САД го предупредија Иран да не користи странски милиции против демонстрантите

Соединетите Американски Држави јавно го предупредија Иран да не користи странски вооружени групи за насилно задушување на антивладините протести што во изминатите денови ја зафатија земјата. Од Вашингтон изразија сериозна загриженост поради информации дека иранските власти ангажираат припадници на Хезболах и ирачки милиции за справување со мирните демонстранти.Преку иранската верзија на официјалниот профил на американскиот Стејт департмент на социјалната мрежа Икс, беше соопштено дека постојат извештаи за вмешаност на странски вооружени формации во сузбивањето на протестите. Во објавата се наведува дека ваквите постапки претставуваат сериозна ескалација и дополнително загрозување на основните човекови права.Американската администрација посочува дека иранските власти со години трошеле милијарди долари од државниот буџет, односно од средствата на сопствените граѓани, за поддршка на, како што ги нарекуваат, терористички структури надвор од земјата. Според Вашингтон, нивна можна употреба против сопственото население би претставувала уште едно тешко предавство на иранскиот народ.Од Стејт департментот потенцираат дека мирните протести се легитимен израз на незадоволство и дека секој обид за нивно задушување со помош на странски вооружени групи ќе биде внимателно следен од меѓународната заедница. Засега, иранските власти официјално не ги коментираа овие наводи.

Свет | пред 2 седмици

Жител на Техеран за Си-Ен-Ен: „Ова повеќе не може да се запре“

Антивладините протести во Иран, поттикнати од високата инфлација и драматичниот раст на трошоците за живот, во изминатите две недели се проширија низ целата земја и претставуваат најсериозниот предизвик за властите во последните неколку години, објави Си-Ен-Ен. Според сведочење на жител на Техеран, протестното движење добило динамика што, како што вели, повеќе не може да се запре.Соговорникот на Си-Ен-Ен, 47-годишен маж кој од безбедносни причини инсистирал на анонимност, раскажува дека во поголемите ирански градови граѓаните чекаат да се стемни за да излезат на улиците. Собирањата, според него, најчесто се интензивираат по 19 часот, кога протестите добиваат масовен карактер.Тој опишува сцени во кои, во текот на ноќта, улиците се исполнуваат со луѓе и возила, а демонстрантите се движат низ градот без однапред утврдена рута или конкретна дестинација. Чувството што доминира, вели, е чувство на „неизбежен замав“, додека протестите се шират и стануваат сè посилни.„Луѓе од сите возрасти – мажи, жени и деца – учествуваат, викаат од прозорците и масовно се собираат“, изјави жителот на Техеран за Си-Ен-Ен, додавајќи дека стравот постепено го заменува решителноста.Иако протестите првично започнале како реакција на неконтролираната инфлација, политичката нестабилност, според неговите зборови, дополнително ја влошила економската состојба. Цените на основните прехранбени производи продолжуваат да растат, а намирници како јајца и млеко станале „значително поскапи“, што уште повеќе го зголемува незадоволството кај граѓаните.И покрај строгите ограничувања на комуникациите, вклучително и блокадите на интернетот, како и сè потешките економски услови, тој нагласува дека граѓаните остануваат „одлучни, организирани и отпорни“. Според него, меѓу демонстрантите преовладува силно убедување дека сегашната власт претставува ќор-сокак и дека за голем дел од општеството веќе не постои враќање назад.

Свет | пред 2 седмици

Гнев во кантонот Вале по пожарот со 40 загинати млади: „Сериозни институционални пропусти“

Челникот на швајцарскиот кантон Вале, во кој за време на новогодишната ноќ во пожар во бар загинаа 40 млади лица, јавно изрази гнев поради сериозните пропусти на локалните власти, кои, како што е утврдено, не го извршиле потребниот инспекциски надзор на објектот цели шест години. Во исто време, обвинителството ги интензивира напорите за утврдување кривична одговорност за трагедијата што ја потресе Швајцарија.Градоначалникот на скијачкото одморалиште Кран-Монтана оваа недела соопшти дека барот „Ле Констелацион“ не бил инспектиран од 2019 година. Оваа информација предизвика силни реакции во јавноста, а претседателот на кантоналната влада, Матијас Рејнар, во интервју за швајцарскиот весник „Ле Темпс“ отворено призна дека е револтиран од, како што ги нарече, сериозните институционални пропусти.„Бев лут“, изјави Рејнар, нагласувајќи дека е сосема природно да се почувствува гнев во вакви околности, но дека истовремено мора да ѝ се дозволи на правдата да го направи своето. Тој посочи дека одговорноста не смее да се сведе само на сопствениците на објектот, туку дека ќе мора да се испита и улогата на надлежните институции.Дополнителни контроверзии се појавија откако шефот на службата за безбедност во кантонот Вале соопшти дека изолациската пена во подрумот на барот, каде што избувнал пожарот за време на новогодишната прослава, требало редовно да биде предмет на законски пропишани контроли.Во рамки на истрагата, обвинителството во петокот одреди притвор за Жак Морети, еден од двајцата француски сопственици на барот. Судот во наредните денови треба да одлучи дали притворот ќе биде продолжен и дали ќе следува формално приведување. Против сопствениците се води истрага поради сомнеж за тешки кривични дела, вклучително и убиство од небрежност. Семејствата на жртвите веќе поднесоа повеќе тужби поврзани со трагедијата.Партнерката на Жак Морети, Џесика Морети, јавно им се извини на семејствата на загинатите, наведувајќи дека и двајцата се скршени од болка поради трагичниот настан. Сепак, во швајцарската јавност сè погласни се повиците за целосна и неселективна одговорност, при што дел од јавноста ја доведува во прашање и одлуката сопствениците толку долго да останат на слобода.„Одговорните ќе мора да одговараат, вклучително и надлежните власти“, порача Рејнар, додавајќи дека трагедијата не смее да заврши без целосно расветлување и санкционирање на сите пропусти кои довеле до смртта на младите луѓе.

Свет | пред 2 седмици

(Видео) Медведев преку видео со закани кон Европа: „Сакате војна – ќе ја добиете“

Поранешниот руски претседател и премиер, а актуелен заменик-претседател на Советот за безбедност на Русија, Дмитриј Медведев, преку објава на социјалната мрежа Икс упати остри и заканувачки пораки кон европските политички лидери, обвинувајќи ги дека, како што тврди, свесно ја туркаат Европа кон војна преку зголемена поддршка за Украина.Во провокативниот статус, Медведев додаде дека Русија ќе им го покаже на европсите лидери „токму тоа што ќе го добијат“. Објавата беше проследена со видео од балистичката ракета со среден дострел „Орешник“, која Москва ја претставува како хиперсонично оружје способно за екстремно високи брзини и маневрирање во завршната фаза од летот.Изјавата на Медведев доаѓа откако Русија по вторпат употреби ракета од типот „Орешник“ врз територијата на Украина, при што цел беше западниот украински град Лвив, кој се наоѓа на околу 60 километри од границата со Полска, земја-членка на НАТО. Овој напад дополнително ги засили загриженоста и тензиите меѓу Москва и западните сојузници.Во објавата, Медведев директно го нападна и францускиот претседател Емануел Макрон, кого подбивно го нарече „Микрон“, обвинувајќи го дека упорно ја турка Европа кон директен судир со Русија. Тој повтори дека Москва, како што рече, „илјада пати јасно ставила до знаење дека нема да прифати европски или сили на НАТО на украинска територија“, но дека западните лидери, според него, продолжуваат со истата реторика и политики.Ова не е првпат Медведев да упатува вакви закани. Од почетокот на војната во Украина, тој во повеќе наврати предупредуваше на можноста од директен воен судир меѓу Русија и НАТО, доколку Западот, како што оценува Москва, премине од политичка и воена поддршка кон директно учество во воените операции. Во неколку наврати, Медведев користеше и радикална реторика, алудирајќи дека таквиот развој на настаните би можел да се третира како објава на војна против Русија.Изјавите на поранешниот руски претседател доаѓаат во момент на растечки меѓународни тензии, особено по неодамнешните ноќни напади врз Украина во кои беше употребен и проектилот „Орешник“. Москва тврдеше дека станува збор за одмазда за наводен напад врз една од резиденциите на претседателот Владимир Путин, тврдење што беше демантирано и од Киев и од западните сојузници, вклучително и Соединетите Американски Држави.

Свет | пред 2 седмици

ЦУК: Одрони, излевања и поплавени површини по обилните врнежи, состојбата под контрола

Центарот за управување со кризи информира дека до 12:30 часот, по обилните врнежи од дожд во изминатиот период, на територијата на државата состојбата е под контрола, иако во одделни региони се регистрирани проблеми со одрони, излевања на реки и поплавени земјоделски површини.Во Штипскиот регион, како последица на претходните врнежи, забележани се зачестени одрони од камења и појава на свлечишта на коловозите, поради што се апелира на внимателно движење. Во Скопскиот регион, според информациите на ЦУК, нема нарушување на редовната состојба поврзана со обилните врнежи од дожд.Во Охридскиот регион, до 12:30 часот нема пријави за поплавени објекти, а врнежите моментално се прекинати. Надлежните служби од Кризниот штаб Охрид извршија теренска проверка на критичните точки на реката Далјан кај селата Орман и Дебелополе. Регистрирано е излевање на реката Сушица во делот кај улицата „Прилепска“, по што е испратена механизација од ЈП „Нискоградба“ за спречување на понатамошно излевање. Надлежните предупредуваат дека доколку врнежите продолжат, постои опасност од излевање на реката Далјан кај селото Косел и селото Вапила.Во Струга е пријавено поплавување на дворови во четвртиот реон кај Мислешевски пат, предизвикано од надојдени води од Струшкото Поле. За состојбата се известени надлежните служби, а екипи на Територијалната противпожарна единица Струга интервенираат на терен со пумпи за испумпување на водата. На патниот правец Дебар – Струга има појава на одрони, при што екипи на „Македонијапат“ се ангажирани за одржување и расчистување на коловозот.Во Велешкиот регион нема нарушување на редовната состојба поврзана со врнежите од дожд и снег. Во Битолскиот регион градското подрачје е нормализирано, но во селото Кравари има заезерени земјоделски површини од 10 до 20 хектари, без опасност по куќите и индустриските објекти. Во селата Жабени и Породин поплавени се околу 70 до 80 хектари земјоделско земјиште, додека излевањето на Елешка Река предизвикало поплавување на околу 50 хектари обработливи површини, при што водата постепено се повлекува во коритото.Патот кон Буковскиот манастир е сериозно оштетен од поројните врнежи, а ЈП „Нискоградба“ интервенира со градежна механизација. Свлечиште е евидентирано и на патниот правец од селото Буково кон селото Горно Ореово. Поради оштетување на мостот на Боишка Река, локалниот пат кон селото Мренога е затворен за сообраќај. Како последица на поројните дождови, водата за пиење е заматена и се препорачува превривање од најмалку десет минути.Нивото на реката Црна кај селото Бучин е покачено, но стабилно и без опасност од излевање, при што насипите на критичните точки се дополнително зајакнати. Во текот на наредната недела, општинските власти во Крушево ќе формираат комисија за пријавување и проценка на штетите од поројните врнежи. Во општина Долнени е пријавена штета кај еден жител од селото Лажани, каде биле поплавени дворот и приземните простории, а оштетен е и тутунот. Поплавувања се регистрирани и во селото Пешталево, при што причината се неисчистени канали, а на двете локации интервенираше градежна механизација.Во Ресенскиот регион поплавени се земјоделско земјиште, дворови, куќи, помошни објекти и магацини за складирање јаболка. Нивото на Голема Река е зголемено од вчерашните 1,40 метри на 1,65 метри. Сите расположливи градежни машини и пумпи од јавните претпријатија и локалната самоуправа се ангажирани за испумпување на водата и стабилизирање на состојбата.Во Струмичкиот регион засега нема пријави за направени штети, врнежите се со послаб интензитет и не постои опасност од излевање на реките. Исто така, нема пријави за одрони или непроодни патишта. Во Кумановскиот регион, како и во општините Липково, Ранковце, Старо Нагоричане, Крива Паланка и Кратово, состојбата е стабилна, без излевање на реките, а сите патни правци се проодни по влажни коловози.Во Тетовско-гостиварскиот регион до 12 часот нема пријави за штети предизвикани од врнежите, а надлежните служби и понатаму ја следат состојбата на терен.

Македонија | пред 2 седмици

Граѓаните излегуваат на протести во Струмица поради загадениот воздух

Граѓанската иницијатива „Здрава котлина“ најави протест против аерозагадувањето, кој ќе се одржи на 24 јануари 2026 година, со почеток во 12 часот, на раскрсницата пред Трговскиот центар „Глобал“ во Струмица. Организаторите повикуваат на масовно излегување на улица, оценувајќи дека состојбата со квалитетот на воздухот, особено во јужниот дел на градот, е алармантна и директно го загрозува здравјето на граѓаните.Во јавниот повик, иницијативата наведува дека и покрај честите промени на власти и функционери, проблемот со загадениот воздух останува нерешен со години. Според нив, ветувањата за чист воздух, стратегии и акциски планови останале само на хартија, додека граѓаните секојдневно се изложени на штетни концентрации на ПМ честички.„Здрава котлина“ предупредува дека според актуелните мерења, изложеноста на ПМ честичките во одредени делови од градот е еквивалентна на пушење околу седум цигари дневно. Од иницијативата посочуваат дека ова не е индивидуален проблем, туку сериозна закана за јавното здравје, која подеднакво ги погодува децата, бебињата, бремените жени, старите лица и луѓето со хронични, срцеви и респираторни заболувања.Организаторите потенцираат дека аерозагадувањето не е сезонски проблем поврзан само со зимскиот период, туку трае во текот на целата година и, како што наведуваат, е последица на дозволена и толерирана практика, институционална негрижа и недоволна контрола на загадувачите. Според нив, инспекциските надзори најчесто постојат само формално, додека реалните загадувачи остануваат неказнети.„Ова не е прашање на политика, туку прашање на право на живот“, наведуваат од „Здрава котлина“, додавајќи дека протестот има за цел да испрати јасна порака до институциите дека граѓаните повеќе нема да молчат.На протестот се повикуваат да учествуваат сите категории граѓани – родители, млади, пензионери, работници и студенти – со цел заеднички и јавно да се побара крај на аерозагадувањето, санкционирање на загадувачите и вистинска институционална одговорност.Иницијативата порачува дека масовното присуство е неопходно за да се изврши притисок врз надлежните и да се стави крај на, како што ја нарекуваат, „воздушната апокалипса“, нагласувајќи дека станува збор за борба за здравјето, иднината и животот на сегашните и идните генерации.

Македонија | пред 2 седмици

18-годишник ја усмртил жената во Капиштец, па веднаш со татко му избегал од државата: автомобилот најден пред нивната куќа

СВР Скопје поднесе кривична пријава против четири лица во врска со тешката сообраќајна несреќа што се случи вчера околу 11:30 часот на улицата „Народен фронт“ во центарот на Скопје, во која животот го загуби 79-годишна жена.Според информациите од Министерството за внатрешни работи, патничко возило „фолксваген пасат“ со скопски регистарски ознаки, управувано од С.С. (18) од Скопје, удрило во пешакот Љ.Ј. (79), која од здобиените повреди починала во Ургентниот центар. По несреќата, возачот го напуштил местото на настанот без да ѝ укаже помош на повредената жена.По пријавата за несреќата, полициските службеници веднаш презеле интензивни мерки за пронаоѓање на возачот и возилото. Преку системот „Безбеден град“, камерите од околните објекти и изјави од сведоци, било утврдено дека станува збор за возило сопственост на Б.С. (45) од Скопје, управувано од неговиот син С.С. (18).Возилото било пронајдено пред домот на сопственикот, каде бил затекнат С.С. (69), кој бил приведен и со него бил извршен службен разговор. Дополнително било утврдено дека возачот С.С. (18) и неговиот татко Б.С. (45), со помош на Ш.П. (45) и А.Ј. (53) од Скопје, ја напуштиле државата во текот на истиот ден.Лицата Ш.П. и А.Ј. се лишени од слобода и против нив е поднесена кривична пријава за кривично дело „помагање на сторител по извршено кривично дело“, додека против 18-годишниот возач е поднесена кривична пријава за „тешки дела против безбедноста на луѓето и имотот во сообраќајот“, како и за „неукажување помош на лице повредено во сообраќајна незгода“.По возачот и неговиот татко е распишана потерница, а во рамки на истрагата се пронајдени и одземени двете возила – „фолксваген пасат“, со кое била удрена жената, и „мерцедес“, со кое осомничените ја напуштиле државата. За целиот случај е известен јавен обвинител, а истрагата продолжува.Трагедијата предизвика силни реакции во јавноста, особено поради фактот што сторителот го напуштил местото на несреќата и, со помош на други лица, се обидел да избегне одговорност за загубениот човечки живот.

Скопје | пред 2 седмици

Вештачката интелигенција создава „совршени“ лица – но постои едноставен начин како да ги препознаеме

Генераторите на слики базирани на вештачка интелигенција стануваат сè поумешни во создавање човечки лица кои често изгледаат пореално од вистинските. Сепак, ново истражување покажува дека постои релативно едноставен начин луѓето значително да ја подобрат способноста за препознавање на ваквите лажни лица, објави Science Alert.Истражувачи од Обединетото Кралство ја тестирале перцепцијата на 664 волонтери, поделени во две групи. Првата група била составена од таканаречени „супер-препознавачи“ – лица кои во претходни тестови покажале исклучителна способност за препознавање и паметење човечки лица. Втората група била составена од лица со просечни способности.Резултатите покажале дека и двете групи имале сериозни тешкотии во разликување на вистински лица од оние создадени со вештачка интелигенција, иако супер-препознавачите биле нешто поуспешни.Во рамки на истражувањето, учесниците извршувале два различни теста. Во првиот, им било прикажувано по едно лице, при што требало да одлучат дали станува збор за вистинска фотографија или за слика генерирана од вештачка интелигенција. Во вториот тест, истовремено им биле прикажувани едно вистинско и едно вештачко лице, со задача да го идентификуваат лажното.Кај учесниците кои не поминале обука, супер-препознавачите точно ги идентификувале лажните лица во 41 отсто од случаите, додека кај лицата со просечни способности точноста изнесувала само 31 отсто. Со оглед дека половина од прикажаните фотографии биле лажни, ова укажува дека вештачки генерираните лица се толку убедливи што дури и случајното погодување би било поуспешно.Клучниот пресврт се случил по кратка, петминутна обука. По неа, лицата со просечни способности ја зголемиле точноста на 51 отсто – приближно на нивото на случајна проценка. Сепак, кај супер-препознавачите резултатите биле значително подобри: тие успеале да ги препознаат лажните лица во дури 64 отсто од случаите.Во текот на обуката, учесниците биле насочени да внимаваат на суптилни визуелни детали кои можат да ја оддадат вештачката интелигенција, како недостасувачки или нејасно прикажани заби, неприродно заматување околу косата или кожата, како и невообичаени текстури на лицето.„Сликите генерирани од вештачка интелигенција стануваат сè полесни за изработка, а сè потешки за откривање“, изјави психологињата Ејлид Нојс од Универзитетот во Лидс. Таа предупреди дека ваквите технологии можат да се злоупотребат за измами, кражба на идентитет и лажни профили на социјалните мрежи.Технологијата зад овие слики се нарекува генеративна спротивставена мрежа (GAN), систем во кој два алгоритми работат заедно – едниот создава слики, а другиот ја оценува нивната реалистичност. Со текот на времето, ваквите системи стануваат сè подобри, што ги прави сериозна безбедносна закана во дигиталниот простор.„Нашиот метод за обука е краток и лесно применлив“, изјави Кејти Греј, истражувачка од Универзитетот во Рединг. „Комбинирањето на ваква обука со природните способности на супер-препознавачите може да биде од голема корист за реални ситуации, како проверка на идентитет на интернет.“Истражувањето е објавено во научното списание Royal Society Open Science.

Магазин | пред 2 седмици

„Чекаше да ми завршат сите поголеми овоземски обврски па да замине“, почина мајката на Перо Камиказа

Музичарот и актер Петар Георгиевски – Камиказа утринава објави тажна вест, дека починала неговата мајка.Музичарот во емотивна објава на својот профил на Фејсбук се збогуваше со својата мајка.„Сабајлево во 6 и 15 престана да чука срцето на мајка ми. Мислам дека оваа слика е најсоодветна за нашата шест и пол децениска љубов. Од раѓaњeто до денес, беше мојата најголема поткрепа во сѐ… До последно чекаше да ми завршат сите поголеми овоземски обврски па да замине. Почивај во мир мој ангелу. Конечно со тато и дада ќе си кажувате разни догодовштини. Ги истажи и исплача и двајцата до последниот здив. Таму меѓу ангелите нека ти е светол патот мамичке. Во текот на денот ќе објавиме точно време кога ќе биде испратена во вечниот дом во Бутел“, напиша Камиказа.

Македонија | пред 2 седмици

Овие хороскопски знаци панично се плашат од промени

Хороскопските препораки и совети не треба да се сфаќаат премногу сериозноДодека едни сонуваат за авантури и постојано бараат возбуда, други среќата ја наоѓаат во познатото и предвидливото. Астрологијата открива дека склоноста кон рутина не е само прашање на навика, туку длабоко вкоренета карактерна особина кај одредени хороскопски знаци. За нив, промената не е можност, туку закана што го нарушува внимателно изграденото чувство на сигурност.БикБикот е владетел на комфорот и материјалната стабилност. Овој земјен знак ја цени сигурноста над сè, па секоја промена што ја нарушува неговата рутина ја доживува како потрес. Неговото мото е „ако не е расипано, не го поправај“, а животот го гради бавно и трпеливо, чекор по чекор.Без разлика дали станува збор за промена на работа, преселба или дури и пробување нов ресторан, Бикот најпрво ќе пружи отпор. Му треба време за да се прилагоди, бидејќи најсигурно се чувствува на познат терен, опкружен со луѓе и работи на кои е навикнат.РакЕмотивниот Рак ја пронаоѓа сигурноста во домот, семејството и тесниот круг пријатели. Неговиот „оклоп“ го штити од надворешниот свет, а секоја непозната ситуација ја доживува како закана за емоционалната стабилност. Промените го плашат затоа што носат неизвесност и можност за повреда.Раковите се носталгичари кои силно се држат до минатото и спомените. Напуштањето на зоната на комфор за нив значи напуштање на безбедното засолниште. Најсреќни се кога ги следат воспоставените семејни ритуали и традиции, бидејќи тие им носат мир и чувство на припадност.ДевицаЗа аналитичната Девица, животот е систем што мора да функционира совршено. Таа е мајстор за планирање, организација и детали. Ненадејните промени внесуваат хаос во нејзиниот уреден свет и предизвикуваат анксиозност, бидејќи го губи чувството на контрола.Девицата се спротивставува на промените од страв од непознат исход и можни грешки. Попрво ќе се држи до проверени методи и рутини што гарантираат успех, отколку да ризикува со нешто ново и неизвесно.ЈарецАмбициозниот Јарец е архитект на сопствениот живот. Кариерата и иднината ги гради трпеливо, следејќи јасен долгорочен план. Секое отстапување од тој пат за него е губење време и енергија. Тој ја цени традицијата, дисциплината и проверените структури.Јарците не сакаат изненадувања. Промени што не ги испланирале самите ги доживуваат како пречка на патот до целта. Спонтаноста и непредвидливоста ги прават нервозни, а сигурноста ја наоѓаат во работа и јасни правила.ВагаИако Вагата е воздушен знак, отворен за идеи и дружење, таа панично избегнува сè што може да ја наруши хармонијата. Промените често носат конфликти и тешки одлуки – нешто што за Вагата претставува вистинска ноќна мора.Нејзиниот отпор кон промените произлегува од стравот дека ќе ги наруши односите и внатрешниот мир.

Магазин | пред 2 седмици

(Видео) „Ова е година на крв“: Нови снимки сведочат за ширење на протестите низ Техеран

Нови видеоснимки до кои дојде медиумот Iran International покажуваат дека синоќа протестите во Иран се прошириле на повеќе делови од главниот град Техеран, со сѐ поостри пораки против врвот на власта и отворени повици за промена на режимот.На плоштадот Херави во Техеран се слушале повици „Да живее кралот“, додека на булеварот Кешаварз демонстрантите скандирале „Ова е година на крв, Сејед Али ќе биде соборен“, директно алудирајќи на врховниот верски водач Али Хамнеи. Во одделни снимки од техеранската населба Долат, граѓани излегуваат на улиците и извикуваат „Слобода“, што укажува на широка поддршка за протестното движење и надвор од централните делови на градот.Во меѓувреме, поради влошената безбедносна состојба и немирите што зафатија голем дел од земјата, Министерството за надворешни работи на Пакистан упати повик до своите државјани да ги избегнуваат сите патувања во Иран што не се неопходни. Во соопштението објавено во саботата се наведува дека условите за безбедно патување се сериозно нарушени и дека препораката ќе важи сѐ додека состојбата не се стабилизира.На пакистанските државјани кои веќе се наоѓаат во Иран им се советува зголемена претпазливост, ограничување на движењето само на неопходното и постојан контакт со дипломатските претставништва на Пакистан.Дополнителна загриженост предизвика и објавата на новинарот на BBC, Шајан Сардаризадех, кој сподели снимка од градот Фардис. На видеото се слушаат истрели за време на протестите, додека демонстрантите панично се повлекуваат, обидувајќи се да се засолнат и да ја сочуваат сопствената безбедност.

Свет | пред 2 седмици

„Телеграф“: На Трамп му е доста од Путин

Американскиот претседател Доналд Трамп станува сѐ пофрустриран од рускиот претседател Владимир Путин и сѐ почесто го смета за поголема пречка за постигнување мир во Украина отколку украинскиот претседател Володимир Зеленски, тврдат извори блиски до американската администрација, пренесува британскиот весник The Telegraph.Според истите извори, неодамнешните потези на Трамп – заплената на руски танкер под санкции и давањето зелено светло за нов пакет санкции против Русија – биле јасна порака до Кремљ дека времето за одолговлекување истекува.„Тој функционира по принципот морков и стап. А очигледно со морковите е завршено“, изјавил извор од најтесниот круг на Трамп, додавајќи дека руската преговарачка тактика „два чекора напред, еден назад“ станала заморна за Белата куќа.Иако во минатото Трамп знаеше да упатува позитивни зборови за Путин, па дури и дел од вината за војната да ја насочи кон Украина, повеќе сегашни и поранешни американски функционери за „Телеграф“ велат дека размислувањето на администрацијата сè повеќе се доближува до европскиот став – дека Москва купува време без вистинска намера за компромис.Во средата, американски специјални сили, и покрај ризикот од директен судир со Москва, извршиле операција врз руски танкер под санкции. Неколку часа подоцна, Белата куќа потврди дека Трамп, по средбата со сенаторот Линдзи Греам, дал поддршка за законски предлог со кој на претседателот би му се дале исклучително широки овластувања за економска изолација на Русија, вклучително и воведување царини до 500 проценти за земји што купуваат руска нафта, деривати или ураниум.Поранешен висок американски функционер оценил дека најголемата фрустрација во администрацијата доаѓа од однесувањето на Русија на преговарачката маса, додека, според истиот извор, Украина покажала поголема подготвеност за компромис. Оваа промена во перцепцијата дополнително се зацврстила по серијата руски напади што следеле по, како што се опишуваат, „топли разговори“ меѓу Трамп и Путин, нешто што одамна ги загрижувало европските сојузници на Киев.Еден британски функционер за „Телеграф“ изјавил дека континуираната бруталност и политичко маневрирање на Кремљ не поминале незабележано во Вашингтон. Во тој контекст, британскиот заменик-премиер Дејвид Лами се сретнал во Белата куќа со американскиот потпретседател Џеј Ди Венс, при што се разговарало за можни безбедносни гаранции за Украина. Речиси истовремено, Москва предупреди дека секое распоредување западни сили во Украина ќе го смета за легитимна цел, по што следеше лансирање балистичка ракета кон Лавов, град на само четириесетина километри од границата со Полска, членка на НАТО.Трамп неодамна и јавно го изрази своето незадоволство од Путин, изјавувајќи дека „не е воодушевен од него бидејќи убива премногу луѓе“, а отфрли и руски тврдења за наводен украински дронски напад врз една од резиденциите на Путин. Сепак, „Телеграф“ потсетува дека и во минатото заострувањата на односите со Москва често завршувале со попуштање на притисокот.Поранешен член на Советот за национална безбедност од првиот мандат на Трамп оценува дека станува збор повеќе за оперативна, отколку за стратешка промена и дека клучната цел на американскиот претседател – брзо завршување на војната во Украина – останува иста. Тоа го потврди и Белата куќа, порачувајќи дека Трамп е фокусиран на ставање крај на конфликтот и на, како што наведуваат, „бесмисленото убивање“.

Свет | пред 2 седмици

Се собрале четири кавадарчани за да крадат ламинат од магацин, ама ги уапсија

Полициски службеници од Одделението за внатрешни работи Кавадарци, на 9 јануари 2026 година, во периодот од 16:00 до 19:35 часот, лишиле од слобода четири лица од Кавадарци, осомничени за сторено кривично дело кражба. Станува збор за Е.О. (32), И.С. (28), К.Ј. (26) и Ѓ.К. (26), кои, според полициските информации, одзеле ламинат од магацински простор во сопственост на правно лице од градот.Дел од одземениот материјал бил пронајден и вратен на сопственикот. По приведувањето, осомничените биле задржани во полициска станица, а за настанот бил известен надлежен јавен обвинител. По целосно документирање на случајот, против нив ќе биде поднесена соодветна кривична пријава, соопшти Министерството за внатрешни работи.

Македонија | пред 2 седмици

(Видео) Активистика објави снимка: Гори една од најголемите џамии во Иран

На социјалните мрежи се прошири видео-снимка на која се гледа оган и густ чад во близина на верски објект, а која ја објави иранската активистка и новинарка Масих Алинеџад на платформата Икс. Во објавата таа тврди дека за време на актуелните протести во Иран горела „една од најголемите џамии во земјата“, објавувајќи ја снимката со силна политичка порака насочена против исламскиот режим.Во нејзината објава се наведува дека настанот не треба да се гледа како хаос, туку како израз на децениски гнев, тврдејќи дека по речиси пет децении репресија, протестите се директен одраз на насобраното незадоволство кај граѓаните. Пораката предизвика бројни реакции и коментари, а видеото за кратко време беше споделено илјадници пати и на други платформи.Сепак, во моментов не постои независна потврда за точната локација, времето и околностите под кои е направена снимката. На видеото не се забележуваат јасни ориентири, натписи или други визуелни елементи што би овозможиле сигурна геолокациска проверка или идентификација на објектот. Поради тоа, не може со сигурност да се утврди дали навистина станува збор за џамија, ниту дали снимката е поврзана со актуелните протести.Иранските власти досега не се огласија со официјален став во врска со видеото, а ниту релевантни меѓународни медиуми не објавија потврда дека за време на сегашните немири дошло до пожар во некој од поголемите верски објекти во земјата. Дел од корисниците на социјалните мрежи во коментарите тврдат дека станува збор за голема џамија во Техеран, но овие наводи засега не се поткрепени со проверливи извори.Единствено што може со сигурност да се потврди во овој момент е дека снимката ја објави Масих Алинеџад, која со години е една од најгласните критичарки на иранскиот режим, и дека истата е придружена со политичка интерпретација на случувањата во земјата. Надлежните институции и медиумите сè уште не излегоа со официјални информации што би ги потврдиле или демантирале тврдењата, поради што повиците се информациите од социјалните мрежи да се примаат со зголемена претпазливост.

Свет | пред 2 седмици

Научен пресврт: Откриен механизам што може да го врати мозокот и кај напреднат Алцхајмер

Повеќе од сто години во медицината преовладуваше уверувањето дека оштетувањата во мозокот предизвикани од Алцхајмеровата болест се неповратни. Токму поради тоа, најголемиот дел од научните истражувања досега беа насочени кон превенција или кон забавување на болеста, а не кон можноста за опоравок. Ова гледиште сега е сериозно доведено во прашање со нова студија објавена во научното списание Cell Reports Medicine, која отвора перспектива дека дури и тешко оштетен мозок може да покаже знаци на обновување.Истражувачки тим од University Hospitals, Case Western Reserve University и медицинскиот центар Louis Stokes Cleveland VA Medical Center анализирал мозочни ткива од лица заболени од Алцхајмер и спровел експерименти на глувчешки модели со напредната форма на болеста. Резултатите покажале дека еден од клучните фактори за развојот на Алцхајмерот е нарушената рамнотежа на NAD+, молекула од суштинско значење за енергетскиот метаболизам на клетките.Нивото на NAD+ природно опаѓа со стареењето, но кај лицата со Алцхајмерова болест овој пад е значително поизразен. Истото било утврдено и кај лабораториските животни. Кога рамнотежата на оваа молекула е нарушена, клетките постепено ја губат способноста да ги извршуваат основните функции неопходни за нивно преживување. Научниците утврдиле дека одржувањето на стабилни нивоа на NAD+ не само што може да го запре напредувањето на болеста, туку и да доведе до функционален и патолошки опоравок.Во рамки на истражувањето биле користени два различни глувчешки модели со генетски мутации поврзани со Алцхајмеровата болест, еден поврзан со амилоидните наслаги, а другиот со тау-протеинот. Кај двата модели се развиле сериозни оштетувања на мозокот, нарушување на заштитната бариера, хронична воспалителна состојба, губење на нервни врски и сериозни проблеми со меморијата и учењето, слични на симптомите кај луѓето.Научниците потоа ја обновиле рамнотежата на NAD+ со соединение наречено P7C3-A20, развиено во нивната лабораторија. Резултатите биле, како што наведуваат авторите, изненадувачки. Кај животните кај кои терапијата била применета превентивно, болеста воопшто не се развила, а кај оние со веќе напреднат Алцхајмер, бил забележан значителен опоравок на мозочните функции. Во двата случаи, глувците целосно ги повратиле когнитивните способности.Дополнителна потврда за вистинскиот пресврт на болеста бил и падот на нивото на тау-протеинот 217 во крвта на нормални вредности, биомаркер што кај луѓето е директно поврзан со Алцхајмеровата болест. Главниот автор на студијата, Ендрју А. Пипер, изјави дека обновувањето на енергетската рамнотежа во мозокот довело до реален функционален и структурен опоравок, што отвора сериозна надеж и за примена кај луѓето.Иако на пазарот, особено во САД, веќе постојат додатоци во исхраната кои се прекурсори на NAD+, научниците предупредуваат на претпазливост. Во некои случаи тие можат да доведат до опасно високи нивоа на оваа молекула, што може да поттикне и несакани процеси, вклучително и развој на канцер. Пристапот со P7C3-A20, според авторите, овозможува прецизна регулација на рамнотежата без ризик од прекумерно зголемување.Според дел од експертите, ова истражување е значајно бидејќи покажува дека подобрувањето на симптомите не мора нужно да значи враќање на изгубените неврони, туку може да се должи на зголемена отпорност и приспособливост на мозокот. Тоа подразбира запирање на понатамошното оштетување, подобрување на комуникацијата меѓу нервните клетки и поефикасно користење на новоформираните неврони.Авторите на студијата најавија дека следниот чекор ќе бидат клинички испитувања кај луѓе. Доколку резултатите се потврдат, ова откритие би можело да означи историски пресврт во третманот на Алцхајмеровата болест, болест која со децении се сметаше за неповратна и прогресивна без реална можност за опоравок.

Магазин | пред 2 седмици

Иран врие, Трамп се заканува, ама Путин ќути

Иран во изминатите години беше сцена на повеќе народни бунтови, но масовниот протестен бран што ја зафати земјата кон крајот на 2025 година сè почесто се оценува како најсериозната закана досега за опстанокот на автократскиот режим. Актуелните демонстрации се најголеми и најнасилни во последните неколку години, со запалени државни објекти, судири со безбедносните сили и пароли со директни повици за уривање на власта, меѓу кои и извици против врховниот водач Али Хамнеи.Во видеообраќање на 9 јануари, Хамнеи порача дека протестите ќе бидат задушени, по што властите воведоа речиси целосна блокада на интернетот. Состојбата внимателно ја следат и меѓународните актери, пред сè Соединетите Американски Држави и Русија, додека независна проверка на информациите е речиси невозможна поради ограничениот пристап до комуникациските мрежи.Протестите започнаа на 28 декември како реакција на високата инфлација и драматичниот пад на вредноста на иранскиот ријал, но за кратко време прераснаа во отворено политичко движење со барање за соборување на режимот. Немирите се проширија во повеќе од 100 градови и населени места, што претставува географски опфат без преседан. На улиците излегоа десетици, а според тврдењата на опозицијата и стотици илјади луѓе, кои влегоа во директни конфликти со полицијата и паравоените формации.Клучен момент беше 8 јануари, кога на протестите им даде дополнителен импулс повикот на Реза Пахлави, син на последниот ирански шах соборен во Исламската револуција во 1979 година. Пахлави, кој се залага за демократија и почитување на човековите права, за дел од јавноста претставува обединувачка фигура, а меѓу демонстрантите се појавија и повици за обновување на монархијата. Опозицијата тврди дека протестите се најмасовни од 1979 година наваму, со милиони луѓе на улиците, но овие бројки не можат да се потврдат поради информативната блокада.Според податоците на организацијата „Iran Human Rights“, најмалку 62 демонстранти се убиени, стотици се повредени, а повеќе од 2.000 лица се уапсени. Дел од аналитичарите сметаат дека протестите се без преседан бидејќи, за разлика од претходните бранови, не се ограничени само на големите градови, туку се проширија и во руралните средини, создавајќи атмосфера слична на Арапската пролет.Експертите се поделени околу прашањето дали режимот навистина е пред колапс. Некои оценуваат дека сегашните немири се поопасни за власта од претходните, бидејќи целат кон целосно уривање на системот, а не кон ограничени реформи, и затоа што во нив се вклучени пошироки општествени слоеви подготвени на радикални чекори. Други, пак, предупредуваат дека иранскиот режим, иако ослабен, сè уште располага со силен репресивен апарат и лојални безбедносни структури кои можат да ја задржат контролата.Во меѓувреме, се отвори и прашањето за можна странска интервенција. Американскиот претседател Доналд Трамп јавно се закани дека Иран ќе биде „жестоко погоден“ доколку режимот отвори оган врз демонстрантите, оставајќи простор за различни сценарија. Дел од аналитичарите сметаат дека ограничен удар врз клучни безбедносни структури би можел да предизвика распад на лојалноста во рамки на режимот, додека други предупредуваат дека странска интервенција може да има спротивен ефект и да го обедини населението околу власта под изговор на надворешна закана.Посебно значајна е и позицијата на Русија, еден од главните сојузници на Техеран. Москва засега молчи за случувањата во Иран, а аналитичарите оценуваат дека падот на режимот би значел сериозен геополитички удар за Кремљ, вклучително и губење на важен партнер. Сепак, се смета дека Русија веројатно нема активно да интервенира, туку евентуално би можела да понуди засолниште за иранските лидери, како што тоа го направи во други слични случаи.Иран, според многумина, влегува во најнеизвесната фаза од својата понова историја. Дали протестите ќе доведат до вистински политички пресврт или режимот повторно ќе успее да се одржи со сила, останува отворено прашање, чии одговори ќе зависат од одлуките на безбедносните структури, однесувањето на меѓународната заедница и истрајноста на граѓаните на улиците.

Свет | пред 2 седмици

Гостивар, Маврово и Ростуше, Врапчиште и Центар Жупа на поправен за избор на градоначалник

Утре жителите на Гостивар, Маврово и Ростуше, Врапчиште и Центар Жупа, на повторено гласање ќе бираат градоначалник.Изборите за градоначалник во овие четири општини се повторуваат бидејќи на Локалните избори 2025 во октомври, таму немаше доволен број граѓани излезени на гласање.На повторените избори, според законот, не е потребна излезност од една третина на гласачите туку за да се избере градоначалник треба за еден од кандидатите да гласаат повеќе од половината од излезените избирачи.Денеска гласаат болните и изнемоштените лица, како и притворените и затворениците кои се жители на овие општини.Во Гостивар за гласање се пријавени 146 болни и изнемоштени лица, а во затворите 81 лице.Во Маврово и Ростуше ќе гласаат 69 болни лица и двајца затвореници.Во Врапчиште пријавени се 32 болни и изнемоштени, а во затворите се пријавени 11 жители од оваа општина.Во Центар Жупа пријавени се само двајца болни.Гласањето утре започнува во 7:00 часот, а завршува во 19:00 часот.

Македонија | пред 2 седмици

Пансионот „Ав ав хепи догс“ ќе си продолжи да работи, АХВ не провери присуство зараза туку даде препораки за чистење и тестирање

Агенцијата за храна и ветеринарство по вонреден инспекциски надзор во пансионот за кучиња „Ав, ав хепи догс“ донела решение само препорачала на сопствениците итно да си ги преземат своите миленици и да ги тестираат за евентуално присуство на заразна болест. Тие наредиле механичко чистење и темелна дезинфекција на целиот објект, кој ќе остане времено затворен само во период од 21 ден, колку што изнесува инкубацискиот период за сомнителната болест. Оттаму велат дека законот не им дозволува, а ниту наложува тие да проверат присуство на парво болест, од која угинало куче кое претходно било оставено на чување во овој пансион.Од Агенција за храна и ветеринарство за „Скопје1“ информираат дека досега ниту еден сопственик на домашен миленик не пријавил појава на болест кај своето куче по преземањето од пансионот, иако имаше јавни сведоштва од сопственици на кучиња.Надзорот, како што појаснуваат, бил спроведен исклучиво од аспект на здравствената заштита на животните и спречување евентуално ширење на заразни болести, а не во насока на утврдување одговорност за конкретниот смртен исход.„Со постоечките закони за здравствена заштита и за благосостојба на животните правно не е регулирана работата на пансиони и хотели за домашни миленици односно АХВ не ги регистрира/одобрува и не издава дозволи за нивно работење“, велат од АХВ на прашањето дали утврдиле од што угинало кучето кое претходно било сместено во пансионот.Од пансионот уште на 31 декември самите се пофалија дека инспекцискиот надзор не се однесувал за присуство на болеста, туку администрациска проверка.Случајот стана јавен по сведоштвото на Ана Пејковска, која објави дека нејзиното куче Мајло починало по престој во пансионот, тврдејќи дека било заразено со парвовироза и вратено во тешка здравствена состојба. По нејзините објави следуваа и други сведоштва од сопственици и поранешна практикантка, кои изнесоа сериозни наводи за условите и односот кон животните во објектот, додека пансионот во реакција негираше присуство на парвовирус и најави правни чекори против, како што велат, лажно информирање.Од АХВ апелираат до сопствениците на кучиња да бидат одговорни, редовно да ги вакцинираат своите миленици, да ги тестираат доколку има сомнеж за заразна болест и да ги следат исклучиво официјалните информации од надлежните институции, додавајќи дека јавноста ќе биде навремено информирана по завршување на целосната постапка.

Скопје | пред 2 седмици

Зимски сообраќај низ државата: Влажни коловози, снег на Попова Шапка и внимателно возење

Сообраќајот на државните патишта во земјава се одвива во зимски услови, по претежно влажни коловози, информира Автомото сојузот на Македонија во утринскиот билтен од 10 јануари 2026 година, објавен во 06:30 часот. Слаби врнежи од снег се бележат на подрачјето на Попова Шапка, додека на останатите патни правци состојбата се следи континуирано.На граничниот премин Ники, односно Меџитлија, воведена е забрана за движење на товарни возила која ќе трае до денеска во 10:00 часот. Сообраќајот за патничките моторни возила на овој премин се одвива непречено и без ограничувања. На останатите гранични премини, од македонска страна, нема подолги задржувања за влез и излез од државата.Интензитетот на сообраќај надвор од градските средини е умерен. Од АМСМ потсетуваат дека од 15 ноември 2025 година е на сила законската обврска за задолжително поседување зимска опрема во сите возила, без оглед на моменталните временски услови, и таа ќе важи до 15 март 2026 година.Автомото сојузот апелира до возачите да ја приспособат брзината на движење кон условите на патот, да ја почитуваат сообраќајната сигнализација и да управуваат внимателно, особено на делниците кои минуваат низ котлини, речни долини и клисури, каде постои зголемена можност од појава на одрони. Како критични се издвојуваат правците Катланово – Велес, Маврово – Дебар – Струга, Виница – Берово и Кочани – Делчево.Патниот правец Охрид – Ресен преку Националниот парк Галичица е затворен за сообраќај за сите видови возила и ќе остане затворен до 31 март 2026 година, согласно сезонскиот режим на сообраќај.Во тек се и повеќе градежни активности на патната мрежа. На Коридор 10, на делницата Прилеп – Битола, сообраќајот е пренасочен по регионалниот пат Р1101. На скопската обиколница, на државниот пат А2, се изведуваат рехабилитациони работи во должина од 250 метри меѓу клучките Волково и Кондово, при што е затворена левата лента за претекнување, а сообраќајот се одвива по средната и десната лента.На експресниот пат Крива Паланка – Страцин, кај село Петралица, сообраќајот се одвива со времен режим поради градежни активности, со рачна регулација во текот на денот и семафорска сигнализација во ноќните часови. Времени измени на режимот на сообраќај се применуваат и на регионалниот пат Косоврасти – Мелнички Мост, како и на мостот Здуње на делницата Гостивар – Стража, каде сообраќајот се одвива наизменично со семафорска регулација.АМСМ апелира до сите учесници во сообраќајот да бидат внимателни и да ги следат најновите информации за состојбата на патиштата, со цел безбедно и непречено патување.

Македонија | пред 2 седмици

Ирански функционер со закана кон Трамп: Да постапиме со него како со Мадуро

Висок ирански функционер и идеолог, Хасан Рахимпур Азгади, синоќа изнесе крајно остра и провокативна изјава во која оцени дека Иран, како одговор на ставот на Вашингтон кон протестите во земјата, треба да постапи со американскиот претседател Доналд Трамп „на ист начин како што тој постапил со Мадуро“.Азгади, кој е член на Врховниот совет за културна револуција на Иран, изјави дека, според него, поради политиките и јавните изјави на Трамп, би била „дозволена секоја форма на операција на територијата на Соединетите Американски Држави, во сите сојузни држави и градови“, вклучително и, како што рече, „деструктивни операции од типот на оние што тие ги спроведуваат тука“.„Иран мора да му го направи на Трамп она што тие му го направија на Мадуро“, изјави Азгади, алудирајќи на постапките на САД кон венецуелскиот лидер. Во продолжение на својата изјава тој додаде дека американскиот претседател „мора да ја плати цената за своите постапки, за време или дури и по завршувањето на неговиот претседателски мандат“, изразувајќи и лична надеж дека Трамп „треба да биде фатен“.Изјавата доаѓа во период на сериозни тензии меѓу Техеран и Вашингтон, по заканите од американскиот претседател дека САД ќе реагираат „многу силно“ доколку иранските власти започнат со убиства на демонстранти за време на актуелните масовни протести во земјата. Реториката од иранска страна дополнително ја заострува веќе кревката дипломатска состојба и отвора сериозни прашања за натамошната ескалација на односите меѓу двете држави.

Свет | пред 2 седмици

Иран ги обвини САД и Израел за немирите, писмо доставено до Советот за безбедност на ОН

Иран во писмо доставено до Советот за безбедност на Обединетите нации ги обвини Соединетите Американски Држави и Израел дека стојат зад немирите и насилните настани во земјата. Постојаниот претставник на Иран при ОН, Амир Саид Иравани, во писмото наведува дека, според Техеран, САД се „директно одговорни за немирите и насилните дејствија“, преку, како што тврди, закани, поттикнување и намерно охрабрување на насилството, како и преку нарушување на мирот и стабилноста.Иравани дополнително го осуди однесувањето на Вашингтон, наведувајќи дека американските активности се одвиваат во координација со Израел, што, според иранската страна, претставува директно мешање во внатрешните работи на Иран. Во писмото се истакнува дека ваквите дејствија се спротивни на меѓународното право и на Повелбата на Обединетите нации.Протестите во Иран траат веќе 14 дена и започнаа на големата пазарна зона во Техеран, по што се проширија и во други делови на земјата. Иранските власти во последните денови сè почесто повикуваат на разграничување меѓу мирните демонстранти и, како што ги нарекуваат, „изгредниците“, иако тој термин, според бројни реакции и извештаи, режимот го користи и за самите учесници во протестите.Состојбата во Иран и натаму предизвикува зголемено внимание кај меѓународната заедница, додека официјален Техеран инсистира дека надворешни фактори ја поттикнуваат нестабилноста и ја користат внатрешната социјална и економска криза за свои геополитички цели.

Свет | пред 2 седмици

Нови тензии на Корејскиот Полуостров: Северна Кореја тврди дека соборила јужнокорејски дрон

Армијата на Северна Кореја денеска ја обвини Јужна Кореја дека во текот на неделата со беспилотни летала го нарушувала воздушниот простор над границата, предупредувајќи дека Сеул ќе се соочи со последици поради, како што наведуваат, „неопростива хистерија“. Јужна Кореја брзо ги отфрли обвинувањата, но новиот инцидент дополнително ги намалува шансите за обновување на дијалогот меѓу двете земји, оценуваат аналитичарите.Во соопштение објавено преку државните медиуми, Генералштабот на Корејската народна армија наведе дека севернокорејските сили во неделата употребиле специјални средства за електронско војување за да соборат јужнокорејски дрон кој летал над пограничен град. Според тврдењата од Пјонгјанг, леталото било опремено со две камери и снимало неидентификувани области.Во истото соопштение се наведува дека Јужна Кореја уште на 27 септември минатата година испратила друг дрон во севернокорејскиот воздушен простор, кој наводно бил принуден да се урне по електронски напади. Севернокорејските власти тврдат дека и тој дрон содржел видеоматеријали од значајни објекти во земјата.„Остро го осудуваме сериското и дрско нарушување на нашиот суверенитет и отворените провокации“, се наведува во соопштението, со порака дека „воените хушкачите од Република Кореја ќе платат висока цена“.Министерството за одбрана на Јужна Кореја соопшти дека не управувало беспилотни летала на датумите што ги наведува Северна Кореја, а претседателот Ли Џе-мјунг наложил темелна истрага за наводите од Пјонгјанг.Од преземањето на функцијата во јуни минатата година, владата на претседателот Ли вложи напори за повторно отворање на преговорите и намалување на тензиите со Северна Кореја, но Пјонгјанг досега ги одбиваше сите повици за дијалог. Претседателот Ли неодамна изјави дека на самит побарал посредништво од кинескиот претседател Си Џинпинг за смирување на состојбите, при што Пекинг повикал на трпение.Северна Кореја ги избегнува разговорите и со Сеул и со Вашингтон уште од пропаѓањето на нуклеарната дипломатија меѓу Ким Џонг-ун и американскиот претседател Доналд Трамп во 2019 година, поради несогласувањата околу санкциите. Оттогаш, Пјонгјанг се фокусира на зајакнување на нуклеарниот арсенал и официјално прогласи непријателски „систем на две држави“ на Полуостровот, со што практично ги прекина односите со Јужна Кореја.Дроновите и претходно беа извор на тензии меѓу двете Кореи, кои со години меѓусебно се обвинуваат за нарушување на воздушниот простор. Во октомври 2024 година, Северна Кореја тврдеше дека јужнокорејски дронови го прелетале Пјонгјанг и фрлале пропагандни летоци, што Сеул тогаш не го потврди. Од друга страна, Јужна Кореја во декември 2022 година објави дека подигнала борбени авиони и испукала предупредувачки истрели поради, како што наведе, првиот упад на севернокорејски дронови по пет години.Новите обвинувања уште еднаш ја потврдуваат кревката безбедносна состојба на Корејскиот Полуостров и ограничените изгледи за брзо смирување на долгогодишното ривалство.

Свет | пред 2 седмици

ЦУК со најнова вонредна информација: Интервенции низ земјата по поројните дождови

Обилните врнежи од дожд во изминатиот период предизвикаа излевања на реки, поплави на земјоделски површини и локални оштетувања на инфраструктурата на повеќе локации низ Република Македонија, информира Центарот за управување со кризи, според состојбата регистрирана до 9 часот утрово.Во кочанскиот и штипскиот регион, кај Оризарска река во селото Грдовци е забележано излевање, при што ЈП Водостопанство „Брегалница“ интервенира со багер гасеничар, а механизацијата сѐ уште е на терен. Од понеделник е најавен почеток на чистење на речното корито од Грдовци кон Оризари, со цел спречување на идни несакани последици. Сообраќајот на патниот правец Кочани – Грдовци е нормализиран, додека на повеќе патишта во источниот дел се појавуваат одрони кои екипите на „Македонијапат“ континуирано ги расчистуваат.Во Битола, во населбата Стрчин, КЈП „Нискоградба“ интервенира со механизација за отстранување на нанос од чакал и земја. Во селото Кравари има заезерени земјоделски површини, но без опасност по објектите, додека во Жабени и Породин се евидентирани поплавени ниви, при што ЈП Водостопанство интервенира на Жабјанска река. Елешка река исто така е излеана, со поплавени земјоделски површини, а надлежните служби информираат дека нивото на водата во реките е во опаѓање.Во ресенскиот регион, поплавени се земјоделско земјиште, дворови, куќи, помошни објекти и магацини за складирање јаболка. Нивото на Голема река е значително намалено, од 2,20 на 1,40 метри, а екипи од локалната самоуправа, „Македонијапат“ и ЈКП „Пролетер“ вршат обиколка и проценка на терен. Според ЦУК, состојбата таму е нормализирана.Во Крушево, поради поројните врнежи, водата за пиење е заматена и на граѓаните им се препорачува истата да се преврива најмалку 10 минути. Нивото на Црна река кај селото Бучин е покачено, но водата се повлекла од местата каде што претходно била излеана. Екипи од ЈП „Комуна“, Територијалната противпожарна единица, општината и други надлежни служби работат на зајакнување на насипите кај критичните точки.Во Демир Хисар, локалниот пат кон селото Мренога е затворен за сообраќај поради оштетување на мост на Боишка река, а надлежните служби ја обезбедуваат локацијата. Во прилепските села Лажани и Пешталево се пријавени поплавени дворови и приземни простории, како и штети на тутун, при што интервенираше градежна механизација за расчистување на неисчистените канали.Во тетовскиот регион, патот кон Бање Тетово е исчистен, но сообраќајот е забранет од страна на СВР Тетово од безбедносни причини. Патиштата кон селата Жерма и Бродец се проодни, а состојбата во селото Стримница, општина Желино, континуирано се следи од надлежните служби.Од Центарот за управување со кризи информираат дека состојбата на теренот постојано се следи и дека институциите остануваат во подготвеност за навремено реагирање доколку се појават нови ризици.

Македонија | пред 2 седмици

Трамп се закани на Иран: Ако почнат убиства на демонстранти, ќе удриме силно

Американскиот претседател Доналд Трамп упати остро предупредување до иранските власти, порачувајќи дека Соединетите Американски Држави внимателно ја следат состојбата со масовните протести во Иран и дека ќе реагираат „многу силно“ доколку режимот почне да ги убива демонстрантите.Изјавата Трамп ја даде по состанок со раководители на американски нафтени компании во Белата куќа, нагласувајќи дека Иран се наоѓа во „голема неволја“ и дека протестите се шират и во градови каде што, како што рече, до пред неколку недели никој не можел да замисли дека е можно граѓаните да излезат на улица.Трамп истакна дека САД будно ги следат случувањата и дека веќе јасно ставил до знаење оти нема да останат пасивни доколку дојде до крвопролевање. Според него, доколку иранските власти применат смртоносна сила врз учесниците на протестите, САД ќе возвратат со силен удар „таму каде што најмногу ги боли“.Претседателот притоа појасни дека ваквата најава не значи испраќање американски копнени трупи во Иран, туку употреба на други форми на силен притисок. Тој нагласи дека Вашингтон не посакува ескалација, но дека нема да дозволи повторување на сценарија од минатото кога, според него, иранските власти без последици се пресметувале со сопствениот народ.Трамп направи и споредба со претходни американски администрации, оценувајќи дека во минатото имало случаи кога САД целосно се повлекувале од вакви ситуации. Сегашните случувања во Иран, како што рече, се „неверојатни за гледање“ и се директна последица на лошото и репресивно постапување на режимот кон граѓаните.Изјавата на американскиот претседател доаѓа во момент кога протестите во Иран продолжуваат да се шират, а меѓународната заедница сè погласно реагира на насилството, прекините на интернетот и обидите на властите да ја задушат јавната побуна.

Свет | пред 2 седмици

Масовни протести во Иран: Граѓаните бараат крај на режимот и враќање на Пахлави

Масовните протести во Иран продолжуваат втора недела по ред, при што илјадници граѓани излегуваат на улиците на Техеран и на бројни други градови во земјата, изразувајќи незадоволство од владеењето на ајатоласите и од тешката економска состојба. Снимките што се појавуваат на социјалните мрежи сведочат за најголемите демонстрации против клерикалниот режим во последните неколку години, со протести што се проширија во повеќе од 100 градови низ Иран.Немирите се поттикнати од колапсот на националната валута, растечката сиромаштија и општото чувство на безизлезност, а дел од демонстрантите јавно бараат враќање на синот на прогонетиот шах, Реза Пахлави. Тие сметаат дека промената на политичкиот систем е единствениот излез од длабоката криза во која се наоѓа државата.Иранските државни медиуми се обидуваат да ги минимизираат или целосно да ги негираат протестите, објавувајќи снимки од наводно празни улици и тврдејќи дека состојбата е под контрола. Истовремено, властите посегнаа по ригорозни мерки, па надзорната организација „НетБлокс“ соопшти дека во земјата е регистриран „национален прекин на интернетот“, со цел да се оневозможи комуникацијата и координацијата меѓу демонстрантите.Ситуацијата во Иран будно ја следи и меѓународната заедница. По повод протестите се огласи и врховниот верски лидер, ајатолахот Али Хамнеи, кој во говор пренесуван на државната телевизија порача дека редот мора да се зачува и дека државата нема да дозволи дестабилизација.Дополнителен импулс на протестите им даде и јавниот повик на прогонетиот принц Реза Пахлави, кој живее во Вашингтон. Тој ги повика граѓаните на Иран да излезат на улиците и, како обединет фронт, гласно и јасно да ги изнесат своите барања, порачувајќи дека моментот за промени е сега.И покрај засилените безбедносни мерки и обидите за замолчување на јавноста, протестите не стивнуваат, а неизвесно е дали иранските власти ќе успеат да го задржат целосниот контролен механизам врз состојбата што сè повеќе се заканува да прерасне во најсериозна политичка криза во последната деценија.

Свет | пред 2 седмици