Дадена наредба за обдукција на двегодишното дете кое почина на Клинички, по повреда на новогодишната ноќ

Двегодишното дете кое беше тешко повредено за време на новогодишната ноќ, утринава им подлегна на повредите на Клиниката за детска хирургија во Скопје. И покрај интензивните напори на медицинските тимови, лекарите констатирале смрт, потврдија од надлежните институции.Основното јавно обвинителство Скопје соопшти дека во однос на случајот е издадена наредба за обдукција на телото, со цел целосно расветлување на причините и околностите под кои настанала трагедијата.Според досегашните сознанија од истрагата, детето било надвор со својата мајка, каде присуствувале на новогодишна прослава и огномет, кога било погодено од метален проектил, за кој се сомнева дека станува збор за залутан куршум. По инцидентот, детето веднаш било пренесено во болница, најпрво во Градската општа болница, а поради сериозноста на повредите било итно транспортирано на Детската клиника.Лекарите утврдиле тешки повреди на мозокот и состојба директно опасна по живот. Детето било сместено на одделението за интензивна нега, но повредите се покажале како фатални.Министерот за внатрешни работи, Панче Тошковски, претходно потврди дека случајот е под истрага и дека надлежните служби ги испитуваат сите можни сценарија.„Станува збор за тешко телесно повредено детенце од две години, со присуство на метален фрагмент. Во овој момент не можеме со сигурност да кажеме како точно дошло до повредата. Постојат повеќе теории и јавноста ќе биде информирана откако ќе се утврдат фактите“, изјави Тошковски.За инцидентот засега не се соопштуваат официјални податоци за точната локација и конкретните околности под кои настанал, ниту лични податоци за семејството, со цел заштита на истрагата.

Скопје | пред 4 седмици

(Видео) „Беше апокалипса“: Сведоштва од градот погоден од трагедијата во новогодишната ноќ

Стотици граѓани синоќа во тишина се собраа во Кран Монтана, полагајќи цвеќе и палејќи свеќи во спомен на жртвите од катастрофалниот пожар што ја зави во црно оваа швајцарска туристичка дестинација. Дел од присутните стоеја со поглед вперен кон местото на трагедијата, додека разговорите, доколку воопшто ги имаше, се водеа шепотејќи.„Не бев во барот, но многу мои пријатели и роднини беа таму. Некои загинаа, други се во болница“, изјави млад човек кој дошол да положи цвеќе во знак на почит. „Нека почиваат во мир“, додаде тој, видно потресен.Во близина, групи пријатели се прегрнуваа во солзи, додека мажи стоеја немо, со солзи во очите. Матијс, жител на соседното место Шермињон-д’ан-Ба, за агенцијата АФП изјави дека барот бил едно од главните места за дружење на младите. „Тоа е барот каде што се среќаваме со многу пријатели, практично секој викенд“, рече тој.Тој сведочеше дека првично помислиле оти станува збор за мал пожар, но реалноста била сосема поинаква. „Кога стигнавме таму, беше како војна. Тоа е единствениот збор со кој можам да го опишам – апокалипса. Беше ужасно“, истакна Матијс.Пауло Мартинс, француски државјанин кој живее во регионот повеќе од 24 години, изјави дека трагедијата можела директно да го погоди и неговото семејство. „Мојот син многу лесно можеше да биде внатре. Не беше далеку. Беше со девојката и планираа да влезат, но на крајот не отидоа. Кога се врати дома, беше во целосен шок“, рече Мартинс.Поради интензитетот на пожарот и тешките изгореници, идентификацијата на жртвите се одвива бавно и со големи тешкотии. Меѓу исчезнатите има француски и италијански државјани, вклучувајќи и 16-годишно момче од Болоња, чија мајка јавно апелира за помош. Како исчезнати се водат и двајца тинејџери од Милано.Барот бил особено популарен меѓу младата популација, а голем дел од жртвите се тинејџери. Преживеани раскажуваат за застрашувачки моменти на бегство од пламените јазици, при што некои биле принудени да кршат прозорци за да излезат од објектот.Повредените се згрижени во болници низ Швајцарија, но и во странство, а здравствената состојба на многумина од нив се оценува како критична.

Свет | пред 4 седмици

(Видео) Расте бројот на загинати и повредени: 47 мртви во пожарот во бар во Кранс-Монтана за новогодишната ноќ

Најмалку 47 лица загинаа, а 115 се повредени во катастрофалниот пожар што избувна за време на дочекот на Новата година во барот „Ле Констелејшн“ во познатиот швајцарски скијачки центар Кранс-Монтана, на југозападот од Швајцарија. Трагедијата се случи околу 1:30 часот по полноќ, кога објектот бил преполн со гости од различни националности.Надлежните институции соопштија дека случајот се третира како пожар, а можноста за терористички или друг насилен напад е целосно исклучена. Регионалната обвинителка изјави дека истрагата е насочена кон утврдување на причините за избувнувањето и брзото ширење на огнот, како и кон безбедносните услови во објектот.Француските медиуми објавија дека сопствениците на барот, Џесика и Жак Морети, се живи. Станува збор за брачен пар со потекло од Корзика, кој го презел барот во 2015 година. Покрај „Ле Констелејшн“, тие управуваат и со ресторанот „Ле Вје Шале“ во местото Ленс. Според информациите, во моментот кога избувнал пожарот, во објектот се наоѓала само Џесика Морети, 40-годишна жена, која претрпела изгореници на раката.Под водство на Морети, некогаш запуштениот локал бил трансформиран во еден од најпопуларните ноќни клубови во Кранс-Монтана, редовно посетуван за време на туристичката и скијачката сезона. И покрај тоа, медиумите досега не успеале директно да стапат во контакт со сопствениците.Еден од вработените во барот изјавил дека целиот колектив се наоѓа во длабок шок. „Изгубивме дел од нашето персоналот. Денес е навистина тешко да се зборува за тоа“, рекол тој, додавајќи дека трагедијата оставила длабоки последици кај сите кои биле поврзани со објектот.Швајцарските власти најавија дека истрагата ќе биде темелна и ќе опфати проверка на противпожарните системи, евакуациските излези и безбедносните протоколи, со цел да се утврди дали трагедијата можела да биде спречена. Во меѓувреме, продолжува идентификацијата на жртвите и информирањето на нивните семејства.

Свет | пред 4 седмици

Муцунски до швајцарскиот амбасадор: Подготвени сме да прифатиме повредени пациенти

Министерството за надворешни работи и надворешна трговија информира дека, по трагичната несреќа во бар во швајцарскиот скијачки центар Кран-Монтана, по која бил активиран европскиот механизам за цивилна заштита, министерот Тимчо Муцунски, по претходна консултација со претседателот на Владата Христијан Мицкоски и министерот за здравство Азир Алиу, попладнево остварил телефонски разговор со швајцарскиот амбасадор во земјава, Кристоф Зомер.Во рамки на разговорот, министерот Муцунски изразил искрено и длабоко сочувство до семејствата на загинатите, како и солидарност со народот на Швајцарија, упатувајќи желби за брзо и успешно закрепнување на повредените.Во таа насока, Република Северна Македонија ја изразила подготвеноста да прифати повредени пациенти од несреќата, како и да обезбеди соодветна медицинска поддршка во домашните здравствени установи, доколку за тоа постои потреба од швајцарска страна.Дополнително, министерот Муцунски изразил подготвеност, во случај на потреба, македонски лекари – специјалисти, кои беа директно вклучени во лекувањето на пациентите по трагедијата во Кочани, веднаш да заминат во Швајцарија и да се вклучат во процесот на лекување на повредените.Од Министерството потенцираат дека Северна Македонија останува целосно на располагање за натамошна соработка и поддршка во рамки на европските механизми за солидарност и заеднички одговор при вакви трагични настани.

Свет | пред 4 седмици

Во април ново линеарно зголемување на пензиите

Линеарно зголемување на пензиите ќе има и во април, најави премиерот Христијан Мицкоски, посочувајќи дека Владата останува доследна на политиката на континуирана поддршка на пензионерите како една од најранливите категории во општеството.„Во април ќе има линеарно покачување на пензиите. Продолжуваме со тоа“, изјави Мицкоски, нагласувајќи дека ваквиот пристап е директно поткрепен со последните статистички податоци за нивото на сиромаштија во државата.Според премиерот, стапката на сиромаштија кај пензионерите е еден од клучните индикатори што ја оправдуваат одлуката за линеарно, а не процентуално зголемување на пензиите, со цел да се постигне поголема социјална праведност.„Сакаме да го намалиме нивото на сиромаштија кај оваа група“, истакна Мицкоски, додавајќи дека Владата ќе продолжи со мерки што имаат директен и мерлив ефект врз животниот стандард на пензионерите.Најавата за априлското зголемување доаѓа во период кога Владата ја нагласува својата заложба за стабилен социјален систем, предвидливи политики и заштита на граѓаните со најниски приходи, во услови на економски предизвици и зголемени трошоци за живот.

Македонија | пред 4 седмици

(Фото) Стар парк во Кочани можна локација за меморијал центар за 63-те жртви од „Пулс“, идејата е да се изгради патека на бесконечноста

Здружението на граѓани „16 март 2025 – Кочани“ поднесе официјална граѓанска иницијатива до Општина Кочани со барање да се определи локација за изградба на спомен-обележје во чест на жртвите од трагедијата што ја одбележа 2025 година. По разгледувањето на иницијативата, Советот на Општина Кочани побара локалната самоуправа да организира јавна трибина, на која граѓаните, а особено жителите што живеат во непосредна близина на предложената локација, ќе можат јавно да го изнесат своето мислење.Во таа насока, Општина Кочани закажа јавна трибина за 12 јануари 2026 година, со почеток во 17 часот, во големата сала на Мултикултурниот центар. На настанот, граѓаните ќе можат да се произнесат по однос на поднесената иницијатива за поставување спомен-обележје на локацијата Стар парк во Кочани, поточно на триаголниот простор меѓу улиците „Браќа Ставреви“ и „Кеј на револуцијата“.Покрај непосредното учество на јавната трибина, од 2 до 11 јануари 2026 година ќе биде овозможено и електронско изјаснување на граѓаните преку дигиталната алатка мЗаедница, со цел да се овозможи поширока и подостапна јавна консултација. Собраните мислења, предлози и забелешки, како од јавната трибина така и од електронската анкета, Советот на Општина Кочани ќе ги земе предвид при донесувањето на конечната одлука за поднесеното барање.Во рамки на иницијативата, Здружението „16 март 2025 – Кочани“ го претстави и идејното решение за спомен-обележјето, под наслов „Патека на бесконечноста за 63-те ангели“. Според објавениот концепт, меморијалниот простор е замислен како мирна и ненаметлива целина, без масивни бетонски конструкции, со фокус на тишина, достоинство и човечка мера.Централниот елемент на решението е пешачка патека во форма на бесконечност, изведена од природен камен или бел мермер, со благо извивање и без остри агли, наменета за бавно движење и личен момент на размисла. Покрај патеката се предвидени седум мермерни плочи, на кои ќе бидат врежани вкупно 63 имиња со години на раѓање, распоредени едноставно и без визуелна натрупаност.Проектот предвидува дискретно ноќно осветлување од подлогата, со топла светлина која ненаметливо ги следи патеката и имињата, како и уреден централен простор за оставање цвеќе и кратка тишина. Во еден од мирните агли е замислена и фонтана со скулптура на Богородица, како симбол на утеха и молитва, со тивок шум на вода и без доминантно присуство.Од Здружението истакнуваат дека зеленилото на Стариот парк би било целосно зачувано, без огради и без ограничувања, со цел просторот да остане отворен и достапен за сите – место за тивка почит, за прашања, за сеќавање и за незаборавање. Според нив, не станува збор за споменик што се набљудува, туку за споменик што се чувствува.

Македонија | пред 4 седмици

(Видео) „Мирис на палеж и хаос пред болницата“: Сведоштво за драмата по пожарот во бар во Сион, сомнежот е дека го предизвикала петарда

Очевидка која ноќта ја поминала во болницата во Сион заедно со својата мајка, за локалниот весник „Le Nouvelliste“ ја опиша драматичната атмосфера во моментите кога во здравствената установа почнале да пристигнуваат повредените од пожарот што избувнал во бар за време на новогодишната прослава.Според нејзиното сведоштво, медицинска сестра им наредила на сите лица кои се наоѓале во чекалната веднаш да ја напуштат просторијата, откако болницата била информирана дека пристигнуваат десетици повредени лица.„Медицинската сестра нè замоли сите да си заминеме и да се вратиме следниот ден, бидејќи доаѓаа околу триесет повредени по експлозијата“, изјавила жената за локалниот медиум.Таа раскажува дека излегла надвор за да го ослободи пристапот до итниот прием, по што настанал целосен хаос.„Луѓе доаѓаа од сите страни, тешко повредени лица пристигнуваа со автомобили, се чувствуваше силен мирис на палеж. Возилата беа оставани среде пристапната рампа, без никаква контрола“, вели очевидката.Во меѓувреме, истрагата за причините за пожарот сѐ уште е во тек, а официјалните информации остануваат ограничени. Италијанскиот министер за надворешни работи, Антонио Тајани, за телевизијата Sky TG24 изјави дека првичните сознанија укажуваат на трагедија предизвикана од пожар и можна експлозија.„Се чини дека станува збор за трагедија предизвикана од пожар, некаков вид експлозија, можеби од петарда фрлена за време на новогодишните славења“, изјави Тајани.Тој информираше дека италијанскиот амбасадор е на пат кон местото на несреќата и дека конзуларните служби формирале кризен штаб со цел да се утврди дали меѓу настраданите има италијански државјани. „Во овој момент не можеме да го исклучиме тоа, бидејќи сѐ уште немаме потврдени информации“, додаде Тајани.Италијанскиот министер нагласи дека Владата на Италија внимателно ја следи ситуацијата „од минута во минута“ и дека е во постојан контакт со италијанската премиерка Џорџа Мелони.

Свет | пред 4 седмици

МВР со биланс: Напади, агресивно однесување и пожар во новогодишната ноќ

Во текот на последниот ден од 2025 година и првите часови од 2026 година, на подрачјето на Скопје биле регистрирани повеќе инциденти поврзани со физички напади, нарушување на јавниот ред и мир и еден пожар, информира Министерството за внатрешни работи.На 31 декември во 10:40 часот, во СВР Скопје била пријавена физичка пресметка во парк во населбата Влае, при што, според пријавата на 42-годишна жена од село Волково, нејзината 16-годишна ќерка била нападната од двајца малолетници кои ги познавала. Настанот се случил претходната вечер околу 22:30 часот, а полицијата презема мерки за расчистување на случајот.Истото попладне, во 17:10 часот, полициски службеници го привеле 42-годишниот С.Т. од Радовиш, кој на подрачјето на Општина Аеродром се однесувал агресивно и предизвикал нарушување на јавниот ред и мир во конфликт со три лица од Скопје. Кратко потоа, во 17:45 часот, во катна гаража во централното градско подрачје, по претходна расправија, избила физичка пресметка меѓу четири лица, од кои едно е државјанин на Сојузна Република Германија.Во 19:30 часот, по расправија за паркинг-место во центарот на градот, полициски службеници привеле тројца скопјани кои учествувале во меѓусебна физичка пресметка. Нешто подоцна, во 20:20 часот, 30-годишна жена пријавила дека била физички нападната од друго женско лице пред угостителски објект во централното подрачје на Скопје.Во првите часови од Новата година, во 04:15 часот, по завршување на забава во Спортскиот центар „Борис Трајковски“, полицијата го привела 34-годишниот Д.М. од Валандово поради агресивно однесување кон полициски службеници за време на извршување на службени дејствија.Покрај нарушувањата на јавниот ред и мир, на 31 декември во 22:20 часот, во СВР Скопје било пријавено и дека во населбата Гази Баба избувнал пожар во штала во сопственост на 41-годишен скопјанец. Повредени лица нема, а пожарот бил локализиран од екипа на Бригадата за противпожарна заштита. Извршен бил увид од надлежните служби.Од Министерството за внатрешни работи информираат дека по целосно документирање на сите случаи ќе следуваат соодветни поднесоци.

Македонија | пред 4 седмици

Тешко повреден 12-годишник од петарда во парк во Скопје

Дванаесетгодишно дете од Скопје било тешко повредено од петарда во последните минути од 2025 година и е хоспитализирано на Клиничкиот комплекс „Мајка Тереза“.Како што соопшти Министерството за внатрешни работи, на 31 декември 2025 година во 23:26 часот, во СВР Скопје од Ургентниот центар било пријавено дека кај нив е донесен малолетник со тешки телесни повреди. Според пријавеното, повредата настанала околу 23:00 часот во парк на подрачјето на Општина Аеродром.Првичните информации укажуваат дека петарда, фрлена од негов соученик, пукнала во раката на детето откако тој се обидел да ја тргне за да не му падне на главата. Повредениот малолетник бил итно пренесен на лекување, каде му била укажана медицинска помош.Од МВР информираат дека се преземаат мерки за целосно расчистување на случајот.

Скопје | пред 4 седмици

Маж без документи пронајден мртов во првите минути од Новата година

Починато машко лице било пронајдено во првите минути од Новата година на автобуска постојка во централното градско подрачје на Скопје.Како што соопшти Министерството за внатрешни работи, на 1 јануари 2026 година во 00:05 часот, од Итна медицинска помош Скопје било пријавено дека на автобуска постојка на подрачјето на Општина Центар е пронајдено починато машко лице без лични документи. Според првичните информации, постои сомнеж дека станува збор за бездомно лице.Лекар од Итната медицинска помош констатирал смрт на местото на настанот. По насоки на надлежен јавен обвинител, телото на починатиот било предадено на обдукција, со цел утврдување на причините за смртта.Од МВР информираат дека се преземаат дополнителни активности за идентификација на лицето и целосно расчистување на случајот.

Скопје | пред 4 седмици

МВР со детали за убиството во Старата чаршија: Жртвата починала на лице место

Едно лице го загуби животот, а друго е тешко повредено во крвав инцидент што се случи во првите часови од Новата година во Старата скопска чаршија.Како што соопшти Министерството за внатрешни работи, на 1 јануари 2026 година во 01:11 часот во СВР Скопје било пријавено нарушување на јавниот ред и мир со физичка пресметка пред угостителски објект во Старата скопска чаршија, при што биле употребени остри предмети.Полициски службеници веднаш излегле на местото на настанот, каде што со повреди од остар предмет биле пронајдени две лица – А.М.Д. (22) и Ч.Е. (23), двајцата државјани на Турција. Кај А.М.Д., во 01:30 часот, лекар од Итната медицинска помош констатирал смрт, додека второто повредено лице било пренесено во Комплексот клиники „Мајка Тереза“ за укажување медицинска помош.За настанот бил известен надлежен јавен обвинител, а од МВР информираат дека се преземаат интензивни мерки и активности за целосно расчистување на случајот и утврдување на сите околности поврзани со убиството.

Македонија | пред 4 седмици

Десет лица приведени во Скопје за поседување и трговија со дрога

Полициски службеници од СВР Скопје, во периодот од 31 декември 2025 до 1 јануари 2026 година, на повеќе локации низ главниот град лишиле од слобода десет лица поради сомнение за недозволена трговија и поседување наркотични средства.Како што соопшти Министерството за внатрешни работи, приведени се О.Р. (42), Б.М. (45), А.Т. (36), К.Г. (28) и С.С. (25), сите од Скопје, како и К.Г. (19) од селото Катланово, скопско, А.П. (37) од Кавадарци, Р.П. (31) и К.С. (27) од Куманово, како и Г.С.Ф. (23), државјанин на Турција.При полициските контроли кај приведените биле пронајдени и одземени различни видови наркотични материи, меѓу кои бела и розева прашкаста материја, марихуана, дробилка, како и други предмети поврзани со извршување на кривични дела.Од МВР информираат дека по целосно документирање на настаните ќе следуваат соодветни поднесоци до надлежните обвинителства.

Македонија | пред 4 седмици

(Видео) Двегодишно дете се бори за живот на Клинички, има повреда на главата за која постои сомнеж дека е од оружје

Двегодишно дете е примено на лекување на Универзитетската клиника за трауматологија, ортопедски болести, анестезија, реанимација, интензивно лекување и ургентен центар, откако било тешко повредено со огнено оружје. Детето се наоѓа во животозагрозувачка состојба и е сместено на одделението за интензивна нега.Според првичните информации, станува збор за прострелна рана во пределот на главата, при што лекарите констатирале присуство на метален фрагмент. Засега не е со сигурност утврдено како точно настанала повредата, а надлежните институции разгледуваат повеќе можни сценарија.Министерот за внатрешни работи Панче Тошковски потврди дека случајот е под истрага.„Тешко телесно е повредено детенце од две години, кое е во животозагрозувачка состојба. Станува збор за метален фрагмент, но во овој момент не можеме со сигурност да кажеме како точно дошло до повредата. Постојат повеќе теории за настанот и штом бидат утврдени причините, јавноста ќе биде информирана“, изјави Тошковски.За инцидентот засега нема официјални информации за местото и околностите под кои настанал, ниту се соопштуваат лични податоци за детето.Овој случај е само еден од низата тешки инциденти што ја одбележаа бурната новогодишна ноќ, по која хируршките оддели во Скопје беа преполни со тешко повредени пациенти.Во критична состојба е и 30-годишен маж, пронајден во реонот на Буњаковец по пад од висина. Тој веднаш бил подложен на итна хируршка интервенција поради сериозни повреди на ’рбетот.Меѓу потешките случаи што биле згрижени на хируршките клиники се и 17-годишна девојка од Тетово, која итно била оперирана по тешка сообраќајна несреќа, како и уште еден пациент со прострелна рана во пределот на лактот, регистриран во Прилеп.Покрај повредите од огнено оружје и физичко насилство, сериозен број повреди биле предизвикани и од употреба на пиротехнички средства. Според болничките податоци, дури 20 лица биле повредени од петарди, меѓу кои две деца на возраст од 12 и 13 години, како и 69-годишен маж со тешки повреди на дланката.Здравствените и безбедносните служби и натаму апелираат на одговорно однесување и строга контрола на употребата на оружје и пиротехника, особено во периоди на масовни прослави.

Настани | пред 4 седмици

(Видео) Убиство во Старата чаршија за време на новогодишната ноќ: Турски државјанин загина, убиецот во бегство

Едно лице e убиено, а друго се здоби со тешки телесни повреди при инцидент што се случил во скопската Стара чаршија, потврди министерот за внатрешни работи Панче Тошковски. Според неговите изјави, жртвата е турски државјанин, а кривичното дело било извршено со остар предмет.„Имаме едно лице кое е починато и едно лице со тешки телесни повреди. И убиството и тешката телесна повреда се извршени со остар нож. Постојат осомничени лица, но во овој момент не можам да изнесам повеќе детали, бидејќи едно од нив е во бегство“, изјави Тошковски.Министерот посочи дека во настанот учествувале повеќе лица и дека сите инволвирани биле странски државјани. Истрагата е во тек, а Министерството за внатрешни работи презема мерки за пронаоѓање на осомниченото лице.Покрај убиството, во текот на новогодишната ноќ во Скопје биле регистрирани и седум лица повредени при употреба на пиротехнички средства.Тошковски информираше дека во истиот период на територијата на главниот град се случиле вкупно 23 сообраќајни несреќи, од кои две завршиле со тешки телесни повреди.

Настани | пред 4 седмици

Бугарија со евро, но со поделено општество – порака од новогодишното обраќање на Радев

Бугарскиот претседател Румен Радев оцени дека одлуката за усвојување на еврото претставува стратешки избор донесен во контроверзен момент, истакнувајќи дека за ваква одлука требало да се одржи референдум. Ова Радев го порача во своето новогодишно обраќање до јавноста, пренесуваат бугарските медиуми.Според него, воведувањето на еврото е последната голема пресвртница во процесот на интеграција на Бугарија во Европската Унија и чекор што земјата го заслужува врз основа на својата милениумска култура и цивилизациски придонес. Сепак, Радев оцени дека одбивањето да се побара мислењето на граѓаните за ова прашање е еден од најсериозните симптоми на длабокиот раскол меѓу политичката класа и народот.Претседателот посочи дека токму ваквиот јаз бил потврден со масовните протести што се одржаа низ целата земја и кои, според него, ја казниле владејачката коалиција. Радев истакна дека првиот буџет изготвен во евра го ослободил акумулираното незадоволство кај граѓаните, наталожено поради корупцијата, растечката инфлација и самоволието на властите.Тој нагласи дека протестите испратиле јасна порака за промената во расположението на општеството, при што младите Бугари, наместо да бараат индивидуален спас, почнале да размислуваат како да ѝ помогнат на државата. На плоштадите, како што рече, излегле и генерациите што ја преживеале транзицијата, што, според Радев, го прави ова најзначајниот политички настан во 2025 година.Радев додаде дека граѓаните барале фер избори, јасна перспектива и достоинствен живот, нагласувајќи дека претстојните парламентарни и претседателски избори ќе бидат тест за тоа дали политичките елити ќе научат од досегашните грешки или ќе продолжат да се вртат во круг.Бугарија на полноќ официјално го воведе еврото како своја валута.

Свет | пред 4 седмици

ЦИА: Украина не ја таргетирала резиденцијата на Путин

Американската Централна разузнавачка агенција проценила дека Украина не ја таргетирала резиденцијата на рускиот претседател Владимир Путин во неодамнешниот напад со беспилотни летала, и покрај тврдењата што самиот Путин му ги соопштил на американскиот претседател Доналд Трамп во телефонски разговор. Проценката, за која директорот на ЦИА Џон Ратклиф го информирал Трамп, директно го доведува во прашање официјалниот наратив на Кремљ, пренесуваат американски медиуми.Русија во понеделникот јавно ја обвини Украина дека се обидела да ја нападне резиденцијата на Путин, по што Трамп пред новинарите потврди дека рускиот претседател лично му го изнел тоа тврдење. Во тој момент, Трамп изјави дека наводниот напад го вознемирил, нагласувајќи дека „не му се допаѓа“ и дека „не е добро“, додавајќи дека бил „многу лут“. Иако призна дека е можно тврдењето да е неточно, тој истакна дека Путин му рекол оти нападот навистина се случил.По брифингот од страна на директорот на ЦИА, ставот на Трамп очигледно се променил. На социјалната мрежа Truth Social, тој сподели линк до уреднички текст на „Њујорк пост“ во кој се оценува дека Русија е таа што го попречува патот кон мир. Во текстот се наведува дека е иронично Путин, кој води војна со огромни човечки жртви речиси четири години, да очекува посебна осуда за наводен напад врз него, а дополнително се посочува дека таков напад најверојатно воопшто не се случил.Во уредничкиот коментар се потсетува дека украинскиот претседател Володимир Зеленски остро ги негирал обвинувањата, додека портпаролот на Кремљ Дмитриј Песков признал дека Москва не може да обезбеди докази, повикувајќи ја јавноста „да му верува на зборот на Кремљ“, нешто што, како што се наведува, медиумите не се подготвени да го направат.Белата куќа не даде коментар за информациите што ги објавија американските медиуми, додека од ЦИА одбија да ја коментираат проценката.Тврдењата на Путин и американската разузнавачка проценка доаѓаат во чувствителен момент, кога администрацијата на Трамп интензивно работи на обиди за постигнување прекин на војната во Украина. Обвинувањето за напад беше изнесено само еден ден по средбата меѓу Трамп и Зеленски во Мар-а-Лаго, на која американскиот претседател изрази оптимизам за можноста од мировен договор. Дел од европските претставници оценуваат дека изјавите на Путин претставуваат обид да се нарушат мировните напори без директна конфронтација со Трамп. Високата претставничка на Европската Унија за надворешна политика Каја Калас оцени дека станува збор за намерно одвлекување на вниманието.Од Москва, пак, Министерството за одбрана соопшти дека 91 беспилотно летало биле лансирани од северна Украина кон резиденцијата на Путин во близина на Валдај, во Новгородската област. Според нив, повеќе од половина од дроновите биле соборени на стотици километри оддалеченост, без притоа да биде објаснето како е утврдено дека нивната крајна цел била резиденцијата на рускиот претседател. Министерството тврди дека останатите дронови биле пресретнати над регионот Новгород во раните утрински часови и објави мапа со наводни патеки на леталата.Сепак, жителите на градот Валдај не пријавиле никакви звуци од дејствување на противвоздушната одбрана во ноќта меѓу 28 и 29 декември. Аналитичарите посочуваат дека бројка од 91 беспилотно летало би подразбирала масовна и интензивна противвоздушна активност, што би било тешко да остане незабележано од локалното население.

Свет | пред 4 седмици

Трамп го одложи зголемувањето на царините за мебел и кујнски елементи

Американскиот претседател Доналд Трамп донесе одлука да го одложи најавеното зголемување на царините за тапациран мебел, кујнски елементи и елементи за бањи за период од една година. Одлуката е потпишана само неколку часа пред истекот на 2025 година, со што примената на повисоките царински стапки, кои требаше да стапат во сила денеска, се поместува за почетокот на 2027 година, соопшти Белата куќа.Со оваа одлука се стопира планираното поскапување на увезените производи, кое требаше директно да влијае врз увозниците и потрошувачите во Соединетите Американски Држави. Потсетување дека во септември минатата година беа воведени царини од 25 проценти за овие производи, со план тие од почетокот на 2026 година да се зголемат на 50 проценти за кујнските елементи и на 30 проценти за тапацираниот мебел. Со одложувањето, царините засега остануваат на постојното ниво од 25 проценти.Од Белата куќа како причина за одлуката ги наведуваат тековните трговски преговори со меѓународните партнери. Во официјалното соопштение се посочува дека Соединетите Држави продолжуваат со продуктивни разговори со трговските партнери со цел решавање на прашањата поврзани со трговскиот реципроцитет и националната безбедност во контекст на увозот на дрвни производи. Сепак, не е прецизирано зошто одлуката за одложување е донесена токму во последните часови од годината.Одлуката доаѓа во чувствителен момент за администрацијата на Трамп, која се соочува со зголемени критики поради растот на цените и неможноста да се стабилизира инфлацијата. Дел од јавноста и економските аналитичари зголемувањето на цените го поврзуваат токму со царините воведени за широк спектар увозна стока откако Трамп ја презеде функцијата на почетокот на 2025 година. Цените на мебелот веќе претходно пораснаа поради царините за производи од Кина и Виетнам, кои се меѓу најголемите светски извозници во оваа индустрија.И покрај загриженоста кај американските домаќинства, претседателот Трамп и понатаму за инфлацијата ја обвинува претходната администрација на Џо Бајден, тврдејќи дека неговата царинска политика на долг рок ќе доведе до намалување на трошоците за граѓаните.При воведувањето на царините во септември, Трамп како главни аргументи ги наведе заштитата на домашната дрвна индустрија и националната безбедност. Одлуката следеше по истрага спроведена од американското Министерство за трговија за увозот на дрвна граѓа. Во месеците пред тоа, Трамп повеќепати ја критикуваше Канада поради големиот извоз на дрвни производи во САД, оценувајќи дека таквата трговска пракса може да претставува ризик за националната безбедност.

Свет | пред 4 седмици

(Видео) Првите огномети за 2026 година го осветлија Пацификот

Пацифичката држава Кирибати прва ја пречека Новата 2026 година, ставајќи го симболичниот почеток на глобалното новогодишно одбројување. Најголемиот остров во земјата, Киритимати, официјално влезе во новата година во 11 часот по средноевропско време.По Кирибати, од 2025 година се прости и Нов Зеланд. Во Окленд, илјадници граѓани и посетители ја дочекаа Новата година со спектакуларен огномет над Скај Тауер, највисоката зграда во земјата, кој традиционално претставува централна точка на новогодишната прослава.Набргу потоа, Новата 2026 година ја пречекаа и пацифичките островски држави Самоа и Тонга, како и Токелау – територија под управа на Нов Зеланд, лоцирана околу 3.500 километри северно од Окленд. И во овие земји Новата година беше одбележана со јавни прослави и свечена атмосфера, продолжувајќи го глобалниот синџир на новогодишни дочекувања.

Свет | пред 4 седмици

Каде ќе се слави Новата година: Објавени програмите од градовите, еве кој и каде настапува

Организиран дочек на Новата 2026 година на градските плоштади во Македонија е најавен во Скопје, Кавадарци, Охрид и Кичево, додека во дел од другите градови ќе се одржат алтернативни или дневни празнични програми без централен ноќен дочек.Скопје годинава ќе ја дочека Новата година без традиционален огномет. Градоначалникот Орце Ѓорѓиевски најави дека главниот град се насочува кон поинаков, модерен и семеен концепт на прослава. За музичката програма ќе се погрижат Каролина Гочева, Тамара, Миле Кузмановски, Огнен Здравковски, Лара и Пајак, Два Бона, Куку Леле и Лина Пејовска, кои ќе настапат во рамки на целовечерната програма на плоштадот „Македонија“.И Охрид традиционално ќе организира јавен дочек на Новата година на плоштадот „Свети Климент Охридски“. Забавата ќе започне во 20 часот, а на сцената ќе настапат Влатко Лозановски, Ефто Пупиноски, Ѓоко Танески, како и диџеите Yuxell и Bagzi. На 1 јануари, на истата локација, со почеток во 20 часот, охриѓани ќе имаат можност да уживаат во настапите на групата „Меморија“ и музичкиот состав „Фузија“.Кавадарци, пак, Новата година ќе ја дочека на Градскиот плоштад со настап на Марјан Коцев и неговиот бенд. Програмата ќе започне во 22 часот.Богата предновогодишна програма најави и Општина Крива Паланка, со повеќедневни настани и пладневна журка на 31 декември. Општината, сепак, нема да организира централен јавен дочек во новогодишната ноќ.Општина Кичево најави голем дочек на Новата година на 31 декември пред Домот на културата. Програмата ќе започне со богата детска новогодишна забава, со настапи на „Академија Кристина“, детските ликови Биби и Боби, пристигнување на Дедо Мраз и доделување новогодишни пакетчиња. Вечерната музичка програма, која започнува во 20 часот, ќе вклучи настапи на Ани Малинкова, Елвис Зенкоски, Јасмин Хусоски, Сузана Спасовска, Rozafa Etemi & Black Jack, како и групите „Љубојна“, „Фолтин“, Addicted Band, Phoenix Band, Future Band и други изведувачи.

Македонија | пред 4 седмици

Инцидент во скопско Глуво: по вербален конфликт следела физичка пресметка

Во селото Глуво, во скопскиот регион, утрово бил нарушен јавниот ред и мир по претходна расправија која прераснала во физичка пресметка меѓу четири лица, при што бил употребен и тврд предмет.Како што информира Министерството за внатрешни работи, на 30 декември 2025 година во 08:50 часот, во СВР Скопје било пријавено дека по вербален конфликт дошло до тепачка помеѓу М.М.Б. (52) и М.Б. (28), двајцата од селото Глуво, од една страна, и С.Ч. (66) и Б.Ч. (44), двајцата од селото Мирковци, од друга страна.Според пријавеното, во текот на физичката пресметка бил употребен и тврд предмет, по што случајот бил пријавен во полиција. Засега не се соопштуваат детали за евентуални повреди кај учесниците во инцидентот.Од Министерството за внатрешни работи информираат дека по целосно документирање на настанот ќе биде поднесен соодветен поднесок до надлежните институции.

Скопје | пред 4 седмици

Провалил во Центар за дијализа и украл картички, со помошник подигнал 40.300 денари

Полицијата поднесе кривична пријава против две лица поради кражба и неовластена злоупотреба на банкарски платежни картички во Центарот за дијализа во Кочани, при што биле подигнати над 40 илјади денари.Како што соопшти Министерството за внатрешни работи, Одделението за внатрешни работи Кочани поднело кривична пријава против О.С.А. (42) од Штип поради сомнение дека сторил кривично дело „кражба“, како и две кривични дела „оштетување и неовластено навлегување во компјутерски систем“. Дополнително, кривична пријава е поднесена и против Д.Т. (39) од Кочани за продолжено кривично дело „помагање“ во врска со неовластеното навлегување во компјутерски систем.Според наводите од пријавата, на 4 октомври 2024 година, првопријавениот неовластено влегол во просториите на Центарот за дијализа во Кочани и од заклучен шкаф одзел паричник со пари, две банкарски платежни картички и лични документи кои им припаѓале на две вработени лица.Истата вечер, второпријавениот, со помош на украдените платежни картички, извршил повеќе трансакции и подигнал парични средства во вкупен износ од 40.300 денари, со што им овозможил корист за себе и за првопријавениот.Од Министерството за внатрешни работи информираат дека против лицата се преземени законски мерки и дека случајот е целосно документиран и процесуиран до надлежното јавно обвинителство.

Македонија | пред 4 седмици

Се претставил дека работи во Кувајт и измамил скопјанец за 5.000 евра

Осумдесет и петгодишен скопјанец пријавил во полиција дека бил измамен и останал без 5.000 евра, откако бил доведен во заблуда од две лица кои му оставиле лажни дијамантски алки како наводна гаранција.Како што информира Министерството за внатрешни работи, на 30 декември 2025 година околу 16 часот во СВР Скопје, оштетениот пријавил дека измамата се случила неколку часа претходно, околу 11 часот, на подрачјето на општина Центар. Според неговото сведоштво, бил пресретнат од две непознати лица, при што едниот од нив се претставил како лице од Хрватска кое работи во Кувајт.Тие му побарале да им покаже евра за да ги споредат со парите кои наводно ги поседувале. Оштетениот, верувајќи во нивната приказна, заминал во својот дом, ги земал парите и им ги предал. За возврат, како „гаранција“, му оставиле три алки за кои тврделе дека се дијамантски, со објаснување дека ќе се вратат и ќе му ги вратат парите.Откако лицата не се појавиле повторно, скопјанецот сфатил дека бил измамен и дека алките се без реална вредност, по што случајот го пријавил во полиција.Од Министерството за внатрешни работи соопштија дека се преземаат мерки за целосно расчистување на случајот и за пронаоѓање на сторителите.

Скопје | пред 4 седмици

Кривична пријава во Кочани: Во приватен објект чувани археолошки артефакти од Османлискиот период

Основното одделение за внатрешни работи Кочани поднесе кривична пријава против В.П. (56) од Кочани, сопственик и управител на правно лице од истиот град, поради постоење основи на сомнение дека сторил кривично дело „присвојување на добра под привремена заштита или културно наследство или природни реткости“.Како што соопшти Министерството за внатрешни работи, при извршени проверки во просториите на правното лице, кај пријавениот биле пронајдени три мермерни плочи. По извршена стручна идентификација од страна на Комисија формирана во Националната установа Археолошки музеј на Република Северна Македонија, било утврдено дека плочите претставуваат оригинални археолошки наоди кои потекнуваат од Османлискиот период и дека се дел од културното наследство на државата.Според наводите во пријавата, осомничениот неовластено ги чувал артефактите, а истовремено вршел и неовластени истражувања, со намера преку нивно јавно презентирање да одржува предавања и активности поврзани со таканаречен „македонизам“, при што се сомничи дека сакал да оствари имотна и друга корист.Од МВР наведуваат дека со ваквите дејствија биле повредени законските одредби за заштита на културното наследство, а случајот е доставен до надлежното јавно обвинителство за понатамошна постапка.

Македонија | пред 4 седмици

Возач на трактор загина во несреќа во гостиварско

Трагичен настан се случи вчера попладне во гостиварското село Долна Бањица, каде што едно лице го загуби животот во сообраќајна несреќа со трактор.Како што соопшти Министерството за внатрешни работи, на 30 декември 2025 година околу 15:15 часот во ОВР Гостивар било пријавено дека М.К. (69) од селото Долна Бањица, управувајќи трактор „ИМТ“ со приколка, изгубил контрола над возилото, по што тракторот се превртел.Од здобиените повреди, лицето починало на самото место на настанот. Смртта ја констатирал лекар од Итната медицинска помош во Гостивар.По наредба на надлежен јавен обвинител, телото на починатиот е дадено на обдукција, со цел утврдување на точните причини за смртта, додека увид на местото на несреќата извршила увидна екипа на ОВР Гостивар.Околностите под кои дошло до трагичната несреќа се предмет на натамошна истрага.

Македонија | пред 4 седмици

Тешка сообраќајна несреќа кај Желино: Едно лице тешко повредено, меѓу повредените и две деца

На регионалниот пат меѓу селото Желино и Тетово, вчера наутро се случи тешка сообраќајна несреќа во која едно лице се здоби со тешки телесни повреди, а повеќе лица, меѓу кои и две деца, се повредени.Како што соопшти Министерството за внатрешни работи, несреќата била пријавена во СВР Тетово на 30 декември 2025 година во 10:35 часот. Во судирот учествувале патничко возило „БМВ“ со италијански национални ознаки, управувано од Љ.П. (44) од селото Голема Лешница, тетовско, и патничко возило „Фолксваген голф“ со тетовски регистарски ознаки, управувано од Х.Љ. (40) од селото Добарце, тетовско.По меѓусебниот судир, возилата удриле и во паркирано патничко возило „Јагуар“ со тетовски регистарски ознаки, сопственост на А.З. (31) од селото Требош, тетовско.Во сообраќајната несреќа, возачот на „БМВ“-то, Љ.П., се здобил со тешки телесни повреди, додека со телесни повреди се здобиле и неговиот сопатник Ј.Е. (20), возачот на „Голф“-от, како и неговите сопатници Г.Ј. (41), Л.С. (43) и две деца на возраст од пет и шест години.Сите повредени биле пренесени и згрижени во Клиничката болница во Тетово, каде им биле констатирани повредите.На местото на несреќата бил извршен увид од увидна екипа на СВР Тетово, а причините и околностите под кои дошло до судирот се предмет на натамошна истрага.

Македонија | пред 4 седмици