Премиерот Мицкоски и командантот Најт од САД со разговори за обука и размена на искуства

Премиерот Христијан Мицкоски соопшти дека остварил средба со генерал-мајор Грегори Најт, командант на Националната гарда на американската сојузна држава Вермонт.Разговорите биле насочени кон продлабочување на соработката меѓу македонските институции и Националната гарда, со акцент на обуката, размената на искуства и поддршката во развојот на современи и ефикасни одбранбени капацитети.Мицкоски оцени дека продолжува партнерството кое со години се гради меѓу Северна Македонија и Вермонт, при што ваквите средби, како што истакна, претставуваат чекор напред во унапредувањето на заедничките одбранбени политики.

Македонија | пред 6 дена

Револуција во медицината: Новата генска терапија носи ремисија кај неизлечив рак на крв

Терапија која до неодамна се сметаше за научна фантастика успеа да го преобрати текот на некои од најагресивните и дотогаш неизлечиви форми на рак на крвта, објавија лекарите. Овој пионерски третман се заснова на прецизно уредување на ДНК во белите крвни зрнца, трансформирајќи ги во „жив лек“ што директно ги напаѓа канцерогените клетки, јавува BBC.Првата пациентка, девојче лекувано во 2022 година, и денес е без знаци на болест и планира да стане научник специјализиран за рак. Во меѓувреме, со истиот третман биле опфатени уште осум деца и две возрасни лица со Т-клеточна акутна лимфобластична леукемија, а речиси две третини од пациентите (64%) постигнале ремисија. За сите нив, хемотерапијата и трансплантацијата на коскена срж веќе не давале резултат, а единствената преостаната опција била палијативна грижа.Шеснаесетгодишната Алиса Тепли од Лестер, која прва го примила ова лекување, сведочи: „Навистина мислев дека ќе умрам и дека нема да можам да пораснам и да ги правам сите работи што секое дете заслужува.“ Нејзиниот стар имунолошки систем целосно бил уништен, а потоа создаден нов. Поминала четири месеци во болница, целосно изолирана поради ризик од инфекција. Денес, ракот кај неа не е воочлив и потребни ѝ се само годишни прегледи.Како функционира „живиот лек“?Истражувачите од University College London и болницата Great Ormond Street користеле технологија наречена „уредување бази“. Базите – аденин (A), цитозин (C), гванин (G) и тимин (T) – се градивни елементи на генетскиот код. Уредувањето бази им овозможува на научниците да ја изменат структурата на една единствена база и на тој начин да ја променат генетската инструкција.Кај оваа форма на леукемија, Т-клетките кои треба да го штитат телото почнуваат неконтролирано да растат. Затоа, лекарите стартувале со здрави донорски Т-клетки и ги модифицирале низ неколку чекори:– го оневозможиле нивниот природен механизам за напаѓање, за да не го оштетат телото на пациентот;– го отстраниле протеинот CD7 кој се наоѓа на сите Т-клетки, за клетките да не се уништат меѓусебно;– создале „невидлив штит“ за да ги заштитат од хемотерапија;– ги препрограмирале да напаѓаат сè што носи CD7 – вклучително и канцерогените и преостанатите Т-клетки на пациентот.Резултатите се надежни, но ризиците остануваатСтудијата објавена во New England Journal of Medicine ги претставува резултатите од првите 11 пациенти. Девет од нив постигнале длабока ремисија која овозможила трансплантација на коскена срж. Седум пациенти се и натаму без болест – од три месеци до три години по третманот.„Пред неколку години ова ќе беше научна фантастика,“ вели професорот Васим Касим од UCL. „Третманот е длабок и тежок, но кога функционира – резултатите се извонредни.“ Најголемите ризици се инфекции во периодот кога имунолошкиот систем е уништен. Во два случаи, ракот ги изгубил CD7-ознаките и се „скрил“ од терапијата, по што повторно се појавил.„Станува збор за пациенти кои речиси немаа надеж за преживување,“ додава д-р Роберт Кјеса од Great Ormond Street.Д-р Дебора Јалоп од King’s College Hospital вели дека резултатите се „импресивни кај леукемија што претходно се сметаше за неуништлива“, а д-р Танија Декстер од организацијата Anthony Nolan оценува дека третманот нуди „нова надеж дека овие терапии ќе станат достапни за сè поголем број пациенти“.

Свет | пред 6 дена

Ескалација на границата: Жртви, евакуации и меѓусебни обвинувања меѓу Тајланд и Камбоџа

Борбите меѓу Тајланд и Камбоџа околу спорното гранично подрачје продолжуваат со несмалена жестина, а бројот на загинати расте додека илјадници жители се принудени да ги напуштат своите домови. Камбоџа соопшти дека уште двајца цивили биле убиени во ноќно гранитирање, со што бројот на жртвите кај нив се искачи на шест. Тајланд, пак, потврди дека загинал најмалку еден негов војник.Двете држави се меѓусебно се обвинуваат за нарушувањето на кревкото примирје постигнато во јули под покровителство на американскиот претседател Доналд Трамп, јавува BBC.Според камбоџанското Министерство за одбрана, тајландските сили отвориле оган врз провинцијата Бантеи Минчеј по полноќ, кога биле убиени двајца цивили на пат. Претходно, во гранитирањето на провинциите Преах Вихеар и Оддар Минчеј загинале уште четири лица, соопшти министерот за информации Нет Пхеактра.Тајландската страна тврди дека само возвратила на камбоџански напад во провинцијата Убон Рачатани и дека покренала воздушни операции насочени исклучиво кон воени цели. Портпаролот на тајландското Министерство за одбрана, контраадмирал Сурасан Конгсири, нагласил дека нападите се прецизно таргетирани.Поранешниот камбоџански премиер Хун Сен објави на Фејсбук дека камбоџанските сили возвратиле „синоќа и изутрина“, наведувајќи дека биле „стрпливи повеќе од 24 часа за да го почитуваат примирјето“. Неговата влада повторно ја обвини Тајланд за употреба на тенкови и отровен гас – обвинувања кои и претходно се покажале како неосновани.Тајландските власти денеска потврдија дека во воздушните напади погодиле казино-комплекс во Камбоџа кој, според нив, бил користен како „команден центар за дронови“. Не е познато дали во зградата имало луѓе во моментот на нападот, а камбоџанските власти засега не коментираат.Новиот бран насилство предизвика егзодус на илјадници жители од обете страни на границата. Пограничните заедници живеат под постојан страв. Жител на тајландската провинција Си Са Кет за BBC Thai изјави: „Ова е вистинска агонија – целиот ден сум во страв.“ Местната земјоделка Пранее Ра-нгабпаи додава дека нејзиниот дом е премногу близу до огнот и дека „пукањето јасно се слуша“.Додека многумина побегнале, дел од жителите одлучиле да останат за да ги чуваат имотите на соседите. „Останав за да спречам кражби,“ вели 49-годишниот земјоделец Сутиан Пјевчан, кој тврди дека пукотниците не престануваат од рано утро.Како последица на судирите, најмалку три болници во тајландската провинција Убон Рачатани и две во провинцијата Сурин се затворени, а пациентите се пренесуваат во привремени амбуланти. UNICEF изрази загриженост и порача дека „безбедноста и благосостојбата на децата мора да бидат приоритет“.Ова е најсериозната ескалација од јули, кога во петдневните судири загинаа десетици луѓе. Насилството го тестира и мирoвниот договор потпишан во октомври во присуство на претседателот Трамп, кој тогаш го нарече „историски успех“. Камбоџа дури го номинираше за Нобелова награда за мир.Тајландскиот премиер Анутин Чарнвиракул порача дека „ќе бидат употребени сите неопходни средства за зачувување на суверенитетот“, додека Хун Сен го обвини Тајланд за „агресија“.

Свет | пред 6 дена

Вашингтон и Киев без договор: Клучното прашање е територијата што Русија не ја освои

Мировните преговори меѓу САД и Украина запнале на централното прашање – како да се убеди Украина да се откаже од територии што Русија не успеа да ги освои во повеќе од три години војна, јавува Politico.Според висок европски функционер запознаен со процесот, американската страна е фокусирана на начините како да се реализира руското барање Украина да се откаже од Донбас. „Американците инсистираат Украина да го напушти Донбас… на овој или оној начин“, изјавил функционерот.Украина, пак, останува на ставот дека секој мировен договор мора да го замрзне конфликтот на моменталните линии на фронтот. Околу 30 проценти од Донбас сè уште е под контрола на украинските сили. „Најреално е да останеме таму каде што сме“, навел европскиот функционер, додавајќи дека Москва и понатаму врши притисок Киев да направи територијални отстапки.Американскиот претседател Доналд Трамп повторно изразил незадоволство од украинскиот однос кон предлогот. Според него, Русија е подготвена да го прифати планот, но не е сигурен дека и Зеленски го поддржува. Трамп изјавил дека украинскиот лидер „не го прочитал предлогот“, иако, како што рекол, „неговите луѓе го сакаат“.Зеленски не ги коментирал изјавите на Трамп, но за Bloomberg потврдил дека нема договор со САД за источните територии.Киев се обидува да го увери Вашингтон дека откажување од делови од Донбас би ја охрабрило Русија на понатамошни освојувања. Според украинските процени, предавањето на преостанатите 30 проценти од Доњецката област – со стратешките Краматорск и Словјанск – би го отворило патот кон Дњепропетровск, Запорижја и Харков.Минатата недела рускиот претседател Владимир Путин изјави дека Русија „секако ќе го заземе Донбас“, додека Зеленски во август предупреди дека Москва би имала потреба од околу четири години за целосно да го преземе регионот.Европскиот функционер истакнал дека клучно прашање останува позицијата на САД: „Дали ќе дејствуваат како посредник или ќе се приклонат кон Русија?“Киев, истовремено, чека појаснување за какви безбедносни гаранции САД би биле подготвени да понудат.

Свет | пред 1 седмица

СДСМ со нова порака: ‘Идризово, 2026’ – програмата сведена на една точка

СДСМ денеска ја претстави својата нова политичка порака под слоганот „Идризово, 2026 година“, наведувајќи дека програмата е сведена на една точка: „Криминалците од ВМРО-ДПМНЕ во Идризово, 2026 година.“Од партијата порачаа дека е време да се стави крај на, како што велат, организираната пљачка што ја спроведува актуелната власт и да се заврши со криминалот и корупцијата.Во нивното соопштение стои дека состојбата во Идризово ќе остане непроменета, бидејќи, според СДСМ, „нема пари за нови инвестиции – власта ги покраде“.„Исти услови, иста храна, исти штетници“, наведува СДСМ, додавајќи дека „работата не е завршена“ и дека „сите ќе одговараат“.

Македонија | пред 1 седмица

Зеленски за Блумберг: Мировниот договор е далеку, споровите околу Донбас остануваат

Иако мировните преговори под покровителство на САД се во тек, договор за клучното прашање околу териториите во источната украинска област Донбас сè уште не е постигнат, изјави украинскиот претседател Володимир Зеленски, пренесе Bloomberg News.Во телефонски разговор, Зеленски објаснил дека одредени елементи од американскиот предлог бараат дополнителни разговори за повеќе „осетливи прашања“, меѓу кои се и безбедносните гаранции за регионите Доњецк и Луганск.„Постојат визии на САД, Русија и Украина – а ние немаме единствен став за Донбас“, изјавил тој.Оваа изјава следи по коментарите на американскиот претседател Доналд Трамп, кој изрази „мало разочарување“ од фактот дека, како што кажа, Зеленски се чини дека сè уште не го прочитал предлогот. Трамп исто така изрази уверување дека украинскиот претседател не е подготвен да потпише договор.Едно од најспорните прашања во првичниот мировен план на САД, составен од 28 точки, е барањето Украина да направи значајни територијални отстапки на Русија, што би го опфатило предавањето на целиот Крим, како и регионите Луганск и Доњецк.

Свет | пред 1 седмица

(Видео) Ќе го испита ли тимот на Заев и Венко случајот кога Анѓушев ги градеше модуларните, а една се запали и загинаа 14 лица?, прашува Манасиевски

Валентин Манасиевски од ВМРО-ДПМНЕ, остро реагираше на обвинувањата на СДСМ дека директорот на Службата за општи и заеднички работи, Ивица Томовски, е поврзан со фирма која добила 161 тендер во вредност од 5,3 милиони евра. Според Манасиевски, станува збор за „конструкции и дезинформации“, а партијата „се обидува да создаде скандал каде што нема никаква основа“.„Тимот за одбрана на криминалот на Заев и Филипче мисли дека открил Америка. Големото откритие е дека Томовски е донатор на ВМРО-ДПМНЕ – како и илјадници други – и тоа е јавно достапен податок. Каде е криминалот? Го нема“, изјави Манасиевски.Тој додаде дека СДСМ треба да ги проверува информациите со стручни лица, а не „текстовите да им ги пишува Зоран Заев од Дубаи“.Манасиевски ги посочи, како што рече, „трите лаги на СДСМ“:Прво, дека фирмата не е сопственост на Томовски и дека тој нема никакви приходи или врска со нејзиното работење.Второ, дека телефонскиот број што го користи компанијата не е нејзин единствен контакт, а бројот што се споменува е личен број на Томовски кој го користи со години.Трето, дека донациите на Томовски не претставуваат никаква незаконитост, бидејќи станува збор за јавно пријавени уплати.„Во сите три случаи се потврдува дека СДСМ лаже“, рече Манасиевски.Тој возврати со обвинување дека вистинските нерешени случаи не се кај ВМРО-ДПМНЕ, туку кај нивните политички противници.„Е сега кога сме кај криминалот, го прашуваме Венко дали не е криминал тоа што додека тој е министер, негов министер и колега вицепремиерот Кочо Анѓушев му ги градеше модуларните болници од кои една се запали и загинаа 14 наши сограѓани? Кога тимот за одбрана на криминалот на Венко и Заев ќе го испита овој случај? Тоа треба да одговорат!“, рече Манасиевски.

Настани | пред 1 седмица

Сообраќајка во Охрид: Повредена жена по судир со службено возило на МВР

Министерството за внатрешни работи информира дека на 7 декември 2025 година, во 09:40 часот, во СВР Охрид била пријавена сообраќајна несреќа што се случила на крстосницата меѓу улиците „7 Ноември“ и „Васил Главинов“.Во несреќата учествувале патничко возило „пежо“ со охридски регистарски ознаки, управувано од 44-годишната Л.Т. од селото Лескоец, и службено возило „шкода јети“ сопственост на МВР, со кое управувал полицискиот службеник Н.И. (26).При судирот, со телесни повреди се здобила Л.Т., а повредите биле констатирани во Специјалната болница „Св. Еразмо“ во Охрид.На местото на настанот бил извршен увид од јавен обвинител и увидна екипа на СВР Охрид, која работи на утврдување на причините за несреќата.

Охрид | пред 1 седмица

Инцидент во беровско: Женa со ‘хјундаи’ прво удрила пешак, потоа нападнала со остар предмет

Министерството за внатрешни работи соопшти дека изминатата ноќ во село Будинарци, беровско, бил пријавен сериозен инцидент во кој учествувала 52-годишна жена од селото Возарци, кавадаречко.Според пријавата во ОВР Берово, дадена во 00:40 часот на 8 декември, М.М., управувајќи патничко возило „хјундаи“ со штипски регистарски ознаки, удрила во 38-годишниот Д.Г. од селото Митрашинци, кој стоел пред угостителски објект заедно со 24-годишниот Ѓ.Ч., исто така од Митрашинци.По ударот, жената излегла од автомобилот и со остар предмет тргнала кон Ѓ.Ч., а потоа физички го нападнала и Д.Г. По инцидентот, таа го напуштила местото заедно со лице кое се наоѓало со неа во возилото.Полицијата презема мерки за целосно расчистување на случајот и идентификација на сите околности поврзани со нападот.

Македонија | пред 1 седмица

Напади во Аеродром, Гази Баба, Бит Пазар и Сарај: жена го пријавила синот, скопјанец натепан во казино

Министерството за внатрешни работи информира дека во изминатото деноноќие биле пријавени повеќе случаи на физички напади на различни локации во Скопје и околината.61-годишна жена од скопско пријавила дека во семејниот дом била нападната од својот син, кој користел и тврд предмет. Полицијата работи на расчистување на случајот.Во СВР Скопје, во 20:00 часот, 33-годишен жител на Арачиново пријавил дека бил нападнат пред угостителски објект во Гази Баба од едно лице и уште еден сторител. Се преземаат мерки за целосно расветлување на настанот.На подрачјето на Бит Пазар, полициски службеници го лишиле од слобода 26-годишен скопјанец по пријава на неговата партнерка дека околу 15:00 часот физички ја нападнал. И во овој случај, по документирањето ќе следува поднесок.Рано утрово, во 04:00 часот, 34-годишен жител на Сарај пријавил дека околу 03:30 часот бил нападнат со тврд предмет од лице од селото Љубин. И за оваа пријава се преземаат мерки за расчистување.Дополнително, вчера во 14:05 часот, 66-годишен скопјанец пријавил дека бил нападнат во казино во Кисела Вода. Полицијата работи на идентификација на сторителот.Во 14:00 часот била примена и пријава од 43-годишен скопјанец кој околу 07:00 часот бил нападнат на подрачјето на Карпош по претходна расправија.Полицијата информира дека за сите случаи се преземаат мерки за утврдување на фактите и идентификација на сторителите.

Македонија | пред 1 седмица

Руски научници: Ретка црна дамка забележана по голема експлозија на Сонцето

Научниците од Лабораторијата за соларна астрономија при рускиот Институт за вселенски истражувања (ИКИ) соопштија дека минатата ноќ на Сонцето е забележана ретка црна дамка, формирана по силна експлозија на водород. Како што информираат, појавата е регистрирана околу полноќ по московско време.Според описот на институтот, експлозијата се проширила по сончевата површина со пречник од околу еден милион километри, создавајќи темна зона која јасно се издвојувала на набљудувањата. Овие феномени се релативно ретки и претставуваат значајни настани за научниците што ги следат активностите на Сонцето.Сончевите дамки, појаснуваат од ИКИ, се класифицираат според јачината на рендгенското зрачење што го емитуваат. Постојат пет категории – A, B, C, M и X – при што X претставува најмоќна форма на соларна активност.

Магазин | пред 1 седмица

Поранешен американски амбасадор: Трамп сака Европа да го преземе водството во односите со Русија

Поранешниот американски амбасадор во Европската унија, Гордон Сондланд, изјави дека Доналд Трамп очекува Европа во иднина да го преземе водството во односите со Русија, додека САД би играле поддржувачка улога. Во гостување на BBC Radio 4, Сондланд оцени дека овој пристап е дел од насоката во која се движи американскиот претседател.„САД можат да застанат зад Европа и да обезбедат поддршка, но Европа е таа што треба да биде на чело. Тоа е насоката во која оди Доналд Трамп“, изјави Сондланд.Тој смета дека продолжување со досегашниот модел – во кој САД самостојно комуницираат со Русија, вршат притисок врз Владимир Путин и се закануваат со мерки доколку Москва не ги прифати нивните барања – би значело дека Вашингтон повторно би се нашол во позиција директно да се соочува со рускиот режим, додека Европа останува на страна.„Ако Путин не се согласи со нашите барања, САД би биле тие што би влегле во конфликт, а Европа би гледала однадвор. Тоа не е она што Трамп сака да го направи овој пат“, додаде поранешниот амбасадор.Изјавата доаѓа во период на засилени дебати околу европската безбедност и односите со Русија, во услови на продолжена нестабилност по војната во Украина.

Свет | пред 1 седмица

Кузеска: Семејната фирма добила 161 тендер, а Томовски е голем донатор на ВМРО-ДПМНЕ

Портпаролката на СДСМ, Богданка Кузеска, денеска упати сериозни обвинувања за, како што го нарекува, „скандалот со семејната фирма“ поврзана со Ивица Томовски – директор на Службата за општи и заеднички работи на Владата, која добила 161 тендер во вредност од 5,3 милиони евра.Кузеска обвини дека Томовски интензивно се обидува да се дистанцира од фирмата, иако во неа учествуваат негови блиски роднини – таткото Витомир, роднината Кутановски, зетот, внукот, а како контакт телефон е наведен број кој му припаѓа токму на Томовски.„Затоа е нервозата? Затоа што се фатени живи“, рече Кузеска, нагласувајќи дека моделот на поврзаност е јасен и документиран.СДСМ тврди дека следејќи го „трагот на парите“ откриле дека Томовски е редовен донатор на ВМРО-ДПМНЕ. Според нив, во 2021 година Томовски донирал 8.000 евра, а во повеќе наврати уплатувал суми од 499.700 денари, 100.000 денари, 70.000 денари и 100.000 денари. Додаваат дека како донатор се јавува и неговиот зет, Кутановски.„Семејна фирма, семејни донации. Сè е јасно. Вака парите завршуваат во белата палата“, изјави Кузеска.Од партијата бараат Државната комисија за спречување корупција и Јавното обвинителство да покренат истрага за можен конфликт на интерес и корупција во врвот на владата на Мицкоски.„Крадењето на народот мора да престане, а одговорност мора да има. Работата не е завршена“, порача СДСМ.

Македонија | пред 1 седмица

Орце Ѓорѓиевски „сели” дел од администрацијата од Кисела Вода во Град Скопје

Со одлука за преземање, радоначалникот на Скопје Орце Ѓорѓиевски одлучи својот тим да го зајакне со 12 лица со кои работел додека беше градоначалник на Кисела Вода.Иако е вообичаено кај нас секој функционер да доаѓа со тим во кој има доверба, сепак сите 12 лица доаѓаат од исто место, а меѓу нив има тројца раководители на сектори: за животна средина, сообраќај и поодршка на Кабинет:четворица помошници на раководители: урбанистичко планирање, поддршка на здруженија и граѓани, поддршка на градоначалникот и општи работи. Меѓу преземените ќе има и двајца возачи, од кои едниот ќе биде за претседателот на Советот и секретарот на градот, потоа двајца инспектори и еден референт за документација.Градот се уште нема нов секретар, но според прописите, најверојатно тоа ќе биде еден од преземените, бидејќи секретарот доаѓа од редовите на администрацијата.Финансиски средства за овие 12 трајни преземања на вработени, како што е наведено во предлог одлуката, се предвидени во Буџетот на Град Скопје за 2025 година.За одлуката советниците ќе се изјаснат во среда, но со оглед на мнозинството кое го има ВМРО-ДПМНЕ, потпомогнато од ВРЕДИ и ЗНАМ нема да има проблеми одлуката да помине. Нејасно е што со административците кои до сега ја извршуваа функцијата, дали ќе бидат распределени на други места.

Скопје | пред 1 седмица

Авион од линијата Приштина – Истанбул излета од такси-патека на аеродромот

Авион од линијата Приштина – Истанбул, по слетувањето на аеродромот „Сабиха Ѓокчен“ во Турција, излета од патеката и застана на крајот од пистата. Според информациите на Амбасадата на Косово во Турција, во инцидентот нема повредени патници.Во соопштението се наведува дека авионот од типот Boeing 737-800, опериран од компанијата AJet, по редовниот лет TKJ76Q / VF102, излетал од патеката веднаш по слетувањето. Сите патници биле евакуирани безбедно преку надворешни скали, без употреба на итните лизгалки. Ниту еден патник не побарал медицинска помош, а сите уредно го напуштиле аеродромот и продолжиле кон своите дестинации.Компанијата AJet во својата изјава појасни дека авионот регуларно слетал, но при движењето по такси-патеката завршил на помека земјена површина, што се поврзува со обилните дождови што го зафатиле регионот.Инцидентот не го нарушил воздушниот сообраќај на аеродромот и не предизвикал дополнителни проблеми за патниците.

Свет | пред 1 седмица

(Видео) Затворот ми е докторат на државна сметка, не е болка затоврската средина туку пропуштените можности надвор, вели затвореникот Делов

Коста Делов, затвореник во КПУ Штип и осуден за обид за убиство на Зијадин Села, во интервју за „Претрес со Ландов“ проговори отворено за својата состојба, за изгубените години и за предизвиците на животот зад решетки.Тој призна дека најголемата болка не е затворската средина, туку пропуштените можности надвор. Според него, ѕидовите не се најстрашни – најтешко е чувството дека животот продолжил без него.„Скоро сите мои пријатели и пријателки се со семејства, со кариера. Јас каде сум?“ вели Делов.Голем дел од времето го минува во читање и самообразование. На шега говорел дека затворот му станал „магистратура и докторат на државна сметка“, а уште во притвор почнал да чита класична литература.Делов откри и дека во затворските услови човек тешко може да зачува здрав дух ако не избере внимателно со кого се дружи. Контактира само со мал, одбран круг на луѓе и смета дека тоа е единствениот начин да остане психички стабилен.Разговорот со Делов ја отвора сликата за внатрешната борба на човек кој се соочува со последиците од сопствените постапки, но и со тешката реалност на затворскиот живот, во кој – како што истакнува – најголемата загуба е времето што не може да се врати.Цел разговор:

Македонија | пред 1 седмица

ВМРО-ДПМНЕ: СДСМ создава лажен скандал со дезинформации и политички конструкции

ВМРО-ДПМНЕ реагираше на обвинувањата од СДСМ поврзани со случајот со фирмата која добила државни тендери, оценувајќи дека опозициската партија повторно користи политички конструкции и дезинформации без да понуди конкретни докази за било каков прекршок.Во реакцијата се наведува дека, согласно фактите, Игор Томовски нема надлежност и не учествува во постапки за јавни набавки, ниту има донесено службени одлуки што би можеле да се поврзат со тендери. Според партијата, станува збор за јасно проверлива состојба која ја демантира тезата на СДСМ.„Кога нема факти, СДСМ се обидува да создаде лажен скандал со интерпретации и класични дезинформации“, стои во реакцијата. Од ВМРО-ДПМНЕ посочуваат дека ваквата стратегија можеби имала одреден ефект во минатото, но денес граѓаните очекуваат аргументи, а не инсинуации.Понатаму се додава дека одговорност не може да се гради со политичка врева, туку единствено со јасни и недвосмислени докази.„Ако СДСМ има доказ, нека го објави. Ако нема, нека престане со злоупотреба на термините ‘корупција’ и ‘скандал’ за дневно-политички напади и прикривање на сопствените криминали“, порача ВМРО-ДПМНЕ.

Македонија | пред 1 седмица

Сиљановска-Давкова со честитка за Свети Климент: Да ги обновиме вредностите што ја одржуваат заедницата

Претседателката Гордана Сиљановска-Давкова упати честитка до верниците од православна вероисповед по повод државниот празник Свети Климент Охридски, нагласувајќи дека се чествува ликот и делото на најголемиот македонски просветител и верен ученик на Светите Кирил и Методиј.Во честитката се истакнува дека споменот за Свети Климент е длабоко врежан не само во македонската, туку и во колективната меморија на целото словенство. Неговото име, како што посочува претседателката, денес го носат бројни образовни, научни и културни установи, а ликот му ги краси православните храмови ширум земјата.Најголемото наследство на Свети Климент, се вели во честитката, се писменоста и вредностите што им овозможиле на луѓето да ги разберат книгите и себеси, како и одговорноста што ја имаат не само за сопствените животи, туку и за животот на заедницата. Под негово водство, нашите краишта преминале од политичка периферија во значаен образовен и духовен центар, со Охрид како престолнина на просветителската мисла.Сиљановска-Давкова потсетува дека Охридската книжевна школа и духовното творештво оставиле траен белег врз европската цивилизација, надживувајќи империи и системи поради својата непрекинлива вредност и човечка универзалност.Празникот, додава таа, е можност да се преиспита колку од вредностите на Свети Климент – милост, смирение, взаемна помош и разбирање – се препознаваат во современиот живот. Пред македонското општество, како што наведува, стои голема задача: повторно да се изградат доблестите што ја одржуваат заедницата и да се создаде заедничка цел што ќе ги надмине поделбите.Во честитката се подвлекува потребата од владеење на правото, борба против корупцијата, социјална правда и заемна грижа како темели за обновување на општествениот договор меѓу слободни и еднакви граѓани.„Нека пораката на Свети Климент за смирение, милост, знаење и заедништво биде инспирација да ја изградиме Македонија како пристојно, праведно и достоинствено место за живеење“, порача претседателката.

Македонија | пред 1 седмица

Власта ги брка младите од Македонија додека преговара за прием на мигранти, вели СДСМ

СДСМ ја обвини владата на Христијан Мицкоски дека со своите политики ја изолира Македонија, ја претвора во „црна точка“ на Европа и го забрзува иселувањето на младите. Според партијата, додека земјата се соочува со криминал, корупција и пад на животниот стандард, власта тајно преговара за прием на мигранти.Од СДСМ посочуваат дека европските транспортни коридори ја заобиколуваат Македонија, сиромаштијата расте, граѓаните имаат сè помалку пари, а младите сè почесто заминуваат во странство. Во такви услови, велат од опозицијата, Владата води разговори за враќање и трајно сместување мигранти во земјата.Партијата нагласува дека бројни британски медиуми веќе известиле за овие разговори, додека, како што велат, македонската влада се обидува да го ублажи скандалот. Според аналитичари во Обединетото Кралство, Македонија се споменува како можен домаќин на дел од мигрантите, што би подразбирало нивно трајно сместување, интеграција, домување и вработување.„Не може младите да си заминуваат, а власта да преговара за носење мигранти“, реагираат од СДСМ, оценувајќи ги овие политики како опасни и штетни за државата.Од партијата порачаа дека со целиот свој капацитет ќе се спротивстават на ваквите планови и ги повикаа граѓаните, невладините организации и целото општество да кажат „не“ на, како што велат, антидржавните политики на Мицкоски и ВМРО-ДПМНЕ.„За Македонија се работи – работата не е завршена“, стои во реакцијата на СДСМ.

Македонија | пред 1 седмица

Исчезна 48-годишен велешанец: Полицијата и семејството трагаат по Стојанче Клифов, се бара помош од јавноста

Полицијата и семејството на велешанецот Стојанче Клифов (48) интензивно трагаат по него, откако околу полноќ во сабота кон недела му се изгубила секоја трага. Неговото исчезнување предизвика голема вознемиреност во Велес, а блиските апелираат до граѓаните да помогнат со каква било информација.Неговата сестра Наташа за „Викимедиа“ изјави дека Стојанче живеел со родителите и никогаш досега не се случило да замине без да каже каде оди. Како што вели, овој пат излегол ненадејно и неочекувано, без да остави каков било траг,Според досега собраните информации, Стојанче излегол околу полноќ, а последен пат бил виден во такси-возило кое го оставило во близина на маркетот „Жито“. Со себе го имал мобилниот телефон, но веднаш по излегувањето од возилото сигналот му се изгубил.Сестрата наведува дека станува збор за крупен човек, висок околу 1,83 метри. Семејството е вознемирено и порачува дека секој детал може да биде пресуден за откривање на неговата местоположба.За сите информации што можат да помогнат, отворен е контакт број: 076 226 323.Денес семејството заедно со родителите официјално го пријавило исчезнувањето во полициската станица, а потрагата е во тек.

Македонија | пред 1 седмица

ВМРО-ДПМНЕ ја претстави стратегијата ‘Македонија 2030’ – шест стожери за стабилна и современа држава

ВМРО-ДПМНЕ на својот 18. конгрес усвои нов стратешки документ за развој на државата во следната деценија, под називот „Ново поглавје – Стратегија Македонија 2030“. Според партијата, оваа стратегија претставува јасно определување за долгорочен државен развој и ја позиционира ВМРО-ДПМНЕ како политичка сила подготвена да преземе државничка одговорност.Во образложението на документот се наведува дека државата мора да излезе од цикличните импровизации и краткорочните мерки, а да воведе систем на управување кој се темели на силни институции, конкурентна економија и вредносно стабилно општество. Стратегијата опфаќа нови области што, според партијата, ја подготвуваат Македонија за иднината – национална стратегија за вештачка интелигенција, политики за сајбер-безбедност, геоекономска дипломатија и создавање државен инвестициски Фонд за иднината кој ќе поддржува технологии, иновации и научни истражувања.Главната цел, според документот, е до 2030 година Македонија да стане држава со институционална зрелост, економска сила и стабилност во која идентитетот не се условува, туку се почитува.Стратегијата опфаќа шест клучни стожери:Првиот се однесува на националната безбедност – модерна армија, развиена сајбер-заштита и систем за справување со хибридни закани.Вториот стожер е економската конкурентност, со нагласок на создавање економија заснована на знаење, технологија и иновации, промена на моделот на евтина работна сила, поддршка за домашните компании, стабилни даноци и зелена енергетска транзиција.Третиот стожер е правната држава – независно судство, департизирана администрација и механизми за системска борба против корупцијата, особено преку дигитализација.Четвртиот стожер се демографските политики, со акцент на поддрška за младите, програми за поврат на дијаспората и подобра грижа за постарите лица.Петтиот стожер ја опфаќа европската интеграција и надворешната политика, заснована на партнерства со јасно дефинирани позиции – поддршка за европскиот пат, но без условувања кои го допираат идентитетот и достоинството на државата.Шестиот стожер ги опфаќа образованието, културата и националниот идентитет, со вложување во модерни учебни програми, дигитални кампуси, научни проекти и заштита на македонскиот јазик и културното наследство.Од партијата порачуваат дека „Македонија знае, може и мора многу повеќе“, а новата стратегија ја претставуваат како визија за стабилна, современа и европски ориентирана држава.

Македонија | пред 1 седмица

Бројот е мој, таткото е мој, зетот и внукот се мои, ама немам врска со фирмата, вели СДСМ за Томовски

СДСМ остро реагираше на изјавите на директорот на СОЗР, Ивица Томовски по откривањето дека фирма поврзана со негови блиски членови на семејството добила 161 тендер во вредност од 5,3 милиони евра. Од партијата оценија дека неговиот обид да се дистанцира од случајот изгледа како „бегство од сопствената сенка“.Од СДСМ велат дека изјавите на Томовски може да се сведат на една реченица: бројот е негов, таткото е негов, зетот и внукот се негови, „сè е мое, ама немам никаква врска со фирмата“. Според опозициската партија, ваквата реакција само ја потврдува сериозноста на сомнежите за конфликт на интерес.„Фактите се јасни, потврдени со документи и јавно објавени. Не е време за правдање, туку за одговорност“, соопшти СДСМ, додавајќи дека ја повикува Државната комисија за спречување на корупцијата да отвори постапка за можен конфликт на интерес и корупција во врвот на владата на Мицкоски.Од партијата порачаа дека случајот не е затворен и дека јавноста има право да добие прецизни одговори за критериумите и начинот на кој биле доделувани тендерите.

Македонија | пред 1 седмица

По нарушено примирје: нови судири и воздушни напади меѓу Тајланд и Камбоџа

Тајланд денес започна воздушни напади долж спорната граница со Камбоџа, откако двете земји меѓусебно се обвинија за прекршување на договорот за прекин на огнот, постигнат со посредство на американскиот претседател Доналд Трамп.Според соопштението на тајландската војска, нападите биле извршени по загинувањето на еден тајландски војник и ранувањето на уште четворица во престрелки долж нестабилниот пограничен појас меѓу двете држави, пренесува „Гардијан“.Тајландското воено воздухопловство потврди дека користи борбени авиони за напади врз воени цели во неколку области, обвинувајќи ја Камбоџа дека мобилизира тешко вооружување и ги прегрупира своите борбени единици.Инцидентот претставува нова ескалација во долготрајните тензии меѓу двете земји, чија граница во повеќе наврати била причина за судири, дипломатски кризи и вооружени инциденти.

Свет | пред 1 седмица

Истекување вода во Лувр: оштетени стотици предмети од египетскиот оддел

Во прочуениот париски музеј Лувр дошло до истекување вода, при што беа оштетени неколку стотици предмети од египетскиот оддел. Инцидентот се случил само неколку недели по кражбата на скапоцен накит, што повторно ги отвори прашањата за безбедноста и застарената инфраструктура на музејот, пренесува весникот „Гардијан“.Заменик-директорот на музејот, Франсис Штајмбок, потврди дека се оштетени меѓу 300 и 400 дела. Станува збор за египтологски списанија и научна документација што редовно ја користат истражувачите. Овие материјали, кои датираат од крајот на 19. и почетокот на 20. век, се оценети како „многу корисни“, но не и незаменливи. Штајмбок нагласи дека ниту еден историски артефакт не е погоден и дека засега нема неповратни штети.Музејот отвори внатрешна истрага. Како причина за инцидентот се наведува случајно отворање на вентил од системот за греење и вентилација, по што водата продрела низ таванот во крилото Молијен, каде се чувала документацијата. Раководството на Лувр предупреди дека системот е целосно застарен и дека е планирано негово целосно заменување дури во септември 2026 година.Инцидентот доаѓа во период кога вниманието веќе е насочено кон безбедносните слабости на музејот. Во октомври беше украден накит вреден 102 милиони долари. Бандата која стои зад кражбата успеа за само седум минути, среде ден, да изнесе драгоцености – настан што предизвика голема загриженост во јавноста.Оштетените дела ќе бидат исушени, испратени на реставрација и потоа повторно ќе се вратат во архивските простории. За да обезбеди средства за неопходните обнови, управата на Лувр најави значително зголемување на цените на влезниците. Посетителите од земји надвор од Европската унија, вклучувајќи ги оние од САД, Велика Британија и Кина, ќе плаќаат 32 евра, што претставува зголемување од 45 проценти.Музејот очекува на овој начин да ги зголеми годишните приходи за околу 23 милиони долари. Лувр во 2024 година го посетиле 8,7 милиони лица, од кои 69 проценти биле странски туристи.

Свет | пред 1 седмица

Што треба да направите денеска: Се слави споменот на Свети Климент Охридски

Според календарот на МПЦ, денес се празнува еден од најголемите духовни столбови на нашиот народ – Свети Климент Охридски – Чудотворец, патронот на Охрид и просветителот кој го остави најдлабокиот траг во македонската духовност и култура.Овој огромен светител, ученик на Светите Кирил и Методиј, низ вековите бил познат како човек кој ги лечел болните, ги подигнувал духот на луѓето и го ширел словото Божјо меѓу целиот народ. Неговите чуда, раскажувани од генерации, и денес будат почит и трепет.Се верува дека токму на овој ден неговата благодат е најсилна, а молитвите најбрзо се слушаат.Еве што треба да направите денеска:Посетете црква – Дури и ако само накратко, отидете до најблискиот храм.Запалете свеќа за здравје, за себе, за семејството, за сите што ги сакате.Помолете се искрено – се вели дека Свети Климент особено ги слуша оние што му се обраќаат со чисто срце.Кажете благодарам – овој светител важи за чувар на домот и народот, па многумина токму утре изговараат благодарствени молитви.Денот на Свети Климент не е само празник – тоа е потсетник на нашите корени, верата, писменоста и духовната сила која со векови нè држи обединети.Многу семејства веруваат дека ако човек искрено се помоли утре, годинава ќе ја помине со мир, сила и заштита.Именден слават: Климент, Климе, Климентина…

Охрид | пред 1 седмица