Низа акции против дрога низ државата: приведени повеќе лица во Скопје, Радовиш и Охрид

Во текот на 13 и 14 март 2026 година полицијата спровела повеќе одвоени акции поврзани со дрога во Скопје, Радовиш и Охрид, при што биле приведени повеќе лица, а во дел од случаите се поднесени и кривични пријави.Во Скопје, на различни локации, полициски службеници од СВР Скопје ги лишиле од слобода Е.А. (49), Д.П. (23) и К.С. (28), сите од Скопје, затоа што кај нив биле пронајдени и одземени марихуана и бела прашкаста материја.Во Радовиш, полициски службеници ги лишиле од слобода М.М. (19), М.Ш. (21) и С.Ј. (21), а во полициска станица, во присуство на родител, бил повикан и 17-годишен малолетник. Според полицијата, четворицата биле затекнати додека користеле марихуана, а кај дел од нив биле пронајдени и пакувања со дрогата.Во Охрид, пак, на булеварот „Железничка“ биле лишени од слобода А.Ј. (60) и М.Б. (44), двајцата од Охрид, откако при претрес во патнички автомобил „мерцедес“, извршен по судска наредба, била пронајдена и одземена марихуана.Покрај апсењата, СВР Скопје поднела и кривична пријава против Н.Н. (58) од Скопје поради сомнение за „лажно претставување“ и „неовластено изработување, држење, посредување и тргување со оружје или распрскувачки материи“. Според полицијата, тој на 29 декември 2025 година се претставил како полициски службеник со службена легитимација на МВР, иако бил пензиониран, а при преглед кај него биле пронајдени рамка за пиштол, муниција и метален боксирач.За сите случаи, по целосно документирање, ќе следуваат соодветни поднесоци и пријави.

Македонија | пред 2 седмици

Техеран со закана: Пристаништата во Емиратите стануваат легитимни цели, напуштете ги областите

Иран преку полуофицијалната новинска агенција Тасним ги повика жителите на Обединетите Арапски Емирати веднаш да ги напуштат областите околу неколку големи пристаништа, предупредувајќи дека тие станале „легитимни цели“.Во објавата се наведува дека станува збор за пристаништата Џебел Али во Дубаи, Калифа во Абу Даби и пристаништето Фуџеира.Според агенцијата Тасним, овие локации станале потенцијални цели поради, како што се тврди, присуството на американски воени сили во близина на цивилни објекти.„Тие области станаа легитимни цели поради присуството и криењето на американските воени сили меѓу цивилни објекти и ќе бидат погодени во наредните часови“, се наведува во објавата.Предупредувањето доаѓа во време на зголемени тензии во Персискиот Залив и ескалација на конфликтот меѓу Иран, Израел и Соединетите Американски Држави.

Свет | пред 2 седмици

(Видео) Тага, плач и лелек во Кочани, родителите неутешни: Ангели вечна ви слава, ве сакаме

Неутешни родители, семејства, роднини и пријатели се собраа на кочанските гробишта во алејата на ангелите, на годишнината од смртта на 63 лица кои загинаа како последица на трагедијата во „Пулс“. Солзи, тага, лелеци и болки. Драги Горгиев, татко на тапанарот од ДНК, Георги објави снимка каде се гледа траорната атмосфера. На ова место, голем дел од семејствата го минуваат секојдневието и посочуваат дека само тоа им останало по трагедијата.„Ангели вечна ви слава, ве сакаме“, напиша Горгиев.Родителите цела година, речиси секој викенд го минуваа со Маршот за ангелите, барајќи правда за своите чеда. И натаму раскажуваат за нивните планови и соништа. Душата ја отвораат пред целата јавност за да ја доловат нивната болка, од која треба да се извлече поука дека ваков настан не смее да се повтори и дека треба да биде поука за целото општество да работи на функционалност на системот.Истовремено, Кривичен суд им суди на обвинетите од сопственици на објектот до функционери кои според Обвинителството, дозволиле клубот „Пулс“ да работи без да ги исполнува законските прописи.

Македонија | пред 2 седмици

Емиратите со порака до Иран: На заплашување нема да одговориме со повлекување

Државната министерка на Обединетите Арапски Емирати, Лана Нусејбе, испрати јасна порака до Иран дека Емиратите нема да се повлечат под притисок или заплашување.Во разговор за телевизијата Ен-Би-Си њуз со новинарот Кир Симонс, Нусејбе зборувала за војната со Иран и за безбедносните и економските последици од конфликтот.„На заплашување нема да одговориме со повлекување. Покажавме дека сме подготвени да се браниме и да реагираме навреме во кризни времиња“, изјавила Нусејбе.Изјавата доаѓа во време на растечки тензии на Блискиот Исток, по ескалацијата на конфликтот меѓу Иран, Израел и Соединетите Американски Држави, кој има сериозни безбедносни и економски последици за регионот.

Свет | пред 2 седмици

Томовски: Оваа конференција е обврска да извлечеме поуки од трагедијата

Директорот на Службата за општи и заеднички работи, Ивица Томовски, изјави дека трагедијата во Кочани останува една од најтешките што ја погодиле државата и дека институциите имаат обврска да извлечат поуки и да изградат поотпорен систем.Говорејќи на „Меѓународната конференција за институционалните и клиничките аспекти и решенија по пожарот во Кочани“, Томовски изрази сочувство до семејствата на настраданите.„Нема зборови со кои може да се утеши загубата, ниту реченица што може да ја намали болката што ја носат семејствата. Болката е заедничка и човечка, и национална“, истакна тој.Томовски потсети дека во моментите по трагедијата институциите реагирале брзо и координирано. Била отворена донаторска сметка преку Црвениот крст, а на итна владина седница биле обезбедени 30 милиони денари од буџетските резерви за поддршка на семејствата на повредените кои се лекуваа во странство.Тој посочи дека институциите работеле деноноќно, а неговиот службен телефон бил ставен на располагање за комуникација со семејствата и засегнатите граѓани.„Владиниот авион беше ставен во функција за транспорт на пациенти, затоа што во такви моменти секоја минута, секоја одлука и секоја подадена рака значи живот“, рече Томовски.Според него, конференцијата не е само потсетник на трагедијата, туку и обврска да се зајакнат институционалните механизми и клиничките протоколи.„Во спомен на жртвите и во поддршка на нивните семејства, наша должност е да изградиме посилен, похуман и поподготвен систем“, порача директорот на СОЗР.

Македонија | пред 2 седмици

Техеран одговара на Вашингтон: Нема отворање на Ормускиот теснец

Иран нема да го отвори Ормускиот теснец и покрај заканите од американскиот претседател Доналд Трамп, изјави поранешниот командант на Иранската револуционерна гарда, Мохсен Резаи.Неговата изјава доаѓа откако Трамп предупреди дека САД повторно ќе ја разгледаат одлуката да не ја уништат иранската нафтена инфраструктура на островот Харк доколку Иран продолжи да го попречува преминот на бродови низ Ормускиот теснец.Островот Харк се смета за клучен за иранската економија, бидејќи преку него се извезува околу 90 проценти од иранската нафта.Резаи изјави дека без повлекување на САД од Персиски Залив и без пренесување на контролата врз Ормускиот теснец на регионалните држави и Оман, безбедноста во регионот не може да биде обезбедена.Тој додаде дека Иран би размислил за завршување на војната само доколку добие обештетување од САД и, како што рече, „стопроцентна гаранција за иднината“, што, според него, е невозможно без повлекување на американските сили од Персискиот Залив.

Свет | пред 2 седмици

Четири жртви во руски напади врз Украина, Зеленски обвинува за злоупотреба на кризата во Иран

Претседателот на Украина, Володимир Зеленски, изјави дека Русија го користи конфликтот во Иран како параван за засилување на нападите врз Украина.Според украинските власти, Москва во текот на ноќта извршила напади со ракети и беспилотни летала, при што загинале четири лица, а штета е регистрирана во пет региони низ земјата.„Русија ќе се обиде да го искористи конфликтот на Блискиот Исток за да предизвика уште поголеми разурнувања овде во Европа, во Украина“, изјави Зеленски.Нападите доаѓаат во период на зголемени глобални тензии, додека војната меѓу Русија и Украина продолжува, а конфликтот на Блискиот Исток дополнително ја усложнува меѓународната безбедносна состојба.

Свет | пред 2 седмици

Ирански функционер: Украина се вмеша во војната и стана легитимна цел

Иранскиот функционер Ебрахим Азизи изјави дека Украина, со наводната поддршка за Израел во тековниот конфликт, се вмешала во војната и со тоа ја направила својата територија легитимна цел за Иран.Азизи тврди дека Киев обезбедува поддршка со беспилотни летала за, како што го нарече, „израелскиот режим“.„Со обезбедувањето беспилотна поддршка за израелскиот режим, пропаднатата Украина всушност се вклучи во војната и, според член 51 од Повелбата на Обединетите нации, ја претвори целата своја територија во легитимна цел за Иран“, изјави тој.Членот 51 од Обединетите нации се однесува на правото на државите на самоодбрана во случај на вооружен напад.Засега нема официјална реакција од украинските власти на овие обвинувања. Изјавата доаѓа во време на зголемени тензии на Блискиот Исток и ширење на конфликтот меѓу Иран, Израел и Соединетите Американски Држави.

Свет | пред 2 седмици

ВМРО-ДПМНЕ обвинува: Протестот е организиран од СДС под превез на синдикална борба

Од ВМРО-ДПМНЕ тврдат дека денешниот протест за повисоки плати, организиран од Сојузот на синдикатите на Македонија, покажал дека станува збор за заедничка активност на синдикатот и СДСМ.Од партијата велат дека за време на протестот низ улиците биле забележани лица со промотивен материјал и обележја на СДСМ, како и учесници кои носеле маици со партиски натписи.„Ова е доказ за нашите прес-конференции во кои информиравме дека ова не е борба за работнички права на синдикатот, туку организирана активност на СДС и ССМ под превез дека се бараат повисоки плати“, соопштија од ВМРО-ДПМНЕ.Од партијата тврдат и дека според нивните информации на протестот биле донесени луѓе и од други градови, а организацијата, како што наведуваат, била спроведена преку локални штабови на СДС.„Денешниот протест покажа дека е само една парада со која СДС и ССМ ги лажат работниците дека се залагаат за повисоки плати“, велат од ВМРО-ДПМНЕ.

Македонија | пред 2 седмици

(Видео) „Минималната плата мора да се зголеми во март, не затоа што некој ќе ни ја даде, туку затоа што ние како ја заработуваме, рече Трендафилов

Сојузот на синдикатите на Македонија (ССМ) организираше протест со барање минималната плата да изнесува 600 евра и линеарно зголемување на сите плати за 100 евра. Синдикатите се против законското усогласување на минималецот од околу 1.600 денари, оценувајќи дека тоа не ги покрива растечките трошоци за живот.Протестот започна пред Работничкиот дом и заврши пред Владата. Претседателот на ССМ, Слободан Трендафилов, изјави дека околу 160.000 работници примаат плата под прагот на сиромаштија.„Минималната плата мора да се зголеми во март, не затоа што некој ќе ни ја даде, туку затоа што ние како работници ја заработуваме“, рече Трендафилов.ССМ го отфрла усогласувањето од 1.667 денари, посочувајќи дека само во последните два месеца синдикалната минимална кошница се зголемила за околу 2.000 денари.Синдикатот најави и 24-часовен генерален штрајк кој ќе го опфати и приватниот сектор доколку не се прифатат нивните барања. Владата, пак, најави дека доколку нема договор меѓу синдикатите и работодавачите, ќе се донесе законско зголемување на минималната плата од околу 1.667 денари.

Настани | пред 2 седмици

Македонија успешно евакуираше 380 свои и 78 странски државјани, вели Муцунски

Министерот за надворешни работи и надворешна трговија, Тимчо Муцунски, изјави дека државата денес покажува институционален капацитет брзо и ефикасно да реагира во кризни ситуации, да ги заштити своите граѓани каде и да се наоѓаат, но и да им помогне на пријателските држави.Во гостување во емисијата „Вечерното шоу на Богдан“, Муцунски посочи дека изминатата година била особено предизвикувачка за Министерството за надворешни работи и надворешна трговија, кое трипати се соочило со сложени кризни ситуации со значителни логистички и безбедносни предизвици.Тој потсети дека по трагедијата во Кочани институцијата учествувала во организирањето на извлекување на 115 повредени македонски граѓани, нивно лекување во странство и нивно враќање во државата. Подоцна следела и безбедносната криза меѓу Иран и Израел, кога биле организирани евакуации на македонски државјани од регионот на Блискиот Исток.Муцунски нагласи дека во последната криза операцијата била дополнително сложена бидејќи македонски граѓани престојуваат во повеќе држави во регионот, меѓу кои Обединетите Арапски Емирати, Кувајт, Бахреин, Саудиска Арабија, Катар и Израел.„Сметам дека во сите три ситуации постапивме успешно како институција, а повратните реакции од граѓаните покажуваат дека државата стои зад нив и дека може да сметаат на поддршка во најтешките моменти“, изјави Муцунски.Тој посочи дека со четири организирани евакуациони летови биле евакуирани вкупно 458 патници, од кои 380 македонски државјани и 78 странски државјани.„Во минатото знаевме да бидеме држава која бара солидарност. Денес сме држава која во тешки времиња нуди солидарност на своите соседи и на своите меѓународни партнери“, рече министерот.Муцунски нагласи дека во ваквите операции најважен приоритет е безбедноста на граѓаните и дека зад ваквите активности стои широка координација на повеќе институции и дипломатско-конзуларни претставништва.„Кога сте македонски граѓанин, треба да знаете дека имате држава и институции кои стојат зад вас“, порача Муцунски.

Македонија | пред 2 седмици

Добро утро, ние денеска се бориме за Вашите плати, што ќе правите Вие?, праша Трендафилов во пресрет на протестот

Претседателот на Сојузот на синдикатите на Македонија, Слободан Трендафилов, ги повика работниците да се приклучат на денешниот работнички протест во Скопје, со порака дека синдикатите се борат за повисоки плати и подобар животен стандард.„Добро утро, ние денеска се бориме за вашите плати, што ќе правите вие?“, порача Трендафилов во пресрет на протестот.Работничкиот протест, организиран од Сојузот на синдикатите на Македонија, е закажан за 14 март со почеток во 12:05 часот пред Работничкиот дом во Скопје, на улицата „Мирче Ацев“ во општина Центар.Според најавата на синдикатите, протестниот марш ќе продолжи по улиците „Филип Втори Македонски“, „11 Октомври“, „Димитрие Чуповски“, „Даме Груев“, булеварот „ВМРО“ и ќе заврши пред Владата на Република Северна Македонија на булеварот „Илинден“.Планирано е учесниците да застанат и пред Собранието и пред Стопанската комора, каде синдикатите ќе ги упатат своите пораки до институциите и работодавачите.Од ССМ велат дека протестот се организира поради долгогодишното незадоволство на работниците, бидејќи, како што наведуваат, платите не ги следат реалните трошоци за живот.Синдикатот тврди дека нивните барања за зголемување на минималната плата и на останатите плати биле игнорирани од Владата и работодавачите, што, според нив, дополнително го зголемило револтот кај работниците.„Кога Владата и газдите не слушаат, тогаш работниците и синдикатите ќе зборуваат на улица“, порачаа од ССМ.

Македонија | пред 2 седмици

Најмалку 112 загинати во нападите врз ирански Курдистан

Најмалку 112 лица загинале во американско-израелските напади врз иранската провинција Курдистан, соопшти локален функционер цитиран од иранската новинска агенција Тасним.Според истиот извор, во нападите досега се повредени најмалку 969 лица.Раководителот на службата за итна помош во провинцијата Курдистан изјавил дека 27 повредени лица во моментов се хоспитализирани на редовни болнички оддели, додека пет пациенти се наоѓаат на интензивна нега.Иранските власти не објавија дополнителни детали за целите што биле погодени во оваа област, која се наоѓа во западниот дел на земјата, во близина на границата со Ирак.Нападите се дел од пошироката ескалација на конфликтот меѓу Иран од една страна и САД и Израел од друга, кој во последните недели се прошири на повеќе земји на Блискиот Исток.

Свет | пред 2 седмици

Што ќе се гради под Белата куќа

Во рамки на поширока реконструкција на комплексот на Белата куќа во Вашингтон, американските власти планираат изградба на подземен центар за безбедносна проверка на посетители.Според прелиминарниот дневен ред на федералната комисија за планирање, објектот со површина од околу 3.066 квадратни метри би бил изграден под Шерман парк, кој се наоѓа југоисточно од Белата куќа.Планирано е центарот да има седум контролни ленти со цел да се олесни обработката на посетителите и значително да се намали времето на чекање за влез во комплексот. Според информациите на телевизијата Ен-Би-Си њуз, изградбата би можела да започне веќе во август, а центарот да биде ставен во функција до јули 2028 година.Во рамки на проектот нема да биде отстранет споменикот на генералот Вилијам Шерман, кој се наоѓа во паркот.Проектот го реализираат Извршната канцеларија на претседателот на САД, Тајната служба на САД и Службата на националните паркови, додека Националната комисија за планирање на главниот град треба да го разгледа предлогот на седница закажана за 2 април.На истата седница ќе се разгледуваат и планови за изградба на нова зграда со површина од околу 8.360 квадратни метри, која би вклучувала голема балска сала и би била изградена на местото на Источното крило на комплексот на Белата куќа.

Свет | пред 2 седмици

Вучиќ: Нема да се срамам од српското оружје, Србија нема да дозволи да биде покорена

Претседателот на Србија, Александар Вучиќ, изјави дека државата ја зајакнува својата војска за да ја зачува слободата и независноста, а не за да напаѓа други земји.Говорејќи на предизборен собир во спортската сала во Аранѓеловац, Вучиќ порача дека граѓаните можат мирно да спијат, но дека никој не треба да помисли дека Србија може да биде покорена.„Србија ќе остане слободна и независна и ќе ја чуваме со сета наша сила. Затоа ја зајакнуваме војската“, изјави Вучиќ.Тој се осврна и на реакциите од регионот поради српското вооружување, коментирајќи ги изјавите на хрватскиот премиер Андреј Пленковиќ дека за тоа ќе го извести НАТО.„Не мораш ти да го известуваш НАТО, јас ќе го известам. Не се срамам од она што српските раце го создадоа. За разлика од оние што сакаат да уништуваат српско оружје, јас сакам да ја зајакнам Србија“, рече Вучиќ.Тој нагласи дека Србија нема намера да нападне никого, но предупреди дека државата нема да дозволи некој да ја заплаши.Во говорот Вучиќ се осврна и на внатрешните политички тензии во земјата, тврдејќи дека во изминатата година и половина имало обиди за дестабилизација на Србија.„Се обидуваа да ја срушат Србија, да ги поделат луѓето и семејствата, да ги свртат младите против постарите“, рече тој.Вучиќ порача дека неговата политика е обединување на општеството и најави економски цели според кои до 2030 година просечната плата во Србија би требало да надмине 1.300 евра, а пензиите 750 евра.Тој додаде дека ќе се обиде да најде начин најниските пензии да растат побрзо од останатите, со цел да им се помогне на најсиромашните граѓани.

Свет | пред 2 седмици

Техеран тврди дека 56 културни објекти се оштетени во војната

Најмалку 56 културни објекти во Иран, меѓу кои музеи и историски споменици, претрпеле „сериозни структурни оштетувања“ во американско-израелските напади од почетокот на војната, соопшти иранското Министерство за култура.Во соопштение објавено од новинската агенција ИСНА, министерството наведува дека најголем број оштетени објекти има во провинцијата Техеран, каде се регистрирани 19 погодени споменици.Според податоците на властите, дополнително се оштетени и 12 значајни историски локалитети во иранската провинција Курдистан.Иранските власти не објавија детали за степенот на оштетувањата на поединечните објекти, ниту дали меѓу нив има локалитети под заштита на УНЕСКО.Нападите врз Иран се дел од ескалацијата на конфликтот меѓу Иран од една страна и САД и Израел од друга, кој во последните недели се прошири на повеќе земји на Блискиот Исток. Војната веќе предизвика сериозни човечки загуби и значителни оштетувања на инфраструктурата во регионот.

Свет | пред 2 седмици

Убиството на Хамнеи не го урна режимот: Аналитичари предупредуваат дека САД се заглавени во конфликтот

Американско-израелските напади во кои беше убиен врховниот лидер на Иран, Али Хамнеи, не доведоа до пад на власта во Техеран, туку отворија конфликт кој Вашингтон тешко може да го контролира, предупредуваат аналитичари.Иако операцијата на почетокот се сметаше за значителен воен успех, бидејќи беа елиминирани Хамнеи и повеќе високи функционери, иранскиот режим брзо воспостави ново раководство и продолжи со воени активности.Во меѓувреме, крвавиот воздушен конфликт трае веќе две недели, а Иран користи значајни адути – притисок врз светската енергетска снабдувачка мрежа и напади врз американски сојузници на Блискиот Исток.Според анализите, Техеран речиси го затвори Ормускиот теснец – една од најважните поморски рути низ која минува околу една петтина од светската трговија со сурова нафта. Поради тоа, цените на енергенсите нагло пораснаа, а дел од државите веќе почнаа да користат стратешки резерви на нафта.Истовремено, Иран и неговите сојузници, вклучително и Хезболах во Либан, отворија повеќе фронтови во регионот. Ракетни и беспилотни напади беа насочени кон цели во Израел, како и кон американски сојузници во Персискиот Залив.Аналитичарите оценуваат дека Техеран применува стратегија во три чекори – да го обезбеди опстанокот на режимот, да задржи капацитет за одмазда и да го продолжи конфликтот што е можно подолго за да го заврши под поповолни услови.Професорот по политички науки Џонатан Пакин од Универзитетот Лавал смета дека американската администрација ја потценила ситуацијата.„Американската администрација несомнено беше претенциозна верувајќи дека ги држи сите карти во раце“, изјави Пакин.Во меѓувреме, последиците од конфликтот се чувствуваат низ целиот свет. Поради нарушувањата во снабдувањето со енергенси, цените на нафтата и горивата растат, а поморскиот и воздушниот транспорт се соочуваат со сериозни ограничувања.Аналитичарите предупредуваат дека Вашингтон можеби ќе мора да ја преиспита својата стратегија и да ги намали првичните цели, бидејќи сценариото за брз пад на иранскиот режим не се оствари.Во спротивно, конфликтот би можел да се прошири уште повеќе и да го вовлече регионот во долготрајна и непредвидлива војна.

Свет | пред 2 седмици

ВМРО-ДПМНЕ: СДС стои зад организацијата на протестот на ССМ

ВМРО-ДПМНЕ обвини дека СДС стои зад организацијата и логистиката на протестот што денеска го најави Сојузот на синдикатите на Македонија (ССМ).Од партијата тврдат дека постојат докази оти зад мобилизацијата на луѓе и организирањето превоз во повеќе градови стојат лица блиски до СДС.„По доказите дека за организирање луѓе и превоз од Струмица и струмичкиот регион е одговорен Бранко Георгиев, поранешен раководител во ЈПКД ‘Комуналец’ Струмица во време на СДС, се појавуваат нови факти дека СДС го координира и управува ССМ и на централно и на локално ниво“, велат од ВМРО-ДПМНЕ.Според нив, протестот формално е организиран од ССМ, но логистиката и техничката организација, како што тврдат, се водат од структури блиски до СДС.Како пример го посочуваат Куманово, каде според нив за организацијата на превоз за протестот бил задолжен Оливер Трајковски, кој, како што наведуваат, е шеф на штаб на СДС во населбата Зелен Рид и вработен во јавното претпријатие „Чистота и Зеленило“ во Куманово.Од ВМРО-ДПМНЕ наведуваат дека фотографии од претходни политички активности ја потврдуваат неговата блискост со функционери и кандидати на СДС на локалните избори во 2021 година.Партијата оценува дека наместо вистинска синдикална борба за подобрување на правата и платите на работниците, протестот се користи како средство за политички притисок.„Граѓаните и работниците заслужуваат искрена и независна синдикална борба, а не политички сценарија“, велат од ВМРО-ДПМНЕ, додавајќи дека јавноста има право да знае кој стои зад организацијата на протестот.

Македонија | пред 2 седмици

СДСМ: Платите се ниски, цените растат, Владата не презема мерки

СДСМ обвини дека платите во Македонија се ниски, додека цените на основните производи и енергенсите постојано растат, а Владата предводена од премиерот Христијан Мицкоски, според партијата, не презема мерки за подобрување на стандардот на граѓаните.Од СДСМ велат дека повеќе од 200.000 работници во земјава едвај ги покриваат основните трошоци за живот.„Работниците во Македонија едвај врзуваат крај со крај. Над 200.000 работници буквално преживуваат со плати кои не можат да ги покријат ниту основните животни потреби“, се наведува во реакцијата.Партијата ја критикува Владата дека одбива да ја зголеми минималната плата на 600 евра и тврди дека наместо поддршка за работниците, премиерот ги навредува оние кои бараат повисоки примања.Според СДСМ, Мицкоски изјавил дека платите во јавната администрација се добри „со оглед на тоа колку работат“, како и дека не им е потребен годишен одмор, што, како што наведуваат, претставува потценување на трудот на работниците.Од партијата посочуваат и дека растот на цените на нафтата дополнително ги зголемува цените на храната и основните производи.„Во продавниците веќе има нови поскапувања, а цената на зејтинот надмина 100 денари“, наведуваат од СДСМ.Тие додаваат дека со вакво темпо на поскапувања платите секојдневно губат од вредност и предупредуваат дека економијата не може да се смета за силна доколку платите на работниците останат ниски.

Македонија | пред 2 седмици

Иран ги исмева САД: „Сега го молат светот да купува руска нафта“

Иранскиот министер за надворешни работи Сајед Абас Арагчи остро го критикуваше потегот на САД привремено да ублажат дел од санкциите за руската нафта, обвинувајќи го Вашингтон дека сега „го моли светот“ да купува руска енергија.Арагчи на социјалните мрежи објави насловна страница од весникот „Фајненшл тајмс“, во која се наведува дека Русија по американската одлука би можела да заработува околу 150 милиони долари дневно дополнителни приходи од нафта.„САД со месеци вршеа притисок врз Индија да го прекине увозот на руска нафта. По две недели војна со Иран, Белата куќа сега го моли светот – вклучително и Индија – да купува руска сурова нафта“, напиша Арагчи, нарекувајќи го потегот на Вашингтон „патетичен“.Администрацијата на американскиот претседател Доналд Трамп привремено ублажи дел од санкциите за руската нафта со цел да се ублажи растот на цените на енергенсите по ескалацијата на конфликтот на Блискиот Исток.Вашингтон издаде привремена дозвола со која се овозможува продажба на дел од руската нафта што веќе се наоѓала на танкери на море, во обид да се стабилизира глобалниот енергетски пазар.Одлуката предизвика критики и во Европа. Германскиот канцелар Фридрих Мерц оцени дека ваквиот потег е погрешен бидејќи го ослабува притисокот врз Русија поради војната во Украина.Цените на нафтата нагло пораснаа по американско-израелските напади врз Иран на крајот на февруари, што предизвика сериозни нарушувања во глобалното снабдување со енергија.Поради заканите за затворање на Ормускиот теснец – една од најважните рути за светската трговија со нафта – глобалните пазари остануваат под силен притисок.Анализите покажуваат дека Русија би можела значително да профитира од растот на цените на нафтата и промените во санкциите. Според проценките објавени во „Фајненшл тајмс“, Москва би можела да остварува околу 150 милиони долари дополнителни приходи дневно од извоз на нафта.

Свет | пред 2 седмици

(Фото) Се поставува мостот на Момин Поток

Градоначалникот на Скопје објави дека започна поставувањето на мостот на Момин Поток, дел од инфраструктурниот проект кој со години предизвикува сообраќаен метеж на овој потег.Уште на почетокот на јануари, градоначалникот Орце Ѓорѓиевски информираше дека изградбата на мостот се одвива со забрзано темпо, со цел што побрзо да се надмине долгогодишниот проблем со застојот во сообраќајот.На овој дел од градот со години се создаваат гужви и забавување на сообраќајот, поради што граѓаните во повеќе наврати апелираа градежните работи да се забрзаат.

Скопје | пред 2 седмици

(Видео) Трамп објави снимка од нападот врз Харг: клучниот остров за извоз на иранска нафта

Американскиот претседател Доналд Трамп објави снимка од синоќешните американски воздушни напади врз ирански воени цели на островот Харг во северниот дел на Персискиот Залив.На видеото се гледаат удари врз воена база на островот, меѓу кои и напади врз писта на воздухопловна база, како и врз повеќе други локации.Според достапните информации, мета биле и системи за противвоздушна одбрана, како и можни позиции на ракетни системи што ги користи Иранската револуционерна гарда.Трамп претходно на социјалната мрежа „Трут соушал“ соопшти дека американската војска извела еден од најмоќните воздушни напади во поновата историја на Блискиот Исток.„Пред неколку моменти Централната команда на САД изведе еден од најмоќните бомбардерски напади во историјата на Блискиот Исток и ги уништи сите воени цели на иранскиот остров Харг“, напиша Трамп.Тој додаде дека свесно одлучил да не ја напаѓа нафтената инфраструктура на островот.„Одлучив да не ја уништам нафтената инфраструктура на островот. Но ако Иран или кој било друг се обиде да го попречи слободниот и безбеден премин на бродовите низ Ормускиот теснец, веднаш ќе ја преиспитам таа одлука“, порача Трамп.Островот Харг се смета за клучна точка за иранскиот извоз на нафта, бидејќи преку него поминуваат околу 90 проценти од нафтените пратки што Иран ги извезува на светските пазари.Станува збор за корален остров долг околу осум километри, кој се наоѓа на околу 43 километри од иранскиот брег. Таму завршуваат нафтоводите што ја носат нафтата од централниот и западниот дел на Иран до терминалите за извоз.Според податоците на инвестициската банка „Џеј-Пи Морган“, преку Харг вообичаено се извезуваат меѓу 1,3 и 1,6 милиони барели нафта дневно, а во последниот период количината била зголемена на околу три милиони барели дневно поради страв од можен напад.Аналитичарите предупредуваат дека уништување на извозната инфраструктура на островот би можело да предизвика силен и долготраен раст на цените на нафтата на глобалниот пазар.

Свет | пред 2 седмици

Северна Кореја лансираше десет балистички ракети кон Јапонското Море

Северна Кореја лансираше околу десет балистички ракети кон Источното, односно Јапонското Море, во демонстрација на сила во време кога САД и Јужна Кореја ги одржуваат годишните пролетни воени вежби „Штит на слободата“.Според јужнокорејската војска, ракетите биле лансирани од област во близина на главниот град Пјонгјанг. Јапонското Министерство за одбрана соопшти дека проектилите паднале надвор од јапонската ексклузивна економска зона, пренесува агенцијата Асошиејтед прес.Здружениот штаб на Јужна Кореја соопшти дека вооружените сили ја зголемиле подготвеноста и внимателно ја следат ситуацијата поради можноста за нови лансирања, во координација со САД и Јапонија.Лансирањата следуваат по предупредувањето на сестрата на севернокорејскиот лидер Ким Џонг Ун, Ким Јо Џонг, која ги критикуваше заедничките воени вежби на САД и Јужна Кореја и предупреди на „страшни последици“ за безбедноста на Северна Кореја.Во меѓувреме, Министерството за надворешни работи на Северна Кореја ги осуди американските и израелските напади врз Иран и изрази поддршка за врховниот лидер на Иран, Мојтаба Хамнеи.Воената вежба „Штит на слободата“ ќе трае до 19 март и има цел да ги тестира оперативните способности на сојузниците преку симулации и безбедносни сценарија. Северна Кореја и понатаму ги одбива повиците за дијалог за нејзината нуклеарна програма, додека паралелно ги зајакнува врските со Русија и учествува во воени активности поврзани со војната во Украина.

Свет | пред 2 седмици

Сончево со мала облачност, попладне можен слаб дожд

Сончево време со мала до умерена облачност се очекува денеска во земјава, со услови за слаб локален дожд во попладневните часови, информира Управата за хидрометеоролошки работи.Претпладне во одделни котлини ќе има појава на слаба магла, а ќе дува слаб до умерен ветер од југоисточен правец. Максималната дневна температура ќе се движи од 12 до 19 степени.Утринава најниска температура од -4 степени е измерена во Берово, -2 во Маврови Анови, а -1 степен во Крива Паланка, Битола и на Попова Шапка. Нула степени се измерени во Скопје-Петровец, Тетово, Прилеп, Крушево и Струмица.Температура од еден степен е регистрирана во Претор и Велес, два степени во Скопје-Зајчев Рид, Охрид, Куманово, Штип, Кавадарци и Демир Капија, три степени во Виница, а најтопло утринава било во Гевгелија со четири степени.Снежна покривка од 55 сантиметри е измерена на Попова Шапка.Во Скопје денеска ќе преовладува сончево време со мала до умерена облачност. Попладне во делови од котлината ќе има услови за слаб дожд, а максималната температура ќе достигне до 18 степени.

Македонија | пред 2 седмици

Пентагон: Не грижете се, Ормускиот теснец нема да остане затворен

Високи претставници на Пентагон порачаа дека САД ќе се спротивстават на обидите на Иран да го претвори Ормускиот теснец во опасно тесно грло за светското снабдување со нафта.Американскиот министер за одбрана Пит Хегсет изјави дека нема потреба од загриженост и дека Вашингтон нема да дозволи овој клучен морски премин да остане блокиран.„Тоа е нешто со кое се занимаваме и не треба да се грижите“, изјави Хегсет на брифинг во Пентагон.Тој нагласи дека во моментов главната причина за нарушениот поморски сообраќај се нападите врз бродови.„Единственото нешто што го спречува транзитот низ теснецот е иранското пукање врз бродови. Теснецот е отворен за сообраќај доколку Иран престане со тоа“, рече Хегсет.Според него, уништувањето на делови од иранската морнарица било една од клучните цели на американските операции, бидејќи Техеран со децении се обидува да пресретнува бродови во овој регион.Ормускиот теснец е еден од најважните морски премини во светот, преку кој минуваат околу 20 проценти од глобалните испораки на нафта.Во меѓувреме, американскиот претседател Доналд Трамп изјави дека разгледува можност американската морнарица да обезбедува придружба на комерцијални бродови и нафтени танкери за да се ублажи кризата со снабдувањето со енергенси.„Ќе го направиме тоа ако биде потребно. Се надеваме дека работите ќе се одвиваат добро, но ќе видиме што ќе се случи“, изјави Трамп во интервју за „Фокс њуз“.Ормускиот теснец е широк околу 48 километри, а на најтесниот дел само 34 километри, што го прави исклучително чувствителна зона за поморскиот сообраќај.Иран поседува и поморски мини со кои би можел да го блокира преминот, што би претставувало сериозна закана за танкерите и другите бродови, кои веќе се изложени и на ракетни и беспилотни напади.Пентагон соопшти дека засега нема јасни докази дека Иран поставил мини во теснецот, иако во последните денови биле нападнати повеќе комерцијални бродови во регионот.Во меѓувреме, американските сили продолжуваат со напади врз ирански ракетни и беспилотни позиции, како и врз фабрики поврзани со воената индустрија, со цел да се намали способноста на Иран да произведува ново оружје.Од почетокот на конфликтот, САД и Израел погодиле околу 15.000 цели во Иран.Во војната, која се приближува кон втората недела, ранети се најмалку 140 американски војници, а 13 загинале во различни напади и инциденти на Блискиот Исток.

Свет | пред 2 седмици