Од нас нема да слушнете едно пред камера, а друго зад затворени врати, вели Муцунски и упати критика кон Филипче

„Од нас нема да слушнете едно пред камера, а друго зад затворени врати. Тоа е суштината на довербата – да бидеме исти и во зборовите и во делата. Тука е и најголемата противречност кај Венко Филипче: од една страна зборува за уставни измени, од друга страна за откажување од преговорите ако има ново вето. Таков пристап не носи сигурност, туку неизвесност за правецот во кој треба да оди државата,“ изјави министерот за надворешни работи, Тимчо Муцунски.Тој потсети дека изминатите години се покажало што значат политиките на брзи потези и празни ветувања, оценувајќи дека СДСМ и ДУИ отворале надеж со секое ветување, а ја поништувале со секој притисок. „Заедничките документи што се носеа во Собранието не донесоа сила, туку слабост – беа дерогирани веднаш штом ќе се појавеше предизвик,“ рече Муцунски.Министерот нагласи дека патот на сегашната влада е поинаков и се базира на решенија кои носат траен напредок. „Подобро е да покажеме трпение и мудрост, отколку да направиме потег кој утре ќе биде уште поголем товар за државата. Тоа е државнички пристап: да мислиме на денес, на утре и на задутре,“ истакна тој.Муцунски додаде дека европската иднина за актуелната влада не е празна фраза, туку борба против корупцијата, модерна администрација, дигитализација, инвестиции во патишта, инфраструктура и нови можности за граѓаните. „Ние веруваме дека резултатите дома создаваат почит надвор. Токму затоа сме решени да обезбедиме европска иднина која ќе биде достојна, одржлива и прифатлива за сите. Тоа го заслужува македонскиот народ,“ порача Муцунски.

Македонија | пред 8 месеци

Пад на приходите на рускиот нафтен гигант за повеќе од 68% поради ниските цени на нафтата

Нетo приходот на рускиот нафтен гигант „Роснефт“ се намали за повеќе од 68% во првата половина од годинава, достигнувајќи 245 милијарди рубљи (околу 2,6 милијарди евра), јави Ројтерс повикувајќи се на извори од индустријата.Причината за падот, како што се наведува, е намалувањето на цените на нафтата поради зголеменото производство од страна на Саудиска Арабија и другите држави-членки на Организацијата на земји извознички нафта (ОПЕК+).„Првата половина од годината ја одбележа пад на цените на нафтата, пред сè поради прекумерното производство. Главна причина е активното зголемување на производството на земјите од ОПЕК, вклучително и Саудиска Арабија, ОАЕ, Ирак и Кувајт,“ изјави првиот човек на „Роснефт“, Игор Сечин.Според индустриски извори, Русија на состаноците на ОПЕК+ изразила загриженост дека зголемувањето на производството се одвива побрзо од очекуваното.

Свет | пред 8 месеци

Аxios: Белата куќа ја обвини Европа дека ја продолжува војната во Украина

Според пишувањето на американскиот портал Axios, високи претставници на Белата куќа сметаат дека дел од европските лидери го продолжуваат војната во Украина, убедувајќи го украинскиот претседател Володимир Зеленски да почека подобар договор со Москва.Фрустрацијата во Вашингтон расте поради отсуство на напредок од разговорите меѓу Владимир Путин и Доналд Трамп што се одржаа пред две недели на Алјаска. Американските претставници веруваат дека некои европски државници ја поттикнуваат Украина да очекува нереални територијални отстапки од Русија.„Европјаните не смеат да го продолжуваат овој војна и да поттикнуваат неразумни очекувања, а истовремено да очекуваат Америка да ја сноси цената,“ изјавил висок претставник на Белата куќа за Axios.Медиумот не прецизира кои земји се на мета на критиките, но наведува дека тоа не се Обединетото Кралство или Франција, кои заедно ја предводат таканаречената „коалиција на подготвените“, лабаво партнерство на западни земји што и ветуваат поддршка на Украина.

Свет | пред 8 месеци

Зеленски: Украина планира нови удари длабоко во Русија

Украинскиот претседател Володимир Зеленски најави дека Киев подготвува нова серија напади врз цели длабоко во руската територија.„Украина планира нови удари длабоко во Русија. Ќе ги продолжиме нашите активни операции токму на начин кој е неопходен за одбраната на Украина,“ изјави Зеленски.Тој додаде дека „силите и ресурсите се подготвени“ и дека „се планирани нови длабоки удари“, по средбата со врховниот украински командант Олександар Сирски.

Свет | пред 8 месеци

(Видео) Цеца во Крива Паланка собра трипати повеќе публика од било кој нејзин настап годинава

Балканската музичка ѕвезда Светлана Ражнатовиќ – Цеца, во изминатите месеци настапувала во шест држави, но ниту еден настап не го надминал бројот на публика во Крива Паланка. Таму, според проценките, нејзините песни ги слушале рекордни 50.000 посетители – за трипати повеќе од кој било друг нејзин концерт ова лето.Статистиките направени според медиумсите извештаи покажуваат дека втор град по бројност на посети е Ниш каде имала 15.000 посетители, а потоа следува Бања Лука во Босна и Херцеговина (БиХ) со 13.167 посетители. На трето место е Будва во Црна гора со 10.000 посети, а потоа следува Брчко (БиХ) со 7.000 публика, па Дизелдорф во Германија со 6.000 посетители.Статистиките направени според медиумските извештаи покажуваат дека втор по посетеност бил настапот во Ниш со 15.000 посетители, а потоа следувала Бања Лука со 13.167 луѓе. На трето место е Будва со 10.000 посетители, па Брчко со 7.000 и Дизелдорф со 6.000 посетители. Концертите во Врање, Нова Гора и Требиње собрале по 5.000 посетители, додека најмал настап имала во Смедерево.Рекордниот концерт во Македонија се случи во период кога на социјалните мрежи се водеше жестока полемика помеѓу македонскиот пејач Спасен Силјановски и градоначалникот на Кавадарци, Митко Јанчев околу настапите на српските ѕвезди во Македонија. Јанчев беше обвинуван дека на „Тиквешки гроздобер“ повикал повеќе турбофолк изведувачи од соседството наместо македонски пејачи, за што се правдаше дека само тие можат да привлечат многубројна публика. Силјановски реагираше со остри критики и доби широка поддршка од јавноста.

Магазин | пред 8 месеци

Потресни пораки од семејството на докторот Исјановски: „Те сакам бескрајно, тато“; Се прости и Перо Антиќ

Семејството на докторот Виктор Исјановски, кој почина во Грција, со неверување, се прости од својот сопруг и татко. Споделувајќи ја објавата, неговата ќерка Мила Исјановска напиша „Ќе те сакам бескрајно тато!“. Емотивна порака објави и неговата сопруга Милка, која напиша „Нема живот без тебе, чекај ме љубов моја, една и единствена“.И кошаркарот Перо Антиќ, кој ја споделил и последната фотографија со Исјановски од таверна во Грција, објави порака, со фотографија од плажа „Почивај во мир, братче мое“.Исјановски, вечерта пред да почине бил во друштво на Антиќ и Владимир Ристов – Камењар. Дружбата била во грчка таверна и ништо не навестувало на ваква трагедија.[caption id="attachment_346959" align="alignnone" width="880"] Последната јавно споделена фотографија[/caption]Исјановски, јавноста најмногу го памети по неговата улога за време на пандемијата на ковид-19, кога го раководеше Здравствениот дом – Скопје и со сите расположливи ресурси ја водеше борбата против вирусот.

Коментари | пред 8 месеци

Кешбекот згасна – пирамидата падна: Митровски до Витанов „Ги превесла луѓето“, тој пак врати: „Не критикувајте, не разбирате!“

По банкротот на „Лајконет“, на тапет на јавноста постојано е нејзиниот промотер, Зоран Витанов, помал акционер во „Мај Ворлд“, која е сопственик и на „Лајконет Австрија“. Дел од оние кои вложиле во оваа пирамидална шема, вчера обзнанија дека не можат да пристапат ниту до апликацијата преку која работеле. Витанов пак, имал преписка на „Фејсбук“ преку коментари, со адвокатот Јанаки Митровски.„Зоран ти си цар. Ги превесла луѓево и сега си ги бушиш. Така и треба за лековерци кои веруваат дека можат да си купат јахта во Монако со cashback (поврат на средства)“, напиша Митровски.На ова вратил Витанов: „Ако не се лажам, вие сте адвокат. Не критикувајте нешто што не сте го разбрале. Пред да претпоставите измама, претпоставете си го сопственото незнаење“, на што Митровски реплицирал „Никаде не пишав измама“, а Витанов продолжил „Одлично. Тоа сакав да слушнам“.Витанов, остро искритикува и новинари, обвинувајќи ги дека дезиформираат.„Кога нешто не разбираш, не обвинувај – прашај; знаењето гасне сомнежи, незнаењето раѓа навреди. Запомнете: 1)злобните и завидливите шират невистини, 2)будалите веруваат, а 3)најглупавите ги пренесуваат понатаму. Кога адвокати клеветат по социјални мрежи, наместо да го процесираат тоа што го зборуваат, кога новинари свесно шират лаги за вас, а не ви се јавиле да ве прашаат, јасно е дека свесно манипулираат, а вас ве обвинуваат за манипулација. Крадецот вели држете го крадецот! Дали сега ви е јасно зошто хигиената во општеството ни е таква, особено менталната? За ваша информација, само двајца (2!), новинари ми се јавија лично да ме прашаат пред да објават “Фактор” и “Пари”! Сите други пишуваа, објавуваа слики, дезинформираа, а воопшто не ме контактираа!!! Внимавајте да не влезете во групата на 1)Злобни 2)Будали 3)Најглупави“, напишал Витанов.Членовите на „Лајконет“ во Македонија веќе не можат да ги користат поволностите на кешбек системот, ниту пак имаат пристап до своите сметки, бидејќи вчера и „МајВорлд“ и „Лајконет“ Македонија ги затворија своите веб страни и ја деактивираа апликацијата. Според првичните информации, страниците се затворени на барање на надлежните институции во Австрија, бидејќи преку нив, и покрај активниот стечај, сè уште се вршело рекламирање за компанијата.[caption id="attachment_346985" align="alignnone" width="697"] Screenshot[/caption]

Коментари | пред 8 месеци

(Фото) По критиките за фонтот и обвинувањата за сквернавење на македонскиот јазик - Општина Битола ќе ја замени плочата на споменикот од Турунџев

По низата реакции во јавноста за изгледот на спомен-плочата посветена на револуционерот Александар Турунџев, Општина Битола соопшти дека ќе биде изработена нова плоча со современ македонски фонт, целосно усогласен со правописните норми.Забелешките од граѓаните беа насочени кон тоа дека буквите изгледаат како да се напишани со туѓа ортографија. Според стручната лингвистичка анализа, сепак, станувало збор за декоративно типографско решение, во кое одредени форми визуелно наликуваат на латинични знаци, што создаде впечаток на погрешно напишани зборови.„Имајќи ја предвид чувствителноста на прашањето и значењето на јазикот и писмото како дел од националниот идентитет, Општина Битола ќе изработи нова спомен-плоча со современ македонски фонт. Целта е да се избегне забуна и да се обезбеди јасна и прецизна јазична форма, како што прилега за јавните обележја што ја чуваат историската меморија,“ стои во соопштението.Општината додава дека останува посветена на негување на јазичната исправност, културната традиција и достоинственото чествување на хероите што се вградиле во слободата на Македонија.

Македонија | пред 8 месеци

Путин со клучна дипломатска офанзива во Кина: Пари за војната и демонстрација на сила

Владимир Путин денеска започнува четиридневна посета на Кина, која според руските и западните анализи е од суштинско значење за продолжување на неговата војна во Украина и за зајакнување на меѓународниот легитимитет во услови на западни санкции.Москва се обидува да ја сопре негативната тенденција – трговијата со Кина, која лани достигна рекордни 245 милијарди долари, во првата половина од 2025 година падна за 8,1% во однос на истиот период од претходната година. „Без кинеската технологија ниту една ракета или дрон не би биле направени, а економијата одамна ќе колабираше. Да сакаше Пекинг, оваа војна одамна ќе беше завршена“, изјави за Ројтерс еден руски извор.Освен економските, посетата има и силни дипломатски импликации. Путин добива високопрофилен меѓународен настап и покрај санкциите и налогот за негово апсење издаден од Меѓународниот кривичен суд. На самитот на Шангајската организација за соработка во Тијанџин ќе се сретне со повеќе од 20 светски лидери, меѓу кои кинескиот претседател Си Џинпинг, индискиот премиер Нарендра Моди, турскиот претседател Реџеп Таип Ердоган и иранскиот претседател Масуд Пезешкијан.Во агендата се предвидени разговори со Си во Пекинг, учество на воена парада на плоштадот Тјенанмен, како и потенцијален состанок со севернокорејскиот лидер Ким Јонг-ун. Кремљ најави и потпишување на три документи што го вклучуваат „Газпром“, со што Москва ќе ја зацврсти соработката со Пекинг во енергетиката.Путин и Си во февруари 2022 година прогласија „стратешко партнерство без ограничувања“, само неколку недели пред руската инвазија врз Украина. Сега, по повеќе од три години војна, Пекинг останува неговиот најважен сојузник и извор на економска и технолошка поддршка.

Свет | пред 8 месеци

Обвинителството спие и тогаш и сега, време е за прочистување на безбедносните служби, порача Ковачки

Пратеникот од ВМРО-ДПМНЕ, Драган Ковачки, како член на собраниската комисија за надзор на работата на АНБ и АР, реагираше на објавите за сериозни злоупотреби во Агенцијата за национална безбедност во време на претходното раководство.Ковачки изрази разочарување што, како што вели, за овие злоупотреби молчат претседателот и заменикот на собраниската комисија за надзор, јавниот обвинител, народниот правобранител, како и невладиниот сектор и здруженијата за човекови права. Според него, тоа уште еднаш покажува „кој ги влече конците во позадина“, иако станува збор за тешки прекршувања на Уставот и законите, како и на меѓународните конвенции.„Мора да имаме искрен и сериозен процес на прочистување од старите практики кои се користеле за оцрнување на опозицијата, за лично богатење и за партиски интереси. Одговорните лица мора конечно да бидат изнесени пред лицето на правдата – и извршителите, но и нарачателите,“ порача Ковачки.Тој обвини дека „остатоци од југословенските структури и нивни наследници“ сѐ уште попречуваат во извршувањето на должностите и повика службите да станат институции кои ќе ја штитат државата и граѓаните, наместо да се користат за политички притисоци.„Овие тешки злоупотреби се правени во период кога Македонија веќе беше членка на НАТО, а во исто време во Алијансата се брифирало дека лидер на опозицијата крои заговори,“ додаде пратеникот, посочувајќи дека ваквите постапки нанеле голема штета на угледот на државата.Ковачки обвини дека обвинителството „спиело и тогаш и сега“, а прашањето дали ќе има извинување за штетата нанесена на угледот и достоинството на поединци и институции останува

Коментари | пред 8 месеци

Повеќе од 29.000 жители на Одеса без електрична енергија поради руски удар

Руски дронски напад во текот на ноќта оштети електроенергетско постројка во близина на градот Одеса, со што повеќе од 29.000 луѓе останаа без електрична енергија.Гувернерот на Одеската област, Олег Кипер, информираше дека најтешко погоден е градот Чорноморск, веднаш до Одеса, каде што биле оштетени станбени куќи и управни објекти. „Клучната инфраструктура функционира со генератори“, изјави Кипер, додавајќи дека во нападот е повредено едно лице.Овој удар е дел од континуираните напади на Русија врз клучната украинска инфраструктура за време на 42-месечната војна што започна со инвазијата во февруари 2022 година. Само во четвртокот, во масовен напад врз повеќе региони во Украина, во главниот град Киев загинаа 25 лица.Во исто време, руското Министерство за одбрана соопшти дека руските сили собориле 21 украински дрон над својот териториј. Од нив, 11 биле уништени над Волгоградската област, а останатите над Ростовската, Белгородската и Брјанската област.

Свет | пред 8 месеци

(Видео) Силниот ветер во Скопје предизвика хаос: десетици паднати дрвја, оштетени возила и кабли кои предизвикале пожар

Силниот ветер кој вчера го зафати Скопје предизвика сериозни проблеми во повеќе делови од градот. Од Центарот за управување со кризи информираат дека на бројот за итни повици 112 биле пријавени десетици случаи на паднати дрвја, скинати кабли на ЕВН и оштетувања на приватна сопственост, меѓу кои моторни возила, настрешници и кровови.Меѓу најтешко погодените локации се булевар „Партизански одреди“ спроти слаткарницата „Палма“, каде паднато дрво оштетило повеќе возила, улицата „Руѓер Бошковиќ“ кај Драмски факултет, улицата „Самоилова“ каде дрво паднало врз струен кабел, како и улицата „Ѓорче Петров“ каде дрво оштетило автомобил.Пријави има и за паднати дрвја во дворови на училишта и градинки, оштетени кабли со искрења на повеќе локации, како и оштетени семафори и кровови на приватни куќи и згради во изградба. На улицата „Јордан Мијалков“ паднати контејнери целосно блокирале сообраќајница, а во населбата Козле била пријавена запалена бандера.Сите пријави се проследени до надлежните служби, кои интервенираат по приоритет за надминување на последиците од невремето. Од ЦУК велат дека екипите на терен работат непрекинато за стабилизирање на состојбата и заштита на безбедноста на граѓаните.

Скопје | пред 8 месеци

Левица: Растот на платите постои само во табелите на ДПМНЕ, не и во паричниците на работниците

Левица остро реагира на изјавите на пратеникот од ВМРО-ДПМНЕ, Бојан Стојаноски, кој на прес-конференции се повикува на растот на реалната плата и стабилизирана инфлација како аргумент за наводно подобрен животен стандард на граѓаните.„Тврдењето дека растот на реалната плата е 6,7% е политичка манипулација и целосно игнорирање на реалноста во која живеат повеќе од половина милион работници. Во мај 2025 година, од 509.960 работници, дури 374.045 или 73,3% добиваат плата под просечната, а 169.082, односно една третина, преживуваат со под 30.000 денари месечно – двојно помалку од синдикалната минимална кошница која во август достигна 65.507 денари,“ велат од Левица.Според партијата, парадоксално е да се зборува за висок раст на реалната плата додека голем дел од работниците се наоѓаат под прагот на сиромаштија. Дополнително, Левица обвинува дека властите манипулативно се повикуваат на просечна инфлација од 3,6%, која е „вештачки измазнета“ и ги прикрива реалните поскапувања на храната, енергенсите и кириите, кои во последните пет години се зголемиле за 30 до 40%.„Стабилизирана инфлација постои само на хартија, додека секојдневието на народот е обележано со неизвесност, долгови и осиромашување,“ додаваат од партијата.Левица инсистира на итни мерки за заштита на граѓаните, меѓу кои ефективна контрола на цените на основните продукти, зголемување на минималната плата на 500 евра, подобрување на социјалните мерки, целосна транспарентност во монетарната и фискалната политика и воведување фер, прогресивен даночен систем.„Економската политика на ДПМНЕ е политика на одбрана на привилегиите на малцинството наспроти интересите на мнозинството,“ порачуваат од Левица.

Македонија | пред 8 месеци

Систем, не спектакли и пи-ар: Шукова и Битиќи со граѓаните за чисто и одржливо Скопје, велат од СДСМ

„Кандидатката за градоначалничка на Скопје од СДСМ, Каја Шукова, оствари средба со претставници од ЗИП Институтот и учесници во првото Граѓанско климатско собрание“, информираа од СДСМ и додаваат:Аерозагадувањето во Скопје и реалните, граѓански решенија за негово надминување, се итна тема и од суштинско значење.Шукова ги сослуша приоритетите на граѓаните, и јасно се заложи за нивна имплементација. Таа порача дека препораките кои произлегле од Климатското собрание се основа врз која треба да се гради новата еколошка политика на градот, но не како политички маркетинг, туку како план за опстанок.„Овие препораки не се само листа на желби, тие се мапа за здрава иднина. Она што недостасуваше изминативе четири години е токму ова, дијалог, храброст да се именува проблемот и волја да се постапи. Јас се обврзувам да ги ставам граѓаните и науката во срцето на политиката за Скопје“, рече Шукова.Таа најави реформа на јавниот превоз преку набавка на еколошки автобуси и редизајн на улиците за да станат пристапни за велосипедисти и пешаци. Поддршка ќе добијат домаќинствата за премин кон еколошко греење, со субвенции и долгорочни решенија што ќе ја намалат зависноста од загадувачките извори. „Ако сакаме почист воздух, мора да се справиме со реалниот предизвик, затоплувањето во домаќинствата. Тоа е нешто за кое зборував и пред пет години, и тогаш тоа не беше популарно. Денес е значајно за сите“, истакна Шукова.Таа ја посочи нефункционалноста на јавните претпријатија, предупредувајќи дека без реорганизација и вложување во човечки ресурси, ниту една стратегија нема да даде резултати.,,Имаме документи и стратегии, но немаме имплементација. Сè што треба да направиме, веќе е измислено. Само треба да престанеме да се плашиме од промени и да почнеме да ги применуваме решенијата што постојат”, нагласо Шукова.На средбата учествуваше и Фатмир Битиќи, пратеник и поранешен вицепремиер за економија, кој потенцираше дека вистинските промени не доаѓаат со спектакли, туку со поставување на системи што функционираат.,,Не можеме да очекуваме да имаме инспектор зад секој проблем. Македонија е мала земја, ни требаат дигитални решенија, автоматизирани системи и пред се, ред. И тука ја гледам разликата, Каја не ветува чудо, туку ред и систем“, констатира Битиќи.Тој посочи и примери од други европски градови, каде воведувањето на зони со ограничен сообраќај за загадувачки возила дало мерливи резултати во квалитетот на воздухот.,,Во Скопје, улиците се чистат еднаш на 14 дена, нема техничка вода, опремата е дотраена, а комуналната хигиена е сведена на добрата волја на граѓаните. Тоа не е политика, тоа е хаос. А од хаос, нема напредок”, посочи БитиќиНа средбата заеднички се заклучи дека граѓаните, институциите и стручната јавност мора да работат заедно, а не паралелно. Вистинскиот напредок, според Шукова, нема да дојде преку камери, ПР акции и еднократни спектакли за чистење, туку преку дневна, упорна работа на системот што ќе функционира без разлика кој е на власт.Кандидатката на СДСМ испрати јасна порака дека Скопје не смее повеќе да биде град на пропуштени шанси. Последните четири години, под водство на ВМРО-ДПМНЕ и Данела Арсовска, градот стагнираше. Таа потенцира дека многу беше ветено, малку, ако воопшто и нешто беше испорачано. Институциите беа ослабени, комуналниот сектор занемарен, а граѓаните оставени сами да се борат со загадувањето, сообраќајниот хаос и урбанистичката деградација.„Доаѓа време кога Скопје ќе престане да биде синоним за разочараност. Мојата визија не е базирана на имиџ, туку на суштина. Верувам во град каде воздухот е чист, институциите се достапни, а јавниот интерес стои над приватниот“, заклучи Шукова.

Скопје | пред 8 месеци

(Видео) Скопје попладнево зафатено од невреме и повеќе пожари, има сомнежи и за подметнување на дел од нив

Скопскиот регион денес попладне беше погоден од силно невреме проследено со ветер и дожд, по што речиси истовремено избија повеќе пожари на отворен простор, видливи од голем дел од градот и предизвикувајќи вознемиреност кај граѓаните.Од Дирекцијата за заштита и спасување информираат дека за дел од пожарите постојат сомневања дека биле намерно подметнати.Во моментите кога огнената стихија беснееше на повеќе локации, силниот ветер и дожд во регионот на аеродромот Скопје не дозволија ер тракторите на ДЗС и армискиот хеликоптер, кои беа ставени во готовност, да полетаат и да помогнат во гаснењето.Пожари беа регистрирани во општина Сарај, во селото Крушопек кон падините на Водно, каде беа зафатени ниска вегетација и мешана шума, во општина Карпош кај спортската сала „Борис Трајковски“, во Гази Баба кај селата Виниче и Црешево, во Бутел кај последна 57 и во Инџиково.Надлежните соопштија дека сите пожари се изгаснати или ставени под целосна контрола.„Голема благодарност до екипите на скопската Бригада за противпожарна заштита за брзата и пожртвувана реакција. Благодарност и до тимовите на ДЗС, како и доброволното противпожарно друштво од Чаир. Посебна благодарност до повеќето граѓани кои се затекнаа на местата на пожарите и несебично помогнаа на пожарникарите,“ објавија од ДЗС.

Скопје | пред 8 месеци

(Видео) Полиција евакуираше публика во СЦ “Борис Трајковски”, девет полицајци во болница

Денеска (30.08.2025) околу 16:00 часот во непосредна близина на спортскиот центар Борис Трајковски во Скопје настана пожар, при што и покрај неповолните временски услови, од страна на полициски службеници ангажирани за физичко обезбедување на меѓународниот ракометен турнир заедно со екипа од противпожарна заштита, преземени се мерки и активности со цел спречување на ширење на истиот и зафаќање на моторни возила и објекти како и лизгалиштето што е во склоп на спортскиот центар.Исто така безбедно е направена евакуација на учесниците на турнирот и сите други спортски работници и публика. Како последица на настанатиот пожар девет полициски службеници се на кислородна поддршка на Одделот за токсикологија поради вдишување на чад и се во стабилна состојба.

Скопје | пред 8 месеци

(Видео) Костовски: Спречивме голема катастрофа, пожарот кај училиштето „Св. Климент Охридски“ е под контрола

Градоначалникот на општина Бутел, Дарко Костовски, соопшти дека пожарот кој денеска избувна во близина на новоизградената детска градинка во дворот на основното училиште „Св. Климент Охридски“ е ставен под целосна контрола.„Станува збор за подметнат пожар кој се доближи на десетина метри од градинката. Не сакам да поверувам дека и најмалку овој грозен чин е политички инструиран од страна на крајно неразумни луѓе,“ напиша Костовски на социјалните мрежи.Тој им оддаде признание на пожарникарите за навремената реакција, како и на командирот на полициската станица Бутел, кој прв пристигнал на местото на настанот, како и на кризниот штаб на Општина Бутел.„Спречивме голема катастрофа,“ додаде градоначалникот.

Скопје | пред 8 месеци

„Виз ер“ хаос: Патници од Крит тргнале за Белград, но слетале во Скопје, а на аеродромот очекувале празен авион?

Летот на „Виз ер“ од Крит за Белград, кој требаше да полета 15 минути по полноќ, заврши со неочекуван пресврт – патниците наместо на белградскиот аеродром се најдоа во Скопје околу 4 часот изутрина, пренесе српската „Н1“.Една од патничките, Јелена, изјавила дека никој не бил информиран дека летот ќе биде откажан, туку добивале пораки на секој час со нови одложувања. Конечно, летот тргнал во 4:20 часот, но наместо во Белград, слетале во Скопје.„На аеродромот во Скопје сите беа изненадени и полицијата и службениците, бидејќи ‘Виз ер’ им пријавил дека слетува празен авион, а од него излегоа околу 200 патници,“ раскажала Јелена.Таа додала дека патниците биле задржани подолго во авионот без објаснување, а една жена се почувствувала лошо. „Пилотот кажа дека нивното работно време завршува и дека информации ќе добиеме на аеродромот. Но таму никој не знаеше ништо,“ вели таа.Како причина за пренасочувањето било наведено дека белградскиот аеродром „не работи и дека авиони не слетуваат“. Патниците дури ја контактирале и српската амбасада, но им било одговорено дека не може ништо да се стори.По инсистирање на патниците, аеродромот во Скопје обезбедил автобус за нивен транспорт до Белград.Засега од ТАВ Македонија нема официјално соопштение за настанот.

Балкан | пред 8 месеци

Како дете бил жртва на сексуално вознемирување, сега пешачки 111 километри за институциите да ги чујат другите жртви

Кирил Ангелов, кој во детството бил жртва на сексуално злоставување, а подоцна успешно се изборил и со канцерот, најави хуманитарен подвиг – пешачење во должина од 111 километри, со цел подигнување на свеста за сексуално злоставување на деца, булинг и сите форми на насилство.Ангелов објави дека акцијата ќе се одржи од 30 март до 4 април 2026 година. Почетната точка ќе биде Скопје, а завршната Демир Капија, иако рутата може да претрпи промени, зависно од условите на терен.„Молкот на државните структури низ годините ме натера на овој потег. Верувам дека народот може да промени сѐ, ако има желба. Можам ова пешачење да го направам сам, но целта ми е да покажеме дека жртвите не треба да поминуваат сами низ сопствените тегобни патешествија,“ напиша Ангелов.Тој ги охрабри сите заинтересирани да му се приклучат – било од Скопје, Велес, Неготино или за само еден дел од патот – со цел да се покаже заедништво и поддршка. „Да ги утешиме жртвите дека треба да побараат помош, да се доверат некому и да го поминат животот во љубов и пријателство, а не сами и во изолација. Болката не треба да е табу, а ни тишина,“ порача тој.Ангелов, кој денес пишува за сопствените трауми, вели дека подвигот е начин да се испрати силна порака дека општеството мора да ја крене свеста и да застане зад најранливите.

Македонија | пред 8 месеци

„Добар човек, кој прерано заминува“ - политичари и колеги со последни пораки за д-р Виктор Исјановски

Со длабока тага и неверување македонската јавност ја прими веста за прераната смрт на д-р Виктор Исјановски, истакнат психијатар, професор, долгогодишен здравствен работник и поранешен претседател на СДСМ Карпош.Поранешниот премиер и претседател на СДСМ, а сега пратеник, Димитар Ковачевски, во својата порака истакна дека Исјановски ќе биде паметен како позитивен и професионален човек. „Како лекар, тој се грижеше за менталното здравје на граѓаните, а во најтешко време на пандемија успешно ја водеше најголемата здравствена установа во главниот град. Ќе го паметиме како секогаш позитивен, насмеан и професионален семеен човек, лекар и другар,“ напиша Ковачевски, упатувајќи сочувство до семејството, пријателите и колегите.Од општинската организација на СДСМ – Карпош порачаа дека неговото заминување е ненадоместлива загуба. „Виктор беше пример за човек со визија, знаење и посветеност. Како лекар, тој несебично се грижеше за менталното здравје на граѓаните; како лидер во здравството, со достоинство ги водеше институциите во најтешките времиња, а како партиски активист, беше глас на разумот, единството и напредокот. Почивај во мир, другар Виктор. Твоето дело ќе живее вечно.“Со зборови на почит се обрати и поранешниот министер за внатрешни работи, а сега пратеник, Оливер Спасовски: „Виктор беше човек со визија, знаење и несебична посветеност кон своите пациенти, колегите и пријателите. Со својот професионализам, добрината и човечноста остави длабока трага кај сите што имаа чест да го познаваат. Неговото заминување е голема и ненадоместлива загуба за здравството и за целото наше општество.“„Нека му е лесна земја и вечен спомен...“ напиша поранешниот градоначалник на Карпош, Стефан Богоев, а со кратка порака се обрати и Бојан Маричиќ: „Почивај во мир другар. Добар човек, кој прерано заминува.“Исјановски, јавноста најмногу го памети по неговата улога за време на пандемијата на ковид-19, кога го раководеше Здравствениот дом – Скопје и со сите расположливи ресурси ја водеше борбата против вирусот.

Коментари | пред 8 месеци

Инцидент на „Широк сокак“: Турист од Шведска нападнат поради маицата која ја носел, пробале да го расоблечат

Во СВР Битола вчера бил пријавен необичен инцидент на улицата „Широк сокак“, каде 32-годишен државјанин на Шведска со престој во Дебар бил нападнат од група непознати лица.Според пријавата, околу 19:50 часот неколку момчиња на возраст од околу 20 години му пришле на туристот и се обиделе насилно да му ја соблечат маицата на која имало симболи на друга држава. Откако сфатил дека не може да се одбрани, странскиот државјанин ја соблекол маицата и им ја предал, по што тие заминале во непознат правец.Од Министерството за внатрешни работи информираат дека се преземаат мерки за пронаоѓање на сторителите и за целосно расчистување на случајот.

Македонија | пред 8 месеци

(Видео) Објавенa снимка од моментот на ликвидацијата на поранешниот претседател на украинскиот парламент Андриј Парубиј

На социјалната мрежа X се појави видео од моментот на убиството на Андриј Парубиј, украински политичар кој беше претседател на Врховната рада и кој одигра значајна улога во револуцијата Евромајдан.Парубиј беше убиен денеска во западноукраинскиот град Лавов. Националната полиција претходно соопшти дека еден политичар бил застрелан, а подоцна пратеничката од „Европска солидарност“, Ирина Херашченко, потврди дека станува збор токму за Парубиј. „Министерот за внатрешни работи Игор Клименко и главниот државен обвинител Руслав Кравченко штотуку ме информираа за првите околности од страшното убиство во Лавов. Андриј Парубиј е починат,“ изјави украинскиот претседател Володимир Зеленски.Тој нагласи дека сите неопходни ресурси се вклучени во истрагата и потрагата по убијците.Украина официјално покрена истрага за „намерно убиство“ на 54-годишниот политичар. Според првичните информации, Парубиј починал на самото место на настанот, а властите и понатаму трагаат по сторителот.

Свет | пред 8 месеци

Тажна вест: Почина психијатарот и ексдиректор на „Здравствен дом – Скопје“ Виктор Исјановски

Виктор Исјановски, поранешен директор на ЈЗУ „Здравствен дом – Скопје“, почина во Грција каде што престојувал на летувањеИсјановски беше на чело на најголемата здравствена установа во земјава од јуни 2019 година до смената на власта во 2024 година. Македонската јавност најмногу го памети по неговата активност за време на пандемијата со коронавирусот, кога Здравствен дом – Скопје со сите расположливи ресурси беше ставен во функција на борбата со Ковид-19, особено во процесот на масовна вакцинација.По професија беше специјалист психијатар и зад себе остави богата професионална кариера.На социјалните мрежи, од Исјановски, во неверување се простуваат неговите пријатели.[caption id="attachment_346924" align="alignnone" width="448"] Screenshot[/caption]

Македонија | пред 8 месеци

Мицкоски за предлогот на Филипче: Донесоа декларации дека нема да менуваат име и нема да прифаќаат ултиматуми - па прифатија сѐ

Премиерот Христијан Мицкоски не се согласува со предлогот на лидерот на опозициската СДСМ, Венко Филипче за донесување на нова декларација во Собранието со „црвени линии“ во контекст на евроинтеграциите, за ако има ново вето, да се стави крај на преговорите. Според Мицкоски, тоа е само нова „итроштина“.„Мислам дека СДСМ и ДУИ го потценуваат народот и граѓаните и играат на картата на кратка меморија. Јас ќе ги потсетам дека тие имаа таква декларација во Собранието, да не прифаќаат ултиматуми од Софија, па прифатија сѐ. Имаше и една декларација во Парламентот дека нема да има промена на името, па знаете што правеше СДСМ. Исто така ќе ве потсетам дека ќе ги почитуваа резултатите од референдумот, а потоа не ги почитуваа кога беше неуспешен“, рече Мицкоски.

Македонија | пред 8 месеци

Малолетници од Скопје извршиле разбојништво врз доставувач во Визбегово

Министерството за внатрешни работи информира дека на 29 август 2025 година, во 18:20 часот, во селото Визбегово, скопско, полициски службеници од СВР Скопје лишиле од слобода двајца малолетници на возраст од 17 и 15 години.Тие се сомничат дека истиот ден, околу 16:40 часот, со употреба на физичка сила извршиле разбојништво врз 23-годишниот У.Д. од Скопје, кој во тој момент извршувал работни задачи како доставувач на пратки. На оштетениот му бил одземен ранец со пратки.Од МВР соопштуваат дека по целосно документирање на случајот против приведените ќе биде поднесен соодветен поднесок.

Скопје | пред 8 месеци