„Скопје1“ дознава: Се запленуваат рекордни 27 тони марихуана во Скопје и струмичко

Полицијата вечерва завршува заплена на речиси десет тони марихуана во Скопје, поврзани со претходно одземените пет тони во Србија, а складирани во кругот на фирмата инволвирана во случајот со нелегалниот шверц, дознава „Скопје1“ од извори вклучени во истрагата. Паралелно со оваа заплена, според истите извори, се спроведува и втора акција на локации надвор од Скопје, каде што се одземаат дополнителни 18 тони марихуана. Според неофицијалните информации, втората заплена е во струмичко.Акцијата, која трае во текот на целиот ден, ја спроведува Министерство за внатрешни работи под насоки на Обвинителство за гонење организиран криминал и корупција. Со тоа, се одзема вкупна количина од околу 27 тони марихуана, што според достапните информации претставува најголема конфискација на дрога во Македонија за која досега се слушнало во јавноста.Акцијата следи по настаните од пред четири дена, кога во Србија беа пронајдени и одземени пет тони марихуана за кои српските власти соопштија дека биле прошверцувани од Македонија и биле наменети за српскиот пазар. Тамошните институции информираа дека дрогата била складирана во магацин поврзан со семејство во село во Крушевац.Во фокусот на истрагата е компанијата „Алфафарм ДОО Скопје“, регистрирана во 2023 година, со дејност одгледување и преработка на билки, ароматични и лековити растенија за фармацевтска употреба. Според податоците од Централниот регистар, компанијата има акционерски капитал од околу 529 илјади евра и повеќе ко-сопственици. Интересно е што има измени во сопственичката структура денови пред да бидат фатени шверцуваните пет тони во Србија.Од македонските институции засега не се соопштуваат детали, со образложение дека акцијата сè уште е во тек. Во кругот на поранешниот комплекс ОХИС, каде што правно е регистрирано седиштето на „Алфафарм ДОО Скопје“, вечерва е забележливо засилено полициско присуство, истражители на Обвинителството, како и медицински лица.Во Србија, според официјалните информации, осомничени се пет лица, од кои две се сè уште недостапни за органите на прогонот, а се гонат за неовластено производство и ставање во промет на наркотични дроги. Бројот на осомничени и кривичните дела за кои постојат сомневања во Македонија ќе бидат соопштени по завршувањето на целосната истражна постапка, кога и официјално се очекува потврда за заплената од над 27 тони марихуана.

Македонија | пред 1 месец

(Видео) По заканите за „убиства и тепачки“, демонстрантот се извини: „Нема да се повтори“

Лицето кое за време на протестите се закани дека „ќе има убиства и тепачки“ доколку полицијата одземе нечие возило, денеска јавно се извини, наведувајќи дека изјавата ја дал во афект.Демонстрантот посочува дека неговата реакција била предизвикана од тоа што на негов братучед му било одземено возилото, согласно измените на Законот за прекршоци, и уверува дека вакво однесување нема да се повтори.„Ова нема да се повтори уште еднаш, на братучед ми му ја земаа колата. Ова нема да се повтори уште еднаш. Нема да се закануваме повеќе“, изјави тој.Заканите предизвикаа силни реакции во јавноста, а надлежните институции претходно најавија дека ќе постапуваат по сите случаи на загрозување на јавниот ред и безбедноста.

Македонија | пред 1 месец

Мицкоски најавува заплена на десетици тони марихуана: Разоткривање на криминалната мрежа

„Мислам дека уште вечерва граѓаните ќе слушнат нешто катастрофално“, изјави денеска премиерот Христијан Мицкоски, најавувајќи масовна полициска акција која, според него, ќе ги разоткрие вистинските размери на криминалот со нелегалното производство и трговија со марихуана во државата.Тој посочи дека во текот на денешниот ден и во наредните денови јавноста ќе биде сведок на заплена на, како што рече, „десетици тони“ недозволени супстанции, нагласувајќи дека станува збор за една од најголемите акции досега.Мицкоски остро ги критикуваше политиките на претходната власт на СДСМ и ДУИ, обвинувајќи ги дека создале лажна слика кај граѓаните и инвеститорите дека преку бизнисот со марихуана може брзо да се дојде до богатство и економски напредок.„Тоа беше економската политика на претходната влада која ги натера луѓето да веруваат дека преку ноќ ќе станат милионери. Наместо трансформација, добивме тешка и мачна состојба која директно ги загрозува младите генерации“, изјави премиерот.Според него, акцијата на Министерството за внатрешни работи, која веќе е во тек, има за цел целосно да го пресече нелегалниот промет, складирање и извоз на марихуана. Тој истакна дека се работи за огромни количини кои биле пласирани на незаконски начин, со вклученост на правни субјекти и од земјата и од странство.„Не станува збор за неколку килограми, туку за десетици тони материи. Констатирани се незаконски односи меѓу домашни и странски фирми“, нагласи Мицкоски.Премиерот побара целосна одговорност од креаторите на, како што ги нарече, погрешните и опасни политики од минатото, потенцирајќи дека последиците од ваквиот систем се катастрофални за целото општество.Според најавите, граѓаните наскоро ќе имаат увид и во официјалните бројки и податоци од Министерството за внатрешни работи, кои, како што рече Мицкоски, ќе ја потврдат „катастрофалната состојба“ што актуелната власт ја наследила.

Македонија | пред 1 месец

Полиција, истражители, медицински тимови влегоа во фирмата поврзувана со шверцот на марихуната од Македонија за Србија

Полицијата и истражителите цел денср во седиштето на фирмата што се поврзува со шверцот на пет тони марихуана од Македонија кон Србија. Голема полициска присутност се забележува во кругот на поранешната фабрика „Охис“, додека паралелно се вршат проверки и на повеќе локации во струмичкиот регион. На терен се присутни и медицински тимови.Акцијата се спроведува по наредба на Обвинителството за гонење на организиран криминал и корупција, кое ја води истрагата за меѓународниот шверц на дрога.Во фокусот на истрагата е компанијата „Алфафарм ДОО Скопје“, регистрирана во 2023 година, со дејност одгледување и преработка на билки, ароматични и лековити растенија за фармацевтска употреба. Според податоците од Централниот регистар, компанијата има акционерски капитал од околу 529 илјади евра и повеќе ко-сопственици, од кои еден е осомничен во постапката што ја води Обвинителството.Јавно достапните финансиски податоци покажуваат дека фирмата работи со загуба, а во 2024 година пријавила минус од над осум милиони денари. Лиценцата за одгледување канабис за медицински цели ја добива во април минатата година, а седиштето ѝ е во скопска Кисела Вода.Случајот повторно го отвора прашањето за поврзаноста на лица од Србија со македонски компании за одгледување медицински канабис, тема што веќе еднаш беше актуализирана по аферата „Јовањица“. Истрагата е во тек, а надлежните најавуваат дополнителни дејствија.

Македонија | пред 1 месец

Скандал во Бугарија: Стотици жени тајно снимани во салони за убавина, снимките завршиле на порнографски сајтови

Бугарско обвинителство започнува истражна постапка откако е откриено дека стотици жени биле нелегално снимани за време на интимни козметички третмани во салони за убавина, а видеоснимките подоцна биле објавувани на порнографски интернет-страници и Телеграм-канали.Според досегашните сознанија, снимањето се вршело со скриени камери поставени во просториите каде што се изведувале третманите, во моменти кога жените често биле целосно разголени. Дел од спорните снимки датираат од 2023 година, а со текот на времето биле масовно споделувани на повеќе порнографски платформи.Обвинителката Марија Маркова соопшти дека до полицијата во Бургас биле поднесени повеќе од 100 пријави од оштетени лица. Аферата, според досегашните податоци, опфаќа најмалку два салона за убавина во Бургас и еден во Казанлак, додека истражни дејствија се преземаат и во други градови низ Бугарија. Обвинителството потврдува дека меѓу жртвите има и малолетнички на возраст од 15 до 17 години.Една од жртвите во изјава за бугарската телевизија „Нова“ раскажува дека првично препознала пријатели и роднини на видеоснимките, бидејќи со години го посетувале истиот салон, по што почнала да стравува дека и самата може да се појави на некоја од објавите. Таа го опишува искуството како длабоко понижувачко и вознемирувачко, истакнувајќи дека најголем страв ѝ е можноста да биде препознаена од пошироката јавност.Бугарските медиуми информираат дека меѓу оштетените има и јавни личности, меѓу кои судијка, обвинителка, новинарка, како и ќерки на регионален функционер. Дел од жените сведочат дека камерите биле поставени исклучително блиску и директно насочени кон нивните интимни делови, а некои наведуваат дека процедурите дури биле пренесувани во живо, при што гледачите плаќале пристап со криптовалути.Полицијата досега ги сослушува сопствениците на салоните, како и сегашни и поранешни вработени, но засега нема приведени лица. Сопствениците на салоните ја негираат одговорноста, тврдејќи дека безбедносните камери биле злоупотребени како резултат на хакерски напад, што е една од верзиите што ја проверуваат истражните органи.

Свет | пред 1 месец

(🔴ВО ЖИВО) Претрес на Јовановски: како им пресудија на 27 април, проституцијата и силувањата во затвор, УЧК во 2001, кризите

Човекот што бил поротник-судија во предметите за 27 април, рамо до рамо со Кацарска, a денес е директор на најголемиот затвор во државата – Идризово. Вечерва, Зоран Јовановски зборува јавно за судењето, за (не)правдата), одговара на прашања од осудените...Во „Идризово“ зборуваме за „силувањата“ и проституцијата, Диво Насеље и вклучувањето во живо на косовски телевизии... но и за првпат, за најдениот параглајдер на кровот од затвореното одделение, ексклузивно!Јовановски – човек што минал низ најжешките години на безбедносниот систем. Ќе прашуваме за посебната единица“ и немирите, преку 2001 и кризите, до граничната полиција, „Сејф сити“ пред 15 години, криминалните групи, судските процеси и тоа што се случува „внатре“ кога институциите молчат.Ќе отвори теми за кои ретко кој зборува јавно: операции на терен, одлуки во секунди, пропусти што чинеле животи, притисоци, молк, и како изгледа државата кога се води „од сенка“.СЛЕДЕТЕ ВО ЖИВО:

Студио | пред 1 месец

По вторпат разрешена судијката Савовска Димитровска која се закануваше на „Скопје1“, а со нејзе заминува и судијката Георгиева

Со девет гласа „за“, Судски совет на Република Македонија по втор пат ги разреши судијките Наташа Савовска Димитровска и Роза Георгиева од Апелационен суд Скопје, кои постапувале во предметот „Телеком–Фокуснет“, додека третата судијка, Јетмире Ајдини, е санкционирана со парична казна. Оваа одлука е конечна и нема право на жалба.Одлуката е донесена попладнево, едногласно, и е идентична со претходната, иако по првото разрешување Савовска Димитровска поднесе жалба до Врховен суд на Република Македонија, која беше уважена, со јасни напатствија предметот повторно да биде разгледан од Судскиот совет.Случајот „Телеком–Фокуснет“ трае повеќе од две децении и произлегува од тужбата на интернет-провајдерот Фокуснет од Штип против телекомуникациската компанија Телеком. Апелациониот суд донесе пресуда со која Телеком беше задолжен да исплати отштета од околу четири милиони евра. По повторното разгледување, Судскиот совет утврди сериозни прекршувања и недоследности во постапувањето на Апелација.Судијката Јетмире Ајдини, по чии укажувања за незаконско постапување беше отворена постапката, на членовите на Судскиот совет им посочила и дека постојат два записника од исто рочиште, при што еден од нив, според нејзините наводи, бил лажен. Таа беше казнета парично.Паралелно со дисциплинската постапка, Основно јавно обвинителство отвори предистражна постапка за можни неправилности при донесувањето на пресудата, со што дополнително се отвори прашањето за интегритетот и одговорноста во судството.Минатата недела,, сега разрешната судијка Савовска Димитровска преку адвокат упати закани до главниот уредник на „Скопје1“, најавувајќи кривична пријава. На ова реагираше Здружение на новинари на Македонија, кое поднесе претставка и до Адвокатската комора. Со оглед дека судијката во меѓувреме е разрешена, за нејзиното однесување повеќе не е надлежен Судскиот совет.Во истата недела, Наташа Савовска Димитровска јавно негираше дека сторила законски прекршувања и им порача на членовите на Судскиот совет да не подлегнуваат на притисоци, нагласувајќи дека одлуките ги донела според сопственото судиско убедување.

Македонија | пред 1 месец

ССМ бара 80 отсто пониски функционерски плати: ако нема закон, следуваат 10.000 потписи

Со барање за намалување на функционерските плати за 80 проценти, Сојуз на синдикати на Македонија денеска во Собранието поднесе иницијатива со која директно ги повикува пратениците сами да поднесат законски измени.Од ССМ порачаа дека доколку пратениците не ја преземат оваа обврска, синдикатот ќе ја искористи законската можност и ќе собере 10.000 потписи од работниците, со што ќе добие право самостојно да поднесе измени на Законот.Според ССМ, кога веќе нема поддршка за Законот за раст на минималната плата, пратениците треба да покажат солидарност со работниците и да си ги намалат платите за 78 проценти – износ идентичен на зголемувањето што го добија во април 2023 година.До ова дојде откако Владата не ги прифати нивните барања за зголемување на платите.

Македонија | пред 1 месец

71 ракета и 450 дронови: Русија ѝ нанесе една од најтешките енергетски штети на Украина

71 ракета и 450 дронови беа лансирани во најновиот масовен руски напад врз украинската енергетска инфраструктура, при што загинаа најмалку четири лица, а 32 беа повредени, соопштија украинските власти, оценувајќи дека станува збор за една од најтешките штети од почетокот на војната во полн обем.Украинскиот министер за енергетика Денис Шмихал соопшти дека се оштетени производствени капацитети, како и преносни и дистрибутивни мрежи во повеќе региони. Според него, состојбата е исклучително комплицирана, поради што енергетските компании воведуваат итни исклучувања на струјата, а дополнителни генератори се распределуваат во критичните подрачја.Шмихал информира дека сериозни оштетувања претрпела и киевската термоелектрана „Дарница“, која обезбедува греење за голем дел од населението во главниот град, нагласувајќи дека нападите врз цивилната енергетска инфраструктура претставуваат воено злосторство.Украинското Министерство за надворешни работи соопшти дека со овој напад Русија ги прекршила обврските од енергетското примирје и дека не покажува реални знаци на деескалација, и покрај јавните изјави од американскиот претседател.Извршниот директор на најголемата приватна енергетска компанија во Украина, ДТЕК, Максим Тимченко изјави дека електраните претрпеле „страшна штета, една од најлошите што досега сме ја виделе“, нагласувајќи дека ова е деветти масовен напад врз нивните капацитети од октомври 2025 година. Тој предупреди дека илјадници семејства во Киев се соочуваат со температури до минус 25 степени и недели без греење.И покрај екстремните услови, од ДТЕК соопштија дека нивните екипи успеале да ја вратат струјата за околу 100.000 домаќинства во Киев и дека санацијата продолжува непрекинато, дење и ноќе.Нападите продолжија и во текот на ноќта, кога руските сили лансираа уште 105 дронови, од кои украинската противвоздушна одбрана пресретна 88. Државната компанија „Укренерго“ информира дека повторно е гаѓана енергетската инфраструктура во повеќе области, оставајќи делови од Сумската, Донецката, Днепропетровската, Херсонската и Запорошката област без електрична енергија.Претседателот Володимир Зеленски соопшти дека ситуацијата во моментов е најтешка во Киевската, Харкивската, Сумската, Полтавската, Днепарската и Черкаската област, наведувајќи дека во Киев работат над 200 тимови за поправки и дека повеќе од 1.100 станбени згради се без греење.Украинската служба за безбедност порано соопшти дека собраните докази укажуваат оти нападите врз енергетската инфраструктура се дел од систематска политика насочена кон цивилното население, што претставува злосторство против човештвото.Овие напади се случуваат паралелно со почетокот на нова рунда трипартитни разговори меѓу Русија, Украина и Соединетите Американски Држави во Абу Даби, насочени кон пронаоѓање решение за прекин на војната.

Свет | пред 1 месец

Од 1,8 на 1,2 милиони до 2070: Сиљановска-Давкова предупредува на демографски колапс

1,8 милиони денес, 1,2 милиони во 2070 година – загуба од 33 отсто од населението. Со овие алармантни бројки претседателката Гордана Сиљановска-Давкова денеска се обрати на Светскиот самит на владите во Дубаи, каде што беше главен говорник на сесија посветена на демографските промени.Таа посочи дека Македонија, заедно со поширокиот регион, се соочува со троен демографски притисок: ниска стапка на наталитет, висока емиграција и забрзано стареење на населението. Според проекциите што ги презентираше, доколку трендовите продолжат, земјата во следните децении би можела да изгуби речиси една третина од сегашното население.Оваа демографска тријада, нагласи Сиљановска-Давкова, директно го намалува бројот на работоспособни граѓани и истовремено го зголемува товарот врз здравствениот, социјалниот и пензискиот систем. Таквиот притисок, како што истакна, е особено тежок за мала и отворена економија каква што е македонската.Претседателката повика на длабоки институционални реформи, со посебен акцент на судството и јавната администрација, како и на забрзана дигитализација на јавните услуги, кои треба да ја зголемат ефикасноста и довербата во институциите.Во своето обраќање таа ја потенцираше и улогата на младите, нагласувајќи дека тие мора да ја добијат заслужената позиција како двигатели на дигиталната и економската трансформација, но и како активни учесници во креирањето на јавните политики.Особено место во говорот ѝ беше дадено и на дијаспората, која, според Сиљановска-Давкова, претставува значаен мотор на интелект, иновации и инвестиции и треба системски да биде вклучена во развојните процеси на државата.На крајот, таа повика на изградба на демографски отпорно општество – општество во кое луѓето ќе имаат причини да останат, да живеат и да формираат семејства, нагласувајќи дека демографијата не е само статистика, туку прашање на иднината на државата.

Македонија | пред 1 месец

Вучиќ повторно кон премиерската фотелја, се отвора прашањето за промена на Уставот на Србија

Сè појасно се наѕира дека српскиот претседател Александар Вучиќ повторно има амбиција да се врати на премиерската функција, додека неговата Српска напредна странка се соочува со сериозен проблем – нема јасен кандидат кој со сигурност би победил на идните претседателски избори. Токму поради тоа, во јавноста сè погласно се зборува за можноста власта да побара излез преку промена на Уставот, со што би се сменил начинот на избор на претседателот на државата.Како „пробен балон“ во јавниот простор се појавува предлогот на Војислав Шешељ, кој отворено сугерира дека претседателот на Србија не треба да се избира на непосредни избори, туку во Народното собрание. Таквата идеја, според аналитичарите и дел од опозицијата, совршено се вклопува во интересите на владејачката структура, имајќи предвид дека СНС располага со двотретинско мнозинство потребно за уставни измени.Во изминатиот период во јавноста се споменуваат повеќе можни наследници на Вучиќ – од Томислав Николиќ, преку Ана Брнабиќ, до Милош Вучевиќ – но ниту едно од тие имиња не гарантира изборна победа. Дополнителен проблем за СНС претставуваат истражувањата на јавното мислење, кои покажуваат пад на рејтингот на партијата. Во таков контекст, загубата на претседателската функција би била сериозен удар за власта, што ја прави идејата за уставна интервенција политички привлечна.Шешељ јавно изјавува дека изборот на претседател во Собранието е „подемократски“, бидејќи овозможува и негово разрешување, за разлика од директниот избор од граѓаните. Истовремено, тој потврдува дека неговата Српска радикална странка останува во коалиција со СНС и дека не планира самостојни политички маневри.Од опозицијата реагираат остро. Потпретседателот на Странката на слободата и правдата, Бoрко Стефановиќ, оценува дека Шешељ јавно го изговара она што Вучиќ го мисли, нагласувајќи дека меѓу двајцата постои долготрајна политичка и идеолошка симбиоза. Според него, ваквиот предлог оди кон дополнително слабеење на врската меѓу граѓаните и институцијата претседател, и кон зајакнување на авторитарен модел на владеење, во кој центарот на моќта се концентрира во рацете на еден човек.Стефановиќ предупредува дека не би било изненадување доколку иницијативата за уставни измени навистина стигне до Народното собрание, бидејќи процедурата тоа го дозволува. Според српскиот Устав, иницијатива за измена можат да поднесат најмалку една третина од пратениците, претседателот на државата, Владата или најмалку 150.000 избирачи. За започнување и усвојување на измените потребно е двотретинско мнозинство, кое владејачката коалиција моментално го има.Српскиот Устав последен пат беше изменет во 2022 година, по референдум за усогласување на судскиот систем со европските стандарди. Дали сега следи нова, далеку поконтроверзна уставна интервенција, која би го променила начинот на избор на претседателот, останува отворено прашање, но сигналите што доаѓаат од врвот на власта и од нејзините најгласни сојузници сè повеќе упатуваат токму во таа насока.

Свет | пред 1 месец

Истекува последниот нуклеарен договор меѓу САД и Русија, расте стравот од нова трка во вооружување

Последниот важечки нуклеарен договор меѓу Русија и Соединетите Американски Држави истекува за неколку часа, со што светот се соочува со можност двете најголеми нуклеарни сили првпат по повеќе од половина век да останат без какви било формални ограничувања за своите нуклеарни арсенали. Развојот ја зголемува загриженоста од нова глобална трка во вооружување, во која сè поважна улога има и Кина.Станува збор за договорот „Нов СТАРТ“, потпишан во Прага во 2010 година, кој ги ограничува бројот на распоредени нуклеарни боеви глави и носачи и предвидува механизми за проверка и транспарентност. Ако во последен момент не биде постигнат нов договор или привремено продолжување, Вашингтон и Москва остануваат без обврзувачка рамка за контрола на стратешкото нуклеарно оружје.Од Кремљ порачуваат дека Москва ќе постапува „внимателно и одговорно“. Советникот на рускиот претседател изјавува дека Владимир Путин за ова прашање разговара со кинескиот претседател Си Џинпинг, при што Русија изразува подготвеност за разговори за стратешка стабилност. Истовремено, од Москва наведуваат дека досега нема официјален одговор од американска страна на предлогот ограничувањата да продолжат и по истекот на договорот.Апел упатува и поглаварот на Римокатоличката црква, папата Лав XIV, кој повикува двете страни да не дозволат престанок на важноста на договорот. Тој порачува дека е неопходно логиката на страв и недоверба да се замени со заедничка етика насочена кон општото добро.Експертите за контрола на вооружувањето предупредуваат дека без договорот, и Русија и САД добиваат слобода да распоредат стотици дополнителни нуклеарни боеви глави на своите ракети и тешки бомбардери. Во екстремно сценарио, тоа би можело речиси да ја удвои сегашната големина на нивните распоредени арсенали. Дополнително, исчезнуваат механизмите за проверка, што ја намалува довербата и ја отежнува проценката на намерите на другата страна.Иако вкупниот број нуклеарни боеви глави во светот е значително намален во однос на врвот од Студената војна, кога во 1986 година изнесувал над 70.000, денес тој број е околу 12.000. Сепак, и Русија и САД активно ги модернизираат своите нуклеарни сили, додека Кина во последната деценија повеќе од двојно го зголемува својот арсенал.Американскиот претседател Доналд Трамп испраќа спротивставени пораки. Тој изјавува дека доколку договорот истече, може да се постигне „подобар договор“, а претходно јавно се залага Кина да биде вклучена во идните рамки за контрола на вооружувањето, оценувајќи дека големите сили веќе располагаат со доволно оружје за повеќекратно уништување на светот.Дел од аналитичарите сметаат дека високата цена на нуклеарното оружје може да ја ограничи непосредната трка во вооружување, но истовремено предупредуваат дека отсуството на договор отвора опасен простор за недоверба, погрешни проценки и ескалација. Во такви околности, истекот на Новиот СТАРТ не се смета само за формален крај на еден договор, туку за потенцијална пресвртница во глобалната безбедносна архитектура.

Свет | пред 1 месец

Тобакото до ЗОО-Скопје се издава 117 евра месечно, а Скопје на пат да плаќа над милион евра оти почнала со рушење на галија два дена пред истек на концесија

Градоначалникот на Град Скопје, Орце Ѓорѓиевски, изјавува дека е неопходно раскинување на низа штетни договори склучени во минатото, но предупредува дека секое погрешно и непромислено постапување носи сериозни финансиски последици за градот.Одговарајќи на советничко прашање за договорите што приватни компании ги имаат со Град Скопје и со јавните претпријатија, Ѓорѓиевски посочува дека веќе е влезено во процес на решавање на дел од тие случаи, но дека наследените состојби создаваат дополнителни проблеми. Како пример ја наведува првата галија во Вардар, за која вели дека пред претходното раководство на Градот (кога градоначалник беше Петре Шилегов) започнало постапка за нејзино отстранување само два дена пред истекот на концесијата, со влегување во градежни активности за рушење на објектот.Според него, ваквото постапување резултирало со судски спор кој на прв степен е добиен од концесионерот, а како последица Град Скопје ќе треба да плати над 70 милиони денари отштета.„Секое нерационално постапување носи последици“, нагласува Ѓорѓиевски, посочувајќи дека цената на ваквите одлуки ја плаќаат граѓаните.Градоначалникот додава дека во моментов се бараат алтернативни решенија за справување со небулозни договори и кирии, кои суштински се штетни за градот. Како пример ја наведува киријата за објектот кој е тобако кај Зоолошката градина, кој, според него, се издава за 7.200 денари месечно.„Ќе правиме реална проценка. Според мене, таму киријата треба да биде најмалку 2.000 евра. Не е виновен тој што плаќа, туку тој што дозволил така да се користи просторот“, истакнува Ѓорѓиевски, додавајќи дека ваквата пракса е дел од наследената состојба со која актуелното раководство мора да се соочи.Тој порачува дека целта е да се воспостави ред, одговорно управување и заштита на јавниот интерес, но и дека решавањето на штетните договори мора да се прави внимателно, за Град Скопје да не се соочи со уште поголеми финансиски штети.

Скопје | пред 1 месец

Четири функционери на пат да останат без функциите во ВМРО-ДПМНЕ оти Мицкоски планира да ги укине потпретседателските позиции

Претседателот на ВМРО-ДПМНЕ, Христијан Мицкоски планира укинување на потпретседателските места во партијата, а пак генерален секретар, неофицијално, ќе остане Ѓорѓија Сајковски кој и досега ја обавува оваа функција, дознава „Скопје1“.Ова се промените во владејачката партија кои се очекува во петок да се најдат пред Централниот комитет. Мицкоски и на прес-конференција кажа дека седницата на ова партиско тело е веќе закажана.Освен Сајковски, желба да бидат во трката, но и да бидат избрани за секретарската функција има и Ивица Томовски, кој е директор на Службата за општи и заеднички работи.Според партискиот статут, претседателот Мицкоски номинира кандидати за потпретседатели и генерален секретар на партијата, како и предлага нивно разрешување.Укинувањето на потпретседателските функции ќе значи дека Александар Николоски, Владо Мисајловски, Тимчо Муцунски, Гордана Димитровска Кочовска ќе останат без нивните позиции.Засега овие информации не се потврдени од партијата, ниту коментирани во јавноста.

Македонија | пред 1 месец

„Лајка“ добива нови капацитети и современи услови

Градоначалникот на Град Скопје, Орце Ѓорѓиевски, најавува проширување на капацитетите на ЈП Лајка, оценувајќи дека конечно започнува хумано, одговорно и системско решавање на проблемот со бездомните кучиња во главниот град.Ѓорѓиевски посочува дека во минатото „Лајка“ била користена за партиски вработувања, додека суштинскиот проблем со бездомните животни со години бил игнориран. Според него, последиците од таквиот пристап ги чувствуваат и граѓаните и самите животни, кои остануваат без соодветна заштита, услови и грижа.Тој информира дека во рамки на програмата на Градот се обезбедени 30 милиони денари за сериозно проширување на капацитетите на претпријатието и за создавање современи и хумани услови за згрижување на бездомните кучиња. Како што нагласува, ова претставува суштинска промена која треба да донесе видливи и трајни резултати.Градоначалникот признава дека забелешките на граѓаните се оправдани, нагласувајќи дека проблемот со години се зголемува наместо да се решава. Токму затоа, според него, сега се пристапува сериозно, одговорно и со јасна визија за негово надминување.Истовремено, Ѓорѓиевски порачува дека нема да се дозволи Скопје да стане депонија за бездомни кучиња од други градови. Прашањето за нивно носење во главниот град, како што вели, веќе е отворено со надлежните институции, а со воведувањето на системот „Безбеден град“ ќе се откриваат и санкционираат сите кои несовесно ги префрлаат животните во Скопје.Тој апелира до граѓаните активно да соработуваат и да пријавуваат вакви појави, истакнувајќи дека само со заедничка акција може да се воспостави ред и функционален систем. Според најавите, во наредниот период започнува конкретна постапка за проширување на капацитетите на „Лајка“, со што ќе се обезбедат простор, ветеринарна грижа и достоинствен третман за бездомните кучиња.„Тие се живи суштества кои заслужуваат заштита и шанса за подобар живот“, порачува Ѓорѓиевски, нагласувајќи дека проблемот со бездомните кучиња ќе се решава со работа, инвестиции, ред и вистинска грижа, а не со празни ветувања.

Скопје | пред 1 месец

Над 2 милиони евра се платени на некој што имплементирал нефункционален систем во ЈСП, рече Ѓорѓиевски

Градоначалникот на Град Скопје, Орце Ѓорѓиевски, на седница на Град Скопје изјави дека над два милиони евра се исплатени на субјект кој имплементирал нефункционален систем во Јавно сообраќајно претпријатие Скопје, нагласувајќи дека токму поради тоа претпријатието со години трпи сериозни финансиски загуби.Според Ѓорѓиевски, најголем дел од загубите во ЈСП настануваат поради ненаплата на билети, што директно произлегува од нефункционалниот систем кој, како што вели, мора целосно да се замени. Тој посочува дека во моментов состојбите во претпријатието постепено се нормализираат и дека се работи на воспоставување поефикасно и одржливо функционирање.Во текот на расправата, градоначалникот е прашан од советничка како е можно Ленин Јовановски да биде ангажиран како надворешен консултант во ЈСП, а советничката на Левица го нарече „кралот на приватните привозници“. На тоа, Ѓорѓиевски одговара дека не му е познато за кого станува збор и дека нема сознанија дека таква одлука е донесена од страна на директорот на претпријатието.

Скопје | пред 1 месец

По години чекање, Скопје за еден месец ќе почне со изградба на Луна паркот: се бара и враќање на парите за старите реквизити

Градоначалникот на Град Скопје, Орце Ѓорѓиевски, информира дека тендерската постапка за изградба на Луна паркот влегува во финална фаза и дека неговите очекувања се во рок од 30 до 40 дена да започнат градежните активности на терен.Според Ѓорѓиевски, станува збор за проект кој со години е меѓу најбараните од граѓаните, а кој конечно треба да добие реализација. Тој нагласува дека изградбата на Луна паркот ќе претставува значаен чекор во збогатувањето на јавните содржини и простори за деца и семејства во главниот град.Паралелно со подготовките за новиот проект, градоначалникот посочува дека сериозен правен тим работи и на расчистување на состојбите околу претходната набавка на реквизити за Луна паркот. Како што вели, уште во минатото комисии утврдиле дека квалитетот на набавените реквизити бил незадоволителен, но институционална реакција тогаш изостанала.„Верувам дека ќе има правна разрешница, со цел да се вратат парите на Градот за реквизитите набавени во минатото, а кои ниту едно дете ги нема видено во Градот“, истакнува Ѓорѓиевски, додавајќи дека одговорноста за ваквите пропусти мора да биде утврдена.Со најавата за почеток на градежните работи и со отворањето на правните постапки, градските власти порачуваат дека Луна паркот не само што ќе стане реалност по долгогодишни најави, туку и дека ќе се направи обид да се исправат претходните неправилности и да се заштитат интересите на граѓаните и на буџетот на Град Скопје.

Скопје | пред 1 месец

ЕБОР го откочи БРТ: Скопје оди кон набавка на 130 автобуси, наместо најавените 80 - дел ќе стигнеле и до крајот на годината

Градоначалникот на Град Скопје, Орце Ѓорѓиевски, изјавува дека наместо првично најавените 80, за Скопје ќе бидат набавени вкупно 130 нови автобуси. Тој информира дека утрово пристигнува писмо од ЕБОР со кое конечно се откочува проектот за брзиот автобуски превоз БРТ и неговата изградба.„Наместо 80 автобуси, ќе бидат набавени 100 автобуси. Од ЕБОР утринава стигна писмо со кое конечно се откочува проектот со БРТ и изградба на истиот“, вели Ѓорѓиевски, додавајќи дека обврска на Градот е да формира проектна единица и да изврши измена на планот за јавни набавки.Покрај 100-те автобуси кои ќе ги обезбеди Влада на Република Македонија за Скопје, градоначалникот најавува дека преку БРТ-проектот ќе се обезбедат уште најмалку 30 автобуси за градот. „За брзо ќе ја започнеме постапката за тоа. Сега ќе бидат 130 автобуси, иако сум ветувал 80 автобуси“, посочува тој.Според информациите со кои располага, набавката најверојатно ќе се реализира по моделот влада со влада, што, како што вели, ќе ја забрза испораката. Во однос на роковите, Ѓорѓиевски нагласува дека најголемиот дел од автобусите треба да бидат испорачани во текот на оваа година, но не може да гарантира дека сите 100 од првата набавка ќе пристигнат до крајот на годината.„Во најголем дел автобусите ќе треба да бидат испорачани оваа година. Но дали сите 100 ќе стигнат оваа година, не можам да гарантирам – не го правам јас тоа“, изјавува градоначалникот, додавајќи дека динамиката ќе зависи од постапките и од партнерите вклучени во набавката.Со оваа најава, како што оценува Ѓорѓиевски, јавниот превоз во Скопје влегува во фаза на значително засилување, при што се комбинираат директна владина поддршка и долгорочно решение преку БРТ-системот.

Скопје | пред 1 месец

Документите за транспортираните мозоци во САД можеби и не се чуваат во целост, вели Алиу кој не верува дека има злоупотреби при извозот кон САД

Министерот за здравство Азир Алиу изјавува дека е побарана детална анализа на сите достапни податоци поврзани со случајот во кој мозоци на починати македонски државјани со психијатриска дијагноза биле транспортирани како чекиран багаж на комерцијални летови во САД и Канада за медицински истражувања.„Барав да ги анализираат податоците поврзани со случајот. Ние не сме надлежни за истражувањата, бидејќи станува збор за истражувачки проект. Секој проект почнува со меморандум. Ние сме надлежни да дадеме дозвола за извоз или увоз на материјал од страна на некоја наша институција и токму во тој дел се фокусираме“, вели Алиу.Тој појаснува дека случајот датира од пред околу 30 години, период во кој, како што нагласува, не постоела Агенцијата за лекови и медицински средства, туку дозволите за ваков вид активности ги издавало директно Министерство за здравство. Според него, токму поради временската дистанца не треба да се брза со информации и заклучоци.Алиу оценува дека постои многу мал простор за злоупотреби, особено имајќи предвид дека, како што вели, втората држава вклучена во процесот е САД, а институцијата која го спроведувала истражувањето е престижен универзитет со научници со светска репутација.„Почнувајќи од себеси, не верувам дека таа држава, таа лабораторија или тој универзитет би дозволиле незаконски внес на материјал“, истакнува министерот.Тој додава дека од работната група конкретно побарал да утврди како бил испратен материјалот и по кои процедури, со цел да се добие јасна и документирана слика за целиот процес.Во однос на документацијата, Алиу укажува дека и според стариот и според новиот закон, постои реална можност дел од документите да не бидат достапни. „Ако земеме предвид дека станува збор за документи стари 30 години, страв ми е дека институциите можеби и ги немаат сите документи“, вели тој, објаснувајќи дека според старите законски решенија документацијата за изнесување биолошки материјал се чувала 15 години, додека според новите законски одредби рокот е 25 години.Министерот потенцира дека јавноста ќе биде информирана откако работната група ќе ги заврши анализите.

Македонија | пред 1 месец

Мицкоски за случајот со транспортираните мозоци: Да почекаме истрагата и Обвинителството да дадат одговор

Премиерот Христијан Мицкоски изјави дека нема јавно да коментира додека не добие поконкретни информации во врска со објавите дека мозоци на починати македонски државјани со психијатриска дијагноза биле транспортирани како чекиран багаж на комерцијални летови во САД и Канада за медицински истражувања.„Не би коментирал јавно додека не добиеме поконкретно. Ова е состојба која се случувала пред неколку децении. Да оставиме истрагата и Обвинителството да дадат одговор на многу прашања“, рече Мицкоски.Во одделна изјава, одговарајќи на прашање што очекува од новиот јавен обвинител кој допрва треба да биде избран, Мицкоски истакна дека приоритет мора да биде расчистување на сите случаи кои со години биле запоставени.„Прво што треба да направи е сите оние документи и случаи кои стоеле во фиока да се истражат. Каде што има дело и докази – да има случај, каде што нема – да се затвори“, изјави премиерот.Тој додаде дека од идниот јавен обвинител очекува да биде „заштитник на правото, генератор на правда и правдина“.

Македонија | пред 1 месец

(Видео) Мицкоски најави жесток одговор за заканите и нарушувањето на јавниот ред на протестите организирани од тие кои немаат возачки дозволи

Премиерот Христијан Мицкоски изјави дека побарал решителна и силна реакција од полицијата за сите кои го прекршиле законот, упатувале јавни закани и го загрозиле мирот и безбедноста на граѓаните за време на вчерашните протести поврзани со одземањето на возилата на лица кои управувале без возачка дозвола.„Разговарав утрово со министерот за внатрешни работи. Тоа што го побарав од него е оној кој го прекршил законот, јавно упатил закани, го загрозил мирот и безбедноста на граѓаните – жестоко да се одговори. И ќе се одговори за да не се повтори тоа дивеење вчера што се случи“, рече Мицкоски.Изјавата на премиерот доаѓа по серијата протести и блокади на патишта, при што дел од демонстрантите палеа и гуми и отпад и влегуваа во вербални конфликти со полициските службеници. Протестите се реакција на примената на измените на Законот за прекршоци, со кои е предвидено задолжително одземање на возилата на лица затекнати како управуваат моторно возило без положен возачки испит.

Настани | пред 1 месец

(Видео) „Ми земаа кола 700 евра! Да ми се врати оти со пет деца во шупа живеам“, протест на патот Битола-Охрид оти сакаат да возат без возачки

Социјалниот револт поради одземањето на возилата на лица кои управуваат без возачка дозвола кулминираше на патот Битола–Охрид, каде демонстрантите јавно ги изнесуваат своите лични приказни и причини за протестот.„Ние сме од Битола, ние сме од нашите, некои немаме возачки. Денеска ми земаа 700 евра кола. Пет деца имам, во шупа живеам. Кај да одиме?“, вели еден од демонстрантите, објаснувајќи дека возилото за него не е луксуз, туку единствено средство за преживување.Тој директно ги поврзува протестите и блокадите со последните законски измени со кои се предвидува задолжително одземање на возила управувани без возачка дозвола. „Гледај сега што направи претседателот со ова. Е сега гледај ние што правиме. Прилеп, Ресен, Битола – сѐ е блокирано. Уште 2000 души доаѓаат“, изјавува демонстрантот, нагласувајќи дека протестите се шират и дека незадоволството расте.Во неговото обраќање доминира чувството на социјална безизлезност. „Без возачки што беа луѓето трпат за леб. Греотичка сме, кај да најдеме леб? Овде што сме ние, немаме возачки. Ни даваат по 50 евра социјално“, вели тој, додавајќи дека барањето е едноставно и директно: „Колата да ми се врати“.Ваквите сведоштва ја отсликуваат атмосферата на протестите, каде што законските мерки за зголемување на безбедноста во сообраќајот се судираат со длабоки социјални проблеми и сиромаштија. Демонстрантите порачуваат дека за нив возилото претставува основно средство за егзистенција, а не прекршок од кој може лесно да се откажат, додека институциите најавуваат дека законот ќе се применува без исклучоци.

Настани | пред 1 месец

(Видео) Протест во Штип поради одземање возила: запален оган и тензии со полицијата

Граѓани од ромската заедница протестираат во Штип, каде што палат оган на јавна површина. Причината за протестот, како што посочуваат, е одземањето на возилата на дел од нив поради управување без возачка дозвола, мерка што произлегува од новите законски одредби.На местото е повикана и пристигнува Противпожарна екипа, но демонстрантите не дозволуваат пристап за гаснење на огнот. Повеќе од 20 минути трае расправија меѓу учесниците на протестот и полициските службеници, по што полицијата повикува и засилување.Демонстрантите тврдат дека мерката е неправедна и дека им се одземаат возилата, иако ги управуваат без возачка дозвола, поради што извикуваат „бараме правда“. Атмосферата е напната, а огнот сè уште гори.Полициските службеници се обидуваат да им укажат дека палењето оган претставува опасност и дека истиот мора итно да биде изгаснат, но демонстрантите продолжуваат да одбиваат соработка. Засега нема официјални информации за приведени лица, но од надлежните се очекува постапување согласно законот.

Настани | пред 1 месец

(Фото) И во Кочани протест оти им ги одземаат возилата на тие кои немаат возачка

Поради новиот закон за одземање возила управувани без возачка дозвола, попладнево во кочанската населба Трајаново Трло беше одржан протест, кој се одвиваше на улицата „Цветан Димов“ во Кочани. Како израз на револт, демонстрантите запалија гуми, при што настанаа чад и краткотрајна блокада на улицата.По кратка, но тензична интервенција, на терен излегоа пожарникарски екипи и полициски службеници, кои го изгаснаа огнот и го прекинаа собирот, со цел да се спречи понатамошна ескалација и загрозување на безбедноста на граѓаните.Од надлежните институции се очекува соодветно постапување, имајќи предвид дека ваквиот начин на искажување незадоволство, со палење гуми и нарушување на јавниот ред и мир, претставува кривично дело според важечките закони. Засега нема официјални информации за приведени лица или за дополнителни мерки, но институциите најавуваат дека ќе реагираат согласно законските надлежности.

Македонија | пред 1 месец

(Видео) Одземањето на возила на тие кои немаат возачки донесе блокирање на патот Битола-Охрид со запален отпад

Со палење пластика и ѓубре, група граѓани од ромската заедница организираа протест и го блокираа регионалниот пат Битола–Охрид, поради што сообраќајот беше привремено прекинат. Протестот беше проследен со извици „нема правда, нема мир“ и „бараме правда“, а чад од запалениот отпад се забележуваше и од поголема оддалеченост.Според неофицијални информации, причината за протестот е одземањето на возилата на лица кои управувале без положен возачки испит, мерка што стапи во сила со последните измени на Законот за прекршоци. Дел од присутните јавно негодуваа поради, како што велат, високата вредност на одземените автомобили, а на една од снимките од настанот се слуша извикување „5.000 евра кола ми земавте“.Присутните се жалеа на дискриминација, објаснувајќи дека тие немаат завршено училиште за да полагаат за возачка.На местото на протестот биле присутни и полициски службеници, кои ја следеле состојбата. Засега нема официјална информација за приведени лица или за времетраењето на блокадата, ниту пак за евентуални понатамошни мерки.

Настани | пред 1 месец