Американскиот претседател Доналд Трамп изјави дека САД најверојатно ќе ја преземат контролата врз операциите во Ормускиот теснец и очекува другите земји финансиски да ја надоместат заштитата на овој стратешки важен поморски премин.
Во интервју за „Фокс њуз“, Трамп рече дека американските сили ќе го обезбедуваат теснецот и дека за тоа треба да добијат значителен финансиски надомест.
„Ние ќе го чуваме. Ќе ни биде платено за тоа, и тоа многу пари. Сакаме да ни биде надоместено што ги изложуваме нашите луѓе на опасност“, изјави Трамп.
Тој го обвини Иран дека го прекршил меморандумот за разбирање што, според него, двете земји го постигнале на 18 јуни.
„Имавме договор. Тие секогаш го прекршуваат. Ќе ги погодиме многу силно. Веројатно ќе управуваме со теснецот“, рече Трамп, додавајќи дека САД ќе бидат „ангел чувар“ на Ормускиот теснец.
Неговите изјави следуваат по новата ескалација на судирите меѓу американските и иранските сили. Во текот на викендот и денеска, Иран со ракети и беспилотни летала нападна американски воени објекти во повеќе земји од Персискиот Залив, додека американската војска изврши напади врз ирански системи за противвоздушна одбрана, крајбрежни радари, ракетни и беспилотни капацитети, како и помали пловни објекти.
Иран во саботата повторно објави дека го затворил Ормускиот теснец поради, како што тврди, неовластено минување на едно пловило и соопшти дека плодбата ќе остане запрена сè додека не се воспостават „стабилност и мир“.
Иранската Револуционерна гарда порача дека редовната плодба може да биде обновена само доколку престанат американските воени активности во теснецот, предупредувајќи дека продолжувањето на таквите операции може да предизвика дополнителни потреси на светскиот пазар на нафта и природен гас.
Од друга страна, САД тврдат дека Иран нема контрола врз Ормускиот теснец и дека американските сили се распоредени со цел да обезбедат слободна плодба. Според податоците од системите за следење на бродови, сообраќајот низ теснецот во последните денови е значително намален.
Ормускиот теснец е еден од најважните светски поморски премини, низ кој пред почетокот на конфликтот поминувала околу една петтина од глобалните испораки на нафта и течен природен гас. Секое нарушување на плодбата низ овој теснец директно влијае врз цените на енергенсите и ја зголемува загриженоста од нов раст на глобалната инфлација.
