Разорните шумски пожари и натаму беснеат во повеќе европски земји, оставајќи зад себе уништени домови, опожарени шуми и илјадници евакуирани жители и туристи. Најтешка е состојбата во Грција, Франција и Турција, каде што високите температури и силниот ветер дополнително ја отежнуваат борбата со огнената стихија.
Во Франција, пожарникарите и понатаму се борат со пожарите во департманите Жиронда, Вар и Кот д’Ор, додека голем дел од источниот дел на земјата останува под портокалово предупредување поради екстремен топлотен бран. Француските власти соопштија дека две лица се уапсени под сомнение дека намерно предизвикале пожари.
Во Грција, ситуацијата останува драматична, особено на островот Крит, каде што во гаснењето на пожарите загинаа двајца пожарникари, откако нивното возило било зафатено од пламените јазици. Дополнително, уште еден пожарникар починал на Пелопонез, додека двајца доброволци се здобиле со полесни повреди.
Од јужниот дел на Крит биле евакуирани околу 2.000 туристи, а 29 лица биле извлечени од плажите по морски пат. Во Ираклион е отворена спортска сала каде што за евакуираните се обезбедени душеци за спиење и основна медицинска помош.
Пожарникарите цела ноќ се бореле со огнот на повеќе фронтови, а најкритична е состојбата во регионот Ретимно, каде што огнената линија достигнува околу 20 километри. Во голем дел од Грција и денеска е на сила предупредување за многу висок ризик од пожари.
Сериозна е состојбата и во Турција, каде што пожарите зафатија повеќе провинции, меѓу кои Анталија, Мугла, Бурса, Маниса, Аланија и Чанаккале. Во гаснењето учествуваат повеќе од 3.500 припадници на службите за итни интервенции, со поддршка од десетици авиони, хеликоптери и над илјада копнени возила.
Во провинцијата Мугла, од безбедносни причини се евакуирани повеќе од 700 жители, како и 45 пациенти од локална болница. Според локалните власти, пожарите оштетиле 55 објекти, а дел од нив се целосно уништени.
Надлежните во сите три земји предупредуваат дека високите температури, сувата вегетација и силниот ветер и понатаму создаваат услови за брзо ширење на пожарите, поради што противпожарните служби остануваат во состојба на максимална подготвеност.
