Премиерот на Гренланд, Јенс-Фредерик Нилсен, денеска порача дека Гренланд не е на продажба, откако американскиот претседател Доналд Трамп на самитот на НАТО во Анкара повторно изјави дека САД треба да ја преземат контролата врз оваа арктичка територија.
„Гренланд не е на продажба. Повторените повици за преземање на контролата врз нашата земја нема да го променат тоа“, напиша Нилсен на Фејсбук.
Еден ден по новите изјави на Трамп, данскиот министер за надворешни работи, Ларс Локе Расмусен, изјави дека Данска продолжува со дипломатските разговори со Гренланд и Соединетите Американски Држави, но засега не е познато каков ќе биде нивниот исход.
Трамп повторно оцени дека Гренланд треба да биде под американска, а не под данска контрола и додаде дека спорот околу островот негативно влијае врз односите меѓу САД и НАТО.
„Тоа е она што го наруши мојот однос со НАТО, бидејќи Гренланд не ѝ користи на Данска“, рече Трамп, обвинувајќи го Копенхаген дека не вложува доволно средства во развојот и безбедноста на островот.
Во меѓувреме, норвешкиот министер за одбрана, Торе Сандвик, изјави дека сојузниците веќе преземаат конкретни мерки за зајакнување на безбедноста на Арктикот, вклучително и на Гренланд, во услови на засилени активности на Русија во регионот.
