Приведен гостиварец во Тетово, возел и покрај активна забрана

Полициски службеници од СВР Тетово на 1 март 2026 година во 12:25 часот го лишиле од слобода А.С. (47) од Гостивар, откако бил затекнат како управува моторно возило и покрај тоа што имал активна забрана за управување со возило од Б категорија.Како што информира полицијата, при контрола на крстосницата од булеварот „В.С. Бато“ со улицата „Фуштанска“ во Тетово, било сопрено патничко возило „рено“ со гостиварски регистарски ознаки, кое го управувал приведениот. По преземените мерки било утврдено дека тој управувал возило и покрај изречената забрана.Возилото било одземено, а по целосно документирање на случајот против 47-годишникот ќе биде поднесена соодветна пријава.

Македонија | пред 2 седмици

Револуционерната гарда ги предупредува Иранците преку пораки: Протестите ќе се третираат како соработка со непријателот

Иранската Револуционерна гарда ги предупредила граѓаните да не излегуваат на улица на протести, оценувајќи дека секое собирање ќе се смета за соработка со „непријателот“, покажуваат пораки испратени од разузнавачката единица на Корпусот на исламската револуционерна гарда, до кои дојде Би-Би-Си.Според содржината на пораките, евентуалните протести се квалификуваат како „улични немири“ што се „планирани од непријателот“, а се предупредува дека „секое движење што ја нарушува безбедноста се смета за пример на директна соработка со непријателот“. Во посебна текстуална порака, граѓаните биле повикани да пријавуваат „антибезбедносни“ инциденти преку телефонски број што го обезбедува Револуционерната гарда.По смртта на ајатолахот Али Хамнеи, Би-Би-Си верификуваше видеа од повеќе ирански градови на кои се гледаат групи граѓани кои слават на улиците. Паралелно со тоа, ирански медиуми известуваат за собири на ожалостени граѓани во Техеран и други градови, што укажува на длабока поларизација во јавноста.Во меѓувреме, интернетот и натаму е недостапен за поголемиот дел од населението, што значително ја отежнува проверката на информациите и создава нејасна слика за случувањата во земјата. Дел од граѓаните сепак успеваат да се поврзат преку алтернативни методи, вклучително и преку сателитската интернет-услуга „Старлинк“, што овозможува ограничен проток на информации надвор од државната контрола.

Свет | пред 2 седмици

Саудиска Арабија: Огнот во државната рафинерија изгаснат, нема жртви

Министерството за енергетика на Саудиска Арабија соопшти пожарот во рафинеријата Рас Танура е ставен под контрола, откако објектот бил погоден при пресретнување на два дрона во негова непосредна близина.Рафинеријата Рас Танура, со која управува државната нафтена компанија „Сауди Арамко“, претрпела „мала материјална штета од паднати остатоци“, се наведува во соопштението што го пренесе Саудиската новинска агенција. Според властите, огнот бил „веднаш ставен под контрола“ од страна на итните служби, при што нема повредени ниту жртви.Видео-снимки потврдени од Би-Би-Си прикажуваат пожар и густ чад што се издига над рафинеријата, која важи за еден од клучните објекти за преработка на нафта во кралството и има стратешко значење за глобалниот пазар на енергенси.Саудиска Арабија со години е домаќин на американски и западни воени сили, а во саботата владата во Ријад издаде соопштение во кое ги осуди, како што ги нарече, „отворените и кукавички ирански напади“.Според саудиските власти, нападите биле „успешно пресретнати“ и биле насочени кон регионот Ријад и Источната провинција, каде се наоѓа и дел од клучната нафтена инфраструктура на земјата. Тензиите во регионот дополнително се засилија во услови на поширок воен конфликт што ја потресува Блискиот Исток и ги вклучува Соединетите Американски Држави, Иран и нивните регионални сојузници.

Свет | пред 2 седмици

Тишина по „Епски гнев“: Белата куќа без јасна стратегија

Американскиот претседател Доналд Трамп остана невообичаено воздржан по најавата за почеток на големи воени напади врз Иран, наместо да ѝ се обрати на нацијата од Овалната соба, како што тоа традиционално го правеле неговите претходници при објавување на воени интервенции.Сместен во своето луксузно одморалиште Мар-а-Лаго во Флорида, Трамп одлучи почетокот на операцијата да го соопшти преку осумминутно видео објавено на неговата социјална мрежа „Трут Соушл“. Видеото беше објавено во саботата во 2:30 часот по локално време, а следната видео-порака се појави дури во неделата попладне.При враќањето во Вашингтон во неделата, Трамп одби да одговара на прашања од новинарите кои патуваа со него во претседателскиот авион „Ер Форс Уан“, вклучително и на дописници на меѓународни агенции. Не одржа ниту прес-конференција со која би ја образложил одлуката за влегување во нов вооружен конфликт на Блискиот Исток.Целата администрација на Трамп остана подеднакво тивка од почетокот на операцијата „Епски гнев“, што отвори прашања за начинот на спроведување на најголемата американска интервенција во регионот во изминатите две децении. Ниту раководството на Пентагон, ниту Стејт департментот не излегоа со јавни обраќања, а ниту еден член на владата не се појави во традиционалните неделни информативни емисии за да ја брани офанзивата.Оскудните информации што стигнаа до јавноста произлегоа од серија кратки телефонски интервјуа на Трамп со американски медиуми, но тие честопати беа противречни. Во едно интервју тој изјави дека војната би можела да трае четири недели, во друго – пет. Спомена дека постојат тројца кандидати кои би можеле да управуваат со Иран по смртта на врховниот верски водач, за потоа да тврди дека сите најсилни кандидати веќе биле убиени.Белата куќа во еден момент демантираше извештај дека претседателот ќе одржи директно телевизиско обраќање, според моделот на поранешниот претседател Барак Обама, кој во 2011 година од Ситуациската соба ја објави ликвидацијата на Осама бин Ладен.Наместо тоа, Трамп објави фотографии од импровизирана ситуациска просторија во Мар-а-Лаго, на кои заедно со тимот за национална безбедност изгледа уморно, носејќи исти бели бејзбол капи.Иако викендот не играше голф, што инаку е негова честа практика за време на престојот во Флорида, Трамп присуствуваше на две донаторски вечери на Републиканската партија во својот клуб. Сепак, и таму се задржа кусо, без подолги јавни настапи или дополнителни објаснувања за започнатата воена операција.

Свет | пред 2 седмици

Израелски медиуми: Германија блиску до влегување во војна; Германскиот министер: Само ќе се браниме

Израелските медиуми пренесуваат дека Германија сериозно ја разгледува можноста да се придружи на американско-израелската кампања против Иран доколку режимот не престане со нападите врз земјите во регионот. Извори од германската политика и војска го пренеле ова за израелското радио Army Radio.Според тие извори, веќе е во тек планирање на можна воена акција заедно со Соединетите Американски Држави, од учество во бомбардирање до обезбедување воена и воздушна поддршка, што го потврдиле официјални лица од германското министерство за надворешни работи и членови на Комитетот за надворешни работи на Бундестагот.Синоќа, Франција, Германија и Обединетото Кралство во заедничко соопштение ги осудија иранските напади во регионот и предупредија дека се подготвени да ги заштитат своите интереси и интересите на сојузниците во Персискиот Залив, доколку е потребно, со преземање „одбранбени мерки“ против Иран.Германскиот министер за надворешни работи, Јохан Вадефул, изјави дека американско-израелската војна против Иран може да влијае и врз Германија и Европа и дека Иран претставува значајна закана за Германија и Европа. „Германските војници се подготвени за одбранбени мерки, но ништо надвор од тоа не е планирано“, додаде Вадефул.

Свет | пред 2 седмици

Иран: Погоден е нашиот нуклеарен полигон

Иранскиот нуклеарен полигон во Натанз бил погоден за време на американските и израелските воени операции, изјави денеска иранскиот амбасадор при Меѓународната агенција за атомска енергија.„Вчера повторно беа нападнати ирански мирољубиви и заштитени нуклеарни постројки“, изјави Реза Наџафи пред новинарите на состанокот на Управниот одбор на Меѓународната агенција за атомска енергија (ИАЕА).На прашање кои објекти биле погодени, тој одговори: „Натанз“.САД и Израел во јуни извршија напади врз ирански нуклеарни постројки, во рамки на ескалацијата на тензиите со Техеран. Вашингтон бара Иран да се откаже од збогатување ураниум на своја територија, оценувајќи дека таа активност може да биде чекор кон развој на нуклеарно оружје.International Atomic Energy Agency со месеци бара од Техеран да појасни што се случило со залихите од околу 440 килограми збогатен ураниум по израелско-американските напади во јуни, како и да овозможи целосно продолжување на инспекциите.Агенцијата инсистира на непречен пристап до трите клучни постројки што беа бомбардирани минатата година – Натанз, Фордо и Исфахан – со цел да се утврди обемот на штетите и статусот на нуклеарниот материјал.Техеран тврди дека неговата нуклеарна програма има исклучиво мирољубива намена, додека западните земји предупредуваат дека нивото на збогатување ураниум ги надминува цивилните потреби и ја продлабочува меѓународната загриженост.

Свет | пред 2 седмици

Експлозии во британската воздухопловна база Акротири на Кипар

Неколку експлозии одекнале во воздухопловната база на Кралските воздухопловни сили на Обединетото Кралство на Кипар.Силни детонации биле слушнати во британската база Акротири кај Лимасол околу полноќ по локално време, откако наводно била прогласена „безбедносна закана“, пренесува Дејли мејл.Засега не е познато дали експлозиите се директно поврзани со настаните околу Иран, но тие следуваат откако британскиот премиер Кир Стармер ѝ даде дозвола на Соединетите Американски Држави да користат британски бази за „одбранбени“ удари врз ирански ракетни позиции.Според медиумските извештаи, непосредно пред полноќ во британските бази на Кипар била прогласена безбедносна закана, а персоналот бил предупреден да се врати во своите домови и да остане внатре до понатамошно известување.На вработените им било наложено да се оддалечат од прозорците и да се засолнат зад или под масивен мебел, додека не добијат дополнителни инструкции, објави Сајпрус мејл.Обединетото Кралство официјално не учествуваше во нападите врз Иран во кои загина ајатолахот Али Хамнеи. Сепак, во неделата британски борбени авиони соборија ирански дрон кој бил насочен кон Катар, во рамки на одбранбени операции во регионот.

Свет | пред 2 седмици

(Видео) Протест во Ниш: „Пумпањето“ продолжува до распишување избори

Студенти и граѓани денеска во Ниш порачаа дека нема да се откажат од борбата за „праведна и подобра Србија“ и дека ќе „пумпаат“ сè до распишување избори. Протестот под мотото „Државата тоа сме ние“ започна во 16 часот со собирање пред Апелациониот суд и кај кружниот тек кај трговскиот центар „Делта планет“, по што следуваше марш до централниот градски плоштад, пишува Бета.рс.Студентот Илија Тасиќ од Филозофскиот факултет во Ниш оцени дека граѓаните предолго слушаат празни ветувања и сведочат на бришење на границата меѓу партијата и државата. Според него, институциите се претвораат во партиска сопственост, а јавните ресурси се третираат како плен. „Живееме во систем во кој лојалноста се наградува, а знаењето се казнува“, истакна Тасиќ.Тој најави и трибина на 3 март во Косовска Митровица за иднината на тамошниот универзитет, за кој рече дека му се заканува згаснување поради законот донесен од приштинските власти.Земјоделецот Небојша Томиќ од околината на Прокупље обвини дека власта со години ја уништува земјоделската политика, поради што младите ги напуштаат селата, а сточарството е погодено од, како што рече, неконтролиран увоз и намалени откупни цени на млекото. „Не бараме милостина, туку услови да работиме“, порача тој.Адвокатот Владaн Манчиќ оцени дека законските слабости се намерно создадени за да овозможат корупција и избегнување на Законот за јавни набавки, посочувајќи на големи проекти што се реализираат преку меѓудржавни договори. Доктор Дејан Христов предупреди дека здравствениот систем се соочува со недостиг од кадар и системски проблеми, се додава Бета.рс.На протестот беа истакнати транспаренти „Државата тоа сме ние“ и „Сите сме тука“. Дел од учесниците носеа кукла со ликот на претседателот на Србија, Александар Вучиќ, прикажан како распнат на крст.Собраните одржаа 16-минутен молк за загинатите во падот на настрешницата на Железничката станица во Нови Сад. Протестот заврши по 19 часот со настап на „Блокадниот хор“, а присуствуваа граѓани и студенти од повеќе градови низ Србија.

Свет | пред 2 седмици

Што ќе случува со цената на нафтата?

Светските пазари се подготвуваат за нагло зголемување на цената на нафтата, откако ескалацијата на конфликтот меѓу САД, Израел и Иран, како и блокадата на Ормутскиот Теснец, предизвикаа силни турбуленции на енергетските берзи.Според податоците на брокерската куќа ИГ, американската сурова нафта би можела да поскапи за околу 9 проценти веднаш по продолжување на тргувањето, што би ја искачило цената на барелот над 73 долари – највисоко ниво од јуни 2025 година. Аналитичарите на Барклис предупредуваат дека во случај на „значително нарушување на снабдувањето“ цената може да достигне и 80 долари по барел. Од Ројал банк оф Канада одат чекор понатаму, оценувајќи дека нафта над 100 долари не е нереално сценарио доколку кризата се продлабочи.Клучниот удар врз пазарот дојде по одлуката на Иран да го забрани преминот на бродови низ Ормутскиот Теснец – стратешка поморска точка низ која поминува околу 20 проценти од светската трговија со нафта и енергенси, во вредност од приближно 500 милијарди долари годишно. Преку теснецот се транспортираат и хемикалии и ѓубрива, што значи дека блокадата може да има ефект и врз земјоделството и глобалните цени на храната.Дополнителна неизвесност создаде и нападот врз нафтен танкер, по што најмалку 150 пловила што превезуваат сурова нафта, течен природен гас и деривати останаа закотвени на отворено море.Во обид да го смират пазарот, осум земји од групата ОПЕК плус, меѓу кои Саудиска Арабија и Русија, се договорија да го зголемат производството за 206.000 барели дневно од април. Сепак, аналитичарите предупредуваат дека капацитетот за значително дополнително зголемување е ограничен, а извозот и натаму зависи од безбедноста на пловидбата низ Заливот.Покрај нафтата, раст бележат и благородните метали. Златото поскапе за повеќе од 2 проценти, доближувајќи се до 5.400 долари за унца, додека среброто скокна за над 3 проценти. Инвеститорите бараат „безбедни засолништа“, што е типична реакција во услови на геополитичка нестабилност.Ефектите веќе се чувствуваат и на регионалните берзи. Повеќето пазари во Заливот забележаа пад, при што саудискиот индекс изгуби 2,5 проценти, додека Кувајт привремено го суспендираше тргувањето поради „вонредни околности“.Експертите предупредуваат дека скокот на големопродажните цени на нафтата директно ќе се одрази врз малопродажните цени на горивата, што значи дека граѓаните ширум светот, вклучително и во Европа, би можеле наскоро да се соочат со поскапи бензин и дизел, но и со поширок инфлаторен притисок доколку кризата потрае.

Свет | пред 2 седмици

(Видео) Трамп најави одмазда за загинатите војници: „Ќе следи најтежок удар“

Американскиот претседател Доналд Трамп вети дека ќе се одмазди за смртта на тројцата американски војници загинати во судирите со Иран и најави дека се можни нови загуби.„За жал, веројатно ќе има уште пред крајот. Така е тоа“, изјави Трамп во видео објавено на неговата социјална мрежа Трут соушл. „Америка ќе ја одмазди нивната смрт и ќе им нанесе најтежок удар на терористите кои ѝ објавија војна, во суштина, на цивилизацијата“, додаде тој.Американската војска соопшти дека тројца војници загинале, а петмина се тешко ранети, што претставува први официјално потврдени жртви во рамки на операциите против Иран.Трамп нагласи дека САД спроведуваат „масовна операција“, не само за да ја гарантираат безбедноста во сегашноста, туку и за идните генерации. „Тоа е должност и товар на слободниот народ“, изјави претседателот.Американско-израелските напади врз Иран ги оцени како „исправни“ и „неопходни“ за елиминација на, како што рече, „крвожеден терористички режим вооружен со нуклеарно оружје“. „Борбените операции продолжуваат со полна сила и ќе продолжат сè додека не ги постигнеме сите наши цели“, порача тој.Претседателот повторно упати повик до Револуционерна гарда на Иран и до иранската воена полиција да го положат оружјето и да добијат „целосен имунитет“, во спротивно, како што рече, ќе се соочат со сигурна смрт.Во краткото обраќање, Трамп уште еднаш ги повика граѓаните на Иран да го соборат режимот, порачувајќи: „Америка е со вас.“

Свет | пред 2 седмици

И ЕУ се огласи за војната на Блискиот Исток: Нападите на Иран и нарушувањето на суверенитетот на низа земји во регионот се неопростиви

Европската Унија вечерва повика на „максимална воздржаност“ и целосно почитување на меѓународното право во контекст на ескалацијата со Иран, изјави високата претставничка за надворешна политика на ЕУ, Каја Калас.Во соопштение објавено во име на сите земји членки, таа нагласи дека е неопходна заштита на цивилите и целосно почитување на принципите на Повелбата на Обединетите нации и меѓународното хуманитарно право.Соопштението следуваше по итната видеоконференција на министрите за надворешни работи на ЕУ, свикана откако Соединетите Американски Држави и Израел извршија воени напади врз Иран, по што Техеран возврати со одмазднички дејствија кон Израел, американските сили и земји од Персискиот Залив.„Нападите на Иран и нарушувањето на суверенитетот на низа земји во регионот се неопростиви. Иран мора да се воздржи од неселективни воени напади“, се наведува во соопштението на ЕУ.Унијата исто така изрази загриженост за можните нарушувања во протокот на нафта и синџирите на снабдување, оценувајќи дека конфликтот не смее да доведе до поширока ескалација што би го загрозила Блискиот Исток, Европа и пошироко, со непредвидливи економски последици.Во текстот се истакнува дека мора да се избегнат пречки на клучните поморски патишта, како што е Ормутскиот Теснец.Соопштението претставува компромис меѓу различните ставови во рамки на Унијата, која брои околу 450 милиони жители, во однос на воените акции на американскиот претседател Доналд Трамп и израелскиот премиер Бенјамин Нетанјаху.Германскиот канцелар Фридрих Мерц изјави дека сега не е време за држење лекции на партнери и сојузници, додека шпанскиот премиер Педро Санчез ги отфрли американските и израелските акции, оценувајќи дека тие придонесуваат кон понесигурен и понепријателски меѓународен поредок.Зад затворени врати, дипломатски извори наведуваат дека Европа има ограничено влијание врз развојот на конфликтот, иако неговите последици би можеле значително да се одразат врз континентот.

Свет | пред 2 седмици

Американскиот претседател најави можни нови жртви и остар одговор, па упати повик до иранската гарда: Положете оружје или ќе се соочите со сигурна смрт

Американскиот претседател Доналд Трамп изјави дека воената операција против Иран ќе продолжи „со полн интензитет“ сè додека не бидат постигнати сите поставени цели.„Борбените операции продолжуваат со полна сила и ќе продолжат сè додека не ги оствариме сите наши цели“, рече Трамп во видеообраќање објавено пред неколку минути.Тој додаде дека е можно да има уште американски жртви. „За жал, веројатно ќе има уште. Така е тоа“, изјави претседателот.Трамп нагласи дека Соединетите Американски Држави ќе се одмаздат за загинатите војници и ќе зададат „најстрог удар“ врз, како што рече, терористите кои водат војна против „речиси целата цивилизација“.Во истото обраќање, тој упати директен повик до Револуционерна гарда на Иран и до иранската воена полиција да го положат оружјето.„Повторно ги повикувам Револуционерната гарда и иранската воена полиција да го положат оружјето и да добијат целосен имунитет или да се соочат со сигурна смрт. Тоа ќе биде сигурна смрт и нема да биде убаво“, изјави Трамп.Изјавите доаѓаат во момент на силна ескалација на конфликтот, додека меѓународната заедница повикува на воздржаност и дипломатско решение.

Свет | пред 2 седмици

Трамп до Иранците: „Вратете си ја вашата држава“

Американскиот претседател Доналд Трамп во ново видеообраќање ги оцени американско-израелските удари врз Иран како „исправни“ и „неопходни“, со образложение дека целта е елиминација на, како што рече, „крвожеден терористички режим вооружен со нуклеарно оружје“.„Овие неподносливи закани повеќе нема да продолжат“, изјави Трамп.Тој повторно повика на промена на режимот во Техеран, обраќајќи им се директно на граѓаните на Иран.„Ги повикувам сите ирански патриоти кои копнеат по слобода да го искористат овој момент, да бидат храбри“, рече Трамп. „Бидете смели, бидете херојски и вратете си ја вашата држава. Америка е со вас.“Изјавата доаѓа во услови на продлабочена ескалација на конфликтот и засилени воени операции во регионот, додека дипломатските напори за деескалација засега остануваат неизвесни.

Свет | пред 2 седмици

Две лица убиени, 14 ранети во пукање во Тексас, напаѓачот ликвидиран: носел маица со иранско знаме

Американските власти истражуваат дали нападот врз Иран можел да биде мотив за пукањето што рано утрово се случи во градот Остин, сојузната држава Тексас, при што две лица се убиени, 14 се ранети, а напаѓачот е ликвидиран.Според информации на Си-Ен-Ен, повеќе полициски извори потврдиле дека истрагата се движи во насока на можна поврзаност со тероризам, иако официјалните лица предупредуваат дека е прерано за конечни заклучоци.Напаѓачот, кој исто така бил убиен во размената на оган со полицијата, носел маица со мотив од иранското знаме, потврдиле двајца полициски службеници. Властите дополнително проверуваат дали осомничениот имал проблеми со менталното здравје додека живеел во Тексас. Тројца од хоспитализираните и натаму се во критична состојба.„Сè уште е прерано да се утврди точниот мотив, но кај осомничениот и во неговото возило се пронајдени елементи што упатуваат на можна поврзаност со тероризам“, изјави Алекс Доран, вршител на должноста специјален агент на канцеларијата на Федерално истражно биро во Сан Антонио.Во истрагата се вклучила и Заедничката работна група за борба против тероризам, врз основа на доказите пронајдени на местото на настанот.Според полициски извор, напаѓачот бил со потекло од Сенегал. Во САД пристигнал на почетокот на 2000-тите години, првично се населил во Њујорк, а подоцна се преселил во Тексас, каде имал повеќе пријавени адреси.Шефицата на полицијата во Остин, Лиса Дејвис, изјави дека службите добиле дојава за маж кој пука од големо теренско возило пред локалот „Буфордс Бекјард Бир Гарден“. Возилото било забележано како кружи околу блокот непосредно пред нападот.Според неа, напаѓачот во еден момент ги вклучил трепкачите, го спуштил прозорецот и почнал да пука кон луѓето на терасата и пред барот. Потоа се оддалечил по Шестата улица, го паркирал возилото, излегол вооружен со пушка и продолжил да пука кон случајни минувачи.Бидејќи полициски и медицински екипи веќе биле распоредени во центарот на градот поради викендските настани, тие пристигнале за помалку од една минута. На раскрсница дошло до размена на оган, при што напаѓачот бил погоден и убиен. Тројца полицајци возвратиле со оган.На местото бил повикан и тим за деактивирање експлозивни направи откако во возилото биле забележани сомнителни предмети, но по прегледот било утврдено дека нема експлозив.Шефот на итната медицинска служба на округот Остин-Тревис, Роберт Лакриц, изјави дека на терен биле ангажирани повеќе од 20 тимови. Сите критично повредени биле згрижени и транспортирани во болница во рок од 24 минути.Градоначалникот на Остин, Кирк Вотсон, изрази сочувство до жртвите и им се заблагодари на службите за брзата реакција, нагласувајќи дека со тоа биле спасени животи. Гувернерот на Тексас, Грег Абот, го осуди нападот и нареди засилено полициско присуство во областа на Шестата улица за време на викендите.Според податоците на организацијата „Архива на оружено насилство“, ова е најмалку 56-та масовна пукање во САД од почетокот на годината. За масовно пукање се смета напад во кој се убиени или ранети најмалку четири лица, без да се пресметува напаѓачот.

Свет | пред 2 седмици

Драма во Бар: Jелена Томашевиќ падна на сцена во Бар, концертот прекинат

Концертот на поп-пејачката Јелена Томашевиќ во Бар беше прекинат вечерва откако уметницата ненадејно падна на сцената во Домот на културата, пренесуваат српските медиуми.Иако салата била исполнета до последното место, публиката успеала да слушне само една песна. За време на изведбата на втората нумера, Томашевиќ одеднаш клекнала на колена, по што членовите на бендот веднаш притрчале да ѝ помогнат и ја изнеле од сцената.Пејачката веднаш била пренесена во службата за итна медицинска помош, а организаторите ги информирале присутните дека концертот се откажува поради нејзината нарушена здравствена состојба.Само неколку часа претходно, Томашевиќ на својот профил на Инстаграм објавила приказ од сместувањето во Бар, споделувајќи идилична сцена пред настапот. Засега нема официјални информации за нејзината моментална здравствена состојба.

Магазин | пред 2 седмици

Трамп: Нападите врз Иран може да траат и до еден месец, сѐ оди според планот

Американскиот претседател Доналд Трамп изјави дека воените удари врз Иран би можеле да траат и до еден месец, наведувајќи дека првичната проценка за времетраењето на операцијата изнесувала околу четири недели.Во разговор за Дејли мејл, Трамп посочил дека, иако нападите се силни, станува збор за голема земја и дека ќе биде потребно време за целосно реализирање на целите.„Отсекогаш планиравме да трае четири недели. Проценката беше околу четири недели. Колку и да се силни ударите, тоа е голема земја и ќе бидат потребни четири недели, а можеби и помалку“, изјавил Трамп, додавајќи дека засега е задоволен од текот на операцијата.Тој се осврна и на првите тројца загинати американски војници во текот на борбите, оценувајќи ги како „одлични луѓе“ и истакнувајќи дека вакви загуби, за жал, се можни во воени услови.„Разговарав со нивните семејства и ќе се сретнам со нив во соодветно време“, рече Трамп.Во однос на текот на операцијата, претседателот нагласи дека засега нема непланирани изненадувања и дека, според неговата оценка, „сè оди според планот“. Тој тврдеше дека биле елиминирани голем број високи фигури од иранското раководство, повеќе од првично очекуваното.Истовремено, Трамп изјави дека е отворен за разговори со иранското раководство, но посочи дека, според него, тие требало да се одржат порано.„Тие сакаат да разговараат, но им реков дека требаше да разговараат минатата недела, а не оваа“, изјави американскиот претседател, оставајќи отворена можност за дипломатски контакт во наредниот период.

Свет | пред 2 седмици

(Видео) Британскиот премиер: Велика Британија им дозволи на САД користење воени бази

Британскиот премиер Кир Стармер потврди дека Обединетото Кралство го прифатило американското барање за користење британски воени бази во рамки на, како што нагласи, „конкретна и ограничена одбранбена цел“.Во видеопорака објавена на социјалните мрежи, Стармер изјави дека Велика Британија засега не е директно вклучена во американско-израелските напади врз Иран, но истовремено истакна дека британските воздухопловни сили учествуваат во координирани одбранбени операции.„Нашите партнери во Персискиот Залив побараа од нас да направиме повеќе за да ги одбраниме и моја должност е да ги заштитам британските животи. Британските авиони веќе успешно пресретнаа ирански напади“, рече Стармер.Тој додаде дека единствениот начин да се запре заканата е уништување на проектилите на нивниот извор – во складиштата каде што се чуваат или на лансирните позиции од кои се испукуваат.Според премиерот, Соединетите Американски Држави побарале дозвола за користење британски бази за таа ограничена одбранбена намена, а владата одлучила да го прифати барањето со цел да се спречи Иран да продолжи со ракетни напади врз земји во регионот.„Засега нема да учествуваме во офанзивни акции, но ја поддржуваме колективната самоодбрана на нашите сојузници и на нашите граѓани во регионот“, изјави Стармер, во услови на зголемена ескалација на Блискиот Исток.

Свет | пред 2 седмици

(Видео) Иранска ракета погодила западен Ерусалим, одекнале силни експлозии

Иранска ракета директно погодила дел од западен Ерусалим, јавува дописник на Ал Џезира, при што над градот одекнале силни експлозии.Непосредно пред ударот се огласиле сирени за воздушна опасност, а израелската војска соопштила дека детектирала проектили лансирани од Иран кон територијата на Израел.„Пред кратко време идентификувавме проектили лансирани од Иран кон територијата на Државата Израел“, се наведува во соопштението на војската.Според информациите, одбранбените системи биле активирани со цел пресретнување на заканата, а граѓаните биле повикани да останат во засолништа до дополнителни инструкции.Засега нема официјални информации за евентуални жртви или материјална штета, додека состојбата на теренот и понатаму е напната.

Свет | пред 2 седмици

Ирански дрон ја погодил базата на Петтата флота на САД во Бахреин

Висок функционер од Бахреин изјави дека вечерва околу 19:30 часот по Гринич (22:30 по локално време) ирански дрон ја погодил базата на Петта флота на САД во Бахреин, при што бил предизвикан голем пожар.Според информациите, беспилотното летало удрило во непосредна близина на британската поморска постројка која се наоѓа до американската зона, но нема жртви бидејќи областа била претходно евакуирана поради ескалацијата на конфликтот.Официјалниот претставник навел дека досега четири лица се повредени во иранските напади врз Бахреин – еден кинески, двајца египетски и еден бахреински државјанин.Во меѓувреме, министрите за надворешни работи на земјите од Заливот одржуваат виртуелен состанок, на кој се разгледува можноста да го следат примерот на Обединетите Арапски Емирати и да ги затворат своите амбасади во Техеран, во услови на продлабочена регионална криза.

Свет | пред 2 седмици

САД: Погодени повеќе од 1.000 ирански цели во текот на операцијата

Централна команда на САД соопшти дека во досегашниот тек на операцијата против Иран биле погодени повеќе од 1.000 цели на иранска територија.Според објавата, меѓу метите се нашле командни и контролни центри, позиции на балистички проектили, бродови и подморници на иранската морнарица, како и воени комуникациски капацитети.Од Централната команда наведуваат дека нападите се насочени кон ослабување на воената инфраструктура и оперативните способности на Иран.Во објава на социјалните мрежи, командата дополнително тврди дека иранскиот режим „активно таргетира цивили во своите одмазднички напади“, оценувајќи ја таквата практика како сериозна ескалација на конфликтот.Операцијата, според американските власти, продолжува, а засега нема официјални информации за евентуални дополнителни проширувања на целите или времетраењето на воените дејствија.

Свет | пред 2 седмици

Нов врховен водач на Иран можно е да биде избран за неколку дена

Иранскиот министер за надворешни работи и шеф на дипломатијата, Абас Аракчи, изјави дека е можно нов врховен водач на Иран да биде именуван во рок од неколку дена.„Можеби за ден или два ќе биде избран нов водач на земјата“, рече Аракчи во изјава за Ал Џезира.Тој го осуди убиството на претходниот врховен водач, Али Хамнеи, кој загина во американско-израелските напади, оценувајќи го како „целосно и без преседан кршење на меѓународното право“.Сè додека не биде избран нов државен лидер, неговите надлежности ќе ги преземе тричлено тело, согласно уставните механизми во Иран.За избор на нов врховен водач надлежно е Собранието на експерти, составено од 88 влијателни верски лидери. Засега не е познато кој би можел да го наследи Хамнеи, а самиот тој јавно не говореше за можен наследник.

Свет | пред 2 седмици

Британија, Франција и Германија: Можеби ќе преземеме нужни обрамбени мерки против Иран

Лидерите на Обединетото Кралство, Франција и Германија, познати како Е3, објавија заедничко соопштение во кое остро ги осудуваат иранските ракетни напади, оценувајќи ги како „неселективни и несразмерни“.Во изјавата се наведува дека трите земји ќе преземат чекори за заштита на своите национални интереси и на интересите на сојузниците во регионот, доколку безбедносната состојба дополнително се влоши.Според соопштението, тие чекори потенцијално би можеле да вклучуваат овозможување нужни и пропорционални одбранбени мерки со цел неутрализирање на иранските проектили и беспилотни летала на нивниот извор.Лидерите — Кир Стармер, Емануел Макрон и Олаф Шолц — се согласија дека во евентуалните активности ќе соработуваат со Соединетите Американски Држави и со други партнери во регионот.Во моментот на објавување на соопштението, Форин офис на Обединетото Кралство информираше дека околу 94.000 британски државјани ја регистрирале својата присутност во земјите од Персискиот Залив кај владините служби, во услови на зголемена безбедносна неизвесност.

Свет | пред 2 седмици

САД: Го уништивме седиштето на Иранската револуционерна гарда

Американската војска соопшти дека во напад во Техеран е уништено седиштето на Иранската револуционерна гарда.„Америка има најмоќна војска во светот, а ИРГЦ повеќе нема седиште“, објави CENTCOM на социјалните мрежи.Во објавата се наведува дека Иранската револуционерна гарда во изминатите 47 години убила повеќе од 1.000 Американци.„Вчерашниот обемен американски напад ѝ ја отсече главата на змијата“, се додава во соопштението.Засега нема официјална потврда од иранските власти за наводите на американската страна, ниту информации за евентуални жртви или материјална штета. Ситуацијата останува во развој.

Свет | пред 2 седмици

(Видео) Болницата „Ганди“ во Техеран мета на американско-израелски напади, објави Иранската новинска агенција

Иранската новинска агенција ISNA објави дека болницата „Ганди“ во северен Техеран била цел на американско-израелски воздушни напади.Во извештајот се наведува дека „техеранската болница ‘Ганди’ била нападната во ционистичко-американски воздушни удари“.Иранските агенции Fars и Mizan објавија видео за кое тврдат дека е снимено во внатрешноста на болницата, на кое се гледаат расфрлани остатоци по подот меѓу празни инвалидски колички.Според Reuters, очевидци потврдиле дека објектот бил погоден во нападот. Засега нема официјални информации за евентуални жртви или за обемот на штетата.Независна потврда на наводите од меѓународни извори сè уште нема, а ситуацијата останува во развој.

Свет | пред 2 седмици

Постои закана и сомнежи за чувствителни објекти како Музејот на холокаустот на Евреите, но тоа се следи, уверува претседателката

Претседателката Гордана Сиљановска-Давкова изјави дека во услови на зголемени тензии на глобално ниво, надлежните институции посветуваат посебно внимание на објекти кои потенцијално би можеле да бидат цел на закани, како што се синагогите, седиштата на еврејската заедница и Музеј на холокаустот на Евреите од Македонија.„Знаете ширум светот постои закана или сомнеж дека објекти од типот синагоги или седишта на Еврејската заедница, кај нас има Музеј на холокаустот дека може да бидат места на коишто треба посебно да им се посвети грижа и внимание. Добивме информации од надлежните дека тоа се следи и дека и тоа е под заштита и контрола, што значи не може да очекуваме изненадување“, рече претседателката Гордана Сиљановска-Давкова по седницата на Совет за безбедност на МакедонијаСпоред неа, безбедносните служби континуирано ги анализираат можните ризици и превентивно постапуваат со цел зачувување на безбедноста и стабилноста во земјата.

Македонија | пред 2 седмици