РУСИЈА

ЕУ бара повлекување на руските воени сили од Белорусија, Грузија и Ерменија

Европската унија бара Русија да ги повлече своите воени сили не само од Украина, туку и од Белорусија, Грузија, Ерменија и сепаратистичката молдавска регија Придњестровје, наведува документ испратен од високиот претставник на ЕУ за надворешна политика Каја Калас.Документот бара и забрана за руско воено присуство, повлекување на нуклеарното оружје од Белорусија и демилитаризација на окупираните територии. Руски трупи се стационирани во Абхазија, Јужна Осетија, Придњестровје, Ерменија и Белорусија, од каде се организираше инвазијата во 2022 година.ЕУ исто така бара исплата на воена штета, укинување на амнестијата за воени злосторства и целосен пристап за меѓународни истражители. Брисел истакнува дека траен мир не е возможен без учество на ЕУ на преговарачката маса и без заштита на безбедносните интереси на Унијата.

Свет | пред 1 месец

Мерц: Војната ќе заврши дури кога едната од двете страни ќе биде исцрпена, воено или економски

Германскиот канцелар Фридрих Мерц оцени дека шансите за брз крај на војната во Украина преку преговори се мали.Тој за германските весници НБР и „Рајнфалц“ изјави дека според неговата проценка војната ќе заврши дури кога едната од двете страни ќе биде исцрпена, „било воено или економски“.„Разумот и хуманитарните аргументи нема да го убедат рускиот претседател Владимир Путин. Тоа е горчлива вистина“, рече Мерк.Според неговите зборови, целта на европските напори е „да се спречи руската држава да ја продолжи воената акција и неговото финансирање“, пренесува Шпигел. Мерц истакна дека смета за практично невозможно нормалните односи со Путин некогаш да се вратат.„Кога ќе го погледнам овој режим и овој слеп, лут терор, имам малку надеж“, наведе германскиот канцелар.Според Мерк, руската „владејачка елита“ не може без војна во блиска иднина и мора да ја одржува воената машинерија во функција затоа што немаат план што друго да прават со стотици илјади војници, од кои некои се тешко трауматизирани, кога се враќаат од фронтот.

Свет | пред 1 месец

Зеленски: Никој не може да гарантира дека Путин нема повторно да нападне

Украинскиот претседател Володимир Зеленски изјави дека никој не може да гарантира дека лидерот на Русија, Владимир Путин, нема да започне нов напад врз Украина.„Значи, денес никој не може да ни даде, знаете, цврст збор – со сето почитување кон моќниот американски претседател и кон Америка во целина. Мислам, Америка е силна земја, со должно почитување, и ни се потребни нивните безбедносни гаранции. Но дури и со сето тоа, никој не може да ни каже ниту да ни даде збор дека Путин нема повторно да се врати“, рече Зеленски во големото интервју за Пирс Морган.Зеленски нагласи дека на Украина ѝ се потребни силни безбедносни гаранции.„Кога зборуваме за безбедносни гаранции, мислиме на тоа дека ни се потребни силни безбедносни гаранции, односно дека остатокот од светот или некои земји ќе бидат подготвени да одговорат на Путин ако се врати со својата агресија“, наведе претседателот на Украина.Тој исто така наведе дека САД ѝ нудат на Украина безбедносни гаранции на 15 години, но дека Киев бара обврска за период подолг од 20 години.

Свет | пред 1 месец

Четворица Јеховини сведоци во Русија осудени на затвор

Четворица Јеховини сведоци минатата недела во Русија добија затворски казни за „екстремистичка дејност“, врз основа на тајно снимени видеа од нивните молитвени состаноци. Од 2017 година, кога Русија ја забрани организацијата, околу 220 членови се затворени.Во првиот случај, во Биробиджан, 61-годишниот Олег Постников доби шест години и два месеца затвор. Тој изјави дека снимките го прикажуваат само нормалното одржување на молитви и барање сила за издржување на прогон, без повици за насилство.Во вториот случај, во Твер, Валериј Толмазов (71), Александар Костјук (53) и Максим Барбазјук (43) добија по шест години затвор. Јаррод Лопес од седиштето на Јеховините сведоци во Њујорк истакна дека тајните агенти длабоко се инфилтрирале во заедниците и селективно ја предавале материјата на истражителите, што ја нагласува контроверзноста на пресудите.

Свет | пред 1 месец

Руски министер: Странски служби имаат пристап до преписките на војниците на Телеграм

Странските разузнавачки служби можат да имаат увид во пораките што руските војници ги разменуваат преку апликацијата Telegram, изјави рускиот министер за дигитален развој Максуд Шадаев, пренесе новинската агенција Интерфакс.Телеграм, една од најкористените апликации за комуникација во Русија, широко се употребува и од руските сили кои учествуваат во војната во Украина. Истовремено, платформата е под засилен притисок од руските власти, кои ѝ наметнаа ограничувања поради, како што наведуваат, непостапување во бришење екстремистички содржини.„Постојат бројни индиции дека странски разузнавачки агенции имаат пристап до преписките на оваа апликација и дека тие податоци ги користат против руската војска“, изјави Шадаев.Во меѓувреме, рускиот регулатор за комуникации Роскомнадзор соопшти дека ја забавува работата на Телеграм како дел од поширока постапка против апликации во странска сопственост, за кои тврди дека не ги почитуваат руските закони.Кремљ минатата недела потврди дека американската апликација WhatsApp, која е во сопственост на Meta Platforms, е целосно блокирана поради непочитување на локалната регулатива. Руските власти ги повикаа граѓаните да преминат на „националната апликација за размена на пораки“ наречена МАХ, поддржана од државата.Критичарите предупредуваат дека МАХ може да претставува алатка за надзор, додека руските власти ги отфрлаат таквите тврдења.

Свет | пред 1 месец

Зеленски најави санкции за Лукашенко поради поддршка на руската агресија

Украинскиот претседател Володимир Зеленски објави дека Украина воведува санкции против белорускиот претседател Александар Лукашенко поради неговата улога во подготовката на руската агресија врз Украина, како и за неговото учество во продолжувањето на војната.Веста Зеленски ја објави на социјалните мрежи, пренесе украинскиот портал NV.ua.Зеленски нагласи дека под наредба на Лукашенко, од втората половина на 2025 година, во Белорусија биле распоредени голем број репетитори задолжени за контрола на руските удари со беспилотни летала врз Украина.„Окупаторот не би можел да изведе бројни напади без овие системи“, истакна Зеленски, додавајќи дека ова особено се однесува на напади врз украинските енергетски и инфраструктурни објекти и системи.Тој исто така напомена дека повеќе од 3.000 белоруски компании ја снабдуваат Русија со опрема и компоненти за војната во Украина.„Белорусија продолжува да ја развива инфраструктурата за распоредување ракети со среден дострел ‘Орешник’, чии компоненти исто така ги доставуваше на Русија“, напиша Зеленски.„Александар Лукашенко веќе долго време го разменува суверенитетот на Белорусија за продолжување на својата лична моќ, помагајќи им на Русите да ги заобиколат светските санкции за оваа агресија, активно оправдувајќи ја руската војна, а сега исто така го зголемува своето учество во ескалацијата и продолжувањето на војната. За тоа ќе има посебни последици“, посочи Зеленски.

Свет | пред 1 месец

Трамп го одложува гласањето за нови санкции кон Русија

Американскиот претседател Доналд Трамп го одложува гласањето за двопартиски предлог-закон со кој би се заостриле санкциите насочени кон рускиот енергетски сектор, предупредија двајца високи сенатори од Демократската партија, пренесува Yahoo News.Сенаторот Ричард Блументал, говорејќи во Киев по учеството на Минхенската безбедносна конференција, изјави дека санкциите што ги предложил заедно со сенаторот Линдзи Греам би претставувале „економски чекан“ врз рускиот претседател Владимир Путин, во момент кога во Женева продолжуваат разговорите меѓу Киев и Москва со посредство на САД.Според Блументал, постојните американски и европски санкции веќе почнале да ја ограничуваат руската нафтена продукција, но е потребен дополнителен притисок. Тој посочи дека лидерот на републиканското мнозинство во Сенатот, Џон Тјун, му ветил дека за предлогот ќе се гласа пред крајот на тековното заседание на Конгресот.„Чекаме зелено светло, а тој толку се двоуми што на секој што го следи му се врти во глава“, изјави Блументал, алудирајќи на Трамп.Во меѓувреме, сенаторот Шелдон Вајтхаус изјави дека администрацијата бележи напредок во сузбивањето на таканаречената руска „флота во сенка“ – танкери кои ги заобиколуваат санкциите. Тој додаде дека неодамнешните американски интервенции во близина на Венецуела покажале дека американската војска е подготвена да заплени дополнителни бродови доколку тоа биде неопходно.

Свет | пред 1 месец

Хибридна кампања и поголем ризик: Москва ја зголемува присутноста во Балтикот

Must предупреди дека Русија ги засилила своите активности во близина на Шведска, оценувајќи дека Москва ја интензивира кампањата на хибридно војување и дека таа може да продолжи и по завршувањето на војната во Украина. Директорот на службата, Томас Нилсон, изјави дека Русија во одредени случаи го зголемила своето дејствување и присуство во регионот и дека е подготвена да преземе поголем ризик.Хибридното војување, кое опфаќа саботажи, кибернапади и ширење дезинформации, според шведската служба станало клучен инструмент во растечкото непријателство на Москва кон Западот. Во извештајот се наведува дека Русија развила широк спектар методи што може да се применат во рамки на таквата стратегија, вклучително и мешање во изборни процеси и разузнавачки операции.Нилсон изјави дека Русија континуирано ги развива своите способности и дека е подготвена да преземе поголеми ризици, вклучително и таканаречена „напредна саботажа“, што подразбира планови за атентати, сериозни пожари и напади врз критична инфраструктура. Според него, ваквите активности значително се засилиле од почетокот на инвазијата врз Украина, што придонесе Шведска и Финска да ја напуштат долгогодишната воена неутралност и да се приклучат на НАТО.Во анализата се истакнува дека Русија останува примарна воена закана за Шведска и Алијансата, при што Балтичкиот регион се оценува како стратешки важен и од економски и од воен аспект. Според Must, зајакнувањето на руските ресурси во Балтикот веќе започнало, но неговата динамика ќе зависи од текот на војната во Украина, состојбата на руската економија и односите со Кина.Како дел од пошироките хибридни активности долж источниот фронт на НАТО, се наведуваат и инциденти во Литванија, која граничи со Белорусија, сојузник на Русија. Кон крајот на минатата година, од белоруска територија биле пуштени балони опремени со ГПС-уреди што навлегле во литванскиот воздушен простор и предизвикале прекин на авионскиот сообраќај во Вилнус.Дополнително, Русија се сомничи и за кампањи со беспилотни летала насочени кон цивилни аеродроми, воени бази и нуклеарни централи во Европа, што предизвикало реакција на британски, француски и германски единици за заштита од дронови.Британскиот институт Royal United Services Institute во неодамнешен извештај предупреди дека Русија обучува прорежимска „армија на млади“ за изведување саботажи во рамки на подготовките за потенцијален конфликт со НАТО. Меѓу организациите што се споменуваат е и Јунармија, младинска воена структура под покровителство на руската влада.

Свет | пред 1 месец

Две илјади украински деца вратени од окупираните подрачја и од Русија

Од почетокот на целосната руска инвазија врз Украина, две илјади украински деца се вратени од привремено окупираните подрачја и од Русија, пренесува Ukrainska Pravda. Сепак, според официјалните податоци, повеќе од 1,6 милиони деца и натаму се наоѓаат на тие територии.Според информации од Канцеларијата на повереникот за човекови права, институцијата учествувала во враќањето на 419 деца. Од нив, 83 биле вратени од привремено окупираните подрачја и од Русија со поддршка на Катар, додека 19 деца биле вратени со посредство на поранешната прва дама на САД, Меланија Трамп.Украинскиот претседател Володимир Зеленски изјави дека илјадници украински деца и понатаму се во руско заробеништво и дека секојдневно стануваат жртви на војната.„Нема да застанеме додека секое украинско дете не се врати дома“, порача Зеленски.Повереникот за човекови права, Дмитро Лубинец, предупреди дека повеќе од 1,6 милиони деца сè уште живеат на привремено окупирани територии, каде се изложени на пропаганда и, како што рече, обиди за бришење на нивниот идентитет.Според Лубинец, образовниот систем на тие подрачја е претворен во средство за идеолошко влијание, при што децата се оддалечуваат од украинскиот јазик, култура и семејства. Тој истакна дека секој ден поминат во депортација или под окупација претставува изгубен дел од детството и дополнително ја отежнува можноста за зачувување на националниот идентитет, особено кај помалите деца кои се премногу мали за самите да го бранат.

Свет | пред 1 месец

(Видео) Пилотот што спаси 167 луѓе се соочува со тужба од 1,5 милиони долари

Рускиот пилот Сергеј Белов по сè изгледа ќе мора да плати 1,5 милиони долари поради оштетување на својот Airbus А320 откако авионот принудно слетал на поле во Новосибирската област во септември 2023 година, во инцидент во кој никој од 161 патник и шест членови на екипажот не бил повреден.Судските документи кои станаа јавни на 22 јануари откриваат дека од капетанот Белов лично се бара надомест на штета во врска со вонредното слетување, кое во тоа време привлече големо внимание на светските медиуми како драматичен, но успешно завршен настан без човечки жртви.За време на летот, „Ербас А320“ изгубил притисок во зелениот хидрауличен систем, што довело до низа оперативни одлуки на екипажот. Поради забележаниот технички проблем, одлучиле да го пренасочат летот кон Новосибирск, чија писта нуди поголеми безбедносни маргини.Меѓутоа, во текот на продолжението на летот не било забележано дека стајниот трап не може да се вовлече, што го зголемило аеродинамичкиот отпор и ја забрзало потрошувачката на гориво. Како што резервите на гориво се приближувале до критично ниво, екипажот прогласил вонредна состојба и донел одлука за итно слетување надвор од аеродром.Авионот на крајот слетал на поле околу 185 километри западно од Новосибирск. Во авионот имало 161 патник, плус шест членови на екипажот и сите преживеале без сериозни повреди. Снимките од евакуацијата меѓу пченкарните полиња станаа симбол на смиреноста и професионализмот на кабинскиот и летачкиот екипаж.Понатамошната истрага, која во меѓувреме делумно била повлечена и ревидирана, укажала на неколку фактори кои влијаеле на текот на настаните. Меѓу нив се наведени грешки во проценката и распределбата на оптоварувањето во пилотската кабина, неточности во планирањето и следењето на потрошувачката на гориво и недоволно управување со ресурсите на екипажот. Истовремено, причината за почетниот технички дефект била препишана на абење на флексибилното црево во хидрауличниот систем.Во деновите по инцидентот, раководството на „Урал ерлајнс“ најавило можност авионот, по детална проверка, повторно да полета со сопствен погон и да полета од писта. Подоцнежните медиумски извештаи сугерирале поинаков исход: авионот ќе биде демонтиран и искористен за резервни делови, што на крајот и се случило.Тужбата поднесена против пилотот покренува пошироко прашање за личната финансиска одговорност на членовите на екипажот за одлуки донесени во вонредни околности. Во комерцијалното воздухопловство вообичаено е операторот да ја сноси примарната одговорност, додека поединечните грешки се анализираат низ регулаторни и дисциплински постапки, а не преку приватни тужби.

Магазин | пред 1 месец

Русија повеќе троши на отштети за загинати војници отколку на плати на живи војници

Анализите покажуваат дека Русија одвојува поголем дел од буџетот за отштети на семејствата на загинати војници отколку за плати на живи војници или за нови регрути. Според независните руски аналитички групи Тим за разузнавање и следење на конфликтите и Медиазона, повеќе од една третина од трошоците за воено персонал во Украина оди на надоместоци за семејствата на стотици илјади загинати, додека платите на активните војници чинат околу 33%, а бонусите за новаци околу 20%.Промената на руската тактика од брзи оклопни напади кон бавни пешадиски јуриши доведе до поголеми загуби, особено во сиромашните региони како Бурјатија и Чукотка. Украинските одбранбени тактики постојано нанесуваат големи загуби, а руските сили губат војници побрзо отколку што можат да регрутираат нови.Притисокот и понекогаш насилството од регрутационите канцеларии, како и игнорирањето на ранети и загинати војници, се широко документирани, а семејствата на исчезнати и загинати често се соочуваат со тешкотии да добијат информации или надомест.Овој тренд ја покажува големината на човечките и финансиските трошоци на војната за Русија и предизвиците со кои се соочува во одржувањето на својата војска во Украина.

Свет | пред 1 месец

Лукашенко: Нема сила што може да ги раздели Белорусија и Русија

Белорускиот претседател, Александар Лукашенко, денеска изјави дека нема сила која може да ја оддели Белорусија од Русија.„Денес добив извештај дека некои во Русија зборуваат како некој се обидува да ја оддели Белорусија од Русија. Немам намера тоа ни да го коментирам. Ќе кажам само едно – денес нема сила која може да ја оддели Белорусија од Русија, ниту Русија од Белорусија“, нагласи Лукашенко.Тој додаде дека околностите ги поврзале двете земји „веројатно на многу децении и векови“, зборувајќи на средба со државниот секретар на Сојузната држава, Сергеј Глаѕјев.Лукашенко истакна дека Белорусија секогаш била ориентирана кон Русија и дека многу, ако не и сè, е „наше таму“. „Нашите ресурси се таму, нашиот пазар е таму, економски сме целосно обединети. И политички исто така“, додаде тој.Претседателот нагласи дека Русија и Кина се од витално значење за опстанокот на Белорусија, истакнувајќи дека Западот, вклучувајќи ги и САД, однапред ги затворил вратите за Белорусија, додека Русија и Кина секогаш ги држеле отворени.

Свет | пред 1 месец

Голема грешка е да му се дозволи на агресорот да земе нешто, не сакам да ги повторам грешките на претходниците, вели Зеленски

Украинскиот претседател Володимир Зеленски објави остра порака на платформата X, во која ги повика западните лидери да не ги повторуваат, како што наведе, грешките од минатото во односот кон Русија. Тој предупреди дека дозволувањето отстапки кон агресор, според него, носи долгорочни последици и ја охрабрува понатамошната експанзија.„Голема грешка е да му се дозволи на агресорот да земе нешто. Тоа беше голема грешка уште од самиот почеток, почнувајќи од 2014 година. И претходно, за време на нападот и окупацијата на делови од Грузија. Па и порано, кога Чеченија беше окупирана, со целосно разорување и милион жртви – загинати и ранети“, напиша Зеленски.Тој посочи дека не сака да биде претседател кој ќе ги повтори грешките на своите претходници, ниту, како што нагласи, на лидерите од други држави кои дозволиле Русија да навлезе на нивна територија. Според него, попустливоста не е начин за запирање на рускиот претседател Владимир Путин.„Путин не може да се запре со бакнежи или со цвеќе. Јас никогаш не сум го правел тоа и не мислам дека тоа е вистинскиот пат. Мој совет до сите – не го правете тоа со Путин“, наведе украинскиот претседател.Во продолжение, Зеленски изнесе тврдење дека руската армија трпи значителни загуби на фронтот, оценувајќи дека Русија во моментов губи меѓу 30.000 и 35.000 луѓе месечно. Тој предупреди дека во случај на отстапки, Москва би можела во рок од неколку години повторно да ја обнови и зајакне својата воена моќ.„Во спротивно, тоа ќе биде прв чекор, а потоа за пет години ќе ја обнови својата војска и ќе го зголеми бројот на војници. Сега губи 30-35 илјади луѓе месечно. Можете ли да го замислите тоа во 21 век?“, напиша Зеленски.Русија ја започна целосната инвазија врз Украина во февруари 2022 година, а војната наскоро ќе влезе во петтата година. И двете страни редовно изнесуваат процени за загубите на противникот, но независната проверка на тие податоци често е отежната.Објавата на Зеленски доаѓа во период кога во западните престолнини повторно се отвора дебата за натамошната воена и финансиска поддршка за Украина, како и за можните сценарија за идни преговори. Украинскиот претседател и претходно предупредуваше дека секој компромис со Москва, според неговата оценка, може да ја охрабри натамошната агресија.

Свет | пред 1 месец

Кремљ го отфрли тврдењето дека Навални бил убиен со отров од жаба

Кремљ го отфрли тврдењето на пет европски земји дека рускиот опозициски лидер Алексeј Навални бил убиен во 2024 година во руски затвор со токсин од отровна жаба.Портпаролката на руско Министерство за надворешни работи, Марија Захарова, изјави за државната новинска агенција TASS дека обвинувањата се „дезинформациска кампања на Западот“. „Ќе бидат објавени резултатите од анализите, ќе бидат познати формулите на супстанците – тогаш ќе следат коментари. Без тоа, сите разговори и изјави се дел од кампања насочена кон одвлекување на вниманието од горливите проблеми на Западот“, рече таа.Слична порака испрати и руската амбасада во Обединетото Кралство. „Ова не е потрага по правда, туку исмејување на покојникот. Дури ни по смртта на рускиот државјанин Лондон и европските престолнини не можат да му дадат мир, што многу зборува за иницијаторите на оваа кампања“, соопшти амбасадата.Претходно, владите на Германија, Обединето Кралство, Франција, Шведска и Холандија објавија дека Навални бил убиен од руската држава со употреба на силен токсин. Анализите на посмртните остатоци покажале траги од високо токсичниот епибатидин, по што Москва беше обвинета за убиството на најголемиот противник на рускиот претседател Владимир Путин.Смртта на Навални во февруари 2024 година предизвика меѓународна осуда и обвинувања од западните влади, додека Москва повеќепати ја негираше својата вмешаност.

Свет | пред 1 месец

Шефот на НАТО: Русија трпи огромни загуби во Украина

Русија во војната во Украина претрпела „луди загуби“, со околу 65.000 војници во последните два месеци, изјави генералниот секретар на НАТО, Марк Руте, на Минхенската безбедносна конференција.Тој посочи дека приходите на Русија од нафта се намалиле за една третина и дека земјата забрзано го троши државниот фонд. Според него, Алијансата е доволно силна и Москва во моментов не би се осмелила да ја нападне.„Ќе победиме во секоја борба со Русија ако нè нападнат сега и мораме да се погрижиме и за две, четири или шест години да биде така“, изјави Руте на тркалезна маса со новинарите.

Свет | пред 1 месец

Зеленски: САД премногу бара отстапки од Украина, а премалку од Русија

Украинскиот претседател Володимир Зеленски изјави дека Соединетите Американски Држави премногу често бараат отстапки од Украина, а не од Русија, но нагласи дека и понатаму се надева оти продолжението на мировните преговори ќе биде сериозно и суштинско. По минатонеделната средба на руски и украински воени претставници во Абу Даби, разговорите меѓу Украина, Русија и САД следната недела се селат во Женева.Според изјавите на сите страни, усогласени се речиси 90 проценти од договорот, но најсложените прашања сè уште остануваат отворени, меѓу нив територијалниот статус и нуклеарната централа „Запорожје“.„Искрено се надеваме дека трилатералните состаноци следната недела ќе бидат сериозни и содржински и дека ќе ни помогнат. Но, искрено, понекогаш имам чувство дека страните зборуваат за сосема различни работи“, изјави Зеленски на Безбедносната конференција во Минхен.Тој додаде дека чувствува одреден притисок од американскиот претседател Доналд Трамп, кој го повикал да не ја пропушти можноста за постигнување мир во блиска иднина.„Американците често се враќаат на прашањето за отстапки и премногу често тие се разгледуваат само во контекст на Украина, а не на Русија“, истакна Зеленски.Сепак, украинскиот претседател изрази надеж дека САД ќе останат активно вклучени во процесот, како и дека Европа, која во последниот период е маргинализирана, ќе добие позначајна улога во разговорите.Американскиот државен секретар Марко Рубио претходно изјави дека САД ќе продолжат да работат на постигнување мировен договор за Украина, но дека останува отворено прашањето дали Русија навистина е подготвена да го заврши конфликтот. „Не знаеме дали Русите се сериозни во однос на крајот на војната. Ќе продолжиме да го тестираме тоа“, рече Рубио во Минхен.Тој нагласи дека во меѓувреме Вашингтон продолжува да врши притисок врз Москва преку нафтени санкции и преку поддршка на Украина со испораки на оружје преку НАТО, со цел да се зајакне позицијата на Киев во преговарачкиот процес.

Свет | пред 1 месец

Британскиот премие: Русија направи стратешка грешка, но забрзано се пренаоружува

Британскиот премиер Кир Стармер на Безбедносната конференција во Минхен оцени дека Русија направила стратешка грешка со започнувањето на војната во Украина, конфликт кој, според неговите зборови, однел повеќе од еден милион жртви. Тој истовремено предупреди дека Москва, и покрај исцрпувачката војна, забрзано ги обновува и зајакнува своите воени капацитети.Повиквајќи се на проценки на НАТО, Стармер нагласи дека постои предупредување оти Русија до крајот на деценијата би можела да биде подготвена да употреби воена сила против Алијансата. Сепак, подвлече дека Западот не бара судир.„Нашата цел е траен мир, враќање на стратешката стабилност и владеење на правото“, порача тој.Според британскиот премиер, Русија покажала јасен „апетит за агресија“, нанесувајќи тешки страдања на Украина, но нејзините закани не се ограничуваат само на бојното поле. Тој предупреди на хибридни активности ширум Европа – од дезинформациски кампањи што создаваат поделби, до сајбер напади и саботажи кои го нарушуваат секојдневниот живот и ја продлабочуваат кризата со трошоците за живот. Москва, според него, соработува и со популистички актери кои ги поткопуваат европските вредности.Стармер најави конкретни чекори од страна на Обединетото Кралство. Оваа година Лондон ќе испрати ударна група носач на авиони во Северниот Атлантик и на далечниот север, предводена од носачот HMS Prince of Wales. Операцијата ќе се спроведува во соработка со Соединетите Американски Држави, Канада и други сојузници од НАТО. Потегот го нарече „силен показател за посветеноста на евроатлантската безбедност“. Дополнително, најави продлабочување на нуклеарната соработка со Франција, потсетувајќи дека Велика Британија со децении ги става своите способности за одвраќање во служба на заштитата на сите членки на Алијансата.Говорејќи за европската одбрана, Стармер ја опиша Европа како „заспан џин“ со огромен потенцијал, истакнувајќи дека европските економии се десетпати посилни од руската. Но предупреди дека тој потенцијал често останува неискористен поради фрагментирано индустриско планирање и набавки. Како илустрација наведе дека Европа располага со повеќе типови борбени авиони, фрегати и дури десет различни модели главни борбени тенкови, додека Соединетите Американски Држави користат само еден модел.Заклучокот на британскиот премиер беше дека Европа мора поефикасно да ги координира своите капацитети и инвестиции, доколку сака целосно да ја искористи сопствената сила и да обезбеди долгорочна стабилност на континентот.

Свет | пред 1 месец

Отсуствата на Путин повторно во фокус, Кремљ без објаснување

Не е јасно дали последното отсуство на рускиот претседател Владимир Путин е поврзано со здравствени причини или со други околности, но неговото повремено повлекување од јавноста повторно отвори шпекулации.На Минхенска безбедносна конференција, украинскиот претседател Володимир Зеленски во интервју изјави: „Помлад сум од Путин“, по што додаде дека рускиот лидер „нема премногу време“, без притоа да појасни на што конкретно алудира. Изјавата предизвика реакции и толкувања во јавноста.Путин ретко зема одмор, но неколкупати годишно отсуствува од јавноста без официјално објаснување, што во минатото доведе до шпекулации дека се подложува на медицински третмани. И покрај тоа, во последниот период се појавува со интензивен работен распоред. Сепак, во ноември вниманието го привлече неговата појава со видливо отечени раце, што поттикна нови, недокажани гласини за можни здравствени проблеми.Во меѓувреме, американскиот претседател Доналд Трамп повторно повика Украина да направи отстапки во мировните преговори, тврдејќи дека Русија сака договор.Москва и натаму бара од Украина да отстапи дел од територијата во Донбас, услов што Киев го одбива пред најавените мировни преговори во Женева. Зеленски возврати дека Украина веќе направила компромиси, посочувајќи дека најголемиот е тоа што Путин не се соочува со правна одговорност за наводни воени злосторства.Новите дипломатски тензии доаѓаат во период кога војната влегува во петтата година, а мировните иницијативи и понатаму се соочуваат со длабоки политички и територијални несогласувања.

Свет | пред 1 месец

Трамп до Зеленски: Дејствувајте брзо со Русија или ќе пропуштите историска можност

Американскиот претседател Доналд Трамп го повика украинскиот претседател Володимир Зеленски да дејствува побрзо во преговорите со Русија, оценувајќи дека постои можност за постигнување договор.„Русија сака да постигне договор, а Зеленски ќе мора да дејствува – во спротивно ќе пропушти одлична можност. Мора да се покрене“, изјави Трамп пред новинарите.Русија и Украина одржаа две рунди мировни преговори со посредство на Соединетите Американски Држави во Абу Даби, главниот град на Обединетите Арапски Емирати, во јануари и претходно овој месец. Како резултат на разговорите беше договорена првата размена на воени заробеници по пауза од пет месеци.Од Кремљ денеска соопштија дека следната рунда мировни преговори меѓу Русија и Украина ќе се одржи на 17 и 18 февруари во Женева, Швајцарија.

Свет | пред 1 месец

Русија ја блокираше апликацијата WhatsApp

Русија ја блокираше апликацијата WhatsApp, со цел над 100 милиони корисници да преминат на државната апликација Max. Кремљ тврди дека блокадата е поради „неспремноста на Мета да се придржува до рускиот закон“, а WhatsApp и Telegram одбиле да ги чуваат податоците на руските корисници во земјата.Апликацијата Max се промовира преку телевизија, плакати и преку јавни институции, а од 2025 година мора да биде прединсталирана на сите нови уреди. Дополнително, Roskomnadzor го ограничува пристапот и до Telegram, кој е многу популарен во Русија.WhatsApp е блокиран од 2022 година откако Meta беше прогласена за „екстремистичка организација“. Од компанијата велат дека прават сè за корисниците да останат поврзани, додека проектот „На Свијази“ предупредува дека Русија сè повеќе ја ограничува слободата на интернетот. Според Tass, блокадата на WhatsApp се очекува да стане трајна во 2026 година.

Свет | пред 1 месец

(Видео) Русија тестира ново оружје со ротирачки сајли за соборување дронови

Русија го претстави своето најново неконвенционално средство во војната против Украина – систем со ротирачки челични сајли наменет за одбрана од напади со ФПВ-дронови. Уредот е поставен на оклопно беспилотно копнено возило „Курир“ и се состои од четири ротирачки дискови со тенки сајли, кои при вртење функционираат како вентилатор и треба да ги оттурнат или соборат дроновите.Прототипот беше прикажан на руската државна телевизија, каде беше демонстрирана неговата издржливост, но без јасен приказ дали возилото има горна заштита. Според наводите, системот го развиле механичари од 70. мотострелачки полк и се тестира во окупираните делови на Запорошката област.Иако слични решенија со пропелери биле патентирани претходно, се смета дека сајлите се поевтини и поиздржливи. Сепак, експертите предупредуваат дека ваквиот механизам може да има проблеми на сложен терен, каде постои ризик од заплеткување во гранки и вегетација. Системот е дел од низата импровизирани противдронски решенија што ги развиваат двете страни во конфликтот.

Свет | пред 1 месец

Лавров по коментарите дека Епстин бил руски агент: Ова не вреди ни за дискусија

Тврдењата на западните медиуми дека американскиот финансиски инвеститор и сексуален престапник Џефри Епстин можеби имал врски со руските разузнавачки служби не се ништо повеќе од лажно новинарство, изјави рускиот министер за надворешни работи Сергеј Лавров.Дипломатот реагираше на неодамнешните недокажани тврдења во западните медиуми и коментари на полскиот премиер Доналд Туск, кои сугерираат дека Епстин можеби бил агент на руските разузнавачки служби.Високите претставници во Москва рекоа дека тврдењата кои го поврзуваат Епстин со руските разузнавачки служби намерно се засилуваат за да се тргне вниманието од скандалот кој го откри лицемерието на моќните личности во САД и Европа.„Влегувате во жолто новинарство. Ова не вреди ни за дискусија. Тоа е обид за провокација од земји кои на одредени кругови во други земји случајно не им се допаѓаат“, изјави Лавров во интервју за НТВ емитувано во неделата.Тој додаде дека таквите шпекулации имале за цел да влијаат и на Републиканската и на Демократската партија во САД, како и на владите во Европа.Минатиот месец, Министерството за правда на САД објави голема количина на е-пошта, фотографии и видео снимки од имотот на Епстин, што доведе до повторно испитување на истакнати личности кои биле поврзани со Епстин, и покрај неговата осуда за сексуални злосторства.Декандентниот животен стил на Епстин и начинот на живеење на неговиот потесен круг претставуваат доказ за моралниот пропаст на западните елити, изјави Лавров. Досијата, додаде тој, „го откриле вистинското лице на Западот и на длабоката држава – или подобро кажано длабоката унија која управува со целиот Запад и се стреми да владее со светот“.

Свет | пред 1 месец

Лавров: До мир во Украина има уште долг и тежок пат

Рускиот министер за надворешни работи Сергеј Лавров изјави дека нема простор за ентузијазам околу притисокот што американскиот претседател Доналд Трамп го врши врз Европа и Украина, нагласувајќи дека патот до мир е сè уште долг и неизвесен. Неговите пораки доаѓаат неколку дена по разговорите во Абу Даби, кои Соединетите Американски Држави, Украина и Русија ги оценија како тешки, но конструктивни, иако Москва јасно сигнализира дека конечен договор ќе биде исклучително тешко да се постигне.Русија, според изјавите на Лавров, и натаму останува на своите почетни и максималистички позиции. Тие вклучуваат територијални претензии кон источните региони на Украина, јасно противење на членството на Украина во НАТО, како и отфрлање на можноста на украинска територија да бидат распоредени западни сили како дел од какви било безбедносни гаранции.Од украинска страна, претседателот Володимир Зеленски порача дека мирот може да се изгради исклучиво врз основа на цврсти и доверливи безбедносни гаранции. Тој предупреди дека Русија секое евентуално мировно решение би можела да го тестира преку нови напади или преку таканаречени хибридни операции, со што би се поткопала стабилноста и безбедноста во регионот.Во меѓувреме, Кремљ соопшти дека датумот за следната рунда преговори сè уште не е утврден, иако се најавува дека тие би можеле да продолжат во скоро време. Паралелно со дипломатските пораки, Русија ги продолжува и воените дејства, при што во текот на ноќта беше погоден енергетски објект во јужниот црноморски регион Одеса, во момент кога Украина и понатаму се соочува со ниски температури и сериозни енергетски предизвици.

Свет | пред 1 месец

Трагедија на Бајкалското Езеро: Автомобил пропаднал низ мраз, две лица загинаа

Две лица загинаа, а две се спасиле кога автомобил пропаднал низ мразот на Бајкалското Езеро, откако возачот ја прекршил забраната за возење надвор од обележаните премини. Возилото потонало на длабочина и до неколку стотици метри, а потрагата по настраданите е во тек.Две лица загинаа, а две успеале да се спасат кога нивниот автомобил пропаднал низ мразот на Бајкалското Езеро, соопшти Министерството за вонредни ситуации на Иркутската област во Русија.„Прекршувањето на безбедносните прописи при возење по мраз резултираше со пропаѓање на автомобилот и смрт на две лица на Бајкалското Езеро“, се наведува во соопштението, пренесува РИА Новости.Во понеделник вечерта, спасувачите добиле информација за „тојота рактис“ која пропаднала низ мразот на Бајкалското Езеро.Според информациите на Министерството за вонредни ситуации, возачот ја прекршил забраната за возење по мраз надвор од обележаните премини додека се движел долж заливот Уст-Анга.Автомобилот потонал на околу два километри од брегот.„Во автомобилот имало четири лица. Две од нив успеале да избегаат од возилото што тонело, но другите две, маж роден 1991 и жена родена 1989 година, не успеале да го сторат тоа“, се наведува во соопштението.Агенцијата напомена дека дното на езерото е нерамно, со карпести испакнатини. Длабочината на езерото се движи од 100 до 400 метри. Потрагата е во тек.

Свет | пред 1 месец

(Видео) Украински борбен авион собори руски дрон

Украинското воено воздухопловство објави драматична видеоснимка на која се гледа како ловечки авион Ф-16 соборува руски дрон „Шахед-136“, нудејќи редок и јасен увид во воздушните борби што станаа секојдневие над Украина. Објавата доаѓа во ист ден кога, во друг руски напад со дрон, животот го загубиле мајка и мало дете, што дополнително ја нагласува суровата реалност на конфликтот.Снимката, направена од земја, прикажува како дронот „Шахед“ лета со препознатливо гласно зуење од пропелерот, предизвикувајќи паника кај присутните. Само неколку секунди подоцна леталото експлодира откако е успешно пресретнато од украинскиот Ф-16. Јасно се слуша и огнот од авионскиот топ М61А1 „Вулкан“, како и татнежот на моторот додека ловецот се оддалечува. „Браво!“, се слуша глас на украински јазик додека остатоците од дронот паѓаат на земјата. Иако ова не е прв случај на соборување „Шахед“ со Ф-16, станува збор за една од најјасно документираните акции од овој вид.Дроновите од иранско производство, познати и под ознаката „Геран-2“, претставуваат едно од клучните средства на Русија во исцрпувачката војна. Со проценета цена на производство од околу 35.000 долари по парче, овие еднократни јуришни летала ѝ овозможуваат на Москва да изведува масовни напади длабоко на украинска територија без директно изложување на сопствени војници. Веќе повеќе од три години тие предизвикуваат страв и штети меѓу цивилното население.За Украина, пресретнувањето на ваквите дронови со скапи ракети претставува сериозен финансиски товар, додека обидите за соборување од блиска дистанца носат висок ризик за пилотите. Според специјализираното списание „Ер енд Спејс Форсес“, украинските Ф-16 во моментов извршуваат околу 80 отсто од борбените летови против руските сили. Досега се изгубени четири вакви авиони, а ќе биде потребно време пред сите околу 80 ловци, донирани од западните сојузници, да станат целосно оперативни.Поради високите трошоци за одбрана од секојдневните напади со „Шахед“, Украина е принудена на креативни решенија. Дроновите се соборуваат со автоматско оружје, ракети испукани од рамо, хеликоптери, па дури и со други беспилотни летала, во обид да се зачува скапата противвоздушна муниција и да се заштити населението.

Свет | пред 1 месец