Кривична пријава за злоупотреба на софтверска лиценца: Истата користена во 16 клубови

Секторот за внатрешни работи Тетово поднесе кривична пријава против едно правно лице со седиште во селото Кадино, општина Илинден, како и против В.А. (53) од селото Мирковци, скопско, во својство на управител на правниот субјект, поради постоење основи на сомнение за сторено кривично дело „повреда на правото од пријавен или заштитен пронајдок и топографија на интегрални кола“.Како што информира Министерството за внатрешни работи, кривичната пријава произлегува од акциска контрола спроведена на 29 јануари 2025 година во подружница на пријавеното правно лице во Тетово. При контролата било утврдено дека лиценцата која ја поседува правниот субјект била инсталирана и користена на 16 клубови на територијата на државата, иако според законските и договорните услови, истата може легално да биде инсталирана само на еден уред и не смее да биде пренесувана или мултиплицирана на други уреди.Со ваквото постапување, според МВР, пријавените го повредиле правото на користење на заштитен технолошки пронајдок, со што е нанесена штета на носителот на правото, а воедно е нарушен и правниот поредок во областа на заштитата на интелектуалната сопственост.По целосното документирање на случајот, кривичната пријава е доставена до надлежното јавно обвинителство, кое ќе одлучува за натамошниот тек на постапката.

Македонија | пред 4 седмици

Денеска се гаснат канали на MTV: Крај на една телевизиска ера

Денеска започна исклучувањето на музичките канали на MTV, при што на екраните веќе се појави пораката „MTV 80s is now closed. Thank you for watching.“, со што симболично се затвора едно од најпрепознатливите поглавја во историјата на музичката телевизија.По повеќе од четири децении емитување, музичките канали MTV Music, MTV 80s, MTV 90s, Club MTV и MTV Live ќе престанат со работа во Обединетото Кралство по 31 декември 2025 година. Одлуката не го опфаќа главниот канал MTV HD, кој во последните години е насочен кон реалити-содржини и нема музички формат.Оваа одлука се толкува како директна последица на драматичната промена во навиките на публиката, која денес музичките спотови речиси целосно ги консумира преку YouTube, социјалните мрежи и стриминг-платформи, наместо преку традиционалната телевизија. Затворањето доаѓа и во период по спојувањето на Paramount со компанијата Skydance Media, предводена од Дејвид Елисон, кој неодамна најави план за најмалку 3 милијарди долари заштеди и намалување на работната сила за околу 1.600 вработени.MTV беше лансиран во САД во 1981 година како канал целосно посветен на музиката, а првиот спот што беше емитуван симболично беше „Video Killed the Radio Star“ од The Buggles. Каналот со децении беше културен феномен – од премиерата на спотот за „Thriller“ на Мајкл Џексон, преку легендарниот Live Aid маратон во 1985 година, до создавањето на MTV Video Music Awards.MTV Europe започна со работа во 1987 година, додека Велика Британија доби сопствен музички MTV канал во 1997 година, што дополнително ја зацврсти улогата на брендот во европската поп-култура.Поранешната MTV водителка Симон Анџел, која работеше за MTV Europe и MTV UK во деведесеттите, за BBC изјави дека е „искрено тажна“ и „во неверување“ поради ваквата одлука. Таа порача дека MTV бил местото каде што музиката, уметниците и публиката се среќавале на едно место, а не во изолирани дигитални простори, оценувајќи дека со ова се губи еден заеднички културен простор.Со затворањето на музичките канали, MTV дефинитивно става точка на ерата во која телевизијата беше главниот прозорец кон светот на музиката, оставајќи ја таа улога на дигиталните платформи и новите медиуми.

Магазин | пред 4 седмици

44 кривични пријави и милијарди под истрага – годишен биланс на Финансиската полиција

Директорот на Управата за финансиска полиција, Слободан Ивановски, оцени дека изминатата година донела конкретни и мерливи резултати во борбата против финансискиот криминал, при што со истраги биле опфатени над 3,36 милијарди денари јавни средства.Според Ивановски, институцијата работела фокусирано, со јасно утврдени приоритети и со целосна посветеност кон заштита на јавниот интерес. Тој нагласи дека професионалниот пристап и ангажманот на вработените резултирале со видливи ефекти во заштитата на јавните финансии и јакнењето на владеењето на правото.Во текот на годината, Управата за финансиска полиција поднела 44 кривични пријави против вкупно 206 лица, од кои 147 физички и 59 правни лица. Преку спроведените постапки е утврдена штета од речиси 3 милијарди денари, како и противправна имотна корист од над 400 милиони денари, што, според податоците на институцијата, претставува значителен финансиски удар врз незаконските практики.Покрај оперативната работа, Ивановски посочи дека посебен акцент бил ставен и на јакнење на институционалната и меѓународната соработка, при што поддршката од меѓународните партнери и координацијата со домашните институции придонеле за зголемување на капацитетите и зацврстување на позицијата на Финансиската полиција како кредибилна и доверлива институција.Директорот истакна дека во изминатиот период било постигнато и подобрување на условите за работа на вработените, вклучително и зголемување на платите, како и набавка на нова опрема и средства. Според него, овие чекори претставуваат значаен мотивирачки фактор за поголема ефикасност и професионалност во извршувањето на задачите.Ивановски нагласи дека Управата за финансиска полиција работи врз принципот на неселективна правда, потенцирајќи дека институцијата мора да остане отпорна на какви било влијанија и целосно посветена на јавниот интерес. Тој порача дека лично ја презема одговорноста Финансиската полиција да функционира со висок степен на интегритет и транспарентност.Во однос на идните активности, директорот најави дека во 2026 година институцијата ќе продолжи уште поодлучно, со засилени истраги, поголема институционална координација и јасен фокус на заштита на јавните финансии и владеењето на правото, нагласувајќи дека борбата против финансискиот криминал и корупцијата останува врвен приоритет.

Македонија | пред 4 седмици

ВМРО-ДПМНЕ со нови прашања за патувањата на Филипче и неговата поврзаност со Заев

ВМРО-ДПМНЕ денеска излезе со ново партиско соопштение, во кое повторно отвора прашања за патувањата на претседателот на СДСМ, Венко Филипче, и неговата наводна поврзаност со поранешниот партиски лидер Зоран Заев. Повод за реакцијата, како што наведуваат од партијата, се тврдењата на СДСМ дека Филипче не се наоѓа во Дубаи, што ВМРО-ДПМНЕ го оценува како избегнување одговори за неговите движења и приватни патувања.Од ВМРО-ДПМНЕ прашуваат дали Филипче, заедно со Заев, престојува на зимување во луксузни и скапи алпски туристички центри, конкретно во Сент Мориц и Гармиш-Партенкирхен, обвинувајќи дека станува збор за елитистичко однесување и раскошен начин на живот. Во соопштението се поставува и прашањето дали Новата година ќе ја дочекаат токму во Гармиш-Партенкирхен, каде во тој период се одржува познатата скијачка турнеја „Четири скокалници“.Партијата повторно ја актуелизира и темата за таканаречената „златна виза“ за Дубаи, тврдејќи дека, според нив, СДСМ индиректно признала дека Филипче ја поседува, но без да даде јасни одговори за нејзината цена, валутата во која е платена и изворот на средствата. Од ВМРО-ДПМНЕ прашуваат дали таа виза е поврзана со наводни градежни проекти, вклучително и изградба на објект од 42 ката, и како, според нив, ваков трошок може да се покрие со примања од лекарска плата.Во завршницата на соопштението, ВМРО-ДПМНЕ саркастично се осврнува и на реакциите на СДСМ во врска со пејачот Харис Џиновиќ, наведувајќи дека не прашувале каде настапува, туку дали ќе настапува приватно за Заев и Филипче, обвинувајќи ги нивните политички противници за, како што велат, преголем интерес за естрадни теми наместо за суштински прашања од јавен интерес.

Македонија | пред 4 седмици

(Видео) Претседателката со новогодишна порака: Трагедијата во Кочани е трајна обврска за правда

Претседателката на Македонија, Гордана Сиљановска-Давкова, упати новогодишна честитка до граѓаните, во која направи осврт на годината што изминува, оценувајќи ја како период обележан со длабоки глобални и домашни предизвици, но и со започнување на важни реформски процеси.Според Сиљановска-Давкова, 2025 година ќе остане запаметена по драматичните промени во меѓународниот поредок, незамисливите војни со огромни човечки жртви, забрзаната милитаризација, како и по продлабочените климатски, еколошки и енергетски кризи. Таа посочи дека во такви услови, меѓународните институции биле маргинализирани, а меѓународното право сериозно доведено во прашање.Во обраќањето, претседателката истакна дека надворешната и безбедносна политика на државата во изминатата година била јасно европска и усогласена со заедничката европска надворешна и безбедносна политика, при што земјата се позиционирала како видлив и почитуван меѓународен актер. Во евроинтеграциските процеси, како што наведе, фокусот бил ставен на исполнување на Копенхашките критериуми.На внатрешен план, Сиљановска-Давкова оцени дека 2025 година била година на почеток на реформи во правосудството, отворање на битка со корупцијата и криминалот, креирање национална развојна стратегија, воспоставување нови стратешки партнерства за економски и структурни реформи, како и засилена инфраструктурна активност. Таа ги посочи и напорите за долгорочно решавање на енергетските прашања и системско унапредување на соработката со дијаспората.Како најтежок момент во годината, претседателката ја издвои трагедијата во Кочани, нагласувајќи дека таа ќе остане трајна сенка и обврска за целото општество. Таа порача дека не смеат да бидат заборавени семејствата на загинатите, повредените, но и барањето за правда, оценувајќи дека нивната жртва мора да резултира со подобар политички и правен систем кој нема да дозволи нови невини жртви.Во честитката, Сиљановска-Давкова изрази надеж дека Новата година ќе донесе исчекор кон траен светски мир заснован на меѓународното право и меѓународните институции, како и напредок на државата на патот кон членство во Европската Унија, во услови на владеење на правото, демократија, економски развој и здрава животна средина.На крајот, таа упати лична порака до сите граѓани, посакувајќи секому Нова година исполнета со здравје, мир и лична среќа, со посебни честитки до децата, младите и до сите граѓани.

Настани | пред 4 седмици

По три дена, пансионот „Ав ав хепи дог“ негира присуство на парвовирус, иако сопственичка тврди дека таму и било заразено кучето кое угина

По три дена молк, пансионот за кучиња „Ав ав хепи дог“ се огласи во јавноста, негирајќи дека во објектот е утврдено присуство на парвовирус и наведувајќи дека, како што тврдат, не постои официјален наод што укажува на заразна болест кај кучињата згрижени во пансионот.Во писмената реакција, управителката на „Ав ав хепи дог“ ДООЕЛ Скопје, Наде Богоевска, наведува дека актуелниот инспекциски надзор не се однесува на постоење вирус, туку на технички и административни аспекти од работењето на објектот. Од пансионот информираат дека со Агенцијата за храна и ветеринарство соработуваат целосно и транспарентно и дека ги почитуваат сите пропишани процедури, апелирајќи граѓаните да се воздржат од шпекулации и информации што, според нив, не се потврдени од надлежните институции.„Во врска со информациите што се шират на социјалните мрежи, информираме дека во нашиот објект не е утврден парвовирус, ниту пак постои официјален наод кој укажува на заразна болест. Инспекцискиот надзор се однесува на технички и административни точки, а не на постоење вирус. Со АХВ соработуваме целосно и транспарентно и ги почитуваме сите пропишани процедури.Ги молиме граѓаните да се воздржат од шпекулации. Сите официјални информации ќе ги соопштат надлежните институции — не социјалните мрежи. АВ АВ Хепи Дог секогаш работи по строг режим на хигиена и биосигурност и останува посветен на заштита на животните. Единствена овластена институција која треба да го даде конечниот одговор е Агенцијата за храна и ветерина која тоа ќе стори во најкус можен рок, бидејќи постапката пред оваа агенција е во тек“, се наведува во соопштението, во кое се посочува и дека секое, како што велат, лажно информирање на јавноста ќе биде пријавено до МВР и надлежното Јавно обвинителство.Истовремено, од Агенцијата за храна и ветеринарство за „Скопје1“ претходно информираа дека по добиени иницијативи и претставки, официјален ветеринар во моментот спроведува вонреден инспекциски надзор во пансионот лоциран во скопската населба Бардовци, поради сомнеж за циркулирање на заразна болест кај кучињата. Наводите во претставките, според АХВ, се однесуваат на сомнеж за појава на парвовироза.Од Агенцијата појаснија дека со постојната законска регулатива работата на пансиони и хотели за домашни миленици не е системски регулирана, односно тие не се регистрираат и не се одобруваат од АХВ, поради што постапуваат исклучиво од аспект на здравствена заштита и спречување на ширење заразни болести кај животните. Воедно, беше најавено дека во новиот закон за здравствена заштита и благосостојба на животните, кој е во финална фаза на подготовка, оваа област ќе биде регулирана, а пансионите ќе мора да исполнуваат одредени услови и да добијат одобрение од АХВ.Агенцијата упати и апел до сопствениците на кучиња да бидат одговорни, да ги микрочипираат своите миленици, да поседуваат валиден пасош, да ги вакцинираат против заразни болести и редовно да ги третираат со средства против паразити. Од АХВ најавија дека јавноста дополнително ќе биде информирана за наодите од надзорот, потенцирајќи дека единствена институција која може да даде конечен одговор е токму Агенцијата за храна и ветеринарство, бидејќи постапката сѐ уште е во тек.Случајот излезе во јавноста по сведочењето на Ана Пејковска, која јавно тврдеше дека нејзиното куче починало откако било оставено на чување во пансионот „Ав ав“. Таа наведе дека кучето било вратено во тешка здравствена состојба и дека, според ветеринарната дијагноза, било заразено со парвовироза. Пејковска на социјалните мрежи ги повика сопствениците итно да ги земат своите кучиња, тврдејќи дека во објектот има присуство на парво вирус.Според нејзиното сведоштво, кучето по име Мајло престојувало десет ноќи во пансионот, а по преземањето на 25 декември било во критична состојба, со повраќање и губење на свеста. Таа тврди дека ветеринарите утврдиле дека болеста била во напредна фаза и дека, и покрај обидите за лекување, животното починало. Пејковска смета дека доколку навреме била информирана и доколку било реагирано порано, кучето имало шанса да преживее.Во меѓувреме, таа објави и комуникации со други сопственици на кучиња, кои, според нејзините тврдења, по престој во истиот пансион добиле позитивни резултати на парвовироза. Дополнително сведоштво објави и лице кое тврди дека било на пракса во пансионот, опишувајќи, како што наведува, загрижувачки услови за чување на животните, наводи што пансионот досега не ги коментираше поединечно.Редакцијата на „Скопје1“ во изминатите три дена безуспешно се обидуваше да добие одговор на конкретни прашања упатени преку нивниот официјален профил на социјалните мрежи.Парвовирозата е исклучително заразно вирусно заболување кај кучињата, кое може да има фатален исход, особено доколку не се реагира навреме. Ветеринарите предупредуваат дека изолацијата на заболени животни и строгите мерки за дезинфекција се клучни за спречување на ширење на вирусот, а институционалната контрола на објектите за згрижување животни останува прашање од сериозен јавен интерес.

Скопје | пред 4 седмици

Запленети над 40 илјади петарди и огномети на Блаце, кривична пријава за едно лице

Царинската управа спречи обид за нелегално тргување со пиротехнички средства, при што беа запленети вкупно 40.872 парчиња петарди и огномети, за кои надлежните оценуваат дека претставуваат сериозна закана по здравјето и безбедноста на граѓаните. За случајот е поведена кривична постапка против едно лице, македонски државјанин од Гостивар.Како што информираат од Царинската управа, заплената била реализирана во акција на мобилен царински тим на граничниот премин Блаце, при контрола на патничко возило со швајцарски регистарски таблички. При деталниот преглед, царинските службеници утврдиле дека задните седишта на возилото биле спуштени, а целиот простор зад нив, како и багажникот, бил исполнет со пиротехнички средства.Во текот на постапката било утврдено дека осомничениот ги набавил пиротехничките средства во Приштина и се обидел противзаконски да ги внесе на територијата на државата, со намера за нелегална трговија. Против него е поднесена кривична пријава за неовластено изработување, држење, посредување и тргување со оружје и експлозивни материи, кривично дело предвидено и казниво според Кривичниот законик.Од Царинската управа предупредуваат дека употребата и трговијата со нелегални пиротехнички средства претставуваат сериозен ризик по јавната безбедност, особено за децата и младите, и можат да предизвикаат тешки телесни повреди и материјални штети.Надлежните најавуваат дека и во наредниот период ќе продолжат со засилени контроли и координирани активности со другите институции, со цел спречување на нелегалната трговија со пиротехнички средства и заштита на безбедноста на граѓаните, особено во периодот на празници.

Македонија | пред 4 седмици

(Фото) Апасиев си доби опомена од „Сејф сити“ за 51 километар на час

Пратеникот и лидер на Левица, Димитар Апасиев, на социјалните мрежи објави дека добил опомена од системот „Сејф сити“ поради возење со 51 километар на час на делница каде дозволената брзина е 50 километри на час. Според неговата објава, прекршокот бил регистриран на клучката Хиподром во правец кон Ченто.Апасиев, со саркастичен тон, напиша дека сам ќе ја „извади“ опомената на јавност, алудирајќи на настапите на премиерот во Собранието и нивните кавги, но и на, како што наведе, прекумерната контрола и бирократизација.Во меѓувреме, од Министерството за внатрешни работи информираа дека по пробното пуштање во употреба на системот „Сејф сити“ е забележано намалување на бројот на регистрирани прекршоци. Министерот за внатрешни работи, Панче Тошковски, изјави дека системот сè уште не е целосно усогласен со новите законски правила.Тошковски појасни дека, согласно измените, во градска средина прекршок треба да се евидентира при надминување на брзината од 57 километри на час, наместо досегашната граница од 50 километри на час, но дека техничката адаптација на системот сè уште не е завршена. Поради тоа, дел од прекршоците, како што е и случајот со Апасиев, се регистрираат според старите параметри.Надлежните најавуваат дека во наредниот период ќе следи целосно усогласување на „Сејф сити“ со законските измени, по што системот ќе функционира согласно новите прагови за санкционирање, со цел поголема правна прецизност и еднаков третман на сите учесници во сообраќајот.

Македонија | пред 4 седмици

Опозициска реакција: Каде е фотографијата од Дубаи со Филипче?

Опозициската СДСМ реагираше на, како што ги нарекува, континуираните лаги и манипулации што, според партијата, доаѓаат од ВМРО-ДПМНЕ во врска со наводното патување во Дубаи и т.н. „златна виза“. Од СДСМ велат дека обвинувањата се целосно неконзистентни и се менуваат од ден во ден, што, според нив, ја разоткрива паниката и изгубеноста на владејачката партија.„Толку многу лажат што веќе и самите се загубија во сопствените лажни вести“, наведуваат од СДСМ, посочувајќи дека дури и износот на наводната виза постојано се менува. Според нив, првично се зборувало за половина милион долари, потоа за половина милион евра, а веќе следниот ден сумата, како што тврдат, прераснала во половина милијарда евра.Во реакцијата се наведува дека ВМРО-ДПМНЕ во обид да ја одржи приказната, започнала да вклучува и јавни личности кои, според СДСМ, немаат никаква врска со настаните. Како пример го посочуваат името на Харис Џиновиќ, за кого велат дека со едноставно јавно пребарување може да се утврди дека новогодишната ноќ ја поминува во Херцег Нови, а не во Дубаи.Од СДСМ оценуваат дека ваквите обвинувања претставуваат обид за дефокус од, како што наведуваат, сериозните теми поврзани со криминални тендери и договори за мигранти, за кои тврдат дека актуелната власт избегнува да даде одговори. Според партијата, станува збор за систематска политичка манипулација која прераснува во директна навреда на интелигенцијата на граѓаните.Во реакцијата, СДСМ повторно прашува кога ВМРО-ДПМНЕ ќе објави конкретен доказ за своите тврдења, односно фотографија од наводното патување во Дубаи, оценувајќи дека до тогаш сите обвинувања остануваат на ниво на неосновани инсинуации и лажни вести.

Македонија | пред 4 седмици

Русија тврди: Украина се обидела со масовен дронски напад врз резиденцијата на Путин

Руските власти тврдат дека Украина извршила темелно подготвен, но неуспешен напад со беспилотни летала врз една од официјалните резиденции на рускиот претседател Владимир Путин, лоцирана во Новгородската област. Според руската страна, станувало збор за повеќеслоен и целно насочен напад, кој бил навремено откриен и целосно неутрализиран од системите за противвоздушна одбрана.Генерал-мајор Александар Романјенков, командант на руските противвоздушни ракетни сили, на брифинг изјави дека формата на нападот, бројот на употребени летала и нивното дејствување од југ, југозапад и запад, директно кон претседателската резиденција, укажуваат дека нападот бил внимателно испланиран. Според неговите тврдења, беспилотните летала биле лансирани од украинските области Суми и Чернигов, а обидот за напад бил изведен од повеќе правци.Романјенков наведе дека нападот бил детектиран во неделата околу 19:20 часот по московско време и дека сите дронови биле соборени над територијата на Брјанската, Смоленската и Новгородската област. Тој истакна дека нема причинета материјална штета врз резиденцијата, ниту пак има загинати или повредени лица, додавајќи дека руската армија постапила координирано и ефикасно.Од Кремљ соопштија дека, според нивните податоци, во нападот биле употребени вкупно 91 беспилотно летало, а сите биле уништени од противвоздушната одбрана. Рускиот министер за надворешни работи Сергеј Лавров изјави дека поради овој настан Москва ќе го преиспита своето преговарачко позиционирање во однос на Украина.Портпаролот на Кремљ, Дмитриј Песков, оцени дека ваквите, како што ги нарече, провокации од страна на Киев имаат цел да ги поткопаат напорите на американскиот претседател Доналд Трамп за посредување во мировниот процес. Тој додаде дека инцидентот нема да влијае врз дијалогот меѓу Русија и САД и дека руската војска знае како, кога и со кои средства да одговори.Од украинска страна, обвинувањата беа категорично отфрлени. Украинскиот министер за надворешни работи Андриј Сибиха на социјалните мрежи напиша дека нема никакви докази за ваков напад и дека станува збор за лажни тврдења, кои, според него, се дел од вообичаената руска тактика. Тој оцени дека Русија често ги обвинува другите за активности кои самата планира да ги спроведе.Украинскиот претседател Володимир Зеленски изјави дека обвинувањата се измислени и дека Кремљ со нив подготвува оправдување за нови напади врз Украина. Според него, целта е создавање изговор за удари врз Киев и државните институции, предупредувајќи дека постои ризик од нова ескалација.Скептицизам изразија и од Соединетите Американски Држави. Американскиот амбасадор при НАТО, Метју Витакер, изјави дека не е јасно дали нападот навистина се случил и дека е потребно да се видат разузнавачките информации за инцидентот. Тој оцени дека би било нелогично Украина, во момент кога се зборува за напредок во мировните преговори, да преземе чекор што би можел да се толкува како непромислен.Американскиот претседател Доналд Трамп потврди дека рускиот претседател лично го информирал за наводниот напад во телефонски разговор. Трамп изјави дека таков потег не би бил добар и нагласи дека напад врз дом на државен лидер не е соодветен во ваков момент, додавајќи дека допрва ќе се утврдува дали навистина постојат докази за случувањето.

Свет | пред 4 седмици

Година без олеснување: Како 2025 ја затекна Македонија неподготвена

Годината што изминува ја остави Македонија во состојба на длабока политичка, институционална и општествена преиспитувачка фаза, обележана од трагедии, политички пресврти, остри судири околу одговорноста и сè погласно незадоволство кај граѓаните. Наместо стабилизација, 2025 година донесе чувство дека државата чекори по тенка линија меѓу формалната демократија и реалниот институционален застој.Најтешкиот и најтрауматичен настан што ја обележа годината беше пожарот во дискотеката „Пулс“ во Кочани, во кој животот го загубија 63 млади лица, а над 200 беа повредени. Трагедијата не само што ја потресе јавноста, туку ја разоткри и целата мрежа на системски пропусти, институционален молк и долгогодишна неказнивост. Објект кој со години работел без минимално-технички услови, без противпожарна заштита и со незаконски реконструкции, стана симбол на држава што реагира дури кога е предоцна. Судскиот процес што следеше, со десетици обвинети – од сопственици, обезбедување и инспектори, до поранешни министри и градоначалници – ја претвори Кочани во лакмус-тест за владеењето на правото. Барањето за неселективна правда стана доминантна порака на јавноста, додека скепсата дали системот ќе ги санкционира вистинските виновници остана присутна.Паралелно со ова, политичката сцена влезе во нова турбулентна фаза. По локалните избори, ВМРО-ДПМНЕ завзеде повеќе општини, додека СДСМ се најде во длабока внатрешна криза, проследена со јавни судири, заминувања на истакнати функционери и отворени обвинувања за авторитарен начин на водење на партијата. Изјави на поранешни функционери дека партијата се оддалечува од своите вредности дополнително ја продлабочија недовербата кај гласачите. Политичкиот дијалог се сведе на меѓусебни обвинувања.Неминовен детал беше дебатата дали ќе ни се населат мигранти. Владата склучи договор со Велика Британија за взаемна соработка, а СДСМ ја отвори темата дали ќе се носат мигранти кои таа земја не ги прифаќа. По еден месец препукувања, а додека граѓаните не знаеја на кого да веруваат - предновогодишната атмосфера ги стиши ривалите.Економската состојба во 2025 година беше обележана со раст на трошоците за живот, стагнација на платите и зголемен притисок врз средната класа. Инфлацијата, иако формално стабилизирана, во пракса се чувствуваше преку високите цени на храната, енергенсите и кириите. Младите сè поотворено зборуваа за иселување, додека недостигот од јасна стратегија за задржување на работната сила остана нерешен проблем.Безбедноста и јавниот ред исто така беа во фокусот на годината. Проектот „Сејф сити“, кој требаше да донесе поголема безбедност преку видео-надзор, се најде на удар на критики дека камерите не можат да ја заменат физичката присутност на полицијата, особено по серијата сообраќајни несреќи и дивеење по улиците. Граѓаните сè почесто поставуваа прашање дали безбедноста се сведува на казни или на реална превенција.На надворешнополитички план, Македонија продолжи да тапка во место во процесот на европска интеграција. И покрај декларативната заложба за ЕУ, конкретен напредок беше речиси незабележлив, а разочараноста кај граѓаните растеше. Чувството дека земјата е заглавена меѓу ветувањата и блокадите стана доминантно расположение.Годината беше обележана и со граѓански реакции и јавен отпор – од протести по трагедии, до бурни реакции на социјалните мрежи за случаи на институционална негрижа, злоупотреби и неправди. Јавниот простор стана место на гласно незадоволство, но и на поделби, со сè помалку доверба дека институциите навистина слушаат.Во текот на цела година, од власта слушавме дека се работи на проекти кои биле во застој, се отвораа делови од автопатот Кичево-Охрид кој се гради повеќе од една деценија, нѐ убедуваа дека утре ќе биде подобро од вчера.На крајот од годината, Македонија не излезе посилна, но излезе поосвестена. 2025 година не беше година на напредок, туку година на разоткривање – на слабостите, на пропустите и на цената што ја плаќаат граѓаните кога системот не функционира. Останува прашањето дали научените лекции ќе се претворат во реформи, или ќе останат само уште една болна статистика во историјата на пропуштени шанси.

Македонија | пред 4 седмици

ВМРО-ДПМНЕ со новогодишна порака: Заедништво, стабилност и одговорност за иднината

Владејачката партија ВМРО-ДПМНЕ, во пресрет на Новата година, упати честитка до сите граѓани на Република Македонија, со порака за заедништво, стабилност и одговорност кон иднината на државата.Во честитката, од партијата посочуваат дека новата година започнува во период на сериозни општествени, економски и национални предизвици, при што нагласуваат дека се свесни оти секојдневието на голем број семејства не е лесно и дека од политиката се очекуваат конкретни резултати, а не декларативни изјави. ВМРО-ДПМНЕ наведува дека нивната заложба е насочена кон работа за секој поединец, за секое семејство и за сите делови на државата, со ветување дека довербата на граѓаните нема да биде изневерена.Во пораката се потенцира дека, според партијата, политичката борба не е само прашање на власт, туку на принципи, вредности и визија за државата. Од ВМРО-ДПМНЕ оценуваат дека станува збор за спротивставување меѓу одговорното градење на државните темели и, како што наведуваат, импровизациите и краткорочните калкулации, при што посочуваат дека националните интереси мора да бидат заштитени и водени со јасна визија и почит кон граѓаните.Како клучна вредност се истакнува заедништвото, кое, според ВМРО-ДПМНЕ, претставува најголемата сила на општеството. Во честитката се наведува дека само преку обединетост, заемна почит и солидарност може да се изгради стабилна, сигурна и праведна држава, која ќе го вреднува трудот, ќе го почитува достоинството на човекот и ќе создава еднакви можности за сите.Партијата нагласува дека останува посветена на одговорно управување, економски развој, социјална сигурност и унапредување на животниот стандард, посочувајќи дека целта е создавање цврсти и трајни темели за иднината на младите генерации.Во завршниот дел од честитката, ВМРО-ДПМНЕ наведува дека во Новата година влегува со вера во сопствените сили, со почит кон минатото и со јасна визија за иднината, изразувајќи уверување дека со чесна работа, принципиелност и заедништво, Македонија може да биде подобро место за живеење. На граѓаните им се упатуваат желби за здравје, мир, семејна топлина и поголема сигурност во секој дом, со порака Новата година да биде година на стабилност, сплотеност и напредок.

Македонија | пред 4 седмици

ВМРО-ДПМНЕ со жестока критика кон СДСМ: Без реформи и со старо раководство во слободен пад

Владејачката ВМРО-ДПМНЕ со соопштение реагираше на состојбите во опозициската СДСМ, оценувајќи дека партијата се наоѓа во, како што наведуваат, длабок внатрешен хаос, додека нејзиниот лидер Венко Филипче, според тврдењата на ВМРО-ДПМНЕ, престојува во Дубаи „по инструкции од поранешниот премиер Зоран Заев“.Од ВМРО-ДПМНЕ наведуваат дека јавноста сè уште не добила одговори за, како што тврдат, инвестициите поврзани со Заев во Дубаи, изградбата на објект со 42 ката, како и за наводна „златна виза“ на Филипче. Според партијата, додека овие прашања остануваат без одговор, раководството на СДСМ се луксузира, користејќи средства кои, како што обвинуваат, биле стекнати за време на седумгодишното владеење на СДСМ и ДУИ.Во соопштението се наведува дека по, како што го оценуваат, „пустошот“ што го оставиле СДСМ и ДУИ, ВМРО-ДПМНЕ успеала да ја стабилизира државата и економијата. Како аргумент, од партијата потсетуваат на резултатите од локалните избори, на кои, според нив, ВМРО-ДПМНЕ остварила убедлива победа, освојувајќи 54 општини и градот Скопје, додека СДСМ, како што наведуваат, останала со шест општини и значително помал број гласови и советници.Посебно се истакнува дека победите во општини како Кичево, Карпош и Струга претставувале историски пресврт, додека резултатите на СДСМ се оценуваат како најтежок пораз во историјата на партијата, со губење на нејзините, како што се наведува, традиционални упоришта.ВМРО-ДПМНЕ смета дека СДСМ не спроведува вистински реформи и дека во партијата и понатаму доминира, како што го нарекуваат, „заевизмот“, што, според нив, ја води партијата кон натамошен пад. Во соопштението се наведува дека доколку Филипче и неговиот, како што тврдат, политички ментор продолжат да управуваат со СДСМ, партијата ризикува целосно да исчезне од политичката сцена.Во контраст на тоа, од ВМРО-ДПМНЕ истакнуваат дека Владата предводена од нивната партија носи стабилност, економски раст и подобрување на животниот стандард. Како резултати се наведуваат зголемување на платите, раст на пензиите за 7.000 денари, стабилизирање на инфлацијата која, според нив, сега е во рамките на европскиот просек, како и континуиран раст на индустриското производство.Партијата наведува дека се зголемени платите во образованието, здравството, културата, полицијата, социјалната заштита и јавната администрација, како и дека пензиите се зголемени значително повеќе во споредба со периодот кога на власт била СДСМ.Во соопштението се посочува и на инвестиции во енергетиката, изградба на патна инфраструктура, воведување нови авиолинии и подобрување на поврзаноста на државата за бизнис и туризам. Посебно се нагласува мерката со која студентите добиле ваучери од 250 евра за електронски уреди, која, според ВМРО-ДПМНЕ, опфатила околу 55.000 студенти.Дополнително, се наведува дека платите во образованието пораснале за над 12 проценти, дека се градат нови училишта, спортски сали и факултетски објекти, како и дека буџетот за наука во 2025 година бил двојно зголемен во однос на 2024 година. Како поддршка за науката и иновациите, се посочува обезбедувањето на 274 милиони денари за научно-истражувачки проекти на јавните установи, МАНУ и компании кои соработуваат со академската заедница.ВМРО-ДПМНЕ наведува дека е воспоставен механизам за континуиран раст на платите на здравствените работници, кои, според плановите, во текот на мандатот треба да се зголемат за повеќе од 40 проценти, како и дека е зголемен капитациониот бод за матичните лекари, гинеколозите и стоматолозите.На крајот од соопштението, ВМРО-ДПМНЕ порачува дека останува посветена на борбата против корупцијата и криминалот, воспоставувањето на правна држава и владеење на правото, како и на создавање подобра иднина и повисок животен стандард за сите граѓани.

Македонија | пред 4 седмици

СДСМ обвинува за репресија и политички прогон: Власта влегува во последна фаза пред избори

Опозициската СДСМ обвини дека власта предводена од ВМРО-ДПМНЕ влегла во, како што наведуваат, „последната фаза од политичката кампања“, која, според нив, се темели на репресија, политички прогон и обиди за замолчување на опозицијата.Од СДСМ тврдат дека по, како што го нарекуваат, „декретот со кој се ограничува слободата на говорот“, следува нов чекор – обиди за апсења и директен притисок врз партијата, со цел да се запре, како што велат, нивната борба против криминалот и корупцијата на владејачката коалиција ВМРО-ДПМНЕ и ЗНАМ.Во соопштението се наведува дека станува збор за веќе видено сценарио, со јасно дефинирани фази: прво, јавни обвинувања и напади врз СДСМ преку, како што тврдат, лажни вести и надворешни притисоци; потоа, ограничување на слободата на говорот; и конечно, репресија и политички прогон. Овој модел, според СДСМ, е „копија на сценарија применувани во други држави од регионот“.Партијата оценува дека целта на ваквите активности е заштита на, како што ги нарекуваат, „криминалците во власта“ од кривична одговорност, особено поради серијата објавени информации за сомнителни тендери. Како примери, од СДСМ ги посочуваат тендерите во вредност од 5,3 милиони евра доделени на една фирма преку 161 постапка, договори од 9 милиони евра за фирма со, како што наведуваат, минимален број вработени, како и тендери од 1,2 милиони евра поврзани со Македонска пошта.Во обвинувањата се тврди дека власта воспоставила целосна контрола врз судството и обвинителството, дека се спроведува координирана медиумска кампања против СДСМ, како и дека постои организиран обид за внатрешно уривање на партијата преку поединци и медиумски написи кои, според нив, имаат за цел јавно дискредитирање на раководството и политиките на СДСМ.Дополнително, од партијата наведуваат дека дел од јавните средства, преку тендерски постапки, се користат за политички договори со коалициски партнери, што тие го оценуваат како „исплата за политичка лојалност“.СДСМ смета дека ваквите потези се подготовка за изборниот период што следува и за, како што тврдат, контроверзни политички одлуки поврзани со мигрантските политики. Од партијата порачуваат дека нема да се откажат од, како што велат, борбата против криминалот и корупцијата и дека, според нив, „одговорност ќе има“.

Македонија | пред 4 седмици

Ексдиректорот на затворот во Шутка осуден на затворска казна, другите вработени на условна за давање на погодности вон закон на затвореници

Основниот кривичен суд Скопје ја објави пресудата за предметот со КОК бр. 98/25, кој се однесува на злоупотреби сторени од вработени во КПУ Затвор Скопје. Судот ги огласи обвинетите за виновни за кривичните дела што им се ставаа на товар, оценувајќи ги сите олеснителни и отежителни околности.Поранешниот директор на затворот „Скопје“ во Шуто Оризари, Филип Андов – Сокол, е осуден на казна затвор во траење од осум месеци за кривичното дело злоупотреба на службената положба и овластување. Судот утврди дека делото е сторено во соизвршителство и во продолжено траење.На обвинетиот П.А., исто така за злоупотреба на службената положба и овластување, му е изречена условна осуда од шест месеци затвор, која нема да се изврши доколку во рок од две години од правосилноста на пресудата не стори ново кривично дело.Обвинетиот Ѓ.Р. е огласен за виновен за кривичното дело несовесно работење во службата и му е изречена условна осуда од три месеци затвор, со рок на проверка од една година. Иста санкција, условна осуда од три месеци затвор со рок од една година, судот му изрече и на обвинетиот С.П. за истото кривично дело.За обвинетиот Т.Н., кој беше обвинет за злоупотреба на службената положба и овластување и за несовесно работење во службата, судот утврди единствена санкција – условна осуда од осум месеци затвор, која нема да се реализира доколку во наредните три години не стори ново кривично дело.Обвинетиот Е.О. е осуден за несовесно работење во службата и му е изречена условна осуда од шест месеци затвор, со рок на проверка од две години, додека обвинетиот К.В. доби условна осуда од три месеци затвор со рок од една година.Пресудата не е правосилна и странките имаат право на жалба до Апелациониот суд Скопје.Претходно, Обвинителството за организиран криминал и корупција поднесе обвинение против поранешниот директор на затворот „Скопје“ и против повеќе затворски надзорници и полициски службеници. Според обвинението, осум лица беа опфатени со постапката, додека за две лица истрагата беше запрена поради недостиг на докази.Од обвинителството информираа дека првообвинетиот, во својство на директор, заедно со двајца полициски службеници, како соизвршители, сторил продолжено кривично дело злоупотреба на службената положба и овластување. Дополнително, еден од полициските службеници е обвинет и за несовесно работење во службата, кривично дело за кое се обвинети и останатите петмина службеници.Според наводите во обвинението, во периодот од март до јули 2024 година, обвинетите со умисла извршиле повеќе меѓусебно поврзани дејствија при вршење на службените овластувања, со што на петмина осуденици им овозможиле незаконски погодности. Осудените биле спроведувани до своите домови и до други локации за приватни потреби, спротивно на пропишаната постапка за спроведување лица лишени од слобода надвор од казнено-поправна установа.Истрагата за овој предмет беше отворена во февруари годинава против десет лица, но за две од нив постапката беше запрена поради немање доволно докази.

Македонија | пред 4 седмици

Кривична постапка за „Јужна пруга“: објектот работел и покрај службена забрана

Основното јавно обвинителство Скопје поведе кривична постапка против едно лице поради основано сомнение за сторено кривично дело „симнување и оштетување на службен печат или знак“ од член 389 став 1 од Кривичниот законик.Според информациите од Обвинителството, осомничениот е сопственик и управител на угостителскиот објект „Јужна пруга“ во Скопје, на кој претходно му била изречена забрана за вршење на дејност. Забраната била донесена со решение од овластен инспектор за животна средина од Општина Аеродром и истата била јавно истакната на влезната врата од објектот.И покрај тоа, осомничениот го отстранил решението, а при последователна инспекциска контрола било утврдено дека угостителскиот објект продолжил со работа и дека во него имало присутни гости, иако дејноста била формално забранета.Од Обвинителството наведуваат дека со ваквото постапување, осомничениот свесно продолжил да врши угостителска дејност без да ги исполнува законските услови, со што манифестирал непочитување на службените акти и директно ја нарушил службената функција на издаденото решение. Со тоа, според обвинителството, било попречено и нормалното функционирање на државните и јавните институции.Поради основаното сомнение дека со симнувањето на службениот знак е исполнето битието на кривичното дело, јавниот обвинител побарал од надлежниот суд да изрече мерка на претпазливост за време на кривичната постапка. Конкретно, предложено е да се изрече забрана осомничениот да врши дејност за давање угостителски услуги, како и целосно да се спроведе решението донесено од надлежните инспекциски служби.

Скопје | пред 1 месец

„Па каков е тој ‘Сејф сити’ кога нема полиција по улиците за овој народ? За таа стока што вози 150 на Трета македонска бригада и на Партизанска, камерите не бркаат работа“

Ина Многуфина со остра јавна реакција го доведе во прашање ефектот од системот „Сејф сити“, оценувајќи дека камерите не можат да ја заменат присутната и активна полиција на улиците. Во објава на социјалните мрежи, таа посочи дека секојдневните сообраќајни прекршувања, особено дивеењето со големи брзини, остануваат несанкционирани во реално време, а граѓаните се оставени без чувство на безбедност.„Па каков е тој ‘Сејф сити’ кога нема полиција по улиците за овој народ? За таа стока што вози 150 на Трета македонска бригада и на Партизанска, камерите не бркаат работа“, напиша Многуфина, алудирајќи на конкретни сообраќајни инциденти забележани претходниот ден.Таа смета дека системот базиран исклучиво на видео-надзор служи претежно за наплата на казни, но не и за превенција и директна интервенција кон ризичните возачи. Според неа, проблематичните учесници во сообраќајот не се плашат од камери, туку од непосредна полициска контрола.„Си бара тоа полиција – ‘добар ден господине, документи, излезете од возилото, отворете багажник, каде брзате, дувајте тука’. Сѐ тоа“, наведува таа, потенцирајќи дека само физичкото присуство на полицијата може да делува воспитно и одвраќачки.Во продолжение, Многуфина оценува дека концептот на целосна автоматизација на контролата е погрешен и создава лажна слика за ред и безбедност. „Камери и демек завршивме работа. Камерите ќе донесат само пари од казни. Проблематичните си бараат друг третман“, заклучува таа.

Коментари | пред 1 месец

Сомнежи за парво вирус во пансион за кучиња во Скопје: сопственичка тврди дека миленикот ѝ угинал по престој во „Ав, ав“, заразени и други миленици

Ана Пејковска тврди дека нејзиното куче починало откако било оставено на чување во пансионот за кучиња „Ав, ав“, посочувајќи дека животното било вратено во тешка здравствена состојба и заразено со парвовироза. Таа за случајот јавно проговори на социјалните мрежи, каде објави дека, според неа, во пансионот има присуство на парво вирус и ги повика сопствениците итно да ги земат своите миленици.„‘Ав, ав’ ми го убија кучето. Сите да си ги земете и однесете кучињата дома. Во хотелот има парво вирус. Земете си ги со време, пред да ви ги изгладнат без да ви кажат, со денови, и да ви умрат во раце штом ги земете“, напиша Пејковска во јавната објава.Според нејзиното сведоштво, кучето по име Мајло престојувало десет ноќи во пансионот. На 25 декември, околу 17 часот, ѝ било вратено со објаснување дека тој ден не јадел и бил нерасположен. Таа тврди дека веднаш по преземањето, уште пред да стигнат дома, кучето повратило и се онесвестило, по што било однесено на итен ветеринарен преглед.„На ветеринар ни рекоа дека има парво вирус и дека е речиси во крајна фаза. Кога ја контактирав ветеринарката за која ми беше кажано дека рекла дека кучето е добро, таа ми потврди дека имало крв во изметот – информација што јас никогаш не ја добив од пансионот. Мајло беше со обилно крвавење, од 5,5 килограми паднат под четири. Ми го вратија како сенка од куче. Ова не се случува за еден ден. Ова е резултат на денови болка, гладување и игнорирање“, наведува Пејковска.Таа посочува дека, и покрај обидите на ветеринарите со инфузии и терапии, состојбата била веќе критична и кучето починало. Според неа, доколку пансионот навреме реагирал и ја информирал за здравствените проблеми, постоела реална шанса животното да преживее.Редакцијата на „Скопје1“ утринава побара став од пансионот за кучиња „Ав, ав“, но до моментот на објавување на овој текст не добивме одговор, ниту реакција на поставените прашања.Во меѓувреме, Пејковска објави и комуникација, за која тврди дека била водена меѓу пансионот и друг корисник на нивните услуги, кој прашувал дали неговото куче било во контакт со заразениот и починат Мајло. Според објавените принт-скринови, сопственикот бил уверуван дека контакт немало, но подоцнежните тестирања покажале дека и тоа куче, иако возрасно и со претходни здравствени проблеми, било позитивно на парво вирус.Сведоштво објави и извесна Викторија Арсова, која тврди дека била еден ден на пракса во пансионот и дека таму видела, како што наведува, загрижувачка состојба. Таа во објава пишува дека кучињата биле сместени во боксови без вода, спиеле на плочки, а излегувањето надвор било краткотрајно и служело главно за фотографирање за социјалните мрежи. Арсова тврди и дека била сведок на груб однос кон животните, при што тие биле удирани со метла за да се придвижат во боксот.Дополнителни реакции се појавија и на официјалната фејсбук-страница на пансионот, каде корисници бараат објектот привремено да се затвори и да се изврши целосна дезинфекција поради сомнеж за присуство на парво вирус. Во коментарите се поставуваат и прашања дали пансионот планира јавно да информира дека просториите се потенцијално контаминирани.Во уште едно сведоштво, објавено без име, а споделено од Пејковска, сопственик на куче наведува дека неговиот миленик по шест ноќи престој во пансионот бил вратен значително ослабен и подоцна бил дијагностициран со парвовироза. „Ми рекоа дека бил под стрес и дека затоа не јадел“, стои во објавениот принт-скрин.„Скопје1“ испрати прашања и до Агенцијата за храна и ветеринарство, од каде се очекува одговор дали пансионот „Ав, ав“ поседува валидна лиценца за работа, кој орган ја издал, дали досега имало пријави против објектот и дали е извршен инспекциски надзор по актуелните наводи.Јавно реагираше и пејачката Бојана Скендеровски.Парвовирозата е тешко вирусно заболување кај кучињата, кое најчесто ги погодува помладите животни, но може да се јави и кај возрасни кучиња. Станува збор за исклучително заразна болест, при која заразените животни претставуваат сериозен ризик за останатите кучиња, поради што е неопходна изолација и строги мерки за дезинфекција. Ветеринарите предупредуваат дека навремената реакција е клучна за преживување, а институционалната контрола на објектите за чување животни е од суштинско значење за спречување вакви трагични случаи.

Скопје | пред 1 месец

95 проценти усогласеност, но без конечен договор: што го кочи мирот во Украина

Американскиот претседател Доналд Трамп и украинскиот претседател Володимир Зеленски соопштија дека е постигнат значителен напредок во разговорите за завршување на војната во Украина, по нивната средба одржана на Флорида. Иако двајцата лидери ги оценија разговорите како исклучително позитивни, Трамп предупреди дека остануваат „едно или две многу чувствителни прашања“ кои допрва треба да бидат решени, при што како клучна пречка повторно го посочи прашањето за територијата.Обраќајќи се пред медиумите во Мар-а-Лаго, Зеленски изјави дека е постигната согласност за околу 90 проценти од мировниот план од 20 точки, додека Трамп наведе дека договорот за безбедносни гаранции за Украина е речиси целосно усогласен, со околу 95 проценти согласност. Сепак, американскиот претседател не даде конкретно ветување за распоредување американски трупи или за директна воена заштита од евентуални идни напади.Зеленски најави дека украинските и американските преговарачки тимови ќе продолжат со интензивни средби уште наредната недела, со цел финализирање на договорот за ставање крај на конфликтот кој трае речиси четири години. Во порака објавена на Телеграм, украинскиот претседател нагласи дека разговорите биле суштински и дека е постигнат напредок како резултат на повеќенеделната работа на двата тима.Најтешкото прашање, според Трамп, останува статусот на регионот Донбас, кој во голем дел е под руска контрола. Американскиот претседател потврди дека предлогот за трансформација на Донбас во демилитаризирана зона сè уште не е усогласен. Во моментов, Русија контролира околу 20 проценти од украинската територија, вклучувајќи околу 75 проценти од Доњецката област и речиси целосно Луганската област.„Дел од таа земја е окупиран, а дел е предмет на спор и ќе мора да се реши“, изјави Трамп, додавајќи дека станува збор за исклучително комплексно прашање. Москва бара Украина целосно да се повлече и од преостанатите делови на Донбас кои се под контрола на Киев, додека украинската страна предлага тие области да добијат статус на слободна економска зона, под украински надзор.Во дипломатска позадина на средбата со Зеленски, Трамп претходно телефонски разговарал со рускиот претседател Владимир Путин. Иако не изнесе детали, американскиот претседател изјави дека смета оти Путин „сака Украина да успее“, но истовремено призна дека Москва не е подготвена за примирје кое би овозможило одржување референдум за територијалните прашања. „Го разбирам тој став“, додаде Трамп.Рускиот советник за надворешна политика Јуриј Ушаков потврди дека разговорот бил инициран од американската страна и дека ставот на Москва е оти привремено примирје, како што предлагаат Европската Унија и Украина, само би го пролонгирало конфликтот. Трамп воедно отвори можност за тројни разговори меѓу САД, Русија и Украина, оценувајќи дека таков формат би можел да се реализира „кога ќе дојде вистинскиот момент“.Од европските сојузници стигнаа внимателно позитивни реакции. Зеленски најави дека украински претставници би можеле да ја посетат Белата куќа во јануари, можеби заедно со европски лидери. Претседателката на Европската комисија, Урсула фон дер Лајен, го поздрави „добриот напредок“ во разговорите, нагласувајќи дека цврстите безбедносни гаранции за Украина се неопходни од првиот ден.Францускиот претседател Емануел Макрон најави дека почетокот на јануари ќе донесе средба во Париз на земјите од таканаречената „Коалиција на подготвени“, со цел прецизирање на конкретните придонеси за долгорочната безбедност на Украина. Според него, фокусот ќе биде ставен на стабилен мировен договор што нема да остави простор за нова ескалација на конфликтот.

Свет | пред 1 месец

По период на стагнација, биткоинот бележи силен раст на азиското тргување

Цената на биткоинот забележа силен раст за време на азиското тргување, надминувајќи ја границата од 90.000 долари, што се толкува како можен сигнал за опоравување на криптопазарот, по периодот на стагнација во кој најпознатата криптовалута го пропушти таканаречениот „божиќен раст“ што ги подигна берзанските индекси на рекордни нивоа.Биткоинот порасна за 3,1 процент, достигнувајќи вредност од над 90.200 долари на тргувањето во Сингапур, додека етерот забележа раст од околу 4 проценти, пробивајќи ја границата од 3.000 долари, објави „Блумберг“.За разлика од пазарот на акции, каде индексот S&P 500 пред Божиќ достигна историски највисоки вредности, биткоинот во тој период главно се движеше без значајни осцилации. Криптопазарот сè уште ги чувствува последиците од повеќенеделната распродажба што започна во октомври, кога беа ликвидирани позиции со финансиска полуга во вредност од околу 19 милијарди долари, што предизвика силен удар врз довербата на инвеститорите.По овој шок, пазарот влезе во фаза на воздржаност, а вложувачите избегнуваа поголеми ризици. Сепак, последниот раст упатува на промена на расположението. Според главниот инвестициски директор на компанијата „ReserveOne“, Себастијан Беа, актуелното движење на цената е делумно поттикнато од краткорочни мали инвеститори кои преземаат сè поголеми позиции на пазарот на фјучерси.Податоците на аналитичката платформа CryptoQuant покажуваат дека стапката на финансирање за биткоинот, еден од клучните индикатори за пазарното расположение, е на највисоко ниво од 18 октомври, што укажува на зголемена побарувачка за т.н. „биковски“ позиции на пазарот на термински договори.Воедно, отворениот интерес за фјучерс-договорите на биткоинот почна да се опоравува од неодамнешните најниски вредности, иако, според Беа, тој сè уште е значително под претходните врвови забележани во октомври, кога цената на биткоинот го достигна историскиот максимум од 126.251 долар.И покрај позитивните сигнали, поширокиот контекст останува сложен. Иако криптовалутите сè повеќе се прифаќаат од институционалните инвеститори и иако политичката клима во САД, под водство на про-крипто ориентираниот претседател Доналд Трамп, донесе неколку поволни регулаторни потези, биткоинот во текот на 2025 година сè уште бележи пад од околу 4 проценти.Последниот раст, сепак, повторно го враќа оптимизмот на криптопазарот и отвора прашање дали се работи за краткорочен технички одскок или за почеток на посериозен и подолгорочен тренд на закрепнување.

Свет | пред 1 месец

(Видео) Патриотска ноќ со Влатко Миладиновски: Само македонски песни, знаме со 16 краци и најголемо оро

Во спортскиот центар „Борис Трајковски“ во Скопје, Влатко Миладиновски одржа концерт кој ќе остане запаметен како редок и значаен момент за македонската музичка сцена. За првпат, во пресрет на Новата година, во салата цела вечер одекнуваше исклучиво македонска музика.Концертот прерасна во вистинска патриотска вечер, со исполнување на традиционални и современи македонски песни, додека на трибините се развеа македонското знаме со 16 краци. Во салата се формираше едно од најголемите македонски ора, во кое се вклучија и познати и непознати, обединети во заедничка игра и песна.Со Влатко Миладиновски на сцената настапија и „Некст Тајм“, кои ја изведоа народната „Ја излези Ѓурѓо“, како и Спасен Сиљановски, кој ја отпеа „Ќе ти дојдам“. Атмосферата беше исполнета со емоции, аплаузи и заедничко пеење, што дополнително ја зацврсти симболиката на вечерта.Концертот траеше до полноќ и беше дочекан со воодушевување од публиката, која ја препозна оваа музичка вечер како силна порака за значењето и континуитетот на македонската музика. Настанот се оценува како важен чекор во афирмацијата и зачувувањето на македонскиот музички идентитет, особено во период кога ваквите сцени се реткост.

Магазин | пред 1 месец

Партијата на Албин Курти убедливо победи на изборите во Косово

Партијата на косовскиот премиер Албин Курти оствари убедлива победа на вонредните парламентарни избори одржани во неделата на Косово, покажуваат прелиминарните официјални резултати, со што се отвора можност за надминување на долготрајниот политички ќор-сокак што ја држеше земјата во институционална блокада.Според податоците на Централната изборна комисија, движењето Самоопределување (Ветевендосје) освоило 49,79 проценти од гласовите, по пребројани околу 95 проценти од гласачките места. На второто место се пласираше Демократската партија на Косово со 21,18 проценти, додека Демократската лига на Косово го зазеде третото место со 13,77 проценти од освоените гласови.По објавувањето на првичните резултати, Курти изјави дека е неопходно институциите да се конституираат без одлагање и упати повик до опозициските партии за соработка во Собранието. Тој порача дека стабилноста и функционалноста на државата мора да бидат ставени пред партиските интереси, нагласувајќи дека Косово нема време за нови политички блокади.Изборите беа одржани по неуспехот да се формира влада по гласањето во февруари, кога Самоопределување освои околу 42 проценти од гласовите, но не успеа да обезбеди парламентарно мнозинство. Тој резултат доведе до продолжување на политичката криза и повторно излегување на граѓаните на гласање. Конечните резултати се очекува да бидат објавени по пребројувањето на гласовите од дијаспората.За самостојно формирање влада, на партијата на Курти ѝ се потребни најмалку 61 пратеник од вкупно 120 во Собранието. Излезноста на овие избори изнесувала околу 45 проценти од запишаните гласачи, што претставува зголемување во однос на февруарските избори, кога гласале 40,6 проценти од електоратот.Нов неуспех во формирањето влада би ја продлабочил кризата во момент кога Косово се соочува со сериозни институционални обврски. Новиот парламентарен состав треба да избере претседател на државата и да ратификува кредитни договори во вредност од околу една милијарда евра со Европската Унија и Светската банка, чиј рок истекува во наредните месеци.Опозициските партии и натаму одбиваат коалиција со Курти, критикувајќи го неговиот однос со западните сојузници и политиките што ги води во северниот дел на Косово, населен претежно со српско население. Од друга страна, Курти ја обвинува опозицијата за институционалниот застој и за, како што наведува, блокирање на реформските процеси.Со речиси половина од освоените гласови, Самоопределување сега е во значително посилна позиција од претходно, а политичката сцена во Косово влегува во период во кој ќе се покаже дали изборниот резултат ќе донесе стабилност или ќе отвори ново поглавје на политичка неизвесност.

Македонија | пред 1 месец

Судењето за пожарот во „Пулс“ продолжува: Во фокусот сведочењата на оштетените

Во судницата во Идризово при Основниот кривичен суд Скопје денеска продолжува судењето за пожарот во дискотеката „Пулс“ во Кочани, една од најголемите трагедии во поновата историја на државата. На денешното рочиште е предвидено сведочење на законските застапници на оштетените, односно на семејствата на жртвите и на повредените, со што постапката влегува во чувствителна фаза во која фокусот се става врз последиците од трагедијата и барањата за правда и одговорност.На претходното рочиште, по предлог на Обвинителството, сведочеше сопственикот на авто-лимарски сервис кој се наоѓа веднаш до дискотеката „Пулс“. Тој од своја перспектива, како долгогодишен сосед на објектот, зборуваше за реновирањата што се вршеле со години, како и за кобната ноќ кога пожарот го зафати клубот. Неговото сведочење опфати и детали за условите во објектот, пристапите, излезите и хаосот што настанал во обидите за спасување на присутните.Претходно, одбраната на обвинетиот Александар Нацев во воведниот збор истакна дека во текот на постапката ќе докаже дека Нацев не бил ниту одговорно лице, ниту фактички сопственик на правното лице „Рубикон“, како и дека припадниците на обезбедувањето ноќта на трагичниот настан немале обврска да го контролираат бројот на посетители, да вршат проверки на безбедносната опрема или на сигурносните услови во објектот. Одбраната тврдеше и дека обвинетото правно лице немало законска обврска да достави план за обезбедување.На почетокот на денешното рочиште, Основниот кривичен суд Скопје донесе одлука постапката за овој предмет да се спои со друга поврзана постапка, со цел поцелосно и поефикасно утврдување на фактите и одговорноста.Во воведното излагање на Обвинителството, обвинителот Борче Јанев нагласи дека судењето претставува чекор кон утврдување и на лична и на институционална одговорност. Тој истакна дека општеството мора да се соочи со вистината за тоа кој дозволил, кој премолчел и кој не спречил дискотеката „Пулс“ да функционира во услови што ја претвориле во смртоносна стапица. Јанев порача дека не е пресудно само кој го запалил огнот, туку и кој имал моќ и должност да го спречи, посочувајќи дека трагедијата не е резултат исклучиво на пиротехничките средства, туку на долгогодишни системски пропусти, институционален молк и отсуство на ефективна контрола. Според него, правдата не се бара како одмазда, туку како неопходна последица на незаконитост и занемарување на службените обврски.Сите обвинети на почетокот на судењето изјавија дека не се чувствуваат виновни за трагедијата во која загинаа 63 лица, а над 200 беа повредени. Дел од нив изразија сочувство до семејствата на жртвите, но останаа на ставот дека не сториле тешки дела против општата сигурност.Повеќемина обвинети, преку своите бранители, ја оспорија основаноста на обвинението, тврдејќи дека не презеле дејствија што би можеле да доведат до пожарот, дека поседувале валидна документација и дека трагедијата е резултат на пошироки институционални пропусти, а не на индивидуална вина. Одбраните најавија изведување докази и сведоци со кои, според нив, ќе се потврди оваа теза.Во досегашните воведни обраќања своја одбрана изнесоа и сопственикот на дискотеката „Пулс“, Дејан Јованов, сопственикот на „МММ кафе“ Митко Стојанов, обезбедувачот Стојанчо Димитриев, како и Гроздан Милковски, сопственик на објектот. Јованов изјави дека и по девет месеци притвор не може да поверува во трагедијата и дека како родител никогаш не би дозволил небезбедни услови во клубот. Неговиот син, третообвинетиот Михаил Јованов, преку одбраната тврдеше дека против него нема ниту еден конкретен доказ и дека е обвинет исклучиво поради семејната поврзаност.Бранителите на Митко Стојанов истакнаа дека обвинението против него е неосновано и дека нема причинско-последична врска меѓу неговите постапки и пожарот, додека одбраната на Гроздан Милковски нагласи дека закупот на објектот бил законит, дека поседувал валидна документација и дека не учествувал во адаптацијата на просторот.Проектантката Милка Едровска, преку својата одбрана, наведе дека била ангажирана исклучиво за сообраќајно решение за паркинг и дека немала никаква улога во адаптацијата или во внатрешната структура на објектот. Градежните инспектори, пак, тврдат дека не можеле да постапуваат без пријава или наредба и дека трагедијата не произлегува од градежни пропусти.Поранешниот градоначалник на Општина Кочани, Ратко Димитровски, преку својот бранител оцени дека обвинението претставува преседан, наведувајќи дека уште пред отворањето на објектот поднел барање за неиздавање дозвола за работа. Одбраната на поранешните градоначалници Николчо Илијев и Љупчо Папазов тврди дека тие постапувале согласно закон, дека надзорот не бил во нивна надлежност и дека обвинението се темели на нецелосна истрага.Обвинетите од обезбедувањето, преку своите адвокати, наведоа дека обвинението е изградено врз претпоставки, дека нивните задачи биле ограничени и дека не можеле реално да го спречат внесувањето пиротехника, повторно посочувајќи ги институционалните пропусти како суштинска причина за трагедијата.Поранешните министри за економија Крешник Бектеши и Ваљон Сараќини, како и поранешните директори на Дирекцијата за заштита и спасување, во воведните говори ги негираа обвиненијата, нагласувајќи дека немаат вина. Одбраната на обвинетите службеници од Министерството за економија истакна дека тие имале исклучиво административни надлежности поврзани со лиценците, без можност за теренска инспекција, и дека работеле врз основа на документација заверена од други институции. Пазарните инспектори, пак, упатија сериозни забелешки кон Обвинителството, наведувајќи дека правната конструкција е погрешна и дека во јавноста се изнесуваат неточни информации за нивните надлежности.Пожарот во дискотеката „Пулс“ избувна на 16 март 2025 година, за време на настап на групата „ДНК“. Во трагедијата загинаа 63 лица, а над 200 беа повредени. Објектот работел со години без минимално-технички услови, со реконструкции без дозволи, без систем за противпожарна заштита и со активирање пиротехнички средства без одобрение, при што во клубот имало далеку повеќе посетители од дозволеното, меѓу кои и малолетници.Дополнителен пресврт во јавната перцепција донесоа наодите на Истражувачката репортерска лабораторија, според кои кај голем дел од жртвите примарна причина за смртта не биле изгорениците, туку интоксикацијата со отровни гасови. Овие сознанија отворија сериозни прашања за употребата на лесно запаливи и токсични материјали во ентериерот и звучната изолација, спротивно на безбедносните стандарди.Речиси една година по трагедијата, случајот „Пулс“ прераснува во симбол на борбата против неказнивоста и тест за капацитетот на правосудниот систем да обезбеди неселективна правда. Очекувањата на јавноста се дека судскиот процес ќе резултира со јасно утврдена одговорност и ќе стави крај на долгогодишната пракса на институционален молк и занемарување на безбедноста во угостителските објекти.

Македонија | пред 1 месец

(Видео) Кина започнува големи воени вежби околу Тајван и испраќа остро предупредување

Кинеската армија денеска најави мобилизација на копнените, поморските, воздухопловните и ракетните сили за спроведување големи воени вежби во водите и воздушниот простор околу Тајван. Маневрите, кои го носат називот „Мисија правда–2025“, имаат за цел, како што соопшти Пекинг, да испратат „сериозно предупредување“ до сите кои се залагаат за независност на Тајван, како и до надворешните сили што, според кинеските власти, се мешаат во внатрешните работи на островот.Според соопштението на Источното командно подрачје на кинеската армија, вежбите ќе ја тестираат борбената подготвеност на силите, како и способностите за блокада и контрола на клучни пристаништа и критични области. Активностите со борбена муниција ќе се одвиваат во пет поморски и воздушни зони кои го опкружуваат Тајван. Владата во Тајпеј остро реагираше, обвинувајќи ја Кина за воено заплашување и за поткопување на регионалната стабилност.Најавата доаѓа во исклучително чувствителен момент за регионот. Во изминатите недели се продлабочи дипломатскиот спор меѓу Кина и Јапонија по изјави на јапонскиот премиер поврзани со Тајван, додека Вашингтон и Тајпеј претходно месецов објавија еден од најголемите договори за продажба на американско оружје на островот досега. Истовремено, тајванскиот претседател се обидува да обезбеди поддршка за историски посебен одбранбен буџет, што дополнително го разгневи Пекинг.Портпаролот на Источното командно подрачје, Ши Ји, изјави дека вежбите ќе бидат фокусирани на патроли за борбена подготвеност на море и во воздух, воспоставување целосна контрола, како и на блокада на клучни пристаништа и стратешки точки. Тој нагласи дека станува збор за легитимна и неопходна мерка за заштита на националниот суверенитет и зачувување на националното единство, алудирајќи првенствено на Соединетите Американски Држави и нивните сојузници.Во кинеските државни медиуми, воените аналитичари беа уште подиректни, поврзувајќи ги вежбите со американско-тајванскиот договор за вооружување, кој го оценија како ескалација и прикриена активност насочена против интересите на Кина. Од тајванска страна, пак, беше порачано дека овие маневри сериозно го нарушуваат безбедносниот статус кво во Тајванскиот Теснец и поширокиот индо-пацифички регион и дека претставуваат отворен предизвик за меѓународниот правен поредок.Договорот за оружје меѓу САД и Тајван, вреден 11,1 милијарди долари, вклучува ракетни системи ХИМАРС, противтенковски проектили, беспилотни летала, хаубици и воен софтвер. Иако Вашингтон официјално ја признава Народна Република Кина како единствена легитимна влада на Кина и го зема предвид ставот на Пекинг дека Тајван е дел од Кина, САД никогаш не ја прифатиле тезата за суверенитет на Комунистичката партија над островот. Соединетите Држави одржуваат блиски, но неформални односи со Тајван и законски се обврзани да му обезбедат средства за самоодбрана.Дополнителни тензии предизвика и реакцијата на Пекинг на изјавите од Јапонија, каде беше сугерирано дека Токио би можел воено да реагира доколку Кина се обиде насилно да го преземе Тајван. За кинеското раководство, прашањето за Тајван претставува црвена линија во односите со САД, а секој обид за зајакнување на врските меѓу Тајпеј и Вашингтон редовно се осудува како мешање во внатрешните работи на Кина.Покрај најавата за вежбите, кинеските медиуми објавија и пропагандни материјали со националистичка симболика, додека сè уште не е прецизирано колку долго ќе траат маневрите. Според најавите, патролите за борбена подготвеност започнуваат на 29 декември, а вежбите со борбена муниција ќе се одржат на 30 декември во затворени поморски и воздушни зони. Кинеската крајбрежна стража исто така соопшти дека започнала патроли во водите во близина на Тајван.

Свет | пред 1 месец

Новата 2026 година започнува со силен студ и температури под нулата: ќе има ли снег?

Новогодишната ноќ ќе помине во знакот на многу ладно и суво време, под влијание на изразено студена и сува воздушна маса која ќе продре од север. Ќе дува слаб до умерен ветер од северен правец, а времето ќе биде ведро, без облачност и без врнежи од снег, што значи дека ќе преовладува т.н. сув студ.Температурите на воздухот за време на новогодишната ноќ насекаде во Македонија ќе бидат под нулата, и ќе се движат во интервал од -10 до -3 степени, додека на повисоките населени места и на планините постојат услови тие да се спуштат и под -10 степени.Во Скопје и околината, за време на новогодишната ноќ, минималната температура се очекува да се спушти околу -5 до -6 степени.Суво и многу ладно време ќе продолжи и на 1 јануари 2026 година (четврток), што значи дека новата година ќе започне со стабилни временски услови, без врнежи од снег, но со изразено ниски температури и присутен сув студ.

Македонија | пред 1 месец