ТОП

(Фото) Малолетник со нерегистриран мотор удри пешак во Кисела Вода и побегна

Возач, кој бил малолетник, прегазил пешак и избегал во Кисела Вода. На местото имаше полициски екипи и Брза помош. Возачот е најден.„Денеска околу 19.15 часот во СВР Скопје е пријавено дека на бул.„Борис Трајковски“ во Скопје мотоцикл „Беверли“ без регистарски таблици удрил во пешак. По несреќата пешакот со Итна медицинска помош е пренесен во КЦ-„М.Тереза“, а мотоциклистот го напуштил местото на настанот. По преземени мерки од полициски службеници, пронајден е мотоциклистот и утврдено е дека е малолетник и го управувал мотоциклот без возачка дозвола“, велат од МВР.Се работи на расчистување на случајот.

Скопје | пред 9 месеци

Трагедијата ги смени фотелјите: Стојанче Ангелов ја презема ДЗС по пожарот во Кочани со 62 жртви

Стојанче Ангелов, досегашен директор на Центарот за управување со кризи (ЦУК), е именуван за нов директор на Дирекцијата за заштита и спасување (ДЗС). Одлуката ја донесе Владата, откако досегашниот директор Џеват Селами од коалицијата „Вреди“ беше суспендиран поради мерката домашен притвор. Тој е осомничен во истрагата за катастрофалниот пожар во дискотеката „Пулс“ во Кочани, кој се случи на 16 март и однесе 62 човечки животи.Назначувањето на Ангелов доаѓа во чувствителен момент, кога институциите за справување со кризи и заштита се под зголемено јавно внимание и притисок да покажат капацитет, одговорност и транспарентност.Ангелов е долгогодишен функционер во безбедносниот систем и поранешен командант на специјалните единици. Во јавноста е препознаен како лице со искуство во управување со ризици и кризни ситуации, што беше особено нагласено во неговото досегашно раководење со ЦУК.Останува да се види како овие кадровски промени ќе се одразат на ефикасноста и довербата во системот за заштита и спасување, особено по една од најголемите трагедии во поновата историја на земјава.

Македонија | пред 9 месеци

Кој е уапсениот во Грција: 27 години бегалец, 15 години казна

Ацо Боцевски, во подземјето познат како „Циганот“ e Македонецот кој е уапсен по речиси три децении бегство. Него денеска го лоцирала и лишила од слобода грчката полиција во градот Катерини, потврди македонското Министерство за внатрешни работи.Боцевски беше во бегство од 1998 година, кога наместо да отслужи 15 години затвор за ладнокрвното убиство на Сеат Ибраими, исчезна под сомнителни околности додека беше во домашен притвор. За него беше распишана една од најстарите и најозлогласени меѓународни потерници.Крвавиот настан што го внесе Боцевски во криминалната историја се случи во ноември 1997 година, среде бел ден, во центарот на Скопје. По кратка автомобилска потера, Боцевски излегол од „корветата“, го стигнал Ибраими, кој со „мерцедесот“ излетал од патот и испразнил цел шаржер врз него. Убиство со потпис – ладнокрвно, брутално и пред очите на градот.Со денешното апсење, правдата конечно му се доближува. Од МВР најавуваат дека ќе следи процедура за негова екстрадиција во Македонија, каде го чека неиздржаната затворска казна.

Македонија | пред 9 месеци

Скопје станал бордел за елитна проституција – обвинение за меѓународна мрежа и перење пари што се переле преку криптовалути

Основното јавно обвинителство за гонење организиран криминал и корупција поднесе обвинителен акт против четири лица – двајца странски државјани (од Бразил и Сирија) и двајца македонски државјани – поради сомнение за посредување во вршење проституција и перење пари.Според обвинението, во периодот од декември 2023 до ноември 2024 година, првообвинетата, бразилска државјанка со престој во РСМ, заедно со второобвинетиот – македонски државјанин роден во Сирија – организирале мрежа за сексуална експлоатација на жени од Бразил, кои биле сместени во изнајмени станови во „Џевахир Холдинг“ во Скопје. Преку веб-страницата eurogirlsescort.com нуделе сексуални услуги по однапред утврдени цени, а профилите ги водела првообвинетата, која организирала и логистика за клиентите.„Секоја жртва имала креиран еден или повеќе профили на веб сајтот: www.eurogirlsescort.com, каде биле постирани телефонски броеви и листа на цени на сексуални услуги што се движеле од 150 евра за половина час, 200 евра еден час, 300 евра два часа, 450 евра три часа и 800 евра за цела ноќ, како и фотографии со експлицитна содржина“, велат од ОЈО-ГОКК.Обвинетите го делеле профитот, а парите ги трансферирале преку Вестерн Унион до лица во Бразил и Португалија, како и преку криптовалути, со цел да се прикрие нивното потекло.Третообвинетиот и четвртообвинетиот се теретат за помагање во перење пари. Четвртиот обвинет, покрај што користел сексуални услуги, ѝ овозможил на една од жртвите да трансферира средства преку криптовалути и да ги претвори во готовина.Обвинителството побара продолжување на притворот за тројца од обвинетите, поради опасност од бегство, влијание врз сведоци и повторување на делото.

Македонија | пред 9 месеци

Тошковски тврди дека нема скандал со униформите, негира врски на фирмата со неговата сопруга

Министерот за внатрешни работи, Панче Тошковски, го повтори ставот дека тендерската постапка за набавка на униформи за полицијата, е согласно законот. Тој демантираше дека сопственичката на модното студио, за кое опозициската СДСМ обвини дека е основано непосредно пред распишување на тендерот и е со двајца вработени, е пријателка на неговата сопруга.„Ниту знам кој е сопственик на модното студио кое и да е, ниту пак било кој и да е сопственик е близок на мојата сопруга. Од ова прашање, ќе сфати јавноста дека ова е хајка“, вели Тошковски.Тој посочи дека досега не се сеќава дека во Македонија има политичар кој е проверуван како работи уште пред да ја добие функцијата.„Во текот на вчерашниот ден, даден е одговор на сите обвинувања. Сметам дека МВР тоа што требало да го преземе, го презело. Одредени услови кои се побарани - согласно информациите кои ги имам, а се поврзани со квалитетот на униформите - се исполнети. Досега не е нарачана ниту една униформа. Да оставиме да видиме како ќе се одвива овој процес“, рече Тошковски.На крајот, тој ги повика институциите да го испитаат тендерот.„Ги повикувам одделите при МВР и Обвинителството да ги истражат сите тендери кај што има сомнежи. Јас преземам сѐ што треба да преземам, се грижам за имплементирање на проектите“, рече Тошковски.

Македонија | пред 9 месеци

Уапсен Македонец во Грција, бегал од правдата речиси три децении по убиство во 1997 година

Македонски државјанин, осуден на 15 години затвор за убиство извршено во ноември 1997 година, е уапсен во грчкиот град Катерини, јавува грчката новинска агенција АНА-МПА. Против него била распишана европска потерница, а по убиството се претпоставува дека со години се криел во Бугарија и Турција.Станува збор за 60-годишен маж кој, според судските документи од Македонија, во 1997 година предизвикал сообраќајна несреќа, по што, кога жртвата излегла од возилото, ја нападнал со оружје и ја усмртил. Жртвата била 37-годишен македонски државјанин.За убиството, сторителот бил осуден во 1998 година, но избегал пред да започне издржувањето на казната. По неговото апсење во Катерини, тој ќе биде изведен пред обвинител во Солун, каде што ќе започне процедурата за негова екстрадиција назад во Македонија.Случајот повторно ја отвора темата за бегалците од правдата и меѓународната соработка во борбата против криминалот.

Македонија | пред 9 месеци

Филипче: Не чувствувам вина за „Онкологија“

Претседателот на СДСМ и ексминистер за здравство, Венко Филипче, рече дека не чувствува вина за случувањата во „Онкологија“, за кои двајцата поранешни директори Нино Васев и Нехат Нухи добија обвиненија. Одговорот доаѓа по прес-конференциите на ВМРО-ДПМНЕ, кои го обвинија Обвинителството за селективност при постапувањето, бидејќи Филипче не е на листата со лица кои се обвинети.„Вина не чувствувам апсолутно. Добро е да ја знаеме вистината. Да видиме што ќе покаже судскиот процес. Излезе на виделина лажната кампања која ВМРО-ДПМНЕ ја водеше преку анкетната комисија. Сите ингеренции на Министерството, се извршувани, дури и во најтешките ковид времиња. Сметам дека апсолутно секој, ако го прекршил законот, треба да одговара“, рече Филипче.Поднесени се две обвиненија за случајот „Онкологија“. Деталите прочитајте ги тука:

Македонија | пред 9 месеци

Грчките медиуми за грчката драма во Скопје

Одлуката на ракометниот клуб АЕК да не се појави на реванш натпреварот против Алкалоид во финалето на ЕХФ Европскиот Куп во Скопје предизвика лавина реакции во грчката јавност и медиуми. Потегот на АЕК, кој го правда со третманот на нивните навивачи, се слави како „одбрана на честа“, но во Македонија се доживува како класичен бојкот со политичка и навивачка позадина.„Браво претседателе!“, „Честитки Папастаматис!“, „Вака се брани честа“ – со вакви пораки грчката јавност го поздрави потегот на АЕК, кој одби да се појави на реваншот од финалето во ЕХФ Европскиот куп против Алкалоид во Скопје.АЕК тврди дека нивните навивачи биле условени: или ќе влезат сите што тргнале со автобуси од Атина, или никој. Тие инсистираат на спортското правило според кое 10% од капацитетот на салата треба да биде резервирано за гостинска публика – што за „Борис Трајковски“ значи околу 650 луѓе.Македонската полиција, по безбедносна проценка, одлучи дека е невозможно да се обезбеди влез за толку голем број навивачи.Навивачката група „Оригинал 21“ од Атина излезе со соопштение: „Ова беше голем момент за клубот. Играчите се откажаа од европски трофеј за да нè поддржат. За нас, тие веќе се победници. Нашето правило ‘сите или никој’ не е каприц – тоа е животен став.“Грчките медиуми пренесуваат дека на АЕК му биле доделени само 190 билети, наспроти очекуваните 1.000. Дел од автобусите со навивачи биле вратени на Евзони, по што клубот ја информирал ЕХФ дека нема да излезе на терен.Алкалоид одговори со соопштение: „Натпреварот не се одигра бидејќи противникот одлучи да не игра“.Натпреварот останува „во воздух“, а исходот зависи од одлуките на ЕХФ.

Спорт | пред 9 месеци

На 24 јуни ќе му се суди на Зоран Јованов, таткото на Васил Јованов

Првото судење за Зоран Јованов, таткото на Васил Јованов, кого Обвинителството го гони за предизвикување општа опасност, бидејќи му дал автомобил на синот, со кој беше усмртена младата Фросина Кулакова, ќе се одржи на 24 јуни. Предметот го суди судијката Снежана Марковска, истата која претходно досуди 12 години затвор за Васил.Зоран Јованов е обвинет дека две години му овозможувал на Васил, да го вози автомобилот „Пежо 207“, иако знаел дека тој немал возачка дозвола. Поради тоа, Обвинителството го гони дека со општоопасно дејствие предизвикал опасност за животот и телото на луѓето, свесен дека поради неговите сторувања можат да настапат штетни последици, а сепак лекомислено сметал дека тие нема да настапат.„Тој на својот син му давал да управува патничко моторно возило „Пежо 207“, иако знаел дека синот не смее да управува со автомобил бидејќи нема возачка дозвола и е повеќекратен сторител на сообраќајни деликти, и тоа: едно кривично дело – сообраќајна несреќа со полесни последици во ноември 2022 година, 11 сообраќајни прекршоци (возење без возачка дозвола, возење под дејство на алкохол, непочитување на семафор и на пешачки премин) во текот на 2023 и 2024 година, како и кривично дело – сообраќајна несреќа со смртни последици на 29.01.2025 година“, стои во обвинението.Исправка: За денеска не било закажано рочиште, ниту одржано - забуна е направена поради грешен број на предмет по кој нашата редакција се водеше, а кој не се однесува на Зоран Јованов.

Македонија | пред 9 месеци

Смена на врвот: Судскиот совет не ја избра Адеми, Фидани поставен за шеф на Врховниот суд

Со 8 гласа „за“ и 5 „против“, Судскиот совет денеска го избра судијата Африм Фидани за нов претседател на Врховниот суд. Неговата противкандидатка, судијката Беса Адеми, која ја вршеше функцијата до февруари годинава, доби само 2 гласа „за“ и 11 „против“, што не беше доволно за повторен мандат.На истата седница, Советот треба да избере и 10 нови судии за Апелациониот суд Скопје.Африм Фидани има долгогодишна кариера во правосудниот и јавниот сектор:1990–1996: работел во просветата на правно-административни позиции.1996–2005: бил републички инспектор за труд во Државниот инспекторат за труд, со фокус на работните односи.2005–2007: ја извршувал функцијата секретар на Општина Врапчиште.2007–2011: работел како адвокат со канцеларија во Гостивар.2011: е избран за судија во Апелациониот суд Скопје, каде работи во кривичниот оддел.Подоцна, со одлука на Судскиот совет, е избран за судија во Врховниот суд на Република Македонија.Сега, со мнозинство гласови, Фидани го презема највисокото место во судскиот систем.Претходно, Беса Адеми, поранешна претседателка на Врховниот суд, беше во центарот на контроверзии поради иницијативата за нејзино разрешување, поднесена од членот на Судскиот совет, Миљазим Мустафа. Мустафа ја обвини Адеми за непочитување на обврските како член по функција во Судскиот совет, наведувајќи дека таа не присуствувала на 21 седница од мај до октомври 2023 година без соодветни оправдувања. Дополнително, интервјуто на Адеми за порталот СДК.мк, во кое зборуваше за политички притисоци врз судството, беше исто така предмет на критика. Адеми и нејзината одбрана ги отфрлија обвинувањата, истакнувајќи дека нејзиното отсуство било оправдано и дека интервјуто претставува израз на слободата на говор. Таа нагласи дека постапката против неа е обид за политички притисок врз судството. Судскиот совет, по разгледување на извештајот од Комисијата, одлучи да ја запре постапката за утврдување на одговорност на Адеми, дозволувајќи ѝ да ја продолжи функцијата како претседателка на Врховниот суд.

Македонија | пред 9 месеци

Градоначалникот на Кичево под истрага: адвокати инкасирале илјадници евра, иако општината има 37 правници

Градоначалник на Кичево, Фатмир Дехари, под истрага – ОВР Кичево поднесе кривична пријава за злоупотреба на службена положба. Според полицијата, во периодот од 2017 до 2024 година, Дехари незаконски склучувал договори со адвокати, иако општината има сопствен правен сектор со 37 вработени. Со ова, според МВР, тој овозможил противзаконска корист за трети лица, нанесувајќи штета на општинскиот буџет од речиси 4 милиони денари (околу 64.000 евра).„ОВР Кичево поднесе кривична пријава против Ф.Д.(51) од кичевското село Србица поради постоење основи на сомнение за сторено кривично дело „злоупотреба на службена положба и овластување“ по член 353 од Кривичниот законик“, вели МВР и додава:„Во периодот од 2017 до 2024 година, тој во својство на градоначалник на општина Кичево, противзаконски склучил повеќе договори за извршување на адвокатски услуги со адвокати од Кичево, иако во рамките на општина Кичево постои Сектор за правни работи со вкупно 37 вработени, кои имаат право да ја застапуваат општината пред судовите во државата. На тој начин пријавениот ја искористил својата службена положба, постапил спротивно на одредбите од Законот за спречување на корупцијата и судир на интереси, на Законот за локална самоуправа, на Законот за јавни набавки, ги прекршил одредбите од Законот за парнична постапка, Правилникот за систематизацијата на работните места, со што на адвокатите им овозможил, на штета на буџетот на општина Кичево, да се стекнат со противзаконска имотна корист од 3.938.420 милиони денари или околу 64.000 евра“

Македонија | пред 9 месеци

Нема фотографија

Држава со опасни возачи: полицијата викендов казни 1343 лица - брзи, пијани, без дозволи

„На подрачјата на сите сектори за внатрешни работи во текот на изминатиот викенд (24/25.05.2025) полициските службеници во рамки на интензивните сообраќајни контроли издадоа вкупно 1343 платни налози, а претежно по преземени мерки по основ на Законот за безбедност на сообраќајот на патиштата (ЗБСП), како и по основ на Законот за возила (ЗВ)“, велат од МВР и додаваат:Според статистичките податоци, специфично за деновите од викендите и натаму најголемиот број изречени прекршоци се однесуваат на непочитување на брзината на движење 546, за непрописно паркирање беа изречени 120 мерки, за непоседување на возачка дозвола изречени се 137 санкции, потоа 121 мерка за некористење на сигурносен појас, како и 47 изречени санкции за користење на мобилен телефон.Во деновите на викендот санкциониран е 21 возач за минување на затворен сигнал (црвено светло), додека пак 43 возачи се исклучени од сообраќај бидејќи управувале возило под дејство на алкохол. Исто така санкционирани биле десет возачи на мотоцикли поради неносење заштитна кацига, изречени се четири мерки за прекршоци што ги чинат пешаците, а санкционирани биле и тројца возачи на електрични тротинети.Во рамки на контролите, санкционирани се и 24 возачи за управување нерегистирано возило, а исклучени од сообраќај биле седум возила заради техничка неисправност согласно Законот за возила.Сообраќајните контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта.

Македонија | пред 9 месеци

Финансиска полиција открила финансиски скандал во М-НАВ

Управата за финансиска полиција поднесе кривични пријави до Основното јавно обвинителство Скопје против две лица вработени во М-НАВ АД Скопје – акционерско друштво во државна сопственост за услуги во воздухопловната навигација.Првата пријава се однесува на В.К., поранешен извршен директор на Секторот за воздухопловна техника, кој се сомничи за кривично дело „Злоупотреба на службена положба и овластување“ (член 353 став 2 од Кривичниот законик). Според пријавата, В.К. во 2022 година споил две различни јавни набавки – набавка на софтвер за управување со документи и физичко/електронско архивирање – во една постапка. Притоа, изготвил техничка спецификација и тендерска документација со дискриминирачки и несразмерни услови, со што, според надлежните, го прекршил Законот за јавни набавки, особено членовите 5 и 8, кои се однесуваат на начелата на конкуренција и сразмерност.Втората пријава е против Б.А., в.д. раководител на Одделението за јавни набавки, осомничена за „Несовесно работење во службата“ (член 353-в став 2 од Кривичниот законик). Таа, иако била свесна дека тендерската документација е спротивна на законот, сепак ја објавила во електронскиот систем за јавни набавки, со што овозможила спроведување на постапката.„Со поставување на вакви дискриминирачки критериуми кои ја ограничиле конкуренцијата, пријавените, според Финансиската полиција, го оштетиле буџетот на М-НАВ АД Скопје за над 1.493.000 денари, додека корист остварило приватното правно лице Контего ДОО Скопје, со кое потоа бил склучен договор“, велат од Финансиската полиција.

Македонија | пред 9 месеци

Трамп за Путин: Што, по ѓаволите, се случи со него, Путин е апсолутно луд

Американскиот претседател Доналд Трамп остро реагираше на најголемиот руски воздушен напад врз Украина, во кој вчера биле лансирани речиси 300 дронови и 69 проектили, а има и жртви и повредени.„Што, по ѓаволите, се случи со него? Тој убива многу луѓе. Путин е апсолутно луд“, рече Трамп, додавајќи: „Го познавам Путин долго време, секогаш добро сме се сложувале, но тој гаѓа градови со ракети и убива луѓе и тоа не ми се допаѓа.Секогаш сум велел дека Путин ја сака цела Украина, не само дел од неа и можеби тоа се покажува како точно, но ако го направи тоа, тоа ќе доведе до пропаст на Русија”, рече Трамп.Трамп не ја отфрли можноста да ги засили санкциите кон Русија.

Свет | пред 9 месеци

Трамп се согласи да го продолжи рокот за трговски разговори до 9 јули

Претседателката на Европската комисија, Урсула фон дер Лајен, телефонски разговорала со американскиот претседател Доналд Трамп околу неговата најава за воведување тарифи од 50 проценти на увозот од Европската унија, почнувајќи од 1 јуни.За разговорот таа се огласи на платформата Икс каде го оцени разговорот со Трамп како добар, потенцирајќи дека ЕУ и САД имаат најзначајни и најтесни трговски односи во светот.„Европа е подготвена за брзи и одлучни разговори“, додаде таа, истакнувајќи дека за постигнување на квалитетен договор ќе биде потребно време до 9 јули, крајниот рок претходно одреден од Трамп.Американскиот претседател Доналд Трамп се согласи да го продолжи рокот за трговски разговори со Европската унија до 9 јули, откако претседателката на Европската комисија изјави дека на блокот му е потребно повеќе време за да постигне добар договор.

Свет | пред 9 месеци

Времето денеска: Сончево и топло со мала облачност

Денеска времето ќе биде сончево и потопло со мала до умерена локална облачност.Ќе дува умерен, но долж Повардарието и во источните делови засилен ветер од северен правец со над 70 километри на час.Во Скопје, сончево и малку потопло со мала до умерена облачност. Ќе дува умерен до засилен ветер.Во наредните денови времето ќе биде променливо облачно и нестабилно со локален пороен дожд, грмежи и засилен ветер, а дневните температури ќе бидат во постепен пораст.

Македонија | пред 9 месеци

Не смееле ни да излезат на терен, биле со солзи – АЕК клекна пред навивачки ултиматум

Финалето во ракомет меѓу Алкалоид и АЕК не само што не се одигра, туку остана запаметено како пример за притисоци, закани и спорт што капитулира под надворешни влијанија. Претставникот на Алкалоид, Зоран Цветановски, за МРТВ откри детали од драмата зад кулисите. Според него, уште од утринскиот технички состанок постоеле јасни сигнали дека може да настане проблем поради бројот на дозволени грчки навивачи – ограничени на 200 лица поради безбедносни проценки и одлука на МВР. Дел од навивачите на АЕК сепак допатувале во Скопје, без да имаат билети, и поставиле ултиматум до сопствениот клуб.„Имавме сигнали во текот на денот, бидејќи тие разговори траеја од 10 часот кога беше техничкиот состанок, кога треба да се договир сѐ, како ќе тече протоколот. Нашиот клуб и МВР донесоа одлука, по сѐ што се случува во државата, бројот на влезници за гостите да биде 200. Дел од навивачите на АЕК допатуваа во Скопје, дел не. И тука настана проблем. Дадоа ултиматум на претставниците на АЕК дека ќе трпат последици, ако се појават на теренот. Управата на АЕК затоа не им дозовли да се појават. Ракометарите на АЕК имаа и солзи на очите, но не смееја против одлуката на управата“, рече Зоран Цветановски, претставник на „Алкалоид“ за МРТВ.Тој додаде: „Точно се знаеше дека тој контингент е 200. Се напраивја напори, им беше кажано да не доаѓаат. Но тие патуваа без разлика дали имаат влезници или не. Нашите органи од МВР си ја знаат работата, беа децинди дека мора така да биде. Јас нема да си дозволам да ги толкувам критерумите, правилата и сите тие кои имаат свои некои правила на игра во ЕХВ. Тоа нема да си дозволам. На прва, логично е дека треба да биде 10:0. Можно е сѐ да се случи. Сметам дека Алкалоид треба да го добие трофеојот, но би почекал, бидејќи може да се појави друга варијатна“.

Спорт | пред 9 месеци

„Алкалоид“ чекаше, „АЕК“ се повлече – финалето стопирано

Натпреварот што требаше да биде ракометен спектакл во Скопје – финалето меѓу Алкалоид и АЕК – е откажан пред самиот почеток. Причината? Екипата на АЕК одби да излезе на терен, поради спор околу влезот на нивните навивачи.„Натпреварот вечерва нема да се одигра за жал. АЕК нема да излезе на терен. Така што, за понатамошни инструкции што со овој натпревар, ќе чекаме информации. За вечерашниот натпревар што требаше да биде спектакл, се извинуваме. Добивме информација дека екипата на АЕК не сака да го одигра натпреварот“, рече официјалниот спикер.Вечерва требаше да се додели пехарот, но тоа нема да се случи. За судбината на ова финале ќе се одлучува дополнително. Според неофицијалните информации, екипата на АЕК се откажала оти сакале во салата да влезат повеќе од 200 нивни навивачи, што било недозволиво и надвор од дадените насоки.Неофицијално, играчите на АЕК сакале да го играат натпреварот, ама претседателот на клубот бил во кавга со навивачите и добивал закани. Па затоа, била донесена ваква одлука. Дали ќе има нов натпревар или ќе биде доделен пехарот на „Алкалоид“, ќе одлучува Европската ракометна федерација.

Спорт | пред 9 месеци

Конзулката Ременски и нејзиниот сопруг од АНБ на фотографија со претседателката Сиљановска во Рим

Експратеничката на СДСМ, конзул на Македонија во Венеција, Фросина Ременски, заедно со нејзиниот сопруг, кој работи во АНБ, Јовче Ременски, се фотографираа со претседателката Гордана Сиљановска-Давкова во Рим. На фотографијата тие се пред базиликата Санта Марија Маџоре во Рим. Сопружниците Ременскис е гледаат на една од единаесетте фотографии кои ги објави Кабинетот на Сиљановска. Поводот беше чествувањето на Св. Кирил и Методиј. Неофицијално, присуството на Ременски било дел од дипломатските активности на Македонија во Италија.Одлуката за именување на Ременски за конзул беше донесена од Владата на 13 февруари 2024 година, со потпис на поранешниот заменик-претседателот на Владата, Фатмир Битиќи од СДСМ. И по смената на власта, таа остана дипломатски претставник. Ременски е редовна професорка на Факултетот за безбедност во Скопје. Во својата политичка кариера, таа беше пратеничка на СДСМ, потпретседателка на Собранието и техничка министерка за труд и социјална политика. Исто така, беше потпретседателка на СДСМ, се обиде да го добие и претседателското место - но не доби поддршка.

Македонија | пред 9 месеци

(Фото) Несреќа по полноќ кај Порта Македонија – возач со „ауди“ излетал од улицата, автомобилот се запалил

Возач со „ауди а4“ имал тешка несреќа кај „Порта Македонија“. Сѐ се случило ноќеска по полноќ, кога излетал од улицата, удрил во бетонски столбчиња и канделабра, а потоа автомобилот се запалил. Полициските службеници интервенирале и го изгаснале огнот.„Во незгодата со телесни повреди се здобил возачот, констатирани во Градската општа болница 'Св.Наум Охридски'“, велат од МВР за „Скопје1“.Извршен е увид од увидна екипа од СВР Скопје.

Скопје | пред 9 месеци

Затворска „мафија“ фатена на дело: „плати или ќе го претепаме“ – затвореници уценувале мајка на осуденик

Секторот за внатрешни работи Струмица поднесе кривична пријава до Основното јавно обвинителство Струмица против четири лица од Скопје – А.Б. (31), А.Р. (25), Е.Б. (27) и Р.Р. (20) – поради сомнение за сторени кривични дела „изнуда“ и „лихварство“.А.Б. и А.Р., кои во моментот издржуваат затворска казна во Затворот Идризово, со помош на незаконски внесени мобилни телефони, преку апликацијата „Фејсбук Месинџер“, стапиле во контакт со мајка на друг осуденик. Од неа барале месечен надомест од 1.200 евра во замена за, како што тврдeле, „заштита“ и подобри услови за нејзиниот син во затворот. Во видео повици ѝ прикажувале сцени на насилство врз нејзиниот син, уценувајќи ја дека ќе продолжат со насилството доколку не ги добијат парите.На 23 мај 2025 година, Е.Б. (брат на А.Б.) и Р.Р. (брат на А.Р.) по претходен договор се сретнале со мајката во Струмица за да ја преземат паричната сума, за која тврделе дека е долг. Во моментот кога Е.Б. ги примил претходно обележаните пари, бил приведен од полициски службеници од СВР Струмица. Р.Р. се обидел да побегне, но веднаш бил фатен и приведен. При приведувањето, кај Е.Б. биле пронајдени пари во различни валути и апоени, за кои не поседувал доказ за потекло, па истите биле одземени.Истовремено, по наредба на надлежните органи, биле извршени претреси во затворските ќелии на А.Б. и А.Р. во Затвор Идризово. Притоа биле пронајдени и одземени два мобилни телефони со кои, според истрагата, тие ја извршувале изнудата.Е.Б. и Р.Р. се задржани во Полициската станица Струмица, а за случајот бил известен јавен обвинител од Основното јавно обвинителство Струмица. По поднесувањето на кривичната пријава, двајцата биле изведени пред судија од Основниот суд Струмица, кој им изрече мерка куќен притвор.

Македонија | пред 9 месеци

(Видео) Пак прскалки во затворена просторија, организаторот казнет

Со пиротехника се прославила победата на кошаркарскиот клуб „Маџари“ кој издвои победа над клубот „Ангели“, иако Собранието донесе измени на Законот за прекршоци против јавниот ред, со кои, се забранува употреба на прскалки во затворени простории. Натпреварот се одиграл во затворена сала, а зад лед дисплејот, покрај конфетите, се гледаат и прскалките.Побаравме став од Кошаркарската федерација на Македонија, дали се тие организатори, но и дали знаат дека употребата на пиротехника во затворени простории е казниво – до овој момент не добивме одговор. Го контактиравме и кошаркарскиот клуб кој славеше победа за употребените прскалки – но и од таму молк.Од Министерството за внатрешни работи, посочуваат дека постапиле и дека ќе има прекршочна пријава за организаторот.„Констатирано е дека организаторот нема пријавено до МВР користење пиротехника, согласно закон за пиротехника. СВР Скопје го повика организаторот при што ќе му биде поднесен прекршок согласно новиот закон за користење на пиротехника“, велат од МВР за „Скопје1“.Со измените не е дозволена употреба на пиротехнички средства во објекти и простории од затворен тип, а двојно се зголемени и прекршочните глоби за физичките и правните лица кои постапуваат спротивно на забраната. Доколку прекршокот се повтори, се предвидува затворска казна. Овие измени дојдоа по големата трагедија во Кочани, каде при употреба на прскалки, искра го зафати таванот и изби пожар, по што загинаа 62 лица.Инаку, кошаркарскиот клуб „Маџари“ славеше победа за влез во првата лига со трофеј.

Македонија | пред 9 месеци

(Видео) Македонецот на врвот: Илиоски ја одбрани светската светската титула во кик бокс!

Бобан Илиоски успешно ја одбрани светската титула во кик бокс по ВАКО Про правилата во категоријата до 88,6 килограми (К1 стил). Негова поддршка околу рингот беа семејството, селекторот Дејан Митровски-Урко, но и Македонци кои живеат во Швајцарија.Македонскиот шампион синоќа во Женева, Швајцарија, забележа импресивна победа со технички нокаут во втората рунда против Кадри Мурсели од Франција. Со оваа победа, Илиоски уште еднаш покажа дека е еден од најдоминантните борци во својата категорија на светско ниво.Да потсетиме, Бобан ја освои титулата минатата година во Скопје, кога по тешка и израмнета борба го победи турскиот претставник Берк Дузенли со судиско мнозинство (2-1).Со оваа одбрана, Илиоски не само што ја потврди својата светска класа, туку и испрати силна порака дека е подготвен за нови предизвици и уште поголеми подвизи во кик бокс арената.

Спорт | пред 9 месеци

Таравари расчистува со „непослушните” кадри

На вонредното собрание на Алијансатана албанците од крилото на Арбен Таравари, беше разрешен шефот на партиското Собрание, Арбен Фетаи.Одлуките за расчистување со нелојалните кадри доаѓаат неколку дена откако дел од високите функционери на оваа партија се спротивставија на неговата одлука да ја напушти Владата и коалицијата ВРЕДО.За нов претседател на Собранието на Алијансста е избран Назим Таипи.„Исклучивме и некои членови на Претседателството кои веќе јавно се изјаснуваат против Алијансата за Албанците.За Мимоза Муса одлуката не беше донесена, бидејќи не беше добро дефинирана пораката од неа, дали останува со Алијансата за Албанците, или останува со ВРЕДИ, немаме јасна порака“, рече Таравари.Таравари го повтори ставот дека на Собранието била потврдено одлуката партијата да ја напушти Владата и самостојно да се натпреварува на локалните избори во октомври. Таравари вели дека на локалните избори ќе соработува и со ДУИ и со ВРЕДИ, па така набројс дека во Битола, во Кичево, во Брвеница, во Чашка, во Преспа и во Бутел ќе соработуваат и со ДУИ и со ВРЕДИ бидејќи само така можат да им помогнат на Албанците.Таравари не исклучи во другите општини соработка со која било опозициска политичка партија.

Македонија | пред 9 месеци

Светските берзи паѓаат поради заканата на Трамп кон ЕУ

На светските берзи, цените на акциите паднаа минатата недела бидејќи инвеститорите се загрижени за намалувањето на кредитниот рејтинг на САД, а пазарите беа негативно погодени и од новите закани на Вашингтон за зголемување на царините за увоз од Европската Унија. На Волстрит, Dow Jones минатата недела се лизна за 2,5 проценти на 41.603 поени, додека S&P 500 падна за 2,6 проценти на 5.802 поени, а индексот Nasdaq падна за 2,5 проценти на 18.737 поени.Индексите се во минус од почетокот на неделата бидејќи Moody's го намали кредитниот рејтинг на САД од Aaa на Aa1 поради големиот дефицит на федералниот буџет, високите трошоци за финансирање и планираните намалувања на даноците.Јавниот долг на САД е околу 36,2 трилиони долари и може да се зголеми за уште 3,8 трилиони во следните десет години бидејќи претседателот на САД Доналд Трамп има намера да ги намали даноците. Ова доведе до значително зголемување на приносите на државните обврзници, што значи дека владата мора да се задолжува по повисока цена.Намалувањето на даноците веројатно би го зголемило трошењето и би го поддржало економскиот раст, но од друга страна, јавниот долг би се зголемил ако не се намалат владините трошоци. А намалувањето на федералните трошоци, што е еден од приоритетите на Трамп, не оди толку непречено како што најави претседателот. Покрај тоа, се чини дека овој проект не е добро подготвен.Сепак, приносите од обврзниците се стабилизираа донекаде на крајот од неделата, откако Претставничкиот дом тесно го поддржа предлог-законот на Трамп за намалување на даноците, па затоа сè уште се чека поддршката од Сенатот.Сепак, во петокот, Трамп повторно ги потресе пазарите заканувајќи се на Европската Унија со царини од 50 проценти од 1 јуни, бидејќи не е задоволен од напредокот на трговските преговори меѓу САД и ЕУ.Цените на акциите, исто така, паднаа на повеќето европски берзи минатата недела. Мора да се признае, лондонскиот индекс FTSE се зајакна за 0,4 проценти, на 8.717 поени, но франкфуртскиот DAX се лизна за 0,6 проценти, на 23.629 поени, а парискиот CAC за 1,9 проценти, на 7.734 поени.

Свет | пред 9 месеци