(Видео) Трамвај излета од шините во центарот на Сараево: Едно лице загина, малолетничка остана без нога

Едно лице го загуби животот, а четири лица се повредени во тешка сообраќајна несреќа што се случи во Сараево, кога градски трамвај излета од шините на една од централните раскрсници во градот. Информацијата во попладневните часови ја потврдија болнички извори.Според досегашните податоци, трамвајот излегол од колосекот, ја пробил заштитната ограда и завршил надвор од трасата. При несреќата бил притиснат пешак кој починал на местото на настанот. По првичните спротивставени информации во јавноста, порталот „Кликс“ објави дека жртвата е 23-годишно момче.Екипите на Итната медицинска помош на местото затекнале уште четири повредени лица. Лекарка од Сараево изјави дека една девојка била во особено тешка состојба и веднаш била транспортирана во болница.Подоцна беше соопштено дека станува збор за 17-годишна девојка на која поради сериозните повреди ѝ била извршена ампутација на ногата. Таа се наоѓа во критична состојба и е животно загрозена.Несреќата се случила на раскрсница каде минатата година била спроведена реконструкција на пругата и свртницата во рамки на поширок проект за обнова на трамвајската инфраструктура. Засега се разгледуваат повеќе можни причини за излетувањето, меѓу кои се споменуваат неприлагодена брзина и староста на трамвајот од чешко производство, набавен во времето на поранешна Југославија.И покрај тоа што во тек е процес на модернизација и во сообраќај се вклучени нови трамваи, на сараевските шини и понатаму сообраќаат возила стари неколку децении, што повторно ја отвори дебатата за нивната техничка исправност и безбедноста во јавниот превоз.

Свет | пред 1 месец

(Видео) Давидовиќ: Вината за процесот за Пулс е кај екс обвинителот Коцевски кој грчевито се бореше да ја задржи фотелјата

Адвокатот Звонко Давидовиќ, бранител на обвинетиот Аднан Џаферовски, поранешен директор на Дирекцијата за заштита и спасување и на еден од обезбедувачите кој бил без лиценца и стоел пред дискотеката Пулс, каде загинаа 63 лица и има повеќе од 200 повредени е гостин во ,,Претрес со Ландов”.„Случајот е тежок товар за судијката, но добро го менаџира. Сепак со прифаќање на обвинението, судот го амнестираше обвинителството”, вели Давидовиќ.Од 34 обвинети очекува голем дел да има ослободителни пресуди, а одговорноста да биде кај оние дозволиле запаливи средства во дискотеката и газдата на Пулс. За голем дел од обвинетите, делото ќе биде застарено.„Обвиненијата требаше да се разделат. Поранешниот државен обвинител ги хушкаше родителите и немаше доблест да им каже дека судењето ќе биде долго, а нас не обвинуваше. Чесно беше со 34 обвинети, 12 обвинители, да им каже на родителите на загинатите деца дека предметот со толку обвинети и докази ќе трае. Дури ни Нирнбершкиот процес немаше толку обвинители. Таму имаше двајца или тројца обвинети.Вината е кај Коцевски, но тој грчевито се бореше да ја задржи фотелјата”, вели адвокатот Давидовиќ.

Скопје | пред 1 месец

(Видео) Во Врање приведено лицето кое прегази и усмрти жена во Капиштец

Приведено е лицето кое ја прегази и ја усмрти 75 годишната жена Љ.Ј. на улицата Народен фронт во скопски Центар. Лицето е приведено во Врање, Србија, ексклузивно во „Претрес со Ландов”, откри адвокатот Звонко Давидовиќ.Осумнаесет годишното лице, кое со возило тешко ја повредил жената, избегал од местото на несреќата, оставајќи ја беспомошна на коловозот, заедно со неговиот татко било пренесено преку граница од роднини.„Лицето ќе биде екстрадирано од Србија во Македонија.Најверојатно е приведен и неговиот татко”, вели Давидовиќ кој е бранител на роднините кои ги пренеле таткото и синот преку граница.„Им верувам на моите клиенти дека не знаеле дека превезуваат сторител на такво тешко кривично дело. Мажот работи во Дирекција за заштита и спасување и е родител на дете со посебни потреби и за набавка на суплементи често патувал во Србија”, рече во Претрес, адвокатот Давидовиќ.

Скопје | пред 1 месец

(Видео) Ексклузивно во Претрес, Давидовиќ покажа договор за пренос на пари на мајката на судијата Ристов

Ние не сме должни ништо да докажуваме, познавајќи го народот не може да ја докажеме чесноста на судијата Ѓоко Ристов, но кога ќе заврши процесот, тоа ќе биде докажано, тврди адвокатот Звонко Давидовиќ.Ексклузивно, во „Претрес со Ландов”, покажа документ со договор за пренос на пари врз мајката на апелацискиот судија Ѓоко Ристов за удел во фирма која има имот. Не продавала нива за фотоволтаиците, туку удел во фирма. Не кажа дали парите се сменети во менувачница.„Ова е доказ, јас излегов со доказ. Дали обвинителството може да докаже дека парите се на судијата Ристов. Парите се подигнати, но тоа вештакот ќе го докаже”, рече Давидовиќ.

Скопје | пред 1 месец

(Видео) Адвокатот на судијата Ристов: Немам толку пари за да ги чувам во ѕид

Звонко Давидовиќ, адвокат на апелацискиот судија Ѓоко Ристов кај чии родители беа пронајдени заѕидани 350.000 евра, во „Претрес со Ландов” рече дека нема доказ дека парите се на Ристов.„Во туѓ ѕид има туѓи пари”, вели Давидовиќ, според кого е несериозно да се излезе на прес конференција а без ниту еден доказ.„Држите прес без докази тоа се случи и со Кочани .Обвинителката не достави докази за тоа што го тврди. Тоа е како kindergarten ( детска градинка). Заспаниот министер за правда наеднаш излезе и коментираше полициски акции и постапки, исто и премиерот”, вели Давидовиќ кој дека посочи дека нема толку пари за да ги чува во ѕид.

Македонија | пред 1 месец

Деветмина убиени во пукање во училиште во Канада, најмалку 25 ранети

Девет лица се убиени, а најмалку 25 се ранети во вооружен напад што се случил во средно училиште и во еден дом во малиот канадски град Тамблер Риџ, соопштија локалните власти. Градот со околу 2.500 жители, сместен 667 километри североисточно од Ванкувер, со часови бил под полициска блокада додека траела интервенцијата.Градоначалникот Дарил Краковка изјави дека заедницата е скршена од трагедијата и дека речиси сите жртви ги познавал лично. „Овде не сме само жители, туку семејство“, рече тој, нагласувајќи дека станува збор за мала и тесно поврзана средина во која вакво нешто никогаш претходно не се случило.Советникот Крис Норбери, чија сопруга предава во училиштето, а ќерка му посетува основно училиште во близина, опиша часови страв и неизвесност додека чекал информации. Откако бил прогласен аларм за блокада, учениците и наставниците останале затворени во училниците, додека полицијата ја обезбедувала зградата. „Тешко е да се опише чувството кога знаете дека вашата најблиска личност е во опасност“, изјави тој.Родители сведочат дека дел од учениците биле барикадирани два до три часа, збиени во аглите на училниците. Некои паничеле и плачеле, додека други се обидувале да ги смират своите соученици. Матурентот Даријан Квист рече дека во еден момент станало јасно дека станува збор за сериозен инцидент, а излегувањето од училиштето по повеќечасовната блокада го опиша како „организиран хаос“, при што професионалноста на службите била клучна.Дури по неколку часа биле објавени првичните информации за бројот на жртвите, што дополнително ја потресло заедницата. Имињата на загинатите сѐ уште не се соопштени, но локалните власти најавија психолошка поддршка за учениците, наставниците и семејствата. „Ќе мора да се собереме како заедница и да си помогнеме еден на друг“, порача Норбери, предупредувајќи дека последиците од трагедијата ќе се чувствуваат долго време.

Свет | пред 1 месец

Зеленски: Војната мора да запре за да има избори

Украинскиот претседател Володимир Зеленски изјави дека избори во Украина ќе се одржат дури по воспоставување безбедносни гаранции и прекин на огнот со Русија, отфрлајќи ги наводите дека под притисок на Соединетите Американски Држави планира брзо организирање ново гласање, јавува „Франс 24“.Изборниот процес во земјата е практично ставен во мирување од почетокот на руската инвазија во 2022 година, поради прогласената воена состојба. „На избори ќе одиме кога ќе бидат воспоставени сите потребни безбедносни гаранции. Многу е едноставно – воспоставете прекин на огнот и ќе има избори“, порача Зеленски во аудио-обраќање до новинарите.Тој додаде дека, доколку и Москва се согласи, можно е непријателствата да завршат до летото.Изјавата следува откако „Фајненшл тајмс“ објави дека Киев, соочен со притисок од Вашингтон, ја разгледува можноста за одржување претседателски избори во наредните три месеци. Зеленски и претходно истакнуваше дека избори се можни само по потпишување мировен договор со Русија, но неодамна сигнализираше подготвеност и за побрзо гласање во рамки на американски план за завршување на војната. Тој нагласи и дека евентуален договор што би вклучувал територијални отстапки кон Москва би морал да биде ставен на референдум.Русија повеќепати го оспорува неговиот легитимитет по 2024 година, кога во мирнодопски услови би му истекол мандатот. Зеленски беше избран за претседател во 2019 година со петгодишен мандат.Покрај политичките дилеми, постојат и сериозни практични пречки за одржување избори – гарантирање безбедност за време на кампањата и на денот на гласањето, како и организирање гласање за милионите украински бегалци во странство. Дополнително, милиони граѓани се внатрешно раселени, стотици илјади живеат под руска окупација или се наоѓаат на фронтот.Анкетите покажуваат дека меѓу украинската јавност засега постои слаб интерес за одржување избори во услови на војна.

Свет | пред 1 месец

Норвешкиот генерал: Не сум го видел Трамп во Авганистан, нема поим за што зборува

Норвешка не може да ја исклучи можноста за руска инвазија на нејзиниот север, со цел заштита на нуклеарниот арсенал сместен на полуостровот Кола, предупреди началникот на норвешкиот одбранбен штаб, генерал Еирик Кристоферсен. Во интервју за британскиот „The Guardian“ тој истакна дека Русија нема освојувачки цели во Норвешка како во Украина, но дека дел од нејзините нуклеарни капацитети – подморници, копнени ракети и авиони – се во близина на норвешката граница. „Не ја исклучуваме можноста Русија да се обиде да заземе дел од нашата територија за да го заштити својот нуклеарен арсенал“, рече Кристоферсен.Генералот, кој има искуство од мисиите на НАТО во Авганистан, остро ги критикуваше изјавите на Доналд Трамп дека сојузниците не биле на првите линии на бојното поле. „Тоа нема смисла. Бевме на првите линии, губевме пријатели и извршувавме различни мисии“, подвлече Кристоферсен, додавајќи дека ваквите изјави ги загрижиле норвешките ветерани и семејствата на загинатите.И покрај заканата од традиционална инвазија, Кристоферсен истакна дека современите руски тактики се повеќе насочени кон саботажи и хибридни закани. Норвешка и Русија, сепак, одржуваат директен контакт за мисии за пребарување и спасување и редовно се среќаваат на границата. Тој предложи и воспоставување директна воена телефонска линија меѓу главните градови за избегнување на несогласувања.За арктичкиот регион, Кристоферсен рече дека Русија ги почитува договорите за демилитаризација на архипелагот Шпицберген, а тврдењата за скриена милитаризација ги оцени како пропаганда. Коментирајќи ги тврдењата на Трамп за можни воени намери кон Гренланд, тој ги нарече „чудни“, истакнувајќи дека норвешките разузнавачки служби не забележуваат такви активности.На крајот, Кристоферсен предупреди дека окупирањето на земја е лесно на почетокот, но многу тешко за одржување и дека секоја експанзионистичка сила тоа го има искусено, давајќи јасна порака кон САД и Трамп.

Свет | пред 1 месец

Трамп: Имаме голема флота кај Иран, размислувам да испратам уште една

Американскиот претседател Доналд Трамп изјави дека ја разгледува можноста за испраќање втора ударна група носачи на авиони на Блискиот Исток, како подготовка за можна воена акција доколку пропаднат преговорите со Иран. Изјавата ја даде во интервју за порталот „Аксиос“, во период кога САД и Иран ги обновија преговорите во Оман, првпат по 12-дневниот конфликт во јуни.Трамп порача дека изборот е јасен – или ќе се постигне договор, или ќе следува многу остра акција. Тој додаде дека веќе има значително американско воено присуство во регионот и дека е можна дополнителна ескалација. Американски функционер потврди дека се воделе разговори за испраќање уште една носачка група, покрај онаа предводена од носачот „Абрахам Линколн“.И покрај воениот притисок, Трамп изрази оптимизам дека е можен договор, оценувајќи дека Иран сега пристапува посериозно кон преговорите. Клучна точка на несогласување останува иранскиот став да се преговара исклучиво за нуклеарната програма, без откажување од збогатувањето ураниум.Во ваков контекст, во Вашингтон пристигнува израелскиот премиер Бенјамин Нетанјаху, кој најави дека ќе ги претстави ставовите на Израел за преговорите со Иран, додека во исто време Иран ја засилува дипломатската активност преку контакти со Оман и Катар, клучни посредници меѓу Техеран и Вашингтон.

Свет | пред 1 месец

Американскиот амбасадор во НАТО: Мирот во Украина е поблиску од кога било

Американскиот амбасадор Метју Витакер оцени дека Украина е поблиску до мир од кога било досега, иако сè уште не е познато кога ќе биде потпишан мировниот договор за запирање на руската агресија.Тој нагласи дека договорот ќе биде финализиран „кога за тоа ќе дојде вистинското време“, изразувајќи уверување дека завојуваните страни се наоѓаат на чекор до постигнување мир.Витакер посочи дека внимателно ги следи преговорите и дека неговиот оптимизам се темели на конкретни случувања на теренот и на дипломатско ниво. Според него, документите за мировниот договор ќе ги потпишат американскиот претседател Доналд Трамп и украинскиот претседател Володимир Зеленски тогаш кога условите ќе бидат соодветни.Тој истакна дека, покрај надежта за мир, неопходно е да се обезбеди континуирана поддршка за Украина, со цел таа да може да се брани. Во тој контекст, Витакер ја нагласи важноста на програмата ПУРЛ, преку која европските членки на НАТО купуваат американско оружје за украинските вооружени сили, како и на другите иницијативи за воена помош.САД очекуваат дека земјите членки на НАТО во наредните денови ќе објават нови обврски за набавка на американско вооружување за Украина. Според Витакер, најголеми купувачи во рамки на програмата ПУРЛ досега биле Германија, Холандија и Норвешка.Во меѓувреме, генералниот секретар на НАТО, Марк Руте, за време на посетата на Украина вети дека Алијансата ќе обезбеди повеќе од 15 милијарди американски долари за набавка на оружје за украинските сили, како дел од истата програма.

Свет | пред 1 месец

(Видео) Јута Лердам со олимписки рекорд до злато: Штипнете ме – ова е сон

Јута Лердам, која многумина ја сметаат за најубавата спортистка на планетата, испиша историја во дисциплината 1.000 метри брзо лизгање, освојувајќи златен олимписки медал со нов олимписки рекорд.. Само десет минути претходно, нејзината сонародничка Фемке Кок го собори рекордот, но Лердам веднаш го подобри и ја потврди апсолутната доминација на Холандија.По среброто во Пекинг, ова злато беше круна на кариерата за Лердам, која не ги сокри солзите на мразот. Емоциите кулминираа и во тунелот, каде сцената со нејзиниот партнер Џејк Пол стана вирална и собра над 300.000 лајкови.„Штипнете ме“, напиша Лердам на социјалните мрежи, порака што совршено го опиша моментот кога сонот стана реалност.

Свет | пред 1 месец

(Видео) Симпатизер на СНС нападнал средношколци по протест пред Уставниот суд во Белград

На социјалните мрежи се појави видео-снимка на која се гледа младо лице, за кое сведоци тврдат дека е симпатизер на владеачката Српската напредна странка (СНС), како агресивно се однесува кон средношколци и студент од Машинскиот факултет, по завршување на протестот пред Уставниот суд во Белград.Според сведочењата, младиот човек се обидел да му го извади мобилниот телефон од рацете на еден студент кој го снимал настанот, а во друг момент успеал да и го избие телефонот од рацете на инспекторка која исто така документирала со камера.„Ќаци насрна врз средношколци, а потоа и врз мене и моите колеги. Се обиде да ми го избие телефонот од рака, а друг ќаци успеа да и го избие телефонот на инспекторката која снимаше“, напиша студентот кој ја објави снимката на Инстаграм.Инцидентот се случил по протестот, а видеото предизвика бројни реакции и осуди на социјалните мрежи, со барања надлежните институции да реагираат и да утврдат одговорност за насилното однесување.Засега нема официјална реакција од полицијата или од Српската напредна странка.

Свет | пред 1 месец

Кралот Чарлс првпат реагира за случајот Епстин

Кралот Чарлс првпат јавно реагираше на скандалот поврзан со Џефри Епстин, порачувајќи дека Бакингемската палата е подготвена да ѝ пружи целосна поддршка на полицијата која ги разгледува наводите против неговиот брат, поранешниот принц Ендрју Маунтбатен-Виндзор, објави Би-би-си.„Кралот, и со зборови и со дела, јасно ја изрази својата длабока загриженост поради постојаните обвинувања поврзани со однесувањето на господинот Маунтбатен-Виндзор“, соопшти портпарол на Бакингемската палата, додавајќи дека доколку полицијата се обрати, палатата ќе соработува целосно.Реакцијата следува откако британската полиција потврди дека врши проценка на пријава поднесена од антимонархистичката група „Република“, која го пријави Ендрју за сомнеж за злоупотреба на службена положба и можно кршење на Законот за службени тајни.Случајот повторно ја отвори темата за врските меѓу Ендрју и осудениот сексуален престапник Џефри Епстин. Полицијата наведува дека ги разгледува наводите според кои Ендрју во 2010 година наводно споделувал доверливи информации со мрежата на Епстин, додека ја извршувал функцијата британски трговски пратеник. Овие сомнежи се засилени по објавата на електронска кореспонденција во американски судски документи.Дополнително внимание привлече и контроверзната фотографија на Ендрју со Вирџинија Џуфре од Лондон во 2001 година, која таа ја користеше како доказ во своите обвинувања за сексуално злоставување. Според документи објавени од американското Министерство за правда, електронска порака од 2015 година сугерира дека фотографијата е автентична, што е спротивно на претходните тврдења на Ендрју.Притисокот околу случајот со Епстин веќе имаше сериозни последици за британското кралско семејство. Ендрју ги загуби сите титули и привилегии, вклучително и титулата принц. Тој ги отфрла сите обвинувања и не признава вина.

Свет | пред 1 месец

(Видео) Украински борбен авион собори руски дрон

Украинското воено воздухопловство објави драматична видеоснимка на која се гледа како ловечки авион Ф-16 соборува руски дрон „Шахед-136“, нудејќи редок и јасен увид во воздушните борби што станаа секојдневие над Украина. Објавата доаѓа во ист ден кога, во друг руски напад со дрон, животот го загубиле мајка и мало дете, што дополнително ја нагласува суровата реалност на конфликтот.Снимката, направена од земја, прикажува како дронот „Шахед“ лета со препознатливо гласно зуење од пропелерот, предизвикувајќи паника кај присутните. Само неколку секунди подоцна леталото експлодира откако е успешно пресретнато од украинскиот Ф-16. Јасно се слуша и огнот од авионскиот топ М61А1 „Вулкан“, како и татнежот на моторот додека ловецот се оддалечува. „Браво!“, се слуша глас на украински јазик додека остатоците од дронот паѓаат на земјата. Иако ова не е прв случај на соборување „Шахед“ со Ф-16, станува збор за една од најјасно документираните акции од овој вид.Дроновите од иранско производство, познати и под ознаката „Геран-2“, претставуваат едно од клучните средства на Русија во исцрпувачката војна. Со проценета цена на производство од околу 35.000 долари по парче, овие еднократни јуришни летала ѝ овозможуваат на Москва да изведува масовни напади длабоко на украинска територија без директно изложување на сопствени војници. Веќе повеќе од три години тие предизвикуваат страв и штети меѓу цивилното население.За Украина, пресретнувањето на ваквите дронови со скапи ракети претставува сериозен финансиски товар, додека обидите за соборување од блиска дистанца носат висок ризик за пилотите. Според специјализираното списание „Ер енд Спејс Форсес“, украинските Ф-16 во моментов извршуваат околу 80 отсто од борбените летови против руските сили. Досега се изгубени четири вакви авиони, а ќе биде потребно време пред сите околу 80 ловци, донирани од западните сојузници, да станат целосно оперативни.Поради високите трошоци за одбрана од секојдневните напади со „Шахед“, Украина е принудена на креативни решенија. Дроновите се соборуваат со автоматско оружје, ракети испукани од рамо, хеликоптери, па дури и со други беспилотни летала, во обид да се зачува скапата противвоздушна муниција и да се заштити населението.

Свет | пред 1 месец

Документ од 2015 година: Епстин открива вечера со Маск, Тил и Цукерберг

Фотографија од судските списи за Џефри Епстин прикажува вечера одржана во 2015 година, на која присуствувале некои од највлијателните личности од Силициумската Долина, а самиот Епстин подоцна се фалел дека собирот бил „див“. На фотографијата, објавена од американското Министерство за правда, основачот на Фејсбук, Марк Цукерберг, седи на маса покрај извршниот директор на Спејс-Екс, Илон Маск, и Џои Ито, поранешен директор на MIT Media Lab, објави британскиот таблоид „Дејли мејл“.На вечерата присуствувал и коосновачот на ПејПал, Питер Тил, иако тој не се наоѓа на самата фотографија. Епстин ја испратил фотографијата сам на себе по електронска пошта во понеделникот, на 3 август 2015 година, само еден ден откако се пофалил дека вечерал со технолошките титани. Врамениот примерок бил изложен и во неговиот стан на Менхетен. Според електронската кореспонденција во досието, вечерата се одржала на 2 август 2015 година.Истата вечер, Епстин му пишал на авторот и лекар Питер Атија, прашувајќи го каде се наоѓа, додавајќи дека можеби ќе отпатува во Лос Анџелес за да ја разгледа внатрешноста на друг авион, при што навел дека во тој момент вечера со Маск, Тил и Цукерберг. Атија одговорил со ентузијазам, оценувајќи дека станува збор за „одлична вечера“.Епстин, кој почина во затвор на Менхетен во 2019 година, подоцна го опишал собирот како „див“ во електронска порака испратена до милијардерот Том Прицкер на 20 август 2015 година. Овој опис повторно излезе во јавноста во момент кога расте интересот за врските на финансиерот со моќни поединци.Именуваните личности во меѓувреме се обидуваат да ја минимизираат секоја поврзаност со Епстин. Објавувањето на повеќе од три милиони документи од страна на Министерството за правда го разоткри неговиот општествен круг, при што се нагласува дека појавувањето на фотографиите не претставува доказ за какво било незаконско дејствие.Илон Маск се споменува повеќепати во документите, вклучително и во постари електронски пораки кои укажуваат на пријателски однос со Епстин со години пред вечерата во 2015 година. Во ноември 2012 година, Маск му пишал на Епстин прашувајќи кога ќе биде „најлудата забава на островот“, додавајќи дека веројатно ќе дојде со тогашната сопруга, актерката Талула Рајли. Во тоа време, Епстин веќе бил осуден за сексуални злосторства против малолетници на Флорида.Во декември 2013 година, Маск повторно го контактирал Епстин за можен престој на неговиот карипски остров, при што размениле повеќе пораки за датумите. Иако не е јасно дали посетата некогаш се реализирала, кореспонденцијата укажува на блиски односи.И покрај објавените документи, Маск во повеќе наврати негираше блискост со Епстин. Во интервју за „Венити фер“ изјави дека не го познавал доволно добро за да запознава други луѓе со него и го нарече „очигледно морничав“. На платформата Икс тој исто така отфрли тврдења дека присуствувал на негови забави, нагласувајќи дека никогаш не бил на таков настан и дека јавно повикувал на кривично гонење на сите што соработувале со Епстин во извршување злосторства.Дополнителни електронски пораки покажуваат дека Џои Ито присуствувал на вечери со Епстин и во 2014 година, а во друга кореспонденција разговарал за заеднички патувања со него. Јапонскиот претприемач поднесе оставка од функцијата директор на MIT Media Lab во 2019 година, откако беше откриено дека Епстин донирал околу 850.000 долари на Универзитетот меѓу 2002 и 2017 година.Според извештаи, Ито се обидел да прикрие значителни донации насочени кон лабораторијата и кон негови лични инвестициски фондови. Случајот излезе на виделина по објавата на текст во „Њујоркер“, во кој беше наведено дека вработени во лабораторијата, напорите за сокривање на контактите со Епстин ги нарекувале „Волдеморт“, односно „оној чие име не смее да се изговори“. Ито денес е претседател на Технолошкиот институт Чиба во Јапонија.

Свет | пред 1 месец

Петрушевски: Заев и Филипче вмешани и во последниот случај со заплена на марихуана, дали Заев се интересирал во државни институции и за запленетата марихуана во Србија?

Пратеникот на ВМРО-ДПМНЕ, Бране Петрушевски, денеска изнесе сериозни обвинувања на сметка на поранешниот премиер Зоран Заев и поранешниот министер за здравство Венко Филипче, поврзувајќи ги со, како што рече, низа скандали и сомнежи за криминал поврзани со производство и трговија со марихуана.Петрушевски изјави дека, според ВМРО-ДПМНЕ, името на Зоран Заев се појавува во речиси сите случаи во кои постои сомнеж за криминал, заедно со Венко Филипче, кого го нарече негов близок соработник. Тој оцени дека јавните настапи на Заев се, како што рече, „изблик на нервоза“ поради наводи дека лица блиски до него биле фатени „на лице место“.Пратеникот тврди дека Заев не ја говори вистината кога вели дека не гради во Дубаи и дека постојат јавни сведоштва според кои и тој и Филипче поседуваат т.н. златна виза. Според Петрушевски, Филипче претходно објаснувал дека визата ја добил како лекар, а постави прашање врз која основа Заев ја добил истата.Во обраќањето, Петрушевски истакна дека, според ВМРО-ДПМНЕ, владата предводена од Заев била основоположник на бизнисот со марихуана во Македонија. Тој тврдеше дека околу 70 проценти од запленетата дрога ѝ припаѓа на фирма поврзана со кадар на СДСМ, односно со лице блиско до Заев, додавајќи дека само во текот на вчерашниот ден во струмичкиот регион биле запленети околу 30 тони дрога.Како што наведе, станува збор за фирмата „ЦБД Медплант“, која, според неговите зборови, е поврзана со Тони Котев, познат како М’гчев, поранешен претседател на општинската организација на СДСМ во Ново Село, при што формалната сопственост била на неговиот син, Христијан Котев. Петрушевски додаде дека Котев бил познат и по бизнис-релации со Вице Заев.Тој изјави дека, според документи со кои, како што тврди, располага ВМРО-ДПМНЕ, фирмата на Котев во период пократок од шест месеци во 2025 година испорачала 19 тони марихуана до скопска фабрика, каде што подоцна започнала полициска акција. Дополнително посочи дека дозволата за работа фирмата ја добила во 2020 година, кога премиер бил Заев, а министер за здравство Филипче.Петрушевски повтори дека ВМРО-ДПМНЕ и тогаш укажувала оти лиценците за одгледување марихуана за медицински цели се доделувале на лица блиски до Заев, а не врз основа на исполнување на законските услови, наведувајќи и други примери на фирми кои добиле дозволи во истиот период.Од ВМРО-ДПМНЕ упатија апел до Јавното обвинителство да ја испита поврзаноста на Заев и Филипче со фирмата во која била запленета марихуаната, како и да се утврди зошто, според нивните тврдења, Заев лично се интересирал и контактирал со државни институции во врска со случајот со петте тони марихуана запленети во Србија.Петрушевски порача дека борбата против криминалот, според ВМРО-ДПМНЕ, е јасна и дека, како што рече, ќе дојде крајот на „наркокартелот на Заеви“.

Македонија | пред 1 месец

СДСМ: ВМРО-ДПМНЕ е заробена партија

Социјалдемократскиот сојуз на Македонија денеска остро ја критикуваше ВМРО-ДПМНЕ, оценувајќи дека партијата функционира како „заробен систем“ управуван од еден човек – лидерот Христијан Мицкоски.Според СДСМ, со последните одлуки Мицкоски ги отстранил сите потпретседатели и целосно ја укинал внатрепартиската рамнотежа, воспоставувајќи авторитарен модел на раководење во кој, како што тврдат, сите одлуки зависат исклучиво од него. Како дел од тие промени, од функциите биле тргнати Тимчо Муцунски, Александар Николовски, Владо Мисајловски и Гордана Кочовска.Во партиското соопштение се наведува дека наместо реформи, ВМРО-ДПМНЕ се трансформирала во „приватна фирма“, каде што приоритет имаат тесни интереси и приватни зделки, особено преку јавни набавки. СДСМ дополнително обвини дека ваквиот модел овозможува и непречено функционирање на незаконски активности, вклучително и шверц на дрога преку границите.Социјалдемократите тврдат дека на местото на отстранетите функционери се поставени најблиските соработници на Мицкоски, при што еден од нив бил задолжен за организација и контрола на тендерите, а друг за контакти и соработка со безбедносните служби.„Станува збор за затворен систем на контрола, моќ и бизнис-зделки, во кој партијата е целосно заробена“, се наведува во реакцијата на СДСМ.

Македонија | пред 1 месец

Димитријевиќ: Одговорноста за картелскиот скандал со 5 тони дрога води директно до врвот на власта

Генералниот секретар на СДСМ, Александар Саша Димитријевиќ, на денешната прес-конференција нагласи дека одговорноста за картелскиот скандал со 5 тони дрога која од Македонија завршила во Србија води директно до врвот на власта, затоа цела недела нема информации, а а јавноста е сведок на организирана владина медиумска кампања  за дефокусДимитријевиќ посочи дека цела недела нема одговор на клучното прашање, како толкава количина дрога поминала преку македонската граница и кој ќе одговара за тоа.„ Нема приведени, нема осомничени. Има само дефокус.Од јавно објавените фотографии може да се види дека запленетата дрога во Србија била пакувана во големи картонски кутии со димензии 60 на 40 сантиметри, со по 4 до 5 килограми марихуана во најлонски кеси. Тоа значи многу пратки, и многу возила, камиони. Пет, десет, можеби и повеќе шлепери или камиони требало да ја поминат границата. Како?“, рече Димитријевиќ.Притоа, Димитријевиќ истакна  дека и за последните акции за запленет, одговорноста е кај власта.„МВР молчи за тоа како 5 тони преминале преку македонската граница ама објавува дека заплениле 40 тони канабис во земјава. Ако навистина се запленети 40 тони нелегално произведен и складиран канабис во Македонија, тогаш повторно одговорноста е кај власта и кај никој друг.“Тој нагласи дека без поддршка и заштита од институциите, ваков шверц не е возможен.„Без поддршка, заштита и логистика од врвот на власта шверцот на огромна количина дрога преку границата не било возможно. Од Скопје до Табановце има 48 километри, со гранична и царинска контрола. Каде се камерите на „Safe City“? Каде е полиција? Каде се екипите на Мобилна царина? Каде се контролите?“, рече Димитријевиќ.

Македонија | пред 1 месец

Николоски: Институциите ќе започнат постапка за конфискација на нелегално изградениот објект на спортскиот аеродром Стенковец

На својот фејсбук профил, вицепремиерот и министер за транспорт, Александар Николоски објави дека министерството во координација со повеќе надлежни институции ќе започне постапка за конфискација на нелегално изграден објект на аеродорм Стенковец.„Министерството за транспорт како институција која е надлежна за објекти од прва категорија како што се аеродроми, болници кои третираат терциерна здравствена заштита, градби за високо образование, спортски сали, стадиони и други државни инфраструктурни објекти во изминатиот период сериозно пристапи кон решавање на проблемот со нелегалните објекти кои спаѓаат во оваа категорија.Во координација на повеќе институции – Министерството за транспорт, Агенцијата за цивилно воздухопловство, Државниот градежен инспекторат, како и Аероклубот на спортскиот Аеродромот Стенковец Скопје – ќе се започне постапка за КОНФИСКАЦИЈА на нелегално изградениот објект на спортскиот аеродром Стенковец.Имајќи предвид дека објектот е целосно нелегално изграден на државно земјиште, надлежните органи одлучија да се обратат до Обвинителството и Судот и да побараат целиот објект да се конфискува во корист на државата со цел истиот да може го користи Агенцијата за цивилно воздухопловство за тренинг на пилоти и други потреби.Ова е јасна порака дека нема да се толерира изградба на нелегални објекти на места каде Министерството за транспорт и Државниот градежен инспекторат имаат надлежност" - објави вицепрмиерот Николоски.

Македонија | пред 1 месец

Илјадници се собраа кај Бранденбуршката порта во поддршка на народот на Иран

Илјадници луѓе денеска демонстрираа во Берлин во знак на поддршка на иранското национално востание, на денот кога се одбележува годишнината од револуцијата во Иран од 1979 година, со која беше соборена монархијата. Собирот следува по националните протести во Иран што започнаа во декември поради економски тешкотии, а брзо добија политичка димензија и беа задушени во најжестокиот судир со безбедносните сили од Исламската револуција наваму.Според берлинската полиција, околу 8.000 луѓе се собрале кај Бранденбуршката порта, додека организаторите пријавиле учество на 20.000 лица. Шахин Гобади, член на Комитетот за надворешни работи на Националниот совет на отпорот на Иран, изјави дека на протестот имало околу 100.000 учесници и дека илјадници не успеале да допатуваат поради откажани летови предизвикани од временските услови.На собирот се обрати новоизбраната претседателка на Националниот совет на отпорот на Иран, а поранешниот американски државен секретар Мајк Помпео се приклучи онлајн откако неговиот лет беше откажан. Настанот, според организаторите, го поддржале 344 организации и политички личности, меѓу кои парламентарни групи за пријателство со Иран, синдикати и претставници на граѓанското општество од повеќе европски земји, како и 312 ирански здруженија во Европа.„Пораката на иранскиот народ и неговиот Отпор беше и останува иста: без отстапки, без војна или странска интервенција, промена на режимот и суверенитет на република на народот, од народот и со неговиот организиран отпор“, изјави Маријам Раџави на собирот во Берлин.

Свет | пред 2 месеци

СДСМ прашува: Кој дозволи 5 тони дрога да помине граница?

Социјалдемократскиот сојуз на Македонија соопшти дека најавената заплена на 40 тони марихуана, масло од канабис и биомаса од страна на Министерството за внатрешни работи не го одговара клучното прашање – кој дозволил пет тони дрога да поминат преку македонската граница.Од СДСМ оценуваат дека власта води медиумска кампања за дефокусирање на јавноста, додека МВР молчи за одговорноста на институциите. Според партијата, за транспорт на пет тони дрога потребни се повеќе камиони, што, како што наведуваат, не можело да се случи без знаење или поддршка од структури во МВР, Царината и други државни институции.„Началници, раководители, службеници, инспектори и функционери мора да понесат одговорност. Без институционална поддршка, невозможно е да се шверцуваат тони дрога преку државната граница“, велат од СДСМ.Партијата бара МВР да престане да ја избегнува одговорноста и јавно да одговори кој овозможил шверц на пет тони дрога и кои лица ќе бидат повикани на одговорност.

Македонија | пред 2 месеци

Иран во нов бран протести, отстапките на режимот не го смируваат народот

Нов бран народен гнев се шири во Иран, каде граѓаните, револтирани од масовните убиства на демонстранти минатиот месец, сè поотворено му пркосат на режимот и покрај заканите со одмазда. Ожалените семејства, студентите и здравствените работници учествуваат во протести и тивки акти на непослушност, додека властите продолжуваат со масовни апсења.Погреби и комеморации низ земјата се претворија во собири на отпор, на кои се извикуваат слогани против врховниот лидер Али Хамнеи. Протести и бојкоти се бележат и во училиштата и на универзитетите, а дел од јавните личности јавно го осудија насилството и повикаа на крај на режимот.Според организации за човекови права, од почетокот на протестите се убиени илјадници луѓе, а десетици илјади се уапсени, иако властите пријавуваат далеку помали бројки. Безбедносните сили упаѓале и во болници, приведувајќи повредени демонстранти и медицински персонал кој им укажувал помош.И покрај неколкуте најавени отстапки од властите, повиците за нови протести продолжуваат, а трговци од Техеран најавија масовни собири во февруари, со цел, како што наведуваат, да се оддаде почит на жртвите и да се продолжи народниот бунт.

Свет | пред 2 месеци

Орбан: Добив покана за седница на Одборот за мир на Трамп во Вашингтон

Унгарскиот премиер Виктор Орбан во саботата најави дека „за две недели“ ќе отпатува во Вашингтон, каде што ќе присуствува на инаугуративниот состанок на „Одборот за мир“, иницијатива на американскиот претседател Доналд Трамп за ставање крај на вооружените судири во светот.Говорејќи на предизборен собир во Самботел, во западна Унгарија, во пресрет на парламентарните избори во април, Орбан изјави дека добил официјална покана за повторна средба со американскиот претседател. Според неговите зборови, токму во Вашингтон ќе се одржи првиот состанок на новоформираното тело.Според планот на Трамп за завршување на војната во Појасот Газа, Националниот одбор за управување со Газа привремено би управувал со палестинската територија, под надзор на Одборот за мир, со кој ќе претседава самиот американски претседател. Сепак, во нацрт-повелбата на Одборот не се споменува изречно палестинската територија, туку се поставува поширока мисија – придонес кон решавање на вооружени конфликти на глобално ниво.Во преамбулата се наведува дека Одборот за мир треба да има „храброст да се оддалечи од пристапи и институции кои премногу често потфрлиле“, што се толкува како индиректна критика кон Обединетите нации.Покани за приклучување кон новото тело добиле повеќе светски лидери, меѓу кои и Орбан, познат како близок сојузник на Трамп, кој веќе ја прифатил поканата. За државите што ќе сакаат постојано место во Одборот за мир, ќе биде потребно да уплатат сума од една милијарда долари.

Свет | пред 2 месеци

Фрчкоски: Власта ја турка Македонија во изолација, младите се иселуваат

-Изолираноста на Македонија во моментов плаши, затоа што таа само ќе се продлабочува и на ниеден начин нема да го спречи иселувањето, ниту ќе ги врати младите. Напротив. И покрај изјавите на премиерот дека млади се враќаат тука со авиони, прашањето е дали воопшто има визија за нивната иднина тука, додаде рече Јон Фрчкоски, член на ИО на СДСМ, во гостувањето во емисијата Стадион во Канал 77.Фрчкоски рече дека најзагрижувачки  е  фактот што заминуваат млади, образовани луѓе.-Тоа е тивка катастрофа. Државата вложува во нив, а резултатот го користат други земји. Ова е последица на долгогодишна несигурност и лоши политики, додаде тој.Во контекст на надворешната политика, Фрчкоски истакна дека во однос на стратешкото партнерство со САД денес сме подалеку од било кога досега-Партнерството со САД отсекогаш било исклучително важно за Македонија. Но, имам впечаток дека, од она што е во периметарот, денес сме подалеку од било каква поддршка и партнерство отколку било кога. Немаме конкретни односи, туку шетање по ходници на премиерот од кои не добиваме ништо. Во Давос немаше средба со сериозен лидер, а истовремено декларативно гаиме симпатии кон САД, додека сме на една друга, дури ни европска линија, која во јавната комуникација многу пати ја споменуваме. Тоа е оската Орбан – Вучиќ – Мицкоски, која на крајот не завршува кон Запад и САД, туку веројатно кон Москва, рече Фрчкоски.

Македонија | пред 2 месеци

Кина успешно лансираше експериментално вселенско летало

Кина успешно лансираше експериментално вселенско летало за повеќекратна употреба, што претставува четврто вакво лансирање од 2020 година наваму. Леталото беше испратено во орбитата со ракета „Долг марш-2Ф“ од сателитскиот лансирен центар Ѓуќуан, на северозападот од земјата, објави државната новинска агенција Синхуа, пренесува Ројтерс.Според Синхуа, целта на мисијата е проверка на технологиите за летала за повеќекратна употреба и обезбедување техничка поддршка за мирољубиво користење на вселената. Не е соопштено колку долго леталото ќе остане во орбитата, ниту се наведени детали за технологиите што се тестираат или за орбиталната височина на летот.Развојот на вакви летала се смета за клучен чекор за зголемување на зачестеноста на вселенските мисии и за намалување на нивните трошоци.Кина првото експериментално летало за повеќекратна употреба го лансираше во септември 2020 година, кога престојот во орбитата траеше два дена. Втората мисија, започната во август 2022 година, траеше 276 дена. Леталото лансирано во септември 2024 година, исто така од центарот Ѓуќуан, по 268 дена во орбитата успешно се врати на предвиденото место за слетување, наведува Синхуа.

Свет | пред 2 месеци