ПУЛС

Случајот „Пулс“ продолжува: Одбраната на министерот Шанбан Салиу ќе даде воведно излагање

Судската постапка за кочанската дискотека „Пулс“, трагедија во која животот го загубија 63 лица, а стотици беа повредени, продолжува со ново рочиште на кое треба да бидат дадени воведните зборови на одбраната на обвинетите поранешни раководители на Дирекцијата за заштита и спасување.На обвинителната листа се наоѓа и актуелниот министер без ресор Шабан Салиу, кој денес е задолжен за интеграција и за имплементација на Стратегијата за Ромите. Обвинението се однесува на времето кога тој раководел со Дирекцијата за заштита и спасување — период од 2008 до 2017 година.Покрај него, обвинети се и неговите наследници на функцијата:– Ајдан Џафероски (2017–2020),– Беким Мазуки (2020–2024),– Цветан Селман, кој беше именуван за директор во август годинава, но по трагедијата ја напушти функцијата и се врати на работа во Кочани.Во постапката е опфатен и инспектор од ДЗС, кому обвинението му припишува пропусти во надзорните постапки.По воведните зборови на одбраната на раководството на ДЗС, треба да следуваат воведни излагања на обвинетите претставници на Министерството за економија, по што судот ќе премине на разгледување на доказите.

Македонија | пред 3 месеци

Во Идризово продолжува судењето за „Пулс“: Ваљон Сараќини и Крешник Бектеши ќе дадат воведни зборови

Судењето за трагедијата во дискотеката „Пулс“ од Кочани продолжува денеска во Идризово, во атмосфера на засилени безбедносни мерки и силен интерес од јавноста. Процесот се води за најтешката цивилна катастрофа во поновата историја на државата, во која загинаа 63 лица, а повеќе од 200 беа повредени.На претходното рочиште дел од обвинетите ја оспорија обвинителната постапка, тврдејќи дека е нецелосна и дека нема прецизни докази кои индивидуално ги поврзуваат со трагедијата.Досега воведни говори дадоа обвинителството и одбраните на првообвинетиот Дејан Јованов, сопственикот на „ММММ Кафе“ Митко Стојанов, обезбедувачот Стојанчо Димитриев и сопственикот на објектот Гроздан Милковски. Повеќето од нив ја отфрлија одговорноста и го доведоа под прашање целиот обвинителен акт.Следни ќе бидат поранешните министри Ваљон Сараќини и Крешник Бектеши, потоа службениците од Министерството за економија, како и пазарните инспектори Миле Ампов, Блашка Евтимова, Весна Кузмановска и Емил Митев.Воведно обраќање допрва треба да даде и Александар Нацев, сопственик на агенцијата за обезбедување „Рубикон“, чииот предмет беше споен со процесот непосредно пред почетокот на судењето.Обвинителството, составено од тим од 15 јавни обвинители, најави дека низ доказите ќе покаже дека „Пулс“ бил смртоносна стапица уште од првиот ден – производ на систематска негрижа, нелегална градба, пропуштени контроли и институционални пропусти кои довеле до катастрофа.На обвинителната клупа се 37 лица – сопственици, управители, инспектори, градоначалници, обезбедувачи и државни службеници.

Македонија | пред 3 месеци

(Видео) „Срам ми е што сум дел од оваа држава“ – потреснен говор на мајката на загинатата Надица во Собранието

Габриела Наунова, мајка на загинатата Надица Наунова, остро им се обрати на пратениците за време на Анкетната комисија во Собранието, обвинувајќи ги за манипулации, незаинтересираност и децениски системски пропусти.„Прво сакавте да манипулирате со нас родителите, тоа беше срамно од ваша страна. И од државата... Девет месеци никој од вас не се појави во Кочани да подаде рака на нас, да ни изрази сочувство, особено само писменото обраќање... Кај некој отидовме и лично да се видиме и не ни оставија убав впечаток“, рече Наунова.Таа нагласи дека борбата за вистинска правда не е само за нивните деца, туку и за сите други.„Велам ние бараме вистинска правда за нашите деца, но и за вашите деца... Дали сте се запрашале некогаш дали треба да го смениме системот од корен? Да, треба. Ние како обични граѓани стоиме пред вас, не само родители. 35 години гледаме дека системот не функционира.“Во своето излагање Наунова остро го критикуваше односот на институциите и предупреди на последиците од трајната неефикасност.„Ако не го смениме системот, нашите деца ќе се иселат како и ние. Срам ми е што сум дел од оваа држава. Дозволуваме секој ден да гледаме убиства, дозволуваме секој ден да гинат млади личности. Да се иселуваат... а од што? Не е од нас! Од вас е!“, им порача таа на пратениците.

Македонија | пред 3 месеци

(Видео) Си седите на телефони, си шушкате, замачкувате очи“ - Павловска од „Кој е следен“ разочарана од пратениците на анкетката за „Пулс“

Анастасија Павловска од граѓанската иницијатива „Кој е следен?“ остро реагираше на однесувањето на дел од пратениците за време на седницата на Анкетната комисија, опишувајќи го како понижувачко и целосно непочитувачко кон родителите на жртвите од трагедијата во Кочани.„Оваа страна покажа нула заинтересираност за целата дискусија која се одвиваше. Ве гледам, си седите на вашите мобилни телефони, си шушкате меѓусебно. Кога се прибраа членовите на медиумите, а голем дел си заминаа – како мислите дека мене, како млад човек во државава, каква слика ми создава? Дека вие ќе можете да соработувате и вистински да се изборите за правда за овие луѓе што собрале храброст да дојдат да се обратат?“, рече Павловска.Таа праша дали навистина некој очекува по вакво однесување младите да стекнат доверба во институциите:„Дали сметате дека јас по денеска ќе излезам од тука и ќе речам: ‘Да, соработуваат пратеничките групи, гледаме дека покажаа емпатија и дека им е важно што имаат да кажат овие родители’? Не. Мене ова ми личи дека е само некоја процедура, само да се замачкаат очите дека ‘еве, конечно ви дадовме Анкетна комисија’. Навистина е многу разочарувачки.“Павловска истакна дека внимателно ги следела емоциите на пратениците, особено во моментите кога зборуваа двете мајки од Кочани, и додаде дека однесувањето е „засрамувачко“.На крајот, упати директен повик:„Ве молам, пишете им на сите ваши колеги да се вратат назад во оваа сала!“

Македонија | пред 3 месеци

Спасовски: Игнорирањето е најлош можен пристап кон семејствата на загинатите

„Ова е навистина тешка дебата во којашто се мешаат разумот и емоциите, меѓутоа во моменти кога родителите собираат најголема сила за да учествуваат во дебатата, на нас не треба да ни биде тешко ништо. Треба да бидеме потрезени и поразумни во дебатата ако сакаме да допринесеме барем малку да се смени системот“, рече координаторот на пратеничката група на СДСМ, Оливер Спасовски, на денешната дебата пред анкетната комисија за пожарот во дискотеката „Пулс“ во Кочани.Спасовски нагласи дека трагедијата ги погоди не само семејствата на жртвите, туку и целата заедница: „Загуба има и градот Кочани, државата, изгубени се цели генерации, не само на починатите, туку и на оние кои преживеаја и кои останаа со сериозни повреди“, потенцираше Спасовски.Тој нагласи дека анкетната комисија има задача да го испита функционирањето на системот и институциите, но дека кривичниот прогон останува во надлежност на Јавното обвинителство.Спасовски повика на анализа на законските решенија и сите системски пропусти: „Од 16 март до денеска, најлесно ни е да кажеме ‚системот не функционира‘, но не одговараме на прашањето што направивме за да почнеме да го менуваме системот кој не ни функционира“.Тој потенцираше дека е неопходно да се ревидираат закони и правила кои оставиле простор за манипулација: „Сè што не го дефинираме во законска рамка остава простор за манипулација и различни толкувања, што нè доведува во сериозен системски проблем. Временската рамка сè уште овозможува конкретни акции. Сè уште има време декларативното да го претвориме во дела“, додаде тој.Спасовски истакна дека барањата на родителите и семејствата мора да бидат разгледани и аргументирано образложени:„Игнорирањето е најлош можен пристап, особено кон семејствата на загинатите. Системот ќе го градиме со заедништво и солидарност. Комисијата и секоја друга расправа не смеат да бидат политизирани. Ова е настан во кој нема и не треба да има политика“, истакна Спасовски.Тој потврди дека поддршката на пратеничката група на СДСМ и коалицијата ќе биде целосна во процесот:„Поддршката на пратеничката група на СДСМ и коалицијата ќе ја имате во целиот процес, заедно со законодавниот дом и парламентарното мнозинство, доколку навистина сакаме да направиме промени. Повикувам по завршување на дебатата да седнеме заедно со родителите и заеднички да ги напишеме заклучоците и едногласно да ги усвоиме, за да знаеме како да постапуваме во идниот период“, рече координаторот на пратеничката група на СДСМ.

Македонија | пред 3 месеци

Мојсоска: Трагедијата во Кочани е системски колапс, не несреќа

Пратеничката Јована Мојсоска од Левица оцени дека трагедијата во Кочани не може да се нарече „несреќа“, туку последица на децениски системски пропусти.„Кога една мајка го губи своето дете, тоа не е несреќа. Несреќа е нешто што не зависи од нас. Ова е трагедија создадена од систем кој 35 години функционира со очигледни пропусти: дивоградби, фиктивни инспекции, корупција и институции кои молчат кога треба да штитат. Да не беше упорноста на родителите, Собранието немаше ниту денес да разговара за Кочани. И тоа е најголемиот срам – што жртвите мора да го креваат гласот за да ги натераат институциите да работат“, рече Мојсоска.Таа потсети дека девет месеци по пожарот нема ниту една законска измена која би спречила слична трагедија. „Законот за угостителска дејност се најавува со месеци, инспекциските надзори завршуваат со празни одговори, а институциите сè уште се кријат зад формалности наместо да покажат одговорност. Не е злоупотреба да бараш одговори. Злоупотреба е кога со години се дозволува да работи ‘дискотека на смртта’, кога инспектори земаат мито, кога началници игнорираат прекршоци, кога министер доаѓа на рочишта со службени возила, а политичка одговорност – никаде“, нагласи таа.Мојсоска во своето излагање пред Анкетната комисија порача дека станува збор за системска, а не индивидуална вина, и дека гласот на родителите мора да биде слушнат. „Македонија има изгубено повеќе деца во системски трагедии отколку што губи една држава во војна. Тоа мора да престане“, заклучи таа.

Македонија | пред 3 месеци

(Видео) Мојсоска: Трагедијата во Кочани е резултат на системски пропусти , а не „несреќа“

На седницата на Анкетната комисија за случајот во Кочани, пратеничката Јована Мојсоска упати сериозни обвинувања за децениски институционални пропусти кои, како што посочи, довеле до смртта на деца и повторување на трагедии што можеле да бидат спречени.„Кога една мајка го губи своето дете, тоа не е несреќа. Несреќа е нешто што не зависи од нас. Ова е трагедија создадена од систем кој 35 години функционира со очигледни пропусти, дивоградби, фиктивни инспекции, корупција и институции кои молчат кога треба да штитат. Да не беше упорноста на родителите, Собранието немаше ниту денес да разговара за Кочани. И тоа е најголемиот срам – што жртвите мора да го креваат гласот за да ги натераат институциите да работат.“Мојсоска потсети дека речиси една година по трагедијата институциите не донеле ниту една законска измена. „Девет месеци поминаа без ниту една законска измена која ќе спречи ваква трагедија да се повтори. Законот за угостителска дејност се најавува со месеци, инспекциските надзори завршуваат со празни одговори, а институциите сè уште се кријат зад формалности наместо да покажат одговорност. Не е злоупотреба да бараш одговори. Злоупотреба е кога со години се дозволува да работи ‘дискотека на смртта’, кога инспектори земаат мито, кога началници игнорираат прекршoци, кога министер доаѓа на рочишта со службени возила, а политичка одговорност – никаде.“Во своето излагање таа додаде дека трагедијата не може да се сведе на индивидуален случај, туку претставува последица на системски пропусти. „Ова не е индивидуален пропуст, туку системска трагедија. Македонија има изгубено повеќе деца во системски трагедии отколку што губи една држава во војна. Тоа мора да престане.“

Македонија | пред 3 месеци

Мајка на загинато дете во пожарот во „Пулс“ побара одговорност и од двајца актуелни функционери

На денешната седница на Анкетната комисија во Собранието, посветена на трагедијата во кочанската дискотека „Пулс“, збор зеде Марија Петрушова, мајка на една од жртвите. Таа пред пратениците и претставниците на институциите ја опиша борбата за расветлување на случајот како „борба за иднината на сите деца во државата“.Петрушова укажа дека трагедијата од 16 март, во која згаснаа млади животи, не може да се гледа одвоено од серијата институционални пропусти што, според неа, ја оставиле без заштита младата публика во клубот. Таа праша зошто одговорност не се бара и од актуелниот министер за економија и од раководството на Државниот пазарен инспекторат, институции кои, како што рече, имаат надлежности во делот на контрола на работата на угостителски објекти.Во обраќањето, Петрушова посочи дека во случајот се вклучени повеќе институции – од МВР, БЈБ и локалните полициски структури, до инспекциските служби, УЈП, ДЗСИ, општинските служби и приватната агенција за обезбедување „Рубикон“, кои имале обврска да обезбедат минимални стандарди на безбедност.„Секој граѓанин мора да се запраша – што се случува со нашите животи ако вакво нешто може да се повтори? Каде е безбедноста што државата треба да ја гарантира? Ние сме овде за да бараме правда. Не можеме да останеме безгрижни. Нашето барање е овој случај да се третира како сериозна повреда на човековите права, со посебен акцент на правото на живот. Она што го доживеавме претставува системска опасност за сите граѓани.Надлежност за случајот имаат МВР, БЈБ, СВР Штип, ОВР Кочани, инспекторката за економски криминал при ОВР Кочани, градоначалникот и општинските инспектори, ДПИ, Министерството за економија, УЈП, ДЗСИ, Агенцијата за обезбедување ‘Рубикон’ и низа други институции. Наместо да ги заштитат, системот ги остави нашите деца на немилост во објект кој работел незаконски и без соодветни безбедносни стандарди. Оваа трагедија е резултат на системски пропусти и негрижа.“Присутните членови на Комисијата по говорот најавија дека продолжуваат со собирање информации и документација за институционалното постапување пред и по пожарот во „Пулс“.

Македонија | пред 3 месеци

(Видео) Вербален судир на седницата за „Пулс“: Апасиев и Василевска во расправа околу надлежностите на Комисијата

На денешната седница на Постојаната анкетна комисија за заштита на слободите и правата на граѓанинот, која се одржа во присуство на родителите на загинатите во пожарот во дискотеката „Пулс“ во Кочани, дојде до остри расправии меѓу дел од пратениците.Според текот на седницата, пратеничката од мнозинството Иванка Василевска и претседателот на Комисијата, проф. д-р Димитар Апасиев, размениле повеќе забелешки во врска со надлежностите и функцијата на телото.Апасиев ѝ реплицираше на Василевска, посочувајќи дека според Уставот Постојаната анкетна комисија има посебна улога во утврдување факти поврзани со слободите и правата на граѓаните, а не истражни овластувања.„Она што го прочитавте беше допис на Обвинителот во врска со вашата анкетна комисија, а не со Постојаната анкетна комисија, која е уставна категорија, гарантирана во членот 76“, рече Апасиев, нагласувајќи дека наодите на Комисијата може да послужат како основа за иницирање постапка за утврдување политичка одговорност на носители на јавни функции.Тој додаде дека ова тело има за цел да утврди што пропуштиле институциите и како тоа се одразило врз трагичните настани, меѓу кои и пожарот во „Пулс“, за кој родителите бараат институционална одговорност.Пратеничката од ВМРО–ДПМНЕ, Иванка Василевска, побара изземање на претседавачот Димитар Апасиев од водeњето на Комисијата, наведувајќи дека, според неа, постојат околности што ја доведуваат во прашање непристрасноста.Василевска во своето обраќање изрази сочувство кон семејствата на загинатите во трагедијата во дискотеката „Пулс“, нагласувајќи ја, како што рече, длабоката човечка и професионална одговорност да го посочи, според неа, проблематичното постапување на Комисијата.„Стојам денеска пред вас со длабока тага и искрено сочувство за оваа незамислива трагедија“, рече таа, истакнувајќи дека како професор по право и како пратеник чувствува должност да укаже на сериозноста на ситуацијата.Во продолжение, Василевска се обрати директно до претседавачот Апасиев, укажувајќи на член 10 од Законот за постапување по поднесоци и претставки:„Во членот 10 се забранува да се постапува по претставка каде веќе има судска постапка за истата работа, а колега Апасиев, вие како правник сте должен да го знаете ова“, рече таа, оценувајќи дека неговото постапување, како што наведе, „делува сомнително“.Таа додаде дека правните принципи налагаат изземање во ситуации кога постои сомнеж во непристрасност, особено во предмет со висока чувствителност и вклучена јавност.„Пратеникот Апасиев со неговите изјави и ставови го изгуби кредибилитетот да ја води денешната комисија“, изјави Василевска, нагласувајќи дека, според неа, правдата мора да ја водат лица кои не даваат однапред оцени за можната одговорност.Таа заклучи со барањето Апасиев да биде изземен од претседавање со Комисијата, со образложение дека „правдата не смее да биде водена од оние кои однапред ја негираат“.Седницата продолжи со обраќања на родителите, кои повторија дека очекуваат парламентарна поддршка за расветлување на околностите и за утврдување одговорност за трагедијата во Кочани.

Македонија | пред 3 месеци

Левица ја повика власта да обезбеди кворум на седницата за „Пулс“

Пред денешната седница на Постојаната анкетна комисија за заштита на слободите и правата на граѓанинот, партијата Левица јавно побара од пратениците од владејачкото мнозинство да присуствуваат и да овозможат одржување на расправата за трагедијата во Кочани, која се случи пред девет месеци.Од Левица потсетуваат дека во периодот по настанот Собранието не усвоило ниту една суштинска мерка во врска со случајот, поради што, како што велат, институциите имаат обврска да покажат „сериозност и одговорност“ кон семејствата и јавноста. Според партијата, досегашното одложување на расправата испратило порака на недоволна институционална чувствителност за последиците и прашањата што ги отвори трагедијата.Одржувањето на седницата зависи од присуството на членовите (или нивните заменици) на Комисијата од редовите на владејачкото мнозинство. Меѓу нив се: Александар Велјановски, Миле Лефков, Ангелинка Петкова, Петар Ристески, Бране Петрушевски, Рашела Мизрахи, Игор Здравковски, Фериде Хаџиу и Весна Бендевска.Левица смета дека присуството на пратениците е неопходно за Собранието да ја исполни својата надзорна улога и да се обезбеди транспарентен процес. Партијата предупреди дека евентуално ново одложување би било дочекано како продолжување на опструкциите и како сигнал дека институциите не покажуваат подготвеност да ја расчистат одговорноста за случајот.Од страна на владејачкото мнозинство засега нема официјална реакција во врска со барањето на Левица.

Македонија | пред 3 месеци

Комисијата за „Пулс“ закажана за денеска, можно е да нема кворум

Во Парламентот за денеска е најавено одржување на седницата на Постојаната анкетна комисија за заштита на слободите и правата на граѓаните. Седницата е закажана по претставка од родителите на младите кои го загубија животот во пожарот во кочанската дискотека „Пулс“.Семејствата на жртвите очекуваат присуство од сите пратеници и претставници на институциите, предупредувајќи дека нема простор за нови одложувања. Тие посочуваат дека денешниот термин е единствената можност директно да се обратат пред Собранието.Опозицијата стравува дека, доколку пратениците од владејачкото мнозинство не се појават, ќе недостига кворум и седницата нема да може да се одржи.Иако претседателот на Собранието предложи одложување поради тековната расправа за буџетот, од „Левица“, каде што Апасиев претседава со Комисијата, остануваат на закажаниот датум и време.Паралелно со ова, Собранието веќе формираше и посебна анкетна комисија со задача да ги разгледа сите поголеми трагедии од последните години, меѓу кои се и настаните поврзани со пожарот во „Пулс“.

Македонија | пред 3 месеци

(Видео) „Дали судницата стана сцена за поезија?“, прашуваат родителите на загинатите деца во „Пулс“ по воведните говори на обвинетите

Со неизмерна болка на лицата, родителите на 63-те млади жртви од кочанската дискотека „Пулс“ повторно маршираа низ градот. Родителите прашуваат: дали судницата се претвори во „Струшки вечери на поезијата“? Дали зборовите, вештите интерпретации и правните конструкции треба да ја покријат смртта на нивните деца?Велат, две рочишта по ред гледаат исто сценарио: префрлање на одговорноста, бегство од фактите, избегнување на вина.„Гледаме како сите ја префрлаат топката еден на друг, а никој не застанува исправено пред вистината. Како е можно денес сите да се ненадлежни, а децата да се мртви?“, рече Александар Наунов, татко на загинатата Надица.Маршот, велат родителите, не е против државата туку за државата конечно да почне да функционира. За да се слушне гласот на нивните деца, кои повеќе не можат да зборуваат.Наунов нагласи дека протестот е крик за правда што ќе продолжи да одекнува:„Не се откажуваме. Нема да молчиме. Ќе бидеме тука на секое рочиште и на секој протест, сè додека правдата не победи. Овој марш е за нашите деца, за нивните згаснати животи, за иднината на сите деца во оваа држава.“Тој потсети дека Обвинителството располага со над 200 гигабајти доказен материјал – снимки, разговори, анализи, вештачења.„Тоа не се празни зборови, тоа се факти“, рече.Но и покрај тоа, одбраната продолжува да тврди дека никој не е виновен, а дел од обвинетите изјавуваат дека „не знаеле“ за постоењето на дискотеката.Судењето започна на 19 ноември. На последното рочиште сите 35 обвинети се изјаснија за невини.Следното рочиште е закажано за 10 декември, а ден претходно, на 9 декември, во Собранието повторно треба да заседава Анкетната комисија, која треба да ги утврди системските пропусти што довеле до трагедијата.Родителите повторија:„Не бараме одмазда. Не бараме крв. Бараме само едно – правда.“

Македонија | пред 3 месеци

Повредена од „Пулс“ сведочи: Столе ме бодреше во Брзата помош, но не издржа, почина во Белград

Животот на ученичката од четврта година во средно стручно училиште за хемија и технологија бил наидно совршен: првенец на генерација, пијанист, дел од училишниот оркестар, дете на лекари со јасна желба – да стане доктор. Сѐ се движело во вистински правец. До 16 март.„Борба – тоа е она што ни останува. И на преживеаните, и на родителите што ги изгубија децата. Секој од нас носи тежина што мора да ја издржи“, вели 19-годишната Надалина Грозданова, девојка која ја преживеа трагедијата во кочанската дискотека „Пулс“ – денот што засекогаш ќе го носи во срцето и на кожата. Денот што однесе 63 животи.„Беше сабота. Го славевме роденденот на мојата најдобра другарка. Потоа петмина тргнавме на настапот на ДНК. Сѐ изгледаше вообичаено – диџеј, бенд, полна дискотека. Ние стоевме во третиот ред. Се вклучи пиротехниката, но не обрнуваме внимание. А потоа, за неколку минути, пламенот беше насекаде“, раскажува Надалина за „Курир“.„Сите тргнаа кон единствениот излез. 600 луѓе – една врата. Другарките излегоа, јас не. Почнав да паничам и се онесвестив. Последното што го памтам се вресоците и обидите на луѓето да се пробијат. Кога се освестив, беше темно. Не сфатив веднаш што се случило. Можеби умот се обидува да ги избрише најстрашните слики.“Се обидела да се извлече сама. „Не знам како успеав. Како да ме водеше нешто посилно од мене. Се сеќавам само на моментот кога поминав низ вратата. Сѐ околу тоа е избришано.“Својот ужас го раскажа и 26-годишната учителка Санела Давиткова – исто така преживеана.„Бевме точно пред бината, под пиротехниката. На почеток ни изгледаше како дел од настапот, сѐ додека пејачот не извика: ‘Излезете сите!’ Речиси сите мои пријатели излегоа, но ние тројца се заглавивме пред вратата. Од излезот ме делеше еден чекор. Кога го почувствував жешкиот воздух, ги ставив рацете преку лицето“, вели таа. Тој инстинкт ѝ го спасил лицето – рацете, пак, и денес ги носат изгорениците.„Понатаму ништо не памтам. Мислам дека кратко се онесвестив. Кога се разбудив – заглавена. Луѓе врз луѓе, вресоци. На вратата го здогледав моето момче. Го викав, но не ме препозна – сите бевме исчадени. Но ме слушна. Не знам како ме извлече.“Додека таа ја очекувала Итната помош, тој се вратил по неговите другари. „Двајцата ги извадија. Столе, еден од нив, момче што многу го сакавме, беше во амбулантното возило со мене. Беше храбар. Ме бодреше дека сѐ ќе биде добро. А тој… не издржа. Почина во Белград.“Санела се лекувала во Солун, потоа се вратила дома. „Тешко е – лузни, воспомините… но се навикнуваш. Работам. Учениците на почеток ме гледаа поинаку, сега е нормално.“И Надалина минала низ долга терапија во Солун – 75 дена со изгореници на вратот, вилицата и левата рака.„Дојдов до болница, разговарав со родителите, а ништо не памтам. Кога се разбудив од кома, не знаев ни зошто сум таму. На интензивна нега ми кажаа што се случило. Дека загинале луѓе што ги знам. Дека изгубив пријатели“, раскажува таа низ солзи.„Како минува времето, сфаќаш што навистина значи загуба. Не е лесно да се живее со тоа. Но останува борба. Тоа ми е најголемата животна лекција. Сфаќам колку е минливо сè што мислев дека вреди. Сонував за титулата првенец на генерација – и ја добив. Но на интензивна нега, таа титула не вреди ништо. Само сакаш да преживееш. Да се разбудиш. Да ги видиш твоите. Сè друго е помалку важно. Тоа е суштината.“

Македонија | пред 3 месеци

Одбраната за Захариев:„ Лазар ги спасуваше децата од пожарот, тој е херој“

На денешното рочиште за трагедијата во „Пулс“ во Идризово, адвокатот Зоран Зафировски го претстави случајот на обвинетиот Лазар Захариев, припадник на приватната агенција за обезбедување „Рубикон“, како пример на човек кој во кобната ноќ направил сè што можел за да спаси животи. Според одбраната, Захариев не е причинител на трагедијата, туку човек што се борел во хаосот за да извлече што повеќе млади на безбедно.Инсистирајќи дека обвинението погрешно го претставува неговото учество, Зафировски наведе дека Захариев воопшто не бил дел од обезбедувањето кое контролира влез, туку дошол дури откако пиротехниката веќе била внесена во дискотеката. Тој бил ангажиран на патрола на повеќе локации, а не како стационарно обезбедување во „Пулс“. Дополнително, таа вечер не носел рефлектирачки елек бидејќи никој не го информирал дека ќе се одржува концерт.Во своето обраќање, адвокатот ја нагласи и херојската страна на неговото делување:„Тој е херој во моите очи. Им го проверувал пулсот, се обидувал да ги реанимира и подигнал две врати кои биле паднати врз луѓето… Сето ова го направил откако и самиот бил натрупан со луѓе.“Одбраната најави дека ќе повика повеќе од 20 млади лица кои ќе сведочат дека токму Лазар им помогнал да излезат живи од објектот.Обвинителството го товари Захариев дека не го спречил внесувањето пиротехника, а истовремено, на страница 40, го наведува како оштетен, со констатација дека во пожарот се здобил со инхалациона повреда.Самото ова, според одбраната, покажува дека Захариев бил внатре во објектот како спасувач, а не како човек што дозволил прекршок.Захариев накратко и видно потресен се обрати пред судот:„Криво ми е што на кобниот ден не можев да спасам повеќе луѓе.“Захариев е обвинет за кривичното дело „Тешки дела против општата сигурност“, исто како и другите обвинети во делот што се однесува на пропусти поврзани со безбедносните стандарди во дискотеката.

Македонија | пред 3 месеци

Адвокатот на Камбери тврди: „Телефоните не се негови“ – затворот возвраќа дека никој не признал сопственост

Адвокатот Насер Рауфи денеска пред судот изјави дека 13-те мобилни телефони и лаптопот, за кои на претходното рочиште беше соопштено дека биле пронајдени во ќелијата на обвинетиот Џеваир Камбери, не му припаѓаат на неговиот клиент. Според него, „вистинскиот сопственик“ се пријавил сам.„Го молам судот да ја провери информацијата во затворот,“ изјави Рауфи, наведувајќи дека тоа може лесно да се утврди преку управата со притворското одделение.Од затворот појаснуваат дека во ќелијата на Камбери престојуваат тројца притвореници, дека ниту еден од нив – ниту пак некое друго лице – не признал сопственост над уредите, поради што сите телефони и лаптопот се заведени како заеднички имот на тројцата, што значи и на Камбери.По интерната проверка, управата истакна дека не може да изрече дисциплински мерки без одлука на судот, па доколку судијката наложи санкција, затворот ќе ја спроведе.На претходното рочиште судијката Диана Груевска-Илиевска посочи дека поседување телефони во притвор е сериозен прекршок, но овојпат Камбери доби само опомена. Таа најави дека во иднина ваквите прекршоци ќе бидат санкционирани.Џеваир Камбери е поранешен службеник во Министерството за економија и е единствениот меѓу 35-те обвинети кој, покрај тешките дела против општата сигурност, се товари и за примање поткуп и за изготвување фалсификувани службени исправи.Според обвинението, примил 226.000 денари (над 3.600 евра) за да обезбеди незаконска дозвола за работа на дискотеката „Пулс“.

Македонија | пред 3 месеци

Екс-градоначалникот Ратко Димитровски во судницата во Идризово: „Реагирав уште во 2012, но институциите молчеа“

На денешното рочиште за трагедијата во дискотеката „Пулс“, поранешниот градоначалник на Кочани, Ратко Димитровски, ја отфрли вината. Во своето воведно обраќање тој рече дека е шокиран што по повеќе од една деценија се наоѓа на обвинителна клупа и дека, како што рече, „не може некој невин да го носи товарот наместо вистинскиот одговорен“.Во судницата ја даде следнава изјава, која ја пренесуваме дословно:„Изненаден сум. Никогаш, ама никогаш не би помислил дека ќе застанам на обвинителна клупа за функција што сум ја вршел пред 13 години. Не постојат заменски обвинети. Не може некој невин да одговара за друг.“Тврди дека предупредил уште пред отворањето на „Пулс“Димитровски пред судот откри дека во октомври 2012 година, уште пред дискотеката официјално да почне со работа, испратил допис до Министерството за економија барајќи информации за дозволата на објектот.„Кога дознав дека ќе се отвора дискотека, на 19.10.2012 година се обратив до Министерството: ’Ве молиме да не информирате дали му е издадена или ќе му биде издадена дозвола за тој објект‘. Јас сум единствен во Македонија кој го направил тоа, иако сум немал надлежност. На тој допис до денес немам добиено одговор,“ изјави тој.Тој дополнително наведе дека на 5 ноември 2012 година општината официјално го информирала сопственикот Дејан Јованов дека парцелите во близина на објектот не можат да се користат како паркинг, бидејќи тоа не е предвидено со важечкиот ДУП.„Не смее да се изостават оние што требало да бидат обвинети“Екс-градоначалникот истакна дека во целиот процес има пропусти и дека, според него, дел од одговорните лица не се опфатени со обвинението.„Каква правда може да се очекува ако се изостави и само еден човек кој требало да биде обвинет, а се обвинуваат луѓе кои не се виновни?“ рече Димитровски пред присутните роднини на жртвите и судскиот совет.

Македонија | пред 3 месеци

Одбраната тврди дека трагедијата во „Пулс“ не е последица на градежни пропусти – продолжија воведните излагања во судот

На денешното рочиште за случајот „Пулс“ одбраната на општинските градежни инспектори ја оспори тезата на обвинителството дека нивното непостапување придонело за катастрофата во која загинаа 63 млади животи. Бранителите на обвинетите објаснија дека „причината за трагедијата не произлегува од конструктивни недостатоци на објектот“, туку од други фактори кои не се во надлежност на градежните инспектори. Сите обвинети инспектори уште на почетокот упатија сочувство до семејствата на загинатите.Адвокат Зоран Зафировски, бранител на седмообвинетиот Огњен Георгиев, истакна дека делото за кое се гони неговиот клиент е веќе во постапка на застарување. Тој нагласи дека одбраната ќе докаже дека објектот не страдал од градежни недостатоци што би можеле да бидат предмет на инспекциска контрола.Според него, сите промени во објектот биле реновирања изведени од сопственикот без да поднесе пријава, што автоматски го ограничувало просторот за постапување на инспекторот. „Инспекциски надзор не може да се спроведе ако нема поднесок, налог или иницирана постапка,“ потенцираше Зафировски.Другите инспектори тврдат дека ниту знаеле за кабарето ниту имале надлежностБранителот на Љупчо Стаменков, адвокат Јован Танчев, истакна дека неговиот клиент во последните години работел во Скопје и „не можел ни да знае дека во објектот се одвива кабаретска дејност“. Според него, во целиот период додека Стаменков бил вработен во Општина Кочани, „немало ниедна поднесена пријава што би барала инспекторите да излезат на терен“.Адвокатите сметаат дека обвинителниот акт е „правно неконзистентен“, дека погрешно се применува материјалното право и дека нема докази кои би ја потврдиле вината.Одбраната на Николчо Коцев: немал налог, немал пријава, немал надлежностЗа деветтообвинетиот Николчо Коцев, повторно адвокат Зоран Зафировски објасни дека Коцев никогаш не добил ниту известување, ниту налог, ниту службена пријава за контрола на објектот. Тој потсети дека објектот е граден пред повеќе од 30 години, кога Коцев не бил ни службено лице, а за периодот што се опфаќа со обвинението е изведена само една градежна активност што не претставува промена на намената.Коцев, обраќајќи им се на семејствата на жртвите, рече:„– Таа вечер јас бев во болницата и до доцна во ноќта помагав. Тоа не е момент што можам да го заборавам и го носам со мене. А, денеска сум обвинет за нешто што не сум го сторил и никогаш не било во моја надлежност.“Тој додаде дека работел исклучиво во рамките на законските овластувања и очекува судот „да ја препознае разликата меѓу виновник и жртва на системска слабост“.

Македонија | пред 3 месеци

„Вратете ми го телефонот“ – обвинетиот инспектор Георгиев со лична молба во судницата: Новото рочиште за „Пулс“ продолжува

На денешното рочиште за случајот „Пулс“ се отвори нова полемика околу улогата на поранешниот кочански градежен инспектор Огњан Георгиев (68), еден од обвинетите за тешки дела против општата сигурност. Тој, во судницата во Идризово побара да му биде вратен мобилниот телефон, кој му бил одземен како доказ во истрагата.Изјавата на Георгиев ја пренесуваме дословно:„Имам едно барање до ЈО, барам да ми се врати мојот мобилен телефон затоа што јас друг телефон немам. Мојот телефон е ’чист‘ со гаранција, немам никакви доказни материјали бидејќи сум немал никакви контакти со обвинетите.“Георгиев посочи дека и натаму ги плаќа месечните сметки за уредот, нагласувајќи дека телефонот не содржи ништо што би го поврзало со останатите обвинети или со трагичниот настан.Неговиот адвокат, Зоран Зафировски, подетално ја оспори правната основаност на обвинението, тврдејќи дека Обвинителството погрешно ги толкува надлежностите на градежните инспектори.Според Зафировски, инспекторите немаат овластување да запечатуваат објекти, ниту да интервенираат во делокругот на управувањето со урбанистички планови. Тој нагласи дека Георгиев немал налог за вонредна контрола и дека никој не побарал од него да спроведе дополнителен надзор.Одбраната смета дека во случајот „Пулс“ не се работело за пренамена од деловен во станбен простор, туку за пренамена „деловен во деловен“, поради што, како што тврдат, инспекторот немал законска обврска да преземе мерки.Адвокатот дополнително побара судот да утврди дали воопшто постои временска рамка во која делото сè уште може да се гони, бидејќи Георгиев го вршел својот инспекторски мандат од 2005 до 2021 година.Тој инсистира дека делото не може да се квалификува како сторено со умисла, туку евентуално со пропуст или небрежност.

Македонија | пред 3 месеци

„63 сенки ќе ги следат засекогаш“ – мајката на загинатиот Томас со болна порака пред новото рочиште за трагедијата во Кочани

Пред денешното продолжение на судскиот процес за „Пулс“, силна и емотивна реакција испрати Јулија Златкова, мајка на еден од загинатите, Томас Златков. Таа, очигледно потресена, пред новинарите зборуваше за болката која не згаснува и за огорченоста од ставот на обвинетите на претходните рочишта.63 убиени деца, 63 уништени иднини на децата и нивните семејства. Многу контрадикторно беше што на минатото рочиште никој од обвинетите не се изјасни за виновен. Зарем треба ние родителите да ги потсетиме зошто тие се наоѓаат во судницата? Никој од нив немаше ни грам совест ни човечност да ја признае својата вина. Ни монструмот, ни син му, ни брат му, ни соучесници дали биле од прв од втор од трет ред, никој не покажа барем човечност, а сите ние знаеме кој е виновен и се надевам дека ќе ја добиеме правдата за нашите убиени деца! 63 не е само бројка! 63 не е статистика! Тоа се млади убиени деца и 63 сенки ќе ги следат засекогаш. Искрено се надевам дека овие деца и ние семејствата ќе ја добиеме правдата бидејќи овие деца заслужуваат правда,“ вели Јулија Златкова, мајка на Тома Златков.Трагедијата што однесе 63 животи и натаму остава длабоки рани, а родителите и блиските очекуваат дека судскиот процес конечно ќе донесе одговорност и правда.

Македонија | пред 3 месеци

Во живо продолжува судењето за „Пулс“: И денеска нови воведни зборови на одбраната

И денеска во живо може да се следи новото рочиште за трагичниот пожар во дискотеката „Пулс“ во Кочани – случај што веќе две години ја потресува јавноста. Пред Судот во Идризово денеска треба да продолжат воведните излагања на одбраната, а фокусот ќе биде на тоа што нивните тимови ќе го презентираат како аргументи против обемното обвинение поднесено од 15 јавни обвинители.На ова рочиште се очекува детално да се образложат тврдењата на адвокатите дека обвинетите не презеле дејствија со кои директно би придонеле кон катастрофата во која загинаа 63 лица, а над 200 беа повредени.На минатото рочиште сите обвинети – вкупно 37 лица, меѓу кои сопственици, управители, инспектори, поранешни градоначалници, обезбедувачи и државни службеници – се изјаснија дека не се виновни за делата што им се ставаат на товар. Повеќето од нив изразија сочувство до семејствата на загинатите, но инсистираа дека не постои причинско-последична врска меѓу нивните постапки и пожарот, а дел од одбраната тврдеше дека трагедијата е последица на институционални пропусти, не на лична вина.Одбраната најави дека ќе изведе сведоци и документација за да покаже дека сопствениците имале валидни дозволи, дека изведувачите и проектантите постапувале во рамки на своите надлежности, а дека некои обвинети – како синот на сопственикот, Михаил Јованов – воопшто не учествувале во управувањето со клубот.Од друга страна, Обвинителството останува на ставот дека „Пулс“ бил смртоносна стапица уште од првиот ден и дека систематската негрижа, пропустите во надзорот и нелегалните адаптации довеле до најголемата цивилна трагедија од овој вид во земјата.

Македонија | пред 3 месеци

Михаил: „Ја изгубив Бојана, го изгубив пријателот“

На денешното рочиште за трагедијата во „Пулс“, адвокатката на обвинетиот Михаил Јованов, Ивана Гоцева, изјави дека обвинителниот акт против нејзиниот клиент е правно неоснован и дека Обвинителството не приложило ниту еден доказ што укажува на негова конкретна улога во настаните.Гоцева оцени дека обвинението е во спротивност со основните принципи на кривичната постапка, нагласувајќи дека товарот на докажување секогаш е на страна на обвинителството.„Одбраната нема обврска да докажува невиност. Но во оваа ситуација сме ставени во позиција да го правиме токму тоа,“ рече таа, укажувајќи дека се очекува судот да одлучи по начелото in dubio pro reo ако нема докази за вина.Според Гоцева, единствената причина поради која Јованов се најде меѓу обвинетите е неговата семејна поврзаност со сопственикот на клубот – Дејан Јованов.Одбраната тврдеше дека Обвинителството ја довело јавноста во заблуда со селективно споделување дел од доказите, што – според Гоцева – дополнително го оптоварило Михаил, кој веќе се справувал со сериозни психички последици. Таа потсети дека Јованов ја загубил својата партнерка Бојана и најблизок пријател во трагедијата и дека по настанот работел со стручен тим за да ги надмине суицидните мисли.Одбраната: Нема докази дека учествувал во работата на клуботОдбраната наведе дека во периодот од 2020 до 2025 година нема ниту еден показател дека Михаил бил вмешан во работењето на правното лице.Според доставените податоци, тој:од 2017 до 2021 година бил редовен студент на УКИМ и живеел таму,по студиите отворил сопствена фирма „Карго бит ДООЕЛ Кочани“,не бил ниту сопственик ниту управител во клубот,не добил никакви овластувања од неговиот татко да презема дејствија во име на фирмата.Гоцева истакна дека самото присуство во клубот не го прави лице одговорно за работата на објектот, ниту го става под каква било законска обврска да презема мерки за заштита.Спорно обвинение за „заедничко договарање“Одбраната реагираше и на второто дело за кое Јованов се товари, кое – според нив – претставува незаконски мултиплицитет, бидејќи станува збор за исто кривично дело. Според обвинението, Михаил наводно учествувал во организирањето на настан во клубот и заедно со други лица договорил употреба на пиротехника.Гоцева категорично негираше дека тој имал било каква улога во тоа, истакнувајќи дека не бил присутен кога пиротехниката била внесена, ниту бил обврзан да знае за тие активности.Видео-докази: на работа до по полноќОдбраната најави дека ќе приложи видео-снимки од надзор кои, според нив, потврдуваат дека на 15 март 2025 година Михаил бил во својата фирма, а во клубот влегол дури по 2 часот и 5 минути по полноќ – по настанот.„Прашањето е едноставно: кое дејствие го презел за да се загрози безбедноста и да настане пожар?“ рече Гоцева, заклучувајќи дека за членовите на обвинението не се исполнети основните елементи на кривично дело.

Македонија | пред 3 месеци

(Видео) Петтообвинетата инженерка Милка Едровска до одбраната на газда Деко: „Никогаш не сум работела на ентериерот на ‘Пулс’“

На денешното рочиште за случајот „Пулс“, инженерот Милка Едровска – петтообвинета во постапката – ја отфрли одговорноста која ѝ се става на товар. Таа тврдеше дека нејзината работа била ограничена само на сообраќајното решение и дека немала никаква улога во внатрешното уредување на дискотеката.Едровска јавно ја повика одбраната на првообвинетиот Дејан Јованов – Деко да потврди дека од неа никогаш не бил побаран комплетен проект.„Дејан нека каже дали некогаш од мене побарал целосен проект“, рече таа во судницата, нагласувајќи дека нејзината работа не се однесувала на избор на материјали или на безбедноста на објектот.Таа изјави дека не стои зад изведбата на ентериерот:„Не сум изготвила проект за внатрешното уредување и не сум учествувала во избор на материјали во објектот.“Во однос на нејзината улога, додаде дека единствениот ангажман што го имала бил поврзан со сообраќаен дел од документација:„Не сум вршела надзор, ниту сум била присутна на терен. Бев ангажирана само во 2012 година, кога проектот беше завршен и од мене беше побарано исклучиво сообраќајно решение.“Застапникот на Едровска претходно посочи дека ентериерниот проект наводно бил изработен од друг архитект кој воопшто не е дел од обвинението.Инаку, според обвинителниот акт, Едровска се сомничи за „Тешки дела против општата сигурност“, при што обвинителството наведува три точки:-дека изготвила документ наречен „Основен проект“ кој не ги содржел задолжителните проектни целини (статика, електрика, механика, противпожарна заштита);-дека во 2023 година, без теренски увид, ја ажурирала документацијата само со промена на датум и насловна страница, по што проектот бил користен за добивање дозвола;-дека подготвила сообраќајно решение во кое паркинг-местата биле прикажани на дел што се води како државно земјиште.Судењето продолжува со излагањата на останатите обвинети.

Македонија | пред 3 месеци

„Седам во четири ѕида и секој ден ја преживувам кобната ноќ“, кажа газда Деко во судницата во Идризово

На денешното рочиште за пожарот во дискотеката „Пулс“, сопственикот Дејан Јовановски – Деко се изјасни дека не е виновен за обвиненијата за тешки дела против општата сигурност. Во своето обраќање пред судот, тој даде подолга изјава, наведувајќи дека и самиот сè уште се справува со последиците од трагедијата во која загинаа 63 лица.„До ден денес се чудам и не можам да поверувам што се случи таа вечер“, изјави Јовановски. Тој додаде дека цели девет месеци е во притвор „во четири ѕида“ и дека секој ден го минува со истата мисла: „Секојдневно ја преживувам таа трагична ноќ.“Јовановски зборуваше со треперлив глас, а на моменти со солзи во очите. „Не можам да поверувам што се случило таа ноќ“, рече тој.Во продолжение тој нагласи дека никогаш не би дозволил неговиот клуб да претставува опасност за гостите:„Јас како човек и како родител, каде што се собираа сите млади и моите деца, да бидам способен да дозволам да фали нешто? Зарем сериозно мислите дека доколку би знаел дека фали нешто, не би презел се за да се отстрани навреме?“Тој посочи дека во клубот низ годините израснале десетици генерации и дека сите што го познаваат знаат „колку и како се грижев за безбедноста на сите гости во клубот“.„Од срце и од душа сакам да изразам сочувство до сите фамилии што имаат починати, а на повредените оздравување. Затоа што ја знам нивната болка и тага, затоа што и ние во нашата фамилија имаме починат и повреден член“, додаде тој.Во одбраната го спомена и неговиот син Михајло, кој е обвинет во предметот. „Мојот син Михајло е обвинет бидејќи тој немаше никакви обврски и активности ниту пак допринел кон тоа што се работеше на клубот. Тој имаше негова фирма за дистрибуција, си ги работеше неговите работни обврски со неговата фирма и си беше нормален гостин како и сите“, рече Јовановски.Со денешното изјаснување на првообвинетиот продолжува судскиот процес за утврдување на одговорноста за најголемата трагедија од ваков вид во земјата.

Македонија | пред 3 месеци

(Во живо) „Дејан не е монструм“ - адвокатката на газдата на „Пулс“ жестоко го брани пред судот

Адвокатката на Дејан Јовановски-Деко, газда на „Пулс“ кажа дека тој не е монструм, ниту виновен за трагедијата во која загинаа 63 лица.„Тешко ми е да го бранам човекот што за сите вас, во вашите очи е убиец, а за мене само еден обичен човек. Еден обичен човек кој колку и да го правите монструозен, тој не е. Тој е човек на кого му падна на товар, институционалната одговорност. Не сме свесни ниту колку локали и моментално функционираат пропуштени од институцинален надзор, кој во конкретниот случај ниту ние немаше да го осазнаеме, ако ја немавме и немарноста на ангажираните музички артисти (ДНК) кои биле ангажирани во локалот на Дејан“, рече адвокатката.„Дејан е човек, а не монструм. Не сакал тоа да се случи. По оваа трагедија која е последица на долгогодишната непрофесиналност на системот, морам да напоменам дека и јас како човек кој живее во ова општество, барам правно издржана завршница.Таа го критикуваше обвинителниот акт.„Ова е најиздржаното обвинение. Говорот на Обвинителството беше поетичен“, додаде таа.СЛЕДЕТЕ ВО ЖИВО:

Настани | пред 3 месеци

Никој, па ни газадата Деко не чувствува вина за смртта на 63 млади животи

Сите обвинети за трагедијата во „Пулс“ ја негираат вината – ниту еден од 38-те обвинети не се чувствува одговорен за смртта на 63-те младиВо судницата во Идризово денес заврши изјаснувањето за вина на обвинетите за најтешката трагедија во поновата историја на Македонија – пожарот во дискотеката „Пулс“ во кој загинаа 63 млади лица. И покрај огромните човечки загуби, ниту еден од 35-те физички и трите правни лица не призна вина.Првообвинетиот, газдата на „Пулс“, Дејан Јованов – Деко, кратко и јасно изјави:„Не се чувствувам виновен за кривичното дело што ми се става на товар.“Истото го повторија и неговиот син, братот, како и сите други обвинети меѓу кои има поранешни градоначалници, директори, инспектори и функционери. Клучните фигури: никој не чувствува вина, многумина зборуваат за „конструкции“Митко Стојанов, поранешен управител, иако изрази длабоко жалење, сепак не ја призна вината:„Жалам за изгубените животи, и животот би го дал за некои од нив. Но не се чувствувам виновен.“Тодор Јованов, задолжен за влезниците – и сам родител на повредено дете – рече:„Им посакувам брзо опоравување. Како родител на повредено дете изразувам сочувство… но не сум виновен.“Политичките фигури со став: обвинението е „селективно“ и „политички мотивирано“Ексградоначалникот Љупчо Папазов беше најотворен во критиката:„Ова е конструирано обвинение. Разбирам за што сум обвинет, но истрагата е селективна.“Поранешниот директор на ДЗС, Шабан Салиу, исто така не ја призна вината:„Процесот е политички мотивиран и правно неоснован.“Инспекторите и службениците: „Немаме никаква вина“Голем дел од инспекторите – оние кои требало да ги контролираат документацијата, безбедносните стандарди и техничките услови на објектот – изјавија дека се обвинети само „за бројка“.Градежниот инспектор Огњан Георгиев:„Немам никаква вина. Обвинет сум само за да има повеќе луѓе на списокот.“Пазарниот инспектор Весна Кузмановска:„Дечиња има таму, другари на моите деца… Сочувствувам, но не чувствувам вина.“И останатите инспектори – Љупчо Стаменков, Николчо Гоцев, Зоран Николовски, Беким Максути, Аднан Џафероски – исто така ја негираа одговорноста.Обезбедувањето: „Ние спасувавме животи“Вработените од обезбедувањето „Рубикон“ тврдат дека единствено се обидувале да помогнат.Мартин Ѓорѓиев:„Делата што ми се ставаат на товар не ги прифаќам. Ние ризикувавме живот за да спасиме други.“Стојанчо Димитријев:„Чувствувам само болка што не спасив повеќе.“Ивица Грозданов, Јане Јанчевски и сопственикот Александар Нацев (чиј предмет неодамна беше споен) исто така не признале вина.

Македонија | пред 3 месеци