Филипче тврди дека е мета на клевети

Претседателот на Социјалдемократскиот сојуз на Македонија, д-р Венко Филипче, на денешната вонредна прес-конференција, жестоко реагираше на континуираната црна кампања и јавниот линч што власта го води против него.„Секој ден сум предмет на јавен линч, преку груби лаги и постојана црна кампања и манипулации. Дубаи, згради од 42 спрата, визи, Венеција, Сент Морис итн. Пред некој ден ме споредија дури и со Џим Џонс, убиец на 300 деца. Вчера, отидоа дотаму, да преку Жан Митрев, за кого како лекар не можам да кажам што мислам, ме обвинија за рекет за цела болница“, рече  Филипче.Како што кажа Филипче, ВМРО-ДПМНЕ ја премина секоја граница и најави дека ќе покрене судска постапка против сите инволвирани.„ВМРО-ДПМНЕ  ја помина секоја граница и јас преку ова нема да поминам. Ова не е политика. Претераа. Ова веќе ги поминува сите можни граници. Што ќе смислат следно, утре ќе ме обвинат и за силување, за убиство? За што следно? Доста е веќе. Сега ќе ги тужам. Мојот одговор преку суд ќе го добијат и наредбодавачите и извршителот“, нагласи Филипче.Воедно, Филипче на денешната прес-конференција јавно го повика Жан Митрев да постапи институционално, доколку смее и најави дека ќе ги гони и нарачателите и извршителот.„Го повикувам Жан Митрев нека отиде кај обвинител и нека поднесе Кривична пријава ако смее, па да одговара по Кривичен закон. Не го прават тоа затоа што знаат дека ќе одговараат, а не вака да ги тужам само за клевета. Е, затоа власта не сака реформи, не сака реформирано правосудство по европски стандарди, за токму ова да го прави“, рече,  претседателот на СДСМ, Венко Филипче.

Македонија | пред 2 седмици

Судска битка тешка милијарди: Маск против OpenAI и Microsoft

Илон Маск покрена судска постапка против OpenAI и Microsoft, со која бара отштета во износ до 134 милијарди долари, тврдејќи дека двете компании незаконски стекнале огромна добивка врз основа на неговата рана финансиска и институционална поддршка на организацијата што развива вештачка интелигенција.Според судските поднесоци, OpenAI наводно остварил добивка меѓу 65,5 и 109,4 милијарди долари, додека Microsoft инкасирал од 13,3 до 25,1 милијарда долари, благодарение на процеси и трансформации што, според Маск, се спротивни на основачката мисија на организацијата. Маск бил еден од коосновачите на OpenAI во 2015 година, кога организацијата функционирала како непрофитна, а од неа се повлекол во 2018 година.Во тужбата се наведува дека Маск вложил околу 38 милиони долари, што претставувало околу 60 отсто од почетното финансирање на OpenAI. Со тие средства, според неговите адвокати, биле регрутирани клучни кадри, обезбедени важни контакти и ѝ бил даден кредбилитет на организацијата во раната фаза на развој.OpenAI остро ја отфрли тужбата, оценувајќи ја како „неоснована“ и дел од, како што наведуваат, кампања на Маск за притисок и злоупотреба на судскиот систем. Од Microsoft, пак, соопштија дека не постојат докази дека компанијата „помагала или поттикнувала“ какво било незаконско постапување. Потсетуваат дека Microsoft првпат инвестирал во OpenAI во 2019 година, веќе откако Маск ја напуштил организацијата.Маск денес е сопственик на компанијата xAI и развива конкурентски чет-бот со име „Грок“, а во тужбата тврди дека OpenAI ја прекршил својата основачка мисија преку трансформацијата од непрофитна во комерцијална структура.Судија во Оукленд, Калифорнија, на почетокот на месецов одлучи процесот да се води пред порота, а судењето е закажано да започне во април. Во тужбата се наведува дека пресметката на потенцијалната отштета ја изработил финансискиот експерт К. Пол Вазан, а Маск, покрај финансиска компензација, најавува дека може да побара и дополнителни санкции.Од OpenAI и Microsoft побарале од судот да ја ограничи или целосно да ја отфрли експертизата на Масковиот финансиски советник, оценувајќи ја како „измислена, непроверлива и без преседан“. Според нив, барањето за пренос на милијарди долари од организација во која Маск бил донатор, а подоцна станал конкурент, претставува опасен и правно неодржлив преседан.

Свет | пред 2 седмици

Тројца возачи лишени од слобода поради возење под дејство на алкохол, еден излетал од патот кај Велес

Тројца возачи биле лишени од слобода во одвоени случаи во Велешко, Валандово и Гевгелија, откако полициските контроли утврдиле дека управувале возила под дејство на алкохол, соопшти Министерството за внатрешни работи.На 16 јануари околу 17 часот, полициски службеници од СВР Велес го привеле И.П. (43) од селото Владиловци, општина Чашка. Претходно, на регионалниот пат Велес – село Извор, на мостот на реката Бабуна, тој со патничко возило „шкода“ со велешки регистарски ознаки удрил во бетонски столб од мостот. При увидот било утврдено дека возачот го управувал возилото со 2,45 промили алкохол во крвта.Истиот ден, исто така околу 17 часот, во Валандово, полициски службеници од СВР Струмица – ОВР Валандово го лишиле од слобода Т.К. (59) од Валандово. За време на сообраќајна контрола бил сопрен трактор со валандовски регистарски ознаки, кој го управувал приведениот. По преземените мерки било утврдено дека возачот имал 1,59 промили алкохол во крвта.Во раните утрински часови на 17 јануари, во 01:23 часот, во Гевгелија, полициски службеници од СВР Струмица – ОВР Гевгелија го привеле С.С. (29) од селото Корешница, општина Демир Капија. При сообраќајна контрола било сопрено патничко возило „ауди“ со демиркаписки регистарски ознаки, а по алкотестирањето било утврдено дека возачот имал 1,53 промили алкохол во крвта.Од Министерството за внатрешни работи информираат дека по целосно документирање на сите случаи ќе бидат поднесени соодветни пријави по член 297-а од Кривичниот законик за „безобѕирно управување со моторно возило“.

Македонија | пред 2 седмици

Националниот парк Шар Планина со детали за инцидентот со ратраците: Притисоци, закани и неовластена уплата

Јавната установа Национален парк Шар Планина соопшти дека веќе четврта година континуирано работи на регулирање на дејноста скијање со ратрак-машини надвор од скијачкиот центар Попова Шапка, согласно Планот за управување со паркот и правилата за движење на моторни возила на заштитеното подрачје.Од институцијата нагласуваат дека оваа дејност е дозволена исклучиво под строго утврдени услови и со почитување на актите и одлуките што ги има донесено Националниот парк, како институција основана од Владата на Република Македонија. Операторите кои ја вршат дејноста се обврзани целосно да ја почитуваат законската рамка.Во врска со вчерашната интервенција на терен, од Националниот парк информираат дека службените лица постапувале исклучиво во рамки на своите законски овластувања, со цел контрола на спроведувањето на законите и заштита на природните вредности на Шар Планина. Според нив, немилиот настан што се случил при извршување на службените задачи претставува напад врз правниот поредок и директно го загрозува интегритетот и безбедноста на вработените.На местото на настанот, покрај директорот на Националниот парк, раководителот на Одделението за заштита на природата и чуварите на природа, биле присутни и лица ангажирани од операторот, приватно обезбедување, сопственикот на хотел „Арена“, како и околу педесетина туристи. Дел од лицата ангажирани од операторот, како што наведуваат од институцијата, влегле во конфликт со вработените, ја попречувале нивната работа, го нарушиле нивниот личен дигнитет и го довеле во ризик нивниот живот и здравје.Поради ескалација на ситуацијата, во 9:15 часот било упатено барање за полициска поддршка на бројот 112, од каде, според Националниот парк, не биле преземени конкретни мерки против лицата кои го предизвикале инцидентот, ниту било спречено понатамошното користење на ратраците. Присутните, како што се наведува, го напуштиле местото со скандирања и навреди.По завршување на настанот, претставници на Јавната установа се упатиле во Полициската станица во Тетово, каде што поднеле соодветна пријава, оценувајќи дека законитоста на постапувањето на терен треба да биде предмет на темелна и дополнителна истрага.Дополнително, од Националниот парк информираат дека додека давале изјава во полиција, во 13:26 часот, на сметката на институцијата била извршена уплата од 300.000 денари од ресторан „Арена“, со назначена цел „аванс за надомест за вршење дејност со ратрак по регистриран пат“. Од паркот појаснуваат дека ресторанот не е регистриран оператор, нема договор со институцијата и не поседува лиценци за вршење на ваква дејност.Средствата, како што наведуваат, се уплатени без издадена фактура или претходно барање и ќе бидат вратени во првиот нареден работен ден, а за случајот е известен и Секторот за економски криминал.

Македонија | пред 2 седмици

Бенон: Канада може да биде „следната Украина“ поради кинеските амбиции на Арктикот

Американскиот претседател Доналд Трамп се подготвува да му се спротивстави на растечкото кинеско влијание во Канада, како дел од проширувањето на таканаречената „Донро доктрина“ на целата западна хемисфера, изјави неговиот поранешен шеф на кампања и главен стратег во Белата куќа, Стив Бенон.Според Бенон, Канада би можела да стане „следната Украина“ поради, како што тврди, неможноста самостојно да ја брани својата северна арктичка граница и поради засилените кинески интереси во регионот.„Следната голема работа ќе биде Канада. Канада е следната Украина бидејќи не може да ја одбрани својата северна арктичка граница и Кина ќе дојде да загризе. Тие не можат да ја бранат, а Трамп ќе настапи силно кон Канада“, изјави Бенон.За време на првиот мандат на Трамп беше формирана специјална работна група за Арктикот, со што, според поранешни функционери на Белата куќа, претседателот стекнал подлабоко разбирање за геостратешкото значење на регионот, вклучително и на Гренланд. Истите извори наведуваат дека загриженоста во Вашингтон значително пораснала откако Кина во 2018 година самата себе се опиша како „речиси арктичка држава“.Дополнителна вознемиреност кај американската администрација предизвикува и зајакнувањето на односите меѓу Канада и Кина. Канадскиот премиер Марк Карни неодамна ја посети Кина, првпат по речиси една деценија, при што кинескиот претседател Си Џинпинг и Кина ги нарече „стратешки партнери“. Карни изјави дека постигнатиот напредок и партнерството ги подготвуваат двете земји за „новиот светски поредок“.Во исто време, Трамп јавно истакна дека неговиот интерес за Гренланд не е само територијален, туку и дел од поширока стратегија за држење на Русија и Кина подалеку од клучните арктички региони. По неодамнешната американска операција во Венецуела, која заврши со апсење на Николас Мадуро, меѓународната заедница, според аналитичарите, посериозно почна да го сфаќа новото толкување на Монроовата доктрина од страна на Трамп.„Монроовата доктрина беше голема работа, но ние одамна ја надминавме. Сега ја нарекуваат Донро доктрина“, изјави Трамп, нагласувајќи дека според новата стратегија за национална безбедност, американската доминација во западната хемисфера повеќе нема да биде доведена во прашање.Таканаречената „Донро доктрина“ ја проширува класичната Монроова доктрина со цел спречување на какво било позиционирање на воени или стратешки капацитети од страна на не-хемисферни сили, како Русија и Кина, во истата хемисфера со САД. Овој пристап е детално опишан и во Стратегијата за национална безбедност на Белата куќа, објавена во ноември.Републиканците во американскиот Сенат во голема мера ја поддржаа оваа визија. Сенаторот Ерик Шмит од Мисури изјави дека со „Донро доктрината“ Трамп го оживува принципот кој бил темел на американската надворешна политика во најголемиот дел од историјата.„Под водство на Трамп, Америка се однесува како суперсила каква што е – без извинување за политики што ја прават земјата побезбедна и посилна“, порача Шмит.

Свет | пред 2 седмици

Фатен бегалец од Идризово по кражба на мобилен телефон во центарот на Скопје

Полициски службеници од СВР Скопје рано утринава го лишија од слобода 43-годишниот Ј.П. од Скопје, кој бил баран поради бегство од Казнено поправна установа Затвор Идризово.Како што информира Министерство за внатрешни работи, апсењето било извршено на 17 јануари околу 4 часот наутро, на подрачјето на општина Центар, по претходна пријава дека осомничениот вечерта на 16 јануари, околу 21:50 часот, во угостителски објект одзел мобилен телефон од 23-годишна девојка од Скопје.При преземените мерки било утврдено дека Ј.П. е лице по кое се трага по наредба од Основниот кривичен суд, поради бегство од затворот Идризово. Одземениот мобилен телефон е пронајден и вратен на оштетената.По целосно документирање на настанот, Ј.П. е вратен во Затвор Идризово, а против него ќе биде поднесен соодветен поднесок, информираат од МВР.

Македонија | пред 2 седмици

Возило „киа“ удрило во пешак во Скопје, жената со тешки повреди пренесена на Клиника

Жена на возраст од 48 години се здобила со тешки телесни повреди во сообраќајна несреќа што се случила утринава во Скопје, информира Министерството за внатрешни работи.Според информациите од МВР, на 16 јануари 2026 година околу 08:00 часот во СВР Скопје било пријавено дека на улицата „Војвода Васил Чакаларов“ патничко возило „киа“ со скопски регистарски ознаки, управувано од Д.П. (52) од Скопје, удрило во пешакот Р.Д. (48), исто така од Скопје.Во несреќата, пешакот се здобил со тешки телесни повреди, кои биле констатирани во Комплексот клиники „Мајка Тереза“ во Скопје.На местото на настанот бил извршен увид од страна на увидна екипа од СВР Скопје, а се работи на целосно расчистување на околностите под кои се случила сообраќајната несреќа.

Скопје | пред 2 седмици

Ново семејно насилство: Скопјанка пријави дека сопругот ја нападнал со тврд предмет и ѝ се заканувал со остар предмет

Жена на возраст од 29 години пријавила семејно насилство во СВР Скопје, информира Министерството за внатрешни работи.Според пријавата, на 10 јануари 2026 година, во семејниот дом на подрачјето на општина Петровец, таа била физички нападната од нејзиниот сопруг К.Ј. (33), кој употребил тврд предмет, а воедно ѝ упатувал и закани со остар предмет.Како што е наведено во пријавата, претходно сопругот физички ја нападнал и нивната малолетна ќерка.Од Министерството за внатрешни работи информираат дека по целосно документирање на случајот ќе следува соодветен поднесок до надлежните институции.

Скопје | пред 2 седмици

УЈП: Целосна соработка со обвинителството во случајот со 11 вработени, нема компромис со незаконитости

Управата за јавни приходи соопшти дека континуирано соработува со сите надлежни институции во случаите каде што постои сомневање за незаконито постапување во даночната област и дека наодите од спроведените контроли претставуваат основа за постапување на другите надлежни органи.Во врска со актуелниот случај кој се однесува на 11 вработени, од УЈП информираат дека се во постојана и целосна координација со обвинителството, при што биле обезбедени и доставени целосна документација, релевантни материјали и експертски појаснувања поврзани со даночната регулатива и постапките.„Нема компромис кога станува збор за незаконито постапување, злоупотреба или корупција. Овие појави се неприфатливи и целосно спротивни на професионалните и етичките принципи на институцијата“, нагласуваат од Управата за јавни приходи.Истовремено, од УЈП потсетуваат дека во сите постапки мора доследно да се почитува принципот на презумпција на невиност, како темелна гаранција на правниот поредок.Додека трае постапката, Управата за јавни приходи, како што се наведува во соопштението, презела навремени и соодветни мерки за обезбедување непречено функционирање на институцијата и стабилност на работните процеси во засегнатата организациона единица. Со тоа, се овозможува континуитет во работењето, заштита на јавниот интерес и зачувување на институционалниот интегритет.Од УЈП порачуваат дека остануваат посветени на владеењето на правото, отчетното и професионално постапување и на заштитата на јавниот интерес, најавувајќи дека ќе продолжат со целосна соработка со надлежните органи со цел утврдување на одговорност таму каде што постои, но и зачувување на угледот, довербата и интегритетот на институцијата и нејзините вработени.

Македонија | пред 2 седмици

Украина под нов жесток удар, Киев во мрак, Запорожје на праг на катастрофа

Војната во Украина влезе во 1.424. ден, можности за мир само се најавуваат, а борбите продолжуваат со сериозни предупредувања од претседателот Володимир Зеленски дека Русија подготвува нови масовни напади низ земјата.Во вакви услови е договорено само ограничено и привремено примирје, исклучиво за да се овозможи поправка на последниот резервен далекувод во нуклеарната централа Запорожје.Киев се соочува со најтешката енергетска криза од почетокот на војната. Градоначалникот Виталиј Кличко предупреди дека главниот град располага со едвај половина од потребната електрична енергија, по разорните руски напади врз енергетската инфраструктура.Западната поддршка продолжува. Претседателот на Чешка, Петр Павел, најави дека Украина ќе добие борбени авиони способни за соборување непријателски дронови, додека Велика Британија јасно порача дека нема разговори со Путин, туку фокусот е исклучиво на поддршка на Украина.Во исто време, Кремљ тврди дека сè уште не е утврден датум за средби со американски претставници.Меѓународната агенција за атомска енергија потврди локален прекин на огнот околу Запорожје, но клучното прашање останува: колку долго може да трае овој кревок договор додека војната влегува во уште поопасна фаза?

Свет | пред 2 седмици

(Видео) Еколошки скандал во Ужице: 800 кубици отров се излеа во поток, институциите молчеа со часови

Депонијата „Дубоко“ повторно се претвори во еколошка бомба. Поради хаварија во собирната шахта, во Турски Поток се излеале над 800 кубни метри концентрирани, загадени процедни води, додека надлежните институции со часови не презеле ништо.Реакција имало дури откако граѓанското здружение „Да не дишеме Дубоко“ го пријавило инцидентот. Наместо итна интервенција и јасна одговорност, јавноста доби задоцнето соопштение и неубедливи изговори за „пукната цевка“ и „заштитен балон“.Овој инцидент не е несреќа, туку резултат на системска негрижа и свесно игнорирање на предупредувањата, реагираат невладините здруженија. Уште во ноември беше укажано дека депонијата претставува сериозна закана, но институциите молчеа.Граѓаните револтирано прашуваат:Зошто десет часа никој не реагирал? Кој дозволи овој еколошкиот криминал да се случи? И кој ќе одговара за загадувањето и ризикот по здравјето на граѓаните?

Свет | пред 2 седмици

Хаменеи го обвини Трамп

Протестите кои со недели ја потресуваа Иран сега се смирија, но по немирите останаа илјадници загинати и сериозни обвиненија од највисоките власти. Врховниот лидер на Иран, ајатолах Али Хаменеи, го обвини американскиот претседател Доналд Трамп за „жртвите и штетите“ предизвикани за време на протестите, додека организациите за човекови права наведуваат дека во нивното гушење се убиени повеќе од 3.000 луѓе, пренесува Sky News.Во својата прва објава на социјалната мрежа X на 12 јануари, Хаменеи изјави дека го смета Трамп за одговорен за „жртвите, штетите и клеветите изнесени против иранскиот народ“. Претходно, тој ги обвини демонстрантите дека делуваат во име на Трамп и други „странски терористи“, нарекувајќи ги „вандали и разбојници“ кои „ги уништуваат сопствените улици за да го задоволат претседателот на друга земја“. За време на немирите, дел од демонстрантите палеа слики на Хаменеи, што стана симбол на отпорот против режимот.Протестите избувнаа на 28 декември поради економски тешкотии, но брзо се проширија низ целата земја со повици за крај на клерикалната власт. Снимките од 30 декември прикажуваа студенти кои маршираа заедно со трговци во Техеран, викајќи пароли во чест на Реза Шах, основачот на династијата соборена во Исламската револуција во 1979 година.Американската група Human Rights Activists News Agency (HRANA) потврди 3.090 смртни случаи, вклучително и 2.885 демонстранти. Иранската државна телевизија, пак, наведе бројка од 300 жртви. Sky News независно потврди повеќе од 110 смртни случаи, меѓу кои шест жени и 11 деца, истакнувајќи дека приказните на жртвите покажуваат обиди на режимот да ја прикрие бруталноста.Во последните денови нема знаци на нови протести, а животот на улиците во Техеран и другите градови се враќа во нормала. Властите започнаа со пописување на штетите предизвикани од демонстрациите: оштетени се 350 џамии, 126 молитвени сали, 80 домови на имами, 400 болници и стотици возила на итните служби. Пристапот до интернет беше речиси целосно блокиран повеќе од една недела, што го отежнуваше добивањето проверени информации, а организацијата за кибернетичка безбедност NetBlocks забележа „многу слаб раст на интернет-поврзаноста“ по 200 часови прекин.По извештаите за убиствата, Трамп најави дека САД „ќе помогнат“ и воведе царина од 25% за земјите што тргуваат со Иран. Подоцна, тој го промени тонот и му се заблагодари на иранското водство за откажувањето на „над 800 егзекуции“. Американскиот претседател изјави дека никој не го убедил да не напаѓа, туку дека сам се уверил откако егзекуциите беа откажани.Во Вашингтон, на конференција за новинари, прогонетиот ирански престолонаследник Реза Пахлави изјави дека „Исламската Република ќе падне – не ако, туку кога“ и повика на меѓународна помош за свргнување на режимот. Тој понуди да води привремена влада која ќе ја врати земјата во демократија и ќе обезбеди слободни избори, иако аналитичарите сметаат дека неговата изјава за брз колапс на режимот е тешко проверлива, а и самиот Трамп претходно изрази скептицизам кон Пахлави.Поддршка за иранската опозиција се изрази и со протести низ светот. Пред иранската амбасада во Лондон избиле насилни немири, при што беа повредени неколку полицајци, а четири лица се пренесени во болница. Полицијата соопшти за бројни апсења поради фрлање проектили кон службени лица.

Свет | пред 2 седмици

Иран повеќе не е поканет на Минхенската безбедносна конференција: „Тоа не би било соодветно“

Организаторите на Минхенската безбедносна конференција соопштија дека ги поништиле поканите упатени до претставници на иранската влада за годинашното издание на настанот, кое ќе се одржи од 13 до 15 февруари, поради жестоката репресија врз демонстрантите во Иран, пренесе агенцијата Франс прес.Портпаролот на конференцијата изјави дека поканите биле испратени пред неколку недели, но дека во светло на актуелните настани одлучено е тие да не бидат уважени. Одлуката доаѓа по масовните протести кои избувнаа во Иран на 28 декември поради високите трошоци за живот и прераснаа во едни од најголемите антирежимски демонстрации од прогласувањето на Исламската Република во 1979 година.Невладината организација „Иран хјуман рајтс“ од Норвешка соопшти дека има потврдени најмалку 3.428 загинати лица, според податоци проверени од организацијата или од независни извори. Други проценки наведуваат дека бројот на жртви надминува 5.000, а според некои дури достигнува и 20.000, но ограничениот пристап до интернет значително ја отежнува проверката на информациите од страна на медиумите и организациите за човекови права.Претходно, портпарол на германското Министерство за надворешни работи изјави дека не се смета за соодветно учеството на иранскиот министер за надворешни работи Абас Аракчи на конференцијата, имајќи го предвид, како што беше наведено, крвавиот однос на властите кон демонстрантите. Според министерството, на организаторите им било укажано дека таква покана не би била соодветна во актуелниот контекст.Минхенската безбедносна конференција е еден од најзначајните годишни настани на дипломатскиот календар и редовно собира водечки светски политички лидери и функционери. Минатогодишното издание остана запаметено по настапот на американскиот потпретседател Џеј Ди Венс, кој ги критикуваше европските земји, обвинувајќи ги за поткопување на демократијата и слободата на изразување, оценувајќи дека состојбата со слободата на говор во Европа е позагрижувачка дури и од заканите од Русија и Кина.

Свет | пред 2 седмици

Рама „се нафрли” на Јавниот сервис: Менаџментот на РТШ е „најмизерната служба на светот“

Албанскиот премиер Еди Рама жестоко го критикуваше Јавниот сервис, дури спомна и опција за негово гаснење. Тој го нарече менаџментот на Албанската радио-телевизија (РТШ) „најмизерната служба на светот“.Рама посочи дека нема да се издвојуваат јавни пари се додека не се спроведат реформи во РТШ. Според него, сите опции се на маса, вклучувајќи затворање, приватизација или партнерство.Тој рече дека јавниот сервис е неуспешен и оти неговото работење е полошо од помалите комерцијални телевизиски станици со помал буџет и кажа дека не ја следел програмата на РТШ од 1990 година и оти претходно им дал можност на директорите да ја подобрат својата работа, но без успех.Здружението на новинари на Албанија реагираше на изјавите на албанскиот премиер, оценувајќи дека неговата реторика „ги стигматизира јавните медиуми“ и предлага драстични решенија што „сериозно би го загрозиле медиумскиот плурализам и уредничката независност“.Здружението повика на длабинска реформа на РТШ преку дијалог со експерти и граѓанското општество, почитувајќи ги европските стандарди за слобода на медиумите.Здружението нагласи дека РТШ е институција од јавен интерес, која мора да гарантира непристрасно информирање, култура, образование и еднаков пристап до граѓаните.

Свет | пред 2 седмици

Здравство: Забраната за пушење во затворени простории е заштита на здравјето, не удар по угостителите

Предлог-законот за заштита од пушењето, подготвен од Министерството за здравство, не претставува удар по угостителството, туку законско решение насочено кон заштита на правото на здраво и безбедно работно место, соопштија од ресорното министерство. Со законското решение се предвидува целосна забрана за пушење во затворени јавни и работни простории, во согласност со европските стандарди и препораките на Светската здравствена организација.Од Министерството нагласуваат дека со законот се воспоставува јасно и универзално правило, без исклучоци и без сиви зони, кое ги штити сите граѓани. Пушењето, како што се наведува, останува личен избор, но затворениот заеднички простор не смее да биде место каде тој избор се претвора во директен ризик за здравјето на другите присутни.Јавноздравствените анализи укажуваат дека квалитетот на воздухот во затворените простории има директно влијание врз здравјето, при што чистиот воздух значи помалку иритации на дишните патишта, помал број астматични напади и намален ризик од развој на хронични заболувања. Во тој контекст, изложеноста на тутунски чад се третира како прашање на безбедност и здравје при работа, а не како прашање на личен животен стил.Посебен акцент во предлог-законот се става на угостителските објекти, каде што токму вработените се најдолго и најинтензивно изложени на чад од цигари и други тутунски и никотински производи. Според Министерството за здравство, државата има јасна обврска да го заштити правото на вработените на здрава и безбедна работна средина, независно од дејноста во која работат.Министерот за здравство Азир Алиу посочува дека искуствата од европските земји кои веќе вовеле вакви законски решенија покажуваат оти стравувањата од негативни економски последици се неосновани. Како примери ги наведува Ирска, Велика Британија и други држави, каде што ваквите мерки не довеле до пад на приходите, туку до поуреден, поквалитетен и попредвидлив амбиент во угостителските објекти.Според Алиу, забраната за пушење во затворени простории овозможува поголема посетеност од семејства, туристи и граѓани кои преферираат чист воздух, што на долг рок претставува директен бенефит и за самите угостителски објекти. Министерството за здравство порачува дека предлог-законот има за цел да воспостави рамнотежа меѓу економските активности и основното право на заштита на здравјето на граѓаните.

Македонија | пред 2 седмици

СДСМ: Одлуката на САД за визите е порака, стануваме земја од „третиот свет“

Социјалдемократскиот сојуз на Македонија (СДСМ) оцени дека одлуката на Соединетите Американски Држави да ја суспендираат обработката на визи за македонските граѓани не претставува „техничка пауза“, туку сериозно предупредување за насоката во која се движи државата.Од партијата наведуваат дека Македонија ја плаќа цената на, како што велат, погрешните политики на премиерот Христијан Мицкоски, кои водат кон затворање, изолација и губење на довербата кај стратешките партнери, при што земјата се доведува во позиција на држава од „третиот свет“.СДСМ ја обвинува Владата дека нејзината надворешна политика е сведена на антиамерикански активности, посочувајќи го вицепремиерот Стоилковиќ како пример за, според нив, отворени проруски ставови и директни врски со Москва.Истовремено, од опозициската партија предупредуваат на, како што ја нарекуваат, агресивна анти-Европска Унија кампања, при што, наместо спроведување реформи, намерно се продуцираат судири со Грција и Бугарија и повторно се отвораат, како што велат, затворени прашања со цел да се оправда изолацијата и да се избегнат вистински решенија.Според СДСМ, мерката на САД е индикатор за реалната позиција на Македонија на меѓународната мапа, оценувајќи дека државата се движи кон сериозна меѓународна маргинализација.Од партијата посочуваат дека ова се само првите чекори и потсетуваат дека САД веќе носат Закон за Западен Балкан, насочен кон борба против криминалот и корупцијата.СДСМ најави дека ќе продолжи, како што велат, јасно, гласно и одговорно да ја разоткрива „опасната агенда“ на власта и да се бори против политиките на изолација, криминал и нарушување на стратешкото партнерство со Соединетите Американски Држави.

Македонија | пред 2 седмици

Скопје утрово: Магла, азотни оксиди и отрови во воздухот

Скопјани денеска се разбудија со густа магла, токсична мешавина од ПМ честички, азотни оксиди. Денешните вредности на PM10 и PM2.5 значително го надминуваат ЕУ стандардите.Еве ги најновите податоци од мерења на реалното време на меѓународната платформа iQair:PM10 се движат околу 104–150 µg/m³, што е повеќе од два пати над препорачаната граница на СЗО од 45 µg/m³ за дневен просек.PM2.5 исто така се на високи нивоа, со измерени вредности од 76–104 µg/m³ и се драматично над дозволеното на СЗО (15 µg/m³ за 24-часовен просек. Ова е сериозно здравствено ризично ниво и опасен воздух.ПМ2.5 честитките длабоко продираат во белите дробови и крвните садови.Бидејќи никакви маски не помагаат целосно, треба да се избегнува излегување кога е вака загаден воздухот.

Скопје | пред 2 седмици

Ниа Ноар не постои: Вештачка интелигенција измами милиони корисници на „Тик-ток“

Модел создаден со вештачка интелигенција, познат како Ниа Ноар, успеал да измами милиони корисници на социјалните мрежи, собирајќи огромен број прегледи и следбеници. Нејзиниот профил на „Тик-ток“ брои околу 2,7 милиони следбеници, а едно од видеата достигнало речиси 199 милиони прегледи.Иако голем број корисници верувале дека станува збор за вистинска личност, подоцна било утврдено дека Ниа Ноар е целосно генерирана со вештачка интелигенција. Дел од корисниците забележале дека нејзините танци и облека често се идентични со оние на реални креатори, додека позадините во видеата изгледаат статично и неприродно, особено во сцени кои наводно се снимени на отворено.Коосновачот на „Планет ВПН“, Константин Левинзон, објаснува дека содржините создадени со вештачка интелигенција најчесто се препознаваат по неприродно мазна кожа, „стаклен“ сјај на очите, проблеми со екстремитетите и неускладеност меѓу субјектот и позадината. Според него, лицата кај ВИ-содржините често изгледаат „исклесано“, а не фотографирано.Сè уште не е познато кој стои зад профилот, ниту дали ликот е базиран на реална личност. Сепак, и покрај очигледните знаци, содржината била доволно убедлива за да измами милиони луѓе ширум светот.

Свет | пред 2 седмици

Студено утро со минусни температури и снег на планините

Утрово во земјава е измерено студено време со минусни температури во повеќе места. Најстудено е на Попова Шапка со –4 степени, а под нулата се и Скопје-Петровец, Тетово, Маврови Анови, Штип и Берово. Во Гевгелија утрово се измерени 6 степени Целзиусови.На планинските места има снежна покривка, и тоа 25 сантиметри на Попова Шапка, како и по 7 сантиметри во Маврови Анови и Крушево.Според податоците од Управата за хидрометеоролошки работи (УХМР), денеска времето ќе биде променливо облачно со слаби локални врнежи од дожд, а на повисоките места и на планините со слаб снег. По котлините ќе има појава на магла, а максималната дневна температура ќе се движи од 3 до 8 степени.Во Скопје се очекува променливо облачно време со магла и услови за слаб дожд, со максимална температура до 5 степени.

Македонија | пред 2 седмици

„Рацете подалеку од Гренланд“: Масовни протести денеска во Данска и Нуук

Големи протести против амбициите на американскиот претседател Доналд Трамп за преземање на Гренланд се очекуваат денеска во повеќе градови во Данска, како и во главниот град на Гренланд, Нуук.Според најавите на социјалните мрежи, неколку илјади граѓани изразиле намера да учествуваат на протестите што ќе се одржат на Гренланд и во Данска, во Копенхаген, Архус, Олборг и Оденсе, по иницијатива на повеќе гренландски организации.„Целта е да се испрати јасна и едногласна порака за почитување на демократијата и темелните човекови права на Гренланд“, соопшти националната организација на граѓани на Гренланд во Данска – Уагут, на својата интернет-страница.Организаторите, меѓу кои се Уагут, граѓанското движење „Рацете подалеку од Гренланд“ и коалицијата на локални гренландски здруженија Инуити, имаат намера да ја искористат посетата на делегација на американскиот Конгрес во Копенхаген за нивниот глас да биде слушнат на меѓународно ниво.Откако повторно се врати на власт пред една година, Трамп редовно ја споменува можноста за преземање контрола врз огромниот, стратешки важен, но слабо населен арктички остров кој е под суверенитет на Данска. Тој тврди дека Гренланд ќе го преземе „на овој или на оној начин“, со цел, како што вели, да се спротивстави на руските и кинеските интереси на Арктикот.Во петокот навечер, неговиот близок советник Стивен Милер ги потврди американските ставови во врска со територијата.„Гренланд е голем колку една четвртина од САД. Данска, со сета почит, е мала земја со мало стопанство и мала војска и не може да го брани Гренланд“, изјави Милер за телевизијата „Фокс њуз“.Тој додаде дека Соединетите Американски Држави не планираат да „трошат милијарди долари за одбрана“ на територијата, додека суверенитетот би останал во рацете на Данска.Протестите најавени за сабота доаѓаат три дена по состанокот во Вашингтон, на кој данските власти признаа дека во моментов не постои можност за договор со американското раководство за иднината на автономната територија.Иако повеќе европски лидери изразија поддршка за Данска, една од основачките членки на НАТО, американскиот претседател во петокот се закани со воведување царини за земјите што нема да го поддржат неговиот план за стекнување на Гренланд.Повик за протест е упатен и во Нуук, со цел спротивставување на, како што се наведува, „незаконските планови на Соединетите Американски Држави за преземање контрола над Гренланд“.Во меѓувреме, Франција, Шведска, Германија и Норвешка, на кои им се приклучија Холандија, Финска и Обединетото Кралство, оваа недела најавија распоредување воен персонал за извидувачка мисија на Гренланд, во рамки на данската воена вежба „Arctic Endurance“, организирана со сојузниците од НАТО.

Свет | пред 2 седмици

Забелешки и критики од правните експерти, бараат да се доработат измените на Кривичниот законик

Во собраниската Комисија за политички систем и односи меѓу заедниците почна јавната расправа по предлог-законот за изменување и дополнување на Кривичниот законик, поднесен од пратеници од ВМРО-ДПМНЕ.На јавната расправа за збор се пријавени 13 лица од разни области од правосудството – адвокати, професори, истакнати правници, претставници од невладиниот сектор.Дел од нив изнесоа голем број забелешки главно на членот 353 кој се однесува на оние измени кои беа направени во 2023 година со што се амнестираа функционери, како и на измените кои се однесуваат на кривични дела од Сејф сити системот.Ана Чупеска, експотпретседателката на СДСМ, во својство на професор на Правен факултет, смета дека овие измени се правна козметика и инструмент на моќта со цел заштита на политичките елити.„Се воочува свесно амнестирање на службени злоупотреби преку перфидни, би рекла јазични замки и преку субсидијарни клаузули”, вели Чупеска.За Ружица Николовска, адвокат, измените се добри бидејќи во член 353 се додава и искористување на службената положба или овластување на лицето а видно од самата одредба се зголемуваат казните односно се заострува казнената политика.Нејзиниот колега, адвокатот Звонко Давидовиќ вели дека е потребно доработување на законот бидејќи има одредени недоследности и тоа не само во членот 353 во кој не е предвидено одземање на имотната корист кои би ја стекнале функционерите, туку и во одредбите кои го опфаќаат Сејф сити системот.„Се предвидува кога може да се одземе возило ако вози 50 или 70 километри зависно од местото каде. Но никаде не се предвидува да се одземе возило заради 1,5 промили алкохол или дроги. Луѓе што е поопасно 50 километри или 1,5 промили алкохол? Страшно”, рече Давидовиќ.Измените на Кривичниот законик според образложението, со цел отстранување на слабостите во постојните одредби и постапување согласно Решение на Уставен суд од 12 февруари 2025 година.Tенденцијата на предложените законски измени и дополнувања, според предлагачите е унапредување на одредбите за законските битија и заострување на казнената политика преку зголемување на постојните пропишани казни за кривичните дела „Злоупотреба на службената положба и овластување“ од член 353, „Злосторничко здружување“ од член 394.

Македонија | пред 2 седмици

Трамп се шегуваше за укинување на изборите, Белата куќа ги смирува реакциите

Белата куќа соопшти дека американскиот претседател Доналд Трамп не бил сериозен кога пред неколку дена изјавил дека можеби не треба да има избори за Конгресот.Портпаролката на Трамп, Каролин Ливит, појасни дека претседателот всушност се обидувал да биде хумористичен, а не да го доведе во прашање одржувањето на изборите.„Претседателот се шегуваше“, рече Ливит, одговарајќи на прашања од новинарите. Таа додаде дека Трамп зборувал во контекст на пофалба за работата на неговата администрација, сугерирајќи дека тие „вршат толку добра работа“ што треба само да продолжат.Изјава што предизвика реакцииИзјавата на Трамп дојде за време на получасовното интервју за Ројтерс во Овалната соба на Белата куќа. Разговарајќи за среднорочните избори, претседателот изрази фрустрација од историскиот модел според кој владејачката партија често губи места во Конгресот.„Кога ќе победите на претседателските избори, не ги добивате среднорочните избори“, рече Трамп, додавајќи дека неговата администрација направила толку многу што „кога ќе размислите за тоа, воопшто не треба да имаме избори“.Изјавата предизвика загриженост и критики, бидејќи американскиот устав предвидува одржување избори за Конгресот на секои две години, без можност за претседателска одлука за нивно откажување.Белата куќа се обидува да ја смири ситуацијатаПо реакциите што следеа, Белата куќа истакна дека изјавата на Трамп не била политичка порака или предлог, туку дел од неговиот вообичаен реторички стил. Според Ливит, претседателот сакал да истакне дека неговата администрација ги исполнила очекувањата на гласачите, а не да го доведе во прашање уставниот поредок или да најави промени во изборниот систем.

Свет | пред 2 седмици

Крај на „дивото“ инфлуенсерство: Инфлуенсерите со над 10.000 следбеници и заработка мора да се регистрираат во АВМУ

Агенцијата за аудио и аудиовизуелни медиумски услуги (АВМУ) денеска, 16 јануари 2026 година, упати јавен повик до сите инфлуенсери, јутјубери и влогери веднаш да го регулираат својот статус. Со последните законски измени, тие веќе не се сметаат само за хобисти, туку официјално се класифицирани како „даватели на аудиовизуелни медиумски услуги по барање“ и мора да се впишат во Регистарот на Агенцијата.Обврската произлегува од измените на медиумската легислатива донесени во јули 2023 година, со кои за првпат официјално се признава влијанието на креаторите на содржини на социјалните мрежи.АВМУ прецизираше кои инфлуенсери мора да се регистрираат. Обврската важи за физички лица кои ги исполнуваат сите следни критериуми:Објавуваат видеа на платформи како YouTube, Instagram, TikTok и слично.Имаат повеќе од 10.000 следбеници или претплатници.Остваруваат економски интерес од своите содржини.Во последните 12 месеци објавиле најмалку 24 аудиовизуелни содржини.Целта на содржините е да информираат, образуваат или забавуваат, а креаторот има уредничка одговорност за нив.Агенцијата апелира до сите кои ги исполнуваат овие услови да поднесат пријава што е можно поскоро. Формуларите и потребните документи се достапни на веб-страницата www.avmu.mk, во посебниот банер „Инфлуенсери/Влогери“. За дополнителни информации или нејаснотии, отворена е посебна електронска адреса: influenseri@avmu.mk.

Македонија | пред 2 седмици

(Видео) Зеленски : Русија се подготвува за нови големи напади врз Украина

Украинскиот претседател Володимир Зеленски изјави дека разузнавачките податоци покажуваат дека Русија се подготвува за нови големи напади врз Украина. Тој го соопшти ова во своето вечерно обраќање на 16 јануари.„Некои денешни задачи се насочени кон противвоздушната одбрана. Во моментов, разузнавачките податоци укажуваат дека Русите се подготвуваат за огромни нови напади. Отворено разговараме со нашите партнери за противвоздушни ракети и системи кои ни се итно потребни. Залихите се недоволни. Обидуваме се да го забрзаме процесот, и важно е нашите партнери да нè слушнат“, истакна Зеленски.Тој додаде дека Министерството за одбрана на Украина вложува големи напори и ги повика граѓаните да обрнуваат внимание на предупредувањата за воздушни напади.Зеленски претходно, на 8 јануари, исто така предупреди на можен голем руски напад. Во ноќта меѓу 8 и 9 јануари, руски сили со балистички проектил погодиле областа Орешник во Лавовската област, а остатоците од проектилот подоцна ги пронашла Службата за безбедност на Украина. Русите исто така нападнаа и Киев и Киевската област, при што главните цели беа станбени објекти, како и критична и транспортна инфраструктура.

Свет | пред 2 седмици

Откриени нови детали за убиството на Рене Гуд од страна на агент на Службата за имиграција на САД

Нови полициски и медицински документи откриваат дека Рене Никол Гуд, 37-годишна мајка на три деца, била погодена со најмалку три, а можеби и четири куршуми откако агент на американската Служба за имиграција и царина (ICE) пукал во неа додека била во автомобил во Минеполис. Извештаите на итните служби и транскриптите од повиците на 911 детално ја опишуваат хаотичната ситуација по пукањето и состојбата во која ја затекнала брзата помош.Според извештајот на градската противпожарна служба, брзата помош пристигнала неколку минути по првите повици и ја затекнала Гуд без свест, без здив и со многу слаб, неправилен пулс. Имала крв по лицето и горниот дел од телото. Кога била извадена од автомобилот, пулсот ѝ бил „нееднаков, неправилен и едвај опиплив“.Документите покажуваат дека Гуд имала две прострелни рани на десната страна од градниот кош, една на левата подлактица и можно прострелно повредување на левата страна од главата. Крв излегувала од левото уво. Итните служби веднаш започнале реанимација и продолжиле со обиди за спасување за време на транспортот до болница, но околу 10:30 часот лекарите се откажале од обидите за оживување.Пукањето се случило на 7 јануари во 9:38 часот, додека агентите на ICE биле присутни на терен како дел од федералните имиграциски активности во градот. Од достапните податоци не произлегува дека Гуд била цел на планирана операција или дека против неа се спроведувала конкретна акција.Снимките и сведочењата покажуваат дека повеќе агенти се приближиле до автомобилот Honda Pilot кој го управувала Гуд. Додека седела на возачкото место и се обидувала да се помести, агентот Џонатан Рос пукал повеќе пати преку стаклото на автомобилот.Повиците на 911 започнале веднаш и продолжиле повеќе од еден час. Еден сведок изјавил: „Група агенти на ICE пукале во една жена, од непосредна близина, додека била во автомобилот. Пукале бидејќи не сакала да ги отвори вратите. Сè е снимено.“Друг сведок рекол дека автомобилот по пукањето удрил во паркирано возило. Сведоците исто така навеле дека на местото биле правни набљудувачи кои ја следеле работата на федералните агенти.Еден од повиците на 911 дошол и од лице што се претставило како службеник на Министерството за внатрешна безбедност, кој рекол дека „службениците биле заглавени во возилото“ и дека на местото имало „агитатори“, додека пукало од нивните луѓе.Документите покажуваат дека агентот кој пукал го напуштил местото веќе околу 10:04 и бил превезен во федерална зграда. До тој момент локалните власти не знаеле кој ја води истрагата. Сите агенти на ICE ја напуштиле областа до 11:20, а FBI пристигнал десетина минути подоцна и ја презел истрагата.Федералните власти тврдат дека агентот пукал во самоодбрана, наведувајќи дека Гуд се обидела да повреди или да прегази агенти со автомобилот. Министерството за внатрешна безбедност потврдило дека агентот бил повреден во инцидентот.Овие наводи предизвикале силни реакции во јавноста и повеќедневни протести во Минеполис и други американски градови. Демократски политичари и локални власти побарале повлекување на агентите на ICE од градот, предупредувајќи за прекумерна употреба на сила за време на федералните имиграциски операции.Недела дена по смртта на Рене Гуд, друг федерален агент убил маж од Венецуела за кој властите рекле дека побегнал од сообраќаен надзор и физички нападнал агент, што дополнително ја заострило дебатата за употребата на смртоносна сила од страна на федералните служби.

Свет | пред 2 седмици