Американскиот претседател Доналд Трамп на својата социјална мрежа сподели напис посветен на неговото возможно влијание врз политичката иднина на израелскиот премиер Бенјамин Нетанјаху, во време кога односите меѓу Вашингтон и Тел Авив се соочуваат со нови предизвици.
Во написот, насловен „Трамп ги држи картите во неизвесната изборна иднина на Нетанјаху“, се пренесува изјава на американскиот претседател во која тој вели дека најпрво ќе ги разгледа сите кандидати што би можеле да се појават на идните избори во Израел.
„Ќе треба да видам кој ќе се кандидира“, изјавил Трамп за израелските медиуми, додавајќи дека „најверојатно“ би го поддржал Нетанјаху, но дека ќе ги разгледа и можните противкандидати, меѓу кои Нафтали Бенет и Гади Ајзенкот.
Објавата доаѓа по серија јавни критики што Трамп неодамна ги упати кон израелскиот премиер поради воените активности во Либан. Американскиот претседател претходно оцени дека пристапот на Тел Авив е „предолг“ и изрази незадоволство од бомбардирањето на Бејрут непосредно пред потпишувањето на мировниот меморандум со Иран.
Трамп претходно изјави дека Вашингтон мора „малку да го вразуми“ израелскиот лидер и го повика на повнимателен пристап во Либан.
Според „Волстрит Журнал“, односите меѓу двајцата лидери дополнително се влошиле во период кога Белата куќа настојува да обезбеди дипломатско решение за конфликтот со Иран.
Весникот, повикувајќи се на висок претставник на американската администрација, наведува дека во разговорите меѓу двајцата лидери Нетанјаху често барал поинтензивни воени активности, што со текот на времето предизвикало незадоволство кај Трамп.
Според истиот извор, американскиот претседател во еден разговор побарал од Нетанјаху да „престане да урива згради“, а наводно го потсетил и дека без американската поддршка би се соочил со сериозни политички последици, алудирајќи на актуелните судски постапки против израелскиот премиер.
