Осум часовна блокада пред влезот на „Усје“: активисти ќе прават „Блокада фест“ идниот петок

Граѓанската иницијатива „Стоп за Усје“ најави осумчасовна блокада пред влезот на Титан Усје на 27 февруари, под слоганот „Блокада фест“, со почеток во 15 и завршување во 23 часот.Од иницијативата порачуваат дека настанот нема да биде само блокада, туку, како што наведуваат, „гласен, жив и солидарен отпор“. Тие најавуваат и дополнителна програма и учество на изведувачи, чии имиња ќе бидат соопштени во наредниот период.Активистите повторно ги истакнуваат своите барања за дислокација на цементарницата, како и поставување мерни станици чии податоци ќе бидат јавно достапни и следливи во реално време. Според нив, граѓаните имаат право на целосна транспарентност во однос на квалитетот на воздухот и влијанието на индустриските капацитети.Од друга страна, од „Титан Усје“, повикувајќи се на независни студии и хемиски анализи, тврдат дека индустријата има значително помало влијание врз загадувањето на воздухот во споредба со загревањето на домовите, сообраќајот, градежните активности и палењето на отворено. Компанијата бара еднаков третман за сите субјекти и оценување на нејзината работа врз основа на стручни параметри и законски прописи, а не, како што наведуваат, врз лични и паушални ставови.

Скопје | пред 3 седмици

Нема фотографија

Поддршката за Трамп на 39 отсто, мнозинството смета дека ги пречекорил овластувањата

Непосредно пред обраќањето до нацијата на претседателот на САД, Доналд Трамп, новата анкета што ја спроведоа „Вашингтон пост“, „Еј-би-си њуз“ и „Ипсос“ покажува дека мнозинството Американци не го одобруваат неговото работење и сметаат дека ги пречекорил овластувањата на функцијата.Според резултатите, 39 отсто од испитаниците го поддржуваат Трамп, додека 60 отсто не го поддржуваат, при што 47 отсто изразуваат силно неодобрување. Кај регистрираните гласачи поддршката изнесува 41 отсто, а противењето 58 отсто. Негативните оценки се прошируваат и на конкретни области, како економијата, царините, инфлацијата и надворешната политика. Најслаби резултати бележи во справувањето со инфлацијата, каде само 32 отсто ги одобруваат неговите потези.Кога станува збор за целокупното управување со економијата, 41 отсто од анкетираните изразуваат поддршка. Иако разликата меѓу позитивните и негативните оценки се намалила во споредба со октомври, расположението останува претежно критичко. Речиси две третини од испитаниците, односно 65 отсто, сметаат дека Трамп ги пречекорил своите овластувања, што претставува пораст во однос на почетокот на мандатот.Мнозинство од 56 отсто не веруваат дека е посветен на заштитата на правата и слободите на граѓаните, а 62 отсто сметаат дека ја користи функцијата за лично збогатување. Дополнително, 56 отсто оценуваат дека администрацијата не била транспарентна во објавувањето на владините документи поврзани со истрагата за Џефри Епстајн.Анкетата покажува дека Американците се поделени околу прашањето за имиграцијата. Тесно мнозинство од 50 наспроти 48 отсто го поддржува повикот за депортација на милиони имигранти без документи, но 58 отсто сметаат дека Трамп оди предалеку во спроведувањето на таквите мерки. Околу 60 отсто се противат на тактиките што ги применува имиграциската служба.Во однос на економската состојба, 48 отсто од испитаниците сметаат дека економијата се влошила откако Трамп ја презел функцијата, додека 29 отсто оценуваат дека се подобрила. Само 22 отсто велат дека лично се во подобра финансиска состојба, 33 отсто дека им е полошо, а 44 отсто не гледаат промена.Царинската политика останува непопуларна – 34 отсто ја одобруваат, а 64 отсто не. Дополнително, Врховен суд на САД неодамна ги укина царините, оценувајќи дека претседателот ги наметнал надвор од своите овластувања.Поддршката кај републиканците и натаму е висока, но се забележуваат пукнатини – 48 отсто од нив сега силно го одобруваат неговото работење, што е пад во однос на минатата година. Истовремено, 70 отсто од анкетираните сметаат дека не е искрен и доверлив, а 56 отсто оценуваат дека му недостасува ментална подготвеност за ефикасно извршување на функцијата.Резултатите ја отсликуваат длабоката поларизација во американското општество во пресрет на нови политички одлуки и можни надворешнополитички потези на администрацијата.

Свет | пред 3 седмици

Поради силен ветер, жичницата на Водно денеска не сообраќа

Жичницата на Водно денеска нема да продолжи со работа поради силен ветер, информираат од Јавното сообраќајно претпријатие Скопје.Според соопштението, јачината на ветерот ги надминува дозволените граници за објектот да функционира непречено и безбедно, поради што е донесена одлука за привремен прекин на превозот на патници.Надлежните служби ја следат состојбата на терен и веднаш штом се создадат услови за безбедно функционирање, жичницата ќе продолжи со редовен превоз.Од ЈСП апелираат до граѓаните за разбирање и почитување на мерките, со цел да се гарантира безбедноста на сите корисници.

Скопје | пред 3 седмици

(Видео) Вознемирувачка сцена на планината Јахорина, дете спасено откако висело од седиште на жичара

Вистинска драма се одвивала денеска на планината Јахорина, кога дете висело од жичара и во последен момент било спасено со брза реакција на присутните.Според информациите објавени од регионални медиуми, на местото на настанот настанала паника кога било забележано дека детето виси од седиштето на жичарата. На видеоснимка што се појави во јавноста се гледа како две лица го придржуваат детето додека висело, а останатите присутни притрчуваат за да помогнат безбедно да биде спуштено на земја.Благодарение на навремената реакција, детето било успешно приземјено. Засега нема официјални информации дали претрпело повреди.Овој настан доаѓа само неколку дена по друг сериозен инцидент на истата планина, кога дете падна од жичара. Тогаш беше потврдено дека детето се здобило со повреда на ногата и било пренесено во болница, каде било задржано на лекување.Очевидци кои присуствувале на претходниот инцидент сведочеа дека сè се случило во рок од една минута. Според нив, мајката го држела детето, но тоа се лизнало и паднало. Во моментот сите биле на скии и немало време за дополнителна реакција.

Свет | пред 3 седмици

18-годишник ноќеска пред полноќ со „мерцедес“ сакал да прегази деца во Карпош: пријавени се и други инциденти

Повеќе инциденти биле пријавени во текот на вчерашниот ден на подрачјето на Карпош во Скопје, при што две лица се лишени од слобода, а за неколку случаи се преземаат мерки за целосно расчистување.Од Министерството за внатрешни работи информираат дека на 21 февруари 2026 година, во 23.15 часот, полициски службеници од Единицата за интервентна полиција при СВР Скопје го лишиле од слобода И.С. (18) од Скопје. Тој бил приведен по претходна пријава дека, откако двајца малолетници физички нападнале 13-годишник, со патничко возило „мерцедес“ се обидел да го удри. За настанот е известен јавен обвинител и се преземаат мерки за целосно расчистување, по што ќе следува соодветен поднесок.Претходно, во 22.20 часот, во трговски центар на подрачјето на Карпош, полициски службеници од СВР Скопје го лишиле од слобода М.Н. (20) од Скопје, затоа што физички нападнал лице вработено како обезбедување, откако претходно се обидел да украде производ од продажен објект. По целосно документирање на случајот ќе следува соодветен поднесок.Во 22.30 часот, 32-годишна жена пријавила дека во Градскиот парк во Скопје била физички нападната од нејзиниот партнер А.Д. (31). Полицијата презема мерки за расчистување на случајот.Истовремено, во 11.30 часот, Б.Ј. (46) пријавила дека на подрачјето на Карпош била физички нападната од Б.П. (44). И за овој настан се преземаат мерки за целосно расчистување.

Скопје | пред 3 седмици

Акција во Скопје: три лица се уапсени, најмладиот е 18 години

Три лица биле лишени од слобода во текот на изминатото деноноќие на повеќе локации во Скопје, откако кај нив биле пронајдени и одземени наркотични супстанци.Од Министерството за внатрешни работи информираат дека на 21 и 22 февруари 2026 година, полициски службеници од СВР Скопје ги привеле А.Б. (39), Г.С. (40) и Д.Б. (18), сите од Скопје, поради тоа што кај нив биле пронајдени прашкаста материја, марихуана и дробилка.По целосно документирање на случаите, против нив ќе бидат поднесени соодветни поднесоци.

Скопје | пред 3 седмици

Се ловеше дрога: Во Кичево уапсени две лица откако им влегле во казино и ги фатиле со прашкаста материја

Полициски службеници од ОВР Кичево рано утринава извршиле интервенција во казино на улицата „Тане Цалески“ во Кичево, каде биле пронајдени и одземени две најлонски опаковки со остатоци од бела прашкаста материја.Од Министерството за внатрешни работи информираат дека на 22 февруари 2026 година, во 02.40 часот, во врска со настанот од слобода биле лишени Р.Ч. (23) од кичевското село Црвевци и Б.Р. (21) од селото Грешница, додека на разговор биле повикани Ш.Ф. (29) и А.А. (29) од селото Гарани. По целосно документирање на случајот ќе биде поднесена соодветна пријава.Во одделен случај, СВР Тетово поднесе кривична пријава против Х.Ш. (25) од Тетово поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурзори“. Во текот на 2025 година во Тетово, полициски службеници забележале патничко возило „БМВ“ во кое две лица вршеле купопродажба на марихуана. По извршен преглед кај едното лице била пронајдена марихуана, за која било утврдено дека претходно ја набавило од пријавениот.Кривична пријава поднесе и Надворешната канцеларија за криминалистички работи Гостивар против В.А. (51) и Ф.Т. (56), двајцата од селото Неготино, гостиварско, поради сомнение за истото кривично дело. На 13 мај 2025 година во Гостивар, полициски службеници од Одделението за недозволена трговија со дрога и оружје запреле патничко возило во кое се наоѓале пријавените, при што при преглед на возилото бил пронајден и одземен кокаин.

Македонија | пред 3 седмици

Приведен скопјанец откако со метална монета погодил малолетник на кошаркарски натпревар во Куманово - детето со повреди

Дваесет и тригодишен жител на Скопје бил лишен од слобода по инцидент што се случил за време на кошаркарски натпревар во спортска сала во Куманово.Од Министерството за внатрешни работи информираат дека на 21 февруари 2026 година, во 19.40 часот, полициски службеници од СВР Куманово го привеле Б.Б. (23) од Скопје, откако на натпреварот погодил малолетно дете со метална монета, при што му нанел повреди.Б.Б. бил задржан во полициска станица, а по целосно документирање на случајот против него ќе биде поднесена соодветна пријава.

Македонија | пред 3 седмици

Тепачки во Кисела Вода и во Центар пред ресторан

Две одделни физички пресметки биле пријавени во текот на изминатото деноноќие на подрачјето на Скопје, информираат од Министерството за внатрешни работи.На 22 февруари 2026 година, во 01.00 часот, во СВР Скопје било пријавено дека пред угостителски објект на подрачјето на Центар бил нарушен јавниот ред и мир со физичка пресметка помеѓу В.В. (25) и С.Ќ. (23), двајцата од Скопје. По целосно документирање на случајот ќе следува соодветен поднесок.Претходно, на 21 февруари 2026 година, во 17.20 часот, во СВР Скопје, Г.В. (40) пријавил дека околу 12.00 часот на подрачјето на Кисела Вода бил физички нападнат од М.И. (33), двајцата од Скопје. И за овој случај, по целосно документирање, ќе следува соодветен поднесок.

Скопје | пред 3 седмици

Приведен возач кај рампата „Маџари“, нападнал полицаец и имал 1,64 промили алкохол

Дваесет и осумгодишен жител на селото Јурумлери бил лишен од слобода откако физички нападнал полициски службеник при вршење службени дејствија во Скопје.Од Министерството за внатрешни работи информираат дека на 22 февруари 2026 година, во 01.20 часот, во близина на рампата „Маџари“, полициски службеници од Мобилната единица за безбедност на сообраќајот на патиштата го привеле Т.Б. (28) од Јурумлери, скопско. Тој претходно бил запрен со патничко возило, по што физички нападнал полициски службеник кој извршувал службено дејствие и му упатувал закани.По извршеното алкотестирање било утврдено дека има 1,64 промили алкохол во крвта.По целосно документирање на случајот, против него ќе биде поднесен соодветен поднесок.

Скопје | пред 3 седмици

Пожар во куќа во Кочани, изгоре куќа

Пожар избувнал рано утринава во куќа на улицата „Гоце Делчев“ во Кочани, информираат од Министерството за внатрешни работи.Според информациите, на 22 февруари 2026 година, во 02.35 часот, во СВР Штип било пријавено дека настанал пожар во куќа во која во моментот немало присутни лица.Пожарот бил изгаснат од Територијалната противпожарна единица Кочани, а повредени лица нема.На местото на настанот извршен е увид од увидна екипа на ОВР Кочани.

Македонија | пред 3 седмици

Запалено возило во Аеродром

Пожар на патничко моторно возило бил пријавен рано утринава на подрачјето на Општина Аеродром во Скопје.Од Министерството за внатрешни работи информираат дека на 22 февруари 2026 година, во 04.37 часот, во СВР Скопје било пријавено дека настанал пожар на патничко возило „опел“ со скопски регистарски ознаки, сопственост на Ѓ.А. (48) од Скопје.Пожарот бил изгаснат од страна на Бригадата за противпожарна заштита, а повредени лица нема.За настанот е известен јавен обвинител, а увид на местото извршила екипа на СВР Скопје. Се преземаат мерки за расчистување на случајот.

Скопје | пред 3 седмици

Товарно возило усмрти жена во Струга, возачот приведен

Седумдесетгодишна жена од селото Мислодежда почина по сообраќајна несреќа што се случила вчера попладне на улицата „Струшки Кепенци“ во Струга.Од Министерството за внатрешни работи информираат дека на 21 февруари 2026 година, околу 16.30 часот, во ОВР Струга било пријавено дека товарно возило „Ивеко“ со струшки регистарски ознаки, управувано од Н.О. (57) од Струга, удрило во И.И. (70) од село Мислодежда, струшко.По несреќата, повредената била пренесена во Медицинскиот центар Струга за укажување лекарска помош, каде подоцна им подлегнала на повредите.На местото на настанот извршен е увид од увидна екипа на ОВР Струга. Во 21.40 часот полициски службеници го лишиле од слобода возачот Н.О., а по целосно документирање на случајот ќе следува соодветен поднесок.

Македонија | пред 3 седмици

„Емшири“ во Велгошти е жив сведок на традицијата и заедништвото

Традицијата не е само спомен од минатото, туку жив дух што се негува и се пренесува од генерација на генерација, порача претседателот на Советот на Општина Охрид, Перчо Божиновски, по повод одбележувањето на Велики Поклади – Прочка.Тој истакна дека маскенбалот „Емшири“ во Велгошти претставува симбол на заедништво, духовно прочистување и почит кон вековните обичаи поврзани со овој голем христијански празник. Според него, Прочка е ден кога луѓето си простуваат и ги отвораат срцата за помирување, љубов и нов почеток.Божиновски нагласи дека ваквите манифестации имаат посебно значење, бидејќи го одржуваат живиот дух на традицијата и ги потсетуваат граѓаните на вредностите што ја обликуваат заедницата. Тој повика духот на Прочка да биде потсетник дека најголемата сила лежи во човечноста и во способноста искрено да се изговори „Прости ми“ и „Простено ти е“.

Охрид | пред 3 седмици

Политичарите на Прочка - кој бара прошка, кој простува, а кој не простува: Доста ми е од лицемерие и користољубие

Православните верници денеска ја одбележуваат Прочка – Велики поклади, ден на меѓусебно простување пред почетокот на Велигденскиот пост. Празникот традиционално е поврзан со зборовите „прости ми“ и „простено ти е“, но годинава политичарите му дадоа и личен и политички тон.Пратеникот од СДСМ и поранешен министер за внатрешни работи Оливер Спасовски порача: „Денес е Прочка, небото и простува на земјата, човекот му простува на човекот. Простено нека е!“Претседателката на „Глас за Македонија“, Солза Грчева, објави поинаков став. Таа напиша дека на одредени луѓе нема да им прости, наведувајќи дека не ѝ дале поддршка во период кога одела на тешка операција. „Доста ми е од лицемерие и користољубие“, напиша Грчева, додавајќи дека на останатите им посакува здравје и среќа.Градоначалникот на Гази Баба, Бобан Стефковски, побара прошка од граѓаните: „Од срце барам прошка, ако со збор или дело сум Ви погрешил. Човечки е да се згреши, но христијански е да се прости.“Директорката на Управата за јавни приходи, Елена Петрова, во својата објава истакна дека проштевањето е знак на духовна зрелост и сила, а не слабост, нагласувајќи дека општеството станува посилно кога луѓето се подготвени да се слушнат и разберат.Претседателот на СДСМ, Венко Филипче, порача дека големината на човекот е во простувањето и дека солидарноста и меѓусебното почитување се темел на зрело и праведно општество.Градоначалникот на Прилеп, Дејан Проданоски, повика на искрено преиспитување и смирение, додека пратеникот од ВМРО-ДПМНЕ, Бране Петрушевски, истакна дека простувањето е темел на верата и повика на повеќе почит и сплотеност.Слична порака упати и градоначалникот на Кичево, Александар Јовановски, кој ги повика сограѓаните да простуваат „без гордост и без пресметки“.Додека дел од политичарите избраа универзални пораки за помирување и духовна чистота, други го искористија денот за лична исповед или јавно дистанцирање. Прочка, барем на социјалните мрежи, повторно стана огледало и на личните и на политичките позиции.

Македонија | пред 3 седмици

Тензија во ЕУ поради транзитот на нафта кон Унгарија и Словачка: Сијарто се закани со блокада ако Киев не го обнови транзитот

Унгарскиот министер за надворешни работи Петер Сијарто го засили притисокот врз Украина поради транзитот на нафта кон Унгарија и Словачка преку нафтоводот „Дружба“, заканувајќи се со блокада на одлуки важни за Киев во рамки на Европската Унија.Во две објави на платформата „Икс“, Сијарто порача дека решението е „едноставно“ и дека Украина треба да ги обнови испораките.„Едноставно и лесно е. Наместо да се мешате во нашите избори, повторно покренете ги испораките на нафта кон Унгарија и Словачка. И едните и другите знаеме дека нема техничка пречка“, напиша Сијарто.Во втората објава тој најави дека Унгарија ќе го блокира усвојувањето на 20-тиот пакет санкции против Русија на Советот за надворешни работи на ЕУ.„Додека Украина не го обнови транзитот на нафта кон Унгарија и Словачка преку ‘Дружба’, нема да дозволиме одлуки важни за Киев да одат понатаму“, порача Сијарто.Реакцијата доаѓа откако украинското Министерство за надворешни работи соопшти дека не прифаќа ултиматуми и дека работи на стабилизација на енергетскиот систем под постојани руски напади. Киев тврди дека на Будимпешта и Братислава им предложил алтернативни начини за снабдување со нафта што не е од руско потекло.Новата ескалација околу транзитот на нафта дополнително ги усложнува односите во ЕУ во момент кога Унијата разгледува нови санкции кон Москва и продолжување на поддршката за Украина.

Свет | пред 3 седмици

Врховниот лидер ја пренасочува моќта: Иран се подготвува за војна и наследување

Соочен со масовни протести и закани од американска воена интервенција, врховниот лидер на Иран Али Хаменеј управувањето со државата му го доверил на својот долгогодишен соработник Али Лариџани, кој во изминатите месеци значително го проширил своето влијание.Лариџани, 67-годишен политички ветеран, поранешен командант на Револуционерната гарда и актуелен челник на Врховниот совет за национална безбедност, ефективно ја координира безбедносната и надворешната политика на земјата. Неговиот подем, според ирански извори, довел до маргинализација на претседателот Масуд Пезешкијан, кој во јавноста и натаму се претставува како „лекар, а не политичар“.Според повеќе високи ирански функционери, Лариџани бил задолжен за справување со неодамнешните протести, а сега ги координира односите со Русија и регионалните актери како Катар и Оман, како и нуклеарните преговори со Вашингтон. Паралелно, се подготвуваат планови за управување со државата во случај на војна со САД.Извори блиски до власта наведуваат дека Хаменеј издал директиви за создавање повеќеслоен систем на наследување, со именување заменици на клучните позиции и пренесување дел од овластувањата на тесен круг доверливи соработници, во случај комуникацијата со него да биде прекината или да биде убиен.Во најтесниот круг околу врховниот лидер, покрај Лариџани, се и високи воени и политички функционери, меѓу кои и актуелниот претседател на парламентот и поранешни команданти на Револуционерната гарда.Иран, според тврдењата на повеќе извори, ги ставил вооружените сили во највисока состојба на готовност. Поставени се ракетни системи долж западната граница со Ирак и долж јужниот брег во Персискиот Залив, а во последните недели биле спроведени тестирања на ракети и воени вежби, вклучително и краткотрајно затворање на Ормускиот Теснец.Покрај воените подготовки, се разгледуваат и политички сценарија за опстанок на режимот во случај на елиминација на врвното раководство. Според дел од изворите, Лариџани се споменува како потенцијална клучна фигура во такво сценарио, заедно со други високи функционери.Аналитичари оценуваат дека Хаменеј се обидува да го заштити системот што го градел со децении, распределувајќи ја моќта и подготвувајќи ја државата за можен воен судир и сложен процес на наследување.Во меѓувреме, иако дипломатските контакти со САД продолжуваат, иранското раководство, според изворите, смета дека воената ескалација останува реална можност.

Свет | пред 3 седмици

ВМРО-ДПМНЕ: Предлогот за Адамовиќ е од амбасадорот именуван од СДС

ВМРО-ДПМНЕ реагираше на прес-конференцијата на СДСМ во врска со назначувањето на Душан Адамовиќ за почесен конзул на Република Северна Македонија во Србија, тврдејќи дека предлогот потекнува од амбасадорот во Белград.Од партијата наведуваат дека амбасадорот на Македонија во Србија, кој го предложил Адамовиќ, бил именуван уште во времето на владата на СДСМ и ДУИ.„Предлогот за конзул на Душан Адамовиќ доаѓа од амбасадорот на Македонија во Белград именуван уште од времето на владата на СДС и ДУИ“, соопштија од ВМРО-ДПМНЕ.Од партијата порачаа дека СДСМ треба да разбере дека е опозиција во Македонија и дека не сакаат да се вклучуваат во, како што наведуваат, дневно-политички настани во соседна Србија.Во реакцијата се истакнува и дека споменатото лице ги исполнува сите критериуми потребни за негово поставување за почесен конзул.Од СДСМ претходно отворија прашања околу изборот на Адамовиќ и побараа одговори од Владата.

Македонија | пред 3 седмици

Осум пијани возачи исклучени од сообраќај, едно лице приведено за безобѕирно возење, малолетник од Тетово удрил во електричен ормар

Мобилната единица за безбедност на сообраќајот при Секторот за сообраќајни работи спроведе акциска контрола на подрачјето на СВР Скопје и СВР Куманово во ноќта меѓу 21 и 22 февруари 2026 година, во периодот од 22:00 до 04:00 часот.При контролата биле изречени вкупно 15 мерки за сторени сообраќајни прекршоци. Осум возачи биле санкционирани и исклучени од сообраќај поради управување моторно возило под дејство на алкохол. Едно лице е лишено од слобода за сторени кривични дела „безобѕирно управување со моторно возило“ по член 297-а од Кривичниот законик и „напад врз службено лице при вршење работи на безбедноста“ по член 383.Дополнително, седум возачи биле санкционирани за други сообраќајни прекршоци. За сите сторители се изготвени соодветни поднесоци.Во истиот период, на територијата на целата држава, полициски службеници лишиле од слобода 18 лица. Седум од нив управувале возило без возачка дозвола, седум под дејство на алкохол, две лица управувале возило по истек на важноста на регистрацијата и без возачка дозвола, едно лице било затекнато без возачка дозвола и под дејство на алкохол, а едно лице возело со брзина поголема од дозволената.Меѓу приведените се возачи од Скопје, Велес, Кавадарци и малолетник од Тетово, кој со голема брзина удрил во електричен ормар на ЕВН и се обидел да ги прегази полициските службеници.Возачи од Свети Николе, Кочани, Прилеп, Куманово, Богданци, Охрид и Скопје управувале возило под дејство на алкохол, додека возач од Република Србија бил затекнат како управува со брзина од 203 километри на час на место каде дозволената брзина е 120 километри на час.Возачи од Гостивар и Скопје управувале возила без возачка дозвола и со истечена регистрација, додека возач од Македонски Брод, кој управувал без возачка дозвола, бил и под дејство на алкохол.Лицата се приведени во полициска станица и по целосно документирање на случаите против нив ќе бидат поднесени соодветни пријави.Од МВР информираат дека сообраќајните контроли ќе продолжат и во наредниот период, апелирајќи до граѓаните да ги почитуваат сообраќајните правила и прописи. Управувањето возило под дејство на алкохол и без возачка дозвола, посочуваат од полицијата, претставува сериозна закана за безбедноста на сите учесници во сообраќајот.

Македонија | пред 3 седмици

Данска: На Гренланд не му е потребен болнички брод од САД

Данските власти порачаа дека на Гренланд не му е потребна посебна здравствена поддршка, откако американскиот претседател Доналд Трамп најави дека ќе испрати болнички брод на автономната данска територија.Данскиот министер за одбрана Троелс Лунд Поулсен изјави за државната телевизија DR дека населението на Гренланд ја добива потребната здравствена грижа.„Жителите на Гренланд добиваат здравствена заштита што им е потребна. Ја добиваат на Гренланд, а доколку има потреба од специјализирано лекување, го добиваат во Данска. Нема потреба од посебна здравствена иницијатива“, рече Поулсен, додавајќи дека не е информиран за евентуално испраќање болнички брод.Премиерката Мете Фредериксен порача дека е „среќна што живее во земја каде пристапот до здравство е бесплатен и еднаков за сите“, нагласувајќи дека истиот принцип важи и за Гренланд.Иако Трамп на платформата Truth Social објави дека испраќа „голем болнички брод“ за да се грижи за „многу болни луѓе кои таму не се лекуваат“, податоците покажуваат дека двата американски болнички брода – USNS Mercy и USNS Comfort – се наоѓаат на ремонт во бродоградилиште во Мобил, Алабама, и не се на пат кон Гренланд.Гренланд управува со сопствениот здравствен систем, кој е јавно финансиран и бесплатен за граѓаните, во тесна соработка со Данска. На островот функционираат пет регионални болници, а централната болница во Нуук прима пациенти од целата територија.Објавата на Трамп дојде неколку часа по евакуацијата на член на екипаж од американска подморница во близина на Нуук, кој бил пренесен со хеликоптер на данската одбрана до болница на Гренланд.Прашањето за Гренланд добива и поширока политичка димензија, бидејќи Трамп во изминатиот период повеќепати изјавуваше дека сака САД да го преземат островот, оценувајќи го како стратешки важен за националната безбедност. Данска и властите во Гренланд досега повеќепати порачаа дека територијата не е на продажба и дека иднината ја одлучуваат нејзините жители.

Свет | пред 3 седмици

Адеми од ДУИ: Се толерирал говор на омраза на натпреварот Вардар-Башкими, а специјалци се користеле да се спротистават на клубот

Арбер Адеми од ДУИ реагираше по два, како што ги оцени, сериозни инциденти во македонскиот фудбал, наведувајќи дека тие не се случајни, туку директна последица на неказнивоста и, како што рече, тивкото охрабрување на оние што ги кршат правилата и поттикнуваат омраза.„Кога на натпревар меѓу Вардар и Башкими се толерира отворен говор на омраза и дури се користат специјални единици против претставници на клубот Башкими, додека играта продолжува како ништо да не се случило, пораката е јасна – стандардите не важат еднакво за сите“, изјави Адеми.Тој посочи и на друг натпревар, меѓу Шкендија од Харачина и Преспа, каде, според него, било побарано отстранување на албанското знаме со образложение дека „има наредба од горе“, иако, како што нагласи, законот го регулира користењето на симболите.„Проблемот не е спортски, туку политички“, рече Адеми, додавајќи дека ваквите појави се повторуваат затоа што никој не сноси одговорност.Според него, лицата што постапуваат на ваков начин не само што не се санкционираат, туку, како што тврди, често се унапредуваат, сè додека се во линија со владата предводена од ВМРО-ДПМНЕ.Адеми оцени дека станува збор за прашање на достоинство и еднаквост, а не само за спортско ривалство, повикувајќи ги фудбалските институции да се дистанцираат од, како што рече, политички притисоци и да воспостават еднакви стандарди за сите.

Македонија | пред 3 седмици

Обвинувања за тендери и нереализирани градинки во Аеродром

Советникот во Советот на Општина Аеродром и претседател на ОО СДСМ Аеродром, Милутин Ристески, оцени дека и по 100 дена од вториот последователен мандат на ВМРО-ДПМНЕ во општината, градоначалникот Дејан Митески нема реализирано нови проекти, туку, како што рече, се фали со стари активности.„И по 100 дена од новиот мандат, Митески се фали со објектите на училиштето ‘Блаже Конески’ и градинката ‘Изворче’ во Стар Аеродром, направени со средства обезбедени од Владата на СДСМ во Буџетот за 2024 година“, изјави Ристески.Тој посочи дека ветувањето за изградба на четири градинки било заменето со ново ветување за пет, но дека за четири години и 100 дена ниту една не е започната. Според него, исчезнало и ветувањето за зголемување на еднократната помош за новороденче на 20.000 денари, додека сè уште се применува мерката воведена во претходни мандати.Ристески наведе дека од програмата, како што рече, „мистериозно исчезнале“ и ветените 3.000 нови паркинг-места и велопатеките на секоја улица.Тој алармираше и за, како што оцени, лоша хигиена во општината, посочувајќи дека преполните контејнери создаваат диви депонии. Дополнително, обвини дека општината се соочува со долгови, а училиштата и градинките имаат неплатени сметки за струја, парно и вода.„Четири месеци по изборите не се исплатени ни средствата за членовите на избирачките одбори“, рече Ристески, додавајќи дека се намалени и средствата за еднократна помош за социјално ранливи категории граѓани.Тој обвини и за, како што ги нарече, „пирамидални тендерски шеми“, наведувајќи дека 22 тендери во вредност од 11 милиони евра биле доделени на една иста фирма во период од четири години.Ристески порача дека СДСМ ќе продолжи да го следи работењето на градоначалникот и ќе инсистира на отчетност.Од Општина Аеродром засега нема одговор на изнесените обвинувања.

Скопје | пред 3 седмици

Кузеска: СДСМ е за целосна интеграција во ЕУ, БРИКС не е опција

Портпаролката на СДСМ, Богданка Кузеска, изјави дека партијата останува цврсто определена за целосна интеграција на Северна Македонија во Европската Унија, нагласувајќи дека полноправното членство со сите права, вклучително и правото на глас, е единствената прифатлива опција.„До денес нема официјална одлука на Европската комисија, Европскиот совет или Европскиот парламент која предвидува прием на земја како полноправна членка без гласачки права. Доколку стане официјална позиција на ЕУ, дури тогаш може да се разгледува“, посочи Кузеска.Таа потенцира дека СДСМ е за целосна интеграција во ЕУ и дека, според нив, не постои алтернатива на европскиот пат.Кузеска ја обвини ВМРО-ДПМНЕ и лидерот Христијан Мицкоски дека водат антиевропска кампања, претставувајќи ја Европската Унија како фактор што врши притисок врз државата, наместо, како што рече, да ги признаат обврските и реформите што треба да се спроведат.Според неа, блокирањето на уставните измени и создавањето проблеми со соседите ја држат државата во стагнација.„СДСМ е за Европа, за нас нема друга алтернатива. Ниту БРИКС ниту изолацијата не се опција“, истакна Кузеска.

Македонија | пред 3 седмици

Виткоф по осум средби со Путин: Мора да ги знаеш неговите „црвени линии“, наскоро добри вести за крај на војната

Специјалниот пратеник на американскиот претседател Доналд Трамп и негов близок соработник Стив Виткоф изјави дека рускиот претседател Владимир Путин во нивните разговори за војната во Украина „секогаш бил отворен“.Во интервју за Fox News, Виткоф ги бранеше своите средби со Путин, нагласувајќи дека бил изложен на критики поради тоа што се сретнал со него осум пати.„Никогаш не бил ништо друго освен отворен со мене. Иако поради тоа ме напаѓаат, тоа е точна изјава. Ми кажа кои се неговите црвени линии“, рече Виткоф.Путин, кој кариерата ја започнал како оперативец на советската тајна служба КГБ во осумдесеттите години, вклучително и мандат во Источна Германија, денес е во центарот на дипломатските напори за можен прекин на војната во Украина.Виткоф истакна дека средбите биле неопходни за да се разберат позициите на Москва.„Како ќе постигнете договор ако не знаете од кои позиции тргнува другата страна? Морав да ги разберам неговите мотиви и цели“, рече тој, додавајќи дека овие разговори сега стануваат „многу релевантни“.Тој оцени дека постои различна проценка меѓу САД и Украина за состојбата на терен, алудирајќи на несогласувањата со Киев. Украинскиот претседател Володимир Зеленски по неодамнешните трилатерални разговори во Женева изјави дека гледа напредок во воениот дел од преговорите, но не и во политичкиот.Виткоф не ја исклучи можноста за средба меѓу Зеленски и Путин и најави дека „добри вести“ за крај на војната би можеле да се појават во наредните недели.Во меѓувреме, украинскиот претседател посочи дека нова рунда разговори со Русија и САД би можела да се одржи пред крајот на месецот.

Свет | пред 3 седмици

(Видео) СДСМ прашува: Кој е Душан Адамовиќ и зошто е избран за почесен конзул?

Портпаролката на СДСМ, Богданка Кузеска, отвори прашања во врска со назначувањето на Душан Адамовиќ за почесен конзул на Република Северна Македонија во Република Србија, со седиште во Панчево.Кузеска посочи дека пред околу еден месец српското Министерство за надворешни работи соопштило дека му ја предало егзекватурата на Адамовиќ, со што и официјално стапил на функцијата почесен конзул.„Кој е Душан Адамовиќ и зошто токму тој е избран за почесен конзул?“, праша Кузеска.Таа наведе дека на социјалната платформа „Икс“ може да се најдат стари објави на Адамовиќ во кои, како што рече, се користи формулацијата „српска Македонија“ и се тврди дека била окупирана, што според неа претставува скандал.Кузеска дополнително обвини дека Адамовиќ бил висок функционер на Српската напредна странка, која ја нарече сестринска партија на ВМРО-ДПМНЕ, и дека бил близок до српскиот претседател Александар Вучиќ. Според неа, тој бил член на Извршниот одбор на СНС, координатор за Срем и координатор за Јужен Банат.Портпаролката на СДСМ се повика и на медиумски објави во Србија во кои, како што рече, се споменуваат различни афери поврзани со Адамовиќ, вклучително и наводи за негова поврзаност со трговија со оружје, како и информации за претходни инциденти и апсења.„Сега прашањето е како покрај толку угледни бизнисмени, личност со вакво минато е избрана за почесен конзул?“, изјави Кузеска.Таа го повика премиерот Христијан Мицкоски да одговори дали македонските безбедносни служби ја провериле биографијата на Адамовиќ и дали постои каква било негова врска со Владата.

Македонија | пред 3 седмици