охрид

Реализиран проектот „Мала ноќна музика“

Општина Охрид беше вклучена од реализацијата на проектот ,,Мала ноќна музика” чиј носител е збратимениот град Крагуевац од Србија. Покрај Охрид, партнери на проектот беа и градовите Бар, Црна Гора и Фоча, Босна и Херцеговина.Како дел од активностите на проектот, во периодот од 2-ри до 5-ти јуни 2023 година, во Крагуевац, се одржаа работилници за Менаџмент во културата и двe концертни вечери, на кои настапија млади музичари од градовите учесници.Во името на Охрид, во рамки на втората концертна вечер настапија младите охридски флејтисти м-р Даниела Петкоска, Светлана Богданоска Ристоски, Моника Стојкоска и Ана Матеска.Целта на проектот е продлабочување на пријателството помеѓу збратимените градови. Проектот е финансиран од Фондот за Западен Балкан, Општина Охрид, Општина Крагуевац и музичкиот центар од Крагуевац. Во проектот беа вклучени и Младинскиот центар од Охрид, Културолошката иницијатива „5 до 12“ и здружението „Ахрид“ од Охрид.

Охрид | пред 2 години

Нема фотографија

Во вторник ќе се изведуваат градежни активности на улицата „Марко Цепенков“ во Охрид

Се известуваат сите учесници во сообраќајот дека на ден 06.06.2023 година (вторник) на улицата „Марко Цепенков“, ќе се изведуваат градежни активности.Со цел непречено и безбедно одвивање на активностите се молат сите учесници во сообраќајот да ја избегнуваат оваа улица и да не се паркираaт на истата.

Охрид | пред 2 години

Сертификати за основците кои изучуваа италијански јазик во две охридски училишта

Денес во општинските основни училишта „Св. Климент Охридски“ и „Христо Узунов“ беа доделени дипломи на околу 100 ученици кои беа опфатени со проектот на Општина Охрид за факултативно изучување на италијански јазик.Учениците од петто и шесто одделение од овие училишта за првпат годинава изучуваа италијански јазик два пати во неделата.Предавач по овој предмет беше професор Маја Мијаиловиќ, а на настанот меѓу другите присуствуваа и универзитетските професорки д-р Радица Никодиноска и професорките Бранка Гривческа како претставници на Здружението на наставници по италијански јазик.

Охрид | пред 2 години

Завршија спортските училишни игри во Охрид

Со финалните натпревари во мал фудбал помеѓу учениците од општинските основни и средни училишта, денеска во спортскиот центар „Тодор Александров“ во Велгошти завршија овогодинешните Училишни спортски игри, кои ги организираше Сојузот за училишен спорт.Во конкуренцијата помеѓу средните училишта на натпреварите во мал фудбал, најдобри беа учениците од ОСУ „Свети Климент Охридски“ кои го освоија првото место. Второто место им припадна на учениците од угостителското училиште „Ванчо Питошески“, а третото место го освоија учениците од СОСУ „Свети Кирил и Методиј“.Во категоријата за основно образование, првото место им припадна на учениците од ООУ „Христо Узунов“. На втората позиција се најдоа учениците од ООУ „Ванчо Николески“ од Лескоец, а третото место им припадна на учениците од ООУ „Григор Прличев“.Во името на Локалната самоуправа, наградите на најуспешните училишни екипи ги додели советникот во Советот на Општина Охрид, Наум Јамандиев.Натпреварите од Училишните спортски игри се одржуваа во два дела, есенски и пролетен дел, а освен во мал фудбал, учениците се натпреваруваат и во одбојка, баскет, ракомет, атлетика, пинг-понг и шах.

Охрид | пред 2 години

Чешка парламентарна делегација во посета на Општина Охрид

Парламентарна делегација од економскиот совет при чешкиот парламент, составена од претседателот Михал Кортиш и членовите Ондреј Фебер, Мирослав Плевни и Ростислав Костил, денес беше во посета на Охрид. Дел од делегацијата беа и амбасадорот на Република Чешка во Македонија, Н.Е. Јарослав Лудва и конзулот на Република Чешка, Давид Чернохорски.Во рамки на посетата делегацијата оствари средба со градоначалникот Кирил Пецаков. На средбата соговорниците разговараа за продлабочување на соработката на повеќе полиња и пренесувања на искуствата. Сите членови на парламентарната делегација претходно обавувале градоначалнички функции. Во склоп на делгацијата беа и претставници на стопанскиот сектор од Чешка.Средбата беше искористена за потпишување на меморандум за соработка помеѓу Општина Охрид и „Смарт ФинТехнологиес“. Потписници на меморандумот беа градоначалникот Кирил Пецаков во име на Општина Охрид и Михал Вит од компанијата „Смарт ФинТехнологиес“. Со меморандумот се опфаќа соработка во понатамошниот развој на „Касарна Хаб“, овозможување пријатна бизнис клима за чешките компании, поддршка во економскиот развој, заедничка поддршка за иновативни бизнис идеи во рамки на „Касарна Хаб“ и поддршка во активирањето на локалната бизнис заедница. Исто така предвидено е со меморандумот да се разменуваат искуства помеѓу охридските компании и компаниите од Чешка.Потписниците на меморандумот се согласија дека овој конкретен чекор е почеток во продлабочувањето на соработката со Република Чешка.

Охрид | пред 2 години

Заврши 28-та седница на Советот на Општина Охрид

Советниците на Советот на Општина Охрид на денешната 28-ма Седница ги усвоија Записниците од 25-та и 26-та седница. Беа усвоени 16 –те точки на дневниот ред којшто беше дополнет со уште една точка, а се однесуваше на Предлог одлуката за измена на одлуката за начинот и постапката на регулирање на паркирањето во рамките на градежната парцела со употреба на механизирани паркинг системи. Покрај оваа се усвоија и следниве Предлог – Програми.Предлог-Програма за измени на програмата за поддршка на локалниот економски развој на општина Охрид за 2023 година. Предлог-Програма за измени на програмата за поттикнување на развојот на туризмот на општина Охрид за 2023 година. Предлог-Програма за измени и дополнувања на програмата за финасиските потреби на ТППЕ Охрид за 2023 година. Предлог-Програма за измени и дополнувања на програмата за заштита на животната средина и природата за 2023 година. Предлог-Програма за измени и дополнувања на програмата за активностите на општина Охрид во областа на културата за 2023 година. Предлог-Програма за измени и дополнувања на програмата за спорт и рекреација за 2023 година. Предлог-програма за измени и дополнувања на годишната програма за изработка на урбанистички планови на територијата на општина Охрид за 2023 година. Предлог-Програма за измени и дополнувања на развојна програма за капиталните инвестиции на општина Охрид во областа на основното образование 2023-2025 година (НА). Предлог-Програма за измени и дополнувања на развојна програма за капиталните инвестиции на општина Охрид во областа на средното образование 2023-2025 година (НБ). Предлог-Програма за измени и дополнувања на годишната програма на општина Охрид за здравствена и социјална заштита за 2023 година (Т1). Предлог-Програма за измени и дополнувања на програмата за енергетска ефикасност за 2023 година. Предлог-Програма за измени и дополнувања на програмата за уредување на градежно земјиште за 2023 година. Предлог-Програма за измени на развојната програма за уредување на градежно земјиште за 2023 – 2025 година. Предлог-Програма за дополнување на програмата за урбана опрема – изградба и одржување за 2023 година. Предлог-одлука за изменување и дополнување на буџетот на ЕЛС Охрид за 2023 година. Предлог-одлука за изменување и дополнување на Одлуката за извршување на Буџетот на општина Охрид за 2023 година.

Охрид | пред 2 години

Во понеделник ќе се прска против комарци во Охрид

Се информира граѓаните дека на ден 12.06.2023 година ќе се спроведе дезинсекција против возрасни форми на комарци. Дезинсекцијата ќе се врши на површина од 500 хектари на територијата на Општина Охрид.

Охрид | пред 2 години

Промовирана збирката поезија создадена од учениците од основните и средните училишта во Охрид

Во просториите на Општина Охрид, денес, беше промовирана збирката поезија која е создадена од учениците од основните и средните училишта во Охрид. Насловот на оваа книга е „Тие Доаѓаат“, а издавач е Општина Охрид.Книгата е поделена во два дела и тоа прв дел се песните од учениците од основно училиште, додека вториот е резервиран за учениците од средните училишта. Збирката вкупно брои 55 песни, од кои 43 се од основците, а 12 од средните училишта. Промотор на книгата беше Славе Ѓорго Димоски, а главен и одговорен уредник е Митре Велјаноски. Тиражот на изданието брои 200 книги.Во име на Општина Охрид присутните ги поздрави заменик градоначалникот Перчо Божиновски.– Чест и задоволство е да се присуствува на овој прекрасен културен настан по повод промоција на втората книга „Тие доаѓаат“, откако првата ја виде светлината на денот во 2006 година. Станува збор за збирка поезија во која ценетиот поет и професор, Славе Ѓорго – Димоски на 90-ина страници по свој избор ги смести поетските творби на 55 млади творци од охридските основни и средни училишта. Меѓу кориците на книгата расеани се никулците кои се фатиле во костец со јазикот, кои ќе продолжат да ја разгоруваат јазичната искра и ќе го развиорат духовниот оган на македонскиот јазик. Зошто како што ќе рече ценетиот Блаже Конески Јазикот е единствена наша татковина. Се додека го чуваме, го негуваме, го вардиме, го гледаме јазикот наш македонски – ќе можеме да сметаме дека ја имаме и татковината. Како куќа, како дом, како огниште. Издавач на книгата е градоначалникот на Охрид,Кирил Пецаков кој секогаш застанува и ги поддржува проектите во кои се вклучени талентирани деца на кои останува ова општество. А авторите на прекрасните поетски творби се токму нашите паметни дечиња кои затропале на триумфалната порта на литературата, бидејќи влегувањето низ неа бара многу мака, обврски, откажувања, предизвици. На сите нив им посакаувам успеси понатака, да ги дофатат сите височини во творештвото, секогаш негувајќи го нашиот мајчин македонски јазик којшто е основен белег, генетски код на се она што е македонско. Да сте ми живи и здрави и уште многу вакви убави настани да бидат повод за нашите наредни средби, истакна заменик градоначлникт во своето обраќање.Инаку, ова е втора книга – „Тие Доаѓаат“, а првата беше објавенa во 2006 година.

Охрид | пред 2 години

Се одржа купот во спортски рибилов „Охрид 2023“

Спортски риболовци и рибарски клубови од неколку македонски градови беа дел од Купот во спортски риболов „Охрид 2023“ кој се одржа на Охридското Езеро. Натпреварувањето го организираше спортскиот клуб „Свети Апостол Петар“ со поддршка на Општина Охрид.На завршната свеченост од манифестацијата, заменик градоначалникот, Перчо Божиновски ги додели наградите на риболовците кои остварија најдобри резултати во екипно и поединечно натпреварување.Натпреварот се организираше на патеката помеѓу хотел „Метропол“ и населбата „Лагадин“, согласно Правилникот за организирање на натпревари во спортски риболов и Правилата за натпревари во дисциплина „пливка“.

Охрид | пред 2 години

Охрид домаќин на конференција за локална самоуправа, граѓански организации, образование и спорт

Вчера во Охрид започна тридневната Конференција „Проектни предизвици- Локална самоуправа,граѓански организации, образование и спорт“ што ја организираат Геостратешкиот институт „Глобал“, спортската академија „Скај Велнес“ и Општинскиот сојуз на училишен спорт.Во улога на домаќин на конференцијата пред присутните се обрати градоначалникот на Охрид Кирил Пецаков кој се осврна на значењето на спортот и физичката активност што е и главна тема на дискусија на настанот.– Дозволете да го изразам моето огромно задоволство што денес сум меѓу вас на отворањето на конференцијата „Проектни предизвици- локална самоуправа, граѓански организации, образование и спорт“ што наредниве неколку дена ќе се одржува во Охрид ,а на која ќе се расправа за значењето на спортот.Одамна е познато дека основна друштвена и индивидуална вредност е човечкиот живот и здравјето. А основна алатка за здрав живот и ведар дух е спортувањето. Спортот како натпревар или игра има огромно значење за правилен психофизички развој на децата и младите. Токму затоа огромно е значењето на образовните и останати институции во правилно насочување на младите, а во таа насока е организирана и денешнава конференција.Секако упатувам честитки до Здружението за Геостратешки Истражувања „Глобал“, Скај Велнес и Општинскиот сојуз на училишни спортови кои го реализираа проектот “Учиме да пливаме“, а во којшто беа вклучени првачињата и деца со посебни потреби од Скопје. Се надевам дека вакви спортски случувања во иднина ќе се организираат и тука во нашиов град.Деновиве ќе имате тематски дебати во кои ќе бидат вклучени универзитетски професори, домашни експерти, раководители на Сектори од локално и национално ниво и еминентни новинари. Посакувам да донесете заклучоци кои ќе овозможат напредок во спортскиот живот, а нас ќе не обврзете да работиме на континуирано усовршување на условите за спортување. Секако, покрај работниот дел посакувам да одвоите време да прошетате по убавиот Охрид кој изобилува со природни убавини и културно – историски знаменитости. Посетете ја Наколоната населба кај Градиште или „влезете во древнините“ на старото градско јадро кое е надвиснато над езерските води. Качете се на Самуиловите тврдини или на Античкиот театар. Верувајте секогаш ќе најдете интересни и недопрени содржини кои сведочат за вечна Македонија. И секако здрави и живи со убави впечатоци повторно дојдете кај нас- рече градоначалникот Пецаков.Пригодни обраќања имаа и градоначалникот на општина Аеродром, Тимчо Муцински и проф. д-р Иван Анастасовски од Факултетот за физичко образование, спорт и здравје при Универзитетот Св. Кирил и Методиј од Скопје.

Охрид | пред 2 години

Шишиња, лименки, пластика, конзерви извадени од Охридско Езеро

Шишиња, лименки, пластика, конзерви се извадени од Охридското Езеро за време на новата еколошка акција на Нуркачкиот центар „Амфора“ од Охрид.Нуркачите затекнаа огромна количина на разновиден цврст отпад.Потенцираа дека најголемата количина на цврст отпад доаѓа преку реките кои се влеваат во езерото и носат огромни количини на отпад.Раководителот на „Амфора“, Јован Секулоски, кажа дека пред неколку години дале предлог да се изградат минибрани со кои во голема мера ќе се намали количината на отпад што завршува во езерото.Во акцијата учествуваа 28 нуркачи од Нуркачкиот Центар Амфора, Спелеонуркачки клуб Врело од Скопје како и припадници на нуркачкиот тим на БСС на АРМ кои се вклучуваат во сите поголеми еколошки акции и активности што ги организира Нуркачкиот Центар Амфора.

Актуелно | пред 2 години

Одбележан 24-ти мај денот на просветителите

Во рамки на одбележувањето на 24-ти мај, Денот на сесловенските просветители претпладнево пред споменикот на Кирил и Методиј во градскиот парк, Општина Охрид додели симболични награди на 311 основци и средношколци од општинските училишта, кои освоиле највисоки награди на државни и регионални натпревари.Пред присутните на настанот градоначалникот Пецаков се осврна на значењето на делото на Кирил и Методиј.-Денес се собравме тука да го одбележиме денот посветен на извонредното епохално, просветителско дело на Сесловенските браќа Кирил и Методиј.Распространивајќи го мислењето дека секој народ има право својата вера и култура да ги прима на својот мајчин јазик тие ја создадоа првата словенска азбука глаголицата која беше основа за создавање на кирилското писмо. Дарувајќи им знаење на своите ученици тие ја поставија основата за подигнување на Охридската книжевна школа којашто е етаблиран духовен центар со такви културолошки особености што до денес не успеал да ги стекне ниту еден друг универзитет.Верувајќи во тоа дека во Светот има безброј зборови и дека сите тие имаат свое значење браќата Кирил и Методиј го направија цивилизацискиот чекор за Европа описменувајќи ги словенските народи, просветлувајќи ги и вадејќи ги од мракот, зошто еднаш просветлен ум повеќе никогаш не може да биде мрачен.За просветителската мисија на браќата Кирил и Методиј учат нашите деца од најрана возраст.Нашите ученици кои покажале најдобри резултати на државни, регионални и меѓународни натпревари се едни од Кирило методиевите следбеници. Тие се нашата гордост, нашите идни водичи, лидери на кои останува светот. Од срце им честитам за постигнатите успеси и посакувам и понатака да ги дофатат сите височини што се пред нив. Тоа се деца кои сфатиле дека знаењето е богатство кое не може да се украде од единката, кое не може да се “избрише“ со гума или да избледи. Затоа деца, учете, тоа ќе ви даде таква сила со која ќе може да поместите се што ќе наумите. Никогаш не престанувајте да учите затоа што животот никогаш нема да престане да ви биде учител.Ние како локална власт пак, ќе го поддржуваме секој ваш успех и ќе работиме на создавање услови за реализација на секој ваш добар проект, зошто само така може да градиме напредно општество.Нека ни е честит Денот посветен на Големото дело на Светите Кирил и Методиј- рече градоначалникот Пецаков.Во рамки на чествувањата, претходно во ЦК „Кирил и Методиј“ во населба Кошишта се одржа панихида и се положи свежо цвеќе пред нивниот Споменик каде се одржа и културно уметничка програма.

Охрид | пред 2 години

Свечен уметнички настан во чест на „Кирил и Методиј“

„Уметниците во чест на светите браќа Кирил и Методиј“ беше насловен свечениот настан кој во чест на големиот празник, се одржа вчеравечер во црквата „Света Софија“.За музичкиот дел од програмата се погрижија учениците од ОМУ „Методи Патче“ во класата на м-р Даниел Чуркоски и младата охридска пијанистка Викторија Митеска. Во рамки на свеченоста за животот и делото на сесловенските просветители беседеше Проф. д-р Димитар Пандев, а беше отворена и изложбата на фотографии „Охрид во духот на средниот век“ од Славчо Малезанов.На почетокот на програмата во името на Општина Охрид пред присутните се обрати заменик градоначалникот, Перчо Божиновски.-Неопислива е радоста и огромно е задоволството, на овој голем празник посветен на нашите просветители, светите браќа Кирил и Методиј да се биде вечерва тука, во овој преубав амбиент и да се ужива во едно уникатно музичко патување, приредено од младите таленти, кои се гордост за сите нас.Оваа можност сакам да ја искористам и да упатам благодарност до организаторите, кои со својот труд и посветеност продолжуваат во континуитет да ја приредуваат оваа културна манифестација, која покрај свечената музичка програма ќе ни понуди и други уметнички содржини, кои се достојни да бидат слушнати и видени, токму на овој ден.Епохалното дело на светите браќа како основоположници на нашата писменоста и култура има неизмерна важност за Охрид, за македонскиот народ, за Македонија и за целиот славјански свет. Не постојат избрани зборови со кои може да се долови нивната големина, нивната сила и нивното трудољубие, на патот кон божјата промисла.“Но кој оратор, каков панегирик може достојно и пристојно да ги пофали светите Кирил и Методиј? Најголемата за нив пофалба е оти папата, денешниот папа римски, откако им ги оцени маките и трудот, откако ја оцени големината на нивните дела ги нарече рамноапостоли и издаде заповед, строга повелба низ сета своја паства да го празнуваат сите тие денот на Кирил и Методиј. И така денеска сиот славјански род го празнува великиот празник….”Овие зборови, искажани од големиот преродбеник Григор Прличев нека бидат нашиот мотив и нашата инспирација да продолжиме да го чуваме и вреднуваме споменот на Кирил и Методиј и достојно да ја фалиме и славиме нивната светост.Почитувани, во духот на верата и православието, во мое лично име и во името на градоначалникот на Општина Охрид, Кирил Пецаков, ви упатувам срдечни честитки по повод денешниот голем празник со желби за добро здравје, благосостојба и посветла иднина. Нека е вечно името на нашите светители и учители, а чествувањето на нивните вредни дела да го оставиме како аманет за идните генерации, истакна Божиновски во своето обраќање.Свеченоста беше организирана со поддршка на Општина Охрид во рамки на Програмата за одбележување на 24. мај, Денот на сесловенските просветители.

Охрид | пред 2 години

Обука за подготовка на раководниот и командниот кадар на општина Охрид за заштита и спасување

Подготовка на раководниот и командниот кадар од просторните сили за заштита и спасување, во делот на превенција и делување во случај на природни непогоди и други несреќи, беше целта на обуката која беше организирана вчера во Општина Охрид.Обуката ја спроведе Центарот за обуки при Дирекцијата за заштита и спасување и на неа учествуваа вработени во Локалната самоуправа кои се членови на Кризниот штаб, претставници на јавните претпријатија, претставници на противпожарната единица, претставници на единицата за планинско спасување и спасување на вода, медицински лица и претставници на други институции.Пред почетокот на обуката, учесниците ги поздрави градоначалникот на Општина Охрид, Кирил Пецаков.-Како одговорна власт, согласно одредбите од Законот за заштита и спасување имаме донесено Програма за заштита и спасување, која предвидува превентивни и плански програмски мерки кои се преземаат со цел навреме да се откријат и спречат природни непогоди и други несреќи и да се отстранат последиците од настанатите природни непогоди во мир, воена и вонредна состојба.Општина Охрид веќе има формирано Штаб за заштита и спасување која го предводам јас како командант. Во неговите рамки функционираат Просторна специјализирана единица за комунални работи во јачина на вод; Просторна специјализирана единица за прва медицинска помош со јачина на вод; Просторна специјална единица за противпожарна заштита со јачина на одделение и Специјална единица за планинско спасување и спасување на вода. Штабот, по потреба воспоставува постојана соработка со Подрачните одделенија на Центарот за управување со кризи, Дирекцијата за заштита и спасување, Министерството за одбрана и Министерството за внатрешни работи.Преку овие активности создаваме услови за организирано делување и обезбедуваме можности за соодветна опременост и координираност на силите за заштита и спасување и за справување со кризни состојби, со една основна цел, а тоа е заштита на граѓаните, материјалните добра и природните ресурси. Очекувам оваа обука да овозможи соодветна подготовка на вработените во општината и сите кои се вклучени во заштитата и спасувањето на локално ниво и да ги пренесе сите потребни информации и практики на кризниот штаб, истакна Пецаков во своето обраќање.Освен обуката за Штабот за заштита и спасување, во рамки на Програмата за заштита и спасување на Општина Охрид предвидени се и низа други активности кои ќе се водат и реализираат според системот за планирање, програмирање и буџетирање.

Охрид | пред 2 години

Отворена изложба за културното и природното наследство на Охрид

Вчера во ООУ „Григор Прличев“ беше отворена изложбата на изработки „Гледај учи и пренеси…ТИ- чувару на културното и природно богатство на Охрид“.Изложбата беше завршен настан на проектот „Watch and Learn“ што е дел од CIPSS програмата 2022-2023, а го реализира и имплементира тим од Секторот за ТЛЕР заедно со претставници од ООУ “Григор Прличев“.За значењето на изложбата пред присутните зборуваше советничката во Советот на Општина Охрид, Ана Крстеска.-Во денес изложените изработки е сконцентрирана суштината на проектот на кој сите вие вредно работевте повеќе месеци, а тоа е подигнување на свеста и значењето за приридното и културно наследство на регионот Охрид.Знаејќи дека наследството на еден народ е преточено во неговата култура сосема е логично да кажеме дека културата е извор на неизмерна сила која на народите им помага да ги надминат препреките но и им дава волја да се соочат со новите предизвици. Древниот Охрид е бедем на македонскиот национален идентитет, научен и културен центар кој ја промовира Република Македонија како земја која се грижи за своето минато, сегашност и иднина. Тука во Охрид е Музејот на Вода, куќата на Уранија стана научен центар на МАНУ во кој редовно се организираат научни симпозиуми и промоции. Во Охрид се наоѓа локалитетот на Манчевци , Св. Климентовиот Универзитет на Плаошник, Златната Одаја во куќата на Робевци и многу други места сведочат за нашето огромно природно и културно наследство.Токму затоа сметам дека е прекрасно што Општина Охрид заедно со познати научно образовни институции од Шведска стана дел од проектот Watch and learn. Во име на градоначалникот Кирил Пецаков ви се заблагодарувам за овој значаен проект со кој се обезбедува стабилен и одржлив континуитет во зачувување, проучување и ревитализација на македонското природно и културно наследство- истакна Крстеска.Претходно во рамки на проектот „Watch and learn“ беа одржани едукативни, тематски, интерактивни настани и работилници . Проектот се имплементираше и реализираше во соработка со генерација 2012-2013 година, заедно со Универзитетот Лунд ( LUCE) и „Валенберг“ Институтот од Шведска.

Охрид | пред 2 години