Утре се очекуваат нови цени на горивата, дизелот би можел да поскапи до 2,5 денари

Премиерот Христијан Мицкоски очекува утре Регулаторната комисија за енергетика да донесе одлука за зголемување на цените на горивата, откако во текот на изминатата седмица беше забележан раст на цената на нафтата на светските берзи.

— реклама —

Одговарајќи на новинарско прашање, Мицкоски рече дека според владините пресметки, дизелот би можел да поскапи за околу 2 до 2,5 денари по литар, додека бензините за околу еден денар.

— реклама —

— реклама —

„Врз основа на нашите калкулации, имаме зголемување во текот на минатата седмица, се извинувам, на нафтата на светските берзи, отприлика 5-6%, и благо зголемување на бензините за 2-3%. Очекувам да имаме зголемување околу 2-2,5 денари по литар за дизел горивото и околу 1 денар за бензините, но сепак да почекаме утре Регулаторната комисија да ги каже последните бројки, со што повторно остануваме, и покрај тоа што станува збор за бензински производ, убедливо држава со најниски цени на дизел горивата и на бензините.“

Конечната одлука за новите малопродажни цени на горивата треба да ја донесе Регулаторната комисија за енергетика во текот на утрешниот ден, по што цените ќе стапат во сила согласно нејзината одлука.