Мицкоски: Јавниот и државниот долг е најнизок во последните 5 години, очекувам намалувањето да продолжи

Претседателот на Владата на Република Северна Македонија, Христијан Мицкоски денеска одговарајќи на новинарско прашање во однос на нивото на јавниот и државниот долг и очекувањата да продолжи нивното намалување, изјави:„Да, очекувам. Инаку имаме ниво на јавен и државен долг во однос на бруто домашниот производ којшто е најнизок во последниве пет години. Односно јавниот долг е некаде околу 57,7% од бруто домашниот производ, а додека пак државниот е 50,1%. Како Влада имаме јасна стратегија, до крајот на мандатот овие параметри да ги сведеме на следниве бројки и тоа јавниот да биде под 55%, зошто да не и под 50%, а државниот да биде под 45%, зошто да не и под 40%.Но, она коешто за мене е исто така важно е да номиналниот бруто домашниот производ биде 20 милијарди долари. Сега сме некаде на ниво од 17 милијарди долари за 2025 година. До крајот на овој мандат, очекувам Владата да ги исполни овие три стратешки цели, во делот на макроекономските показатели и мислам дека тоа ќе се случи. Да не речам сум сигурен, бидејќи како што кажав во месеците коишто следат ќе објавиме многу убави вести за македонската економија и за македонските граѓани.“

Македонија | пред 1 година

Вработени во ЗОО си ја бараат платата, велат дека немаат ни здравствено; Директорот не е ни на работа, рече Неделков од СОНК

Вработени во Зоолошката градина си ја бараат платата за изминатите два месеци. Тие велат дека немаат ништо против Зоолошката градина или Министерството за култура кои им исплаќаат плати, или пак против Град Скопје. Посочуваат дека никогаш не се случило 45 дена да немаат земено плата.„Овој протест е за да нѐ видат дека немаме земено плата за март месец. Плата имаме земено пред 45 дена. Вчера изгубивме и здравствено, бидејќи немаме плата на време. Имаме и колеги кои се на боледување. Кај без плата, па и без здравство. Замолувам тие кои се надлежни ова да го решат, за да ние поскоро земем плата. Си ја бараме заслужената плата која треба да ни ја дадат. Дали ќе исплаќаат по старо или ново - има синдикат, министерство. Ако ние не сме задоволни, ќе си поднесеме преставки до судот и ќе работиме според тоа што ќе ни кажат“, рече Миле Таневски, претседател на синдикална организација на ЗОО-Скопје.Тој порача дека ќе плаќаат камати ако не ги подмират долговите.„Банки, извршители почнаа, знаете како функционира оваа држава. Телефоните ни ги исклучија. Како понатаму, ќе треба да се договориме во Синдикатот. Ние го најавивме протестов, излеговме толку колку што сме. Велигден го пројдовме без плата, 1 Мај го поминавме без пари“, рече Таневски.Немаме луѓе, немаме работници по реони, порача зоо-негователот Мирослав Станковиќ. Апелираше да се донесат помлади работници.„Ова не е протест, туку за време на пауза, да испратиме порака дека ние секојдневно сме склони на повреди, а еве веќе немаме ниту здравствено. Зоолошка градина е подолго време е арена за политички пресметки. Нас тоа не нѐ интересира. Апелираме да ни се реши статусот. При крај ни се и финансиските средства“, додаде Мирослав Станковиќ, зоо-неговател.„Трпението е при крај. Со бирани зборови ја кажуваат нивната мака, нивната тага. Но факт е дека денеска немаат ни здравствено осигурвање. Секојдневно се изложени на повреди, а да останат без здравствено осугурвање е нехумано. Ако не се исплатат платите, веројатно и вратите на ЗОО да бидат затворени. За жал, добив информација дека директорот не е на работа, а мислев да се срентеме. Генерално директорот е задолжен за исплата на плата, а кој е надлежен по хиерархија, нас не нѐ интересира. Ние забелешките ќе ги упатиме до директорот. Според моите информации никој во Град Скопје нема земено плата“, рече претседателот на СОНК, Јаким Неделков.

Скопје | пред 1 година

Осум повредени од „Пулс“, се враќаат од лекувањето во странство

Денеска се враќаат осум пациенти од лекување од Турција, Бугарија и Словенија, во странство остануваат хоспитализирани 18 пациентиМинистерството за здравство информира дека денеска уште осум пациенти од повредените во трагедијата во Кочани се враќаат од лекување, од кои пет од Турција, двајца од Бугарија и еден од Словенија. На лекување во странство остануваат уште 18 пациенти.Согласно протоколот, пет пациенти ќе бидат под опсервација во ГОБ „8 Септември“, двајца на Клиника за пластична хирургија и еден пациент во Хируршка клиника „Св.Наум Охридски“.Дел од повредените, кои изминатиот период се вратија во земјава, веќе започнаа процес на рехабилитација во Општата болница во Кочани, кои во зависност од повредите се третираат на одделенијата за неврологија, хирургија и физикална терапија.Министерството за здравство континуирано ја следи состојбата со повредените пациенти, со цел обезбедување најдобар можен третман, како и натамошна рехабилитација.

Македонија | пред 1 година

(Видео) Поставен оџакот на Сикстинската капела за избор на нов папа

Очите на светот свртени кон Ватикан.Течат подготовките за избор на нов папа. Членовите на противпожарните и спасувачките служби веќе го подготвуваат оџакот кој игра клучна улога во тоа.Со оглед на тоа што изборот за папа е затворен за јавноста и дека јавноста нема увид во случувањата во црквата во тие моменти, црковните службеници ќе ја информираат јавноста за резултатите од гласањето по секое гласање, преку бојата на чадот која излегува од оџакот.Ако се појави бел чад, тоа значи дека папата е избран.Во случај папата да не биде избран, гласачките ливчиња ќе бидат изгорени и на нив ќе се додаде „црна смеса“ што ќе го направи самиот чад црн. За граѓаните кои ќе се соберат на плоштадот „Свети Петар“ во Ватикан, ова ќе значи дека папата не е избран.Конклавата за избор на 267-от папа ќе започне на 7 мај 2025 година, по завршувањето на мисите кои се одржуваат за покој на душата на починатиот папа Франциск.Се очекува 133 кардинали од целиот свет да го изберат новиот поглавар на Католичката црква. За валиден избор на нов папа се потребни две третини плус еден глас.

Свет | пред 1 година

ЗНМ: Извештајот на „Репортери без граници“ е реален показател за потребата од реформи во медиумскиот сектор

„Во најновиот извештај на Репортери без граници (RSF), Македонија бележи пад од шест позиции на Светскиот индекс за слобода на медиумите за 2024 година и се рангира на 42 место. ЗНМ го смета извештајот за реален и балансиран приказ на состојбите, кој јасно ги посочува постојните предизвици и потребата од суштински реформи“, велат од ЗНМ и додаваат:Во правниот дел, извештајот нотира дека националното законодавство сè уште не е усогласено со европските стандарди, а злоупотребата на т.н. SLAPP тужби (стратешки тужби против јавна партиципација) останува механизам за притисок врз критичките медиуми и новинари.Во делот за безбедност, и покрај позитивниот чекор со назначувањето на контакт точки во ЈО и МВР за случаи на напади врз новинари, извештајот бележи продолжени случаи на заплашување, притисоци и напади кои го нарушуваат чувството на сигурност кај новинарите, особено кај оние што известуваат за злоупотреба на моќ и корупција.Извештајот укажува на тенденцијата носители на јавни функции да имаат негативни и понижувачки ставови кон новинарите, а таквиот однос создава атмосфера на недоверба и недостоинство, која лесно се прелева и во јавниот дискурс, но и во реални закани и напади врз новинари.Во економскиот дел, се истакнува дека финансирањето на медиумите е ограничено и нетранспарентно, а редакциите често се подложни на економски влијанија.Извештајот се однесува на изборната 2024 година, во период на поларизирана политичка клима која резултираше со засилен партиски дискурс во јавната комуникација и медиумите.Овие наоди, според ЗНМ, претставуваат јасен сигнал до институциите дека се неопходни итни и координирани реформи за зајакнување на медиумскиот сектор и подобрување на положбата на новинарите. Клучните приоритети треба да бидат:Усогласување на националното медиумско законодавство со Европскиот акт за слобода на медиумите (EMFA), за да се обезбеди покохерентна и транспарентна правна рамка.Формирање на фонд за поддршка на медиумскиот плурализам, со цел зајакнување на независноста и одржливоста на професионалното новинарство.Ефикасно решавање на сите сериозни случаи на закани и напади врз новинари, вклучувајќи проширување на институционалните механизми и надвор од главниот град.Воведување на правни заштити против злоупотреба на SLAPP-тужбите, со цел заштита на новинарите кои известуваат во интерес на јавноста.Политичарите, особено оние на позиции на моќ, треба да преземат одговорност и да придонесат кон создавање на култура на почит, транспарентност и конструктивна комуникација со медиумите. Преку јавно признание на улогата на новинарите во демократското општество и воздржаност од навредлив говор, може значително да се подобри целокупната медиумска средина и да се зајакне довербата на јавноста.ЗНМ останува посветено на поддршка на реформите што ќе ја унапредат слободата на изразување, ќе ги подобрат условите за работа на новинарите и ќе придонесат кон зголемување на довербата на јавноста во медиумите.

Македонија | пред 1 година

Нема фотографија

Целите на Путин се променија

Нovi разузнавачки информации собрани од американски и западни претставници сугерираат дека рускиот претседател Владимир Путин го префрлил својот непосреден фокус во војната во Украина кон краткорочни цели. Фокусот е првенствено на консолидирање на контролата врз територијата што руските сили веќе ја зазедоа и зајакнување на економијата на Русија, која се бори со тешкотии, изјавија за CNN повеќе извори запознаени со разузнавачките извештаи.Ова е пресврт од претходните проценки на американските и западните разузнавачки агенции, кои сугерираа дека Путин верувал дека шансите се во негова корист и дека имал и моментум и човечки ресурси да води долготрајна војна против ослабената Украина со цел да ја преземе целата земја.Перцепцијата дека Путин можеби се предомислил се совпаѓа со верувањето на американскиот претседател Доналд Трамп и неговите преговарачи дека рускиот претседател сега можеби е поподготвен да разгледа мировен договор отколку порано, изјавија за CNN два американски извори запознаени со дискусиите.Но, високи американски претставници остануваат скептични кон тврдењата на Путин за време на разговорите дека тој сака мировен договор, иако предлогот на САД е во голема мера поволен за Русија и вклучува признавање на поголемиот дел од територијата што ја зазела.Општо е прифатено дека дури и ако Москва се согласи со сегашната верзија на договорот, подоцна би можела да се обиде да ја обнови војната и да се обиде да заземе уште поголема украинска територија.„Мислам дека тој сега размислува - не би рекол поскромно - но во однос на поразумни, понепосредни цели“, рече еден висок западен разузнавачки службеник.Притисокот од администрацијата на Трамп, која сè повеќе се заканува со дополнителни санкции, и економската криза во Русија би можеле да го стават Путин во тешка позиција. Во исто време, можноста за големи американско-руски инвестиции ако војната заврши, што САД ја опишуваат како „историска можност“, исто така силно се нагласува во разговорите.„Сè зависи од тоа што САД ќе донесат на масата, така што не само што ќе ја прикажат победата дома, туку и навистина ќе почувствуваат дека постигнале нешто доволно големо за да оправдаат значајна пауза, а можеби и еден ден повторно да го започнат конфликтот“, рече истиот висок разузнавачки службеник.Изворот забележал дека Путин често се повикува на регионите од кои „потекнува рускиот народ“ и дека сè уште одржува „долгорочна цел“ за заземање на големи делови од Украина, која во својата идеологија ја гледа како „лулка на руската цивилизација“.Висок европски функционер се согласил дека Москва во моментов е подготвена да „ја игра играта“ и привремено да ги ограничи своите цели со цел да ги подобри односите со Вашингтон, но предупредил: „Јасно е дека тие не ги напуштиле своите максималистички воени цели“.„Кремљ се надева дека подобрените односи ќе го одвлечат вниманието од војната, по тактичка пауза, и дека потоа може да користи комбинација од воена сила, економски притисок, информативна пропаганда и политичко влијание за да ги постигне целите на Путин - не само во Украина, туку и пошироко“, рекол истиот европски функционер.Претходно оваа година, американските разузнавачки служби ги предупредија сегашните советници на Трамп дека контролата врз Украина останува главен приоритет на Путин, втор по опстанокот на неговиот сопствен режим. Тие, исто така, предупредија дека рускиот лидер ќе се обиде да го искористи секој знак дека новата администрација брза кон преговори, рекол извор запознаен со разговорите.„Путин се предомисли затоа што верува дека од другата страна е американски претседател кој не знае што прави и кој е фокусиран на брзи победи“, рече демократскиот конгресмен Џејсон Кроу, член на Комитетот за разузнавање на Претставничкиот дом.„Путин верува дека може да се постигне договор кој едноставно нема да се спроведе“, додаде Кроу.Дебатите за територијалните граници се фокусираа на пет области каде што Русија има најсилна контрола, вклучувајќи го и Крим, кој Путин го анектираше во 2014 година. Трамп рече дека Украина нема да врати голем дел од територијата што ја изгуби.Минатата недела, потпретседателот Џ.Д. Венс рече дека САД очекуваат конечно примирје „некаде блиску“ до сегашните бојни линии, со „некои територијални размени“.„Овој мировен договор се однесува на тие пет региони, но вклучува и многу повеќе“, рече Стив Виткоф, преговарачот на Трамп, кој се сретна со Путин четири пати оваа година, додавајќи: „Мислам дека можеби сме блиску до нешто што би можело да биде многу важно за целиот свет“.

Свет | пред 1 година

Падот на Индексот на Репортери без граници се должи главно на ширење на лажни вести, главната фабрика за тоа е СДС, вели ВМРО-ДПМНЕ

„Падот на Индексот на Репортери без граници се должи главно на ширење на лажни вести и дезинформации. Главната фабрика за лажни вести и дезинформации, во отсуство на конструктивни политики се СДС и Венко Филипче, за што како партија имаат и осудителни пресуди за тоа“, вели ВМРО-ДПМНЕ и додава:Пример за лажна вест е последното соопштение и прес-конференција. Тие тврдат дека министри давале неколку илјади евра за ручеци, а во суштина и институциите демантираа кажувајќи дека се работи за исплати кон ресторански оператор за услуги за храна кои ги користат и плаќаат вработените од министерствата.Борбата против лажните вести е заедничка одговорност на сите општествени фактори. Потсетуваме дека СДС е главниот финансер и мецена на лажните вести и тој полусвет кој оваа партија го одржува. Тоа е последица и на отсуството на политики и предлози кои ќе бидат конструктивен фактор во општеството.СДС е синоним за неспособност, предавства и криминал.

Македонија | пред 1 година

На 1 мај се фатени 132 пијани возачи, а 114 без возачка дозвола

„Во текот на вчерашниот празничен ден (01.05.2025), а како резултат на редовните сообраќајни контроли што ги реализираат полициските службеници од сите сектори за внатрешни работи на патиштата низ земјава, од вкупно 613 издадени платни налози дури 132 прекршоци се однесуваат за возачи кај кои после алкотестирање било утврдено недозволено количество на алкохол во крвта. Воедно биле откриени и 114 учесници во сообраќајот кои што немале возачка дозвола“, велат од МВР и додаваат:Инаку согласно одредбите од Законот за безбедност на сообраќајот на патиштата 115 прекршоци се однесуваат на непочитување на пропишаната брзина на движење, 42 мерки за недозволено паркирање, додека пак прекршочно се казнети уште 37 лица кои не користеле сигурносен појас, изречени се 10 мерки за возачи на мотоцикл за неносење заштитна кацига како и седум санкции за возачи кои што говореле на мобилен телефон при возење.Исто така а согласно Законот за возила, 24 возила биле отстранети заради тоа што биле нерегистрирани, а четири возила заради техничка неисправност.Сообраќајните контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта.

Македонија | пред 1 година

Македонија падна за шест места на Индексот за слобода на медиумите, ситуацијата е „задоволителна“

Македонија е позиционирана на 42. место во светот според Индексот за слобода на медиумите на Репортери без граници за 2025 година, што е пад од шест места во однос на лани кога беше 36-та.Земјава и покрај забалежаниот пад, сепак, по Словенија која е на 33 место и Црна Гора 37, е повисоко рангирана од останатите држави од регионот.Хрватска е 60-та, Бугарија 70-та, Албанија е на 80 место, Босна и Херцеговина на 86, Грција на 89, Србија на 96 и Косово на 99.Репортери без граници  ја оценува состојбата со слобода на медиумите во земјава како „задоволителна“.- Иако новинарите не работат во непријателска средина, широко распространетите дезинформации и недостатокот на професионализам придонесуваат за намалување на довербата на општеството во медиумите, што ги изложува независните медиуми на закани и напади. Исто така, владините претставници имаат тенденција да имаат лоши и понижувачки ставови кон новинарите, се наведува во општата оценка за Македонија.Оценката на Репортери без граници за земјава се базира на неколу индикатори - Медиумски пејзаж, Политички контекст, Правна рамка, Социокултурен контекст, Безбедност.Медиумски пејзажИако телевизијата е доминантен извор на информации, онлајн медиумите играат важна улога. Сепак, мора да се направи разлика помеѓу професионалните онлајн редакции кои вработуваат новинари и објавуваат оригинална содржина и индивидуалните портали кои плагираат и копираат и лепат содржина. Исто така, постои голем јаз помеѓу користењето и довербата: најгледаните телевизиски станици - Алсат, Сител, МТВ1, Канал 5 - имаат низок индекс на доверба.Политички контекстЦелокупната средина останува поволна за слободата на медиумите, но владините агенции не се многу транспарентни, а критичкото новинарство е сè повеќе предмет на напади. Поради силната политичка поларизација, медиумите можат да бидат под притисок од властите, политичарите и бизнисмените и на национално и на локално ниво. Двете најголеми партии (на власт и во опозиција) создадоа паралелни медиумски системи врз кои го вршат своето политичко и економско влијание. Јавниот радиодифузен сервис нема уредувачка и финансиска независност.Правна рамкаИако Уставот гарантира слобода на говор и забранува цензура, земјата бавно го хармонизира законодавството за медиуми со стандардите на Европската Унија, на која има намера да се приклучи. Процедурите на SLAPP тужбите служат како инструменти за заплашување и притисок врз независните медиуми. Новиот закон со кој повторно се овластуваат националните и локалните власти да се рекламираат во приватни медиуми предизвика загриженост за можно поврзано влијание.Економски контекстИако одредени видови медиумска концентрација се забранети со закон, уредничкиот персонал на некои од главните телевизиски канали е изложен на економски притисоци од нивните сопственици. Државното финансирање е ограничено и нетранспарентно, а независните медиуми во голема мера се потпираат на донатори. Странските грантови базирани на проекти придонесуваат само за опстанок, но не и за понатамошен развој. Новинарството е многу несигурна професија. Некои медиумски куќи се подложни на влијание од страна на маркетинг агенциите.Социокултурен контекстИако нема јасни ограничувања во социјалната и културната средина што влијаат на слободното новинарство, социјалните медиуми и дигиталната сфера генерално го фаворизираат ширењето на дезинформации и сајбер закани. Во комбинација со ниските професионални стандарди, тие придонесуваат за намалување на јавната доверба во медиумите и го отвораат патот за напади врз новинари врз основа на пол, етничка припадност или религија.БезбедностНеколку инциденти го намалија чувството на безбедност на новинарите, вклучувајќи палења на нивниот имот и случаите на полициско вознемирување. Од една страна, беше назначен специјален обвинител за да се занимава со случаи на напади врз новинари, а се разгледува и отворањето слични канцеларии низ целата земја. Од друга страна, новинарите што известуваат за обвинителите се соочуваат со значителен притисок.Индексот за слобода на медиумите на Репортери без граници за 2025 година опфаќа 180 земји во светот.

Македонија | пред 1 година

Девет месеци не е утврдено дали се исправни инсталациите на објектот каде загина младиот Љупчо Лешко

Девет месеци се испитува дали некој има вина за смртта на младиот диџеј Љупчо Лешко, кој загина од струен удар во приватен објект во Радишани, каде пуштал музика. Обвинителството и натаму без одговор на прашањето на „Скопје1“ - дали до овој момент има осомничени лица. Истовремено, и натаму се вршат вештачењата, по кои треба да се донесе јавнообвинителска одлука. Сомнежите се дека имало проблеми во инсталациите на објектот, каде исто така имало и базен. Токму тоа се испитува од почетокот на истрагата до сега, а се прават и распити.„Во конкретниот предмет, со цел испитување евентуална одговорност, по наредба на јавен обвинител извршени се повеќе вештачења, дополнувања на вештите наоди, мерења на заземјувањето и проверки на инсталациите на објектот. Во моментов се преземаат други дејствија на распити, по што ќе биде донесена јавнообвинителска одлука“, велат од Обвинителството за „Скопје1“.Претходно, адвокатот Владимир Туфегџиќ, кој е адвокат на родителите на загинатиот Љупчо, а кои очекуваат правда, рече дека истрагата треба да биде насочена кон сопственикот и менаџерот на објектот, бидејќи според него, го издавале без одобрение. Алармираше дека има крупни пропусти и од полицијата.„Во конкретниот случај како адвокат на оштетеното семејството сметам дека постои основано сомневање за сторено кривично дело Тешки дела против општата сигурност и истражната постапка во оваа смисла треба и мора да биде насочена кон сопственикот на објектот како и кон лицето кое го менаџирало објектот преку позната инстаграм адреса со издавање за настани на кои биле собрани поголем број луѓе и со ставање на неисправна и неиспитана музичка опрема на располагање, без одобрение и согласност од надлежен орган“, рече Туфегџиќ за „Скопје1“, пред неколку месеци.Родителите пак, пред два месеци, посочија дека истрагата е претворена во турска серија.„Во случајот кој го водите во предистражната постапка која веќе премина во турска серија ние тврдиме дека нашиот син не е починат во несреќен случај туку во причинско-последичен случај заради неисправност на објектот“, вели во објавата Кети Лешко, мајка на загинатиот Љупчо дополнувајќи со: „Обвинителке, кабелот не е крив“.Љупчо Лешко работеше како ди-џеј. Критичната вечер кога загина, бил на приватен објект во Радишани. Таму имало две роденденски забави. Тој бил најмен од еден од славениците. Во текот на вечерта, кога се допрел на мискетата, го удрил струен удар, а починал на лице место.Семејството во два наврати зборуваше за ова во „Претрес“:?t=4877

Македонија | пред 1 година

Избрани зетот и невеста за Галичката свадба: „Да се ќердосает, од небо да им врне од земја да им никне!“

Овогодинешните зет и невеста за Галичката свадба се Јован Филипоски и Лилјана Михајлоска!„Јован, потомок на галичкото семејство Филипоски, уште како дете чекорел низ Галичник облечен во носија, сонувајќи еден ден да ја води свадбата. Од најрана возраст активно учествува во сите обичаи. Неговата избраничка, Лилјана, веќе ја почувствувала магијата на Галичката свадба во 2022 година и ова лето ќе заигра во улогата на невеста – со срце полно љубов и почит кон традицијата“, велат од МЗ Галичник и додаваат:„Во срцето на Галичник, под сенката на Бистра, секое лето љубовта добива посебна форма. Зетот и невестата не се само млад пар – тие се симболот на вековната традиција, на непрекинатото предание што низ генерации се пренесува со чест и гордост. Тие чекорат низ Галичник не само како двајца вљубени, туку како чувари на обичајот. Секое движење, секој поглед, секоја песна – сè е длабоко вкоренето во духот на Галичник.Манукот ја носи гордоста на предците, додека мануката со раскошната носија ја раскажува приказната за момичките од овие планински височини – достоинствени, вредни, горди и полни со љубов. Заедно, тие не се само пар – тие се огледало на Галичник. Во нивниот поглед се препознаваат љубовта и ветувањето дека традицијата ќе продолжи. И токму затоа, секој што ќе ги види, не гледа само свадба – туку гледа историја што живее. Да се ќердосает, од небо да им врне од земја да им никне!“.

Магазин | пред 1 година

ДПМНЕ се врати – слободата на медиумите замина, медиумите мета на притисок, вели СДСМ

„Падот на Македонија за 6 места на Индексот за слобода на медиумите за 2025 година, објавен од „Репортери без граници“, е уште еден алармантен показател за погрешната насока во која оди државата под власта на ДПМНЕ“, велат од СДСМ и додаваат:Репортери без граници оценуваат дека независните медиуми се изложени „на закани и напади“ и констатира дека владините функционери имаат тенденција да имаат “лоши и понижувачки ставови кон новинарите“.Наместо да работат на унапредување на демократските стандарди, Владата предводена од ДПМНЕ се враќа на старите методи на контрола, притисоци и страв.Секогаш кога ВМРО-ДПМНЕ е на власт, слободата на медиумите се гуши, новинарите се ставаат под притисок, а медиумскиот простор се затвора. Оваа тенденција повторно се потврдува.Слободата на медиумите е темел на секое демократско општество и СДСМ ќе продолжи да се бори против оваа регресија што ја спроведува ДПМНЕ.Медиумските слободи не смеат да бидат жртва на партиските апетити и авторитарните амбиции на ДПМНЕ.

Македонија | пред 1 година

Вучиќ: Ќе се сретнам со Трамп, Путин и Си. Кој друг може да го направи тоа?

Српскиот претседател Александар Вучиќ потврди дека ќе отпатува во Москва на 8 мај за да го одбележи Денот на победата, и покрај критиките од Западот.„Му ветив на Путин пред осум месеци и си стојам на зборот. Мојот збор значи нешто. Не одам од каприц, туку од почит и личен интегритет. Одам, освен ако не се случи нешто драстично или не добиеме сериозни закани“, рече Вучиќ.Тој додаде дека следните 15 до 20 дена се клучни за Србија, не само поради посетата на САД, туку и поради најавените пристигнувања на европски претставници во Белград. „Ќе ми кажат да не одам во Москва, но нема да ме убедат. Тврдоглав сум“, рече тој со насмевка.Вучиќ се осврна и на наводните најави за санкции од Брисел за лидерите кои ќе присуствуваат на церемонијата во Москва: „Сите во Брисел само мене ме споменуваат. Фицо, Си Џинпинг, Лула, никој не е тема. Само што ќе правиме со Вучиќ? Тоа е веќе опсесивно.“Вучиќ нагласи дека останува посветен на европскиот пат на Србија и покрај сите притисоци. „Мојот мандат наскоро завршува. Со или без мене – Србија ќе остане на европскиот пат. Тоа им го ветивме на граѓаните“, рече тој.Тој исто така рече дека нема да ја напушти политиката под притисок однадвор: „Ако заминам, тоа ќе биде по моја слободна волја. Ако некој ме отстрани од странство – тоа би бил најголем срам“.Вучиќ рече дека планира да му го врачи орденот на рускиот патријарх Кирил на 8 мај и дека се надева на кратка средба со кинескиот претседател Си Џинпинг. „Замислете, билатерална средба со американскиот претседател, потоа со рускиот и кинескиот. Кој друг може да го направи тоа?“, рече Вучиќ, додавајќи дека тоа „го подигнало меѓународниот углед на Србија“.Тој, исто така, коментираше за можните обвинувања од домашната јавност за тоа: „Премногу е доцна за обоена револуција. Тој воз помина – веќе во февруари. Во март, протестите веќе стивнуваа, дури и во Белград“.Вучиќ рече дека ќе ги штити интересите на Република Српска (РС) во секое време, но почитувајќи го територијалниот интегритет на Босна и Херцеговина.„Во разговорите со американските претставници, ги истакнав двојните стандарди, тие нè бомбардираа кршејќи ја Повелбата на ОН, а сега се огорчени од истите работи на друго место“, рече тој.Тој, исто така, го критикуваше ставот на меѓународната заедница кон Косово и РС: „Некои во Сараево велат дека Косово е независно, а кога Додик не прифаќа нелегална одлука, тој веднаш е криминалец. Ова се двојни стандарди“.

Свет | пред 1 година

(Видео) Масовен украински напад врз Крим

Руското Министерство за одбрана објави дека синоќа системите за противвоздушна одбрана собориле вкупно 121 украински дрон над окупираниот украински полуостров Крим и неколку руски региони. Според локалните канали на Телеграм, експлозиите одекнале во неколку населени места на полуостровот.Според руското Министерство за одбрана, над Крим биле соборени 89 дронови, додека над Црното Море биле уништени 23. Дополнително, тврдат тие, четири дронови биле соборени над Краснодарската област, два над Орјолската област, по едно над Брјанската и Белгородската област и уште едно над Азовското Море. Каналот на Телеграм за кримски ветер објави експлозии во Севастопол, Џанкој, Саким, Новофедоровка и Кача, каде што се наоѓаат воени воздухопловни бази. Тие објавија и неколку видеа на кои се прикажани детонации и фотографија од пожар во селото Ухлове, во близина на базата во Кача. Каналот наведува дека „нешто почнало да гори по дејството на руската противвоздушна одбрана“.Информацијата за експлозиите ја потврди и Михаил Развожаев, гувернерот на Севастопол, кој беше назначен од Москва. „Гласните звуци што ги слушаат жителите се резултат на одбивањето на нападот со беспилотни летала од страна на нашите сили. Според првичните информации, седум беспилотни летала се соборени над морето, далеку од брегот“, објави Развожаев кратко по 2 часот наутро.Околу еден час подоцна, во 3 часот наутро, тој објави дека „руската флота во соработка со воздушната одбрана одбива голема комбинирана офанзива врз Севастопол од морскиот правец на ’ртот Херсонес, Севастополскиот залив, Каја и Балаклава“.„Досега не е оштетен ниту еден објект во градот или во водите на Севастопол“, тврди тој.

Свет | пред 1 година

Трамп го намалува финансирањето на јавните медиуми

Белата куќа соопшти дека Доналд Трамп потпишал извршна наредба со која се намалува финансирањето за NPR и PBS, што е најнов обид на американскиот претседател да го користи федералното финансирање како средство за влијание врз институциите што ги не одобрува.Наредбата ѝ наложува на Корпорацијата за јавно радиодифузија (CPB), која ги распределува средствата на PBS и NPR, да „прекине со директното финансирање“ за нив, според текстот на наредбата објавена од Белата куќа во четврток навечер. Медиумите се означени како партиски и пристрасни.„Управниот одбор на CPB ќе го прекине постојното директно финансирање во најголема можна мера дозволена со закон и ќе одбие да обезбеди идно финансирање“, се вели во наредбата.И NPR и PBS претходно предупредија дека обидот на Трамп да го намали нивното финансирање ќе ги наруши основните медиумски услуги и ќе има „разорно влијание“ врз Американците кои се потпираат на нив за веродостојни локални и национални вести, вклучително и за време на вонредни состојби.Администрацијата на Трамп ги етикетираше повеќе институции во академијата и медиумската индустрија, од Харвард и Колумбија до NPR и PBS, како левичарски, марксистички, пристрасни и „разбудени“ и се закани дека ќе го намали финансирањето. Активистите за човекови права изразија загриженост за заканите врз слободата на говорот и академската слобода.Откако ја презеде функцијата во јануари, Трамп и неговиот сојузник, милијардерот Илон Маск, започнаа кампања за намалување на трошоците што резултираше со распуштање и обид за распуштање на разни агенции и отпуштање на повеќе од 200.000 федерални вработени.Администрацијата на Трамп се обидува да ги затвори „Гласот на Америка“, „Радио Слободна Азија“ и радио и телевизиските мрежи MBN кои емитуваат вести од Блискиот Исток, чии вести се финансирани од владата. Федерален судија ѝ наложи на администрацијата на Трамп кон крајот на април да ги запре тие напори.Извршната наредба на Трамп од четврток има за цел да го запре индиректното финансирање за NPR и PBS со тоа што бара од CPB да обезбеди „дека носителите на лиценци и дозволи на јавните радио и телевизиски станици, како и сите други приматели на средства од CPB, не користат федерални средства за NPR и PBS“.CPB ја тужеше Белата куќа во понеделник откако Трамп се обиде да отпушти тројца од петте членови на одборот. Непрофитната корпорација е создадена од Конгресот во 1967 година и финансира повеќе од 1.500 локално управувани јавни радио и телевизиски станици.Неколку медиуми објавија дека Белата куќа планира да побара од Конгресот да намали за 1,1 милијарда долари финансирање за CPB, износ што би бил еквивалентен на двегодишно финансирање.NPR има повеќе од 900 вработени, според нејзината веб-страница. Точниот број на вработени во PBS е нејасен, иако еден медиумски извештај вели дека имало повеќе од 550 вработени на крајот на 2022 година.

Свет | пред 1 година

Вработените во ЗОО последно земале плата во февруари: директорот Попов вика дека се изработени, министерот Љутков: Ја немаат ни доставено до нас!

Вработените од Зоолошка градина немаат земено плата од февруари, а менаџментот вика дека навремено ги изработиле за Министерството за култура да ги исплати. Министерот за култура, Зоран Љутков вели дека до нив уште не е доставена пресметка, која потоа оди на исплата во Министерството за финансии. За тоа време, вработената Тина Мицковска посочува дека од денеска нема да имаат ни здравствено.Едно празнично хаику за 1 Мај, последна плата ни беше за февруари, од утре ни здравствено ќе немаме, платата за март не знаеме до кога ќе ја нема, а мене ми се пие едно ладно пивце“, пишува Мицковска.Директорот на ЗОО-Скопје, Зоран Попов, за „Скопје1“, вели дека „Платите за вработените се навремено изготвени и исратени во Министерството за култура и Министерството за финансии, платите за сите културни установи во град Скопје ги обезбедува Министерството за култура“.Истовремено, од ЗОО-Скопје ојбаснуваат дека: „Од страна на Министерството за култура до нашата институција беше испратен мејл, врз основа на кој бараа сите јавни установи од културата да направат незаконски измени на пресметките за мартовските плати, без правна основа, спротивно на Колективниот договор. Зоолошка градина Скопје, како и другите јавни установи испрати официјални забелешки и прашања до Министерството бидејќи насоките во мејлот беа нејасни, но до денеска немаме добиено никаков одговор. Согласно насоките од Министерството за култура кои беа дадени за директорите истите се принудуваат да ги поништат старите решенија за плата и да изготват нови. Оттука јасно произлегува дека вината за неисплатените плати не е во менаџментот на Зоолошка градина Скопје како што во јавноста пробаа да излажат и манипулираат одредени поединци, за што ќе побараме јавно извинување“.Министерот Љутков пак, во изјава за „Скопје1“ е дециден: „Се уште немаат доставено ништо до нас“.„Не е точно, платите не се стигнати до нас. Не е можно за 125 институции да сме изработиле, а само скопските за - не. Точно е дека ние ги обезбедуваме, но треба да стигнат до нас. Пред да стигнат до нас, треба да се одобрени и од градоначалник. Инаку уште вчера добив информација од вработените од Зоолошка дека не ни почнала да се изработува“, вели Љутков.

Скопје | пред 1 година

Се подобрува состојбата на Панчо, преместен е од интензивна нега на оддел - има изгореници по телото и дишните патишта

Се подобрува здравствената состојба на Владимир Блажев-Панчо, член на бендот ДНК, кој имаше тешки повреди и беше хоспитализиран во болницата „Систина“, дознава „Скопје1“. Според неофицијални информации, по повеќе од 40 дена на интензивна нега и под апарати, сега е преместен на оддел, каде и натаму ќе се третираат неговите повреди односно изгорениците по телото и на дишните патишта. Тој е веќе 46 дена на болничко лекување, првично беше сместен на Клиничкиот центар во Скопје, а потоа, преместен во приватната болница.Според последните соопштени информации, во македонските болници се уште се лекуваат тројца пациенти, меѓу кој е Блажев-Панчо. Од Бугарија, пред три дена, тројца пацинети беа вратени за македонија и тоа на возраст од 19, 21 и 48 години. Сите во стабилна состојба.Обвинителството на 21 март соопшти дека и Блажев-Панчо е осомничен за пожарот во дискотеката „Пулс“, а поради внесување на пиротехниката.„За внесување и употреба на пиротехничките средства е осомничен и еден член на музичката група. Постои сомнение дека членовите на бендот околу 02:32 часот како дел од сценскиот настап и ефект ги активирале експлозивните материи – пиротехнички фонтани кои исфрлале искри во правец на плафонот над сцената од кои веднаш се опожарил кровниот дел од објектот и пожарот се проширил по целиот објект“, изјави Коцевски.По несреќата, има 62 загинати лица и 197 лица беа повредени. Осум лица од тимот на „ДНК“ се помеѓу загинатите во пожарот во Кочани. Загина вокалот Андреј Ѓорѓиески, музичарот Филип Стевковски, гитаристот Андреј Коларов, тапанарот Ѓорѓи Ѓорѓиев, придружниот вокал Сара Пројковска, тонецот Игор Велков, бит-боксерот Мартин Атанасовски – Буцо и Александар Ефремов, фотограф на „ДНК“.

Македонија | пред 1 година

Уапсен полицаец во Струмица: при проверка на пиштол кој требало да го врати, испукал куршум

На 30.04.2025 во 10.28 часот во СВР Струмица полициски службеници од СВР Струмица го лишиле од слобода А.Б.(52), полициски службеник, кој се сомничи дека сторил кривично дело „предизвикување опшгта опасност“ по чл. 288 од КЗ.„На 30.04.2025 во службена просторија на СВР Струмица во која биле присутни и други полициски службеници, при проверка на службен пиштол кој требало да го раздолжи, А.Б. испукал еден куршум со пиштолот. За настанот биле запознаени началникот на СВР Струмица, Одделот за внатрешна контрола, криминалистички истраги и професионални стандарди при МВР и јавен обвинител од Основното јавно обвинителство за гонење на организиран и сериозен криминал Скопје“, велат од МВР.По документирање на случајот, против А.Б. ќе биде поднесена соодветна пријава.

Македонија | пред 1 година

„Луксузот ваш е од трудот наш“, им рекоа работниците на пратениците, па им го свртеа грбот и ги поздравија со „уа“

Со извици „уа, уа“, дел од работениците ги поздравија пратениците од пред Собранието, иако тие не беа во зградата. Симболично се свртија со грб кон законодавниот дом, за да им покажат како е кога работникот ќе им го заврти грбот, макар и симболично. Им порачаа дека се лускузираат со парите од граѓаните и побараа поголеми плати, како и платен превоз и хранарина.„Во најважните моменти на работниците, најголем дел од овие позади мене (пратениците) се на одмор.УА! За жал, до денеска 1 мај, Денот кога ја одбележуваме работничката борба, дел од овие донесоа закон за да имаме 12 часовен работен ден, нешто што го снемало во светот во 1986 година. Жалосно е да уживаат привилегии, трошоци за превоз поголеми од минималната плата, собраниско бифе поевтино од работничка менза, 79 отсто зголемени плати, а да одбиваат да донесат измени на Законот на минимална плата, да имаат право работниците за превоз и храна, зголемување на платите. Бараме најбрзо што може да покажат дека се и со работниците. Денеска на оваа страна од барикадите сме ние кои бараме достоинствена плата за достинствена работа, а од другата страна се тие кои уживаат привилегии. Луксузот ваш е од трудот наш. Макар и симболично, да им го свртиме грбот како што им го вртам јас, за да почувствуваат како е кога работникот ќе им го заврти грбот“, рече Трендафилов, а присутните се свртија со грб кон Собранието.

Македонија | пред 1 година

(Видео) По последната патарина кај Гостивар, се стои во место: „Имам 41 година, ваква гужва немам видено“

Од утринава, големи гужви има и на автопатот Скопје-Гостивар. Најдолги задржувања има по последната патарина, каде колоната возила е споена од патарината до семафорите, пред да се тргне кон Стража. Граѓани посочуваат дека буквално се стои во место.„Имам 41 година, ваква гужва немам видено на патарината пред Маврово“, вели граѓанин заглавен во гужвата.Други возачи јавуваат дека колоната е од Гостивар до Маврово.

Македонија | пред 1 година

(Видео) Гужви за влез во Грција, колони возила на граница

Големи колони на возила можат да се забележат вечерва на граниниот премин „Богородица“ кон Грција. Во четири ленти, стотици возачи се обидуваат побрзо да минат граница. Иако петок е работен ден, голем дел од граѓаните го земале за слободен, па си споиле од четврток до недела да поминат на море.Како што известуваат од АМСМ интензитетот на сообраќај на патните правци надвор од градските средини е умерен, додека на граничните премини од македонска страна нема подолги задржувања за влез и излез од државата.Гужви се очекуваат и утре.

Македонија | пред 1 година

Едни на протест, други на скара - синдикатите и на работничкиот празник се поделија

И на празникот на трудот, синдикатите си тргнаа, секој на своја страна. Едни ќе протестираат, други ќе празнуваат со скара.Mеѓународниот ден на трудот, Сојузот на синдикати на Македонија (ССМ) и Конфедерацијата на слободни синдикати (КСС) повторно се судрија околу тоа, кој, како и колку ги штити правата на работниците.Сојузот на синдикати на Македонија денеска ќе го одбележи Меѓународниот ден на трудот 1 Мај со синдикален протест барајќи повисоки плати и подобри услови за работа. Претседателот на ССМ, Слободан Трендафилов, како што најави вчера, протестот ќе започне во 11 часот од пред Работничкиот дом и ќе продолжи до Собранието и пред Владата, посочувајќи дека се бара зголемување на минималната плата на најмалку 500 евра и зголемување на сите останати плати за 100 евра, почитување на колективните договори и зголемување на платите на вработените согласно придобивките од истите.„Протестот е начин на Први мај да изразиме незадоволство од висината на платите кои ги примаат работниците во Македонија, а како што многупати сме кажале досега се најниски во регионот, а не зборуваме и за пошироко. Сојузот на синдикатите на Македонија ги повикува сите кои му мислат добро на работникот во текот на утрешниот ден, 1 мај во 11 часот да ни се приклучат на работничкиот протест на рутата на движење-Собрание-Стопанска комора-Влада“, повика Трендафилов.Конфедерацијата на слободни синдикати (КСС) нема да учествува на утрешниот протест во организација на Сојузот на синдикати на Македонија (ССМ), а по повод 1 Мај, рече денеска нејзиниот претседател Благоја Ралповски.„Утре ќе бидам дома со семејството. Сакаме да ги решаваме проблемите низ дијалог. Всушност, секогаш решавањето на проблемите на крајот доаѓа на маса, низ социјален дијалог. Сега сметаме дека имаме добар социјален дијалог и затоа на ваков начин го одбележуваме 1 Мај. Каде го гледаме добриот социјален дијалог? И без репрезентативни синдикати, на ниво на граѓански синдикати, разговаравме повторно со Владата и имаше подготвеност од нејзина страна на 1 мај да почне повторно и поголемо зголемување на платите во јавниот сектор. Но, сега ќе ги прашате оние што излегуваат утре на протест зошто одбиваат да се согласат и зошто вработените во министерствата, агенциите и управите нема да земат зголемување на платите од 1 мај“,рече тој.Меѓународниот ден на трудот е државен празник во над 80 земји во светот.

Македонија | пред 1 година

(Видео) Скара во Грција: илјадници граѓани со часови чекаат на граница

Гужвите за влез во Грција, на граничниот премин „Богородица“ ги имаше и во текот на ноќта, како и утринава. Чекаат автобуси и автомобили, во седум километарски колони. Според АМСМ чекањето на границата е 30 минути, но во пракса се чека и до два часа, јавуваат патници.„Интензитетот на сообраќај на патните правци надвор од градските средини е зголемен. Се бележи зголемена фреквенција на возила на ГП Табановце за влез и на ГП Богородица за излез од државата, времето е на чекање е околу 30 минути. На останатите гранични премини од македонска страна нема подолги задржувања за влез и излез од државата“, стои во известувањето од АМСМ.На границата голем дел од возилата се со српски регистарски ознаки, бидејќи кај нив, нереботни денови се 1 и 2 мај, за разлика од Македонија каде неработен е само 1 мај. Гужвите започнаа од вчера.

Македонија | пред 1 година

Димитриевски и Дуковска станаа кривични судии, Маркова за граѓанска судијка во Врховен

Членовите на Судскиот совет денеска на седница ги избраа Зоран Димитриевски и Татјана Дуковска за кривични судии на Врховниот суд. Димитиревски и Дуковска се судии од Апелациониот суд – Скопје. На седницата беше избрана и Маја Маркова за граѓански судија на Врховниот суд, но не се изврши избор на кандидатите Јетмир Ајдини Бошњаков, Наташа Савовска Димитровска од Апелационен суд Скопје и на Рафиз Идризи од Апелационен суд Гостивар.Како што информираше на почетокот на седницата претседателот на Судскиот совет, Александар Камбовски, Судскиот совет објави оглас за избор на шест судии на Врховниот суд, и тоа три судии за граѓанска област и три судии за кривична област, објавен во Службен весник. Како што рече, по спроведената постапка, од страна на Комисијата при Советот, поднесен е извештај со конечна ранг листа на кандидатите.Известителот и претседателот на Комисијата, Павлина Црвенковска рече дека листата кандидати за судии во кривичната област е составена од двајца кандидати Зоран Димитриевски и Татјана Дуковска, судии на Апелационен суд Скопје.По однос на останатите кандидати за избор на судии, Маја Маркова, Јетмир Ајдини Бошњаков, Наташа Савовска Димитровска и Рафиз Идризи, Весна Дамева побара да се поништи огласот и итно да се распише нов оглас.

Македонија | пред 1 година

Државната агенција МИА доби нов директор

Десет месеци по промената на власта државната агенција МИА доби нов директор и претседател на Управниот одбор. Тоа е новинарот Дарко Јаневски, кој има работено во неделникот „Фокус“, во „Нова Македонија“, во „Вечер“. . Од 2018 до 2025 година е уредник на порталот „Денешен“.Јаневски работи како главен и одговорен урендик на дневниот весник „Дневник“ во периодот од 2013 до 2017 година. Од 2017 до 2018 година е уредник и водител на политичката ТВ емисија „Без ракавици“ на ТВ Алфа.Надзорниот одбор на денешната седница ја избра Пандорка Арсовска Гацова за член на Управниот одбор, задолжен за генерален сервис на вести. Арсовска Гацова е искусен долгогодишен новинар во МИА, која и претходно била член на Управниот одбор и уредник на Внатрешна редакција во периодот од 2006-2017 година.Надзорниот одбор на денешната седница го констатира престанокот на мандатот на досегашниот генерален директор и претседател на УО на МИА, Драган Антоновски.На седницата беше констатиран и престанокот на мандатот на членот на УО, задолжен за генерален сервис на вести, Ана Цветковска.

Македонија | пред 1 година