БУГАРИЈА

Мицотакис и бугарскиот премиер разговараа за Вертикалниот гасен коридор

Грчкиот премиер Кирјакос Мицотакис ја истакна стратешката важност на инфраструктурната иницијатива „Вертикален коридор“ за време на разговорите со неговиот новоизбран бугарски колега Румен Радев, оценувајќи дека проектот може значително да ја зајакне енергетската безбедност и транспортната поврзаност во Југоисточна Европа.Мицотакис нагласи дека Вертикалниот гасен коридор ја зголемува геополитичката улога на двете земји, овозможувајќи им да снабдуваат со енергија и држави во северниот дел на Европа.Станува збор за стратешка енергетска иницијатива која ја поврзува Грција со Југоисточна и Централна Европа преку мрежа на гасоводи и инфраструктура што овозможува транспорт на природен гас, особено течен природен гас (LNG), од грчките терминали кон север.Грчкиот премиер претставил и поширока визија за создавање копнен коридор што би ги поврзал грчките пристаништа со Украина преку мрежа на автопати и железници кои би минувале низ Бугарија и Романија.„Прашањата за поврзаноста се во срцето на нашата соработка“, изјави Мицотакис, додавајќи дека Грција и Бугарија би можеле да обезбедат значителни европски средства за реализација на иницијативата.Тој изрази надеж дека преку трипартитна соработка меѓу Грција, Бугарија и Романија ќе се забрза реализацијата на проектот.За време на средбата, двајцата лидери се согласија да ја продлабочат соработката во областа на енергетиката, транспортот и регионалната поврзаност, како и да ја зајакнат координацијата околу европските приоритети и прекуграничните инфраструктурни проекти.

Свет | пред 17 часа

Дојави за бомби на аеродромот во Софија и во државни институции

Безбедносните служби во Бугарија денеска беа ставени во состојба на зголемена готовност по серија дојави за поставени експлозивни направи во повеќе градови, меѓу кои и на аеродромот во Софија.На софискиот аеродром денеска е примена дојава за поставена експлозивна направа, по што веднаш е активиран стандардниот оперативен план за вакви кризни ситуации.Иако надлежните служби одлучија да не спроведат евакуација на патниците, аеродромот во моментов функционира под максимално засилени мерки за безбедност.Бугарското Министерство за внатрешни работи соопшти дека ова не е изолиран инцидент и дека станува збор за организирана серија закани.Во текот на денот биле примени повеќе заканувачки електронски пораки за поставени бомби во различни државни институции во неколку градови низ земјата.Сериозна ситуација е регистрирана и во градот Годеч, каде по добиена закана било извршено привремено евакуирање на учениците и наставниот кадар од едно училиште.По деталните проверки спроведени од антитерористичките единици на полицијата, наставата во училиштето продолжила без прекини, а состојбата била целосно нормализирана.Надлежните органи продолжуваат со истрагата за утврдување на потеклото на заканите, додека повеќе информации се очекуваат во текот на денот.

Балкан | пред 22 часа

Бугарија не дозволува продолжен престој на американски воени авиони

Прашањето за безвизниот режим за бугарските граѓани повторно се најде во фокусот на односите меѓу Софија и Вашингтон, откако бугарските власти одлучија да го ограничат престојот на американските воени авиони на своја територија до крајот на јуни.Бугарскиот премиер Румен Радев изјави дека целосно ја разбира сложеноста на американските процедури поврзани со безвизниот режим, но нагласи дека и Бугарија има свои интереси и приоритети.„Целосно ја разбирам сложеноста на регулаторните процедури и потребата од време, но и ние имаме свои приоритети и процедури и не можеме позитивно да одговориме на барањето за долг престој на авиони и тенкови на аеродромот во Софија“, изјави Радев.Претходно, бугарскиот претседател разговарал со американскиот претседател Доналд Трамп, при што побарал итно разгледување на можноста за суспендирање на визниот режим за бугарските граѓани. Сепак, според Радев, од американска страна не бил добиен позитивен одговор.Американските воздухопловни сили моментално користат капацитети на аеродромот „Васил Левски“ во Софија врз основа на договор што истекува на 31 мај. Уште во февруари, Амбасадата на САД доставила дипломатска нота со барање за распоредување до 15 авиони во периодот од 17 февруари до крајот на мај.Од бугарското Министерство за одбрана посочуваат дека станува збор за логистички летала без борбени функции, а дозволата за нивно стационирање ја одобри владата предводена од Росен Жељазков.Одлуката на Софија доаѓа во период кога Бугарија продолжува да бара олеснување на патувањата за своите граѓани во САД, прашање што со години е високо на агендата на бугарските власти.

Балкан | пред 5 дена

(Видео) Над 80 литри дожд на квадратен метар: поплави и евакуации во Бугарија

Во Велико Трново, Бугарија, ситуацијата останува сериозна по силните поројни дождови кои донесоа над 80 литри на квадратен метар врнежи за кратко време.Прогласена е вонредна состојба, а има и евакуирани жители. Вонредна состојба е прогласена и во регионите на Велико Трново, Габрово, Горна Орјаховица и Драјново.Повеќе патишта се затворени, а реката Јантра излегла од своето корито, што довело до евакуации.Поплавите предизвикаа сериозни штети на возила и патна инфраструктура. Затворени се патиштата кон Стара Загора и Габрово, бидејќи реката навлегла на коловозот.„Никој не спиеше“, изјави еден жител на Велико Трново.Друг граѓанин наведе дека земјоделските насади се уништени, додека трета жителка рече дека водата во приземјето достигнала до колена и дека поплавата повторно ја погодила областа по повеќе од една деценија.Министерот за внатрешни работи изјави дека евакуацијата е превентивна поради значителен пораст на нивото на реките, меѓу кои и Јантра. Тој додаде дека службите работат на терен во текот на целата ноќ за да се спречат жртви и да се проценат штетите.Нивото на реката во градот речиси достигнало критична висина од 7,50 метри во најниските зони.Областниот управител соопшти дека кризниот штаб останува на терен додека водата не се повлече и не се утврдат штетите, при што се најавуваат и нови врнежи.

Свет | пред 1 седмица

По навредливата изјава за Гоце Делчев, Рубин Земон на средба со Виктор Стојанов од Бугарија, осомничен за ширење омраза кон Македонија

Рубин Земон, член на Централниот одбор на СДСМ, се сретнал со бугарскиот државјанин Виктор Стојанов, претседател на т.н. „Фондација Македонија“, кој има доживотна забрана за влез во Македонија и против кого пред два месеци беше поднесена кривична пријава за ширење говор на омраза кон македонската држава.За средбата објави самата фондација на социјалните мрежи.„На неофицијална средба со Рубин Земон - дел од раководството на опозициската СДСМ и претставник на Египќаните во Република Северна Македонија. На режимот на Мицкоски ќе му се спротивстават мнозинството граѓани на државата, а ние од Европската Унија ќе им дадеме поддршка: во име на европската иднина на С. Македонија и децата таму“, стои во објавата на „Фондација Македонија“.Средбата предизвика реакции и поради претходните ставови и активности на Стојанов, но и поради изјавите на самиот Земон. Тој претходно во јавноста изјави:„Гоце Делчев ништо не напишал во животот, ниедна битка не извојувал никаде, а кај нас е мит направен“.По ова, Земон се извини и кажа дека бил погрешно разбран, по што седна на маса со Стојанов, кој забраната за влез во Македонија ја доби токму во време на СДСМ.Против Виктор Стојанов, кој е претседател на бугарската фондација „Македонија“, беше поднесена кривична пријава за ширење расистички и ксенофобичен материјал по пат на компјутерски систем, дело казниво по член 394-г од Кривичниот законик.Од Агенцијата за национална безбедност тогаш соопштија дека пријавата следува по обезбедени информации за „субверзивно-пропагандни активности насочени кон поттикнување етничка и национална омраза“.Според Обвинителството, Стојанов преку специјално креирана Фејсбук-страница споделувал содржини со кои поттикнувал национална и етничка омраза и дискриминација, а во истрагата бил одземен и пропаганден материјал наменет за дистрибуција во Македонија.Стојанов и претходно беше во фокусот на јавноста. Пред три години тој упати закани кон Македонците од Пустец, предупредувајќи дека доколку не се попишат како Бугари на пописот во Албанија, ќе им бидат одземени бугарските пасоши.

Македонија | пред 1 седмица

Ако се прифатат тези на СДСМ за уставни измени, тогаш се прифаќа и бугарската приказна за „200.000 Бугари“, вели Вангелов

Докторот по политички науки и универзитетски професор Огнен Вангелов, поранешен член на Комисијата за историски и образовни прашања со Бугарија, остро реагираше на ставовите на СДСМ околу францускиот предлог и внесувањето на Бугарите во Уставот, оценувајќи дека со таквите тези индиректно се прифаќа и бугарската нарација за постоење на „200.000 Бугари“ во Македонија.„Освен ограничени симболички ефекти во одредени институционални постапки и закони, внесувањето во Преамбулата не создава автоматски широка службена употреба на јазикот ниту суштински нов пакет колективни права“, наведува Вангелов.Тој посочува дека според пописот од 2021 година околу 3.500 лица се изјасниле како Бугари, а околу 1.500 лица бугарскиот го навеле како мајчин јазик, па според него нема демографска основа за суштинска примена на колективни права поврзани со процентуална застапеност.„Оттука се поставува прашањето: во која општина постои концентрација што би овозможила поширока службена употреба на бугарскиот јазик?“, прашува Вангелов.Според него, вистинскиот проблем е што зад ваквите барања стои политичка логика која оди многу подалеку од прашањето за малцински права.„Освен, се разбира, ако оние што ги формулираат овие тези не тргнуваат од претпоставката дека во Македонија навистина живеат над 200.000 Бугари, како што тврди официјална Софија“, наведува Вангелов.Тој предупредува дека тогаш веќе не станува збор за толкување на македонскиот уставен систем, туку за прифаќање на бугарските политички и демографски тези.„Но тогаш веќе не станува збор за толкување на македонскиот уставен систем, туку за прифаќање на бугарските демографски и политички тези“, пишува Вангелов.Реакцијата следува откако СДСМ соопшти дека внесувањето на Бугарите во Уставот е „патот за заштита на македонскиот идентитет и јазик“ и оцени дека францускиот предлог нуди гаранции дури и поголеми од Преспанскиот договор.

Коментари | пред 2 седмици

Спор тежок три милијарди евра: „Лукоил“ ја обвинува Бугарија за незаконско преземање

Рускиот нафтен гигант „Лукоил“ бара три милијарди евра отштета од Бугарија, откако државата ја презеде контролата врз локалното работење на компанијата, изјави Румен Спецов, специјален управник задолжен за надзор на бугарскиот имот на групацијата.Барањето е поднесено преку швајцарската трговска подружница „Литаско“, но, според Спецов, сè уште не е конечно.Спорот произлегува од интервенцијата на бугарската држава во работењето на компанијата по назначувањето специјален управник. Претходно годинава, „Лукоил“ најави дека ќе покрене арбитражна постапка против Бугарија пред Меѓународниот центар за решавање инвестициски спорови, обвинувајќи ја Софија за незаконско одземање на имотот на компанијата.Во интервју за бугарската телевизија bTV, Спецов изјави дека евентуалните барања во арбитражната постапка би можеле да се темелат на финансиски показатели, но нагласи дека четирите компании на „Лукоил“ во Бугарија моментално се во одлична финансиска состојба.Законските измени со кои беа проширени овластувањата на специјалниот управник беа усвоени на почетокот на ноември, а на 14 ноември тогашниот директор на Националната агенција за приходи, Румен Спецов, официјално беше назначен на функцијата.Во Бугарија, „Лукоил“ управува со најголемата рафинерија за нафта на Балканот, лоцирана во Бургас, како и со мрежа од 217 бензински пумпи. Компанијата е и најголем производител на авионско гориво во регионот.Годишниот промет на групацијата во Бугарија надминува осум милијарди евра, што претставува значителен удел во бугарската економија, чиј бруто-домашен производ изнесува околу 110 милијарди евра.Одлуката за именување државен управник беше донесена во ноември, по американските санкции што влијаеја врз работењето на „Лукоил“. Подоцна, Вашингтон одобри шестмесечно изземање за деловните активности на компанијата во Бугарија.По парламентарната одлука, „Лукоил“ соопшти дека очекува државниот управник да не ги попречува комерцијалните активности на компанијата, ниту планираната продажба на бугарскиот имот.Од седиштето на компанијата во Москва повеќепати ја опишаа бугарската подружница како „најголем инвеститор и снабдувач со гориво во земјата, главен работодавач и даночен обврзник“, нагласувајќи дека компанијата одржува конструктивен дијалог со локалната заедница и применува високи стандарди за индустриска и еколошка безбедност.Според податоците на руската групација, вкупните инвестиции на „Лукоил“ во Бугарија во изминатите 25 години надминале 4,5 милијарди долари.Спецов изјави дека неговата улога е исклучиво да обезбеди почитување на санкциите што САД ги воведоа врз деловните активности на компанијата.Тој истовремено оцени дека актуелната состојба претставува ретка можност бугарската држава да стекне удел во стратешки важната рафинерија на „Лукоил“ во Бургас.Според него, рафинеријата повеќе не преработува руска сурова нафта. Снабдувањето, како што наведе, сега се врши преку меѓународно признати трговци и производители од Либија, Иран, Казахстан и Азербејџан, врз основа на транспарентни договори.Извозот на гориво на „Лукоил Бугарија“ моментално е предмет на сложен механизам за одобрување во кој учествуваат царинската управа, Министерството за финансии и парламентот.

Балкан | пред 2 седмици

Завршени сите подготовки од наша страна за Клепало, проблемот е кај Бугарија, вели Николоски

Вицепремиерот и министер за транспорт Александар Николоски изјави дека од македонска страна целосно се завршени сите подготовки за граничниот премин Клепало, во координација со надлежните институции, додека одложувањата ги лоцира на бугарската страна.„Во однос на ГП Клепало, од наша страна целосно се завршени работите во координација со релевантните институции, Министерството за внатрешни работи, Царинската управа и останатите институции коишто се поврзани со граничниот премин.Од наша страна е сè завршено. Проблемот беше на бугарска страна. Морам да кажам дека претходниот министер за транспорт и вице-премиер на Бугарија, Гроздан Караџов, го задвижи проектот и се надевам дека со изборот на нов министер, ќе се дополнително реализира и ќе може да се поврземе од двете страни“, изјави Николоски.

Македонија | пред 2 седмици

„Bangaranga“ ја освои Европа: Којa е бугарската победничка на Евровизија?

Бугарската претставничка на изборот за Песна на Евровизија – Дара, чие вистинско име е Дарина Јотова, преку ноќ стана едно од најбараните имиња на европската музичка сцена по синоќешната победа.Заразната песна „Бангаранга“, впечатливата кореографија и енергичниот настап ѝ ја донесоа на Бугарија првата победа во историјата на натпреварувањето. Иако со години е голема ѕвезда во нејзината родна Бугарија, Евровизијата ја лансираше пред милионска публика низ цела Европа.За време на Евровизиската недела, таа особено се истакна со настапот кој комбинираше современи поп и фолклорни мотиви, и токму оваа комбинација ги освои и публиката и жирито.Дара е родена во Варна, третиот по големина бугарски град на брегот на Црното Море, каде што дипломирала на Националното училиште за уметност. Почнала да пее како девојче, прво изведувајќи традиционална бугарска народна музика, а подоцна се свртела кон модерната поп музика.Пошироката јавност ја запознала во 2015 година во бугарската верзија на шоуто „X Factor“, по што нејзината кариера доживува подем. Деби синглот „К’во не чу“ многу брзо заврши на врвот на музичките листи, проследен од хитови како „Гром“, „Повикај ме“ и „Господин Ровер“.Низ годините, таа освои бројни музички награди, распродадени билети на концерти и собра милиони прегледи на социјалните мрежи.Таа беше и најмладиот ментор во шоуто „Гласот на Бугарија“, а минатата година настапи како предгрупа за Роби Вилијамс на концерт во Софија.Дури и пред финалето, Дара отворено зборуваше за тоа колку многу ѝ значи претставувањето на Бугарија на Евровизискиот натпревар.„Победата би била неверојатна и апсолутно се натпреварував за победа. Но, подеднакво сум трогната од идејата Бугарија да биде видена. Дека навистина можеме да бидеме видени“, рече таа во интервју за The Independent.Таа исто така додаде дека верува оти нејзината земја има „огромна културна душа“ за која Европа сè уште не дознала доволно.„Ако „Бангаранга“ го натера некого да ја истражува бугарската музика, брегот, литературата или луѓето, тогаш веќе сум постигнала нешто вистинско“, рече таа.Насловот на победничката песна доаѓа од јамајканскиот сленг и може да се преведе како „бунт“, „метеж“ или „хаос“. Дара ја опишува како посебна енергија што симболизира слобода и живот без страв.Тоа е чувство што секој го носи во себе. Моментот кога ќе одлучите да ја изберете љубовта пред стравот“, објасни таа по полуфиналето.Песната стана и симбол на големото враќање на Бугарија на Евровизискиот натпревар по отсуството од натпреварот поради финансиски причини.Земјата последен пат се натпреваруваше во 2022 година, а враќањето веднаш беше крунисано со историски успех.

Магазин | пред 2 седмици

(Видео) Бугарија победи на Евровизија 2026 со песната „Bangaranga“

Победник на овогодинешната Евровизија 2026 е Бугарија, која ја претставуваше Дара со песната Bangaranga.Дара со својот настап ги воодушеви и публиката и жирито и убедливо триумфираше на 70. издание на музичкото натпреварување, кое годинава се одржа во Виена.Победничката песна комбинира модерен електро-поп звук со балкански ритми, поради што брзо стана една од омилените меѓу фановите на Евровизија.На второто место заврши Израел.Во финалето на Евровизија учествуваа 25 земји, а победникот беше избран врз основа на гласовите од публиката и националните жири-комисии од 35 држави.

Магазин | пред 2 седмици

Грција, Македонија, Србија и Бугарија се договорија за проширување на Вертикалниот коридор

На четвртиот министерски состанок за енергетика и поврзување во Југоисточна Европа, кој се одржа во Атина, министрите и претставниците задолжени за енергетика од Грција, Србија, Македонија и Бугарија се согласија за проширување на Вертикалниот коридор кон Западен Балкан.Според грчкото Министерство за животна средина и енергетика, на состанокот се разговарало за предизвиците поврзани со европската и регионалната енергетска безбедност, зајакнувањето на меѓусебните поврзувања и енергетската соработка во регионот, како и за потребата од забрзување на стратешките енергетски инфраструктурни проекти.„Се договоривме за проширување на Вертикалниот коридор со Северна Македонија и Србија, како и за институционализирање на соработката меѓу четирите земји“, изјави грчкиот министер за енергетика Ставрос Папаставру.Тој додаде дека следниот состанок ќе се одржи во Белград во септември.„Со заедничка визија и јасен план, енергијата станува сила за поврзување и просперитет во регионот“, порача Папаставру.

Свет | пред 2 седмици

Реакција по изјавата на бугарската министерка: МНР го повика амбасадорот

Бугарскиот амбасадор Жељазко Радуков денеска бил повикан во Министерството за надворешни работи и надворешна трговија, каде му бил упатен устен демарш поради употребата на терминот „северномакедонски“ од страна на шефицата на бугарската дипломатија, Велислава Петрова-Чамова.„На средбата му е упатен устен демарш во врска со несоодветното адресирање од страна на министерката за надворешни работи на Република Бугарија, Весислава Петрова Чамова, која во својата вчерашна изјава за време на Советот на министри за надворешни работи на Европската Унија употреби несоодветна и неправилна придавка изведена од името на нашата држава, користејќи го изразот ‘северномакедонски партнери’“, наведуваат од МНР.Реакцијата на Министерството се однесува на изјавата што вчера од Брисел ја даде новата министерка за надворешни работи на Бугарија, Весислава Петрова-Чамова. Таа рече дека во Брисел имала средба со министерот Тимчо Муцунски и дека својот северномакедонски партнер го информирала за непроменетиот став на Бугарија – дека Северна Македонија треба да ја почитува преговарачката рамка со ЕУ од 2022 година.На ова реагираше Муцунски велејќи дека имал едноминутен разговор, а не средба со Петрова-Чамова во Брисел, при што употребата на терминот „северномакедонски“ ја оцени за несоодветна и неточна.

Македонија | пред 3 седмици

Софија упорно бара уставни измени: Бугарите да влезат во Уставот на Македонија ако сакате напредок кон ЕУ

Бугарската министерка за надворешни работи, Весислава Петрова-Чамова, уште неседната во министерското столче, изјави дека Македонија треба да се придржува до договореното со Европската унија во 2022 година и да ги преземе неопходните политички чекори доколку сака продолжување на евроинтегративниот процес.Говорејќи во Брисел, каде учествуваше на состанок на министрите за надворешни работи на земјите членки на ЕУ, Петрова-Чамова кажа дека бугарската позиција веќе не е билатерално прашање, туку дел од односите меѓу Европската унија и земјата кандидат.„Имавме добра прва средба со министерот за надворешни работи на Македонија, Тимчо Муцунски. Бугарија има јасно изразена позиција, која од 2022 година веќе не е билатерално прашање, туку прашање на дискусија меѓу Европската унија и држава кандидат“, изјави таа.Петрова-Чамова посочи дека прозорецот за проширување на ЕУ може да биде отворен во наредните години, но дека Македонија ризикува да ја пропушти шансата ако не ги исполни преземените обврски.„Да се придржуваат до постигнатиот договор од 2022 година и да ги направат неопходните политички чекори. Да го отворат сопствениот европски пат“, рече бугарската министерка.Таа додаде дека Софија очекува конкретни активности од македонска страна кои ќе покажат политичка подготвеност за напредок кон Европската унија.Во изјавата, Петрова-Чамова ги нарече македонските претставници „северномакедонски партнери“, термин кој претходно предизвика реакција и од министерот Тимчо Муцунски.Во меѓувреме, Муцунски порача дека е потребно „да се оттурнеме од билатерализацијата на критериумите за пристапување“.Бугарската агенција БГНЕС потсетува дека во јуни 2022 година Македонија го прифати таканаречениот „француски предлог“, според кој за продолжување на преговорите со ЕУ, Бугарите треба да бидат внесени во Преамбулата на македонскиот Устав.Во рамки на истиот договор, Македонија се обврза и на почитување на Договорот за добрососедство од 2017 година, како и на протоколите што произлегуваат од него, кои опфаќаат прашања поврзани со говорот на омраза, архивите на југословенските служби и историските прашања.

Свет | пред 3 седмици

Уапсен маж во Србија поради труење диви животни и угинување на редок мршојадец од Бугарија

Припадници на Министерството за внатрешни работи во Ниш го уапсиле Б. Р. (1968) од околината на Сврљиг, Србија, поради сомнение дека извршил повеќе кривични дела, меѓу кои уништување и оштетување на заштитени природни добра, загадување на храна и вода, како и попречување на докажувањето.Како што е соопштено од српското МВР, полицијата, преку интензивна оперативна работа, преку Одделението за сузбивање на еколошки криминал, го идентификувала осомничениот, кој се товари дека на почетокот на мај на својот имот поставил отров на труп од теле, наменет за диви животни.Се сомнева дека при тоа дошло до угинување на единка црн мршојадец, строго заштитен вид птица, која е во сопственост на Република Бугарија. Надлежните оценуваат дека со овој чин сериозно е загрозен екосистемот и заштитените видови на тоа подрачје.Според наводите на полицијата, Б. Р. потоа, со намера да ги прикрие трагите и да спречи докажување, ги отстранил трупот на телето и угинатиот мршојадец и ги фрлил на непристапна локација во шумата.По налог на Основното јавно обвинителство во Ниш, на осомничениот му е одредено задржување до 48 часа, по што со кривична пријава ќе биде изведен пред надлежниот обвинител.Истрагата е во тек, а надлежните органи продолжуваат со работа за утврдување на сите околности на случајот.

Свет | пред 3 седмици

Румен Радев е новиот премиер на Бугарија

Румен Радев е избран за нов премиер на Бугарија, откако Народното собрание ја поддржа новата влада со 124 гласа „за“, 70 „против“ и 36 „воздржани“, со што доби зелено светло за формирање на кабинетот.По свечената заклетва и интонирањето на бугарската и европската химна, дел од пратениците од партијата „Преродба“ демонстративно ја напуштија пленарната сала.Радев порача дека граѓаните ставиле крај на политичката криза и дека новата влада ќе се фокусира на итни задачи, меѓу кои: усвојување на буџет, стабилизирање на исплатите, како и избор на нов Врховен судски совет и инспекторат. Тој нагласи дека работата ќе се темели на уставните принципи, поделбата на власта и владеењето на правото.Во составот на новата влада се предвидени четири вицепремиери и 18 министри. Поранешниот технички премиер Галаб Донев ќе ја преземе функцијата министер за финансии и вицепремиер.Министерството за надворешни работи ќе го предводи Велислава Петрова-Чамова, која најави „тивка дипломатија“ и фокус на заштита на националните интереси.Од опозициските и европските кругови внимателно се следи новиот политички курс на владата, особено во делот на надворешната политика и односите во регионот.

Свет | пред 3 седмици

Радев стана нов премиер на Бугарија со поддршка од 124 пратеници

Народното собрание на Бугарија денеска ја изгласа новата влада на Румен Радев, со што официјално беше формиран 107-от редовен кабинет на Бугарија.Пратениците ја поддржаа структурата, составот и изборот на премиерот со 124 гласа „за“, 70 „против“ и 36 „воздржани“. Со истиот резултат беа изгласани и составот и структурата на Советот на министри.По гласањето, новата влада положи свечена заклетва, по што беа интонирани химните на Бугарија и на Европската Унија. За време на европската химна, пратениците од Вазраждане демонстративно ја напуштија пленарната сала.Како што се очекуваше, владата беше поддржана од пратениците на Прогресивна Бугарија, додека ГЕРБ-СДС остана воздржана. Против гласаа ДПС, Демократска Бугарија, Продолжуваме со промената и „Вазраждане“.Во своето обраќање пред парламентот, Радев најави дека владата ќе работи на забрзан економски развој, модернизација на државата, борба против корупцијата и реформи во институциите.Тој истакна дека приоритети ќе бидат привлекување инвестиции, развој на високите технологии и вештачката интелигенција, енергетска и прехранбена безбедност, како и подобрување на образованието и здравствениот систем.Радев порача и дека Бугарија ќе продолжи да ги почитува своите обврски во рамките на ЕУ и НАТО, и покрај чувствителните политички теми поврзани со војната во Украина и односите со Москва.Неговата партија „Прогресивна Бугарија“ победи на предвремените парламентарни избори одржани на 19 април, освојувајќи доволно пратеници за самостојно формирање влада.

Балкан | пред 3 седмици

Бугарскиот парламент денеска гласа за новата влада на Радев

Народното собрание на Бугарија денеска треба да гласа за предлог-составот на новата влада на Румен Радев, чија партија Прогресивна Бугарија освои апсолутно мнозинство на последните парламентарни избори.В.д. претседателката Илијана Јотова вчера му го предаде мандатот за состав на влада на Радев, кој веднаш го претстави предлогот за новиот владин кабинет.Предложената владина структура предвидува четворица вицепремиери и 18 министри, а се планира и преструктурирање на ресорите за економија, иновации и електронско управување во две министерства.„Ова не е само оптимизација и кратење на администрацијата, туку и обид да се подобри работата на владата, да се создадат подобри услови за инвестиции и бизнис, како и да се забрза дигитализацијата“, изјави Радев.Партијата „Прогресивна Бугарија“ освои 131 пратеник во 240-члениот парламент, што ѝ овозможува самостојно да формира влада.Дел од опозициските партии, меѓу кои ГЕРБ-СДС, Демократска Бугарија, Продолжуваме со промената и Преродба, веќе најавија дека нема да го поддржат новиот кабинет, додека од ДПС засега нема официјален став.На денешната седница на парламентот, покрај изборот на новата влада, пратениците ќе расправаат и за формирање привремени комисии за буџет и финансии, како и за правни прашања.

Балкан | пред 4 седмици

„Подземен град“ со канабис: Откриена огромна плантажа во напуштен рудник во Бугарија

Бугарската полиција откри огромна плантажа со канабис сместена во 20 подземни галерии во напуштен рудник за цинк. Како што информираа официјалните лица, во акцијата се обвинети три лица, додека по едно се уште се трага.Заменик-директорот на Генералната дирекција за борба против организираниот криминал, Емил Борисов, соопшти дека се запленети 70 килограми дрога, 600.000 евра во кеш и 600 парчиња муниција.„Поранешниот рудник бил опремен со високотехнолошка инфраструктура и веројатно се користел за производство на големо наменето за шверц во странство“, рече Борисов.Заменик-градскиот обвинител Вихар Михаилов појасни дека рудникот располага со повеќе од 20 тунели, а сопственикот на објектот во моментов не е меѓу обвинетите. Фотографиите од теренот покажуваат дека галериите биле претворени во современи оранжерии, но и во простории за живеење, кујни и магацини.„Ова е подземен град со објекти. Истрагата е во тек и веројатно ќе трае со месеци. Очекуваме помош од разни организации, експерти за рударство“, изјави Дарин Костов од Дирекцијата за рударство.Според пишувањата на бугарските медиуми, двајца осомничени веќе се во притвор. Едниот се товари за дистрибуција на 67 килограми дрога, додека другиот за перење пари и нелегално поседување муниција. Сите четворица се соочуваат со обвиненија за кривичен заговор.

Свет | пред 1 месец

Во напуштен рудник во Бугарија откриена голема нелегална плантажа со канабис

Бугарските власти откриле голема нелегална плантажа со канабис во напуштен рудник за цинк, сместена во повеќе од 20 подземни галерии, при што се води истрага против повеќе лица, а едно лице сè уште е во бегство.Според информациите од истрагата, во објектот биле пронајдени околу 70 килограми дрога, околу 600.000 евра во готово и 600 парчиња муниција. Надлежните наведуваат дека поранешниот рудник бил опремен со техничка инфраструктура и користен за производство на канабис наменет за илегална трговија.Потврдено е дека подземниот комплекс содржел повеќе од 20 тунели, дел од кои биле претворени во импровизирани оранжерии, додека во други простории престојувале лица вклучени во активностите.Истрагата е во тек, а властите најавуваат дополнителни вештачења и ангажман на експерти за рударство со цел целосно расчистување на случајот.

Балкан | пред 1 месец

Бугарија е перципирана како најголем непријател – дали тоа го сакате?, вели ексминистерот Димитров

Поранешниот министер за надворешни работи Никола Димитров упати остра порака до Бугарија од Делфи форумот, оценувајќи дека стратегијата на Софија довела до „најлоши односи меѓу двете земји што некогаш сме ги имале“.Реагирајќи на провокација од бугарски претставник од публиката дека Македонија нема друг избор освен да го прифати компромисот од 2022 година, Димитров возврати дека „нема компромис, туку пакет кој не донесе решение“.„Прашањето не е решено. Бугарија на сите анкети кај нас е најголем непријател. Дали навистина тоа го сакате? Знаете што рекол Черчил – колку и да мислите дека ви е добра стратегијата, не е лошо одвреме-навреме да си ги погледнете резултатите. А резултатите од вашата стратегија се тажни“, изјави Димитров.Тој нагласи дека вистински компромис подразбира незадоволство кај двете страни, а не ситуација во која „едната страна е еуфорична и слави“.Дебатата се отвори откако грчката професорка Марилена Копа повика Грција поактивно да се вклучи како медијатор во надминување на спорот меѓу Скопје и Софија, оценувајќи дека Атина не прави доволно за поддршка на Македонија на европскиот пат.Ова предизвика реакција од бугарски претставник, кој тврдеше дека прашањето е затворено и дека Македонија треба да ги исполни преземените обврски.Димитров, говорејќи на панелот за безбедноста во источното соседство на Европа, оцени дека процесот на проширување на Европската Унија има сериозен проблем со кредибилитетот.„Ние сме кандидат од 2005 година, а денес не сме поблиску од тогаш. Процесот беше маргинализиран, а сега повторно е актуелен поради Украина и безбедносниот контекст“, рече тој.Тој додаде дека Европа има интерес да ја интегрира Украина, но прашањето е дали ќе успее да ги исполни очекувањата, нагласувајќи дека земјите од регионот можат да придонесат со своето искуство во управување со долгиот и неизвесен процес.Делфи форумот важи за една од најголемите меѓународни конференции во Европа, со учество на илјадници претставници од политиката, бизнисот, академската заедница и медиумите.

Македонија | пред 1 месец

Лефков: Новата власт во Бугарија може да донесе стабилност во регионот

Миле Лефков, пратеник во Собранието од редовите на ВМРО-ДПМНЕ, беше гостин во денешното издание на регионалната телевизија Њусмакс, каде се осврна на темата за новата влада на источниот сосед на Македонија. Тој вели дека изборите на една суверена држава, според него се секогаш внатрешно прашање на таа држава, и  ја честиташе победата на новата влада во Бугарија. Како што вели Лефков, конечно има стабилна Влада кај источниот сосед на земјава. Тој кажа дека  патот кон ЕУ не треба да зависи од билатерални спорови, туку од тоа дали земјата ги исполнува реформите, за што кажа дека Владата предводена од ВМРО-ДПМНЕ неуморно работи на истите.„Значајно е да имаме ден стабилен сосед, којшто ќе може да преземе одговорност за своите постапки, затоа што вистинскиот пат кон ЕУ, и тоа сме го кажале, не е преку процесот на билатерални проблеми, туку преку преку процесот на исполнување на реформи кои што се задолжителни од ЕУ и конечно ќе имаме еден стабилен партнер којшто ќе треба да ја преземе одговорноста и да одговара за блокирањето на целиот регион“, вели Лефков.Тој кажа дека владите во современиот свет имаат одговорност кон своите гласачи и населението, но и дека имаат одговорност кон регионот во кој се наоѓаат.,,Бугарија и бугарската Влада, ќе може сега да изберат пат дали ќе значи стабилност во регионот, дали ќе ја продолжи соработката со Република Македонија, на оние полиња на кои што треба да ја продолжи една влада којашто работи и за своите граѓани и за регионот. Притоа мислиме на порвзувањето, на заедничката соработка на многу различни полиња, наместо она со кое што до сега се среќававме  тоа се блокади,предизвикување на проблеми“, истакна Лефков.Според него, Владата предводена од ВМРО-ДПМНЕ работи солидно во насока на исполнување на реформската агенда и сите реформи кои се наложени од европскиот пат.,,Бугарската Влада знае дека има солиден партнер во македонската Влада, се надеваме дека и тие ќе бидат на нивото на задачата и нема да влеземе во еден процес на дополнително блокирање. Она што е најважно, е тоа дека европските стандарди, европските критериуми се за доброто на народот,  за доброто на сите. Затоа што, на крајот на денот секој граѓанин има корист од поквалитетно управување со јавни финансии, секој има корист од реформа во јавната администрација. Сите граѓани имаат корист од владеење на правото и реформи во судството и сметам дека нашиот источен сосед, како земја членка на ЕУ, со новата Влада треба да ги препознае овие вредности и да работиме на подобрување на поврзаноста, инфрасттруктурата и на сите други полиња на кои што можеме да соработуваме“, заклучи Лефков.

Македонија | пред 1 месец

Дали политичката промена во Софија ќе донесе промена во односот кон Скопје

Коалицијата „Прогресивна Бугарија“ предводена од Румен Радев победи на парламентарните избори и обезбедува мнозинство во новиот состав на бугарскиот парламент. Резултатот повторно го отвора прашањето каков ќе биде односот на Софија кон Скопје во наредниот период.Според поранешниот македонски амбасадор во Софија Марјан Ѓорчев, суштински промени во бугарскиот пристап кон Македонија не се очекуваат, без разлика која политичка опција е на власт. Тој оценува дека бугарските политички фактори остануваат обединети околу клучните позиции поврзани со македонското прашање.„Ниту еден бугарски политичар не може да излезе од таа матрица кога станува збор за Македонија“, вели Ѓорчев, посочувајќи дека во Софија постои континуитет во ставовите околу идентитетските и историските прашања.Тој додава дека, за разлика од Бугарија, во Македонија недостасува политичко единство околу националните позиции во однос на овие прашања, што, според него, ја отежнува преговарачката позиција на земјата.Победата на Радев, според анализите, не се очекува да донесе радикален пресврт во билатералните односи, туку повеќе продолжување на веќе воспоставените позиции, со фокус на европската рамка, но и на заштита на бугарските национални интереси.

Македонија | пред 1 месец

Радев: „Прогресивна Бугарија“ оствари убедлива победа

Поранешниот претседател на Бугарија , Румен Радев им се заблагодари на граѓаните за поддршката на „Прогресивна Бугарија“, оценувајќи дека изборниот резултат претставува победа на надежта, слободата и моралот.Во своето обраќање, Радев упати благодарност до граѓаните во земјата и дијаспората, како и до својот тим и сите кои, како што наведе, со години стојат зад него. Тој се заблагодари и на изборните комисии и институциите, посебно на Министерството за внатрешни работи, за нивниот ангажман во спроведувањето на изборниот процес и спречувањето на изборни нерегуларности.Радев посочи дека излезноста била висока и дека апатијата е надмината, но нагласи дека недовербата во политиката сè уште е присутна. Според него, резултатот е прв чекор кон обновување на општествениот договор.Тој оцени дека „Прогресивна Бугарија“ остварила убедлива победа, додавајќи дека граѓаните ги отфрлиле, како што рече, ароганцијата и манипулациите на старите политички структури.Радев најави дека дополнителни коментари ќе следуваат по објавувањето на конечните изборни резултати.

Балкан | пред 1 месец

Радев по првите резултати: Подготвени сме за стабилна влада

Лидерот на „Прогресивна Бугарија“, Румен Радев, по објавувањето на првичните резултати од излезните анкети изјави дека неговата формација е подготвена да работи на формирање стабилна влада и да избегне нов изборен циклус.„Ние сме подготвени на различни варијанти, за да има Бугарија редовна и стабилна влада. Ќе направиме сè што е можно да не дозволиме повторно избори. Тоа е погубно за Бугарија, значи да преминуваме од криза во криза, а ние треба сериозно да работиме за да излеземе од нив“, изјави Радев.Тој додаде дека неговата партија не очекувала да биде прва според анкетите, но дека поддршката од теренот била јасен сигнал за расположението кај граѓаните.„Мојата ‘социологија’ беа полните сали и плоштади низ целата земја. Тоа беше нормално и закономерно. Очекувањата и надежите се големи, а тоа значи и голема одговорност“, рече Радев.На прашањето за можни коалициски партнери, тој посочи дека се надева на соработка со коалицијата ПП–ДБ, особено во делот на реформите во правосудството.Во меѓувреме, Антон Кутев, кој исто така ја коментираше победата на „Прогресивна Бугарија“, изјави дека целта на движењето не е само учество во власта, туку суштински промени.„Ние не се појавивме за да бидеме на власт, туку за да ја промениме Бугарија. Сакаме да најдеме партнер со кој ќе составиме влада и ќе направиме промени во судскиот систем“, изјави Кутев.Тој додаде дека според него, нема попогоден кандидат за премиер од самиот Румен Радев.

Свет | пред 1 месец

„Прогресивна Бугарија“ на Радев убедливо води на изборите во Бугарија

Предвремените парламентарни избори во Бугарија донесоа убедлива победа за партијата „Прогресивна Бугарија“, предводена од Румен Радев, покажуваат првичните резултати од излезните анкети објавени по затворањето на избирачките места.Според анкетата на агенцијата „Мерка“, спроведена во 19 часот и презентирана на Бугарското национално радио, „Прогресивна Бугарија“ освоила 38,7 отсто од гласовите. На второто место е ГЕРБ-СДС со 14,8 проценти, додека трета е коалицијата „Продолжуваме со промената – Демократска Бугарија“ со 13,1 процент.Во парламентот, според овие резултати, би влегле уште „ДПС – Нов почеток“ со 9,2 отсто, „Преродба“ со 5,3 проценти и „БСП – Обединета левица“ со 4 проценти.Слични резултати покажува и истражувањето на „Маркет линкс“, според кое „Прогресивна Бугарија“ добила 38,9 проценти, ГЕРБ-СДС 15,4 отсто, а ПП-ДБ 13,6 проценти. Излезноста до 19 часот била 47,2 проценти.Според проекциите за распределба на мандати, „Прогресивна Бугарија“ би имала 110 пратеници, ГЕРБ-СДС 44, ПП-ДБ 39, „ДПС – Нов почеток“ 21, „Преродба“ 14 и „БСП – Обединета левица“ 12 мандати.И анкетата на „Алфа Рисрч“ потврдува водство на Радевата партија со 37,5 проценти, пред ГЕРБ-СДС со 16,2 и ПП-ДБ со 14,3 проценти.Лидерот на „Прогресивна Бугарија“, Румен Радев, изјави дека очекувале победа, но нагласи дека ќе ги почека конечните резултати, како и гласовите од странство.„Ќе направиме сè што е можно за да избегнеме нови избори“, изјави Радев, алудирајќи на можноста за формирање стабилна влада.

Свет | пред 1 месец