Анкета во Украина: Зеленски и Залужни во втор круг, генералот со убедлива предност

Украинскиот претседател Володимир Зеленски и украинскиот амбасадор во Обединетото Кралство и поранешен врховен командант на вооружените сили, Валериј Залужни, би влегле во втор круг доколку претседателските избори се одржат во блиска иднина, покажува истражувањето на јавното мислење спроведено од агенцијата СОЦИС.Анкетата е објавена во чувствителен политички момент, кога украинските пратеници започнуваат подготовки за можни законски измени со кои би се овозможило одржување избори за време на воена состојба, откако Зеленски дал насока да се изработат соодветни законски предлози.Според резултатите, во првиот круг Зеленски би освоил 22 проценти од гласовите, само еден процент повеќе од Залужни, кој би добил 21 процент. Истовремено, дури 24,1 процент од испитаниците изјавиле дека сè уште не одлучиле за кого би гласале, што претставува раст во однос на октомври, кога неодлучни биле 21,1 процент.Во хипотетички втор круг меѓу Зеленски и Залужни, анкетата покажува убедлива предност на поранешниот командант на армијата. Залужни би освоил 64 проценти од гласовите, наспроти 36 проценти за актуелниот претседател. Доколку, пак, Залужни не се кандидира, вториот круг најверојатно би се водел меѓу Зеленски и шефот на военото разузнавање Кирило Буданов, при што Буданов би победил со 56 проценти, а Зеленски би освоил 44 проценти.Истражувањето е спроведено на примерок од 2.000 испитаници со користење на стратификуван квотен примерок, а податоците се прибирани преку директни разговори со метод на компјутерски поддржано лично интервјуирање.Резултатите доаѓаат во време на обновена дебата во Киев за можноста од одржување избори за време на војната. Зеленски во декември изјави дека е подготвен да организира избори и во услови на воен конфликт, но само доколку сојузниците на Украина можат да гарантираат безбедност, што, според него, би подразбирало Русија да прифати прекин на огнот.Безбедносните услови остануваат клучна пречка за национални избори, но не и единствена. Според податоците на Обединетите нации, повеќе од шест милиони Украинци ја напуштиле земјата од почетокот на целосната руска инвазија, додека околу 3,7 милиони лица се внатрешно раселени, што дополнително го усложнува избирачкиот процес.Според важечкото украинско законодавство, изборите се забранети за време на воена состојба и можат да се одржат само по нејзино укинување или со измена на законот од страна на парламентот. Претходно оваа недела, Врховната рада формираше посебна работна група задолжена за подготовка на законска рамка за избори за време и по завршување на војната. Во меѓувреме, украинската Централна изборна комисија повторно започна со работа на државниот регистар на избирачи, за првпат од почетокот на целосната руска инвазија.

Свет | пред 1 месец

На слобода излегува уште еден осуденик за 27 април: Вили Гајда најавува враќање на сцената

Уште еден осуденик за настаните од 27 април 2017 година доби условен отпуст од судот, откако одлежа две третини од изречената затворска казна за упадот во Собранието. Станува збор за Вилијам Михајловски – Вили, кој преку објава на социјалните мрежи информира дека од 1 јануари е на условна слобода и дека планира постепено да се врати на јавниот и професионалниот живот.Во пораката до јавноста, Михајловски најави дека од 2026 година повторно ќе настапува како музичар, со фокус на традиционалната македонска музика и инструменти. Тој порача дека музиката за него претставува „лек за душата“ и дека има намера преку настапи да го промовира македонскиот мелос, културата и јазикот, притоа потенцирајќи дека политиката ја остава настрана.Според судските одлуки, условниот отпуст на Михајловски формално започнува од 31 декември 2025 година. Во изминатиот период, условна слобода добија и други осуденици за 27 април. Пред околу еден месец условен отпуст им беше одобрен на Мунир Пепиќ, Оливер Поповски, Влатко Трајковски, Душко Лазаров, Јане Ченто, Митко Пешов, Горан Ѓошевски и Никола Митревски, додека Младен Додевски и Горан Ангелов исто така се најдоа на списокот на лица кои излегоа од затвор под услов.Оливер Радулов, пак, условен отпуст доби пред околу шест месеци. Со тоа, бројот на осуденици за упадот во Собранието кои се пуштени на условна слобода континуирано се зголемува, по одлежување на законски предвидениот дел од казните.Според информации со кои располага медиумот, паралелно со овие постапки е поднесено и барање за повторување на судската постапка за случајот „27 април“, што повторно ја отвора дебатата во јавноста за судските пресуди, одговорноста и правните последици од еден од најконтроверзните настани во поновата политичка историја на државата.Бонус видео:

Настани | пред 1 месец

Кои се новите министри „птици преселници“ кои беа во ДУИ, па добија нови функции со ВЛЕН

Без образложение од премиерот Христијан Мицкоски, Собранието на Република Македонија на денешната седница го разреши министерот за европски прашања Орхан Муртезани и истовремено ги избра новиот министер за европски прашања и вицепремиер Беким Сали, како и новиот министер за животна средина и просторно планирање Мухамед Хоџа. Одлуките беа донесени со поддршка од пратениците на ВМРО-ДПМНЕ, без подолга расправа и без детално објаснување за причините за смената.Премиерот Мицкоски во обраќањето пред пратениците му се заблагодари на Муртезани за досегашниот ангажман и најави дека тој ќе продолжи да работи во извршната власт, но на друга позиција. Како што посочи, Муртезани ќе биде дел од кабинетот на премиерот, каде ќе биде задолжен за следење на реализацијата на реформската агенда. Засега официјално не е потврдено, но веќе е познато дека Муртезани е номиниран за амбасадор на Република Македонија во Брисел.Новоназначениот министер за европски прашања и вицепремиер Беким Сали, според образложението на Мицкоски, располага со релевантно искуство во извршната и законодавната власт. Премиерот нагласи дека неговото претходно министерско искуство, како и тековниот пратенички ангажман, му овозможуваат добро разбирање на односите меѓу институциите и на механизмите на државното функционирање, што, како што рече, е од особена важност за ресорот задолжен за европските интеграции и реформските процеси.За министер за животна средина и просторно планирање беше избран Мухамед Хоџа, за кого премиерот истакна дека има долгогодишно искуство во државната управа и во извршната власт, со повеќе ангажмани на раководни позиции. Според Мицкоски, ваквото искуство претставува основа за ефикасно справување со сложените административни и институционални предизвици во овој ресор, како и за подобрување на меѓуинституционалната соработка.Во политичката биографија на Мухамед Хоџа се вбројува и функцијата портпарол во претходната Влада на СДСМ и ДУИ, додека Беким Сали беше министер за здравство во истата коалициска влада и наследник на Венко Филипче. Двајцата подоцна ја напуштија ДУИ и се приклучија на коалицијата ВЛЕН, од каде што доаѓаат и нивните актуелни номинации.Со денешните кадровски промени, Владата продолжува со реконструкција на својот состав, при што вниманието во јавноста останува насочено кон мотивите за смената на Муртезани и кон идните чекори во процесот на европските интеграции и реформите во клучните сектори.

Македонија | пред 1 месец

По три години затвор за ексдиректорите Бесими и Етеми за трагедијата во модуларната болница во Тетово

Апелациониот суд во Гостивар донесе одлука со која двојно ги зголеми затворските казни за Флорим Бесими и Артан Етеми, обвинети за пожарот што на 8 септември 2021 година избувна во модуларната ковид-болница во Тетово, при што животот го загубија 14 пациенти и членови на нивните семејства. Наместо првостепените казни од една и пол година затвор, судот им изрече по три години ефективна затворска казна.Флорим Бесими, како тогашен директор на Клиничката болница во Тетово, и Артан Етеми, како економски директор, беа прогласени за виновни за кривичното дело тешки дела против општата сигурност, за кое Кривичниот законик предвидува максимална казна затвор до пет години. Апелацискиот суд одлучуваше по жалбите и на Јавното обвинителство од Тетово и на бранителите на обвинетите, а јавната седница беше одржана на 25 ноември, додека одлуката беше јавно објавена вчера.Со истата одлука, правното лице Клиничка болница Тетово, кое се товареше за кривично дело предизвикување општа опасност, е казнето со парична казна од 1.300.000 денари, што претставува зголемување во однос на првостепената казна од еден милион денари.Во претходната судска постапка, директорите првично беа осудени на условни казни од една и пол година затвор, а болницата на парична казна. Таа пресуда, по жалба на Обвинителството, беше укината од Апелациониот суд во Гостивар и предметот беше вратен на повторно судење, по што сега следуваше и построга санкција.Обвинението против Бесими и Етеми не се однесува на директната причина за настанување на пожарот, туку на нивното непостапување, односно непоставување пропишани уреди за заштита од пожар. Според обвинението, тие не ги спровеле мерките кои произлегувале од договорот за заем меѓу државата и Светската банка, со кој било предвидено модуларните болници да бидат опремени со соодветни противпожарни апарати и инсталации. Иако биле должни, од денот на пуштањето во употреба на модуларната болница во Тетово, па сѐ до денот на трагедијата, такви уреди не биле обезбедени.Како последица на кус спој во приклучниот кабел на дефибрилатор, за време на реанимација на пациент, дошло до палење на продолжниот кабел и синтетичките материјали, по што пожарот за кратко време се проширил низ целиот објект. Пожарот се обиделе да го изгаснат со ќебиња и вода двајца лекари, три медицински сестри и една болничарка, кои безуспешно барале противпожарни апарати што не биле достапни.Во истиот предмет, докторот Бобан Вучевски се товареше за непостапување според здравствените прописи за време на епидемија, бидејќи дозволил влез на членови на семејствата на пациентите во модуларната болница, иако тоа било изрично забрането. За него обвинението не се однесува на причините за пожарот, туку исклучиво на прекршување на мерките за време на епидемијата. Тој беше ослободен од вина.Застапник на обвинението во овој случај е јавниот обвинител од Тетово, Бесир Алиу.

Македонија | пред 1 месец

(Фото) Од 25 до 31 година имаат лицата кои се гонат за сексуална продажба на малолетничка, која ја терале и да се дрогира

Министерството за внатрешни работи поднесе кривична пријава против пет лица од Тетово, поради основано сомнение за сторени тешки кривични дела поврзани со трговија со дете и сексуално насилство. Кривичната пријава е поднесена од Одделот за сузбивање на организиран и сериозен криминал при Бирото за јавна безбедност, односно Националната единица за сузбивање на криумчарење мигранти и трговија со луѓе, до Основното јавно обвинителство за гонење на организиран криминал и корупција.Според МВР, првопријавениот Ф.М. (25) се товари за кривично дело трговија со дете, додека И.Д. (56), А.С. (30) и Л.С. (28) се пријавени за учество во истото кривично дело, а Р.М. (31) за полов напад и силување, согласно одредбите од Кривичниот законик.Од досега документираните сознанија произлегува дека во периодот од мај 2023 година до крајот на 2024 година, првопријавениот, злоупотребувајќи ја довербата на тогаш 15-годишно дете, лажно претставувајќи се како потенцијален љубовен партнер, преку сериозни закани и уцени ја принудувал жртвата да користи опојни дроги и да биде сексуално експлоатирана. Со цел стекнување противправна имотна корист, тој, по претходен договор со останатите пријавени и со вклучување и на други засега неидентификувани лица, овозможувал вршење полови дејствија врз детето-жртва на повеќе локации во Тетово.Петтопријавениот, кој имал улога да се грижи за безбедноста на детето, ја злоупотребил својата позиција и спротивно на волјата на жртвата извршил полов однос, со што дополнително ја продлабочил кривичната одговорност во овој случај.По наредба на судија на претходна постапка од Основниот кривичен суд Скопје, биле извршени претреси на четири локации на подрачјето на Тетово, при што биле пронајдени и привремено одземени мобилни телефони и СИМ-картички. Сите пет лица се лишени од слобода, а истрагата продолжува со цел целосно расветлување на случајот и утврдување на целосната одговорност.

Македонија | пред 1 месец

Ново заострување меѓу Брисел и Вашингтон по забраната за влез на европски државјани

Европската унија ќе ја штити слободата на говор и правото на изразување, порачаа претседателката на Европската комисија Урсула фон дер Лајен и претседателот на Европскиот совет Антонио Кошта, откако Соединетите Американски Држави воведоа забрана за влез за пет европски државјани, меѓу кои и поранешниот еврокомесар Тиери Бретон.Забраната беше воведена од администрацијата на американскиот претседател Доналд Трамп, која ги обвини засегнатите европски граѓани за ограничување на слободата на говор и за, како што наведуваат, прекумерна регулација на американските технолошки гиганти. Реагирајќи на одлуката, Урсула фон дер Лајен на социјалните мрежи порача дека слободата на говор е темел на силната и жива европска демократија и дека Европската унија е горда на тие вредности и ќе продолжи да ги брани.Претседателот на Европскиот совет Антонио Кошта ја оцени одлуката на Вашингтон како неприфатлива меѓу сојузници, партнери и пријатели. Тој нагласи дека Европската унија цврсто стои зад одбраната на слободата на изразување, правичните дигитални правила и сопствениот регулаторен суверенитет, додавајќи дека ваквите потези само го продлабочуваат недоразбирањето меѓу двете страни.Забраната за влез се очекува дополнително да ги влоши односите меѓу САД и дел од европските престолнини, особено околу чувствителни прашања како слободата на говор, одбраната, миграцијата, односот кон крајната десница, трговијата и војната меѓу Русија и Украина.Одлуката доаѓа неколку недели по објавувањето на американската стратегија за национална безбедност, во која се наведува дека Европа се соочува со, како што е формулирано, „цивилизациско бришење“ и дека мора да го промени правецот доколку сака да остане сигурен сојузник на САД. Потегот на администрацијата на Трамп беше осуден и од францускиот претседател Емануел Макрон, како и од германското Министерство за правда, кои предупредија дека ваквите мерки го нарушуваат духот на сојузништво и демократските принципи.

Свет | пред 1 месец

Повеќе од година малолетничка била сексуално експлоатирана во Тетово: ја натерал да се заљуби во него, па ја продавал

Јавен обвинител од Основното јавно обвинителство за гонење на организиран криминал и корупција, постапувајќи по кривичната пријава поднесена од Националната единица за сузбивање на криумчарење на мигранти и трговија со луѓе при МВР, донесе Наредба за спроведување на истражна постапка против пет лица.„Првоосомничениот од есента 2023 година до крајот на 2024 година, во Тетово, откако започнал емотивна врска со тогаш петнаесетгодишната жртва, ја злоупотребил положбата на љубовен партнер и континуирано манипулирајќи со неа и искористувајќи ја довербата што жртвата му ја укажала, ја довел во состојба на зависност. Користејќи различни форми на принуда ѝ овозможил на жртвата да конзумира психотропни супстанции, со што ја доведувал во состојба на физичка или ментална неспособност воспоставувајќи контрола врз неа. Лишувајќи ја од способност самостојно да донесува одлуки го вовлекол детето-жртва во состојба на сексуална експлоатација. Заради остварување имотна корист, ја подведувал жртвата да дава сексуални услуги, а на останатите осомничени и други неидентификувани лица им овозможил да користат сексуални услуги од детето – жртва, кои иако знаеле и биле должни и можеле да знаат дека е жртва на трговија со луѓе, сепак ги користеле сексуалните услуги и му плаќале на осомничениот директно или преку детето – жртва“, велат од Обвинителството.Ценејќи ги околностите, јавниот обвинител утврди дека се исполнети условите за определување на мерка притвор и на судијата на претходна постапка при Основниот кривичен суд Скопје му предложи истата да им ја определи на сите петмина осомничени.

Македонија | пред 1 месец

Орбан предупредува: 2025 може да биде последната година на мир за Европа која се лизга кон војна

Унгарскиот премиер Виктор Орбан во божиќно интервју за унгарскиот весник „Маѓар Немзет“ изјави дека не може да се исклучи можноста 2025 година да биде последната година на мир за Европа, оценувајќи дека самото поставување на такво прашање е шокантно за континент кој со децении живеел во релативна безбедност.Орбан потсети дека Европа е навикната на мир, нагласувајќи дека последната голема војна на европско тло завршила во 1945 година, по што следеле осум децении без директен континентален конфликт од таков обем. Според него, долги години нуклеарното оружје дејствувало како фактор на одвраќање, бидејќи се верувало дека секоја европска војна би прераснала во нуклеарен светски судир. Тој оцени дека тој страв функционирал речиси осумдесет години, но дека денес светот влегува во сосема нова фаза.Осврнувајќи се на последниот самит на Европската унија во Брисел, Орбан изјави дека Европа во моментов не се движи кон мир, туку се приближува кон војна. Според него, Унгарија успеала само да го забави темпото со кое Унијата се лизга кон конфликт, но не и целосно да го запре процесот. Тој оцени дека на европската сцена повторно се оформуваат два табора – еден што заговара војна и друг што се залага за мир, при што, како што рече, во моментов доминираат силите што ја поддржуваат конфронтацијата.Унгарскиот премиер смета дека војната меѓу Русија и Украина не е коренот на европската нестабилност, туку нејзина последица. Вистинската причина, според него, лежи во политичкиот, економскиот и општествениот пад на Западна Европа, процес што, како што тврди, започнал уште во средината на 2000-тите години и значително се забрзал по светската финансиска криза. Орбан нагласи дека пред дваесет години економските перформанси на Европската унија и САД биле приближно еднакви, додека денес Америка забрзано напредува, а Европа, како што рече, се движи надолу и ја губи својата глобална тежина.Тој ја критикуваше и ориентацијата на Европа кон таканаречена воена економија, оценувајќи дека тоа е познат историски рефлекс на општества кои не можат да се натпреваруваат со побрзо растечките региони и затоа се обидуваат да создадат економски раст преку воена индустрија. Орбан изјави дека Европа во февруари 2022 година можела да испрати мировна мисија во Москва и Киев и да не го прогласи конфликтот за своја војна, додавајќи дека во таков случај денес континентот немало да живее во сенка на вооружен судир.Посебно ја нагласи улогата на САД, тврдејќи дека интервенцијата на администрацијата на поранешниот американски претседател Џо Бајден ја наклонила рамнотежата во корист на воениот табор. Воедно, оцени дека најавите на новиот американски претседател за мир претставуваат предупредување за Европа и дека Унијата не смее своите стратешки одлуки да ги темели на внатрешнополитичките циклуси во САД.Орбан беше исклучително критичен и кон функционирањето на Европската унија, оценувајќи дека таа се наоѓа во состојба на распаѓање и дека паралелно со процесите на дезинтеграција се засилуваат имперските амбиции на бриселската бирократија. Како пример ги наведе зелените политики и планираната забрана на возила со мотори со внатрешно согорување од 2035 година, за кои рече дека сериозно ѝ наштетиле на европската индустрија, особено на автомобилскиот и хемискиот сектор.Говорејќи за Украина, Орбан јасно порача дека членството во Европската унија не е безбедносна гаранција и дека поврзувањето на мирот со влезот на Украина во Унијата е погрешно. Тој нагласи дека Унгарија се противи дури и на почетокот на пристапните преговори, оценувајќи дека вклучувањето на Украина би ја ослабнало Европската унија и дополнително би ги исцрпело нејзините ресурси.Премиерот истакна дека унгарската економија трпи последици и од војната и од слабеењето на Европската унија, додавајќи дека санкциската политика на Брисел сериозно ја погодила европската индустрија и довела до значително повисоки цени на енергијата во споредба со конкурентските економии.Во завршницата на интервјуто, Орбан зборуваше и за човечката цена на конфликтот, наведувајќи дека илјадници луѓе неделно излегуваат од борбите на двете страни, што, според неговите проценки, значи стотици илјади жртви годишно. Тој го постави прашањето кој ќе ја преземе моралната одговорност за таквите загуби.Обраќајќи им се на граѓаните на Унгарија, Орбан порача дека западниот свет се наоѓа во период на длабоки превирања и повика на самопочит и зачувување на сопствените вредности, оценувајќи дека токму тоа е патот што може да ја доведе земјата и нејзиниот народ кон мир.

Свет | пред 1 месец

Русија повикува на обновување на односите со САД, но под сопствени услови

Рускиот Совет на Федерацијата денеска му препорача на Министерството за надворешни работи на Русија да продолжи со напорите за обновување на полноправните односи меѓу Русија и Соединетите Американски Држави, водејќи сметка за руските национални интереси. Ова е наведено во резолуцијата што беше усвоена по обраќањето на рускиот министер за надворешни работи Сергеј Лавров пред членовите на горниот дом на рускиот парламент.Во текстот на резолуцијата се истакнува потребата од продолжување на работата на обновување на односите на заемно корисна основа, како и изградба на дијалог со САД кој ќе ги земе предвид интересите на Русија и значењето на одржливо решение за состојбата во Украина. Притоа, се нагласува дека решавањето на конфликтот мора да ги адресира, како што наведуваат руските власти, „основните причини“ за украинската криза.Советот на Федерацијата, исто така, упати апел до земјите што Москва ги дефинира како дел од „глобалното мнозинство“ да се дистанцираат од, како што се наведува, конфронтациската политика на Советот на Европа кон Русија.Резолуцијата доаѓа во услови на продолжени тензии меѓу Москва и западните земји, при што руските власти сè почесто нагласуваат дека евентуалната нормализација на односите со САД мора да се темели на рамноправност, почитување на суверенитетот и признавање на руските позиции во однос на безбедносните прашања и конфликтот во Украина.

Свет | пред 1 месец

Сајбер-криминалците украле криптовалути вредни рекордни 2,7 милијарди долари

Сајбер-криминалците годинава украле криптовалути во вкупна вредност од рекордни 2,7 милијарди американски долари, покажуваат податоците на компании специјализирани за следење на блокчејн-трансакции, меѓу кои „Чејналисис“ (Chainalysis) и TRM Labs, како и базата REKT која ги евидентира кражбите поврзани со web3 и DeFi-проекти.Ова претставува значителен раст во однос на претходните години, кога во 2024 година беа украдени околу 2,2 милијарди долари, а во 2023 година приближно две милијарди долари. Податоците укажуваат на континуиран пораст на сајбер-нападите врз крипто-платформи и дигитални паричници, како и на сè поголема софистицираност на хакерските групи.Најголемата поединечна кражба оваа година е регистрирана на крипто-берзата „Бајбит“, од каде што напаѓачите успеале да одземат околу 1,4 милијарди долари во дигитални средства. Според пренесените информации, за оваа масовна кражба се сомничат хакерски групи поврзани со владата на Северна Кореја, наведува технолошкиот портал „Тек Кранч“.Експертите предупредуваат дека ваквите напади претставуваат сериозна закана за довербата во крипто-пазарот и дека без дополнителни безбедносни мерки и меѓународна соработка, ризикот од слични инциденти ќе продолжи да расте.

Свет | пред 1 месец

Научен пробив: Најдеталните симулации досега откриваат што се случува на работ од црните дупки

Научници со помош на суперкомпјутери создадоа досега најдетални симулации кои откриваат како гасот и материјата се однесуваат на самиот раб на црните дупки, во подрачја каде што екстремната гравитација се среќава со огромно зрачење. Новата студија нуди клучни сознанија за хаотичните процеси што со децении ги збунуваа астрономите, пренесува Science Alert.Подрачјата во непосредна близина на црните дупки се сметаат за исклучително нестабилни, склони кон ненадејни блесоци, моќни млазови и исфрлање на материја. Предвидувањето на ваквите појави досега претставуваше голем научен предизвик поради сложената математика и екстремните физички услови што владеат таму. Поради тоа, претходните модели мораа да се потпрат на значителни поедноставувања за пресметките воопшто да бидат возможни.Новата студија, спроведена од истражувачи од американскиот институт „Флатирон“, нуди најдетален приказ досега за начинот на кој црните дупки со ѕвездена маса ја привлекуваат и исфрлаат материјата. Користејќи два исклучително моќни суперкомпјутери, научниот тим успеал да ги поврзе набљудувањата на протокот на материја со мерењата на ротацијата на црната дупка и нејзиното магнетно поле, создавајќи модел заснован на далеку посложени и пореални податоци.Астрофизичарот Лижонг Џанг од институтот „Флатирон“ истакнува дека ова е првпат најважните физички процеси во акрецијата на црните дупки да бидат вклучени без поедноставување. Според него, овие системи се исклучително нелинеарни и секоја поедноставена претпоставка може целосно да го промени конечниот резултат.Симулациите покажале дека гасниот диск околу брзовртечка црна дупка станува сè погуст кон средиштето, додека истовремено моќен млаз од гас, управуван од магнетни полиња, се исфрла нанадвор. Овие резултати се совпаѓаат со набљудувањата на различни типови системи со црни дупки. Истражувачите утврдиле дека кога црната дупка привлекува доволно материја, се формира густ акрециски диск кој апсорбира огромни количини зрачење, а енергијата потоа се ослободува преку силни ветрови и млазови.Дополнително, симулациите откриле формирање на тесен „левак“ кој ја вовлекува материјата со неверојатни брзини и создава сноп зрачење што е видлив само под одредени агли. Утврдено е и дека распоредот на околното магнетно поле игра клучна улога во однесувањето на црната дупка, помагајќи да се насочи протокот на гасот кон хоризонтот на настаните и повторно да се исфрли кон надворешноста.Технологијата што стои зад ова откритие ја вклучува Ајнштајновата општа теорија на релативност, која објаснува како масите го искривуваат просторот и времето, како и детални модели што ги опфаќаат законите на физиката кои управуваат со плазмата, магнетните полиња и интеракцијата меѓу светлината и материјата. Истражувачите нагласуваат дека нивниот алгоритам е единствениот што моментално овозможува третман на зрачењето во рамките на општата теорија на релативност, со прецизно следење на движењето на фотоните низ искривено простор-време.Во иднина, научниците планираат да проверат дали овие симулации можат да се применат и на други типови црни дупки, вклучително и на супермасивната црна дупка Стрелец А* во центарот на Млечниот Пат. Тие веруваат дека моделите би можеле да помогнат и во решавањето на мистеријата на неодамна откриените „мали црвени точки“, вселенски објекти кои емитуваат помалку рендгенско зрачење отколку што се очекувало.Иако моделите користат параметри соодветни за црни дупки со ѕвездена маса, истражувачите сметаат дека многу од општите карактеристики на резултатите ќе бидат применливи и кај супермасивните црни дупки. Истражувањето е објавено во научното списание The Astrophysical Journal.

Магазин | пред 1 месец

Љупчо Палевски-Палчо бара да го ослободат или предметот пак да се суди: Пресудата е расказ

Љупчо Палевски – Палчо, осуден на доживотна казна затвор за грабнување и две свирепи убиства, преку својот бранител поднесе жалба до Апелациониот суд во Скопје, со која бара да биде ослободен од вина или предметот да се врати на повторно судење.Жалбата до скопска Апелација ја поднел неговиот адвокат Јовица Страшевски, кој во изјава за „Скопје1“ наведува дека во првостепената постапка биле сторени сериозни процесни пропусти.„Имаме најдено доста суштествени повреди во постапката. Дел од доказите воопшто не се изведени на суд, а се наведени во пресудата. Има случаи каде што доказ се побива со исказ на обвинет, а исказ на обвинет не може да биде доказ. Побаравме јавна седница, каде што дополнително ќе ги образложиме наодите, бидејќи рокот за жалба беше кус. Бараме или повторно судење, или ослободителна пресуда“, истакна Страшевски.Според одбраната, доказите содржани во пресудата претставуваат „расказ“, со значајни несогласувања, особено во делот на временските рамки, што, како што најавуваат, ќе биде детално елаборирано на јавната седница пред Апелациониот суд.Судија-известител за предметот во скопска Апелација е Ѓоко Ристов, а предметот веќе е доставен на мислење до Вишо јавно обвинителство Скопје.Во првостепената пресуда, судијата Ивица Стефановски на Палевски и на останатите обвинети – Велибор Манев, Боре Видевски и Влатко Кешишев – им изрече по 10 години затвор за кривичното дело грабнување на Вања Ѓорчевска и Панче Жежовски, како и доживотна казна затвор за двете свирепи убиства.Во истиот предмет, таткото на Вања, Александар Ѓорчевски, беше ослободен од обвинението, но Јавното обвинителство на таа одлука веќе поднесе жалба до Апелациониот суд.Скопска Апелација во наредниот период треба да закаже јавна седница, по која ќе одлучува дали ќе ја потврди првостепената пресуда, ќе ја укине и ќе наложи повторно судење или ќе донесе поинаква одлука.

Македонија | пред 1 месец

АХВ затвори 9 новогодишни куќарки во Струга поради сериозни хигиенски пропусти

Агенцијата за храна и ветеринарство – Агенција за храна и ветеринарство спроведе вонреден инспекциски надзор во девет новогодишни куќарки лоцирани во градската чаршија во Струга, при што издаде решенија за забрана за работа поради неисполнување на основни хигиенски услови.Контролата била извршена на 22 декември, а инспекторите утврдиле сериозни неправилности во работењето. Во куќарките работеле физички лица кои не ги исполнувале минималните санитарно-хигиенски стандарди пропишани со закон.Меѓу утврдените пропусти се наведува дека објектите не биле поврзани на градската водоводна мрежа, немале спроведено задолжителна дезинфекција, дезинсекција и дератизација, а лицата кои подготвувале и продавале храна немале извршено задолжителни здравствено-санитарни прегледи. Дополнително, не биле почитувани ниту правилата за Добра производствена и Добра хигиенска пракса.На угостителите им се изречени парични казни во износ од по 200 евра во денарска противвредност, а истовремено им се издадени и налози за задолжителна регистрација во Агенцијата како оператори со храна.Од АХВ информираат дека решенијата за времена забрана за вршење на дејност ќе останат во сила сè додека не бидат исполнети сите законски и хигиенски услови за безбедно работење.Од Агенцијата апелираат до сите оператори со храна да ги почитуваат пропишаните стандарди, особено во периоди на зголемена фреквенција на граѓани, со цел заштита на здравјето на потрошувачите.

Македонија | пред 1 месец

Или сите ќе го носат товарот, или ќе следат други одлуки – Македонска пошта мора да расте, дециден е Николоски

Вицепремиерот и министер за транспорт Александар Николоски денеска порача дека состојбата на поштенскиот пазар не може да остане иста и дека мора да се воспостави фер однос меѓу државната и приватните пошти.На јавниот состанок што го одржа Агенцијата за пошти, Николоски нагласи дека е неприфатливо приватните оператори да го преземаат само профитабилниот дел од пазарот, додека Македонска пошта ја носи општествената одговорност за испорака и во рурални и непрофитабилни средини.„Да бидеме фер и отворени – многу е лесно да се земе делот од пазарот што е профитабилен, а Македонска пошта да ја има општествената одговорност. Или сите подеднакво ќе го носат товарот, или ќе носиме други одлуки“, истакна Николоски, нагласувајќи дека неговата цел е Македонска пошта да расте, а не да пропаѓа.Тој потсети дека и во рамки на Планот за раст се бара подобрување на ефикасноста со намалување на трошоците до 15 проценти и зголемување на профитабилноста за ист процент, но оцени дека тоа во сегашните услови е практично невозможно без промена на регулативата.Николоски истакна дека Македонија во континуитет ја следи европската пракса за регулација на поштенскиот пазар, иако земјата не е членка на ЕУ, што создава сериозни предизвици за функционирањето на Македонска пошта. Притоа подвлече дека оваа Влада има јасна определба да го заштити државниот капитал и државните компании, за разлика од претходни влади кои, како што рече, биле подготвени да ги продаваат.Во таа насока најави и законски измени, кои ќе бидат резултат на консултации со сите релевантни чинители на пазарот, со цел создавање поправични услови за работа.Вицепремиерот информираше и дека следниот месец Владата ќе ѝ обезбеди на Македонска пошта 100 возила – 90 помали и 10 поголеми комбиња – со што значително ќе се подобрат условите за работа и испорака.Покрај тоа, најави програма за дополнителна поддршка во делот на софтвер, сортирки, просторни услови и модернизација на услугите, при што соработката со Агенцијата за пошти ќе има клучна улога.Осврнувајќи се на глобалните трендови, Николоски нагласи дека традиционалната трговија постепено изумира, а е-трговијата станува сè поатрактивна, што отвора нови можности токму за поштенскиот сектор.„Ќе гледаме затворени дуќани и трговски центри, но и многу повеќе пратки што ќе одат директно до адресите на граѓаните. Тоа е шансата и за државната и за приватните пошти, но и можност загубените работни места во традиционалната трговија да се надоместат со нови“, истакна тој.Според Николоски, работите мора да се гледаат реално, а не розово, со цел и државната и приватните пошти да работат профитабилно, да имаат повеќе вработени и да не се повторуваат лошите искуства од минатото.Инаку, на македонскиот пазар во моментов работат 29 правни лица за поштенски услуги – 28 со општо овластување и АД Пошта на Македонија како државна компанија.На настанот се обрати и директорката на Агенцијата за пошти Марина Тоневска, која направи осврт на досегашните активности и идните планови, додека Данијела Спасиќ Томовска ја презентираше анализата за пазарот на поштенски услуги за првата половина од 2025 година.

Македонија | пред 1 месец

Мицкоски: Не им се лутиме на тие што заминаа, каменот тежи на своето место, Македонија има потреба од вас

Премиерот Христијан Мицкоски упати силна и емотивна порака до македонските иселеници кои се вратиле во татковината и започнале нови, успешни приказни, истакнувајќи дека нивното враќање не е симболично, туку суштинско за развојот на државата.Обраќајќи им се на луѓе кои, како што рече, ја знаат Македонија „и одвнатре и однадвор“, Мицкоски нагласи дека заминувањето од татковината не било прашање на желба, туку на нужда – потрага по подобри услови, сигурност и перспектива. „Ние не можеме да се лутиме на оние кои заминале. Ги разбираме нивната мака, нивната борба и нивните тешки одлуки“, истакна премиерот.Тој посочи дека, и покрај успехот во странство, човек секогаш останува „дојденец“, додека дома е свој на свое. „Само дома твоето име, твојот труд и твојата приказна имаат длабок корен и трајна вредност“, рече Мицкоски, потсетувајќи на народната мудрост дека „каменот тежи на своето место“.Премиерот нагласи дека знаењето и искуството стекнато во странство, со враќањето во Македонија, добиваат нова смисла и стануваат темел за отворање нови бизниси, работни места и идеи што носат свежа енергија во економијата. Според него, Македонија повеќе не е земја што стои во место, туку држава што се менува и се развива преку инвестиции во индустрија, енергетика и инфраструктура.„Нашата обврска како Влада е да создадеме услови – стабилност, правна сигурност и поддршка за инвестиции. Но државата не се гради само со институции, туку со умови, знаење и храброст“, порача Мицкоски.Во обраќањето беше испратена јасна порака и до македонската дијаспора ширум светот: „Ве разбираме, ве почитуваме и вратите се отворени“. Премиерот нагласи дека не се ветува лесен пат, но се нуди смисла и можност трудот да биде дел од нешто поголемо – придонес за заедницата и идните генерации.„Домот не е совршен, домот се гради. А нашата заедничка Македонија денес е токму тоа – дом што се гради и во кој има место за сите свои луѓе“, заклучи Мицкоски, оценувајќи дека повратниците се доказ дека враќањето е сила и најсилната порака до сите дека татковината сè уште ги чека своите.

Македонија | пред 1 месец

Собраниски заклучоци за Кочани: Апасиев повикува на правда, институционална одговорност и обесштетување

Пратеникот и претседател на Постојаната анкетна комисија за слободата и правата на граѓанинот, Димитар Апасиев, информира дека до сите пратенички групи во Собранието доставил Предлог-заклучоци од одржаната седница на Комисијата, поврзана со претставката на родителите на загинатите деца во трагедијата во Кочани.„Очекувам предложените заклучоци да бидат едногласно усвоени на првото продолжение на V-та седница на Постојаната анкетна комисија“, соопшти Апасиев преку социјалните мрежи.Со Предлог-заклучоците најостро се осудува институционалната нефункционалност која доведе до трагедијата од 16 март во дискотеката „Пулс“ во Кочани, при што се изразува и најдлабоко сочувство до семејствата на жртвите и до повредените. Во документот се укажува на сериозни институционални слабости, системско непочитување на законите и можни обиди за прикривање на одговорноста, што, како што се наведува, наметнува итна и решителна реакција од сите државни институции.Комисијата бара спроведување независна, транспарентна и темелна кривична постапка со која ќе се утврдат сите одговорни лица и институции, при што одговорност мора да понесат и носителите на јавни функции, без какви било исклучоци.Во заклучоците се потсетува дека правото на живот е највисока вредност во уставниот поредок на државата, поради што се упатува повик до Јавното обвинителство да постапува непристрасно, навремено и неселективно, со цел да се обезбеди правда за жртвите и нивните семејства.Дополнително, се изразува загриженост за наводите за корупција во постапките за издавање дозволи и во инспекцискиот надзор. Во таа насока се препорачува Собранието да усвои итни законски измени за унапредување на регулаторниот и инспекцискиот надзор врз угостителските и другите објекти наменети за одржување јавни настани, како и за заострување на кривичната одговорност на службените лица кои не постапуваат согласно закон.Се поддржува и одржување надзорна расправа во Собранието за утврдување на институционалната одговорност и предлагање конкретни мерки за превенција, при што се нагласува потребата од ефикасен и независен правосуден систем и целосно искоренување на корупцијата.На крајот, Апасиев упатува апел до пратениците од власта и опозицијата да постигнат консензус и да донесат посебен закон за обесштетување на семејствата на жртвите од трагедијата во Кочани, а усвоените заклучоци да бидат доставени до Владата и до Јавното обвинителство.

Македонија | пред 1 месец

Серија полициски интервенции во Скопје: дрога, тепачки и пријавени повреди на работно место

Полициски службеници од СВР Скопје во текот на 23 декември презеле повеќе интервенции и активности на различни подрачја во главниот град, при што биле приведени две лица поради недозволена трговија со дрога и биле евидентирани повеќе нарушувања на јавниот ред и мир.Во 19:55 часот, на подрачјето на Карпош, полициски службеници од Единицата за недозволена трговија при СВР Скопје го лишиле од слобода А.Д. (37) од Скопје. При претрес во неговиот дом, извршен со судска наредба, била пронајдена и одземена марихуана. По целосно документирање на случајот ќе следува соодветна пријава.Истата вечер, во 21:15 часот, на подрачјето на општина Аеродром, полициски службеници го лишиле од слобода и Н.М. (35) од Скопје. При претрес во домот каде што престојувал, исто така со судска наредба, била пронајдена и одземена марихуана, по што ќе биде поднесена соодветна пријава.Во 20:20 часот во СВР Скопје било пријавено нарушување на јавниот ред и мир на подрачјето на Гази Баба, каде што дошло до физичка пресметка меѓу Ф.И. (38) и М.С. (38) од една страна и М.Н. (49) и Б.Н. (44) од друга страна, сите од Скопје. При пресметката биле употребени и тврди предмети, а по целосно документирање на случајот ќе следува соодветен поднесок.Во утринските часови, во 09:00 часот, Б.С. (52) од Скопје пријавил дека на 5 декември околу 05:47 часот се здобил со повреди додека извршувал работни задачи како обезбедување во стоматолошка клиника во Комплексот клиники „Мајка Тереза“. За настанот е известен надлежен трудов инспектор.Дополнително, во 15:12 часот, Б.Ш. (27) од Скопје пријавил дека на подрачјето на Бит Пазар, по претходно недоразбирање во сообраќајот, бил физички нападнат од едно лице. Полицијата презема мерки за расчистување и на овој случај.

Скопје | пред 1 месец

Осомничен 32-годишник од Албанија: неовластено влегол на е-маил и добил пристап до приватни фотографии на прилепчанец

Од Министерство за внатрешни работи информираат дека ОВР Прилеп поднело кривична пријава против Д.Ц. (32) од Република Албанија, со престој во селото Долнени, прилепско, поради постоење основи на сомнение за сторено кривично дело „оштетување и неовластено навлегување во компјутерски систем“.Според пријавата, осомничениот без согласност на едно лице ги искористил неговите лични податоци, така што неовластено ја користел неговата електронска пошта. Преку електронската адреса, пријавениот добил пристап до приватни фотографии на оштетениот и на неговата сопруга.По целосно документирање на настанот, кривичната пријава е доставена до надлежното јавно обвинителство, кое ќе постапува понатаму по предметот.

Македонија | пред 1 месец

Лажно уверение за обука: СВР Тетово гони две лица за фалсификување и несовесно работење

Секторот за внатрешни работи Тетово, во рамки на Министерство за внатрешни работи, поднесе кривична пријава против П.Т. (62) и А.Г. (56), двајцата од Тетово, поради постоење основи на сомнение дека сториле кривични дела „фалсификување службена исправа“ и „несовесно работење во службата“.Според информациите од СВР Тетово, првопријавениот изготвил уверение за извршена обука за безбедност и здравје при работа на лице кое, според официјалните списоци за присутност, воопшто не учествувало на обуката. Обуката била спроведена истиот ден за вработени во Јавното претпријатие за државни патишта, каде што било вработено лицето за кое било издадено спорното уверение.Второпријавениот, кој бил во својство на управител на Центарот за безбедност и здравје при работа Тетово, пропуштил должен надзор и несовесно постапил при извршување на службените обврски. Тој го потпишал уверението и овозможил истото да стане употребливо, иако лицето за кое било издадено не присуствувало на обуката.По целосно документирање на случајот, против двајцата осомничени е поднесена соодветна кривична пријава, а предметот е доставен до надлежното јавно обвинителство за понатамошна постапка.

Македонија | пред 1 месец

Обид за лажна сообраќајна незгода во Тетово: тројца кривично пријавени за измама

Секторот за внатрешни работи Тетово, во рамки на Министерство за внатрешни работи, поднесе кривична пријава против А.Б. (44), М.А. (39) и Г.Ш. (25), сите од Тетово, поради постоење основи на сомнение дека сториле кривично дело „измама“.Според информациите од СВР Тетово, на 16 декември 2024 година пријавените се обиделе со лажно прикажување факти да измамат полициски службеници од сообраќајната полиција. Тие претходно се договориле и во кругот на автоперална на улицата „Маршал Тито“ во Тетово фиктивно предизвикале судир меѓу две патнички возила од марката „БМВ“, од кои едното било со швајцарски национални ознаки, а другото со тетовски регистарски таблички.Целта на договорениот и инсцениран судир, како што наведуваат од полицијата, била да се прикаже лажна сообраќајна незгода и на тој начин да се наплати осигурително обештетување од осигурително друштво. Благодарение на навремената реакција и проверките од страна на полициските службеници, обидот за измама бил откриен и спречен.Против тројцата осомничени е поднесена соодветна кривична пријава, а предметот е доставен до надлежното јавно обвинителство за понатамошно постапување.

Македонија | пред 1 месец

(Видео) Ново сериозно свлечиште во Пелагонија – аларм за безбедноста на патната инфраструктура

Големо свлечиште што се активираше вчера на регионалниот пат Новаци – Маково, кај депонијата Мегленци, целосно го пресече коловозот и го стави патниот правец надвор од функција. Од видеото што кружи на социјалните мрежи се гледа како земјиштето пропаѓа, а асфалтот е буквално „проголтан“ од свлечиштето.Според првичните информации, среќна околност е што во моментот на активирањето на свлечиштето на патот немало возила, со што е избегната можноста за човечки жртви или повредени.Градоначалникот на Општина Новаци, Стевче Стевановски, во вчерашното обраќање до јавноста предупреди на сериозната опасност по безбедноста на овој регионален патен правец. Тој информираше дека веднаш по настанот на терен излегле екипи на РЕК Битола и на Јавното претпријатие за одржување на патишта, кои работат на итна санација на деформацијата и стабилизирање на теренот.Настанот повторно ја отвора загриженоста за состојбата на земјиштето и инфраструктурата во поширокиот регион. Потсетување дека пред околу три недели беше регистрирана и колосална пукнатина во земјата во атарот на Липково, каде што беше утврдено активно свлечиште што претставуваше директна закана за локалното население. Тогаш жителите јавно побараа итна реакција од надлежните институции за запирање на ерозијата и спречување на евентуална катастрофа.Надлежните служби најавуваат дека дополнителни информации за состојбата на патот Новаци – Маково и за понатамошните мерки ќе бидат соопштени откако ќе се направи целосна проценка на ризикот и стабилноста на теренот. До тогаш, апелот до граѓаните е да го избегнуваат овој патен правец и да користат алтернативни рути.

Македонија | пред 1 месец

СДСМ обвинува: Загуба од над 100 милиони евра во ЕСМ – кој профитира од увозот на струја?

Генералниот секретар на СДСМ, Александар Саша Димитријевиќ, денеска обвини дека поскапувањето на електричната енергија и прогласувањето кризна состојба не се резултат на надворешни фактори, туку на, како што рече, криминални тендери и неспособно управување со енергетскиот сектор од страна на Владата.Според Димитријевиќ, наместо да се зголемат платите и пензиите, граѓаните се соочуваат со повисоки сметки за струја, додека државниот буџет се соочува со дупка од околу една милијарда евра. Тој тврди дека за само година и половина, Владата ја довела државната енергетска компанија ЕСМ до финансиски и производствен колапс.„Оваа година имаме историски најниско производство на домашна струја – не е произведена ниту половина од планираните 5.100 GWh. Наместо домашно производство кое чини 80–90 евра по мегават-час, државата купува струја по цена од 140 евра“, истакна Димитријевиќ.Според податоците што ги изнесе, загубата на ЕСМ за првите два квартали од 2025 година изнесува 77 милиони евра, а проекциите се дека до крајот на годината таа ќе надмине 100 милиони евра. Токму овие загуби, според СДСМ, се причина за поскапувањето на струјата и за прогласувањето кризна состојба.Димитријевиќ го постави и клучното прашање – кој профитира од скапиот увоз на електрична енергија и зошто навреме не биле обезбедени енергенси, како мазутот. Тој повторно ги посочи и, како што рече, сомнителните тендери, меѓу кои 161 тендер доделени на една фирма и договор од 9 милиони евра за компанија со само двајца вработени.СДСМ побара Јавното обвинителство итно да отвори истрага за загубите во енергетскиот сектор и да се утврди одговорност.„Кој ќе одговара за над 100 милиони евра загуба? Кој заработува додека народот плаќа поскапа струја? Одговорност мора да има“, порача генералниот секретар на СДСМ.

Македонија | пред 1 месец

Русија планира нуклеарна електрана на Месечината до 2036 година

Русија планира во следната деценија да изгради електрана на Месечината која ќе го снабдува со енергија нејзиниот лунарен вселенски програм, како и заедничката руско-кинеска истражувачка станица. Со овој чекор, Москва се вклучува во забрзаната глобална трка на големите сили за истражување и долгорочно присуство на единствениот природен сателит на Земјата.Од времето кога советскиот космонаут Јуриј Гагарин во 1961 година стана првиот човек што отпатувал во вселената, Русија се сметаше за една од водечките сили во оваа област. Сепак, во последните децении, земјата заостанува зад САД, а сè повеќе и зад Кина, особено поради технолошкиот напредок и комерцијализацијата на вселенските летови.Рускиот вселенски програм претрпе сериозен удар во август 2023 година, кога беспилотната мисија „Луна-25“ се урна при обидот за слетување на Месечината. Во меѓувреме, приватни компании, предводени од Илон Маск, значително го променија пазарот на лансирање летала – област во која Русија некогаш доминираше.И покрај тоа, руската државна вселенска корпорација „Роскосмос“ соопшти дека планира изградба на лунарна електрана до 2036 година и дека за таа цел е потпишан договор со воздухопловната компанија „Лавочкин асоцијација“. Според соопштението, електраната треба да обезбедува енергија за роверите, опсерваториите и инфраструктурата на заедничката руско-кинеска Меѓународна лунарна истражувачка станица.„Проектот е важен чекор кон создавање трајно функционална научна лунарна станица и премин од еднократни мисии кон долгорочна програма за истражување на Месечината“, наведуваат од „Роскосмос“.Иако во официјалното соопштение не се наведува експлицитно дека електраната ќе биде нуклеарна, меѓу вклучените партнери се руската државна нуклеарна корпорација „Росатом“ и Институтот „Курчатов“, водечкиот руски центар за нуклеарни истражувања, што укажува на таков тип енергетско решение.Претходно, директорот на „Роскосмос“, Дмитриј Баканов, изјави дека поставувањето нуклеарна електрана на Месечината е еден од клучните цели на корпорацијата, заедно со идни мисии за истражување на Венера – планета која често се нарекува „сестринска“ на Земјата.Со овие најави, Русија сигнализира дека сака да се врати во првите редови на вселенските истражувања, и покрај технолошките и финансиските предизвици со кои се соочува во изминатите години.

Свет | пред 1 месец

РКЕ: 95% отчитување на броилата, воведени вонредни екипи за празниците

Регулаторната комисија за енергетика, водни услуги и услуги за управување со комунален отпад (РКЕ) информира дека е зголемен процентот на отчитување на броилата на 95 отсто на тримесечно ниво, односно на 90 отсто на месечно ниво. Истовремено, таргетирани се околу 10.000 потрошувачи кои во последните две години имале приговори или поплаки поврзани со фактурите за електрична енергија, со кои е започната етапна телефонска комуникација.Овие активности се дел од сетот активни мерки што, по налог на РКЕ, ги презеде операторот на електродистрибутивниот систем – Електродистрибуција ДООЕЛ Скопје.Во пресрет на зимските месеци, на иницијатива на РКЕ беше одржан координативен состанок со раководството на Електродистрибуција, на кој беа презентирани преземените чекори за подобрување на услугите и зајакнување на двонасочната комуникација со потрошувачите, со цел зголемување на довербата, транспарентноста и отчетноста.Од РКЕ нагласија дека клучно е редовното отчитување да продолжи и во првите недели од јануари. Од Електродистрибуција информираа дека, имајќи ги предвид искуствата од претходните години со зголемен број поплаки за време на празниците, се формирани вонредни екипи кои ќе работат и за време на празници и викенди. Целта е потрошувачите да добиваат сметки со реална, а не со прогнозирана потрошувачка.Компанијата соопшти и дека од 1 декември се проширени дигиталните услуги за корисниците, меѓу кои и новата услуга за онлајн корекција на фактура. Дополнително, вработените се мобилизирани да им помагаат на граѓаните при креирање кориснички профили.Покрај тоа, на располагање остануваат и веќе воведените дигитални опции како „Пријави состојба“, „Е-фактура“, како и јасната ознака на сметките со „О“ – отчитана или „М“ – проценета состојба, со што потрошувачите можат точно да знаат дали фактурата е базирана на реална или на проценета потрошувачка.Од РКЕ и Електродистрибуција упатија апел до граѓаните и во текот на зимскиот период да продолжат со одговорно и рационално користење на електричната енергија.

Македонија | пред 1 месец

Голем застој на обиколницата поради сообраќајна незгода на Качанички пат

Поради сообраќајна незгода на Качанички пат, сообраќајот на скопската обиколница се одвива со големи потешкотии и е во сериозен застој.Според првичните информации, двете коловозни ленти се целосно блокирани, што довело до формирање долги колони возила и значително забавување на сообраќајот.Надлежните служби работат на расчистување на местото на незгодата, а на возачите им се препорачува да користат алтернативни правци и да ја избегнуваат оваа делница сѐ додека не се нормализира сообраќајот.

Скопје | пред 1 месец