Мицкоски апелира на трпеливост: Следуваат позитивни сигнали од Вашингтон

Премиерот Христијан Мицкоски изјави дека актуелните информации поврзани со визните ограничувања на САД кон Македонија се однесуваат исклучиво на емигрантските визи, а не на туристичките посети или студентските визи, и порача дека во наредните денови очекува позитивни вести за македонските граѓани во односите со Соединетите Американски Држави.Според Мицкоски, нема простор за вознемиреност кај јавноста, бидејќи станува збор за тесно дефинирана категорија визи, која не ги засега граѓаните што патуваат туристички или поради образование. Тој истакна дека комуникацијата со стратешките партнери продолжува и дека очекува разврска која ќе биде во интерес на државата и на граѓаните.Премиерот упати и критика до опозицијата, оценувајќи дека по претходните реакции и критики поврзани со Обединетото Кралство, сега неоправдано се отвораат и прашања за односите со САД.Тој нагласи дека Владата останува посветена на зачувување и унапредување на односите со стратешките партнери и повтори дека очекува „многу добри вести“ за македонските граѓани во блиска иднина.

Македонија | пред 1 седмица

Полицијата со низа интервенции за нарушување на јавниот ред: Закани, напад врз полицаец и приведувања на граница

Надлежните полициски служби изминативе денови интервенираа во повеќе случаи поврзани со закани, напади и нарушување на јавниот ред. Во Дебар, против 35-годишен жител е поднесена кривична пријава поради сомнение за загрозување на сигурноста, откако преку мобилна апликација упатувал закани кон 52-годишно лице.Во Гостивар, пак, кривична пријава е поднесена против 59-годишен маж, осомничен дека во семејниот дом ѝ се заканувал на својата сопруга. Во Скопје, на подрачјето на Драчево, 41-годишен маж бил лишен од слобода откако физички нападнал полициски службеник за време на вршење службени дејствија.На граничниот премин Табановце, на влез во државата, полициски службеници лишиле од слобода 34-годишен државјанин на Косово, откако било утврдено дека се наоѓа на „стоп-листа“ по барање на СВР Скопје.

Македонија | пред 1 седмица

Полициски акции во Скопје, Штип и Горно Количани против нарко-криминал

Полициските служби во изминатиот период спроведоа повеќе акции против нелегалната трговија со дрога, при што беа лишени од слобода повеќе лица на различни локации низ државата. СВР Скопје поднесе кривична пријава против 28-годишниот А.Ј. од Скопје, кај кого на 5 март 2025 година, при полициска контрола на улицата „Февруарски поход“, била пронајдена и одземена марихуана.Кривична пријава е поднесена и против 28-годишниот И.Е. од Скопје, кај кого на 31 декември 2025 година во селото Горно Количани бил пронајден кокаин при претрес на неговото возило, а еден ден подоцна, при претрес во неговиот дом, биле откриени и одземени околу 800 куршуми калибар 9 милиметри.Дополнително, на 16 јануари 2026 година, на повеќе локации во Скопје, полициски службеници лишиле од слобода три лица – двајца скопјани и еден државјанин на Холандија со престој во Скопје, кај кои биле пронајдени и одземени марихуана и бела грутчеста материја. Во Штип, пак, двајца 17-годишници биле приведени откако биле затекнати како фрлаат марихуана на улицата „Сутјеска“. По целосно документирање на сите случаи ќе следуваат соодветни поднесоци.

Македонија | пред 1 седмица

Провала и кражба во трговски центар во Скопје

На 16 јануари 2026 година во раните утрински часови било пријавено дека со употреба на сила било влезено во простории на финансиско друштво во трговски центар во скопската општина Карпош, при што биле одземени пари.Полицијата презема мерки за расчистување на случајот.

Скопје | пред 1 седмица

Ги воделе ‘Тот’, ‘Тамара’, ‘Трансмет’, ‘Двојник’, „Тенковски делови“: меѓу исксутвото и контроверзиите, кои се петте кои сакаат да шефуваат

Обвинителите Дејан Петрески, Спасенка Андонова, Тања Трајчевска, Анел Фидоски и актуелниот шеф Гаврил Бубевски се имињата што се споменуваат како потенцијални кандидати за нов раководител на Основното јавно обвинителство Скопје. За пет дена, Советот на јавни обвинители треба да донесе одлука кој ќе застане на чело на најголемото обвинителство во државата.Изборот се одвива во период на институционална чувствителност, по оставката на поранешниот републички јавен обвинител Љупчо Коцевски и назначувањето на вршител на должноста јавен обвинител Анита Тополова Исајловска. Скопското обвинителство, кое постапува по најголем број и најкомплексни предмети во земјава, добива ново раководство во момент кога довербата во правосудниот систем е под силен јавен притисок.А кои се кандидатите...Анел Фидоски како обвинител во скопското Обвинителство е познат по неколку високопрофилни случаи, а меѓу нив е гонењето на обвинетите за убиството на Никола Сазодвски, член на групата „Комити“ и експремиерот Владо Бучковски за „Тенковски делови“ кој застаре благодарение на преквалификацијата на делото која ја направи Фидоски. Додека обвинителот ја водеше истрагата и утврдуваше факти, еден од обвинетите и осудените, Јетон Љужа, избега од Макеоднија. Тој беше вклучен и во судскиот процес за гонењето на 12 чоктори и членови на комисии за малата Тамара од Влеес, која почина додека чекаше државата да и помогне за лекувањето во странство.Дејан Петрески е обвинител во Основното јавно обвинителство Скопје и е ангажиран на предмети поврзани со напади врз новинари. Тој го водеше предметот за упадот во М-НАВ, во кој осомничен беше Беким Незири, како и предметот за пожарот во модуларната болница во Тетово. Токму за тој случај, поранешната обвинителка, а денес адвокатка Лејла Кадриу, јавно изнесе сериозни критики, наведувајќи дека Петрески бил користен како „поштар“ преку кој се контролирале дејствијата во истрагата и се штителе одредени лица.Тања Трајчевска го водеше предметот за убиството на ракометарот Денис Тот, во кој обвинетите беа осудени и на по 18 години затвор. Таа постапуваше и во предметот за смртта на диџејот Љупчо Лешко, за кој родителите на починатиот изнесоа серија забелешки поради непокренување обвинение покрај доказите за сопствениците на објектот каде младото момче загина. По тие реакции, Вишото јавно обвинителство донесе одлука случајот повторно да се преиспита.Спасенка Андонова беше обвинителка во Обвинителството за гонење организиран криминал и корупција и го водеше предметот „Двојник“, поврзан со незаконско издавање пасоши на странски криминалци. Во овој случај, судените добиваа релативно ниски казни од судот. Во минатото Андонова беше дел и од Обвинителството за гонење организиран криминал и корупција, каде не беше реизбрана.Гаврил Бубевски, актуелен шеф на скопското Обвинителство, дојде од Специјалното јавно обвинителство, каде што беше избор на Катица Јанева во 2015 година, како млад обвинител со шестгодишен стаж. Во СЈО работеше на предмети што произлегоа од прислушуваните разговори, меѓу кои „Трансмет“, „Шамарите во Центар“, „Титаник 2“, „Моќник“, како и истрагите за „Актор“ и „Подарок“. Тој беше дел и од постапката за случајот „Монструм“. Бубевски беше обвинуван дека со наводно непостапување, овозможил Сеад Кочан и компанијата „Трансмет“ да префрлат имот на трето лице, а кој што требало да биде предмет на конфискација. Тој јавно тврдеше дека не направи грешка во постапувањето.Кандидатите за функцијата имаат обвинителско искуство кое се движи од шест до повеќе од дваесет години и зад себе носат серија јавни и општествено значајни предмети, дел од нив и со силни контроверзии. Одлуката на Советот на јавни обвинители ќе биде внимателно следена, бидејќи изборот на нов шеф на скопското Обвинителство се смета за клучен тест за насоката и кредибилитетот на обвинителскиот систем во период на институционални превирања.

Македонија | пред 1 седмица

Македонија го отвора Европското првенство против светскиот и олимписки шампион Данска

Седумнаесеттото Европско првенство во ракомет за мажи, кое се одржува во Данска, Норвешка и Шведска, официјално започна вчера, а денеска на терен ќе излезе и македонската репрезентација. За Македонија ова е деветто учество на континенталните шампионати, осмо по ред, а најдобриот пласман останува петтото место освоено на ЕП 2012 година.Титулата на шампион ја брани Франција, која со евентуално ново злато би се израмнила со рекордерот Шведска, со по пет европски титули. Македонија е сместена во групата Б и шампионатот го започнува вечерва од 20:30 часот во данскиот град Хернинг, каде ќе се соочи со актуелниот олимписки и светски првак Данска. Вториот натпревар македонските ракометари ќе го одиграат в недела против Португалија од 18 часот, додека во вторник следува дуелот со Романија, исто така од 18 часот. Пласман во следната фаза обезбедуваат двете првопласирани селекции од секоја од шесте групи.Македонија и Данска последен пат се сретнаа во групната фаза на Европското првенство 2022 година, кога Данците славеа со 31-21. Сепак, македонската јавност сè уште го памети триумфот од 33-29 во квалификациите за истото првенство, остварен во Скопје, на дебито на Кирил Лазаров како селектор, што воедно беше еден од ретките порази на Данска во изминатата деценија, како што потсетува Европската ракометна федерација.Селекторот Кирил Лазаров пред почетокот на шампионатот истакна дека неговиот тим влегува во натпреварот без притисок, но со голема желба да се надигрува со најдобрите. Тој оцени дека Данска е најдобрата репрезентација во светот во последните десет години, дека игра пред домашна публика и дека тоа ќе биде огромен предизвик, но нагласи дека Македонија нема што да изгуби и треба да ужива во ваков натпревар. Лазаров посочи дека промената на генерацијата е тежок и долг процес, особено за мала земја како Македонија, но изрази задоволство од напредокот што е направен во изминатите две години и од фактот што тимот веќе покажал дека може да одигра добар натпревар, иако континуитетот на големите турнири останува најголемиот предизвик.Македонската репрезентација во подготовките одигра пет контролни натпревари, на кои забележа три победи, едно реми и еден пораз. Подготовките започнаа во Пореч, каде Хрватска славеше со 26-23, по што следуваше турнирот во Винтертур, на кој Македонија го освои второто место со победи над Бахреин и Украина, како и реми со домаќинот Швајцарија. Генералната проба пред шампионатот беше победата над данскиот прволигаш Митјиланд со 35-27.Шефот на македонската делегација и поранешен репрезентативец Филип Миркуловски оцени дека последната проверка била исклучително корисна за тестирање на тактичките замисли и нагласи дека Македонија е во тешка група, но дека целта е да се изненадат фаворитите. Тој потенцираше дека иако станува збор за млада репрезентација, играчите зад себе имаат повеќе големи турнири и дека овој состав има потенцијал да расте и да постигнува резултати во иднина, како што пренесе Ракометната федерација на Македонија.Од другата страна, Данска, која според ракометните експерти е прв фаворит за златниот медал, со оптимизам влегува во шампионатот. Селекторот Николај Јакобсен изјави дека почетните натпревари секогаш носат одредена трема, но дека искуството и поддршката од околу 15.000 навивачи во арената Јуске Банк Боксен ќе бидат огромен ветер во грб. Тој оцени дека Македонија има млад и талентиран тим, но дека Данска влегува со јасна цел и самодоверба дека, ако игра на своето ниво, ќе биде тешко да биде поразена.Годинешното Европско првенство е прво за Данска без легендите Никлас Ландин, Хенрик Мелгард и Микел Хансен. И покрај тоа, Данците досега на европските првенства имаат освоено осум медали, а Јакобсен, кој е селектор од 2017 година, зад себе има четири светски титули и една олимписка. Македонија, пак, со млад состав и процес на постепена генерациска смена, влегува на шампионатот со амбиција за чекор напред и со надеж дека токму ваквите натпревари се патот кон идни успеси.

Спорт | пред 1 седмица

Финансиска истрага на 16 локации: 20 осомничени за штета од 4,8 милиони евра врз буџетот

Под раководство на јавен обвинител од Основното јавно обвинителство за гонење организиран криминал и корупција, истражителите од Истражниот центар при обвинителството, со асистенција на Министерството за внатрешни работи, до доцните вечерни часови вршеа претреси на вкупно 16 локации низ државата. При претресите биле пронајдени и времено одземени фиктивна документација, парични средства, оружје и лажни печати од правни лица, а осомничените лица се обезбедени.Како што информираат од обвинителството, акцијата е резултат на постапувања на Истражниот центар на ОЈО ГОКК и Управата за финансиско разузнавање, по известување од Агенцијата за национална безбедност, при што биле обезбедени докази за основано сомнение за сторени кривични дела од финансиска природа. Врз основа на прибраните докази, обвинителството отворило предмет и донело наредба за спроведување истражна постапка против 20 лица, кои, според сомневањата, го оштетиле државниот буџет за 297.733.844 денари, односно околу 4,8 милиони евра.Првоосомничениот, српски државјанин и сопственик и управител на две правни лица, заедно со двајца службеници од Управа за јавни приходи – Регионална дирекција Скопје, во текот на 2023 година формирале организирана група со цел извршување кривични дела даночно затајување, даночна измама, перење пари и злоупотреба на службената положба. Во периодот од 2023 до 2025 година, во групата биле вклучени и други сопственици, управители и вработени во правни лица во Скопје и Гевгелија.Според наодите на истрагата, со прикажување неточни податоци во даночните пријави и со помош на даночни службеници, во периодот 2023–2024 година првоосомничениот избегнал плаќање данок во износ од 11.593.403 денари. Останатите осомничени сопственици и управители на правни лица поднесувале лажни барања за враќање данок за нерезидентни правни лица, кои осомничени вработени во УЈП неосновано ги одобрувале, со што на буџетот му била нанесена штета од 31.175.168 денари.Дополнително, дел од осомничените во истиот период вршеле трансфер и подигање парични средства со цел прикривање на потеклото на пари прибавени со кривични дела, во вкупен износ од 91.985.197 денари. Досегашните докази укажуваат дека осомничените вработени во УЈП – Регионална дирекција Скопје, меѓу кои и лица на високи раководни позиции, со повеќекратни злоупотреби на службената положба нанеле вкупна штета на Буџетот на Република Северна Македонија од најмалку 162.980.076 денари.Јавниот обвинител, ценејќи ги сите околности, утврдил дека се исполнети условите за определување мерка притвор за десет осомничени. До судијата на претходна постапка при Основниот кривичен суд Скопје е доставен предлог за определување притвор за осум лица, додека за две лица мерката притвор веќе е определена во друг предмет поврзан со Агенцијата за финансиска поддршка во земјоделството и руралниот развој. За преостанатите десет осомничени предложени се мерки за обезбедување присуство, меѓу кои и забрана за вршење работни активности поврзани со кривичните дела, како и забрана за извршување службени должности во Управата за јавни приходи.

Македонија | пред 1 седмица

Повраќало, но имало уредни анализи - што се случувало пред смртта на бебето во Кавадарци

Од Општа болница Кавадарци соопштија дека лекарските тимови 35 минути се обидувале да го реанимираат двомесечното бебе кое почина по нагло влошување на здравствената состојба. Информацијата ја соопшти директорката на болницата, Гордана Ѓорчева Камчева, која во писмено обраќање изрази сочувство до родителите на починатото дете.Според нејзиното објаснување, доенче со иницијали У.М., на возраст од два месеца, било примено на Одделот за педијатрија на 12 јануари 2026 година, поради обилно повраќање по хранење. Во деновите на болнички престој, детето било со уредни витални параметри и уредни лабораториски анализи, без повторна појава на повраќање.На 14 јануари 2026 година, по итен повик од мајката дека бебето престанало да дише, веднаш бил повикан дежурниот педијатар, а истовремено и анестезиолог. Како што информира директорката, веднаш била започната реанимација со соодветна терапија, која траела околу 35 минути, но, за жал, без успех.По констатирањето на смртта, согласно законските процедури, биле известени Министерството за внатрешни работи и Јавното обвинителство. Земени биле изјави од родителите и од дежурниот медицински персонал, по што телото на доенчето било предадено на обдукција, со цел утврдување на точната причина за смртта.Од Општата болница Кавадарци посочуваат дека ќе соработуваат целосно со надлежните институции во понатамошната постапка.

Македонија | пред 2 седмици

Удрил со автомобил во полицаец, па и го натепал и избегал: драма во кумановско, имало пукање

Полициски службеници од Министерството за внатрешни работи, односно од СВР Куманово, на 14 јануари 2026 година во 23:30 часот во селото Романовце, кумановско, лишиле од слобода 28-годишно лице од истото село, поради сериозно нарушување на јавниот ред и напад врз полициски службеник.Според информациите од МВР, околу 22:30 часот во селото Отља, липковско, лицето не застанало на даден знак за запирање од страна на полицијата и со патничко возило „ауди А3“ со скопски регистарски ознаки, кое го управувало, удрило во полициски службеник, по што продолжило со движење.Во близина на селото Романовце, возачот застанал, го напуштил возилото и се обидел да побегне пеш. При обидот за бегство, еден од полициските службеници испукал два предупредувачки куршуми во воздух, по што осомничениот бил стигнат и фатен. При приведувањето, лицето пружало отпор и физички нападнало полициски службеник.Осомничениот е задржан во полициска станица, а по целосно документирање на случајот против него ќе биде поднесена соодветна пријава, соопштија од Министерството за внатрешни работи.

Македонија | пред 2 седмици

Осомничениот за смртната несреќа во Капиштец имал досие во МВР уште како малолетник

Осумнаесетгодишниот Саит Саитов, кој е во бегство по сообраќајната несреќа со смртен исход во скопската населба Капиштец, има досие во Министерството за внатрешни работи, потврдуваат од полицијата. Според МВР, Саитов уште минатата година, кога бил малолетен, бил санкциониран поради управување моторно возило без положен возачки испит, исто како и во случајот кога ја усмрти Љуба Јаковлеска.Од МВР за „Скопје1“ информираат дека за Саитов, по барање на СВР Скопје, во 2025 година му била изречена санкција по член 225 став 9 од Законот за безбедност на сообраќајот на патиштата за управување возило без положен возачки испит. Истовремено, за неговиот татко Берти Саитов била поднесена прекршочна пријава по член 317 став 14, поради давање возило на управување на лице без возачка дозвола.Основното јавно обвинителство Скопје донесе наредба за спроведување истражна постапка против 18-годишниот осомничен за кривичните дела „тешки дела против безбедноста на луѓето и имотот во сообраќајот“ и „неукажување помош на лице повредено во сообраќајна незгода“, поврзани со несреќата што се случи на 9 јануари на улицата „Народен фронт“ во Капиштец. Според обвинителството, осомничениот управувал патничко возило „фолксваген пасат“, извршил непрописно поместување налево, навлегол во лента од спротивен правец и возел со брзина неприлагодена на условите, при што немал важечка возачка дозвола.Во тие околности, со возилото удрил во пешакот Љуба Јаковлеска, која го преминувала коловозот, а по ударот и падот на асфалтот таа се здобила со тешки телесни повреди. Наместо да ѝ укаже помош, осомничениот го напуштил местото на настанот. Повредената била пренесена во Ургентниот центар, каде подоцна починала и покрај укажаната медицинска помош.Обвинителството информира и дека уште две лица, маж и жена, се осомничени дека му помогнале на возачот по извршувањето на кривичното дело, пренесувајќи го со свој автомобил преку граничниот премин Табановце и овозможувајќи му да ја напушти државата. По нивното враќање во земјата тие се лишени од слобода, а за нив е побарана мерка притвор.Притвор е побаран и за осомничениот возач, кој сè уште е недостапен за органите на прогонот, а мерката ќе започне да се спроведува по неговото пронаоѓање и лишување од слобода. Во меѓувреме, врз основа на прибраните докази, по него е распишана централна и меѓународна потерница по барање на Основното јавно обвинителство Скопје, поради сомнение за кривично дело казниво по член 300 од Кривичниот законик.Од надлежните институции упатуваат апел до граѓаните, доколку имаат какви било сознанија за движењето или престојот на осомничениот, веднаш да ја известат полицијата.

Скопје | пред 2 седмици

Суспендирани визи од САД - Мицкоски ја доведе Македонија во ранг со Сомалија, вели Фрчкоски

Членот на Извршниот одбор на СДСМ, Јон Фрчкоски, денеска остро реагираше на одлуката на Соединетите Американски Држави да ја опфатат Македонија со мерката за суспендирање на обработката на визи, оценувајќи дека ваквиот чекор ја става државата во ист ранг со земји како Сомалија и Сирија.Според Фрчкоски, одлуката на САД, со која Македонија се најде на листата на уште 75 држави за кои привремено се суспендира обработката на визи, е директна последица на, како што ги нарече, погрешните политики на актуелната власт и „периметарот на Христијан Мицкоски“. Тој потсети дека минатата година САД ги зголемиле царините кон Македонија, а сега, од 21 јануари, следува и суспензија на визната обработка, што според него претставува сериозен дипломатски сигнал.Фрчкоски нагласи дека СДСМ подолг период предупредува на штетните последици од политиките на, како што ја нарече, тендерската коалиција ВМРО-ЗНАМ, кои, според него, го загрозуваат стратешкото партнерство со САД и европската интеграција на државата. Во тој контекст, тој го посочи Иван Стоилковиќ како еден од најблиските соработници на Мицкоски во Владата, обвинувајќи го за отворени проруски ставови и директни врски со Москва.Како дополнителен аргумент, Фрчкоски наведе дека пред неколку дена Стоилковиќ бил виден на прослава со припадници на групата „Ноќни волци“, која важи за блиска до рускиот претседател Владимир Путин. Според него, ваквите активности се во директна спротивност со интересите на државата и со нејзините стратешки сојузништва.Паралелно со, како што рече, антиамериканските активности, Фрчкоски ја обвини Владата и за водење анти-ЕУ кампања, преку намерно отворање судири со Грција и Бугарија, повторно активирање затворени прашања и создавање изговори за блокирање на преговорите со Европската Унија. Според него, ваквото однесување има за цел да ја оправда изолацијата на државата и отсуството на суштински реформи.Фрчкоски предупреди дека САД веќе најавиле носење специјален закон за Западен Балкан, насочен кон борбата против криминалот и корупцијата, оценувајќи дека актуелните мерки се само првите чекори. Тој најави дека можно е следување на т.н. црни листи и воведување дополнителни санкции.На крајот, Фрчкоски порача дека СДСМ ќе продолжи да ја, како што рече, разоткрива оваа агенда, потенцирајќи дека стратешки партнери на Македонија се САД, а единственото место на државата е во НАТО и Европската Унија.

Свет | пред 2 седмици

Царина фатила фирма која нелегално вршела поштенски услуги и криумчарела пратки, заплениле стока од 240 илјади денари

Царински инспектори од Одделението за истраги при Царинска управа, во координирана акција со Министерството за внатрешни работи, Управа за јавни приходи, Агенцијата за пошти и Државниот пазарен инспекторат, извршија претрес во фирма која нелегално вршела меѓународни поштенски услуги и се сомничи за криумчарење стока.При претресот биле пронајдени вкупно 166 поштенски пратки со разновидна стока, чија вкупна вредност изнесува речиси 240 илјади денари. Пронајдената стока е запленета, а инспекторите поднеле кривична пријава против едно правно и едно физичко лице, поради сомнение за сторено кривично дело прикривање стоки кои се предмет на криумчарење и царинска измама.Според информациите од Царинската управа, фирмата вршела меѓународни поштенски услуги без соодветна лиценца. Пратките биле внесувани во државата со возила преку граничен премин, без да бидат пријавени кај царинските органи, по што нелегално биле складирани во магацин во сопственост на фирмата. Од таму, стоката требало да биде транспортирана до крајните нарачатели, за што бил предвиден паричен надомест.Од Царинската управа најавуваат дека и во наредниот период ќе продолжат со засилени контроли и координирани активности со другите надлежни институции, со цел откривање и спречување на сите облици на криумчарење и незаконско работење, заштита на државните финансиски интереси и обезбедување фер и рамноправна конкуренција на пазарот.

Македонија | пред 2 седмици

(Видео) Голема несреќа во Словенија, горат автомобили, затворен автопатот

Поради тешка сообраќајна несреќа, Штаерскиот автопат во Словенија е целосно затворен за сообраќај во двата правца, на делницата меѓу клучките Словенске Коњице и Словенска Бистрица – југ. Информацијата ја соопшти Сообраќајно-информативниот центар на Словенија, од каде апелираат возачите строго да ги следат упатствата на надлежните служби.Поради прекинот на сообраќајот, се создаваат долги колони и застои како на автопатот, така и на регионалните сообраќајници. Од Сообраќајно-информативниот центар апелираат возачите кои се заглавени во колоните да формираат итен, односно спасувачки коридор, со цел непречено движење на службите за итна помош.За товарните возила кои сообраќаат меѓу Марибор и Љубљана, во двата правца се препорачува користење на обиколен правец преку Хрватска.Според неофицијални информации што ги пренесува Радио Рогла, во сообраќајната несреќа експлодирала цистерна, а детонацијата наводно се слушнала во поголем дел од Словенска Бистрица. Според истите извори, во несреќата учествувале повеќе возила.Се очекуваат официјални соопштенија од полицијата и противпожарните служби со повеќе детали за причините и последиците од несреќата.

Свет | пред 2 седмици

(Видео) ТикТок-рециклирање на стара снимка: колку чини стајлингот на Сашо Мијалков во Монако

Минатогодишната снимка на која се гледа поранешниот директор на УБК и осуденик во предметот „Империја“, Сашо Мијалков, како се движи низ улиците на Монако, повторно се најде во фокусот на јавноста, овојпат во преработена верзија на социјалните мрежи. Профилот на ТикТок „officialstellarspace“ ја реобјави снимката пред два дена, додавајќи наратив во кој се анализира и проценува вредноста на облеката и модните додатоци што Мијалков ги носи во видеото.Според тврдењата изнесени во преработената снимка, станува збор за комбинација од луксузни парчиња од познати модни брендови, при што поединечните елементи од стајлингот се претставени како исклучително скапи. Во видеото се наведува дека целокупниот изглед достигнува сума која за просечниот граѓанин е недостижна.Реобјавената снимка за кратко време стана вирална, со над 300.000 прегледи и илјадници споделувања. Дел од тие кои коментираат се воодушевуваат, други критикуваат.Иако станува збор за стара снимка, нејзината нова интерпретација покажува дека ликот на Мијалков и натаму предизвикува силни реакции, особено кога е поврзан со демонстрација на раскош и луксуз.

Настани | пред 2 седмици

Трамп со проценка за Техеран: претстои интересно и неизвесно раздобје

Американскиот претседател Доналд Трамп изјави дека верува оти режимот во Техеран би можел да падне, оценувајќи дека актуелните протести имаат потенцијал да доведат до сериозни политички промени во земјата. Неговите коментари доаѓаат откако Иран утринава соопшти дека Ерфан Солтани е уапсен, но не и осуден на смрт, што е спротивно на тврдењата на неговото семејство и на една организација за човекови права, објави Reuters.Во интервјуто, Трамп изрази уверување дека протестите би можеле да резултираат со пад на режимот кој е на власт од Исламската револуција во 1979 година. „Секој режим може да падне“, изјави тој, додавајќи дека „без разлика дали ќе падне или не, ова ќе биде интересно раздобје“.Трамп воедно изрази скепса околу можноста власта во Иран да ја преземе иранскиот прогонет престолонаследник Реза Пахлави, кој во последниот период се наметна како еден од погласните поддржувачи на демонстрантите. Американскиот претседател оцени дека Пахлави „изгледа многу симпатично“, но додаде дека не е сигурен „како би се снаоѓал во сопствената земја“.Американскиот претседател вчера изнесе и тврдење дека „убивањето во Иран запира“, без притоа да навлезе во дополнителни детали за основата на таа проценка.

Свет | пред 2 седмици

Трамп: Потенцијалната акција во Иран мора да биде брза и решителна

Актуелниот американски претседател Доналд Трамп им соопштил на членовите на својот тим за национална безбедност дека евентуална американска акција во Иран треба да биде брза и решителна, со цел да се избегне долготраен воен судир. Ова го објави NBC News, повикувајќи се на американски функционер, две лица запознаени со внатрешните разговори и извор близок до Белата куќа.Според изворите, Трамп нагласил дека, доколку се одлучи на интервенција, таа треба да претставува јасен и конечен удар врз режимот во Техеран, без вовлекување на САД во продолжен конфликт.„Ако нешто преземе, сака тоа да биде завршно“, изјавил за NBC еден од соговорниците упатени во разговорите.Во исто време, се наведува дека Трамп е подготвен да го исполни и своето претходно ветување дадено на иранските демонстранти, дека САД ќе застанат зад нивните напори и ќе интервенираат како поддршка, доколку процени дека за тоа постојат услови. Изјавите доаѓаат во период на засилени регионални тензии и зголемено меѓународно внимание кон односите меѓу Вашингтон и Техеран.

Свет | пред 2 седмици

„Пирамид билдинг солушнс“ ги отфрла обвинувањата на СДСМ: Тендерите се законски и транспарентни

Компанијата „Пирамид билдинг солушнс“ ДООЕЛ Скопје остро ги демантира обвинувањата изнесени од Антикорупцискиот тим на СДСМ, оценувајќи дека станува збор за селективно и тенденциозно прикажување на податоци со цел да се наруши угледот и деловната репутација на фирмата.Во писмено соопштение доставено до медиумите, од компанијата наведуваат дека во последните денови се соочуваат со јавни напади и клевети изнесени од претставници на СДСМ, во кои, како што велат, намерно се изоставуваат клучни факти и се создава искривена слика за нивното работење.„Пирамид билдинг солушнс“ посочува дека повеќе од 15 години успешно и континуирано работи на македонскиот пазар, без ниту еден утврден скандал, постапувајќи исклучиво согласно законите, прописите и правилата за јавни набавки, во услови на реална пазарна конкуренција.Од компанијата нагласуваат дека во јавните настапи на СДСМ е премолчано дека значителен дел од договорите за јавни набавки биле склучени и реализирани токму во период кога СДСМ ја имала власта, а институциите биле раководени од нивни функционери. Според „Пирамид билдинг солушнс“, тие договори биле законски добиени, целосно реализирани и претставуваат доказ за континуираниот раст и развој на компанијата во изминатите години.Во прилог на своите тврдења, компанијата доставува детална табела со реализирани договори за јавни набавки по години и по договорни органи, вклучително и институции управувани од кадри на СДСМ, што, како што наведуваат, јасно ја потврдува транспарентноста и законитоста на нивното работење.Во однос на тврдењата за наводни поврзаности со политички структури и ангажмани на блиски лица до функционери, од „Пирамид билдинг солушнс“ наведуваат дека таквите обвинувања се неосновани, непроверени и во функција на дневнополитички пресметки, додавајќи дека доколку постојат конкретни докази, тие треба да бидат доставени до надлежните институции, а не да се пласираат во јавноста како инсинуации.Компанијата апелира бизнис-секторот да не биде вовлекуван во политички конфликти и предупредува дека ваквите неосновани напади нанесуваат директна штета не само на конкретни компании, туку и на целокупната деловна клима и економијата во државата.Од тие причини, „Пирамид билдинг солушнс“ бара јавно извинување во рок од 24 часа од објавувањето на демантот, во спротивно, како што најавуваат, ќе ги искористат сите расположливи правни механизми за заштита на својот углед, интегритет и деловна репутација.

Македонија | пред 2 седмици

САД го замрзнуваат издавањето имигрантски визи и за Македонија

САД привремено го запираат процесирањето на имигрантски визи за државјани од вкупно 75 земји, меѓу кои и Македонија, јавува „Фокс њуз“, повикувајќи се на интерен меморандум на американскиот Стејт департмент.Според документот, конзуларните службеници добиле насока да ги одбиваат апликациите за имигрантски визи согласно постојниот закон, додека трае преоценка на процедурите за проверка и селекција на апликантите. Паузата ќе започне на 21 јануари и ќе трае на неопределено време, сè додека американските власти не ја завршат ревизијата на целиот систем за издавање имигрантски визи.Како причина за мерката се наведува намерата да се спречи влез на лица за кои се проценува дека би можеле да станат товар за американскиот социјален систем, односно да зависат од државна помош. Во тој контекст, повторно ќе се применува т.н. одредба за „јавен товар“, која им овозможува на конзуларните службеници да одбијат виза врз основа на проценка дека апликантот веројатно ќе користи јавни средства.Проценката, според упатствата, ќе се врши врз широка лепеза критериуми, меѓу кои се возраста, здравствената состојба, финансиската стабилност, познавањето на англискиот јазик, како и можната потреба од долготрајна медицинска нега. Меѓу факторите што може да влијаат негативно се наведуваат и претходно користење на парична социјална помош или институционална грижа.Од Стејт департментот појаснуваат дека исклучоци од оваа мерка ќе има „во многу ограничени случаи“ и само откако апликантите ќе ја поминат проценката за ризик од станување јавен товар.За македонските граѓани ова значи дека апликациите за имигрантска виза кон САД ќе бидат ставени во мирување, без јасна временска рамка кога постапката би можела повторно да продолжи. Во листата на опфатени држави, покрај Македонија, се наоѓаат и земји од регионот и пошироко, како Косово, Црна Гора, Босна и Херцеговина, Србија, Албанија, но и Русија, Иран, Ирак, Египет, Нигерија и други.Американските медиуми потсетуваат дека одредбата за „јавен товар“ постои со децении, но нејзината примена варирала во зависност од администрацијата. Таа беше значително проширена во времето на Доналд Трамп, потоа делумно укината, а сега повторно се активира во построга форма, со што директно се засегаат и апликантите од Македонија кои планирале трајно иселување во САД.

Свет | пред 2 седмици

САД стопираат издавање визи за државјани од 75 земји

Администрацијата на американскиот претседател Доналд Трамп од 21 јануари ја запира обработката на визи за посетители од вкупно 75 земји, објави „Фокс њуз“, повикувајќи се на интерен допис на американскиот Стејт департмент.Според информациите, меѓу земјите за кои ќе се применува оваа мерка се Сомалија, Русија, Иран, Авганистан, Бразил, Нигерија и Тајланд. Со дописот, американските дипломатски претставништва добиле насока привремено да ги одбиваат апликациите за визи во согласност со постојните законски одредби, сè додека Стејт департментот не изврши анализа и ревизија на актуелните правила.Одлуката се вклопува во строгата имиграциска политика што Трамп ја спроведува од стапувањето на функцијата, со фокус на ограничување на влезот во САД од земји кои администрацијата ги оценува како безбедносен ризик.Во ноември минатата година, Трамп најави дека ќе се залага за „трајно запирање“ на миграциите од, како што ги нарече, земји од „третиот свет“, по инцидентот во кој авганистански државјанин отвори оган во близина на Белата куќа и усмрти припадник на Националната гарда.Истовремено, потсетува „Фокс њуз“, дел од авганистанските државјани кои аплицирале за азил во САД по 2021 година добиле специјални имигрантски визи, наменети за лица кои соработувале со американската армија за време на дваесетгодишната воена мисија во Авганистан.

Свет | пред 2 седмици

(Видео) Вучиќ со жестока реакција по инцидентот со Ана Бекута во Чачак: Таа не бегаше и не се скри од теророт

Српскиот претседател Александар Вучиќ со остра реторика реагираше по инцидентот во Чачак, каде што пејачката Ана Бекута беше гаѓана со снег за време на новогодишниот концерт, организиран на градскиот плоштад.Во објава на социјалните мрежи, Вучиќ жестоко ги осуди граѓаните кои, како што наведе, „од чиста мира“ нападнале жена која, според него, „на секој од нив може да му биде мајка, баба или сестра“. Тој употреби навредливи квалификации за учесниците во протестот, нагласувајќи дека нема право јавно да ги изговори сите зборови што, како што рече, „народот би ги употребил“.Претседателот посебно ја пофали Бекута за, како што оцени, нејзината храброст и одлуката да не го прекине настапот и да не се повлече од сцената.„Таа не сакаше да бега, не сакаше да се крие и не дозволи теророт и дивјаштвото да ја натераат да се повлече“, напиша Вучиќ.Инцидентот се случи во услови на сериозни временски непогоди во Србија, кога делови од земјата беа зафатени од обилни снежни врнежи, прекини во снабдувањето со електрична енергија и прогласена вонредна состојба во одредени општини. Дел од граѓаните изразија незадоволство што, во такви околности, од буџетот биле издвоени околу 40.000 евра за концертот на пејачката, што и беше повод за протестите за време на нејзиниот настап.

Свет | пред 2 седмици

Ние сме спремни да настапиме на избори, кога и да се случат, а ќе има предвремени, вели Филипче

Лидерот на СДСМ, Венко Филипче, изјави дека неговата партија нема намера да прави политички договори со власта, нагласувајќи дека единствениот договор што СДСМ го признава е оној со граѓаните. Изјавата ја даде на прес-конференција, одржана по лидерската средба на која СДСМ одлучи да не учествува.„СДСМ е спремна за избори, годинава, следната, па и во редовни избори. Јас сум сигурен, а со оглед на тоа што се случува, дека избори предвремени ќе има. Дали годинава, пролет, есен, на крајот од годината“, рече Филипче.Тој рече дека ВМРО-ДПМНЕ и ДУИ се во коалиција.„Ние договор можеме да правиме единствено со граѓаните. Наша обврска е да ја вратиме власта кај граѓаните. ВМРО-ДПМНЕ и ДУИ нека се договараат меѓу себе“, рече Филипче, образложувајќи ја одлуката на партијата да не биде дел од средбата свикана од премиерот.Тој изнесе серија обвинувања кон актуелната власт, наведувајќи дека наместо реформи се спроведуваат политики кои, според него, ја оддалечуваат државата од Европската Унија. Филипче посочи на, како што рече, сомнителни тендери, запирање на европската агенда и сè поизразено приближување кон Русија.„Еден закон беше донесен непосредно пред Нова година и тоа не може да се нарече реформска агенда“, оцени лидерот на СДСМ, додавајќи дека институциите се повторно целосно партизирани, на начин кој потсетува на периодот на владеењето на Никола Груевски.Според Филипче, се злоупотребува полицијата, а под сомнеж е и користењето на ИПАРД фондовите, што, како што истакна, претставува сериозен удар врз владеењето на правото и европските стандарди. Тој јасно порача дека СДСМ се спротивставува на укинувањето на таканаречената пржинска влада, оценувајќи дека во услови на нарушена демократија таа сè уште има своја улога.

Македонија | пред 2 седмици

Светот на работ на нова ескалација: САД размислуваат за удар врз Иран по масовните убиства на демонстранти

Светската јавност со големо внимание ја следи драматичната ескалација на состојбата во Иран и дилемата дали САД ќе се одлучат на воен одговор. Американскиот претседател Доналд Трамп јавно му се закани на иранскиот режим со воени удари доколку безбедносните сили продолжат со насилството врз демонстрантите, во услови кога протестите веќе однесоа, според различни извори, повеќе од две илјади човечки животи.Снимките што доаѓаат од Иран сведочат за размерите на кризата. Во Форензичкиот медицински центар Кахризак, јужно од Техеран, е формирана импровизирана мртовница, преполна со тела сместени во црни вреќи, додека очајни семејства се обидуваат да ги препознаат своите најблиски. Протестите траат од крајот на декември и се поттикнати од гневот поради колапсот на националната валута и драматичното влошување на животниот стандард.Во ваква атмосфера сè погласно се зборува за можен американски воен удар. Вашингтон одамна го смета Иран за еден од главните фактори на нестабилност на Блискиот Исток, а евентуална интервенција би претставувала најопасна ескалација на односите меѓу двете држави во последните години.Проценка изнесе и германскиот канцелар Фридрих Мерц, кој изјави дека иранскиот режим, соочен со сериозни внатрешни проблеми, можеби се наоѓа во своите „последни денови и недели“. Сепак, не сите аналитичари се уверени дека воената интервенција е најизвесното сценарио.Во меѓувреме, од Белата куќа протекуваат информации дека Трамп ги разгледува и иранските сигнали за можни преговори. Според изјава за „Аксиос“, американскиот претседател е наклонет кон опцијата за удари како казна за убиствата на демонстранти, но сè уште нема донесено конечна одлука. Доколку се одлучи за акција, таа најверојатно би била насочена кон структури на режимот поврзани со внатрешната безбедност, кои се сметаат за директно одговорни за репресијата.Американскиот амбасадор во Израел, Мајк Хакаби, изјави дека во моментов не постојат конкретни планови за воен напад, но истовремено нагласи дека таквата одлука може да се промени. Геополитичките експерти посочуваат дека САД располагаат со широк спектар алатки, од кибернапади и саботажи, до дронови и ракетни удари од воздух и море, како и можни напади врз нуклеарната и воената инфраструктура со цел да се намалат капацитетите на режимот и да се одврати од понатамошни дестабилизирачки дејства.Ковачевиќ дополнително истакнува дека ваков развој на настаните го посакува и значаен дел од поддржувачите на Трамп, кои веруваат дека уривањето на иранската власт би ја елиминирало заканата за Израел и би придонело за заштита на христијаните од, како што сметаат, верски непријателски режими. Во случај на промена на власта, се споменува и можноста за враќање на династијата Пахлави, иако таквото сценарио засега останува неизвесно.

Свет | пред 2 седмици

(Видео) Ана Бекута протерана од сцена со сила: пееше од комбе за да наплати 40 илјади евра од Чачак, иако публиката бараше да прекине со настап

Синоќа на градскиот плоштад во Чачак настапи српската пејачка Ана Бекута, но концертот наместо празнична атмосфера предизвика револт и незадоволство кај дел од граѓаните. Причината беше сумата од 4,5 милиони динари, односно околу 40 илјади евра, издвоена од градскиот буџет за нејзиниот настап, во време кога голем дел од Србија се соочува со сериозни проблеми поради обилните снежни врнежи и прекини во снабдувањето со електрична енергија.Активистката од Чачак, Славица Петровска, јавно објави дека токму толкава сума била потрошена за едновечерниот концерт, по што информацијата брзо се прошири меѓу граѓаните. Дел од нив излегоа на плоштадот за време на настапот, не за да слават, туку за да изразат протест против, како што оценуваат, неодговорното трошење на јавните пари.На видеата објавени на социјалните мрежи се гледа како пејачката за време на целиот настап се соочува со свирежи од публиката. Во еден момент, таа изјави дека вакво нешто не доживеала во текот на својата 40-годишна кариера. Иако немало физичка закана, освен свирежи и неколку фрлени снежни грутки, Бекута побарала интервенција од полицијата.На крајот, пејачката го прекинала настапот на сцената и продолжила да пее од комбе, но и тоа не го смирило револтот. Граѓаните и понатаму ја опкружувале, изразувајќи незадоволство со свирежи.Реакциите доаѓаат само неколку дена откако Чачак беше зафатен од ледена дожд и снег, поради што градот беше практично парализиран, а надлежните служби, според сведоштвата на граѓаните, со часови не реагирале. Во соседните Лучани беше прогласена вонредна состојба, а околу 4.000 жители останаа без струја поради дефекти предизвикани од силниот ветер и снегот. Во таков контекст, одлуката на локалната власт да инвестира значителни средства во прослава на Српската Нова година предизвика дополнителен гнев, со пораки дека забавата не може да биде приоритет додека граѓаните се соочуваат со основни егзистенцијални проблеми.

Свет | пред 2 седмици

Судот одлучи: Поранешниот државен правобранител Стафа и натаму останува во притвор

Притворот за поранешниот државен правобранител Фехми Стафа е продолжен за дополнителни 30 дена, по одлука на надлежниот суд, на предлог на Основното јавно обвинителство за гонење организиран криминал и корупција.Стафа е осомничен за кривичното дело примање награда за противзаконито влијание и против него се води истрага поради сомнежи дека посредувал со цел да влијае врз судска одлука. Според обвинителството, во периодот од октомври до декември 2025 година, тој побарал 100.000 евра, а примил вкупно 50.000 евра, за да изврши влијание врз судија од Апелациониот суд Скопје со цел да биде укинат притворот на лице кое во тој момент било во бегство.Првата транша од 30.000 евра, како што наведуваат истражните органи, била предадена во октомври од сестрата на лицето кое се наоѓало во бегство. При примањето на преостанатите 20.000 евра, на 13 декември, Стафа бил фатен и лишен од слобода во рамки на полициска акција, при што кај него биле пронајдени парите.Судот ја продолжи мерката притвор оценувајќи дека и натаму постои опасност од бегство, можност за влијание врз сведоци и постапката, како и ризик од повторување на кривичното дело. Истрагата на Обвинителството за гонење организиран криминал и корупција продолжува.

Македонија | пред 2 седмици

Студен бран и снег за викендот: Значителен пад на температурите низ Македонија

Постепена промена на временските услови повторно се очекува за време на претстојниот викенд, во сабота и недела, 17 и 18 јануари 2026 година, информира „Метео аларм“. Територијата на Македонија повторно ќе се најде под влијание на значително постуден и влажен воздушен бран кој ќе продира од исток и североисток.Во такви услови, температурите ќе забележат поизразен пад, а особено во недела, на 18 јануари, кога повремено ќе дува умерен до засилен ветер од северен правец. Најсилни удари на ветерот се очекуваат долж Повардарието.Истовремено, облачноста ќе се зголеми, а на повеќе места ќе има повремени локални врнежи. Во пониските предели и во градовите се очекуваат врнежи од дожд и снег, додека во повисоките населени места и на планините врнежите ќе бидат исклучиво од снег. Таму се очекува формирање на нова снежна покривка, како и зголемување на веќе постојната.Во Скопје и околината, во истиот период, ќе има повремени и локални слаби врнежи од дожд и снег. Во недела, 18 јануари, и во главниот град повремено ќе дува умерен до засилен северен ветер.Утринските температури за време на викендот ќе бидат значително пониски, особено во недела, кога ќе се движат во интервал од -6 до 4 степени. Ниските температури ќе продолжат и во текот на денот, со максимални вредности од -2 до 6 степени Целзиусови.

Македонија | пред 2 седмици