Со спектакл на Роџер Санчез, Кисела Вода го прослави својот 70-ти роденден: „Сега сè е на свое место!“

Со несекојдневен музички спектакл и настап на светски познатиот диџеј Роџер Санчез, Општина Кисела Вода синоќа го одбележа својот 70-ти роденден и го означи почетокот на Културното лето 2025, кое годинава се одвива под мотото „Сè на свое место“.Над 30.000 посетители од цело Скопје, Македонија и од соседните Србија, Бугарија и Грција, се собраа за да бидат дел од овој настан, кој ќе остане запаметен како едно од највпечатливите музички случувања во главниот град.Музичката вечер започна со сет на диџеј Матс, по кој следуваа настапите на диџеј Ампов и диџеј Деан Мицкоски, кои ја загреаја атмосферата пред појавувањето на главната ѕвезда. Американскиот диџеј и продуцент Роџер Санчез приреди двочасовен сет, носејќи енергија и ритам што ја раздвижи публиката до доцна во ноќта.Пред почетокот на настапот на Санчез, на сцената се појави градоначалникот на Кисела Вода, Орце Ѓорѓиевски, кој на публиката ѝ го честиташе јубилејот. Заедно со водителот Сашко Коцев, симболично го поставија последното парче од сложувалката во форма на карта на Скопје – делот што ја претставува Општина Кисела Вода.„Сега сè е на свое место,“ порача Ѓорѓиевски, добивајќи громогласен аплауз од присутните.„Обединетоста што ја видовме вечерва е најголемата потврда дека сме на вистинскиот пат. Конечно, оваа година сè доаѓа на свое место. И не заборавајте – најдоброто допрва доаѓа!“ – додаде тој.Културното лето во Кисела Вода продолжува и во наредните денови, со богата програма од концерти, театарски претстави и културни настани на неколку локации низ општината.[caption id="attachment_341356" align="alignnone" width="2048"] default[/caption]

Скопје | пред 7 месеци

Руски дронски напад врз Запорожје предизвика големи пожари и штети

Во ноќен напад со руски дронови врз градот Запорожје се предизвикани серија пожари и значителни оштетувања на индустриски објекти и гаражни комплекси, пренесе денеска агенцијата „Укринформ“.Гувернерот на Запорошката област, Иван Федоров, преку Телеграм информираше дека биле погодени најмалку шест различни локации во регионот. Според него, беспилотни летала удриле во индустриско претпријатие и територија на гаражна задруга, што довело до силни пожари.И покрај сериозната материјална штета, нема жртви меѓу цивилното население. Нападот предизвикал големи штети и врз локалната инфраструктура, но противвоздушната одбрана успешно делувала и спречила поголеми последици.Федоров додаде дека состојбата во Запорожје во моментов е стабилизирана, а проценката на штетите е во тек.

Свет | пред 7 месеци

(Видео) Објавена снимка од подметнување пожар во сеулското метро

Јужнокорејското обвинителство објави видео од надзорна камера на кое се гледа моментот кога маж истура запалива течност во вагон на подземната железница во Сеул и предизвикува пожар. Инцидентот се случил на 31 мај. Во пожарот се повредени шест лица – главно поради вдишување чад и обид за бегство. Една личност се здобила со истегнување на зглобот додека се обидувала да избега. За среќа, нема загинати.Полицијата го уапсила 67-годишниот осомничен, кој сега е официјално обвинет за обид за убиство и подметнување пожар. Засега не е објавен мотивот за нападот.

Свет | пред 7 месеци

54-годишен маж тепал и давел сопруга со чадор во алкохолизирана состојба - обвинение за семејно насилство во Скопје

Јавен обвинител од Основното јавно обвинителство Скопје поднесе Обвинителен предлог против едно лице за кривично дело – Телесна повреда при вршење семејно насилство, односно согласно член 130 став 2 во врска со став 1 од Кривичниот законик.„Обвинетиот 54-годишник, во алкохолизирана состојба вршел телесно ја повредил својата сопруга. Во семејниот дом на улицата ,,Бутелска“, на 20 јуни, тој најпрво влегол во спалната соба каде се наоѓала оштетената, и се доближил држејќи чадор во раката и започнал агресивно да ја навредува. Откако жртвата се повлекла кон дневната соба тој започнал да ја влече, и задал удар со чадорот по главата и таа паднала на под. Во тој момент обвинетиот започнал да ја дави и продолжил да ја удира со чадорот по целото цело, а таа обидувајќи се да се оттргне од него, повредена се влечела по подот до ходникот. Се доближила до влезната врата од куќата која била отворена, по што успеала да излезе надвор и да повика полиција“, велат од Обвинителството.Јавниот обвинител оцени дека во конкретниот случај се уште постојат основите поради кои првично беше определена мерка притвор, па побара притворската мерка за обвинетиот да биде продолжена.

Скопје | пред 7 месеци

Почина професорката Мирјана Поленак Акимовска – истакнат правник и научник со длабок траг во македонската правна наука

Почина професорката Мирјана Поленак Акимовска. Веста на социјалните мрежи ја сподели нејзиниот колега, Гордан Калајџиев.„Замина уште еден голем професор, Мирјана Поленак Акимовска, бескрајно ја сакав и почитував, а таа ме поддржуваше кога ми беше најтешко“, напиша тој.Мирјана Поленак Акимовска беше реномирана македонска професорка по правни науки на Правниот факултет „Јустинијан Први“ во Скопје и авторка на повеќе дела во областа на римското право и интелектуална сопственост. Беа познати нејзините публикации како: „Избор на текстови од римското право“ (212 страници, Софија, 2020); „Le Contrat De Dépôt…“ – студија за влијанието на римското право врз современиот депозитен договор во РМ; Различни анализи за авторско право, трговски марки и интелектуални права во Македонија и САД;.Исто така, таа учествуваше и како коавтор во изданија за реторика, стил и правна методологија, во соработка со акaдемици.Во научната заедница беше почитувана за својата посветеност, педантност и способност да ги поврзе теоретските основи на римското право со современите правни предизвици. Остави важен придонес во развојот на македонската правна наука и образование.

Македонија | пред 7 месеци

Новак Ѓоковиќ по тренингот со Алкарас: „Чест ми е што ме избра за спаринг-партнер“

Новак Ѓоковиќ и Карлос Алкарас одиграа тренинг-меч на Вимблдон кој заврши без победник – 5:5 без ниту еден брејк – по што беше прекинат поради временско ограничување. По натпреварот, српскиот тенисер даде изјава за Вимблдонската телевизија, пренесена од „Експрес“.„Не можам да бидам посреќен. Карлос, како бранител на титулата, има право да избере со кого ќе тренира. Овојпат ме избра мене и тоа ми е навистина голема чест. Привилегија е да се тренира на ваков терен. Сè е совршено, а дури се чувствувате лошо што играте на ваква, недопрена трева“, рече Ѓоковиќ.Српскиот ас дебитираше на Вимблдон во 2005 година и досега има освоено седум титули. Во последните две финалиња, беше поразен токму од Алкарас.„Терените се исти, но топчињата се поспори отколку тогаш. Затоа е исклучително тешко да се помине играч како Карлос кога излегува на мрежа“, додаде тој.Ѓоковиќ го коментираше и финалето на Ролан Гарос, во кое Алкарас го совлада Јаник Синер, иако Италијанецот водеше со 2:0 во сетови и имаше три меч-топки во четвртиот сет.„Тоа е поинаква подлога и стил на игра, но она што го одиграа во Париз беше фантастично.“Новак призна дека не успеал да го проследи целиот меч:„Бев во Србија, сопругата сакаше да го гледа финалето, но јас не. Првиот дел го поминавме на ручек, а кога се вративме дома, го изгледав крајот. Навистина неверојатен меч. Големи честитки за двајцата. Еден од најдобрите мечеви што сум ги видел во животот“, изјави Ѓоковиќ.

Спорт | пред 7 месеци

Иран започна брутална акција против наводни шпиони – повеќе од 700 уапсени, неколку погубени

Иранските власти тврдат дека преземаат неопходни мерки за заштита на националната безбедност, но активистите и набљудувачите предупредуваат дека станува збор за обид да се задуши несогласувањето и да се засили контролата врз населението.Според информациите објавени од персискиот сервис на Би-Би-Си, иранските функционери тврдат дека израелски агенти без преседан се инфилтрирале во безбедносните структури на земјата. Протекувањето на информации, според наводите, овозможило серија атентати врз високи команданти на Револуционерната гарда и научници поврзани со нуклеарната програма.Во текот на 12-дневниот вооружен конфликт со Израел, три лица обвинети за шпионажа биле погубени, а уште три ден по прогласувањето прекин на огнот. Државната телевизија емитуваше наводни признанија од уапсени, кои, според властите, признале соработка со израелскиот Мосад.Иранските безбедносни сили досега уапсиле повеќе од 700 лица од 13 јуни наваму, под сомневање за шпионажа, според новинската агенција Фарс, блиска до Револуционерната гарда. Министерството за разузнавање тврди дека води „неуморна борба“ против западните разузнавачки служби – ЦИА, Мосад и британскиот МИ6.Исто така, започната е кампања со испраќање предупредувачки пораки до граѓани чии телефонски броеви биле поврзани со израелски профили на социјалните мрежи. Од нив се бара итно да ги напуштат тие страници или ќе се соочат со кривична одговорност.Се врши и силен притисок врз новинарите што работат за медиуми во странство – Би-Би-Си Персијан, Иран Интернешнл и Маното ТВ. Револуционерната гарда, според тврдењата, уапсила родители и брат на водителка на Иран Интернешнл, за да ја натера да даде отказ. Исто така, властите стапиле во контакт со семејствата на новинари од Би-Би-Си, предупредувајќи ги дека тие се „непријатели на Бога“ – обвинение кое во Иран носи смртна казна.Маното ТВ пријави закани и кон своите вработени, од кои некои се обвинети за шпионажа и „непријателство кон Бог“. Набљудувачите веруваат дека ова е дел од поширока стратегија на заплашување, насочена не само кон активисти и новинари, туку и кон уметници, писатели и роднини на жртви од протестите во 2022 година.Особено се таргетирани семејствата на загинатите во протестите одржани под слоганот „Жени, живот, слобода“. Стотици беа убиени, илјадници уапсени, а сега, велат активистите, без конкретни обвиненија се апсат и членови на нивните семејства.Во текот на конфликтот со Израел, властите сериозно го ограничиле пристапот до интернет, а и покрај прогласеното примирје, нормална конекција сè уште не е воспоставена. Пристапот до социјалните мрежи како Инстаграм, Телеграм, Јутјуб и Икс (поранешен Твитер) е блокиран со години и достапен само преку ВПН.Аналитичарите предупредуваат дека ситуацијата потсетува на 1980-тите, кога во текот на иранско-ирачката војна властите спроведоа масовни репресии врз политичката опозиција. Особено се споменуваат масовните егзекуции од 1988 година, кога илјадници политички затвореници беа погубени по тајни судења. Поголем дел од нив беа погребани во необележани масовни гробници.Стравот сега е дека Иран, ослабен по последниот судир со Израел, би можел повторно да тргне по истиот пат – со репресија, затворања и егзекуции во обид целосно да го задуши секој облик на несогласување.

Свет | пред 7 месеци

Топло и до 40 степени, но попладне можно е да има невреме

ВРЕМЕТО ДЕНЕСКАСончево и многу топло со мала до умерена локална облачност. Попладне и во вечерните часови наместа ќе има појава на нестабилност со пороен дожд и грмежи, локално во форма на невреме со интензивен пороен дожд, силен ветер, грмежи и појава на град. Максималната температура ќе биде во интервал од 32 до 40 степени.Во Скопје, сончево и многу топло со слаб ветер од северен правец. Попладне и во вечерните часови во делови од котлината ќе биде нестабилно со пороен дожд, грмежи и засилен ветер, краткотрајно во форма на невреме. Максималната температура ќе достигне до 39 степени.

Македонија | пред 7 месеци

Едно лице на лекување, стан изгоре до темел во Делчево

Во текот на ноќта, околу 00:20 часот, во станбената зграда „Брод“ на булеварот Македонија во Делчево избувна пожар, при што целосно изгоре еден стан.Во пожарот нема повредени лица, но едно лице било пренесено во Општата болница во Делчево од страна на екипа на Итна медицинска помош за дополнителен преглед.На терен интервенираа три противпожарни возила и екипи од Територијалната противпожарна единица Делчево, како и припадници на полицијата. Пожарот бил ставен под контрола и целосно изгаснат околу 01:30 часот по полноќ.Надлежните институции најавија дека дополнителни детали за случајот ќе бидат соопштени во текот на денот.

Македонија | пред 7 месеци

САД и Кина постигнаа договор за ретки метали: Белата куќа потврди пробив во трговските односи

САД и Кина постигнаа значаен договор кој предвидува забрзување на испораките на редки земни метали во САД, соопшти претставник од Белата куќа. Овој договор доаѓа како дел од напорите за смирување на трговската војна меѓу двете најголеми економии во светот.Американскиот претседател Доналд Трамп претходно изјави дека договорот е потпишан во средата, без да открие повеќе детали, но најави и можност за нов договор со Индија.Клучниот дел од договорот, како што информираа официјални лица за Reuters, се однесува на „рамка за имплементација“ на т.н. Женевски договор, кој во мај предвиде Кина да ги укине нетарифните контрамерки воведени кон САД.Во изминатиот период, Кина како одговор на новите американски царини го објави прекинот на извозот на критични минерали и магнети, што сериозно ги наруши синџирите на снабдување во автомобилската, полупроводничката, аеронаутичката и воената индустрија.Американскиот министер за трговија, Хауард Лутник, изјави за Bloomberg дека откако Кина ќе ги испорача договорените метали, САД ќе ги укинат сопствените контрамерки.„Ќе ни ги испорачаат ретките земни метали и кога тоа ќе се случи, ние ќе ги укинеме нашите мерки“, рече Лутник.Официјални претставници нагласија дека договорот е постигнат уште претходно оваа недела и претставува потенцијален напредок по месеци трговски тензии и неизвесности.Женевскиот договор досега не беше потпишан поради кинеските ограничувања за извоз на критични материјали, што ја натера администрацијата на Трамп да воведе контроли за извоз на американска технологија, вклучително и за дизајн на полупроводници и авиони.Почетокот на јуни донесе сигнал за олеснување, кога Кина одобри привремени дозволи за извоз на ретки метали кон три најголеми американски автомобилски производители.Дополнително, се разгледува нов договор според кој Кина ќе продолжи да испорачува магнети и ретки метали, а САД ќе овозможат полесен пристап за кинески студенти на американските универзитети.Иако се работи за позитивен сигнал, аналитичарите предупредуваат дека патот до целосен и стабилен трговски договор сè уште е долг.

Свет | пред 7 месеци

Јапонија по три години повторно активираше смртна казна: Погубен „Убиецот од Твитер“

Јапонија денес ја изврши првата смртна казна по речиси три години, погубувајќи го Такахиро Шираиши, озлогласениот како „Убиецот од Твитер“, кој беше осуден за убиство на девет лица во 2017 година. Телата на жртвите биле распарчени и скриени во неговиот стан во близина на Токио.Погубувањето предизвика бурни реакции, особено по сè погласните повици за укинување на смртната казна во земјата. Минатата година, најдолговечниот осуденик на смрт во светот, Ивао Хакамада, беше ослободен, што дополнително ја интензивира дебатата за оваа казнена мерка во Јапонија.Шираиши беше уапсен во октомври 2017 година, откако полицијата во неговиот стан открила човечки остатоци. На судењето во 2020 година, тој призна дека ги убил сите девет жртви. Осум од нив биле жени, од кои една имала само 15 години, а единствениот маж бил убиен затоа што се обидувал да ја пронајде својата девојка, една од жртвите.Според обвинителството, Ширайши отворил Твитер-профил со цел да пронаоѓа лица со суицидални мисли, ветувајќи им „помош“ во извршување на самоубиство. Во некои случаи им ветувал дека ќе се самоубие заедно со нив.„Сакам да им помогнам на луѓето кои страдаат. Пишете ми кога сакате“, стоело во неговата Твитер-биографија.Адвокатите на Шираиши се обиделе да госменат обвинението, тврдејќи дека дел од жртвите „доброволно се согласиле да бидат убиени“, но судот не ја прифатил оваа одбрана.Случајот предизвика огромно внимание во јавноста, а за само 13 места во судската галерија се пријавиле над 600 луѓе. Неговото апсење ја отвори и јавната расправа за мрачните интернет-заедници поврзани со самоубиство, по што јапонската влада најави регулаторни мерки. Поради овој случај, Твитер ги измени своите правила и забрани објави што поттикнуваат или охрабруваат самоповредување и самоубиство.Оваа брутална серија убиства го потресе јапонското општество и повторно ја стави смртната казна во фокусот на јавната дебата.

Свет | пред 7 месеци

Хрват пронајден жив по 30 години: Намерно ја лажирал својата смрт и започнал нов живот во Франција

Хрватскиот државјанин Борис Ц. од Виерсен (Северна Рајна-Вестфалија), кој исчезнал во 1994 година, по речиси три децении е пронајден жив во Франција, каде што живее под нов идентитет со ново семејство, пишува Јутарни.хр. Случајот кој со години се водеше како можна жртва на убиство, доби неочекуван и драматичен пресврт.Во времето на исчезнувањето, Борис имал 37 години. Неговиот автомобил бил пронајден во Дизелдорф со траги од крв, кои подоцна било потврдено дека се негови. Германската полиција веднаш претпоставила дека е убиен, а и покрај долготрајната истрага, не бил пронајден. Во 1997 година, неговото семејство официјално го прогласило за мртов.Пресвртот се случил по повеќе од 30 години, кога властите откриле дека Борис всушност живее во Франција. Според информации од државното обвинителство, тој однапред го испланирал своето исчезнување. Признал дека имал сериозни долгови и стравувал од можни последици по себе и семејството, поради што решил да исчезне и да започне нов живот.Клучен доказ во случајот – крвавите траги во автомобилот – се покажале како дел од неговиот план. Властите сега веруваат дека Борис намерно се самоповредил за да создаде убедлив впечаток дека станува збор за насилен криминал. Овие лажни траги ги навеле истражителите на погрешен пат, кој траел со децении.Случајот повторно бил отворен благодарение на германската телевизиска емисија Aktenzeichen XY, која често придонесува за разрешување на стари случаи на исчезнувања и кривични дела. Но, ретко се случува "мртов човек" – особено од Хрватска – повторно да се појави во јавноста жив и здрав.

Свет | пред 7 месеци

ЕУ ги продолжува санкциите против Русија до јануари 2026: Избегната нова блокада од Унгарија

Лидерите на земјите-членки на Европската унија постигнаа договор за продолжување на секторските санкции против Русија за дополнителни шест месеци, до јануари 2026 година. Одлуката доаѓа цел месец пред крајниот рок – 31 јули – и претставува изненадување, со оглед на честите закани од Унгарија дека ќе ја блокира одлуката.Секторските санкции, кои вклучуваат забрана за извоз на различни производи во Русија, како и замрзнување на средства и забрана за влез на одредени лица и компании, се обновуваат на секои шест месеци – во јануари и јули. Листата на индивидуални санкции се обновува во март и септември.И покрај договорот за продолжување на постојните санкции, и понатаму нема согласност за најновиот – 18-ти пакет санкции – против Москва. Словачка и Унгарија се против предложените мерки и бараат дозвола за понатамошно купување руски гас и нафта.Европската комисија претходно предложи ЕУ целосно да се ослободи од зависноста од руските фосилни горива до крајот на 2027 година.

Свет | пред 7 месеци

Украински дронови нападнаа цели во Волгоград: затворени мост и аеродром, Русија тврди дека соборила 39 беспилотни летала

Голем украински дронски напад ја погоди руската територија и Кримскиот Полуостров во текот на ноќта, при што беа активирани противвоздушни системи во повеќе региони. Министерството за одбрана на Русија соопшти дека руската противвоздушна одбрана соборила вкупно 39 дронови, од кои 13 над областа Волгоград.Нападот предизвикал прекин на сообраќајот на важен мост преку реката Дон во Калачевскиот округ, објави утрово администрацијата на регионалниот гувернер Андреј Бочаров. Според информациите, мостот е привремено затворен поради остатоци од дроновите и потребата од нивно отстранување. Засега не е познато дали мостот е физички оштетен. Реката Дон, која е петта најдолга во Европа, претставува значајна сообраќајна и стратешка точка.Покрај тоа, аеродромот во Волгоград беше затворен на повеќе од три часа, а авиосообраќајот повторно беше воспоставен нешто пред 7 часот наутро по локално време, соопшти руската служба за цивилно воздухопловство „Росавијација“.Гувернерот Бочаров потврди дека во нападот нема повредени и повика на смиреност. Засега не се објавени детали за материјалната штета, ниту информации за можни последователни мерки.Овој напад доаѓа во време на засилени тензии и зачестени украински напади со беспилотни летала на руската територија, како дел од пошироката стратегија за нанесување удари врз логистички и воени цели во длабочината на Русија.Инцидентот дополнително го зголемува ризикот од проширување на воените дејства, особено по предупредувањата на Москва дека ќе одговори на сите обиди за навлегување во руска територија.

Свет | пред 7 месеци

(Видео) Пожар на сплав на Ада Циганлија - 22 пожарникари на терен

Голем пожар избувна попладнево на сплавот „Оган и вода“ на белградската Ада Циганлија. Како што јавуваат српските медиуми, пожарот бил пријавен во 14:55 часот, по што веднаш на терен интервенирале противпожарните екипи.На местото на настанот се распоредени 22 пожарникари со седум противпожарни возила, кои се обидуваат да го локализираат и изгаснат пожарот. Засега нема информации за тоа што ја предизвикало огнената стихија, ниту дали има повредени лица.Не е познат ниту износот на материјалната штета, а надлежните служби работат на расветлување на случајот. Очевидци сведочат за густ чад и пламени јазици кои се гледале од далечина.Линк од видеото: https://www.instagram.com/p/DLXZUsxI-qk/

Свет | пред 7 месеци

Здравковски: Охрабрувачки е фокусот на Владата кон младите

Игор Здравковски, пратеник од редовите на ВМРО-ДПМНЕ, се обрати од собраниската говорница за време на 57 седница посветена за пратенички прашања. Здравковски се осврна на темите за младите, и особено го истакна фактот што младите се во фокус на Владата, а доказ за тоа е и новиот Оперативен план, а второто прашање го посвети на темата за земјоделие.,,Овие денови одбележуваме една година од владеењето на оваа влада која што е предводена од ВМРО-ДПМНЕ и коалицијата. Една година од новиот почеток и обновата на Република Македонија. До сега видовме дека можело и поинаку видовме дека не може се да биде како до сега. Со работењето на оваа влада се внесе нова енергија, нов темелен пристап кон решавање на проблемите“, рече Здравковски.Тој истакна дека Македонија се движи од тешка стартна позиција кон стабилизација и реална обнова и додаде дека постигнати се конкретни резултати во повеќе области, од социјална заштита до образование и поддршка за младите. Според него, охрабрувачки е фокусот на Владата кон младите, со цел да се поттикне нивната иницијативност и да се создадат услови за останување и развој во земјава.,,Она што многу ме радува посебно е освртот кон младите кои што до сега заминуваат од Република Македонија не поради тоа што немаат пари, не поради тоа што немаат егзистенција туку поради неправдите меѓутоа имавме една категорија на млади коишто имаат секогаш желба енергија меѓутоа немаат храброст и одлучност да почнат свој бизнис. Овој пат се донесе еден голем Оперативен план на Владата којшто опфаќа пофаќа повеќе од 16000 граѓани. Ќе се даде еден стимул на сите овие млади граѓани на Република Македонија да започнат сопствен бизнис каде што ќе ја покажат својата иновативност, а со тоа и ќе останат во Република Македонија да дадат додадена вредност со својата креативност“ истакна Здравковски.Првото прашање на пратеникот Здравковски, беше до претседателот на Владата, и се однесуваше на информации околу Оперативниот план за бројот на апликанти, како и кои се следните чекори за истото.,,Затоа што повикот беше до 20 јуни, дали почитуван премиер имате конкретни информации колку имаме апликанти до сега во која насока се движи и кои би биле следните чекори. За Велес конкретно знам дека има многу поголема заинтересираност од она што до сега се предвидуваше дека ќе биде. Сакам да го поставам прашањето за да биде на ниво на Република Македонија“, праша Здравковски.Второто прашање од Здравковски беше од областа на земјоделието и се однесуваше на тоа дали се воведени некои нови мерки, со оглед на тоа што за време на траење на мандатот на претходната Влада незадоволството од страна на земјоделците беше јасно покажано во јавноста.,,Второто прашање се однесува на земјоделието. Доаѓам од Велес. околните општини каде што најчесто гравитираме се земјоделски општини. Во тек е жетва, во тек е лачење, прскање на лозје итн. Претходно бевме сведоци на премногу чести протести на земјоделци, истураа млеко, исфрлаа јаболка по доловите итн. Сега гледам дека некако ги нема тие појави. Имаме многу зачестени исплати односно редовни исплати на субвенциите. Слушнавме дека можеби ќе има проширување на опфатот на зелената нафта итн. Дали имаме некакви нови мерки во однос на земјоделието? Знаејќи дека земјоделието претставува еден столб којшто предизвикува или не предизвикува во моментов голема инфлација“, истакна Здравковски.

Македонија | пред 7 месеци

Филипче и Мицкоски во судир околу „модерниот“ македонски идентитет: предупредувања за амандмани во Европскиот парламент

Премиерот Христијан Мицкоски и лидерот на СДСМ, Венко Филипче, денеска разменија остри ставови во Собранието поради најавените амандмани во Европскиот парламент со кои се предлага пред македонскиот јазик да се додаде зборот „модерен“.Филипче го праша премиерот дали Владата има рок до кога ќе се обидува да издејствува подобра преговарачка позиција со ЕУ и дали со ваквите амандмани се загрозуваат македонскиот јазик и идентитет. Тој потенцираше дека сите досегашни документи, вклучувајќи го и францускиот предлог и договорот со ФРОНТЕКС, го признаваат македонскиот јазик без додавки.Мицкоски одговори дека Македонија ќе ги почне преговорите „но не како модерни Македонци“, предупредувајќи дека суштината на предложените амандмани е креирање нов топоним – „модерен македонски јазик“ и „модерен македонски идентитет“. Тој истакна дека такви формулации никогаш досега не постоеле во извештаите на Европскиот парламент и го нарече тоа закана по националниот идентитет.Премиерот посочи дека неговата Влада активно работи со европратеници и со меѓународни партнери за амандманите да не поминат на пленарната седница од 7 до 10 јули.Филипче возврати дека за време на владеењето на СДСМ, за идентитетот и јазикот никогаш не се преговарало и побара политичко единство со цел да се спречи евентуално усвојување на спорните формулации.Во репликата, Мицкоски го повтори ставот дека проблемот не е во Уставните измени, туку во континуираната политика на негирање на македонскиот народ и неговото право на идентитет.

Македонија | пред 7 месеци

Тошковски го отвори Европското првенство во џудо за кадети - потпишан и меморандум за разбирање за соработка и обука на полициските службеници

Министерот за внатрешни работи Панче Тошковски денеска учествуваше на отворањето на Европското првенство (ЕП) во џудо за кадети, во организација на Европската џудо-унија (ЕЏУ), кое од четврток до недела ќе се одржи во Скопје. Под мотото „Младите ѕвезди на иднината“, овој престижен настан ќе ги собере најдобрите млади џудисти од целиот континент, кои ќе се натпреваруваат за европските медали и ќе ги покажат својата сила, техника и спортски дух.„Македонија за првпат е организатор на Европско првенство во џудо – чест и задоволство ни е што ги пречекуваме младите џудисти и нивните поддржувачи од цела Европа. Џудото нè обликува преку дисциплина, почит и стремеж кон извонредност – вредности што силно ги цениме. Ова првенство е вистинска манифестација на младешкиот дух, истрајноста и светлата иднина на овој благороден спорт.“, потенцираше министерот.Министерот Тошковски информираше дека беше потпишан Мемнорандум за разбирање помеѓу Министерството за внатрешни работи, Европската џудо федерација и Националната џудо федерација на Македонија.„Целта е соработка на проекти за промоција и џудото Македонија, со посебен фокус на едукација на полициски службеници во областа на џудо спортот и самоодбраната. Планирани се програми за физичка обука базирани на џудо за полициски службеници за подобрување на самоодбраната, техниките на ограничување на движењето и целокупната физичка подготвеност и соработка во многу други активности кои го промовираат спортот, дисциплината и здравото живеење на младите.“, истакна министерот Тошковски.Министерот Тошковски на учесниците на првенството им посака да победи спортскиот дух на младите.

Македонија | пред 7 месеци

Мицкоски: По 7 години застој градиме интерконектор за гас со Грција, заедно со другите проекти од увозно зависна земја, ќе станеме земја која извезува електрична енергија

Претседателот на Владата, Христијан Мицкоски на денешната собраниска седница за пратенички прашања истакна дека конечно по 7 години застој се работи на интерконекторот за гас со Грција и стануваме земја низ која ќе транзитира гас, што заедно со другите проекти во енергетиката од увозно зависна земја, ќе нè направат земја која извезува електрична енергија што ќе влијае позитивно во финансиските биланси.Во однос на изградбата на интерконекторот за гас со Грција, премиерот Мицкоски појасни дека на минатата влада и бил оставен завршен проект со потпишани договори, обезбедено финансирање, проектирање, но по 7 години тие ништо не направиле освен тендер со основ за корупција кој го довел во прашање финансирањето на истиот.„Заемодавателите рекоа дека не го финансираат затоа што во тендерската документација има делови кои укажуваат на корупција и рекоа дека се повлекуваат или да се коригира тендерската документација да почне од почеток. Имајќи предвид дека овој интерконектор е многу значаен за иднината на државата, затоа што со него и интерконекторот во соседна Србија и крак до соседно Косово, ние стануваме многу значаен играч во делот на транзитот на енергенси, затоа што капацитетот на овој интерконектор околу е 3 милијарди метри кубни, со оние кои доаѓаат од исток ќе дојдеме до 4 или 4,5 милијарди метри кубни, а ние како држава трошиме половина милијарда, значи 4 милијарди ќе транзитираат. Прв пат стануваме земја која ќе биде на мапата транзит држави на ваков тип на енергенси и замислете тие си играат 7 години и тендерот паѓа затоа што имало основ за корупција. Ние ја коригиравме тендерската документација, ја објавивме, избравме изведувачи, пративме до заемодавателите и тие дадоа зелено светло“, изјави премиерот Мицкоски.Премиерот Мицкоски додаде дека фирмата од пред еден месец е воведена во работа, теренските активности се завршуваат и се оди со исклучително брза динамика и околу 10 јули се планира официјално да им се претстави на македонските граѓани дека се гради втор интерконектор.„Досега имавме еден со Бугарија, но еднонасочен, овој е двонасочен. И тој кој планираме да го градиме со Србија за да бидеме земја низ која ќе транзитира гас. Очекувам крајот 2026 година или почетокот на 2027 година, овој да биде функционален и поврзан со националниот гасовод на Македонија. Тоа е сериозна работа, бидејќи ќе може да се донесат нови количини за новите гасни централи кои ги планираме во Скопје, но и низ државата. Енергетската независност не е само со овој интерконектор, туку продолжуваме да ја градиме бидејќи тоа е архитектура за иднината на државата“, потенцираше премиерот Мицкоски.Премиерот Мицкоски посочи дека се почнува и со многу значаен проект, а тоа е ветерниот парк во Штип, Карбинци и Радовиш кој годишно со максимален капацитет ќе произведува 1 терават час електрична енергија, тоа е околу 20% од денешно планирано производство на АД ЕСМ и за прав пат оваа година се очекува да заврши годината со резултат еднаков на нула, односно ќе произведеме онолку колку ќе потрошиме.„Се разбира ќе има периоди од годината кога ќе увезуваме, тоа е најчесто зимно, ќе има и кога ќе извезуваме, но на крајот на годината за прв па ќе бидеме нула, нема да бидеме увозно зависна, а потоа откако ќе бидат пуштени првите количини ќе бидеме извозник, што е историски показател, ќе имаме вишок на електрична енергија и тоа ќе влијае и во финансиските биланси и во БДП“, изјави премиерот Мицкоски.Воедно, премиерот Мицкоски додаде дека со Косово обезбедуваме околу милион тони јаглен кој понатаму ќе се плати со струја, а не како порано со тендери, високи цени, броење кеш, сега е поразлично и прашање е зошто порано се плаќал јагленот поскапо од сега и каде одела таа разлика.

Македонија | пред 7 месеци

Стојаноски: Драго ми е што конечно се зборува за тоа колку и какви услуги се достапни, колку километри автопатишта се градат, тоа е едно нормално коешто граѓаните на оваа држава го заслужуваат

На денешната собраниска седница, посветена на пратенички прашања свое обраќање имаше пратеникот од ВМРО-ДПМНЕ, Бојан Стојаноски. Тој постави три прашања кои се однесуваа до претседателот на Владата, Христијан Мицкоски. Стојаноски праша кои се идните чекори коишто се планирани во насока на подобрување на здравствената инфраструктура, бидејќи како што кажа тој истото е една од општествените сфери кои најмногу ги интересираат граѓаните.„Кои се идните чекори коишто се планирани во насока на подобрување на здравствената инфраструктура и во здравството како сфера воопшто, бидејќи од она коешто може да се види тоа е една од општествените сфери кои најмногу ги интересираат граѓаните“, вели Стојаноски.Стојаноски постави дополнително прашање од енергетиката. Тој праша до каде е процесот за отпочеток на градбата за интерконекторот за гас со Грција, нешто коешто треба да даде енергетска независност на Македонија, како и дополнителни околности за функционирање на нашето стопанство.„До каде е процесот за почеток на градбата за интерконекторот за гас со Грција? Нешто коешто сме го зборувале тука неколку години, коешто треба да даде една енергетска независност, или приклучок на Македонија со гас за да можеме да бидеме и во таа рамка, односно во тој дел, да добиеме дополнителна енергетска независност, како и дополнителни олеснителни околности за функционирање на нашето стопанство и на нашите граѓани“, истакна Стојаноски.Стојаноски смета дека прашањата треба да се однесуваат за реализација на мерки и проекти кои треба да го подобрат животот на граѓаните. Тој додаде дека драго му е што конечно дојдовме до ниво да разговараме за тоа колку и какви услуги се достапни, колку километри автопатишта се градат, и додаде дека тоа е едно нормално коешто граѓаните на оваа држава го заслужуваат.„Сметам дека ова се прашања кои ги интересираат граѓаните. Она коешто се најавува како дискурс во јавноста, што е присутно во медиумите, во ТВ дневниците или порталите. Драго ми е што конечно се зборува за тоа колку и какви услуги се достапни, можеби од аспект на дигитализација на одредена платформа, колку километри автопатишта се градат, дали е потребно да градиме. Дојдовме до тоа ниво, разговараме колку клиники ќе отвориме, или какви болници ќе се градат, каде ќе се градат и сметам дека тоа е едно нормално коешто граѓаните на оваа држава го заслужуваат“, дециден е Стојаноски.

Македонија | пред 7 месеци

Филипче до Мицкоски: За јазикот и идентитетот никогаш не се преговарало, тие се потврдени со документи во ЕУ

На денешната седница на пратенички прашања, потпретседателот на СДСМ Венко Филипче се обрати со сериозно предупредување до премиерот Мицкоски и Владата во врска со најавите за можно прифаќање на амандман во Европскиот парламент што би го релативизирал статусот на македонскиот јазик.„Се поставува прашањето: дали е загрозен јазикот и идентитетот?“ – праша Филипче.Тој потсети на конкретни документи кои јасно го утврдуваат македонскиот јазик како рамноправен, без какви било условувања.„Ќе цитирам неколку документи кои што се дел и од францускиот предлог, и од документи од Европската унија, и заклучоци донесени тука, во Собранието, во 2022 година. Првиот документ се заклучоците на ЕУ за отворање на преговорите со Македонија и Албанија, без никакви услови за јазикот и идентитетот.Понатаму, самата Преговарачка рамка, каде македонскиот јазик е експлицитно наведен, без никакви додавки, ѕвездички или фусноти. И потпишаниот договор со ФРОНТЕКС – на чист македонски јазик,“ рече Филипче.Тој предупреди дека за првпат постои реален ризик во Европскиот парламент да помине извештај со нејасно означување на македонскиот јазик.„Во Европскиот парламент, за првпат има сериозен ризик да помине извештај во кој што јазикот некако дополнително се означува. Ние направивме силна кампања во 2022 година. Тогаш беше едностран, напишан тој извештај од тогашниот известувач за Македонија – тоа беше бугарскиот европратеник Ќучук, кој што го запревме,“ рече Филипче.Тој подвлече дека било какви измени што би довеле до нови условувања или дополнувања пред македонскиот јазик се директно спротивни на собраниските заклучоци.„Поради тоа што таква додавка пред македонскиот јазик и нација оди спротивно на заклучоците кои што ова Собрание ги донело – а тоа е дека во ниту еден контекст, во ниту еден момент, ниту за јазикот, ниту за културните, ниту за историските одредници – никој нема право да преговара. За јазикот никогаш не се преговарало. Тоа биле нашите црвени линии. И затоа е таков – чист – јазикот: без фусноти, без додавки, без ништо. И таков е и така е во буквално сите документи,“ рече Филипче.На крај, тој апелираше до премиерот за итна институционална реакција и координација.„И последната работа – во однос на тоа што сега се случува во Европскиот парламент: тогаш, премиере, ни треба сериозна координација на ниво на Парламентот. Сите институции да ги обединиме силите за таков амандман да не помине во Европскиот парламент. Поради тоа што веќе се содржи во сите документи кои што ги гласало ова Собрание – дека таква работа не смее да се случи,“ истакна Филипче.

Македонија | пред 7 месеци

Левица поднесе интерпелација за државниот јавен обвинител Љупчо Коцевски

Пратеничката група на Левица денеска поднесе интерпелација за државниот јавен обвинител Љупчо Коцевски, обвинувајќи го за селективно постапување, политички влијанија и пропусти во работењето на Јавното обвинителство.Пратеникот Сашко Јанчев на прес-конференција посочи четири основи за интерпелацијата:Селективна истрага за трагедијата во Кочани, при што, според Левица, се таргетирале само поранешни функционери, а се изземале актуелни лица од одговорност.Политички притисоци врз обвинителството, што, како што рече Јанчев, се потврдило преку јавниот судир со Владата и повлекувањето на иницијативата за смена по отворањето предмети против кадри на ВМРО-ДПМНЕ.Хаос во Вишото обвинителство во Скопје, за кое беа споменати случаи на компромитирани обвинители што, според Левица, укажуваат на институционално распаѓање.Игнорирање на пријавите за дивоградби во Чаир, и покрај, како што наведоа, јавно обелоденети докази од страна на градоначалничката Данела Арсовска.„Коцевски е персонално одговорен за состојбите, согласно Законот за јавно обвинителство“, рече Јанчев, најавувајќи дека по изгласување, заклучокот ќе биде доставен до Владата за понатамошна постапка за смена.

Македонија | пред 7 месеци

Неуставно е категоризирањето на резиденти и нерезиденти при пописот во 2021 година, Симовски ги пречекорил надлежностите, пресече Уставен суд

Директорот на Државниот завод за статистика, Апостол Симовски, ги пречекорил своите надлежност при изготвување на методологијата за пописот во 2021 година, кога изврши категоризирање на резидентно и нерезидентно население. Ваква одлука донесе Уставниот суд, кои укинаа одредби од методологијата.„Судот оцени дека означените делови од Методологијата, не се во согласност со темелната вредност на нашиот уставен поредок- владеењето на правото, потоа и со членови од Законот за попис на населението, домаќинствата и становите во Република Северна Македонија 2021 година“, велат од Уставен суд.Тие додаваат: „Уставниот суд оцени дека директорот на Државниот завод за статистика ги пречекорил своите надлежности и со подзаконски акт (Методологијата) извршил категоризирање на резидентно и нерезидентно население, за што нема законско овластување, бидејќи Законот за попис на населението, домаќинствата и становите во Република Северна Македонија 2021 година, не предвидува категоризацијата на населението да се разработи со подзаконски акт“.Поради фактот што станува збор за укинувачка, а не поништувачка одлука, Судот напоменува дека одлуката ќе се применува од моментот кога ќе биде објавена во Службен весник (за подзаконските акти кои ќе се носат во иднина), но нема да важи ретроактивно-за веќе спроведениот попис од 2021 година.

Македонија | пред 7 месеци

Лажно видео со Игор Џамбазов предизвика бурни реакции: „Срам да ви е! Ни ова не знаете да го направите како што треба“

На социјалните мрежи деновиве се шири лажно видео, изработено со вештачка интелигенција, во кое „главен лик“ е познатиот актер и шоумен Игор Џамбазов. Видеото е стилизирано како телевизиски прилог со сензационалистички наслов: „Игор Џамбазов ги нападна претставниците на фармацевтската индустрија со зборовите: Убијци во бели мантили“.Монтажата дополнително содржи фотографии на кои Џамбазов е прикажан во лисици, спроведен од полиција, како и исечоци од едно негово претходно интервју кои се злоупотребени и извадени од контекст. Во видеото се тврди дека тој физички нападнал група фармацевти бидејќи му бил забранет „лекот на доктор Илир Демири“, за кој наводно тврдел дека го спасил од инвалидска количка.Следува и „лажно сведоштво“, во кое компјутерски генериран глас, што наликува на гласот на Џамбазов, раскажува за наводна борба со артритис и хронична болка, тврдејќи дека стотици илјади денари биле потрошени на безуспешни терапии.Оваа дезинформација брзо се прошири на интернет и ги вознемири и јавноста и самиот Џамбазов, кој остро реагираше на својот Instagram профил: „Е не сте нормални... вие што го смисливте ова. Колку што јас бев во инвалидска количка, толку вие да бидете среќни и успешни луѓе! Имате ли ум вие воопшто? Оти мозок немате, евидентно. И да, заборавив. Срам да ви е! И арам! П.С. Башка од авион се гледа дека ‘тепачот’ е Тони Михајловски, не сте се потрудиле баш. Ни ова не знаете да го направите ко што треба. Бедници...“Случајот отвора нова сериозна дискусија за злоупотребата на технологијата, особено вештачката интелигенција, во создавање лажни вести и компромитирачки содржини со цел дезинформација и манипулација на јавноста.

Магазин | пред 7 месеци

Млад Македонец се удави во Грција по срцев удар, спасувачот од Ханиоти сведочи за трагедијата

Македонец на возраст од 19 години почина по давење во морето на плажата Ханиоти, на првиот крак на Халкидики. Момчето било извлечено во бессознание од вода и итно пренесено во здравствената установа во Касандра, каде што лекарите ја констатирале неговата смрт.Според информациите од грчката Крајбрежна служба, до нивната канцеларија во Неа Мудања било пријавено дека млада машка личност е извлечена без свест од морето во попладневните часови.Спасувачка присутна на плажата веднаш започнала со реанимација, користејќи автоматски дефибрилатор, а во спасувањето помогнале и неколку капачи. За кратко време пристигнал и волонтер-спасувач, кој продолжил со оживување заедно со тимот од Итната медицинска помош.Во емотивна објава на социјалните мрежи, спасувачот напиша дека се бореле да го вратат младиот човек во живот, но борбата завршила безуспешно. Момчето било пренесено со амбулантно возило до здравствениот центар, каде што неговата смрт била официјално потврдена.Тој на Фејсбук сподели потресна објава:„19-годишно дете…19-годишен ангел…19-годишен несреќен млад човек од Македонија кој имаше срцев застој по давење на централната плажа во Ханиоти…Имаше брза реакција на спасувачот од областа, или кој и да го извлече младиот човек со помош на неколку капачи, и ја започна постапката за реанимација.Повикот беше примен во 16:45 и за 2 минути пристигнав на местото и почнав да му помагам на спасувачот да го вратиме детето во живот.Имаше брз одговор од екипите од брза помош кои ја продолжија борбата, но за жал, без посакуваниот резултат…Го транспортиравме детето до здравствениот центар, а јас бев во амбулантното возило со болничар и правев реанимација до болницата, додека возачот возеше брзо и внимателно колку што можеше. За жал, лекарите ја констатираа смртта на детето.Луѓе, сè што можам да му посакам на светот и на вас е да бидете во добро здравје бидејќи, за жал, животот е краток.“Телото на момчето ќе биде пренесено во Судска медицина во Солун, каде ќе се изврши обдукција, а грчките власти спроведуваат истрага за причините за трагичната смрт.

Свет | пред 7 месеци