СРБИЈА

Вучиќ претстави план во пет точки: Србија може да стане пример и за поголемите држави

Претседателот на Србија, Александар Вучиќ, претстави план во пет точки за идниот развој на државата, најавувајќи реформи во економијата, образованието, енергетиката и јавната администрација, како и борба против ароганцијата и злоупотребата на моќта.Вучиќ оцени дека светот се менува побрзо од кога било и дека Србија мора да се приспособи на новите глобални околности, особено во услови на силна конкуренција меѓу САД и Кина и променетата позиција на Европа.Тој посочи дека циклусот од 2014 до 2026 година е завршен со, како што наведе, историски економски резултати. Според него, невработеноста е намалена од 26 на осум проценти, а бруто-домашниот производ пораснал од 32 на речиси 100 милијарди евра.Сепак, српскиот претседател нагласи дека се неопходни нови и длабоки промени за да се задржи економскиот раст и да се подобри животниот стандард.Во првата точка од планот, Вучиќ предлага драстично намалување на бројот на министри, државни секретари и други функционери, како и укинување агенции и институции кои, според него, немаат суштинска улога.Втората точка се однесува на зголемување на продуктивноста и работната ангажираност. Вучиќ порача дека Србија ќе мора „да работи повеќе, а не помалку“, отфрлајќи ги идеите за скратување на работното време.Третата точка предвидува целосна реформа на образовниот систем, со поголема отвореност кон светот и посилно воведување на дуалното образование, со цел младите подобро да се подготват за пазарот на трудот.Во четвртата точка, Вучиќ најавува сеопфатен пристап кон енергетиката, вклучително и употреба на нуклеарна енергија. Тој смета дека Србија нема да може да обезбеди долгорочна енергетска стабилност без изградба на мали и големи нуклеарни постројки.Петтата точка се однесува на забрзан развој на роботиката, вештачката интелигенција и современите технологии, како и продолжување на инвестициите во суперкомпјутери и дата-центри.Осврнувајќи се на состојбите во општеството, Вучиќ призна дека власта не успеала да ги ослободи граѓаните од, како што наведе, ароганцијата и бахатоста на поединци на функции.„Не успеавме да им се спротивставиме на самобендисаните и арогантни властодршци, препознатливи по реченицата – „Знаеш ли кој сум јас?“, наведе Вучиќ, додавајќи дека никој не смее да биде понижуван или непочитуван.Тој призна и лична одговорност, оценувајќи дека премногу внимание било посветено на економските резултати, а недоволно на човечноста, емпатијата и односот кон обичните луѓе.Во текстот, Вучиќ ја критикуваше и опозицијата, оценувајќи дека во изминатата година покажала повеќе ароганција и суета отколку власта, без јасна програма и конкретни резултати.На крајот порача дека Србија се наоѓа пред период на големи промени и дека државата мора да ја менува не само инфраструктурата, туку и свеста и односот кон општеството и иднината.

Балкан | пред 3 седмици

Монах од Србија скокнал од амбулантно возило во движење во Грција

Четириесет и осумгодишен монах од Србија е хоспитализиран на оддел за интензивна нега во Солун, откако скокнал од амбулантно возило во движење во северна Грција, соопшти грчката полиција.Инцидентот се случил во вторник, за време на транспортот од Урануполи кон Полигирос. Според информациите, монахот претходно се пожалил дека не се чувствува добро и имал симптоми кои упатувале на можен срцев проблем.Во текот на возењето, истражителите претпоставуваат дека тој го одврзал безбедносниот појас и потоа скокнал од возилото. Точните околности и мотивите сè уште се утврдуваат.Повредениот најпрво бил пренесен во Општата болница во Полигирос, по што бил препратен на натамошно лекување во болницата „Ипократио“ во Солун, каде што бил интубиран.Двајца членови на екипажот на Итната медицинска помош биле привремено приведени под сомнение за несовесно нанесување телесна повреда, а истрагата за случајот продолжува.

Свет | пред 3 седмици

Во пет дена ,,опустошил" четири објекти, штета околу 300 илјади динари - уапсен крадец на бакар во Србија

Полицијата во Крушевац уапсила лице со иницијали С. М. од околината на градот, под сомнение дека во период од пет дена извршил серија кражби во објекти каде се складира отпаден материјал и одзел бакар, со што наводно причинил материјална штета проценета на околу 300.000 динари.Според соопштението на Полициската управа во Крушевац, осомничениот се товари дека од 1 до 5 мај извршил четири кривични дела тешка кражба, при што цел на напад биле објекти поврзани со складирање на секундарни суровини.По налог на Основното јавно обвинителство во Крушевац, на осомничениот му е одредено задржување до 48 часа, по што ќе биде изведен пред надлежен јавен обвинител за понатамошна постапка.

Балкан | пред 3 седмици

Убиство во Белград: млад човек избоден повеќе пати со нож на автобуска постојка

Во Белград, на автобуско стојалиште во населбата Канарево брдо, млад човек е убиен откако бил повеќепати избоден со остар предмет, соопшти Министерството за внатрешни работи на Србија.Според официјалните информации, осомничениот Михајло В. е уапсен по налог на Вишото јавно обвинителство во Белград, под сомнение дека извршил кривично дело тешко убиство. Се наведува дека инцидентот се случил вчера попладне, кога деветнаесетгодишниот Неманја Ф. бил нападнат и здобил повеќе убодни рани, по што починал на местото на настанот.Полицијата и надлежните истражни органи извршиле увид, а на осомничениот му е одредено задржување до 48 часа, по што ќе биде предаден на обвинителството.

Балкан | пред 3 седмици

Вучиќ: Денес имаме со што да одиме во војна, Србија е посилна од кога било

Претседателот на Србија Александар Вучиќ изјави дека земјата денес има значително поголеми одбранбени капацитети, но порача дека не сака војна и останува посветен на мирот.„Денес сме многу посилни и затоа никој нема да нè нападне, но мора да продолжиме да се зајакнуваме. Сега би имале со што да одиме во војна, но не сакам војна, затоа што на граѓаните им ветив мир“, изјави Вучиќ.Тој оцени дека Србија е повеќекратно посилна отколку пред 15 години, нагласувајќи дека зајакнувањето на војската е резултат на економскиот раст и инвестициите во одбранбениот сектор.Според него, земјата располага со значајни количества оружје и воена опрема, вклучително и набавки од Израел, што дополнително ја зголемило борбената готовност.Вучиќ најави дека претстојната посета на Кина ќе биде една од најважните во неговата политичка кариера. Таму, како што рече, ќе се сретне со претседателот Си Џинпинг, кој во наредниот период ќе биде домаќин и на лидерите на САД и Русија, Доналд Трамп и Владимир Путин.Во фокусот на разговорите, како што посочи, ќе бидат роботиката, вештачката интелигенција, воено-техничката и економската соработка, инфраструктурата, како и реформите во образованието.Говорејќи за Косово, Вучиќ истакна дека прашањето повторно е на преговарачката маса, но нагласи дека Србија нема да влезе во воен конфликт и ќе продолжи со политика на соработка со различни партнери.

Свет | пред 3 седмици

Молотов коктел предизвика пожар во белградска населба

Локал во белградската населба Котеж бил запален рано утрово, а полицијата трага по лица осомничени дека предизвикале пожар со фрлање запаливо средство.Според информации од очевидци, инцидентот се случил околу пет часот наутро, кога непознати сторители, наводно, фрлиле молотов коктел врз објектот, по што избувнал пожар. Сведоците тврдат дека напаѓачите пристигнале со мотор и веднаш по нападот избегале од местото на настанот.Надлежните служби извршиле увид, а истрагата е во тек со цел да се утврдат околностите и идентитетот на сторителите.

Балкан | пред 3 седмици

Вучиќ: За десет дена одлука за изборите, ќе се одржат кога е најповолно за државата

Српскиот претседател Александар Вучиќ најави дека во рок од десет дена ќе биде донесена одлука за одржување на изборите, нагласувајќи дека тие ќе се организираат во период што е најповолен за државата.Говорејќи за медиумите, Вучиќ истакна дека изборите се клучен демократски процес во кој граѓаните одлучуваат каква иднина сакаат и кому ќе му ја доверат управата со државата.Тој посочи дека изборите претставуваат „момент на вистината“, но дека суштината не е во поединците, туку во иднината на државата и граѓаните.Според него, одлуката за терминот ќе биде водена од интересите на државата, со цел да се минимизираат евентуалните штети и да се обезбеди стабилност.Вучиќ нагласи дека државата мора да остане силна и стабилна, и економски и политички, со раководство кое ќе знае да се справи со предизвиците.Во изјавата тој се осврна и на претстојната посета на Кина, која ја оцени како една од најзначајните во неговата кариера. Според најавите, кинескиот претседател Си Џинпинг ќе има средби со повеќе светски лидери, меѓу кои и со Доналд Трамп и Владимир Путин.

Балкан | пред 3 седмици

Тешка сообраќајна несреќа кај Нови Пазар: четворица починаа, две лица тешко повредени

Четири лица го загубија животот, а две се тешко повредени во тешка сообраќајна несреќа што се случила на магистралниот пат меѓу Нови Пазар и Рашка.Според првичните информации, до несреќата дошло по судир на две патнички возила, „опел астра“ и „голф 7“.Полицијата потврди дека три лица починале на самото место, додека едно лице им подлегнало на повредите по приемот во болница. Двете повредени лица се хоспитализирани во Општата болница во Нови Пазар со тешки телесни повреди.Надлежните извршиле увид на местото на несреќата, а сообраќајот на оваа делница бил во прекин неколку часа додека траела истрагата и расчистувањето на теренот.

Балкан | пред 3 седмици

Земјотрес од 4,1 степен го разбуди северот на Србија, почувствуван и во регионот

Земјотрес со јачина од 4,1 степен според Рихтеровата скала ноќеска го погоди подрачјето кај Сомбор, поточно во близина на Бездан, соопшти Републичкиот сеизмолошки завод. Потресот бил регистриран околу 02:35 часот, а епицентарот се наоѓал на самата граница меѓу Србија и Хрватска, во близина на Бачки Моноштор, на длабочина од околу 13 километри.Само десетина минути по главниот удар, следувал и последователен потрес со јачина од 2,5 степени. Земјотресот бил почувствуван и во други делови на Србија, како и во Хрватска, Унгарија и северниот дел на Босна и Херцеговина.Граѓаните на социјалните мрежи споделија дека потресот ги разбудил од сон и предизвикал вознемиреност. Дел од нив опишуваат дека траел неколку секунди, но бил доволно силен за да создаде чувство на страв.Засега нема информации за повредени лица или поголема материјална штета. Според експертите, земјотреси со ваква јачина обично не предизвикуваат сериозни последици, иако во епицентралното подрачје можат да се почувствуваат како силни и непријатни.

Балкан | пред 3 седмици

(Видео) Србин претепан во Косово, повредена и жена која се обидела да го заштити

Мирослав Гуџиќ од Добротин во Косово е претепан во местото Донја Гуштерица и е хоспитализиран во Клиничко-болнички центар, а при обид да го заштити, повреди добила и работничка од оваа установа, која исто така е хоспитализирана.Гуџиќ, чијашто здравствена состојба е стабилна, раскажал дека на физичкиот напад од непознати напаѓачи му претходел сообраќаен инцидент, кога нешто по 11 часот тргнал од Добротин кон Донја Гуштерица.„Кај добротинските гробишта едно бело возило, мислам дека беше голф петка, почна да претекнува повеќе возила. Јас му дадов светлосен сигнал за да го предупредам дека ќе се судриме. Јас застанав, тој помина покрај мене. Јас го продолжив патот кон Гуштерица и таму, кај раскрсницата во близина на маркет, ме удри автомобил од задната десна страна“, истакна Гуџиќ.Тој додава дека, откако застанал да види колкава е материјалната штета, видел тројца млади Албанци кои, според неговите зборови, нешто му дофрлале, но не слушнал што и не ги препознал.„Во тој момент сакав да го продолжам патот, да ја избегнам целата ситуација. Тргнав со автомобилот напред, но возилото со кое се сретнав кај гробиштата ми го препречи патот. Некако успеав да ја избегнам блокадата и тргнав кон Домот на здравје, надевајќи се дека ќе се откажат. Тие продолжија да ме следат. Мислам дека беа три возила“, раскажува Гуџиќ.Гуџиќ потоа, гледајќи дека напаѓачите сакаат конфликт, се обидел да влезе во домот за здравје во Донја Гуштерица, со надеж дека ќе го избегне инцидентот.„Излегов од автомобилот и влегов во канцеларија, некаде да се тргнам. Тие, пет или шестмина, тргнаа по мене. Влетаа во канцеларијата и почнаа да ме удираат и да ме влечат. Таму имаше една работничка или медицинска сестра која се обиде да ме одбрани, ја нападнаа и неа. Потоа ме извлекоа надвор и продолжија да ме тепаат“, рече Гуџиќ.Тој нагласи дека не знае кој го нападнал и зошто, дека никого не провоцирал и дека единствен мотив, според него, е тоа што е Србин и што вози автомобил со нишки регистарски таблички.Гуџиќ изјави дека од вработените во домот на здравје побарал да повикаат полиција, што тие и го направиле.„Полицијата беше тука, дадов изјава за тоа што се случи. Случајот е отворен и ми рекоа по хоспитализацијата да се јавам во полициската станица во Грачаница“, додаде тој.Тврди дека напаѓачите постојано му се заканувале и го навредувале.„Ми се закануваа дека ќе ме најдат каде било. Врескаа и никогаш во животот не сум видел толку омраза и суровост во нечии очи“, изјави Гуџиќ.Директорот на Клиничко-болничкиот центар Приштина со седиште во Грачаница, Братислав Лазиќ, потврди дека две лица нешто по 12 часот се хоспитализирани и дека нивната состојба е стабилна.„Двајца повредени денес се примени на хируршката клиника со повреди здобиени во тепачка, според нивните наводи. Донесени се со санитетско возило и се во тек на дијагностика. Засега нивната состојба е стабилна, но за тежината на повредите ќе можеме да зборуваме по завршување на сите испитувања“, изјави Лазиќ.

Свет | пред 3 седмици

Три години од трагедијата кај Младеновац: девет жртви, максимални казни за Блажиќ

Навршуваат три години од масовното убиство кај Младеновац, во селата Мало Орашје и Дубона, кога Урош Блажиќ уби девет лица и рани уште 12. За овој злостор, тој правосилно е осуден на 20 години затвор – максималната казна што можеше да му биде изречена според законот.Апелациониот суд во Белград ја потврди пресудата на Вишиот суд во Смедерево, со која и Урош и неговиот татко Радиша Блажиќ се осудени на по 20 години затвор. Судот утврди дека таткото набавил оружје и муниција, кои подоцна биле искористени во нападот.Блажиќ бил осуден за тешко убиство, нелегално оружје, киднапирање и неовластено користење возило. Сепак, бидејќи во моментот на злосторството немал наполнето 21 година, не можел да добие доживотна казна затвор.Злосторството се случи на 4 мај 2023 година, кога напаѓачот пукал на три локации, при што загинаа девет лица, а повеќе беа тешко повредени. По нападот, тој побегнал, киднапирал такси возило заканувајќи се со бомба и бил уапсен во близина на Крагуевац.Во поврзан судски процес, Горан Гавриловиќ беше ослободен од обвиненијата, додека неговиот син Борис Гавриловиќ доби казна затвор од година и пол.Владата на Србија донесе одлука 3 и 4 мај да се прогласат за Денови на сеќавање на жртвите од масовните убиства, вклучително и трагедијата во Основното училиште „Владислав Рибникар“ во Белград. Во училиштата се одбележува и „Недела на сеќавање и заедништво“.Во спомен на жртвите, денеска во Мало Орашје се одржува меморијален турнир „Живите“, кој ги собира семејствата, пријателите и пошироката заедница за да им оддадат почит.

Балкан | пред 3 седмици

(Видео) Инцидент на комеморацијата за жртвите од „Рибникар“ : фрлен топовски удар, настана паника

Инцидент со фрлање топовски удар ја наруши комеморативната служба за жртвите од масовното пукање во основното училиште „Владислав Рибникар“ во Белград, предизвикувајќи паника меѓу присутните.Настанот се случил додека голем број граѓани биле собрани пред училиштето за да оддадат почит на третата годишнина од трагедијата. Според сведоштва од местото, во момент кога владеела тишина, се слушнал силен тресок, по што се појавил чад во делот од толпата каде што луѓето чекале да положат цвеќе.Присутните биле вознемирени и настанала краткотрајна паника, по што интервенирала полицијата, која влегла во зградата од каде што бил фрлен топовскиот удар.Комеморацијата се одржува по повод три години од трагедијата во училиштето, кога ученик го извршил нападот во кој загинаа девет ученици и еден вработен во обезбедувањето.

Настани | пред 4 седмици

Македонец осомничен дека крадел од џамии во Србија - полицијата го уапси

Во заедничка акција на полицијата од Нови Пазар и Бујановац, уапсен е 66-годишниот М.З., државјанин на Северна Македонија, кој се сомничи дека во период од три дена извршил кражби во четири верски објекти на територијата на Србија.Според информациите, кражбите биле извршени во периодот од 29 април до 1 мај, а мета биле џамии во Нови Пазар, Тутин и Сјеница. Осомничениот, според истрагата, ги кршел касите во верските објекти и ги одземал парите што се наоѓале во нив.При полицискиот преглед кај него биле пронајдени нож и електрошокер, поради што против него е поднесена и соодветна прекршочна пријава.На М.З. му е одредена мерка задржување до 48 часа, по што ќе биде изведен на сослушување во Основното јавно обвинителство во Нови Пазар, каде ќе продолжи постапката за расчистување на случајот.

Македонија | пред 4 седмици

Грција го суспендира EES системот за српските туристи од 1 јуни до 30 август, вели Српската конзулка во Солун

Од 1 јуни до 30 август новиот систем за влез во Европската Унија – EES (Entry/Exit System) ќе биде суспендиран за граѓаните на Србија, ќе се применува во ноќните часови и нема да влијае на дополнителни гужви, пишува Њузмакс Балканс.Според зборовите на генералната конзулка на Србија во Солун Јелена Вујиќ Обрадовиќ, иако нема да има официјален документ што би ја потврдил суспензијата на EES системот меѓу Грција и Србија, постојат ветувања и уверувања засновани на добрите односи меѓу двете земји, потврдила за ТВ Прва.Обрадовиќ истакна дека Грција најверојатно нема официјално да го суспендира новиот систем за влез во Европската Унија за граѓаните на Србија, но се очекува неговo запирање во текот на летото, со цел да се избегнат големи гужви на границите.„Од 1 јуни до 30 август ќе биде суспендиран за граѓаните на Србија. Ќе се применува во ноќните часови, но нема да влијае на дополнителни гужви“, наведе таа.Директорот на ЈУТА Александар Сеничиќ неодамна изјави дека Грција на српската делегација на состанок усно ѝ ветила дека во текот на летната туристичка сезона нема да дојде до целосна примена на EES системот на границите за државјаните на Србија.Тој наведе дека биле преземени конкретни чекори и одржани состаноци со грчките претставници, како и дека крајот на мај ќе има состанок на високо ниво во Атина, а претходно во Солун со директорот на граничната полиција, со цел договор за отворање на максимален број премини и проширување на ленти од шест на десет, како и дополнителни за автобуси, за да се забрза протокот на патници во шпицот на сезоната.EES е нов дигитален систем за контрола на влез во Шенген зоната кој подразбира земање биометриски податоци од патниците, како отпечатоци од прсти и фотографирање, со што се заменува досегашното печатирање на пасоши.

Свет | пред 4 седмици

Франција стопира пратка малини од Србија поради двојно повеќе кадмиум од дозволеното

Во пратка замрзнати малини од Србија, наменета за францускиот пазар, е откриено значително зголемено присуство на кадмиум – тежок метал кој претставува сериозен ризик по здравјето на луѓето. Според податоците на Европската комисија преку системот за брзо предупредување за храна (RASFF), измереното ниво е речиси двојно повисоко од дозволеното.Француските служби веднаш ја задржале пратката по лабораториските анализи, со што е спречено таа да стигне до потрошувачите. Случајот е официјално евидентиран на 30 април и е класифициран како „сериозен ризик“.Анализите покажале дека во малините има 0,071 милиграми кадмиум по килограм, додека максимално дозволеното ниво во Европската унија е 0,04 милиграми. Ова значително надминување ја активирало европската алармна мрежа за безбедност на храната.Кадмиумот е еден од најопасните тешки метали во синџирот на исхрана. Тој се акумулира во организмот, особено во бубрезите и црниот дроб, и може да остане во телото со децении. Долготрајната изложеност се поврзува со оштетување на бубрежната функција и зголемен ризик од канцерогени заболувања.Овој случај повторно го отвора прашањето за безбедноста на храната во меѓународната трговија и потребата од строги контроли, дури и кај производи што важат за здрави и природни.Европските институции најавуваат засилени инспекции на пратки од регионот, додека инцидентот со српските малини е впишан како пример за сериозно прекршување на стандардите за безбедност на храната.

Свет | пред 4 седмици

(Видео) Грбовиќ: Опозицијата и студентите се конкуренција, „студентската листа не постои“

Лидерот на Движењето на слободни граѓани, Павле Грбовиќ, изјави дека опозицијата и студентските блокади во Србија се наоѓаат во директна конкуренција, признавајќи дека меѓу нив постои политичка трка за поддршка.Во гостување на телевизијата N1, Грбовиќ нагласи дека е потребно реално да се согледа состојбата на опозициската сцена.„Луѓе, мора да бидеме реални – главната движечка сила на опозициското дејствување е студентската листа која не постои. Нас од опозицијата нè знаете, ги знаете лидерите, ги знаете партиите и програмите“, изјави тој.Неговата изјава доаѓа во време на засилени тензии меѓу дел од опозициските партии и студентските движења, кои во изминатиот период организираа блокади и протести низ земјата.

Настани | пред 4 седмици

Момче од Србија мета на навреди на интернет поради своето хоби

Јавноста реагира по појавата на голем број негативни коментари на социјалните мрежи насочени кон 11-годишниот Виктор Митиќ од Србија, кој преку интернет објавува содржини поврзани со своето хоби – плетење. Тој активноста ја практикува со поддршка од своите родители и ја споделува со пошироката публика.Неговите објави за кратко време привлекле големо внимание, при што стекнал стотици илјади следбеници и милиони прегледи. Голем дел од корисниците ги оценуваат видеата како симпатични и го поддржуваат неговото плетење, истакнувајќи ја креативноста на детето.Сепак, паралелно со популарноста, се појавил и значителен бран негативни и навредливи коментари, што довело до проблеми со неговиот профил на една од социјалните мрежи, кој бил блокиран поради масовни пријави.Во дел од коментарите се изнесуваат ставови дека плетењето не е соодветно хоби за момчиња, додека други корисници упатуваат и навреди и дискриминаторски пораки. Дел од јавните личности и свештени лица се вклучиле во дебатата со различни ставови, при што имало и извинувања, но и одбрана на детето.Случајот повторно ја отвори темата за влијанието на социјалните мрежи и алгоритмите, каде што негативните содржини често добиваат поголема видливост и брзо се шират, особено кога се насочени кон малолетни лица.И покрај негативните реакции, дел од јавноста продолжува да го поддржува Виктор и неговото хоби, истакнувајќи дека станува збор за дете кое преку плетење успеало да стекне широка популарност и внимание.

Свет | пред 4 седмици

Инцидент во Чачак: ученичка донела скалпел во училиште, пронајден и список со имиња

Во Основното училиште „Ратко Митровиќ“ во Чачак се случил инцидент кој ги вознемирил родителите, откако ученичка од петто одделение донела скалпел во училиште и, според наводи, имала список со имиња на деца и изјавувала дека сака да се „одмазди“ за момче кое извршило масовно убиство во „Рибникар“.Директорот на училиштето, Ѓуро Ќераниќ, потврди дека случајот се случил и дека училиштето веднаш реагирало. Тој наведе дека најпрво биле добиени информации од ученици дека девојчето има опасен предмет и наводен список, по што родителот бил повикан во училиштето и биле преземени мерки за проверка.Според неговото објаснување, ученичката првично негирала дека има скалпел, но подоцна, при проверка во училиштето, навистина бил пронајден кај неа. Родителите потоа ја презеле ученичката, а случајот бил пријавен и до Школската управа.Училиштето, во координација со надлежните институции, донело одлука девојчето привремено да биде оддалечено од редовна настава и да премине на хибриден модел на учење. Во постапката се вклучени и Центарот за социјална работа и училишниот психолог, кои треба да изработат план за работа со ученичката и одделението.Директорот нагласи дека училиштето реагирало превентивно и дека безбедноста на сите ученици е обезбедена, додека истовремено е покрената и воспитно-дисциплинска постапка.

Балкан | пред 4 седмици

Студентите контра Вучиќ: „Ја нема таа кражба што ќе го спаси, избори за него сега значат политички крај“

Студентите од Електротехничкиот факултет во Белград остро реагираа на изјавите на српскиот претседател Александар Вучиќ, кој тврдеше дека актуелните анкети покажуваат сигурна победа на владејачката партија на евентуални предвремени парламентарни избори.Во својата реакција, студентите порачуваат дека реалната слика на терен е поинаква и дека, како што велат, „нема таа кражба со која може да се надомести моменталната разлика“, алудирајќи на падот на поддршката за власта.„Во јавноста се лицитира со датуми кога ќе има избори, кога ќе има митинг. Но, тоа ништо не значи. Тие датуми служат само за нивната машинерија да биде подготвена за брза мобилизација. А таа војска сѐ побрзо го напушта бродот што тоне, управуван од капетан со сомнителна рационалност“, наведуваат студентите.Тие додаваат дека доколку одлуките се носеле рационално, избори наскоро воопшто не би биле распишани.„Да беше рационален, а не е, избори немаше да има. Разликата не се менува со месеци и не може да се покрие. Ако сепак се одлучи на таков чекор, тоа ќе биде уште еден во низата ирационални потези за кои ќе се кае“, стои во нивната порака.Од друга страна, Вучиќ претходно изјави дека, според истражувањата, коалицијата предводена од Српската напредна странка би освоила мнозинство мандати, иако призна дека изборите секогаш носат неизвесност и дека би била тешка политичка трка.

Балкан | пред 4 седмици

Вучиќ: Косово не е целосно призната држава, членството во НАТО неизвесно

Претседателот на Србија, Александар Вучиќ, изјави дека се надева оти нема да дојде до прием на Косово во НАТО, коментирајќи ги иницијативите на поединечни американски конгресмени.Говорејќи пред медиумите по отворањето на тренинг-центар за дуално и доживотно образование во Машинското училиште во Панчево, Вучиќ нагласи дека Србија има соработка со Алијансата, вклучително и учество во заеднички вежби.Во исто време, тој повтори дека Косово не може да се смета за целосно меѓународно призната држава, бидејќи, како што посочи, не е признато од сите членки на Обединети нации.Изјавата доаѓа во контекст на засилени политички дебати околу можниот евроатлантски пат на Косово, прашање кое и натаму предизвикува поделени ставови на меѓународната сцена.

Балкан | пред 4 седмици

ЕУ ја суспендираше финансиската поддршка за Србија поради назадување на судството, медиумите молчат

Европската унија ги суспендираше средствата за финансиска поддршка за Србија во рамките на Европскиот план за развој, објави европската комесарка за проширување Марта Кос.Кос рече дека средствата ќе останат замрзнати сè додека, како што изјави, „Белград не ги реши проблемите забележани во функционирањето и независноста на судскиот систем“.,,Моментално ги суспендиравме сите исплати кон Србија според планот за развој , бидејќи повторно има назадување во судскиот систем, бидејќи повторно гледаме тесно грло во судскиот систем. Додека ова не се поправи, земјата нема да може да добие финансиска поддршка од ЕУ“, рече Кос.За оваа одлука голем дел од српските медиуми молчат.Кос ја објави одлуката наведувајќи сериозен „застој“ во независноста и функционирањето на српското судство“. Главната причина за суспензијата е серија контроверзни законски измени донесени од српската влада на почетокот на 2026 година. Овие реформи, насочени кон „централизирање“ на судството, беа широко осудени од локалните обвинители и меѓународните монитори. Критичарите тврдат дека новите закони го зајакнуваат влијанието на претседателот Александар Вучиќ врз судовите и ја ослабуваат независноста на Јавното обвинителство за организиран криминал. Според новите правила, наводно се прераспоредуваат десетици специјализирани обвинители, потег за кој ЕУ стравува дека ќе ги парализира случаите на корупција на високо ниво и организиран криминал.Комесаркатат Кос нагласи дека финансирањето од ЕУ е строго условено од владеењето на правото, демократските институции и независното судство. Нерегуларностите и насилството за време на локалните избори на 29 март 2026 година длабоко ја еродираа довербата во Брисел.Исто така, одбивањето на Србија да се усогласи со санкциите на ЕУ против Русија останува главна точка на триење, при што Брисел сè повеќе бара Белград да престане да „седи на две столчиња“. Континуираниот притисок врз независните новинари и репресијата врз активистите на граѓанското општество беа посебно наведени од Комисијата како доказ за влошување на демократската средина.Српскиот министер за надворешни работи, Марко Ѓуриќ, рече дека Србија планира да ги заврши сите технички процедури за интеграција во ЕУ до крајот на годината, но нагласи дека земјата нема да моли.

Свет | пред 4 седмици

Вучиќ најави посета на Кина: Договори за инвестиции и развој на роботика

Претседателот на Србија, Александар Вучиќ, најави дека наскоро ќе ја оствари, како што ја опиша, најзначајната посета во својата политичка кариера – патување во Кина.Тој посочи дека пред оваа посета ќе престојува и во Азербејџан, но дека токму посетата на Кина ќе биде од исклучително значење, со оглед на очекувањата за конкретни договори и економски придобивки за земјата.Според Вучиќ, во подготовките ќе бидат вклучени повеќе членови на владата, а дел од делегациите веќе престојуваат во Кина. Тој изрази уверување дека ќе се постигнат резултати кои ќе придонесат за раст на индустријата и градежништвото, што, како што нагласи, останува клучна цел за економскиот развој.Особено внимание привлече најавата за можна изградба на фабрика за производство на роботи. Вучиќ изјави дека првите резултати од овој проект би можеле да се очекуваат веќе во јуни, нагласувајќи дека ваквите технологии имаат широка примена – од секојдневна употреба во домаќинствата до потенцијални индустриски и безбедносни намени.Тој оцени дека ваквиот проект би имал значително влијание врз развојот на земјата и би претставувал важен чекор кон модернизација на економијата и технолошки напредок.

Балкан | пред 4 седмици

Вучиќ: Избори или на 12 јули, или од октомври до крајот на ноември

 Српскиот претседател Александар Вучиќ вечерва изјави дека за датумот на изборите сè уште не е донесена конечна одлука.„Изборите ќе бидат или на 12 јули, или од октомври до крајот на ноември. Ќе се водиме од државните интереси“, рече Вучиќ.Тој нагласи дека изборите ќе бидат демократски и дека ќе се почитуваат сите препораки на ОДИХР, а народот ќе одлучи што сака.

Свет | пред 1 месец

Ученик донел пиштол во училиште во Србија, реагирала полицијата

Во основно училиште во Сјеница, Србија, ученик од седмо одделение донел пиштол во училиштето, потврдуваат неофицијални информации.Инцидентот се случил утрината околу 10 часот, а според информациите нема повредени и не било употребено оружјето.Раководството на училиштето веднаш реагирало и ги известило надлежните институции, по што полицијата излегла на терен и го презела случајот.Надлежните органи работат на утврдување на сите околности поврзани со инцидентот.

Свет | пред 1 месец

Струен удар на градилиште во Чачак однесе човечки живот

Маж на 49-годишна возраст трагично го загубил животот при работа на градилиште во Чачак, откако, според неофицијални информации, бил погоден од струен удар.Според сведоштва од лице запознаено со случајот, несреќата се случила додека тој извршувал работни задачи на објектот. И покрај интервенцијата, повредите биле фатални.Од надлежните органи е најавено дека ќе се спроведе истрага за целосно утврдување на околностите под кои дошло до трагедијата.

Балкан | пред 1 месец