Лажна порака за „Сејф сити“: Кавадарчанка измамена за речиси 30 илјади денари

Од Министерството за внатрешни работи информираат дека на 21 јануари 2026 година, во 15:45 часот, во ОВР Кавадарци била пријавена измама, во која 43-годишна жителка на Кавадарци била оштетена за износ од 29.930 денари.Според пријавеното, на 20 јануари 2026 година таа на својата електронска адреса добила лажна порака, испратена во име на Одделот за моторни возила при МВР, во која била известена за наводно сторен сообраќаен прекршок и добила насоки за електронско плаќање на казна. Следејќи ги дадените инструкции, оштетената се регистрирала на посочена интернет-страница и ги оставила своите лични податоци.Како што било пријавено, подоцна добила известување дека од нејзината банкарска сметка бил извршен одлив на парични средства, по што сфатила дека станува збор за измама.Од Министерството за внатрешни работи информираат дека се преземаат мерки за целосно расчистување на настанот и повторно апелираат до граѓаните да бидат внимателни и да не доставуваат лични и банкарски податоци преку сомнителни електронски пораки или линкови.

Македонија | пред 1 седмица

Тешко повредена 16-годишна девојка во сообраќајна несреќаa

Од Министерството за внатрешни работи информираат дека на 21 јануари 2026 година, околу 20:30 часот, во ОВР Кочани била пријавена сообраќајна несреќа на магистралниот пат кај местото познато како „Двојни кривини“, во атарот на селото Уларци.Според пријавата, патничко возило „фолксваген туран“ со кочански регистарски ознаки, управувано од Н.С. (41) од Кочани, излетало од коловозот. Во несреќата со тешки телесни повреди се здобила 16-годишна сопатничка од селото Спанчево.Со телесни повреди се здобиле уште тројца 16-годишници од селата Чешиново, Спанчево и Кучичино, како и 14-годишна малолетничка од селото Чешиново. Повредите биле констатирани во Клиничка болница Штип, каде што повредените биле пренесени на укажување лекарска помош.На местото на настанот бил извршен увид од увидна екипа на ОВР Кочани, а надлежните служби преземаат мерки за утврдување на причините и околностите под кои се случила сообраќајната несреќа.

Македонија | пред 1 седмица

Девојче од 19 години прегазено во Скопје, однесено во болница со тешки повреди

Од Министерството за внатрешни работи информираат дека на 21 јануари 2026 година, околу 20 часот, во СВР Скопје била пријавена сообраќајна несреќа на булеварот „Крсте Мисирков“ во Скопје.Според пријавата, патничко возило „рено“ со скопски регистарски ознаки, управувано од А.Б. (25) од Скопје, удрило во пешакот А.И. (19) од селото Арачиново, скопско. Во несреќата 19-годишната пешачка се здобила со тешки телесни повреди.Повредената била пренесена во Комплекс клиники „Мајка Тереза“, каде што повредите биле констатирани од лекарска екипа.На местото на настанот бил извршен увид од увидна екипа на СВР Скопје, а надлежните служби преземаат мерки за целосно расчистување на околностите под кои се случила сообраќајната несреќа.

Скопје | пред 1 седмица

Со закани барале 50.000 евра за наводен долг: тројца скопјани осомничени за изнуда на скопјанец

Министерството за внатрешни работи соопшти дека СВР Скопје поднело кривична пријава против Х.З. (48), Ѓ.А. (27) и Ц.Е. (36), сите од Скопје, поради постоење основи на сомнение за сторено кривично дело „изнуда“.Според информациите од полицијата, пријавените во периодот од ноември 2025 година до 25 декември 2025 година, со сериозни закани по животот на Ш.К. (32), барале исплата на 50.000 евра за наводен долг во износ од 20.000 евра, кој, како што тврделе, го должел 26-годишниот Н.К.Од МВР информираат дека се преземаат понатамошни мерки за целосно расчистување на случајот, по што ќе следува постапување од надлежното обвинителство.

Скопје | пред 1 седмица

Полицајка осомничена дека открила информации за полициска акција со дрон

Одделот за внатрешна контрола, криминалистички истраги и професионални стандарди при Министерството за внатрешни работи до Основното јавно обвинителство Делчево поднесе кривична пријава против В.М., поради постоење основи на сомнение за сторено кривично дело „оддавање службена тајна“, казниво по член 360 од Кривичниот законик.Според соопштението на МВР, пријавената В.М., вработена како полицаец – приправник во Одделението за полиција при Секторот за внатрешни работи Штип, на 10 јули 2025 година остварила телефонска комуникација со едно лице, користејќи телефонски број кој го употребува нејзиниот брат. Во разговорот, таа му соопштила дека ќе бидат преземени службени полициски дејствија за извидување со дрон, информации кои претставуваат службена тајна и биле поврзани со конкретна оперативна акција.Од Министерството наведуваат дека со ваквото постапување пријавената можела да предизвика штетни последици за службата, поради што се сомничи дека го сторила кривичното дело „оддавање службена тајна“.Покрај кривичната пријава, од Одделот за внатрешна контрола најавуваат дека против В.М. ќе биде поднесен и предлог за поведување постапка за утврдување дисциплинска одговорност.

Македонија | пред 1 седмица

(🔴Во живо) Претрес на Бранко Героски: Моќта, новинарството и линијата што се преминува

Во новото издание на поткастот „Претрес“, гостин е Бранко Героски – еден од најконтроверзните и највлијателни новинари во поновата македонска медиумска историја. Разговорот не нуди комфор, ниту носталгија, туку директна и жестока конфронтација со минатото, сегашноста и улогата на новинарството во политички и бизнис контексти.Од почетоците во печатените медиуми, преку обвинувањата за блискост со центри на моќ, па сè до аферите, судирите со поранешни сојузници и актуелните конфликти со дел од новинарската заедница, „Претрес“ отвора прашања кои со години се туркаат под тепих. Се зборува за односите со политичките елити, за границата меѓу новинарство и активизам, за етиката, огласувачите, личните напади, јазикот во јавната комуникација и за тоа дали борбата против „заробеното новинарство“ завршува со станување дел од истиот систем.Посебен фокус е ставен и на најактуелните судири поврзани со трагедијата во Кочани, јавниот интерес, улогата на истражувачкото новинарство и прашањето кој и зошто одлучува за тоа што смее, а што не смее да се објави. Разговорот ја отвора и темата за одговорноста на влијателните новинари, нивната моќ и цената што ја плаќа јавноста кога медиумите се претвораат во арена за лични и политички војни.Ова не е интервју за допаѓање. Ова е „Претрес“ – без заобиколување и без калкулации.СЛЕДЕТЕ ВО ЖИВО:

Студио | пред 1 седмица

Протест поради загадувањето: Судир на аргументи меѓу граѓаните и „ТИТАН Усје“

Граѓанската иницијатива „Стоп за Усје“ повторно излезе на улица со порака да се стават независни мерни станици кои ќе утврдат колку загадува Цементарница. Со транспаренти „Жолт картон за Усје и МЖСПП“, „Ваши тајни деловни за наши бели гробови“ и „Скопје во одбрана на живот“, демонстрантите побараа итни мерки за заштита на здравјето и животната средина.Говорниците нагласија дека загадувањето не е само еколошки, туку и сериозен здравствен проблем, особено за децата, и порачаа дека протестите и блокадите ќе продолжат сè додека нивните барања не бидат исполнети.Претходно:

Скопје | пред 1 седмица

Зошто куќен, наместо ефективен притвор за Ѓоко Ристов: боледувањето една од клучните причини

Можноста за бегство секогаш постои, но постојат и други околности, меѓу кои и боледувањето, беше образложението на обвинителката Искра Хаџи Василева во врска со предлогот судијата Ѓоко Ристов да биде ставен во куќен притвор наместо ефективен притвор, мерка што судот ја прифати. Според неа, со оглед на активното боледување, но и врз основа на проценката на Обвинителството, определената мерка се очекува да ги даде своите резултати истрагата да тече без влијание на сведоци, а Ристов да биде достапен за органите на прогонотОва објаснување доаѓа по низата реакции и прашања во јавноста, поврзани со тоа дали Ристов може да влијае врз истрагата доколку не биде сместен во истражен затвор, како и дали постои ризик од бегство, особено по сознанијата дека во домот на неговите родители биле пронајдени 350.000 евра заѕидани во ѕид. Коментарите одеа дотаму да, се отвори прашањето дали може да има и други пари кои по дојава би смениле место каде се наоѓаат - нешто што досега не е потврдено ниту со истрагата, а ниту со докази.И покрај овие дилеми, обвинителката оцени дека куќниот притвор во овој момент е соодветна и пропорционална мерка. Таа посочи дека Обвинителството внимателно ќе го следи нејзиното почитување и дека секое евентуално прекршување на условите ќе резултира со барање за определување притвор.

Македонија | пред 1 седмица

Патиштата проодни, службите на терен – стабилна состојбата по снежните врнежи

Според информациите од регионалните центри и надлежните служби, на територијата на државата во моментов нема активни врнежи од снег, соопшти Центарот за управување со кризи. Патните правци на кои претходно беше формирана снежна покривка се расчистуваат и се врши опесочување, при што сообраќајот се одвива во зимски услови, претежно по влажни коловози.Екипите на ЈП „Македонија пат“, општинските зимски служби и јавните комунални претпријатија се постојано на терен и работат согласно утврдените приоритети. Главните магистрални и регионални патни правци се проодни, додека локалните патишта се расчистуваат на местата каде што претходно имало насобран снег.Забраните за сообраќај на тешки товарни возила на одредени планински превои и понатаму остануваат во сила таму каде што беа претходно воведени. Од надлежните служби информираат дека нема пријави за нови застои или посериозни проблеми во одвивањето на сообраќајот.Снабдувањето со електрична енергија и водоснабдувањето се стабилни, без евидентирани прекини на територијата на државата. Надлежните институции ја следат состојбата на терен и постапуваат согласно информациите од Авто-мото сојузот и теренските извештаи.Од Центарот за управување со кризи најавуваат дека и натаму внимателно ќе ја следат состојбата и навремено ќе ја информираат јавноста доколку дојде до какви било промени.

Македонија | пред 1 седмица

Четири години затвор за Мухсин Арифи во случајот „Геријатрија“, неговиот соработник осуден на една година и десет месеци

Основниот кривичен суд Скопје го осуди поранешниот директор на Клиниката за геријатрија, Мухсин Арифи, на четири години затвор за кривичното дело примање мито, додека неговиот соработник Блерим Амети беше осуден на една година и десет месеци затвор. Судот при одмерувањето на казната ги ценеше тежината и начинот на извршување на делото, како и времето што обвинетите го поминале во притвор.Според обвинението, Арифи побарал имотна корист за да овозможи хоспитализација на лице во тешка здравствена состојба, иако тоа било негова службена должност како директор на здравствената установа. Амети, кој го познавал сведокот, се понудил да посредува и бил уапсен на лице место при примање 20 илјади евра, дел од сумата наменета за Арифи. Двајцата обвинети во текот на целата судска постапка ја негираа вината.Бранителот на обвинетите, адвокатот Скендер Мехмеди, изрази незадоволство од пресудата и најави жалба до Апелациониот суд Скопје. Тој оцени дека изречените казни се превисоки и дека судот не го ценел доволно однесувањето на обвинетите, особено во делот на одлуката за притвор, посочувајќи дека можело да бидат изречени поблаги мерки за обезбедување.Мехмеди додаде дека детални коментари ќе даде откако ќе ја добие писмената пресуда, особено во однос на оценката на судот дека делото било извршено на дрзок начин.Од друга страна, обвинителката Искра Хаџи-Василева, која го застапуваше обвинението, изјави дека Обвинителството е задоволно од исходот на постапката и од тоа што судот ги прифатил нивните аргументи и ја утврдил вината на обвинетите. Таа посочи дека во однос на висината на казните, Обвинителството ќе го почека писменото образложение на пресудата, по што ќе одлучи дали ќе поднесе жалба.Судијката Ленка Давиткова, при образложувањето на пресудата истакна дека судот ги земал предвид сите околности релевантни за индивидуализација на казната. Како отежнувачки околности биле ценети видот, карактерот и тежината на кривичното дело, начинот и условите под кои е извршено, организираноста и упорноста на обвинетите, како и фактот дека делото било сторено со цел стекнување материјална корист, искористувајќи тешка здравствена и социјална состојба на оштетеното лице.

Македонија | пред 1 седмица

Родителите на судијата тврделе дека 350.000 евра ги заработиле тие од земјоделие односно грозје, па ги скриле во бункерот зад ѕидот

Родителите на судијата од скопска Апелација, Ѓоко Ристов, тврделе дека парите. 350.000 евра најдени скриени зад плочки во ѕид не се на нивниот син, туку нивна сопственост, стекнати од земјоделие.Кога истражителите односно полицијата побарала појаснување, родителите на Ристов рекле дека се од „лозје“. Ова беше соопштено на брифингот со новинарите од обвинителката Искра Хаџи Василева која го води предметот за противправно стекнување имот и перење пари против судијата.Обвинителката Искра Хаџи Василева рече дека „одбраната која беше дадена од осомничениот, Обвинителството не го убеди, наспроти нашите докази, кажувањата. Одбраната дека се од земјоделие и на родителите – мене не ме убеди“.Признавањето дека парите се на родителите на Ристов, а не на судијата, дошле откако биле најдени. Претходно, на прашања од полицијата односно истражителите кажале дека не чуваат дома пари. На претресот кој според Обвинителството е законит, не присуствувал судијата кој сега е во домашен притвор.Инаку Ѓоко Ристов не бил на ПИ-мерки. Обвинителката Искра Хаџи Василева рече дека има и други сведочења во контекст на дадени пари за наместени судски одлуки.„Има и други сведочења, ќе видиме што ќе донесе истрагата. Осомничениот (Ѓоко Ристов) никогаш не бил на ПИ-мерки. Паралелно тече финансиска истрага. Финансиските истраги бараат дополнително време, многу институции ви даваат податоци, да врзите математички, сопствености. Паралелно со финансиската истрага која ви дава доста сознанија и докази, станува јасно дека кога барате кеш-пари, тешко е да фатите пари на рака. Имаше многу луѓе кои пријавуваа, имаше покредибилни пријави за адвокати, за други лица“, рече обвинителката на брифинг со новинарите.Повеќе детали за тоа како се најдени парите:

Македонија | пред 1 седмица

Како истражителите ги најдоа парите во ѕид: „Се потрудивме да не кршиме, ама дупката се појави одма, а низ неа парите“

Во домот на родителите на судијата Ѓоко Ристов биле извршени два претреси на иста локација, при што првиот обид завршил без пронаоѓање пари, иако истражителите наишле на тазе бетон и дупка под него. Дури при вториот претрес, кога тимовите на Министерството за внатрешни работи со истражителите на ОЈО-ГОКК влегле со повеќе опрема и засилени истражни капацитети, биле откриени скриени пари.При вториот влез во куќата, истражителите ги прашале родителите на судијата дали поседуваат пари, на што тие одговориле негативно.„Имало потазе цемент, а ги прашувате дали сте поправале нешто, а тие велат дека не поправале“, посочи обвинителката.Како клучен сомнителен детал при вториот претрес се појавиле плочките во просторијата, кај кои било забележано дека фугата не е иста како кај другите плочки. Дополнително, истрагата располагала и со оперативни сознанија кои упатувале на можност дека парите се кријат токму таму.„Испокршени биле плочките на местото каде се криеле парите, на рачно тропкање давале друг звук. Нас нѐ обврзуваат прописите да не растураме и кршиме.. Па се потрдувиме што поелегантно. Но, при мало кршење се појави дупка, а низ дупката се појавија пари“, рече обвинителката Искра Хаџи Василева, предметен обвинител.Таа појасни дека биле направени проверки на имотната состојба, недвижностите и приходите, вклучително и анализи на примањата од судиската плата, која, како што нагласи, е лесно проверлива.„Беа направени проверки, на недвижност, имот, како и што можете од државна плата што е многу лесно, бидејќи ние не смееме да имаме дополнителни примања. Направени претреси на три локации претходно, не беа најдени средства. Не е лесно да најдете пари. При првиот обид не беше најдено ништо, па си велите по сознанијата да се провери пак. Отидовме поспремни со технологија“, изјави обвинителката.Во овој момент, според обвинителството, пронајдените пари не се директно поврзани со конкретен судски предмет. Сепак, контурите на случајот, како што беше наведено, почнале да се исцртуваат во контекст на предметот поврзан со адвокатот Фехми Стафа кој го застапува обвинетиот Љупчо Пецов-Ѓаволот. Стафа кој беше фатен при примање пари, за кои Обвинителството тврди дека биле наменети за подмитување судија.„Со наводи и докази кои беа доставени по однос на Љупчо Пецов (Ѓаволот) кој е осомничен во една постапка на Обвинителството... Тогаш се добиваше поконкретни контури. Нему му се барани пари, за да мерката се укине. Ама знаете, кога имате активно решение, тешко е да не влезете во притвор барем еден ден, два, за да образлагате потоа зошто да не влезете. И оттука тргнуваат жалбите, враќање на жалби...“, изјави обвинителката.Таа посочи дека во повеќе случаи, лицата фатени со мито ја поставуваат истата прашалник-реакција.„Кој ме намести“, ова било прво нешто што го кажувале во повеќе случаи, лица кои биле фатени со мито, рече обвинителката, додавајќи: „Како може некој да ве намести, ако вие сте барале и ви дале мито?“.Обвинителката Хаџи Василева ја оцени постапката како сложена уште од самиот почеток.„Комплексна и интересна истрага беше од самиот старт“, рече таа.

Македонија | пред 1 седмица

Нова судска драма: Уапсен вработен во Основниот суд Гостивар под сомнение дека примил мито

Вработен во Основниот суд во Гостивар е лишен од слобода поради сомнение дека сторил кривично дело „примање поткуп“, информираа од Министерство за внатрешни работи.Според информациите, на 20 јануари 2026 година во 20:10 часот, полициски службеници од Полициското одделение Ростуше го уапсиле А.Ј. (49) од селото Присојница, Општина Маврово и Ростуше. Приведувањето следувало по пријава од Н.А. од селото Калиште, Општина Врапчиште, кој навел дека осомничениот, како вработен во Основниот суд во Гостивар, преку заеднички пријател му понудил за паричен надомест од 100 евра да избрише судска казна од 200 евра и изречена забрана за управување со моторно возило во траење од шест месеци.Како што е пријавено, А.Ј. тврдел дека предметната документација пристигнала кај него на извршување и дека може да „заврши работа“. По договор, Н.А. стапил во контакт со осомничениот и средбата била закажана во угостителски објект во Гостивар. По нивната средба, пријавителот го информирал А.Ј. дека е новинар и дека разговорот се снима, по што осомничениот се обидел да се оправда дека се работи за шега и се обидел да побегне.Осомничениот е задржан во полициска станица, а по целосно расчистување и документирање на случајот, против него ќе биде поднесена соодветна кривична пријава до надлежното обвинителство.

Македонија | пред 1 седмица

(Фото) Се расчистуваат пешачките патеки и дрвцата низ Скопје од снегот

По утринските снежни врнежи што го зафатија подрачјето на Скопје, теренските екипи на ЈП Паркови и зеленило веднаш беа мобилизирани и излегоа на терен со цел расчистување на снегот од пешачките патеки покрај булеварите и во парковите низ градот.Од јавното претпријатие информираат дека паралелно со расчистувањето на патеките, екипите вршат и отстранување на снегот од дрвјата и грмушките во зелените површини, со што се спречува оштетување на вегетацијата и се зголемува безбедноста на граѓаните.Интервенциите се спроведуваат во сите реонски делови на Скопје, а од „Паркови и зеленило“ најавуваат дека состојбата ќе продолжи внимателно да се следи и во текот на денот, со цел навремено реагирање доколку снежните услови го наложат тоа.

Скопје | пред 1 седмица

(Фото) Од синоќа се расчистува снегот во Охрид

По синоќешните снежни врнежи, дежурните екипи на ЈП Охридски Комуналец се целосно мобилизирани и од раните утрински часови дејствуваат на терен со целокупната расположлива механизација и човечки ресурси.Од јавното претпријатие информираат дека расчистувањето на снежната покривка се одвива согласно утврдените приоритети, при што најнапред се интервенира во повисоките населени места, на главните сообраќајници, пешачките зони, како и на пристапните патеки до објекти од витално значење.Состојбата на теренот, како што наведуваат од „Охридски Комуналец“, будно се следи во текот на целиот ден, а екипите ќе продолжат да интервенираат секаде каде што ќе се појави потреба, со цел да се обезбеди безбедно и непречено функционирање на градот во зимски услови.

Охрид | пред 1 седмица

(Фото) Во Аеродром „се мете“ снегот од пешачките патеки

Зимската служба на Општина Аеродром била активирана рано утрово и започна со превентивно дејствување на сите сообраќајници и пешачки површини, со цел да се обезбеди безбедно и непречено движење на возилата и пешаците во зимски услови, соопшти општината.Од општината информираат дека активностите се реализираат согласно утврдениот план за работа, при што приоритет има критичната инфраструктура, меѓу која се болниците, училиштата, градинките и другите објекти од јавен интерес.Надлежните служби постојано ја следат состојбата на терен и, како што наведуваат од општината, се подготвени навремено да реагираат со сите расположливи ресурси доколку состојбите го наложат тоа.Воедно, од Општина Аеродром упатија апел до граѓаните, управителите на станбени згради и деловните субјекти да ја почитуваат законската обврска и навремено да ги исчистат снегот и мразот пред своите влезови и објекти, со цел заеднички да се придонесе за поголема безбедност и непречено движење во текот на зимскиот период.

Скопје | пред 1 седмица

(Видео) Подмрзнати патишта, заглавени камиони на Плетвар - возете внимателно

Дел од патиштата низ државата утрово беа блокирани, подмрзнати, недорасчистени. Возачи јавиваат дека околу 09 часот, кога возеле низ овие делници, патиштата биле тешко проодни. Па така, ова е состојбата од Кичево кон Пресека утрово во 09 часот.Ова е состојбата со снегот после велешка патарина.На Плетвар има десетина заглавени камиони, по снежните наноси (09:00)Утрово подмрзнато и на скопската ОбиколницаПоследна информација:

Настани | пред 1 седмица

(Фото) Активиран кризен штаб во Скопје, екипите интензивно работат на расчистување на снегот

Градоначалникот на Скопје, Орце Ѓорѓиевски, информира дека градските служби од раните утрински часови се постојано на терен и интензивно работат на расчистување на снегот од улиците и булеварите што се под надлежност на Град Скопје.Како што посочи Ѓорѓиевски, снегот во зимскиот период не претставува изненадување, но подготвеноста на институциите е обврска кон граѓаните. Со цел навремена и ефикасна реакција, активиран е кризен штаб кој функционира 24 часа дневно, со постојано следење на состојбата и детектирање на сите клучни и критични точки во градот.Според градоначалникот, безбедноста на граѓаните останува врвен приоритет, а сите расположливи ресурси се ставени во функција за непречено одвивање на сообраќајот и нормално функционирање на градот во зимски услови.Воедно, беше упатен апел до сите учесници во сообраќајот да возат внимателно, да ги почитуваат сообраќајните правила и да ја приспособат брзината и начинот на возење на условите на патиштата.„Со одговорност, навремена акција и заедничка грижа, Скопје може да се движи безбедно и во зимски услови“, порача градоначалникот.

Скопје | пред 1 седмица

Курти од Давос: Србија подобро од кога било знае дека Косово е држава

Вршителот на должноста премиер на Косово, Албин Курти, кој престојува во швајцарски Давос по повод Светскиот економски форум, изјави дека Србија денес подобро од кога било ја разбира реалноста дека Косово е држава, иако и понатаму одбива формално да ја признае неговата независност, пренесува Анадолу.Во разговор со поранешниот британски дипломат и политичар Рори Стјуарт, Курти истакна дека, и покрај континуираното непризнавање, српските власти се свесни за променетата состојба на терен. Според него, од четирите соседи на Косово, три држави ја признале независноста, додека само Србија останува на спротивната позиција, без јасни индикации дека тоа наскоро ќе се промени.Курти предупреди дека Русија претставува закана за регионот, делувајќи преку Србија, оценувајќи дека соништата за повторно воспоставување доминација или враќање на стари имперски концепти мора да згаснат. Тој посочи дека, како што е невозможно оживувањето на руската империја, така е нереално и очекувањето за некакво враќање на Косово под српска контрола, бидејќи современата политичка реалност е значително изменета.Осврнувајќи се на состојбите во северниот дел на Косово, Курти рече дека пред пет или десет години таму не постоела ниту основна слобода за слободно движење или користење на албанскиот јазик, додавајќи дека денес ситуацијата е суштински поинаква.Тој повика на поголема солидарност во рамки на Европа и НАТО, истакнувајќи дека, според неговите оценки, Русија има за цел да ја поткопа и Европската унија и Алијансата, додека Кина настојува да ја достигне моќта на САД. Курти нагласи дека секој што му помага на соседот во обидите за дестабилизација индиректно придонесува за создавање проблеми и за Косово, предупредувајќи дека регионалната безбедност е тесно поврзана и меѓусебно зависна.

Свет | пред 1 седмица

Заѕиданите 350.000 евра не се на судијата, родителите признале дека се нивни, вели неговиот бранител Давидовиќ

Адвокатот Звонко Давидовиќ, бранител на апелациониот судија Ѓоко Ристов, кој доби мерка куќен притвор, изјави дека истрагата за противправно стекнување и прикривање имот е правно проблематична и не може да се примени врз судија. Во изјава за ТВ24, Давидовиќ посочи дека законската одредба на која се повикува Обвинителството се однесува на одговорни или службени лица во јавни установи, јавни претпријатија или органи што управуваат со државен имот, но дека судот не спаѓа во таа категорија.Според него, ваквата формулација не може да се применува ниту на судии, ниту на обвинители, што, како што рече, отвора сериозна правна дилема околу самата квалификација на делото. Давидовиќ нагласи дека клучниот доказ што Обвинителството постојано го истакнува се 350 илјади евра пронајдени во домот на родителите на Ристов, но дека тие средства, па според записникот од претресот, биле пријавени како нивни лични пари.„350 илјади евра, кои беа најдени кај неговите родители, кои на записникот, напишале дека се нивни лични средства, тоа го признава и обвинителката“, вели Давидовиќ.

Македонија | пред 1 седмица

Поранешниот висок функционер на НАТО бара европска „црвена линија“ поради изјавите на Трамп

Европа мора да заземе значително поцврст став кон, како што ги оцени, „непријателските испади“ на американскиот претседател Доналд Трамп поврзани со Гренланд, истовремено нудејќи рамка за соработка што ќе вклучува економски и безбедносни договори. Ова го порача поранешниот дански премиер и поранешен генерален секретар на НАТО, Андерс Фог Расмусен, во авторски текст објавен во „Економист“.Расмусен потсети на долгогодишната воена поддршка што Данска ѝ ја давала на Америка, нагласувајќи дека данските војници со години учествувале во американските воени операции во Авганистан и Ирак. Тој наведе дека во периодот од 2002 до 2021 година, во 52 наврати, ковчези со посмртните останки на дански војници се враќале дома, откако тие ги загубиле животите борејќи се рамо до рамо со американските сили. Според него, Данска, гледано по глава на жител, претрпела поголеми загуби од речиси сите други членки на коалицијата предводена од САД, па дури и поголеми од самата Америка.Поранешниот дански премиер истакнува дека долго време ја сметал Америка за природен лидер на слободниот свет, како во периодот кога бил премиер, така и додека ја извршувал функцијата генерален секретар на НАТО. Сепак, според него, по изјавите и однесувањето на Трамп кон Данска, која ја нарече еден од најлојалните американски сојузници, „време е да се каже дека е доста“.Расмусен потенцира дека Гренланд не претставува закана за Соединетите Американски Држави и дека островот е заштитен од НАТО. Тој наведува дека секој обид на Русија или Кина да распоредат сили на Гренланд би наишол на заеднички одговор од Алијансата, а не само од данските вооружени сили. Потсети и на безбедносниот договор меѓу САД и Данска од 1951 година, со кој на американските сили веќе им е овозможено зголемување на присуството на островот, додавајќи дека на Вашингтон може да му се понудат и дополнителни економски можности, вклучително и инвестиции на американски компании во природните ресурси на Гренланд.Во текстот, Расмусен предупредува дека класичната дипломатија можеби нема да биде доволна во односот со Трамп. Според него, американскиот претседател верува дека може да го анектира Гренланд затоа што ја гледа Европа како поделена и немоќна, убеден дека на крајот ќе се остане само на зборови, додека САД ќе го добијат она што го сакаат.Тој ја повика Европската унија јасно да ги постави границите и најави дека, доколку се направи обид за промена на суверените европски граници, САД мора да се соочат со целосната сила на европската економска „базука“, преку сериозни ограничувања на увозот и извозот и исклучување на американските компании од европските јавни набавки.На крајот, Расмусен заклучува дека Европа има избор: или ќе одговори со сила и решителност на ваквите притисоци, или ќе биде принудена да прифати сè што ќе ѝ биде наметнато, предупредувајќи дека токму сега е моментот да се повлече јасна и непоместлива линија во „снегот на Гренланд“.

Свет | пред 1 седмица

Нејасен одговор на Трамп за Гренланд ја вознемири јавноста

Американскиот претседател Доналд Трамп одби конкретно да одговори на прашањето колку далеку е подготвен да оди во намерата Соединетите Американски Држави да го преземат Гренланд, испраќајќи кратка, но вознемирувачка порака до јавноста.По обраќањето во Белата куќа со кое одбележа една година од враќањето на претседателската функција, Трамп одговараше на прашања од новинарите. За разлика од долгиот и содржаен говор, дел од одговорите беа куси и директни.На директното прашање колку е подготвен да оди далеку за да го оствари планот за преземање на Гренланд, Трамп одговори само: „Ќе дознаете“.Ваквата изјава дополнително ги засили шпекулациите и загриженоста кај европските сојузници, особено Данска и Гренланд, откако американскиот претседател во изминатиот период во повеќе наврати јавно ја доведе во прашање нивната контрола и суверенитет над островот. Кусата и двосмислена порака од Белата куќа се толкува како сигнал дека Вашингтон не се откажува од амбициите поврзани со Гренланд, оставајќи отворено прашање какви чекори би можеле да следат.

Свет | пред 1 седмица

Трамп за европските лидери: Кога сум тука се однесуваат многу коректно

Американскиот претседател Доналд Трамп со ироничен тон го опиша својот однос со францускиот претседател Емануел Макрон и британскиот премиер Киер Стармер, одговарајќи на новинарско прашање за актуелните релации со двајцата европски лидери.На прашањето дали разговарал со Макрон и Стармер по денешната објава на социјалните мрежи, која се однесуваше на неговата критика за британскиот договор околу архипелагот Чагос, Трамп одговори дека не остварил директен контакт, но истакна дека односите ги смета за добри.„Не, не разговарав со нив, но мислам дека многу добро се сложуваме. Секогаш се коректни кон мене. Малку стануваат поостри кога не сум во нивна близина, но кога сум тука, се однесуваат навистина убаво. И, знаете, ми се допаѓаат и двајцата“, изјави Трамп.Изјавата доаѓа во период на зголемени тензии меѓу Вашингтон и дел од европските сојузници, особено околу прашања поврзани со Гренланд, Чагос и трговските односи, при што Трамп во повеќе наврати јавно ги критикуваше европските влади, но истовремено нагласува дека личните односи со клучните лидери остануваат стабилни.

Свет | пред 1 седмица

Трамп признава: Можеби имам лош ПР

Американскиот претседател Доналд Трамп одржа исклучително долга и содржински агресивна прес-конференција, точно една година по неговото враќање на власт, на која ги истакна, како што ги нарече, големите успеси на неговата администрација, но воедно призна дека економската порака не допира до мнозинството Американци.Обраќањето започна во преполната сала за новинари во Белата куќа, каде Трамп демонстративно покажа фотографии од лица што ги опиша како „пореметени убијци“, за кои тврдеше дека биле уапсени од Имиграциската и царинска служба и депортирани од САД. Посебен акцент стави на сојузната држава Минесота, каде изминатиот период се одржуваа протести против владините имиграциски политики.Трамп зборуваше за својот економски програм, тврдејќи дека успеал да ја „исчисти“ федералната администрација и остро го критикуваше својот демократски претходник Џо Бајден. Според него, актуелната власт наследила „хаос“, но бројките, особено во однос на инфлацијата, сега биле драстично намалени. Тој инсистираше дека економските показатели се значително подобрени, но изрази незадоволство што јавноста тоа не го препознава.„Навистина ги намаливме бројките. Искрено, не разбирам зошто тоа не се чувствува. Можеби имам лоши луѓе за односи со јавноста. Не успеваме да ја пренесеме пораката“, рече Трамп, во редок момент на отворена самокритика.Осврнувајќи се на Венецуела, тој ја пофали опозициската лидерка и добитничка на Нобеловата награда за мир, Марија Корина Мачадо, опишувајќи ја како „исклучително љубезна жена“, додавајќи дека постои можност повторно да биде вклучена во американската стратегија кон таа земја.Настапот на Трамп следуваше непосредно пред неговото заминување за Давос, каде треба да учествува на Светскиот економски форум. Според најавите, форумот би можел да биде обележан од неговите контроверзни ставови и закани поврзани со Гренланд, тема што во последно време предизвикува силни реакции и на меѓународната сцена.

Свет | пред 1 седмица

Лазаров по победата над Романија: Имавме шанса за поубедлив триумф, мора да работиме на концентрацијата и менталитетот

Селекторот на македонската ракометна репрезентација Кире Лазаров изрази умерено задоволство по драматичната победа над Романија, истакнувајќи дека триумфот е значаен, но дека натпреварот можел да заврши и со поубедлива разлика.Лазаров нагласи дека Македонија одиграла добар меч против, како што рече, цврста и силна репрезентација. Според него, македонските ракометари делувале како да се изненадиле од фактот што уште во првото полувреме стекнале висока предност од седум до осум голови, иако, како што оцени, Романија во тие моменти била немоќна, а Македонија имала добри позиции за реализација.Селекторот објасни дека во продолжението тимот морал да биде поофанзивно внимателен поради повреди и исклучувања на дел од играчите, што неминовно се одразило врз играта во одбраната. Тој додаде дека се надевал на победа со поголема гол-разлика, најмалку од три до пет голови, но потенцираше дека надежта сè уште постои, иако шансите се минимални.Лазаров истакна дека пласманот понатаму зависи од висока победа на Данска, оценувајќи дека задачата е исклучително тешка, но не и невозможна. Сепак, упати честитки до своите ракометари, нагласувајќи дека нема што да им замери за прикажаното на теренот.Тој повторно се осврна и на, како што рече, проблемот со концентрацијата и менталната стабилност, посочувајќи дека желбата била Македонија да се најде меѓу најдобрите 12 селекции и дека за тоа било потребно повеќе присебност во клучните моменти. И покрај сè, Лазаров потенцираше дека не е незадоволен од настапот и дека репрезентацијата ќе остане да ја следи и бодри Данска, нагласувајќи дека тимот продолжува понатаму со крената глава.

Спорт | пред 1 седмица