Изјавата на министерката за образование и наука Весна Јаневска дека првачињата треба да побараат братче или сестриче предизвика реакции од Левица, СДСМ и ЛДП. Додека Јаневска тврди дека со пораката сакала да алармира за сериозниот демографски пад, опозициските партии сметаат дека проблемот не може да се решава со вакви апели.
При посетата на ОУ „Ацо Шопов“ во Радишани, Јаневска, покрај важноста на образованието, им порача на првачињата да побараат братче или сестриче, посочувајќи дека бројот на ученици значително се намалува.
Од Левица оценија дека демографската криза бара конкретни економски мерки. Пратеникот Амар Мециновиќ предложи државата да презема 20 отсто од преостанатиот станбен кредит за секое новородено или посвоено дете.
„Демографската криза не се решава со апели, туку со создавање материјални услови преку долгорочни политики и инвестиции“, порача Мециновиќ.
Од СДСМ велат дека состојбата е алармантна, посочувајќи дека има околу 3.000 првачиња помалку, 148 празни училишни објекти, 433 паралелки помалку и привремено затворање на 26 подрачни училишта.
Според СДСМ, на демографските проблеми влијаат иселувањето на младите и економската состојба, како и блокирањето на европскиот пат.
ЛДП, пак, остро ја критикуваше пораката на министерката, оценувајќи ја како „срамна и без ронка емпатија“. Од партијата прашаа дали Јаневска помислила на децата од разведени семејства, семејствата со еден родител, како и на оние кои се соочуваат со неплодност или економски тешкотии. ЛДП побара и јавно извинување од министерката и Владата.
Јаневска по реакциите објасни дека немала намера никого да навреди, туку сакала да укаже на сериозноста на демографските трендови.
„Сосема сум свесна дека тоа е лична одлука и дека треба да ја почитуваме одлуката на секој пар дали ќе има или нема деца. Со таа изјава сакав да потенцирам дека ситуацијата е алармантна“, рече Јаневска во интервју за Сител.
Таа посочи дека, доколку продолжи намалувањето на бројот на ученици, ќе продолжи и затворањето на училиштата. Според неа, потребно е подобрување на условите за живот, намалување на иселувањето и стабилизирање на демографскиот пад.
Според податоците на МОН, оваа учебна година има речиси 3.000 првачиња помалку од лани, а привремено се затвораат 26 подрачни училишта.
