ГРЦИЈА

Семејствата на жртвите бараат поширока одговорност за трагедијата кај Темпи во Грција

Учеството на грчката држава во судскиот процес за железничката несреќа кај Темпи повторно беше доведено во прашање, откако обвинителите и семејствата на жртвите ги оспорија мотивите на државата во постапката.Државниот обвинител предложи да биде отфрлено граѓанското побарување на државата, кое е насочено само кон четворица обвинети – тројца железнички службеници кои биле на должност ноќта на судирот на 28 февруари 2023 година и поранешен надзорник на железничката инспекција во Лариса. Според обвинителството, учеството на државата во постапката е процесно спорно.На критиките им се приклучија и семејствата на загинатите. Адвокатот Антонис Псаропулос, чија 20-годишна ќерка Марти загина во трагедијата, оцени дека настапот на државата е „недоволен“ и „формален“, обвинувајќи ја владата дека се обидува вината да ја сведе исклучиво на човечка грешка.Тој нагласи дека незаконскиот трансфер на железничкиот службеник е поврзан со смртта на жртвите и дека обвинетите биле свесни за ризиците што ги носеле нивните постапки, особено поради отсуството на соодветни безбедносни системи на делот од пругата каде што се случила несреќата.Од друга страна, адвокатот кој ја застапува државата ги отфрли обвинувањата дека постои намера за прикривање или пренасочување на одговорноста.Следното рочиште е закажано за 9 јуни.

Свет | пред 11 час

Вучиќ во Тиват се сретна со Мицотакис, разговарале за нови проекти и гасовод преку Македонија

Претседателот на Србија, Александар Вучиќ изјави дека во Тиват остварил средба со Киријакос Мицотакис, на која разговарале за натамошно унапредување на соработката меѓу Србија и Грција, како и за реализација на нови заеднички проекти.Вучиќ, кој учествува на Самитот ЕУ – Западен Балкан во Тиват, посочи дека со грчкиот премиер разговарале и за можната изградба на гасовод преку територијата на Македонија.„Имав разговор со Киријакос Мицотакис за понатамошно унапредување на соработката меѓу Србија и Грција и верувам дека отворивме нови полиња на соработка и важни проекти за кои можеме да разговараме, вклучително и за планираната изградба на гасовод преку територијата на Македонија“, изјави Вучиќ.Тој додаде дека на средбата станало збор и за европскиот пат на Србија, при што изразил очекување дека Грција ќе продолжи да ја поддржува земјата во процесот на европска интеграција.

Свет | пред 14 часа

Спасени 101 мигрант кај Крит, пристигнале со два чамци

Вкупно 101 мигрант беа спасени од два чамци во близина на островот Крит во четвртокот, соопштија грчките власти.Мигрантите биле лоцирани на околу 38 наутички милји југоисточно од Кали Лименес, во јужниот дел на Крит, откако биле забележани од брод што оперира во рамки на Фронтекс, агенцијата на Европската Унија за гранична и крајбрежна стража.По спасувањето, тие биле безбедно пренесени во пристаништето Кали Лименес, каде што надлежните служби ќе спроведат процедури за прием, регистрација и идентификација.Претходно истиот ден, уште 69 мигранти биле спасени во близина на островот Гавдос, најјужната точка на Европа, кое се наоѓа јужно од Крит.Според официјалните податоци на Грчката крајбрежна стража, бројот на мигранти кои од Либија пристигнуваат на Гавдос и јужен Крит во мај се зголемил за повеќе од 50 проценти, што укажува на зголемен притисок врз миграциските рути во источниот Медитеран.

Свет | пред 14 часа

Мицотакис и бугарскиот премиер разговараа за Вертикалниот гасен коридор

Грчкиот премиер Кирјакос Мицотакис ја истакна стратешката важност на инфраструктурната иницијатива „Вертикален коридор“ за време на разговорите со неговиот новоизбран бугарски колега Румен Радев, оценувајќи дека проектот може значително да ја зајакне енергетската безбедност и транспортната поврзаност во Југоисточна Европа.Мицотакис нагласи дека Вертикалниот гасен коридор ја зголемува геополитичката улога на двете земји, овозможувајќи им да снабдуваат со енергија и држави во северниот дел на Европа.Станува збор за стратешка енергетска иницијатива која ја поврзува Грција со Југоисточна и Централна Европа преку мрежа на гасоводи и инфраструктура што овозможува транспорт на природен гас, особено течен природен гас (LNG), од грчките терминали кон север.Грчкиот премиер претставил и поширока визија за создавање копнен коридор што би ги поврзал грчките пристаништа со Украина преку мрежа на автопати и железници кои би минувале низ Бугарија и Романија.„Прашањата за поврзаноста се во срцето на нашата соработка“, изјави Мицотакис, додавајќи дека Грција и Бугарија би можеле да обезбедат значителни европски средства за реализација на иницијативата.Тој изрази надеж дека преку трипартитна соработка меѓу Грција, Бугарија и Романија ќе се забрза реализацијата на проектот.За време на средбата, двајцата лидери се согласија да ја продлабочат соработката во областа на енергетиката, транспортот и регионалната поврзаност, како и да ја зајакнат координацијата околу европските приоритети и прекуграничните инфраструктурни проекти.

Свет | пред 15 часа

Дрон со експлозив предизвика дипломатска тензичност меѓу Грција и Украина

Инцидентот со беспилотно пловило пронајдено во Јонското Море предизвика дипломатска реакција од Атина, која официјално побара објаснување од Киев и предупреди на можните последици за безбедноста во регионот.Како реакција на случајот, грчката влада испрати официјален дипломатски протест до Киев, оценувајќи дека беспилотното пловило претставувало сериозна закана за безбедноста на поморскиот сообраќај, но и за цивилното население и животната средина во регионот.Според грчките медиуми, министерот за надворешни работи, Јоргос Герапетритис, ги информирал претставниците на Европската Унија и НАТО за резултатите од истрагата, а прашањето било отворено и во разговор со украинските власти.Атина испратила писмени и усни протести до Киев на крајот од мај, нагласувајќи дека дронот, за кој се тврди дека можел да носи околу 100 килограми експлозив, претставувал потенцијална закана за цивилните бродови и животната средина.Во протестната нота, грчката страна истакнала дека правото на Украина на самоодбрана не може да биде оправдување за активности што би можеле да ја загрозат безбедноста во Медитеранот и побарала вакви инциденти да не се повторуваат.Според извештајот на грчкото Министерство за одбрана, анализираното пловило било беспилотен површински брод од типот „MAMAI“, модел кој претходно бил користен во напади врз руски поморски цели.Техничката истрага покажала дека дронот бил опремен со два независни сателитски системи – еден за навигација и позиционирање, а друг за далечинско управување и видео-пренос во живо.Грчките експерти утврдиле дека пловилото не било лансирано во близина на грчките острови, туку најверојатно влегло во грчките територијални води од област јужно од Италија. Според наодите, дефект во комуникацискиот систем довел до губење на контролата врз дронот, по што морските струи го однеле до брегот на Лефкада.Во извештајот се наведува и дека по прекинот на комуникацијата бил активиран автоматски безбедносен протокол, поради што дронот се движел кон однапред зададени координати.Грчките власти соопштија дека сега очекуваат официјален одговор од украинска страна во врска со целиот инцидент.

Свет | пред 23 часа

Грчката полиција разби мрежа за злоупотреба на европски фондови вредна 2,5 милиони евра

Грчката полиција од раните утрински часови спроведува голема акција во регионите на Кожани и Агринио, насочена кон разбивање на мрежа осомничена за злоупотреба на европски земјоделски субвенции.Според информациите од надлежните служби, уапсени се 13 лица кои, според истрагата, незаконски се стекнале со повеќе од 2,5 милиони евра преку измами поврзани со земјоделски фондови на Европската Унија.Акцијата ја води Одделот за борба против економски криминал при Дирекцијата за борба против организиран криминал. Истражителите се сомневаат дека осомничените биле дел од организирана криминална група која со лажни изјави и манипулации ги оштетила финансиските интереси на Европската Унија.Меѓу приведените има и управител и вработен во Центар за прием на барања за субвенции, додека истрагата опфаќа вкупно 39 лица.Од грчката полиција соопштија дека, покрај незаконски стекнатата финансиска корист, во случајот биле откриени и даночни прекршоци.Ова е втора голема акција во врска со злоупотреба на европските земјоделски фондови во Грција во последните денови. Минатата седмица, во одделни полициски операции во Солун, Килкис, Сер, Атина и на островот Крит беа уапсени 39 лица, осомничени дека незаконски присвоиле повеќе од 7 милиони евра од европските субвенции.

Балкан | пред 1 ден

ЕУ со најголема мобилизација досега против шумските пожари: Распоредени 777 пожарникари и 27 летала

Европската комисија ја претстави најголемата досега координирана операција за справување со шумски пожари, со која стотици пожарникари и десетици летала ќе бидат распоредени низ јужна Европа пред почетокот на летната сезона, пишува Екатимерини.Според планот, вкупно 777 пожарникари од 14 земји ќе бидат стратешки распоредени во Грција, Кипар, Италија, Франција, Шпанија и Португалија, кои се сметаат за најризични подрачја за појава на големи пожари.Поддршка ќе обезбедуваат и 22 противпожарни авиони и пет хеликоптери од заедничката европска флота за итни интервенции.Оперативната координација ќе ја врши Координативниот центар за итни реакции на Европската Унија, кој ќе обезбедува 24-часовен мониторинг и управување со активностите врз основа на метеоролошки податоци и процени на ризик.Дополнително, преку сателитскиот систем „Коперникус“ и Европскиот информативен систем за шумски пожари ќе се врши мапирање и прогнозирање на потенцијалните жаришта.Европската Унија најави и отворање на регионален центар за координација на борбата против шумските пожари во Кипар во текот на 2026 година. Центарот ќе служи за сместување на летала, обука на персонал и подобрување на подготвеноста во источниот Медитеран.Механизмот за цивилна заштита на ЕУ овозможува прекугранична помош во случаи кога националните капацитети не се доволни за справување со големи природни катастрофи.

Свет | пред 2 дена

Металика го победи Ајрон Мејден во „сеизмичкиот дуел“ во Атина

Концертот на Металика во Атина предизвикал посилни микроземјотреси од настапот на Ајрон Мејден, покажало истражување на Институтот за геодинамика при Националната опсерваторија на Грција.Според научниците, инструментите за следење на сеизмичка активност регистрирале микропотреси за време на двата концерта одржани на Олимпискиот стадион во Атина, но оние предизвикани од публиката на Металика биле значително посилни.Истражувањето покажало дека околу 80.000 посетители на концертот на Металика на 9 мај создале вибрации еквивалентни на земјотрес со магнитуда од 1,5 степени, а најсилниот ефект бил забележан за време на изведбата на песната „Moth Into Flame“.Од друга страна, публиката на Ајрон Мејден, која броела околу 50.000 луѓе на концертот одржан на 23 мај, создала вибрации со јачина од 0,9 степени според Рихтеровата скала, додека се изведувала песната „Killers“.Сеизмолозите анализирале и движења на навивачите за време на финалето на Евролигата, одржано во близина на стадионот, но утврдиле дека тие предизвикале послаби вибрации од двата музички спектакли.Од Институтот наведуваат дека резултатите покажуваат како современата сеизмологија може да ги регистрира не само природните појави, туку и влијанието на човековата активност врз околината. Според нив, двата концерта претставувале своевидна „природна лабораторија“ во која колективното движење, ритамот и ентузијазмот на десетици илјади обожаватели биле претворени во мерливи сеизмички бранови.

Магазин | пред 2 дена

Македонија најевтина во Европа за сместување, Грција меѓу 12-те најскапи во Европа

Грција се наоѓа на 12-то место меѓу најскапите европски туристички дестинации за краткорочно изнајмување сместување, покажуваат податоците на компанијата за туристичка аналитика AirDNA.Според анализата, просечната цена за ноќевање во Грција изнесува 141 евро, додека најскапата европска дестинација е Монако со просечни 417 евра по ноќ.Во првите пет најскапи дестинации се и Исланд со 211 евра, Андора со 189 евра, Швајцарија со 184 евра и Обединетото Кралство со 176 евра за ноќевање.Анализата покажува дека Грција има една од најизразените сезонски разлики во цените на сместувањето во Европа. Во текот на летните месеци, просечната цена се зголемува за 55 проценти и достигнува 174 евра по ноќ, додека во останатиот дел од годината изнесува 112 евра.Најголема разлика е забележана на островот Миконос, каде летното ноќевање во просек чини 758 евра, што е за 65,6 проценти повеќе од цената од 458 евра во останатиот дел од годината.На европско ниво, најголем сезонски раст на цените е регистриран во Портимао во регионот Алгарве во Португалија, каде цените во лето се повисоки за 71,6 проценти. Во Марбела, пак, цената се зголемува од 200 на 315 евра по ноќ.Според истражувањето, најприфатлива дестинација за краткорочно сместување во Европа е Македонија, каде просечната цена за ноќевање изнесува само 39 евра.

Магазин | пред 2 дена

Ципрас му возврати на Рама: Не ја мешајте заштитата на малцинствата со национализам

Поранешниот грчки премиер Алексис Ципрас му возврати на албанскиот премиер Еди Рама, откако Рама го обвини за национализам поради неговите критики за третманот на грчкото малцинство во Албанија.Спорот избувна по повредувањето на припадник на грчкото етничко малцинство за време на протест во јужна Албанија. Ципрас побара албанските власти да ги заштитат правата на грчката заедница, по што Рама реагираше со остра порака на социјалните мрежи.Во објава на платформата Икс, Рама оцени дека Ципрас покажал „рефлекси од минатото“ и се обидува да собира политички поени преку избрзани заклучоци за соседите и нивните суверени институции.Ципрас, пак, одговори дека изјавите на Рама се дадени „во жарот на моментот“ и потсети на Преспанскиот договор како доказ за неговата посветеност на решавање чувствителни национални прашања преку дијалог.„Нашата работа, напори и борби за промоција на мирот и соработката во регионот, вклучително и историскиот Преспански договор, не оставаат простор некој јавно да ми држи лекции што значи национализам или што претставува левицата во 21 век“, порача Ципрас.Тој нагласи дека не треба да се меша патриотската должност за заштита на правата на националните малцинства со националистичките тенденции кои, според него, повторно земаат замав во светот.Инцидентот што ја предизвика расправијата се случил во областа Звернец во јужна Албанија, каде граѓани протестирале против плановите за изградба на голем туристички комплекс во еколошки чувствителна зона.Проектот се поврзува со Џаред Кушнер, зет на американскиот претседател Доналд Трамп.Рама ја обвинил приватната агенција за обезбедување за насилството врз демонстрантите и повредувањето на еден од учесниците, но истовремено силно го бранеше проектот вреден четири милијарди евра, оценувајќи дека ќе донесе туристи со висока платежна моќ и нови работни места за локалното население.

Свет | пред 2 дена

Растат цените во Грција: Инфлацијата достигна 5 проценти

Инфлацијата во Грција се искачи на 5 отсто во мај, во споредба со 4,6 проценти во април, покажуваат прелиминарните податоци што во вторникот ги објави европската статистичка служба Евростат.Главен двигател на растот на цените се повисоките цени на енергенсите, кои дополнително се зголемија поради конфликтот на Блискиот Исток.Во исто време, инфлацијата во еврозоната порасна на 3,2 проценти, од 3 отсто во април.Со инфлација од 5 проценти, Грција се наоѓа меѓу земјите со највисок раст на цените во Европската Унија. Повисока инфлација во мај забележале само Бугарија со 6,3 проценти и Литванија со 5,1 процент.На ниво на еврозоната, најголем придонес за инфлацијата има енергетскиот сектор, каде растот достигнал 10,9 проценти во мај, во споредба со 10,8 проценти во април.Следуваат услугите со раст од 3,5 проценти, наспроти 3 проценти претходниот месец. Кај храната, алкохолот и тутунот е забележан раст од 2 проценти, додека кај индустриските производи што не се поврзани со енергијата инфлацијата достигнала 0,9 проценти.Економистите предупредуваат дека продолжените тензии на Блискиот Исток и растот на цените на енергенсите би можеле дополнително да го зголемат инфлаторниот притисок во Европа во наредниот период.

Свет | пред 2 дена

Мечка истрча на автопат во Грција, автомобил директно удри во неа

Возач за влакно избегнал потешки последици откако вчера со својот автомобил удрил во мечка која се обидувала да го премине автопатот Егнатија во северна Грција, објавија локалните медиуми.Станува збор за заменик-градоначалникот на општината Дескати во регионот Гревена. Тој не се здобил со повреди во судирот, но превентивно бил пренесен во локалниот здравствен центар.Неговиот автомобил претрпел сериозни оштетувања.Засега не е познато колку тешко е повредена мечката. Во вторникот еколошки организации започнале потрага по животното за да ја утврдат неговата состојба.Несреќата е само една во низата сообраќајни инциденти во кои се вклучени мечки на патиштата во руралните делови на Грција.

Свет | пред 2 дена

Две девојки залутале на снежните падини на Олимп, спасени по ноќна потрага

Две млади планинарки биле успешно спасени по ноќна акција на грчките спасувачки служби на планината Олимп, соопшти грчката противпожарна служба.Станува збор за девојки на возраст од 21 и 24 години кои се изгубиле во темнината во снежниот дел на планината, во близина на локалитетот Прионија над селото Литохоро. Во спасувачката операција, која траела во текот на ноќта, учествувале осум припадници на противпожарната служба.Спасувачите успеале да ги лоцираат двете планинарки и безбедно да ги придружуваат до сигурно место.Инцидентот се случува само неколку дена по трагичната несреќа на Олимп, кога животот го загуби 25-годишен шпански планинар. Тој бил пријавен за исчезнат на 20 мај, откако тргнал кон врвот Митикас, највисоката точка во Грција на 2.917 метри надморска височина. Неговото тело беше пронајдено неколку дена подоцна.Иако Олимп е една од најпосетуваните планини во Грција и голем дел од годината е лесно достапен за посетители, надлежните потсетуваат дека планинарењето и искачувањето бараат добра подготовка, внимателно планирање и почитување на временските услови. Во изминатите години на планината се регистрирани повеќе несреќи со смртни последици.

Свет | пред 3 дена

Нови бранови мигранти пристигнуваат на Крит, Атина алармира за зголемен прилив

Десетици мигранти повторно се спасени во близина на грчкиот остров Крит, додека грчките власти предупредуваат на зголемен миграциски притисок од Либија кон јужниот дел на земјата.Според официјални податоци, во понеделникот биле спасени 143 лица од четири пловни објекти кои се нашле во неволја јужно и југоисточно од островот Гавдос. Ден претходно, уште 42 мигранти биле извлечени од море од трговски брод во истиот регион, откако испловиле од областа околу Тобрук.Грчките власти проценуваат дека од почетокот на годинава околу 10.000 мигранти нелегално влегле во земјата по копнен и морски пат, при што речиси половина од нив тргнале токму од Либија. Останатите пристигнале преку Турција.Министерот за миграција Танос Плеврис предупреди дека владата би можела да воведе „многу строги мерки“ доколку продолжи зголемениот прилив на мигранти од северноафриканската држава. Тој изјави дека најголем дел од лицата кои моментално пристигнуваат се од Бангладеш и Египет, кои вообичаено не ги исполнуваат условите за добивање бегалски статус.Атина веќе подолго време се обидува да воспостави поефикасна соработка со властите во источна Либија за спречување на заминувањето на мигрантските чамци, но досегашните напори не дале значајни резултати.Според Плеврис, соработката со Турција дала подобри резултати, па миграциските текови во источниот дел на Егејското Море се намалени за околу 70 проценти. Во минатото, токму рутата од турскиот брег кон грчките острови Лезбос, Самос и Кос беше една од најкористените за нелегален влез во Европската Унија.За време на големата мигрантска криза во 2015 година, преку Турција во Грција пристигнаа речиси еден милион луѓе на пат кон другите земји од Европа.

Свет | пред 3 дена

Топлотните бранови ќе ја чинат Грција до 13 милијарди евра до 2030 година

Повторливите топлотни бранови би можеле да ја чинат грчката економија до 13 милијарди евра во периодот до 2030 година, предупредува осигурителната и кредитна компанија Allianz Trade во најновата анализа.Според извештајот, екстремно високите температури негативно ќе влијаат врз продуктивноста на работниците, трошоците за енергија и инвестициската активност, што може да доведе до намалување на економското производство за дури 4,1 проценти.Анализата покажува дека инвестициите би можеле да се намалат за околу осум проценти, потрошувачката за четири проценти, додека инфлацијата би можела да порасне за 2,5 проценти. Истовремено, стапката на невработеност би се зголемила за еден процент.Од компанијата предупредуваат дека топлотните бранови повеќе не се краткотрајна временска појава, туку претставуваат структурен економски шок со долгорочни последици. Според проценките, најголем удар ќе претрпат економиите кои имаат помал капацитет да ги апсорбираат ефектите од климатските промени.Извештајот доаѓа во време кога Грција сè почесто се соочува со долги периоди на екстремни горештини, кои влијаат врз туризмот, земјоделството, енергетскиот сектор и целокупната економска активност.

Магазин | пред 3 дена

Рама му возврати на Ципрас: Оставете ги „рефлексите од минатото“ и националистичката реторика

Албанскиот премиер Еди Рама остро реагираше на ставовите на новата грчка левичарска партија на Алексис Ципрас, обвинувајќи ја дека од изолиран инцидент направила политичко прашање и дека се потпира на „рефлекси од минатото“, пренесе Екатимерини.Во отворено обраќање на социјалните мрежи до својот „стар пријател“ Ципрас, Рама изрази зачуденост што новата партија брзо го поврзала инцидентот во Звернец со наводни прекршувања на правата на грчкото малцинство во Албанија и со европската интеграција на земјата.Повод за реакцијата беше соопштение на грчката партија ЕЛАС, која побара од Атина да реагира по повредувањето на грчки државјанин за време на протест против туристички проект во јужна Албанија. Проектот, според медиумските извештаи, се поврзува со инвестиции во кои е вклучен и зетот на американскиот претседател Доналд Трамп, Џаред Кушнер.Рама нагласи дека инцидентот не се случил за време на мирен протест за имотни права, туку во атмосфера на дезинформации и обиди за попречување на законски активности на меѓународни инвеститори кои работеле на приватно земјиште стекнато во согласност со албанските закони.Тој посочи дека властите веднаш реагирале, при што биле уапсени одговорните лица од приватното обезбедување, и била одземена лиценцата на компанијата и бил разрешен директорот на полицијата во Валона.„Не е ниту праведно ниту одговорно еден изолиран инцидент да се претставува како доказ за прекршување на малцинските права, имотните права или владеењето на правото“, порача Рама, додавајќи дека таквиот пристап не е во духот на европските вредности.Албанскиот премиер истакна дека грчкото национално малцинство во Албанија претставува „богатство“ за државата и дека ужива исти права и заштита како и сите други граѓани.Во пораката до Ципрас, Рама оцени дека на Европа ѝ се потребни помалку „рефлекси од минатото“, а повеќе доверба во фактите, институциите и добрососедските односи. Истовремено, му посака успех на поранешниот грчки премиер на претстојните избори, изразувајќи надеж дека неговото ново политичко движење нема да прибегнува кон националистичка реторика и брзи заклучоци за соседните држави.

Свет | пред 3 дена

Оваа грчка плажа изгледа како површина на Месечината, а морето е неверојатно тиркизно

Една од најнеобичните плажи во Грција се наоѓа на островот Милос, каде природата создала пејзаж што многумина го споредуваат со површината на Месечината. Станува збор за плажата Саракинико, која привлекува туристи од целиот свет со своите бели вулкански карпи и тиркизно море.Нејзиниот препознатлив изглед е резултат на илјадници години дејство на ветерот и морските бранови, кои ги обликувале сиво-белите вулкански формации во необични форми. Поради тоа, западниот дел од плажата наликува на лунарен пејзаж, додека источниот открива сосема поинаква глетка – сув и карпест предел со ретка вегетација.Саракинико е формирана од комбинација на вулкански ерупции и фосилни наслаги, а денес важи за една од најфотографираните и највпечатливи природни атракции во Грција.Посетителите особено ја препорачуваат во доцните попладневни часови, кога белите карпи добиваат златна нијанса, а залезот на сонцето создава спектакуларна глетка над Егејското Море. Поради својата единствена убавина, Саракинико е меѓу најпосакуваните дестинации за туристите кои бараат поинакво летно искуство, далеку од вообичаените плажи и големите туристички гужви.

Магазин | пред 3 дена

Телефон во рака може да ве чини и до 4.000 евра во Грција

Грција воведе значително построги казни за користење мобилен телефон за време на возење, а новите правила важат и за странските туристи кои патуваат низ земјата.Според новиот Закон за безбедност во сообраќајот, кој целосно стапи во сила минатата година, користењето мобилен телефон зад волан се смета за еден од најопасните прекршоци и една од главните причини за сообраќајни несреќи.Грчките власти предупредуваат дека возачите кои држат телефон во рака реагираат за околу половина секунда побавно, што при брзина од 110 километри на час значи дополнителни 14 метри сопирачки пат.За прв прекршок е предвидена парична казна од 350 евра и одземање на возачката дозвола на еден месец. При повторување на прекршокот казната изнесува 1.000 евра и шестмесечно одземање на дозволата, додека трет прекршок се казнува со 2.000 евра и забрана за управување возило во траење од една година.Доколку користењето мобилен телефон предизвика сообраќајна незгода, санкциите се уште построги. При втор ваков случај следуваат 2.000 евра казна и одземање на возачката дозвола на четири години, а при трет случај казната достигнува 4.000 евра и забрана за возење во траење од осум години.Законот предвидува и затворски казни. Во случаи на тешки телесни повреди предизвикани од користење телефон зад волан, сторителот може да биде осуден на затвор до 10 години, додека доколку несреќата заврши со смртни последици, казната може да достигне и до 20 години затвор. За несреќи со повеќе жртви е предвидена и доживотна затворска казна.Грчката полиција најавува засилени контроли во текот на летната туристичка сезона, особено на патиштата што водат кон најпосетените туристички дестинации.

Магазин | пред 3 дена

„Евзони“ повторно тесно грло за туристите, мерките се неопходни пред летниот шпиц

Продолжениот викенд повторно донесе зголемена фреквенција на граничните премини „Богородица“ и „Евзони“, каде што денеска се формираа колони од возила на патот кон грчките туристички центри.Според информации од патници, на македонска страна патничките автомобили чекаат околу половина час за преминување на границата, додека кај автобусите задржувањата во одредени периоди достигнуваат и неколку часа. Иако летната сезона сè уште официјално не е започната, продолжениот викенд уште еднаш покажа со каков притисок би можеле да се соочат граничните премини во јули и август.Дополнителен предизвик претставува и новиот европски систем за евиденција на влез и излез на државјани од земји кои не се членки на Европската Унија. Системот предвидува регистрација на биометриски податоци, што значително го продолжува времето потребно за проверка на секој патник.Најголемо влијание од новите процедури се очекува токму на најфреквентните премини, меѓу кои е и „Евзони“, главната копнена врска на македонските граѓани со грчкото крајбрежје.Грчките власти претходно најавија мерки за подобрување на протокот на патници и возила, вклучително и зајакнување на граничните служби, унапредување на информатичките системи и можни технички интервенции на инфраструктурата. Сепак, денешните колони покажуваат дека овие мерки ќе треба што побрзо да се спроведат во практика.Се очекува зголемената фреквенција на „Богородица“ и „Евзони“ да продолжи и во текот на наредните денови, поради што на патниците им се препорачува однапред да го планираат патувањето и да предвидат дополнително време за преминување на границата.

Балкан | пред 5 дена

Грк обвинет во Лондон за шпионажа во корист на Иран

Грчки државјанин е обвинет во Велика Британија за помагање на странска разузнавачка служба, за која се верува дека е поврзана со Иран, во активности насочени против новинар на лондонската телевизија „Иран Интернешнл“, соопшти британската полиција, пренесува „Ројтерс“.Британската антитерористичка полиција соопшти дека станува збор за 46-годишниот Јоанис Аидинидис, кој живеел во Минхен. Тој бил уапсен на 16 мај и обвинет според британскиот Закон за национална безбедност. Се очекува подоцна денеска да се појави пред Судот во Вестминстер.Според полицијата, обвиненијата се поврзани со соработка со Иран и следење на новинар кој работел за „Иран Интернешнл“, медиум познат по критичкото известување за властите во Техеран. Истражителите посочуваат дека засега не постои поширока закана за јавноста.Шефицата на антитерористичката полиција во Лондон, Хелен Фланаган, изјави дека случајот може да предизвика загриженост кај медиумите на персиски јазик во Велика Британија.„Продолжуваме тесно да соработуваме со повеќе организации и поединци за да им обезбедиме безбедносни совети и поддршка, вклучително и на лицето и организацијата поврзани со оваа истрага“, изјави Фланаган.Случајот доаѓа откако во април три лица беа обвинети за обид за подметнување пожар во објект поврзан со „Иран Интернешнл“ во северозападен Лондон, иако тогаш немало повредени ниту материјална штета.Британската полиција претходно соопшти дека ја истражува можната поврзаност на Иран со тој инцидент, како и со серија подметнати пожари на еврејски објекти во Лондон. Одговорноста за повеќето напади ја презеде проиранската група „Ашаб ал-Јамин ал-Исламија“ (HAYI).

Свет | пред 6 дена

„Шеврон“ ќе бара природен гас во Јонско море

Американскиот енергетски гигант „Шеврон“ поднесе понуда за вклучување во проектот за истражување на природен гас во грчкото подморје, во таканаречениот Блок 10 во Јонското Море, објави „Јуроњуз“. Потегот ја нагласува растечката важност на источниот Медитеран во европската енергетска стратегија и може дополнително да ја зајакне улогата на Грција во енергетската безбедност на регионот.„Шеврон“ бара приклучување кон концесијата за Блок 10, кој се наоѓа во близина на заливот Кипарисија во јужниот дел на Јонското Море, во партнерство со грчката компанија HelleniQ Energy. Компаниите побарале и операторската улога да премине од „ХелениКју Енерџи“ на „Шеврон“.Според договорот, кој сè уште чека регулаторно одобрување, „Шеврон“ би презел 70 проценти од концесијата и би станал главен оператор, додека „ХелениКју Енерџи“ би ги задржал преостанатите 30 проценти.Овој потег доаѓа во период кога големите меѓународни енергетски компании сè повеќе го насочуваат вниманието кон источниот Медитеран. „Шеврон“ веќе управува со гасното поле „Афродита“ во близина на Кипар, а воедно го проширува и своето присуство во грчките истражувања на јаглеводороди.Интересот на американските компании за грчкото подморје се поврзува со проценките за значителни резерви на природен гас, но и со геополитичката стабилност што ја нуди Грција како членка на Европска Унија и НАТО.„Шеврон“ и „ХелениКју Енерџи“ веќе имаат потпишано договори за закуп на уште четири подморски подрачја јужно од Крит и Пелопонез, со што дополнително се засилува енергетската улога на Грција во регионот.Грчкиот министер за животна средина и енергетика Ставрос Папаставру оцени дека вклучувањето на „Шеврон“ е важен чекор за развојот на грчкиот сектор за јаглеводороди и доказ дека Грција станува центар на големи енергетски инвестиции во источниот Медитеран.Во меѓувреме, конзорциумот ExxonMobil – „ХелениКју Енерџи“ неодамна одлучи да не продолжи со следната фаза од истражувањата во блокот „Западно од Крит“, но интересот на „Шеврон“ за Блок 10 покажува дека меѓународните компании и понатаму гледаат потенцијал во одредени делови од грчкото подморје.

Свет | пред 6 дена

Дожд, грмежи и локални бури денес во овие делови од Грција

Делови од северна и источна Грција денеска ќе бидат зафатени со нестабилно време, со зголемена облачност, локални врнежи од дожд и изолирани грмежи, соопшти Националната метеоролошка служба на земјата.Најизразени временски промени се очекуваат во централна и источна Македонија, Тракија, островите во северниот дел на Егејското Море, источните копнени предели и на островот Евбеја, каде што повремено ќе има дожд и краткотрајни невремиња.Во останатите делови од Грција времето ќе биде претежно стабилно, но во попладневните часови локални врнежи и грмежи се можни во внатрешноста на централна и јужна Грција, на Пелопонез, како и во планинските предели на Крит.Утринските часови на места во западна Грција ќе бидат проследени со намалена видливост. Ќе дува северен ветер со јачина од 3 до 5 бофори, а во делови од Егејот повремено ќе достигнува и до 6 бофори.Температурите ќе бидат малку пониски во однос на претходните денови, особено во источните региони, и ќе се движат меѓу 26 и 28 степени, додека во централните делови на земјата локално ќе достигнат и до 30 степени Целзиусови.Во Атина се очекува променливо облачно време со можност за краткотраен дожд до пладне, додека во Солун времето ќе биде претежно стабилно, со можност за слаб дожд во околните планински подрачја во текот на денот.Според прогнозите, за време на викендот се очекува подобрување на временските услови, иако во попладневните часови на некои места во внатрешноста и понатаму ќе има услови за изолирани врнежи и грмежи.

Балкан | пред 6 дена

Дете во Грција заврши на интензивна нега: со тротинет се забило во автомобил

Дванаесетгодишно момче се наоѓа на интензивна нега откако било тешко повредено во сообраќајна несреќа со електричен тротинет во Пеанија, југоисточно од Атина.Според грчката полиција, несреќата се случила во саботата кога момчето, возејќи електричен тротинет, не застанало на знак „стоп“ на раскрсница и се судрило со автомобил кој минувал по патот.Првичните информации покажуваат дека детето не носело заштитен шлем, а постојат сомнежи дека во моментот на несреќата користело и мобилен телефон.По несреќата било пренесено во Детската болница „Агиа Софија“ во Атина, каде што е сместено на Одделот за интензивна нега. Лекарите соопштија дека неговата состојба е стабилна и дека во моментов не е во животна опасност.Инцидентот доаѓа во период кога во Грција е забележан пораст на повреди поврзани со користење електрични тротинети. Според здравствените власти, само во мај биле регистрирани повеќе од 80 случаи на повредени деца, додека болниците бележат и сè поголем број возрасни лица повредени при вакви несреќи.Надлежните институции повторно апелираат до граѓаните, особено до малолетниците, да ги почитуваат сообраќајните правила и задолжително да користат заштитна опрема при управување со електрични тротинети.

Свет | пред 6 дена

Грчката полиција заплени 25 нелегални пиштоли, се сомнева во шверц за турски криминални групи

Грчките власти запленија 25 нерегистрирани пиштоли во близина на северниот град Комотини, во случај што истражителите го поврзуваат со шверц на оружје од Турција преку регионот Еврос.Според полициски информации, оружјето било откриено во саботата вечерта кога припадници на Дирекцијата за борба против организиран криминал запреле автомобил „Нисан Алмера“ на локален пат во близина на Комотини, по дојава добиена претходно истиот ден во Солун.При претресот бил уапсен 29-годишен грчки државјанин, а во багажникот на возилото бил пронајден црн патен куфер со 25 пиштоли завиткани во најлон за заштита од влага и корозија. Оружјето немало сериски броеви ниту ознаки на производител.Истражителите ги опишуваат како таканаречени „дух-пиштоли“, кои по изглед наликуваат на моделите „Глок“. Според полицијата, оружјето покажува сличности со пратка од 147 пиштоли запленети во октомври минатата година.Властите се сомневаат дека оружјето било наменето за турски криминални групи кои дејствуваат во Грција и во западноевропски земји, особено во Шпанија. Во истрагата се споменуваат криминалните организации „Далтонс“ и „Бајгаралар“, кои се поврзуваат со убиства и трговија со дрога.Осомничениот изјавил дека за 300 евра требало да го пренесе оружјето до Комотини и како организатор го посочил лице по име Мехмет.Подоцна бил уапсен и 43-годишен грчки муслиман од Александруполис, кој според истражните органи претходно бил приведуван поради криумчарење мигранти во регионот Еврос.Ова е само еден во низата случаи на заплена на оружје во северна Грција. Во јануари 2025 година крајбрежната стража заплени 61 пиштол и 3.000 куршуми во близина на Александруполис, додека во октомври истата година полицијата пронајде 147 пиштоли и 173 наполнети рамки кај мигранти во близина на селото Тихеро.Случајот го привлече и вниманието на Европол, кој неодамна координираше меѓународна акција со властите на Шпанија, Грција и Бугарија против мрежа осомничена за шверц на оружје од Турција кон Западна Европа.

Свет | пред 6 дена

Грција воведува нови мерки за намалување на метежот на Евзони поради новиот ЕЕС систем

Грчките власти најавија пакет нови мерки за олеснување на сообраќајот на граничните премини Евзони и Кипи, по зголемените задржувања предизвикани од имплементацијата на новиот европски систем за влез и излез (ЕЕС).Одлуката беше донесена на состанок во Солун, свикан од заменик-министерот за внатрешни работи, надлежен за Македонија и Тракија, Константинос Гулекас, на кој присуствуваа претставници на надлежните институции, безбедносните служби и локалните власти.Според грчкото Министерство за внатрешни работи, мерките предвидуваат дополнително зајакнување на информатичките системи за побрзо спроведување на контролите, како и разгледување на можноста за изградба на привремени технички решенија за олеснување на протокот на патници и возила.Гулекас посочи дека туристичкиот и трговскиот сообраќај кон Грција постојано расте, а задолжителната биометриска проверка на секое лице што влегува или излегува од земјата создава дополнителни доцнења при граничните контроли.За денеска се најавени теренски посети на специјални тимови на граничните премини Евзони, кон Македонија, и Кипи, кон Турција, со цел да се испита можноста за непосредна примена на дополнителните мерки.Во меѓувреме, грчкиот министер за заштита на граѓаните, Михалис Хрисохоидис, изјави дека Грција мора целосно да ја спроведе европската легислатива, додавајќи дека добил поплаки од колегите од Македонија и Србија за проблемите што ги создава новиот систем. Тој истакна дека, покрај процесот на биометриска регистрација, дополнителен проблем претставува и застарената инфраструктура на дел од граничните премини.

Македонија | пред 6 дена