САД

Одлучивте да не ми ја доделите Нобеловата награда за мир, па повеќе немам обврска да размислувам само за мирот, му пишал Трамп на норвешкиот премиер

Американскиот претседател Доналд Трамп му испратил писмо на норвешкиот премиер Јонас Гар Сторе, во кое наведува дека повеќе не се чувствува обврзан да се фокусира исклучиво на мирот, откако минатата година не му била доделена Нобеловата награда за мир. Писмото било испратено во период на засилени изјави и барања од страна на Трамп поврзани со Гренланд.„Драг Јонас, бидејќи вашата земја одлучи да не ми ја додели Нобеловата награда за мир за запирање на повеќе од осум војни, повеќе не чувствувам обврска да размислувам исклучиво за мирот, иако тоа секогаш ќе биде доминантно, туку сега можам да размислувам за тоа што е добро и соодветно за Соединетите Американски Држави“, напишал Трамп во пораката, чијашто автентичност ја потврдиле од кабинетот на норвешкиот премиер.Во истото писмо, Трамп повторно го довел во прашање суверенитетот на Данска над Гренланд, тврдејќи дека островот не може самостојно да се одбрани од влијанието и заканите на Кина и Русија без директна американска вмешаност. Тој наведува дека не постојат, според него, јасни пишани докази за данските сопственички права, оценувајќи дека „светот нема да биде безбеден“ додека Соединетите Американски Држави немаат целосна контрола врз островот.Норвешкиот премиер Сторе ги отфрлил тврдењата на Трамп во врска со Нобеловата награда, појаснувајќи дека неа ја доделува независниот Норвешки Нобелов комитет, а не владата на Норвешка, која нема влијание врз одлуките на комитетот.Норвешка, заедно со уште седум европски држави, е меѓу земјите на кои Трамп им се заканил со воведување царини од 10 проценти, како дел од поширокиот притисок поврзан со прашањето за Гренланд и односите со европските сојузници.

Свет | пред 2 месеци

ЕУ засега се воздржува од „трговската базука“ против САД поради Гренланд, приоритет добива дипломатијата

Земјите членки на ЕУ оцениле дека во оваа фаза треба да се избегне ескалација и да се остави простор за политичко и дипломатско решение со Соединетите Американски Држави. Инструментот против присила, усвоен во 2023 година, ѝ овозможува на Унијата да санкционира земји што вршат, како што се дефинира, „економска уцена“, преку ограничување на трговски дозволи и пристап до единствениот пазар, но досега никогаш не бил применет.Според дипломатски извори, Европската комисија на состанокот презентирала повеќе можни опции, меѓу кои и активирање на ACI, но амбасадорите на земјите членки само дискутирале, без гласање за конкретни мерки.Сепак, ЕУ има подготвен пакет контрамерки во вредност од 93 милијарди евра, насочени кон американски производи, кој може да биде активиран доколку Трамп ја реализира најавата и од 1 февруари воведе дополнителни царини од 10 проценти за осум европски земји, меѓу кои Данска, Германија и Франција. Одлуката за повторно воведување на овие мерки, кои беа суспендирани минатата година, ќе биде донесена по истекот на рокот што го постави американскиот претседател.Контрамерките беа подготвени уште лани, во период на неизвесност околу тоа дали САД ќе прифатат трговски договор со ЕУ. Тие предвидуваат реципрочни царини до 30 проценти за низа американски производи, од автомобили до живинско месо. Нивната примена беше одложена откако летоска претседателката на Европската комисија, Урсула фон дер Лајен, и Доналд Трамп постигнаа договор со кој се утврди основна царина од 15 проценти за поголемиот дел од извозот на ЕУ во САД, а царините за многу американски индустриски производи беа намалени на нула.Новите закани на Трамп, поврзани со спорот околу Гренланд, го доведоа во прашање овој договор, откако влијателни пратеници во Европскиот парламент најавија одложување на гласањето за неговата имплементација, закажано за крајот на месецот.Во меѓувреме, претседателот на Европскиот совет, Антонио Кошта, свика вонреден самит на лидерите на ЕУ, кој треба да се одржи во наредните денови. Според извори запознаени со подготовките, самитот би можел да се одржи во четврток, на 22 јануари.Дипломати присутни на неделните разговори во Брисел, на кои беа претставени сите 27 земји членки на амбасадорско ниво, истакнаа дека е изразена целосна солидарност со Данска и Гренланд, како и поддршка за нивниот суверенитет и територијален интегритет.

Свет | пред 2 месеци

Нема фотографија

Осум европски држави со заедничка порака до Трамп

Осум европски држави, кои се најдоа на листата на земји погодени од најавените царини на американскиот претседател Доналд Трамп, поради нивната поддршка за Данска во прашањето за Гренланд, во неделата излегоа со заедничка изјава во која предупредуваат дека ваквите мерки носат ризик од „опасна надолна спирала“.Во заедничката изјава, Обединетото Кралство, Данска, Финска, Франција, Германија, Холандија, Норвешка и Шведска оценуваат дека заканите со царини директно ги поткопуваат трансатлантските односи и создаваат сериозен ризик од ескалација. Земјите нагласуваат дека ќе останат обединети и координирани во својот одговор и дека се цврсто посветени на заштита на сопствениот суверенитет.Во документот тие истакнуваат целосна солидарност со Кралството Данска и со народот на Гренланд, посочувајќи дека подготвеноста за дијалог останува, но исклучиво врз основа на принципите на суверенитет и територијален интегритет.Осумте држави, кои одлучија да испратат свои војници на Гренланд, потсетуваат дека како членки на НАТО се посветени на јакнење на безбедноста на Арктикот, што го оценуваат како заеднички трансатлантски интерес. Во тој контекст се наведува дека воената вежба на Алијансата „Арктичка издржливост“ претставува одговор на тие безбедносни потреби и не е закана за никого.Во меѓувреме, од Франција доаѓаат сигнали за поостар европски одговор. Според соработници на францускиот претседател Емануел Макрон, Париз бара од Европска унија активирање на Инструментот за борба против присила, механизам познат како „господарска базука“. Со негово активирање, Европската унија би можела да го ограничи пристапот на САД до јавни набавки или да воведе ограничувања во трговијата во сектори каде американската страна остварува суфицит, доколку Трамп не се откаже од најавените царини.

Свет | пред 2 месеци

Трансатлантските односи на раб на пукање поради Гренланд и новите царини на Трамп

Одлуката на Доналд Трамп да воведе царини за земјите кои го поддржаа Гренланд ги доведе трансатлантските односи до точка на сериозна ескалација, а лидерите на Европската Унија разгледуваат досега незамисливи форми на одмазда против Вашингтон, објави Politico.Односите меѓу САД и ЕУ веќе со месеци се нарушени поради американското двоумење околу поддршката за Украина, притисоците врз земјите членки на ЕУ да прифатат неповолен трговски договор и барањата сојузниците во НАТО драстично да ги зголемат трошоците за одбрана.Тензиите дополнително ескалираа откако Трамп ги засили претензиите кон Гренланд, што за време на викендот предизвика протести на улиците на Нук и Копенхаген. Европските лидери сега се соочуваат со сѐ погласни повици да го напуштат досегашниот умерен пристап и да се подготват за директен судир со САД.Во Брисел сѐ почесто се споменува можноста Европа да го активира т.н. Инструмент против присила – трговската „базука“ на ЕУ. Станува збор за моќен механизам за трговска одмазда, првично осмислен како средство за одвраќање на Кина, кој ѝ овозможува на Унијата да воведе царини и ограничувања за инвестиции кон држави што вршат економски притисок.„ЕУ треба да биде подготвена да примени целни и пропорционални контрамерки“, порача Валери Хајер, лидерка на центристичката група Renew Europe во Европскиот парламент.Таа истакна дека активирањето на Инструментот против присила мора сериозно да се разгледа, бидејќи токму за вакви случаи на економска закана е создаден.Францускиот претседател Емануел Макрон не даде директна поддршка за ваков чекор, но јасно навести можен одговор, изјавувајќи дека Европа ќе реагира „обединето и координирано“ доколку царините на Трамп навистина стапат на сила.Европскиот парламент веќе најави подготвеност да дејствува, вклучително и преку блокирање на ратификацијата на трговскиот договор меѓу ЕУ и САД. Лидерот на европските конзервативци Манфред Вебер изјави дека „во оваа фаза не е можно“ договорот да добие зелено светло.Сепак, активирањето на Инструментот против присила би претставувало значително порадикален чекор, бидејќи тоа би значело примена на алатка наменета за ривалски држави против најголемиот сојузник на ЕУ.„Убеден сум дека не смееме да попуштиме. Спротивставувањето на нов обид за понижување и вазализација е единствениот начин Европа конечно да се афирмира како геополитички актер“, изјави поранешниот француски дипломат Жереми Галон.И покрај повиците за остар одговор, извозно ориентираните европски економии стравуваат од целосна трговска војна со САД, особено ако се земе предвид дека спорот се води околу Гренланд – остров со околу 57.000 жители, кој уште во 1985 година гласаше за излез од тогашната Европска заедница.Еврокомесарот за трговија Марош Шефчович оцени дека во актуелните услови би било „многу комплицирано“ да се одобри трговски договор со САД, предупредувајќи дека новите американски царини можат да предизвикаат „многу опасна надолна спирала“ која Европа треба по секоја цена да ја избегне.Според извори во Брисел, подготвеноста за конфронтација е значително помала во главните градови на земјите членки отколку во Европскиот парламент.„Амбасадорите имаат сосема поинаков пристап. Ретко Европскиот парламент и Советот се целосно усогласени, особено за прашања како ова“, изјави висок функционер на ЕУ за Politico.Во меѓувреме, европската стратегија за одговор на заканите од Трамп интензивно се обликува. Претседателката на Европската комисија Урсула фон дер Лајен и претседателот на Европскиот совет Антонио Кошта се враќаа од Латинска Америка токму во момент кога прашањето за односите со САД стана централна тема.Се очекува европските лидери да се водат од долгорочните економски и безбедносни интереси на Унијата – зачувување на НАТО, но и паралелно јакнење на европската самостојност во одбраната. Во таа насока, фон дер Лајен минатата недела најави нова безбедносна стратегија за ЕУ, а во наредните денови се очекува и презентирање на планови за зајакнување на кибер-безбедноста.

Свет | пред 2 месеци

Нова ескалација: Европскиот парламент го замрзнува трговскиот договор со САД поради царините и Гренланд

Европскиот парламент нема да го одобри клучниот трговски договор меѓу Европската унија и Соединетите Американски Држави, откако американскиот претседател Доналд Трамп воведе нови царини за европските земји, како дел од неговите притисоци поврзани со Гренланд.Одлуката дека Европскиот парламент нема да продолжи со ратификацијата на договорот, кој минатото лето го потпишаа Трамп и претседателката на Европската комисија Урсула фон дер Лајен, ја доведува во прашање иднината на трговското примирје меѓу Брисел и Вашингтон. Договорот предвидуваше американски царини од 15 проценти за увоз од ЕУ, во замена за тоа Унијата да не воведува давачки за американски производи.Претседателот на Европската народна партија Манфред Вебер соопшти дека ескалацијата на тензиите со САД значи дека Европскиот парламент нема да гласа во корист на пактот. Тој нагласи дека, иако ЕПП во принцип го поддржува договорот, заканите на Трамп во врска со Гренланд ја прават неговата ратификација невозможна во овој момент и дека мерките за нулта царини за американските производи мора да бидат ставени во мирување.Иако останатите политички групи во Европскиот парламент – социјалдемократите, либералите и Зелените – веќе подолго време бараа стратешка пауза во примената на договорот, токму ставот на ЕПП беше клучен за конечната одлука. Гласањето за замрзнување на договорот првично беше закажано за 26 јануари, но се очекува европратениците формално да ја потврдат одлуката на наредната седница.Шведската европратеничка Карин Карлсбро оцени дека не постои реална можност договорот да добие мнозинство, истакнувајќи дека ЕУ мора да се подготви за одговор на царинските напади од САД, вклучително и можни одмазднички мерки. Таа не ја исклучи ниту употребата на таканаречената трговска „базука“ на ЕУ – Инструментот против економска принуда, кој овозможува ограничувања за инвестиции, јавни набавки и заштита на интелектуална сопственост.И други високи претставници во Европскиот парламент побараа Европската комисија да ја разгледа примената на овој инструмент, оценувајќи дека користењето царини и економски закани за остварување територијални барања претставува директна форма на економска присила.Трамп, пак, најави дополнителни царини од 10 проценти за европските земји кои испратиле војници во малиот контингент на Гренланд, со зголемување на 25 проценти од јуни, што ќе важи сè додека, како што рече, не се постигне договор за „целосна купопродажба“ на Гренланд.Европските лидери остро реагираа на ваквите изјави, нагласувајќи дека распоредувањето трупи на Гренланд е одговор на безбедносните предизвици и предупредувајќи дека новите царини ќе добијат заеднички и координиран одговор од Европската унија.

Свет | пред 2 месеци

Белгискиот министер: Не одиме на Гренланд за судир со САД, тоа не е наша цел

Белгија не се приклучила на арктичката мисија под водство на Данска со цел да се спротивстави на Соединетите Американски Држави, изјави белгискиот министер за одбрана Тео Франкен, отфрлајќи ги тврдењата дека засиленото европско воено присуство на Гренланд претставува демонстрација на сила кон Вашингтон.Франкен во телевизиско интервју оцени дека создавањето впечаток оти Европа оди на островот за да се конфронтира со САД е целосно погрешно. Тој нагласи дека таква намера воопшто не постои и дека белгиското учество е строго ограничено и од неборбен карактер.Министерот појасни дека Белгија ќе испрати еден офицер во рамки на извидувачка мисија на Гренланд, која ја предводи Данска, со задача да ги процени логистичките можности, оперативните опции и условите на терен. Според него, станува збор исклучиво за извидувачка мисија, без планови за трајно распоредување или воспоставување борбени позиции.Овој потег доаѓа во период кога Данска, заедно со сè поголем број европски сојузници, на нејзино барање ги засилува воените активности на Гренланд и во неговата околина. Копенхаген соопшти дека целта е зајакнување на безбедноста на Арктикот и подобрување на способностите на сојузниците за дејствување во екстремни услови, а офицери и помали воени одреди од неколку европски земји веќе пристигнале на островот.Распоредувањето се одвива во чувствителна политичка клима, откако американскиот претседател Доналд Трамп во повеќе наврати ја спомена можноста САД да преземат контрола над Гренланд. Тој неодамна изјави дека заземањето на островот би можело да биде опција за Вашингтон, дури и во контекст на односите во рамки на НАТО, при што ги минимизираше и ограничувањата на меѓународното право.Франкен истакна дека европскиот одговор треба да се сфати како порака за уверување, а не за одвраќање. Според него, пораката до Вашингтон е дека европските држави се подготвени да преземат одговорност за безбедноста на Гренланд, поради загриженоста од зголемените руски и кинески активности на Арктикот, и дека тоа сакаат да го сторат во рамки на НАТО, во кој членуваат и САД.Тој заклучи дека целта на распоредувањето не е испраќање порака за воена конфронтација со Американците, нагласувајќи дека никој во Европа не размислува за судир, туку за соработка и стабилност.

Свет | пред 2 месеци

Бенон: Канада може да биде „следната Украина“ поради кинеските амбиции на Арктикот

Американскиот претседател Доналд Трамп се подготвува да му се спротивстави на растечкото кинеско влијание во Канада, како дел од проширувањето на таканаречената „Донро доктрина“ на целата западна хемисфера, изјави неговиот поранешен шеф на кампања и главен стратег во Белата куќа, Стив Бенон.Според Бенон, Канада би можела да стане „следната Украина“ поради, како што тврди, неможноста самостојно да ја брани својата северна арктичка граница и поради засилените кинески интереси во регионот.„Следната голема работа ќе биде Канада. Канада е следната Украина бидејќи не може да ја одбрани својата северна арктичка граница и Кина ќе дојде да загризе. Тие не можат да ја бранат, а Трамп ќе настапи силно кон Канада“, изјави Бенон.За време на првиот мандат на Трамп беше формирана специјална работна група за Арктикот, со што, според поранешни функционери на Белата куќа, претседателот стекнал подлабоко разбирање за геостратешкото значење на регионот, вклучително и на Гренланд. Истите извори наведуваат дека загриженоста во Вашингтон значително пораснала откако Кина во 2018 година самата себе се опиша како „речиси арктичка држава“.Дополнителна вознемиреност кај американската администрација предизвикува и зајакнувањето на односите меѓу Канада и Кина. Канадскиот премиер Марк Карни неодамна ја посети Кина, првпат по речиси една деценија, при што кинескиот претседател Си Џинпинг и Кина ги нарече „стратешки партнери“. Карни изјави дека постигнатиот напредок и партнерството ги подготвуваат двете земји за „новиот светски поредок“.Во исто време, Трамп јавно истакна дека неговиот интерес за Гренланд не е само територијален, туку и дел од поширока стратегија за држење на Русија и Кина подалеку од клучните арктички региони. По неодамнешната американска операција во Венецуела, која заврши со апсење на Николас Мадуро, меѓународната заедница, според аналитичарите, посериозно почна да го сфаќа новото толкување на Монроовата доктрина од страна на Трамп.„Монроовата доктрина беше голема работа, но ние одамна ја надминавме. Сега ја нарекуваат Донро доктрина“, изјави Трамп, нагласувајќи дека според новата стратегија за национална безбедност, американската доминација во западната хемисфера повеќе нема да биде доведена во прашање.Таканаречената „Донро доктрина“ ја проширува класичната Монроова доктрина со цел спречување на какво било позиционирање на воени или стратешки капацитети од страна на не-хемисферни сили, како Русија и Кина, во истата хемисфера со САД. Овој пристап е детално опишан и во Стратегијата за национална безбедност на Белата куќа, објавена во ноември.Републиканците во американскиот Сенат во голема мера ја поддржаа оваа визија. Сенаторот Ерик Шмит од Мисури изјави дека со „Донро доктрината“ Трамп го оживува принципот кој бил темел на американската надворешна политика во најголемиот дел од историјата.„Под водство на Трамп, Америка се однесува како суперсила каква што е – без извинување за политики што ја прават земјата побезбедна и посилна“, порача Шмит.

Свет | пред 2 месеци

САД предупредува на ризици за летови над Мексико и делови од Јужна Америка поради можни воени активности

Американската Федерална управа за авијација (FAA) во петокот издаде предупредување до авиокомпаниите да бидат особено претпазливи при летање над Мексико, земјите од Централна Америка и делови од Јужна Америка, поради ризици од можни воени активности и потенцијални пречки во ГПС-системите.Американската Федерална управа за авијација соопшти дека се издадени официјални известувања за пилотите, кои го опфаќаат воздушниот простор над Мексико, државите од Централна Америка, како и над Еквадор, Колумбија и делови од источниот Пацифик. Предупредувањата стапија на сила во петокот и ќе важат во наредните 60 дена.Оваа мерка доаѓа во период на зголемени тензии меѓу Соединетите Американски Држави и дел од лидерите во регионот, откако администрацијата на претседателот Доналд Трамп започна значително воено засилување во јужниот дел на Карибите, спроведе воена акција против Венецуела и го уапси претседателот на таа земја, Николас Мадуро. Трамп во изминатиот период најави и можност за други воени дејствија во регионот, вклучително и против Колумбија.Американскиот претседател минатата недела изјави дека нарко-картелите фактички управуваат со Мексико и сугерираше дека САД би можеле да изведат удари врз копнени цели за борба против организираниот криминал, што беше дел од серијата закани за употреба на воена сила против картелите.По објавувањето на предупредувањето, мексиканските власти реагираа со појаснување дека станува збор за претпазлива мерка која не воведува никакви ограничувања за мексиканскиот воздушен простор или за националните авиокомпании. Како што наведоа, известувањето се однесува исклучиво на американските оператори, а авио-сообраќајот во Мексико продолжува да се одвива нормално.По претходната воена операција во Венецуела, Американската Федерална управа за авијација веќе воведе ограничувања за летови во поширокиот карипски регион, што доведе до откажување на стотици летови од големите авиокомпании. Американските власти информираа дека пред тие операции имало координација меѓу цивилната авијација и воените структури.Во еден од поновите инциденти, патнички авион на „ЏетБлу“ на пат кон Њујорк бил принуден да преземе избегнувачки маневар за да спречи судир во воздух со авион-цистерна на Американското воздухопловство во близина на Венецуела, откако воениот авион летал без вклучен транспондер.

Свет | пред 2 месеци

Трагедија во САД: Дете пукало во таткото откако му бил одземен „Нинтендо свич“

Единаесетгодишно момче од американската сојузна држава Пенсилванија е обвинето за убиство откако, според истрагата, со огнено оружје го застрелало и усмртило својот татко, револтирано затоа што му била одземена играчката конзола „Нинтендо свич“. Трагедијата се случила на 13 јануари во семејната куќа во населбата Данканон Боро.Полицијата била повикана околу 3:20 часот по полноќ, по пријава за „онесвестен маж“. По пристигнувањето, полициските службеници го пронашле 42-годишниот Даглас Диц без знаци на живот, легнат во кревет со прострелна рана во главата. Тој бил во спалната соба што ја делел со сопругата, а која, според судските документи, била поврзана со собата на детето преку плакар.По спроведената истрага, како осомничен бил идентификуван неговиот 11-годишен син. Според полицискиот извештај, момчето, на кое тој ден му бил роденден, влегло во собата извикувајќи дека татко му е мртов, а пред полицајците и мајката рекло: „Јас го убив тато“.Истражителите утврдиле дека пукањето се случило откако родителите легнале да спијат по полноќ. Детето во изјава навело дека денот го поминале убаво, но се налутило кога таткото му рекол дека е време за спиење. На прашањето што се случило, тој им рекол на полицајците: „Пукав во некого“, додавајќи дека целта му бил токму татко му.Според судските документи, момчето објаснило дека клучот од сефот со оружје го нашло во фиока во родителската спална соба, додека го барало „Нинтендо свич“, кој претходно му бил одземен. Откако го отклучило сефот, внатре пронашло пиштол.Во изјавата до полицијата, детето признало дека го извадило оружјето, ставило куршуми, се доближило до креветот од страната каде што лежел таткото и пукало. На прашањето што мислело дека ќе се случи, одговорило дека било лути и дека не размислувало за последиците.На момчето му е одбиена кауција, а судското рочиште е закажано за 22 јануари. Случајот предизвика силни реакции во американската јавност и повторно го отвори прашањето за безбедноста на оружјето во домовите со деца.

Свет | пред 2 месеци

СДСМ: Одлуката на САД за визите е порака, стануваме земја од „третиот свет“

Социјалдемократскиот сојуз на Македонија (СДСМ) оцени дека одлуката на Соединетите Американски Држави да ја суспендираат обработката на визи за македонските граѓани не претставува „техничка пауза“, туку сериозно предупредување за насоката во која се движи државата.Од партијата наведуваат дека Македонија ја плаќа цената на, како што велат, погрешните политики на премиерот Христијан Мицкоски, кои водат кон затворање, изолација и губење на довербата кај стратешките партнери, при што земјата се доведува во позиција на држава од „третиот свет“.СДСМ ја обвинува Владата дека нејзината надворешна политика е сведена на антиамерикански активности, посочувајќи го вицепремиерот Стоилковиќ како пример за, според нив, отворени проруски ставови и директни врски со Москва.Истовремено, од опозициската партија предупредуваат на, како што ја нарекуваат, агресивна анти-Европска Унија кампања, при што, наместо спроведување реформи, намерно се продуцираат судири со Грција и Бугарија и повторно се отвораат, како што велат, затворени прашања со цел да се оправда изолацијата и да се избегнат вистински решенија.Според СДСМ, мерката на САД е индикатор за реалната позиција на Македонија на меѓународната мапа, оценувајќи дека државата се движи кон сериозна меѓународна маргинализација.Од партијата посочуваат дека ова се само првите чекори и потсетуваат дека САД веќе носат Закон за Западен Балкан, насочен кон борба против криминалот и корупцијата.СДСМ најави дека ќе продолжи, како што велат, јасно, гласно и одговорно да ја разоткрива „опасната агенда“ на власта и да се бори против политиките на изолација, криминал и нарушување на стратешкото партнерство со Соединетите Американски Држави.

Македонија | пред 2 месеци

Трамп се шегуваше за укинување на изборите, Белата куќа ги смирува реакциите

Белата куќа соопшти дека американскиот претседател Доналд Трамп не бил сериозен кога пред неколку дена изјавил дека можеби не треба да има избори за Конгресот.Портпаролката на Трамп, Каролин Ливит, појасни дека претседателот всушност се обидувал да биде хумористичен, а не да го доведе во прашање одржувањето на изборите.„Претседателот се шегуваше“, рече Ливит, одговарајќи на прашања од новинарите. Таа додаде дека Трамп зборувал во контекст на пофалба за работата на неговата администрација, сугерирајќи дека тие „вршат толку добра работа“ што треба само да продолжат.Изјава што предизвика реакцииИзјавата на Трамп дојде за време на получасовното интервју за Ројтерс во Овалната соба на Белата куќа. Разговарајќи за среднорочните избори, претседателот изрази фрустрација од историскиот модел според кој владејачката партија често губи места во Конгресот.„Кога ќе победите на претседателските избори, не ги добивате среднорочните избори“, рече Трамп, додавајќи дека неговата администрација направила толку многу што „кога ќе размислите за тоа, воопшто не треба да имаме избори“.Изјавата предизвика загриженост и критики, бидејќи американскиот устав предвидува одржување избори за Конгресот на секои две години, без можност за претседателска одлука за нивно откажување.Белата куќа се обидува да ја смири ситуацијатаПо реакциите што следеа, Белата куќа истакна дека изјавата на Трамп не била политичка порака или предлог, туку дел од неговиот вообичаен реторички стил. Според Ливит, претседателот сакал да истакне дека неговата администрација ги исполнила очекувањата на гласачите, а не да го доведе во прашање уставниот поредок или да најави промени во изборниот систем.

Свет | пред 2 месеци

Откриени нови детали за убиството на Рене Гуд од страна на агент на Службата за имиграција на САД

Нови полициски и медицински документи откриваат дека Рене Никол Гуд, 37-годишна мајка на три деца, била погодена со најмалку три, а можеби и четири куршуми откако агент на американската Служба за имиграција и царина (ICE) пукал во неа додека била во автомобил во Минеполис. Извештаите на итните служби и транскриптите од повиците на 911 детално ја опишуваат хаотичната ситуација по пукањето и состојбата во која ја затекнала брзата помош.Според извештајот на градската противпожарна служба, брзата помош пристигнала неколку минути по првите повици и ја затекнала Гуд без свест, без здив и со многу слаб, неправилен пулс. Имала крв по лицето и горниот дел од телото. Кога била извадена од автомобилот, пулсот ѝ бил „нееднаков, неправилен и едвај опиплив“.Документите покажуваат дека Гуд имала две прострелни рани на десната страна од градниот кош, една на левата подлактица и можно прострелно повредување на левата страна од главата. Крв излегувала од левото уво. Итните служби веднаш започнале реанимација и продолжиле со обиди за спасување за време на транспортот до болница, но околу 10:30 часот лекарите се откажале од обидите за оживување.Пукањето се случило на 7 јануари во 9:38 часот, додека агентите на ICE биле присутни на терен како дел од федералните имиграциски активности во градот. Од достапните податоци не произлегува дека Гуд била цел на планирана операција или дека против неа се спроведувала конкретна акција.Снимките и сведочењата покажуваат дека повеќе агенти се приближиле до автомобилот Honda Pilot кој го управувала Гуд. Додека седела на возачкото место и се обидувала да се помести, агентот Џонатан Рос пукал повеќе пати преку стаклото на автомобилот.Повиците на 911 започнале веднаш и продолжиле повеќе од еден час. Еден сведок изјавил: „Група агенти на ICE пукале во една жена, од непосредна близина, додека била во автомобилот. Пукале бидејќи не сакала да ги отвори вратите. Сè е снимено.“Друг сведок рекол дека автомобилот по пукањето удрил во паркирано возило. Сведоците исто така навеле дека на местото биле правни набљудувачи кои ја следеле работата на федералните агенти.Еден од повиците на 911 дошол и од лице што се претставило како службеник на Министерството за внатрешна безбедност, кој рекол дека „службениците биле заглавени во возилото“ и дека на местото имало „агитатори“, додека пукало од нивните луѓе.Документите покажуваат дека агентот кој пукал го напуштил местото веќе околу 10:04 и бил превезен во федерална зграда. До тој момент локалните власти не знаеле кој ја води истрагата. Сите агенти на ICE ја напуштиле областа до 11:20, а FBI пристигнал десетина минути подоцна и ја презел истрагата.Федералните власти тврдат дека агентот пукал во самоодбрана, наведувајќи дека Гуд се обидела да повреди или да прегази агенти со автомобилот. Министерството за внатрешна безбедност потврдило дека агентот бил повреден во инцидентот.Овие наводи предизвикале силни реакции во јавноста и повеќедневни протести во Минеполис и други американски градови. Демократски политичари и локални власти побарале повлекување на агентите на ICE од градот, предупредувајќи за прекумерна употреба на сила за време на федералните имиграциски операции.Недела дена по смртта на Рене Гуд, друг федерален агент убил маж од Венецуела за кој властите рекле дека побегнал од сообраќаен надзор и физички нападнал агент, што дополнително ја заострило дебатата за употребата на смртоносна сила од страна на федералните служби.

Свет | пред 2 месеци

Жерновски: Мицкоски ја стави државата на црната листа на САД

Членот на Извршниот одбор на СДСМ, Андреј Жерновски, денеска на прес-конференција остро ги критикуваше политиките на Владата, оценувајќи дека одлуката на Соединетите Американски Држави за суспендирање на обработката на визи за македонските граѓани претставува сериозен политички сигнал и дипломатско предупредување.Жерновски изјави дека премиерот Христијан Мицкоски „го надминал Никола Груевски“ и, како што рече, „за жал ја ставил целата држава на црната листа на САД“. Според него, мерката не може да се третира како техничка пауза, туку како јасна порака дека Вашингтон внимателно ја следи состојбата во земјата и детектира сериозни проблеми.Тој нагласи дека митот за наводно „одлични и специјални односи“ со САД се распаднал, оценувајќи дека Македонија е ставена во ист контекст со земји од т.н. трет свет, што, според него, претставува тежок удар за меѓународниот углед на државата. Жерновски потенцираше дека земјата ја плаќа цената на погрешните политики кои водат кон затворање и изолација, што директно ја зголемува недовербата на граѓаните во институциите.Во своето обраќање, тој посочи дека недостигот од економска перспектива и реформска насока ги тера младите да ја напуштаат државата, бидејќи не гледаат иднина во сопствената земја. Според Жерновски, одлуката на САД е порака дека постои сериозна недоверба во капацитетот на институциите и дека се очекуваат реформи кои, како што рече, Владата не ги спроведува.Жерновски повтори дека СДСМ подолг период предупредува дека политиките на, како што ја нарече, тендерската коалиција ВМРО-ЗНАМ го загрозуваат стратешкото партнерство со САД и процесот на интеграција во Европската Унија. Тој како проблематични ги посочи и надворешнополитичките активности на најблискиот соработник на Мицкоски во Владата, Иван Стоилковиќ, поврзувајќи ги со групи блиски до рускиот претседател Владимир Путин.Дополнително, Жерновски предупреди дека во јавноста сè почесто се појавуваат поранешни дипломати и политички актери блиски до ВМРО-ДПМНЕ кои, како што рече, отворено ги напаѓаат Соединетите Американски Држави и го доведуваат во прашање стратешкото партнерство. Според него, паралелно се води и активна анти-ЕУ кампања, преку намерно продуцирање судири со Грција и Бугарија, со повторно отворање на затворени прашања, со цел да се оправда меѓународната изолација.На крајот, Жерновски оцени дека мерката на САД претставува јасен дипломатски аларм и индикатор за позицијата на Македонија на меѓународната мапа. Тој порача дека СДСМ ќе продолжи, како што рече, јасно и гласно да ја разоткрива „опасната агенда“ на власта и да се спротивставува на политиките кои го загрозуваат стратешкото партнерство со САД и европската иднина на државата.

Македонија | пред 2 месеци

Мицкоски апелира на трпеливост: Следуваат позитивни сигнали од Вашингтон

Премиерот Христијан Мицкоски изјави дека актуелните информации поврзани со визните ограничувања на САД кон Македонија се однесуваат исклучиво на емигрантските визи, а не на туристичките посети или студентските визи, и порача дека во наредните денови очекува позитивни вести за македонските граѓани во односите со Соединетите Американски Држави.Според Мицкоски, нема простор за вознемиреност кај јавноста, бидејќи станува збор за тесно дефинирана категорија визи, која не ги засега граѓаните што патуваат туристички или поради образование. Тој истакна дека комуникацијата со стратешките партнери продолжува и дека очекува разврска која ќе биде во интерес на државата и на граѓаните.Премиерот упати и критика до опозицијата, оценувајќи дека по претходните реакции и критики поврзани со Обединетото Кралство, сега неоправдано се отвораат и прашања за односите со САД.Тој нагласи дека Владата останува посветена на зачувување и унапредување на односите со стратешките партнери и повтори дека очекува „многу добри вести“ за македонските граѓани во блиска иднина.

Македонија | пред 2 месеци

Левица: „Запирање на имигрантските визи од САД - стратешки шамар за домашните вазали“ 

Партијата Левица ја обвини Владата дека со својот, како што наведуваат, вазалски однос кон САД директно придонела за одлуката да се запре постапката за издавање имигрантски визи за македонските граѓани.Во соопштението, партијата тврди дека актуелната власт со години градела илузија за наводно „стратешко партнерство“ со Вашингтон, но дека реалноста покажала отсуство на каква било вистинска поддршка. Според Левица, надворешната политика на Владата се свела на симболични средби и фотографии со американски функционери без влијание врз клучните одлуки.Партијата потсетува дека на запирањето на визите му претходело воведување трговски маржи и царини од страна на САД, по што Владата, како што се наведува, „во немоќ и коленичење“ одлучила целосно да ги укине царините кон американските производи.Левица ја критикува и серијата надворешнополитички потези на власта – гласањето против укинувањето на санкциите кон Куба, поддршката на американските резолуции за Украина и ставовите околу Венецуела – оценувајќи дека тие го нарушуваат угледот на Македонија без да донесат каква било корист.„Мицкоски и Муцунски не можат да научат дека вазалскиот однос кон САД не е и не може да биде стратешко партнерство“, се наведува во соопштението.Според Левица, ваквата политика ја внесува државата во „стратешки ќорсокак“, а излезот го гледаат во промена на надворешнополитичкиот курс и отворање кон други глобални партнери. Партијата заклучува дека актуелната власт нема капацитет за таков пресврт и дека последиците ги трпат граѓаните.

Македонија | пред 2 месеци

Белата куќа потврди дека САД се насочуваат кон Гренланд: „Нема врска што таму има европски војници“

Гласноговорничката на Белата куќа, Каролин Левит, изјави дека претседателот на САД, Доналд Трамп, јасно истакнал дека сака Соединетите Американски Држави да ја „преземат“ контролата над Гренланд, додавајќи дека присуството на европски сили на оваа територија нема да влијае врз неговата одлука.Левит изјави дека разговорите помеѓу министрите за надворешни работи на Данска и Гренланд со американскиот потпретседател Џ.Д. Венс и државниот секретар Марк Рубио биле „продуктивни“.„Беше добар состанок. Двете страни се согласија да формираат работна група која ќе продолжи со техничките разговори за преземањето на Гренланд“, изјави Левит. Таа додаде дека овие разговори треба да се одржуваат на секои две до три недели.„Ова е дијалог кој администрацијата има намера да го продолжи со Данците и со делегацијата од Гренланд“, рече Левит.Таа нагласи дека претседателот многу јасно го поставил својот приоритет: „Тој сака Соединетите Американски Држави да го преземат Гренланд, бидејќи смета дека тоа е најдоброто решение за националната безбедност.“Левит посочи дека испраќањето европски сили на Гренланд нема да го промени ставот на Трамп за преземање на оваа територија.Претходно беше објавено дека сили од Франција, Германија, Обединетото Кралство, Холандија, Норвешка и Шведска се упатиле кон Гренланд. Данска соопшти дека операцијата „ќе ја зајакне нашата способност за делување во регионот“, додека Трамп претходно тврдел дека само американската контрола може да го заштити арктичкиот регион од Русија и Кина.Неколку часа пред изјавите на Левит, министрите за надворешни работи на Гренланд и Данска одржаа разговори со Венс и Рубио, но по состанокот посочија дека и понатаму постои „темелна несогласност“ околу иднината на оваа данска територија.

Свет | пред 2 месеци

Нов инцидент со Службата за имиграција во САД: Агент застрелал маж, откако бил нападнат со лопата

Федерален агент во Минеаполис пукал во ногата на маж откако бил нападнат со лопата за време на обид за апсење, соопшти Министерството за домашна безбедност на САД (DHS). Инцидентот дополнително ги зголеми тензиите во градот, кои се веќе високи по смртта на жена застрелана од агент на Службата за имиграција и царина (ICE) минатата недела, настан што предизвика протести низ целата земја, објави Би-Би-Си.Според DHS, на пукањето му претходела автомобилска потера по државјанин на Венецуела кој нелегално престојувал во земјата. Потерата завршила со сообраќајна несреќа, по што на осомничениот му се придружиле уште две лица и заедно го нападнале службеникот. Повредениот маж бил пренесен во болница со повреди кои не се животозагрозувачки, додека медицинска помош добил и агентот на ICE.Во соопштението се наведува дека за време на физичката пресметка на земја, од близок стан излегле уште две лица кои го нападнале службеникот со лопата за снег и со дршка од метла. Додека агентот бил нападнат од повеќе лица, првичниот осомничен успеал да се ослободи и повторно да го нападне. Стравувајќи за сопствениот живот, службеникот испукал одбранбени истрели. Двајца од напаѓачите биле приведени.Според информации објавени од Си-Би-Ес њуз, ранетиот маж по пукањето се забарикадирал во куќа заедно со уште три лица. Специјализиран тим на ICE упаднал во објектот и ги привел сите затекнати лица. ФБИ отвори истрага за случајот, а дел од деталите сè уште не се независно потврдени.По инцидентот избувнаа нови судири меѓу демонстрантите и полицијата во населбата Хоторн. Шефот на полицијата, Брајан О’Хара, изјави дека полицајците биле гаѓани со пиротехника, мраз и снежни грутки. Локалните медиуми јавија и за оштетени возила за кои се верува дека припаѓаат на федерални агенции.Градските власти на Минеаполис повикаа на смирување на состојбата, истовремено повторувајќи го барањето ICE веднаш да го напушти градот и државата. Градоначалникот Џејкоб Фреј оцени дека состојбата е „неодржлива“ поради присуството на федерални агенти спротивно на волјата на локалните власти.Американскиот претседател Доналд Трамп, пак, се закани со повикување на Законот за побуна доколку локалните власти не преземат мерки за запирање на, како што ги нарече, „професионалните агитатори“. Од друга страна, гувернерот на Минесота, Тим Волц, побара прекин на, како што рече, „окупацијата“ од страна на ICE, нагласувајќи дека гневот во јавноста е оправдан.Тензиите во Минеаполис траат од 7 јануари, кога агент на ICE ја уби 37-годишната Рене Никол Гуд. Случајот, како и најновиот инцидент, е предмет на истрага од страна на ФБИ.

Свет | пред 2 месеци

„Власта „најде решение“ за младите да останат во Македонија - со суспендирани визи за САД“: Жерновски со саркасточен стил упати критики до власта

Поранешниот амбасадор на Македонија во Романија и поранешен заменик-министер за надворешни работи, Андреј Жерновски, остро ја критикува владината политика по одлуката на САД за суспендирање на имигрантските визи, оценувајќи дека таа е директна последица на лоша дипломатија и лажно прикажани „специјални односи“ со Вашингтон. Според него, наместо со подобри услови за живот, младите се „задржуваат“ во државата преку рестрикции и меѓународна изолација, што претставува пораз за надворешната политика и сериозен удар врз перспективата на земјата.НЕМА ВИЗА НИ ЗА ПЕРИМЕТАРОТБраво за Мицкоски!Конечно најде „стратегија“ како да ги задржи младите во Македонија – така што САД нема да им даваат визи.Не со подобри плати, не со квалитетно образование, не со сигурни институции, туку со меѓународни рестрикции.Од една страна, владата зборува дека ќе направи сè младите да останат дома. Од друга страна, под нејзино водство, Македонија завршува на листа на земји за кои САД ја суспендираат имигрантската политика. Ако ова е планот – тогаш навистина функционира: не заминуваш затоа што сакаш, туку затоа што не можеш.Ова не е политика за младите, туку политика на затворање. Наместо да создаде услови поради кои младите би избрале да останат, власта создава услови поради кои светот им ги затвора вратите.Мицкоски ветува иднина во Македонија, а испорачува изолација.Ветува надеж, а носи рестрикции.Ветува перспектива, а добивме повик за будење од реалноста.Неговите „одлични, специјални односи“ со САД и со Трамп се толку одлични, што реалноста ни донесе повисоки царини за македонските производи и суспендирани визи за македонските граѓани.Мицкоски веќе втора година нè убедува дека е „во периметарот на Трамп“, па затоа сето ова е резултат на лажно прикажаните односи и слабата дипломатија.Погубно е вината да ја бараме во САД, бидејќи проблемот лежи во митот за „прв другар со Трамп“, кој мит е креиран и постои само во домашната пропаганда. Затоа, ова не е проблем на Вашингтон, туку на неспособната и саморекламерска надворешна политика, која повеќе служи за па-ар стратегија, отколку за заштита на интересите на македонските граѓани.Вистинската опозиција денес има обврска да го каже ова јасно:додека Мицкоски зборува за пријателства, Македонија плаќа цена.А тоа е најсилниот доказ дека „специјалните односи“ постојат само во неговите изјави – не и во реалниот свет, пишува Жерновски.

Македонија | пред 2 месеци

Османи: Стратешкиот дијалог со САД е клучен за безвизен режим

Поранешниот министер за надворешни работи Бујар Османи денеска се осврна на развојот на Стратешкиот дијалог меѓу Северна Македонија и САД, потенцирајќи дека процесот, започнат во 2022 година, отвори пат за продлабочена политичка, безбедносна и институционална соработка, како и за чекори кон олеснет визен режим и безвизно патување за македонските граѓани.Пред неполни четири години, со посета на Вашингтон на 2 јуни 2022 година, започна Стратешкиот дијалог меѓу Република Северна Македонија и САД како надградба на Стратешкото партнерство од 2008 година. Тоа го отвори патот за висок политички дијалог, но и за длабока меѓуресорска и меѓуинституционална соработка меѓу двете земји.Една година подоцна, во јуни 2023 година, Владата го усвои десетгодишниот план за активности во рамките на стратешкиот дијалог со период на реализација од 2023-2033 година, кој претходно беше усогласен (no objection) и со Стејт департментот на САД. МНР беше задолжена институција за следење на реализацијата на овој план, преку хоризонтална координација на останатите ресори и институции.Во рамките на Стратешкиот дијалог, во текот на следната 2024 година, беа започнати активности за приклучување на земјата кон „Global Entry“ програмата на САД., со која требаше да се обезбеди непречен влез во САД на државјани на Северна Македонија со американска виза без спроведување на вообичаените безбедносни и царински проверки на граничните премини.Во една подолгорочна процедура, во Стратешкиот дијалог беа предвидени и во соработка со МВР и другите безбедносни служби, беа започнати активности за усогласување на земјава со безбедносните системи на САД, со цел постигнување на критериумите за влез во т.н. Visa Waiver програмата на САД, која во еден подолг процес на крајот треба да резултира со воведување на безвизен режим меѓу двете земји, пишува Османи.

Македонија | пред 2 месеци

Муцунски за запирањето на визите за САД: Студентските, бизнис и туристичките визи не се засегнати

Одлуката на Соединетите Американски Држави за привремено запирање на одредени визни постапки не значи ограничување за македонските граѓани кои патуваат поради образование, бизнис или туризам, туку се однесува исклучиво на имигрантските визи, изјави министерот за надворешни работи и надворешна трговија Тимчо Муцунски.По средбата со раководството на МАСИТ, Муцунски одговараше на новинарски прашања поврзани со одлуката на Стејт департмент за привремена суспензија на постапките за имигрантски визи за околу 75 земји, меѓу кои и Северна Македонија.Министерот нагласи дека во јавноста погрешно се создава впечаток дека станува збор за поширока забрана. „Не станува збор за никаква црна листа, ниту за прекин на визниот режим во целина. Станува збор за привремена суспензија само на имигрантските визи, што не ги засега другите категории“, рече Муцунски.Тој појасни дека македонските граѓани и понатаму можат непречено да аплицираат за визи за студии, деловни активности, туризам или други краткорочни престои во САД. „Доколку сте бизнисмен, студент или турист, аплицирањето за виза се одвива без никаква промена“, истакна министерот.Муцунски информираше дека институциите се во постојана комуникација со Амбасадата на САД во Скопје, како и преку македонската амбасада во Вашингтон со американските власти. Според информациите што ги добиле, имигрантските визи претставуваат најмал дел од апликациите од македонски државјани, а најчесто се однесуваат на лица од повозрасната популација.Тој додаде дека фокусот на државата во однос на визната политика е насочен кон категории што придонесуваат за економски и општествен развој. „Наш приоритет се визите за бизнис, наука, студенти и туризам. Во тој сегмент нема никаква промена“, рече Муцунски.Министерот направи паралела со претходните реакции околу царинските тарифи, оценувајќи дека и тогаш, според него, имало избрзани и неосновани критики. „Кога беа објавени тарифите, слушавме дека сме меѓу најлошо третираните земји. Подоцна се покажа дека за клучните индустрии договоривме едни од најповолните услови, но тогаш критиките стивнаа“, изјави тој.Муцунски изрази уверување дека во наредниот период ќе следуваат позитивни поместувања и во визната политика. „Во следните неколку месеци очекувам конкретни решенија за прашања што се отвораат со децении. Имаме одлична соработка со нашиот стратешки партнер и верувам дека тоа ќе даде резултати“, рече министерот.Тој повтори дека актуелната одлука на САД нема практично влијание врз најголемиот дел од граѓаните и дека приоритетите на земјата – бизнисот, науката, туризмот и студентите – остануваат целосно незасегнати.

Македонија | пред 2 месеци

Суспендирани визи од САД - Мицкоски ја доведе Македонија во ранг со Сомалија, вели Фрчкоски

Членот на Извршниот одбор на СДСМ, Јон Фрчкоски, денеска остро реагираше на одлуката на Соединетите Американски Држави да ја опфатат Македонија со мерката за суспендирање на обработката на визи, оценувајќи дека ваквиот чекор ја става државата во ист ранг со земји како Сомалија и Сирија.Според Фрчкоски, одлуката на САД, со која Македонија се најде на листата на уште 75 држави за кои привремено се суспендира обработката на визи, е директна последица на, како што ги нарече, погрешните политики на актуелната власт и „периметарот на Христијан Мицкоски“. Тој потсети дека минатата година САД ги зголемиле царините кон Македонија, а сега, од 21 јануари, следува и суспензија на визната обработка, што според него претставува сериозен дипломатски сигнал.Фрчкоски нагласи дека СДСМ подолг период предупредува на штетните последици од политиките на, како што ја нарече, тендерската коалиција ВМРО-ЗНАМ, кои, според него, го загрозуваат стратешкото партнерство со САД и европската интеграција на државата. Во тој контекст, тој го посочи Иван Стоилковиќ како еден од најблиските соработници на Мицкоски во Владата, обвинувајќи го за отворени проруски ставови и директни врски со Москва.Како дополнителен аргумент, Фрчкоски наведе дека пред неколку дена Стоилковиќ бил виден на прослава со припадници на групата „Ноќни волци“, која важи за блиска до рускиот претседател Владимир Путин. Според него, ваквите активности се во директна спротивност со интересите на државата и со нејзините стратешки сојузништва.Паралелно со, како што рече, антиамериканските активности, Фрчкоски ја обвини Владата и за водење анти-ЕУ кампања, преку намерно отворање судири со Грција и Бугарија, повторно активирање затворени прашања и создавање изговори за блокирање на преговорите со Европската Унија. Според него, ваквото однесување има за цел да ја оправда изолацијата на државата и отсуството на суштински реформи.Фрчкоски предупреди дека САД веќе најавиле носење специјален закон за Западен Балкан, насочен кон борбата против криминалот и корупцијата, оценувајќи дека актуелните мерки се само првите чекори. Тој најави дека можно е следување на т.н. црни листи и воведување дополнителни санкции.На крајот, Фрчкоски порача дека СДСМ ќе продолжи да ја, како што рече, разоткрива оваа агенда, потенцирајќи дека стратешки партнери на Македонија се САД, а единственото место на државата е во НАТО и Европската Унија.

Свет | пред 2 месеци

СДСМ: Поради политиките на Мицкоски, САД ја ставаат Македонија во иста група со Сомалија

Социјалдемократскиот сојуз на Македонија денеска ја обвини власта на Христијан Мицкоски и ВМРО-ДПМНЕ дека ја довеле државата до сериозно влошување на меѓународната позиција, откако Соединетите Американски Држави донеле одлука за суспендирање на обработката на визи за македонските државјани.Според соопштението на СДСМ, Македонија е опфатена со одлуката заедно со уште 75 земји, меѓу кои се наведуваат Сомалија, Сирија, Гана, Руанда, Бутан, Нигерија, Иран и Русија.СДСМ потсетува дека ова, според нив, е продолжение на негативните чекори од страна на САД кон Македонија, наведувајќи дека минатата година биле зголемени царините за македонските производи, а сега следува и ограничување на визниот режим.Од опозициската партија директно ја посочуваат владата предводена од Мицкоски како одговорна за состојбата, оценувајќи дека со своите политики ја довела Македонија во ист ранг со земји со сериозни безбедносни и институционални проблеми.„Толку е периметарот на Мицкоски – ја доведе Македонија во ранг со Сомалија“, се наведува во соопштението на СДСМ.

Македонија | пред 2 месеци

Данска по состанокот со САД: „Не се согласуваме“ – земјите од ЕУ испраќаат војници во Гренланд

Соединетите Американски Држави, Данска и Гренланд ниту по денешниот состанок во Вашингтон не се приближија до договор за иднината на Гренланд. Данскиот министер за надворешни работи, Ларс Локе Расмусен, изјави дека и натаму постои, како што рече, „темелно несогласување“ со администрацијата на американскиот претседател Доналд Трамп, која се залага за американска контрола врз овој автономен териториј во состав на Кралството Данска.Состанокот беше одржан со американскиот потпретседател Џеј Ди Венс и државниот секретар Марко Рубио, откако Трамп изјави дека „сè помалку од американска контрола над Гренланд е неприфатливо“.По разговорите, Расмусен рече дека тој и претставниците на Гренланд со Венс и Рубио воделе „искрена, но конструктивна расправа“, но дека ставовите и понатаму суштински се разликуваат.„Претседателот јасно го изнесе својот став, а ние имаме поинаква позиција“, изјави Расмусен на прес-конференција во Вашингтон. Тој нагласи дека Данска смета оти долгорочната безбедност на Гренланд може да се обезбеди во рамки на постојниот политички и уставен поредок.„Идеите што не би го почитувале територијалниот интегритет на Кралството Данска и правото на гренландскиот народ на самоопределување се целосно неприфатливи“, порача тој.Расмусен додаде дека е договорено формирање работна група на високо ниво, која треба да се обиде да најде заеднички пат напред, иако, како што истакна, „темелното несогласување останува“. Првиот состанок на оваа група се очекува во наредните недели.Шведска и Германија испраќаат војнициПаралелно со дипломатските разговори, Данска и нејзините сојузници го зајакнуваат военото присуство на Гренланд поради, како што наведуваат, влошените безбедносни услови на Арктикот.Шведска денеска, на барање на Данска, испрати неодреден број војници на Гренланд. Шведскиот премиер Улф Кристерсон соопшти дека шведските офицери ќе бидат дел од поширока група сојузнички сили кои ќе учествуваат во подготовките за претстојната воена вежба „Operation Arctic Endurance“.Германското Министерство за одбрана објави дека Германија во четврток испраќа извиднички тим од 13 припадници на Бундесверот во Нук. Станува збор за тридневна мисија, од 15 до 17 јануари, чија цел е проценка на условите за можни идни воени придонеси за безбедноста на регионот, вклучително и надзорот на поморскиот простор. Германските војници доаѓаат на покана на Данска и во соработка со други европски земји.Данското Министерство за одбрана претходно потврди дека го зголемува военото присуство на Гренланд поради „безбедносни тензии“, додека расправата со САД за иднината на територијата продолжува без приближување на ставовите.„Се согласуваме дека не се согласуваме, но ќе продолжиме да разговараме“, заклучи Расмусен, истакнувајќи дека Данска нема да отстапи од црвените линии кои вклучуваат почитување на територијалниот интегритет и правото на гренландскиот народ на самоопределување.

Свет | пред 2 месеци

САД го замрзнуваат издавањето имигрантски визи и за Македонија

САД привремено го запираат процесирањето на имигрантски визи за државјани од вкупно 75 земји, меѓу кои и Македонија, јавува „Фокс њуз“, повикувајќи се на интерен меморандум на американскиот Стејт департмент.Според документот, конзуларните службеници добиле насока да ги одбиваат апликациите за имигрантски визи согласно постојниот закон, додека трае преоценка на процедурите за проверка и селекција на апликантите. Паузата ќе започне на 21 јануари и ќе трае на неопределено време, сè додека американските власти не ја завршат ревизијата на целиот систем за издавање имигрантски визи.Како причина за мерката се наведува намерата да се спречи влез на лица за кои се проценува дека би можеле да станат товар за американскиот социјален систем, односно да зависат од државна помош. Во тој контекст, повторно ќе се применува т.н. одредба за „јавен товар“, која им овозможува на конзуларните службеници да одбијат виза врз основа на проценка дека апликантот веројатно ќе користи јавни средства.Проценката, според упатствата, ќе се врши врз широка лепеза критериуми, меѓу кои се возраста, здравствената состојба, финансиската стабилност, познавањето на англискиот јазик, како и можната потреба од долготрајна медицинска нега. Меѓу факторите што може да влијаат негативно се наведуваат и претходно користење на парична социјална помош или институционална грижа.Од Стејт департментот појаснуваат дека исклучоци од оваа мерка ќе има „во многу ограничени случаи“ и само откако апликантите ќе ја поминат проценката за ризик од станување јавен товар.За македонските граѓани ова значи дека апликациите за имигрантска виза кон САД ќе бидат ставени во мирување, без јасна временска рамка кога постапката би можела повторно да продолжи. Во листата на опфатени држави, покрај Македонија, се наоѓаат и земји од регионот и пошироко, како Косово, Црна Гора, Босна и Херцеговина, Србија, Албанија, но и Русија, Иран, Ирак, Египет, Нигерија и други.Американските медиуми потсетуваат дека одредбата за „јавен товар“ постои со децении, но нејзината примена варирала во зависност од администрацијата. Таа беше значително проширена во времето на Доналд Трамп, потоа делумно укината, а сега повторно се активира во построга форма, со што директно се засегаат и апликантите од Македонија кои планирале трајно иселување во САД.

Свет | пред 2 месеци

САД стопираат издавање визи за државјани од 75 земји

Администрацијата на американскиот претседател Доналд Трамп од 21 јануари ја запира обработката на визи за посетители од вкупно 75 земји, објави „Фокс њуз“, повикувајќи се на интерен допис на американскиот Стејт департмент.Според информациите, меѓу земјите за кои ќе се применува оваа мерка се Сомалија, Русија, Иран, Авганистан, Бразил, Нигерија и Тајланд. Со дописот, американските дипломатски претставништва добиле насока привремено да ги одбиваат апликациите за визи во согласност со постојните законски одредби, сè додека Стејт департментот не изврши анализа и ревизија на актуелните правила.Одлуката се вклопува во строгата имиграциска политика што Трамп ја спроведува од стапувањето на функцијата, со фокус на ограничување на влезот во САД од земји кои администрацијата ги оценува како безбедносен ризик.Во ноември минатата година, Трамп најави дека ќе се залага за „трајно запирање“ на миграциите од, како што ги нарече, земји од „третиот свет“, по инцидентот во кој авганистански државјанин отвори оган во близина на Белата куќа и усмрти припадник на Националната гарда.Истовремено, потсетува „Фокс њуз“, дел од авганистанските државјани кои аплицирале за азил во САД по 2021 година добиле специјални имигрантски визи, наменети за лица кои соработувале со американската армија за време на дваесетгодишната воена мисија во Авганистан.

Свет | пред 2 месеци