(Видео) Мицкоски по пораките од Кошта: Нема цена што ќе нѐ натера да влеземе во авантура без гаранции

Премиерот Христијан Мицкоски изјави дека ставот на Владата останува непроменет и покрај пораките од претседателот на Европскиот совет, Антонио Кошта, дека уставните измени остануваат услов за продолжување на евроинтегративниот процес.

Мицкоски рече дека Македонија нема да влезе во процес чиј крај е неизвесен и нагласи дека нема цена што би го натерала да прифати таков пристап.

— реклама —

„Нашиот став е јасен и непроменет. Еве да го повторам, нема цена со која ќе нѐ натераат да влеземе во авантура без да знаеме дека таа авантура ќе има извесен крај. Не постои цена што може мене како претседател на Владата да ме натера да влезам во таква авантура во која нема да има извесен крај“, изјави Мицкоски.

Тој оцени дека Македонија и понатаму се наоѓа на истото место како и пред 26 години, а според информациите што ги добил по неодамнешните разговори меѓу министрите за надворешни работи, смета дека во односите со Бугарија се реализираат и други барања кои не биле дел од првичните услови.

— реклама —

„Не само што ова не е единствениот услов за да влеземе во процесот и да го изодиме до крај, туку напротив, таму драматично се реализира сето тоа“, рече премиерот.

Мицкоски ја обвини опозицијата дека работи против позициите на државата кога станува збор за, како што кажа, одбрана на македонските национални интереси и идентитет.

— реклама —

„Имаме факти, имаме аргументи и ќе работиме. Ова не е спринт, ова е маратон. Потребна е стратегија, план и визија. Ова се победува со ум, а не со брзање и под притисок“, изјави тој.

Премиерот упати повик до македонската јавност да се обедини околу политиките на Владата во однос на евроинтеграциите и спорот со Бугарија.

„Колку повеќе сме заедно и обединети, толку повеќе сме силни и дома и надвор“, порача Мицкоски.