(Фото) Иселени бездомници кои узурпирале напуштени објекти во Центар, постоел ризик од пожари и загрозување на здравјето

Инспекциските служби на Општина Центар започнаа интензивна акција за расчистување на два напуштени објекта на улиците „Тетовска“ бр. 20 во Ново Маало и „Владимир Полежиновски“ бр. 7, во близина на ТЦ „Буњаковец“, информираше градоначалникот Горан Герасимовски.Интервенцијата следува по барање на жителите од околните згради, кои укажале на страв од можни пожари, кражби и загрозување на јавното здравје. На локацијата во близина на гимназијата Раде Јовчевски – Корчагин, со асистенција на Министерство за внатрешни работи, биле иселени затекнатите лица, по што започнало расчистување на отпадот во и околу објектот.На втората локација, кај ТЦ „Буњаковец“, поради присуство на малолетни лица, во акцијата била вклучена и социјалната служба. По нивната интервенција, надлежните пристапиле кон целосно чистење на мини-депонијата што се формирала во и околу напуштениот објект.Од Општина Центар посочуваат дека и покрај континуираните интервенции на овие критични точки, нерешените имотно-правни односи често се користат како можност за повторно вселување и создавање нови ризици. Упатен е апел до сопствениците на објектите да покажат поголема одговорност, а до граѓаните – да продолжат со навремено пријавување на вакви појави со цел ефикасна реакција на службите.

Скопје | пред 1 месец

Жена од Тетово се водела за почината се додека не се појавила со новороденче во Центарот за социјални работи

Тројца вработени во Центарот за социјални работи Тетово пријавиле сомнение за сторено кривично дело „фалсификување исправа“, информираат од СВР Тетово.Според информациите, на 12 февруари 2026 година во 13:40 часот во СВР Тетово било пријавено дека на 21 јануари 2026 година во Центарот пристигнало известување од Управа за водење матични книги, во кое се наведува дека на 8 декември 2025 година во Клиничка болница Тетово е родено женско дете од мајка со иницијали А.С. (27).При постапката за регистрација на новороденчето во службените евиденции на Управата, било утврдено дека мајката се води како почината од 21 октомври 2006 година, што предизвикало сомнение и било пријавено како можен случај на фалсификување службена исправа.По преземени мерки и испратени покани, на 12 февруари 2026 година лицето А.С. се појавило во Центарот за социјални работи заедно со новороденото дете и едно машко лице. Притоа, не бил приложен ниту еден документ за лична идентификација.Надлежните институции преземаат мерки за целосно расчистување и документирање на случајот, по што ќе бидат соопштени дополнителни информации.

Македонија | пред 1 месец

Mozzart го отвори „Театарот на хуманоста“: Племенита уметност која ја храни душата

Кога уметноста и хуманоста ќе се спојат, резултатот е вистинско ремек-дело.Полна сала, насмевки и громогласен аплауз во Театар Комедија го одбележаа изведувањето на претставата „Олд Сејбрук“, првата за која компанијата Mozzart им делеше бесплатни билети на граѓаните.Со оваа фантастична комедија започна проектот „Театарот на хуманоста“, кој има двојна цел – да им овозможи на љубителите на театарот да уживаат во претстави без да купуваат карти, а истовремено да поттикне хуманост преку донации за Банката за храна на Македонија.Посетителите добиваа флаери со број за донации, а секоја испратена порака значеше бесплатен оброк за оние кои не можат да си го дозволат.„Прекрасно е што секој има можност да дојде и да ја погледне претставата, а истовремено да направи добро дело,“ порача актерката Маја Љутков, која ја толкува една од главните улоги во претставата.Од компанијата Mozzart велат дека ова е само почеток: „Успешно ја започнавме реализацијата на проектот ‘Театарот на хуманоста’. Целта е љубителите на театарот да уживаат во културни содржини, а истовремено да донираат за хуманитарни цели. Првата претстава помина одлично, а веќе се подготвуваме за следната,“ изјави Ивана Стефановска Крстевска од Mozzart.Фактот дека картите беа поделени за само половина час зборува за огромната љубов на граѓаните кон театарската уметност. Токму затоа Mozzart најавува уште неколку бесплатни претстави, продолжувајќи да ја поддржува културата и хуманоста.(ПР)

Магазин | пред 1 месец

Ќосето му одговори на Заев: „Иде време за наплата“

Горан Ангелов, еден од осудените за настаните од 27 април 2017 година во Собранието, со остра порака реагираше на изјавата на поранешниот премиер Зоран Заев, кој претходно изјави дека никому не му се одмаздил за случувањата во парламентот.„Не сум се одмаздил на никој од 27“, рече Заев, додавајќи дека никогаш не ја злоупотребил својата политичка позиција, но дека „сега е доста“.На ова Ангелов возврати со серија обвинувања и тешки зборови, посочувајќи дека осудените за 27 април издржувале долгогодишни затворски казни и дека дел од нив се соочуваат со сериозни здравствени последици.„Не ти беше малку што лежевме по осум години? Не ти беше малку што починаа Игор и Кире? Деведесет проценти од луѓето за 27 се со хронични болести, покрај растурени и уништени семејства“, напиша Ангелов.Тој во својата објава упати и порака, наведувајќи дека „иде време за наплата“.

Коментари | пред 1 месец

Факултетот за физичко образование ќе добие нов објект во Скопје

Факултетот за физичко образование, спорт и здравје во Скопје ќе добие нов објект во дворот каде што се наоѓа постојната зграда, најави министерката за образование и наука Весна Јаневска.Според Јаневска, станува збор за модерен простор кој ќе ги обезбеди сите неопходни услови за квалитетно изведување на наставната и научната дејност, на задоволство и на вработените и на студентите.Таа информира дека веќе е објавена постапката за изработка на проектната документација, по што ќе следува и постапка за избор на изведувач на градежните работи.За планираната инвестиција денеска се разговарало со професорите кои го сочинуваат Наставно-научниот совет на факултетот. Министерката порача дека реализацијата на овој проект е дел од заложбата за унапредување на високото образование и подобрување на условите за студирање и научноистражувачка работа.„Тоа што го ветуваме, тоа и го реализираме“, истакна Јаневска.

Македонија | пред 1 месец

Нетанјаху: Се надевам дека Трамп создава услови за договор со Иран без воена ескалација

Израелскиот премиер Бенјамин Нетанјаху денеска изјави дека се надева оти американскиот претседател Доналд Трамп создава предуслови за постигнување договор со Иран, со кој би се избегнала воена интервенција.Нетанјаху, кој вчера разговараше со Трамп во Вашингтон, нагласи дека секој можен договор со Иран „мора да ги содржи елементите што се од витално значење за Израел“. Според него, тоа подразбира запирање на иранската нуклеарна програма, ограничување на балистичките ракети и сузбивање на дејствувањето на посредничките структури што Техеран ги поддржува во регионот.Ова беше седма средба меѓу Трамп и Нетанјаху откако американскиот претседател повторно ја презеде функцијата. Разговорот се одржа зад затворени врати, без присуство на медиуми. Трамп ја оцени средбата како „многу добра“, но посочи дека не биле донесени суштински одлуки.Американскиот претседател претходно се закани со можни напади врз Иран доколку не се постигне договор, додека Техеран возврати дека во таков случај ќе следи одмазда, што ги засили стравувањата од поширок регионален конфликт. Трамп во повеќе наврати ја истакна својата поддршка за безбеден Израел, долгогодишен сојузник на Соединетите Американски Држави и еден од најострите противници на Иран.„Мислам дека условите што тој ги создава, во комбинација со фактот дека тие сигурно разбираат дека минатиот пат направија грешка што не постигнаа договор, можат да создадат околности за добар договор“, изјави Нетанјаху.Тој нагласи дека со САД споделува „многу блиска и искрена врска“ и дека разговорите се фокусирале на повеќе прашања, но пред сè на преговорите со Иран. Според него, Трамп сакал директно да го слушне неговото мислење.Нетанјаху се осврна и на неодамнешниот дванаесетдневен судир меѓу Израел и Иран, кој кулминираше со американски воздушни напади врз ирански нуклеарни објекти, посочувајќи дека иранската страна веќе знае „со кого има работа“. Трамп претходно изјави дека верува оти Иран сака договор.Иранските власти соопштија дека се подготвени да разговараат за ограничувања на својата нуклеарна програма во замена за укинување на санкциите, но ја отфрлија можноста тоа прашање да се поврзе со ракетната програма.Нетанјаху додаде дека на средбата се разговарало и за состојбата во Газа, каде што е на сила кревко примирје меѓу Израел и палестинското движење Хамас, како и за пошироките регионални прашања. „Тоа беше уште еден разговор со голем пријател на Државата Израел, каков што никогаш досега не сме имале“, изјави израелскиот премиер.

Свет | пред 1 месец

Касами ќе оценува кој ќе си оди од Владата, иако Мицкоски му кажа дека тој одлучува

Лидерот на Движењето Беса, Билал Касами, изјави дека партијата ќе направи оценка на работата на сите свои функционери во извршната власт и врз основа на тоа ќе донесе одлука дали ќе остане зад актуелните министри, меѓу кои и министерот за труд и социјална политика, Фатмир Лимани.„Свесни сме дека премиерот е мандатар и тој одлучува кој ќе биде министер, но додека станува збор за политичка влада во која учествува Беса како дел од коалицијата Влен, Беса одлучува кој министер ќе биде предложен од нејзина страна како дел од идната Влада“, рече Касами.Тој најави дека од сите функционери ќе биде побаран извештај за сработеното во изминатиот период, по што раководството на партијата ќе оцени дали е задоволно од нивниот ангажман. „Ќе се донесе одлука дали ќе бидеме задоволни од работата на Лимани и другите функционери“, изјави Касами.Претходно, премиерот Христијан Мицкоски, одговарајќи на новинарски прашања во врска со најавите за можно разрешување на Лимани, изјави дека е задоволен од неговата работа и дека нема информации за негова смена.„Мислам дека тој е додадена вредност во Министерството за социјални работи. Јас сум носител на мандатот и јас ја формирам Владата“, изјави Мицкоски.Премиерот додаде дека доколку некој заборавил кој го има мандатот за состав на Владата, тој потсетува дека таа одговорност е негова, алудирајќи на политичките пораки што доаѓаат од коалициските партнери.

Македонија | пред 1 месец

Првиот синдикалец со остар напад: Половина држава им се смее, другата половина ги осудува

Претседателот на Сојузот на синдикатите на Македонија, Слободан Трендафилов, со остра реакција кон носителите на извршната и законодавната власт, обвинувајќи ги дека наместо да се фокусираат на зголемување на минималната и работничките плати, ја насочуваат енергијата кон одбрана на, како што рече, „неодбранливото“.„Дозволете ми на премиерите, министрите и пратениците да им се заблагодарам на пи-ар стратегиите кои успеаја да предизвикаат половина држава да им се смее, а другата половина да ги осудува“, изјави Трендафилов, додавајќи дека мал број луѓе на врвот нанесуваат штета на многумина.Тој посочи дека изминатите денови во јавноста се создава атмосфера која, според него, потсетува на опасна реторика и обиди за поделба меѓу граѓаните, вклучително и меѓу оние што живеат со минимална плата. Според Трендафилов, наместо да се отвори суштинска дебата за подобрување на животниот стандард, вниманието се пренасочува кон дневнополитички пресметки.„Што значи еден ден доаѓање на работа пешки без патни трошоци? Што значи иницијативата функционерите да примаат минимална плата? Да беа толку жестоки за зголемување на платите, колку што се жестоки во нивната одбрана, денес ќе имавме поинаква реалност“, нагласи тој.Првиот синдикалец порача дека синдикатот нема да се повлече под притисоци и дека нападот врз синдикалното организирање, како што оцени, претставува напад врз секој работник. „Ние не се плашиме. Се бориме за зголемување на работничките плати затоа што на работниците им треба достоинствен живот“, рече Трендафилов.Тој додаде дека синдикатот нема политички амбиции, туку бара конкретни мерки за подобрување на стандардот, истакнувајќи дека доколку платите биле навремено зголемени, ниту ќе имало вакви конфронтации, ниту јавноста ќе била сведок на сегашните тензии.

Македонија | пред 1 месец

ВМРО-ДПМНЕ со обвинувања кон Филипче и Заев за лиценците за канабис и запленетата марихуана

ВМРО-ДПМНЕ побара одговори од поранешниот министер за здравство Венко Филипче во врска со издавањето лиценци за одгледување канабис за медицински цели и последните заплени на марихуана, тврдејќи дека во периодот на владеење на СДСМ биле поставени темелите за злоупотреби во овој сектор.Од партијата обвинија дека Филипче „жестоко се обидува да го одбрани својот ментор Заев“, додавајќи дека Македонија во тој период, наместо да има строго контролирано производство за медицински цели, била претворена во „балкански нарко-центар“. Според нив, запленетите 40 тони марихуана водат до фирми блиски до Зоран Заев и Венко Филипче.ВМРО-ДПМНЕ тврди дека околу 70 проценти од запленетата дрога деновиве потекнува од компанија во сопственост на лица поврзани со Заев, наведувајќи дека медицинската марихуана била параван за организиран криминал од големи размери.Партијата поставува прашања зошто, како што наведуваат, било дозволено одгледување канабис на отворено спротивно на закон, кои биле мотивите за таквите одлуки и дали некој профитирал од нив. Дополнително, бараат објаснување дали измените на правилникот биле донесени по насока од тогашниот премиер и дали со нив се отворил простор за можни злоупотреби и незаконска трговија.Во соопштението се наведува и прашањето зошто Заев, според нив, лично се интересирал за случајот со петте тони марихуана запленети во Србија.ВМРО-ДПМНЕ порача дека останува посветена на борбата против криминалот и корупцијата, на изградба на стабилни институции и владеење на правото, потенцирајќи дека за случајот мора да има одговорност.

Македонија | пред 1 месец

Осум часа испрашување на вештакот за „Онкологија“ – судир околу терапијата на пациентите со карцином на јајници

Вештото лице Маја Равник од Медицинскиот факултет во Марибор повеќе од осум часа одговараше на вкрстени прашања од одбраната на поранешниот директор на Клиниката за онкологија, Нино Васев, во судскиот процес за наводно несовесно лекување пациенти.Во фокусот на расправата беше лекот „капецетабин“ и неговата примена кај пациенти со карцином на јајници. Во своето вештачење, Равник навела дека овој лек нема индикација за лекување на рак на јајници според современите онколошки протоколи. Васев, пак, посочи дека во Македонија, врз основа на национални протоколи и клиничка студија објавена во реномирано европско списание, „капецетабин“ се користи како терапија од втора и трета линија и кај гинеколошки карциноми, како и кај уште 11 други индикации.Равник изјави дека при изготвувањето на мислењето се повикувала на меѓународни и европски протоколи и дека не направила поширока анализа на домашната литература. Доколку постојат национални протоколи поткрепени со докази, рече таа, не може да ги коментира.Одбраната ја оспори и оценката на вештакот дека одредени терапии биле неиндицирани и довеле до влошување на здравствената состојба кај конкретни пациенти. Васев посочи пример со пациентка која живеела 52 месеци, иако просечниот период на преживување за таа болест изнесува 17 месеци. Равник одговори дека ја радува долгото преживување, но останува на ставот дека дел од терапиите отстапувале од протоколите, посочувајќи го и лекувањето со „цетуксимаб“ како несоодветно за карцином на јајници.Судир имаше и околу комбинираната терапија со „перзотумап“ и „херцептин“. Равник нагласи дека давање само на еден од лековите не е оправдано, дури и во услови на недостиг, бидејќи самостојно нема соодветен ефект.На прашање од одбраната, Равник потврди дека не ги анализирала македонските национални протоколи пред да го изготви вештачењето, но оцени дека тие не би требало суштински да се разликуваат од меѓународните насоки. Таа исто така изјави дека во своите наоди не навела кој конкретен лекар го спровел третманот кај одделни пациенти, бидејќи не ја утврдувала индивидуалната одговорност.Бранителот Боби Спирковски изјави дека вештачењето нема правна валидност и дека покажува непознавање на македонските протоколи, нагласувајќи дека лекарите имаат можност, со образложение, да отстапат од нив во интерес на пациентот.Во предметот, покрај Васев, обвинети се уште двајца онколози. Судењето продолжува со сослушување на дополнителни вешти лица од Словенија, а најавено е и вклучување на експерти од Србија во наредната фаза од доказната постапка.

Македонија | пред 1 месец

Битолчанец имал пари само за пудинг откако Битола му исплатила обештетување за земјотресот, па се мисли да им го однесе во Општина

Поранешната советничка во Советот на Општина Битола, Габриела Илиевска, преку објава на социјалните мрежи остро реагираше на висината на исплатените средства за штетите од земјотресот, наведувајќи дека дел од битолчани добиле симболични износи.Илиевска претходно објави дека околу 2.400 граѓани добиле во просек по 700 денари, односно во одредени случаи и по 81 денар, додека, како што тврди, за работата на комисијата за проценка на штетите биле потрошени околу еден милион денари за десет лица. Таа ја доведе во прашање логиката на распределбата на средствата и порача дека на градоначалникот не му се „100 дена“, туку четири години и сто дена на функцијата.Во нова објава, со ироничен тон, таа повика битолчани да купат плик, да ги извадат средствата што ги добиле како надомест и да ги достават на шалтер во Општината, во работно време, алудирајќи дека „очигледно таму повеќе му требаат пари“.Објавата предизвика бројни реакции. Еден жител на Битола, во шеговит тон, напиша дека со парите купил пудинг и праша дали да го однесе него. Илиевска му одговори: „Пробај се. Можеби и пудингот ќе го земат, не можеш да знаеш“.Полемиката повторно ја отвори темата за транспарентноста и критериумите при исплата на надоместоци за штети од природни непогоди, како и за односот меѓу локалната власт и граѓаните.

Македонија | пред 1 месец

(Фото) На оградена дупка со балони и кратер и се слави роденден, се јави Македонец кој ги теши Бугарите

Фотографија објавена во регионалната група BalkansKnow, со опис „Meanwhile in Bulgaria“, предизвика бројни реакции на социјалните мрежи, откако на неа се гледа дупка на пат оградена со ленти, балони и импровизирана роденденска декорација.На транспарентот поставен пред оградената дупка пишува „6 месеци дупка на патот! Честит роденден!“, додека околу неа се поставени маса со торта, свеќи и украсни балони со бројката „6“, иронично означувајќи колку време не е санирана. Наместо вообичаена сигнализација, граѓаните одлучиле со сатира да укажат на долгото чекање за санација.Фотографијата брзо се прошири и предизвика коментари од повеќе балкански земји. Во дел од реакциите од Македонија, граѓани наведуваат дека состојбата со патните оштетувања кај нас е уште полоша, алудирајќи дека има дупки кои остануваат несанирани со години.Претпоставка е дека станува збор за АИ-фотографија, со оглед дека не е позната точната локација, но и изгледот на дизајнот.

Магазин | пред 1 месец

(Видео) Снимен моментот кога трамвај излета во Сараево: загина 23 годишно момче, четири повредени

Тешка сообраќајна несреќа се случи денеска околу пладне во населбата Марин Двор во Сараево, кога трамвај на јавното сообраќајно претпријатие ГРАС излета од шините, удри во трамвајска станица и заврши на главната сообраќајница.Во несреќата животот го загубил 23-годишен млад човек, додека четири лица се повредени. Една девојка е хоспитализирана во Општа болница „Прим. др. Абдулах Накаш“, каде поради сериозноста на повредите ѝ била ампутирана нога. Според информациите од медицинските служби, во тек се интензивни реанимациски мерки и терапија.Од Итната медицинска помош претходно соопштија дека во инцидентот се повредени вкупно четири лица, а дел од нив се задржани на понатамошно лекување.Увидот на местото на несреќата сè уште трае и ќе продолжи и утре, кога се очекуваат дополнителни информации за причините што довеле до излетувањето на трамвајот од шините и за евентуална одговорност.

Свет | пред 1 месец

(Фото) Со најлони се штити архивскиот материјал во Државен архив, оти протекуваат покривите во Битола и Штип

Конечниот извештај на Државниот завод за ревизија за 2024 година открива сериозни слабости во состојбата и одржувањето на објектите на Државниот архив, со посебен акцент на условите во кои се чува архивскиот материјалСпоред ревизорските наоди, дел од архивските депоа не ги исполнуваат пропишаните стандарди за безбедно складирање и заштита на архивската граѓа. Констатирани се проблеми со електричните инсталации, нефункционални или недоволно ефикасни системи за климатизација, како и несоодветни услови во однос на температура и влажност, што директно влијае врз долгорочната заштита на документите.Ревизијата утврдува и дека не се преземени соодветни мерки за осигурување на објектите и имотот, што дополнително го зголемува ризикот од штети во случај на пожар, поплава или друг вид елементарна непогода. Посебно е потенцирано дека системите за рано откривање и спречување на пожар не се целосно функционални или не се во согласност со современите стандарди за заштита.Во извештајот се наведува дека ваквите состојби претставуваат потенцијална опасност за културно-историското наследство, со оглед на тоа што архивскиот материјал има трајна вредност и значење за државата. Недостатоците во инфраструктурата и одржувањето не се од вчера, туку укажуваат на подолг период на недоволни вложувања и системски пропусти.Ревизорите препорачуваат итно подобрување на условите во објектите, модернизација на системите за заштита и воспоставување поефикасен механизам за контрола и управување со ризиците, со цел да се обезбеди соодветна физичка и техничка заштита на архивската граѓа.

Македонија | пред 1 месец

Втор смртен случај во неколку дена на лице кое оперирало крајници

Триесет и осумгодишен маж починал во ноќта меѓу 11 и 12 февруари, во постоперативен тек по хируршка интервенција на трет крајник во Општата болница во Чачак, соопшти Министерството за здравство на Србија.Според соопштението, пациентот самостојно се пријавил за хируршката интервенција поради долгогодишни проблеми со дишењето. Министерството наведе дека пациентот бил свесен за ризиците од операцијата, имајќи ги предвид и другите придружни заболувања од кои боледувал.По добиената информација за смртниот исход, Министерството испратило здравствени инспектори во Чачак. Со одлука на министерот за здравство, раководењето со Одделението за оториноларингологија во Општата болница го презеле лекари од Универзитетски клинички центар Србија и од Универзитетски клинички центар Крагуевац, сè додека не се утврдат сите околности што довеле до двата смртни исхода во краток временски период.Министерот за здравство, Златибор Лончар, наредил воведување привремени мерки во болницата, што вклучува и преземање на раководењето со установата во наредниот период.Пред неколку дена, во истата болница почина четиригодишно девојче по операција на крајници, по што вршителот на должност директор поднесе оставка. Граѓаните организираа протести и побараа транспарентно објаснување за околностите под кои починало детето.Министерството претходно информираше дека е наложен и надворешен стручен надзор, кој го спроведуваат лекари и професори од терцијарни здравствени установи, а резултатите од инспекцијата и стручниот надзор ќе бидат јавно објавени.Од Вишо јавно обвинителство Чачак соопштија дека е наредена обдукција на телото на девојчето, по што ќе биде донесена одлука за понатамошниот тек на постапката.

Свет | пред 1 месец

Прво едукација, па казни за новиот закон за пушење

Министерот за здравство Азир Алиу изјави дека динамиката за почеток на казнувањето за прекршување на новиот закон за пушење сè уште не е прецизно дефинирана, нагласувајќи дека примарната цел на институциите е едукација, а не веднаш санкционирање.Одговарајќи на новинарско прашање од кога ќе започне казнувањето, Алиу посочи дека се создал амбиент во кој јавноста перципира дека државата сака веднаш да казнува, додека, според него, фокусот е на укажување и информирање за тоа што е незаконско и кои се последиците од непочитувањето на прописите.„Инсистирав да дадеме простор да укажеме кој работи незаконски и дека ќе се казнува. Мислам дека тоа е добра практика – државата да соработува со бизнис-заедницата“, изјави министерот.Тој додаде дека државата мора дополнително да се доекипира за целосна имплементација на законот. Според него, доколку веднаш се започне со масовни казни, може да се појави проблем со недоволен број инспектори и службени лица за спроведување контроли на терен.Како пример, Алиу посочи на претходни ситуации кога забраната за пушење формално важела во Скопје, но не била доследно спроведувана во другите средини. Според него, целта е законот да се применува еднакво на целата територија, со јасна стратегија и соодветни ресурси.

Македонија | пред 1 месец

Марко Бислимоски поднесе оставка од Регулаторна по кривичната пријава против него

Марко Бислимоски поднесе оставка од функцијата претседател на Регулаторна комисија за енергетика. Во писменото известување упатено до Собрание на Република Македонија, тој наведува дека се повлекува од функцијата на која бил именуван, односно реизбран, на 26 јули 2023 година, и бара согласно Законот за енергетика да се утврди престанокот на мандатот.Оставката доаѓа по кривична пријава поднесена до Основното јавно обвинителство Скопје, во која се наведува дека Бислимоски, иако бил законски обврзан, не покренал постапка за навремено одземање на лиценцата на компанијата Тритерол Петрол ДООЕЛ Скопје, која, според наводите, не ги исполнувала условите за вршење енергетска дејност.Според пријавата, наместо лиценцата да биде одземена во јануари 2024 година, согласно законските рокови, претседателот на РКЕ донел решение со кое постапката била прекината. Лиценцата официјално била одземена дури во април 2025 година, односно со задоцнување од околу 15 месеци.Бислимоски ги отфрли обвинувањата и изјави дека не чувствува вина во врска со постапувањето. Надлежните институции треба да утврдат дали има основ за кривична одговорност и дали во случајот биле прекршени законските обврски.

Македонија | пред 1 месец

Во 43 компании ќе влезат тимови од МВР и Министерството за здравство

Министерот за здравство Азир Алиу најави дека од денеска започнуваат теренските контроли на лиценците издадени за производство на канабис за медицински цели, посочувајќи дека додека траела прес-конференцијата, инспекциските тимови веќе биле на терен.„Ќе се проверуваат 43 лиценци кои се дадени за производство на канабис за медицински цели“, изјави Алиу, објаснувајќи дека постојат две различни комисии за контрола на овој сектор – една надлежна за административните процедури во рамки на Министерството за здравство, и меѓуресорска комисија формирана согласно законска рамка на Владата, чија улога е да анализира политики поврзани со овој тип процеси. Првата комисија работела и досега за што имало извештаи, додека владината, последен извештај има во 2017 година.Министерот нагласи дека во сила се два правилници – стар и нов – кои во моментот се предмет на анализа од страна на експерти и професори. Според него, врз основа на извештајот што ќе произлезе од таа анализа, ќе се донесат понатамошни одлуки, а доколку биде потребно, ќе се покренат и соодветни постапки.Алиу информираше дека секоја компанија е обврзана да доставува фотографии и информации за количината и квалитетот на произведениот канабис до комисијата за која е задолжено Министерството за здравство. Во моментов, формирана е комисија од пет члена која има рок од 45 дена да изготви извештај за сите 43 лиценци.Тој посочи и дека постојат одредени предизвици во имплементацијата на законот, меѓу кои и недостиг од службени возила, што, како што рече, дополнително го отежнува надзорот и контролата на терен.

Македонија | пред 1 месец

(Видео) Мицкоски најави нови апсења: Битангите кои се занимаваа со криминал се зад решетки, има и уште некои кои ќе се најдат таму

Премиерот Христијан Мицкоски изјави дека неколку правни субјекти се под постојан надзор во рамки на активностите поврзани со производството и контролата на канабис, нагласувајќи дека очекува да бидат откриени уште значителни количини.„Неколку други правни субјекти се под постојан надзор. Не случајно кажав дека неколку десетици тони ќе бидат откриени и дека може до сто тона да дојдеме“, рече Мицкоски кој што го повтори ставот дека одгледаната марихуана не може да се употри за изработка на масло од канабис кое ќе биде со квалитет за да може да се пласира на пазарот.Тој додаде дека лицата кои, како што рече, се занимавале со незаконити влијанија веќе се процесуирани и се наоѓаат зад решетки, а најави дека ќе следуваат и нови постапки.„Оние битанги кои се занимаваат со овие незаконити влијанија се зад решетки. Има уште некои кои ќе се најдат таму. Работата со криминалот е неисплатлива професија и ќе биде жестоко процесирана. И нема да има пардон. Знаете до пред 4-5 години какви битанги и бараби, и банди, хараа низ Македонија, фала Бога сега тоа го нема и тие се таму кај што се“, додаде Мицкоски прашан дали ќе се реактивира телото кое е веќе формирано и функционирало до 2017 година за контрола на дроги.

Македонија | пред 1 месец

(Видео) Мицкоски застана во одбрана на Дафина Стојаноска, смета дека Трендафилов треба да се извини и дека децата не биле прикажени децата на снимката

Премиерот Христијан Мицкоски реагираше на изјавите на претседателот на Сојузот на синдикати на Македонија, Слободан Трендафилов, оценувајќи дека неговиот настап бил премногу нервозен и исполнет со навреди, и дека со тоа испуштил можност да биде над ситуацијата.„Јас го видов тоа што го кажуваше Трендафилов. Видов еден човек кој беше премногу нервозен, истури навреди, но ние сме јавни личности и навикнати сме на тоа. Жалосно е што други јавни личности не се навикнати на јавна критика“, изјави Мицкоски, додавајќи дека јавната критика понекогаш е вистинита, а понекогаш не, но дека, според него, најголемиот дел од обвинувањата кон него на социјалните мрежи и од одредени медиуми се невистини.Тој се осврна и на оправдувањето на Трендафилов во врска со користењето на службено возило, оценувајќи го како „бледо оправдување“. Премиерот нагласи дека повеќе е загрижен за нивото на јавна култура и речникот што бил употребен во реакцијата, особено затоа што, како што рече, станува збор за жена и мајка. Мицкоски посочи дека на видеото не биле прикажани малолетните деца на Трендафилов и дека било внимавано на тој аспект, но смета дека Трендафилов требало да покаже поголема воздржаност. Според него, пратеничката Дафина Стојановска треба да добие извинување.Претходно, Трендафилов на прес-конференција остро реагираше на видеото кое Стојановска го објави на социјалните мрежи, а во кое, според нејзините тврдења, тој ги вози своите малолетни деца со службено возило на синдикатот. Во својата изјава, Трендафилов упати тешки квалификации, оценувајќи дека станува збор за недозволиво објавување на содржина поврзана со малолетни лица и побара институционална реакција од Министерството за внатрешни работи и од обвинителството.Тој го повика и претседателот на Собранието да поведе постапка за одземање на имунитетот на пратеничката, најавувајќи дека ќе ги информира и дипломатските претставништва и синдикалните организации на меѓународно ниво.Случајот предизвика остра јавна полемика и нова размена на обвинувања меѓу политички и синдикални претставници, при што фокусот се префрли од прашањето за користење на службено возило кон начинот на комуникација и границите на јавната критика.

Настани | пред 1 месец

(ВО ЖИВО) 350.000 евра соѕидани зад плочки - сите детали за парите најдени кај родителите на судијата Ѓоко Ристов

Вечерва гледајте нѐ во живо во „Претрес“ – разговор со адвокатот Звонко Давидовиќ, бранител на судијата Ѓоко Ристов од Апелација, осомничен за „противправно стекнување и прикривање имот“ и „перење пари“, откако во домот на неговите родители беа најдени 350.000 евра соѕидани зад плочки во кујна.Ќе прашаме директно: кој и зошто чува толкава сума „во ѕид“, како се пронајдени парите, колку простории се претресувани, дали постојат докази за легално потекло на секое евро, како се објаснуваат старите апоени од 500 евра, дали е платен данок и зошто верзиите во јавноста се менуваат. Отвораме и чувствителен сегмент: фактот дека Давидовиќ во минатото го застапуваше и Сашо Мијалков во „Таргет-Тврдина“, предмет во кој Ристов беше судија, како и прашањата за перцепциите, можен судир на интерес и сѐ што „се шушка“ – но никој не го кажува јавно.Давидовиќ е бранител на лице обвинето дека го обезбедувало „Пулс“ без лиценца, но и на Аднан Џаферовски, ексдиректор на Дирекцијата за заштита и спасување. Зошто се тврди дека обезбедувачот не бил обезбедувач, а Џаферовски нема вина иако Законот за заштита и спасување налага мерки за превенција од пожари?Ексклузивно ќе откриеме многу информации поврзани и со други случаи, следете во живо:

Студио | пред 1 месец

Земјотресот е последица на умерена тектонска активност околу Шар Планина, која се поместува, анализира професорот Милевски по земјотресот

Редовниот професор на Институтот за географија, д-р Ивица Милевски, по последниот земјотрес даде подетално географско и тектонско објаснување за процесите што се одвиваат на просторот на Косово и западниот дел од Македонија. Тој нагласи дека станува збор за тектонски активен простор, но со умерена, а не со изразено силна активност, како дел од поширокиот систем на планини, раседи и котлини на Балканот.Според Милевски, причината лежи во вклештеноста на помали микро-плочи на кои се наоѓаат планинските масиви и котлините, под влијание на притисоците од поголемите регионални и континентални плочи – Африканската од југ, нејзиниот сегмент Јадранската плоча (Adria), како и Евроазиската плоча од север и североисток. Притисокот од Јадранската плоча кон североисток ги активира раседните структури во северна Албанија, Косово и западна до северозападна Македонија.Тој објаснува дека Шарпланинскиот тектонски блок е ограничен со повеќе нормални и хоризонтални раседи, и од косовската и од македонската страна, долж подножјето на Шар Планина. Притисоците од Јадранската плоча се пренесуваат врз овие активни раседи, при што повремено доаѓа до нивно „размрдување“, што се манифестира како земјотрес.Милевски посочува дека раседите и блоковите околу Шара имаат умерена динамика, особено во североисточниот дел, но тие дејствуваат континуирано со десетици и стотици илјади години. Како резултат на тие процеси, блокот на Шар Планина постепено се изместува, и во височина и кон исток, што, според него, објаснува зошто планината во северниот дел има лачно извиена форма.Во однос на последниот земјотрес, професорот проценува дека поместувањето на планинскиот блок било во рамки на десетина милиметри вертикално и до неколку сантиметри кон исток, со минимални поместувања и на околните депресии. Според ослободената енергија, настанот бил еквивалентен на експлозија од приближно стотина тони ТНТ.Тој нагласува дека тектонската активност во овој дел од Балканот е слаба до умерена и дека не се очекува посилен земјотрес во реонот на Шара, за разлика од подрачјата како дебарското, валандовското, пехчевското или скопското, кои се познати по поголема сеизмичка активност. Според Милевски, станува збор за постепено дооформување на северниот дел од Шар Планина и котлините околу неа, како дел од долгите геолошки процеси што траат со милиони години.

Коментари | пред 1 месец

Владата против ограничување на пристапот до социјални мрежи за малолетници

Министерот за дигитална трансформација Стефан Андоновски изјави дека Владата не размислува за воведување забрана или ограничување на пристапот до социјалните мрежи за младите до 15 години, оценувајќи дека таквиот потег би бил радикален и би значел мешање на државата во приватната сфера и во основните слободи.Одговарајќи на новинарско прашање на настан во Прилеп, по повод одбележувањето на Денот на побезбеден интернет, Андоновски рече дека родителите треба да ја задржат контролата врз користењето на социјалните мрежи од страна на нивните деца, а не државата да ја преземе таа улога.Тој посочи дека во изминатата година, во рамки на проект за дигитална безбедност, во сите училишта биле презентирани механизми преку кои родителите можат да контролираат кои апликации нивните деца ги инсталираат на мобилните телефони и други уреди, колку време поминуваат на нив и какви содржини можат или не смеат да следат. Според министерот, ваквиот пристап овозможува превенција од опасностите на интернет, без директна интервенција на државата во семејниот живот.Андоновски нагласи дека станува збор за алатки кои се исклучително приватни и ги користат родители и деца, па секое законско ограничување би можело да се толкува како прекумерно мешање во домашните работи. Сепак, тој остави простор за јавна дискусија доколку постои зголемен интерес и загриженост кај родителите, најавувајќи можност за јавна расправа и анкета за да се утврди ставот на јавноста.Министерот посочи дека не се исклучува можноста за законски измени доколку тоа се покаже како неопходно, но предупреди дека државната забрана на одредени дигитални алатки носи сериозни ризици. Според него, таквиот пристап може да отвори простор за ограничување на слободата на говор и слободата на изразување, доколку државата почне селективно да забранува платформи или апликации.„Забраната треба да биде последна мерка. Првата мерка мора да биде превенција и родителска контрола“, истакна Андоновски.Настанот во Прилеп беше организиран од Министерството за дигитална трансформација во соработка со Општина Прилеп, во рамки на проект за воспоставување Центар за побезбеден интернет во Македонија, поддржан од програмата „Дигитална Европа“ и од Европската Унија. Според најавите, во следниот период се очекува целосно функционализирање на Центарот, кој ќе обезбеди линија за поддршка на млади лица, родители и наставници за справување со ризиците во онлајн просторот.

Македонија | пред 1 месец

Тепачка по сообраќајно недоразбирање во Центар, две кражби пријавени во Скопје од кои едната во финансиско друштво

Од Министерството за внатрешни работи информираат дека на 10 февруари 2026 година, околу 11:10 часот, во СВР Скопје било пријавено нарушување на јавниот ред и мир на подрачјето на Центар, по претходно недоразбирање во сообраќајот. Во инцидентот дошло до физичка пресметка помеѓу М.С. (51) од Скопје и П.В. (28) од Струмица. По целосно документирање на случајот, ќе следува соодветен поднесок.Во друг случај, Единицата за внатрешни работи Аеродром и Драчево при СВР Скопје поднела кривична пријава против Д.М. (18) и Г.Д. (25), двајцата од Скопје, поради основано сомнение за сторено кривично дело „тешка кражба“ на дрзок начин. Според информациите, на 10 февруари околу 06:30 часот на подрачјето на општина Аеродром, тие на 53-годишна жена ѝ одзеле ранец во кој имало пари, документи, мобилен телефон и други предмети. Дел од одземените предмети биле пронајдени и вратени на оштетената.Дополнително, на 10 февруари околу 05:00 часот во СВР Скопје било пријавено дека во периодот од 19:00 часот на 9 февруари до 04:40 часот на 10 февруари, со употреба на сила и подесен алат било скршено стакло од влезна врата на објект на финансиско друштво на подрачјето на Гази Баба во Скопје. По влегувањето во објектот, биле одземени пари. Полицијата презема мерки за расчистување на случајот и утврдување на сторителите.

Македонија | пред 1 месец

Советник во МВР пријавен за проневера: Присвојувал пари од граѓани за пасоши, наместо на сметка завршиле кај него во џеб

Од Министерството за внатрешни работи информираат дека Одделот за внатрешна контрола, криминалистички истраги и професионални стандарди поднел кривична пријава до надлежното Основно јавно обвинителство Штип против М.С., вработен како советник за управни работи за Штип во Одделението за управни работи Штип при Одделот за граѓански работи.Според информациите, постојат основи на сомнение дека пријавениот сторил кривично дело „проневера во служба“ по член 354 став 1 од Кривичниот законик. Во периодот од 1 јануари до 30 јуни 2025 година, тој, наводно, присвоил пари доверени во службата, така што во повеќе наврати од граѓани кои поднесувале барања за издавање патна исправа барал готовина, искористувајќи го нивното непознавање на законските прописи.Како што се наведува, пријавениот им кажувал на барателите дека плаќањето преку ПОС-терминал со платежна картичка не е во функција и дека е потребно износот да го платат во готово. Граѓаните му ги давале средствата во висина на цената на услугата, по што тој бил должен да ги уплати на жиро-сметката на МВР и да изврши уплата на административна такса на сметката на Буџетот на Република Северна Македонија.Иако постапката била завршувана и на граѓаните им биле издавани лични документи – пасоши, пријавениот, според наводите, не ги уплаќал средствата, туку ги присвојувал за себе.Од Одделот за внатрешна контрола најавуваат дека против М.С. ќе биде поднесен и предлог за поведување дисциплинска постапка за кршење на работниот ред и дисциплина, како и задолжителна мерка за отстранување од работното место до завршување на дисциплинската постапка.

Македонија | пред 1 месец