Поранешниот висок функционер на НАТО бара европска „црвена линија“ поради изјавите на Трамп

Европа мора да заземе значително поцврст став кон, како што ги оцени, „непријателските испади“ на американскиот претседател Доналд Трамп поврзани со Гренланд, истовремено нудејќи рамка за соработка што ќе вклучува економски и безбедносни договори. Ова го порача поранешниот дански премиер и поранешен генерален секретар на НАТО, Андерс Фог Расмусен, во авторски текст објавен во „Економист“.Расмусен потсети на долгогодишната воена поддршка што Данска ѝ ја давала на Америка, нагласувајќи дека данските војници со години учествувале во американските воени операции во Авганистан и Ирак. Тој наведе дека во периодот од 2002 до 2021 година, во 52 наврати, ковчези со посмртните останки на дански војници се враќале дома, откако тие ги загубиле животите борејќи се рамо до рамо со американските сили. Според него, Данска, гледано по глава на жител, претрпела поголеми загуби од речиси сите други членки на коалицијата предводена од САД, па дури и поголеми од самата Америка.Поранешниот дански премиер истакнува дека долго време ја сметал Америка за природен лидер на слободниот свет, како во периодот кога бил премиер, така и додека ја извршувал функцијата генерален секретар на НАТО. Сепак, според него, по изјавите и однесувањето на Трамп кон Данска, која ја нарече еден од најлојалните американски сојузници, „време е да се каже дека е доста“.Расмусен потенцира дека Гренланд не претставува закана за Соединетите Американски Држави и дека островот е заштитен од НАТО. Тој наведува дека секој обид на Русија или Кина да распоредат сили на Гренланд би наишол на заеднички одговор од Алијансата, а не само од данските вооружени сили. Потсети и на безбедносниот договор меѓу САД и Данска од 1951 година, со кој на американските сили веќе им е овозможено зголемување на присуството на островот, додавајќи дека на Вашингтон може да му се понудат и дополнителни економски можности, вклучително и инвестиции на американски компании во природните ресурси на Гренланд.Во текстот, Расмусен предупредува дека класичната дипломатија можеби нема да биде доволна во односот со Трамп. Според него, американскиот претседател верува дека може да го анектира Гренланд затоа што ја гледа Европа како поделена и немоќна, убеден дека на крајот ќе се остане само на зборови, додека САД ќе го добијат она што го сакаат.Тој ја повика Европската унија јасно да ги постави границите и најави дека, доколку се направи обид за промена на суверените европски граници, САД мора да се соочат со целосната сила на европската економска „базука“, преку сериозни ограничувања на увозот и извозот и исклучување на американските компании од европските јавни набавки.На крајот, Расмусен заклучува дека Европа има избор: или ќе одговори со сила и решителност на ваквите притисоци, или ќе биде принудена да прифати сè што ќе ѝ биде наметнато, предупредувајќи дека токму сега е моментот да се повлече јасна и непоместлива линија во „снегот на Гренланд“.

Свет | пред 2 месеци

Нејасен одговор на Трамп за Гренланд ја вознемири јавноста

Американскиот претседател Доналд Трамп одби конкретно да одговори на прашањето колку далеку е подготвен да оди во намерата Соединетите Американски Држави да го преземат Гренланд, испраќајќи кратка, но вознемирувачка порака до јавноста.По обраќањето во Белата куќа со кое одбележа една година од враќањето на претседателската функција, Трамп одговараше на прашања од новинарите. За разлика од долгиот и содржаен говор, дел од одговорите беа куси и директни.На директното прашање колку е подготвен да оди далеку за да го оствари планот за преземање на Гренланд, Трамп одговори само: „Ќе дознаете“.Ваквата изјава дополнително ги засили шпекулациите и загриженоста кај европските сојузници, особено Данска и Гренланд, откако американскиот претседател во изминатиот период во повеќе наврати јавно ја доведе во прашање нивната контрола и суверенитет над островот. Кусата и двосмислена порака од Белата куќа се толкува како сигнал дека Вашингтон не се откажува од амбициите поврзани со Гренланд, оставајќи отворено прашање какви чекори би можеле да следат.

Свет | пред 2 месеци

Трамп за европските лидери: Кога сум тука се однесуваат многу коректно

Американскиот претседател Доналд Трамп со ироничен тон го опиша својот однос со францускиот претседател Емануел Макрон и британскиот премиер Киер Стармер, одговарајќи на новинарско прашање за актуелните релации со двајцата европски лидери.На прашањето дали разговарал со Макрон и Стармер по денешната објава на социјалните мрежи, која се однесуваше на неговата критика за британскиот договор околу архипелагот Чагос, Трамп одговори дека не остварил директен контакт, но истакна дека односите ги смета за добри.„Не, не разговарав со нив, но мислам дека многу добро се сложуваме. Секогаш се коректни кон мене. Малку стануваат поостри кога не сум во нивна близина, но кога сум тука, се однесуваат навистина убаво. И, знаете, ми се допаѓаат и двајцата“, изјави Трамп.Изјавата доаѓа во период на зголемени тензии меѓу Вашингтон и дел од европските сојузници, особено околу прашања поврзани со Гренланд, Чагос и трговските односи, при што Трамп во повеќе наврати јавно ги критикуваше европските влади, но истовремено нагласува дека личните односи со клучните лидери остануваат стабилни.

Свет | пред 2 месеци

Трамп признава: Можеби имам лош ПР

Американскиот претседател Доналд Трамп одржа исклучително долга и содржински агресивна прес-конференција, точно една година по неговото враќање на власт, на која ги истакна, како што ги нарече, големите успеси на неговата администрација, но воедно призна дека економската порака не допира до мнозинството Американци.Обраќањето започна во преполната сала за новинари во Белата куќа, каде Трамп демонстративно покажа фотографии од лица што ги опиша како „пореметени убијци“, за кои тврдеше дека биле уапсени од Имиграциската и царинска служба и депортирани од САД. Посебен акцент стави на сојузната држава Минесота, каде изминатиот период се одржуваа протести против владините имиграциски политики.Трамп зборуваше за својот економски програм, тврдејќи дека успеал да ја „исчисти“ федералната администрација и остро го критикуваше својот демократски претходник Џо Бајден. Според него, актуелната власт наследила „хаос“, но бројките, особено во однос на инфлацијата, сега биле драстично намалени. Тој инсистираше дека економските показатели се значително подобрени, но изрази незадоволство што јавноста тоа не го препознава.„Навистина ги намаливме бројките. Искрено, не разбирам зошто тоа не се чувствува. Можеби имам лоши луѓе за односи со јавноста. Не успеваме да ја пренесеме пораката“, рече Трамп, во редок момент на отворена самокритика.Осврнувајќи се на Венецуела, тој ја пофали опозициската лидерка и добитничка на Нобеловата награда за мир, Марија Корина Мачадо, опишувајќи ја како „исклучително љубезна жена“, додавајќи дека постои можност повторно да биде вклучена во американската стратегија кон таа земја.Настапот на Трамп следуваше непосредно пред неговото заминување за Давос, каде треба да учествува на Светскиот економски форум. Според најавите, форумот би можел да биде обележан од неговите контроверзни ставови и закани поврзани со Гренланд, тема што во последно време предизвикува силни реакции и на меѓународната сцена.

Свет | пред 2 месеци

Лазаров по победата над Романија: Имавме шанса за поубедлив триумф, мора да работиме на концентрацијата и менталитетот

Селекторот на македонската ракометна репрезентација Кире Лазаров изрази умерено задоволство по драматичната победа над Романија, истакнувајќи дека триумфот е значаен, но дека натпреварот можел да заврши и со поубедлива разлика.Лазаров нагласи дека Македонија одиграла добар меч против, како што рече, цврста и силна репрезентација. Според него, македонските ракометари делувале како да се изненадиле од фактот што уште во првото полувреме стекнале висока предност од седум до осум голови, иако, како што оцени, Романија во тие моменти била немоќна, а Македонија имала добри позиции за реализација.Селекторот објасни дека во продолжението тимот морал да биде поофанзивно внимателен поради повреди и исклучувања на дел од играчите, што неминовно се одразило врз играта во одбраната. Тој додаде дека се надевал на победа со поголема гол-разлика, најмалку од три до пет голови, но потенцираше дека надежта сè уште постои, иако шансите се минимални.Лазаров истакна дека пласманот понатаму зависи од висока победа на Данска, оценувајќи дека задачата е исклучително тешка, но не и невозможна. Сепак, упати честитки до своите ракометари, нагласувајќи дека нема што да им замери за прикажаното на теренот.Тој повторно се осврна и на, како што рече, проблемот со концентрацијата и менталната стабилност, посочувајќи дека желбата била Македонија да се најде меѓу најдобрите 12 селекции и дека за тоа било потребно повеќе присебност во клучните моменти. И покрај сè, Лазаров потенцираше дека не е незадоволен од настапот и дека репрезентацијата ќе остане да ја следи и бодри Данска, нагласувајќи дека тимот продолжува понатаму со крената глава.

Спорт | пред 2 месеци

Снимки од „Сејф сити“ се презенираа на судењето за таткото на Васил, кој ја усмрти Фросина на пешачки

Со сослушување на сведок и изведување видео-докази од системот „Безбеден град“, денеска во Основниот кривичен суд Скопје продолжи судењето против Зоран Јованов, татко на Васил Јованов. Одбраната и на ова рочиште инсистираше дека не постојат директни докази оти обвинетиот му го доверил возилото на својот син, оценувајќи дека Обвинителството настапило недоволно подготвено при изведувањето и образложувањето на доказите.Пред судот сведочеше пријателка на Васил Јованов, која изјави дека ретко се возела со него и дека никогаш не разговарале за тоа дали автомобилот му бил даден од неговиот татко. Таа наведе дека нема сознанија оти управувал возило без возачка дозвола, освен фактот дека знаела оти во една прилика бил казнет.Во текот на рочиштето беа прикажани три видео-снимки, за кои одбраната изнесе приговори, истакнувајќи дека од нив не може со сигурност да се утврди идентитетот на лицето, управувањето со возилото, ниту пак нивната суштинска релевантност за предметот. Посебно беше нагласено дека системот не овозможува препознавање лица, што, според одбраната, го доведува во прашање доказното значење на снимките.Судот соопшти дека сите изведени докази ќе бидат ценети во завршната фаза од постапката. Судењето продолжува во рамки на предметот поврзан со сообраќајната несреќа од јануари 2025 година, во која животот го загуби пешакот Фросина Кулакова.

Македонија | пред 2 месеци

Драма до крај: Македонија триумфираше против Романија на ЕП

Македонската ракометна репрезентација оствари исклучително важна и драматична победа над Романија на Европското првенство, славејќи со 24-23 по неизвесна завршница што се реши во самите последни секунди од натпреварот.Херој на победата беше Ненад Костески, кој го постигна решавачкиот погодок неколку моменти пред истекот на времето, носејќи голема радост меѓу македонските ракометари и навивачите. Македонија фуриозно го отвори натпреварот, наметнувајќи висок ритам во нападот и цврста, дисциплинирана одбрана која долго време ја држеше Романија под контрола.Во текот на целиот меч се водеше борба, но македонскиот состав покажа карактер и смиреност во клучните моменти, што на крајот се претвори во заслужен триумф.Ова е прва победа за Македонија на турнирот, по претходниот пораз од Данска и нерешениот исход со Португалија, со што репрезентацијата останува во игра и ја задржува надежта за позитивен исход во продолжението на Европското првенство.

Спорт | пред 2 месеци

Францускиот претседател смирено по „протекувањето“ на пораката: Моите ставови се исти, без разлика каде се изречени

Францускиот претседател Емануел Макрон реагираше откако американскиот претседател Доналд Трамп јавно објави приватна порака што, како што тврди, му ја испратил Макрон, истакнувајќи дека останува целосно доследен во своите ставови, без разлика дали тие се изнесени јавно или во приватна комуникација.Трамп претходно на социјалните мрежи објави порака во која францускиот претседател изразува збунетост околу американските потези поврзани со Гренланд и предлага одржување состанок на земјите од Г7 во Париз на 22 јануари, со учество и на Украина, Русија, Данска и Сирија, како и заедничка вечера.Запрашан за „протекувањето“ на пораката на маргините на Светскиот економски форум во Давос, Макрон изјави дека ја презема одговорноста за своите зборови и постапки, нагласувајќи дека неговиот пристап е секогаш ист. Тој посочи дека е навикнат да биде доследен во она што го говори во јавноста и во она што го комуницира приватно, додавајќи дека проценката дали објавувањето на пораката е непристојно им ја остава на другите.Францускиот претседател потврди и дека нема да се сретне со Трамп во Давос, појаснувајќи дека американскиот претседател ќе пристигне на форумот по неговото заминување. Сепак, не ја исклучи можноста за средба на самитот на Г7, оценувајќи дека тоа би можела да биде соодветна прилика за разговор.Макрон нагласи дека Европа мора да остане смирена и доследна на својот курс, особено на економски план, со цел да обезбеди посилен раст, да ги брани сопствените интереси кога правилата не се почитуваат и да ги поддржи партнерите кога се под притисок.Во својот говор на Светскиот економски форум, Макрон претходно ги обвини Соединетите Американски Држави дека се обидуваат да ја ослабат Европа и упати предупредување за можен одговор на Европската унија доколку бидат воведени американски царини, додека Трамп ја повика Европа фокусот да го стави на војната меѓу Русија и Украина, а не на прашањето за Гренланд.

Свет | пред 2 месеци

Трамп: Да не се појавев јас, денес немаше да постои НАТО

Американскиот претседател Доналд Трамп се огласи со нова контроверзна порака на својата социјална мрежа Truth Social, во која тврди дека без неговото појавување денеска немало да постои НАТО.Трамп напиша дека ниту една личност, ниту еден претседател во историјата, не направил повеќе за Алијансата од него, нагласувајќи дека НАТО, според неговите зборови, би завршил „на сметилиштето на историјата“ доколку тој не се вмешал.„Да не се појавев јас, денес немаше да има НАТО. Ќе завршеше на сметилиштето на историјата. Тажно, но вистинито“, напиша Трамп, потпишувајќи ја пораката со иницијалите „Претседател ДЏТ“.Оваа изјава доаѓа во контекст на неговите чести критики кон земјите членки на Алијансата, особено европските, за недоволно издвојување средства за одбраната, како и неговото инсистирање дека токму под негов притисок биле зголемени воените буџети во рамки на НАТО.Изјавите на Трамп и претходно предизвикуваа бурни реакции меѓу сојузниците, а неговото тврдење дека Алијансата опстанала исклучиво поради неговото лидерство повторно отвора дебата за иднината на трансатлантските односи и улогата на САД во колективната безбедност.

Свет | пред 2 месеци

Туск: Европа не смее да си дозволи слабост во однос нс Трамп, ниту кон противниците ниту кон сојузниците

Полскиот премиер Доналд Туск порача дека Европа не смее да си дозволи слабост во односите со претседателот на САД Доналд Трамп, нагласувајќи дека попуштањето не е стратегија што носи резултати, туку пат кон понижување.Во објава на социјалната мрежа Икс, Туск истакна дека отстапките секогаш се доживуваат како знак на слабост и дека Европа нема луксуз да биде слаба – ниту кон своите противници, ниту кон своите сојузници. Според него, актуелниот момент бара јасна европска решителност и самодоверба.Туск предупреди дека попуштањето не води кон стабилност или подобри односи, туку создава впечаток на немоќ, што може да има долгорочни последици по позицијата на Европа на глобалната сцена. Неговата порака доаѓа во период на засилени трансатлантски тензии и преиспитување на односите меѓу Европската унија и Соединетите Американски Држави.Со оваа изјава, полскиот премиер испраќа сигнал дека европските лидери треба да настапуваат пообединето и поодлучно, водејќи се од сопствените интереси и вредности, без страв од притисоци или условувања, без разлика од каде доаѓаат.

Свет | пред 2 месеци

Длабока недоверба и чувство на хаос: ново истражување открива сериозна криза на доверба во САД

Најновото истражување на јавното мислење, спроведено од YouGov за неделникот The Economist во периодот од 16 до 19 јануари 2026 година, укажува на драматичен пад на довербата во стабилноста и институционалниот поредок на Соединетите Американски Држави. Податоците, добиени од примерок од 1.722 испитаници, отсликуваат општество опфатено со длабока вознемиреност, песимизам и незадоволство од политичката и демократската состојба во земјата.Според резултатите, дури 71 процент од Американците сметаат дека работите во државата денес се „надвор од контрола“, додека само 18 проценти веруваат дека состојбата е под контрола. Перцепцијата за насоката во која се движи земјата е исто така изразено негативна – 61 процент од испитаниците оценуваат дека САД одат во погрешен правец, а само 31 процент го поддржуваат актуелниот курс.Истражувањето открива и сериозна криза на доверба во демократскиот систем. Повеќе од половина испитаници, односно 58 проценти, изјавиле дека се незадоволни од начинот на кој функционира демократијата во земјата, при што 33 проценти се изјасниле како целосно незадоволни. Овие бројки упатуваат на продлабочување на јазот меѓу граѓаните и институциите, како и на ерозија на вербата во политичкиот процес.На конкретното прашање за евентуално испраќање федерални трупи во Минеаполис, јавното мислење е поделено, но со јасна наклонетост кон противење. Повеќе од половина, односно 52 проценти од испитаниците, се изјасниле против таква мерка, додека 37 проценти ја поддржуваат.Истражувањето ја опфатило и оценката за работата на актуелниот претседател Доналд Трамп, при што резултатите ја нагласуваат длабоката поларизација во американското општество. Работата на Трамп ја одобруваат 37 проценти од испитаниците, додека 57 проценти не ја одобруваат. Речиси половина од анкетираните, 48 проценти, изјавиле дека „силно не одобруваат“ како тој ја извршува функцијата, наспроти 22 проценти кои изразиле силна поддршка.Најниските оценки претседателот ги добива во областа на инфлацијата и цените, каде што 61 процент од граѓаните не ги одобруваат неговите политики. Слично незадоволство е забележано и во однос на прашањата поврзани со расата и имиграцијата, каде што 53 проценти од испитаниците изразиле негативен став.Истражувањето е спроведено меѓу полнолетни граѓани на САД, при што примерокот е пондериран според пол, возраст, раса, образование и претходно гласачко однесување, со цел да се обезбеди репрезентативност. Маргината на грешка изнесува плус-минус 3,2 процентни поени. Резултатите јасно сигнализираат дека американското општество влегува во период на засилена институционална и политичка несигурност, со сериозни последици по довербата во демократскиот систем.

Свет | пред 2 месеци

Јапонија тестира енергетско оружје за борба против дронови

Јапонија инсталираше ласерски систем со моќност од 100 киловати на воен брод, оружје доволно силно за онеспособување на помали беспилотни летала и други лесни воздушни закани. Системот е поставен на тестниот брод JS Asuka, со депласман од 6.200 тони, со што Јапонија се вклучува во малата група држави што активно развиваат оружја со насочена енергија.Ласерот функционира како интегриран систем од десет поединечни ласери, секој со моќност од 10 киловати, кои заедно создаваат концентриран зрак од 100 киловати. Таа енергија е доволна за да продре низ метални површини, што го прави ефикасен против дронови, минобацачки гранати и други лесни закани од воздух. Станува збор за оптички ласер чиј зрак се создава со засилување и фокусирање на светлина што патува низ оптичко влакно допирано со елементи од ретки земји.Јапонската Агенција за набавка, технологија и логистика ATLA потврди дека системот е инсталиран откако бродот пристигнал во бродоградилиштето „Јапан марин јунајтед“. Ласерот, сместен во два куполести модули со должина од по 12 метри, наскоро ќе биде испратен на отворено море, каде што по 27 февруари се очекува почеток на првите тестирања во реални поморски услови.Развојот на ова оружје започнал во 2018 година, а прототипот бил испорачан од Kawasaki Heavy Industries во февруари 2023 година. Јапонските официјални лица истакнуваат дека, доколку има доволно електрична енергија, системот може континуирано да дејствува без класична муниција, што значи дека има практично „неограничен магацин“. Трошокот по еден истрел е значително понизок во споредба со традиционалните системи за противвоздушна одбрана, а при копнените тестови во текот на 2025 година ласерот успешно се покажал против дронови и минобацачки проектили.Следната фаза претставува сериозен предизвик, бидејќи ласерот ќе мора да функционира во услови на ветер, влага и постојано движење на палубата, како и да се справи со атмосферско расејување и одбивање на зракот. Дополнителни ограничувања се поврзани со потребата од силно ладење и големи количини електрична енергија, имајќи предвид дека ефикасноста на ваквите ласери обично се движи меѓу 25 и 35 проценти.Иако оперативната примена на овој тип оружје се смета дека е оддалечена уште неколку години, јапонските власти нагласуваат дека тековните тестирања ќе помогнат да се процени дали во иднина може да се развијат уште помоќни ласери, способни и за пресретнување ракети. Со овој чекор, Јапонија се приклучува на САД, Франција, Германија и Обединетото Кралство во развојот на насочени енергетски оружја, во време кога ваквите технологии стануваат сè поважен дел од современите одбранбени стратегии.

Свет | пред 2 месеци

(Видео) Со рацете во џеб, судијата Ристов отиде во суд, придружуван од сопругата и адвокатот

Со рацете во џеб, судијата Ѓоко Ристов од скопска Апелација од Обвинителството каде беше на распит, замина во Кривичен суд, каде ќе се одлучува по предлогот да му изречат куќен притвор. Во домот на неговите родители, беа најдени 350.000 евра заѕидани во ѕид.Ристов беше во друштво на неговата сопруга која го чекаше на влезот од Обвинителството, и адвокатот Sвонко Давидовиќ. Во судот дојде и адвокатот Душко Јанковиќ, а таму отиде и обвинителката Искра Хаџи Василева.Претходно, Судски совет му го симна имунитетот на Ристов, за Кривичен суд да може да одреди мерки на претпазливост.Ристов е осомничен за противправно стекнување и прикривање имот, при што во домот на неговите родители во Неготино, за време на претрес извршен по наредба на суд, беа пронајдени 350.000 евра скриени во соѕидан простор во ѕид. Обвинителството соопшти дека парите се сомнителни како незаконски стекнати, а постапката е дел од поширока истрага за висока корупција, поткрепена со информации од Агенцијата за национална безбедност.

Македонија | пред 2 месеци

За да му го заштителе интегритетот, Судски ја исклучи јавноста од седницата за одземање на имунитетот на судијата со парите во ѕид

Судскиот совет ја исклучи јавноста од седницата на Судскиот совет за да му го заштитат интегритетот на судијата Ѓоко Ристов од скопска Апелација, осомничен за противправно стекнување и прикривање имот како и перење пари, а откако во домот на неговите родители беа најдени 350.000 евра заѕидани во ѕид. Тие расправаат да оземање на неговиот имунитет како судија и одобрување на куќен притвор.Десет членови на Советот, гласаа „за“ и тоа Антоанета Димовска, Ивица Николовски, Данка Ристова, Ханиф Зендели, Арлинда Кадри-Шахиновиќ, Сузана Јошевска.„Констатирам дека со десет гласа 'за' е исклучена јавноста“, рече заменик-претседателот Ариф Амала.

Македонија | пред 2 месеци

Со седум гласа Анел Фидоски ја презема раководната функција во скопското Обвинителство

Анел Фидоски е избран за нов шеф на Основното јавно обвинителство Скопје, одлучи Советот на јавни обвинители на денешната седница. Тој доби поддршка од седум членови на Советот, додека досегашниот раководител Гаврил Бубевски, кој конкурираше за нов мандат, освои пет гласа.Со оваа одлука, Фидоски ќе застане на чело на најголемото обвинителство во државата, институција која постапува по најголем број и најсложени кривични предмети и која е под постојан фокус на јавноста.Анел Фидоски во јавноста е познат како обвинител со учество во неколку високопрофилни и општествено чувствителни случаи. Меѓу нив е гонењето за убиството на Никола Саздовски, член на навивачката група „Комити“, како и предметот против поранешниот премиер Владо Бучковски за случајот „Тенковски делови“, кој заврши со застарување поради преквалификација на кривичното дело. Во периодот додека Фидоски ја водеше истрагата, еден од обвинетите, Јетон Љужа, ја напушти државата и стана недостапен за органите на прогонот.Фидоски беше вклучен и во постапките поврзани со случајот на малата Тамара од Велес, која почина додека чекаше државна помош за лекување во странство, каде што се водеа истраги против повеќе лекари и членови на комисии.

Македонија | пред 2 месеци

Бујар Османи ја поздрави двојазичната богослужба во Ростуше како чин на соживот

Ексминистерот за надворешни работи Бујар Османи со порака за соживот и меѓусебна почит реагираше по одржувањето на двојазичната богослужба во Ростуше, истакнувајќи дека токму искрените и тивки гестови се оние што ги приближуваат луѓето и градат мостови меѓу заедниците.Османи ја употреби поговорката „Тивката вода го рони брегот“, нагласувајќи дека вистинските промени и вистинското приближување не се постигнуваат со гласни декларации, туку со конкретни дела што носат суштинска порака. Според него, двојазичната богослужба е пример за таков чин – едноставен по форма, но длабок по значење.Тој упати посебни честитки до албанскиот амбасадор Мејдани и до претставникот на Македонската православна црква – Охридска архиепископија, Партениј, оценувајќи дека нивната заедничка иницијатива во Ростуше испрати силна порака за почит, разбирање и заедничко живеење.На крајот, Османи упати и срдечни честитки до сите православни верници, посакувајќи им мир, здравје и благосостојба во нивните семејства, потенцирајќи дека вистинскиот соживот се живее и се докажува преку дела, а не преку зборови.

Коментари | пред 2 месеци

АНБ работи со засилени оперативни капацитети кои довеле до отворање на предмети за висока корупција, објави Христовски

Финансиската безбедност и борбата против високата корупција денес претставуваат суштински дел од националната безбедност, порача директорот на Агенцијата за национална безбедност, Бојан Христовски, нагласувајќи дека навременото препознавање и спречување на сериозни злоупотреби е од клучно значење за заштита на институционалната стабилност и довербата на граѓаните.Според Христовски, во изминатиот период Агенцијата, преку зајакнати оперативни и аналитички капацитети, како и преку интензивна соработка со надлежните институции, дала значаен придонес во отворањето и процесуирањето на предмети поврзани со сериозен финансиски криминал и висока корупција. Тој посочи дека ваквите појави не се само правен или економски проблем, туку директно ја загрозуваат безбедноста на државата и функционирањето на демократските институции.Директорот на АНБ истакна дека улогата на Агенцијата е јасно дефинирана – навремено да ги препознае ризиците, детално да ги анализира и без одложување да ги сподели со институциите кои имаат законска надлежност да постапуваат. Во таа насока, Христовски најави дека АНБ ќе продолжи со посветена и координирана работа, со цел да се зајакне отпорноста на државата кон корупцијата и финансискиот криминал и да се обезбеди долгорочна стабилност и сигурна иднина за граѓаните.

Македонија | пред 2 месеци

Трамп објави приватни пораки од Макрон и шефот на НАТО

Американскиот претседател Доналд Трамп на својата социјална мрежа Truth Social објави приватни пораки за кои тврди дека му биле испратени од генералниот секретар на НАТО, Марк Руте, како и од францускиот претседател Емануел Макрон.Во пораката што Трамп ја припишува на Руте, генералниот секретар на НАТО му честита за, како што наведува, постигнатото во Сирија и изразува намера на Светскиот економски форум во Давос јавно да го истакне ангажманот на американскиот претседател во Сирија, Газа и Украина. Во истата порака, Руте наведува дека е посветен на изнаоѓање решение за прашањето со Гренланд и дека со нетрпение очекува средба со Трамп.Трамп објави и порака за која тврди дека ја добил од Макрон. Во неа, францускиот претседател пишува дека двете земји се целосно усогласени околу Сирија и дека заедно можат да постигнат „големи работи“ во однос на Иран, но истовремено наведува дека не го разбира пристапот на Трамп кон прашањето за Гренланд. Макрон, според објавената порака, предлага по завршувањето на форумот во Давос да се организира состанок во Париз во формат на Г7, со можност во неформалниот дел да се вклучат и претставници на Данска, Украина, Сирија и Русија. Дополнително, тој предлага и заедничка вечера со Трамп во Париз, пред неговото враќање во Соединетите Американски Држави.Извор близок до францускиот претседател за американската телевизија Си-Ен-Ен потврдил дека пораката која Трамп ја сподели е автентична и дека нејзината содржина е во согласност со јавните ставови на Макрон. Според истиот извор, францускиот претседател во изминатите денови јавно ги нарекол заканите со царини поради Гренланд „неприфатливи“, а воедно го одбил и повикот на Трамп да се приклучи на таканаречениот „Одбор за мир“ кој би ја надгледувал обновата на Газа.По одбивањето, Трамп изјавил дека „никому не му е потребен Макрон“, при што ја споменал и можноста за воведување царини од 200 проценти за француско вино и шампањ. Изворот близок до францускиот претседател оценил дека заканите со царини со цел влијание врз надворешната политика на Франција се неприфатливи и неефикасни.

Свет | пред 2 месеци

Трамп ги прозва Британците за „голем идиотизам“, Лондон возвраќа дека договорот останува

Изјавата на американскиот претседател Доналд Трамп, со која одлуката на Обединетото Кралство да го предаде архипелагот Чагос на Маврициус ја оцени како „голем идиотизам“, нема да влијае врз спроведувањето на постигнатиот договор, порача британската влада.Во изјава за Sky News, главниот секретар на премиерот и член на потесното раководство на британската влада Дарен Џонс истакна дека договорот со Маврициус е веќе склучен и законски уреден. Според него, Велика Британија ги договорила условите со властите во Порт Луис, донела соодветна законска рамка и го потпишала спогодбениот документ, со што процесот е завршен.Џонс нагласи дека договорот претставува начин да се обезбеди функционирањето на британско-американската воена база на островот Диего Гарсија за наредните сто години, потенцирајќи дека токму ова било клучната цел на британската дипломатија. Тој потсети дека и Соединетите Американски Држави претходно позитивно се изјасниле за договорот, а поради сложениот меѓународно-правен статус на архипелагот било неопходно да се најде трајно решение со кое ќе се заштитат воените капацитети.Запрашан дали пристапот на британскиот премиер Кир Стармер, кој настојува да одржи блиски односи со Трамп, дава резултати, Џонс одговори дека британскиот лидер бил критикуван затоа што не реагирал со јавни навреди или остри пораки. Според него, наместо тоа, владата се одлучила за сериозна и тивка дипломатија, што, како што рече, ја ставило Велика Британија во подобра позиција од која било друга држава во односите со новата американска администрација.Во меѓувреме, лидерот на партијата Reform UK Најџел Фараж, кој важи за близок до Трамп, застана во одбрана на американскиот претседател. Во објава на социјалната мрежа Икс, Фараж напиша дека е благодарен што Трамп, како што наведе, „ставил вето на предавањето на архипелагот Чагос“, дополнително заострувајќи ја политичката дебата околу ова чувствително геостратешко прашање.

Свет | пред 2 месеци

(Видео) Објавена досега невидена снимка: Макрон го разбудил Трамп со вест за примирје

Објавена е досега невидена видеоснимка на која се гледа моментот кога францускиот претседател Емануел Макрон телефонски го контактира американскиот претседател Доналд Трамп за да му соопшти дека постои можност за прекин на огнот во Украина. Веста предизвикала видлива еуфорија кај Трамп, кој на тоа одговорил со зборовите: „О, супер, Нобелова награда за ова“.Снимката е направена за документарен филм на France Télévisions и го прикажува Макрон како се јавува од Киев во раните утрински часови на 10 мај. Францускиот претседател го информира Трамп дека украинскиот претседател Володимир Зеленски прифатил услови за 30-дневно примирје со Русија, под надзор на Соединетите Американски Држави и со поддршка од европските земји.„Доналде, знам дека кај тебе е многу рано. Извини што се јавувам во ова време“, вели Макрон во објавениот исечок, по што додава дека Киев се согласил со предложениот договор.„Ги прифати сите услови?“, прашува Трамп, а веднаш потоа додава: „О, супер. Нобелова награда за мир за ова“. Неколку моменти подоцна, Трамп го пофалува Макрон со зборовите: „Ти си најдобар“.Во друга секвенца, снимена само неколку минути подоцна, Макрон стои покрај Зеленски, британскиот премиер Кир Стармер, полскиот премиер Доналд Туск и германскиот канцелар Фридрих Мерц, додека повторно го информираат Трамп дека новинари се присутни и ги повторуваат деталите од договорот постигнат со украинската страна.Сепак, надежите за примирје траеле многу кратко. Само неколку часа подоцна, рускиот претседател Владимир Путин го одбил предлогот за прекин на огнот и наместо тоа предложил „директни преговори“ со Украина, закажани за 16 мај.Тие разговори, на кои инсистираше Москва, се одржаа во Истанбул, но без присуство на претседателите. Руската страна беше претставена од Владимир Медински, понизок советник во хиерархијата. Подоцна беа организирани уште едни „директни“ разговори во Турција, на почетокот на јуни, но и тие завршија без конкретен резултат, со што уште еднаш беа урнати надежите за дипломатски пробив и трајно примирје.

Свет | пред 2 месеци

Се знае ли однапред: Анел Фидоски кој го гонеше Бучковски се споменува како иден шеф на скопското Обвинителство, уште пред да го изберат

Денеска се одржува изборот за нов раководител на Основното јавно обвинителство Скопје, постапка што уште пред формалното гласање е проследена со шпекулации и сомнежи во јавноста дека одлуката е однапред договорена. Како најчесто споменувано име за наследник на актуелниот шеф Гаврил Бубевски, се појавува Анел Фидоски, иако официјалната одлука допрва треба да ја донесе Советот на јавни обвинители.Покрај Фидоски, како потенцијални кандидати за раководната позиција се споменуваат и обвинителите Дејан Петрески, Спасенка Андонова, Тања Трајчевска, како и самиот Бубевски. Советот треба да одлучи кој ќе го преземе раководењето со најголемото и најоптоварено обвинителство во државата, институција што постапува по најголем број и најсложени кривични предмети.Изборот се случува во период на зголемена институционална чувствителност, по оставката на поранешниот републички јавен обвинител Љупчо Коцевски и назначувањето на вршител на должноста Анита Тополова Исајловска. Во ваков контекст, скопското обвинителство добива ново раководство во момент кога довербата во правосудниот систем е под силен јавен притисок.Анел Фидоски е обвинител со препознатливо присуство во неколку високопрофилни случаи. Тој беше вклучен во гонењето за убиството на Никола Саздовски, член на навивачката група „Комити“, како и во предметот против поранешниот премиер Владо Бучковски за случајот „Тенковски делови“, кој застаре поради преквалификација на делото. Во периодот додека ја водеше истрагата, еден од обвинетите, Јетон Љужа, избега од државата. Фидоски беше дел и од постапката против повеќе лекари и членови на комисии во случајот со малата Тамара од Велес, која почина чекајќи државна помош за лекување во странство.Дејан Петрески е обвинител кој работел на предмети поврзани со напади врз новинари и безбедносни инциденти. Тој го водеше случајот за упадот во М-НАВ, каде што осомничен беше Беким Незири, како и истрагата за пожарот во модуларната болница во Тетово. За овој предмет, поранешната обвинителка, денес адвокатка Лејла Кадриу, јавно изнесе критики дека Петрески бил користен како посредник преку кој се насочувале истражните дејствија и се штителе одредени лица.Тања Трајчевска го водеше предметот за убиството на ракометарот Денис Тот, во кој обвинетите беа осудени на по 18 години затвор. Таа постапуваше и во случајот за смртта на диџејот Љупчо Лешко, по кој родителите на починатиот изнесоа сериозни забелешки за непокренување обвинение против сопствениците на објектот. По јавните реакции, Вишото јавно обвинителство наложи повторно преиспитување на предметот.Спасенка Андонова беше дел од Обвинителството за гонење организиран криминал и корупција и го водеше предметот „Двојник“, поврзан со незаконско издавање патни исправи на странски криминалци, во кој судските пресуди резултираа со релативно благи казни. Таа подоцна не беше реизбрана во ова обвинителство.Гаврил Бубевски, актуелниот шеф на скопското обвинителство, дојде од поранешното Специјално јавно обвинителство, каде што беше именуван во 2015 година по избор на Катица Јанева. Таму работеше на предмети како „Трансмет“, „Шамарите во Центар“, „Титаник 2“, „Моќник“, како и на истрагите за „Актор“ и „Подарок“, а беше вклучен и во постапката за случајот „Монструм“. Во јавноста беше обвинуван дека со непостапување овозможил имот на Сеад Кочан и компанијата Трансмет да биде префрлен на трето лице, наместо да биде конфискуван, што тој јавно го негираше.Кандидатите зад себе имаат обвинителско искуство кое се движи од шест до повеќе од дваесет години и низа предмети со силен јавен одек и контроверзии. Одлуката што ќе ја донесе Советот на јавни обвинители ќе биде внимателно следена, бидејќи изборот на нов шеф на скопското Обвинителство се смета за еден од клучните тестови за насоката, независноста и кредибилитетот на обвинителскиот систем во период на сериозни институционални превирања.

Македонија | пред 2 месеци

Лавров: Светскиот поредок сè повеќе се темели на „законот на посилниот“

Рускиот министер за надворешни работи Сергеј Лавров оцени дека современиот светски поредок сè повеќе се темели на „законот на посилниот“, наведувајќи дека правилата врз кои Западот го градел меѓународниот систем се практично напуштени. Изјавата ја даде на прес-конференција посветена на резултатите од руската дипломатија во 2025 година.Лавров истакна дека последиците од ваквата политика не се чувствуваат само во земјите од глобалниот Југ и Исток, туку сè поизразено се манифестираат и во самите западни општества. Според него, кризите и внатрешните тензии таму се резултат на напуштањето на принципите кои Западот самиот ги прогласувал за темел на меѓународниот поредок.Тој нагласи дека Русија ќе продолжи доследно да ги брани своите интереси и нема да дозволи произволно постапување кон своите легитимни права. Воедно порача дека Москва е подготвена за дијалог со меѓународните партнери врз основа на меѓусебно почитување, рамноправност и заемност, оценувајќи дека сите обиди за изолација на Русија досега пропаднале.Лавров повтори дека Русија, како што претходно повеќепати истакнал и претседателот Владимир Путин, останува посветена на пронаоѓање дипломатско решение за војната во Украина. Во исто време, тој ја обвини Европската унија дека се обидува да ги поткопа напорите на САД за мировно решение и дека настојува да изврши влијание врз ставовите на американскиот претседател Доналд Трамп во однос на украинската криза.Според Лавров, европските држави и натаму размислуваат во категории на нанесување „стратешки пораз“ на Русија и, како што рече, сериозно се подготвуваат за можна конфронтација. Тој додаде дека од руската страна никогаш не недостасувала подготвеност за компромис, но дека Западот систематски ги поткопувал сите постигнати договори.Говорејќи за пошироката безбедносна слика, Лавров најави дека Русија ќе продолжи да ја промовира иницијативата за поголемо евроазиско партнерство и создавање паневроазиска безбедносна архитектура заснована на еднаквост и неделива безбедност. Тој посочи дека Москва е подготвена да помогне и во смирување на тензии во други кризнични региони, меѓу кои Венецуела и Иран, како и дека односите со Кина достигнале ниво без преседан.На крајот, Лавров оцени дека кризничните трендови сè појасно се манифестираат и внатре во западните општества, наведувајќи ги дебатите околу Гренланд како пример што, според него, го отвора прашањето за зачувување на единството на НАТО како клучен западен воено-политички блок.

Свет | пред 2 месеци

Захарова: Политиката на ЕУ е комична сама по себе, не им треба дополнителен хумор

Функционер на руското Министерство за надворешни работи на шега коментираше за изјавата на претставникот на ЕУ дека во Брисел веруваат дека институциите на блокот не користат доволно шеги во јавните соопштенијаНа европските политичари не им требаат шеги во своите изјави, политиката што ја водат е комична сама по себе, изјави Марија Захарова, портпаролка на руското Министерство за надворешни работи.Медиумите известуваат дека неименуван функционер на ЕУ изјавил дека во Брисел веруваат дека институциите на блокот не користат доволно шеги во јавните соопштенија, што лошо се одразува на можноста за пренесување на европската порака до јавноста, потсети Захарова.„Според мене, недостатокот на шеги е повеќе од компензиран од комедијата на политиката на ЕУ. А без хумор – човек се смее до солзи“, напиша руската функционерка на својот Телеграм канал.

Свет | пред 2 месеци

Маж и жена пронајдени мртви во два одделни случаи во Македонија

На 18.01.2026 во 16:00 часот во Полициското одделение Јегуновце е пријавено дека во семејниот дом во с.Јегуновце, тетовско, е пронајдена почината С.С.(76) од селото.Екипа од Итна медицинска помош Тетово констатирала смрт без видливи траги на насилство.Увид извршила екипа на СВР Тетово во присуство на јавен обвинител, по чија наредба телото на починатата е дадено на обдукција.На 18.01.2026 во 22:15 часот во Полициското одделение Ростуше е пријавено дека во домот во с.Скудриње, гостиварско, е пронајден починат Ш.Ш.(55) од селото.Лекар од Здравствен дом Ростуше констатирал смрт без видливи траги на насилство, а по наредба на јавен обвинител телото е дадено на обдукција.

Македонија | пред 2 месеци

Данска ја зајакнува одбраната на Гренланд со нови трупи и воена вежба

Поголем број дански борбени војници, кој од страна на армијата се оценува како „значаен придонес“, вечерва треба да пристигне во Кангерлусак на Гренланд. Информацијата ја потврдија данските вооружени сили за телевизијата ТВ 2, наведувајќи дека станува збор за дополнително зајакнување на веќе распоредениот воен контингент.Според извештајот на ТВ 2, заедно со новата група војници на Гренланд ќе допатува и командантот на данската копнена војска, генерал-потполковник Питер Бојсен. Неговото присуство се толкува како сигнал за сериозноста со која Копенхаген ја третира актуелната безбедносна состојба на островот.На Гренланд и во овој момент веќе се распоредени стотици дански војници. Претходно, командантот на Арктичката команда, Сорен Андерсен, соопшти дека околу 100 војници веќе пристигнале во главниот град Нуук, додека сличен број бил распореден и во Кангерлусак. Токму таму е планирано одржување на воената вежба „Арктичка издржливост“, која е забрзана и проширена во обем по неодамнешните изјави на американскиот претседател Доналд Трамп.Трамп во повеќе наврати јавно изјави дека Соединетите Американски Држави имаат интерес да го преземат Гренланд, што предизвика остра реакција во Данска и пошироко во Европа. Како одговор на тие изјави, данските власти одлучија да го зајакнат военото присуство на островот и да ја подигнат подготвеноста на своите сили во арктички услови.Со засиленото распоредување и најавената воена вежба, Копенхаген испраќа порака дека суверенитетот и безбедноста на Гренланд се стратешки приоритет за Данска, особено во контекст на зголемените геополитички тензии околу Арктикот.

Свет | пред 2 месеци