Цените на нафтата на меѓународните пазари повторно пораснаа и ја надминаа границата од 90 долари за барел, откако трговците останаа загрижени поради намалениот поморски сообраќај низ Ормускиот Теснец и новите тензии меѓу САД и Иран.
На лондонскиот пазар цената на барел нафта достигна 90,16 долари, што е за 1,13 долари повеќе во однос на претходниот ден. На американскиот пазар, пак, барелот се тргуваше по цена од 85,34 долари.
Пазарите внимателно ја следат состојбата во Ормускиот Теснец и во Црвеното Море. Според иранските медиуми, Револуционерната гарда запрела два танкери што се обиделе да минат низ теснецот, додека четири други го промениле курсот.
Иако два супертанкери натоварени со нафта успеале да го напуштат Ормускиот Теснец, податоците покажуваат дека поморскиот сообраќај и натаму е значително намален.
Во меѓувреме, иранските власти соопштија дека транзитот низ Ормускиот Теснец и понатаму е прекинат поради новите американски напади во регионот, на кои Техеран одговори со напади врз американска воена база во Кувајт.
Аналитичарите оценуваат дека пазарот повеќе не реагира само на вестите за конфликтите, туку и на реалните податоци за движењето на бродовите низ клучните поморски рути, кои се од големо значење за глобалното снабдување со нафта.
