Загриженост кај туристите по нападот на чакал: Грција повеќе од 12 години без регистриран случај на беснило

По нападот на чакал врз мало дете од Србија во камп во близина на Неос Мармарас, меѓу туристите се појави загриженост за можноста од беснило. Сепак, податоците за Грција покажуваат дека земјата има статус на слободна од оваа заразна болест.

Инцидентот се случил во текот на ноќта, кога чакал влегол во кампот, а потоа и во шаторот во кој се наоѓало српско семејство со мало дете. Животното го каснало детето во пределот на лицето, по што тоа било пренесено во болница, каде што раната била санирана и сошиена.

— реклама —

Ловечката федерација на Македонија и Тракија потврдила дека детето било повредено и дека се наоѓа во добра состојба на лекување во државната болница во Солун. За случајот била известена и Шумската управа во Полигирос, а потрагата по животното продолжува.

Дополнителна загриженост предизвикува тоа што само два дена претходно, на плажа во поширокото подрачје на Неос Мармарас, диво животно нападнало и 55-годишен маж, при што го повредило во пределот на вратот.

— реклама —

Според податоците на Европската агенција за безбедност на храната (EFSA), во Грција од мај 2014 година не е регистриран ниту еден случај на беснило кај животни. Земјата официјално има статус на членка на ЕУ, слободна од инфекција со вирусот на беснило (RABV).

— реклама —

Сепак, по каснување или гребење од диво животно, како и при контакт на плунка со оштетена кожа, се препорачува веднаш да се побара медицински совет.

Чакалите вообичаено се плашливи животни и избегнуваат контакт со луѓе, поради што нивното приближување до камп и влегување во шатор се смета за невообичаено однесување.

На туристите им се советува да не им се приближуваат на дивите животни, да не ги хранат и да не се обидуваат да ги фатат или избркаат. Особено внимание е потребно во вечерните и ноќните часови, а храната и отпадоците не треба да се оставаат надвор од шаторите или сместувачките објекти.

Секое невообичаено приближување на диво животно до луѓе треба да се пријави кај персоналот на кампот или кај надлежните служби.