СДСМ обвинува за корупциска мрежа и најавува нова дигитална алатка против криминалот

СДСМ денеска обвини дека е откриена, како што велат, корупциска мрежа преку која милиони евра од јавните средства завршувале кај компании блиски до власта, преку наместени тендери. Според партијата, додека „тече грабеж на народот“, државата доцни со повеќе видови исплати.„Додека тече грабеж на народот каснат исплатите за породилното, доцни повратот на ДДВ, доцни социјалната помош, се намалува буџетот за болните од ретки болести, нема пари за поголеми плати и пензии“, наведува СДСМ, додавајќи дека граѓаните „едвај врзуваат крај со крај“, а власта се „богатела преку наместени тендери и сомнителни зделки“.Според изнесените податоци, една фирма добила 161 тендер во вредност од 5,3 милиони евра, а друга компанија, основана лани и со двајца вработени, добила тендери во вкупна вредност од 9 милиони евра. СДСМ го оцени ова како „организирано испумпување на граѓаните“, на кое, според партијата, мора да му се стави крај.Од партијата најавуваат и нова дигитална платформа како алатка во борбата против корупцијата и криминалот.„Граѓаните ќе стават крај на криминалот и корупцијата. Власта ќе ја вратиме назад во рацете на граѓаните“, се наведува во соопштението.СДСМ додава дека „не е крај кога ќе каже Мицкоски, туку граѓаните кажуваат кога е крај“, упатувајќи порака дека „сите ќе одговараат“

Македонија | пред 1 седмица

(Фото) Скопје ја донесе празничната магија: новогодишната елка блесна на градскиот плоштад

Градот Скопје вчера ја одбележа свечената најава на празниците со осветлување на новогодишната елка и отворање на Божиќниот маркет. Настанот, кој собра огромен број жители и деца, градоначалникот Орце Ѓорѓиевски го оцени како пресвртница во враќањето на празничниот дух во главниот град.Градот убав повторно блесна!Од срце ви благодарам, драги скопјани, најдраги дечиња, за масовното присуство, за радоста и за прекрасната енергија што вечерва ја споделивме заедно.По години сивило, Скопје повторно блесна, свечено ја осветливме новогодишната елка и официјално го отворивме Божиќниот маркет, со што симболично го означивме почетокот на празничната магија во нашиот главен град.Со оваа церемонија, Скопје направи значаен чекор напред кон визијата да се развива рамо до рамо со современите европски градови, создавајќи настани што носат позитивна енергија, заедништво и радост за сите генерации.Оваа вечер ќе остане запишана во историјата и ќе прерасне во убава традиција.Ви благодарам што со вашето присуство ја направивте оваа ноќ навистина посебна.Време е Скопје повторно да живее со светлина, насмевки и празнична топлина.

Скопје | пред 1 седмица

Матичарите штрајкуваат: денеска нема изводи, нема запишување бракови – револтот зовре

Граѓаните денеска нема да можат да извадат документи од Управата за водење на матични книги, затоа што вработените ќе бидат на своите работни места, но целосно ќе ги прекинат обврските како знак на револт кон институциите што, како што велат, не ги исполниле дадените ветувања и не го потпишале колективниот договор.Од Независниот синдикат на Управата се децидни: ако нема поместување, следниот чекор може да биде генерален штрајк.Потпретседателот на синдикатот, Насер Џемаили, предупредува дека состојбата со кадарот и платите одамна е алармантна:„Никому не му е гајле за вработените во Управата за водење матични книги. Ниту една институција не реагира на нашите барања. А ние сме една од најважните управи во државата – без нас нема изводи, нема запишување бракови.“Во Управата се вработени околу 350 лица, најголем дел од нив земаат минимална плата, а хроничниот недостиг од работници постојано го оптоварува системот. Според Џемаили, недостигаат над 90 вработени, што доведува до сè почести одливи на кадар – токму поради ниските примања.Штрајкот продолжува додека не се обезбеди решение, а граѓаните денеска ќе се соочат со целосен застој во издавањето на најосновните лични документи.

Македонија | пред 1 седмица

Што правеле на Филипините таткото и синот кои го изведоа масакрот на Бонди? Нови детали откриваат можен мотив за нападот

Австралиските и филипинските власти интензивно ги реконструираат последните движења на Саџид и Навид Акрам — татко и син кои го изведоа терористичкиот напад на плажата Бонди во Сиднеј, при што загинаа 16 лица, а околу 40 беа повредени. Испливуваат нови сознанија за нивниот едномесечен престој на Филипините непосредно пред нападот.Истрагата покажува дека двајцата отпатувале од Австралија на 1 ноември и останале на Филипините до 28 ноември, информација што ја потврди имиграциската служба во Манила. Последната точка од нивното патување била градот Давао, на југоистокот од островот Минданао — регион каде што со години се активни исламистички милитантни групи, особено во посиромашните делови на централниот и југозападниот дел од островот.Според австралиските медиуми, кои се повикуваат на безбедносни извори, токму на Филипините таткото и синот наводно поминале „воена обука“. Иако оваа теза доминира во јавните извештаи, ни австралиските ни филипинските власти засега не ја потврдуваат официјално.Полицискиот комесар на Нов Јужен Велс изјави дека се испитува секој аспект од нивниот престој:„Се разгледуваат причините за патувањето, целите и сите локации на кои престојувале“.И филипинската армија излезе со став дека засега нема докази дека двајцата учествувале во било каков вид воена активност, но потврди дека истрагата продолжува.Пасошките податоци откриваат дека Саџид Акрам, кој има 50 години, патувал со индиски пасош, додека 24-годишниот Навид влегол во земјата како австралиски државјанин. Саџид живеел во Австралија од 1998 година, имал дозвола за огнено оружје поради рекреативен лов и бил член на стрелачки клуб.Би-би-си објави дека двајцата биле поддржувачи на групата „Исламска држава“ во Сиднеј, а симболи и знамиња со идеолошка содржина биле пронајдени во нивниот автомобил по нападот.Австралиската Еј-би-си дополнително открива дека Навид, иако роден во Австралија, уште пред повеќе од пет години бил испрашуван од полицијата поради врски со локална ќелија поврзана со ИД. Во тоа време било проценето дека не претставува закана и дека нема индиции за негово можно учество во насилство.Нападот на Бонди ја потресе цела Австралија, а граѓаните непрекинато му оддаваат почит на 15-те жртви и на претепаниот напаѓач кој загина на местото на инцидентот. Паралелните истраги што ги водат австралиските и филипинските служби имаат цел да утврдат дали нивното патување било дел од поширока мрежа на радикализација.

Свет | пред 1 седмица

Денеска пред пратениците разрешувањето на Коцевски и резолуцијата за миграциите

Денеска во Собранието се отвора една од поконфликтните точки на актуелната политичка агенда – на 76. седница пратениците ќе расправаат за предлогот за разрешување на Јавниот обвинител на Република Северна Македонија, Љупчо Коцевски, како и за резолуцијата поднесена од ВМРО-ДПМНЕ, ВРЕДИ и ЗНАМ, со која се осудуваат, како што се наведува, манипулациите на опозицијата и се потврдуваат политиките против нелегалната миграција.Иницијативата за разрешување доаѓа од Владата, која во образложението наведува низа сериозни забелешки за работата на Коцевски. Според извршната власт, тој направил тешки професионални пропусти во раководењето со Јавното обвинителство, постапувал спротивно на законските обврски и со своите дејствија го нарушил угледот на институцијата.Во предлогот се посочува и дека Коцевски неовластено изнесувал информации и податоци поврзани со судски предмети, со што, според Владата, ја прекршил законската обврска за заштита на тајноста на постапките. Дополнително, му се става на товар дека не постапувал во согласност со уставните и законските надлежности, како и со меѓународните договори што државата ги има ратификувано.Покрај разрешувањето на Јавниот обвинител, пратениците ќе се изјаснуваат и за резолуцијата за миграциските политики, со која владејачките партии бараат јасна политичка осуда на, како што наведуваат, обидите на опозицијата за манипулирање со прашањето за мигрантите.Седницата се очекува да отвори жестока расправа, со оглед на чувствителноста на темите и нивната директна поврзаност со правосудството и безбедносните политики на државата.

Македонија | пред 1 седмица

Европа и САД ги финализираат деталите на договорот за крај на војната во Украина: Формирање мултинационални сили се дел од пакет мерките

Деталите за безбедносните гаранции за Украина — кои треба да ја отворат патеката кон траен мир и крај на руската агресија — интензивно се усогласуваат меѓу европските лидери, Вашингтон и Киев. На синоќешната средба во Берлин, групата највисоки европски претставници првпат јавно потврди дека се разгледува формирање мултинационални сили предводени од Европа и поддржани од САД, како дел од поширокиот пакет мерки за стабилизирање на украинската држава по завршувањето на војната.Во заедничката изјава се нагласува дека овие сили би имале повеќеслојна улога: обнова на украинските вооружени капацитети, заштита на украинското небо и поддршка за побезбедни мориња, со можност да дејствуваат и директно на украинска територија. Со ова би се зајакнала оперативната способност на Украина во периодот по постигнувањето на мировен договор.Изјавата ја потпишаа претседателот на Европскиот совет Антонио Кошта, претседателката на Европската комисија Урсула фон дер Лајен, германскиот канцелар Фридрих Мерц, францускиот претседател Емануел Макрон, финскиот претседател Александер Стуб, премиерките на Данска и Италија Мете Фредериксен и Џорџа Мелони, како и премиерите на Велика Британија, Полска, Норвешка, Холандија и Шведска — Кир Стармер, Доналд Туск, Јонас Гар Сторе, Дик Схоуф и Улс Кристершон.Лидерите подвлекуваат дека безбедноста, суверенитетот и долгорочниот просперитет на Украина се составен дел од заедничката евроатлантска стабилност. Украинскиот народ, се наведува, мора да добие гаранции за независна иднина, ослободена од заканата од нова руска агресија.Посебно внимание е посветено на напредокот што го постигна американскиот претседател Доналд Трамп во рамки на своите напори да ги обликува предусловите за праведен и долготраен мир. Европските лидери ја поздравуваат неговата интензивна координација со тимот на украинскиот претседател Володимир Зеленски и со европските преговарачи.Тие изразуваат согласност да работат заедно со Трамп и Зеленски во дефинирање мировен договор што ќе ги заштити украинскиот суверенитет и европската безбедност. Во документот се потенцира „силната конвергенција“ меѓу САД, Европа и Украина.Како дел од договорот, државите се подготвени да обезбедат робустни безбедносни гаранции и економска поддршка за закрепнување на Украина, дополнети со обврска за долгорочна изградба на армиски капацитети. Според изјавата, Украина треба да задржи мирновременско ниво на вооружени сили од околу 800.000 лица, со цел да може ефикасно да одвраќа идни конфликти и да ја брани својата територија.

Свет | пред 1 седмица

СДСМ до ВМРО-ДПМНЕ: Нема да ви помине Катица, нема да ви поминат мигрантите за пари, народот ви подготвува крај“.

СДСМ реагира дека Кривичниот суд и официјално потврди дека на поранешната шефица на СЈО, Катица Јанева ѝ е одобрен условен отпуст од затвор.Отпустот започнува од 21.12.2025 година и трае до 21.08.2026 година. Од вкупната затворска казна од 7 години, дозволен е условен отпуст од 8 месеци.,,Овие факти и периодот токму сега и до летото наредна година, во целост го потврдува сценарио од стратегијата на ДПМНЕ кое целосно го разоткивме.Зошто сега?Затоа што темата со мигрантите за пари стана национална тема, корупциските скандали за наместени тендери покажуваат како се крадат 14,5 милиони евра преку 161 тендер, затоа што кога нема пари во буџетот за плати и пензии а граѓаните тоа го чувствуваат секој ден.Јанева треба да биде искористена како алатка на ДПМНЕ во нивната црна кампања и во нападите врз СДСМ.Нема да ви помине Катица. Нема да ви поминат мигрантите за пари. Нема да ви помине ниту едно сценарио за манипулација и дефокус. Народот ви подготвува крај“, велат од СДСМ.

Македонија | пред 1 седмица

Поевтинуваат горивата за два денари

Бензините и евродизелот од ноќеска на полноќ поевтинуваат за два денара по литар, а цената на екстра лесното масло за домаќинството се намалува за еден денар, одлучи денеска РКЕ. Со одлуката се врши намалување на малопродажните цени на нафтените деривати во просек за 2,09 проценти.Новата малопродажна цена на ЕУРОСУПЕР БС – 95 ќе биде 73 денари за литар, ЕУРОСУПЕР БС – 98 ќе се продава за 75, ЕУРОДИЗЕЛ БС (Д-Е V) за 66,5, а Екстра лесното масло за домаќинство (ЕЛ-1) за 65,5 денари за литар.Со одлуката на РКЕ за 0,248 денари за килограм се намалува и малопродажната цена на Мазутот М-1 НС и ќе изнесува 32,635 денари.Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат намалување кај бензините во просек за 4,932 отсто, кај дизелот за 4,357, кај екстра лесното масло за 1,790 и кај мазутот за 1,013 отсто. Курсот на денарот во однос на доларот по кој беа формирани цените со претходната пресметка е понизок за 0,1167 отсто.

Македонија | пред 1 седмица

Без огномет, Каролина, Тамара и македонски ѕвезди на дочекот на Нова година

Скопјани и сите добронамерници ќе ја пречекаат Новата 2026 година со голем музички спектакл на плоштадот „Македонија“.Ќе настапат Каролина Гочева, Тамара Тодевска, Лара и Пајак, Миле Кузмановски, Куку Леле Лина Пејовска.Деталите за новогодишната програма денеска ги соопшти градоначалникот на Скопје, Орце Ѓорѓиевски, на прес-конференција на која објави дека годинава градот се откажува од традиционалниот огномет и се стремат кон модерен и семеен концепт на прослава.Публиката ќе има можност да ги слушне и најталентираните скопски средношколци, кои ќе настапат со свои музички изведби и свои бендови. Во програмата се вклучени сите средни училишта ид Скопје.„За новогодишната ноќ јас инсистирав да настапат само домашни пејачи. Покрај програма за дочекот од наредните денови ќе има програма за деца, но и за млади. Фокусот ни е да направиме забава за младите и на тоа ќе работиме во наредните години“, рече Ѓорѓиевски.Со ребалансот на буџетот се издвоени средства за оваа намена, а единствениот трошок за градот Скопје е украсувањето, кое е помалку од 70.000 евра. Изведувачите ќе ги плати Државна лотарија.Новинарите на прес конференција прашаа дали ќе има албански изведувачи, скопскиот градоначалник одговори дека „музиката не познава вера и нација“ и ги повика сите на обединување.

Скопје | пред 1 седмица

Поезија, музика и дипломатија: Во амбасадата во Пекинг блесна мултимедијалниот настап на Маријана Котевска Георгиева и Тони Китановски

Во Амбасадата на Република Северна Македонија во Пекинг се одржа мултимедијален културен настан што го спои поетското творештво на Маријана Котевска Георгиева со гитарската уметност на реномираниот музичар Тони Китановски.Настанот го отвори амбасадорот Сашко Насев, кој ја истакна важноста од вакви културни содржини во продлабочувањето на соработката меѓу Македонија и Народна Република Кина.Публиката, во која присуствуваа амбасадори од повеќе земји, конзули, политички претставници, дипломати, медиуми и љубители на уметноста, со одушевување ја следеше неконвенционалната комбинација на две уметнички форми.Новата поетска збирка поезија на Маријна Котевска Георгиевс која ќе биде објавена во издание на „Арс Либрис публикации“, го носи насловот „Сè се случува кога не се случува ништо“.Поезијата се читаше на македонски, кинески и англиски јазик, бидејќи збирката, покрај македонското, ќе има и свое кинеско и англиско издание.

Магазин | пред 1 седмица

Македонска режисерка во срцето на Холивуд: Тамара Котевска на маса со Дикаприо, Дел Торо и елитата на филмската индустрија

Македонската документаристка Тамара Котевска се најде во ексклузивно друштво во Холивуд, на приватен ВИП-настан rezervиран само за триесетина водечки имиња од филмската индустрија. Како членка на Американската филмска академија и гласач за Оскарите, таа беше единствената документарна авторка поканета на ручекот организиран по повод новиот филм на Пол Томас Андерсон „One Battle After Another“.Настанот ја собра актерската и продукциската елита, меѓу кои Леонардо Дикаприо, Бенисио дел Торо, Тијана Тејлор, Чејс Инфинити и Реџина Хол. Гостите разговарале за снимањето, за соработката со Андерсон и за тековната оскаровска трка.Во неформалниот дел од средбата, Котевска имала подолг разговор со Дикаприо, кој – како што вели таа – веднаш се сетил на „Медена земја“ и на нивната фотографија од 2020 година, направена за време на оскаровските номинации. Тој покажал посебен интерес за нејзиниот нов глобално наградуван документарец „Приказната за Силјан“.Интерес за филмот пројавиле и Бенисио дел Торо и Тијана Тејлор, особено поради темите за отпор, правда и борба против неправеден систем.„Да се градат односи и пријателства низ годините со холивудските ѕвезди кои ми биле најголемо влијание како дете да се посветам на филмската магија е како некаков чуден сон кој од секогаш се чинел недостижен. Но, кога си таму со нив во истата малечка просторија, делиш оброк заедно и гледаш колку се тоа обични луѓе кои минуваат низ истите трауми, искушенија, несигурности и притисоци со секој нов филм како и сите ние останатите филмаџии на планетава, тоа е едно особено чувство кое ги руши сите предрасуди и бариери дека нешто е невозможно да се достигне, вели Котевска.“

Магазин | пред 1 седмица

Бадникарски кум е бизнисменот Зоран Кондратенко, а здравичар музичарот Јаков Дренковски

Здружението на граѓани „Одбор за традиционална прослава на Бадник во Скопје“ ги претставија Кумот и Здравичарот за Бадник 2026 година. Кум е македонскиот претприемач во областа на енергетиката и спственик на компанијата Енерго Систем, Зоран Кондратенко, а здравицата ќе ја каже нашиот истакнат музичар Јаков Дренковски.Градоначалникот на општината Центар, Горан Герасимовски рече дека оваа манифестација се организира 33 години и дека му е чест што традицијата продолжува, што се почитува и од година во година се и приклучуваат голем број млади луѓе.Во недела (21.12.2025) напладне во месноста Краста, Одборот за прослава на Бадник во Скопје, ќе ги претстави Кумот и Здравичарот за Бадник 2026 и ќе ги соберат бадниковите гранчиња.Централната прослава е на 6 ти јануари на платото пред Соборниот Храм.

Македонија | пред 1 седмица

Гевгелија Мол ги отвори вратите – шопинг и забава под еден покрив

Официјално е отворена новата шопинг дестинација на југот – Гевгелија Мол, која ги обединува шопингот, забавата и моментите за релаксација под еден покрив.Во саботата, на отворањето на кое присуствуваа стотици гости и партнери на Молот, како и љубопитни граѓани и шопингхоличари, беше збогатено со забава и изненадувања за сите генерации.Дедо Мраз ги развесели и ги анимираше најмладите, музичкиот дел беше резервиран за Лара Иванова и Trinity Band, а имаше и диџеј сетови и отворено студио на Радио Урбан ФМ кои го направија отворањето уште повесело и за паметење.Молот, лоциран на еден километар од граничниот премин Богородица, на самиот автопат, се простира на 10.000 m² распоредени на три нивоа.Во Молот се наоѓа најголемото „Jumbo“ во Македонија, Duty Free / Travel Free продавница, Amore Mio – Luxury Brands Outlet со повеќе од 25 светски луксузни брендови како Armani, Balmain, Balenciaga, Gucci, Burberry, Pinko, Boss, Dsquared2, Dolce & Gabbana, Givenchy, Versace, Valentino, Michael Kors, Off-White, Moschino, како и M Outlet, кои дополнително ќе ја збогата понудата на центарот.Свој простор имаат и SOHO кафетерија, а љубителите на слатките задоволства ќе можат да уживаат и во Marfi macarons, како и во деликатесите на Vori од Гевгелија.Покрај модните брендови, во Гевгелија Мол се наоѓаат и VERO, спортските брендови Champion, Diadora и FILA, The Book Shop – книжарница со богата понуда за сите генерации, аптека, менувачница со Tax-Free услуга, продавница за накит, како и игротека и забавен парк за најмладите.Со отворањето, Гевгелија Мол се позиционира како нов центар за шопинг, забава и инспиративни моменти во регионот, комбинирајќи модерен амбиент, врвни брендови и динамична атмосфера за сите генерации.„Нашиот тим работеше посветено на овој проект, меѓу другото, анализирајќи ги потребите, но и желбите на граѓаните, при што внимателно го осмислувавме секој детал – од изборот на брендови до услугите и просторната поставеност. Верувам дека нашиот труд за кусо време ќе резултира со бројни задоволни посетители и дека секој кој ќе го посети Молот ќе може да ужива во модерниот амбиент, динамичната атмосфера и пред сè разновидната понуда за шопинг“, изјави Мимоза Маркова, менаџер на „Гевгелија Мол“.Гевгелија Мол ќе работи секој ден од 10 до 22 часот, односно до 20 часот во недела.

Македонија | пред 1 седмица

Димитриеска-Кочоска убедува: Трезорот работи, Буџетот е во одлична кондиција

Трезорот работи, се затвора на 31 декември, работите се извадени од контекст. Нема простор за паника, изјави денеска министерката за финансии Гордана Димитриеска - Кочоска по објавите дека трезорот се затвара на 15-ти месецов поради немање прилив и дека ќе бидат стопирани сите исплати.,,Ова прашање го следам деновиве и излезе од контрола. Не можам да ги разберам, поготово да доаѓа од опозиција која наместо да се средува во своите сопствени редови, до вчера беа власт и знае како функционира Трезорот. Трезорот работи. Друго е рокот што сме им го дале на институциите да ги достават налозите до трезорските канцеларии. Тоа значи секоја институција да ги достави налозите до 15-ти за да може да се организираме и да се следи исплатата со 31 декември”, рече Димитриеска.Појасни дека налозите ќе се примаат до 15-ти во месецов што не значи дека ако некој задоцни, дека нема да биде примен налогот.Во однос на информациите дека се доцни со исплатата на социјалните трансфери, министерката за финансии тврди дека во Трезорот не стојат налози за исплата, а доколку има задоцнување, тогаш тоа е во ресорните институции при подготовка на налозите.

Македонија | пред 1 седмица

Апелација пресече, 13 години затвор за Јованов, кој ја прегази Фросина

Апелациониот суд му ја зголеми казната на 13 години на возачот Васил Јованов, кој смртно ја прегази младата Фросина Кулакова во центарот на Скопје, кого Кривичниот суд го осуди на 12 години затворска казна.„Апелациониот суд Скопје во интерес на јавноста и медиумите информира дека, постапувајќи по кривичниот предмет КЖ-696/25, по одржана јавна седница на 06.10.2025 година, а по спроведено советување и гласање на нејавен дел од седницата на ден 27.10.2025 година, донесе пресуда со која ја уважи жалбата на Основното јавно обвинителство Скопје и ја одби како неоснована жалбата на обвинетиот В.Ј. Пресудата на Основниот кривичен суд Скопје ја преиначи во делот на кривичната санкција, на начин што обвинетиот В.Ј. од С. кој со првостепената пресуда е огласен виновен за кривично дело Тешки дела против безбедноста на луѓето и имотот во сообраќајот од член 300 став2 в.в со член 297 став 1 од Кривилниот законик, се осудува на казна затвор во траење од 13-тринаесет години. Во останатиот дел првостепената пресуда се потврдува”, соопшти Апелација.Кривичниот суд пред седум месеци го осуди Јованов на 12 години затвор за тешки дела против безбедноста на луѓето и имотот во сообраќајот. За ова дело предвидена е казна затвор од најмалку четири години до максимум 20 години затвор.

Скопје | пред 1 седмица

Коцевски „ситно брои”, утре на дневен ред предлогот на Владата за негово разрешување

Утре пред пратениците е предлогот на Владата за разрешување на Државниот обвинител Љупчо Коцевски.„Поради направени крупни професионални грешки при раководењето со Јавното обвинителство, што доведува до нарушување на ефикасноста и функционалноста на ЈО. Неовластено изнесување информации, податоци за судски предмети, со што ја повредил обврската за тајноста на постапката согласно закон. Нарушување на угледот на Јавното обвинителство и неговиот личен углед, не постапувајќи согласно обврските предвидени со Уставот, законите и меѓународните договори ратификувани во согласност со Уставот“, изјави на 9 декември владината портпаролка Марија Митева појаснувајќи ги причините за одлуката на Владата да го смени Коцевски по неполни 2 години мандат.Постапката беше на пауза поради изборните дејства, а претходно трагедијата во Кочани беше причина Владата да му даде шанса на Коцевски за да не се попречува истрагата.,,Нов државен обвинител ќе биде избран во законските рокови”, рече спикерот на денешниот брифинг со новинарите, но не посочи точен датум.По разрешувањето, на државен обвинител со ЈОРМ раководи в.д. државен обвинител од редовите на обвинителите од Републичкото обвинителство.Одлуката за разрешување на државниот обвинител се носи со 61 пратенички глас.

Македонија | пред 1 седмица

Апсурдот на австралиската миграциска политика: Синот на Трамп потсети дека Ноле беше депортиран заради невакцинирање против ковид, а терористот слободно се движел низ земјата

По терористичкиот напад во Сиднеј, во кој татко и син убија 16 луѓе за време на еврејскиот празник Ханука, на социјалните мрежи се појавија реакции за безбедносната политика на Австралија. Нападот официјално е класифициран како терористички, а цел била еврејската заедница.Во тој контекст, еден корисник на социјалните мрежи објави споредбена фотографија:– од една страна еден од убијците,– од друга страна Новак Ѓоковиќ,со саркастичен коментар:„На еден од овие двајца му е забранет влез во Австралија.“Целта му била да се укаже на апсурдот во австралиската имиграциска политика:терористот легално поседувал оружје, а Ѓоковиќ беше депортиран поради тоа што не беше вакциниран против ковид.На ова реагираше и Доналд Трамп помладиот, кој го сподели твитот и напиша:„Неверојатен твит. Тажен и вистинит.“Најдобриот тенисер на сите времиња, Новак Ѓоковиќ, кој е и десеткратен првак на „Австралија Опен“, во 2021 година беше депортиран од земјата поради тоа што не беше вакциниран против ковид-19, иако тоа не беше задолжително во времето на неговото влегување во Австралија.

Свет | пред 1 седмица

Бојкот на работата во Управата за матични книги, утре нема издавање на никакви документи!

По едногодишни неуспешни преговори, Управата за матични книги утре ќе ја бојкотира работа, што значи дека нема да издаваат никакви документи.Бојкотот е, како што велат, поради непочитување на Колективниот договорОд Конфедерацијата на синдикалните организации на Македонија (КСОМ) и вработените во Управата за водење на матични книги, велат дека, минатат недела се договориле на ваков чекор, бидејќи досега нема решени за нивните барања.Вработените и утре ќе бидат на своите работни места, но документи нема да издаваат, а бидејќи секој од нив заслужува 20 отсто, поради тежината на работата, поради тоа што работат со доверливи документи, но досега нема никаков договор, на минатонеделниот состанок се договоривме да бојкотираме. Еднодневниот прекин за работата на 16. декември е во знак на револт поради долголгогодишно непочитување на Колективниот договор и игнорирање на нашите барања за подобри услови и повисоки плати.

Скопје | пред 1 седмица

Градоначалникот Орце Ѓорѓиевски ги покани скопјани на празнична магија, вечерва ќе блесне новогодишната елка

Вечерва ќе светне новогодишната елка и празничното осветлување на Скопје, а градските власти најавуваат забава, музика и изненадувања за сите генерации на плоштадот „Македонија“. Почетокот на програмата е закажан за 18 часот, кога официјално ќе биде означен стартот на новогодишните и божиќните празнувања во главниот град.Градоначалникот на Скопје, Орце Ѓорѓиевски, ги повика скопјани да дојдат на плоштадот и најави враќање на празничната атмосфера во центарот на градот.„Нашиот град е најубав тогаш кога свети од радост, насмевки и празнична магија. А сите ние – и младите и возрасните ја заслужуваме таа топлина што ја носат Новогодишните и Божиќните празници. Затоа, со огромна радост ве поканувам заедно да го означиме почетокот на едно ново празнично поглавје исполнето со забава, музика, многу подароци и вашите омилени херои кои ќе ги израдуваат најмалите. Во 18 часот, на плоштадот „Македонија“, заедно со вас ќе го осветлиме градот и после неколку години ќе ја почувствуваме првата искра на празничниот дух“, изјави Ѓорѓиевски.

Скопје | пред 1 седмица

(Видео) СДСМ со граѓаните ќе стави крај на предавствата на ДПМНЕ-ЗНАМ

СДСМ со граѓаните ќе стави крај на предавствата на ДПМНЕ-ЗНАМ, порача Богданка Кузеска, портпаролка на СДСМ, нагласувајќи дека заедно ќе ги одбранат интересите на државата и ќе ги спречат криминалните и предавничките политики на актуелната власт со мигранти и корупциски тендери.„Ние заедно со граѓаните ќе ставиме крај на овие предавнички и криминални политики на ДПМНЕ-ЗНАМ. Македонија мора да се ослободи од корупцијата и криминалот што ја закопуваат државата и иднината на граѓаните. Крај на предавството на Македонија. Крај на корупцијата и криминалот. Крај на тендерите за пумпање пари од граѓаните. Крај на катастрофалните економски политики. Крај на изолацијата!“, порача Кузеска.Таа нагласи дека борбата за Македонија не застанува и одговорност мора да има.„Доаѓа вашиот крај. Тоа граѓаните ќе ви го испорачаат! Борбата за Македонија почна и нема да застане. Сите ќе одговарате!“, потенцираше Кузеска.

Македонија | пред 1 седмица

Критични денови за Европа: ЕУ под силен притисок да спречи мировен договор за Украина без нејзино учество

Европската Унија се соочува со една од најтешките недели во последните години, додека се обидува да го зачува своето влијание во преговорите за потенцијален мировен договор за Украина и истовремено да обезбеди финансиска стабилност за Киев. Сè поголемите стравувања дека САД и Русија би можеле да склучат договор без Европа ја засилуваат политичката тензија во пресрет на клучниот самит на ЕУ во четврток, пренесува Politico.Притисокот се зголеми по критиките од Вашингтон и особено по изјавите на Доналд Трамп, кој европските лидери ги нарече „слаби“, а Европа „во распаѓање“. Затоа Брисел оваа недела ја оценува како пресвртна точка за европското единство и за нејзината улога во обликувањето на мировниот процес.Најважните разговори денес се префрлаат во Берлин, каде украинскиот претседател Володимир Зеленски ќе се сретне со лидерите на Германија, Обединетото Кралство и со претставници на администрацијата на Трамп, меѓу кои Џаред Кушнер и специјалниот пратеник Стив Виткоф. Засега не е јасно дали францускиот претседател Емануел Макрон ќе присуствува, но тој викендов телефонски разговарал со Зеленски.Германскиот кабинет потврди дека по почетната средба ќе се приклучат и други европски шефови на држави и влади, како и раководството на ЕУ и НАТО.Средбата доаѓа по негативните реакции на мировниот нацрт-план од 28 точки, изработен од Виткоф со, како што тврдат европски и украински извори, учество на претставници на Кремљ. Планот беше одбиен од Киев и повеќе европски престолнини, по што е предложена алтернативна верзија.Украина и нејзините европски партнери минатата недела доставија амандман од 20 точки до Вашингтон, чијашто содржина е доверлива. Главниот нерешен проблем е иднината на украинските територии под руска окупација.Според дипломатски извори, Трамп предложил повлекување на двете армии и воспоставување демилитаризирана „слободна економска зона“ отворена за американски инвестиции. Киев го одбил предлогот. Европејците предупредуваат дека инсистирањето на САД за територијални отстапки создава сериозни тензии.Како можен сигнал за компромис, Зеленски изјави дека Украина би можела да не инсистира на членство во НАТО доколку добие силни билатерални безбедносни гаранции од САД и Европа.Паралелно со дипломатските разговори, во Брисел следува тешка расправа за обезбедување средства за Украина. ЕУ планира да користи 185 милијарди евра замрзната руска државна имовина во белгискиот депозитар Euroclear, како и дополнителни 25 милијарди евра од други замрзнати средства.Италија, Малта, Бугарија и новата чешка влада се приклучија кон скептицизмот на Белгија, што значително го отежнува постигнувањето политички консензус. Формално можат да бидат надгласани, но отпорот создава голем ризик за договор.

Свет | пред 1 седмица

Терористот од Сиднеј бил член на српскиот ловечки клуб „Застава“

Австралиските власти најавија итна реформа на законите за оружје по шокантното откритие дека Саџид Акрам (50), извршителот на нападот на плажата Бонди, бил легален сопственик на дури шест парчиња огнено оружје. Акрам и неговиот син Навид (24) се обвинети за терористички напад врз еврејската заедница која вчера ја славеше Ханука, во кој загинаа 16 лица, а десетици беа повредени.Напаѓачот бил член на ловечки клубКомесарот на полицијата во Нов Јужен Велс, Мал Лејнион, потврди дека напаѓачот поседувал дозвола за оружје од 2015 година. „Таткото поседувал дозвола за оружје од 2015 година“, изјави Лејнион, додавајќи дека Акрам имал шест парчиња легално оружје, кои сега се запленети.„Бил член на ловечки клуб“, изјави Лејнион. Подоцна беше утврдено дека Акрам бил член на ловечкиот клуб „Застава“, чиe седиште се наоѓа во Бонериг, на помалку од два километри од неговиот дом. Ловечкиот клуб „Застава“ во Сиднеј го водат припадници на српската заедница.Истражителите откриле дека таткото и синот вежбале пукање на стрелиштето во Сесил Парк. Балистичката и форензичката истрага треба да утврдат дали запленетото оружје е истото за кое Акрам имал дозвола. Во паричникот на неговиот 24-годишен син била пронајдена членска картичка од клубот, но сè уште не е официјално потврдено дека и тој бил член.Повеќе оружје отколку пред масакрот во Порт АртурВо Нов Јужен Велс се регистрирани повеќе од 1,1 милион парчиња огнено оружје, од кои третина се наоѓаат во предградијата на Сиднеј. Загрижувачки е податокот дека во Австралија денес има повеќе оружје отколку пред масакрот во Порт Артур во 1996 година, кога беа убиени 35 лица.Тој настан ја поттикна тогашната влада да го усвои Националниот договор за огнено оружје и да започне масовна програма за откуп, со која од употреба беа повлечени 650.000 парчиња оружје. Меѓутоа, податоците на Australia Institute од мај годинава покажуваат дека денес во Австралија има над четири милиони регистрирани приватни парчиња оружје — што е 800.000 повеќе отколку пред програмата за откуп.

Свет | пред 1 седмица

Поранешните команданти на УЧК без проблем влегле во Македонија, па му се заблагодарија на Меџити

Организаторите на протестот во Скопје за поддршка на поранешните команданти на косовската УЧК соопштија дека групат без никакви задржувања ја поминала косовско-македонската граница. Ова го потврди Хисни Гуцати, еден од организаторите и поранешен претседател на Организацијата на воени ветерани на УЧК, кој јавно му се заблагодари на градоначалникот на Чаир, Изет Меџити.Според Гуцати, Меџити дал гаранции дека нема да има пречки за влез на ветераните кои пристигнале да присуствуваат на протестот во Скопје.„Ме извести и градоначалникот на Чаир, Изет Меџити, на кого му благодарам многу. Тој рече дека границата ќе биде отворена и е отворена за сите граѓани кои ќе дојдат да протестираат денес и дека границата е мирна“, изјави Гуцати.Тој додаде дека поранешните команданти ја поминале границата без детални контроли.„Штом генералите на ОВК пристигнаа во Скопје, границата е мирна, граѓаните ја преминуваат границата многу мирно, нема детална контрола. Сакам да им се заблагодарам на сите тие иницијатори кои ја презедоа иницијативата и испратија албански цариници и полицајци на границата и ова е најголемиот успех“, рече тој.Во своето обраќање, Гуцати изнесе и политички обвинувања во врска со судските процеси во Хаг против поранешните команданти на УЧК.Тој повтори дека, според него, „судењето на ослободителите и војната на ОВК е волја на Русија и Србија“, споменувајќи го и извештајот на покојниот Дик Марти.„Цврсто верувам дека ова го направила српската амбасада, заедно со руската во Швајцарија“, додаде Гуцати.Протестот се одржа во саботата на плоштадот „Скендербег“ во Скопје, како поддршка за обвинетите команданти на УЧК во Хаг за настаните од војната во 1998–1999 година. Организаторите претходно изразија загриженост дека некои од ветераните може да бидат приведени на граница поради меѓународни потерници од Србија.

Свет | пред 1 седмица

Тешка ноќна акција на спасувачите во Босна: повеќе од четири часа борба за извлекување починат планинар од непристапниот терен

На планината Височица во Босна и Херцеговина во неделата вечер се одвиваше една од најсложените операции на локалните спасувачки служби, поради обидот да се извлече телото на починат планинар од исклучително тежок и непристапен терен.Во акцијата учествуваа повеќе од 20 припадници на Службата за спасување Прељ, ГСС Јабланица и ГСС Кантоn Сараево. Спасувачите преку социјалните мрежи објавија видеа од ноќниот терен, пренесувајќи дел од напорот и условите во кои работат, наведувајќи дека повеќе од четири часа се борат за извлекување на телото.Од теренот порачаа дека ситуацијата е исклучително тешка и дека поради мракот и стрмниот релјеф условите за евакуација се значително отежнати.„Се надевавме дека хеликоптерот ќе може да пристигне, но спротивно на очекувањата евакуацијата ќе продолжи цела ноќ. Терeнот е исклучително тежок“, објавија спасувачите.Во текот на денот постоела можност хеликоптер на ЕУФОР да интервенира и да го транспортира телото, бидејќи одреден дел од локацијата бил погоден за слетување. Меѓутоа, по паѓањето на ноќта и влошувањето на видливоста, таа опција била отфрлена.Спасувачите и понатаму ја изведуваа акцијата пеш, под светла и во ригорозни услови, сè додека не успеале да го извлечат телото и да го пренесат на безбедна локација.

Свет | пред 1 седмица

СДСМ со реакција на предлог-Резолуцијата на ВМРО-ДПМНЕ за мигрантите

СДСМ реагира на соопштението на ВМРО-ДПМНЕ и поднесената предлог-Резолуција за мигрантите, обвинувајќи ја владејачката партија дека „не ставила крај на ништо“, туку, како што наведуваат, „отворила врата за мигранти во Македонија“.Во реакцијата се наведува дека крај на прашањето со мигрантите, според СДСМ, може да се стави единствено со потпишување на нивната Резолуција, „во која експлицитно стои дека нема да дозволиме да се носат мигранти“. Од партијата велат дека цела недела ја повикуваат власта да ја поддржи оваа Резолуција, но дека „ДПМНЕ-ЗНАМ не сакаат“ и „бегаат од одговори и од потпишување“.СДСМ тврди дека причината е „јасна“ и дека, како што наведуваат, „има договор, мигранти за пари“, поради што власта поднесува контра резолуции.Во реакцијата се упатува порака до власта дека, според СДСМ, „граѓаните заедно со партијата ќе стават крај на предавничките и криминални политики“ на ДПМНЕ-ЗНАМ. Притоа истакнуваат дека нема да дозволат носење мигранти, продолжување на криминал и корупција или меѓународна изолација.Реакцијата завршува со порака дека „борбата за Македонија почнува и нема да застане“ и дека „сите ќе одговараат“.

Македонија | пред 1 седмица