РУСИЈА

Лавров: Москва води тајни разговори со европски лидери за Украина

Рускиот министер за надворешни работи Сергеј Лавров изјави дека Москва е во тајна комуникација со одредени европски лидери и дека со нив се водат разговори за завршување на рускиот воен конфликт во Украина.„Нема да кријам, во контакт сме со некои европски лидери. Тие се јавуваат и бараат овие разговори да останат тајни. Некои дури доаѓаат овде. И така се одржува таен контакт“, изјави Лавров.Тој додаде дека изјавите на европските лидери „за време на тие приватни, доверливи контакти“ не се разликуваат од она што го кажуваат јавно.„Тоа се исти повици: ‘Да го завршиме ова’, ‘Нешто мора да се преземе’“, рече Лавров.Лавров исто така посочи дека Европа има „безкомпромисен став“ според кој Русија мора да доживее „стратешки пораз“.„Нивниот став е следниот: Украина не смее да изгуби, Русија не смее да победи, бидејќи во спротивно Европа ја губи честа. Сè што сега прават е насочено кон спречување и оневозможување на преговорите кои, се чини, штотуку се наѕираат помеѓу Американците и нас, а сега се вклучуваат и украинските претставници“, додаде Лавров.

Свет | пред 1 месец

Русија, Украина и САД постигнаа договор за размена на 314 затвореници

Ексклузивните разговори во Абу Даби донесоа конкретен резултат, Русија, Украина и Соединетите Американски Држави постигнаа договор за размена на затвореници, прв по петмесечен застој во овој чувствителен процес, пренесуваат медиумите во регионот.Специјалниот претставник на американскиот претседател Доналд Трамп, Стивен Виткоф, го објави договорот на социјалните мрежи, нагласувајќи дека делегациите на трите страни прифатиле размена на вкупно 314 затвореници.„Денес, делегациите од Соединетите Американски Држави, Украина и Русија се согласија да разменат 314 затвореници – прва таква размена во последните пет месеци“, рече Виткоф, оценувајќи дека договорот е постигнат благодарение на „детални и продуктивни преговори“.Размената е договорена како дел од втората рунда преговори за решавање на конфликтот во Украина, која започна на 4 февруари во Абу Даби. Според достапните информации на медиумите, составот на руската делегација останал непроменет во споредба со претходниот состанок одржан на 24 јануари, а преговарачкиот тим на Москва го предводи Игор Костјуков, началник на Генералниот директорат на Генералштабот на руските вооружени сили.Иако деталите за самата размена не се објавени, договорот во дипломатските кругови се толкува како мал, но значаен потег во услови на длабока недоверба и ограничен дијалог. Во исто време, тој укажува дека каналите за комуникација меѓу завојуваните страни и Вашингтон остануваат отворени, барем во прашања од хуманитарна природа, и покрај продолжувањето на политичките и воените тензии.

Свет | пред 1 месец

71 ракета и 450 дронови: Русија ѝ нанесе една од најтешките енергетски штети на Украина

71 ракета и 450 дронови беа лансирани во најновиот масовен руски напад врз украинската енергетска инфраструктура, при што загинаа најмалку четири лица, а 32 беа повредени, соопштија украинските власти, оценувајќи дека станува збор за една од најтешките штети од почетокот на војната во полн обем.Украинскиот министер за енергетика Денис Шмихал соопшти дека се оштетени производствени капацитети, како и преносни и дистрибутивни мрежи во повеќе региони. Според него, состојбата е исклучително комплицирана, поради што енергетските компании воведуваат итни исклучувања на струјата, а дополнителни генератори се распределуваат во критичните подрачја.Шмихал информира дека сериозни оштетувања претрпела и киевската термоелектрана „Дарница“, која обезбедува греење за голем дел од населението во главниот град, нагласувајќи дека нападите врз цивилната енергетска инфраструктура претставуваат воено злосторство.Украинското Министерство за надворешни работи соопшти дека со овој напад Русија ги прекршила обврските од енергетското примирје и дека не покажува реални знаци на деескалација, и покрај јавните изјави од американскиот претседател.Извршниот директор на најголемата приватна енергетска компанија во Украина, ДТЕК, Максим Тимченко изјави дека електраните претрпеле „страшна штета, една од најлошите што досега сме ја виделе“, нагласувајќи дека ова е деветти масовен напад врз нивните капацитети од октомври 2025 година. Тој предупреди дека илјадници семејства во Киев се соочуваат со температури до минус 25 степени и недели без греење.И покрај екстремните услови, од ДТЕК соопштија дека нивните екипи успеале да ја вратат струјата за околу 100.000 домаќинства во Киев и дека санацијата продолжува непрекинато, дење и ноќе.Нападите продолжија и во текот на ноќта, кога руските сили лансираа уште 105 дронови, од кои украинската противвоздушна одбрана пресретна 88. Државната компанија „Укренерго“ информира дека повторно е гаѓана енергетската инфраструктура во повеќе области, оставајќи делови од Сумската, Донецката, Днепропетровската, Херсонската и Запорошката област без електрична енергија.Претседателот Володимир Зеленски соопшти дека ситуацијата во моментов е најтешка во Киевската, Харкивската, Сумската, Полтавската, Днепарската и Черкаската област, наведувајќи дека во Киев работат над 200 тимови за поправки и дека повеќе од 1.100 станбени згради се без греење.Украинската служба за безбедност порано соопшти дека собраните докази укажуваат оти нападите врз енергетската инфраструктура се дел од систематска политика насочена кон цивилното население, што претставува злосторство против човештвото.Овие напади се случуваат паралелно со почетокот на нова рунда трипартитни разговори меѓу Русија, Украина и Соединетите Американски Држави во Абу Даби, насочени кон пронаоѓање решение за прекин на војната.

Свет | пред 1 месец

Истекува последниот нуклеарен договор меѓу САД и Русија, расте стравот од нова трка во вооружување

Последниот важечки нуклеарен договор меѓу Русија и Соединетите Американски Држави истекува за неколку часа, со што светот се соочува со можност двете најголеми нуклеарни сили првпат по повеќе од половина век да останат без какви било формални ограничувања за своите нуклеарни арсенали. Развојот ја зголемува загриженоста од нова глобална трка во вооружување, во која сè поважна улога има и Кина.Станува збор за договорот „Нов СТАРТ“, потпишан во Прага во 2010 година, кој ги ограничува бројот на распоредени нуклеарни боеви глави и носачи и предвидува механизми за проверка и транспарентност. Ако во последен момент не биде постигнат нов договор или привремено продолжување, Вашингтон и Москва остануваат без обврзувачка рамка за контрола на стратешкото нуклеарно оружје.Од Кремљ порачуваат дека Москва ќе постапува „внимателно и одговорно“. Советникот на рускиот претседател изјавува дека Владимир Путин за ова прашање разговара со кинескиот претседател Си Џинпинг, при што Русија изразува подготвеност за разговори за стратешка стабилност. Истовремено, од Москва наведуваат дека досега нема официјален одговор од американска страна на предлогот ограничувањата да продолжат и по истекот на договорот.Апел упатува и поглаварот на Римокатоличката црква, папата Лав XIV, кој повикува двете страни да не дозволат престанок на важноста на договорот. Тој порачува дека е неопходно логиката на страв и недоверба да се замени со заедничка етика насочена кон општото добро.Експертите за контрола на вооружувањето предупредуваат дека без договорот, и Русија и САД добиваат слобода да распоредат стотици дополнителни нуклеарни боеви глави на своите ракети и тешки бомбардери. Во екстремно сценарио, тоа би можело речиси да ја удвои сегашната големина на нивните распоредени арсенали. Дополнително, исчезнуваат механизмите за проверка, што ја намалува довербата и ја отежнува проценката на намерите на другата страна.Иако вкупниот број нуклеарни боеви глави во светот е значително намален во однос на врвот од Студената војна, кога во 1986 година изнесувал над 70.000, денес тој број е околу 12.000. Сепак, и Русија и САД активно ги модернизираат своите нуклеарни сили, додека Кина во последната деценија повеќе од двојно го зголемува својот арсенал.Американскиот претседател Доналд Трамп испраќа спротивставени пораки. Тој изјавува дека доколку договорот истече, може да се постигне „подобар договор“, а претходно јавно се залага Кина да биде вклучена во идните рамки за контрола на вооружувањето, оценувајќи дека големите сили веќе располагаат со доволно оружје за повеќекратно уништување на светот.Дел од аналитичарите сметаат дека високата цена на нуклеарното оружје може да ја ограничи непосредната трка во вооружување, но истовремено предупредуваат дека отсуството на договор отвора опасен простор за недоверба, погрешни проценки и ескалација. Во такви околности, истекот на Новиот СТАРТ не се смета само за формален крај на еден договор, туку за потенцијална пресвртница во глобалната безбедносна архитектура.

Свет | пред 1 месец

Песков: Арктикот е наш

Русија е арктичка држава и е отворена за соработка на Арктикот, изјави портпаролот на претседателот на Руската Федерација, Дмитриј Песков.„Тоа е нашиот регион. Ние сме арктичка држава, за разлика од огромното мнозинство земји на Европската унија. Отворени сме за соработка и за заедничко делување“, рече Песков пред новинарите.Тој додаде дека ако политиката на Европската унија биде насочена кон соработка на Арктикот, Русија тоа ќе го поздрави.„Ако претставниците на Европската унија имаат предвид нова политика насочена кон меѓународна соработка, тоа може да се поздрави. Ако пак се мисли на конфронтација, што моментално е многу модерно во Брисел, тогаш тоа, се разбира, тешко може да се поздрави и тешко дека ќе има каков било позитивен ефект“, истакна Песков.Според неговите зборови, Русија има големи интереси на Арктикот и ќе ги брани, користејќи го целиот арсенал на меѓународното право.Претходно, Каја Калас, шефица на европската дипломатија, на конференција во Норвешка изјави дека Европската унија има потреба од нова безбедносна политика на Арктикот.

Свет | пред 1 месец

Москва: Русија продолжува со војната

Портпаролот на Кремљ, Дмитриј Песков, изјави дека Украина сѐ уште не се согласува на повлекување на трупите од Донбас и дека затоа Русија ја продолжува својата специјална воена операција.„На Украина ѝ се отворени вратите за мирно решение на конфликтот, но додека официјален Киев не донесе соодветни одлуки, Русија ја продолжува својата специјална воена операција“, изјави Песков.Тој додаде дека ставот на Русија е кристално јасен и дека тоа добро го разбираат и киевскиот режим и американските посредници, на кои Русија им е „благодарна за вложените напори“.„Русија останува отворена. Нашиот став е кристално јасен. Добро го разбираат и киевскиот режим и американските преговарачи. Додека режимот во Киев не донесе соодветни одлуки, специјалната воена операција продолжува, а нашите единици напаѓаат цели за кои се верува дека се поврзани со украинскиот воен комплекс“, истакна Песков.Песков додаде дека Кремљ нема намера денес да објавува какви било соопштенија за резултатите од трилатералните преговори во Абу Даби.„Времето за почеток на работата на трилатералната група во Абу Даби го одредуваат делегациите на терен“, рече Песков.Преговарачкиот процес во трилатерален формат – Украина, Соединетите Американски Држави и Русија – се одржува денес во Абу Даби. Преговорите се одвиваат зад затворени врати, без присуство на новинари, изјави извор за РИА Новости.

Свет | пред 1 месец

Напад во руско училиште: Ученичка запалила пожар и со чекан нападнала деца и наставник

Во Краснојарск, Русија, ученичка од осмо одделение вооружена со чекан подметнала пожар во училиште и нападнала други ученици, при што има повредени лица, објавија руските медиуми.Ученицата фрлила запалена крпа во училницата, а потоа удрила неколку ученици со предмет сличен на чекан, соопшти Министерството за внатрешни работи, пренесува агенцијата RIA Novosti.Пет деца и еден наставник се повредени во нападот, јави изворот, пренесува агенцијата TASS.Ученичката, чии постапки предизвикале несреќа во училиштето во Краснојарск, е задржана во притвор, соопшти Главната истражна управа на рускиот Истражен комитет, пренесува агенцијата RIA Novosti.Според изворот, повредените не се во животна опасност.

Свет | пред 1 месец

Претседателот на ФИФА: Не требаше да се исфрли Русија од меѓународниот фудбал

Претседателот на ФИФА, Џани Инфантино, изјави дека било грешка што рускиот фудбал беше исфрлен од сите натпреварувања под капата на ФИФА и УЕФА.Инфантино зборуваше на оваа тема за британскиот Скај Спорт. Тој потсети дека сите руски клубови и репрезентации, во сите возрасни категории, беа суспендирани кратко по почетокот на руската инвазија на Украина во февруари 2022 година.„Мораме да го преиспитаме тоа (исфрлување на Русија). Тоа е сигурно грешка“, изјави Инфантино.Првиот чекор кон враќањето на Русите на меѓународната сцена веќе беше направен од Меѓународниот олимписки комитет, кој препорача младите репрезентации да можат да се натпреваруваат како и сите други земји.„Исклучувањето на Русија не донесе ништо добро, само создаде повеќе фрустрации и омраза. Фактот дека руските момчиња и девојчиња можат да играат фудбал во други делови на Европа е позитивна работа“, нагласи Инфантино.Тој додаде дека ФИФА треба да размисли за промена на правилата, така што идни репрезентации нема да трпат последици заради политичките одлуки на своите земји.„Никогаш не би требало да ја забраниме земјата да игра фудбал поради постапките на нејзините политички лидери. Јас сум против забрани и против бојкоти. Тоа не носи ништо, само ја зголемува омразата“, порача Инфантино, правејќи паралела со трговските односи меѓу Велика Британија и САД.На крајот, Инфантино кратко прокоментира и за критиките околу тоа што претседателот на САД, Доналд Трамп, доби награда „ФИФА признавање за мир“:„Објективно, ја заслужи. Мораме да сториме сè за да придонесеме за светски мир“, одговори првиот човек на ФИФА.

Спорт | пред 1 месец

Нема фотографија

Безбедносни гаранции за Украина: Западот најавува брза реакција на евентуална руска ескалација

Украина постигнала договор со западните партнери според кој секое упорно руско кршење на евентуален иден договор за прекин на огнот би предизвикало координиран воен одговор од Европа и Соединетите Американски Држави, објави „Financial Times“, повикувајќи се на добро информирани извори. Според весникот, планот бил разгледуван во неколку наврати во декември и јануари на состаноци меѓу украински, европски и американски претставници, а неговата цел е да се воспостави јасен механизам за одвраќање на Москва од нови напади.Изворите наведуваат дека предвидениот модел опфаќа повеќефазен одговор за секое прекршување на примирјето. Во првата фаза, во рок од 24 часа по утврденото кршење, би следувало дипломатско предупредување, а доколку е потребно и ограничена акција на украинската армија со цел да се запре нарушувањето на договорот. Доколку непријателствата продолжат и покрај тоа, планот предвидува активирање на втората фаза, која би вклучила интервенција на силите на таканаречената „коалиција на подготвените“, составена од повеќе земји членки на Европската Унија, како и Обединетото Кралство, Норвешка, Исланд и Турција.Според истите информации, во случај на поширока и посериозна руска ескалација, координираниот одговор на силите поддржани од Западот, вклучително и американската војска, би бил активиран во рок од 72 часа од првичното кршење на примирјето. Ваквиот пристап, според соговорниците на „Financial Times“, има за цел однапред да ја дефинира цената за Москва доколку се обиде да го наруши евентуалниот мировен договор.Во меѓувреме, според истиот извор, се очекува претставници од Киев, Москва и Вашингтон да одржат разговори во Абу Даби во среда и четврток, во обид да се најде излез од војната што трае повеќе од три години. Иако официјални потврди засега нема, дипломатските напори се интензивираат во услови на зголемен притисок за воспоставување барем привремено примирје.Прашањето за улогата на САД во евентуалниот безбедносен механизам останува отворено. Подолго време е јасно дека секој иден мировен договор меѓу Украина и Русија би морал да содржи конкретни безбедносни гаранции, чија цел би била да ја одвратат Русија од нова агресија. Американската администрација веќе разгледувала повеќе можни опции, но испраќањето копнени сили се смета за најмалку веројатно сценарио, со оглед на тоа што актуелниот американски претседател Доналд Трамп јавно ја опишува војната како пред сè европски проблем.Пореална се смета можноста за засилени воздушни и поморски патроли, со оглед на тоа што американските сили и сега спроведуваат надзорни летови над Црното Море и други чувствителни региони. Сепак, аналитичарите предупредуваат дека постои суштинска разлика меѓу извидувачки мисии и директно вклучување во потенцијален вооружен судир со нуклеарна сила како Русија.Најизвесна, според проценките, е продолжената разузнавачка и логистичка поддршка. Американските сателитски и воздушни разузнавачки информации досега се покажаа како клучни за украинската одбрана, а токму ова поле се смета за област во која Вашингтон би бил подготвен да продолжи со поддршката и по евентуалното постигнување мировен договор. Дополнително, секоја идна европска мировна мисија би имала потреба од значајна логистичка поддршка, што е уште една сфера во која САД, и покрај најавите за намалување на военото присуство во Европа, веројатно би останале вклучени.Иако планот за координиран одговор сè уште не е официјално потврден, самото негово постоење, според аналитичарите, укажува дека Западот настојува однапред да воспостави јасни правила и црвени линии, со цел идниот прекин на огнот да не остане само хартиена формалност, туку реална и одржлива безбедносна рамка.

Свет | пред 1 месец

Малолетник пукаше со воздушна пушка во руска школа

Ученик од деветто одделение отвори оган со воздушна пушка во една гимназија во Уфа, најголемиот град на Република Башкортостан во Русија, потврди гувернерот на таа република, Радиј Хабиров.Според неговите зборови, во инцидентот немало повредени, а малолетниот напаѓач е приведен. Како што пренесува руската агенција ТАС, безбедносните служби веднаш интервенирале, а ситуацијата во училиштето е ставена под контрола.Хабиров наведе дека нема опасност за учениците и наставниот кадар, како и дека во моментов се утврдуваат сите околности на настанот.

Свет | пред 1 месец

ЕУ планира забрана за увоз на руски бакар и благородни метали

Европската унија разгледува воведување забрана за увоз на бакар и неколку клучни благородни метали од Русија, меѓу кои платина, иридиум и родиум.Овој предлог е дел од 20. пакет санкции што Брисел планира да го усвои до крајот на февруари 2026 година, по повод двегодишнината од почетокот на војната во Украина, пренесува Блумберг, повикувајќи се на анонимни добро упатени извори.Главна цел на овие мерки е рускиот гигант „Норникел“, најголемата рударска компанија во земјата, која досега успеа да избегне директни санкции од ЕУ поради својата критична улога на светскиот пазар.Одлуката за забраната доаѓа во момент кога светските пазари на овие метали веќе се под силен притисок, а цените на бакарот достигнуваат рекордни нивоа поради големата побарувачка и ограниченото снабдување, додека на пазарот на платина се бележи дефицит.Руските метали веќе се делумно потиснати од западните берзи, како што е Лондонската берза на метали, но и понатаму наоѓаат пат до европските индустриски потрошувачи.Европската унија се надева дека со овој потег дополнително ќе ги исцрпи руските воени фондови, и покрај ризикот од натамошен раст на цените на суровините.Новиот пакет санкции е проследен и со најава за огромен пакет финансиска помош за Украина во вредност од 90 милијарди евра за наредните две години.

Свет | пред 1 месец

(Видео) Нови воздушни напади врз Киев и Харков

Руските сили рано утринава извршија напад врз Киев, Харков и други поголеми градови во Украина, а во нападите има повредени лица и штета на енергетската инфраструктура, соопштија украинските официјални претставници.Во нападите се повредени четири лица, по две во Киев и Харков, соопштија официјални претставници во двата најголеми украински града.Во Киев, каде што ноќеска температурите се спуштија на речиси -20 степени Целзиусови, сведоци на агенцијата Ројтерс пријавија експлозии по полноќ, кои, според нивните изјави, биле предизвикани од ракети и дронови.„Ударните напади предизвикаа штета во пет киевски окрузи, погодени се три станбени згради и објект во кој се наоѓа градинка, изјави началникот на градската воена управа“, Тимур Ткаченко.Тој додаде дека, според моменталните податоци, најмалку две лица се повредени во нападите, пренесува Укринформ.Предупредувањето за воздушен напад во Киев било на сила повеќе од пет часа.Градоначалникот на Харков, Игор Терехов, изјави дека нападите во овој град биле насочени кон енергетската инфраструктура.„Целта е очигледна: да се предизвика максимално разорување и градот да се остави без греење при силни студови“, напиша Терехов на Телеграм.Началникот на Харковската регионална државна администрација, Олег Синегубов, извести дека две лица се повредени во руското гранатирање, пренесува Униан.Русија и Украина минатата недела соопштија дека ги прекинале меѓусебните напади врз енергетската инфраструктура, но не се согласија околу временската рамка за прекин на таквите удари.Кремљ соопшти дека американскиот претседател Доналд Трамп лично го замолил рускиот претседател Владимир Путин да се воздржи од напади врз Киев до 1 февруари, додека Зеленски изјави дека прекинот на нападите врз енергетските објекти треба да трае една недела, почнувајќи од 30 јануари.

Свет | пред 1 месец

Кремљ: Средба меѓу Путин и Зеленски можна само во Москва

Портпаролот на Кремљ, Дмитриј Песков, изјави дека контакт меѓу претседателот Володимир Зеленски и неговиот руски колега Владимир Путин е можен само во Москва, пренесе руската агенција Интерфакс.Песков на прес-конференција беше запрашан дали Кремљ ја разгледува можноста за организирање средба меѓу Зеленски и Путин „на неутрална територија“.„Зеленски предлага контакт, Путин рече дека тоа е можно во Москва. Овој став останува наш став.“Песков го опиша ставот на Москва како „прилично доследен“.„Остануваме отворени за преговори. Работата се спроведува преку работни групи. Го поздравуваме тоа и сме подготвени да продолжиме со оваа работа во интерес на решавање на состојбата во Украина.“Зеленски претходно повеќепати повтори дека ниту Русија ниту Белорусија не доаѓаат предвид како можна локација за средба.

Свет | пред 1 месец

Франција стои зад обидот за пуч во Буркина Фасо и активности во Сахара–Сахел, тврди Русија

Руската служба за надворешно разузнавање соопшти дека Франција планира и спроведува неоколонијални пучеви ширум Африка, наведувајќи дека Париз стои зад обидот за државен удар во Буркина Фасо и активно работи на дестабилизација на регионот Сахара–Сахел.Руската служба за надворешно разузнавање известила дека Франција планира неоколонијални пучеви во Африка.Како што се наведува во извештајот, Франција била вмешана во обидот за пуч во Буркина Фасо на 3 јануари, а Париз ќе продолжи да дестабилизира земји во регионот Сахара–Сахел, пренесува TASS. Службата наведува дека Франција „жешко бара можности за политичка одмазда“ во Африка и дека францускиот претседател Емануел Макрон овластил свои разузнавачки агенции да покренат план за елиминација на „непосакувани лидери“.Според наводите на Службата, Франција истражува опции за соборување на новиот претседател на Мадагаскар, а исто така преминала и на директна поддршка на терористи од различен вид, кои стануваат нејзини главни сојузници на африканскиот континент.

Свет | пред 1 месец

Медведев: Не сме заинтересирани за глобален судир, не сме луди

Заменик-претседателот на Советот за безбедност на Русија, Дмитриј Медведев, изјави дека Москва нема интерес да распалува глобален судир, исто како што немала интерес да започне специјална воена операција во Украина.„Секако дека не сме заинтересирани за глобален судир. Не сме луди. Ова е кажано сто пати. Кому му е потребен глобален судир?“, изјави Медведев во интервју за ТАСС, Ројтерс и проектот Варгонзо, потсетувајќи дека руското раководство повеќепати го предупредувало Западот и земјите на НАТО, повикувајќи ги да ги земат предвид интересите на Русија и да седнат на преговарачка маса.Како што вели тој, глобалната ситуација може да доведе до состојба во која сè во еден момент би можело да излезе од контрола, а опасноста од глобална војна е многу голема.„Тоа, секако, ја вклучува и нашата земја – Руската Федерација, Народна Република Кина, Индија и земјите од она што денес го нарекуваме глобален Југ. Јасно е дека ова е сосема нов феномен, со сопствен правен субјективитет, како што велат правниците, и со желба директно да се учествува во меѓународните односи, а не индиректно преку други земји“, изјави заменикот на шефот на Советот за безбедност на Русија.На прашањето на новинарите за најневеројатната прогноза што би можел да ја даде за 2026 година, Медведев оцени дека распадот на НАТО и враќањето на Европската унија кон купување руска нафта и гас би биле корисни за целата планета.„Меѓу неверојатните работи, бидејќи тоа го барате, на пример – Европската унија ќе ѝ се извини на Руската Федерација и повторно ќе побара продажба на гас и нафта. Или НАТО ќе се распадне поради повлекување на САД. И двете, инаку, би биле корисни за нашата планета. Дали е тоа можно? Веројатно е, како и сите неверојатни работи – можно“, истакна Медведев.Според неговите зборови, колонијалните тенденции кон суверена земја како Венецуела биле изненадувачки.„Апсењето на претседателот на Венецуела, Николас Мадуро, од страна на Американците е катастрофа за меѓународното право и го поткопува целиот систем на меѓународни односи“, рече Медведев, додавајќи дека планира да објави правен есеј за правните аспекти на апсењето на Мадуро.Кога станува збор за односите меѓу Москва и Лондон, Медведев оцени дека само фундаментална промена на британската политика може да ги подобри односите со Русија.„Она што го прави сегашното британско раководство е еден вид бесна, примитивна русофобија со цел да си го подигне сопствениот изборен рејтинг“, изјави тој.Во врска со Гренланд, Медведев оцени дека желбата на претседателот на САД, Доналд Трамп, да ја преземе контролата над таа земја претставува сериозен предизвик за единството на Западот.„Нема да се задржувам на Гренланд. Нашиот претседател неодамна рече дека тоа не нè засега. Нека САД и Европејците го решат тоа, но целата работа е прилично чудна. Ништо слично не се случило барем во последните неколку децении, а сега се случува. Ова навистина претставува сериозен предизвик за атлантското единство“, рече Медведев.Тој, исто така, оцени дека тврдењата дека Русија и Кина претставуваат „закана“ за Гренланд се само тактика на заплашување.

Свет | пред 1 месец

Руски напад врз родилиште во Запорожје: повредени шест лица, меѓу нив и трудници

Руски сили денеска извршија напад врз родилиште во Запорожје, на југот на Украина, при што се повредени најмалку шест лица, соопшти гувернерот Иван Федоров. Тој објави и видеоснимки од местото на настанот на кои се гледа оштетената зграда со искршени прозорци и чад што се издига од објектот, објави Kyiv Independent.Меѓу повредените се и две трудници кои во моментот на нападот биле на лекарски преглед. „Нападот врз родилиште е уште еден доказ дека се води војна против животот“, изјави Федоров.За време на инвазијата, руските сили повеќепати таргетираа цивилна инфраструктура, вклучително и родилишта. Во напад во Вилњанск, во Запорошката област, во 2022 година беше убиено бебе старо два дена.Најновиот напад врз Запорожје доаѓа во период кога Русија ја засилува офанзивата во јужниот регион и редовно изведува удари во ова подрачје. Инцидентот се случи во услови на обиди за преговори за мировен договор меѓу Украина, САД и Русија. Американскиот претседател Доналд Трамп на 29 јануари соопшти дека рускиот претседател Владимир Путин прифатил еднонеделна обустава на нападите врз украинските градови, но Москва подоцна појасни дека тоа се однесува само на Киев и дека примирјето истекува денеска, непосредно пред најавениот нов бран студено време.

Свет | пред 1 месец

Сателитски снимки откриваат ново руско воено засилување близу Финска

Русија започнала со обнова на напуштена воена база во градот Петрозаводск, во Република Карелија, во непосредна близина на границата со Финска, со цел таму да смести до 15.000 војници од новоформираниот 44. армиски корпус. Ова го покажуваат сателитските снимки што ги објави финската јавна телевизија Yle, а ги пренесуваат и повеќе меѓународни медиуми.Снимките го прикажуваат просторот на поранешниот гарнизон во близина на електраната Рибка, кој бил напуштен од почетокот на 2000-тите години. Локацијата сега е расчистена од ниска и висока вегетација, а до октомври минатата година биле забележани повеќе од 50 воени камиони и други возила. Во Петрозаводск веќе постојат голема воздухопловна база и магацин за воена опрема, а паралелно се градат и нови работилници и инфраструктура.Според информации од локални руски медиуми, изградбата на нови касарни во Петрозаводск треба да започне во текот на оваа година. Русија го формирала 44. армиски корпус во Карелија уште во 2024 година, со што биле додадени околу 15.000 војници. Дел од нив веќе пристигнале во градот, што ја објаснува потребата од забрзана изградба на објекти за сместување и обука.Воениот аналитичар и поранешен фински разузнавач Марко Еклунд за Yle изјавил дека постои голема веројатност овие сили да се обучуваат за испраќање на боиштето во Украина. Истовремено, се работи и на изградба на ново воено населено место во Кандалакша, во Мурманска област, што дополнително укажува на поширока воена активност во северозападниот дел на Русија.Во меѓувреме, Финска и Шведска на 27 септември минатата година формираа заедничка бригада со околу 5.000 војници, која ќе биде стационирана во Лапонија, долж границата со Русија. Финската воена разузнавачка служба на 22 јануари годинава соопшти дека Русија не се откажала од обидите за оштетување на подводната инфраструктура во Балтичко Море, што дополнително ги зголемува безбедносните грижи во регионот.

Свет | пред 1 месец

Кина директно го поттикнува најсмртоносното оружје на Путин

Кина испраќа клучна технолошка опрема што ѝ помага на Русија во развојот и производството на хиперсонични ракети со нуклеарни способности, оружје кое може да погоди цели во Европа за помалку од 20 минути. Станува збор за специјализирани CNC машини и други компоненти неопходни за изработка на боеви глави и прецизно наведувано оружје.Според „Телеграф“, Русија неодамна го употребила проектилот „Орешник“, кој достигнува брзина од околу 12.875 километри на час и може да носи шест боеви глави со различни цели. Украинските власти и безбедносни аналитичари предупредуваат дека станува збор за сериозна закана за Западот, додека Москва тврди дека ракетата е невозможно да се собори.Клучна улога во зголемувањето на производството има кинеска карусел-струг машина, идентификувана во руската фабрика во Воткинск, главен погон за производство на ракети, кој е под западни санкции. Таму, покрај „Орешник“, се произведуваат и „Искандер-М“ и интерконтиненталните ракети „Топол-М“.Анализите покажуваат дека Кина ѝ испорачала на Русија технологија и опрема во вредност од околу 10,3 милијарди долари, вклучувајќи микрочипови, мемориски плочки, куглични лежишта и компоненти за радари и електронско војување. Дел од овие производи се на списокот на високоприоритетни стоки чиј извоз во Русија е забранет од повеќе западни земји, но Кина не ги прифати тие санкции.Експертите оценуваат дека без пристап до кинеската технологија и пазар, Русија би имала сериозни тешкотии да го одржи темпото на военото производство и модернизацијата на одбранбената индустрија. Пекинг, пак, ги отфрла обвинувањата, наведувајќи дека не придонесува за ескалација на војната и не профитира од конфликтот во Украина.

Свет | пред 1 месец

Путин се согласи на привремен прекин на огнот

Кремљ соопшти дека рускиот претседател, Владимир Путин, се согласил да ги запре нападите врз украинските градови до 1 февруари.Портпаролот на Кремљ, Дмитриј Песков, изјави дека американскиот претседател Доналд Трамп лично го замолил Путин да се воздржи од напади врз Киев една недела со цел да се создадат поволни услови за преговори.На прашањето дали Путин се согласува со предлогот, Песков одговори: „Да, секако. Тоа беше лично барање од претседателот Трамп“.Претседателот на САД вчера изјави дека неговиот руски колега се согласил со неговото барање да не се напаѓа Киев и другите украински градови и места една недела.„Јас лично го замолив претседателот Путин да не го напаѓа Киев и другите градови и места една недела“, рече Трамп на брифинг за медиумите, нагласувајќи дека Украина се соочува со екстремно ниски температури. „И тој се согласи. Морам да ви кажам, тоа беше многу убаво. Многу луѓе ми рекоа – не губете време на тој повик. Но, јас го направив тоа“, додаде тој.Претседателот на САД не разјасни кога или на кој начин го упатил тоа барање до Путин, ниту на кој датум треба да стапи на сила наводното прекин на огнот. Коментарите на Трамп, исто така, следеа по шпекулациите дека Киев и Москва се согласиле на пауза во нападите врз енергетската инфраструктура на другата страна, иако ниту една страна не ги потврди тврдењата ниту ја коментираше изјавата на Трамп.По објавата на Трамп, се огласи украинскиот претседател Володимир Зеленски.„Важна изјава од американскиот претседател за можноста за обезбедување безбедносна заштита на Киев и другите украински градови во текот на овој екстремен зимски период. Снабдувањето со електрична енергија е основа на животот. Ги цениме напорите на нашите партнери кои ни помагаат да ги заштитиме животите. Ви благодариме, претседателе Трамп! Нашите тимови разговараа за ова во Обединетите Арапски Емирати. Очекуваме спроведување на постигнатите договори. Чекорите кон деескалација придонесуваат за вистински напредок кон завршување на војната“, напиша Зеленски

Свет | пред 1 месец

„Путин не го повикал Зеленски и не му понудил никакви средби“, вели Песков

Рускиот претседател Владимир Путин не го повикал украинскиот претседател Володимир Зеленски никаде, ниту му понудил средби, изјави денес портпаролот на Кремљ, Дмитриј Песков.„Путин не го повикал Зеленски проактивно никаде и не му понудил никакви средби. Ги гледавме и слушнавме и овие изјави. Многу изјави имаше изминатите денови, всушност, изминатите часови“, рече Песков на новинарите, одговарајќи на прашањето каква е реакцијата на Кремљ на повикот што Зеленски во видео-изјава му го упати на Путин за непосредна средба на мировни преговори во Киев, пренесува агенцијата РИА Новости.Зеленски претходно денес во видео-изјава објави дека е подготвен за средба со Путин во Киев, на што помошникот на рускиот претседател Јуриј Ушаков рече дека Путин повеќепати претходно изјавил дека Зеленски може да дојде во Москва, ако е отворен за дијалог.Украинскиот претседател денес изјави дека е подготвен за средба со рускиот претседател Владимир Путин во рамки на мировните преговори, но ја исклучи можноста таквата средба да се одржи во Москва или Белорусија, повикувајќи го Путин да дојде во Киев „ако смее“.„Апсолутно е невозможно да се сретнам со Путин во Москва. Тоа би било исто како средба со Путин во Киев. Може исто така да го повикам во Киев – нека дојде. Јавно го повикувам, ако смее, секако“, рече Зеленски, пренесе Униан.

Свет | пред 1 месец

Руски амбасадор до Американците: „Трипати мери и не сечи“

Рускиот амбасадор при Обединетите нации, Василиј Небенџа, им даде совет на Американците во врска со можен американски напад врз Иран: „трипати мери и не сечи“.„Трипати мери и не сечи“, порача Небенџа, нагласувајќи дека Соединетите Американски Држави можат да го нападнат Иран, но дека Техеран сега е подобро подготвен за тоа отколку што беше во јуни 2025 година.Небенџа истакна дека реториката на американскиот претседател Доналд Трамп за Иран во извесна мера се смирила откако завршија протестите во таа земја, но ситуацијата сепак е загрижувачка.„Нападот може да се изведе, но Иран овојпат е подобро подготвен за таков развој на ситуацијата отколку што беше во јуни“, рече Небенџа за руските медиуми.Американските медиуми пренесоа дека Трамп размислува за нов голем удар врз Иран откако претходните разговори меѓу Вашингтон и Техеран за ограничување на иранскиот нуклеарен програм и производство на балистички ракети не напредуваа.Опциите што Трамп сега ги разгледува, вклучуваат американски воздушни напади насочени кон иранските лидери и безбедносни функционери за кои се верува дека се одговорни за убиства за време на протестите во земјата, како и напади врз иранските нуклеарни објекти и владините институции, изјавија извори за Си-Ен-Ен.Ударната група носачи на авиони „USS Abraham Lincoln“ влезе во Индискиот Океан пред три дена и продолжува да се приближува кон Иран.

Свет | пред 1 месец

Зеленски ја одби Москва: Нека дојде Путин, ако смее!

Украинскиот претседател изјави дека не било склучено директно договор со Русија за енергетските удари.„Ако престанат да ја напаѓаат нашата инфраструктура, ние нема да ја нападнеме нивната“, рече тој.Исто така, тој ја одби руската покана да отпатува во Москва, исклучувајќи ја и Белорусија како можно место за средба со Путин.Наместо тоа, Зеленски го повика рускиот лидер во Киев, додавајќи „Aко смее, секако“.

Свет | пред 1 месец

Завршена продажбата на еден од најголемите руски аеродроми

Подружницата на Меѓународниот аеродром Шереметјево „Перспектива“ го купи аеродромот Домодедово на аукција за 66,133 милијарди рубљи (околу 738 милиони евра), објави „Комерсант“.Продажбата беше спроведена како холандска аукција, со претходно објавена максимална цена.Потоа беше утврдено намалување на цената за 10 отсто, по што аеродромот беше продаден по минималниот износ.Првично беа поднесени пет понуди за купување на Домодедово, но три беа дисквалификувани, па на крајот во аукцијата, покрај Шереметјево, учествуваше само уште аеродромот Внуково.Руското Министерство за сообраќај соопшти дека е задоволно од резултатите на тендерот.„Од големо значење за транспортната индустрија е што искусен сопственик го презема управувањето со еден од најголемите руски аеродроми“, се наведува во соопштението.Аеродромите Шереметјево и Домодедово се наоѓаат во Московската област.

Свет | пред 1 месец

Украинските сили уништија руски радар вреден околу 100 милиони долари

Украинските вооружени сили уништија модерен руски радарски систем од типот „Небо-СВУ“, чија вредност се проценува на околу 100 милиони долари, а во одвоени напади беа погодени и неколку руски контролни пунктови за беспилотни летала. Генералштабот на Вооружените сили на Украина соопшти дека радарот бил погоден во близина на селото Лимаривка, во окупираниот дел од Луганската област, објави „Кијив пост“.Станува збор за радарски систем наменет за противвоздушна одбрана на копнените сили, кој руската армија го користи од 2017 година. Според украинските процени, една единица од овој систем чини околу 100 милиони долари. „Небо-СВУ“ се одликува со целосно дигитална обработка на сигналот, висока отпорност на електронско попречување и способност за откривање летала со намалена радарска видливост, со радарски одраз од 0,1 квадратен метар, на далечина до 100 километри.Според претходни информации објавени од „Дифенс експрес“, руската страна тврди дека радарот може да открива цели на далечина до 360 километри доколку летаат на височина од 20 километри. Тој домет се намалува на околу 270 километри за цели на височина од 10 километри, односно на приближно 60 километри за летала што се движат на височина од околу 500 метри. Истовремено се посочува дека, иако руските извори често ја нагласуваат теоретската способност на системот да детектира и летала со стелт-карактеристики, прецизноста на откривањето во тој радарски опсег е релативно ниска.Генералштабот на Украина информираше и за напади врз неколку руски контролни пунктови за дронови, лоцирани во близина на населбите Солодке, Ривнопиље и Новохрихоривка во окупираниот дел од Запорошката област, како и кај Пидстепне во Херсонската област. Во исто време било погодено и складиште за муниција во близина на Василивка, исто така во Запорошката област. Украинската војска ги потврди ударите и наведе дека обемот на руските загуби сè уште се утврдува.

Свет | пред 2 месеци

Русија тврди: НАТО се подготвува за војна

Северноатлантскиот сојуз се подготвува за конфликт со Русија, изјави во интервју за TASS Владислав Маслеников, директор на Одделот за европски прашања при Министерството за надворешни работи на Русија.„Русија моментално е дефинирана како ‘најзначајна и најдиректна безбедносна закана’ во сите доктрински документи на НАТО, бидејќи блокот нагласува дека таквата закана ќе остане долгорочно, дури и ако конфликтот во Украина се реши“, рече висок руски дипломат, одговарајќи на прашањето дали Русија и НАТО би можеле да го обноват дијалогот сега или во иднина.„Имајќи го ова предвид, НАТО всушност се подготвува за потенцијален конфликт со Русија со зголемување на воените расходи, градење на своите капацитети долж нашите граници и распоредување дополнителни мисии и операции во Источна Европа“, објасни Маслеников.Дипломатот потсети дека на 15 ноември минатата година германскиот министер за одбрана Борис Писториус изјавил во интервју за „Frankfurter Allgemeine Zeitung“ дека војна помеѓу Русија и НАТО наводно би можела да започне пред 2029 година. На неговата изјава, портпаролката на руското МНР Марија Захарова одговори дека веќе нема сомнеж кој е агресор. Рускиот министер за надворешни работи Сергеј Лавров додаде дека Писториус ќе мора да живее со изјавата дека војната помеѓу НАТО и Русија е „неизбежна“.Маслеников истакна дека меѓу Русија и НАТО останал само канал за итна комуникација откако Северноатлантскиот сојуз го прекина контактот со земјата.„Алијансата го прекина секој контакт со нас во 2022 година. Остана само канал за комуникација во итни случаи“, рече висок руски дипломат.Според него, НАТО всушност самоволно го замрзнал дијалогот со Русија уште во 2014 година. „Можевме да разговараме за одредени прашања, но НАТО сè сведоа на прашањето Украина. Нашите иницијативи за деескалација на воените тензии во Европа не беа ценети“, истакна тој.Маслеников додаде дека Русија се обидела да иницира дијалог за меѓусебни безбедносни гаранции. „Предложивме нацрт на такви договори во декември 2021 година, но не добивме позитивен одговор.“

Свет | пред 2 месеци