„Молчењето не е опција“ – 34-ти протестен марш за жртвите од „Пулс“

И оваа сабота, 20 декември, во Кочани ќе се одржи 34-тиот по ред протестен „Марш за ангелите“, посветен на жртвите од трагедијата во објектот „Пулс“. Маршот ќе започне во 14:05 часот.Настанот го организира здружението „16 Март 2025“, кое повторно упати јавен повик до граѓаните од Кочани и од целата држава да се приклучат и заеднички да побараат правда.„Ги повикуваме сите граѓани да чекорат со нас за вистинска правда – за нашите деца кои ги нема и за иднината на сите деца што доаѓаат. Да одиме заедно, во тишината што вреска по правда. Молчењето не е опција, правдата мора да се избори заедно“, се наведува во писменото соопштение на организаторите.Од здружението потенцираат дека секој нов марш е потсетник дека одговорноста за трагедијата сè уште не е целосно утврдена и дека болката на семејствата не стивнува.„Секој чекор, секој поглед и секое присуство е повик за правда“, порачуваат организаторите, нагласувајќи дека маршот е мирен, достоинствен и посветен на сеќавањето на жртвите.

Македонија | пред 1 месец

Трамп ја прекина лотаријата за зелени карти по масовното пукање на Универзитетот Браун

Американскиот претседател Доналд Трамп донесе одлука за суспензија на програмата за лотарија за зелени карти, позната како програмата за имигрантски визи за разноликост (DV1), по масовното пукање на Универзитетот Браун, во која минатата недела беа убиени две лица, пренесува Би-би-си.Осомничениот за нападот, португалски државјанин, влегол во Соединетите Американски Држави токму преку оваа програма во 2017 година, што, според администрацијата на Трамп, претставува сериозен безбедносен пропуст.Министерката за внатрешна безбедност Кристи Ноем потврди дека по директна наредба на претседателот програмата е ставена во мирување, со образложение дека целта е „да се осигура дека ниту еден Американец повеќе нема да биде повреден поради овој катастрофален програм“.„На осомничениот никогаш не требаше да му биде дозволен влез во нашата земја“, изјави Ноем.Програмата DV1 овозможува издавање до 50.000 имигрантски визи годишно, преку случаен избор на апликанти од земји со ниско ниво на имиграција во САД.Ноем потсети дека Трамп уште во 2017 година се залагал за укинување на програмата, по нападот со камион во Њујорк, кога беа убиени осум лица. Напаѓачот, узбекистанскиот државјанин Сајфуло Саипов, исто така влегол во САД преку програмата за разноликост на визи.Главен осомничен за пукањето е 48-годишниот Клаудио Невес Валенте. Американските власти веруваат дека тој претходно, на почетокот на неделата, го убил и португалскиот професор Нуно Луреира од Масачусетскиот институт за технологија (МИТ).Според претседателката на Универзитетот Браун, Кристин Паксон, Валенте бил запишан на докторски студии по физика на универзитетот од есента 2000 до пролетта 2001 година, но немал никаква активна поврзаност со институцијата во моментот на нападот.Само неколку часа по нејзината изјава, Валенте бил пронајден мртов во складишен објект во Салем, Њу Хемпшир. Полицијата смета дека извршил самоубиство со огнено оружје. Кај него биле пронајдени торба и две огнени оружја, а доказите од автомобилот во близина се совпаднале со оние од местото на нападот на Универзитетот Браун, потврди државниот обвинител на Род Ајленд, Питер Нерона.Властите истражуваат и убиство на 47-годишниот професор Нуно Ф. Гомеш Луреира, кој бил застрелан во својот дом во Бруклајн, околу 80 километри од Провиденс. Двајцата мажи студирале на ист универзитет во Португалија кон крајот на 1990-тите години.Во нападот што се случи на 13 декември, кога напаѓачот влегол во зградата на Машинскиот факултет на Универзитетот Браун за време на завршните испити, беа убиени двајца студенти, а деветмина беа повредени.Жртвите се идентификувани како 19-годишната Ела Кук, студентка од втора година од Алабама, и 18-годишниот Мухамад Азиз Умурзоков, студент од узбекистанско потекло, кој штотуку го започнал своето студирање.Мотивите за нападите засега остануваат непознати.

Свет | пред 1 месец

Со неуставна резолуција ДПМНЕ и ЗНАМ се обидуваат да ја замолчат јавната дебата, велат од СДСМ

Резолуцијата што ја изгласаа ДПМНЕ и ЗНАМ во Собранието не е ниту наивна ниту случајна, соопшти СДСМ, оценувајќи дека станува збор за опасен обид за директен удар врз демократијата, слободата на говор и уставниот поредок на државата.Од опозициската партија прашуваат зошто ваква резолуција се носи токму сега, во момент кога, како што велат, сè повеќе информации и докази излегуваат во јавноста за договор кој со месеци е предмет на интерес на британските медиуми, но и на домашната јавност.„Со закани за кривична одговорност и судски прогон, власта се обидува да ја спречи секоја јавна расправа за една крупна и важна тема. Тема за која не зборува само опозицијата, туку и релевантни странски медиуми, како и официјални претставници“, се наведува во соопштението.Според СДСМ, секојдневно се појавуваат нови информации поврзани со договорот со Велика Британија, а дополнителна потврда, како што тврдат, дошла и од редовите на самата Влада. Како пример го наведуваат вицепремиерот и министер за транспорт Александар Николоски, кој јавно потврдил дека голем инфраструктурен проект е дел од поширок меѓународен договор со Британија.„Граѓаните одамна знаат што значи тоа. Со што е врзан овој договор? Што треба Македонија да прифати за возврат за 6 милијарди евра кредити? Одговорот е јасен за сите“, велат од СДСМ.Партијата оценува дека токму поради овие прашања се носат, како што велат, неуставни резолуции, со цел да се воведе забрана за говор, да се замолчи опозицијата и јавноста да се држи во страв.„Ова е обид да се забрани дебата за вистината која веќе е позната. СДСМ, заедно со граѓаните, ќе се спротивстави на ова опасно сценарио и ќе се бори за правда, демократија и слобода на говор“, се наведува во соопштението.

Македонија | пред 1 месец

(Фото) Само една мерна станица во Скопје покажува чист воздух

Сите мерни станици во Скопје утрово регистрираат екстремна загаденост на воздухот – состојба што граѓаните ја живеат речиси секоја зима. Највисоките вредности, според апликацијата „Мој воздух“, се измерени во централното градско подрачје, додека единствено релативно чист воздух има на врвот на Водно.Изминативе денови Македонија се наоѓа на врвот од листата на држави со најзагаден воздух во Европа, а во одредени моменти и во светот, според рангирањата на платформата IQAir. Често, Струмица знае да го надмине и Скопје по загаденост.Здравствените експерти препорачуваат граѓаните да го ограничат престојот на отворено, особено во утринските и вечерните часови кога загадувањето е најизразено. Се советува користење јавен превоз наместо лични возила, како и заедничко возење за намалување на емисиите.Во домовите, граѓаните се повикуваат да не користат отпадни материјали за греење, како лакирано или обоено дрво, мебел, стиропор, пластика, гума и други синтетички материјали, чие согорување ослободува исклучително токсични честички. Посебен акцент се става и на правилна употреба и редовно одржување на печките, со користење суво и квалитетно гориво.Во услови на екстремно загадување, се препорачува прозорците и вратите да останат затворени, а при неопходен престој на отворено да се користат заштитни маски од типот FFP2 или N95. Дополнително, се советува избегнување физички активности на отворено.Придржувањето до овие мерки може значително да го намали внесот на штетни честички и да помогне во заштитата на здравјето, особено кај најранливите категории граѓани.

Скопје | пред 1 месец

ЕУ донесе одлука за финансирањето на Украина, стигна и првата реакција од Русија

Русија позитивно реагираше на компромисот што земјите членки на Европската Унија го постигнаа за финансирањето на Украина, оценувајќи дека со одлуката донесена во Брисел е избегнато, како што велат, „незаконско користење на руските државни резерви“.Главниот руски преговарач Кирил Дмитриев преку Телеграм порача дека „правото и здравиот разум засега надвладеале“, додавајќи дека одлуката претставува „тежок удар“ за, како што ги нарече, политичарите кои туркаат кон продолжување на војната.Во своите јавни реакции, Дмитриев директно ги посочи претседателката на Европската комисија Урсула фон дер Лајен, германскиот канцелар Фридрих Мерц и британскиот премиер Кир Стармер, обвинувајќи ги дека не успеале да издејствуваат конфискација на руските средства.„Неколку гласови на разум во рамките на ЕУ досега го спречија нелегалното користење на руските резерви за финансирање на Украина“, напиша Дмитриев, повторувајќи ја позицијата на Москва дека ваквиот потег би претставувал кражба на државен имот.Русија во повеќе наврати предупреди дека секое користење на замрзнатите руски средства ќе биде третирано како непријателски чин, најавувајќи можни контрамерки, вклучително и користење на западни средства и имот во Русија, особено оние во сопственост на приватни компании и инвеститори.По повеќемесечни несогласувања, земјите членки на ЕУ во раните утрински часови во петокот постигнаа договор за модел на финансирање на Украина за наредните две години. Според компромисното решение, Украина ќе добие бескаматен заем од 90 милијарди евра, а доколку Русија не плати воена отштета, отплатата на заемот би се вршела преку замрзнатата руска имотна маса во рамки на Унијата.Претходно, германскиот канцелар Мерц се залагаше за значително поамбициозен план, со кој преку средствата на руската централна банка – најголем дел замрзнати во Белгија – ќе се обезбедеа заеми до 210 милијарди евра. Сепак, тој предлог пропадна поради противење на неколку земји членки, меѓу кои Франција и Италија, како и поради сериозните правни и политички резерви изразени од Белгија.

Свет | пред 1 месец

Орце Ѓорѓиевски едногласно реизбран за претседател на ЗЕЛС, Меџити и Герасимовски се потпретседатели

Со едногласна одлука на Генералното собрание, Орце Ѓорѓиевски повторно е избран за претседател на Заедницата на единиците на локалната самоуправа (ЗЕЛС).Ѓорѓиевски им се заблагодари на членовите на Управниот одбор за укажаната доверба, како и на новоизбраните потпретседатели – Изет Меџити и Горан Герасимовски, нагласувајќи дека пред ЗЕЛС е мандат со значајни реформи и јасна визија за унапредување на локалната самоуправа.Тој посочи дека оптимизмот за успешен мандат се темели на неколку клучни фактори. Како прво, истакна дека годинава се одбележуваат 20 години од започнувањето на процесот на децентрализација, период во кој локалната власт созреала и се профилирале јасни приоритети за понатамошни реформи.Вториот аргумент, според Ѓорѓиевски, е човечкиот и институционалниот капацитет на општините, со оглед дека повеќе од половината градоначалници имаат најмалку еден мандат зад себе, а дел и долгогодишно искуство во локалното управување.Како трет значаен елемент го наведе искуството од енергетската криза, кое, според него, покажало дека кога општините настапуваат обединето преку ЗЕЛС, можат да се справат и со најсериозните предизвици.Ѓорѓиевски нагласи и дека за разлика од минатото, денес постои јасна поддршка и партнерски однос со Владата и премиерот Христијан Мицкоски, што, како што рече, резултирало со ревидиран Меморандум за соработка и забележлив инфраструктурен развој во општините.Тој додаде дека ЗЕЛС останува стабилна и инклузивна платформа во која сите општини настапуваат рамноправно, без оглед на политичката, етничката или верската припадност. Преку документот „Систематизирани ставови на ЗЕЛС“ и новата Стратегија за периодот 2026–2030 година, јасно се дефинираат приоритетите во дијалогот со централната власт.Меѓу конкретните резултати, Ѓорѓиевски го издвои учеството на ЗЕЛС во подготовката на измените на Законот за локална самоуправа, при што било прифатено и долгогодишното барање за воспоставување општинска комунална полиција.Во наредниот период, како што најави, фокусот ќе биде ставен на продлабочување на децентрализацијата, особено во областа на социјалната заштита, како и на обезбедување поголема финансиска стабилност на општините. Тоа ќе вклучува зголемување на уделот на општините во јавните приходи, подобра наплата на сопствените извори и понатамошен развој на електронските услуги.„Пред нас стојат многу важни прашања, но со заеднички пристап и јасна визија можеме да постигнеме конкретни резултати“, порача Ѓорѓиевски.

Македонија | пред 1 месец

Апелација потврдила дека СДСМ клеветела кога кажала дека „Мицкоски е докажан криминалец фатен со рацете во медот“

Лидерот на ВМРО-ДПМНЕ, Христијан Мицкоски, соопшти дека Апелациониот суд со правосилна пресуда утврдил дека СДСМ изнесувала невистини и клевети против него, без докази и без правна основа.„Со оваа одлука, по потврдената првостепена пресуда, СДСМ и формално е судски утврдена како клеветничка партија“, напиша Мицкоски, додавајќи дека тоа што со години било претставувано како „политичка борба“, сега е официјално констатирано како недозволено и спротивно на принципите на правната држава.Според него, пресудата го разоткрива политичкиот модел на СДСМ, кој, како што наведува, се темели на напади и дискредитации наместо на аргументи, програми и одговорност.„Политичката критика е легитимна и потребна, но клеветата и лагата не се политика, туку злоупотреба на јавниот простор“, истакна Мицкоски.Тој додава дека одлуката на судот претставува „жесток шамар“ и за сите, како што ги нарече, поддржувачи и гласноговорници на СДСМ кои учествувале во ширење гласини и кампањи насочени против него.Мицкоски оценува дека СДСМ свесно продолжува со, како што вели, лаги и манипулации, потценувајќи ги граѓаните и надевајќи се дека дезинформациите ќе имаат поголемо влијание од вистината.„Македонија мора да оди напред со политика заснована на вистина, идеи и одговорност. Народот ќе покаже дека е посилен од ваквите лаги и дека тие нема да поминат“, порача Мицкоски.

Македонија | пред 1 месец

Може да добиете награда: Град Скопје е во потрага на најдобро украсен двор и тераса, но и средношколци што добро пушвуаат раскази

Град Скопје и годинава ја организира новогодишната манифестација „Украсуваме по скопски“, со која ќе ги награди најкреативните и највпечатливи празнично украсени домови и простори во главниот град.Сите заинтересирани граѓани кои сакаат да учествуваат во натпреварот можат да се пријават телефонски на бројот 02/3297-265, секој работен ден од 9 до 16 часот, најдоцна до 23 декември 2025 година, информираат од Град Скопје.Фотографии од украсените домови или дворови, заедно со податоци за сопственикот, контакт-телефон и адреса, може да се достават и по електронска пошта на kabinet.nastani@skopje.gov.mk, како и по пошта на адреса:бул. „Илинден“ бр. 82, со назнака „Украсуваме по скопски“.Категории за наградувањеГрад Скопје ќе додели награди во следните категории:Најубаво новогодишно украсен двор од индивидуална станбена куќаНајубаво новогодишно украсена тераса од станНајубави раскази од средношколци на тема новогодишни желби и празнувањаПријавените објекти ќе бидат посетени и оценети од жири-комисија составена од претставници на медиумите.Од Град Скопје порачуваат дека целта на манифестацијата е да се поттикне празничниот дух, креативноста и заедништвото кај граѓаните во пресрет на новогодишните празници.

Скопје | пред 1 месец

Скопската Зоолошка доби нов в.д. директор, доаѓа од редот на вработените

Катерина Костова е назначена за в.д. директорка на Зоолошката градина, дознава „Скопје1“ од изводи од установата. Таа доаѓа на позицијата од Зоран Попов, кој беше кадар на Данела Арсовска, во чие време угинаа десетици животни. Костова е избор на Орце Ѓорѓиевски како нов градоначалник на Скопје.„Скопје1“ се обиде да добие потврда од Град Скопје за тоа дали формално е извршено назначувањето, на што очекуваме одговори. Ова доаѓа откако во јавноста се појавија информациите дека со ЗОО-Скопје ќе раководи Стефан Кирков, за кого беше објавено дека бил осуден за измама со животни, па активисти сметаа дека е тенденциозно оваа функција да му се довери нему.Вработени во Зоолошката градина за „Скопје1“ брифираат дека Костова е дел од установата повеќе од шест-седум години. Последно, таа била и лице задолжено за пристап до информации од јавен карактер.Зоолошката градина во изминатите години беше често мета на критики, поради угинувањето на жирафата, слонот, ламата, мајмунот од расата патас. Во 2023 година, Зоолошката градина го изгуби и кандидатскиот статус за членство во Европската асоцијација на зоолошки градини. Тогаш, неофицијално, како причина беше неведено дека е прекинот на комуникацијата со ЕАЗА во изминатиот период, 2-годишна стагнација на Зоолошката, неизградениот аквариум и честото менување директори. Ова пак предизвика проблеми за носење на нови животни во ЗОО-Скопје.

Скопје | пред 1 месец

Шилегов бара оставка од Филипче: „Или си СДСМ или си тезгарош“; претседателот пак возраврати со обвинувања за притисоци

Поранешниот градоначалник на Скопје и функционер на СДСМ, Петре Шилегов, јавно побара оставка од, како што го нарече, „претседателот“ на СДСМ, Венко Филипче, упатувајќи сериозни обвинувања и прашања за одговорност и мотиви.„Македонското законодавство познава убиство од небрижност. Познава и убиство со умисла, но не познава (само) убиство со умисла. Или ви е тешка одговорноста? Или ви тежи договорот? Или си СДСМ или си тезгарош“, напиша Шилегов.Тој додава дека „прашањата ќе ги постави по празниците“, алудирајќи дека, според него, темата намерно се пласира во период кога јавноста е фокусирана на новогодишните и божиќните празници.По овие обвинувања, со соопштение се огласи и претседателот на СДСМ, Венко Филипче, кој тврди дека партијата „удрила во осино гнездо“ и дека открила, како што вели, „најголема предавничка операција“ која веќе била потпишана, а чија реализација зависи од изборниот резултат.„Не само што ја забранија темата, туку и се закануваат со затвор. Паниката во редовите на ДПМНЕ е толку голема што веќе не бираат средства“, наведува Филипче, обвинувајќи дека владејачката партија секојдневно пласира лажни вести и наводни афери со цел да го одвлече вниманието од, како што ја нарекува, вистината.Филипче тврди дека бил направен обид преку еден член на СДСМ да се нанесе штета на партијата, при што, според него, биле искористени лични и финансиски проблеми, како и можни уцени, за да се внесе немир одвнатре.„Не го доживувам ова како напад врз мене лично, туку како напад врз целата партија и сите нејзини членови“, наведува Филипче, додавајќи дека СДСМ нема да се пресметува со тој член, туку дека ќе се обиде да му помогне.Во пораката до јавноста, Филипче истакнува дека СДСМ е „на патот на правдата“ и дека, како што вели, никој нема да ја запре борбата за враќање на власта „во рацете на народот“.„Кој сака – нека се приклучи. Кој не може или не сака – нека остане настрана. Правдата ќе победи“, порачува претседателот на СДСМ.

Коментари | пред 1 месец

Нова кривична пријава против ексградоначалникот Костадин Костадинов за штета од над 668 илјади денари

Кривична пријава за „несовесно работење во службата“ и „злоупотреба на службената положба и овластување“ е поднесена против поранешниот градоначалник на Струмица, Костадин Костадинов, како и против двајца вработени во општинската администрација, соопшти Министерството за внатрешни работи.СВР Струмица до Основното јавно обвинителство Струмица поднело кривична пријава против К.К. (35) и Б.Ш. (64), двајцата од Струмица, поради сомнение за сторено кривично дело „несовесно работење во службата“, како и против И.Г. (54) од Струмица, поради сомнение за „злоупотреба на службената положба и овластување“.Според МВР, И.Г., во својство на раководител на Одделението за администратирање на приходи при Општина Струмица, постапувала спротивно на Законот за даноците на имот. Таа, во четири наврати, ги пречекорила своите овластувања со изготвување решенија за даночно ослободување од данок на промет на недвижен имот при продажба на станови од станбена куќа со наменска класификација А1.Ослободувањата биле одобрени со повикување на член 25 од Законот за даноците на имот, иако таа законска одредба се однесува исклучиво на станбени згради и станови со номенклатура А2.1, а не на станбени куќи со класификација А1.1, какви што биле предметните недвижности.Дополнително, во три од четирите случаи, И.Г. се потпишала и во полето „потврдил/контролирал“, иако за тоа бил надлежен второпријавениот Б.Ш., кој во тие моменти бил отсутен.Б.Ш., како раководител на Секторот за финансиски прашања, и Костадин Костадинов, како тогашен градоначалник на Струмица, според пријавата, постапиле несовесно и пропуштиле должен надзор над предметите. И покрај неправилностите, тие ги потпишале решенијата за даночно ослободување изготвени од И.Г.Со ваквото постапување, како што наведува МВР, на буџетот на Општина Струмица му била нанесена штета во износ од 668.388 денари.Ова е втора кривична пријава против поранешниот градоначалник Костадин Костадинов. Пред околу две недели, против него и уште пет лица беше поднесена кривична пријава за злоупотреба во постапка за јавна набавка поврзана со набавка на електрични автобуси за Општина Струмица.

Македонија | пред 1 месец

„Скопје1“ дознава: Уште осум осудени за 27 април излегуваат на слобода ден пред Нова година, по години поминати зад решетки

Повеќето од осудените за настаните од 27 април 2017 година добиле условен отпуст, откако издржале повеќе од две третини од затворските казни, дознава „Скопје1“ од извори во Кривичниот суд. Одлуките ги донел Кривичниот совет, кој оценил дека се исполнети законските услови за да се донесе ваква одлука.На слобода ден пред Новата година треба да излезат Мунир Пепиќ, Оливер Поповски, Влатко Трајковски, Душко Лазаров, Јане Ченто, Митко Пешов, Горан Ѓошевски и Никола Митревски. Досега отпуст добија Младен Додевски и Горан Ангелов-Ќосето кои меѓу првите го напуштија затворот.Според нашите информации, Оливер Радулов доби условен отпуст пред 6 месеци.„Скопје1“ дознава дека до Кривичниот суд е испорачано и барањето за повторно судење, поради тоа што постојат нови докази, кои би влијаеле на исходот на постапката. Ова барање беше очекувано дека ќе се поднесе, и најавувано од страна на осудените години наназад. Уште од стартот на судската постапка, по поднесеното обвинение од Вилма Русковска, тие беа децидни дека одговараат за дело кое не го сториле, а за кое им беа изречени високи затоврски казни.Инаку, институтот условен отпуст претставува т.н. „круна“ на ресоцијализацијата, односно „награда“ за доброто поведение при издржувањето на казната. Кога ќе се поднесе молба за овој институт, се подготвува извештај за осуденото лице. Условен отпуст одредува исклучиво Судот и согласно закон може да се состои во посебни мерки на помош, грижа, надзор или заштита кои ги спроведува надлежен орган согласно со закон.

Македонија | пред 1 месец

Не спроведувал одлуки, се создавале диви депонии, се загрозила животната средина - обвинение за екс в.д. директорот на Комунална хигинена

Основното јавно обвинителство Скопје поднесе обвинителен акт против две лица, кои се товарат дека како соизвршители сториле кривично дело „загрозување на животната средина и природата со отпад“, предвидено во член 230 став 1 во врска со член 22 од Кривичниот законик.Според обвинителството, истрагата утврдила дека во текот на октомври годинава, обвинетите со сериозни пропусти во надзорот и управувањето со комуналниот отпад овозможиле состојба која можела да доведе до значително оштетување на почвата, воздухот и водата, како и до опасност по здравјето и животот на луѓето и уништување на растителниот и животинскиот свет.Првиот обвинет, вршител на должност директор на ЈП „Комунална хигиена“ Скопје, Сабахудин Рустеми, според наводите во обвинението, постапувал спротивно на Статутот на претпријатието и Законот за комунални дејности. Тој не ги спроведувал одлуките и заклучоците на Управниот одбор, не се грижел за реализација на деловната политика, не ги извршувал работните обврски од својот делокруг и не преземал мерки за заштита на животната средина.Како одговорно лице во јавно претпријатие кое е давател на комунални услуги, обвинетиот бил должен да обезбеди континуирано и квалитетно собирање и транспортирање на отпадот, како и одржување на објектите, опремата и уредите во функционална состојба, но тоа не било сторено, наведува обвинителството.Вториот обвинет, управител за отпад – подгрупа 5, давател на услуги во областа на комуналните дејности, кој поседувал уверение за положен стручен испит за управување со отпад издаден од Министерството за животна средина и просторно планирање, заедно со директорот, според обвинението, со умисла постапувал спротивно на Законот за животна средина и Законот за управување со отпад.Наместо да преземат законски предвидени мерки и активности, обвинетите не ги спроведувале плановите и програмата за управување со комуналниот отпад на територијата на Град Скопје.Поради неизвршување на основната дејност – редовно собирање и транспортирање на безопасен отпад, како и непобарана измена на Оперативниот план и програмата, обвинетите овозможиле создавање депонии на јавни и сообраќајни површини, каде отпадот бил одлаган во непосредна близина на садовите за собирање.Со оглед дека истражната постапка е завршена и дека обвинетите повеќе не можат да влијаат врз доказите, јавниот обвинител предложи мерката притвор да им биде заменета со мерки на претпазливост. Меѓу нив се: забрана за напуштање на живеалиштето, обврска за повремено јавување во судот и привремено одземање на патната исправа или забрана за нејзино издавање.За обвинетиот управител со отпад, кој сè уште е вработен во ЈП „Комунална хигиена“, обвинителството побара и дополнителна мерка – привремена забрана за вршење работни активности поврзани со кривичното дело, односно отстранување од работното место до завршување на постапката.

Македонија | пред 1 месец

Зеленски: Одиме на преговори со Американците, но не го даваме Донбас

Нови преговори меѓу Украина и Соединетите Американски Држави, насочени кон изнаоѓање решение за ставање крај на војната, ќе се одржат утре и задутре во САД, најави украинскиот претседател Володимир Зеленски.„Во петок и сабота нашиот тим ќе биде во САД. Веќе се на пат, а Американците ги очекуваат таму. Не знам дали ќе има и други учесници, можно е да присуствуваат и Европејци“, изјави Зеленски пред новинарите, без да прецизира кој ќе ја сочинува украинската делегација.Овие разговори ќе се одржат во пресрет на најавената средба меѓу руски и американски претставници, која, според функционер од Белата куќа, треба да се одржи за време на викендот на Флорида. Од Белата куќа засега нема официјални информации за составот на руската и американската делегација.Според порталот „Политико“, САД на тие разговори ќе ги претставуваат специјалниот пратеник за Украина Стив Виткоф и Џаред Кушнер, зет на американскиот претседател Доналд Трамп. Од руска страна, пак, се очекува учество на пратеникот на Кремљ за економски прашања Кирил Дмитриев.Зеленски повтори дека позицијата на Москва е јасна и непроменета.„Сите го знаеме ставот на Русија – тие сакаат да го заземат целиот Донбас, а во моментов бараат ние да се повлечеме од тој регион“, изјави украинскиот претседател.Индустрискиот регион Донбас ги опфаќа Луганската област, која е речиси целосно под контрола на Русија, и Доњецката област, од која околу 20 проценти сè уште се под контрола на украинската армија.

Свет | пред 1 месец

(Видео) Трамп ја прекројува историјата во Белата куќа: Навреди, теории на заговор и самофалење од Трамп за неговите претходници

По враќањето на власт на 20 јануари 2025 година, американскиот претседател Доналд Трамп започна серија интервенции во Белата куќа, со кои не само што го промени изгледот на резиденцијата, туку и начинот на кој се претставува историјата на неговите претходници, пишува „Индипендент“.На надворешниот ѕид од колонадата на Белата куќа е поставена таканаречената „Претседателска патека на славните“, каде се изложени портрети на сите американски претседатели, со нивни биографии на бронзени плочи. Иницијативата формално има за цел едукативна презентација на историјата, но содржината на дел од плочите предизвика силни реакции.При првичното претставување на галеријата, портретот на Џо Бајден воопшто не беше поставен. Наместо него, беше изложена фотографија од автопен – уред за автоматско потпишување документи – со што се алудираше на тврдењата на Трамп дека неговиот демократски претходник страдал од деменција и не бил свесен за одлуките што ги потпишувал.Подоцна, портретот на Бајден беше додаден, но под него се појавија плочи со исклучително негативен и навредлив опис. Во текстот, Бајден е означен како „најлошиот претседател во историјата на САД“, се тврди дека ја довел земјата „до работ на катастрофа“, повторно се пласира неоснованото тврдење дека изборите во 2020 година биле „украдени“, а тој е посочен и како главен виновник за руско-украинската војна што започна во 2022 година.Сличен пристап е забележан и под портретот на Барак Обама. Во биографската белешка, првиот афроамерикански претседател е опишан како „една од најконтроверзните личности во историјата на земјата“, при што намерно е наведено и неговото средно име – Хусеин – со што, според критичарите, се потхрануваат стари теории на заговор за неговото потекло.Во текстот се наведува дека за време на неговиот мандат Исламската држава се проширила на Блискиот Исток, Либија западнала во хаос, а Русија го анектирала Крим. На внатрешен план, Обама е обвинет дека ги „демонтирал малите бизниси и јагленокопите“ и дека ја „шпионирал“ кампањата на Трамп во 2016 година. Посебно е критикуван и Законот за здравствена заштита, кој е наречен „неефикасен“ и директно поврзан со изборните порази на Демократската партија.Во споредба со Бајден и Обама, описот на Бил Клинтон е значително поблаг, со акцент на одлуки кои Трамп подоцна ги поништил, како што е трговскиот договор НАФТА.Под сопствениот портрет, Доналд Трамп, очекувано, е прикажан во исклучително позитивно светло. Посебно се истакнува дека „преживеал два обиди за атентат“, дека „завршил осум војни за осум месеци“ и дека донел „трилиони долари инвестиции“ во САД – тврдења кои, како што наведува „Индипендент“, не се поткрепени со јасни докази.Паралелно со историските интервенции, Трамп значително го променил и физичкиот изглед на Белата куќа. Дел од објектот бил срушен за да се изгради голема балска сала, зголемен е бројот на позлатени украси, а просторот е исполнет со негови портрети – практика што е спротивна на долгогодишниот политички обичај, според кој актуелниот претседател не поставува свој портрет додека е на функција.Со овие потези, оценуваат критичарите, Белата куќа сè повеќе наликува на личен простор на Доналд Трамп, а помалку на институционален симбол на американската демократија и нејзината историја.

Свет | пред 1 месец

Гувернерот на Калифорнија му се потсмева на Трамп

Гувернерот на Калифорнија, Гевин Њусом, реагираше на синоќешното обраќање на американскиот претседател Доналд Трамп до нацијата со објава на социјалната мрежа Икс (X), која за кратко време привлече огромно внимание.Њусом, со воведот „Трамп вечерва:“, објави долга низа од зборот „Јас“ („Me“), повторен стотици пати, алудирајќи дека говорот на претседателот бил крајно самофалечки и целосно фокусиран на неговата личност.Објавата уследи веднаш по говорот на Трамп од Белата куќа, во кој тој ги истакнуваше „успесите“ на својата администрација, ја префрлаше вината за високите цени и економските проблеми врз својот демократски претходник Џо Бајден и понуди малку, ако воопшто и некакви, конкретни мерки за справување со инфлацијата и падот на животниот стандард.Во говорот, Трамп повторно се осврна на миграциите, криминалот и правата на трансродните лица, најави исплата на т.н. „воена дивиденда“ за припадниците на американските вооружени сили и повтори дека неговата политика на царини и даночни олеснувања ќе донесе економски бум. Надворешната политика, пак, доби минимален простор – не го спомена војната во Украина, а конфликтот во Газа го допре само површно.По говорот, демократите порачаа дека Трамп не понудил реални решенија за проблемите со кои се соочуваат граѓаните. Сенаторот Марк Ворнер од Вирџинија го оцени обраќањето како „тажен обид за одвлекување на вниманието“, додека ироничната реакција на Њусом стана најзабележливиот одговор од редовите на Демократската партија.Гевин Њусом е гувернер на Калифорнија од 2019 година и една од највлијателните фигури на Демократската партија на национално ниво. Поранешен градоначалник на Сан Франциско и долгогодишен сојузник на либералното крило на демократите, Њусом сè почесто се споменува како најсериозен потенцијален кандидат на партијата за претседателските избори во 2028 година.Неговата реакција дополнително го нагласува сè подлабокиот политички јаз во САД, во момент кога Трамп – речиси една година пред меѓуизборите – бележи слаби рејтинзи кај јавноста за управувањето со економијата, додека демократите веќе активно бараат лице кое би можело да му се спротивстави на национално ниво.

Свет | пред 1 месец

Ноќна полициска акција: Приведен и ексдиректор на ДУИ за финансиски проневери

Во ноќна полициска акција е уапсен Бујар Дардишта, поранешен директор на Управата за водење на матични книги, дознава „Скопје1“.Заедно со Дардишта се уапсени уште неколку лица, а паралелно се извршени и претреси на повеќе локации низ државата. Од Јавното обвинителство засега не соопштуваат детали за идентитетот на другите приведени.Бујар Дардишта е кадар на ДУИ и во изминатите години извршувал повеќе раководни функции во државната администрација. Најпознат е по мандатот како директор на Управата за водење на матични книги, а подоцна беше именуван и за управител во ЕСМ Дистрибуција.Од Основното јавно обвинителство за гонење организиран криминал и корупција информираат дека акцијата се спроведува под раководство на јавен обвинител, а во неа учествуваат полициски службеници од Одделот за сузбивање на организиран и сериозен криминал при Бирото за јавна безбедност на МВР.„Од ноќеска се преземаат координирани активности на повеќе локации во Скопје и Куманово, поради постоење на основано сомнение за сторени кривични дела од финансиско-економска природа“, соопштија од ОЈО ГОКК.Од Обвинителството најавуваат дека повеќе информации ќе бидат споделени по завршување на теренските активности.

Македонија | пред 1 месец

Уапсените демонстранти во Мароко сведочат: Бевме претепани, оставени без вода и храна со саати“

Во пресрет на неделното домаќинство на Африканскиот куп на нации, Мароко се соочува со сериозни обвинувања за масовни и произволни апсења, полициска бруталност и тешко кршење на човековите права, предупредуваат меѓународни и домашни организации за човекови права.Бранoт протести, предводен од младите од таканаречената „Генерација З“, познат како движењето „Gen Z 212“, ја зафати земјата кон крајот на септември и почетокот на октомври и беше најголемиот од времето на Арапската пролет во 2011 година. Главните барања беа насочени кон реформи во хронично недофинансираните сектори – здравството и образованието, пишува британскиот весник „Гардијан“.Според здруженијата за човекови права, мароканските власти на протестите одговориле со апсење на илјадници луѓе. Многумина од приведените, тврдат активистите, биле претепувани во полициски притвор и со часови оставани без храна и вода.„Мојот син беше во локална сендвичара на вечера кога го уапсија. Тој воопшто не протестираше“, изјавила мајка на 18-годишно момче кое поминало повеќе од два месеца во притвор. Таа тврди дека за време на апсењето бил толку силно удиран што изгубил неколку заби, а подоцна повторно бил претепан во притвор затоа што одбил да потпише полициски записници.Протестантки, според Мароканското здружение за човекови права (AMDH), биле изложени на вознемирување, навреди и груби, сексистички коментари, а дел од нив пријавиле и случаи на недолично допирање.На протестите одржани на 1 октомври во градот Лклиаа, во близина на туристичкиот центар Агадир, безбедносните сили, според наводите, застрелале и убиле тројца демонстранти, додека уште 14 биле повредени, меѓу кои и деца на возраст од 12 години со прострелни рани.Властите тврдат дека полицијата реагирала откако група демонстранти упаднала во полициска станица. Сепак, според „Амнести интернешнл“, досега се покренати кривични постапки против повеќе од 2.400 лица, а десетици учесници на мирни протести се обвинети за насилни дела.Според AMDH, дел од обвинетите веќе добиле затворски казни до 15 години. Организацијата предупредува на сериозни пропусти – отсуство на адвокати за време на сослушувањата, површни истраги и непочитување на презумпцијата на невиност. Стотици лица, меѓу кои и малолетници, сè уште се наоѓаат во притвор.Портпаролот на „Хјуман рајтс воч“, Ахмед Бенчемси, смета дека властите сакале да испратат јасна порака.„Владата очигледно се исплаши и ја оркестрираше оваа репресија за да покаже дека нема да толерира никаков облик на несогласување“, изјави тој.Иако владата по немирите најави зголемени инвестиции во здравството и образованието, во повеќе градови повторно избија протести со барања за ослободување на притворените. Дополнителен револт предизвикаа и неодамнешните поплави во покраината Сафи, во кои загинаа 37 лица, при што демонстрантите ја обвинуваат власта дека им дава приоритет на меѓународни престижни проекти, а не на основната инфраструктура.Активистите предупредуваат дека голем број млади се плашат јавно да зборуваат. „Слушнавме ужасни сведоштва за тортура во полициски притвор“, изјави Мустафа Елфаз од мароканската подружница на AMDH. Според него, некои притвореници биле принудени да се соблечат, а дел биле тепани со електрични кабли, при што трагите од повредите биле видливи со недели.Адвокати кои доброволно ги бранат демонстрантите за „Гардијан“ потврдиле сериозни процедурални прекршувања и изрекување тешки казни врз основа на слаби докази. Од друга страна, мароканските власти тврдат дека сите постапки се водени согласно законот и дека се почитувале условите за фер судење.

Свет | пред 1 месец

Фон дер Лајен решителна: Нема да си заминам од Брисел без решение за финансирање на Украина

Претседателката на Европската комисија, Урсула фон дер Лајен, изјави дека нема намера да си замине од денешниот самит на лидерите на Европската унија во Брисел без конкретно решение за финансирањето на Украина.По пристигнувањето во седиштето на ЕУ, Фон дер Лајен порача дека Унијата мора итно да најде начин како да го затвори финансискиот јаз со кој се соочува Украина, нагласувајќи дека станува збор за клучно прашање не само за Киев, туку и за европската безбедност.„Имаме една крајна цел на овој самит – мир за Украина, но мир со сила. За тоа, Украина мора да има сигурно финансирање најмалку за наредните две години“, изјави Фон дер Лајен.Таа истакна дека на маса веќе се ставени две опции за обезбедување на потребните средства, без да навлегува во сите детали, но јасно порача дека Европската унија веќе презела обврска да ѝ помогне на Украина во покривање на нејзините финансиски потреби.Во однос на таканаречениот репарациски заем, Фон дер Лајен нагласи дека, доколку се постигне договор за ваков модел, ризиците од аранжманот мора да бидат рамномерно поделени меѓу сите земји членки на Европската унија. Со ова таа го повтори ставот што претходно го изнесе и белгискиот премиер Барт де Вевер.Инаку, на 3 декември, Фон дер Лајен официјално го претстави предлогот на Европската комисија за репарациски заем за Украина, кој би се финансирал преку користење на замрзнатата руска имотна маса. Предлогот предизвика силни политички дебати во рамки на Унијата, особено околу правните и финансиските ризици од ваквиот чекор.Денешниот самит се смета за клучен момент во обидите на Европската унија да постигне единствен став околу идната финансиска и безбедносна поддршка за Украина, во услови на продолжен воен конфликт и зголемени геополитички тензии.

Свет | пред 1 месец

Зеленски предупредува: Без одлука на ЕУ за замрзнатите руски средства, Украина ќе се соочи со сериозни проблеми

Украинскиот претседател Володимир Зеленски изјави дека Украина ќе се соочи со сериозни проблеми доколку Европската унија не донесе одлука за користење на замрзнатите руски средства, јавуваат светските медиуми.Зеленски изјавата ја даде пред новинарите за време на летот кон Брисел, каде што учествува на самитот на лидерите на Европската унија. Тој посочи дека средствата од евентуален репарациски заем, доколку се донесе позитивна одлука, би можеле да се користат и за обновата на Украина по завршувањето на војната.„Денес, кога зборуваме за репарации, не го ограничуваме разговорот само на обновата. Ова е војна и тие средства ни се неопходни за одржување на армијата и за поддршка на домашното одбранбено производство. Тоа вклучува европски системи, но и американски противвоздушни ракети“, изјави Зеленски.Тој додаде дека, доколку се донесе позитивна одлука, Украина е подготвена средствата да ги користи и за воени цели. Во случај на завршување на војната, по постигнување дипломатски договор, парите би биле целосно пренасочени кон обновата на земјата.Зеленски нагласи дека Соединетите Американски Држави изразиле подготвеност да помогнат во финансирањето на обновата, иако засега нема конкретни детали, додека Европа, како што рече, континуирано ја отвора оваа тема.„Одлуката за користење на замрзнатата руска имотна маса на крајот зависи од политичката волја. Без таа политичка волја, Украина ќе се соочи со сериозни потешкотии“, порача украинскиот претседател.

Свет | пред 1 месец

(ВО ЖИВО) Претрес на Ивона Талевска

Новинарката Ивона Талевска ќе биде гостинка во емисијата „Претрес“, каде во долга и отворена форма ќе се разговара за нејзината професионална кариера, медиумската сцена во Македонија и клучните настани што со години предизвикуваат силни јавни реакции и контроверзии.Во фокусот на разговорот ќе бидат периодот на прислушуваните разговори („бомбите“) и нивното влијание врз нејзе, Латас и политиката.Талевска ќе зборува и за заминувањето од телевизијата „Сител“, кое самата го опиша како напуштање на „токсична атмосфера“, како и за односите меѓу медиумите и политичките центри на моќ во тој период. Дел од разговорот ќе биде посветен и на нејзините јавни настапи, перцепцијата за нејзината блискост со актуелната власт, како и на критиките дека често настапува со позиции што се доживуваат како одбрана на владините политики.Како претседателка на Македонската асоцијација на новинари (МАН), Талевска ќе одговара и на прашања поврзани со улогата на здружението, реакциите за состојбата со медиумските слободи и обвинувањата за селективен пристап во заштитата на новинарите.Во емисијата ќе се отворат и теми за нејзините професионални контакти со поранешни високи политички функционери како Груевски и Мијалков, медиумската одговорност во време на длабоки политички кризи.Разговорот ќе има и лична димензија, со осврт на новинарскиот пат и влијанието на нејзиниот татко, новинарот Труфин Талевски, како и пораките што таа ги упатува до младите новинари денес.Следете во живо:

Студио | пред 1 месец

Од забава за добредојде со државни пари до тивка оставка: Како замина Љупчо Коцевски од Обвинителството

Љупчо Коцевски ја заврши функцијата државен јавен обвинител без проштална средба, без забава и без формално појавување на работа. За разлика од неговото доаѓање на функцијата, кое беше одбележано со организиран настан и кетеринг, заминувањето помина тивко, без храна и пијалоци за колегите.Од Јавното обвинителство, на прашањето дали Коцевски организирал каква било проштална средба, кусо одговорија: „Не почастил“.Според информации од Обвинителството, Коцевски денеска воопшто не се појавил на работното место. Само еден ден претходно, тој јавно изјави дека ќе си замине порано од работа, наведувајќи дека е преморен и дека со денови останувал до доцна во својот кабинет. Дали просторијата ја испразнил и формално ја предал функцијата – засега нема официјална потврда.Неговото заминување дојде ненадејно. Вчера, пред Собранието формално да ја започне постапката за негово разрешување, Коцевски поднесе оставка, со што, практично, ги претекна пратениците и ја затвори процедурата.За разлика од ваквиот крај, почетокот на мандатот на Коцевски беше одбележан со свечен прием во куполата на Јавното обвинителство. Тој тогаш организираше забава за добредојде, на која беа поканети обвинители, претставници на стручната јавност, невладини организации и државни институции.Како што тогаш информираше Обвинителството, за кетеринг биле потрошени околу 80.000 денари. Дел од сумата бил платен од буџетот на Обвинителството, а дел лично од Коцевски. Според доставената документација, од јавни средства биле платени 39.102 денари, додека преостанатите 40.698 денари, како и трошоците за пијалаци, ги подмирил лично Коцевски.На настанот присуствувале над 100 гости, меѓу кои и поранешни и пензионирани обвинители, како и неговиот претходник Љубомир Јовески. Меѓу поканетите била и Вилма Русковска, иако таа претходно беше разрешена поради дисциплински повреди, во постапка со која претседаваше токму Коцевски.Од Обвинителството тогаш изјавија дека не располагаат со официјална листа на гости и дека станувало збор за „неформална средба“.Две години подоцна, истиот обвинител заминува, без настан и без симболичен гест кон институцијата што ја водеше. Од забава за добредојде со над сто гости, до заминување без проштална честенка – мандатот на Љупчо Коцевски заврши тивко, но со силен јавен одек.

Македонија | пред 1 месец

Опозицијата обвинува: Пари од Британија за железница, а зад нив – мигрантски договор

Од СДСМ денеска обвинија дека проектот за изградба на брза железница низ Македонија е директно поврзан со договорот со Велика Британија, кој, според нив, вклучува и обврски за прифаќање мигранти.Како што наведуваат од опозициската партија, ваквите тврдења дополнително се потврдени со денешната изјава на вицепремиерот и министер за транспорт Александар Николоски, кој посочил дека изградбата на брзата железничка линија од Србија до Грција, која минува низ Македонија, е дел од договорот со Британија.„Ова е уште една потврда дека договорите за, како што велиме, распродажба на Македонија преку мигранти за пари се реалност“, соопштија од СДСМ.Од партијата тврдат дека кредитот од шест милијарди евра од Велика Британија е условен со прифаќање мигранти, повикувајќи се на објави во британските медиуми. Според нив, секојдневно излегуваат нови докази кои ја потврдуваат оваа теза.СДСМ ја поврзува оваа тема и со, како што велат, „предавството во Собранието“, алудирајќи на гласањето за контрарезолуцијата, а дополнително обвинува дека Владата мигрантите ги претставува како „економски работници“.„Сценариото е јасно – избори, па мигранти за пари“, наведуваат од СДСМ, додавајќи дека граѓаните ќе стават крај на, како што ги нарекуваат, криминалните политики.Од Владата засега нема официјален одговор на овие обвинувања.

Македонија | пред 1 месец

Голомразица во Нерези, екипи на терен

Општина Карпош информира дека поради временските услови и појавата на голомразица на коловозните ленти, вечерва била извршена интервенција на патниот правец од Долно кон Горно Нерези.Општинските служби фрлиле сол со цел да се подобри безбедноста во сообраќајот и да се спречат евентуални незгоди поради лизгавиот коловоз.Од Општина Карпош велат дека се подготвени за претстојните зимски временски услови и дека заедно со екипите на економскиот оператор ќе постапуваат навремено и одговорно, согласно состојбата на терен.Општината апелира до граѓаните и возачите на зголемена внимателност при движењето, особено во повисоките делови каде што постои ризик од појава на голомразица.

Скопје | пред 1 месец

Орце тврди дека ниту купувал ниту продавал имот: Анкетниот лист не е поднесен поради многуте обврски

Градоначалникот на Скопје, Орце Ѓорѓиевски, вели дека неговата имотна состојба е непроменета и дека анкетниот лист ќе го поднесе во наредните денови. Во изјава за „Скопје1“, тој појаснува дека досега не го сторил тоа поради, како што наведува, обемните работни обврски.„Имотната состојба ми е иста и непроменета од моментите кога уредно била пријавена во Општина Кисела Вода. Нема никаква промена на движен имот и анкетниот лист ќе биде поднесен во текот на наредните денови. Не бил поднесен до сега, поради обемен обем на работа и обврски“, изјави Ѓорѓиевски.Реакцијата на Ѓорѓиевски доаѓа откако Државната комисија за спречување на корупцијата (ДКСК) утврди дека вкупно 54 сегашни и поранешни градоначалници не ја испочитувале законската обврска за поднесување изјава за имотна состојба и интереси.Според ДКСК, 19 новоизбрани градоначалници, меѓу кои и Ѓорѓиевски, не поднеле анкетен лист по стапување на функцијата, додека 35 поранешни градоначалници, меѓу кои и поранешната градоначалничка на Скопје, Данела Арсовска, не ја исполниле обврската по завршување на мандатот.

Македонија | пред 1 месец