Најнови вести

3 нед.

Трамп конечно откри: Ќе има ли напад врз Гренланд?

Претседателот на САД, Доналд Трамп, обраќајќи се на Светскиот економски форум во Давос, изјави дека „ниедна држава или група држави, освен Соединетите Американски Држави, не е во позиција да го обезбеди Гренланд“, но нагласи дека нема да употреби сила.„Секој сојузник во НАТО има обврска да биде способен да ја брани сопствената територија. Факт е дека ниту една држава, ниту група држави, освен САД, не е во позиција да го заштити Гренланд. Ние сме голема сила, многу поголема отколку што луѓето сфаќаат“, рече Трамп.Тој ја критикуваше Данска, оценувајќи ја како „незахвална“ поради тоа што одбива да се откаже од контролата врз Гренланд, тврдејќи дека таа ѝ должи благодарност на Америка за одбраната во Втората светска војна.„Данска падна во рацете на Германија по само шест часа борба и беше целосно неспособна да се брани, ниту себеси, ниту Гренланд. САД беа приморани да интервенираат и тоа го направивме. Да не бевме ние, денес ќе зборувавте германски и јапонски. По војната им го вративме Гренланд – колку глупаво од наша страна. А денес гледаме колку се неблагодарни“, изјави Трамп.Сепак, тој јасно порача дека нема да се послужи со сила.„Веројатно ништо нема да добиеме, освен ако не одлучам да употребам огромна моќ, со која, искрено, би биле незапирливи. Но, тоа нема да го направам. Не морам и не сакам да користам сила. Нема да употребам сила“, нагласи американскиот претседател.Трамп додаде дека целта на САД е стекнување сопственост врз Гренланд, бидејќи, како што рече, „без сопственост не можете да го браните – не можете да го браните со закуп“.

Свет | пред 3 седмици

3 нед.

Николоски објави видео: Патиштата проодни, снегот ѝ дава убавина на Македонија

Сите државни патишта се проодни низ цела Македонија, напиша вицепремиерот Николоски и објави видео на својот фејсбук профил.„Благодарам за силниот ангажман на вработените во Македонија пат.А, снегот дава дополнителна убавина на нашата Македонија“, напиша Николовски

Македонија | пред 3 седмици

3 нед.

Мециновиќ до Божиновска: Колкав е долгот на ЕСМ и дали се подготвувате да го приватизирате?

Амар Мециновиќ, пратеникот од Левица, денес на собраниската седница за прашања од опозицијата упати пратеничко прашање до министерката за енергетика, Сања Божиновска, со кое побара јасен одговор за состојбата со државната компанија ЕСМ и нејзиниот рекорден долг.„Колку е точниот долг на ЕСМ? Пред една година зборувавме за 183 милиони евра, а денес зборуваме за 250 милиони евра долг. Што направивте вие во изминатата година, за да го спречите ова зголемување?“, праша Мециновиќ.Во своето излагање Мециновиќ потсети дека министерката и самата признала дека долгот е резултат на погрешно водени политики и лошо управување, но оцени дека и покрај признанието и фактот што за прв пат има Министерство за енергетика нема конкретни резултати. „Дали ова зголемување на долгот значи дека спроведувате контролиран крах на ЕСМ? Дали планирате да го приватизирате ЕСМ? Бидејќи ова се легитимни прашањата кои се поставуваат кога доаѓаме во историски највисок долг на нашиот јавен, нашиот државен капацитет“, истакна пратеникот.Мециновиќ упати и критика за молкот на министерката за енергетика при секое ново покачување на струјата и нагласи дека јавноста добива информации единствено од претседателот на РКЕ, Бислимовски. „Зошто имаме министерка за енергетика, кога Бислимовски излегува и ни вели дека ќе имаме покачувања на струја и вие не давате никаков коментар? Дали е Бислимовски министер за енергетика или сите институции во овој сектор се портпароли на ЕВН, бидејќи само ЕВН добива од оваа ситуација во која се наоѓаме и никој друг“, рече Мециновиќ.Тој посочи и дека Владата под превезот на либерализација создава систем во кој државните капацитети се уништуваат, а приватните се зајакнуваат и им се дава предност. „Либерализацијата кај нас не донесе конкуренција. Кога зборуваме за либерализација граѓаните можеби мислат дека ќе дојдат нови инвестиции од други држави. Не, тоа се братучедите на политичарите. Либерализација, значи фирми за братучеди и роднини и така натаму“, нагласи тој.Мециновиќ потсети и дека пратеничката група на Левица поднела и предлог – закон за укинување на Регулаторната комисија за енергетика со цел, како што рече, „политичката одговорност да се врати таму каде што припаѓа, во Министерството за енергетика“. „Оспособете го ЕСМ. Направете го способно да му конкурира на ЕВН Хоум: Само така може да има социјално прифатлива цена на струјата. Граѓаните веќе не можат да ја издржат енергетската сиромаштија“, порача Мециновиќ.На крај, Мециновиќ заклучи дека за прв пат државата има Министерство за енергетика и дека повеќе нема простор за префрлање вина. „По година и пол мандат време е за резултати, а не за изговори“.

Македонија | пред 3 седмици

3 нед.

Трамп: Ја сакам Европа, но таа не оди во добар правец

Претседателот на Соединетите Американски Држави, Доналд Трамп, денеска во Давос изјави дека САД се светскиот економски мотор и дека пред само една година, под водство на „радикалната левица“, земјата била „мртва“.„Нашата економија цвета, инвестициите растат, инфлацијата е поразена, границите се затворени и непробојни, а САД се во средината на најбрзиот економски пресврт во историјата“, рече Трамп во своето обраќање.На почетокот на говорот тој потсети дека вчера се одбележала една година од неговиот втор мандат во Белата куќа и дека за тоа време се случиле големи промени. Според него, САД бележат неверојатен економски раст, каков што земјата досега немала.„Верувам дека наскоро ќе видите раст каков што ниту една земја досега не го видела“, истакна Трамп.Тој додаде дека граѓаните се задоволни од неговото владеење, дека се обезбедени бројни нови инвестиции и дека за четири години биле обезбедени 18 билиони долари инвестиции. „Бевме мртва земја, а сега сме најдобрата земја во светот. САД ќе растат трипати побрзо од прогнозите на ММФ“, рече американскиот претседател.„Го подигнуваме животниот стандард на граѓаните на многу повисоко ниво. Луѓето што доаѓаат кај нас можат многу да научат. Европа во одредени делови изгледа непрепознатливо, и тоа не во добар контекст. Ја сакам Европа и сакам да се развива“, изјави Трамп.Тој нагласи дека кога Америка паѓа, паѓаат сите, но и дека сега промените се случуваат многу брзо. „Денеска сакав да зборувам за тоа како ќе ги подигнеме економските стандарди и како, ако нè следите, во иднина нема да се препознаете“, додаде тој.„Ја сакам Европа и сакам да напредува, но таа не оди во добар правец. Во последната деценија и нашата и вашата економија потрошија премногу на непотребни инвестиции и мигранти“, рече Трамп, додавајќи дека се увезува население од далечни земји, што според него создава сериозни проблеми и големи трговски дефицити.Трамп истакна дека САД го намалиле дефицитот за 28 отсто за една година и дека инфлацијата е намалена во однос на периодот на администрацијата на Бајден.Според Трамп, трговскиот дефицит е намален за 77 отсто, домашното производство на челик пораснало за 300 отсто и низ земјата се градат нови челичарници. Тој додаде дека производството на нафта значително се зголемило и дека САД произведуваат повеќе енергија од Кина.Говорејќи за Венецуела, Трамп изјави дека земјата во наредните шест месеци ќе заработи повеќе отколку за цела година. „Тие беа одлична земја, сега имаат проблеми и ние им помагаме. Ќе заработуваат повеќе пари од кога било“, рече американскиот претседател.

Свет | пред 3 седмици

3 нед.

Мицкоски: Над 100 милиони евра инвестиција за третиот мобилен оператор

Премиерот Христијан Мицкоски информираше дека остварил средба со сопственикот на компанијата „Фор-ај-џи“ (4iG), која ја доби дозволата за трет мобилен оператор во Македонија, при што биле разгледани плановите за идниот развој на телекомуникацискиот пазар.„Она што тој ме информираше е фактот дека во следниот период ќе инвестира повеќе од 100 милиони евра во развој на третиот мобилен оператор“, изјави Мицкоски, посочувајќи дека компанијата веќе ги уплатила средствата потребни за добивање на лиценцата.Според премиерот, новиот оператор ќе донесе директни придобивки за граѓаните. „Граѓаните добиваат нова компанија која ќе нуди мобилни услуги и која, сигурен сум, ќе влијае позитивно врз намалувањето на цените на услугите кои мобилните оператори ги нудат во Македонија“, нагласи тој.Во рамки на престојот во Давос, Мицкоски учествувал и на панел со светски лидери и претставници на мултинационални компании, каде што се разговарало за идните глобални предизвици, меѓу кои и вештачката интелигенција.„За сериозна примена на вештачката интелигенција потребни се сигурна енергетска стабилност и ИТ инженери кои ќе ја користат таа технологија за потребите на општеството и граѓаните“, истакна премиерот.Тој порача дека Македонија нема да остане надвор од овие процеси. „Македонија нема да седи на страна, туку ќе биде активен учесник во сите процеси кои ќе го обликуваат развојот во следните децении“, додаде Мицкоски.Премиерот најави дека престојот во Давос продолжува со бројни билатерални средби и во текот на наредните денови.

Македонија | пред 3 седмици

3 нед.

МВР алармира за нова сајбер измама со злоупотреба на името на директорот на БЈБ

Во МВР пристигнуваат пријави од граѓани за добиенa електронска порака наводно во име на директорот на Бирото за јавна безбедност Александар Јанев, во која се даваат насоки за 24 часа да се оди до полициска станица или да се испрати повратен емаил бидејќи наводно примачот на пораката е предмет на кривични истраги за низа измислени кривични дела, кои ги нема сторено, како детска порнографија, педофилија и трговија со дрога. Целта е примачот на пораката да се регистрира преку мејл и да ги даде неговите лични податоци.„МВР ги известува граѓаните дека станува збор за лажна порака која не е испратена од страна на БЈБ – МВР ниту од одделението за сајбер криминал и безбедност. Овие електронски пораки се класичен обид за измама во кој целта на измамниците е да дојдат до личните податоци на граѓаните со цел нивна понатамошна злоупотреба. Покани до граѓаните за истражни постапки од страна на МВР не се испраќаат преку маил и доколку внимателно се прочитаат овие пораки може веднаш да се забележат грешки во текстот во однос на тоа дека е направен со лош превод на интернет со тоа и смислата на содржината на пораката насочува дека е сомнителна поточно измама.Aпелираме на посебно внимание, овие пораки да не се отвораат, да не се контактира испраќачот и никако да не се споделуваат личните податоци кои ги бараат измамниците. Исто така, предупредуваме да не отворате линкови и датотеки кои се испратени во прилог на било која електронска порака која доаѓа од непознат испраќач, со цел заштита на вашиот компјутерски систем од малициозен софтвер“, стои во соопштението од МВР/

Македонија | пред 3 седмици

3 нед.

Почина Милена, инспирацијата за легендарната „Моја Милена“ на „Нови фосили“

Почина Милена, жената која беше инспирација за легендарната песна „Моја Милена“ на групата „Нови фосили“. Малкумина од постарите генерации не ја препознаваат оваа безвременска југословенска нумера, а помалку е познато дека таа е посветена на Милена од Неготино.Авторот на музиката, Рајко Дујмиќ, ја запознал Милена за време на летување во Херцег Нови. Како што раскажал подоцна, цела ноќ разговарале без престан, а таа работела како социјална работничка во Неготино. Тој тогаш ѝ рекол дека ќе ја претвори нивната средба во песна, иако таа не му поверувала, мислејќи дека тоа е само уште една романтична фраза. Дујмиќ ѝ нагласил дека можеби никогаш повеќе нема да се сретнат, но дека ќе остане доследен на зборот.Сепак, нивните патишта повторно се вкрстиле на концерт во Неготино, одржан во рамки на турнејата „Милена генерацијо“. Дујмиќ настапувал со бендот, а Милена била во публиката со сопругот и двете деца.Тој се присетил дека му пријде редар и му соопшти дека го бара жена која тврди дека го познава. Кога ја видел Милена, таа се расплакала, не верувајќи дека песната навистина била напишана за неа. Тогаш ѝ рекол дека дадениот збор секогаш мора да се испочитува.Песната „Милена“ е објавена во 1983 година на албумот „Послије свега“, со текст на Зринко Тутуќ, а музика и аранжман на Рајко Дујмиќ.

Магазин | пред 3 седмици

3 нед.

Мојсоска до Дурмиши: Десет месеци по трагедијата во Кочани, Законот за угостителство остана само ветување

На денешната седница за пратенички прашања од опозицијата, Јована Мојсоска од Левица упати прашање и до министерот за економија, Бесар Дурмиши, барајќи одговор кога ќе бидат доставени измените на законот за угостителска дејност кои беа најавени минатата година, по трагедијата во Кочани.„После незамисливата трагедија во Кочани еден од клучните системски пропусти за работата на дискотеката на смртта беше лоциран во недореченостите во законот за угостителска дејност. Лиценцата за работа на дискотека кој се однесува на исполнувањето на техничките услови на еден објект, како излези, заштита од пожари, вентилација и сѐ останато го пополнува самиот барател. Апсурдот во ова законско решение е во тоа што никој не проверува на терен пред да ја добие лиценцата дали изјавата на сопсвеникот е вистинита“, рече Мојсоска. Таа посочи дека ваквиот законски модел е како „да ви регистрираат кола само со изјава дека ви е технички исправна“ и дека ревизорите во извештајот за 2024 година констатирале дека издавањето лиценци за угостителски објекти се врши „без да има законска обврска за задолжителна проверка на исполнување на минималните технички услови“.„И по десет месеци по трагедијата, ако некој сака да добие лиценца за угостител тоа ќе може да го направи преку истиот Закон за угостителска дејност кој беше во правна сила и кога се случи трагедијата во Кочани. Јасно е дека позади ваквото лошо законско решение стојат профит интересите на одредени моќници од угостителскиот сектор, кои често се блиски и со самата власт“, додаде Мојсоска.Таа потсети дека министерот Дурмиши на 25 март минатата година најавил дека работна група веќе работи на измени на Законот за угостителска дејност, со зголемување на казните и забрана за работа по одземање на лиценците, доколку се утврди дека законските одредби не се почитуваат.„Моето пратеничко прашање е: дали до 25 март 2026 година, односно точно една година откако најавивте измени на законот, до нас како пратеници конечно ќе пристигне изменетиот Закон за угостителка дејност, со цел во иднина да спречиме, а да не констатираме системски трагедии, како што за жал ни се случува постојано во минатото?“, заврши Мојсоска.

Македонија | пред 3 седмици

3 нед.

Семејна драма во Грчец: Родители ја земале малолетната ќерка по физички напад

Шеснаесетгодишен жител на селото Грчец, општина Сарај, пријавил во СВР Скопје дека во семејниот дом бил извршен физички напад врз неговиот брат и неговата малолетна девојка, по што девојката била однесена со сила.Според пријавата, на 20 јануари 2026 година околу 13 часот, во домот пристигнале две машки и три женски лица кои физички го нападнале Д.Г. (21) и неговата малолетна партнерка. По нападот, малолетничката била земена од лицата и однесена од домот.Како што е пријавено, двајца од лицата што учествувале во настанот се родители на малолетничката девојка. За целиот случај биле известени надлежните служби, а полицијата презема мерки за целосно расчистување и утврдување на сите околности.

Скопје | пред 3 седмици

4 нед.

Лажна порака од „Пошта“ му ја испразнила сметката на гостиварец

Четириесет и двегодишен жител на Гостивар пријавил во полиција дека бил жртва на интернет измама, при што од неговата банкарска сметка биле одземени 26.000 денари.Како што соопштија од ОВР Гостивар, на 20 јануари 2026 година оштетениот добил СМС порака со линк кој наводно водел до веб-страница на „Пошта на Северна Македонија“, со барање за ажурирање на податоци за достава на пакет.Верувајќи дека станува збор за негова претходна нарачка, тој пристапил на линкот и ги внел податоците од својата платежна картичка. Набргу потоа, без негова согласност, биле извршени пет финансиски трансакции кон различни субјекти, по што сфатил дека станува збор за измама.Случајот е пријавен во полиција, а надлежните служби преземаат мерки за целосно расчистување и документирање на настанот.

Македонија | пред 4 седмици

4 нед.

По доцнење од три часа, Трамп пристигна во Давос

Претседателот на Соединетите Американски Држави, Доналд Трамп, слета во Швајцарија, каде што ќе учествува на Светскиот економски форум во Давос.Трамп пристигна со задоцнување од околу три часа, а до Давос го очекуваат уште околу два часа патување. Причина за доцнењето бил помал проблем со електричниот систем на претседателскиот авион.Како што соопшти портпаролката на Белата куќа, Каролин Ливит, авионот „Ер Форс Уан“ бил принуден да се врати во Мериленд помалку од еден час по полетувањето, поради „помал електричен дефект“, по што летот бил продолжен со друго летало.И покрај доцнењето, од Светскиот економски форум информираа дека агендата на американскиот претседател нема да се промени. Првата активност е средба со деловни лидери, по што Трамп ќе одржи говор на форумот.Говорот е закажан за 14:30 часот и, според организаторите, ќе се одржи во предвидениот термин.

Свет | пред 4 седмици

4 нед.

Влада на страната на транспортерите: Николоски бара итно одложување на новите шенген-правила

Јас и Владата го разбираме револтот на транспортерите и протестот кој ќе го направат превозниците од понеделник, не само од Македонија туку од цел регион од Западен Балкан поради новите правила за електронска евиденција во земјите од шенген зоната. Новите правила и штетат на домашната економија, драстично ќе ја намалат работата на транспортерите, а на удар директно ќе биде транспортниот сектор и челичната индустрија, одговори вицепремиерот Александар Николоски на пратеничко прашање на собраниската седница.Тој истакна дека Владата веќе една година разговара со претставници на Европската Комисија за надминување на овој сериозен проблем, но ЕУ заесега нема слух за надминување на проблемот, не само за Македонија туку и за целиот Западен Балкан.“Повеќе од една година разговараме со ЕУ, но слабо се разбираме и не наидуваме на разбирање. Последно разговарав во декември во Брисел со еврокомесарот за транспорт Цицикостас и со генералната директорка за мобилнoст и транспорт при Европската Комисија, Магда Копцинска, при што се обидов најпластично да им пренесам дека ова што го прават ќе значи смрт за економијата во регионот и ќе значи затворање на бројни странски инвестиции во регионот, а кои доаѓаат од земји членки на ЕУ. Намерно користам регионот, бидејќи се однесува за цел Западен Балкан и не се однесува само за Македонија. Формалниот одговор кој го даде портпаролот на ЕК за кој не се слагам е дека нема разлика меѓу она што до сега биле правила и новите правила, затоа што според него еден патник може да остане 90 дена во рамки на 180 дена во шенген зоните останува и сега. Формално тоа е точно, но практично не е точно, од причина што превозниците не се туристи, не одат за туризам, ниту се луѓе кои одат на посета, туку се луѓе кои што работат. Истите не можат да извадат работни визи бидејќи немаат работодавач во конкретна земја членка на ЕУ, а најчесто проблемот е тоа што само транзитираат” истакна вицепремиерот.Тој додаде дека во континуитет одржува средби со бизнис коморите, со транспортните асоцијации и странските инвеститори со цел заедничи да се изнајдат најсоодветни решенија и да апелира до ЕУ за промена на правилата. Владата го задолжила и Министерството за надворешни работи да се обрати до ЕУ за одложување на новите правила за влез.“Проблемот е подлабок. Ова ќе влијае врз извозните компании. Теротески да го уништиме транспортниот сектор и бизнис во Македонија, не само што директно ќе влијаеме врз транспортот, мислам дека ни ЕУ не се свесни со каков проблем се соочуваме. Имаме уште два проблеми, а тоа е со карго сертификатите и вториот е со квотите со извоз на челик. Не може регионот од Западен Блакан да се третира како трети земји, не може за извоз на челик да сме во иста квота со Кина. Квотите кои сега ќе ги постави ЕУ на кои сериозно работат, веројатно од Кина и Индија ќе ги исполнат во првите два месеци од годината. После тоа ќе има 50 % царина и практично ќе значи нема да има увоз на челик во ЕУ затоа што е неконкурентен и тоа значи дека челичната индустрија ќе колабира. Фени се затвори, со вакви линерани политики на ЕУ можеме да заклучиме само што ќе се случува со големи производители на челик од земјава”- додаде вицепремиерот Николоски.Најави дека Владата сериозно ќе работи на надминување на овој предизвик со цел стабилизација на транспортниот сектор во земјава и регионот.

Македонија | пред 4 седмици

4 нед.

Добил 74.294 денари од игри на среќа, а никогаш не учествувал: Гостиварец се сомнева на злоупотребени лични податоци

Седумдесет и двегодишен жител на Гостивар пријавил во полиција дека му биле злоупотребени личните податоци, по што се соочил со сериозни финансиски последици.Како што информираат од ОВР Гостивар, случајот бил пријавен на 20 јануари 2026 година, откако оштетениот при вадење уверение за остварен доход од Управата за јавни приходи забележал дека во неговото досие се евидентирани добивки од игри на среќа во износ од 74.294 денари за 2024 година.Според неговата изјава, тој никогаш не учествувал во игри на среќа, ниту пак подигнал какви било добивки. Поради тоа, се сомнева дека неговите податоци од лична карта биле злоупотребени од вработени во спортска обложувалница, кои наводно ги користеле за исплата на добивки на трети лица.Дополнително, поради фиктивно прикажаните приходи, на оштетениот му биле направени финансиски кратења на пензијата што ја прима во Италија, со што штетата за него не била само евидентна, туку и директна.Надлежните служби преземаат мерки за целосно расчистување и документирање на случајот.

Македонија | пред 4 седмици

4 нед.

Родителите на судијата тврделе дека 350.000 евра ги заработиле тие од земјоделие односно грозје, па ги скриле во бункерот зад ѕидот

Родителите на судијата од скопска Апелација, Ѓоко Ристов, тврделе дека парите. 350.000 евра најдени скриени зад плочки во ѕид не се на нивниот син, туку нивна сопственост, стекнати од земјоделие.Кога истражителите односно полицијата побарала појаснување, родителите на Ристов рекле дека се од „лозје“. Ова беше соопштено на брифингот со новинарите од обвинителката Искра Хаџи Василева која го води предметот за противправно стекнување имот и перење пари против судијата.Обвинителката Искра Хаџи Василева рече дека „одбраната која беше дадена од осомничениот, Обвинителството не го убеди, наспроти нашите докази, кажувањата. Одбраната дека се од земјоделие и на родителите – мене не ме убеди“.Признавањето дека парите се на родителите на Ристов, а не на судијата, дошле откако биле најдени. Претходно, на прашања од полицијата односно истражителите кажале дека не чуваат дома пари. На претресот кој според Обвинителството е законит, не присуствувал судијата кој сега е во домашен притвор.Инаку Ѓоко Ристов не бил на ПИ-мерки. Обвинителката Искра Хаџи Василева рече дека има и други сведочења во контекст на дадени пари за наместени судски одлуки.„Има и други сведочења, ќе видиме што ќе донесе истрагата. Осомничениот (Ѓоко Ристов) никогаш не бил на ПИ-мерки. Паралелно тече финансиска истрага. Финансиските истраги бараат дополнително време, многу институции ви даваат податоци, да врзите математички, сопствености. Паралелно со финансиската истрага која ви дава доста сознанија и докази, станува јасно дека кога барате кеш-пари, тешко е да фатите пари на рака. Имаше многу луѓе кои пријавуваа, имаше покредибилни пријави за адвокати, за други лица“, рече обвинителката на брифинг со новинарите.Повеќе детали за тоа како се најдени парите:

Македонија | пред 4 седмици

4 нед.

Алиу: Пушењето ќе се регулира и на отворено таму каде што граѓаните се директно изложени

Со новиот предлог-закон за заштита од пушењето е предвидено регулирање на пушењето на отворени јавни простори каде има присуство или движење на повеќе луѓе. Поконкретно, станува збор за простор околу здравствени, образовни и социјални установи, јавни настани, спортски и културни настани, како и места наменети за деца, млади и семејства.„Ова е особено важен аспект од законската рамка, имајќи предвид дека кога луѓето се блиску, чадот и аеросолот директно се вдишуваат, а изложеноста е непосредна. На јавни отворени простори граѓаните немаат реален избор да се оддалечат, а особено децата, постарите и хронично болните. Законот интервенира само таму каде што постои неизбежна изложеност на други лица, со цел јавниот простор да биде здрав простор за сите, потенцира министерот за здравство“, Азир Алиу.Посебен акцент е ставен нa локациите каде луѓето не можат реално да избегнат изложеност на чадот од цигари, како на пример, при чекање во ред, простори на отворено каде се престојува подолго и други јавни собири на отворено. За илустрација, луѓето кои чекаат во редица за да купат билет за влез во установа од областа на културата или за влез на спортски натпревар, реално не можат да избегнат изложеност на чад од цигари. Целта на предлог-законот е да се заштити здравјето на оваа категорија население.Исто така, во делот на регулирање на пушењето на отворени јавни простори, посебно е ограничено пушењето на места наменети за деца, млади и семејства, како на пример пред детските игротеки, каде најмладите не би можеле да избегнат изложеност на чад од цигарите.„Отворен простор не значи автоматски безбеден простор, доколку истиот е функционално ограничен или кога луѓето се наоѓаат на мало растојание и се директно изложени на чад од цигари. Токму затоа, ова е еден од клучните аспекти на законската рамка за заштита на здравјето на населението, а особено на најмладите“, појаснува министерот Алиу.

Македонија | пред 4 седмици

4 нед.

Полицијата приведе 41-годишен возач, бил фатен со 2,43 промили алкохол

Полициски службеници од ОВР Ресен вчера попладне го лишиле од слобода 41-годишниот А.Г. од селото Јанковец, откако бил затекнат како управува патничко возило под силно дејство на алкохол.Како што соопшти полицијата, на 20 јануари 2026 година во 14:58 часот, при редовна сообраќајна контрола во селото Јанковец, ресенско, било утврдено дека возачот имал дури 2,43 промили алкохол во крвта.Поради сериозното загрозување на безбедноста во сообраќајот, возачот веднаш бил исклучен од сообраќај и задржан во полициска станица. По целосно документирање на случајот, против него ќе биде поднесена кривична пријава по член 297-а од Кривичниот законик, за кривично дело „безобѕирно управување со моторно возило“.

Македонија | пред 4 седмици

4 нед.

Мојсоска до Алиу: Лекот за хемофилија доцни повеќе од шест месеци - кој ќе ја сноси одговорноста за нарушеното здравје на овие лица?

„Кога точно, односно кога надоцна, лицата со хемофилија ќе го добијат лекот Фактор 8 и чија ќе биде одговорноста доколку здрастената состојба на овие лица се влоши затоа што се принудени да лежат во кревет поради тендер шемите на вашите директори?“ беше првото прашање што пратеничката Јована Мојсоска од Левица го упати до министерот за здравство, Азир Алиу на денешната седница за прашања од опозицијата во Собранието.Мојсоска алармираше за сериозната состојба со пропусти во набавката на овој лек кој е од клучна важност за лицата со хемофилија А.„Се работи за доцнење на тендерот за набавка на лекот фактор 8 повеќе од шест месеци. Ќе пренесам лично сведоштво на пациент со хемофилија А кој за да може нормално да функционира мора да прима 30000 единици на фактор 8 секој месец. Но, од мај минатата година поради раскинување на тендерот воведени се рестрикции за овој лек, па пациентот наместо потребните 30000 единици прима само 5000 единици месечно“, рече Мојсоска. Таа додаде дека ваквите рестрикции ги врзуваат пациентите за кревет и сериозно ја загрозуваат нивната здравствена состојба. „И ова не е само еден пациент на кого сериозно му е загрозено здравјето поради неодговорноста и немарноста на одговорните лица во институциите. Верувам дека ќе се согласите со мене дека и да е само еден живот и еден пациент во прашање, државата е должна да обезбеди достоинствен живот, а не живот врзан за кревет поради бирократски процедури или можеби преговори за провизии од тендери“, посочи пратеничката. Мојсоска се осврна и на институционалната одговорност посочувајќи дека и претходно имало вакви рестрикции но, тоа никогаш не било повеќе од два месеца. Исто така посочи дека со години трае руинирање на здравствениот систем, а сега под водство на ДПМНЕ дополнително се деградира. „Дајте да лоцираме каде е одговорноста. Со институтот за трансфузиона медицина раководи директорот Амир Ељези, поставен од оваа владејачка коалиција. Во интервју вие потврдивте дека сте во комуникација со директорот и дека лекот ќе биде набавен. Информациите кои јас ги имам е дека директорот Ељези вооопшто не бил расположен да ги прими докторите од установата кои барале средба со него токму заради алармантата ситуација за овој лек“, рече Мојсоска. Пратеничката Мојсоска истакна дека Левица и претходно го спорела изборот на овој директор бидејќи со Законот за безбедност во снабдување со крв предвидува дека за директор може да се постави специјалист трансфузиолог со најмалку две години работно искуство. „Ељези не е транзфузиолог, а очигледно не е ни менаџер кога за прв пат во негово директорување доцни лек половина година“, заврши Мојсоска.

Македонија | пред 4 седмици

4 нед.

Како истражителите ги најдоа парите во ѕид: „Се потрудивме да не кршиме, ама дупката се појави одма, а низ неа парите“

Во домот на родителите на судијата Ѓоко Ристов биле извршени два претреси на иста локација, при што првиот обид завршил без пронаоѓање пари, иако истражителите наишле на тазе бетон и дупка под него. Дури при вториот претрес, кога тимовите на Министерството за внатрешни работи со истражителите на ОЈО-ГОКК влегле со повеќе опрема и засилени истражни капацитети, биле откриени скриени пари.При вториот влез во куќата, истражителите ги прашале родителите на судијата дали поседуваат пари, на што тие одговориле негативно.„Имало потазе цемент, а ги прашувате дали сте поправале нешто, а тие велат дека не поправале“, посочи обвинителката.Како клучен сомнителен детал при вториот претрес се појавиле плочките во просторијата, кај кои било забележано дека фугата не е иста како кај другите плочки. Дополнително, истрагата располагала и со оперативни сознанија кои упатувале на можност дека парите се кријат токму таму.„Испокршени биле плочките на местото каде се криеле парите, на рачно тропкање давале друг звук. Нас нѐ обврзуваат прописите да не растураме и кршиме.. Па се потрдувиме што поелегантно. Но, при мало кршење се појави дупка, а низ дупката се појавија пари“, рече обвинителката Искра Хаџи Василева, предметен обвинител.Таа појасни дека биле направени проверки на имотната состојба, недвижностите и приходите, вклучително и анализи на примањата од судиската плата, која, како што нагласи, е лесно проверлива.„Беа направени проверки, на недвижност, имот, како и што можете од државна плата што е многу лесно, бидејќи ние не смееме да имаме дополнителни примања. Направени претреси на три локации претходно, не беа најдени средства. Не е лесно да најдете пари. При првиот обид не беше најдено ништо, па си велите по сознанијата да се провери пак. Отидовме поспремни со технологија“, изјави обвинителката.Во овој момент, според обвинителството, пронајдените пари не се директно поврзани со конкретен судски предмет. Сепак, контурите на случајот, како што беше наведено, почнале да се исцртуваат во контекст на предметот поврзан со адвокатот Фехми Стафа кој го застапува обвинетиот Љупчо Пецов-Ѓаволот. Стафа кој беше фатен при примање пари, за кои Обвинителството тврди дека биле наменети за подмитување судија.„Со наводи и докази кои беа доставени по однос на Љупчо Пецов (Ѓаволот) кој е осомничен во една постапка на Обвинителството... Тогаш се добиваше поконкретни контури. Нему му се барани пари, за да мерката се укине. Ама знаете, кога имате активно решение, тешко е да не влезете во притвор барем еден ден, два, за да образлагате потоа зошто да не влезете. И оттука тргнуваат жалбите, враќање на жалби...“, изјави обвинителката.Таа посочи дека во повеќе случаи, лицата фатени со мито ја поставуваат истата прашалник-реакција.„Кој ме намести“, ова било прво нешто што го кажувале во повеќе случаи, лица кои биле фатени со мито, рече обвинителката, додавајќи: „Како може некој да ве намести, ако вие сте барале и ви дале мито?“.Обвинителката Хаџи Василева ја оцени постапката како сложена уште од самиот почеток.„Комплексна и интересна истрага беше од самиот старт“, рече таа.

Македонија | пред 4 седмици

4 нед.

Путин побара средба со специјалниот пратеник на Трамп

Специјалниот пратеник на американскиот претседател Доналд Трамп, Стив Виткоф, најави дека ќе оствари разговор со рускиот лидер Владимир Путин, но не откри детали за средбите одржани во Давос.„Треба да се сретнеме со него (Путин) во четврток. Русија побара одржување на состанок“, изјави Виткоф.Тој истакна дека е постигнат значителен напредок во разговорите меѓу САД и Русија за Украина, но во интервју за Си-Ен-Би-Си призна дека територијалното прашање и понатаму останува главната пречка.Специјалниот пратеник на Трамп додаде дека САД им предложиле и на Русија и на Украина да се приклучат на Советот за мир и дека очекуваат согласност од двете страни.Се очекува Виткоф во Москва да пристигне заедно со зетот на американскиот претседател, Џаред Кушнер.Да потсетиме, вчера специјалниот претставник на рускиот претседател, Кирил Дмитриев, разговараше со Виткоф во Давос, но за таа средба беа објавени многу малку информации. Портпаролот на Кремљ, Дмитриј Песков, одби да открие детали, објаснувајќи дека разговорите биле приватни и доверливи и дека сите прашања поврзани со украинското решение се разгледуваат зад затворени врати.И руските и американските претставници ги оценија средбите како позитивни. Дмитриев изјави дека руско-американските разговори се одвиваат конструктивно, додека Виткоф ги опиша како „многу позитивни“.

Свет | пред 4 седмици

4 нед.

Минчев: Крај на злоупотребата на в.д.-позициите, меритот станува правило во администрацијата

Министерството за јавна администрација денес ја започна јавната дискусија по нацрт-верзијата на Законот за високи раководители во органите на државната управа и фондовите - реформски закон со кој првпат се воспоставува единствена, јасна и мерит-базирана рамка за уредување на највисоките раководни функции во администрацијата.Министерот за јавна администрација, Горан Минчев, истакна дека законот се носи преку отворен, транспарентен и инклузивен процес, со активно учество на институциите, стручната јавност, синдикатите, граѓанскиот сектор и граѓаните. Нацрт-законот е јавно објавен на ЕНЕР од 31 декември 2025 година, што ја потврдува определбата реформите да се креираат преку дијалог.Во своето обраќање, министерот Минчев истакна дека предложениот закон воведува суштински промени во начинот на избор, именување и отчетност на високите раководни кадри во јавната администрација.„Воведуваме појасни и унифицирани критериуми за избор на директори, државни секретари и членови на колегијални органи на државната управа, но и за членови на управни одбори, за кои досега речиси и да не постоеја правила. Принципот на мерит станува правило, а не исклучок – оној што раководи ќе мора да знае, да може и да одговара“ нагласи министерот Минчев.Посебен акцент во законот, како што посочи министерот, е ставен на реформата на управните одбори.„Со овој закон воведуваме воедначени услови и јасни критериуми за избор и именување на членовите на управните одбори, а нивниот состав го намалуваме на три члена. Наместо бројност, воведуваме квалитет. Наместо формално учество, воведуваме реална одговорност“ истакна Минчев.Тој додаде дека управните одбори повеќе нема да бидат нефункционални и проширени структури, туку компактни и ефикасни тела составени од лица со соодветни професионални квалификации, знаење и интегритет.Министерот се осврна и на една од значајните новини – строгото ограничување на институтот „вршител на должност“.„Со овој закон ставаме крај на злоупотребата на ‘вршител на должност’. Свесни сме дека привремените решенија со години беа правило, а не исклучок, што ја поткопуваше институционалната стабилност и одговорност. В.Д. станува исклучок – строго временски и правно ограничен“ нагласи тој.Дополнително, законот предвидува воспоставување систем за следење и оценување на резултатите од работата на високите раководители.„Позицијата повеќе не е титула, туку одговорност за резултати. Нема доживотни функции, нема недопирливи позиции. За првпат, работата на раководителите системски ќе се мери и ќе се врзува со учинок, а не со статус“ истакна министерот Минчев.На јавната дебата се обрати и генералниот секретар на Владата на Република Македонија, Игор Јанушев, кој ја истакна важноста од јакнење на професионализмот, отчетноста и институционалната стабилност во јавната администрација.Настанот беше организиран од страна на Министерството за јавна администрација во соработка со Центарот за управување со промени во рамки на Проектот „Преосмислување на управувањето“, кој го имплементира ЦУП, со поддршка од Владата на Обединетото Кралство, а во соработка со Владата на Република Македонија.

Македонија | пред 4 седмици