Ангелов пред протестот на ДУИ: Воени злосторства не се бранат со протести, целта им се тензии и враќање на власт

Лидерот на политичката партија Достоинство и бранител од конфликтот во 2001 година, Стојанче Ангелов, остро реагираше во пресрет на денешниот протест што го најави ДУИ во поддршка на поранешните припадници на УЧК. Во објава на својот Фејсбук профил, Ангелов порача дека сите припадници на УЧК кои извршиле воени злосторства мора да одговараат согласно меѓународното право, без разлика каде и кога тие злосторства биле сторени.Тој нагласи дека тоа важи и за припадниците на УЧК кои, како што наведува, извршиле воени злосторства во Македонија во 2001 година, оценувајќи дека е апсурдно да се бара ослободување на лица кои се осомничени, обвинети или осудени за дела опфатени со меѓународното хуманитарно право. Според Ангелов, злосторствата не смеат да се релативизираат ниту да се користат за политички цели.Во продолжение на објавата, Ангелов ја проблематизира политичката позадина на протестот, тврдејќи дека вистинската цел на Али Ахмети и ДУИ е создавање меѓуетнички тензии со цел партијата повторно да се врати на власт. Тој посочи дека протестот нема реално да влијае врз одлуките на Специјализираниот суд во Хаг, што, според него, отвора сериозно прашање за скриената агенда зад неговото организирање.Ангелов се запраша зошто протестот се одржува токму во Скопје и дали станува збор за спонтан настан или за внимателно осмислено сценарио насочено кон напад врз актуелната власт, владејачката коалиција и премиерот Христијан Мицкоски. Тој оцени дека протестот може да претставува перфиден обид да се ослабне власта, ставајќи го и албанскиот коалиционен партнер во незавидна позиција – доколку не учествува, се зајакнува ДУИ, а доколку учествува, се создава услов за политичка нестабилност.Според Ангелов, можноста за разгорување на меѓуетничка нетрпеливост и дополнително нарушување на веќе кревката меѓуетничка доверба претставува „бонус“ за ДУИ во ова сценарио, што, како што заклучува, покажува дека протестот е повеќе политичка алатка отколку искрена борба за правда.

Македонија | пред 2 месеци

(Видео) Кузеска најави „разоткривање“: СДСМ тврди дека ДПМНЕ преку медиумски „кујни“ шири лаги и манипулации

Портпаролката на СДСМ, Богданка Кузеска, најави дека денеска јавно ќе биде прикажано, како што рече, функционирањето на „медиумските кујни“ на ВМРО-ДПМНЕ, кои, според неа, систематски продуцираат лаги, лажни вести и манипулации со цел да се одвлече вниманието на јавноста и да се изврти вистината.Кузеска оцени дека секогаш кога власта е соочена со криминал, скандали или, како што наведе, „предавства“ – како случајот со договорите за мигранти за пари – се активира добро воспоставен механизам за дефокусирање на граѓаните преку медиумски напади. Според неа, токму тоа се случувало и во изминатиот период, кога три теми доминирале во јавноста: објавувањето на таканаречените „бомби“ од Антикорупцискиот тим на СДСМ за, како што тврдат, криминални тендери на ВМРО-ДПМНЕ, наводниот договор за мигранти за пари и нападот врз новинарите на „Инфомакс“.Таа истакна дека професионалните медиуми известувале коректно и ги пренесувале ставовите на сите засегнати страни, но дека, според СДСМ, медиумите блиски до ВМРО-ДПМНЕ систематски ги игнорирале позициите на опозицијата и сите негативни информации поврзани со власта. Наместо тоа, како што рече, биле пласирани серии од текстови со полувистини и манипулации со цел да се „поклопат“ темите што не ѝ одговараат на власта.Како конкретен пример, Кузеска го посочи денот 10 ноември, кога, според неа, само десет минути по прес-конференцијата на претседателот на СДСМ, Венко Филипче, започнала координирана медиумска офанзива. Таа наведе дека наместо да се пренесе содржината на прес-конференцијата, биле објавувани текстови со наслови во кои се тврдело дека Филипче „избегал“ од сопствената прес-конференција или дека СДСМ манипулира со темата за мигрантите, без воопшто да се наведе што било кажано на настанот.Според Кузеска, во тие објави немало ниту збор за ставовите на СДСМ за мигрантите, за Резолуцијата, за осудата на нападот врз новинарите на „Инфомакс“, ниту за тврдењето дека напаѓачот бил член на ВМРО-ДПМНЕ. Таа тврди дека резултатот бил повеќе од 70 различни објави во еден ден, насочени кон напади врз СДСМ и Филипче и кон целосно дефокусирање на јавноста.Кузеска оцени дека ваквиот модел, според СДСМ, е добро познат и потсетува на практиките од времето на Никола Груевски, со лажни вести, манипулации, извртување на вистината, политички притисоци и напади врз новинари. „Вака се одвлекува вниманието на граѓаните и вака власта се обидува да ја промени реалноста“, порача Кузеска, најавувајќи дека јавноста ќе има увид во конкретни примери и анализи.

Македонија | пред 2 месеци

(Видео) Нови детали: Жената во гостиварско била убиена со пиштол, пред да ја закопаат во дупката

Обдукцијата на починатата жена, чие тело беше пронајдено закопано во атарот на гостиварското село Неготино, е завршена и според првичните наоди, таа била лишена од живот со огнено оружје, соопштија од Обвинителството. По наредба на надлежен јавен обвинител, во тек е вештачење на трагите подигнати од повеќе локации, а паралелно се спроведуваат претреси и други истражни дејствија со цел целосно расветлување на случајот.Краткотрајниот притвор од 48 часа за осомничениот е продолжен за уште 48 часа, додека јавниот обвинител до надлежниот суд доставил предлог за определување истата мерка и за второто лице кое претходно беше задржано во полициска станица.Случајот излезе на виделина откако јавен обвинител од Основното јавно обвинителство Гостивар, во текот на ноќта, изврши увид на терен каде беше пронајдено тело на засега неидентификувано лице закопано во дупка. Поради сомневања дека станува збор за жена која претходно била пријавена за исчезната, со индиции за противправно лишување од слобода, беше наредена обдукција, идентификација на телото и прибирање материјални докази од лице место.Во текот на ноќта биле преземени повеќе истражни активности, по што за едно лице беше определен краткотраен притвор за обезбедување докази, додека уште едно лице беше задржано на дополнителни проверки. Од Обвинителството информираат дека истрагата продолжува интензивно и дека се преземаат сите законски мерки за целосно испитување на околностите под кои е сторено убиството.ВИДЕО ОД ПРОНАОЃАЊЕТО:

Македонија | пред 2 месеци

(Видео) Полни кесички, сортирана во засебни пакувања: уапсена нарко-двојка во Скопје

Две лица од Скопје се лишени од слобода поради сомнение за недозволена трговија со дрога, информира Министерството за внатрешни работи. На 12 декември 2025 година, околу 19:55 часот, полициски службеници од Единицата за недозволена трговија со дрога при СВР Скопје, во координација со Одделот за криминалистичка полиција при Бирото за јавна безбедност, ги привеле М.М. (36) и К.М. (29), двајцата од Скопје.По претходно обезбедена судска наредба, бил извршен претрес во домот на К.М. на подрачјето на Карпош, при што биле пронајдени и одземени повеќе видови наркотични дроги, меѓу кои амфетамин, екстази и марихуана, како и дигитална вага.Од МВР соопштуваат дека по целосно документирање на случајот, против приведените лица ќе биде поднесена соодветна кривична пријава.

Скопје | пред 2 месеци

Масовни прекини на струја во Одеса по руски напад врз енергетскиот систем на Украина

Јужниот украински пристанишен град Одеса и поширокиот регион останаа без електрична енергија по масовен руски напад врз електроенергетскиот систем на Украина, соопштија украинските власти. Нападот предизвика сериозни прекини во снабдувањето со струја, особено во јужните делови на земјата.Претседателот на Украина, Володимир Зеленски, преку објава на Телеграм информираше дека Русија лансирала повеќе од 450 дронови и над 30 ракети, при што најголемиот удар бил насочен токму кон енергетската инфраструктура. Според него, најпогодени биле јужните региони, вклучително и Одеската област.Зеленски соопшти дека илјадници домаќинства во најмалку седум региони останале без електрична енергија, а екипите на терен работат на санација на штетите и обновување на снабдувањето. Украинските власти оценуваат дека станува збор за еден од најмасовните напади врз енергетскиот систем во последниот период, додека ситуацијата и понатаму се следи, јавува Ројтерс.

Свет | пред 2 месеци

ЕУ замрзнува 210 милијарди евра руски средства

ЕУ го направи тој потег за да осигури дека Унгарија и Словачка, кои се блиски до Кремљ, не можат да ја спречат поддршката за Украина, што предизвика негодување кај лидерите на тие земји.Претседателот на Европскиот совет, Антонио Коста, изјави дека високи европски претставници во октомври ветија дека ќе „ги задржат руските неподвижни средства сè додека Русија не ја заврши својата агресивна војна против Украина и не ја надомести предизвиканата штета“.„Денес ја исполнивме таа обврска“, додаде тој.Шефот на европската дипломатија, Каја Калас, напиша на „X“ дека Унијата продолжува да го зголемува притисокот врз Москва „сè додека не ги сфати сериозно преговорите (за завршување на војната во Украина)“.Следната недела, лидерите на ЕУ ќе елаборираат за користењето на средствата на руската централна банка за доделување кредити и помош на Украина во следните две години.Унгарскиот премиер Виктор Орбан ја обвини Европската комисија за „систематско кршење на европското право“, како и дека „владеењето на правото во Европската Унија завршува и европските лидери се ставаат над правилата“.„Европската комисија систематски го крши европското право. Го прави ова за да ја продолжи војната во Украина, војна која очигледно е неизбежна“, напиша Орбан на социјалните мрежи, додавајќи дека Унгарија „ќе направи сè што е во нејзина моќ за да го врати правниот поредок“.Словачкиот премиер Роберт Фицо во писмо до Кошта изјави дека ќе одбие да поддржи каков било потег „што би вклучувал покривање на воените трошоци на Украина во наредните години“.„Употребата на замрзнати руски средства би можела директно да ги загрози мировните напори на Соединетите Американски Држави (САД), кои директно сметаат на користењето на тие ресурси за обнова на Украина“, додаде тој.Поголемиот дел од 210-те милијарди евра замрзнати средства се во белгиската финансиска институција „Евроклеар“, која, сепак, се спротивставува на планот за таканаречени репарациски кредити, тврдејќи дека тоа „повлекува последователни економски, финансиски и правни ризици“.

Свет | пред 2 месеци

СДСМ предупредува: Плановите за мигранти и изолацијата од ЕУ ја загрозуваат безбедноста и иднината на државата

СДСМ предупреди дека во Европа се случуваат сериозни процеси поврзани со миграциските политики, кои директно можат да имаат последици и за Македонија, особено во контекст на, како што наведуваат, намерната изолација на државата од Европската Унија и најавите за прифаќање мигранти. Според партијата, дури 27 земји членки на Советот на Европа побарале ревизија на Европската конвенција за човекови права, со цел да се олесни депортацијата на мигранти, вклучително и на лица осудени за тешки кривични дела.Како што наведуваат од СДСМ, во Стразбур неодамна била потпишана заедничка декларација со која се бара нова правна рамка, бидејќи постојната Конвенција, според потписниците, не ги одразувала современите миграциски предизвици. Дел од земјите бараат можност за депортација на странци осудени за сериозни кривични дела, дури и во случаи кога нивните семејства живеат во земјата домаќин.Според СДСМ, клучното прашање е каде би биле депортирани овие мигранти, при што се укажува дека најчесто станува збор за земји кои не се членки на ЕУ, како што се Македонија, Албанија и Косово, каде, како што тврдат, веќе започнало нивно сместување.Од партијата оценуваат дека ова прашање е исклучително сериозно од две причини – најпрво поради најавите и разговорите за евентуално прифаќање мигранти во Македонија, а потоа и поради политиките на актуелната власт кои, според нив, ја држат државата надвор од европските интеграции. СДСМ смета дека изолацијата на Македонија од ЕУ е опасна и од безбедносен аспект, бидејќи би можела да ја претвори земјата во дестинација за мигранти осудени за тешки кривични дела.Според нивните наводи, евентуалното доаѓање на ваков профил на лица би имало сериозни последици по безбедноста и стабилноста на државата, а дополнително би го блокирало и процесот на европска интеграција. Од СДСМ посочуваат дека доколку Македонија стане членка на ЕУ, автоматски би се отвориле вратите кон Унијата, што би овозможило овие лица повторно да се вратат во земјите од кои биле депортирани, поради што тие не ја гледаат Македонија како крајна дестинација, туку како транзитна точка кон побогатите европски држави.Во реакцијата се наведува дека токму затоа, на ВМРО-ДПМНЕ, како што тврдат од СДСМ, ѝ одговара Македонија да остане изолирана од европските механизми, контроли и правосудни стандарди, што, според нив, овозможува непречено продолжување на коруптивни практики и избегнување одговорност. Од партијата сметаат дека одолговлекувањето на европскиот пат и создавањето нови изговори нема врска со заштита на националните интереси, туку со свесно оддалечување од Европската Унија.„Резултатот е двоен ќар за ВМРО-ДПМНЕ – Британија добива можност да депортира мигранти за пари, а ВМРО-ДПМНЕ изолирана држава во која може непречено да владее без контрола“, наведуваат од СДСМ, додавајќи дека губитници во ваквиот сценарио се граѓаните и иднината на Македонија.

Македонија | пред 2 месеци

(Вознемирувачка снимка) Деца од Сарај разменија боксови и клоци пред училиште, други гледаа и снимаа

Тепачка меѓу ученици во скопско Сарај е прикажана во видео кое последните денови интензивно се споделува на социјалните мрежи и предизвикува реакции во јавноста.На снимката се гледа како група ученици, неофицијално, од централното основно училиште „Дитурија“ физички се пресметуваат во училишниот двор со боксови и клоци, додека други деца стојат настрана и го набљудуваат инцидентот.Во видеото јасно се забележува дека дел од присутните ученици не се обидуваат да ја спречат тепачката, туку пасивно ја следат, а некои од нив и ја снимаат со мобилни телефони. Сцените отворија прашања за безбедноста во училиштата и улогата на возрасните во вакви ситуации.Засега нема официјални информации кога точно е направена снимката.Редакцијата на „Скопје1“ побара официјален став и информации од Министерството за внатрешни работи, од каде посочија дека полицијата веќе постапува.

Скопје | пред 2 месеци

Лукашенко не штедеше пофалби за Трамп: Импресиониран сум, велат дека Трамп сака ласкање, но тоа не е мојата намера

Белорускиот претседател Александар Лукашенко вчера во Минск оствари средба со американскиот специјален пратеник за Белорусија, Џон Коул. На почетокот од средбата, Коул го поздрави Лукашенко со зборовите „Ми е драго што ве гледам“, на што белорускиот претседател одговори: „И мене исто така“.Лукашенко му честиташе на Коул за неговото именување за специјален пратеник на САД за Белорусија, нагласувајќи дека со тоа станува клучна личност за односите меѓу двете земји. Тој побара од Коул да му пренесе порака на американскиот претседател Доналд Трамп дека оваа средба ги обврзува двете страни на конкретни резултати. „Кажете му на господинот Трамп дека ова нè обврзува да постигнеме одредени резултати. И ние ќе го сториме тоа“, изјави Лукашенко за време на разговорот.Белорускиот претседател позитивно ги оцени и последните потези на Трамп, истакнувајќи дека бил силно импресиониран од неговите неодамнешни активности. „Велат дека Трамп сака ласкање, но тоа не е мојата намера. Морам да кажам дека навистина бев импресиониран од неговите последни чекори“, рече Лукашенко, додавајќи дека светот се менува многу брзо и дека се појавуваат нови проблеми за кои е неопходно да се разговара и да се бараат решенија.Поголемиот дел од средбата меѓу Лукашенко и американскиот пратеник се одржал зад затворени врати, без дополнителни детали за содржината на разговорите.Претходно, во средата, Лукашенко на седница на Советот за безбедност на Белорусија повторно ја нагласи улогата на Доналд Трамп во обидите за постигнување мирно решение за војната во Украина. Тој оцени дека, без оглед на обидите на дел од јавноста да ја минимизира улогата на Трамп, американскиот претседател работи сериозно на запирање на конфликтот. „Неговите изјави нема да поминат незабележано. Тој сака да ја запре војната за да спречи луѓето да гинат. Може околу тоа да се крева врева и да се зборува што било, но што може да се каже против она што Американците денес го прават“, изјави Лукашенко.

Свет | пред 2 месеци

Мециновиќ: Прашањето за мигрантите мора да се отвори со факти, а не со хистерија и ксенофобија

Амар Мециновиќ, во гостување на ТВ24, оцени дека прашањето за евентуален договор меѓу Македонија и Велика Британија за таканаречените „third country hubs“, односно преземање мигранти, е премногу сериозно за да се третира со дневнополитички напади, манипулации и создавање јавна паника. Тој нагласи дека јавната дебата мора да се води трезвено, со факти и аргументи, а не со, како што рече, хистерија која лесно преминува во ксенофобија.„Благодарен сум што конечно ја отвораме темата на место каде што може да се разговара со факти, без произволни политички заклучоци“, изјави Мециновиќ, додавајќи дека дел од опозициските партии, пред сè СДСМ, наместо аргументирана анализа, се обидуваат да собираат политички поени преку страв и паника. Според него, таквиот пристап е популистички и опасен, бидејќи директно задира во ксенофобични наративи.Мециновиќ посочи дека не тврди оти договор меѓу Македонија и Велика Британија веќе е потпишан, но дека постојат сериозни индиции дека разговори се водат. Тој оцени дека додека македонските власти даваат апсолутни негирања, британската страна преку медиуми и неофицијални политички канали остава впечаток дека постои интерес за ваков модел. Како пример, ги наведе изјавите од Косово, каде политичари отворено зборувале дека би прифатиле ваков договор со Лондон, што, според него, укажува дека Македонија не е изолиран случај.Најголемиот проблем, според Мециновиќ, не е само можноста за ваков договор, туку начинот на кој Владата го третира стратешкиот договор со Велика Британија во целина. Тој оцени дека договорот е нетранспарентен и недостапен за јавноста, иако станува збор за документ кој веќе создава значителен финансиски товар за државата. Според него, токму оваа нетранспарентност ја отвора вратата за шпекулации, недоверба и страв кај граѓаните.Тој потенцираше дека не смее да се прават паралели со мигрантската криза од 2015 и 2016 година, бидејќи тогашниот геополитички контекст бил сосема поинаков, со војни, експанзија на ИСИС и масовни бегалски бранови од Блискиот Исток и Африка. Денес, според него, се зборува за поинаков модел – лица кои би биле одбиени за азил во Велика Британија и за кои меѓународното право не нуди јасна и прецизна категорија.Мециновиќ предупреди дека прифаќањето такви лица отвора сериозни правни ризици за Македонија. Тој потсети дека меѓународното право забранува враќање на бегалци во земјите од кои доаѓаат, што го наметнува прашањето што би правела државата со лица кои не можат да бидат ниту вратени, ниту легално интегрирани. Според него, ваков модел може да доведе до сложени правни и административни лавиринти, но и до потенцијална кривична одговорност за оние што би го потпишале договорот.На крајот, Мециновиќ порача дека токму затоа оваа тема мора да се отвори со факти, целосна транспарентност и сериозна институционална дебата, а не преку политичка хистерија која, како што нагласи, создава страв, поделби и ксенофобија во општеството.

Македонија | пред 2 месеци

Спасовски: Македонија не смее да прифати мигранти што нема каде да ги врати

Пратеникот на СДСМ, Оливер Спасовски, изјави дека Македонија не смее да стане држава која ќе спроведува азилски постапки за друга земја, а притоа да ѝ остануваат мигранти што нема да може да ги врати во нивните матични држави. Во гостување во емисијата „Трилинг“ на 24 Телевизија, тој предупреди дека разговорите за евентуално сместување мигранти во земјава носат сериозни, пред сè безбедносни ризици.Според Спасовски, Македонија нема склучено реадмисиони договори со земјите на потекло на мигрантите, што значи дека дел од нив би останале трајно на територијата на државата без правна можност за враќање. Како пример за потенцијалните безбедносни предизвици, тој посочи дека неодамна група мигранти од Египет го демолирале транзитниот центар во Табановце, што, како што рече, покажува колку чувствителни и сложени се овие процеси.Осврнувајќи се на изјавите на премиерот Христијан Мицкоски дека додека е на функција нема да има бегалски кампови, Спасовски оцени дека и без класични кампови може да се создадат бегалски населби со мигранти, што повторно го отвора прашањето за безбедноста и контролата.Тој потсети дека прифатните центри „Винојуг“ во Гевгелија и Табановце функционираат од 2015 година и дека тогаш бил изменет Законот за странци со воведување рок од 72 часа за транзит на мигрантите. Во тој контекст, Спасовски ги демантираше тврдењата на ВМРО-ДПМНЕ дека во 2018 година биле договарани нови прифатни центри за мигранти во Македонија.

Македонија | пред 2 месеци

(Видео) Поранешната специјална обвинителка Јанева излезе на слобода

Поранешната специјална јавна обвинителка Катица Јанева, која издржуваше седумгодишна затворска казна во казнено-поправната установа „Идризово“, од понеделникот е на условен отпуст и го напушти затворот.Таа беше осудена на седум години затвор за злоупотреба на службената положба, а во казната и беше пресметано и времето поминато во притвор.Јанева беше осудена во предметот „Рекет“, заедно со Бојан Јовановски, кој доби подолга затворска казна за изнудување пари од бизнисменот Орце Камчев.По апсењето на Јанева, Специјалното јавно обвинителство беше укинато со поддршка на сите парламентарни партии, додека дел од предметите продолжија во редовното обвинителство. Камчев во предметот „Империја“ призна вина и се спогоди, издржувајќи пократка затворска казна.Случајот „Рекет“ сега е пред Европскиот суд за човекови права во Стразбур.Последното јавно појавување на Катица Јанева беше во „Претрес со Ландов“, каде отворено кажа дека додека е зад решетките и пречи што се зборуваат невистини и се води црна кампања против неа. Раскажа како го поминува слободното време, но и како се прилагодила во казнено-поправната установа.

Македонија | пред 2 месеци

Детали: Авионот кој заврши во Мавровско Езеро е стар повеќе од 60 години

Авионот кој вчера принудно слета во водите на Мавровското Езеро е идентификуван како Piper PA-28-160 Cherokee, мал спортски авион произведен пред повеќе од шест децении. Според официјалните документи од Федералната управа за авијација на САД (FAA), леталото е регистрирано под американски ознаки и го носи регистарскиот број N5005W, што значи дека формално припаѓа на американскиот цивилен воздухопловен регистар, иако летало над македонското небо.Увидот во јавниот регистар на цивилни воздухоплови во САД покажува дека официјален сопственик на авионот е Дукаѓин Манџука, регистриран со адреса на живеење во Риџфилд Парк, односно сојузната држава Њу Џерси. Сертификатот за регистрација на леталото на ова име е издаден на 21 мај 2021 година и, според податоците на FAA, важи до 2028 година. Американската регистрација со буквата „N“ е вообичаена практика за голем број приватни авиони кои летаат и над европскиот воздушен простор.Техничките податоци откриваат дека станува збор за вистински авијациски „олдтајмер“ со историска и колекционерска вредност. Авионот е произведен во 1961 година, а неговиот сериски број е 28-6, што претставува исклучително низок број и укажува дека овој примерок е еден од првите воопшто произведени модели од серијата PA-28. Опремен е со клипен мотор од серијата Lycoming O-320, еден од најпознатите и најдокажани мотори во лесната авијација. Иако е стар повеќе од 60 години, во американскиот регистар леталото има статус „Valid“, што значи дека ги поседувало сите потребни административни дозволи за летање согласно американските прописи.Несреќата во водите на Мавровското Езеро, која за среќа заврши без човечки жртви, повторно го сврте вниманието на јавноста кон моделот Piper Cherokee, кој со децении важи за еден од најраспространетите и најкористените авиони во светот. Според техничките податоци и кодот на транспондерот Mode S (A63D0C), станува збор токму за Piper PA-28-160 Cherokee, модел што е особено популарен за обука на пилоти и за приватно, рекреативно летање.Овој авион, произведен од американската компанија Piper Aircraft, првпат полетал во раните 1960-ти години и често се нарекува „работен коњ“ на спортската авијација. За разлика од Cessna 172, кој е висококрилец, Piper Cherokee е нискокрилец, со крила поставени под кабината, што му обезбедува стабилност во лет и добар ефект при слетување. Неговата едноставна конструкција и робусност го направиле омилен меѓу пилотите, особено во авио-школите.Авионот е придвижуван од четирицилиндричен мотор Lycoming O-320 со 160 коњски сили, кој важи за еден од најсигурните клипни мотори во авијацијата. Целосно металната конструкција е дизајнирана да издржи груби слетувања и интензивна употреба, а во случај на отказ на моторот, Piper Cherokee има солидни едриличарски способности, што му овозможува на пилотот контролирано да го насочи леталото кон принудно слетување.Според првичните информации, токму откажувањето на моторот е причината поради која авионот завршил во водите на Мавровското Езеро. Фактот што пилотот и патникот успеале безбедно да го напуштат леталото укажува дека слетувањето било контролирано. Иако нискокрилната конфигурација може да претставува дополнителен предизвик при слетување на вода, цврстата структура на кабината очигледно одиграла значајна улога во заштитата на лицата во авионот.Истрагата за точните причини за инцидентот продолжува, но засега е јасно дека во несреќата учествувал редок и историски примерок на еден од најпознатите модели на „Piper“, авион со кој израснале генерации пилоти и кој, кога е соодветно одржуван, важи за безбедно и доверливо летало.

Македонија | пред 2 месеци

Жени добија оштета од фармацевтски гигант, бебешка пудра им донела рак на јајници

На фармацевтскиот гигант „Џонсон и Џонсон“ му е наложено да исплати вкупно 40 милиони долари отштета на две жени кои тврдат дека долготрајната употреба на бебешка пудра со талк придонела за развој на рак на јајници.Поротата на Вишиот суд во Лос Анџелес донесе одлука со која на Моника Кент ѝ се доделени 18 милиони долари, додека на Дебора Шулц и нејзиниот сопруг им се досудени 22 милиони долари. Според пресудата, компанијата со децении била свесна за потенцијалните здравствени ризици од производите на база на талк, но не ги информирала потрошувачите за можните последици, пренесува британски „Гардијан“.Од „Џонсон и Џонсон“ најавија дека ќе поднесат жалба. Потпретседателот задолжен за судски постапки, Ерик Хас, изјави дека компанијата очекува пресудата да биде поништена, нагласувајќи дека, според нив, доказите не ја потврдуваат врската меѓу талкот и ракот.Според судските документи, на Моника Кент ѝ бил дијагностициран рак на јајници во 2014 година, а на Дебора Шулц во 2018 година. Двете жени сведочеа дека користеле бебешка пудра од брендот „J&J“ повеќе од четири децении. Тие изјавиле дека поминале низ сериозни медицински интервенции, вклучително и обемни хируршки зафати и повеќекратни циклуси хемотерапија.Адвокатот на тужителите, Енди Бурчфилд, во завршниот збор пред поротата изјави дека компанијата уште во 1960-тите години имала сознанија дека производите со талк можат да бидат поврзани со појава на рак, но, како што рече, тие информации биле намерно сокривани од јавноста.Одбраната на компанијата, пак, тврди дека нема релевантни научни докази кои ја потврдуваат причинско-последичната врска меѓу употребата на талк и ракот на јајниците. Адвокатката Алисон Браун истакна дека тужбите се темелат на тврдења кои не се поткрепени со валидни и прифатени научни студии.Според судските поднесоци, „Џонсон и Џонсон“ во моментов се соочуваат со повеќе од 67.000 тужби поврзани со нивните производи од талк. Компанијата и понатаму тврди дека нејзините производи се безбедни и дека не содржат азбест, но во 2020 година престана да продава бебешка пудра на база на талк на американскиот пазар.

Магазин | пред 2 месеци

ВМРО-ДПМНЕ со сериозни обвинувања: Спасовски дозволил незаконски профит и ја загрозил безбедноста на граѓаните

ВМРО-ДПМНЕ излезе со сериозни обвинувања на адреса на поранешниот министер за внатрешни работи Оливер Спасовски, тврдејќи дека наместо да ја штити безбедноста на граѓаните, тој ја загрозил преку институционална негрижа и непостапување согласно законските обврски.Од партијата наведуваат дека за станицата за технички преглед во општина Сарај постоел официјален извештај со утврдени нерегуларности, но и покрај тоа, Спасовски не донел решение за одземање на овластувањето во законски предвидениот рок. Според нив, ваквото одложување траело цели три месеци, период во кој техничкиот центар продолжил со работа и, како што тврдат, остварил незаконски профит од околу 5,5 милиони денари, односно приближно 90.000 евра.ВМРО-ДПМНЕ посочува дека пропустот е уште посериозен ако се земе предвид дека автобусот на компанијата „Беса Транс“, кој беше вклучен во тешката сообраќајна несреќа во Бугарија во која загинаа 45 лица, техничкиот преглед го извршил токму во оваа станица во Сарај. Според обвинувањата, лиценцата на техничкиот центар била одземена дури три дена по трагедијата, што отвора сериозни прашања за навременоста и одговорноста на институциите.„Дали трагедијата можела да се спречи доколку Спасовски постапел навреме? Дали постоел некаков договор со фирмата поради кој била игнорирана законската постапка? И дали одземањето на лиценцата по несреќата било обид за задоцнета реакција поради чувство на вина?“, прашуваат од ВМРО-ДПМНЕ.Од партијата оценуваат дека станува збор за тешки институционални пропусти кои не смеат да се повторат и нагласуваат дека јавноста има право да знае кој бил одговорен за гарантирање на безбедноста на граѓаните, а не ја извршувал таа должност.ВМРО-ДПМНЕ бара целосно расчистување на случајот и утврдување на индивидуална одговорност, потенцирајќи дека правда и одговорност мора да има, особено кога станува збор за прашања поврзани со човечки животи и јавната безбедност.

Македонија | пред 2 месеци

СДСМ: Изјавите на ВМРО-ДПМНЕ покажуваат дека постои план за мигранти

Од СДСМ тврдат дека постоењето на план за примање мигранти во Македонија не го откриваат само британските и светските медиуми, туку дека тоа јасно може да се прочита и од јавните настапи и однесувањето на ВМРО-ДПМНЕ во изминатите две недели.Според СДСМ, првиот индикатор е одбивањето на премиерот Христијан Мицкоски и ВМРО-ДПМНЕ да ја потпишат предложената Резолуција. Од партијата велат дека со една јасна одлука на Собранието граѓаните би можеле да бидат сигурни дека мигранти во Македонија нема да има, но дека владејачкото мнозинство тоа го одбива. „Ако нема скриена агенда, Резолуцијата досега ќе беше потпишана“, порачуваат од СДСМ.Како втор аргумент ја наведуваат изјавата на премиерот Мицкоски дека „до пролет“ нема да има мигранти. Според СДСМ, ваквата формулација отвора прашање што ќе се случи потоа и дали по изборите се остава простор за нивно носење.Трето, од СДСМ посочуваат на изјавата дека нема да има „нелегални мигранти“, оценувајќи дека тоа, според нив, значи дека евентуално планираните лица би биле третирани како „легални“, со вклучување на пазарот на труд и сместување.Понатаму, СДСМ ја проблематизира и најавата на Мицкоски дека одлуките за ова прашање треба да се носат на локално ниво, од страна на општините, наместо во Собранието како највисок државен орган. Според нив, избегнувањето на централна одлука отвора сомнеж за постоење скриена намера.Како дополнителен аргумент, од СДСМ ја наведуваат изјавата на Антонио Милошоски дека странските работници кои доаѓаат преку дозволи и агенции немаат врска со азиланти и мигранти, оценувајќи дека на тој начин статусот на мигрантите би се преименувал во „економски работници“.На крај, од СДСМ реагираат и на изјавите на министерот Андоновски, кој посочил дека СДСМ и Венко Филипче немаат право да критикуваат бидејќи во минатото гласале за прифатни центри. Според СДСМ, ваквите тврдења се обид за дефокусирање од клучното прашање – одбивањето на ВМРО-ДПМНЕ да ја потпише Резолуцијата која, како што велат, е единствено целосно решение.„Ова се сите аргументи зошто Резолуцијата не се потпишува“, порачуваат од СДСМ.

Македонија | пред 2 месеци

ВМРО-ДПМНЕ: Филипче глуми патриот, а со Заев планирал мигрантски камп во Бардовци

Од ВМРО-ДПМНЕ обвинуваат дека претседателот на СДСМ, Венко Филипче, денес „глуми загрижен патриот“ по прашањето за мигрантите, иако, како што велат, во времето на владеењето на СДСМ и Зоран Заев активно се работело на носење и населување мигранти во Македонија.Според партијата, токму Филипче и тогашниот премиер Заев имале јасна партиска и државна политика за прифаќање мигранти, кои, како што наведуваат, претставуваат сериозен проблем во повеќе европски земји.Од ВМРО-ДПМНЕ тврдат дека СДС не само што бил подготвен да прифати мигранти во Скопје, туку дека во 2018 година Владата предводена од Заев усвоила и конкретен план за изградба на мигрантски камп во Бардовци. Како доказ, посочуваат дека одлуката е објавена во „Службен весник“, со наведување на имотен лист број 2140 за катастарската општина Бардовци.„Филипче гласал и туркал проект за мигрантски камп во Бардовци, а денес се обидува да се претстави како противник на мигрантите“, велат од ВМРО-ДПМНЕ, додавајќи дека СДС и Филипче сега, според нив, шират конструкции и приказни и покрај тоа што, како што наведуваат, повеќе институции и британскиот амбасадор демантирале дека Македонија ќе прима мигранти од Велика Британија.Од партијата прашуваат колку мигранти СДС и Филипче биле подготвени да примат во тој период и каква корист очекувале од таквите политики. Во соопштението се поставуваат и прашања дали актуелните настапи на Филипче се обид да се прикрие сопствената улога во, како што тврдат, договори за носење мигранти.„Наместо да шират паника и да конструираат приказни, СДС и Филипче треба да се посветат на реформирање на сопствената партија“, порачуваат од ВМРО-ДПМНЕ, додавајќи дека, според нив, „единствените мигранти во Македонија се партиските мигранти на СДС кои ја напуштаат партијата и преминуваат во други политички субјекти“.

Македонија | пред 2 месеци

Декември без вистинска зима – температури над просекот, без врнежи

Според најновите ажурирани метеоролошки прогнози, и во текот на целата наредна седмица Балканскиот Полуостров, вклучително и Македонија, ќе остане под влијание на изразен висок воздушен притисок – антициклон кој се протега од јужните делови на континентот. Ваквата синоптичка состојба ќе продолжи да носи стабилно, суво и невообичаено топло време за месец декември.Температурите ќе бидат натпросечни на целата територија на Македонија, како и во поширокиот регион и во голем дел од Европа. Наместо типични зимски вредности, ќе преовладуваат температури повисоки од климатската норма за овој период од годината.Во однос на врнежите, прогнозите покажуваат дека тие ќе бидат значително под просекот за декември. Времето ќе биде претежно суво, без појава на дожд или снег, како во Македонија, така и на поголемиот дел од Балканот.И покрај стабилното време, антициклонските услови ќе придонесат за честа појава на магла и ниска облачност по котлините, особено во ноќните и утринските часови. На некои места маглата може да биде погуста и подолготрајна, со пониски утрински температури и намалена видливост, додека на повисоките места ќе преовладува посончево и потопло време.

Македонија | пред 2 месеци

Украински дронови погодиле станбена зграда во Русија, има жртви

Две лица го загубија животот во текот на ноќта во напад со украински дронови врз рускиот град Саратов, соопшти регионалниот гувернер Роман Бусаргин.Во објава на Телеграм, Бусаргин информираше дека во нападот била погодена станбена зграда, при што, покрај двете жртви, има и неутврден број повредени лица.Саратов се наоѓа на реката Волга, на околу 625 километри од украинската граница, и во изминатите години повеќепати беше цел на напади со дронови. Нападите најчесто беа насочени кон локалната нафтена рафинерија и големата воена воздухопловна база во близина на градот.Во меѓувреме, руското Министерство за одбрана соопшти дека во текот на ноќта биле соборени вкупно 41 дрон, од кои 28 над територијата на Саратовската област.Информациите за нападот и за евентуалната материјална штета сè уште се дополнуваат, додека надлежните служби работат на утврдување на сите околности поврзани со инцидентот.

Свет | пред 2 месеци

Италија застанува со Белгија, а тука е и Бугарија: Се кочи планот на ЕУ за користење замрзнати руски средства за Украина

Италија ѝ се приклучи на Белгија во спротивставувањето на планот на Европската унија замрзнатиот руски државен имот да се користи како основа за бескаматен заем за Украина, покажува интерен документ до кој дојде „Политико“.Интервенцијата на Рим, како трета најголема земја-членка на ЕУ според население и гласачка тежина, доаѓа помалку од една недела пред клучниот самит на европските лидери во Брисел и сериозно ги поткопува надежите на Европската комисија дека ќе успее да обезбеди политички договор за оваа иницијатива.Европската комисија настојуваше државите-членки да постигнат согласност на самитот на Европскиот совет закажан за 18 и 19 декември, со цел милијардите евра руски девизни резерви, кои се чуваат во белгиската финансиска институција „Еуроклир“, да ѝ бидат ставени на располагање на Украина за поддршка на нејзината економија разурната од војната.Белгија веќе подолго време покажува резерви кон овој план, стравувајќи од високи финансиски последици во случај на арбитражна пресуда во корист на Русија. До неодамна, Брисел немаше отворена поддршка од други земји-членки, но ситуацијата сега се менува.Според документот, Италија заедно со Белгија, Малта и Бугарија ѝ предлага на Европската комисија да разгледа алтернативни модели за финансирање на Украина во наредните години, наместо директно користење на замрзнатата руска имотна резерва.„Ги повикуваме Комисијата и Советот да продолжат со истражување и дискусија за други опции, усогласени со правото на ЕУ и меѓународното право, со предвидливи параметри и значително помали ризици, со цел да се одговори на финансиските потреби на Украина“, се наведува во документот на четирите земји.Како алтернатива се споменува таканаречениот „план Б“, кој би подразбирал заедничко задолжување на Европската унија за финансирање на Украина во наредниот период. Сепак, и ова решение носи сериозни предизвици. Критичарите предупредуваат дека таквиот чекор дополнително би го зголемил и онака високиот јавен долг на Италија и Франција, а би барал и едногласна одлука, што отвора можност за блокада од страна на унгарскиот премиер Виктор Орбан.Иако овие четири земји, дури и со евентуална поддршка од Унгарија и Словачка, немаат доволно гласови за да формираат блокирачко малцинство, нивното јавно противење значително ги намалува шансите Европската комисија да постигне политички договор веќе следната недела.Премиерката на Италија, Џорџа Мелони, досега доследно ги поддржуваше санкциите против Русија, но владината коалиција што ја предводи е поделена кога станува збор за поддршката на Украина. Потпретседателот на владата, Матео Салвини, отворено го поддржа и планот на американскиот претседател Доналд Трамп за завршување на војната во Украина.Во дополнителна критика, Белгија, Италија, Малта и Бугарија изразија скепса и кон идејата Европската комисија да ги користи своите вонредни овластувања за да ги измени правилата за санкции и долгорочно да ја задржи руската имотна резерва замрзната.Иако вчера гласаа за одлука со која се овозможува подолгорочно замрзнување на руските средства, тие нагласија дека тоа не значи автоматска согласност за нивно користење. „Ова гласање на никаков начин не ја прејудицира одлуката за евентуално користење на имобилизираната руска имотна резерва, која мора да биде донесена на ниво на лидери“, наведуваат четирите земји.Правниот механизам за подолгорочно замрзнување на имотот е дизајниран за да се намали можноста проруски влади во рамки на ЕУ, како оние во Унгарија и Словачка, во иднина да дозволат враќање на средствата во Русија.Сепак, Белгија, Италија, Малта и Бугарија предупредуваат дека ваквиот пристап носи „далекусежни правни, финансиски, процедурални и институционални последици“, кои, според нив, би можеле да одат многу подалеку од конкретниот случај со руската имотна резерва.

Македонија | пред 2 месеци

СДСМ: За мигрантите мора да одлучува Собранието, а не општините

СДСМ смета дека одлуките поврзани со евентуален прием на мигранти во Македонија мора да се носат исклучиво во Собранието, а не на ниво на општини.Од партијата реагираат дека премиерот Христијан Мицкоски со денови одбегнува јасен одговор дали ќе ја потпише Резолуцијата со која граѓаните би добиле гаранција дека во Македонија нема да се примаат мигранти за финансиски надомест.„Наместо јасен одговор, секојдневно гледаме изговори. Сега Мицкоски најавува некакви локални иницијативи преку советници од ВМРО-ДПМНЕ во одредени општини. Зошто премиерот не го споменува Собранието, туку зборува за општини?“, прашуваат од СДСМ.Според опозицијата, Собранието е највисокиот орган на државата, составен од пратеници кои се директно избрани од граѓаните, поради што токму таму треба да се носат вакви клучни одлуки.„Резолуцијата е народен договор, затоа што пратениците имаат мандат од граѓаните. Собранието е над општините и единствено тоа може да донесе одлука што ќе важи на целата територија на Македонија и ќе спречи прием на мигранти“, наведуваат од СДСМ.Од партијата иронично додаваат дека „добро е што премиерот не најави иницијативи во месни заедници“, потенцирајќи дека ваквите прашања не смеат да се релативизираат.СДСМ уште еднаш го повикува премиерот Христијан Мицкоски јавно и недвосмислено да одговори дали ќе ја потпише Резолуцијата.„Одговорот е едноставен – ДА или НЕ. Не мора да му одговори на СДСМ, нека им одговори директно на граѓаните“, порачуваат од партијата.

Македонија | пред 2 месеци

(Видео) Пред да им упадне во студио, психијатрискиот случај им коментирал на „јутуб“

Коментари на „Јутуб“ додека траел поткастот „Тешки муабети“ биле претходница на упадот во студиото. Лицето Горан Спасов, кој е пациент во психијатриската болница во Бардовци, претходно коментирал јавно, по што водителот Александар Митoвски-Мечка реагирал.„Абе, Горан Спасов, абе слушај бе да ти кажам тебе една работа. Прееска те гледам ни слика си ставил, ни ништо. Еден follower, ме следиш само мене на инстаграм, те блокирав. Многу бе силен ти? Еве знаеш кај сум! Дојди! Лигур“, вели во реакција на коментарот.Кратко пред полноќ по упадот, подкастот во живо беше прекинат, а десет минути подоцна уредникот на Инфомакс, Александар Митовски, повторно се појави за да каже дека некој насилно влегол во студиото сакајќи физички да го нападне бидејќи го навредувал премиерот. Според него, била повикана полиција а против напаѓачот ќе следува кривична пријава.

Настани | пред 2 месеци

Нелегални покер-клубови и лихварство во Скопје: Осуммина уапсени за нелегални игри на среќа, лихварство и перење пари

Министерството за внатрешни работи информира дека во координирана акција со Основното јавно обвинителство за гонење организиран криминал и корупција е сузбиена организирана криминална група која подолг период делувала на подрачјето на Скопје, инволвирана во повеќе тешки кривични дела, меѓу кои злосторничко здружување, лихварство, перење пари и неовластено приредување игри на среќа.Полициската акција била спроведена во текот на ноќта меѓу 11 и 12 декември 2025 година од страна на Одделот за сузбивање на организиран и сериозен криминал, во координација со Секторот за компјутерски криминал и Единицата за финансиски истраги, под раководство на јавен обвинител од ОЈО-ГОКК. Врз основа на наредби од Основниот кривичен суд Скопје, биле извршени претреси на 11 локации во Скопје и околината.При акцијата лишени од слобода се осум лица од Скопје, а при претресите биле пронајдени и одземени парични средства во износ од околу 34.510 евра, 431.000 денари и 400 американски долари, повеќе мобилни телефони, компјутери и лаптопи, три патнички моторни возила, како и големо количество опрема за организирање игри на среќа – професионални маси за покер, чипови, карти и друга придружна опрема. Пронајдена била и растителна и прашкаста материја за која се сомничи дека е наркотична дрога.Од Обвинителството соопштија дека акцијата е резултат на неколкумесечна предистражна постапка. На една од локациите биле затекнати 14 лица кои во моментот активно учествувале во игри на среќа. По поднесените кривични пријави, јавниот обвинител донел наредби за спроведување на две одделни истражни постапки против вкупно осум лица.Во првата истражна постапка се опфатени шест лица за кои постои основано сомнение дека заедно со други, засега непознати лица, формирале организирана група која од февруари 2025 година до декември истата година континуирано и координирано организирала недозволено приредување игри на среќа без лиценца. Игрите се одвивале на најмалку три локации во Скопје, со однапред утврдени термини, правила, влогови и број на играчи. Осомничените обезбедувале играчи, ангажирале лица за делење карти, воделе каса за уплати и исплати и покривале трошоци за функционирање на нелегалните клубови. Се организирале игри како „омаха“, „покер“, „круг“ и „брич“, со што групата се стекнала со значителна противправна имотна корист.Во втората истражна постапка се опфатени три лица, меѓу кои и еден од осомничените од првата постапка. Тие се сомничат дека преку кривичното дело лихварство се стекнале со противправна имотна корист од 7.583.784 денари, која потоа ја пуштиле во легален оптек преку внесување готовина на свои банкарски сметки, трансакции преку трети лица и користење на средствата за купување недвижен имот, сервисирање кредити и финансирање на луксузен начин на живот. За кривичното дело перење пари осомничена е и сопругата на првоосомничениот.Јавниот обвинител, ценејќи дека постојат законски основи, до судијата на претходна постапка ќе достави предлог за определување мерка ефективен притвор за седуммина од осомничените, додека за една осомничена ќе биде предложена мерка куќен притвор.Од МВР и Обвинителството најавуваат продолжување на истрагата и преземање на дополнителни дејствија со цел целосно расчистување на случајот и утврдување на евентуална вмешаност и на други лица.

Македонија | пред 2 месеци

Најмалку петмина обвинители не се согласуваат со обвинението за „Пулс“ кое го застапуваат, тврди Туфегџиќ

Обвинението за трагичниот пожар во кочанската дискотека „Пулс“ е сериозно проблематично и содржи суштински правни слабости, оценија адвокатите Владимир Туфегџиќ и Еленко Миланов во гостување на ТВ21. Според нив, концептот на обвинението е преширок и неправилно ги третира сите опфатени лица како соучесници, иако голем дел од нив во моментот на трагедијата немале ниту директна, ниту индиректна поврзаност со објектот во кој изби пожарот.Адвокатите сметаат дека ваквиот пристап не кореспондира со основните принципи на кривичното право, особено во делот на утврдување на индивидуална вина, причинско-последична врска и реална можност за влијание врз настанот. Според нив, невозможно е сите опфатени со обвинението автоматски да се третираат како дел од исто кривично дејствие, без прецизна и јасна правна аргументација за секој поединечно.Владимир Туфегџиќ посочи дека бројот на обвинители ангажирани во предметот е симптоматичен и, според него, не е показател за квалитет, туку за внатрешна несигурност во самиот обвинителен концепт. Тој направи споредба со Нирнбершкиот процес, каде што, како што рече, за судење за злосторства од светски размери биле ангажирани само четворица обвинители.„Во овој предмет имате 15 обвинители. Јас лично ги познавам сите и со целосна одговорност тврдам дека најмалку петмина од нив не се согласуваат со ваквиот концепт на обвинението. Тоа го знам, сигурен сум и стојам зад тоа. Но тие го чуваат тоа за себе“, изјави Туфегџиќ.И Еленко Миланов се согласи дека обвинението е поставено на климави правни основи, предупредувајќи дека ваквиот пристап може да доведе до сериозни последици не само за обвинетите, туку и за довербата на јавноста во правосудниот систем. Според него, доколку судот прифати обвинение без јасно утврдена индивидуална одговорност, тоа ќе претставува опасен преседан во македонската судска пракса.Двајцата адвокати оценија дека предмет од ваков обем и тежина бара максимална правна прецизност, а не обид преку масовност и политичко-јавен притисок да се надоместат слабостите во истрагата.

Македонија | пред 2 месеци

Со голема донација во болницата „Свети Еразмо“ во Охрид, Mozzart ја заокружува својата приказна на хуманост за 2025 година

Најубавите дела секогаш се оставаат за крај – токму така компанијата Mozzart ја завршува оваа година, со гест кој носи надеж и светлина. Во специјалната болница „Свети Еразмо“ во Охрид пристигна вредна донација – современ ортопедски трауматолошки борер, апарат кој ќе ја олесни работата на лекарите и ќе им овозможи на пациентите побрзо и поквалитетно лекување.„Нашата благодарност кон Mozzart е огромна. Оваа донација е од исклучително значење за нас – апаратот го скратува времето на операциите и го зголемува нивниот квалитет. Со гордост можам да кажам дека добивме една од најсовремените опреми, донација која ретко која компанија би можела да ја обезбеди,“ истакна директорот Харалампие Шокаревски.Оваа болница, единствена од својот вид во државата, е место каде што доаѓаат пациенти од сите градови. Токму затоа, значењето на донацијата е уште поголемо.„Горди сме што успеавме да ја реализираме оваа донација во болницата Свети Еразмо. Најубаво е кога годината ја завршуваме со дело кое носи добрина и надеж,“ изјави Ивана Стефановска Крстевска од Mozzart.Mozzart ја започна 2025 со хуманост, а ја завршува на ист начин – со срце и грижа за луѓето. Со нови големи проекти, компанијата чекори со сигурност и подготвеност кон 2026 година, носејќи ја истата порака: хуманоста е најголемата победа.

Македонија | пред 2 месеци