(Видео/Фото) Фудбалерот на македонскиот клуб Рокдејл Илинден е една од жртвите во нападот на плажата Бонди во Сиднеј

Францускиот фудбалер Ден Елкајам, член на македонскиот клуб Рокдејл Илинден - Австралија, е идентификуван како една од жртвите во вчерашниот вооружен напад на плажата Бонди во Сиднеј. Тој беше меѓу 16-те луѓе кои го загубија животот во масакрот што властите го квалификуваат како терористички напад.Австралиските служби соопштија дека нападот го извршиле татко и син; едниот напаѓач бил убиен, а другиот е приведен. Покрај загинатите, 42 лица се хоспитализирани. Настанот се случил за време на еврејски фестивал што се одржувал на плажата.Смртта на Елкајам ја потврди потпретседателот на Рокдејл Илинден, Лу Тасевски.„Јас сум скршен од болка, мојот син игра во Рокдејл Илинден и двајцата беа одлични пријатели. Ова е трагична загуба и ние сè уште се обидуваме да се справиме со неа“, изјави тој за локалните медиуми.Елкајам, 27-годишен француски државјанин, во клубот настапувал последните 12 месеци и бил високо ценет од соиграчите, тренерите и управата. Живеел во Австралија неколку години и работел како ИТ-аналитичар во NBC Universal. Освен по фудбалскиот талент, бил препознатлив и по љубовта кон плажите во Сиднеј и патувањата низ Австралија.

Свет | пред 1 седмица

ВМРО-ДПМНЕ поднесе Резолуција против „манипулациите за мигрантите“ и повика на јасна државна политика

ВМРО-ДПМНЕ достави предлог-Резолуција до Собранието на Република Македонија под наслов „Резолуција за осуда на манипулациите на опозицијата и за потврда на политиките против нелегалната миграција“.Од партијата наведуваат дека со документот се става крај на, како што велат, манипулациите на СДС за мигрантите и „организираната кампања што создава несигурност и паника меѓу граѓаните“. Според нив, државата има јасна политика против нелегалната миграција и нема планови за отворање мигрантски кампови, а Резолуцијата, велат, треба да донесе стабилност и сигурност.Во соопштението, ВМРО-ДПМНЕ ги осудува политиките и одлуките на поранешната влада на Зоран Заев, за кои тврдат дека создале можности за отворање кампови за мигранти, спротивно на националните интереси.Резолуцијата се состои од девет точки и предвидува осуда на дезинформациите за наводно прифаќање мигранти и изградба на кампови. Во документот се потврдува дека такви политики не постојат и нема да постојат, се поништуваат сите претходни аранжмани на Владата на Заев поврзани со мигрантски кампови и се повикува на одговорен и јасен говор во интерес на безбедноста, стабилността и меѓуетничките односи.Исто така, се наведува дека свесното ширење дезинформации ќе биде санкционирано согласно важечките закони. Резолуцијата, според ВМРО-ДПМНЕ, воспоставува јасна државна политика против нелегалната миграција и стапува во сила веднаш.Партијата ги повикува сите политички субјекти да ја поддржат Резолуцијата, со цел, како што наведуваат, да се стави крај на „лагите и конструкциите на СДС“.

Македонија | пред 1 седмица

Скопјани почувствуваа слаб земјотрес: Регистриран утринава со јачина од 3,3 степени по Рихтер

Жителите на Скопје утрово почувствуваа послаб земјотрес, кој во 07:20 часот ја затресе метрополата и околните населени места. Потресот, според првичните податоци, бил со јачина од 3,3 степени по Рихтер.Епицентарот бил лоциран во пограничното подрачје кај Урошевац, околу 124 километри северно од Скопје. Телеметриската сеизмолошка мрежа на државата го регистрираше земјотресот преку станиците што ги одржува Сеизмолошката опсерваторија при Природно-математичкиот факултет.Потресот бил почувствуван со интензитет од 3 степени според Европската макросеизмичка скала.Од Опсерваторијата ги повикуваат граѓаните кои го почувствувале земјотресот да го пополнат прашалникот на нивната интернет-страница или да се јават на бројот 112, со цел да се соберат податоци за понатамошни анализи.

Скопје | пред 1 седмица

„Австралија потфрли, не ги заштити Евреите“, Нетанјаху ги обвинува властите во Канбера за масакрот

Стравот и тагата што ја потресоа австралиската еврејска заедница по вооружениот напад на прославата на Ханука во Сиднеј веднаш добија и силна политичка димензија. Израелскиот премиер Бенјамин Нетанјаху остро реагираше на трагедијата, обвинувајќи дека политичките ставови на Канбера ја движат Австралија во опасна насока.Австралиските власти соопштија дека две вооружени лица отвориле оган врз учесниците на прославата на плажата Бонди, при што загинале најмалку 16 луѓе, во напад што го квалификуваат како намерно антисемитски. Еден од напаѓачите бил убиен на местото на настанот. Инцидентот се смета за најтежок антисемитски напад во Австралија од почетокот на војната во Газа во октомври 2023 година.Во јавната реакција, Нетанјаху наведе дека насилството било „ладнокрвно убиство“ и потсети дека уште во август го предупредил австралискиот премиер Ентони Албанезе дека политиките на неговата влада создаваат средина погодна за раст на антисемитизмот.„Вашиот повик за создавање палестинска држава само додава масло на антисемитскиот оган. Ги наградува терористите на Хамас и ги охрабрува оние кои им се закануваат на австралиските Евреи и ја поттикнува омразата кон Евреите што сега беснее по вашите улици“, се присети Нетанјаху на напишаното во писмото до Албанезе.Во продолжение од говорот, тој ја обвини австралиската влада дека „не презема ништо за да го спречи ширењето на антисемитизмот во Австралија“ и рече дека трагичниот напад е последица на тој пропуст. „Дозволивте болеста да се шири, а резултатот се ужасните напади врз Евреите што ги видовме денес“, додаде тој.Албанезе, пак, веднаш го активираше Советот за национална безбедност и категорично го осуди нападот. Тој го нарече злото што се појавило „надвор од умот“ и нагласи дека се работи за целен напад врз Австралијците Евреи токму на првиот ден од Ханука, кој треба да биде ден исполнет со „радост и прослава на верата“.Премиерот веќе претходно, на 11 август, најави дека Австралија планира да поддржи признавање палестинска држава на Генералното собрание на ОН во септември – чекор што следи слични најави од Франција, Велика Британија и Канада.

Свет | пред 1 седмица

Повредениот Ахмед кој стана симбол на храброст во масакрот во Сиднеј полека заздравува - светот му оддава почит!

Додека Австралија сè уште се соочува со последиците од масакрот на плажата Бонди, јавноста го насочи вниманието кон човекот кој успеа да го спречи напаѓачот да продолжи да убива. Ахмед ал Ахмед, сопственик на продавница за овошје од Сиднеј, моментално закрепнува во болница по сложена операција на раката и надлактицата, потврди неговото семејство.Неговото херојство првпат се виде на видеата што кружат на интернет: човек кој, кришум движeјќи се зад паркираните автомобили, се нафрла врз еден од вооружените напаѓачи одзади, ја зграпчува пушката и го турка на земја. Австралиската полиција веќе соопшти дека напаѓачите – татко на 50 години и неговиот 24-годишен син – намерно го нападнале религиозниот еврејски собир на Бонди, при што беа убиени 16 лица, во најсмртоносниот вооружен напад во земјата во речиси три децении.Братучедот на Ахмед, Мустафа, за 7News Australia изјави дека семејството било уверено дека лекарите успешно ја завршиле операцијата и дека Ахмед е стабилен.„Тој е херој, тој е сто проценти херој. Тој е сè уште во болница и не знаеме точно што се случува внатре, но се надеваме дека ќе биде добро“, рече тој.Признанијата за неговата храброст пристигнуваат од целиот свет. Американскиот претседател Доналд Трамп го опиша како „многу, многу храбра личност“ која спречила многу поголема трагедија. Премиерот на Нов Јужен Велс, Крис Минс, исто така изрази огромна почит, оценувајќи дека снимката од моментот на разоружувањето е „најневеројатната сцена што ја видел досега“.Паралелно, поддршката за Ахмед пристигнува и финансиски. Кампањата на GoFundMe, отворена за негово закрепнување и помош, собра повеќе од 200.000 австралиски долари за само неколку часа. Најголемата донација ја упати милијардерот Бил Акман – 99.999 австралиски долари, кој дополнително ја сподели акцијата и на својата сметка на платформата Х.

Свет | пред 1 седмица

Визер ја отвори вратата кон Прага, од денеска почнаа летовите до чешката престолнина

Од денеска Македонија добива нов директен лет до Прага, по што скопскиот аеродром станува побогат за уште една редовна рута во мрежата на нискобуџетската авиокомпанија „Визер“. Новитетот е дел од пакетот проширувања што го најави Владата во летниот период.Петте нови линии произлегуваат од договорот склучен меѓу институциите и авиопревозникот, кој беше официјално потпишан во јули. Тогаш вицепремиерот и министер за транспорт Александар Николоски најави дека со овие летови се очекува засилен туристички и бизнис-проток кон земјава.– „Утрово потпишавме Договор за пет нови дестинации кои што ќе се оперираат од скопскиот аеродром. Пет нови авиолетови кои ќе значат повеќе туристи во Македонија, повеќе бизнис во Македонија и повеќе можности за сите граѓани на Македонија. Веќе од месец ноември почнува редовна авионска линија Стокхолм – Скопје. Исто така, веќе од месец ноември почнува редовна авионска линија Мадрид – Скопје, а од декември почнува редовна авионска линија Бари – Скопје, Келн – Скопје и редовна авионска линија Прага – Скопје“, објави Николоски во јули.Со денешното лансирање на рутата за Прага, започнува и практичната реализација на договореното проширување, со кое Скопје се поврзува со уште неколку европски метрополи.

Македонија | пред 1 седмица

Настрадал пешак во сообраќајќа во Скопје, возачот побегнал

На 11.12.2025 во 14:45 часот во СВР Скопје е пријавено дека на кружен тек од ул.„Борис Сарафов“, ул.„Лука Геров“, ул.„Македонски војски“ и бул.„Партизански Одреди“ во Скопје, патничко возило „мерцедес“ удрило во пешакот Х.М.(34), по што возачот со возилото го напуштил местото на настанот.Во несреќата со телесни повреди се здобил пешакот, констатирани во Градската општа болница „Св.Наум Охридски“. Извршен бил увид од увидна екипа од СВР Скопје и се преземаат мерки за расчистување на случајот.

Скопје | пред 1 седмица

Се степале двајца возачи на автобуси кај Транспортен центар

На 11.12.2025 во 10:00 часот во СВР Скопје, Б.С.(57) од Скопје, возач на автобус, пријави дека во автобус паркиран кај Транспортен центар во Скопје, по претходно недоразбирање, бил физички нападнат од М.Р., исто така возач на автобус.Се преземаат мерки за расчистување на случајот.

Скопје | пред 1 седмица

За мали пратки од Тему и Шеин ќе се плаќа 3 евра царина, ЕУ воведува нова мерка

Од следната година ќе плаќаме 3 евра царина на мали пратки нарачани од Тему и Шеин.Европските министри за финансии денеска постигнаа привремен договор за воведување фиксна царина од три евра за мали пакети, што ќе се применува од 1 јули 2026 година и најмногу ќе ги погоди кинеските онлајн-продавници. Станува збор за пратки со вредност помала од 150 евра, кои сочинуваат 93 проценти од е-трговијата во Европската Унија.Според податоците на Европскиот економски и социјален комитет, секој ден во Европа пристигнуваат околу 12 милиони мали пакети со облека, козметика и играчки нарачани од Кина преку онлајн-платформите Шеин и Тему. Претставници предупредуваат дека прагот од 150 евра ги става европските трговци во неповолна положба и носи ризици по здравјето и безбедноста.Кинеските онлајн-продавници се обвинуваат дека не ги почитуваат здравствените и безбедносните стандарди што важат во Европската Унија. Шеин и Тему преку своите апликации продаваат производи на фабрики со пониски трошоци, делумно поради тоа што не мора да вршат тестирања какви што се задолжителни за производителите во Европа, ниту пак се обврзани да ја рециклираат вратената стока, што е практика во ЕУ.Овие платформи стануваат сè поприсутни и во Македонија, во услови на пораст на цените на храна, енергенси, кирија и облека. Привремениот договор за царина од три евра ќе важи додека не се укине правилото со кое ваквите пратки се ослободуваат од царински давачки.Во ноември, министрите за финансии договорија укинување на правилото што дозволува влез на стока со вредност под 150 евра во ЕУ без плаќање царина. Таа мерка ќе почне да важи откако ќе се воспостави Центарот за царински податоци на Европската Унија – централизирана платформа за размена на царински информации и засилување на контролите, чија функционалност се очекува во 2028 година.Преговорите за воспоставување на овој центар сè уште траат помеѓу Советот на ЕУ и Европскиот парламент, како дел од пошироката реформа на царинската рамка на Унијата. Кога ќе стане целосно оперативен, центарот ќе овозможи царинска примена на сите пакети што влегуваат на европскиот пазар.

Свет | пред 1 седмица

Пронајден починат 25-годишник во напуштена куќа во Центар

На 12.12.2025 околу 00:20 часот во СВР Скопје е пријавено дека во напуштена куќа на подрачјето на Центар е пронајден починат Е.Р.(25) од Скопје.Лекар од Итната медицинска помош констатирал смрт без видливи траги на насилство. Извршен е увид од увидна екипа од СВР Скопје, а по наредба на јавен обвинител телото на починатиот е дадено за обдукција.

Скопје | пред 1 седмица

ЏАМБО влегува во Гевгелија со најсовремен маркет и голема нова инвестиција

Гевгелија добива нова трговска точка – ЏАМБО овој викенд ќе го отвори својот најнов и технолошки најсовремен маркет во рамките на „Gevgelija Mall“. Со овој објект, планиран да стартува на 13 декември, брендот го проширува своето присуство во Македонија и го зацврстува влезот на јужниот пазар, по успешните проекти во Скопје, Тетово и Битола.Со инвестицијата, компанијата не се насочува само кон проширување на продажната мрежа, туку и кон создавање нови работни места, што ја зајакнува локалната економија и носи дополнителна динамика во трговијата во регионот. ЏАМБО наведува дека присуството во Гевгелија е дел од долгорочната стратегија за развој и потврда на довербата во македонскиот пазар.Новиот објект, поставен на простор од 3.000 квадратни метри, е уреден според меѓународни стандарди и нуди повеќе од 20.000 производи – од играчки и украсни артикли, до широк спектар производи за домот. Во рамките на маркетот е интегриран и селектиран асортиман од брендот ВЕРО, што им овозможува на купувачите поголема практичност и повеќе избор на едно место.Генералниот директор на ЏАМБО во Македонија, Петар Денковски, изјави дека отворањето во Гевгелија претставува значајна точка во развојните планови на компанијата, нагласувајќи дека растот на брендот оди рака под рака со вложување во заедницата. Тој додаде дека компанијата ќе продолжи со експанзијата во 2026 година, кога е планирано отворањето на нов објект во Струмица.Свеченото отворање ќе се одржи во 12 часот на 13 декември, а посетителите ќе бидат пречекани со специјални активности и семејна програма во рамките на „Gevgelija Mall“, што е дел од обидот на компанијата да создаде празнична атмосфера за посетителите од целиот регион.

Македонија | пред 1 седмица

Мицкоски: Советниците на ВМРО-ДПМНЕ со иницијатива до советите за документ дека мигрантски кампови нема да има, ширењето на лажна паника e кривично дело

Претседателот на ВМРО-ДПМНЕ, Христијан Мицкоски, одговори на новинарско прашање во однос на се позачестените иницијативи по советите во општините во земјата и кампањата на Венко Филипче за мигранти каде што потенцира дека мигрантски кампови нема да има, а дополнително и советниците на ВМРО-ДПМНЕ ќе поднесат иницијативи до советите во општините, да гласаат документ дека мигрантски кампови на териториите  на општините нема да има.„Не можам да се изначудам се уште кој ги насанка на оваа тема, бидејќи оваа тема тотално не оди во нивна полза, бидејќи самите тие се тие кои што на владина седница гласале за да се градат такви приватни мигрантски кампови и за што имало протести во минатото, вклучително и ние. Јас тоа го кажав во една моја изјава, дека во темелните вредности на ВМРО-ДПМНЕ, е антиемигрантската политика, за што бевме обвинувани дека сме ксенофобична партија. Сега, сосема спротивни обвинувања од страна на СДСМ, а вистината е јасна. Апсолутно таква работа ниту ќе се случи ниту има некој план, или размислувал дека такво нешто се случило. Впрочем такви беа изјавите од единствениот официјален извор, од Британската амбасада во земјава“ кажа Мицкоски.Мицкоски истакна дека советниците на ВМРО-ДПМНЕ во текот на следната недела ќе достават до советите да се гласа таков документ дека мигрантски кампови на териториите на тие општини нема да има.„Инаку, советниците на ВМРО-ДПМНЕ во текот на следната недела ќе достават до советите да се гласа еден таков документ, со којшто ќе се јасно стави до знаење дека таа е политиката, односно антиемигрантската политика, политика која што се бори против нелегалната миграција и генерално таков тип на процеси.  Нема на територијата на тие општини да се создадат такви мигрантски кампови и ќе побара од надлежните институции согласно Кривичиниот законик, да поведат процеси против сите оние кои што сеат страв паника. И покрај  јавно изнесените деманти од страна на Владата, тие се кривично одговорни за тоа што го прават, бидејќи јас разбирам да вие имате во вашата партија проблеми, не можете да мобилизирате извршен одбор, никој не ви се нафаќа да формирате структура, општински организации како и да ги викаат и тоа е во ред“ истакна Мицкоски.Мицкоски истакна дека и покрај сите деманти од Владата и министерствата, СДС и понатаму свесно шири страв и паника кај населението а за тоа во Кривичниот законик се предвидени одредени санкции.„И разбирам еве таа тема да ја покренете еднаш два пати, но кога веќе официјално стигнува демант од претседателот на Владата, од соодветните министерства внатрешни и надворешни, мислам дека од тој момент па натаму вие го поминувате рубиконот и вие свесно и покрај демантите ширите паника и страв и за тоа во Кривичниот законик се предвидени одредени санкции“ нагласи Мицкоски.Мицкоски ги повика соодветните органи да поведат процеси против тие лица.„Јас ги повикувам соодветните органи да излезат од тие октруирани стеги на претходната влада на СДСМ и ДУИ и против овие лица да покренат, би рекол, процес. Затоа што, многумина од граѓаните се загрижени со право, ми се јавуваат и ме прашуваат и покрај тоа што веќе една недела цело време зборуваме со деманти и кажуваме дека такво нешто неа да се случи. Еве ќе поминат месец, два, три, ќе дојде пролет“ рече Мицкоски.Мицкоски потенцира дека мигранти нема да има и нагласи дека трајно ќе ја напушти политиката доколку некој од СДС пронајде барем еден мигрант. „Мигранти нема никој да види. Впрочем јас реков еве трајно ја напуштам политиката, ако раководството на СДСМ, тоа бар што остана таму од СДСМ пронајде и еден мигрант, којшто е дел од договорот со Обединетото Кралство или било кој друг договор, јас реков дека заминувам трајно од политиката. Еве нема подобар начин, бидејќи се уплашени континуирано од мене, сега мене ми ги бројат овие последни четири години како претседател на ВМРО-ДПМНЕ и сега тие од СДСМ, практично во овој случај, имаат начин еве како да се спасат од мене и порано. Еве нека најдат еден таков мигрант, којшто е резултат на договорот со Обединетото Кралство или со некој друг договор, па да видиме. Ако не јас реков еве не барам да заминат од политиката, тие нека си одлучат, не им се мешам тоа е нивна внатрешна работа. Велам, да се извинат. Ќе дојде и февруари и март, нели го кажаа, нема да има избори, нема да има мигранти и свесно некој ширел паника меѓу граѓаните. Јас разбирам слобода на говор, ама кога веќе 5 пати некој демантира дека тоа ќе се случи, тогаш треба да се застане со таа работа“ истакна Мицкоски.

Македонија | пред 1 седмица

(Видео) На полигонот „Криволак“ утре ќе се уништува голема количина на минско-експлозивни средства запленети пред 15 години

Полициски службеници од страна на Оддел за криминалистичка полиција - Единица за недозволена трговија со оружје, опасни материи и радиоактивен материјал во координација и содејство со полициски службеници од Единица за откривање и демонтирање на експлозивни средства и направи при Оддел за сузбивање на организиран и сериозен криминал, врз основа на претходно изготвен план преземаат соодветни мерки и активности за ништење на огромна количина на минско-експлозивни средства.После цели 15 години, во текот на утрешниот ден (13.12.2025), минско-експлозивните средства од касарна „Ѓорче Петров“ до армискиот полигон „Криволак“ ќе бидат транспортирани со товарни возила-камиони на АРМ каде во присуство на Комисијата за уништување на оружје, делови и компоненти на оружје, муниција и експлозивен материјал, од страна на полициски службеници од Единица за откривање и демонтирање на експлозивни средства и направи, стручни лица од АРМ и пиротехничари од Дирекција за заштита и спасување ќе биде спроведено нивно уништување со контролирана детонација.Фактот дека ова е прв случај на уништување на ваков тип минско-експлозивни средства по цели 15 години, за жал, говори дека претходно не била соодветно третирана безбедноста на граѓаните со должната сериозност. Денешниот чекор јасно покажува дека со одговорен пристап, вистинска посветеност и професионално раководење, овој сегмент од безбедносниот систем конечно се поставува на ниво какво што одамна требало да биде

Македонија | пред 1 седмица

Скопскиот аеродром го достигна рекордниот праг од три милиони патници – Николоски: „Ова беше незамисливо пред две децении“

Скопскиот аеродром денеска го испрати својот три милионити патник, што претставува највисока бројка досега постигната во историјата на македонската цивилна авијација. На свечениот настан присуствуваше вицепремиерот и министер за транспорт Александар Николоски, заедно со раководството на ТАВ Македонија.Министерот нагласи дека со ваквиот раст, Меѓународниот аеродром Скопје се позиционира како значаен регионален центар за патнички сообраќај. „Драго ми е што ова прекрасно семејство што денеска патува до Бари ја имаше среќата да биде три милиониот патник на Скопскиот аеродром. Ако споредиме со нешто што се случуваше пред 10, 20 и 30 години ова било незамисливо, Скопскиот аеродром веќе станува центар за целиот регион“, изјави Николоски.Тој посочи дека од септември минатата година до денеска се воведени вкупно 21 нова дестинација на двата македонски аеродроми. Според него, ниту една држава во регионот во истиот период нема отворено толку голем број линии. Проекциите покажуваат дека Скопскиот аеродром ќе ја заврши годината со околу 3,2 милиони патници, а охридскиот со повеќе од 300.000, односно над 3,5 милиони патници на државно ниво.Николоски истакна дека бројките растат континуирано и дека во ноември е забележано зголемување од 25 проценти во однос на истиот месец лани. Овој пораст, рече тој, се поврзува и со поинтензивниот туристички промет и подобрената деловна активност.Министерот најави дека и во 2026 година ќе продолжи проширувањето на понудата. Од 6 април ќе стартуваат линиите Скопје–Наполи и Скопје–Будимпешта, а од 28 јуни ќе се воспостават нови сезонски рути од Охрид до Катовице, Вроцлав и Милано. Ќе почне да сообраќа и редовната линија Охрид–Виена на австриската авиокомпанија.Tој изрази оптимизам дека веќе следната година бројката од 3,5 милиони патници само на Скопскиот аеродром ќе стане достижна.

Македонија | пред 1 седмица

ЗК Пелагонија отвора Агро Еко Центар за обука во зелени и дигитални вештини

ЗК Пелагонија го најави отворањето на „Агро Еко Центар за Обука за Зелени Вештини“, место каде земјоделците, учениците и студентите ќе стекнуваат практични знаења за современи, дигитални и одржливи земјоделски практики. Во рамки на центарот, на 2 декември ќе биде пуштена првата „АгроЕкоСтаница за зелени вештини“, развиена во соработка со Стопанската комора. Преку оваа иницијатива, Пелагонија се позиционира како регион кој активно ги применува европските модернизациски стандарди во земјоделството.Центарот за обука на ЗК Пелагонија ќе отвори уникатна можност за идните, но и за постоечките земјоделци, ученици и студенти да учат од реални примери, да предвидуваат ризици, да применуваат современи технологии и да развиваат одржливи и иновативни земјоделски практики – создавајќи професионалци со зелени вештини подготвени за иновативно и одговорно управување со ресурсите.Првиот проект на „Агро Еко Центар за Обука за Зелени Вештини“ е реализиран во соработка со Стопанска комора на Северна Македонија Economic Chamber of North Macedonia, кадешто на 02 декември 2025 година ќе биде отворена првата „АгроЕкоСтаница за зелени вештини“ – технолошка иновација која претставува важен чекор кон воведување на паметни решенија во земјоделството и можност за континуирана практична обука за идните „Еколошки агротехничари“.АгроЕкоСтаница за зелени вештини ќе претставува современа платформа во склоп на центарот за обука што ќе овозможи развивање на компетенции за еколошко и рационално управување со земјоделските ресурси преку практична работа со современи дигитални алатки:Следење и анализа на состојбата на почвата, растенијата и климатските услови според податоците од сензорите на АгроЕкоСтаницата.Пристап до податоци во реално време и примена на еколошки мерки за заштита на културите и обновување на биолошкиот диверзитет кој ќе доведе до контролирана употреба на заштитни средства, минерални ѓубрива и рационално користење на вода за наводнување.Препознавање и превенција на ризици како суша, болести и штетници преку дигитални предупредувања.Поддршка за одржливи и ефикасни земјоделски практики.Основната цел на ЗК Пелагонија е да ја доближи најсовремената технологија до локалните земјоделци, ученици, студенти и сите заинтересирани, градејќи заедница која се развива преку знаење, иновации и практична примена.Со оваа иницијатива, Пелагонија продолжува да се позиционира како регион што го следи европскиот пат на модернизација и дигитализација во земјоделството.Полињата на ЗК Пелагонија стануваат отворена книга – реален простор каде идните агротехничари, студенти и земјоделци ќе учат, иновираат и применуваат зелени вештини во реални услови – пример за одржливо и модерно земјоделство, се вели во објавата на ФБ.

Македонија | пред 1 седмица

За благајникот од прилепската болница кој проневерил 244.000 евра Обвинителството бара куќен притвор

Постапувајќи по кривична пријава од Управата за финансиска полиција, Основното јавно обвинителство Прилеп донесе Наредба за спроведување истражна постапка против едно лице за продолжено кривично дело – Проневера во службата од член 354 став 3 во врска со став 1 од Кривичниот законик.Постои основано сомнение дека тој во временскиот период од 01.01.2020 година до 31.12.2021 година,  во својство на службено лице – самостоен референт – главен благајник во Одделение за материјално финансиско работење во Сектор за материјално – финансиски работи и сметководство при ЈЗУ Општа болница со проширена дејност Прилеп, со намера за себе да прибави противправна имотна корист, присвоил пари  доверени во службата.Тој во повеќе наврати дел од наплатените и примените парични средства од шалтерите на болницата, наплатени од пациентите по основ на партиципација и приватни здравствени услуги, не ги уплатил на банкарската сметка на болницата, не изготвил обрасци „каса-прими“ и истите противправно ги присвоил за себе со што прибавил значителна имотна корист во вкупен износ од 15.063.284 денари.Јавниот обвинител до судијата на претходна постапка достави предлог за определување мерка куќен притвор за осомничениот.

Македонија | пред 1 седмица

Во „бомбата“ на СДСМ се споменува и името на Гувернерот: „Дали изборот на Трајко Славески на чело на НБРМ беше поради Алта Банка?

Пред само два месеци српската Алта банка ја презеде ‘Стопанска Банка АД Битола’. За тоа согласност дал Трајко Славески, гувернер на НБРМ,“ предупреди Александар Саша Димитријевиќ, челн на ЦО на СДСМ, додавајќи дека тоа поставува клучно прашање:„Дали токму тоа е причината за која Трајко Славевски беше избран за Гувернер НБРМ, само за да тивко и експедитивно се реализира токму оваа зделка?“Димитриевиќ дополнително истакна: „Како тоа Европската централна банка има преземено ваков ригорозен чекор, а Трајко Славевски и НБРМ без размислување го дозволиле преземањето во Македонија? Зошто не биле по внимателни?“Тој ја поврза оваа зделка со сериозни финансиски ризици, додавајќи дека токму тоа е српското сценарио на кое предупредуваше СДСМ. „Бараме Финансиското разузнавање и Финансиската полиција да отворат истрага за ова крајно сомнително преземање. Бараме да се испитаат потеклото на парите и ризикот од перење пари“, потенцираше Димитријевиќ на денешната прес конференција

Македонија | пред 1 седмица

Кој е планот на Трамп за Западен Балкан?

Новата американска Стратегија за национална безбедност, потпишана од претседателот Доналд Трамп, јасно укажува на пренасочување кон строго дефинирани американски приоритети, при што Западниот Балкан се споменува само маргинално, пренесува Дојче веле.Претседателката на Атлантскиот совет во БиХ, професорката Дијана Гупта, наведува дека документот недвосмислено ја поставува тезата „Америка на прво место“, со фокус на националната безбедност, економијата, борбата против криминалните картели и миграциите.„Соединетите Американски Држави низ историјата му помогнале на голем дел од светот, но тоа често не било доволно вреднувано. Доналд Трамп сака другите да почувствуваат што значи кога Америка пред сè се грижи за себе и за своите граѓани“, изјави Гупта за Дојче веле.Според неа, спречувањето на конфликтите во Украина и на Блискиот Исток останува врвен приоритет, додека партнерството со Европа нема да биде доведено во прашање. „Во свет со повеќе центри на моќ, безбедноста е најважна, а интересите на ЕУ и САД се длабоко испреплетени“, истакнува таа.Западниот Балкан на маргините на стратегијатаВојниот аналитичар Хамза Вишта нагласува дека регионот се појавува речиси исклучиво во контекст на односите меѓу Србија и Косово. „Ниту БиХ, ниту регионот во целина немаат значајна улога во документот. Главниот фокус е насочен кон американските интереси во западната хемисфера“, наведува тој.И покрај тоа, стратегијата испраќа важна порака: САД можеби не се подготвени да интервенираат како во минатото, но остануваат спремни да стабилизираат средини каде што има потенцијал за сериозни американски инвестиции.„Доколку се создадат услови за влез на американски капитал во БиХ, тоа подразбира и подготвеност да се заштитат тие вложувања – секако на места каде интересите на партнерите се совпаѓаат со интересите на САД“, објаснува Вишта.Тој додава дека БиХ треба да сфати: колку се посилни односите со Америка и колку е поотворена економијата, толку е постабилен безбедносниот амбиент. Како примери ги наведува јужната гасна интерконекција и можностите за соработка во наменската индустрија.Геополитичка важност и европски интеграцииГупта посочува дека Западниот Балкан мора цврсто да остане на курсот кон НАТО и Европската Унија. „Регионот нема реална перспектива надвор од евроатлантските процеси. Балканот е премногу важен за да биде оставен на маргините. Интеграцијата е предуслов за стабилност, развој и демократски напредок“, истакнува таа.Таа предупредува дека БиХ е политички сложена држава со тешко постигнување консензус. „БиХ е како во политички кружен тек. Без силна поддршка од САД и ЕУ тешко може да се направи исчекор. Затоа е неопходно градење компромис и одржување на мирот“, додава Гупта.Воено-политичкиот аналитичар Недџад Ахатовиќ смета дека промената на американскиот пристап кон проширувањето на НАТО дополнително го усложнува патот на земјите од регионот кон членство. Според него, тоа отвора простор за јакнење на влијанието на Турција и Русија, додека Кина веќе е значаен фактор во регионот.„Србија е најголемиот купувач на руско и кинеско оружје, а воедно ги продлабочува и економските врски со Пекинг“, посочува Ахатовиќ.Американската улога во БиХ останува клучнаБезбедносниот експерт Владимир Вучковиќ уверува дека САД нема да се повлечат од БиХ. „Дејтонскиот договор е еден од најзначајните надворешнополитички успеси на САД. Вашингтон нема да се откаже од него“, рече тој.Вучковиќ појаснува дека забелешките на САД за издвојувањето средства за одбрана во рамки на НАТО се внатрешно прашање на Алијансата и не претставуваат директна закана за Балканот. Независно од тоа кога и дали БиХ ќе стане дел од НАТО, важно е да остане на патот кон Европската Унија.Тој ја нагласи и важноста на мисијата Еуфор Алтеа, оценувајќи дека таа и понатаму е подготвена да одговори на сите безбедносни предизвици.Пониски очекувања, поголема одговорностИако новата стратегија посветува малку внимание на регионот, експертите сметаат дека пораката е јасна: САД ќе бидат присутни таму каде што има сигурни институции и јасен економски интерес.За БиХ тоа значи помалку очекувања од надворешни актери и повеќе напори за зајакнување на внатрешниот политички дијалог и односите со Вашингтон и Брисел.„Каде што се вложуваат американски средства, САД нема да дозволат тие да бидат загрозени“, заклучува Хамза Вишта.

Свет | пред 1 седмица

Антикорупцискиот тим на СДСМ денеска објавува нова бомба: Српското сценарио се потврдува и преку зделките со Алта Банка

„Српското сценарио се потврдува во Македонија и преку зделките со Алта Банка,“ , предупреди Александар Саша Димитријевиќ, член на ЦО СДСМ, посочувајќи дека преземањето на „Стопанска Банка АД Битола“ од страна на српската Алта Банка е реализирано веднаш по доаѓањето на власт на ДПМНЕ.Тој истакна дека „Банкарот на Вучиќ стана банкар и на Мицкоски“, што, укажува на сериозно политичко-финансиско влијание.Димитријевиќ детално објасни дека сопственикот на Алта Банка, Давор Мацура, во Србија стекнал огромни државни бизниси иако до вчера бил сопственик на мала менувачница, наведувајќи дека токму тој модел на сомнителни зделки е препознатлив за власта на СНС и Александар Вучиќ.Тој потсети дека Европската централна банка му го суспендирала правото да купи удел во Адико банка поради сомнеж за потеклото на капиталот, како и дека постои долга истрага за Alta Pay поради сомнежи за перење пари.„Ова значи легален влез на сомнителни финансиски текови во Македонија и отворање врата за можно перење пари. Еве го српското сценарио на кое предупредуваме!“, потенцираше Димитријевиќ.Тој оцени дека ова преземање е нераскинливо поврзано со финансиско-политичката мрежа на владејачките структури со Христијан Мицкоски и ВМРО-ДПМНЕ, со што се создава ризик за трансфер на сомнителен капитал и влијанија од Србија во Македонија.„Бараме Финансиското разузнавање и Финансиската полиција да отворат истрага за ова крајно сомнително преземање. Македонија не смее да стане финансиска платформа за туѓи политички агенди, порача Димитријевиќ.

Македонија | пред 1 седмица

Благајник од прилепската болница присвоил околу 245.000 евра – лишен од слобода по акција на Финансиска полиција

Управата за финансиска полиција до Основното јавно обвинителство Прилеп поднесе кривична пријава против Д.К. во својство на службено лице при ЈЗУ Општа болница со проширена надлежност „Борка Талески“ Прилеп поради постоење на основано сомнение дека сторил кривично дело ”ПРОНЕВЕРА ВО СЛУЖБАТА” од член 354 ст.3 в.в. со член 45 од КЗ на РСМ.Пријавениот во својство на службено лице, вработен на работно место самостоен референт - главен благајник во Одделение за материјално финансиско работење во Сектор за материјално – финансиски работи и сметководство при ЈЗУ Општа болница со проширена надлежност „Борка Талески“ Прилеп, во периодот од 01.01.2020 до 31.12.2021 година, со цел да прибави за себе противправна имотна корист, во повеќе наврати дел од наплатените и примени парични средства од шалтерите на болницата, наплатени од пациентите по основ на партиципација и приватни здравствени услуги, не ги уплатил на банкарската сметка на болницата и истите противправно ги присвоил за себе, односно за 2020-та година присвоил парични средства во износ од 6.568.726 денари и за 2021-ва година присвоил парични средства во износ од 8.494.558 денари, со што го оштетил Буџетот на ЈЗУ Општа болница со проширена надлежност „Борка Талески“ во вкупен износ од 15.063.284 денари.По насоки на Основно јавно обвинителство Прилеп во текот на утринските часови од страна на службени лица на Управата за финансиска полиција пријавеното лице е лишено од слобода и истото е изведено пред пред судија на претходна постапка при Основен суд Прилеп

Македонија | пред 1 седмица

Трамп остро ја нападна Европа, фон дер Лајен возврати: „Никој нема право да се меша во европската демократија“

Американскиот претседател Доналд Трамп повторно ја критикува Европската Унија, а претседателката на Европската комисија Урсула фон дер Лајен му порача дека ниту една надворешна сила не смее да се меша во демократските процеси во Европа. Нејзината реакција следи по објавувањето на новата американска Стратегија за национална безбедност, документ што предизвика силни реакции во Брисел, пренесува Политико.Фон дер Лајен изјави дека „одлуката за тоа кој ќе ја води една држава ја носат само нејзините граѓани“ и додаде дека „суверенитетот на гласачите мора да биде заштитен“. Според неа, никој однадвор нема право да влијае врз изборните процеси во Европа.Оспоруваниот американски документ содржи тези кои добија поддршка од европската крајна десница и од Русија. Во него се тврди дека Европа во следните две децении се соочува со „цивилизациско исчезнување“ и се критикуваат обидите на ЕУ да ја ограничи пропагандата на екстремните десничарски партии, што се нарекува „политичка цензура“. Документот отворено повикува на „отпор кон актуелниот европски курс во рамки на европските нации“.Фон дер Лајен потсети дека токму поради ваквите закани Европската комисија го предложила пакетот „Штит за демократијата“, кој треба да ја засили борбата против странско мешање на интернет, особено во периоди на избори.Таа оцени дека односите со САД се менуваат, но порача дека Европа мора да се потпре на сопствената сила: „Важно е да бидеме горди што сме Европска Унија, да ги препознаеме нашите капацитети и да се соочиме со предизвиците пред нас“, рече таа, нагласувајќи дека „обединета Европа“ мора да биде клучната цел.Критиките од Брисел доаѓаат по интервју во кое Трамп ја опиша Европа како „континент во пропаѓање“ предводен од „слаби лидери“. Иронично, Политико неодамна го прогласи токму Доналд Трамп за личност со најголемо влијание врз европската политика во годината што доаѓа.

Свет | пред 1 седмица

Осумдневно бебе донесено без знаци на живот во прилепската болница

На 11.12.2025 во 08:35 часот во СВР Битола е пријавено дека на детско оделение Општа болница „Борка Талески“ во Прилеп без знаци на живот било донесено бебе на возраст од осум дена.По наредба на јавен обвинител, телото на бебето е дадено на обдукција.

Македонија | пред 1 седмица

Рекордна прва година - солунското метро „избори“ 27 милиони патници

Солунското метро ја заокружува својата прва година со исклучително висока употреба, достигнувајќи 27,04 милиони патувања од октомври 2024 до октомври 2025 година. Тоа значи дека системот бележи просечно околу 2,4 милиони качувања месечно, што го поставува како една од најкористените услуги за јавен превоз во градот.По краткиот прекин, метрото минатиот понеделник повторно беше пуштено во функција, а во тек е подготовката за проширување кон Каламарија. Со ова проширување, Солун за првпат ќе добие поврзување исток–запад преку превоз со фиксна пруга. Дополнително, Западната приградска железница веќе оперира на рутата од Новата железничка станица до Синдос, патување што трае само 11 минути и е особено важно за студентите на Меѓународниот хеленски универзитет.Автобускиот систем, исто така, минува низ значителни промени. Додека во 2019 година поголемиот дел од возниот парк беше нефункционален, денес сообраќаат 510 автобуси — што претставува 80% оперативност, наспроти само 41% пред шест години. Староста на возилата е преполовена: од 14,5 години во 2019 на 7,8 години сега.Дополнително, OASTH ќе добие 100 нови автобуси во првите два месеци од 2026 година, а во јули се очекува пристигнувањето на првите 50 електрични зглобни возила.Во делот на пристапноста, повеќе од 500 таблички со Брајова азбука се поставени на автобуските постојки, а планот е нивниот број да достигне 1.000 до крајот на годината.

Свет | пред 1 седмица

Награди за најубаво украсените скопски домови и дворови: Град скопје почнува нова манифестација „Украсуваме по скопски“

Град Скопје ја стартува новогодишната манифестација „Украсуваме по скопски“, со која граѓаните се повикуваат да се пријават и да учествуваат во изборот на најубаво украсен двор, тераса и најдобар средношколски расказ. Пријавувањето трае до 23 декември, а жири-комисија од медиумски претставници ќе ги оценува учесниците. Наградите ќе бидат доделени на крајот од месецот.„УКРАСУВАМЕ ПО СКОПСКИ!“Почитувани,Новогодишните и божиќните празници се најубавиот дел од годината, време кога градот блеска, а домовите стануваат места исполнети со топлина, радост и празнична магија.Токму во тој дух ја организираме манифестацијата „УКРАСУВАМЕ ПО СКОПСКИ“, со која ги мотивираме и поттикнуваме скопјани да ги украсат своите домови и да придонесат кон создавањето празнична атмосфера низ целиот наш град.Сите заинтересирани граѓани кои сакаат да учествуваат и да се натпреваруваат за најкреативно и највпечатливо новогодишно украсување, може да се пријават на телефонскиот број 3297 265, секој работен ден од 9 до 16 часот, во периодот до 23 декември 2025 година.Фотографиите од украсените домови или дворови, заедно со податоците за сопственикот, контакт-телефон и адреса, може да се испраќаат и на e-адресата kabinet.nastani@skopje.gov.mk или по пошта, на адреса: бул. Илинден бр. 82, со назнака за манифестацијата „УКРАСУВАМЕ ПО СКОПСКИ“.Град Скопје и годинава ќе ги избере најдобрите во следните категории:– Најубаво новогодишно украсен двор од индивидуална станбена куќа– Најубаво новогодишно украсена тераса од стан– Најубави раскази од средношколците на тема новогодишни желби и празнувањаПријавените објекти ќе ги посети жири-комисија составена од претставници на медиумите, кои ќе ги оценуваат и писмените творби на средношколците.Град Скопје ќе обезбеди соодветни награди за најуспешните учесници во сите категории, а доделувањето на наградите ќе се одржи на крајот од декември 2025 година.Да го украсиме Скопје, секој дом, секоја тераса, секое срце. Да ја донесеме празничната магија во секој дом!, објави скопскиот градоначалник

Скопје | пред 1 седмица

Германија се откажува од приемот на Авганистанците што чекаат во Пакистан, можно е до крајот на годинава да бидат вратени на талибанскиот режим

Иако голем број Авганистанци со месеци живеат во пакистански пансиони финансирани од германската држава и имаа добиено уверувања дека ќе бидат хуманитарно примени, Берлин сега ја повлекува таа понуда. Како што пренесува Дојче веле, овие луѓе ќе добијат официјално известување дека „повеќе нема политичка волја“ нивниот прием да се реализира.Портпаролката на германското Министерство за внатрешни работи, Соња Кок, потврди дека околу 640 лица што се наоѓаат на територијата на Пакистан веќе немаат перспектива да заминат за Германија, иако тоа претходно им било ветено во рамките на програмите за заштита од талибанскиот режим. Новата влада на канцеларот Фридрих Мерц реши да ги укине повеќето програми за преселување воспоставени од претходната коалиција.Претходната влада предвидуваше прием на активисти за човекови права, новинари, жени што се соочуваат со прогон и други ранливи категории. Новиот министер за внатрешни работи, Александар Добриндт, ги нарече тие обврски „прашања наследени од минатата влада“ и ги стопираше.Одлуката првпат ги погоди и луѓето кои работеле за германските институции во Авганистан. Хуманитарната организација „Кабул-Луфтбрике“ потврди дека околу 130 од нив – за кои веќе била донесена позитивна одлука – добиле известивање во кое се наведува дека приемот е одбиен. Пораката, испратена од агенцијата ГИЗ, наведува дека нема правен основ за прием според член 22 од Законот за престој.Според податоците што ги даде Кок, од останатите 220 локални работници, само 90 ќе можат да поднесат барање за прием. Добриндт изјави дека Германија ќе ги исполни само оние ветувања кои претставуваат правно обврзувачка одлука и нагласи дека сите кандидати мора да минат безбедносна проверка. До април 2025 година, Германија има прифатено околу 4.000 локални соработници и речиси 15.000 членови на нивните семејства.Ситуацијата станува итна, бидејќи пакистанските власти предупредуваат дека на крајот од годината би можеле да ги предадат Авганистанците на талибанскиот режим. Иако неколку стотици лица се преселени по промената на владата, околу 1.000 луѓе и понатаму се заглавени во неизвесност.Повеќе од 250 организации – меѓу кои „Хјуман рајтс воч“ и „Про азил“ – упатија отворено писмо до министерот Добриндт, барајќи веднаш да се обезбеди прием за ранливите семејства. Хелен Резен од „Про азил“ изјави дека ова ќе биде „испит за кредибилитетот и човечноста“ на германската влада.Иако засегнатите нема веднаш да останат без сместување, како што потврдува Соња Кок, германските власти нудат и опција за враќање во Кабул – потег што многумина го доживуваат како ризичен, со оглед на безбедносната ситуација под талибанска контрола.Дојче веле наведува дека во моментов околу 1.800 Авганистанци сè уште се надеваат дека Германија ќе најде начин да ги спаси.

Свет | пред 1 седмица