Убиен Артур Тураби во Атина, брат на криминалец со богато досие

Артур Тураби е пронајден мртов на улицата „Михаил Вода“ во Атина. Полицијата синоќа го блокирала подрачјето, а мотивот за убиството сè уште се истражува, јавуваат албанските медиуми.Според „Панорама“, Тураби е брат на човек кој важи за десна рака на Албанецот обвинет за убиството на полицаец во Тирана во 2017 година. Во 2022 година, Тураби наводно бил уапсен поради поврзаност со банда која напаѓала патници во јавен превоз.Неговиот брат, Марсел Башими – познат и како Марсел Скуртај или Марсел Гозита – има долг криминален список и во Албанија и во Грција. Тој бил уапсен во јули 2022 година заедно со Бледар Џамбели и Кристак Лечи во врска со вооружен инцидент во Грција. Последните двајца се обвинети за ликвидацијата на полицаецот Артан Цуку пред неговиот дом во Тирана во 2017 година.Башими е добро познат на полицијата повеќе од две децении: уапсен е за разбојништво во Албанија во 2014 година, а во Грција има богато досие кое вклучува апсења за кражби, поседување оружје, лажни документи и обид за убиство. Тој бил поврзан и со криминална група од 41 член која крадела паричници и мобилни телефони во јавниот превоз.Истражните органи во Атина сега го поврзуваат убиството на Артур Тураби со криминалното минато на неговиот брат.

Свет | пред 5 месеци

Мирјана Најчевска јавно му се извини Петар Богојески - „Тој не е глуп, туку опасен човек за демократското општество“

Професорката Мирјана Најчевска објави јавно извинување откако на 18 август 2025 година преку адвокат ангажиран од Петар Богојески добила барање за извинување за својот статус на Фејсбук од 5 август, во кој го нарекла „глуп како точак“.„Со овој пост јавно се извинувам за кажаното. Во мојот пост се употребени несоодветен речник и несоодветна споредба“, напиша Најчевска.Таа образложува дека речникот е несоодветен затоа што не станува збор за глупост, туку за „свесен говор на омраза и поттикнување на меѓуетнички конфликт“. Како доказ посочи на јавно објавениот став на Богојески во кој постапувањето на Јавното обвинителство против навивачи што скандирале „Добар Шиптар, мртов Шиптар“ и „Гасна комора за Шиптари“ го нарекува „лов на вештерки“, како и на негови повици до младите „да не се плашат да бидат гласни“.Во извинувањето Најчевска додава дека споредбата е несоодветна затоа што со тоа го навредила велосипедот, „кој многумина го ценат како спортски реквизит и еколошко превозно средство“.Истовремено, таа го повикува Јавното обвинителство да испита дали постојат основи за поведување постапка против Богојески за говор на омраза и поттикнување на етнички конфликт, „особено затоа што станува збор за континуирана и систематска употреба на таков говор и навреди врз основа на етничка припадност, уверување, политичка или партиска припадност и род“.„Уште еднаш го повторувам моето извинување што го нареков Петар Богојески глуп. Тој не е глуп, туку опасен човек за демократското општество кое го градиме и за мултикултурната заедница во Македонија базирана на почитување на различностите“, заклучува Најчевска.Јавни настапи со навредиВо јавните настапи на социјалните мрежи, Богојески користи речник исполнет со навреди и омаловажувања.Во коментари на Фејсбук, тој на соговорници им се обраќал со изрази како „забегани сте“, „болни“, „шутрак“, „стока неписмена“, па дури и со прашања од типот „ти даваш ли газ за вечера“.Тој користел навреди и на национална основа. Во една објава напишал: „Едно прашање до шиптариве, зошто не гласате за градските луѓе, писмени луѓе, изживеани луѓе со докажано минато, еснаф луѓе…имате такви ваши шиптари“.Во друга прилика, дури изразил и желби за смрт кон дел од граѓаните: „Ајде да ве собере Бог уште малку и ќе куртули Македонија од најскапаната генерација во последните 10 века“.

Македонија | пред 5 месеци

Јавниот увид во Избирачкиот список почнува во сабота

Од 23 август, граѓаните ќе можат да извршат увид и да поднесуваат барања за промени во Избирачкиот список. Увидот ќе трае до 11 септември на полноќ, информира Државната изборна комисија (ДИК).Во овој период секој граѓанин може да побара запишување, дополнување или бришење на податоците. Барањето може да се достави писмено до подрачното одделение или месната канцеларија на ДИК според местото на живеење, или преку електронска пошта.ДИК е должна да одлучи по секое барање во рок од 24 часа од приемот. Доколку барањето биде одбиено, граѓанинот има право во рок од 24 часа да поднесе тужба до Управниот суд електронски. Судот, пак, мора да одлучи во рок од 24 часа и веднаш да ја достави својата одлука. Правосилните решенија на Управниот суд се составен дел на потпишаниот Избирачки список.Политичките партии до 11 септември можат да побараат увид во Избирачкиот список, а ДИК во рок од три дена е должна да им го достави. Во следните пет дена партиите имаат право да поднесат барања за промени на податоците.Министерството за внатрешни работи на 12 септември, односно веднаш по завршување на јавниот увид, треба да достави до ДИК листа на лица кои побарале нова лична карта или пасош од денот на распишување на изборите до завршувањето на увидот, како и список на граѓани кои до денот на изборите ќе наполнат 18 години. ДИК овие податоци ги внесува во Избирачкиот список по службена должност.Министерството за социјална политика, демографија и млади е должно најдоцна 30 дена пред изборите да достави информации за лица кои побарале гласање во установи за вонсемејно згрижување. Основните судови, пак, испраќаат податоци за лица со правосилни одлуки за одземање на деловната способност или за оние на кои им е изречена мерката притвор.Државната изборна комисија треба да го заклучи Избирачкиот список со сите промени најдоцна до 26 септември, а конечната верзија ќе биде потпишана до 3 октомври.

Македонија | пред 5 месеци

„Вруќ микрофон“ во Белата куќа: Трамп откри што мисли за Путин и се шегуваше со европските лидери

Американскиот претседател Доналд Трамп не знаеше дека микрофонот е вклучен додека разговараше со европските лидери, чекајќи почеток на заедничката прес-конференција во Белата куќа за Украина.На снимката се слуша како Трамп му вели на францускиот претседател Емануел Макрон дека рускиот лидер Владимир Путин „сака да направи договор поради мене – колку и да звучи лудо“. Коментарот се однесувал на нивниот состанок на Алјаска.Ситуацијата потсети на долга историја на „вруќи микрофони“ во политиката – моменти кога лидерите забораваат дека се снимени, откривајќи искрени мисли или непланирани шеги. Експертот за комуникации Бил Мекгован објасни: „Луѓето ги обожаваат овие моменти затоа што нема ништо поавтентично од она што ќе се изговори без филтер“.Ова не е првпат високи политичари да се најдат во незгодна ситуација.Роналд Реган во 1984 година за време на проба изјави „за пет минути почнуваме да ја бомбардираме Русија“, што предизвика критики од СССР.Барак Обама во 2012 година беше снимен како му вели на Дмитриј Медведев дека ќе има „повеќе флексибилност“ по изборите – изјава што неговиот ривал Мит Ромни ја нарече „подарок за Кремљ“.Џасинда Ардерн, тогашна премиерка на Нов Зеланд, во 2022 беше снимена како во парламент својот противник го нарекува „арогантна пи*ка“.Дури и кралот Чарлс III беше фатен пред микрофон како пцуе на налив-перо кое не работеше.Во Белата куќа, освен коментарите за Путин, Трамп направи и низа лежерни забелешки. Го пофали тенот на Макрон, рече дека финскиот претседател Александар Стуб е „добар голфер“ и праша кој е подготвен за новинарите „кога ќе влетат во просторијата“. Џорџа Мелони одговорила дека не сака да зборува со италијанските новинари, додавајќи низ смеа: „А тој (Трамп) тоа го сака, нели?“

Свет | пред 5 месеци

Трамп: Помагам на Украина и затоа што сакам да одам во рајот

Американскиот претседател Доналд Трамп изјави дека еден од неговите лични мотиви за ангажманот околу Украина е „желбата да оди во рајот“. Изјавата предизвика бројни реакции во јавноста, особено откако беше потврдена и од Белата куќа.Во интервју за Fox News, Трамп изјави: „Ако можам да спасам 7.000 луѓе неделно од смрт, мислам дека тоа е доста… Сакам да се обидам да одам во рајот ако е можно, слушам дека не ми оди најдобро. Навистина сум на дното на листата. Но ако можам да стигнам до рајот, ова ќе биде една од причините.“Белата куќа: „Претседателот беше сериозен“На новинарско прашање околу изјавата, портпаролката на Белата куќа, Каролин Левит, одговори:„Мислам дека претседателот беше сериозен. Тој сака да оди во рајот – како што, се надевам, сите овде исто така сакаат“.Администрацијата на Трамп во последните денови води интензивни разговори со Русија, Украина и европските сојузници за можни мировни договори и безбедносни гаранции за Украина. Иако Трамп постојано повторува дека американски војници нема да бидат испратени на терен, Левит денеска отвори можност за американско воздушно присуство како дел од идните безбедносни аранжмани.

Свет | пред 5 месеци

Bloomberg: Трамп го притиснал Орбан да го повлече ветото за Украина

Американскиот претседател Доналд Трамп, по средбите со украинскиот лидер Володимир Зеленски и со европските челници во Белата куќа, имал телефонски разговор со унгарскиот премиер Виктор Орбан, јавува Bloomberg.Според изворите на агенцијата, Трамп извршил притисок врз Орбан да го повлече својот вето за започнување на преговори за приклучување на Украина кон Европската Унија.

Свет | пред 5 месеци

Битиќи: Ја добивме битката, концесијата дадена од ВМРО-ДПМНЕ, падна на арбитража

Концесијата дадена од ВМРО-ДПМНЕ, симбол на криминал и коруптивни зделки, падна на арбитража. Државата ја доби битката, нема да плати штета од 115 милиони евра, реагира пратеникот на СДСМ, Фатмир Битиќи и поранешен вицепремиер.„Да се потсетиме: Случајот односно судските рочишта се затворени во 2023 година. Арбитражниот суд носи конечна пресуда во рок од две (2) години по завршните зборови. Тимот што ги застапуваше правата на нашата држава во целиот тој процес се водеше со јасни определби и насоки од страна на мојот кабинет во претходната Влада.“ наведува Битиќи.И затоа, искрена благодарност до White & Case, нашите главни застапници во арбитражата, државните службеници и експерти кои вложија знаење и енергија, како и до локалните адвокатски друштва за нивната посветеност и професионалност, вели пратеникот на СДСМ.„Благодарност до сите што ги застапуваa интересите на државата. Вака се почитува татковината, со искрен настап и без калкулации – а за оние кои имаа други интереси, иднината ќе покаже“ стои во објавата на Битиќи.

Македонија | пред 5 месеци

Арбитражниот суд ја ослободи Македонија од обврска од 115 милиони евра за Казандол

Арбитражниот трибунал на 21 јули 2025 година ги отфрли сите тужбени барања во случајот „Казандол“, со што државата избегна да плати 115 милиони евра од буџетот.-На денешната седница на Владата, на предлог на Координативното тело за следење на арбитражни постапки беше усвоена информацијата со која се утврдува дека во целост се одбиени тужбените барања против државата во случајот познат како КАЗАНДОЛ и со тоа е направена заштеда на буџетските средства на граѓаните во вкупен износ од 115.000.000 евра. Арбитражниот трибунал донесе пресуда на 21 јули 2025 година со која утврди дека неосновани се сите тужбени барања и истите ги одби во целост.

Македонија | пред 5 месеци

Крвав судар кај „Слечиште“ - загинаа двајца возачи, млад охриѓанец и битолчанец кој живеел во Германија

На магистралниот пат кај местото „Слечиште“ загинаа двајца возачи – 52-годишен битолчанец кој живеел во Германија и 20-годишен охриѓанец, откако нивните возила „мерцедес“ и „опел астра“ се судриле директно. Еден 19-годишен сопатник е со тешки повреди и хоспитализиран во Битола„На 18.08.2025 околу 12:50 часот во Полициската станица Ресен било пријавено дека на магистралниот пат Ресен-Битола, на место викано „Слечиште“, се случила сообраќајна несреќа помеѓу патничко возило „опел астра“ со охридски регистарски ознаки, управувано од П.Н.(20) од Охрид и патничко возило „мерцедес“ со германски национални ознаки, управувано од П.К.(52) од Сојузна Република Германија. Од здобиените повреди, на местото на настанот починал возачот П.К., а лекар од Итна медицинска помош констатирал смрт. Возачот П.Н. и неговиот сопатник Д.С.(19) од с.Лескоец, охридско, биле пренесени во Клиничката болница Битола, каде што кај П.Н. лекар констатирал смрт, додека кај Д.С. биле констатирани тешки телесни повреди. Извршен е увид од јавен обвинител и увидна екипа од ОВР Ресен.“

Македонија | пред 5 месеци

Трагичен инцидент во Хелсинки – пратеник се самоуби во парламентот во Финска

Финска јавност е потресена од трагичен инцидент што се случи денеска во зградата на парламентот во Хелсинки, каде што еден од избраните претставници си го одзел животот. Настанот се случил околу 11 часот претпладне, потврдија службите, кои истакнаа дека е регистрирана една смрт, а полицијата не гледа елементи на насилство.Медиумите во Финска наведуваат дека станува збор за пратеник, но неговото име засега не се објавува додека не бидат известени членовите на семејството.На местото пристигнале повеќе екипи на итната помош и полицијата, како и противпожарно возило. Очевидци за локалните медиуми изјавиле дека најпрво со вклучени сирени пристигнала амбуланта, по што пред парламентот дошло големо противпожарно возило, полициско комбе, а потоа и оклопен полициски „мерцедес“.Финската јавна радиодифузна служба Yle пренесе дека во парламентот веднаш била покрената координирана акција на спасувачките служби.Директорот на полицијата, Аро Тоивонен, за медиумите изјави дека сите служби за итни интервенции се на лице место, но дека во овој момент не може да даде детали. „Парламентот е специфична институција и нормално е вакви ситуации да бидат проценети со дополнителна претпазливост додека сè уште е нејасно,“ изјави Тоивонен, без да ги потврди или негира медиумските написи дека починатиот е пратеник.

Свет | пред 5 месеци

Повредените од „Пулс“ и натаму зависат од донации, ниту третата тура компресивна облека не беше платена од државата

Помошта за тешко повредените во пожарот во кочанската дискотека „Пулс“ (16 март 2025) и натаму доаѓа преку донации. И покрај јунските ветувања на институциите дека државата ќе ги покрие трошоците за неопходната терапевтска опрема, реалноста покажува дека компресивната облека што е од витално значење за заздравување од изгореници ја обезбедуваат само граѓани, компании и дијаспората преку движењето Support Kocani. Вчера пристигна третата пратка компресивна облека со вредност од 2.193.047 денари (околу 35.555 евра), која повторно целосно е финансирана преку донации и предадена на Општата болница во Кочани.-Со оваа пратка се опфатени втората тура на нарачки од првите две групи кои се корисници на компресивна облека. Овој пат се обезбедени вкупно 176 парчиња специјализирана компресивна облека.Благодарност до секој поединец, компанија и пријател кој се вклучи со своја донација. Голема благодарност и до компаниите Julius Zorn GmbH и Health 2000, објави иницијативата.Ветувањата на институциитеНа 19 јуни, директорот на Фондот за здравствено осигурување, Сашо Клековски, јавно изјави дека „сите здравствени потреби на повредените од Кочани ќе бидат на товар и поддржани од државата на долги стази“, а болницата во Кочани ќе биде централна установа за грижата. Ден подоцна, директорката на болницата, д-р Катерина Паниќ-Мирчовска, најави дека пациентите ќе добиваат и втор сет компресивна облека, бидејќи носењето е задолжително најмалку две години.Реалноста на терен е сосема поинакваПрва пратка: на 16 јуни беше доставена облека во вредност од 923.458 денари, платена од донации.Втора пратка: на 8 јули пристигнаа 43 парчиња компресивна облека изработени по мерка за 17 повредени лица, со вредност од 283.802 денари, повторно донација.Трета пратка: денес, 18 август, донирана е најголемата набавка досега – вредна 2.193.047 денари.Со ова, вкупната вредност на трите испораки надмина 3,4 милиони денари (околу 59.000 евра) – сите обезбедени преку донации, иако државата претходно вети поинакво сценарио. Од најавената институционална поддршка, засега не е реализирана ниту една набавка. Повредените продолжуваат да ја добиваат неопходната облека исклучиво преку солидарноста на граѓаните и дијаспората.

Македонија | пред 5 месеци

Се огласи Зеленски по средбата во Вашингтон

Американскиот претседател Доналд Трамп објави дека се започнати подготовки за состанок меѓу рускиот претседател Владимир Путин и украинскиот лидер Володимир Зеленски.Трамп на својата мрежа Truth Social средбата со Зеленски и европските партнери ја оцени како „многу добра“.На разговорите во Белата куќа присуствуваа францускиот претседател Емануел Макрон, италијанската премиерка Џорџа Мелони, германскиот канцелар Фридрих Мерц, финскиот претседател Александар Стуб, британскиот премиер Кир Стармер, претседателката на Европската комисија Урсула фон дер Лајен и генералниот секретар на НАТО, Марк Руте.„Вчера во Вашингтон се одржаа важни разговори со претседателот на САД и европските лидери. Тоа беше значаен чекор кон завршување на војната и обезбедување сигурност за Украина и нашиот народ,“ напиша Зеленски на X.Тој додаде дека веќе се работи на конкретна содржина на безбедносните гаранции и дека координацијата на лидерите продолжува: „Ќе има дискусии, подготвуваме формати, советниците за национална безбедност се во постојан контакт. Ќе има безбедносни гаранции. Украина ја чувствува таа сила. Благодарни сме на сите наши партнери за решителноста и поддршката. Ќе направиме сè патот до мирот да стане реалност – преку партнерство, гаранции и храброста на украинскиот народ.“

Свет | пред 5 месеци

Axios: Трамп бил на чекор да ги прекине преговорите со Путин на Алјаска

Американскиот претседател Доналд Трамп бил блиску до прекин на преговорите со рускиот лидер Владимир Путин на средбата на Алјаска, јавува Axios. Причината, според порталот, била инсистирањето на Путин за анексија на целата Доњецка област.Путин на преговорите поставил услов Русија да добие целосна контрола врз Доњецката област, од која моментално контролира околу 75% територија. Тој бил толку цврст во ставовите што, според извори на Axios, Трамп во еден момент бил подготвен да ја напушти средбата.Неименуван извор го цитира Трамп кој му рекол на Путин:„Ако е Доњецк тука клучен и ако нема попуштање, тогаш нема смисла да го продолжуваме ова.“По таа изјава, Путин наводно се откажал од својот максималистички услов.Проценките во САД се поделени: едни предвидуваат дека Русија може целосно да ја заземе Доњецката област до октомври, додека други предупредуваат дека таквата операција би била тешка и неизвесна.Според Reuters, во нацрт-условите на Москва за прекин на војната се барало и повлекување на украинските сили од Доњецката и Луганската област.Во меѓувреме, државниот секретар на САД, Марко Рубио, изјави дека Вашингтон нема да врши притисок врз Украина да отстапи територија на Русија како дел од евентуален мировен договор.Украинскиот претседател Володимир Зеленски во понеделникот порача дека преговорите мора да ја земат предвид актуелната линија на фронтот. Тој нагласи дека Уставот на Украина не дозволува никакво отстапување или размена на територија.

Свет | пред 5 месеци

„Треска“ без дрвја: од зеленило кон пустина – јавниот интерес повторно поразен?

Просторот кај некогашната фабрика „Треска“ наместо да прерасне во квалитетно уреден дел со зеленило, денес изгледа како пустина. Според иницијативата „Шанса за Центар“, во делот каде што беа засадени над 100 дрвја, денес не останало ништо.„На местото каде што требаше да има парк, сега никнуваат само „наполитанки“ згради. Зеленилото постои единствено на хартија,“ реагираат од иницијативата.„За „Треска“ се боревме со мораториум, со урбанистичко-архитектонски конкурс чијашто спроведба ја обезбедивме со поддршка од стручната јавност, но наградените решенија беа игнорирани од институциите и градоначалникот. Планот го поднесовме и до Уставен суд, но на крај секогаш победуваше приватниот пред јавниот интерес,“ велат од „Шанса за Центар“.Советничката Билјана Филиповска Тодорчевска, која е архитект и добитничка на повеќе признанија, со месеци бара начин да се гарантира барем единствената зелена површина предвидена со планот. Денес, пак, на просторот се градат приватни објекти, дел од истите инвеститори кои ги подигаат зградите.Последниот обид, како што посочуваат, бил во координација со стручните служби на Општината да се постават дополнителни барања кон инвеститорите – на нивна сметка да ги отстранат легализираните бараки на просторот предвиден за јавно зеленило.„Инвеститорите се согласија, поднесоа елаборати за уривање и потпишаа изјави дека ќе го уредат предвиденото јавно зеленило од близу 5.700 м². Но, дел од советниците ја напуштија седницата и не дозволија да има кворум. Така постапката запре,“ велат од иницијативата.„Вака не се штити јавниот интерес и не се градат конструктивни политики. Ова само докажува дека во советот повеќе се исполнуваат туѓи барања отколку да се бараат решенија за граѓаните. А градоначалникот, повторно, воопшто не се појави на седницата,“ заклучуваат од „Шанса за Центар“.фото: Скопје1

Скопје | пред 5 месеци

Меџити и Османи во трка кој ќе ангажира попознат архитект, секој со своја визија за нов изглед на Чаир

Изборната трка во Чаир добива нова димензија – кандидатите за градоначалници најавуваат соработка со светски и регионални имиња од областа на урбанизмот и архитектурата, со цел општината да добие современ и функционален лик.Кандидатот на „Алтернатива“, Изет Меџити, во својот тим го вклучи урбанистот Бајрам Вардар, скопјанец кој оставил силен белег врз турските мегаполиси Истанбул и Бурса. Вардар бил дел од тимот на Реџеп Таип Ердоган во периодот кога тој го водеше Истанбул, а подоцна ја извршуваше функцијата главен урбанист на Бурса. Меџити најави изработка на мастер план за Чаир, што ќе се креира во консултација со жителите и ќе има конкретна стратегија за имплементација.– Чаир има предизвици слични на оние што сме ги гледале во Истанбул или Барселона. Наша цел е да изработиме план за иднината на општината кој ќе биде основа за нејзина модерна трансформација – изјави Меџити при претставувањето на Вардар.Од другата страна, кандидатот Бујар Османи најави соработка со мексиканскиот архитект Мишел Ројкинд, светски познат по тоа што ја спојува архитектурата со социјалната и културната димензија. Неговото студио „Rojkind Arquitectos“ е избрано од магазинот „Форбс“ меѓу десетте најиновативни во светот, а самиот Ројкинд е добитник на бројни меѓународни признанија, меѓу кои и наградата „Emerging Voices“ на Архитектонската лига на Њујорк.Ројкинд стана глобално познат по проектот „Nestlé Chocolate Museum“ во Толука, футуристичка структура која освои награди и беше номинирана за „British Museum Award“. Престижни медиуми како „Њујорк Тајмс“ го вброија меѓу имињата што ја обликуваат иднината на современата архитектура.

Скопје | пред 5 месеци

Почнаа уписите на УКИМ, има слободни места за 9719 студенти

На Универзитетот „Св. Кирил и Методиј“-Скопје денеска и утре се спроведува првото пријавувње за упис во прва година додипломски студии за академската 2025/2026 година.Според Конкурсот на УКИМ, на 23-те факултети во негов состав слободни се вкупно 9719 места. Од нив, 4683 за редовни студенти во државната квота, 4081 места за редовни со кофинансирање на студиите и 955 за вонредни студенти.Како и во минатите години, најмногу слободни места има за упис на студиските програми на Факултетот за информатички науки и компјутерско инженерство-ФИНКИ (1020), Природно-математичкиот факултет (910), Филозофски факултет (880), Филолошки (810), Медицински факултет (760), Економски (700), Правен факултет (610), Факултет за електротехника и информациски технологии-ФЕИТ (590).Редовните студенти кои се финансираат од државниот буџет ќе плаќаат партиципација од 200 евра, а тие со кофинансирање на студиите и вонредните ќе плаќаат по 400 евра.Во објавениот Конкурс на УКИМ се наведени условите и критериумите за запишување, роковите, потребните документи и начинот на аплицирање.Пред пријавувањето во роковите утврдени со Конкурсот, секој заинтересиран кандидат треба да се регистрира на www.upisi.ukim.mk и да ја пополни електронската пријава од iKnow-системот.Денеска и утре (19 и 20 август) е првиот рок за пријавување на кандидатите, вториот рок ќе биде на 11 и 12 септември, а третиот рок каде што ќе има слободни места – на 24 септември 2025.

Македонија | пред 5 месеци

Макрон предлага мировен самит меѓу Зеленски и Путин во Швајцарија

Францускиот претседател Емануел Макрон изјави дека се залага за организирање мировен самит помеѓу украинскиот претседател Володимир Зеленски и рускиот лидер Владимир Путин на „неутрално тло“. Како идеална локација ја посочи Швајцарија, а особено градот Женева, пренесуваат странските медиуми.Макрон смета дека на масата за преговори, покрај Зеленски и Путин, треба да седат и клучни европски лидери.Во интервју за француската телевизија LCI, Макрон потврди дека веќе денес ќе започне подготовка на конкретен предлог за сигурносни гаранции за Украина.„Ќе создадеме коалиција на подготвени заедно со британскиот премиер Кир Стармер за да ја информираме јавноста. Паралелно, ќе работиме со Американците за да видиме кој е подготвен и на кој начин да придонесе“, најави францускиот претседател.Тој нагласи дека мирот не смее да биде капитулација на Киев:„Украина ќе направи отстапки кои ги смета за фер и корисни. Но, овој мир не може да биде капитулација – тоа би било трагично и за Украина и за Европејците.“

Свет | пред 5 месеци

Медведев: Европа не успеа да го „надмудри“ Трамп, неизвесно е како ќе постапи Зеленски

Поранешниот руски претседател Дмитриј Медведев изјави дека европските лидери не успеале да го надмудрат американскиот претседател Доналд Трамп и изрази сомнеж како украинскиот претседател Володимир Зеленски ќе се постави во врска со прашањата за териториите и безбедносните гаранции.Медведев преку платформата „X“ порача дека „антируската ратоборна Коалиција на подготвените не успеа да го надмудри @POTUS (претседателот на САД) на негов терен. Европа му се заблагодаруваше и му се додворуваше“.Тој додаде дека клучното прашање сега е „која мелодија ќе ја свири Зеленски за гаранциите и териториите дома, кога повторно ќе ја облече зелената воена униформа“.Изјавата доаѓа откако Трамп му вети на Зеленски дека САД ќе помогнат во обезбедување на безбедносни гаранции за Украина во рамките на евентуален мировен договор, иако деталите и опсегот на таа поддршка засега не се познати.

Свет | пред 5 месеци

(Видео) Избегната трагедија над Крф – авион со 273 патници принудно слета со запален мотор во Бриндизи

Воздухопловна драма се одвивала синоќа над грчкиот остров Крф, кога на „Боинг 757-300“ на германската авиокомпанија „Кондор ервејс“ му откажал десниот мотор непосредно по полетувањето кон Дизелдорф. Во авионот имало 273 патници и осум членови на екипажот, јави „Фикенњуз“.Откажувањето на моторот се случило на надморска височина од околу 450 метри, додека авионот сè уште бил во фаза на искачување. Од десната страна избувнал оган, што било регистрирано и од жителите и туристите на островот, кои слушнале и силен звук налик на експлозија. На социјалните мрежи се појавија фотографии и видеа на кои јасно се гледа пламенот. На аеродромот во Крф биле активирани сите протоколи за итна состојба, но пилотите одлучиле да продолжат со летот користејќи го само левиот мотор и да се пренасочат кон италијанскиот град Бриндизи, лоциран наспроти островот.Германската телевизија RTL пренесува дека поради дефектот немало можност да се продолжи кон првичната дестинација – Дизелдорф, па затоа летот бил пренасочен.Авионот безбедно слета во Бриндизи, без повредени меѓу патниците и екипажот, објави весникот „Вима“. Патниците биле сместени во хотел, каде ќе чекаат замена и продолжување на патувањето.

Свет | пред 5 месеци

Трамп испрати 4.000 маринци во Карибите – целта се нарко-картелите

Соединетите Американски Држави започнаа голема воена операција во Латинска Америка и Карибите, насочена кон сузбивање на нарко-картелите. Според информациите на CNN, распоредени се над 4.000 маринци и морнари, како дел од стратегијата на претседателот Доналд Трамп за борба против криминалните групи што се прогласени за глобални терористички организации.Во наредните 36 часа, пред брегот на Венецуела треба да пристигнат три американски разорувачи опремени со ракетниот систем „Егис“ – „УСС Грејвли“, „УСС Џејсон Данам“ и „УСС Сампсон“.Покрај воените бродови, во поширокиот регион ќе бидат распоредени и шпионски авиони П-8, дополнителни морнарички единици и најмалку една нападна подморница. Процесот ќе трае неколку месеци, а акциите ќе се спроведуваат во меѓународни води и воздушен простор. – Поморските сили може да се користат не само за разузнавачки и надзорни мисии, туку и како основа за насочени напади, доколку биде донесена таква одлука – изјавил висок функционер за американските медиуми.Администрацијата на Трамп ја истакнува борбата против нарко-клановите како еден од своите приоритети, поврзувајќи ја и со намалување на миграцијата и зајакнување на јужната граница на САД.Во последните неколку месеци, Вашингтон веќе испрати дел од своите воени бродови во регионот и го засили воздушниот надзор врз мексиканските картели, собирајќи информации за нивното делување со цел нивно потиснување.фото: Х

Свет | пред 5 месеци

Тројца уапсени во Кочани и Виница – пронајдени дрога, ваги и опрема за пакување

Во два одвоени случаи лишени од слобода три лица во Кочани и кочанско, кај нив е пронајдена дрога, информира МВР.На 18.08.2025 во 15:40 часот во Кочани, полициски службеници од СВР Штип – ОВР Кочани го лишиле од слобода Б.Д.(22) од Кочани. На место викано „Индустриска зона“ во Кочани, полициските службеници извршиле преглед кај лицето и во возилото „бмв“ со кочански регистарски ознаки, кое го управувал, при што пронашле и одзеле марихуана, грендер исполнет со марихуана и дигитална вага. Подоцна, со судска наредба, бил извршен и претрес во неговиот дом, при што биле пронајдени и одземени марихуана и други предмети за кои постои сомнение дека потекнуваат од кривично дело.Исто така, на 18.08.2025 во 22:00 часот во Грдовци, кочанско, полициски службеници од ОВР Кочани ги лишиле од слобода Г.П.(32) и А.А.(29), двајцaта од Виница. Полициските службеници запреле патничко возило „фолксваген голф“ со швајцарски национални ознаки, кое го управувал Г.П., а сопатник бил А.А., при што забележале дека сопатникот од возилото фрлил пакување со марихуана, кое било пронајдено и одземено. Додека, при преглед во возилото билепронајдени и одземени бела прашкаста материја, марихуана и грендер.Лицата биле задржани во полициска станица и во координација со јавен обвинител со нив бил извршен службен разговор. По целосно документирање на случаите против нив ќе бидат поднесени соодветни пријави.

Македонија | пред 5 месеци

(Видео) Свирежи и и извици „Уааа“ го пречекаа Вучиќ пред партиските простории на СНС

Просториите на Српската напредна странка (СНС) во Белград синоќа беа во центарот на драматични настани, откако демонстранти упаднаа и делумно го разурнаа објектот, а полицијата мораше со солзавец да ја воспоставува контролата. Неколку часа подоцна, на местото пристигна и претседателот Александар Вучиќ, чиј влез беше проследен со спротивставени реакции – од скандирање „Ацо, Србине“ од неговите приврзаници, до свирежи и повици „уа“ од околните станбени згради.Протестите започнаа во попладневните часови кога поголема група граѓани влезе во партиските простории и предизвика материјална штета. Жандармеријата интервенираше за кратко време, потиснувајќи ги демонстрантите со употреба на солзавец, но напнатоста во квартот не се намали.Додека Вучиќ со обезбедувањето се движеше кон влезот на партискиот објект, камерите на националните телевизии го прикажуваа само кругот на неговите симпатизери, но на социјалните мрежи почнаа да се појавуваат видеа кои ја покажуваат реакцијата на жителите од околните згради – свирежи, негодување и повици „уа“.На една од снимките јасно се гледа како припадници на специјалната единица „Кобри“ внимателно ги следат прозорците на соседните згради, свесни за непријателската атмосфера. Според очевидци, обезбедувањето дури му препорачало на Вучиќ да се повлече во внатрешноста на зградата. Неколку минути подоцна, колоната автомобили придружувана од силно полициско обезбедување ја напушти улицата, додека од тротоарите и прозорците и натаму одекнуваа свирежи и повици против претседателот.

Свет | пред 5 месеци

Поранешната антикорупционерка Билјана Ивановска денеска ќе се појави во Обвинителството на распит

Поранешната претседателка на Државната комисија за спречување на корупцијата и кандидатка за градоначалник на Општина Центар од иницијативата „Независни заедно“, Билјана Ивановска, ќе треба да даде исказ во обвинителството по кривична пријава поднесена против неа од страна на физичко лице.Од Јавното обвинителство засега не откриваат ниту кој е подносителот, ниту за кое кривично дело станува збор. Единствено прецизираат дека повикот за распит не е поврзан со нејзината кандидатура, туку дека поканата до Министерството за внатрешни работи ја испратиле уште на 25 јули, а времето на доставата се совпаднало со нејзината одлука да влезе во изборната трка.Обвинителката Адела Бојчевиќ, која го води предметот, ја контактирала Ивановска и ѝ понудила можност распитот да се одложи доколку таа смета дека поканата може да се протолкува како притисок во текот на изборната кампања.„Со оглед на нејзината јавна реакција, надлежниот јавен обвинител телефонски ја контактираше Ивановска и ѝ даде можност, доколку сака и доколку исказот го чувствува како форма на притисок, истиот да се помести по завршувањето на изборите,“ наведоа од Обвинителството.Ивановска, пак, реагираше дека поканата ја добила само 11 часа откако ја соопшти својата кандидатура, но додаде дека нема намера да ја одложи постапката и оти ќе се појави во Обвинителството бидејќи нема што да крие.Обвинителството посочува дека пријавата за која преземаат дејствија е поднесена уште на 18 февруари годинава.

Македонија | пред 5 месеци

Трамп ќе зборува со Путин по средбата со Зеленски, можен е нов состанок

Средбата меѓу американскиот претседател Доналд Трамп и украинскиот претседател Володимир Зеленски пред новинарите заврши по нешто помалку од половина час.На последното новинарско прашање – дали очекува нешто повеќе од неодамнешниот самит со Владимир Путин – Трамп изјави:„Токму разговарав со претседателот... Всушност, неформално веќе разговарав со претседателот Путин, а ќе имаме телефонски разговор веднаш по овие средби денес.Можно е да имаме трилатерален состанок – а можно и да не. Ако го нема, борбите продолжуваат. Но ако го има, мислам дека шансите се добри, дека можеби токму со таков состанок може да се стави крај на војната. Тој очекува мој повик веднаш штом ја завршиме оваа средба,“ рече Трамп.Претходно во разговорот, претседателот Зеленски изјави дека е подготвен за трилатерален состанок меѓу него, Путин и Трамп.

Свет | пред 5 месеци

Трамп се смее со костумот на Зеленски во Белата куќa

Среде интензивните разговори за војна и мир во Овалната соба, се случи еден смешен момент.Украинскиот претседател Володимир Зеленски беше забележан облечен во црно одело, привлекувајќи го вниманието и на новинарите и на американскиот претседател Доналд Трамп.„Изгледаш одлично во тоа одело“, рече новинарот Брајан Глен од „Гласот на Америка“, кој постави прашања за изборот на облека на Зеленски за време на неговата посета на Белата куќа во февруари.„И јас го кажав истото“, извика Трамп.„Ти си во иста облека. Јас се пресоблеков, ти не“, му одговори Зеленски на Глен.Според европски функционер, облеката на Зеленски била дискутирана меѓу американските и украинските претставници пред состанокот во понеделник, и се подразбирало дека тој не треба да доаѓа во вообичаената облека.Во февруари, Трамп беше незадоволен кога Зеленски пристигна во Белата куќа облечен во воена униформа, што сугерираше дека е „целосно облечен“.

Свет | пред 5 месеци