ВЕНЕЦУЕЛА

Претседателката на Европската комисија порача: Стоиме покрај народот на Венецуела

Претседателката на Европската комисија, Урсула фон дер Лајен, во саботата порача дека Европската унија стои покрај народот на Венецуела и ја поддржува мирната и демократска транзиција во земјата.„Стоиме покрај народот на Венецуела и поддржуваме мирна и демократска транзиција. Секое решение мора да ги почитува меѓународното право и Повелбата на ОН“, напиша фон дер Лајен на социјалната мрежа X. Таа додаде дека ЕУ внимателно ја следи ситуацијата и ги повика граѓаните на Унијата во Венецуела да се потпираат на целосна поддршка од европските институции.Оваа изјава следи по американската воена интервенција во Венецуела. Соединетите Американски Држави изведоа напади врз земјата, а претседателот Доналд Трамп соопшти дека претседателот на Венецуела, Николас Мадуро, и неговата сопруга се уапсени и одведени надвор од државата.Нападот, кој беше од „големи размери“, го изведоа американските сили, а операцијата за апсење на Мадуро ја спроведе елитната специјална единица Delta Force. Ситуацијата во Венецуела останува кревка и неизвесна, додека меѓународната заедница ги следи развојот на настаните.

Свет | пред 4 месеци

Нема фотографија

Мадуро се упатува кон строг федерален затвор – САД со сериозни безбедносни предизвици

Иако сè уште не е познато каде точно американските власти ќе го држат Николас Мадуро до почетокот на судскиот процес, обвиненијата против него се подигнати во Њујорк, што отвора можност тој да биде сместен во строго чуваниот Metropolitan Detention Center (MDC) во Бруклин.Американскиот претседател Доналд Трамп потврди дека Мадуро моментално се наоѓа на воениот брод USS Iwo Jima, кој плови кон Њујорк. Според американските медиуми, токму поднесувањето на обвиненијата во овој федерален округ овозможува негово задржување во еден од најобезбедените затвори во земјата.Metropolitan Detention Center е познат како објект во кој, пред да биде осуден на доживотен затвор, престојувал и озлогласениот водач на картелот Синалоа, Хоакин „Ел Чапо“ Гузман. Во истиот затвор привремено биле сместени и Шон „Диди“ Комбс, Гислејн Максвел, Р. Кели, како и Сем Бенкман-Фрид.Иако MDC е специјално опремен за притвореници со висок безбедносен ризик, тој денес е единствениот федерален поправен центар во Њујорк, откако Бирото за затвори го затвори комплексот на Менхетен по самоубиството на Џефри Епстин. Токму тој случај ја насочи јавноста кон сериозните проблеми во американскиот затворски систем.За сместувањето на Ел Чапо, кој претходно успеа да избега од затвор во Мексико, биле преземени исклучително строги безбедносни мерки. Во истиот објект бил притворен и Исмаел „Ел Мајо“ Замбада Гарсија, коосновач на картелот Синалоа.

Свет | пред 4 месеци

Мадуро е тргнат од власт: Венецуела влегува во најнеизвесниот период во последните децении

Венецуелскиот претседател Николас Мадуро е тргнат од власт, објави американскиот претседател Доналд Трамп, но засега останува целосно нејасно што ќе се случува понатаму во земјата и како ќе изгледа Венецуела по падот на режимот, анализира Би-Би-Си.Станува збор за најдиректната американска интервенција во Латинска Америка од 1989 година, кога САД ја нападнаа Панама и го соборија тогашниот воен лидер Мануел Нориега. Во Вашингтон, ваквиот развој на настаните многумина го доживуваат како голема победа, особено тврдото крило во администрацијата на Трамп, чии поединечни функционери со години отворено се залагаа за промена на режимот во Каракас.Соединетите Држави подолг период го обвинуваа Мадуро дека предводи криминална нарко-организација, обвинувања што венецуелскиот лидер постојано ги негираше. Воедно, Вашингтон не го признаваше како легитимен претседател по изборите во 2024 година, кои меѓународните набљудувачи и опозицијата ги оценија како нерегуларни и неправедни.Од друга страна, властите во Каракас со години ги обвинуваат САД дека нивната вистинска цел е преземање контрола врз венецуелските нафтени резерви, кои се сметаат за најголеми во светот.Кој ќе ја преземе власта?Клучната непознаница, според аналитичарите, не е ставот на Вашингтон, туку што ќе се случува внатре во самата Венецуела доколку Мадуро навистина е отстранет од власта. Поддржувачите на американската интервенција тврдат дека тоа би можело да го отвори патот за преземање на власта од опозицијата, предводена од добитничката на Нобеловата награда за мир Марија Корина Мачадо или од опозицискиот кандидат на изборите во 2024 година, Едмундо Гонзалес.Сепак, бројни аналитичари предупредуваат дека таков развој на настаните нема да биде ниту брз, ниту едноставен. Венецуелската војска и паравоените структури досега му останаа лојални на Мадуро, а дури и дел од неговите критичари стравуваа дека директна американска воена интервенција би можела дополнително да ја дестабилизира земјата.Можни сценаријаИнформациите за апсење или отстранување на Мадуро би можеле да предизвикаат немир и кај неговите најблиски сојузници, кои би се обиделе да ги зачуваат своите позиции во хаотичниот транзициски период.Според анализите, можни се три сценарија:– Војската и државниот апарат на Мадуро ја задржуваат контролата, што би довело до масовни протести;– Опозицијата ја презема власта со поддршка од САД, при што структурите на поранешниот режим се распаѓаат;– Борба за власт меѓу приврзаниците на Мадуро и опозицијата, проследена со долготрајни немири, насилство и можна дополнителна интервенција на САД.По падот на Мадуро, Венецуела влегува во најнеизвесниот период во последните неколку децении, со отворени прашања за трансферот на власта, безбедноста, улогата на војската и долгорочните последици од американската интервенција врз целиот регион.

Свет | пред 4 месеци

Русија: Венецуела мора сама да одлучува за својата судбина

Руското Министерство за надворешни работи остро го осуди, како што го нарече, „чинот на вооружена агресија против Венецуела“ од страна на Соединетите Американски Држави, оценувајќи дека сите „изговори“ со кои се обидува да се оправдаат ваквите потези се „неодржливи“.Во официјалното соопштение, руската дипломатија изрази солидарност со венецуелскиот народ и поддршка за, како што наведува, насоката на боливарското раководство, насочена кон заштита на националните интереси и суверенитетот на земјата.„Идеолошките непријателства надвладеаја над деловниот прагматизам и подготвеноста за градење односи засновани на доверба и предвидливост“, се наведува во соопштението, со дополнување дека Латинска Америка мора да „остане зона на мир“.Москва повика на спречување на понатамошна ескалација и нагласи дека е неопходно изнаоѓање излез од кризата преку дијалог. „На Венецуела мора да ѝ се гарантира правото самостојно да одлучува за својата судбина, без какво било деструктивно, а особено воено мешање однадвор“, истакнува руското Министерство за надворешни работи.Во соопштението се наведува и дека руската амбасада во Каракас продолжува со редовно работење, додавајќи дека засега нема информации дека некој руски државјанин бил погоден од актуелните настани.

Свет | пред 4 месеци

(Видео) Неизвесност околу судбината на Мадуро: Венецуела бара доказ за живот

Соединетите Американски Држави со години го обвинуваат венецуелскиот претседател Николас Мадуро дека е на чело на меѓународна мрежа за трговија со дрога, обвинувања кои тој постојано ги негира. Американските власти претходно понудија и награда од 50 милиони долари за информации што би довеле до негово апсење, потег што во регионот беше протолкуван како охрабрување за внатрешно свртување против него, особено во услови на значително зголемено американско воено присуство во последните месеци.Американскиот претседател Доналд Трамп не соопшти детали за начинот на кој Мадуро бил приведен, ниту каде бил однесен по акцијата.Трамп преку платформата Truth Social најави дека во 11 часот по источко американско време ќе одржи прес-конференција во неговата резиденција Мар-а-Лаго, каде се очекува да изнесе повеќе информации за воената операција и за судбината на венецуелскиот лидер.Во меѓувреме, остануваат бројни непознати околу утринските напади. Не е јасно колкава штета е нанесена врз погодената воена инфраструктура, ниту колкав е бројот на загинати и повредени. Министерот за одбрана на Венецуела, Владимир Падрино, изјави дека властите собираат податоци за жртвите и тврди дека дел од ударите погодиле и цивилни подрачја. Тој порача дека земјата ќе се спротивстави на присуството на странски војници.Дополнителна неизвесност внесе и изјавата на потпретседателката на Венецуела, Делси Родригез, која соопшти дека владата не располага со информации за тоа каде се наоѓаат претседателот Мадуро и првата дама Силија Флорес. Таа нагласи дека венецуелските власти бараат „итен доказ за живот“ за двајцата, додека меѓународната јавност со внимание го следи развојот на ситуацијата.

Свет | пред 4 месеци

Извори тврдат: Заробувањето на Мадуро било договорено заминување

Според извори на американската телевизиска мрежа CBS News, венецуелскиот претседател Николас Мадуро бил заробен рано изутрината од припадници на Delta Force, елитната специјална единица на американската армија.Американски официјални претставници, кои зборувале под услов на анонимност, потврдиле дека токму Delta Force ја спровела операцијата за приведување на Мадуро, во рамки на пошироката воена акција на САД во Венецуела. Станува збор за истата специјална единица која во 2019 година ја предводеше операцијата во која беше ликвидиран поранешниот лидер на Исламската држава, Абу Бакр ал-Багдади.Во меѓувреме, извори од венецуелската опозиција за Sky News изјавиле дека постои уверување оти приведувањето на Мадуро било резултат на „договорено заминување“, а не класична воена елиминација. Според тие тврдења, операцијата била изведена со минимален отпор, што дополнително ги засилува шпекулациите за претходен договор меѓу дел од внатрешните структури и странските актери.Американските власти засега официјално не соопштуваат детали за локацијата каде се наоѓа Мадуро, ниту за правниот статус под кој ќе биде третиран, додека Белата куќа и Пентагон сè уште немаат издадено формално соопштение.Настанот претставува еден од најдраматичните пресврти во венецуелската криза во последните децении и отвора сериозни прашања за идниот политички поредок во земјата, но и за последиците врз регионалната и глобалната безбедност.

Свет | пред 4 месеци

Иран: Нападот врз Каракас е очигледно кршење на суверенитетот

Иран остро реагираше на воените удари врз Каракас, оценувајќи ги како „очигледно кршење на националниот суверенитет и територијалниот интегритет“ на Венецуела.Во соопштение на иранското Министерство за надворешни работи се наведува дека ваквите дејствија претставуваат сериозно прекршување на меѓународното право и директна закана за регионалната и глобалната безбедност. Техеран предупредува дека употребата на сила без меѓународен мандат создава опасен преседан и може да доведе до неконтролирана ескалација.Иранските власти истовремено упатија повик до Совет за безбедност на Обединетите нации итно да преземе дејствија со цел запирање на, како што ја нарекоа, „незаконската агресија“ и да ги повика одговорните страни на отчетност. Во пораката се нагласува дека молкот или одолговлекувањето на меѓународната заедница би значело соучесништво во нарушувањето на основните принципи на Повелбата на Обединетите нации.Реакцијата на Иран доаѓа во момент кога светската јавност со голема загриженост го следи развојот на настаните во Венецуела, а сè повеќе држави бараат итна дипломатска интервенција за да се спречи понатамошно продлабочување на кризата.

Свет | пред 4 месеци

Трамп тврди дека Мадуро е заробен и изведен од Венецуела

Американскиот претседател Доналд Трамп изјави дека Соединетите Американски Држави извршиле „голем напад“ врз Венецуела, потврдувајќи ја ескалацијата на воените активности што утринава го потресоа Каракас и поширокиот регион.Во своето обраќање, Трамп тврди дека венецуелскиот претседател Николас Мадуро бил заробен за време на операцијата и дека, заедно со неговата сопруга, бил изведен надвор од земјата. Американскиот претседател не соопшти детали за локацијата каде Мадуро е префрлен, ниту под кои услови е извршено неговото приведување.Засега нема официјална потврда од венецуелските власти за овие тврдења, ниту независна потврда од меѓународни институции или медиуми. Претходно, владата во Каракас соопшти дека земјата е изложена на „американска воена агресија“ и прогласи состојба на надворешна закана, повикувајќи на целосна мобилизација.Развојот на настаните дополнително ја зголеми неизвесноста во регионот и предизвика силни реакции на меѓународната сцена, при што повеќе држави и политички актери повикаа на итна седница на Советот за безбедност на Обединетите нации и побараа разјаснување на фактите околу наводното апсење на венецуелскиот претседател.

Свет | пред 4 месеци

Американски сенатори ја оспоруваат законитоста на ударите врз Венецуела

Набргу по воените удари што Соединетите Американски Држави ги извршија врз цели во Венецуела, во американскиот Конгрес се појавија сериозни критики од двете политички партии. Демократскиот сенатор Рубен Галего од Аризона јавно порача дека станува збор за „незаконска војна“, оценувајќи дека интервенцијата нема уставна основа.Галего, кој е ветеран на Американскиот марински корпус и учествувал во војната во Ирак, напиша на социјалните мрежи дека ова е „втората неоправдана војна“ што ја доживеал во својот живот. Неговата изјава предизвика силни реакции во јавноста и повторно го отвори прашањето за законитоста на американските воени интервенции без формално одобрение од Конгресот.Слични сомнежи изрази и републиканскиот сенатор Мајк Ли од сојузната држава Јута, кој нагласи дека со интерес очекува објаснување што, доколку воопшто постои, би можело уставно да ја оправда оваа акција во отсуство на официјална објава на војна или одобрение за употреба на воена сила.Во изминатите месеци, демократите во Конгресот, но и дел од републиканците, отворено се спротивставуваа на зголемувањето на американското воено присуство во регионот. Како резултат на тие несогласувања, во Претставничкиот дом и во Сенатот беа иницирани гласања за мерки со кои на САД ќе им се забранат напади врз Венецуела без претходна согласност од Конгресот. Сепак, овие предлози на крајот не добија доволна поддршка и беа отфрлени.

Свет | пред 4 месеци

САД забранија летови над Венецуела за американските авиокомпании

Американската Федерална управа за цивилно воздухопловство Федерална управа за цивилно воздухопловство (ФАА) донесе итна одлука со која им забрани на сите американски комерцијални авиопревозници да летаат над воздушниот простор на Венецуела, поради, како што е наведено, сериозни ризици по безбедноста на летовите поврзани со тековните воени активности во земјата.Наредбата била издадена во саботата во 2 часот по локално време во Каракас и ќе остане на сила до недела во 1 часот наутро. Во документот се посочува дека одлуката е превентивна мерка донесена врз основа на проценка на безбедносните ризици за цивилниот воздушен сообраќај.Забраната се однесува исклучиво на американски комерцијални авиокомпании и не ги опфаќа странските цивилни превозници, ниту воените летала. Од ФАА не прецизираат дали мерката може да биде продолжена, нагласувајќи дека ситуацијата ќе се следи континуирано и дека дополнителни одлуки ќе зависат од развојот на безбедносната состојба во регионот.Одлуката доаѓа во услови на засилени тензии и пријавени воени дејствија во Венецуела, што дополнително ја зголеми загриженоста кај меѓународните воздухопловни регулатори за безбедноста на цивилниот авионски сообраќај над оваа јужноамериканска држава.

Свет | пред 4 месеци

Извори на CBS: Нападот врз Каракас се разгледувал и за Божиќ, Трамп дал зелено светло денови претходно

Претседателот Доналд Трамп ѝ дал зелено светло на американската војска за спроведување воздушни удари врз Венецуела неколку дена пред самата операција, тврдат двајца американски функционери кои за CBS News зборувале под услов на анонимност.Според нивните наводи, воени претставници дури разгледувале можност нападот врз Каракас да се изведе за време на Божиќ. Сепак, приоритет во тој период имале американските воздушни напади во Нигерија, насочени кон цели на Исламската држава.Како што потсетија изворите, токму на Божиќ Трамп објави дека САД извршиле воздушни удари врз милитанти на Исламската држава во северозападна Нигерија, поради напади врз христијанското население во регионот. Американската команда за Африка тогаш соопшти дека операцијата била изведена на барање на нигериските власти и дека биле убиени повеќе припадници на екстремистичката група.По Божиќ, според CBS, се појавиле повеќе потенцијални можности за напад врз Каракас, но операцијата била одложена поради неповолни временски услови. Истите извори нагласуваат дека американската војска инсистира на временски услови кои ќе обезбедат максимален успех и безбедност на мисијата.

Свет | пред 4 месеци

Венецуела ја обвини САД за воена агресија: Мадуро прогласи состојба на надворешна закана

Откако во Каракас се слушнале авиони и експлозии, а над делови од градот бил забележан густ столб чад, венецуелската влада соопшти дека „остро ја отфрла и осудува“ наводната американска „воена агресија“.Во официјалната изјава, властите во Каракас ги обвинија САД дека имаат за цел да ги преземат „стратешките ресурси на Венецуела, пред сè нафтата и минералите“, со намера насилно да ја нарушат политичката независност на земјата. Според соопштението, ваквите дејствија претставуваат сериозна закана за меѓународниот мир и стабилност, особено во Латинска Америка и Карибите, и директно ги загрозуваат животите на милиони луѓе.Претседателот Николас Мадуро прогласи „состојба на надворешен упад на целата национална територија“, со образложение дека мерката е неопходна за заштита на правата на населението и непречено функционирање на државните институции.„Целата земја мора да се мобилизира за да ја порази оваа империјалистичка агресија“, се наведува во пораката од венецуелското раководство.Засега, нема независна меѓународна потврда за тврдењата за директен воен напад, додека ситуацијата во Каракас останува напната и неизвесна.

Свет | пред 4 месеци

(Видео) Експлозии и воени авиони над Каракас, Венецуела прогласи состојба на надворешна закана

Рано утринава во венецуелската престолнина Каракас биле слушнати звуци од воени авиони и повеќе експлозии, додека над делови од градот бил видлив густ столб од чад, јавуваат светските новински агенции. Во јужниот дел на градот, во близина на голема воена база, било регистрирано и прекинување на електричната енергија. Засега не се познати точните локации и причините за експлозиите.Видеоснимки што кружат на социјалните мрежи прикажуваат повеќе детонации на различни локации низ Каракас, што дополнително ја засили загриженоста кај населението. Настаните се случуваат во период кога Соединетите Американски Држави неодамна распоредија значајни воени сили во регионот, вклучително и носач на авиони, воени бродови и напредни борбени авиони.Американскиот претседател Доналд Трамп претходно најави „блокада“ на венецуелската нафта, воведе дополнителни санкции и одобри низа операции против пловила за кои Вашингтон тврди дека се вмешани во трговија со дрога во Тихиот океан и Карипското Море. Минатата недела Трамп изјави дека САД извршиле напад врз пристаниште во Венецуела каде, според американските информации, бродови биле користени за товарење дрога, што претставува прв познат удар на копно од почетокот на кампањата за зголемен притисок врз Каракас.По утринските настани, венецуелската влада соопшти дека „одлучно ја отфрла и осудува“ она што го нарече американска „воена агресија“. Во официјалната изјава, властите во Каракас ги обвинија Соединетите Држави дека се обидуваат да ги преземат стратешките ресурси на Венецуела, пред сè нафтата и минералите, со цел насилно да ја поткопаат политичката независност на земјата.„Оваа агресија претставува сериозна закана за меѓународниот мир и стабилност, особено во Латинска Америка и Карибите, и директно ги доведува во опасност животите на милиони луѓе“, се наведува во соопштението на венецуелската влада.Претседателот Николас Мадуро прогласи „состојба на надворешна закана на целата национална територија“, со образложение дека мерката е неопходна за заштита на населението, непречено функционирање на државните институции и, како што наведе, подготвеност за вооружен отпор.„Целата земја мора да се мобилизира за да ја порази оваа империјалистичка агресија“, порача Мадуро, повикувајќи на национално единство во услови на ескалација на тензиите.

Свет | пред 4 месеци

Кина и Русија застанаа зад Венецуела по американската блокада на нафтени танкери

Милиони барели венецуелска нафта останаа закотвени на танкери откако САД воведоа блокада врз бродовите поврзани со Каракас, предизвикувајќи застој во пристаништата и нова геополитичка ескалација во Карипското Море. Потегот на Вашингтон веднаш наиде на реакции од Кина и Русија, кои застанаа зад Венецуела и ги осудија американските акции како незаконски и опасни.По одлуката на администрацијата на Доналд Трамп да ги блокира сите санкционирани танкери што влегуваат и излегуваат од Венецуела, активноста во пристаништата нагло се намали. Според податоци на Ројтерс, најголем дел од танкерите сега превезуваат нафта само меѓу домашни пристаништа, додека бројот на натоварени бродови што не тргнале кон странство расте од ден во ден. Клиентите бараат поголеми попусти и измени на договорите поради зголемениот ризик од пресретнување.Американскиот претседател повторно го повика венецуелскиот лидер Николас Мадуро да се повлече од власта и порача дека САД ќе ја задржат или ќе ја продадат нафтата што ја заплениле покрај венецуелскиот брег во последните недели. На прашање дали целта е смена на режимот, Трамп оцени дека за Мадуро би било „паметно“ да ја напушти функцијата, предупредувајќи дека натамошниот отпор ќе има последици.Ескалацијата доби меѓународна димензија откако САД пресретнаа танкер што се упатувал кон Кина. Пекинг реагираше остро, оценувајќи дека ваквите дејствија претставуваат сериозно кршење на меѓународното право. Портпаролот на кинеското Министерство за надворешни работи, Лин Џиан, истакна дека Венецуела има право да развива односи со други држави и дека Кина се спротивставува на сите еднострани и нелегални санкции.Иако Белата куќа тврди дека пресретнатиот брод припаѓал на таканаречената „флота во сенка“ на Венецуела, танкерот во моментот не бил под американски санкции. Панамските власти, пак, соопштија дека супертанкерот „Сенчерис“ ги прекршил поморските правила, го сменил името и го исклучил транспондерот додека превезувал нафта од Венецуела.Кина е најголемиот купувач на венецуелска сурова нафта, која сочинува околу 4 отсто од нејзиниот вкупен увоз, што дополнително ја зголемува чувствителноста на ситуацијата.Подоцна, министрите за надворешни работи на Русија и Венецуела ги осудија американските акции во Карипскиот регион. Москва предупреди дека ескалацијата може сериозно да го загрози меѓународниот поморски сообраќај и безбедноста во регионот, потврдувајќи целосна поддршка за венецуелското раководство и народ.Во меѓувреме, сателитски податоци покажаа дека празниот супертанкер „Бела 1“, кој американската крајбрежна стража се обиде да го пресретне, се движел североисточно од Бермудите.Вашингтон тврди дека приходите од венецуелската нафта се користат за финансирање криминални и терористички активности, вклучувајќи трговија со дрога и луѓе. Од септември наваму, американските сили извршија низа напади врз бродови за кои тврдат дека се вклучени во шверц на дрога, иако без јавно презентирани докази. Според семејства и влади, во тие операции загинале повеќе од 100 луѓе, меѓу кои и рибари.Каракас, од друга страна, предупредува дека станува збор за обид за промена на режимот и ги опишува потезите на САД како меѓународна пиратерија.

Свет | пред 5 месеци

Вашингтон воведе морска блокада на нафтата кон Венецуела, Каракас возвраќа со тешки обвинувања: „Ова е обид за заплена на нашите ресурси“

Тензиите меѓу САД и Венецуела драматично ескалираа откако американскиот претседател Доналд Трамп најави „целосна блокада“ на сите санкционирани танкери кои влегуваат или излегуваат од венецуелските води – мерка што директно го таргетира најважниот извор на приходи на владата на Николас Мадуро: нафтата.Од Вашингтон засега не откриваат како ќе се спроведува новата блокада. Не е познато дали американската крајбрежна стража ќе добие наредба да ги запира бродовите, како што претходно се случи при други операции. Сепак, последните движења на американската војска – распоредување на илјадници војници и речиси десетина воени бродови, меѓу кои и носач на авиони – укажуваат дека регионот е под силен американски надзор.Трамп ја оправда блокадата со остри обвинувања кон Каракас, наведувајќи дека венецуелскиот режим „крадел средства од САД“ и го поврза со „тероризам, наркотрафикинг и трговија со луѓе“. Во својата објава на Truth Social напиша дека венецуелската влада е третирана како „странска терористичка организација“.Каракас реагираше веднаш и со жесток тон. Во доцнообјавено соопштение, потпретседателката Делси Родригез оцени дека ставовите на Трамп ја откриваат „вистинската намера“ на САД – преземање на венецуелските енергетски и минерални ресурси. Владата ја осуди мерката како „интервенционистичка, колонијалистичка и спротивна на меѓународното право“, обвинувајќи ги САД за прекршување на слободната трговија и правото на слободна навигација.– Преку своите изјави, претседателот на САД претпоставува дека нафтата и минералното богатство на Венецуела му припаѓаат нему. Врз таа основа се обидува да наметне морска блокада за да ги ограби богатствата што ѝ припаѓаат на нашата татковина – се наведува во соопштението.Каракас предупреди дека мерката е дел од „гигантска кампања на лаги и манипулации“, насочена кон оправдување на економски и воен притисок врз земјата. Владата на Мадуро порача дека ќе ги брани своите позиции согласно меѓународното право, Повелбата на ОН и уставот, истакнувајќи дека земјата „никогаш повеќе нема да биде колонија“.Венецуела го обвини Вашингтон и за претходните воени операции во Карибите, во кои, од септември наваму, американската војска уби повеќе од 80 луѓе во напади врз наводни бродови на картели. Трамп тврдеше дека тие бродови биле користени за шверц на дрога во САД со поддршка на венецуелската влада – тврдење кое Каракас целосно го негира и го нарекува обид за дискредитација и промена на режимот.Нафтниот пазар веднаш реагираше: цените пораснаа за нешто повеќе од 1% во азиската трговија, откако инвеститорите проценија дека блокадата може да доведе до намалување на венецуелскиот извоз. Засега, меѓутоа, останува неизвесно како конкретно ќе се применува мерката и дали ќе ги опфати и бродовите што не се под санкции.Единствено е јасно дека новата ескалација отвора сериозен ризик од директни инциденти на море, а дипломатскиот јаз меѓу двете држави е подлабок од кога било.

Свет | пред 5 месеци

САД му понудиле „егзил“ на Мадуро додека распоредуваат воени сили околу Венецуела

САД му понудиле на венецуелскиот претседател Николас Мадуро можност да ја напушти земјата и да замине во Русија или во друга држава, изјави американскиот сенатор Марквејн Малин во интервју дадено во петок навечер.Малин, републиканец од Оклахома, истакна дека ваквата опција му била ставена на маса на Мадуро во услови на нагло влошени односи меѓу Вашингтон и Каракас.Масовно американско воено присуство во КарибитеПонудата за егзил доаѓа паралелно со одлуката на американскиот претседател Доналд Трамп да распореди значителни воени капацитети во близина на Венецуела.Трамп испрати ударна група предводена од најголемиот носач на авиони во светот и го прогласи венецуелскиот воздушен простор за „целосно затворен“ за американските сили, наведувајќи дека операцијата има за цел пресекување на, како што тврди, масовната трговија со дрога што стигнува во САДКаракас: „Изговор за промена на режимот и контрола врз нафтата“Мадуро категорично ги отфрли американските обвиненија за нарко-трафикинг, обвинувајќи го Вашингтон дека сака преку воени и политички притисоци да го собори и да воспостави власт по своја мерка.Според него, вистинската цел е преземање на венецуелските нафтени ресурси.Социјалистичкиот лидер е на чело на државата од смртта на Уго Чавез, а неговото реизбирање во 2024 година беше проследено со жестоки протести, притворања и обвинувања за изборни неправилности.Американски сенатори бараат смена на власта во КаракасМалин тврди дека „венецуелскиот народ сака промена и ново раководство“, а сенаторот Линдзи Греам отиде чекор подалеку, отворено повикувајќи на крај на режимот на Мадуро.Греам го опиша венецуелскиот лидер како „нелегитимен“ и „човек кој повеќе од десет години управува со нарко-терористичка држава“.Тој нагласи дека поддршката на Трамп за конечно затворање на „венецуелското лудило“ ќе спаси животи и ќе му даде „нова шанса“ на народот.Над 80 загинати во американски удари – ОН предупредуваатОд почетокот на септември, американските сили нападнале повеќе од 20 бротчиња и поголеми пловила во Карибското Море и во делови од Пацификот под сомнение дека се користат за транспорт на дрога.Во акциите загинале 83 лица, а американските институции досега не презентирале докази дека уништените пловила биле поврзани со нарко-картели.Обединетите нации оценија дека операциите може да претставуваат „вонсудски егзекуции“.Тајни контакти меѓу Трамп и Мадуро„Њујорк тајмс“ неодамна објави дека Трамп и Мадуро во последните недели одржале телефонски разговор за потенцијална средба во САД.Синоќа Трамп потврди дека разговор навистина имало, но не откри ништо за содржината или можните следни чекори.

Свет | пред 5 месеци

САД подготвуваат нова акција против наводните венецуелски мрежи за дрога, најави Трамп

Американскиот претседател Доналд Трамп најави дека САД се подготвуваат за нова акција против наводните мрежи за шверц со дрога во Венецуела, пренесува CNN. Во телефонски разговор со припадници на американската војска по повод Денот на благодарноста, тој порача дека копнените операции би можеле да започнат „многу скоро“ и дека акцијата ќе се прошири од морски на копнени правци. Трамп изјави дека трговците со дрога „веќе не се обидуваат да доаѓаат по море како порано“ и најави дека САД ќе ги запираат и по копно.Најавата следи по серија состаноци на високо ниво и по демонстрацијата на американска воена сила во регионот. Оваа недела Трамп официјално го прогласи венецуелскиот претседател Николас Мадуро и неговите соработници за дел од „странска терористичка организација“. Станува збор за т.н. „Картел на сонцата“, термин што, според експерти, опишува корумпирани владини функционери, а не класична криминална група. Со тоа Трамп добива дополнителни механизми за санкционирање на Мадуровиот режим, но правните експерти предупредуваат дека таквата ознака не претставува директно овластување за копнени напади или употреба на смртоносна сила.Според американските власти, во морските акции против шверцери на дрога убиени се повеќе од 80 лица. Иако нападите на море се оправдуваат со постојните правни толкувања, на затворени брифинзи со конгресмени било појаснето дека САД „во моментов немаат правна основа“ за изведување напади на копно во Венецуела или во која било друга суверена држава.

Свет | пред 6 месеци

Нов напад на САД врз брод во Карибите, најверојатно превезувал дрога: Овојпат има преживеани

Американската војска изврши нов напад врз пловило во Карибите за кое постојат сомневања дека превезувало дрога. За разлика од претходните случаи, овојпат биле пронајдени преживеани членови на екипажот, потврдил за „Ројтерс“ (Reuters) американски функционер под услов на анонимност. Тој не понудил дополнителни детали, освен што навел дека не е јасно дали нападот бил изведен со намера да има преживеани, пишува „Ројтерс“.Овој развој на настаните отвора повеќе прашања — меѓу кои и тоа дали американските сили им пружиле помош на преживеаните и дали тие сега се наоѓаат во американски воен притвор, можеби дури и како воени заробеници. Пентагон, кој целните лица во нападите ги означи како „наркотерористи“, сè уште нема одговорено на барањето за коментар.Досега, во американските воени напади врз сомнителни бродови во близина на Венецуела загинале најмалку 27 лица. Овие напади предизвикаа загриженост меѓу правните експерти и конгресмените демократи, кои ја преиспитуваат нивната усогласеност со меѓународното право за вооружени конфликти. Видео-снимките од претходните напади, објавени од администрацијата на Трамп, прикажуваа целосно уништени пловила, а досега немало извештаи за преживеани.Администрацијата на Трамп ги оправдува нападите со тврдењето дека САД веќе се во војна со „наркотерористички групи“ од Венецуела. Според нив, тие се неопходни затоа што традиционалните методи — како апсење на екипажот и заплена на товарот — не успеале да го запрат шверцот на дрога кон САД. Овие инциденти се случуваат во контекст на засиленото американско воено присуство во Карибите, кое вклучува разорувачи, борбени авиони Ф-35, нуклеарна подморница и околу 6.500 војници, додека претседателот Доналд Трамп го засилува притисокот врз владата на Венецуела.Напнатоста дополнително се зголеми откако Трамп во средата откри дека ја овластил ЦИА (CIA) да спроведува тајни операции во рамките на Венецуела, што поттикна шпекулации за можен обид за соборување на претседателот Николас Мадуро. Поради нападите на море, венецуелскиот амбасадор при Обединетите нации, Самуел Монкада, побара од Советот за безбедност да ги прогласи американските акции за незаконски и да го поддржи суверенитетот на неговата земја.Загриженоста дополнително се зголеми поради неочекуваните промени во американското воено раководство. Пентагон неодамна соопшти дека операциите против дрога во регионот повеќе нема да ги води Јужното командување, туку новоформирана работна група под раководство на маринците. Во четвртокот, министерот за одбрана Пит Хегсет потврди дека адмиралот Алвин Холси, шеф на Јужното командување, поднел оставка две години пред истекот на мандатот. Водечкиот демократ во Сенатскиот комитет за вооружени сили, сенаторот Џек Рид, ја нарече оставката „загрижувачка“.„Оставката на адмиралот Холси само ја продлабочува мојата загриженост дека оваа администрација ги игнорира тешко стекнатите лекции од претходните американски воени кампањи и советите на нашите најискусни офицери“, изјави Рид.

Свет | пред 7 месеци

САД разгледуваат воздушни удари врз цели во Венецуела

Американски воени претставници подготвуваат опции за воздушни удари врз цели поврзани со нарко-картели во Венецуела, а акциите би можеле да започнат за неколку недели, пренесува NBC News, повикувајќи се на четири извори запознаени со плановите.Според информациите, станува збор за можна нова ескалација на воената кампања на администрацијата на претседателот Доналд Трамп против шверцерите на дрога и дел од поостриот став кон владата на Николас Мадуро.Во последните недели, американската војска веќе уништи најмалку три пловила за кои Вашингтон тврди дека превезувале дрога и членови на криминални групи. Засега нема одобрение за напади на венецуелска територија, но извори потврдуваат дека опцијата се разгледува.Плановите што се дискутираат се однесуваат главно на употреба на дронови за елиминација на членови на криминални групи и уништување на лаборатории за производство на дрога. „Видете, Венецуела ни праќа банди, дилери и дрога. Тоа е неприфатливо“, изјави претходно Трамп, одбивајќи да навлезе во детали.Администрацијата проценува дека Мадуро не презема доволно мерки за да го сопре протокот на дрога од Венецуела, иако Каракас не се смета за голем производител на кокаин. Земјата, сепак, се идентификува како клучна транзитна точка.Американската армија веќе распореди најмалку осум бродови, илјадници маринци и борбени авиони F-35 во регионот. Аналитичари предупредуваат дека евентуален напад врз венецуелска територија би имал сериозни дипломатски и политички последици, вклучувајќи и можност за зацврстување на внатрешната поддршка за Мадуро.

Свет | пред 8 месеци

(Видео) Моментот на американската акција против венецуелска нарко-банда: убиени 11 лица

Војската на САД изврши напад во јужниот дел на Карипското Море врз брод што тргнал од Венецуела, при што беа ликвидирани 11 членови на криминалната група „Трен де Арагва“. Информацијата ја потврди американскиот претседател Доналд Трамп, кој од Белата куќа изјави дека на пловилото било пронајдено „големо количество дрога“.Според државниот секретар Марко Рубио, кој се огласи на социјалната мрежа X, нападнатиот брод бил управуван од „позната нарко-терористичка организација“. Тој ја оцени акцијата како „тежок удар“ врз криминалните структури во регионот.Вашингтон неодамна најави засилено присуство на својата морнарица во венецуелските води со цел да се спротивстави на латиноамериканските нарко-картели. Иако не е спомната никаква копнена интервенција, официјален Каракас реагираше со испраќање војска на крајбрежјето и кон границата со Колумбија. Претседателот Николас Мадуро, воедно, ги повика граѓаните да се приклучат на цивилната милиција.Мадуро ја обвини американската администрација дека преку приказни за трговија со дрога сака да создаде алиби за негово соборување. Како аргумент, тој и неговите соработници често се повикуваат на извештај на Обединетите нации, според кој само пет отсто од колумбиското кокаинско производство поминува преку Венецуела.Инаку, Колумбија е водечки светски производител на кокаин, со пристап и кон Тихиот Океан и кон Карипското Море, додека Боливија, иако исто е во регионот, нема излез на море.

Свет | пред 8 месеци

Судот во Венецуела издаде налог за апсење на лидерот на опозицијата Едмундо Гонзалес

Канцеларијата на јавниот обвинител на Венецуела соопшти дека судот издал налог за апсење на опозицискиот лидер Едмундо Гонзалес, обвинувајќи го за заговор и други злосторства поради спорот околу неговата победа на претседателските избори во јули, што предизвика немири во земјата.Изборната комисија на Венецуела го прогласи Николас Мадуро, кој е на власт од 2013 година, за победник на изборите на 28 јули, без да ги објави целосните резултати од гласањето. Венецуелската опозиција ги објави своите резултати кои покажуваат убедлива победа на кандидатот Едмундо Гонзалес. Спорот предизвика апел од меѓународната заедница за објавување на целосните резултати, како и протести во земјата и апсења на опозиционери и новинари.Јавниот обвинител Тарек Сааб сподели фотографија од наредбата со Ројтерс преку порака на Телеграма. Портпаролот на Гонзалес рече дека тие чекаат какво било известување за наредбата. „Портпаролот на Гонзалес не даде дополнителни коментари, но опозицијата отсекогаш негира дека сторила нешто лошо“, пишува Ројтерс.Високи владини функционери со недели велат дека Гонзалес и другите членови на опозицијата треба да одат во затвор. Налогот беше издаден откако обвинителот Луис Ернесто Дуенез побара апсење на Гонзалес за узурпација на функцијата, фалсификување јавни документи, поттикнување на непочитување на законот, заговор и здружување, сето тоа наводно извршено против државата Венецуела.

Свет | пред 1 година

Во Венецуела 80 тинејџери ослободени од затвор: Биле уапсени поради протести

Повеќе од 80 тинејџери беа ослободени од затвор во текот на викендот во Венецуела, откако беа уапсени на антивладините протести по спорните претседателски избори во Венецуела кон крајот на јули, соопшти организацијата за заштита на правата.Изборниот совет и Врховниот суд на Венецуела го прогласија претседателот Николас Мадуро, кој е на власт од 2013 година, за победник на изборите на 28 јули, но не ги објави целосните резултати од гласањето. Венецуелската опозиција објави свои резултати кои покажуваат убедлива победа на нејзиниот кандидат Едмундо Гонзалес.Околу 27 лица загинаа во постизборните протести, а други 2.400 беа уапсени.Алфредо Ромеро, претседател на невладината организација за човекови права Форо Пенал, во неделата на Х напиша дека 86 тинејџери уапсени за време на протестите биле ослободени од затвор во последните денови.Венецуелските власти не одговорија на барањето за коментар.

Свет | пред 1 година

(Видео) Ескалираше протестот во Венецуела: Паднаа првите жртви

Најмалку три лица загинаа, а 44 се повредени во судири меѓу полицијата и демонстрантите кои протестираа во неколку делови на Венецуела.Протестите се одржани откако изборната комисија на земјата објави дека победил актуелниот претседател Николас Мадуро, соопшти денеска организацијата која ја следи состојбата во националните болници, а пренесува италијанската Агенција Нова.Најмногу инциденти се регистрирани во државата Арагва.Невладината организација за човекови права Форо Пенал соопшти дека ширум државата се уапсени 46 лица.Безбедносните сили во Венецуела употребија солзавец и гумени куршуми врз луѓето кои излегоа на улиците на главниот град Каракас да протестираат.Опозицијата во Венецуела ја оспори победата на Мадуро и тврди дека нејзиниот кандидат Едмундо Гонзалес Урутија победи убедливо со 73,2 отсто од гласовите, додека Мадуро ја обвини опозицијата дека повикува на државен удар.

Свет | пред 1 година