ТРАМП

Агенти го убија мажот кој упадна на имотот на Трамп

Припадници на американската Тајна служба го застрела 21-годишниот Остин Такер Мартин, откако вчера вооружен со пушка упаднал на имотот Мар-а-Лаго во Палм Бич, во американската сојузна држава Флорида. Во моментот на инцидентот, американскиот претседател Доналд Трамп не се наоѓал на поседот. Истрагата за мотивите на овој смртоносен инцидент е во тек.Федералното истражно биро ја насочило истрагата кон движењето и можните мотиви на напаѓачот. Според полицискиот извештај, Мартин во рамки на безбедносниот периметар се соочил со агенти на Тајната служба и заменик на локалниот шериф. Тој бил убиен откако околу 1:30 часот по полноќ ја подигнал пушката и ја насочил кон агентите.Мартин неодамна матурирал, а се верува дека во саботата попладне пристигнал на Флорида од својот дом во Северна Каролина, набавувајќи оружје по пат. „Њујорк тајмс“ објави дека минатата година ја основал сопствената компанија „Фреш Скај Илустрејшнс“, која се занимавала со продажба на оригинални цртежи на голф-терени.Порталот ТМЗ објави дека Мартин станал сè поопседнат со случајот на Џефри Епстајн — осрамотениот финансиер и сексуален престапник кој бил пријател со Трамп и со други влијателни личности — по неодамнешното објавување документи поврзани со неговиот случај. Според порталот, тој испратил порака до колега во која напишал дека „злото е реално и недвосмислено“ и повикал да се подигне јавната свест за случувањата.Мартин потекнувал од Камерон, во Северна Каролина, каде што роднините го опишале како тивка личност и генерално противник на оружјето. Неговиот братучед Браеден Филдс изјавил за „Асошиејтед прес“ дека семејството силно го поддржувало Доналд Трамп, додавајќи дека Мартин ретко зборувал за политика. Тој исто така навел дека младиот човек редовно донирал дел од својата месечна заработка во добротворни цели.Семејството за време на викендот пријавило дека Мартин исчезнал, по што канцеларијата на шерифот во округот Мур, Северна Каролина, рано во неделата ја внела пријавата во националната база на исчезнати лица.Трамп не бил во Мар-а-Лаго за време на викендот и засега не го коментирал инцидентот. Тој претходно беше цел на два обиди за атентат за време на претседателската кампања во 2024 година, од кои едниот се случи во голф-клубот „Трамп интернешнл“ во Вест Палм Бич, на неколку километри од Мар-а-Лаго.Рајан Раут, кој во септември 2024 година бил забележан како нишани со пушка од грмушки во близина на местото каде што претседателот играл голф, беше осуден и неодамна му беше изречена доживотна затворска казна.Портпаролката на Белата куќа, Каролин Левит, соопшти дека Мартин кај себе имал и канистер со бензин. „Среде ноќта, додека повеќето Американци спиеја, Тајната служба на Соединетите Американски Држави брзо и одлучно неутрализираше вознемирено лице кое провалило во домот на претседателот Трамп“, изјави таа.

Свет | пред 3 месеци

Аргачи: Ве интересира зошто не капитулиравме? Бидејќи сме Иранци

Иранскиот министер за надворешни работи Абас Арагчи му одговори на специјалниот пратеник на претседателот на САД Доналд Трамп, Стив Виткоф, кој рече дека Трамп е љубопитен зошто Иран сè уште не капитулирал под притисок.„Ве интересира зошто не капитулиравме? Бидејќи сме ИРАНЦИ“, напиша шефот на иранската дипломатија во објава на Икс.Во неодамнешно интервју за Fox News, Виткоф вели дека Трамп го поставува прашањето зошто Техеран не „капитулирал“ и покрај тоа што тој го опишува како значајна американска поморска и морска сила распоредена во регионот.„Претседателот ме праша ова утрово и тој е – не сакам да го користам зборот фрустриран... бидејќи разбира дека има многу алтернативи, но... љубопитен е зошто не капитулираа.“Тој наведува дека Вашингтон очекува од Иран формално да изјави дека не тежнее кон нуклеарно оружје и да преземе конкретни чекори за да го докаже тоа.

Свет | пред 3 месеци

ЕУ бара објаснување од САД по поништувањето на глобалните царини

Европската комисија побара од Соединетите Американски Држави да се придржуваат до условите на трговскиот договор меѓу ЕУ и САД постигнат минатата година.Европската комисија, која преговара за трговската политика во име на 27-те земји членки на ЕУ, соопшти дека Вашингтон мора да даде јасни информации за чекорите кои планира да ги преземе по одлуката на судот, пренесува Ројтерс.По поништувањето на Трамповите глобални царини во петокот, американскиот претседател најави привремени, општи царини од 10%, кои веќе наредниот ден ги зголеми на 15%.„Тековната ситуација не е погодна за остварување на „праведна, израмнета и меѓусебно корисна“ трансатлантска трговија и инвестиции, како што се договорија двете страни во заедничкото соопштение кое ги утврди условите на минатогодишниот трговски договор“, наведува ЕК.Ова соопштение е значително поостро од првичната реакција на ЕК во петокот, кога само наведоа дека ја проучуваат одлуката на Врховниот суд на САД и се во контакт со американската администрација.Минатогодишниот трговски договор предвидува царинска стапка од 15% во САД за поголемиот дел од стоката од ЕУ, освен за производите опфатени со посебни секторски царини, како челикот.Исто така, договорот овозможи нулта царина за одредени производи, како авиони и резервни делови.ЕУ се обврза да ги укине увозните давачки за многу американски производи и ја повлече заканата за воведување возвратни повисоки царини.„Конкретно, производите од ЕУ мора и понатаму да имаат најповолен третман, без зголемување на царините над јасно и сеопфатно договорениот максимум“, наведува Европската комисија, додавајќи дека непредвидливите царини се деструктивен фактор и ja поткопуваат довербата на глобалните пазари.ЕК соопшти дека европскиот комесар за трговија Марош Шефчовиќ во саботата разговарал за ова прашање со американскиот претставник за трговија Џејмисон Грир и со министерот за трговија Хауард Лутник.

Свет | пред 3 месеци

(Видео) Зеленски до Трамп: Не сум диктатор и не ја започнав војната

Украинскиот претседател Володимир Зеленски повторно, во интервју за Би-Би-Си, ги коментираше претходните изјави на американскиот претседател Доналд Трамп, во кои сугерираше дека е диктатор и дека носи одговорност за војната.Водителот потсети на контрадикторните изјави на Трамп, вклучувајќи ја и онаа во која го нарече Зеленски „диктатор“ кој ја започнал војната, што, како што беше нагласено, одекнуваше со тврдењата на рускиот претседател Владимир Путин.„Јас не сум диктатор и не ја започнав војната. Тоа е тоа“, одговори Зеленски со насмевка.Во интервјуто се говореше и за преговорите, вклучително и посетите на Москва од специјалниот пратеник на Трамп, Стив Виткоф, како и за загриженоста дека Соединетите Американски Држави би можеле да бидат под влијание на руски наративи.Зеленски посочи дека Виткоф почесто се среќава со украинската страна отколку со руската и дека имал повеќе средби со Трамп отколку со Путин.Зеленски рече дека верува оти Соединетите Американски Држави треба да ја запрат Русија, а не да се обидуваат да ѝ угодат.Тој заклучи дека Русија дејствува првенствено водена од сопствените интереси.

Свет | пред 3 месеци

(Видео) Инцидент во резиденцијата на Трамп: Тајната служба употреби оружје

Агенти на Тајна служба на САД и заменик-шериф од Канцеларијата на шерифот на округот Палм Бич застрелале вооружен маж кој рано утринава незаконски влегол во обезбедениот периметар на комплексот Mar-a-Lago во Флорида.Според соопштението објавено на платформата „Икс“, станува збор за маж на возраст од околу 20 години, кој бил забележан кај северната капија на имотот. Тој бил застрелан на лице место.Надлежните информираат дека лицето носело пиштол и канистер. Во инцидентот нема повредени припадници на Тајната служба ниту на локалната полиција.Потенцијалниот мотив, околностите на настанот и оправданоста на употребата на сила ги истражуваат ФБИ, Тајната служба на САД и Канцеларијата на шерифот на округот Палм Бич.Во согласност со внатрешните процедури, агентите кои учествувале во интервенцијата ќе бидат ставени на рутинско административно отсуство додека трае истрагата.

Свет | пред 3 месеци

Нема фотографија

Поддршката за Трамп на 39 отсто, мнозинството смета дека ги пречекорил овластувањата

Непосредно пред обраќањето до нацијата на претседателот на САД, Доналд Трамп, новата анкета што ја спроведоа „Вашингтон пост“, „Еј-би-си њуз“ и „Ипсос“ покажува дека мнозинството Американци не го одобруваат неговото работење и сметаат дека ги пречекорил овластувањата на функцијата.Според резултатите, 39 отсто од испитаниците го поддржуваат Трамп, додека 60 отсто не го поддржуваат, при што 47 отсто изразуваат силно неодобрување. Кај регистрираните гласачи поддршката изнесува 41 отсто, а противењето 58 отсто. Негативните оценки се прошируваат и на конкретни области, како економијата, царините, инфлацијата и надворешната политика. Најслаби резултати бележи во справувањето со инфлацијата, каде само 32 отсто ги одобруваат неговите потези.Кога станува збор за целокупното управување со економијата, 41 отсто од анкетираните изразуваат поддршка. Иако разликата меѓу позитивните и негативните оценки се намалила во споредба со октомври, расположението останува претежно критичко. Речиси две третини од испитаниците, односно 65 отсто, сметаат дека Трамп ги пречекорил своите овластувања, што претставува пораст во однос на почетокот на мандатот.Мнозинство од 56 отсто не веруваат дека е посветен на заштитата на правата и слободите на граѓаните, а 62 отсто сметаат дека ја користи функцијата за лично збогатување. Дополнително, 56 отсто оценуваат дека администрацијата не била транспарентна во објавувањето на владините документи поврзани со истрагата за Џефри Епстајн.Анкетата покажува дека Американците се поделени околу прашањето за имиграцијата. Тесно мнозинство од 50 наспроти 48 отсто го поддржува повикот за депортација на милиони имигранти без документи, но 58 отсто сметаат дека Трамп оди предалеку во спроведувањето на таквите мерки. Околу 60 отсто се противат на тактиките што ги применува имиграциската служба.Во однос на економската состојба, 48 отсто од испитаниците сметаат дека економијата се влошила откако Трамп ја презел функцијата, додека 29 отсто оценуваат дека се подобрила. Само 22 отсто велат дека лично се во подобра финансиска состојба, 33 отсто дека им е полошо, а 44 отсто не гледаат промена.Царинската политика останува непопуларна – 34 отсто ја одобруваат, а 64 отсто не. Дополнително, Врховен суд на САД неодамна ги укина царините, оценувајќи дека претседателот ги наметнал надвор од своите овластувања.Поддршката кај републиканците и натаму е висока, но се забележуваат пукнатини – 48 отсто од нив сега силно го одобруваат неговото работење, што е пад во однос на минатата година. Истовремено, 70 отсто од анкетираните сметаат дека не е искрен и доверлив, а 56 отсто оценуваат дека му недостасува ментална подготвеност за ефикасно извршување на функцијата.Резултатите ја отсликуваат длабоката поларизација во американското општество во пресрет на нови политички одлуки и можни надворешнополитички потези на администрацијата.

Свет | пред 3 месеци

Гренланд повторно во фокусот на Трамп: „На пат е!!!“

Гренланд повторно се најде во центарот на вниманието на американскиот претседател Доналд Трамп, кој на својата социјална мрежа „Трут соушал“ објави дека испраќа болнички брод кон овој арктички остров.Трамп наведе дека во соработка со гувернерот на Луизијана, Џеф Лендри – кого го претстави и како специјален пратеник на САД за Гренланд – ќе испрати голем болнички брод за да се „погрижи за бројните болни луѓе за кои никој не се грижи“. Во објавата, придружена со АИ-слика од бродот УСНС „Мерси“, напиша: „На пат е!!!“.Сепак, засега нема официјална потврда дека некој од двата американски болнички брода навистина плови кон Гренланд. Според податоците од поморските сервиси, и УСНС „Мерси“ и УСНС „Комфорт“ се наоѓаат на ремонт во бродоградилиште во Мобајл, Алабама.Данскиот министер за одбрана Троелс Лунд Поулсен изјави дека Копенхаген нема никакви информации за испраќање болнички брод. Тој нагласи дека нема потреба од посебна здравствена интервенција на Гренланд и дека локалните власти, со поддршка од Данска, обезбедуваат соодветна здравствена грижа.Објавата на Трамп дојде неколку часа по евакуацијата на член на екипажот на американска подморница, кој побарал итна медицинска помош на седум наутички милји од главниот град Нук. Евакуацијата ја спроведе хеликоптер „Сихок“ на данската одбрана, а морнарот бил пренесен во болница во Нук.Паралелно со здравствената тема, Трамп во изминатите месеци повеќепати повторува дека сака САД да го „преземат“ Гренланд, нарекувајќи го од клучно значење за националната безбедност. Данска остро ги отфрли таквите изјави, нагласувајќи дека Гренланд не е на продажба и дека неговата иднина ја одлучуваат неговите жители.Европската унија застана зад Данска, а генералниот секретар на НАТО, Марк Руте, порача дека Арктикот треба да остане зона на соработка, а не на конфронтација.Иако САД во просек имаат подобри здравствени показатели од Гренланд, островот функционира со јавно финансиран здравствен модел, со поинаква организација и поголем број болнички кревети по глава на жител. Засега останува нејасно дали објавата на Трамп претставува конкретна оперативна одлука или дел од поширока политичка порака во контекст на неговите амбиции поврзани со Гренланд.

Свет | пред 3 месеци

Трамп најави испраќање болнички брод кон Гренланд, Данска тврди дека нема никакви информации

Гренланд повторно се најде во фокусот на американскиот претседател Доналд Трамп, кој преку објава на својата социјална мрежа „Трут Соушал“ соопшти дека САД испраќаат болнички брод кон островот.Трамп наведе дека во соработка со гувернерот на Луизијана, Џеф Ландри, кој воедно е и специјален пратеник на САД за Гренланд, ќе биде испратен голем болнички брод со цел, како што напиша, „да се згрижат бројните болни луѓе за кои никој не се грижи“. Во објавата, придружена со вештачки генерирана фотографија од бродот „УСНС Мерси“, која ја сподели и Ландри, американскиот претседател порача: „На пат е!!!“.Сепак, голем дел од информациите остануваат нејасни. Дописникот на данската државна телевизија од САД, Јакоб Крог, изјави дека не е познато зошто Трамп ја објавил информацијата токму сега, ниту дали болничкиот брод навистина се упатил кон Гренланд.Данскиот министер за одбрана Троелс Лунд Поулсен изјави дека Данска нема никакви сознанија за испраќање болнички брод и нагласи дека жителите на Гренланд ја добиваат целата потребна здравствена грижа.„Нема потреба од посебна здравствена интервенција на Гренланд. Владата на Гренланд веќе се грижи за тоа, а Данска би интервенирала доколку има потреба“, изјави Поулсен.Американската морнарица располага со два болнички брода — „УСНС Мерси“ и „УСНС Комфорт“. Според податоците од сервисите за следење бродови, „Мерси“ моментално се наоѓа во бродоградилиште во американскиот град Мобил, додека „Комфорт“ пред околу две недели бил лоциран на истото место. Бродоградилиштето „Алабама Шипјард“ во јануари објави фотографија на која двата брода се на ремонт, што дополнително ги доведува во прашање тврдењата дека некој од нив е испратен кон Гренланд.Данската телевизија побарала коментар и од министерот за надворешни работи Ларс Локе Расмусен, како и од американската амбасада во Копенхаген, но официјален одговор не бил добиен.Според достапните здравствени показатели, САД имаат подобри просечни резултати во однос на очекуваниот животен век и смртноста кај новороденчињата. Просечниот животен век во САД изнесува околу 79 години, додека во Гренланд околу 74 години. Смртноста кај доенчињата во САД изнесува околу 5,6 случаи на 1.000 живородени, наспроти околу 9 на 1.000 во Гренланд.Од друга страна, здравствениот систем на Гренланд е јавно финансиран и основните услуги се достапни без класични премии и партиципации, додека американскиот систем во голема мера се потпира на комбинација од приватно и јавно осигурување, што создава поголем финансиски товар за граѓаните. Интересно е и што Гренланд располага со значително повеќе болнички кревети по жител — околу 14 на 1.000 жители, наспроти 2,7 во САД.Во последните месеци Трамп повеќепати јавно повтори дека сака САД да го преземат Гренланд, автономна територија под данска управа. На почетокот на јануари изјави дека островот е од клучно значење за националната безбедност на САД и дека Вашингтон „на овој или оној начин“ ќе го добие.Тој не ја исклучи можноста за економски или политички притисок врз Данска, иако подоцна на Светскиот економски форум во Давос изјави дека нема намера да употреби сила.Еден од неговите највлијателни советници, Стивен Милер, во интервју за Си-Ен-Ен изјави дека Гренланд треба да стане дел од САД, додавајќи дека „никој нема да војува со нас за иднината на Гренланд“, што предизвика остри реакции во Данска.Данските власти повеќепати ги отфрлија ваквите предлози. Данскиот премиер порача дека „Гренланд не е на продажба и нема да биде“, нагласувајќи дека иднината на островот ја одлучуваат неговите жители. Премиерот на Гренланд, Јенс-Фредерик Нилсен, исто така изјави дека територијата не сака да биде „дански или американски пион“.Европската унија застана зад Данска, при што претседателката на Европската комисија Урсула фон дер Лајен порача дека Унијата целосно го поддржува суверенитетот и територијалниот интегритет на земјата.Генералниот секретар на НАТО, Марк Руте, повика на смирување на тензиите, истакнувајќи дека Арктикот треба да остане простор на соработка, а не конфронтација, со почитување на меѓународното право и суверенитетот на државите.

Свет | пред 3 месеци

Прва реакција од Париз: Макрон за новите царини на Трамп

Францускиот претседател Емануел Макрон ја коментираше одлуката на Врховниот суд на САД со која беше поставена пречка за царинската политика на американскиот претседател Доналд Трамп, оценувајќи дека е „добро“ што во САД постојат механизми на проверка и рамнотежа на власта.Говорејќи за време на посетата на земјоделски саем во Париз, Макрон ја нагласи важноста на владеењето на правото и институционалните механизми во демократските системи.„Добро е што во демократиите постојат власт и противтежа на власта. Тоа треба да се поздрави“, изјави францускиот претседател.Во однос на најавата на Трамп за воведување глобална царинска стапка од 15 отсто, Макрон посочи дека Франција внимателно ќе ја анализира новонастанатата ситуација.„Ќе ги проучиме точните последици, што може да се направи и ќе се приспособиме“, рече тој.Макрон додаде дека „најправичните можни правила подразбираат заемност, а не трпење еднострани одлуки“. Според него, доколку новите мерки придонесат за смирување на состојбата, тоа е позитивно, но приоритет треба да биде намалување на меѓународните тензии и продолжување со модернизацијата на националните економии.

Свет | пред 3 месеци

Нов трговски удар од Вашингтон: Трамп ги зголеми глобалните царини на 15 отсто

Американскиот претседател Доналд Трамп денеска објави дека со итен ефект ги зголемува глобалните царини од 10 на 15 отсто, повикувајќи се на овластувањата од американскиот Закон за трговија. Одлуката следува само еден ден откако Врховниот суд на САД пресуди дека неговите претходни „реципрочни“ царини биле незаконски, бидејќи немале соодветна законска основа.Врховниот суд оцени дека претседателот не може во толкав обем да се повикува на Законот за меѓународни вонредни економски овластувања од 1977 година за воведување широки глобални царини без јасно одобрување од Конгресот. Трамп ја критикуваше пресудата, а веќе денес најави нова стапка, тврдејќи дека станува збор за „правно проверена“ мерка.Првата реакција пристигна од Франција. Францускиот претседател Емануел Макрон, за време на посетата на земјоделски саем во Париз, изјави дека е добро што во САД постојат механизми на контрола и рамнотежа меѓу властите.„Добро е што во демократиите постојат механизми на власт и противтежа на власта. Тоа треба да се поздрави“, рече Макрон.Во однос на најавената глобална царинска стапка од 15 отсто, францускиот претседател посочи дека Париз внимателно ќе ги анализира последиците. „Ќе ги проучиме точните ефекти, што може да се направи и ќе се приспособиме“, изјави тој.Макрон нагласи дека „најправичните можни правила подразбираат заемност, а не трпење еднострани одлуки“. Според него, доколку новата мерка придонесе за смирување на ситуацијата, тоа е позитивно, но приоритет треба да биде намалување на меѓународните тензии и модернизација на националните економии.Одлуката на Трамп повторно ги отвора прашањата за стабилноста на глобалниот трговски систем и можните контрамерки од европските и други партнери, во време кога светската економија и натаму се соочува со сериозни предизвици.

Свет | пред 3 месеци

Нема фотографија

Трамп на работ на војна со Иран пред клучните избори, се соочува со голем политички ризик

Претседателот на Доналд Трамп ги доведе Соединетите Американски Држави на работ на воен судир со Иран, и покрај повиците од соработниците да се насочи кон економските проблеми на гласачите, објави Reuters. Воената ескалација носи сериозен политички ризик пред претстојните конгресни избори, а засиленото внимание кон Иран стана најјасен показател дека надворешната политика и сè почестата употреба на воена сила доминираат во неговиот втор мандат.Според извештајот, ова прашање ги засенува домашните теми како што се трошоците за живот, кои според анкетите се многу повисок приоритет за мнозинството Американци. Трамп нареди зголемено распоредување на воени сили на Блискиот Исток и подготовки за можни повеќедневни воздушни напади, но засега нема детално објаснување до јавноста зошто земјата би влегла во најагресивен конфликт со Исламската Република од револуцијата во 1979 година.Висок претставник на Белата куќа изјавил дека и покрај острата реторика, во администрацијата нема целосна согласност околу евентуален напад врз Иран. Советниците и раководителите на изборната кампања сметаат дека фокусот треба да биде ставен на економијата, што било нагласено и на неодамнешна средба со дел од кабинетот, на која Трамп не присуствувал.Изборите во ноември ќе одлучат дали Републиканската партија ќе ја задржи контролата врз двата дома на Конгресот. Стратегот Роб Годфри предупредува дека долготраен судир со Иран би претставувал значителен политички ризик, бидејќи дел од гласачката база на Трамп е скептична кон странски воени ангажмани и се повикува на неговото ветување за ставање крај на „бескрајните војни“.Во рамки на движењето „Направи ја Америка повторно голема“ постојат различни ставови, но дел од поддржувачите ја поздравија неодамнешната брза акција против венецуелскиот претседател Николас Мадуро. Сепак, евентуален судир со Иран, како посилен противник, би можел да предизвика поголем отпор.Трамп повеќепати предупреди дека Иран мора да постигне договор за својата нуклеарна програма, нагласувајќи дека Техеран не смее да поседува нуклеарно оружје ниту капацитет за негово производство. И покрај тоа, критичарите посочуваат дека аргументите за можен напад остануваат нејасни и променливи.Анкетите покажуваат ограничена поддршка за нова војна во странство, додека економските прашања и понатаму доминираат кај гласачите. Аналитичарите оценуваат дека начинот на кој претседателот ќе се справи со кризата со Иран може да има значајно влијание врз исходот од изборите и врз политичката стабилност во наредниот период.

Свет | пред 3 месеци

Хонг Конг: Новите царини на Трамп се можност за нашата економија

Одлуката на американскиот претседател Доналд Трамп за воведување нова царина од 10 отсто на увозот во САД ќе има позитивен ефект врз позицијата на Хонг Конг како регионален трговски центар, изјави висок градски функционер.Секретарот за финансиски услуги и трезор на Хонг Конг, Кристофер Хуи, оцени дека актуелната царинска политика во САД претставува „фијаско“, но истовремено отвора простор за истакнување на специфичните трговски предности на градот. Тој посочи дека новата глобална царина ја нагласува улогата на Хонг Конг како флексибилна и конкурентна економија во услови на променлива меѓународна трговска средина.Во меѓувреме, властите на Тајван соопштија дека внимателно ја следат одлуката на Врховен суд на САД во врска со тарифите, како и спроведувањето на фиксната глобална царина од 10 отсто што ја воведе администрацијата на Трамп.Од кабинетот на островската влада наведоа дека првичниот ефект врз Тајван засега изгледа ограничен, но нагласија дека ќе продолжат со внимателно следење на состојбата и со блиска комуникација со американските власти. Целта, како што посочија, е навремено разбирање на конкретните механизми на спроведување на мерките и соодветно приспособување на економската политика.Реакциите од Азија укажуваат на внимателна проценка на последиците од новите американски трговски мерки, во време кога глобалната економија се соочува со зголемена неизвесност и редефинирање на трговските односи.

Свет | пред 3 месеци

Трамп воведе глобална царина од 10 отсто, мерките стапуваат на сила следната недела

Американскиот претседател Доналд Трамп соопшти дека потпишал извршни наредби за воведување глобална царина од 10 отсто на увоз од сите земји, која, како што наведе, ќе стапи на сила речиси веднаш.Трамп објави дека документите ги потпишал во Овалната соба, нагласувајќи дека мерката претставува значаен чекор во економската политика на неговата администрација. Новите царини ќе започнат да се применуваат од 24 февруари и се засноваат на член 122 од Законот за трговија од 1974 година.Одлуката следува откако Врховен суд на САД ги поништи претходните сеопфатни царини воведени врз основа на Законот за меѓународни вонредни економски овластувања од 1977 година, оценувајќи дека тој правен основ не може да се користи за ваков вид трговски мерки. Белата куќа соопшти дека дел од претходните тарифни мерки ќе бидат укинати, но новите ќе ја заменат нивната суштина со поинаква правна рамка.Според новите наредби, продолжуваат одредени изземања, меѓу кои за воздухопловни производи, патнички возила и дел од лесните товарни возила, како и за одредени производи од Мексико и Канада во рамки на трговскиот договор со САД. Исклучоци се предвидени и за фармацевтски производи, критични минерали и одредени земјоделски артикли.Американскиот министер за финансии Скот Бесент изјави дека новите царини од 10 отсто, како и можните дополнителни мерки според член 301 за нефер трговски практики и член 232 за национална безбедност, ќе резултираат со речиси непроменети приходи од царини во 2026 година. Тој додаде дека администрацијата располага со алтернативни механизми за заштита на економските интереси на земјата.Член 122 овозможува воведување царини до 15 отсто во период до 150 дена без спроведување истрага, со образложение дека постои „голем и сериозен“ проблем во платниот биланс. За продолжување на мерките по истекот на тој рок потребно е одобрување од Конгресот.Трамп најави и нови истраги насочени кон одделни земји врз основа на член 301 од Законот за трговија, со цел справување со нефер трговски практики. Истраги веќе се покренати против Кина и Бразил, а можни цели се и други големи трговски партнери, вклучително и Виетнам и Канада.Со новите потези, администрацијата настојува да ја зачува трговската стратегија и преговарачката позиција, и покрај ограничувањата поставени со судската одлука.

Свет | пред 3 месеци

Американскиот министер за финансии: Судот нема да ги запре царините на Трамп

Американскиот министер за финансии Скот Бесент изјави дека судската пресуда нема да ја запре царинската стратегија на претседателот Доналд Трамп и дека администрацијата веднаш ќе се префрли на други достапни овластувања.Во објава на социјалната мрежа Икс, Бесент порача дека Трамп „секогаш ќе ја става на прво место националната безбедност на Америка и американските граѓани“, додавајќи дека претседателот располага со повеќе правни инструменти.„Да бидеме јасни: Судот не пресуди против царините на оваа администрација. Само утврди дека Законот за меѓународни вонредни економски овластувања не може да се користи за прибирање приходи“, нагласи Бесент.Изјавата следува по одлуката на Врховниот суд со која беше утврдено дека претседателот ги надминал своите овластувања кога се повикал на овој закон за воведување сеопфатни царини. Администрацијата најавува дека ќе продолжи со спроведување на царинските мерки врз основа на други законски механизми.

Свет | пред 3 месеци

Нема фотографија

Трамп: Не планираме враќање на средствата од царините

Американскиот претседател Доналд Трамп изјави дека неговата администрација не планира да враќа средства наплатени врз основа на царините што беа поништени од Врховниот суд, најавувајќи дека прашањето ќе заврши во долготрајни судски постапки.По пресудата со која судот утврди дека еднострано воведените царини биле незаконски, во фокусот се најде можниот поврат на средствата што американските увозници ги плаќале во изминатата година. Тие би можеле да побараат враќање на парите од Американската царинска и гранична служба.Според проценка на економистите од моделот Пен-Вортон за буџетска анализа, потенцијалниот трошок за федералната влада би можел да достигне околу 175 милијарди долари.Еден од судиите, Брет Кавано, кој беше во малцинство при донесувањето на одлуката, наведе дека Соединетите Американски Држави можеби ќе треба да вратат милијарди долари на увозниците што ги платиле царините, иако дел од нив можеби веќе ги префрлиле трошоците врз потрошувачите.Во јавноста се оценува дека процесот на евентуален поврат на средствата би можел да предизвика правен и административен хаос. Запрашан дали администрацијата ќе ги почитува можните обврски за враќање на парите, Трамп изјави дека очекува споровите да траат со години и ја оцени судската одлука како „страшна“ и „целосно погрешна“.Тој додаде дека прашањето не е дополнително разгледувано и дека, според него, целата тема ќе се решава пред судовите во наредните години.

Свет | пред 3 месеци

Трамп пресудата ја нарече „срамна“, најави извршна уредба за нови глобални царини

Врховниот суд на Соединетите Американски Држави пресуди дека претседателот Доналд Трамп го прекршил федералниот закон кога еднострано вовел сеопфатни царини на глобално ниво, оценувајќи дека за таков потег немал соодветно законско овластување.Одлуката претставува тежок удар за Белата куќа во прашање кое е клучно за надворешната и економската политика на претседателот. Според американските медиуми, станува збор за една од најзначајните пресуди против втората администрација на Трамп.На прес-конференција, Трамп ја нарече одлуката „срамна“ и најави дека ќе воведе нови глобални царини од 10 отсто преку друга извршна уредба, за која, како што тврди, не е потребна согласност од Врховниот суд.Поништените „реципрочни царини“ биле воведени повикувајќи се на Законот за меѓународни вонредни економски овластувања од 1977 година, кој му дозволува на претседателот да замрзнува имот и да блокира трансакции во услови на вонредна состојба, но во него не се споменуваат царини како инструмент.Трамп изјави дека ќе продолжи да ја спроведува својата економска агенда, додавајќи дека постојат „методи, практики, закони и овластувања“ кои, според него, се „дури и посилни“ од механизмите на кои се повикал претходно.Новата глобална царина од 10 отсто би се вовела врз основа на федерален закон што дозволува вакви мерки во ограничен рок од 150 дена. Доколку Конгресот го поддржи планот, мерката би можела да биде продолжена со законска процедура.

Свет | пред 3 месеци

Трамп за одлуката на Врховниот суд: „Срамота“

Американскиот претседател Доналд Трамп ја оцени како „срамна“ одлуката на Врховниот суд на САД, кој го поништи големиот дел од царините воведени со користење вонредни овластувања. Според извори на „Хил“, Трамп го кажал тоа за време на приватна средба со гувернерите во петокот, додека ги примаше на појадок во Белата куќа.Одлуката на судот, донесена со резултат 6 спрема 3, ги отфрли проширените овластувања на Трамп според Законот за меѓународни економски овластувања во вонредни состојби (ИЕЕПА), со кои тој воведуваше царини за речиси сите земји. Законот од 1970-те му дозволува на претседателот да регулира трговија како одговор на „невообичаена и извонредна“ закана за националната безбедност.Претседателот на Врховниот суд, Џон Робертс, во образложението напиша дека судот нема намера да се занимава со економска или надворешна политика, туку само ја извршува улогата доделена со членот 3 од Уставот, и дека ИЕЕПА не овластува воведување царини од страна на претседателот.Портпаролката на Белата куќа, Каролин Левит, најави дека Трамп попладнево ќе им се обрати на новинарите во салата за прес-конференции.Ова претставува значаен пораз за Трамп, кој ги направи царините еден од столбовите на својата економска агенда.

Свет | пред 3 месеци

Трамп ги продолжи санкциите против Русија за уште една година

Доналд Трамп, претседателот на Соединетите Американски Држави, ги продолжи американските санкции против Русија за уште една година поради војната во Украина.Официјалната порака на Трамп, објавена во Федералниот регистар, предвидува продолжувањето да стапи во сила на 6 март.Во документот е наведено дека вонредната состојба, прогласена со Извршна наредба 13660, се продолжува за дополнителна една година во согласност со член 202(д) од Законот за национални вонредни состојби (50 USC 1622(д)).Вонредната состојба поврзана со ситуацијата во Украина и натаму овозможува санкции воведени во март и декември 2014 година, како и во септември 2018 и февруари 2022 година со укази на претходните претседатели.Санкциите и вонредните уредби на САД важат една година, по што претседателот може да ги продолжи со посебна наредба.

Свет | пред 3 месеци

Аналитичар за можен напад на САД врз Иран: Трамп има трпение само кон Путин

Надворешнополитичкиот аналитичар Денис Авдагиќ во изјава за N1 Televizija оцени дека евентуален напад на Соединетите Американски Држави врз Иран денес не е невозможно сценарио, иако пред неколку години би било тешко замисливо.Тој потсети дека минатата година веќе бил изведен ограничен напад врз ирански нуклеарни постројки, што, според него, покажува дека постои подготвеност за таков чекор. „Ако се оди кон уништување на нуклеарниот и ракетниот потенцијал, тоа веројатно би траело со недели и би предизвикало голем хаос низ Блискиот Исток“, изјави Авдагиќ.Осврнувајќи се на улогата на американскиот претседател Доналд Трамп, тој нагласи дека доколку Трамп ги оствари поставените цели, прашањето може брзо да биде тргнато од дневен ред. Како пример ја посочи Панама, која, според него, престанала да биде тема откако биле постигнати посакуваните резултати. Во случајот со Иран, клучно прашање е запирањето на нуклеарната програма, а доколку на преговарачката маса не се отвори прашањето за опстанокот на режимот, можно е да се постигне договор.Авдагиќ оцени дека Иран има интерес за преговори, пред сè поради ослабената меѓународна и внатрешна позиција. Тој додаде дека Трамп нема многу трпение, „освен во случајот со Русија и Владимир Путин“, и дека кон останатите земји настапува поинаку. Како показател за зголемените тензии ја наведе и присутноста на американски воени бродови во близина на Иран.Во анализата се осврна и на испраќањето на медитеранската комесарка Дубравка Шуица на првиот формален состанок на Одборот за мир во Вашингтон, потег што наиде на критики, особено од Франција. Според него, најгласни ќе бидат земјите што не учествуваат на состанокот. Хрватска и Италија ќе имаат статус на набљудувачи, што, како што посочи, не е спорно и не претставува исто што и полноправно членство.

Свет | пред 3 месеци

Трамп ја блокираше поддршката за договорот за Чагос, Британија не даде зелено светло за напад врз Иран

Американскиот претседател Доналд Трамп ја повлече поддршката за договорот на британскиот премиер Кир Стармер за предавање на архипелагот Чагос на Маврициус, откако Лондон не дал зелено светло за користење на британските воени бази во случај на американски напад врз Иран, објави „Тајмс“.Според весникот, Белата куќа разработува детални воени планови што би ја вклучиле базата на островот Диего Гарсија и воздухопловната база РАФ Ферфорд во Глостершир, каде што е стационирана американската флота тешки бомбардери за Европа. Долгогодишните договори меѓу Лондон и Вашингтон предвидуваат овие капацитети да се користат само со претходна согласност од британската влада.Обединетото Кралство сè уште не дало одобрение, поради правни дилеми и загриженост дека евентуална интервенција би можела да го прекрши меѓународното право. Според правните толкувања, држава што обезбедува поддршка за напад може да сноси одговорност доколку има сознанија за околностите на евентуален противправен чин.Уште во 2021 година, сегашниот министер за одбрана Џон Хили побара појаснување за правилата околу користењето на британските бази, при што беше нагласено дека секоја операција мора да биде во согласност со британското законодавство и со домашното толкување на меѓународното право. Во пресрет на војната во Ирак, тогашниот државен правобранител Лорд Голдсмит тврдеше дека употребата на сила е дозволена само во самоодбрана или при непосредна закана, став што подоцна беше ревидиран по резолуцијата на Обединетите нации.Трамп и Стармер разговарале за американскиот ултиматум поврзан со нуклеарната програма на Иран, по што американскиот претседател јавно го критикуваше договорот за Чагос. На својата социјална мрежа Трут Соушал, Трамп наведе дека САД можеби ќе мора да ги искористат Диего Гарсија и Ферфорд за да спречат потенцијален напад од „нестабилен и опасен режим“, кој, како што посочи, би можел да биде насочен и кон Обединетото Кралство.Британската влада претходно тврдеше дека договорот со Маврициус, проценет на околу 35 милијарди фунти, е неопходен од безбедносни причини и за да се избегне скапа правна битка околу суверенитетот врз архипелагот. Министерката за жртви Алекс Дејвис-Џонс изјави дека премиерот ќе го исполни ветувањето и повторно ќе го врати законот во парламентарна процедура, нагласувајќи дека националната безбедност останува врвен приоритет.Сепак, високи владини извори неофицијално признаваат дека договорот тешко може да продолжи без американска согласност, а актуелната ситуација ја опишуваат како „мрачна“, што дополнително ги комплицира односите меѓу Лондон и Вашингтон во чувствителен геополитички момент.

Свет | пред 3 месеци

Јапонија вложува 36 милијарди долари во американски проекти за нафта, гас и минерали

Јапонија најави инвестиции од околу 36 милијарди долари во американски проекти за нафта, гас и клучни минерали, како прв бран договори со администрацијата на Доналд Трамп. Договорот го објавија Трамп и јапонската премиерка Санае Такаичи, со цел зајакнување на економската безбедност и намалување на зависноста од Кина. Најголемиот проект е гасна електрана во Портсмут, Охајо, која се најавува како најголема во историјата на САД, со капацитет од 9,2 гигавати годишно. Со неа ќе управува компанијата SB Energy, подружница на јапонската групација СофтБанк груп. Предвидени се и вложувања во терминал за извоз на сурова нафта во Тексас и во фабрика за синтетички индустриски дијаманти.Проектите се дел од поширок пакет од 550 милијарди долари што Јапонија се обврза да ги инвестира според трговскиот договор со САД, во замена за намалување на американските царини за јапонските производи, вклучително и автомобилите. Фабриката за индустриски дијаманти во Џорџија, вредна околу 600 милиони долари, треба да обезбеди американска самостојност во клучен материјал за напредно производство и полупроводници. Трамп изјави дека со тоа ќе се намали зависноста од странски извори, пред сè од Кина, која доминира во производството и преработката на ретки метали.Американскиот министер за трговија Хауард Латник истакна дека Јапонија обезбедува капитал, а САД добиваат стратешка инфраструктура и засилена енергетска позиција.Договорот доаѓа во период на тензии меѓу Токио и Пекинг околу Тајван. И покрај тоа, Јапонија објави раст на извозот од речиси 17 проценти во јануари, делумно благодарение на зголемената трговија со Кина, додека Трамп порача дека „огромниот трговски договор со Јапонија стапи во сила“.

Свет | пред 3 месеци

Трамп го одложува гласањето за нови санкции кон Русија

Американскиот претседател Доналд Трамп го одложува гласањето за двопартиски предлог-закон со кој би се заостриле санкциите насочени кон рускиот енергетски сектор, предупредија двајца високи сенатори од Демократската партија, пренесува Yahoo News.Сенаторот Ричард Блументал, говорејќи во Киев по учеството на Минхенската безбедносна конференција, изјави дека санкциите што ги предложил заедно со сенаторот Линдзи Греам би претставувале „економски чекан“ врз рускиот претседател Владимир Путин, во момент кога во Женева продолжуваат разговорите меѓу Киев и Москва со посредство на САД.Според Блументал, постојните американски и европски санкции веќе почнале да ја ограничуваат руската нафтена продукција, но е потребен дополнителен притисок. Тој посочи дека лидерот на републиканското мнозинство во Сенатот, Џон Тјун, му ветил дека за предлогот ќе се гласа пред крајот на тековното заседание на Конгресот.„Чекаме зелено светло, а тој толку се двоуми што на секој што го следи му се врти во глава“, изјави Блументал, алудирајќи на Трамп.Во меѓувреме, сенаторот Шелдон Вајтхаус изјави дека администрацијата бележи напредок во сузбивањето на таканаречената руска „флота во сенка“ – танкери кои ги заобиколуваат санкциите. Тој додаде дека неодамнешните американски интервенции во близина на Венецуела покажале дека американската војска е подготвена да заплени дополнителни бродови доколку тоа биде неопходно.

Свет | пред 3 месеци

Америка од Европа го добива она што долго го бараше, но Трамп можеби нема да биде задоволен

На хартија, Соединетите Американски Држави го добиваат она што долго го посакуваа – Европа што значително повеќе вложува во одбраната и што станува сè помалку зависна од Вашингтон кога станува збор за сопствената безбедност. Но, според пишувањето на Politico, американскиот претседател Доналд Трамп можеби нема целосно да биде задоволен од насоката во која се движат настаните.Еден по друг, европските лидери говореа на Минхенска безбедносна конференција за зголемување на воените буџети и за преобликување на трансатлантскиот сојуз во таканаречен „НАТО 3.0“. Но, паралелно со пораките за зајакнување на Алијансата, следуваа и повици за европски патриотизам и јакнење на сопствената воена, вселенска и технолошка индустрија, со цел континентот да стане помалку зависен од надворешни актери – вклучително и од САД.Германскиот канцелар Фридрих Мерц, обраќајќи им се директно на американските претставници во салата, порача дека членството во НАТО не е само конкурентска предност за Европа, туку и за САД. Тој повика на обновување на трансатлантската доверба и нагласи дека Европејците ќе го преземат својот дел од одговорноста. Истовремено предупреди дека меѓународниот поредок заснован на правила повеќе не функционира како порано и дека ни САД нема да можат самостојно да делуваат во новата ера на големите сили.Францускиот претседател Емануел Макрон истакна дека Европа мора да ги испорача сите компоненти на геополитичката моќ – одбрана, технологија и намалување на ризиците во односите со големите сили. Тој порача дека Европската Унија треба да има повеќе самодоверба и оцени дека е „голема грешка“ да не се верува во европскиот проект.Од американска страна, заменик-министерот за одбрана Елбриџ Колби изјави дека САД сакаат енергични, способни и посамостојни европски сојузници, додавајќи дека Америка предолго носела несразмерен дел од товарот. Тој особено ја пофали Германија за, како што рече, историскиот и значаен пресврт во одбранбените трошоци.Ваквиот тон претставува забележлива разлика во однос на минатата година, кога американскиот потпретседател Џеј Ди Венс предизвика тензии со остра критика на европските вредности. Во меѓувреме, изјавите на Трамп за можна анексија на Канада и повторените повици за преземање на Гренланд дополнително ги оптоварија односите.Европските лидери сега настапуваат со, како што велат, нов реализам: ако САД ги почитуваат како рамноправни партнери, Европа ќе ја зајакне својата одбрана, ќе го подели безбедносниот товар и ќе стане поверодостоен воен сојузник во сè поопасен свет. Воедно, тие нагласуваат дека ќе продолжат со финансиската и воената поддршка за Украина, иако американската помош под водство на Трамп значително се намалува. „Денес само Европа ѝ дава пари на Украина“, изјави украинскиот претседател Володимир Зеленски, додавајќи дека без Европа не може да има договор за крај на војната.Генералниот секретар на НАТО, Марк Руте, оцени дека токму притисокот од Трамп ја поттикнал Европа на поголеми вложувања и преземање водечка улога во Алијансата. Американскиот државен секретар Марко Рубио, пак, изрази уверување дека сојузот ќе опстане, но најави потреба од искрен разговор за неговата иднина.Сепак, можни се нови жаришта на тензии. Европските лидери јасно се спротивставија на трговските царини и на обидите движењето „Make America Great Again“ да влијае врз европската политика. Мерц порача дека културната војна на МАГА не е европска и дека Европа верува во слободна трговија, а не во протекционизам. Макрон, пак, нагласи дека Европа ќе биде добар и почитуван партнер на САД, но само ако и самата биде третирана со почит.

Свет | пред 3 месеци

Белата куќа отвори чувствително прашање: помилувањето на Нетанјаху предизвика дипломатска непријатност

Вербалниот напад на американскиот претседател Доналд Трамп врз израелскиот претседател Исак Херцог, поврзан со барањето за помилување на премиерот Бенјамин Нетанјаху, предизвика нови политички тензии во Израел, јавуваат странските агенции.Трамп пред новинарите во Белата куќа изјави дека Херцог треба да се „срами“ затоа што сè уште не донел одлука за помилување на Нетанјаху, кој е обвинет во повеќе случаи за корупција. Американскиот претседател додаде дека израелскиот премиер постигнал „извонредни резултати“ во периодот на војна, алудирајќи на неговото лидерство во безбедносно чувствителен контекст.По изјавите од Вашингтон, Кабинетот на израелскиот претседател реагираше со соопштение во кое се појаснува дека Херцог не донел одлука за помилување, спротивно на впечатокот што го создадоа изјавите на Трамп. Барањето за помилување, кое Нетанјаху го поднел во ноември, сè уште се разгледува во Министерството за правда, во согласност со утврдените законски процедури.Од кабинетот на Херцог наведуваат дека претседателот ќе ја разгледа евентуалната одлука дури по завршувањето на правната постапка, водејќи се исклучиво од законот, интересите на државата и сопствената совест, без каков било надворешен или внатрешен притисок.Во соопштението дополнително се истакнува дека Херцог ја цени поддршката на Трамп кон Израел, но нагласува дека Израел е суверена држава заснована врз владеење на правото.Изјавата на Трамп доаѓа непосредно по неговата средба со Нетанјаху во Белата куќа. Израелските медиуми пренесуваат дека кабинетот на Херцог побарал појаснување дали израелскиот премиер на кој било начин влијаел врз американскиот претседател во однос на неговите јавни коментари.Случајот дополнително ја отвора чувствителната дебата во Израел за односот меѓу извршната власт, судството и институцијата претседател, во период кога земјата се соочува со сериозни безбедносни и политички предизвици.

Свет | пред 3 месеци

Гувернерот на Калифорнија: Ќе треба време, но трансатлантското партнерство не е мртво

Гувернерот на Калифорнија, Гавин Њусом, изјави дека нападите на поранешниот американски претседател Доналд Трамп врз Европа ги поттикнале европските земји да се зближат.На панелот на Мунхенска безбедносна конференција, Њусом оцени дека Трамповото однесување кон сојузниците — од заканите за присвојување на Гренланд, преку доведувањето во прашање на НАТО, до воведувањето остри царини — ги поттикнува европските држави на посилна соработка околу важни прашања. „Верувам дека Европа денес се чувствува поединствена отколку во последните години. И можеби тоа е единствениот придонес на Доналд Трамп“, рече Њусом, за што доби гласен аплауз, пренесува Politico.Критиката на Њусом следеше додека учесниците на конференцијата анализираа говорот на американскиот државен секретар Марк Руби, кој имаше попомирлив тон кон напнатите трансатлантски односи и повика на обнова на врските меѓу сојузниците.Њусом оцени дека Америка денес е „изолирана и послаба“ отколку кога Трамп дојде на власт, спротивно на тврдењата на американски официјални лица, вклучувајќи го и амбасадорот при НАТО, Метју Витакер, дека Трамповиот пристап ја направил САД посилни и побезбедни.Тој наведе како пример трговскиот договор на Канада и Кина за електрични возила, потсетувајќи дека порано САД биле водечка сила во слични меѓународни договори. „Тоа некогаш бевме ние, и ми се крши срцето заради тоа“, изјави Њусом.Гувернерот ја смета изјавата на Руби дека „САД и Европа припаѓаат заедно“ како знак дека Трамповата администрација реагира на европската „упорност и карактер“.Со оглед на ограничувањата на мандатот, Њусом не може повторно да се кандидира за гувернер, па многумина негови настапи ги толкуваат како проба за претседателските амбиции во 2028 година. Во јануари учествуваше на Светскиот економски форум во Давос, а вчера во Мунхен оцени дека трансатлантските тензии се „привремени“ и не се поврзани само со заминувањето на Трамп од Белата куќа во 2029 година.Њусом предвиде дека Демократската партија ќе ја преземе контролата на меѓуизборите во ноември и дека Врховниот суд наскоро ќе ги ограничи претседателските овластувања за воведување царини. За трансатлантското партнерство заклучи: „Не е мртво, туку спие. Можеби треба да спиете со едно око отворено. Ќе треба време, но сигурно не е мртво.“

Свет | пред 3 месеци