СЛУЧАЈ ТАФТАЛИЏЕ

Судењето за трагедијата во Тафталиџе почнува на 30 март: на Стојанче ќе му суди судијата од предметот за убиството на Вања и Панче

На 30 март ќе започне судскиот процес против Стојанче Јовановски, сопруг на Ивана Јовановска, која на 2 март скокна од балкон од шести кат заедно со својата шестгодишна ќерка. Случајот ја потресе јавноста и отвори сериозни прашања за институционалната реакција во случаи на семејно насилство.Судењето ќе го води судијата Ивица Стефановски, познат по постапувањето во предметот за убиствата на Вања Ѓорчевска и Панче Жежовски.Според Обвинителството, Јовановски подолг период вршел психичко и физичко насилство врз сопругата. Таа била тепана, навредувана и понижувана, како во домот, така и на јавни места и пред сведоци, при што ѝ биле упатувани закани дека ќе биде избркана од домот и ќе ѝ биде одземено детето.Обвинението наведува дека насилството кулминирало на критичниот ден, по што Ивана, во состојба на тешка психичка вознемиреност и безизлезност, го извршила самоубиството.„Малтретирањето ја довело оштетената во состојба на страв, безнадежност и чувство на безизлезност, поради што таа не можела разумно да ги контролира своите постапки“, наведуваат од Обвинителството.Против Јовановски, според информациите од МВР, претходно биле поднесени повеќе од десет пријави за семејно насилство. Паралелно, против него се водела истрага и за други кривични дела, меѓу кои и трговија со дрога, а двапати бил осудуван, вклучително и за напад врз полициски службеник.По трагедијата, инспекциски служби од Министерството за социјална политика утврдиле пропусти во постапувањето на Центарот за социјални работи.Податоците на МВР покажуваат дека од почетокот на годината до 10 март се регистрирани 319 кривични дела поврзани со семејно насилство, поднесени се 207 кривични пријави, а во 14 случаи е одреден притвор. Во истиот период се евидентирани и 602 поплаки за семејно насилство.

Македонија | пред 5 дена

Стојанче ја тепал Ивана и пред малата Катја: Истрагата завршена, пред трагедијата таа тргнала да се исели, но Стојанче и се заканувал

Основното јавно обвинителство Скопје поднесе обвинение против Стојанче Јовановски за трагедијата во Карпош во која мајката Ивана и нејзината малолетна ќерка Катја го загубија животот по пад од балкон.На обвинетиот му се ставаат на товар три кривични дела: телесна повреда сторена како продолжено дело на семејно насилство, загрозување на сигурноста и наведување на самоубиство и помагање во самоубиство.Според обвинението, на 2 март на повеќе локации во Скопје обвинетиот физички ја нападнал сопругата, удирајќи ја со шлаканици и тупаници, при што таа во еден момент изгубила свест. Истиот ден, на паркинг зад Основниот кривичен суд Скопје, и упатил сериозни закани по нејзиниот живот и тело, со што кај неа предизвикал страв и чувство на несигурност.Обвинителството наведува дека обвинетиот подолг временски период сурово и нечовечно постапувал кон сопругата, која била во положба на фактичка и егзистенцијална зависност од него. Во ноември 2022 година, како што се наведува, тој издејствувал Ивана Јовановска со договор за дар да му го отстапи својот идеален дел од станот во кој живееле со нивната малолетна ќерка.По стекнувањето на сопственоста, според обвинението, започнало психичко и физичко малтретирање, кое во 2025 година прераснало во сурово и нечовечно постапување.Обвинетиот често ја тепал и омаловажувал сопругата, и во домот и на јавни места, пред сведоци и во присуство на нивната малолетна ќерка, заканувајќи се дека ќе ја избрка од домот и дека ќе ѝ го одземе детето.На критичниот ден, по ново психичко и физичко малтретирање и закани, жената се вратила во станот со ќерката, со намера да се спакува и да замине. Обвинетиот инсистирал да се качи со неа во станот и таму продолжил со заканите. Сведок на настанот го оттурнал обвинетиот и заедно се симнале пред зградата за да ја почекаат оштетената.Според обвинителството, долгогодишното малтретирање ја довело жената во состојба на тешка психичка вознемиреност, страв и безнадежност, по што таа скокнала од терасата на станот од шестиот кат заедно со својата малолетна ќерка.Јавниот обвинител до Основниот кривичен суд Скопје поднесе и предлог за продолжување на мерката притвор за обвинетиот, поради опасност од бегство и можност да продолжи со насилнички кривични дела.

Македонија | пред 1 седмица

Полицијата не повикала социјални работници кога Ивана била нападната на Клиника, тврди ресорниот синдикат

Синдикалната гранкова организација при САДУ на Центрите за социјална работа во Македонија ги демантираше тврдењата дека стручни лица од Центарот биле присутни кога Ивана наводно била нападната од сопругот Стојанче Јовановски додека била на лекување во Клиничкиот центар, инцидент кој според одредени медиуми го гледала и нејзината ќерка Катја. Станува збор за мајката и детето кои трагично го загубија животот по пад од балкон во скопската населба Карпош.Од синдикатот соопштија дека во јавноста се пласираат шпекулации и неточни информации во врска со постапувањето на Центрите за социјална работа.Тие тврдат дека записник од наводен вонреден инспекциски надзор, за кој се говори во дел од медиумите, до денот на објавувањето на нивниот демант воопшто не бил доставен до Јавната установа Меѓуопштински центар за социјална работа – Скопје.Воедно, категорично ги отфрлаат и наводите дека социјални работници биле присутни при наводниот физички напад врз Ивана пред здравствената установа.Според синдикатот, на 19 јануари 2026 година – денот кога наводно се случил инцидентот – Центарот не добил никаква пријава или повик за интервенција во Клиниката за дигестивна хирургија во рамки на комплексот клиники. Од увидот во службената документација, како што велат, произлегува дека тој ден дежурни биле две службени лица од Специјализираниот тим, но дека тие не биле повикани на интервенција.Од синдикалната организација оценуваат дека ваквите информации се пласираат тенденциозно и служат за дефокус на јавноста и дискредитирање на улогата на стручните лица во Центрите за социјална работа.Тие предупредуваат дека со ширење непроверени информации се нанесува штета врз угледот и професионалниот интегритет на вработените, кои, како што наведуваат, често работат во услови на зголемен ризик и соочување со чувствителни случаи на семејно насилство.Синдикатот најавува дека ќе застане во одбрана на вработените во Центрите за социјална работа и бара целосно процесуирање на постапката, со цел да се утврдат фактите и одговорноста за постапувањето на сите инволвирани институции.

Македонија | пред 1 седмица

(Видео) Стојанче, сопругот на Ивана останува во притвор уште 8 дена: правеше гримаси на прашањата дали чувствува грижа

Стојанче Јовановски, сопруг на 31-годишната жена, која заедно со своето 6-годишно дете починаа по пад од балкон во Карпош, молчејќи и со правење гримаси влезе во суд. Беше прашан дали станал поголем маж со насилството кое седум години го трпела Ивана, како што тврди Обвинителството – но не одговори. За него судот извести дека останува во притвор уште осум дена.Тој молчеше и на прашањата дали чувствува вина, дали со молчење се брани и во судот каде ќе се одлучува за неговиот притвор откако Обвинителството отвори истрага.  Кога беше прашан од нашата екипа „како можевте седум години да малтретирате жена“, тој мавташе со главата.Основното јавно обвинителство Скопје поведе постапка и предложи мерка притвор за Стојанче Јовановски осомничен за кривични дела наведување на самоубиство и помагање во самоубиство, телесна повреда и загрозување на сигурноста, во врска со трагедијата во скопската населба Карпош во која починаа Ивана Јовановска и шестгодишна ќерка Катја.Според обвинителството, постои основано сомнение дека осомничениот, сопруг на починатата со кого таа била во бракоразводна постапка, во периодот од 2019 година до 2 март континуирано ја малтретирал физички и психички, ја навредувал, тепал и понижувал, нанесувајќи ѝ видливи повреди по телото.Според прибраните докази, ваквото однесување се интензивирало во текот на 2025 и 2026 година, поради што Ивана Јовановска се нашла во безизлезна состојба и донела одлука да си го одземе животот. Таа ја земала во раце својата шестгодишна ќерка и скокнала од балконот на шестиот кат од станот во кој живееле, по што двете паднале на бетонската

Настани | пред 2 седмици

Ивана била седум години малтретирана и тепана од Стојанче, дента кога скокнала со Катја во раце добивала закани дека ќе биде убиена

Основното јавно обвинителство Скопје поведе постапка и предложи мерка притвор за Стојанче Јовановски осомничен за кривични дела наведување на самоубиство и помагање во самоубиство, телесна повреда и загрозување на сигурноста, во врска со трагедијата во скопската населба Карпош во која починаа Ивана Јовановска и нејзината шестгодишна ќерка Катја.Според обвинителството, постои основано сомнение дека осомничениот, сопруг на починатата со кого таа била во бракоразводна постапка, во периодот од 2019 година до 2 март континуирано ја малтретирал физички и психички, ја навредувал, тепал и понижувал, нанесувајќи ѝ видливи повреди по телото.„Од кривичната пријава како и од дополнително прибавените докази, произлегува дека во периодот од 2019 година па се до 2 март кога оштетената – сега починатата Ивана Јовановски, донела одлука да си го одземе животот, осомничениот, нејзин сопруг со кој била во бракоразводна постапка, во повеќе наврати и во континуитет физички и психички ја малтретирал, постојано ја навредувал, ја тепал, ја понижувал и и нанесувал видливи повреди по целото тело. Овие настани сега починатата, но и очевидци и други сведоци ги пријавувале во надлежните институции. Ваквото сурово и нечовечно постапување од страна на пријавениот како нејзин сопруг се интензивирале во текот на 2025 и 2026 година, поради што сега починатата се нашла во безизлезна состојба и се одлучила на самоубиство, го зела во рацете детето и скокнала од балконот на шестиот кат од станот во кој што живееле, по што двете паднале на бетонската подлога пред зградата и починале на лице место“, велат од Обвинителството.Според прибраните докази, ваквото однесување се интензивирало во текот на 2025 и 2026 година, поради што Ивана Јовановска се нашла во безизлезна состојба и донела одлука да си го одземе животот. Таа ја земала во раце својата шестгодишна ќерка и скокнала од балконот на шестиот кат од станот во кој живееле, по што двете паднале на бетонската подлога пред зградата и починале на лице место.„На критичниот ден претходеле неколку настани, а осомничениот најпрво се заканувал и започнал да ја удира оштетената во близина на нејзиното работно место. Потоа, додека со автомобил управуван од трето лице се возеле кон Основниот кривичен суд Скопје, продолжил да и се заканува дека ќе ја убие со што предизвикал кај неа чувство на страв и несигурност. Во близина на судот физички ја нападнал и и нанел телесни повреди – хематоми по главата и телото. Откако од училиште ја зеле 6-годишната ќерка, сведокот ги однел до домот за оштетената да се спакува и да ја носи кај мајка и. Додека сведокот и осомничениот седеле пред зградата, оштетената се заклучила во станот со детето и од таму го извршила самоубиството“, велат од Обвинителството.Јавниот обвинител до судијата на претходна постапка доставил предлог за определување мерка притвор за осомничениот. Како причини се наведуваат опасност од бегство, можност за влијание врз сведоци и вештаци, како и ризик од повторување на кривично дело.Од обвинителството посочуваат дека продолжуваат со прибирање докази за овој, како што го оценија, комплексен случај.

Македонија | пред 2 седмици

Ќе се „чешлаат“ социјалните служби за случајот со Ивана и Катја: како постапиле по секое насилство од Стојанче?

Јавното обвинителство отвори предмет за да го испита постапувањето на Центарот за социјални работи во случајот со Ивана и малата Катја Јовановска, по наводите дека институциите не реагирале соодветно и покрај пријавите за семејно насилство.Од Обвинителството информираат дека предметот е оформен по допрен глас, врз основа на информациите објавени во медиумите за утврдени неправилности при извршен инспекциски надзор во Центарот за социјални работи.„Врз основа на информациите објавени во медиумите за констатирани неправилности при извршениот инспекциски надзор во Центарот за социјални работи, Јавното обвинителство на РСМ оформи предмет по допрен глас и го проследи на надлежно постапување на Основното јавно обвинителство Скопје, кое ќе преземе дејствија на проверки за да испита дали со овие неправилности се исполнети елементи на кривично дело кое се гони по службена должност“, соопштија од обвинителството.Според информациите на СП, Ивана и Катја биле нападнати во болница од Стојанче. Социјални работници излегле на терен, но случајот не добил епилог со кој би се спречило понатамошно насилство.Трагедијата предизвика силни реакции во јавноста, особено поради сомнежите дека институциите не реагирале навреме. Невладини организации повеќепати предупредуваа на пропусти во работата на социјалните служби во случаи на семејно насилство.При последниот инспекциски надзор од Министерството за труд и социјална политика биле утврдени неправилности во водењето на предметот за Ивана и Катја, кои го загубија животот по пад од балкон во скопската населба Карпош.

Македонија | пред 2 седмици

Продолжен краткотрајниот притвор за Стојанче Јовaновски по трагедијата во Карпош

Кривичниот суд го прифати предлогот на Основното јавно обвинителство Скопје и донесе одлука за продолжување на краткотрајниот притвор за осомничениот Стојанче Јовановски, насилниот сопруг на Ивана, во случајот поврзан со трагедијата во скопската населба Карпош, за уште 48 часа.Претходно обвинителството побара продолжување на мерката поради тековните истражни дејствија, меѓу кои се вештачење на три мобилни телефони и други предмети, како и обезбедување и анализа на видео-снимки од повеќе критични локации.Во рамки на постапката се прибира и целокупната документација за претходни поплаки и пријави за семејно насилство кои се однесуваат на осомничениот и на починатата жена.Трагедијата во Карпош, во која мајката Ивана и детето Катја го загубија животот по пад од балкон, предизвика силни реакции во јавноста и отвори прашања за постапувањето на институциите во случаите на семејно насилство.

Македонија | пред 2 седмици

Продолжен краткотрајниот притвор за Стојанче, осомничен за самоубиството на мајката и детето: се вештачат телефони и се анализираат снимки

Основното јавно обвинителство Скопје поднесе предлог за продолжување на мерката краткотраен притвор за уште 48 часа за осомничениот Стојанче Јовановски во случајот поврзан со трагедијата во скопската населба Карпош, каде мајката Ивана и детето Катја го загубија животот по пад од балкон.Од обвинителството информираат дека во тек е прибирање и анализа на повеќе докази. Се постапува по наредби за вештачење на три мобилни телефони и на други предмети, се обезбедуваат и анализираат видео-снимки од повеќе критични локации, како и целокупната документација за претходни поплаки и пријави за семејно насилство кои се однесуваат на осомничениот и на починатата жена.Според обвинителството, се преземаат и дополнителни истражни дејствија кои се од значење за утврдување на фактите и за докажување на кривичните дела чии елементи во моментот се испитуваат.

Македонија | пред 2 седмици

„Не можела поинаку! Институциите реагираат дури по трагедија“, вели психологот Ивановска

Психологот и гешталт психотерапевт м-р Тиана Ивановска, по трагедијата во која животот го загубија Ивана и нејзината ќерка Катја по пад од балкон, остро реагираше за, како што вели, системските пропусти во институциите кои треба да ги штитат жртвите на семејно насилство.Ивановска посочува дека две години работела како психолог во анонимен шелтер за жени жртви на семејно насилство и дека во тој период сведочела на, како што наведува, бројни случаи на „институционална глувост, некадарност и партиски вработувања“ во системот за социјална заштита.Според неа, постојат сериозни пропусти во начинот на кој институциите постапуваат со жртвите. Таа наведува пример кога жена жртва на насилство била транспортирана во анонимен шелтер со службено обележано возило на Центарот за социјална работа, што, според неа, ја довело во дополнителна опасност.Ивановска посочува и дека често се случува насилниците да продолжат со закани и притисоци, додека институциите бавно реагираат, а во некои случаи се завршува само со „консултативни разговори“ наместо со конкретни заштитни мерки.„Тоа што ние го гледаме однапред, вие го гледате отпосле, откако ќе се случи трагедија“, наведува таа, додавајќи дека жртвите често живеат под постојан страв и закани.Таа повика сите институционални пропусти во случајот детално да се испитаат и одговорните лица да бидат санкционирани.„Земете ги сите досиеја и проверете ги до последната точка. Сите пропусти да се најдат и да се казнат“, порача Ивановска.

Коментари | пред 2 седмици

Гарческа: ЛДП бара итно расчистување на случајот во Тафталиџе и електронска нараквица за следење на насилниците

Повторно, Либерално-демократската партија (ЛДП) алармира и искажува сериозна загриженост за институционалната неодговорност и непреземањето на мерки за превенција и спречување на фемицидот и семејното насилство.„Немаме повеќе време за префрлање одговорност, ниту за административни изговори. Секое непостапување има последици и секое доцнење може да значи живот. Последниoт случај со смртта на мајката и ќерката во Тафталиџе, како и сите претходни, ја потресоа јавноста. Уште колку жртви треба да изброиме за институциите да се одважат да постапуваат по пријава?“, прашува во својата изјава за медиумите Тамара Гарческа од ЛДП.Уште колку смртни случаи треба да се случат за пратениците во Собранието да сфатат дека предлог-законот на ЛДП за воведување електронска нараквица за следење на насилниците не е повеќе опција, туку е обврска?„Како држава која ја ратификувала Истанбулската конвенција, Македонија има јасна задача: превенција, заштита, санкција. Не само декларативно, туку и реално. Нулта толеранција значи нула оправдувања. Јавноста е гневна – и со право. Бараме темелна истрага. Бараме целосно расчистување. Бараме одговорност со име и со презиме. Животот на жените не е статистика. Безбедноста не е привилегија“, завршува Гарческа во својата изјава со прашањето уште колку жени треба да умрат за институциите конечно да се разбудат и да постапуваат?

Македонија | пред 2 седмици

Одреден дводневен притвор за сорпугот на Ивана која почина со ќерката по пад од балкон

Основно јавно обвинителство Скопје поднесе предлог до судијата на претходна постапка при Основен кривичен суд Скопје за определување мерка краткотраен притвор од 48 часа за Стојанче Јовановски, сопруг на Ивана, која заедно со својата ќерка Катја го загуби животот по пад од балкон во Тафталиџе.Од Обвинителството информираат дека против осомничениот постојат сомненија за сторени кривични дела – „Телесна повреда“ од член 130 став 2 во врска со став 1, „Загрозување на сигурноста“ од член 144 став 3 во врска со став 2 и став 1 и „Наведување на самоубиство и помагање во самоубиство“ од член 128 став 4 од Кривичниот законик.„Притворската мерка е неопходна со цел преземање на сите истражни дејствија за обезбедување докази во однос на сомненијата“, соопштија од Обвинителството, додавајќи дека по предлог на јавниот обвинител, судот ја определил мерката краткотраен притвор.Во овој период ќе се извршат вештачења, анализи на камери, известувања од претрес... сите дејствија кои беа наредени денеска. Потоа, зависно од резултатите, ќе се произнесе обвинител дали има потреба од продолжување на мерката.

Македонија | пред 2 седмици

Мајка која носи вака тешка одлука заедно со своето дете да замине во смрт е многу ретко, речиси непознато во криминолошката пракса, вели Туфегџиќ

Екссудијата и адвокат Владимир Туфегџиќ оцени дека трагедијата во која мајка и шестгодишно дете го загубија животот по пад од балкон претставува потврда за системските слабости во институциите.„Вчерашната трагедија е само потврда дека нашите институции немаат стандардни оперативни процедури за постапување не само во овој случај на семејно насилство. Во основа реално полицијата поради повеќе децениската партизација нема стручен кадар ниту стандарди на постапување. Само пред една година поради убиството на детето Вања, слушавме во судница исказ на обвинет кој потврди дека бил дел од организирана група која во седиштето на политичка партија направила план за киднапирање и ликвидација на луѓе, а за реализација на планот копале дупки на различни локации во државата за да ги закопаат жртвите. Денеска сме сведоци на случајно откриен сериски убиец и се откриваат неговите жртви. Моето прашање логично се наметнува и тогаш и денеска, што работат нашите безбедносни служби и дали до тој степен се девастирани и партизирани без соодветен професионален кадар“, напиша Туфегџиќ.Во осврт на конкретниот случај, Туфегџиќ посочува дека во криминологијата е познат феноменот на мајка што убива новороденче или го напушта, но дека одлука мајка заедно со своето шестгодишно дете да замине во смрт е исклучително ретка и речиси непозната во праксата.„Во криминологијата е познат феномен мајката да убие или остави на сред улица или на буниште штотуку родено бебе, но мајка која носи вака тешка одлука заедно со своето 6 годишно дете да замине во смрт е многу ретко, скоро непознато во криминолошката пракса. Јавниот обвинител има исклучително тешка задача во која ќе мора да го најде одговорот за клучниот мотив за ваквата одлука без притоа да носи избрзана одлука поради притисокот од јавноста“, додава тој.

Коментари | пред 2 седмици

(Видео) Поради семејно насилство, загрозување на сигурноста и наведување на самоубиство, сопругот на Ивана е во станица, вели Тошковски

Стојанче Јовановски, сопругот на Ивана, која заедно со својата ќерка Катја го загуби животот по пад од балкон во Тафталиџе, е задржан во полициска станица под сомнение дека сторил повеќе кривични дела.Министерот за внатрешни работи Панче Тошковски информира дека Јовановски се сомничи за кривичните дела „наведување на сторување на самоубиство“, „нанесување телесни повреди поврзани со семејно насилство“ и „загрозување на сигурноста“.Според изјавата на министерот, во тек е прибирање докази и документирање на сите околности поврзани со случајот. Надлежните институции спроведуваат истражни дејствија, по што ќе биде одлучено за понатамошната постапка.

Македонија | пред 2 седмици

Против Стојанче, сопругот на починатата Ивана, се воделе повеќе постапки во Обвинителството

Министерот за внатрешни работи Панче Тошковски информираше дека сопругот на трагично починатата Ивана имал десет кривични пријави во изминатите две години, а само неколку часа пред падот од балкон во Карпош, полицијата интервенирала по пријава за семејна расправија.Од Основното јавно обвинителство информираат дека против Стојанче се водела само една постапка во Обвинителството.Во Основното јавно обвинителство Скопје лицето не е пријавено за кривични дела на семејно насилство. Против него има активна постапка од 29.12.2025 година за кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик за пронајдени 19 грама марихуана и 7 грама амфетамин во багажникот на неговиот автомобил. По предлог на надлежниот обвинител, ценејќи ги сите околности во предметот, судија на претходна постапка му определил мерки на претпазливост кои се уште се на сила“, информираат од ОЈО.Во однос на постари постапки, се е процесуирано, поднесено е обвинение за насилство кон трето лице, заедно со други соучесници, како и обвинение за напад врз службено лице заедно со сега починатата, дополнуваат од ОЈО.

Македонија | пред 2 седмици

Вонреден инспекциски надзор во Центарот за социјални работи – Скопје по трагичниот настан

Во врска со трагичниот случај во кој мајка и дете го загубија својот живот, Министерството за социјална политика, демографија и млади изразува длабоко сочувство до семејството и блиските.„Постапувајќи согласно законските надлежности и принципот на должно внимание, Министерството веднаш изврши вонреден инспекциски надзор во Центарот за социјални работи – Скопје, со цел целосно и непристрасно утврдување на фактичката состојба и начинот на постапување на институцијата.Според првичните информации од инспекторите, починатата заедно со сопругот за прв пат се евидентирани во Центарот на 07.10.2025 година, по барање на Основниот граѓански суд за постапување по тужба за развод на брак.Во однос на пријавено насилство, допис од Министерството за внатрешни работи е примен и заведен во Центарот на 02.02.2026 година, а се однесува на настан од 19.12.2025 година, за сторен прекршок против јавниот ред и мир односно физички напад на сопругот врз сопругата.Министерството има јасен и недвосмислен став: секое евентуално пропуштање, ненавремено постапување или непочитување на законските обврски мора да биде целосно утврдено, а одговорност мора да има согласно закон.Заштитата на жртвите на насилство и превенцијата од семејно насилство се врвен приоритет и нема да дозволиме институционални слабости да останат неадресирани.Инспекцискиот надзор е во тек, а по неговото завршување Министерството транспарентно ќе ја информира јавноста за наодите и за понатамошните мерки. Министерството будно ќе го следи случајот и ќе преземе сè што е во негова надлежност за да се обезбеди целосна одговорност и зајакнување на системот на заштита“, велат од министерството.

Македонија | пред 2 седмици

Левица формира работна група за законски измени и инситуционална одговорност во случаите на семејно насилство

Трагичниот настан што ја потресе јавноста, во кој жена и малолетно девојче го загубија животот при пад од зграда, не смее да остане сведен на сензационализам или на уште една црна статистика. Овој случај е уште една болна потврда за системските пропусти во (не)постапувањето по случаи на семејно насилство, велат од Левица.Кога со години се пријавува насилство, кога постојат индикации за сериозни закани и ризик, а институциите не обезбедуваат ефективна заштита, тогаш станува збор за институционална одговорност и нефункционалност на системот што има задача да заштити животи, а не го сторил тоа.Левица бара итна и независна постапка внатрешна контрола во рамки на Министерство за внатрешни работи. Дополнително, потребна е детална анализа на постапувањето на центрите за социјална работа и на целокупната меѓуинституционална координација во случаи на семејно насилство. Јавноста има право на целосна транспарентност - кои пријави биле поднесени, какви мерки биле преземени и зошто тие не резултирале со заштита. Со име и презиме на службениците.Оваа трагедија ја разоткрива длабоката структурна слабост на системот за заштита од семејно насилство. Постојат сериозни недостатоци во проценката на ризик, во следењето на повторени пријави, во навременото изрекување заштитни мерки и во контролата на нивното спроведување. Кога институциите формално „водат предмет“, а суштински не обезбедуваат безбедност, тогаш тие ја изневеруваат својата основна функција.Во таа насока, Левица формира работна група која ќе ги разгледа сите аспекти на институционалното постапување во случаи на семејно насилство – од законската рамка, преку протоколите на МВР и социјалните служби, до праксата на нивна примена. Работната група ќе излезе со конкретни предлог-измени и мерки во најкус можен рок.Ова не е момент за политичко надмудрување, туку за институционална одговорност. Пропустите мора да бидат именувани и санкционирани. Системските слабости мора да бидат коригирани со конкретни и применливи решенија. Ниту еден живот не смее да биде изгубен поради административна незаинтересираност и институционална негрижа.Дополнително, жалиме што теснопартиските калкулации на ДПМНЕ имаа предност пред суштинската заштита на жртвите. Предлог-измената со која се предвидуваше гонење на насилник по службена должност, наместо исклучиво по пријава на жртвата, беше поднесена од Левица и не доби поддршка единствено затоа што доаѓаше од опозицијата. Истата мерка, повеќе од една година подоцна, беше прифатена кога беше предложена од нивна страна. Тоа одложување не е политички детаљ, туку прашање на последици. Доколку измената беше усвоена тогаш, институциите ќе имаа обврска да постапуваат и без формална пријава од жртвата, а граѓаните што алармирале (соседи, роднини, сведоци) немаше да бидат враќани од полициска станица со образложение дека „нема пријава“. Во такви околности, постоеше реална можност насилникот да биде процесиран и изолиран навреме. Кога законските решенија се блокираат од суета, цената ја плаќаат најранливите.Системот мора да функционира кога граѓаните бараат заштита - не по трагедијата, туку пред таа да се случи“, велат од Левица.

Македонија | пред 2 седмици

(Видео) МВР има снимка каде сопругот ја удира жената истиот ден кога таа загина по падот од балконот, вели Тошковски

Министерот за внатрешни работи Панче Тошковски изјави дека во случајот со трагедијата во Карпош, каде жена и дете беа пронајдени мртви по пад од балкон, ќе се утврдуваат сите околности поврзани со претходните пријави за семејно насилство, вклучително и дали изјавите на жртвата биле дадени под притисок.„МВР има видео запис каде се гледа како сторителот, сопругот, ја удира жртвата. Тоа се случило истиот ден“, вели Тошковски.Тошковски посочи дека според службените белешки, на денот на настанот жената потпишала изјава со која се откажува од пријавата, наведувајќи дека немало физички контакт, туку недоразбирање со сопругот и дека не бара понатамошна полициска постапка. Таа, според документот, навела дека не сака настанот да се третира како семејно насилство и дека брачните односи ќе ги решава по мирен пат и преку развод.Министерот нагласи дека МВР ќе треба да утврди дали изјавата била дадена доброволно или под евентуална присила, дали осомничениот бил присутен, како и дали постоело влијание или притисок.„Факт е дека најголем број од предметите се затвораат затоа што жртвата се повлекува“, изјави Тошковски, додавајќи дека таквата пракса не треба да продолжи. Тој повика не само жртвите, туку и сите граѓани – членови на семејство, соседи и сведоци – да пријавуваат насилство, а институциите да обезбедат целосно процесуирање на случаите.Министерот истакна дека новите законски овластувања ѝ даваат на полицијата пошироки можности за постапување по службена должност, особено кога се констатираат видливи телесни повреди. Во такви случаи, жртвата нема да може да го повлече предметот, а Министерството ќе мора да продолжи со постапката.Сепак, Тошковски предупреди дека доколку жртвата повторно се повлече, институциите се соочуваат со сериозни предизвици во фазата на докажување на кривичното дело. Затоа, според него, неопходна е координирана ангажираност на центрите за социјална работа и на сите институционални чинители, како и поголема јавна свест и охрабрување на граѓаните да зборуваат отворено за насилството.Тој нагласи дека Министерството ќе го зголеми фокусот на ваквите кривично-правни настани, со цел да се спречат трагични исходи во иднина.

Настани | пред 2 седмици

(Видео) Десет пријави има против сопругот на Ивана, а пред падот од балкон интервенирала полиција но таа негирала дека била тепана, вели Тошковски

Министерот за внатрешни работи Панче Тошковски информираше дека пријавата за трагедијата во Карпош, каде жена и малолетно дете го загубија животот по пад од балкон, била примена од случаен минувач. Според него, на улицата „Теодосиј Гологанов“ веднаш излегле полициски службеници од Полициската станица Карпош и екипа на Итната медицинска помош, при што била констатирана смрт.Извршен бил увид од страна на СВР Скопје, а телата се предадени на обдукција. Од местото на настанот биле подигнати материјални траги и мобилен телефон.Министерот посочи дека настанот имал претходница истиот ден. На 2 март во 12:05 часот била примена пријава за расправија меѓу сопружниците, а полициски службеници пристигнале на адресата во 12:19 часот. Бил извршен разговор со сопругата, која изјавила дека немало физички контакт со сопругот, дека станувало збор за недоразбирање и дека не бара поведување постапка ниту интервенција. Таа навела дека брачните односи ги решава преку бракоразводна постапка и потпишала службена белешка.По оваа интервенција, жената се упатила кон станот на улицата „Теодосиј Гологанов“, каде подоцна се случил трагичниот исход. Тошковски нагласи дека сите околности се детално документираат.По усна наредба, уапсен е сопругот, Стојанче Јовановски, поради сомневање за сторено кривично дело. Според податоците што ги изнесе министерот, во изминатите две години против него имало десет кривични пријави поврзани со имотни деликти, насилен криминал и недозволена трговија со дрога. Кај него, тогаш биле пронајдени 20 паковки наркотична супстанција, по што бил уапсен и против него била поднесена кривична пријава. По барање на јавен обвинител му биле изречени мерки на претпазливост, односно обврска за јавување во суд.Во 2025 и 2026 година биле евидентирани повеќе пријави за нарушени односи меѓу сопружниците. Полицијата постапувала и преземала мерки, но, како што посочи Тошковски, во сите наврати оштетената се повлекувала од поднесените пријави.

Настани | пред 2 седмици

🔴 ВО ЖИВО: Прес на министерот Тошковски за трагедијата во Карпош

Следете ја во живо прес-конференцијата на министерот за внатрешни работи Панче Тошковски во врска со трагедијата во скопската населба Карпош.Станува збор за настан каде мајка и дете го загубија животот по пад од шести кат. Тошковски се очекува да сподели детали за случајот, како и тоа дали жената претходно имала пријави за семејно насилство, што се шпекулира во јавноста.

Македонија | пред 2 седмици

Полицијата трага по снимки во Тафталиџе, сведочи Ванковска која напиша дека е во шок: Во што се претворивме?

Професорката Билјана Ванковска се огласи на социјалните мрежи по трагичниот настан во скопската населба Тафталиџе, споделувајќи го својот шок и загриженост. Таа откри дека утрово кај неа дошле тројца претставници на МВР за да собираат информации и евентуални снимки од видео надзор, поврзани со вчерашниот инцидент.Утрово на врата ми се појавија тројца претставници на МВР: прашуваа за евентуални снимки од видео надзор врз улицата, како што рекоа „заради вчерашниот настан“. Искрено, се стаписав: знаев на кој настан мислат, но не знаев дека бил толку блиску во моето соседство.Работат на случајот, се обидуваат да најдат докази за оној што натера во смрт две невини души. А јас сум уште во благ шок од помислата дека се разминуваш на улица, можеби поздравуваш, одиш во иста продавница, а не знаеш што монструми (и жртви) среќаваш секојдневно.Некако, секогаш мислиме, тоа на другите им се случува, подалеку од нас, но не е така... И за жал, ваквите случаи стануваат се' пожасни и почести.Лесно е да кажеш, нека почиваат во мир. Но немирот не' јаде однатре. Во што се претворивме? Како некој што се бави со општествени науки, јас не верувам дека е проблемот во пореметени и насилни личности, туку во општество кое создава насилници и жртви. Тоа е тоа структурално насилство, напиша Ванковска.

Коментари | пред 2 седмици

Лесно е од позади тастатура да кажеш што можела да направи, ама ти од друга позиција збориш - ова насилство по овие закони не се спречува, напиша Ина

По трагедијата во скопската населба Карпош, во која мајка и дете ги загубија животите по пад од тераса, социјалните мрежи се преплавени со коментари, осуди и прашања. Меѓу реакциите се издвојува и ставот на критичарката која пишува под псевдонимот Ина Многуфина, која апелира да не се носат лесни заклучоци од „безбедноста на тастатурата“.Лесно е од позади тастатура да кажеш што можела да направи ама ти од друга позиција збориш.Зошто не го оставила? Може немала каде да оди. Ти текнува дека немаат сите семејство или пријател ко тебе да и рече дојди кај мене, јас ќе ти помогнам?Зошто се омажила со него? Зар мислиш ќе се омажела ако знаела дека е мрднат, а и ако е нетокму тоа прогресирало низ годините посебно ако се зависности во прашање?Зошто не го решила? Не може секој да се одбрани на таков начин. Лесно е да се збори сега ама не е така ко шо мислиме ние од дома.Барала помош, каде е закочен случајот? МВР, ЈО, ЦСР? Да видиме.Танкица пријави, не го препознаа ризикот кај неа, не превземаа ништо. Го викнаа на разговор го пуштија, толку беше. Росица пријави кршење мерки, дремеа неколку месеци не вадеа камери, не процесираа, толку беше. Марија, една од неколкуте жени од Кумановско, пријавила, дошле го побарале, не бил дома, толку беше.Нас ни требаат нови закони. Не е доволно по службена должност да се гони. Нас ни треба нов закон за социјални работи, нов закон за заштита од семејно насилство, нас ни треба се ново. Да влезат пратениците да почнат да работат на тоа. Ова насилство по овие закони очигледно не се спречува. Таму каде што кочат случаите и по овој закон треба службениците со лисици да се вадат. Ние имаме многу жртви. Не е решение оди ти него истепај го нема да му текне. Нема да му текне за тој што го истепал, за жена му ќе му текне. Види хроника, секој ден имаме по нешто. Не чини закон, не чини спроведување, се е тоа споро. Или ќе се превземе нешто или ќе гледаме вакви последици”, стои во објавата.

Коментари | пред 3 седмици

„Едно лице задржано во станица, мајката и детето биле заклучени сами во станот“, први информации од Обвинителството за трагедијата во Карпош

Основното јавно обвинителство Скопје соопшти дека ги издава сите потребни наредби и насоки за целосно расчистување на случајот во Карпош, кога при пад од висококатница животот го загубија мајка и малолетно дете.Од Обвинителството информираат дека едно лице е задржано во полициска станица и дека по наредба на јавен обвинител се преземаат дејствија за испитување на евентуална кривична одговорност.Обезбедена е наредба од судија на претходна постапка, а во текот на денот ќе се врши детален претрес на станот, кој веднаш по извршениот увид бил запечатен и обезбеден. Според првичните сознанија, во моментот на настанот починатата и малолетното девојче биле сами во станот, кој бил заклучен од внатрешната страна.По наредба на јавниот обвинител денеска се вршат распити на повеќе лица кои имаат определени сознанија, се спроведува екстракција на податоци од мобилни телефони и се обезбедуваат снимки од видео надзор и други записи од неколку локации.Во текот на вчерашниот ден била наредена и обдукција на телата на починатите.Во однос на евентуалното претходно постапување, јавниот обвинител побарал детално известување од Министерството за внатрешни работи и од Центарот за социјална работа за сите можни претходни пријави и поплаки од оштетената, а ќе биде наложена и внатрешна контрола во МВР за да се испита постапувањето по тие пријави.

Скопје | пред 3 седмици

Сосетка со тешки обвинувања по трагедијата во Карпош: 150 стана не успеавме да те сочуваме од монструмот кој секојдневно те малтретираше и тепаше

По трагедијата во Карпош, каде што по пад од зграда животот го загубија мајка и малолетно девојче, на социјалните мрежи се огласи Тања Спировска, која се претставува како нивна сосетка, изнесувајќи сериозни обвинувања за долготрајно семејно насилство и институционален пропуст.„Почивајте во мир, Ивана и Кате. 150 стана не успеавме да те сочуваме од монструмот кој секојдневно те малтретираше и тепаше. Сите сме виновни во оваа приказна и ние и сите институции исто така“, напиша таа.Во објавата таа посочува конкретно лице како причина за трагедијата, повикувајќи јавноста да не ја обвинува мајката и наведувајќи дека, според нејзиното мислење, тоа бил „последниот излез од мракот во кој што била“.Објавата содржи и тешки навреди и повици на насилство кон лицето што го споменува, што дополнително ја разгоре јавната дебата на социјалните мрежи.Надлежните институции засега водат истрага за околностите под кои се случил настанот. Од Обвинителството претходно соопштија дека се преземаат мерки за утврдување на причините, како и разговори со лица што би можеле да имаат сознанија за случајот.Јавноста повикува на целосно расветлување на настанот и утврдување на евентуална одговорност, доколку се потврдат наводите за претходно пријавувано насилство.МВР и Обвинителството до овој момент немаат доставено податоци за тоа дали и колку пријави имало од страна на сега починатата девојка.

Коментари | пред 3 седмици

Семејно насилство треба да се казнува повеќе од обичното насилство, под итно реформа на Центрите за социјална работа, вели Апасиев

По трагедијата во скопската населба Карпош, каде што животот го загубија мајка и малолетно дете, пратеникот и лидер на Левица, Димитар Апасиев, побара построги казни за семејното насилство и радикална реформа на центрите за социјална работа.„Како што дрска кражба се казнува повеќе, а не помалку од обична; како што убиство со умисла се казнува повеќе, а не помалку од убиство на миг; така и СЕМЕЈНО НАСИЛСТВО треба да се казнува повеќе, а не помалку од обично насилство – оти една од основните функции на семејството е заштитната! А каква ‘заштита’ имаш ако дома маж ти те тепа секој ден?“, напиша Апасиев.Тој во објавата дополнително посочи дека, според него, е неопходна „под итно радикална реформа на заостанатите центри за социјална работа“, оценувајќи дека тие се исполнети со „неспособни и нестручни партиски кадри“.Трагедијата предизвика силни реакции во јавноста, а случајот е предмет на истрага од надлежните институции.

Коментари | пред 3 седмици

Се прибираат докази и се сослушуваат сведоци по трагедијата во Карпош каде мајка и дете беа најдени мртви по пад од зграда

Дежурен јавен обвинител од Основно јавно обвинителство Скопје изврши увид на лице место во скопската населба Карпош, каде по пад од висококатница починаа жена и малолетно дете.Од Обвинителството информираат дека јавниот обвинител наредил обдукција на телата на починатите, како и прибирање траги и други материјални докази со цел целосно расветлување на настанот.Во тек се разговори со повеќе лица кои би можеле да имаат сознанија за причините и околностите под кои се случил трагичниот настан.Од надлежното обвинителство засега не соопштуваат дополнителни детали, а истрагата продолжува.

Македонија | пред 3 седмици