Алкохол и без дозвола: Приведени возачи низ Македонија

Министерството за внатрешни работи информира дека во текот на изминатото деноноќие полициските службеници лишиле од слобода шест возачи поради безобѕирно управување со возило.Според Министерство за внатрешни работи, двајца од приведените управувале возило без возачка дозвола, едно лице управувало мотоцикл без положен возачки испит, додека тројца возеле под дејство на алкохол.Во Гевгелија е затекнат возач кој управувал мотоцикл без дозвола, а слични прекршоци се евидентирани и во општина Чашка и во Скопје.Во однос на возењето под дејство на алкохол, случаи се регистрирани во Битола, Скопје и Охрид, при што кај возач во Охрид биле измерени 1,75 промили алкохол во крвта.Од МВР посочуваат дека по целосно документирање на случаите ќе бидат поднесени соодветни кривични пријави.Воедно, упатен е апел до сите учесници во сообраќајот да ги почитуваат правилата, да не управуваат возило без возачка дозвола или под дејство на алкохол, со цел зголемување на безбедноста на патиштата.

Македонија | пред 1 ден

Се огласи синот на осомничениот убиец: Наместо разбирање, медиумски линч! Македонија знае кој е мојот татко

По убиството на Климе Митревски во Охрид, случај кој предизвика силни реакции во јавноста, се огласи Божидар Грозданоски, син на осомничениот Жарко Грозданоски, упатувајќи јавна поддршка за својот татко.Во објава на социјалните мрежи, тој реагира на, како што вели, односот кон неговото семејство во јавноста.„Во овие исклучително тешки моменти за моето семејство, чувствувам потреба јавно да изразам целосна поддршка за мојот татко, кој со години совесно, чесно и пожртвувано ја извршува својата лекарска професија. За жал, наместо разбирање и достоинство, сведоци сме на медиумски линч кој е најмалку потребен токму сега, кога поминуваме низ сериозна и чувствителна ситуација. Притоа, неправедно се занемаруваат стотиците луѓе на кои им помогнал, грижата што им ја пружил и животите кои ги спасил“, напиша Божидар Грозданоски.Тој во пораката истакнува дека, според него, јавноста има поинаква перцепција за неговиот татко.„Брвенчани, тетовчани, но и граѓаните низ цела Македонија многу добро знаат кој е Жарко – не само како доктор, туку и како човек“, наведува тој.

Македонија | пред 1 ден

Адвокат за убиството во Охрид: „Никој не заслужува ваков крај, којзне уште колку Палчовци има“

Адвокатот Војо Димоски, кој во минатото бил правен застапник на убиениот Климе Митрески, остро реагираше по трагичниот настан во Охрид, посочувајќи на сериозни системски слабости и небезбедност во општеството.„Покојниот Климе Митрески, жртвата на убиството во Охрид, ми беше клиент уште од првите денови на мојата адвокатска пракса. Никој не заслужува да го заврши животот на таков начин“, напиша Димоски.Тој во својата реакција посочува дека состојбите во државата се загрижувачки, обвинувајќи за отсуство на систем и институционален капацитет.„Чудо едно е во каква средина се има претворено оваа наша Македонија, која наизменично им ја доверуваме на владеење на луѓе на кои не би им ја довериле ни главата на шишање“, наведува адвокатот.Димоски тврди дека поради нефункционалноста на системот, опасни лица не само што остануваат на слобода, туку и се организираат.„Поради отсуството на систем, не само што психопатите се на слобода, туку истите се организираат во полулегални милитантни секти. Којзнае уште колку Палчовци чучат во темни подруми“, пишува тој.Во реакцијата, тој упатува критика и кон институциите, посочувајќи дека постои недостиг на јасни приоритети во борбата против криминалот.„Листата на задачи кои Премиерот му ги издиктира на Државниот обвинител укажува на немањето компас за приоритетите на борбата со криминалот“, наведува Димоски.Сепак, тој завршува со порака дека одговорноста не е само кај поединците.„Ама пак ќе речам: не се тие криви“, напиша адвокатот Војо Димоски по убиството на Климе Митрески.

Македонија | пред 2 дена

Полициска акција во Карпош и Кисела Вода – приведени лица и десетици казни

Полицијата во ноќна акција во скопските општини Карпош и Кисела Вода изврши контроли во казина и угостителски објекти, при што беа констатирани повеќе прекршоци и изречени соодветни санкции.Акцијата била спроведена во периодот од 20:00 до 03:00 часот, со цел одржување на стабилна безбедносна состојба.„На 27/28.03.2026 во периодот од 20:00 часот до 03:00 часот, на подрачјето на општина Карпош и Кисела Вода полициски службеници од СВР Скопје извршија контроли во повеќе угостителски објекти и казина и презедоа повеќе мерки за одржување на стабилна безбедносна состојба“, информираат од МВР.Во Карпош биле контролирани шест угостителски објекти и две казина, при што едно лице било лишено од слобода за поседување дрога, три лица биле приведени за утврдување идентитет, а била изречена и една мерка по Законот за прекршоци против јавниот ред и мир.Дополнително, биле изречени 37 мерки по Законот за безбедност на сообраќајот на патиштата, а две возила биле подигнати со специјално возило „пајак“.Во Кисела Вода, пак, полициски службеници заедно со инспектори од Државниот пазарен инспекторат извршиле контроли во седум казина и седум угостителски објекти.„Во шест казина констатирани се прекршоци од Закон за пушење, Закон за лична карта како и Закон за приватно обезбедување, а кај еден угостителски објект е констатирано дека нема одобрение за летна тераса, а кај еден угостителски објект е констатиран прекршок за пречекорено работно време“, соопштуваат од МВР.За сите утврдени прекршоци се изречени соодветни мерки, а од полицијата најавуваат дека ваквите контроли ќе продолжат и во наредниот период.

Скопје | пред 2 дена

Родителите на жртвите од „Пулс“ бараат враќање на обвинителката Трајчева: 63 животи не смеат да станат административна одлука

Одлуката на Советот на јавни обвинители да не го продолжи мандатот на обвинителката која повеќе од половина година работеше на предметот „Пулс“ предизвика сериозна загриженост кај семејствата на жртвите, кои бараат континуитет и ефикасност во постапката за еден од најтешките случаи во државата.Родителите посочуваат дека станува збор за обвинителка која гонела функционери, застапувала високо-профилни случаи и покренала обвинителни предлози и обвинителен акт против полицајци и началници од МВР кои ги смета за одговорни.„Нејзиниот неизбор доаѓа токму по завршување на истрагата и покренување на постапките за еден од најтешките и најчувствителни случаи во јавноста“, наведуваат тие.Според нив, континуитетот во ваков случај не е формалност, туку клучен предуслов за ефикасна постапка.„Со промената на обвинителот, предметот преминува кај нов обвинител кој ќе треба од почеток да се запознае со теоријата на случајот, доказите и целокупната постапка. Ова носи реален ризик од дополнителни одложувања, пролонгирање на судските процеси и нарушување на континуитетот“, посочуваат родителите.Тие додаваат дека дел од рочиштата веќе се одложени, а најголем дел од предметите сè уште се во фаза на чекање.Случајот „Пулс“, поврзан со пожарот во кој загинаа 63 лица, според нив, бара максимална сериозност и одговорност од институциите.„Токму затоа, секоја промена што може да влијае врз текот и динамиката на постапката отвора сериозна загриженост“, наведуваат тие.Родителите истакнуваат дека обвинителката Трајчева веќе е целосно запознаена со предметот и дека нејзиното отстранување не е во интерес на правдата.„Советот на јавни обвинители се повикува на ‘правична застапеност’, додека на обвинителката Трајчева ѝ се ускратува да продолжи со предметот кој сама го водеше – ова отвора сериозно прашање: дали формата се става пред суштината — правдата?“, наведуваат тие.Во пораката до институциите, родителите упатуваат јасно барање.„Затоа, јасно и гласно бараме: обвинителката да биде вратена на случајот. Ова не е прашање на поединец. Ова е прашање на систем и одговорност. 63 изгубени животи не смеат да станат предмет на административни одлуки без последици“, порачуваат тие.Тие нагласуваат дека јавноста има право да бара постапката да продолжи без прекин, институциите да постапуваат независно и професионално и сите одговорни да бидат утврдени согласно закон.„Ова е момент кога институциите треба да покажат дека стојат на страната на правдата. Правдата не смее да биде доведена во прашање. Таа мора да се спроведе — до крај“, порачаа родителите на дел од загинатите во „Пулс“.

Македонија | пред 2 дена

Силни дождови и поплави во Кенија – загинаа 108 лица

Во Кенија, во текот на повеќенеделните обилни дождови и поплави, животот го загубиле 108 лица, соопшти државната полиција во најновиот извештај за бројот на жртви.Поплавите кои започнаа вечерта на 6 март, предизвикаа голема материјална штета во земјата, однесоа десетици возила, го попречија авионскиот сообраќај и ја оштетија енергетската инфраструктура. Според властите, повеќе од 2.700 семејства беа принудени да ги напуштат своите домови.Иако интензитетот на врнежите во некои области ослабна, полицијата предупреди дека опасноста од поплави сè уште постои поради пренатрупаните канали за одводнување и натопената почва.

Свет | пред 2 дена

Полициско куче откри 800 грама закопан амфетамин

Сплитско-Далматинската полиција уапси 56-годишник на чиј имот во населбата Слатина, за време на претрес со помош на службено куче, пронајде околу 800 грама амфетамин закопан во земја. Покрај дрогата, полицијата одзеде и воздушна пушка, дигитална вага за мерење, уред за вакумирање, два мобилни телефони и три заштитени школки периски.Претресот го спровеле полицајците од Полициската станица Трогир во соработка со службениците од Аеродромската полиција Ресник. Службеното куче реагирало на присуство на дрога во дворот, по што била извадена метална кутија со 793 грама амфетамин.Осомничениот е предаден на притворски надзорник и се товари за кривично дело неовластено производство и промет на дроги, уништување заштитени делови на природата и прекршок според Законот за набавка и поседување на оружје.Исто така, уапсена е и 36-годишна жена кај која се пронајдени 1,8 грама амфетамин. Таа ќе биде приведена на надлежен суд за прекршок според Законот за спречување злоупотреба на дроги.

Свет | пред 2 дена

Иран: Од почетокот на војната загинаа речиси 2000 луѓе

Помина еден месец откако САД и Израел започнаа заедничка воена кампања против Иран на 28 февруари, што доведе до интензивни воздушни удари и ракетни напади. Според податоци од Меѓународната федерација на Црвен крст и Црвена полумесечина, во Иран од почетокот на операциите загинаа над 1.900 луѓе, а најмалку 20.000 се повредени, додека цивилното население и инфраструктурата трпат сериозни последици од конфликтот.Иранските власти објавија дека нападите погодиле повеќе од 200 градови и предизвикале огромна материјална штета, вклучувајќи уништување на десетици илјади домови, медицински центри, училишта и други цивилни објекти. Тие тврдат дека околу 93.000 цивилни згради биле оштетени во текот на борбите. Точните бројки не се независно потврдени од меѓународни набљудувачи, но бројните извештаи нагласуваат сериозни хуманитарни последици во населбите погодени од воздушните напади.Во меѓувреме, конфликтот се прошири со регионални напади, како што се ракетни и беспилотни удари на ирански сојузници и зголемена воена тензија на повеќе фронтови.Оваа воена ескалација доведе до големи нарушувања во животот на цивилите и создаде растечки хуманитарни предизвици, вклучувајќи поместувања на население, штета на инфраструктурата и зголемување на бројот на жртви во текот на тековните борби.

Свет | пред 2 дена

Иран сака контрола врз Ормускиот теснец како дел од условите за крај на војната

Кога иранскиот функционер оваа недела го презентираше списокот на барања за завршување на конфликтот предизвикан од САД и Израел, меѓу новите точки се најде и барањето за признавање на суверенитетот на Иран над Ормуски теснец. Овој тесен пловен пат, низ кој минува петтина од светската нафта и течен гас, сега Иран се обидува да го претвори во извор на потенцијални милијарди долари годишно и моќно средство за притисок врз глобалната економија.Додека долгогодишно заканувањето за затворање на теснецот во случај на напад изгледаше како ретка можност, неодамнешните ирански акции покажаа колку ефективно може да се влијае врз глобалните трговски текови. Пловидбата низ теснецот речиси е целосно запрена, што предизвика нарушувања на светските енергетски пазари и принуди земји далеку од Персискиот залив да преземат итни мерки за обезбедување гориво.Според експерти, Иран открил дека контролата врз теснецот е ефтина и лесна алатка за држење на глобалната економија „за таоц“, и сега планира да ја монетизира оваа моќ. Високи ирански функционери размислуваат за воведување систем на наплата за користење на теснецот, што би ги поврзало пристапот до еден од најкритичните светски пловни патишта со геополитичките интереси на Техеран.Меѓународни експерти предупредуваат дека такво наплаќање на транзитот претставува кршење на меѓународното право, според Конвенцијата на ОН за право на море, бидејќи Ормускиот теснец се користи за меѓународна пловидба. Сепак, Иран би можел да се обиде да го искористи фактот што не е потписник на конвенцијата за да го зајакне својот аргумент.Аналитичари проценуваат дека доколку Иран успее да воведе систем на наплата, приходите би можеле да конкурираат со оние што ги остварува Сусеки канал, со можни приходи од стотици милиони долари месечно само од нафта и течен гас.

Свет | пред 2 дена

Војната со Иран ја открива слабоста на непредвидливата стратегија на Трамп

Претседателот Доналд Трамп тврди дека САД победуваат во војната со Иран, и покрај тоа што на Блискиот Исток се испраќаат илјадници дополнителни американски војници. Тој ги критикуваше другите држави за недоволна поддршка, но потоа рече дека неговата земја не се нуждае од таква помош.Двапати ги одложи роковите што ги постави за Иран околу повторното отворање на Ормускиот теснец, и се закани дека ќе ги „уништи“ иранските енергетски постројки ако важниот пловен пат остане затворен, додека истовремено тврди дека затворањето на теснецот „не ги погодува САД“.Историчари и поранешни официјални лица предупредуваат дека Трамп често ја разубавува вистината за војната, прикажувајќи ја ситуацијата како успешна, додека реалноста е далеку покомплексна. Леон Панета, кој служел како секретар за одбрана и директор на ЦИА, вели дека „вистината станува првата жртва“ во секоја војна, и дека Трамп вовел пракса на постојано лажење за текот на конфликтот.Аналитичари забележуваат дека стилот на претседателот – честа непредвидливост и промена на реториката – создава политичка конфузија и ги држи противниците и сојузниците во постојана неизвесност. За критичарите, тоа покажува дека нема долгорочна стратегија, додека за Трамп, непредвидливоста е дел од стратегијата за влијание.Републиканските поддржувачи остануваат главно лојални, но анкети покажуваат дека долгорочниот конфликт на Блискиот Исток може да предизвика незадоволство, особено ако се испраќаат копнени сили. Само 20% од републиканците поддржуваат ставање на копнени трупи во Иран, иако 63% го одобруваат воздушното бомбардирање на воени цели.Повеќе членови на Конгресот изразија загриженост за долгорочните последици, финансиските трошоци и неопределеноста во стратегијата, додека Трамп продолжува да ја менува реториката и да ја прикажува ситуацијата како победничка.Според некои аналитичари, ваквиот пристап можеби има тактичка цел – да ја зголеми несигурноста кај иранските лидери – но ризикот за политичката стабилност и за изборната поддршка во САД е висок.

Свет | пред 2 дена

(Видео) Десетици илјади протестираа во Лондон против крајната десница

Десетици илјади луѓе се собраа во саботата на улиците на централен Лондон на протест под слоганот „Марш за запирање на крајната десница“, изразувајќи негодување против десничарската партија Реформ УК, која ја предводи застапникот на Брегзит, Најџел Фараж. Според извештајот на Reuters, партијата моментално е водечка во анкетите на јавното мислење.Протестот, кој го организира сојузот „Заедно“ со поддршка на синдикати и организации на граѓанското општество, се очекува да биде еден од најголемите во британската престолнина во последниве години. Полицијата најави учество на околу 30.000 луѓе.Покрај транспаренти против партијата „Реформ УК“ и нејзините антимиграциски ставови, демонстрантите носеа и ирански и про-палестински знамиња. Маршот заврши во близина на зградата на Британскиот парламент.Според анкетите, „Реформ УК“ има предност пред Лабуристичката партија на премиерот Кеир Стармер, како и пред другите традиционални британски партии. На саботниот протест се приклучи и Зак Полански, лидер на Зелената партија, која исто така конкурира на лабуристите.

Свет | пред 2 дена

Снимки го откриле осомничениот за убиството во Охрид, жртвата ја убил со бокс и задушување

Основното јавно обвинителство Охрид отвори истражна постапка против 53-годишен маж од тетовска Брвеница, осомничен дека од користољубие го убил охриѓанецот Климе Митрески, со кого имал договор за доживотна издршка.Според обвинителството, делото било извршено на 25 март во домот на жртвата во Охрид, откако осомничениот сакал да го спречи Митрески да го раскине договорот склучен кај нотар во февруари 2025 година, со кој по неговата смрт требало да стекне значителен имот.По вербална расправија, осомничениот го нападнал жртвата од зад грб.„По вербална расправија околу одлуката на оштетениот да го раскине договорот, осомничениот од зад грб физички го нападнал, го совладал на подот и го удрил со бокс неколку пати во главата. За цело време го држел оштетениот со едната рака преку устата и носот со што му го спречил дишењето и кај него предизвикал смрт“, соопштува обвинителството.Откако се уверил дека жртвата не дава знаци на живот, осомничениот го напуштил местото на настанот.Неговото присуство и движење се документирани преку видео надзор.„Присуството и дејствијата на осомничениот во критичниот период се евидентирани на снимки од видео надзор поставен во куќата на оштетениот, а во текот на претходната постапка обезбедени се и други снимки од видео надзор за неговото движење, како и други материјални докази“, информираат од обвинителството.Станува збор за особено тешко кривично дело – убиство од користољубие, за кое е предвидена казна затвор од најмалку 10 години или доживотен затвор.Поради сериозноста на делото и ризикот од бегство, како и можноста осомничениот да влијае врз сведоци или да прикрие докази, јавниот обвинител доставил предлог до судијата на претходна постапка за определување мерка притвор.

Македонија | пред 2 дена

Променливо облачно време со дожд и снег на планините

Според последните податоци од Управата за хидрометеоролошки работи, денеска времето ќе биде променливо облачно со повремени локални врнежи од дожд, особено во западните делови каде имаше ретки грмежи. Ќе дува слаб до умерен, а на моменти повремено засилен ветер од променлив правец.Максималните температури ќе се движат од 1°C на Попова Шапка до 18°C во Гевгелија. На некои повисоки места врнежите ќе бидат од дожд и снег, а на планините од снег. Висината на снежната покривка на Попова Шапка е 62 cm, а наврнат воден талог во последните 9 часа е 5 l/m² во Охрид.До крајот на денот се очекува слаб до умерен северен ветер, поизразен долж Повардарието, со локални врнежи од дожд и услови за изолирана појава на ретки грмежи.Утре ќе биде променливо облачно со услови за краткотраен локален дожд во источните делови. Ветерот ќе дува умерен, повремено засилен од северозапад. Минималната температура ќе се движи од -2 до 4°C, а максималната од 11 до 18°C. Во Скопје, минималната ќе достигне 4°C, а максималната 16°C, со умерен северен ветер.Под влијание на циклонска активност, од вторник до крајот на работната седмица се очекува променливо облачно време со повремени врнежи од дожд. Во вторник врнежите ќе бидат пообилни во западните делови, во среда локално над 20 l/m², а во четврток пообилни во југоисточните делови (над 15 l/m²). Петок ќе биде со послаб интензитет на врнежите, додека ветерот ќе дува умерен до засилен од северозападен и североисточен правец.

Македонија | пред 2 дена

Ирачкиот премиер го осуди нападот врз домот на претседателот на Курдистан

Мохамед Шија ал Судани го осуди нападот врз домот на претседателот на ирачкиот полуавтономен курдски регион, соопшти кабинетот на премиерот.Во соопштението се наведува дека ал Судани имал телефонски разговор со претседателот на курдскиот регион, Нечирван Барзани.Според безбедносните извори, нападот се случил рано утрово.

Свет | пред 2 дена

Американската Централна команда ги отфрли тврдењата на Иранската револуционерна гарда за напади во Дубаи

Американската Централна команда (CENTCOM) ги отфрли тврдењата на Иранската револуционерна гарда дека иранските сили извршиле напади на повеќе локации во Дубаи каде биле распоредени повеќе од 500 американски војници, предизвикувајќи „тешки загуби“.„Во Дубаи не е нападнат ниту еден американски војник“, соопшти CENTCOM на X, обвинувајќи ја иранската власт дека „измислува лаги“. Наводи за ирански напади на цивилни објекти во Дубаи се појавувале и претходно, додека CENTCOM доследно ги отфрла тврдењата за американски жртви.

Свет | пред 2 дена

Низ САД се планираат масовни протести против Трамп

Илјадници протести под слоганот „Нема кралеви“ се очекуваат денеска ширум Соединетите Американски Држави, насочени против политиките на претседателот Доналд Трамп и неговата администрација.Организаторите најавуваат повеќе од 3.200 собири во сите 50 сојузни држави, со очекување дека станува збор за најголемите еднодневни демонстрации во историјата на земјата. Главните протести ќе се одржат во Њујорк, Лос Анџелес, Вашингтон и Минеаполис.„Вистинското прашање на оваа мобилизација не е само колку луѓе протестираат, туку каде сè протестираат“, изјави коосновачката на организацијата Индивизибл, Леа Гринберг, која стои зад протестите.Од Белата куќа, портпаролката Абигејл Џексон ги нарече протестите „терапевтски состаноци на пореметени антитрамповци“.Претходните слични собири привлекоа милиони учесници и беа поттикнати од мерките на имиграциските власти и распоредувањето на Националната гарда во поголемите градови. Според организаторите, денешните протести се насочени и против американско-израелското бомбардирање на Иран.

Свет | пред 2 дена

Дончиќ: Нема подобра асоцијата од ЕУ за народи како македонскиот и хрватскиот

Претседателот на Социјалдемократската партија на Хрватска, Синиша Хајдаш Дончиќ, на денешната заедничка прес-конференција со претседателот на СДСМ, Венко Филипче, нагласи дека европската интеграција е од клучно значење за продлабочување на односите меѓу Македонија и Хрватска. Тој порача дека не постои подобра асоцијација од Европската Унија за народи како македонскиот и хрватскиот.„ЕУ ќе нè зближи уште повеќе и ќе овозможи во депопулациските региони, каде што луѓето за жал заминуваат и во Македонија и во Хрватска, одредени работи да се финансираат со европски средства. И тоа е важно. Но јас Европа не ја гледам исклучиво низ призмата на парите, туку и низ призмата на тоа зошто и како е создадена, а таа е создадена од хумани идеи. По векови војни, Европа всушност живее во мир“, рече Хајдаш Дончиќ.Воедно, на прес-конференцијата Хајдаш Дончиќ потенцираше дека суштината на социјалдемократските политики е праведната распределба на создадената вредност уште во примарната фаза.„Сакаме примарната распределба сликовито кажано, во фабриката, помеѓу работниците и сопствениците на капитал да биде праведна, не секундарната преку даноци, такси, субвенции и социјална помош, туку примарната. За тоа речиси никој не зборува ниту во Македонија освен СДСМ, ниту во Хрватска освен СДП. Социјалдемократијата не исчезнала и не пропаднала ниту во Македонија ниту во Хрватска бидејќи социјалдемократите единствени даваат одговор на две прашања, ние се залагаме за додадена вредност и сме против доминација на капиталот“, рече  Хајдаш Дончиќ.Во своето обраќање,  Хајдаш Дончиќ ја истакна и важноста од заедничката визија и соработка меѓу социјалдемократските партии во двете земји.„Тука сум кристално јасен. И она што денес ми е освежување е што со моите луѓе, пријатели и другари, со кои делиме иста визија, исти стравови, но и иста надеж дека во Македонија и во Хрватска може да биде подобро со силна социјалдемократска партија.Затоа јас и мојот колега претседателот Филипче се договоривме градовите во Македонија, односно општините каде што градоначалниците се од СДСМ, уште повеќе да се поврзат со хрватските градови и општини каде што градоначалниците се од СДП но не само поради политика, туку и за заедничка подготовка за Европската Унија и за средствата што доаѓаат, со цел што подобро да се искористат“, рече Хајдаш Дончиќ.

Македонија | пред 2 дена

Филипче: Понижувачки „фингерпринт“ за докторите наместо владата да им ги покачи платите

Претседателот на СДСМ, Венко Филипче, обвини дека најновата мерка за воведување „фингерпринт“ како начин на мерење на работното време за докторите е понижувачка и несоодветна, а оваа оваа мерка доаѓа од министерот за здравство, кој нема никакво познавање на здравствениот сектор.„Ова е една страшно понижувачка мерка од еден човек којшто моментално е министер за здравство, а со здравството и медицината нема никаква врска. Човекот доаѓа одИТ сектор и не знае што е здравствениот сектор, па медицината воопшто не ја познава“, рече Филипче во одговор на новинарско прашање.Тој додаде дека таквата мерка ја сведува медицинската професија на ниво на работници кои се задолжени да се  отчитаат на почетокот и крајот на работниот ден, што не се случува никаде во светот.„Се поставува прашање: што кога некој доктор ќе дојде попладне и ќе биде повикан од помлад колега за консултација? Ќе се остави „фингер принт“ тогаш? Ќе го плати министерот дополнително?“, дополни Филипче.Тој исто така истакна дека мерката не го зема предвид квалитетот на медицинските интервенции, кои можат да траат и до неколку часа, и кои се од клучна важност за спасување на човечки животи.„Каква е таа мерка со мерење на работното време, односно како се мери работното време кога имате некоја оперативна интервенција која трае час, два или три и се спасува човечки живот, а кога немате? Како се мери квалитативно тоа време? Да го прашаме министерот“, запраша Филипче.Филипче нагласи дека наместо воведување понижувачки мерки, Владата треба сериозно да ги зголеми платите на докторите, како единствен начин да се задржат во јавното здравство.„Наместо вакви понижувачки мерки, треба да се зголемат платите. Треба сериозно да се зголемат платите на докторите, затоа што со вакви мерки и без зголемување на платите, единствено што се прави е дека се бркаат докторите од јавното здравство и се бркаат да одат во приватните болници“, нагласи претседателот на СДСМ, Венко Филипче.

Македонија | пред 2 дена

Дончиќ: Силна поддршка од СДП Хрватска за СДСМ и Филипче

Социјалдемократската партија на Хрватска силно ја поддржува СДСМ и европската перспектива на Македонија, порача претседателот на СДП, Синиша Хајдаш Дончиќ, на денешната заедничка прес-конференција со претседателот на СДСМ, Венко Филипче.„СДП на Хрватска силно ја поддржува европската перспектива на Македонија, а силно ја поддржуваме и нашата партнерска партија во Македонија СДСМ. Треба да знаете дека Европската Унија е само средство за остварување на вашите национални цели, а тоа е благосостојба, односно полна вработеност и пријатен живот за сите граѓани на Македонија. На тој пат имате искрен пријател во СДП на Хрватска, искрен пријател и во мене. “, рече Хајдаш Дончиќ.Тој посочи дека Европската Унија носи огромни придобивки за напредокот на државата.„Тој пат е трновит и можеби Европската Унија не е идеална, но за мали народи како хрватскиот и македонскиот, во ова глобално опкружување, јас не гледам подобра асоцијација во моментов“, рече Хајдаш Дончиќ.

Македонија | пред 2 дена

Филипче: Предавничката ЗНАМ која е подизведувач на ВМРО се распаѓа!

Претседателот на СДСМ, Венко Филипче, во одговор на новинарско прашање истакна дека владината коалиција е нестабилна и дека движењето ЗНАМ постепено се распаѓа.„Очигледно е дека партијата ЗНАМ, коешто е предавничко движење, луѓе коишто ја предадоа партијата за свои сопствени финансиски интереси, неколку луѓе на врвот на партијата, и се подизведувачи на ВМРО-ДПМНЕ во овие антинародни и спротивно на националните интереси политики, постепено се распаѓа“, рече Филипче.Тој посочи дека граѓаните веќе ја препознаваат вистината и дека се чувствуваат изневерени.„Луѓето очигледно мислеле едно дека ќе биде, но се покажало дека е друго. Ние на тоа предупредивме уште за време на кампањата во 2024 година, но имаше голем број на луѓе коишто тогаш беа разочарани од СДСМ, го дадоа гласот за ЗНАМ и сфатија дека биле прелажени“, истакна Филипче.Претседателот на СДСМ нагласи дека вратите на партијата се отворени за сите.„Затоа на тие луѓе сега им е отворена вратата, не само сега, туку и во изминатиот период и ќе биде и понатаму, да знаат дека ова им е матичната партија којашто никогаш не отстапила од главните идеолошки вредносни политики коишто се тука градени и имплементирани со децении“, порача Филипче.Тој додаде дека актуелната власт го блокира развојот на државата и носи штетни политики.„Не може да мислат луѓето како Христијан Мицкоски и Максим Димитриевски дека некој само ќе седи во Собрание и ќе дига рака додека тие тераат бизниси. А блокиран е европскиот пат. Не се гласаат закони за раст на минималната плата. Не се гласаат закони за повеќе пари во земјоделството. Се носи страшен дискриминирачки, противуставен закон за високото образование. Ништо не се случува во здравството. Луѓето не се најадени“, нагласи Филипче.

Македонија | пред 2 дена

Спречен напад со експлозивна направа пред банка во Париз

Во саботата, во Париз, пред филијала на Bank of America е спречен напад со експлозивна направа благодарение на брзата интервенција на полицијата, која уапсила маж додека се подготвувал да ја активира, јавува AFP, повикувајќи се на извори блиски до истрагата.Инцидентот се случил околу 3:30 часот на улицата Rue de la Boétie, во западниот дел од центарот на градот, пред зградата на банката. Полицајците го привеле осомничениот во момент кога поставувал импровизирана експлозивна направа.Според изворите, направата била составена од контејнер со околу пет литри течност, најверојатно јаглеводород, и механизам за детонација.Истрагата е доверена на антитерористичкиот оддел на париската криминалистичка полиција.

Свет | пред 2 дена

Колку е успешна војната на Доналд Трамп со Иран по еден месец?

Помина еден месец откако Соединетите Американски Држави и Израел започнаа воени операции во Иран, конфликт што ја дестабилизираше регијата, ги наруши глобалните синџири на снабдување и предизвика раст на цените на нафтата. Нападите врз енергетската инфраструктура продолжуваат, додека поморскиот сообраќај низ Ормускиот теснец и натаму е блокиран.Американскиот претседател Доналд Трамп постави пет клучни цели за завршување на војната, но сега најавува дека САД наскоро би можеле да ја „приведат кон крај“ операцијата, иако дел од тие цели остануваат нејасни или неисполнети, пишува Euronews.Според извештаите, американските и израелските удари значително ги ослабнале иранските воени капацитети и ликвидирале десетици високи функционери. Сепак, овие тактички успеси не гарантираат исполнување на стратешките цели, особено ако САД се повлечат додека Исламската револуционерна гарда и натаму има значајна улога во земјата.Една од главните цели беше уништување на иранските ракетни способности. Трамп тврди дека околу 90 проценти од ракетите и лансирните системи се уништени, но Иран и понатаму изведува напади со дронови и ракети, вклучително и врз Израел и американски бази во регионот. Во неодамнешен напад врз база во Саудиска Арабија беа ранети десет американски војници.Паралелно, нападите врз иранската одбранбена индустрија не го спречија Техеран да продолжи со производство и користење на оружје. Аналитичарите сметаат дека оваа цел е тешко остварлива, бидејќи производството на дронови може да се одвива во мали и дисперзирани капацитети.Во однос на морнарицата, САД тврдат дека оштетиле или уништиле над 150 ирански пловила, но поморската закана не е целосно елиминирана, а Ормускиот теснец останува под ризик.Прашањето за нуклеарната програма останува едно од најчувствителните. Иако претходно тврдеше дека програмата е уништена, администрацијата сега предупредува дека Иран бил блиску до производство на нуклеарно оружје. Се разгледува и можноста за преземање на обогатениот ураниум, што би барало сложена и ризична копнена операција.Како дополнителна цел, Трамп ја истакна и заштитата на сојузниците на Блискиот Исток, меѓу кои Израел, Катар, Обединетите Арапски Емирати, Бахреин и Кувајт. Сепак, останува нејасно како ќе се обезбеди стабилноста на поморските рути и безбедноста на овие земји.Иако официјално не е прогласена, темата за промена на режимот во Иран постојано се провлекува во изјавите на Трамп, кој тврди дека иранското раководство е „десеткувано“. Во исто време, Вашингтон наводно води разговори со делови од иранските власти, додека Техеран јавно одбива преговори.Еден месец по почетокот на војната, останува нејасно дали најавениот крај на операцијата ќе донесе стабилизација или ќе отвори нова фаза на неизвесност во регионот.

Свет | пред 2 дена

Филипче: Цените растат - наместо мерки, Мицкоски им се потсмева на граѓаните

Мерките на владата се задоцнети и нецелосни, а премиерот Мицкоски наместо конкретни мерки се потсмева на потребите на граѓаните, нагласи претседателот на СДСМ, д-р Венко Филипче, во одговор на новинарско прашање на денешната прес-конференција.„Мерките се апсолутно задоцнети и не само што се задоцнети туку се и нецелосни и тоа што примерот го кажува на некој начин е потсмевање, со потсмев се однесува кон вистинските потреби на граѓаните. Тие бараат помош, а нема ништо од владата.За какви мерки зборува премиерот? Треба граѓаните да видат нешто навистина што ќе почувствуваат во смисла на бенефит, намалување или ако ништо друго ограничување на цените“, рече Филипче.Тој додаде дека поради ненавремени и задоцнети мерки, цените на храната веќе се енормно пораснати.„Дека мерките се задоцнети тоа е факт. Започна спиралата на покачување на цените на храната. Сè е поскапено, сите основни прехранбени продукти се поскапени, од млечни производи, производи од јајца, зејтин, месни производи, производи, овошје, зеленчук, сè е поскапено за 10, 20, 30%. И да почне да се намалува цената на нафтата, тие цени нема да се вратат назад“, рече Филипче.Притоа, Филипче посочи дека премиерот Мицкоски манипулира со цените на горивата и прави несоодветни споредби со другите земји.„Не гледам што објаснува премиерот кога кажува дека ќе има само мало зголемување на цената на дизелот. Мерките се да има намалување или да има зголемување? Ние сме очигледно единствена земја во регионот и веројатно во Европа што воведува мерки, а цените на горивата растат. Таква земја едноставно нема. Гледаме дека слична цена на горивата има во Хрватска, има во Словенија, но таму минималната плата е од 1.000 до 1.500 евра, а кај нас минималната плата е околу 400 евра“, рече Филипче.

Македонија | пред 2 дена

Филипче: Членството во ЕУ е инструмент за подобар живот

Членството во ЕУ е инструмент за подобар живот, порача претседателот на СДСМ, Венко Филипче, на денешната заедничка прес-конференција со претседателот на СДП Хрватска, Синиша Хајдаш Дончиќ.Филипче посочи дека Европската унија не треба да се гледа како крајна цел, туку како средство за подобрување на квалитетот на живот.„Практично Европската унија да не ја гледаме како наша стратешка цел, туку како инструмент да стигнеме до нашата стратешка цел, а наша стратешка цел е да живееме подобро, поквалитетно, во добри, средени, урбани средини, да има можности за младите, да има високи плати, да има квалитетен живот, младите да не заминуваат од земјата, а старите да имаат достоинствени пензионерски денови“, рече Филипче.Во таа насока, тој истакна дека придобивките од членството во ЕУ се клучни за развојот.„Колку сте помалку развиени, толку имате поголем процент од европските фондови. И тоа што сега ние не можеме да го направиме,  празни места, празни локации, поранешни фабрики – во Хрватска прераснуваат во културни центри, спортски сали, сали за концерти, сали за соодветни активности за деца, за кино-проекции за возрасни и пензионери, луѓе коишто благодарение на европските фондови се платени да се грижат за пензионерите. И тоа е тоа што Европската унија вистински квалитативно го нуди, да го подобриме нашиот живот, поради тоа што, немајќи ги тие кохезиски фондови, ние практично сме оставени на немилост. Значи, ја гледаме Европската унија како инструмент да стигнеме до нашата стратешка цел“, порача Филипче.Претседателот на СДСМ оцени дека за жал во Македонија има влада која ништо не прави за членство во ЕУ.„Жал ми е што имаме влада којашто ништо не прави на таа тема. Сметам дека тоа што сме некако поданички наместени во односите со Србија, Унгарија и практично Русија, не нѐ води никаде. Оваа стагнација, немањето развој, не му носи добро на никого.“ рече претседателот на СДСМ, Венко Филипче.

Македонија | пред 2 дена

Парковите и зеленилото во Охрид секојдневно одржувани во пролетниот период

ЈП „Охридски комуналец“ ги интензивира активностите за одржување на парковите и зеленилото во пролетниот период. Се врши тековно сезонско одржување на зелениот појас покрај магистралниот пат, на потегот Билјанини Извори – Свети Стефан.Во овој период се интензивира машинското косење на тревните површини во градскиот парк, на улицата „АСНОМ“ и на кружните сообраќајници на улицата „Јане Сандански“. Паралелно се одржуваат и другите хортикултурни уредени парковски содржини преку кроење, садење, наводнување и плевење.Со овие редовни активности, ЈП „Охридски комуналец“ го одржува уредениот и зелен изглед на јавните површини, обезбедувајќи пријатна средина за граѓаните и посетителите.

ОО | пред 2 дена