ОРМУТСКИ ТЕСНЕЦ

Ескалација во Персискиот залив: нови инциденти со трговски бродови

Во Ормутски теснец е регистриран трет инцидент во текот на истиот ден, откако во регионот претходно беа пријавени уште два напада врз трговски бродови.Според поморско-разузнавачката компанија Vanguard, третиот брод бил нападнат на околу шест наутички милји од иранскиот брег. Во извештаите се наведува дека пловилото било запрено од Иранската револуционерна гарда, по што му било наредено да фрли сидро. Пријавена е и штета на трупот на бродот и на просториите за сместување на екипажот.Инцидентот следи по претходни информации на британската служба за поморски трговски операции UKMTO, која утрото регистрирала два одделни напади во истиот регион. Во првиот случај била отворена оган од страна на единица на Револуционерната гарда врз контејнерски брод во близина на брегот на Оман, додека кратко потоа бил нападнат и товарен брод во близина на иранските води.Серијата инциденти дополнително ја зголемува напнатоста во една од најважните светски поморски рути, преку која поминува значаен дел од глобалната трговија со нафта.

Свет | пред 14 часа

Нападнат трговски брод на Обединетите Арапски Емирати во Персискиот Залив

Трговскиот брод „Euphoria“, кој плови под панамско знаме и е во сопственост на компанија со седиште во Обединетите Арапски Емирати, утрово бил нападнат во водите на Персискиот Залив.Според информации на британскиот Центар за поморски трговски операции и компанијата „Vanguard“, кон бродот било отворено оган на околу осум наутички милји западно од Иран, во 6:38 часот по координирано светско време. Капетанот веднаш го запрел пловилото, а членовите на екипажот се безбедни и нема пријавена материјална штета.Податоците за движењето на бродот покажуваат дека „Euphoria“ влегол во теснецот околу 1:10 часот по истото време, со крајна дестинација Џеда во Саудиска Арабија.Ова е втор инцидент во Заливот во текот на утрото. Претходно беше објавено дека припадници на Иранската револуционерна гарда отвориле оган кон брод во грчка сопственост, што дополнително ги зголемува тензиите во овој стратешки важен поморски правец.

Свет | пред 15 часа

Воени планери од 30 држави во Лондон: Се крои план за отворање на Ормутскиот теснец

Во Лондон започна дводневен состанок на воени планери од повеќе од 30 земји, на кој се разработува меѓународна мисија за повторно отворање на Ормутскиот теснец и обезбедување на слободна пловидба.Состанокот доаѓа една недела откако повеќе од десет држави, предводени од Велика Британија и Франција, се обврзаа да учествуваат во заедничка одбранбена мисија, чија цел е заштита на клучниот поморски коридор веднаш штом се создадат услови за тоа.Британскиот министер за одбрана Џон Хили изјави дека целта на состанокот е да се преточи постигнатиот дипломатски консензус во конкретен оперативен план.„Нашата задача денес и утре е да го претвориме дипломатскиот консензус во заеднички план со кој ќе обезбедиме слободна пловидба во теснецот и ќе поддржиме траен прекин на огнот“, изјави Хили, додавајќи дека очекува напредок во наредните два дена.Според британските власти, разговорите ќе се фокусираат на дефинирање на воените капацитети, командната структура и распоредувањето на силите во регионот.Мисијата, како што е најавено, би започнала по воспоставување одржлив прекин на огнот, со цел да се гарантира безбедноста на трговските бродови низ Ормутскиот теснец, низ кој минува значаен дел од светската нафта и гас.

Свет | пред 16 часа

Измами со криптовалути во Ормутскиот теснец: нудат „слободен премин“ за Биткоин

Марискс, грчка компанија за управување со поморски ризици, предупреди бродски компании за измамнички пораки во кои се нуди „безбеден премин“ низ Ормутскиот теснец во замена за плаќање во криптовалути.Според извештаите, непознати лица се претставувале како претставници на иранските власти и барале такси за транзит да се платат во Биткоин или Tether, за да се одобри премин на бродовите низ теснецот. Mарискс нагласува дека станува збор за измама и дека иранските власти не стојат зад овие пораки.До предупредувањето доаѓа во период на зголемени тензии во регионот, при што САД вовеле ограничувања за ирански пристаништа, додека Иран повремено го ограничува поморскиот сообраќај низ овој клучен светски трговски коридор.Во исто време, во регионот се регистрирани инциденти со пукање кон бродови, а стотици пловила со илјадници морнари остануваат заглавени во зоната на ризик.Компанијата предупредува дека ваквите измами може дополнително да ја зголемат конфузијата и ризикот за бродските екипажи кои се обидуваат да поминат низ една од најчувствителните поморски рути во светот.

Свет | пред 1 ден

Иранска ТВ: Ормутскиот теснец повторно затворен, потребно одобрување за премин

Иранската државна телевизија ИРИБ објави дека Ормутскиот теснец повторно е затворен, наведувајќи дека за секој премин низ клучниот поморски коридор ќе биде потребно одобрување од иранските власти.Во соопштение на иранската армија се наведува дека теснецот „се вратил во претходната состојба“, откако Соединетите Американски Држави одбиле да ја укинат поморската блокада на иранските пристаништа во Персискиот Залив.Овој развој следува веднаш по краток период на зголемен сообраќај низ теснецот, кој според „Ројтерс“ претставувал прво поголемо движење на бродови по седум недели од почетокот на конфликтот.Иран претходно ја ублажи блокадата по стапувањето во сила на десетдневното примирје меѓу Израел и Либан, овозможувајќи ограничен премин на танкери и трговски бродови.Американскиот претседател Доналд Трамп ја поздрави таа одлука, но истовремено потврди дека САД нема да ја укинат блокадата за бродовите што влегуваат и излегуваат од иранските пристаништа.Ормутскиот теснец, низ кој минува значителен дел од светската нафта, повторно станува жариште на геополитичка тензија, со директни импликации врз глобалните енергетски пазари и безбедноста на поморскиот сообраќај.

Свет | пред 4 дена

Иран поставува услови за Ормутскиот теснец: „Ќе одлучува состојбата на терен, не социјалните мрежи“

Иран поставува нови услови за користење на Ормутскиот теснец, испраќајќи јасна порака дека контролата врз една од најважните светски нафтени рути ќе зависи од развојот на ситуацијата на терен, а не од јавните изјави или притисоци.Претседателот на иранскиот парламент и шеф на преговарачката делегација, Мохамад Багер Галибаф, остро ги отфрли изјавите на американскиот претседател Доналд Трамп, оценувајќи дека „изнесол седум тврдења за еден час, од кои сите биле лажни“.„Нема да победат со лаги, ниту ќе постигнат нешто во преговорите“, изјави Галибаф.Во однос на Ормутскиот теснец, тој порача дека евентуалното продолжување на американската поморска блокада директно ќе влијае врз слободата на пловидба.„Ако продолжи блокадата, теснецот нема да остане отворен. Пловидбата ќе се одвива по одредени рути и со иранско одобрување. Дали ќе биде отворен или затворен ќе зависи од реалната состојба, а не од социјалните мрежи“, рече Галибаф.Изјавите од Техеран се разликуваат и по нијанси. Додека министерот за надворешни работи Абас Арагчи најави дека теснецот ќе остане отворен за комерцијални бродови, воени извори посочуваат дека нема да биде дозволен за воени пловила.Според информации од ирански извори, се разгледува и можноста теснецот да остане отворен само во периодот на примирјето, кое трае уште неколку дена, како и воведување на строго контролирани поморски рути.Иранската Револуционерна гарда веќе објави мапа со нови пловни коридори кои минуваат блиску до иранскиот брег, што укажува на намерата за воспоставување нов режим на управување со теснецот.Овој пристап се толкува како обид Ормутскиот теснец да се искористи како силен преговарачки адут, вклучително и можност за воведување такси за премин, со што Иран би вршел дополнителен притисок во актуелната геополитичка криза.

Свет | пред 4 дена

Иран повторно го отвори Ормускиот теснец за комерцијален сообраќај

Иранскиот министер за надворешни работи Абас Арагчи објави дека Ормускиот теснец е повторно отворен за целиот комерцијален поморски сообраќај.Според неговата објава на социјалната мрежа X, одлуката е донесена во согласност со тековниот прекин на огнот меѓу Израел и Либан и ќе важи до истекот на тој договор.Тој наведе дека сите трговски бродови ќе можат непречено да минуваат низ теснецот, по координирани рути утврдени од надлежната иранска поморска и пристанишна администрација. Арагчи истакна дека оваа мерка е дел од поширокиот договор поврзан со стабилизацијата на регионалните безбедносни услови.

Свет | пред 5 дена

Бродови под санкции поминале низ Ормускиот теснец по почетокот на американската блокада

Податоци за следење на бродови покажуваат дека четири пловила поврзани со Иран поминале низ Ормутскиот теснец и покрај почетокот на американската поморска блокада.Два од бродовите претходно влегле во ирански пристаништа. Товарниот брод „Christianna“ поминал низ теснецот во понеделник, по почетокот на блокадата, откако претходно бил закотвен во иранското пристаниште Бандар Имам Хомеини.Бродот „Rich Starry“, кој се наоѓа под американски санкции поради трговија поврзана со Иран, во текот на ноќта пловел кон исток од Шарџа во Обединетите Арапски Емирати, минувајќи низ теснецот.Танкерот „Murlikishan“, исто така под санкции, отпловил од кинеското пристаниште Ланшан и се движел кон запад низ теснецот, а последната регистрирана позиција му била источно од иранскиот остров Кешм.Уште еден танкер, „Elpis“, поминал низ теснецот кон исток во вторник по пристигнување од иранското пристаниште Бушер, при што неговата крајна дестинација не е позната.Се наведува дека е можно дел од овие бродови да користеле лажни податоци за локација, познати како „спуфинг“, со цел да го прикријат своето движење.Американската војска претходно соопшти дека од понеделник ќе го блокира целиот поморски сообраќај што влегува во и излегува од иранските пристаништа, но дека нема да го попречува слободниот премин на бродови низ Ормутскиот теснец кон други дестинации.

Свет | пред 1 седмица

САД подготвени да одмрзнат ирански имот за отворање на Ормутскиот теснец

САД се подготвени да одмрзнат дел од иранскиот имот во странски банки како дел од напорите за отворање на Ормутски теснец, тврди висок ирански извор.Според информациите, средствата се наоѓаат во банки во Катар и други земји, а нивното одмрзнување се оценува како знак за „сериозност“ на Соединети Американски Држави во постигнување договор со Иран.Изворот, кој побарал анонимност, посочил дека овој потег е директно поврзан со обезбедување безбеден премин низ Ормутскиот теснец – клучна артерија за глобалната трговија со нафта и гас.Засега, американската страна јавно не ги потврдила овие информации.Преговорите меѓу САД и Иран започнуваат во Исламабад, каде прашањето за слободна пловидба низ Ормут се очекува да биде една од главните теми.

Свет | пред 1 седмица

Аналитичар тајно влегол во Ормутскиот теснец: Иран пропушта танкери

Аналитичар од Волстрит спровел несекојдневна и ризична мисија во Ормутскиот теснец, со цел од терен да ја провери наводната иранска блокада на еден од најважните светски енергетски коридори.Според извештајот објавен од „Телеграф“, аналитичарот, кој работи за компанијата „Цитрини Рисрч“ под шифра „Аналитичар број 3“, со себе носел кубански пури, никотински кесички и 15.000 долари во готово, со кои воспоставил контакт со ирански криумчари и обезбедил пловило за движење во теснецот.Наместо современа технологија, користел едноставна опрема – бележник и мобилен телефон, додека над него летале беспилотни летала од типот „Шахид“. Неговите набљудувања покажуваат дека низ Ормутскиот теснец минуваат повеќе танкери отколку што се претпоставува, што укажува дека блокадата не е целосна.Во извештајот се наведува дека Иран, наместо целосно да го затвори теснецот, практично го контролира со систем на услови и наплата за премин, при што дел од државите веќе се прилагодуваат на новата реалност и преговараат за слободен премин.Аналитичарот опишува и безбедносни инциденти, вклучително и краткотрајно приведување од страна на оманските служби, кои му го одзеле телефонот, но подоцна бил пуштен без објаснување.Според „Цитрини Рисрч“, Ормутскиот теснец и натаму функционира, но примарно според правилата на Иран, што му дава силна геополитичка предност во актуелниот конфликт.Во анализата се заклучува дека Иран ја гледа ситуацијата како стратегиска добивка, бидејќи во повеќето сценарија успева да оствари корист – освен во случај на целосен колапс на режимот.

Свет | пред 1 седмица

Иранска револуционерна гарда со упатства: Како бродовите да избегнат мини во Ормутскиот теснец

Иран издаде конкретни упатства за пловидба низ Ормутски теснец поради зголемениот ризик од морски мини, предупредувајќи дека бродовите треба да користат алтернативни рути за да избегнат потенцијална опасност.Во соопштение на Иранска револуционерна гарда, пренесено од државните медиуми, се наведува дека новите насоки се воведуваат со цел „почитување на принципите на поморска безбедност“ и заштита на пловилата од контакт со мини.Според препораките, бродовите што влегуваат од Оманско Море треба да се движат северно од островот Ларак, а потоа да продолжат кон Персиски Залив.За пловилата што излегуваат од Персискиот Залив, се препорачува обратна рута – движење јужно од островот Ларак, со насока кон Оманското Море.Овие мерки доаѓаат во момент кога регионот останува високо нестабилен, а Ормутскиот теснец – низ кој поминува значителен дел од светската нафта – повторно е под засилена контрола и безбедносен ризик.Експертите предупредуваат дека и минимални нарушувања во пловидбата низ овој стратешки коридор можат да имаат сериозни последици врз глобалните енергетски пазари и транспортот.

Свет | пред 1 седмица

Десетици танкери блокирани кај Ормутскиот теснец

Десетици нафтени танкери утринава остануваат закотвени од двете страни на Ормутски теснец, додека иранската блокада на еден од најважните енергетски коридори во светот продолжува.Податоците од сервисите за следење на поморскиот сообраќај покажуваат дека голем број бродови мируваат во близина на бреговите на Обединетите Арапски Емирати и Оман, чекајќи можност за безбедно минување.Ормутскиот теснец е од клучно значење за глобалната енергетска стабилност, со оглед дека низ него поминува околу една четвртина од светската поморска трговија со нафта, што го прави исклучително чувствителна точка во време на конфликт.Американскиот претседател Доналд Трамп се закани со напади врз иранската енергетска инфраструктура доколку не се обнови слободата на пловидба.Конфликтот меѓу САД, Израел и Иран трае повеќе од еден месец, откако кон крајот на февруари беа изведени напади врз ирански воени и нуклеарни цели, по што следеше одговор со ракетни и беспилотни напади врз цели во регионот.Судирите постепено се проширија и на поморскиот сообраќај, при што Ормутскиот теснец стана една од главните точки на тензија.И покрај повремените сигнали за можни преговори, засега нема навестувања за брзо смирување на ситуацијата, а неизвесноста околу снабдувањето со нафта продолжува да врши притисок врз глобалните пазари.

Свет | пред 2 седмици

Кинески бродови поминаа низ Ормутскиот теснец: „Затворен е само за непријателите“

Два контејнерски брода на кинескиот бродски гигант Cosco успешно поминаа низ Ормутскиот теснец, и покрај сериозните безбедносни тензии и драматичниот пад на поморскиот сообраќај во регионот.Станува збор за бродовите „CSCL Indian Ocean“ и „CSCL Arctic Ocean“, кои во краток временски интервал го преминале теснецот и продолжиле кон Малезија, покажуваат податоците од системите за следење на поморски сообраќај.Овој потег доаѓа откако Cosco неодамна повторно ги активираше резервациите за транспорт кон земјите од Персискиот Залив, откако претходно ги суспендираше поради војната во регионот.Клучната порака доаѓа од иранските власти, кои тврдат дека Ормутскиот теснец не е целосно затворен, туку дека „е затворен само за непријателите“, додека за „пријателските земји“ е обезбеден безбеден премин.И покрај ваквите тврдења, податоците покажуваат дека сообраќајот низ оваа стратешка рута, преку која се транспортира значителен дел од светската нафта, е намален за околу 95% од почетокот на конфликтот.Дополнително, ирански парламентарен одбор веќе одобрил предлог-закон за воведување такси за транзит низ теснецот, што може дополнително да ги заостри односите и да влијае врз глобалните енергетски текови.

Свет | пред 3 седмици

Фон дер Лајен: Клучниот енергетски правец мора да биде безбеден, потребно е решение преку преговори

Претседателката на Европската комисија, Урсула фон дер Лајен, повика на итно дипломатско решение за војната со Иран, нагласувајќи дека стабилноста на Блискиот Исток е од клучно значење за целиот свет.Говорејќи во Канбера, Австралија, таа истакна дека единствениот одржлив излез од конфликтот е преку преговори и запирање на непријателствата.„Од најголема важност е да се дојде до решение постигнато преку преговори, кое ќе стави крај на конфликтот што го гледаме на Блискиот Исток“, изјави фон дер Лајен.Таа предупреди дека војната веќе има сериозни последици врз глобалната економија, особено преку растот на цените на енергенсите, што директно ги погодува економиите, компаниите и граѓаните.Посебен акцент стави на Ормутскиот теснец, кој го опиша како клучен енергетски и трговски правец за снабдување со нафта и гас на глобално ниво.Фон дер Лајен најави дека дел од земјите членки на Европската унија се подготвуваат да помогнат во обезбедување на овој стратешки коридор, откако ќе заврши конфликтот.„Сите ги чувствуваме последиците – од цените на гасот и нафтата до влијанието врз нашите општества. Затоа овој правец мора да биде безбеден“, порача таа.

Свет | пред 4 седмици

Два индиски танкера поминаа низ Ормускиот теснец

Два танкера за течен гас (LPG) што пловат под индиско знаме денеска успеаја да поминат низ Ормутскиот теснец, и покрај тоа што целиот сообраќај во критичниот воден пат останува блокиран, покажуваат податоците од платформата за следење на бродови „МаринеТрафик“.Првиот танкер, „Пајн Гас“ (Pine Gas), ја помина транзитната рута, а кратко потоа и танкерот „Џаг Васант“ (Jag Vasant), кој се наоѓаше во близина. Според платформата LSEG, „Пајн Гас“ ја испрати пораката „Индиски брод и екипаж“.Иако овие два танкера ја продолжиле пловидбата, стотици други бродови остануваат заглавени во Персискиот Залив, а илјадници морнари се принудени да останат усидрени поради тековната американско-израелска конфронтација со Иран.

Свет | пред 4 седмици

Германски министер за надворешни работи: НАТО не треба да го обезбедува Ормускиот теснец

И Германија со контра реплика до претседателот на САД, Доналд Трамп, по неговото барање НАТО земјите да се вклучат во обезбедувањето на Ормускиот теснец.Како што пренесуваат светските медиуми, германскиот министер за надворешни работи, посочил оти НАТО не треба да игра улога во обезбедувањето на Ормускиот теснец откако американскиот претседател Доналд Трамп предупреди дека Организацијата на Северноатлантскиот договор ќе се соочи со „многу лоша“ иднина ако не помогне во деблокирањето на морскиот пат контролиран од Иран.CNN објави дека германскиот министер за надворешни работи Јохан Вадефул се обратил на медиумите пред состанокот на министрите за надворешни работи на ЕУ во Брисел и рекол дека Германија не гледа потреба НАТО да „преземе одговорност“ за Ормускиот теснец.Вадефул рече дека Германија е наместо тоа за воведување санкции врз оние кои се „одговорни“ за блокирање на клучниот теснец.Воедно и претстаавници на германската влада предупредија дека проширувањето на борбените операции би носело големи ризици за партнерите на Блискиот Исток и Заливот, пишува Анадолија.„Тоа не е војна на НАТО. НАТО е одбранбен сојуз“, изјави портпаролот на владата Стефан Корнелиус пред новинарите во Берлин.„Германската влада, исто така, мора јасно да ја процени ситуацијата на територијата на Алијансата и сопствената позиција за учество во оваа војна“, додаде тој.Тој нагласи дека ескалацијата на конфликтот би ги загрозила регионалните партнери. „Проширувањето на борбените операции би носело големи ризици за другите партнери на Блискиот Исток и Заливот“, рече тој.Германската влада претходно неколку пати изјави дека нема да учествува во американската војна против Иран.

Свет | пред 1 месец

Во Ормутскиот теснец досега нападнати 10 бродови

Според податоците од MarineTraffic, кои во петок ги анализираше AFP, од понеделник се забележани само девет комерцијални бродови – танкери, товарни и контејнерски бродови – кои повремено ја прикривале својата положба. Поморската безбедносна компанија Vanguard соопшти дека бродот Mussafah 2 бил погоден со два проектили додека се обидувал да им помогне на контејнерскиот брод Safeen Prestige, кој два дена претходно бил погоден со проектил.Скорошните извештаи за инциденти укажуваат дека бродовите кои пружаат помош на претходно погодените пловила исто така можат да се соочат со зголемен ризик од повторни напади“, предупреди во саботата Заедничкиот поморски информативен центар (JMIC), кој го управува Западната поморска коалиција.Забележаниот образец на напади врз закотвени бродови, пловила во движење и помошни бродови укажува на кампања насочена кон создавање оперативна несигурност и одвраќање на рутинското комерцијално движење, а не на континуиран обид за потопување на пловила.Нападите со дронови и ракети за кои е одговорна Иранската револуционерна гарда не се секогаш потврдени од независни извори – некои се потврдуваат со денови, а инволвираните пловила не се секогаш идентификувани. Бројот на жртви може да варира.Иран ја извезува сопствената нафта преку Ормутскиот теснец, но неговите намери остануваат нејасни. Генерал од Револуционерната гарда на 2 март предупреди дека Иран ќе „го запали секој брод“ кој ќе се обиде да помине низ теснецот и ќе ја блокира целокупната нафтена трговија од Заливот. Меѓутоа, иранскиот министер за надворешни работи Абас Арагчи изјави дека „нема намера“ да го затвори теснецот.

Свет | пред 1 месец

Иран: Ќе ги гаѓаме бродовите на САД, Израел и Европа ако поминат низ Ормутскиот теснец

Иранска револуционерна гарда соопшти дека Ормутскиот теснец, една од најважните светски поморски рути, е затворен само за бродови од САД, Израел, Европа и други западни сојузници.Претходно рековме дека, во согласност со меѓународното право и резолуциите, Исламската Република Иран во време на војна ќе има право да го контролира преминот низ Ормутскиот теснец“, соопшти IRGC, пренесува државната телевизија IRIB.Тие додадоа дека бродовите кои припаѓаат на САД, Израел, Европа и нивните сојузници, ако бидат забележани, сигурно ќе бидат погодени.Ормутскиот теснец практично е затворен откако САД и Израел започнаа заедничка операција против Иран, што доведе до нагло зголемување на цените на нафтата и предизвика загриженост за можните последици врз глобалната економија.

Свет | пред 1 месец

Проектил погоди брод во Ормутскиот теснец

Товарен контејнерски брод беше погоден од проектил во Ормутскиот теснец, северно од Оман, објави британската агенција UK Maritime Trade Operations (UKMTO), која ја следи безбедноста на комерцијалната пловидба. Според информациите на Sky News, станува збор за британски брод.Проектилот го погоди бродот и предизвика пожар во машинската сала. UKMTO соопшти дека екипажот го напуштил бродот, сите членови на екипажот се спасени и нема повредени. Засега нема информации за еколошки последици, а властите ја истражуваат ситуацијата.Нападот се случи откако претставници на Иранската револуционерна гарда (IRGC) во последните денови се заканија дека ќе нападнат бродови кои ќе се обидат да поминат низ Ормутскиот теснец.

Свет | пред 1 месец

Иранската гарда: Брод кој ќе се обиде да мине низ Oрмутскиот теснец ризикува да биде погоден

Иранската Револуционерна гарда денеска изјави дека го контролира Ормутскиот теснец, клучна морска рута за транспорт на нафта и гас, и дека секој брод кој ќе се обиде да мине низ тој пловен пат ризикува да биде оштетен од проектили или залутани дронови.Во моментов Хормушкиот теснец е под целосна контрола на морнарицата на Исламската Република“, изјави официјалниот претставник на морнарицата на Револуционерната гарда, Мохамад Акбарзаде, за новинската агенција Фарс.Американскиот претседател Доналд Трамп вчера изјави дека американската морнарица е подготвена да ги следи танкерите со нафта низ оваа клучна заливска морска рута.

Свет | пред 1 месец

Иран: Не планираме затворање на Ормускиот Теснец

Иран засега не планира да го затвори Ормускиот Теснец по нападите од САД и Израел, изјави иранскиот министер за надворешни работи Абас Арагачи во разговор за Ал Џезира.Во оваа фаза не планираме да го затвориме Ормускиот Теснец, ниту да преземеме какви било мерки што би ја нарушиле пловидбата“, изјави шефот на иранската дипломатија.Иран произведува околу 3,3 милиони барели нафта дневно и околу 1,3 милиони барели кондензат и други течни јаглеводороди. Во саботата беа регистрирани експлозии и на иранскиот остров Харг, на северот од Персискиот Залив, каде се наоѓаат терминалите преку кои се извезуваат околу 90 проценти од иранската нафта. Најголем купувач на иранската нафта е Кина.Тензиите на Блискиот Исток нагло ескалираа откако американските и израелските сили во саботата извршија напади врз Иран. Техеран возврати со напади врз Израел и врз американски бази во земјите долж Персискиот Залив, вклучително и во големите производители на нафта и гас – Катар, Кувајт и Обединетите Арапски Емирати.Во меѓувреме, повеќе сопственици на танкери, нафтени компании и трговски куќи го прекинаа транзитот на нафта, гориво и течен природен гас низ теснецот, кој во голем дел се наоѓа во иранските територијални води.Сателитските податоци покажаа зголемен број бродови закотвени во близина на клучните пристаништа на Обединетите Арапски Емирати, како што е Фуџајра. Група поморски осигурителни компании, меѓу кои и Gard, Skuld, NorthStandard, London P&I Club и American Club, соопштија дека поради конфликтот го откажуваат покритието за воени ризици за бродовите во регионот на Персискиот Залив.Низ Ормускиот Теснец дневно минуваат околу 20 милиони барели нафта и приближно една петтина од испораките на течен природен гас, главно од Катар, според податоците на Меѓународната агенција за енергија од 2024 година.

Свет | пред 1 месец

Танкери заглавени во Заливот: Осигурителните компании го укинуваат покривањето за воен ризик

Неколку осигурителни компании соопштија дека ќе го укинат покривањето за воен ризик за бродовите поради конфликтот во Иран и Персискиот Залив.Осигурителните компании, меѓу кои се Gard, Skuld, NorthStandard, лондонскиот P&A клуб и Американскиот клуб, соопштија дека укинувањето на осигурувањето од воен ризик за бродовите ќе стапи на сила од 5 март, пренесува Ројтерс.Според соопштението, осигурувањето од воен ризик ќе биде укинато за бродовите во иранските води, како и во Персискиот Залив и соседните води.Јапонската осигурителна група MS&AD изјави за Ројтерс дека привремено суспендирала низа полиси за осигурување кои покриваат воени ризици во водите околу Иран и Израел, како и соседните земји.Тензиите на Блискиот Исток ескалираа откако американските и израелските сили започнаа напади врз Иран за време на викендот, по што Техеран ја затвори пловидбата низ Ормускиот теснец, клучна точка за глобалниот проток на нафта и гас.Неколку сопственици на танкери, големи нафтени компании и трговски куќи од тогаш ја запреа испораката на сурова нафта, гориво и течен природен гас преку теснецот, а сателитските податоци покажуваат дека бродовите се собираат во близина на клучни пристаништа во Обединетите Арапски Емирати, како што е Фуџеира.Податоците за следење на бродови од вчера покажуваат дека најмалку 150 танкери се закотвени во отворените води зад Ормускиот теснец.

Свет | пред 1 месец

Зошто е толку важен Ормутскиот Теснец

Бродови кои пловат низ Ормутскиот Теснец примаат пораки од Иранската револуционерна гарда во кои стои дека „ниеден брод нема дозвола за поминување“. Ова го изјавил службеник од морската мисија на Европската унија Aspides, пишува Reuters.Ормутскиот Теснец е една од најважните светски патеки за извоз на нафта. Тој ги поврзува најголемите производители на нафта во Персискиот залив – меѓу кои Саудиска Арабија, Иран, Ирак и Обединетите Арапски Емирати – со Оманскиот залив и Арапското Море.Истиот службеник напоменал дека Иран сè уште официјално не ја потврдил таквата наредба. Сепак, Техеран со години се заканува со блокада на овој тесен пловен пат, наведувајќи го како можен одговор на било каков напад.Зошто е толку важен?Ормутскиот Теснец е еден од најважните нафтени коридори во светот и има исклучително геостратешко значење. Светската економија во голема мера зависи од протокот на нафта низ овој пат.Теснецот се наоѓа помеѓу Оман и Иран, го поврзува Персискиот залив на север со Оманскиот залив на југ и Арапското Море. На најтесниот дел е широк само 33 километри, а самиот бродски пловен пат изнесува само 3 километри.Преку Ормутскиот Теснец поминува околу 20% од вкупната светска потрошувачка на нафта. Според податоците на аналитичката компанија Vortex, помеѓу почетокот на 2022 година и минатиот месец, низ теснецот дневно протекувале меѓу 17,8 и 20,8 милиони барели сурова нафта, кондензат и гориво.Членките на OPEC (Саудиска Арабија, Иран, Обединетите Арапски Емирати, Кувајт и Ирак) најголемиот дел од својата сурова нафта ја извезуваат токму преку овој пат, главно кон азиските пазари. За безбедноста на морската трговија во овој регион одговорна е Петтата флота на американската морнарица, со седиште во Бахреин.Затворањето на теснецот би предизвикало нагло покачување на цените на нафтата и бран на инфлација, како во САД, така и глобално.Иранската нафта исто така излегува на светскиот пазар преку истата рута, а од неговото затварање особено би била погодена Кина, втората најголема светска економија, која купува речиси 90% од иранскиот извоз на нафта, и покрај меѓународните санкции.

Свет | пред 1 месец

Затворен Ормутскиот Теснец, Иран ја блокира клучната нафтена рута

Иранската револуционерна гарда го затвори Ормутскиот Теснец, што доведува до зголемување на цените на нафтата и преиспитување на транзитните политики.Иранската револуционерна гарда упати порака до бродовите дека не можат да поминат низ Ормутскиот Теснец, пренесува агенцијата „Тасним“.Претходно беше соопштено дека поголем број танкери за нафта или гас ја избегнуваат пловидбата низ Ормутскиот Теснец, кој го поврзува со нафта богатиот Персиски Залив со Индискиот Океан.Танкери со нафта и гас се натрупуваат и внатре и надвор од влезот во теснецот, при што некои сопственици ја преиспитуваат својата политика за транзит, а други одобруваат пловидба на своите бродови, но со зголемена претпазливост, пренесуваат западни медиуми.Ормутскиот Теснец е едно од најголемите жаришта во периоди на тензии со Иран, бидејќи секојдневно низ оваа рута поминува една петтина од светската морска нафта и течен природен гас.Што ќе се случи со цената на нафтата?До поголем и подолготраен раст на цените на нафтата би дошло доколку биде прекината нафтената инфраструктура или испораките, на пример поради попречување на танкерскиот сообраќај низ Ормутскиот Теснец.Низ Ормутскиот Теснец секој ден поминува околу 20% од светската испорака на нафта. Извозниците од Блискиот Исток – Саудиска Арабија, Ирак и Обединетите Арапски Емирати – најголемиот дел од извозот го испраќаат токму по овој правец.Аналитичарите претходно наведоа дека Иран нема мотив да се обиде да го затвори теснецот, бидејќи со тоа би го прекинал сопствениот извоз и би му наштетил на својот единствен голем купувач – Кина. Сепак, според сè изгледа Ормутскиот Теснец е затворен.Поширока војна што би вклучувала иранско попречување на танкерскиот сообраќај би можела да ја подигне цената на суровата нафта над 90 долари за барел.

Свет | пред 1 месец