Нови толеранции за брзина со Сејф сити: до 6км/ч во град, до 9км/ч меѓу градови, до 12км/ч на автопат

Во денешното гостување во Дневникот на МТВ министерот за внатрешни работи Панче Тошковски посочи дека системот Безбеден град не е за парично да ги оштети граѓаните, туку системот е да спаси човечки живот плус.„Во изминатиот период имаше огромен број на забелешки затоа што во првичниот период немаше толеранцијата во рамки на опоменувањето на граѓаните и воведовме толеранција која што беше важечка во рамки на важечка легислатива од 6 км/ч кога управувате мотторно возило до 100, а над 100 тогаш 8км/ч. Правилникот кој е во надлежност на Министерството за енергетика, во консултација со екперти, професори, со луѓе од министерството за енергетика и од Министерството за внатрешни работи се измени овој правилник и стапи во сила во текот на вчерашниот ден со тоа што сега за брзини до 50км/ч останува како што беше и претходно, толеранција од 6км/ч. Тоа значи дека ако возите моторно возило таму каде што имаме знак од 30 км/ч, со 36км/ч камерата нема да ве евидентира за сторен сообраќаен прекршок, туку ќе ве евидентира од 37км/ч. Од 50 до 100 км/ч толеранцијата законски согласно новиот правилник е 9км/ч, тоа значи дека ако управувате моторно возило таму каде што е дозвилено до 50км/ч, со 51км/ч камерата ќе ве евидентира и ќе ви прати порака, односно ќе ве казни системот доколку управувате моторно возило со 60км/ч. Таму каде што имаме ограничување од 100км/ч а се управува возило со над 101км/ч моторно возило камерата ќе ве идентификува со толеранција од 12км/ч, значи таму би биле санкционирани доколку е дозовлено да речеме 100км/ч, а вие управувате на пример со 113км/ч. Овие толеранции се дефинирани во рамки на правилник под Министерството за енергетика и сметаме дека се апсолутно прифатливи се со цел овој систем да го заживееме се со цел да спасиме ден човечки живот повеќе, а притоа да ги увериме граѓаните дека целта не ни е казнување, туку целта ни е помалку повредени, помалку сообраќајни незгоди, помалку загуби на човечки животи“, дециден беше министерот Тошковски.Министерот во овој контекст најави и уште еден проект кој ќе се имлементира во наредните денови со поддршка на македонски телеком.„За сите овие прекршоци кои се сторуваат во рамки на толеранцијата, значи ако е забрането над 30км/ч од 30-36км/ч, ако е забрането над 50км/ч од 50-59км/ч ќе доставуваме информативна порака од страна на Министерството за внатрешни работи до секој еден граѓанин кој што ја пречекорил брзината со која што ќе им го привлечеме вниманието на граѓаните дека и покрај тоа што возат во рамки на законската толеранција која што е дозволена нема да има парична казна, односно нема да има прекршок, тие надминуваат над законски уврдената брзина со што доколку не дај боже било кој граѓанин управува моторно возило и стори сообраќаен прекршок со 55км/ч таму каде што е дозволено да се управува моторно возило максимум со 50км/ч и притоа повреди пешак со тешки телесни повреди, ќе одговара кривично“, заклучи министерот за внатрешни работи Панче Тошковски.

Македонија | пред 2 месеци

МВР одзеде возило на Плачковица во Радовиш

Денеска, во добро организирана акција на Министерството за внатрешни работи, одземено е уште едно возило на територијата на планината Плачковица во Радовиш. Акцијата е дел од посветената борба против девијантни појави кои, покрај штетата за животната средина, претставуваат сериозна опасност за граѓаните.„Ветивме дека состојбата ќе се среди не само на оваа критична точка, туку и секаде во Македонија каде што се среќаваат вакви девијантни појави“, истакна Кире Михаилов. Тој нагласи дека граѓаните кои ја загрозуваат безбедноста не треба да се жалат, а МВР останува посветено на своите законски и хумани обврски кон граѓаните.Акцијата на Плачковица е дел од пошироките напори за заштита на безбедноста и животната средина во земјата.

Македонија | пред 2 месеци

Епстиновите документи го урнаа словачкиот советник Лајчак

Словачкиот премиер Роберт Фицо ја прифати оставката на својот советник Мирослав Лајчак, откако неговото име се појави во документи поврзани со американскиот финансиски криминалец Џефри Епстин. Лајчак сам ја понуди оставката, иако ги негира сите наводи.Лајчак изјави дека никогаш не му биле понудени сексуални услуги, ниту пак учествувал во активности поврзани со Епстин и со лицата што се споменуваат во неговите досиеја.Иако Фицо оцени дека Лајчак е „врвен дипломат“, но дека со прифаќањето на оставката се става крај на нивната соработка. Оставка побараа и опозицијата и дел од владејачката коалиција.Лајчак изјави дека никогаш не бил вмешан во активности поврзани со Епстин и дека е подготвен тоа да го докаже на секој можен начин.Мирослав Лајчак е долгогодишен словачки дипломат, поранешен министер за надворешни работи на Словачка и поранешен специјален претставник на ЕУ за дијалогот Белград–Приштина.

Свет | пред 2 месеци

Поддршката за Орбан „се топи”, опозицијата води на анкетите

По речиси две децении неприкосновена власт, унгарскиот премиер Виктор Орбан се соочува со најтешкиот политички предизвик досега. Најновите анкети покажуваат водство на опозицијата, а во владејачкиот Фидес сè погласно се отвора прашањето дали е време за промена на лидерството и тоа на помалку од три месеци до парламентарните избори.Истражувањето на повеќе агенции покажуваат дека опозициската партија Тиса, предводена од Петер Маѓар, има 49 отсто поддршка, наспроти 39 отсто за Фидес. Во некои анкети разликата меѓу двата блока меѓу сигурните гласачи достигнува и до 12 процентни поени во корист на опозицијата.Поранешниот член на Фидес и сегашен ривал на Орбан, Петер Маѓар, во моментов е најпопуларен политичар во Унгарија.Тиса има силна поддршка кај младите, урбаните и високообразованите гласачи, особено во Будимпешта, а Фидес својата база сè повеќе ја задржува кај гласачите постари од 60 години.Според „Дејли њуз Хангари“, ниту засилената владина кампања со финансиски мерки, пензии и даночни олеснувања не успеала да го запре падот на рејтингот. Независните анкети покажуваат дека Тиса веќе подолго време има околу 400.000 потенцијални гласови повеќе од Фидес – предност што може да се покаже клучна на изборите напролет.

Свет | пред 2 месеци

Оставката на Кедев на 23 јануари е примена во министерството за здравство, до министерот не е пристигната оставка-велат од МЗ

Известувањето за повлекување на кардиологот и академик Сашко Кедев од здравствениот совет е примено во Министерството за здравство на 23 јануари годинава односно пред осум дена.Документот до кој дојде ,,360 степени“ го пишува датумот и причината за оставката.„Ве известувам дека се повлекувам од работата на здравствениот совет на Министерството за здравство, од причина што сметам дека започнатите контролни процеси треба да ги спроведуваат исклучиво компетентни кадри со веќе докажан стручен и професионален кредибилитет“, пишува Кедев во оставката.Претходно денеска, на навно прашање за коментар за повлекувањето на Кедев од здравствениот совет и причините што тој ги навел, од Министерството за здравство одговориле дека до министерот за здравство Азир Алиу досега формално не е пристигната оставка од Кедев.Кедев во писмената оставка наведува и дека се надева оти „јавното здравство ќе остане приоритет во политиките на Министерството за здравство”.Кедев минатата година откри скандал и бараше да се расчисти кој во Македонија оперира срце само за профит и без медицинска потреба.Членови од комисијата, која ја формираше министерот за здравство реагираат дека во контролните процеси не се вклучени компетентни кадри со докажан стручен и професионален кредибилитет а избрани биле доктори интернисти и доктори од судска медицина.Истрагата на комисијата, се прошири и на државното и на приватното здравство, иако наводите на Кедев се однесуваа само на приватното. Првичните наоди беа дека од 25 кардиохируршки интервенции 10 се непотребни или со непотребно упатување.

Македонија | пред 2 месеци

Молдавија погодена од масовни прекини на струја поради проблеми во украинската мрежа

Молдавија денеска беше погодена од масовни прекини во снабдувањето со електрична енергија поради проблеми во електропреносната мрежа на соседна Украина, што остави делови од земјата, вклучително и главниот град Кишињев, без струја.Според соопштението на молдавското Министерство за енергетика објавено на апликацијата Телеграм, пречките во украинската мрежа предизвикале пад на напонот на една од линиите што ја снабдуваат Молдавија.Градоначалникот на Кишињев, Јон Чебан, информираше дека поголемиот дел од населбите во престолнината се без напојување, а властите соопштија дека не работат ниту семафорите.Истовремено, делови на Украина се соочуваат со вонредни прекини на струјата, метрото во Киев е привремено затворено, а водоснабдувањето во главниот град е нарушено. Експертите посочуваат дека украинската електропреносна мрежа со месеци е цел на руските напади, што во изминатите недели довело до значителни ограничувања во снабдувањето со електрична енергија.

Свет | пред 2 месеци

Тешки израелски напади врз Газа, загинати најмалку 32 лица

Најмалку 32 лица загинаа во низа израелски воздушни напади врз Појасот Газа, соопшти денеска палестинската агенција за цивилна заштита. Портпаролот Махмуд Басал рече дека во нападот врз полициската станица во округот Шеик Радван на северот на Газа загинале 14 лица, додека уште седум цивили биле убиени на југот на Појасот Газа кога бил погоден шатор каде биле сместени раселени лица.Палестинските власти ги оцениле овие напади како најтешки од стапувањето во сила на втората фаза на примирјето, договорена во октомври минатата година преку посредство на американскиот претседател Доналд Трамп.Израелската армија соопшти дека целта на нападите била неутрализирање на команданти и инфраструктура на Хамас и Исламски џихад, вклучувајќи складишта со оружје, простории за ракување со оружје и две лансирни рампи.Откако примирјето стапи на сила, двете страни меѓусебно се обвинуваат за негово кршење, а нападите во последните 24 часа дополнително ги заострија тензиите во регионот.

Свет | пред 2 месеци

Германија инвестира многу во борбени дронови, но во Украина тие не ги погодуваа целите

Германија се подготвува да инвестира 267,7 милиони евра во нов систем за борбени беспилотни летала HX-2 од одбранбениот стартап Хелсинг, како дел од поширокиот план за модернизација на Бундесверот. Сепак, податоците од нивната употреба во Украина отвораат сериозни прашања за реалната ефикасност на системот.Според информации на „Политико“, дроновите HX-2 во украинските услови погодиле цел во околу 36 отсто од мисиите, односно во пет од 14 случаи. Во извештаите се наведува дека најголем дел од неуспесите не се должат на руски контрамерки, туку на технички проблеми, меѓу кои нестабилен видео-пренос, ограничувања при насочување и нефлексибилни сензорски системи.Планот на Берлин предвидува набавка на 4.350 дронови HX-2, заедно со симулатори, опрема за обука и техничка поддршка. Хелсинг, пак, јавно ја истакнува нивната употреба во Украина како доказ за сигурноста на системот и наведува дека дроновите се одобрени за борбена употреба и интегрирани во украинскиот воен команден систем.Од компанијата тврдат дека за време на тестирањата во Германија, Обединетото Кралство и на вежби со британската армија во Кенија, HX-2 постигнал стапка на погодок од речиси 100 отсто. Во исто време, Хелсинг предупредува дека украинските податоци се засноваат на „мал двоцифрен број“ распоредени дронови и дека тоа не овозможува сигурна статистичка проценка.Останува нејасно дали дроновите што Германија планира да ги купи се идентични со оние користени во Украина или станува збор за понова верзија. Поради клаузули за доверливост, компанијата одби да открие детали за евентуалните технички разлики.Двајца извори запознаени со процесот на набавки изјавиле за „Политико“ дека германското Министерство за одбрана ги анализира украинските податоци во својата проценка, но официјален коментар засега нема.Договорот е рамковен и предвидува можност за дополнителна набавка на уште 20.000 дронови, што би можело значително да ја зголеми неговата вкупна вредност. Германскиот парламент, кој мора да ги одобри сите воени договори над 25 милиони евра, треба да се изјасни до крајот на февруари.Во меѓувреме, „Блумберг“ објави дека Германија планира дел од пошироката набавка на ваква муниција да ја подели и со друг производител, со цел да избегне зависност од еден добавувач. Случајот повторно ја отвора дилемата со која често се соочува Бундесверот – како да се балансира итната воена потреба со реалните перформанси на скапата нова опрема, особено кога тестирањето доаѓа од активна воена зона.

Свет | пред 2 месеци

Непознато лице фрлало запалени шишиња кон куќа во Ѓорче Петров

Во раните утрински часови на 31 јануари 2026 година, во 03:22 часот, во СВР Скопје 49-годишна жена пријавила дека на подрачјето на општина Ѓорче Петров непознато лице фрлило две стаклени шишиња со непозната течност кон семејната куќа, кои претходно биле запалени.Според пријавата, едното стаклено шише паднало во дворното место, во близина на паркирано товарно возило, додека второто завршило на терасата од куќата, при што предизвикало пожар. Огнот бил навреме изгаснат од членовите на семејството, со што била спречена поголема материјална штета.Во настанот нема повредени лица. На местото бил извршен увид, а надлежните служби преземаат мерки за целосно расчистување на случајот и за идентификување на сторителот.

Скопје | пред 2 месеци

Епстин му нудел „жени и нивните сестри“ на поранешниот словачки претставник во БиХ

Американското Министерство за правда објави повеќе од три милиони нови документи од таканаречените „Епстинови документи“, во кои се појавува и името на словачкиот политичар и поранешен висок претставник во Босна и Херцеговина, Мирослав Лајчак. Во објавените пораки, покојниот финансиски магнат и осуден сексуален престапник Џефри Епстин, наводно, му нудел на Лајчак „жени и нивните сестри“, што словачкиот дипломат категорично го негира, пренесува порталот Кликс.ба.На досега непознати делови од комуникацијата меѓу Лајчак и Епстин од 2018 година прв укажа порталот 360тка, наведувајќи дека пораките откриваат многу поинтимен и поинтензивен однос отколку што Лајчак претходно признавал. Според објавените документи, нивната размена не се однесувала исклучиво на политика и дипломатија, туку во повеќе наврати и на жени. Во една од конверзациите, Епстин му нуди жени на Лајчак, додавајќи дека може „да ги земе и нивните сестри“, а подоцна иронично забележува дека веројатно се премлади, бидејќи имаат под 30 години. На тоа, Лајчак одговара: „Не биди злобен. Не знаеш каков сум во акција“, како што пренесува весникот Деник Н. Во други пораки, двајцата, во опуштен и шеговит тон, коментирале на „девојки“ во Киев или Москва.На една фотографија од Москва, Епстин одговорил дека би сакал „поглед однатре“ и ги опишал девојките како „најдобриот руски извоз“, на што Лајчак додал: „Веднаш по нафтата“. И покрај ваквите содржини, Лајчак за порталот 360тка ги отфрли ваквите толкувања, тврдејќи дека никогаш не комуницирал со Епстин за жени. Сепак, документите укажуваат дека нивниот контакт не бил случаен. Името на Мирослав Лајчак се појавува во документите стотици пати, а Епстин често го ословувал со прекарот „Миро“.Дел од пораките потекнуваат од периодот кога Лајчак бил претседател на Генералното собрание на Обединетите нации и често престојувал во Њујорк. Во тој период, наводно, договарале средби, вечери и можни посети на резиденцијата на Епстин во Палм Бич, Флорида, место поврзано со злоупотреба на малолетни девојчиња.Објавените материјали допираат и до политички теми. Во една порака, Лајчак напишал дека „го сака“ рускиот министер за надворешни работи Сергеј Лавров. Тие разменувале мислења и за состојбата по убиството на новинарот Јан Куцијак во 2018 година. Лајчак му пишувал на Епстин дека има средба со „поранешен премиер“, најверојатно Роберт Фицо, и дека ќе му соопшти дека не сака да се кандидира за претседател. Како причина ги навел желбите на семејството и фактот дека себеси се гледа пред сè на „меѓународната сцена“, но истовремено изразил страв дека неговата партија Смер поради тоа ќе го мрази. Според пораките, Лајчак му нудел и посредување за организирање средба меѓу Стив Банон и Роберт Фицо, што подоцна го демантирал.Објавата на документите предизвика силни реакции во Словачка. Лидерот на партијата Прогресивна Словачка, Михал Шимечка, го повика Лајчак да поднесе оставка од функцијата советник на премиерот Роберт Фицо. Тој порача дека по ваквите откритија нема друга опција освен итна оставка или разрешување, нагласувајќи дека случајот му нанесува штета на угледот на Словачка во странство. И пратеничката од партијата СаС, Мартина Холечкова, побара оставка, оценувајќи дека документите се јасен доказ оти комуникацијата со Епстин не била само општествена или дипломатска.Американското Министерство за правда нагласи дека објавувањето на документите не значи потврда на вистинитоста на сите тврдења, бидејќи дел од записите потекнуваат од непроверени пријави, а дел од материјалите се значително редактирани. Сепак, обемот и карактерот на комуникацијата беа доволни да предизвикаат политичка криза во Словачка.Лајчак соопшти дека му понудил оставка на премиерот Фицо, не затоа што сторил нешто криминално или неетичко, туку за да не му наметне политички трошоци за нешто што, како што вели, не е поврзано со неговите одлуки. Тој изјави дека е подготвен да ги потврди своите тврдења на кој било начин и нагласи дека, како професионален дипломат, не би направил ништо што би довело до негова дискредитација. Премиерот Роберт Фицо, пак, уште кон крајот на ноември минатата година соопшти дека нема да го разреши Лајчак од функцијата советник поради медиумските наводи.

Свет | пред 2 месеци

Филипче и Дончиќ во Загреб потпишаа Меморандум за соработка меѓу СДСМ и СДП

Во рамки на посетата на Загреб, претседателот на Социјалдемократскиот сојуз на Македонија, д-р Венко Филипче и претседателот на СДП Хрватска, Синиша Хајдаш Дончиќ, потпишаа Меморандум за соработка меѓу двете партии.Со потпишувањето на Меморандумот, СДСМ и СДП Хрватска ја потврдуваат заедничката посветеност на вредностите и принципите на европската социјалдемократија, како и определбата за продлабочување на соработката меѓу прогресивните политички сили во Европа.Целта на Меморандумот е зајакнување и унапредување на меѓупартиската соработка преку размена на искуства, политички решенија  и заеднички придонес за развој на демократијата и социјален напредок.Како клучни цели и задачи кои произлегуваат од Меморандумот, се зајакнување на демократските институции и инклузивната демократска култура, промовирање на социјалната правда, солидарноста, еднаквоста и човечкото достоинство, како и поддршка на работничките права, социјалниот дијалог и модернизацијата на социјалните политики.Меморандумот предвидува соработка и размена на искуства во повеќе области, меѓу кои партиска организација и развој, креирање јавни политики, социјална и економска политика, политики за работнички права, учество на младите и жените во политиката, локално управување, зелена  транзиција, како и соработка во процесот на европска интеграција и регионална стабилност.Соработката ќе се реализира преку конкретни активности како заеднички работни групи, конференции и тематски дебати, обуки, размена на експерти и редовни консултации меѓу партиските раководства.Со потпишувањето на Меморандумот, СДСМ и СДП Хрватска ја зајакнуваат меѓупартиската соработка и ја потврдуваат заедничката заложба за демократска, социјално праведна и европска иднина.

Македонија | пред 2 месеци

Жртвите на Епстин во шок по објавата на нивните имиња: „Ова е апсолутен хаос“

Жртвите на злосторствата на Џефри Епстин се „шокирани“ по најновата објава на документи на американското Министерство за правда, во која биле објавени нивни имиња, изјави за Би-би-си адвокатката за правата на жените Глорија Олред. Според неа, меѓу објавените податоци има и жртви кои досега никогаш јавно не биле идентификувани.Олред посочи дека во дел од документите имињата формално се затемнети, но и покрај тоа можат да се прочитаат. Таа додаде дека во некои списи се објавени и фотографии од жртви кои никогаш не давале изјави за медиумите и никогаш јавно не истапиле. „Ситуацијата е апсолутен хаос“, рече Олред, оценувајќи дека Министерството за правда „достигнало ново дно“ и дека „треба да се срами“.Би-би-си побара коментар од американското Министерство за правда, но одговор засега нема.Во објавените документи, кои станаа достапни синоќа, се вклучени околу три до три и пол милиони страници записи за активностите на Епстин, околу 2.000 видео-записи и приближно 180.000 фотографии собрани за време на истрагата, потврди заменик-главниот обвинител на САД, Тод Бланш. Од Министерството за правда тврдат дека дел од содржината е тешко или невозможно да се објави без да се наруши приватноста, поради што имињата и личните податоци на жртвите се делумно или целосно затемнети.Џефри Епстин беше осуден сексуален престапник и трговец со луѓе, кој во 2019 година беше пронајден мртов во притвор. Неговата мрежа опфаќа сериозни обвинувања за сексуална злоупотреба и искористување на бројни жртви, меѓу кои и малолетници. Со години, жртвите и дел од законодавците се залагаат за целосно објавување на списите, со цел да се разјасни улогата на влијателни поединци и можните обиди за институционално прикривање.

Свет | пред 2 месеци

Николоски: На состанокот во вторник со Европската Унија ќе понудам најдобри можни решенија што ќе ги договориме заедно со транспортерите

Истрајноста и единственоста на превозниците од Македонија и од целиот регион, беше клучна за Европската Унија да реагира и да донесе документ со кој превозниците ќе бидат квалификувани како “професионалци”. Тоа е она што го баравме и тоа е она што го бараа превозниците. Закажан е состанок во вторник на кој ќе се дефирнираат сите прашања и јас во координација со транспортерите ќе понудам најдобри решенија, истакна во вечерашното интервју за ТВ Сител, заменик претседателот на Владата и министер за транспорт, Александар Николоски.“Европската Унија ја забрза целата процедура, тие планираа да го носат овој документ многу подоцна. Станува збор за документ од 19 страници, кој што целосно ги опфаќа новите правила на Шенген зоната и таму има еден клучен збор, каде што возачите на камиони се прифаќаат како професионалци”  што е прв пат ЕУ на тој начин да го реши проблемот и кој беше суштиниски. Беа понудени три решенија и ова беше едно од решенијата” - истакна Николоски.Вицепремиерот потенцираше дека на состанок ќе се дефинираат сите прашања за да се излезе од оваа ситуација.“Овој состанок не се закажуваше речиси години дена, па се закажа за 6. февруари, а сега се помести за вторник, што мислам дека симболички многу значи. Сакам да им честитам на сите оние храбри луѓе кои што излегоа на протестите и покажаа дека проблемот е доста сериозен. Да им честитам на одлучноста и храброста. Ја имав честа да ги посетам на протестите и да ги подржам.  Тоа што беа единствени и истрајни и не успеа никој да ги скрши, не коментирам одредени други држави од регионот каде други премиери и минстри се обидуваа да ги скршат. Ние да дадовме подршка, јас, премиерот и тоа доведе до ваков потег на Европската Унија”- рече Николоски.Тој потенцриа дека сите решенија и ставот на Владата ќе се креира заедно со транспортерите“Ние сме во целосна координација со превозниците, се договоривме по состанокот во Брисел, заеднички да седнеме и да ги разгледаме предлозите кои што ќе дојдат од таму и мојот одговор ќе го работам заедно со нив, затоа што сакам да понудам најдобри можни решенија кои ќе одговараат на нашите транспортери. Тие се едни од основните двигатели на македонската економија и цели градови во Македонија живеат од овој сектор”- додаде тој.Во однос на временската рамка, колку ќе траат овие разговори со ЕУ и кога најрано може да се очекува конечно решение, Николоски рече дека до ова лето би требало да се најде решение како нормално би можел да функционира транспортот.

Македонија | пред 2 месеци

Кедев го напушти Советот на Алиу поради застој во откривање дали имало непотребни операции на срце заради профит

Кардиологот и академик, Сашко Кедев, се повлекол од „здравствениот совет“ кој го формираше министерот за здравство Азир Алиу, за да се открие кој во Македонија оперира срце само за пари и без медицинска потреба.ТВ Канал 5, повикувајќи се на извори во Министерството за здравство, објави дека причина за овој потег на Кедев е застојот што се случил во започнатите контролни процеси околу скандалот што го откри токму Кедев дека приватни болници во Македонија правеле тешки и скапи операции на срце кај пациенти на кои таквите зафати воопшто не им биле потребни.За скандалот требаше да почне со работа и комисија составена од странски експерти, но Кедев и дел од комисијата се незадоволни од постапката.Членови од комисијата, која ја формираше министерот за здравство реагираат дека во контролните процеси не се вклучени компетентни кадри со докажан стручен и професионален кредибилитет а избрани биле доктори интернисти и доктори од судка медицина. Не се знае кога и дали воопшто ќе почне со работа комисијата со странски експерти за разрешување на овој скандал кој ја шокираше јавноста.Минатата година, Сашко Кедев во интервју обелодени дека кај пациенти кои биле на контрола било увидено дека не им била потребна тешка интервнција во приватна болница за што била потрешно голема сума на пари од Фондот за здравство. Ова било правено само за профит.Министерот формираше која почна да ги истражува наодите на Кедев.Истрагата се прошири и на државното и на приватното здравство, иако наводите на Кедев се однесуваа само на приватното. Првичните наоди беа дека од 25 кардиохируршки интервенции 10 се непотребни или со непотребно упатување.Министерот за здравство се иште не ја потврди причината за повлекувањето на кардиологот Кедев.

Македонија | пред 2 месеци

Почина Кетрин O'Хара, мајката на Кевин од филмот „Сам дома“

Легендарната актерка Кетрин О’Хара почина на 72-годишна возраст, потврдија извори блиски до нејзиното семејство. Веста за нејзината смрт брзо одекна во светската јавност, додека причината сè уште не е официјално соопштена.О’Хара зад себе остави богата и повеќедецениска кариера во филмот и телевизијата. Најпозната е по улогата на мајката на Кевин Мекалистер во првите два дела од култниот филм „Сам дома“, а нова генерација гледачи ја засака преку улогата на ексцентричната Моира Роуз во серијата „Шитс Крик“, во која настапуваше во сите сезони.Во текот на кариерата оствари значајни улоги и во бројни филмски проекти, меѓу кои сатиричните остварувања „Најдобар на изложбата“ и „Моќен ветер“, како и во филмовите од франшизата „Битлџус“, вклучувајќи го оригиналниот филм и неговото продолжение.Нејзиното последно телевизиско појавување беше во серијата „Студио“, прикажувана на платформата Apple TV+, каде што глумеше заедно со Сет Роген, а за улогата беше номинирана за престижната награда Еми.Кетрин О’Хара освои повеќе значајни признанија во текот на кариерата, меѓу кои и Еми награда за улогата во „Шитс Крик“ во 2020 година, додека своето прво Еми признание го доби уште во раните осумдесетти години за сценарио во комичната емисија „Си-Ти-Ви“.Родена е во Торонто и израснала во големо семејство како шесто од седум деца. Со својот животен партнер, сценографот Бо Велч, се запознала кон крајот на осумдесеттите години за време на работата на филмот „Битлџус“. Во брак беа од 1992 година и имаат два сина.О’Хара последен пат беше видена во јавноста на почетокот на 2024 година, кога кратко зборуваше за улогата по која би сакала да остане запаметена, не насетувајќи дека тоа ќе биде едно од нејзините последни појавувања пред камерите.

Свет | пред 2 месеци

Почина Тихомир Јанчовски – поетот што остави трага во македонската книжевност и култура

Поетот, писател, преведувач, професор и културен дејец Тихомир Јанчовски почина денеска во Скопје, на 58-годишна возраст. Веста за неговата смрт ја соопштија семејството и Друштвото на писателите на Македонија, кои изразија длабока тага за прераното заминување на еден од најавтентичните современи македонски автори.Јанчовски зад себе остави исклучително богато и разнолико творештво. Автор е на повеќе од триесет книги – поезија, поетски романи, преводи, како и значајното историографско дело „Историја на православното монаштво на територијата на денешна Република Македонија“, објавено во 2010 година. Само неколку дена пред неговата смрт, на 23 јануари, на својот профил на социјалните мрежи информираше дека е објавена книгата „60 икони на Мајката Божја“ од Аријан де Сен-Марк, во која тој се јавува како уредник и преведувач, најавувајќи и претстојна промоција.Во 2024 година Јанчовски одбележа 25 години книжевно творештво, а истата година, заедно со Бранислав Николов, го реализираше поетскиот перформанс „Волкот на љубовта“. Неговата поезија е застапена во бројни домашни и странски антологии и литературни списанија, а четири од неговите книги се целосно преведени. Делата на Јанчовски се преведувани на англиски, француски, словачки, хрватски, албански, босански, грчки, германски, српски, полски, грузиски, персиски и италијански јазик.Покрај книжевната работа, Јанчовски беше и посветен педагог. Од Друштвото на писателите на Македонија посочија дека тој ќе остане запаметен како еден од најомилените наставници на повеќе генерации ученици, кои ги образувал во гимназијата „Орце Николов“, во меѓународното училиште „Нова“ и во Американската гимназија во Скопје, оставајќи силен личен и интелектуален печат.Тихомир Јанчовски е роден во Скопје во 1967 година. Дипломирал на Катедрата за општа и компаративна книжевност на Универзитетот „Св. Кирил и Методиј“ во 1991 година. Специјализирал средновековни студии на Централноевропскиот универзитет во Будимпешта, а магистрирал современа историја на УКИМ во 2010 година.

Македонија | пред 2 месеци

Кина директно го поттикнува најсмртоносното оружје на Путин

Кина испраќа клучна технолошка опрема што ѝ помага на Русија во развојот и производството на хиперсонични ракети со нуклеарни способности, оружје кое може да погоди цели во Европа за помалку од 20 минути. Станува збор за специјализирани CNC машини и други компоненти неопходни за изработка на боеви глави и прецизно наведувано оружје.Според „Телеграф“, Русија неодамна го употребила проектилот „Орешник“, кој достигнува брзина од околу 12.875 километри на час и може да носи шест боеви глави со различни цели. Украинските власти и безбедносни аналитичари предупредуваат дека станува збор за сериозна закана за Западот, додека Москва тврди дека ракетата е невозможно да се собори.Клучна улога во зголемувањето на производството има кинеска карусел-струг машина, идентификувана во руската фабрика во Воткинск, главен погон за производство на ракети, кој е под западни санкции. Таму, покрај „Орешник“, се произведуваат и „Искандер-М“ и интерконтиненталните ракети „Топол-М“.Анализите покажуваат дека Кина ѝ испорачала на Русија технологија и опрема во вредност од околу 10,3 милијарди долари, вклучувајќи микрочипови, мемориски плочки, куглични лежишта и компоненти за радари и електронско војување. Дел од овие производи се на списокот на високоприоритетни стоки чиј извоз во Русија е забранет од повеќе западни земји, но Кина не ги прифати тие санкции.Експертите оценуваат дека без пристап до кинеската технологија и пазар, Русија би имала сериозни тешкотии да го одржи темпото на военото производство и модернизацијата на одбранбената индустрија. Пекинг, пак, ги отфрла обвинувањата, наведувајќи дека не придонесува за ескалација на војната и не профитира од конфликтот во Украина.

Свет | пред 2 месеци

Николоски: Деталите за престој на превозниците во ЕУ по средбата во Брисел ќе ги прецизирам заедно нив

Александар Николоски, потпретседател на ВМРО-ДПМНЕ, во своето гостување во Тема на денот на телевизија Сител, се осврна на темата за блокадите од страна на транспортерите кои беа актуелни изминативе денови, за што истакна дека е задоволен од тоа што ЕУ ја забрза постапката и го објави документот порано од планираното. Тој додаде дека по состанокот во Брисел ќе следи заедничка средба за разгледување на предлозите, и целта е да се понудат најдобрите решенија за транспортерите, кои се клучен двигател на македонската економија.,,Се работи за документ од 19 страни, којшто целосно ги опфаќа новите правила на Шенген зоната и таму има еден клучен збор, баш во овој дел којшто го издвоив на мојата објава, каде што возачите на камиони односно транспортерите се прифаќаат како професионалци, со останатите категории коишто се наведени тука, како сппортисти уметнции итн, Што е првпат да ЕУ на тој начин го реши проблемот. Во суштина тоа беше и еден од начините да се излезе од проблемот, затоа што транспортерите кога ги почнаа протестите бараа да се почне дијалог со којшто ќе се реши проблемот, се понудија 3 решенија и ова е едно од трите решенија“, рече Николоски.Тој додаде дека во вторник ќе се одржи состанок кој, како што вели, една година не беше закажуван, а првично бил договорен за 6 февруари, но вчера терминот бил поместен за во вторник.,,Сакам да им честитам на сите оние храбри луѓе кои што излегоа на протестите овие денови, кои што покажаа дека проблемот е навистина сериозен. Да честитам на одлучноста, на храброста, јас ја имав честа и да ги посетам и да ги поддржам. Излегов заедно со нив, и мислам дека покажаа дека навистина е голем проблемот и дека мора сериозно да му се пристапи, и тоа што беа единствени и истрајни никој не успеа да ги скрши, даде резултат“, вели Николоски.Тој истакна дека самиот дал целосна поддршка, но дадоа и премиерот, и Владата, со цел решавање на проблемот. Николоски истакна дека процесот се води во целосна координација со превозниците.,,Во целосна координација со превозниците. Денеска имав средба со претседателката и потпретседателката на најголемото здружение на превозници, на Макамтранс, се договоривме во вторник, по завршувањето на состанокот со Брисел, да повторно се сретнеме и да заеднички ги разгледаме предлозите кои што ќе дојдат од таму, и мојот одговор ќе го работам заедно со нив, односно во координација со нив“, истакна Николоски и додаде:,,Сакам да понудам најдобри можни решенија кои што ќе одговараат на нашите транспортери.  Тие се едни од основните двигатели на македонската економија, цели градови во Македонија живеат од транспортот. Мора да даваме целосна поддршка на овој сектор“.

Македонија | пред 2 месеци

Полицијата пронајде пет тони марихуана во Крушевац

Полицијата во Србија вчера изврши рекордна заплена на пет тони марихуана во селото Коњух кај Крушевац, при што се уапсени три лица, меѓу кои и таткото и синот Раде (68) и Небојша (40) Спасојевиќ. Дрогата беше пронајдена во магацинот на компанијата „Флораком доо“, која се занимава со одгледување саден материјал и производство и откуп на кисели краставички.Според информациите, Раде Спасојевиќ е советник на владејачката Српска напредна партија (СНС), а неговата компанија била центар за складирање и дистрибуција на марихуаната на територијата на Белград. Јавното обвинителство за организиран криминал соопшти дека вредноста на дрогата на уличниот пазар се проценува на околу 50 милиони евра.Покрај марихуаната, полицијата пронашла и огнено оружје – најмалку четири автоматски пушки и еден пиштол – како и пари во износ од над 1.500.000 динари.Опозицискиот политичар Мирослав Алексиќ посочи дека, покрај тоа што е советник на СНС, Раде Спасојевиќ наводно е и близок соработник на министерката за одбрана Братислава Гашиќ.Ова претставува најголема полициска заплена на дрога во историјата на Србија и отвора сериозни прашања за врските меѓу политика и организиран криминал.

Свет | пред 2 месеци

Завршени блокадите на граничните премини, товарните возила повторно на терминалите

Управа за гранична полиција при Министерството за внатрешни работи на Србија соопшти дека денеска од 15 часот е укината блокадата на сообраќајот за товарни возила на граничните премини. Блокадата беше воведена на 26 јануари 2026 година, прво на излезните терминали за товарни возила, а потоа и на граничните премини на влезот во земјата.Од српското МВР истакнуваат дека се преземаат сите мерки за воспоставување редовен режим на сообраќај и забрзување на протокот на товарни возила на граничните премини, како на влез така и на излез од Србија.

Свет | пред 2 месеци

Зеленски тешко ја обвини Европа

Украинскиот претседател Володимир Зеленски ја критикуваше Европа дека ја оставила Украина на „цедило“ со протиракетната одбрана, што Русија го искористи за да нанесе сериозни оштетувања на енергетската инфраструктура и да ја доведе земјата „на работ на целосен мрак“. Зеленски посочи дека доставата на ракетите за системите Patriot доцнела поради пропуштена уплата во рамките на иницијативата PURL, оставајќи многу Украинци без струја, греење и вода среде најстудената зима од почетокот на војната.Иницијативата PURL ја водат САД и НАТО, а придонесуваат повеќе европски држави, но висок претставник на ЕУ за надворешна политика Каја Калас предупреди дека Европа мора да користи свои залихи за протиракетна одбрана за да ја поддржи Украина во кризата.Во меѓувреме, Кремљ потврди дека рускиот претседател Владимир Путин се согласил на привремено примирје до 1 февруари, по повикот на американскиот претседател Доналд Трамп за седумдневно прекинување на нападите врз Киев поради екстремниот студ.

Свет | пред 2 месеци

Истрага против четири лица за пронајдени дрога и оружје во Брвеница

Основното јавно обвинителство во Тетово отвори истражни постапки против четворица лица по претресите извршени во Брвеница, при кои беа пронајдени наркотична дрога и оружје.Тројца од осомничените се товари за кривично дело – Неовластено изработување, држење, посредување и тргување со оружје и експлозивни материи. Кај еден од нив бил пронајден пиштол со два куршуми во рамка и уште 20 куршуми за автоматска пушка. Друг осомничен поседувал 55 куршуми, од кои 53 се боeва муниција забранета за граѓаните, додека кај третиот бил откриен пиштол без шаржер.Четвртото лице било фатено со 3,15 грама кокаин, поради што се води истрага за – Неовластено производство и пуштање во промет на наркотични дроги, психотропни супстанции и прекурсори.По краткотрајниот 48-часовен притвор за обезбедување докази, јавниот обвинител достави предлог до судијата на претходна постапка за определување мерка притвор за тројцата осомничени, додека за четвртото лице се предложени мерки на претпазливост.

Македонија | пред 2 месеци

СДСМ: Затворањето на постмониторингот не е успех на Мицкоски ниту на неговата анти ЕУ кампања

СДСМ истакнува дека во периодот од 2017 до 2024 година, преку спроведување на реформски мерки, земјата бележела значителен напредок во областите на владеење на правото, слободата на изразување и граѓанските слободи. Анализата на меѓународните индекси, како што се „Freedom in the World“, „Rule of Law Index“ и „Human Rights Index“, покажува јасно подобрување на политичките права и заштитата на слободите на здружување и изразување.Според Freedom House, резултатите се зголемиле од 4/3 во 2017 година на стабилни 67–68/100 во 2023 година. Истиот тренд се потврдува и од World Justice Project, кој забележал подобрување на рангот на земјата, како и од V-Dem Human Rights Index, кој се зголемил од 0.78 на околу 0.82.Медиумските слободи, исто така, доживеале значителен напредок, со ранг на Reporters Without Borders од 111. место во 2017 година на импресивно 36. место во 2024 година. Сепак, според СДСМ, повторното доаѓање на ВМРО на власт во мај 2024 година веќе покажува знаци на влошување, со пад на индексите за медиумите на 42. место во 2025 година и критики за притисок врз новинарите и корупција.Парламентарното укинување на комисијата за постмониторинг дијалог од страна на Советот на Европа, според СДСМ, не претставува успех на актуелната власт, туку е последица на реформите спроведени во претходниот период. И покрај ова, надзорот над човековите права и демократијата ќе продолжи преку периодични извештаи и механизми на Советот на Европа и ЕУ.СДСМ апелира до граѓаните да се спротивстават на секое назадување и да ги поддржат демократските вредности, нагласувајќи дека само заедно може да се обезбеди подобра иднина за Македонија.

Македонија | пред 2 месеци

Алиу презентираше нови стратешки приоритети за 2024–2028

Во организација на Министерството за здравство, денеска се одржа конференција насловена „Партнерство за здравство", посветена на стратешките приоритети на здравствениот систем и идентификуваното портфолио на проекти за партнерска поддршка.На настанот присуствуваа претставници од бизнис секторот, странски компании и меѓународни организации, како и амбасадори и претставници на дипломатскиот кор.- Поддршката од општествено одговорните чинители е од големо значење за напредокот на здравствениот систем. Токму затоа сметам преку партнерски однос може да дојдеме до остварување на приоритетите во здравството. Нашата цел е првпат системски да ја канализираме поддршката и да ја насочиме онаму каде што е најпотребна, истакна министерот за здравство, Азир Алиу во обраќањето.Министерот Алиу ги презентираше стратешките приоритети во здравството за периодот 2024 - 2028, и посебно се осврна на оптимизација и функционална реорганизација на здравствениот систем, со цел регионално балансиран и еднаков пристап до здравствените услуги за сите пациенти.- Како Влада сме фокусирани на континуирана едукација и трансфер на знаење на медицинскиот персонал, со ангажирање врвни странски експерти за едукација на нашиот кадар, во насока на воведување нови дијагностички и терапевтски методи, потенцираше Алиу.Тој се осврна и на националната здравствена стратегија за млади лекари, чија цел е подобрување на условите за работа и финансиска стимулација за спречување на одливот на младите лекари.- Во следниот период активно ќе работиме и на развој и имплементација на стандардизирани болнички процедури за квалитетна и безбедна здравствена заштита, односно стандардизирани патеки за упатување на пациентите со цел намалување на неоправданите упатувања од едно на друго ниво на здравствена заштита. Исто така, еден од приоритетните проекти е и Националниот систем на парамедици, како дел од Итната медицинска помош, со што дополнително ќе го зајакнеме одговорот на здравствениот систем во итни случаи, заклучи Алиу.Тој се осврна на стручните упатства за практикување на медицина базирана на докази, унапредување на Националниот здравствен информативен систем во рамки на дигитализацијата на здравството и имплементација на меѓународни стандарди ("здравство без хартија") и национален интероперабилен слој за е-здравство.

Македонија | пред 2 месеци

По пет години судска битка, Митева ослободена од тужбата за клевета на поранешен пратеник на СДСМ

Апелациониот суд во Скопје ја уважи жалбата и ја поништи пресудата со која портпаролката на Владата, Марија Митева, беше осудена по тужба за навреда и клевета поднесена од Дарко Каевски, тогашен пратеник од редовите на СДСМ. Со ова завршува судски процес што траеше цели пет години.Митева во јавна изјава оцени дека иако за многумина овој случај можеби е заборавен, за неа тој претставува важно прашање за правдата и слободата на говор. Таа посочи дека во периодот кога СДСМ декларативно се повикувале на слободата на изразување, во пракса, како што рече, се обидувале да ја ограничат преку правни конструкции и тужби.„Наместо аргументи – конструкции, наместо одговори – тужби. Наместо отчетност – обид за замолчување“, наведе Митева, додавајќи дека ваквиот пристап, според неа, не е напуштен ни денес.Таа истакна дека во периодот кога била во опозиција, секогаш била свесна што зборува, зошто го зборува и со која цел, нагласувајќи дека јавниот говор го темелела на факти и внимателно одмерени аргументи. Според неа, одлуката на Апелациониот суд е потсетник дека правдата во Македонија често доаѓа бавно, но дека нејзината суштина е во тоа правото да не се користи како средство за притисок, туку како заштита на основните слободи.„Борбата за слободен и одговорен јавен говор не смее да престане“, порача Митева.

Македонија | пред 2 месеци