(Видео) „Марш на ангелите“ во Скопје, родителите со порака со сите граѓани

В сабота на 15. ноември, родителите на жртвите во пожарот во кочанската дискотека „Пулс“ најавија дека уште еден протестен „Марш на ангелите“, кој наместо во Кочани ќе го одржат во Скопје.Почетокот на маршот е закажан за 12:05 часот на плоштадот „Македонија“, од каде што ќе продолжи пред Собранието и пред Основниот кривичен суд Скопје.Во видео објавено на инстаграм-профилот на иницијативата „Кој е следен“, неколкумина од родителите на загинатите во пожарот порачаа дека болката е нивна, но борбата мора да биде заедничка.„Нашите деца умреа на 16 март. Шеесет и три деца кои никогаш повеќе нема да ги видиме. Не бараме од вас милост, бараме да ни се придружите во борбата за правда, затоа што нашите деца го заслужуваат тоа. Маршираме за вистината. Болката е наша, но борбата е за сите нас. Ни треба ваша поддршка“, порачаа родителите во видеопораката.

Македонија | пред 6 месеци

(Видео) Вучиќ им се јавил на Дијана Хрка и Угљеша Мрдиќ: „Се надевам дека ќе го прекинат штрајкот со глад“

Претседателот на Србија, Александар Вучиќ, утрово телефонски разговарал со Дијана Хрка и Угљеша Мрдиќ – двајцата активисти кои веќе со денови штрајкуваат со глад во зградата на српското Собрание.„Разговарав со Дијана и со Угљеша. Ги замолив да го прекинат штрајкот и ја поканив госпоѓата Хрка на состанок во претседателството. Сите добри луѓе во Србија се загрижени за нивното здравје, се молам и се надевам дека ќе донесат одлука да запрат“, изјави Вучиќ.Од неговиот кабинет засега не откриваат дали Хрка го прифатила повикот, ниту кога би можел да се одржи состанокот. Според српските медиуми, состојбата на штрајкувачите е влошена, а медицински екипи се во постојана готовност пред парламентот.Како што пишуваат, пак, српските медиуми, можно е средба меѓу нив и претседателот да се одржи во текот на денот.

Свет | пред 6 месеци

МОН: Повеќе од 12 милиони евра од буџетот за науката во Македонија

Министерството за образование и наука оваа календарска година преку три повици за распределба на средства ја стимулираше реализацијата на научно – истражувачки проекти на јавните универзитети, факултети и научни установи, на МАНУ и бизнис заедницата, кои се во корелација со целите од Стратегијата за паметна специјализација на Македонија. Проектите успешно се реализираат, се наведува во денешното соопштение.Науката е столб на општествениот развој и затоа во 2026 година буџетот за наука ќе изнесува 773 милиони денари со кои продолжува финансирањето на научно – истражувачки проекти, за развој на лабораториските ресурси, за учество на меѓународни научни конференции и организирање на домашни, објавување на научни трудови во списанија со импакт фактор, доделување стипендии за млади научници, стипендии за втор и трет циклус на студии во државата, како и организирање на научни и студиски престои во странство.Велат дека посебно радува зголемениот интерес кај младите да се занимаваат со наука и иновации, што се огледува преку искористување на мерките кои МОН ги става на располагање, така што, заедно со другите надлежни владини институции продолжуваме да ги поддржуваме во реализација на личните амбиции.

Македонија | пред 6 месеци

Историски потег: Сириски лидер во Белата куќа за првпат по 80 години, Трамп го пречека претседателот Ал-Шараа

Сирискиот претседател Ахмед ал-Шараа денес пристигна во Вашингтон, каде што ќе има средба со американскиот претседател Доналд Трамп во Белата куќа – историски настан, бидејќи ова е прва официјална посета на сириски лидер во САД откако земјата ја стекна независноста во 1946 година.Главната тема на разговорите, според медиумите, ќе биде укинувањето на преостанатите санкции кон Сирија, која се обидува да закрепне по тринаесетгодишната граѓанска војна. Весникот The Guardian објави дека Дамаск ќе побара целосно укинување на економските ограничувања што останаа на сила и по падот на поранешниот претседател Башар ал-Асад.Ал-Шараа, кој дојде на власт минатата година откако неговите сили го соборија режимот на Асад, се обидува да го убеди Вашингтон дека санкциите го забавуваат закрепнувањето на земјата и дека повеќе немаат оправдување. Неговиот советник Ахмад Зејдан за саудиската телевизија „Ал Арабија“ изјави дека приоритет на преговорите е укинувањето на Законот Цезар од 2019 година, со кој беа воведени строги санкции за кршење на човековите права од страна на поранешниот режим.Трамп, кој со сирискиот претседател се сретна првпат во мај во Ријад, уште тогаш го опиша како „млад и привлечен човек, цврст борец со силно минато“. По таа средба, американскиот претседател укина дел од санкциите, што беше голем пресврт во американската политика кон Сирија.Сепак, Законот Цезар останува во сила и неговото трајно укинување ќе бара одобрение од Конгресот. САД минатата недела предводеа иницијатива во Советот за безбедност на ОН со која беа укинати и санкциите против самиот ал-Шаара.Поранешниот командант на бунтовничките сили, кој некогаш беше на американската потерница со награда од 10 милиони долари, во последните месеци се обидува да ја претстави својата влада како отворена и подготвена за соработка со Западот. Во септември тој се обрати пред Генералното собрание на ОН – прв сириски лидер што го направил тоа по повеќе децении.„Имаме огромна задача – да ја изградиме економијата одново“, изјави тогаш ал-Шараа. „Сиријците сакаат да работат, тоа им е во природата. Само укинете ги санкциите и резултатите ќе ги видите сами.“ Според проценките на Светската банка, обновата на земјата ќе чини најмалку 216 милијарди долари.Портпаролот на Стејт департментот, Томи Пигот, потврди дека владата на ал-Шараа ги исполнува барањата на САД – меѓу кои соработка во потрагата по исчезнатите американски државјани и елиминација на преостанатото хемиско оружје. „Овие чекори се доказ за напредокот што го постигна новото раководство по повеќе од половина век репресија“, рече Пигот.

Свет | пред 6 месеци

Нов бран студентски протести се подготвува, но фокусот сега е на Дијана Хрка

Студентските блокади низ Србија продолжуваат да бидат симбол на отпорот против власта, но и покрај плановите за нов бран протести, акциите засега се одложени. Причината, велат студентите, е поддршката што во моментов ѝ ја даваат на Дијана Хрка, мајката на трагично загинатиот Стефан Хрка, која веќе неколку дена штрајкува со глад пред Собранието во Белград.„Имаме подготвен план за нови протести и ништо не е стопирано, само сме се пренасочиле на нешто што сега е поважно – да ѝ помогнеме на Дијана и да ја поддржиме во нејзината борба“, велат студентите од Универзитетот во Нови Сад.Иако за ноември биле предвидени неколку поголеми собири, тие се одложени до понатамошно известување. Како можен датум за следниот протест се споменува 29 ноември – денот кога минатата година започнаа блокадите на факултетите.Покрај барањето за предвремени парламентарни избори, студентите веќе подготвуваат и политичка програма и заеднички настап. „Списокот е готов, а сега ја оформуваме платформата која ќе ги обедини сите универзитети“, појаснуваат тие.Претставниците од Белград и Нови Сад истакнуваат дека конечна изјава или потврда за следните акции ќе има дури откако сите пленуми ќе се усогласат. „Нема одмор, нема пауза, само внимателно ги координираме чекорите. Хоровите се состануваат секојдневно, а наскоро ќе излеземе со заеднички план“, велат студентите.„Ќе има протести – тоа е сигурно. Само сакаме сите да застанеме зад ист датум и ист настап. Нашите барања остануваат исти, борбата продолжува“, додаваат тие.Последниот голем собир се одржа на 1 ноември во Нови Сад – датум што студентите го избраа во спомен на уривањето на настрешницата на железничката станица. На митингот учествуваа студенти од сите делови на Србија, меѓу кои и група од Нови Пазар кои пешачеа 16 дена за да пристигнат.Веднаш по митингот, Дијана Хрка започна штрајк со глад, што повторно ги обедини студентите, средношколците и граѓаните пред Собранието – во време кога Српската напредна партија одржуваше свој паралелен собир.

Свет | пред 6 месеци

Мечка нападнала маж додека собирал печурки кај Рилево

Возрасен маж од селото Рилево, во општина Долнени, вчера утрината бил тешко повреден откако бил нападнат од мечка додека собирал печурки во атарот на селото.Инцидентот се случил околу 10 часот, а брзо по нападот човекот бил забележан од група ловџии кои веднаш му притрчале на помош.Повредениот бил пренесен во прилепската болница, а поради сериозноста на повредите, подоцна бил транспортиран на скопските клиники.Според првичните информации, ова е редок инцидент во овој регион, а локалните жители велат дека мечки во последно време сè почесто се спуштаат во близина на населените места во потрага по храна.

Македонија | пред 6 месеци

„Корумпирани новинари“: Трамп го нападна раководството на Би-Би-Си по скандалот со фалсификуван говор

Американскиот претседател Доналд Трамп остро ги нападна новинарите на британската телевизиска мрежа „Би-Би-Си“, нарекувајќи ги „корумпирани“, откако двајца од највисоките функционери на медиумот поднесоа оставки поради контроверзна монтажа на еден од неговите говори.Во објава на неговата социјална мрежа Truth Social, Трамп напиша дека „највисоките луѓе во Би-Би-Си, вклучувајќи го и директорот Тим Дејви, сите си заминуваат бидејќи беа фатени како го ‘фалсификуваат’ мојот совршен говор од 6 јануари“. Тој им се заблагодари на новинарите од весникот „Телеграф“ за, како што рече, „разоткривањето на корумпираните новинари“, обвинувајќи ги дека се обиделе да влијаат врз претседателските избори во САД. „Тоа се нечесни луѓе од странска земја што многумина ја сметаат за наш најголем сојузник. Ужасна работа за демократијата!“, додаде Трамп.Скандалот што го откри британскиот весник „Дејли телеграф“ се однесува на документарецот на „Би-Би-Си“ емитуван само една недела пред претседателските избори во ноември 2024 година. Телевизијата била обвинета дека во прилогот „Панорама“ направила монтажа на делови од говорот што Трамп го одржа на 6 јануари 2021 година, така што се добивал впечаток дека тој директно ги повикува своите приврзаници да маршираат кон Капитол и да „се борат како ѓаволи“.По бурните реакции во јавноста, генералниот директор на „Би-Би-Си“ Тим Дејви и извршната директорка на информативната програма Дебора Тернес поднесоа оставки. Тие се соочија со жестоки критики дека прилогот ги довел гледачите во заблуда и дека направената монтажа сериозно ја нарушила довербата во уредувачката политика на медиумот.Во својата писмена оставка, Дејви нагласи дека одлуката ја донел сам, по две децении работа во јавниот сервис, и дека останува благодарен на Управниот одбор за поддршката што ја добивал во текот на мандатот.„Размислував за големите лични и професионални предизвици што ги носи оваа позиција, особено во овие турбулентни времиња. Би-Би-Си има посебна улога во британското општество — ја поттикнува толеранцијата, љубопитноста и отвореноста. Секако, не сме совршени и мора да бидеме транспарентни и одговорни“, напиша тој.Дејви додаде дека иако дебатата околу уредувањето на вестите не е единствената причина, таа несомнено влијаела врз неговата одлука. „Би-Би-Си во целина работи добро, но имаше и грешки. Како генерален директор, должност ми е да ја преземам крајната одговорност“, заклучи тој.

Свет | пред 6 месеци

Ќе заврши ли конечно најдолгата блокада на САД, сенаторите постигнаа привремен договор

Американските сенатори во неделата постигнаа привремен договор за прекин на рекордната блокада на буџетот што ги парализираше дел од јавните служби цели 40 дена, пренесуваат неколку американски медиуми.Според информациите на телевизиите CNN и Fox News, републиканците и демократите во Сенатот се усогласиле за финансирање на федералната влада до јануари. Предлогот веднаш бил ставен на гласање, очигледно со доволна поддршка од демократските сенатори, по што ќе биде испратен до Претставничкиот дом. Доколку таму биде одобрен, документот ќе оди на потпис кај претседателот Доналд Трамп.Со овој договор, според оценките, се прави важен чекор кон нормализирање на состојбата, имајќи предвид дека воздушниот сообраќај и исплатите на социјалните надоместоци се сериозно нарушени, а стотици илјади државни службеници од 1 октомври се на принуден одмор или работат без плата.„Можеме да кажеме дека се приближуваме кон крајот на блокадата на владата“, изјави Трамп, кој се врати во Белата куќа по викендот минат во неговата приватна резиденција во Флорида.Договорот треба да овозможи повторно исплаќање на социјална помош за 42 милиони граѓани, враќање на работа на илјадници државни службеници и исплата на нивните плати, како и гласање за продолжување на програмата за здравствено осигурување која истекува на крајот на годината.Лидерот на демократите во Сенатот, Чак Шумер, изрази жалење што прашањето за здравствената заштита било само делумно разгледано, а не целосно одобрено. „Таа борба ќе мора да продолжи“, рече тој во обраќањето пред Сенатот.Поради буџетската парализа што го погоди системот за контрола на летање, во неделата во САД беа откажани над 2.700 летови, а околу 10.000 беа одложени, според податоците на FlightAware. Најмногу проблеми имале аеродромите Њуарк и Ла Гвардија во Њујорк, О’Хара во Чикаго и Хартсфилд-Џексон во Атланта.Министерот за транспорт Шон Дафи предупреди дека доколку блокадата продолжи, состојбата би можела дополнително да се влоши со приближувањето на Денот на благодарноста. „Авионските патувања ќе бидат сведени на минимум бидејќи сите ќе сакаат да отпатуваат за да ги посетат своите семејства“, рече Дафи.И по завршувањето на блокадата, ќе бидат потребни неколку дена за целосна стабилизација на воздушниот сообраќај и обновување на редовното финансирање, вклучително и исплатата на платите на федералните вработени.

Свет | пред 6 месеци

Обилни дождови, но топло, температурта во Скопје до 17 степени

Целата територија на Македонија денеска ќе биде во жолта предупредувачка фаза поради очекуваните обилни и поројни врнежи од дожд кои локално ќе бидат проследени со појава на грмежи и засилен ветер од јужен и од југоисточен правец. Локално ќе наврне поголемо количество на воден талог за 24 часа (над 30 литри на метар квадратен дожд). Токму поради ова можни се  и локални поројни поплавувања.Според УХМР во за изминатите 24 часа до 07 часот во најмногу дожд наврнало:42 литри на метар квадратен во Струмица, 36 Гевгелија, 30 Пожар-Радовиш, 29 Претор, 26 Битола, 24 Крушево, 23 Тополчани, 18 Попова Шапка, Маврови Анови, 17 Прилеп, 16 Демир Капија, 15 Берово, 14 Пожаране, Виница, 12 Тетово, 10 Штип, Ѓуриште, 9 Лазарополе, Кавадарци, Крива Паланка, Кавадарци, Велес, 8 Скопје–Петровец, Куманово, 6 Скопје-Зајчев Рид.Сето ова е поради влијанието на серијата на влажни воздушни бранови од Медитеранот кои кај нас условуваат да имаме обилни и поројни врнежи од дожд.МИНИМАЛНА ТЕМПЕРАТУРА (ВО оС):6 Крушево, Маврови Анови, Лазарополе, 8 Претор, 9 Берово, Крива Паланка, Прилеп, Битола, 10 Тетово, 11 Скопје–Петровец, Скопје–Зајчев Рид, Кавадарци, Виница, Куманово, 12 Велес, Штип, 13 Гевгелија, Струмица, 14 Демир Капија.ВРЕМЕТО ДЕНЕСКАПретежно облачно со повремени врнежи од дожд. Наместа врнежите ќе бидат поројни и пообилни (над 30 l/m² за 24 часа) со услови за појава на грмежи. Ќе дува слаб до умерен ветер претежно од јужен правец.Максималната температура ќе биде во интервал од 14 до 18 степени.Во Скопје, претежно облачно со повремени врнежи од дожд, пообилни попладне. Ќе дува слаб до умерен ветер од југоисточен правец. Максималната температура ќе достигне до 17 степени.

Скопје | пред 6 месеци

(Видео) Скопскиот татко по 72 часа мандат: Собрано петпати повеќе ѓубре од тоа што вообичаено се собира за викенд

Во првите 72 часа откако ја презеде функцијата градоначалник на Град Скопје, Орце Ѓорѓиевски спроведе голема акција за чистење на главниот град, во која биле собрани повеќе од 4.500 тони отпад.Во акцијата учествувале над 2.500 работници, а биле исчистени речиси сите микролокации со контејнери и диви депонии, како и речното корито на Вардар, кое, според градоначалникот, „по долги години конечно тече нормално“.„Плоштадот ‘Македонија’ е исчистен, кејот беше целосно третиран, исто како и Градскиот парк, Жена парк и сите останати места кои во минатото беа симбол на срам за градот. Нема да дозволам повторно да ја гледаме грдата слика на валкано Скопје“, изјави Ѓорѓиевски вечерва на плоштадот, по завршувањето на акцијата.Според податоците од Град Скопје, во текот на првите три дена биле изречени повеќе од 40 казни и 70 опомени за физички и правни лица кои несоодветно го одлагаат отпадот.Градоначалникот најави дека контролите ќе продолжат, а сите кои ќе фрлаат смет на јавни површини ќе се соочат со санкции.„Ова е само почеток на создавањето ново лице на Скопје – чисто, достоинствено и европско“, порача Ѓорѓиевски.

Скопје | пред 6 месеци

(Видео) Родителите на загинатите од „Пулс“ со повик до цела јавност, доаѓаат во Скопје четири дена пред првото судење

Низ солзи и со длабока болка, родителите на трагично загинатите млади во пожарот во дискотеката „Пулс“ најавија голем граѓански марш во Скопје, закажан за 15 ноември во 12:05 часот — четири дена пред почетокот на првото судење за случајот.Маршот ќе започне од Плоштад Македонија, ќе продолжи пред Собранието, а ќе заврши пред Основниот кривичен суд, каде што родителите ќе бараат од институциите конечно да преземат одговорност и да обезбедат правда за нивните деца.„Болката е наша, но борбата мора да биде заедничка. Нашето прво доаѓање во Скопје беше крик за видливост. Тогаш марширававме сами, додека градот молчеше. Сега ве повикуваме сите да дојдете — без посредници, без лаги, без манипулации. Ние сме родителите на ангелите и за нас единствено што остана е борбата за правда,“ порачаа родителите во своето обраќање.Тие потсетија дека во изминатите месеци одржале повеќе од триесет маршеви во Кочани, но додаваат дека „тоа не било доволно за да ги разбуди институциите“.„Свесни сме дека патот до вистината ќе биде долг и тежок, исполнет со отпор и искривени намери. Но ако застанеме еден до друг, системот нема да има друг избор освен да постапи онака како што бара народот. Веруваме дека Македонија има совест, дека знае да се сплоти кога најмногу боли,“ велат тие.Маршот на 15 ноември ќе биде, како што родителите нагласуваат, „повик на совеста, а не на политиката“, симбол на сплотеност и отпор против неправдата која трае повеќе од една година.„Се гледаме на маршот,“ завршуваат родителите.

Македонија | пред 6 месеци

Бугарија во трка со времето за спас на нафтените рафинерии пред стапување на сила на американските санкции

Романија и Бугарија се наоѓаат во драматична трка со времето во обид да спречат затворање на своите клучни нафтени рафинерии, откако американските санкции кон руските компании „Лукоил“ и „Роснефт“ треба да стапат на сила во текот на овој месец, пишува Politico. Одлуката на Вашингтон да ги стави двете компании на „црната листа“ предизвика вистински хаос во рамките на Европската Унија, каде што овие руски гиганти поседуваат голем број објекти и имаат силно влијание врз снабдувањето со гориво.Бугарија веќе презема вонредни мерки — парламентот во Софија усвои закон кој ѝ овозможува на владата да назначи специјален управител со широка контрола врз најголемата рафинерија во земјата, „Бургас“, која е во сопственост на „Лукоил“. Владата ќе може да преземе оперативна контрола, да ја одобри продажбата, па дури и да ја национализира рафинеријата, доколку тоа биде потребно. Паралелно, Бугарија разгледува можност да побара ослободување од санкциите.Во Романија, каде што се наоѓа рафинеријата „Петротел“, исто така под сопственост на „Лукоил“, сè уште нема донесена официјална одлука. Висок владин функционер за Politico изјавил дека Букурешт размислува да побара „продолжување на рокот на санкциите“ за да има време да подготви сопствен план. Национализацијата, според него, се разгледува само како „последна опција“.Министерот за енергетика Богдан-Груја Иван изјави дека владата е подготвена за секое сценарио, а приоритет ќе биде „зачувување на економската стабилност, но и запирање на финансирањето на Руската Федерација“. Министерството за финансии на САД, кое мора да одобри секоја продажба на санкционирани компании, како и Европската комисија, одбија да ја коментираат ситуацијата.Санкциите, освен на Бугарија и Романија, влијаат и врз други земји-членки на ЕУ. Германија доби шестмесечно ослободување за својата рафинерија „Шведт“ во сопственост на „Роснефт“, која е под државна контрола уште од 2022 година. Унгарскиот премиер Виктор Орбан, пак, отпатува во Вашингтон во обид да издејствува исклучок за увоз на руска нафта преку цевководи кон Унгарија и Словачка.Одлуката на Вашингтон доаѓа во момент кога претседателот Доналд Трамп е сè понетрпелив поради застојот во мировните преговори за Украина, а и самата Европска Унија последните месеци ја засили кампањата за намалување на енергетската зависност од Москва.Според аналитичарите, евентуално запирање на работата на рафинериите би имало драматични последици. Во Бугарија, каде што „Лукоил Бургас“ обезбедува до 80% од вкупните количини на гориво, тоа би значело дека земјата може да остане без доволни резерви до крајот на годината. Во Романија, пак, рафинеријата „Петротел“ покрива околу 20% од потребите за гориво, па евентуалното гаснење би довело до благ пораст на цените и краткотрајна нестабилност на пазарот.Дополнително, Молдавија би можела сериозно да биде погодена, бидејќи дел од извозот на гориво од Романија оди токму таму. Владата во Кишињев веќе понуди да ја купи локалната имотна на „Лукоил“ и официјално побара одложување на санкциите од Вашингтон.Сепак, експертите предупредуваат дека наоѓањето нов сопственик ќе биде исклучително тешко. Иако рафинериите се технички добро водени, малку компании се подготвени да преземат ризик поврзан со санкциите, огромните финансиски обврски и високите трошоци за осигурување и модернизација.Според проценките, вредноста на бугарската рафинерија се движи околу 1,5 милијарди долари, додека романската „Петротел“ е помалку привлечна поради долговите и потребата од значителни инвестиции.Истовремено, брзото усвојување на бугарскиот закон за заплена на имотот предизвика критики во јавноста. Опозицискиот пратеник Ивајло Мирчев предупреди дека ваквото дејствување без детална правна процедура „може да доведе до сериозни грешки и меѓународна арбитража“, при што, како што рече, „на крајот на штета ќе биде бугарскиот народ“.Аналитичарите од ЕУ сметаат дека решението треба да се координира на европско ниво, за да се спречи „Лукоил“ индиректно да ги заобиколи американските санкции. Литванскиот министер за енергетика Жигимантас Ваичјунас нагласува дека Европската комисија мора да ги провери сите потенцијални купувачи пред која било продажба, бидејќи, според него, „во овој случај, сите можности мора внимателно да се разгледаат“.

Свет | пред 6 месеци

Блокадата на американската влада стопирала извоз на оружје вреден повеќе од 5 милијарди долари, погодени и НАТО сојузниците

Блокадата на американската влада, која трае веќе 40 дена, го замрзна извозот на американско оружје во вредност од над 5 милијарди долари, наменет за НАТО-сојузниците и Украина, објави порталот Axios.Според извори од Стејт департментот, застојот во работењето на федералните институции има сериозни последици за сојузниците, но и за домашната воена индустрија, која не може да ги испорача договорените системи.„Ова навистина им штети и на нашите партнери и на американската индустрија која треба да обезбеди критични способности во странство,“ изјавил висок функционер на Стејт департментот за Axios.Меѓу земјите засегнати од блокадата се Данска, Хрватска и Полска, а меѓу опремата чија испорака е стопирана се наоѓаат ракетите AMRAAM, системите Aegis, како и HIMARS – мобилни артилериски системи со висок дострел.Иако не се открива кои пратки се наменети за Украина, дел од продажбите на НАТО-сојузниците подоцна се пренасочуваат како воена помош за Киев.Прекинатите трансакции се однесуваат и на државни продажби на оружје, и на лиценци за извоз на приватни американски компании. Под нормални услови, овој процес се одвива рутински, но поради блокадата голем дел од службениците се на принуден одмор, што го парализира системот.Проблемот произлегува од Законот за контрола на извозот на оружје, кој налага Конгресот да ги разгледа сите предлози за продажба на вооружување. Бидејќи дел од службениците кои го известуваат Конгресот не работат, процесот практично е запрен.Одделот за политичко-воени прашања во Стејт департментот моментално функционира со само една четвртина од редовниот број вработени, потврдија американски претставници.Од Стејт департментот тврдат дека демократите ја задржуваат продажбата на оружје, вклучително и кон НАТО-сојузниците, што, како што велат, ја ослабува безбедноста на САД и партнерите.Слична порака испрати и Џејмс Риш, претседател на Сенатскиот комитет за надворешни односи:„Кина и Русија не мируваат. Нивните напори да ги поткопаат САД и нашите сојузници стануваат полесни додека нашата индустрија трпи, а потребите на сојузниците остануваат неисполнети,“ рече Риш.

Свет | пред 6 месеци

(Видео) Елката во Њујорк пристигна – започнува магијата на празниците пред „Рокфелер центар“

Големата божиќна елка пред „Рокфелер центар“ – еден од најпрепознатливите симболи на празниците во светот – денеска официјално пристигна во Њујорк, означувајќи го почетокот на празничната магија во градот кој никогаш не спие.Оваа година, елката е норвешка смрека висока околу 23 метри, донесена од градчето Ист Гринбуш во државата Њујорк. По транспорт од речиси 240 километри, масивното дрво беше поставено на познатото плоштадче пред 30 Rockefeller Plaza, каде што ќе биде украсено со повеќе од 50.000 LED светилки и ѕвезда изработена од кристали „Сваровски“, тешка над 400 килограми.Подготовките за украсување веќе се во полн ек, а официјалната церемонија на вклучување на светилките е закажана за 3 декември. Настанот, како и секоја година, ќе биде проследен со настапи на познати музички ѕвезди и ќе се пренесува во живо низ целата земја.„Овој настан не е само традиција, туку и симбол на надеж, заедништво и светлина во студените зимски денови“, изјавија од управата на „Рокфелер центар“.По завршувањето на празничниот период, елката ќе биде преработена во дрвен материјал и донирана на добротворната организација Habitat for Humanity за изградба на домови за семејства во потреба – практика што е дел од традицијата веќе неколку години.Со пристигнувањето на елката, Њујорк и официјално влегува во најчаробниот период од годината. Илјадници жители и туристи веќе се собираат околу плоштадот за да ја видат елката одблиску и да направат фотографии што ја носат истата порака секоја зима – дека празничниот дух на Њујорк е светлина што никогаш не згаснува.

Свет | пред 6 месеци

Израел: „Нема да има турски војници во Газа“ – Тел Авив ја одби можноста за турско учество во меѓународните сили

Портпаролката на израелската влада Шош Бедросијан денеска категорично ја отфрли можноста турски војници да бидат дел од меѓународните стабилизациски сили кои би ја презеле контролата врз Газа по повлекувањето на израелската војска.„На терен нема да има турски војници,“ изјави Бедросијан, одговарајќи на новинарско прашање за можноста Анкара да има воено присуство во појасот Газа.Планот на американскиот претседател Доналд Трамп за завршување на двегодишниот конфликт во палестинската енклава предвидува формирање привремени меѓународни стабилизациски сили, кои би ја презеле одговорноста за безбедноста и воспоставување ред во Газа.Иако силите сè уште не се формирани, неколку држави бараат нивниот мандат да биде одобрен од Советот за безбедност на ОН.Американскиот амбасадор во Турција, Том Барак, претходно месецов на безбедносна конференција во Манама изјави дека Турција ќе биде дел од тие меѓународни сили, додека потпретседателот на САД, Џ. Д. Венс, нагласи дека Анкара ќе има „конструктивна улога“, но дека Вашингтон нема да му наметнува ништо на Израел кога станува збор за присуство на странски сили на негово тло.Со оваа изјава, Израел јасно става до знаење дека одбива било какво турско воено присуство во Газа, и покрај тоа што Турција претходно изрази подготвеност да учествува во меѓународни мировни мисии на Блискиот Исток.

Свет | пред 6 месеци

Десетици казни за фирми поради неправилно одлагање на отпад

Градоначалникот на Град Скопје, Орце Ѓорѓиевски, соопшти дека акцијата за чистење „72 часа“ се одвива успешно и со полна пареа, со цел главниот град конечно да изгледа чисто и достоинствено.„Акцијата се одвива одлично. Во неа се вклучени повеќе од 2.500 луѓе и над 100 возила, кои работат на расчистување на јавните површини низ сите општини,“ изјави Ѓорѓиевски.Тој нагласи дека целта не е само краткорочно чистење, туку создавање нови стандарди на одговорност и ред во градот, при што апелираше до граѓаните да се однесуваат совесно и да не го фрлаат отпадот на јавни места.„Досега се изречени десетици казни за неколку правни субјекти, а оваа пракса ќе продолжи за секој што го загрозува здравјето на скопјани.Да го чуваме Скопје,“ порача Ѓорѓиевски.Акцијата „72 часа за чисто Скопје“ започна вечерта во петокот и опфаќа механичко и рачно чистење на улиците, плоштадите, парковите и зелените површини низ сите делови на градот.

Скопје | пред 6 месеци

(Видео) Таткото на Надица која загина во „Пулс“ со потресна објава: „Тоа беше последното затворање на вратата…“

Александар Наунов, таткото на трагично загинатата Надица, една од 63-те жртви во пожарот во дискотеката „Пулс“ во Кочани, сподели видео од нејзиното последно заминување од дома — момент кој, како што напиша, засекогаш му го променил животот.„Последното затворање на врататаТоа беше обично затворање на врата…Но за мене – тоа беше последниот здив на мојот свет.Моето дете, мојата Надица, ја затвори вратата со насмевка,а јас не знаев дека зад неа ќе остане нејзиниот живот,заробен во пламен, во неправда, во тишина што нема крај.Наместо да ја чекам со внуци во прегратка,јас ја чекам во соништата – таму каде што не гори.Наместо нејзиниот глас, слушам ехо од болка,наместо чекори по ходникот – тишина што ме гуши.Помина време, но не и мојата болка.Надица, ти остана вечна во моето срце,во секоја свеќа што ја палам, во секоја солза што не престанува.Твоето име ми е молитва, твојот лик – вечна светлина.И додека светот заборава, јас ќе живеам за да те паметам“, напиша Наунов.Потресната порака на таткото ја проследи со видеоснимка направена неколку часа пред трагедијата, на која неговата ќерка се гледа како заминува од домот со насмевка.Во објавата се приклучи и нејзиниот вујко, Дарко Златев, кој напиша:„Мој ангел, моја светлина, моја вечна љубов… засекогаш ќе живееш во мене. Сакам те, вујкино злато мое.“Објавата предизвика лавина емоции и поддршка на социјалните мрежи. Многумина коментираа дека зборовите на Наунов се потсетник дека трагедијата во „Пулс“ не е завршена – таа сè уште живее во болката на семејствата кои изгубија најмилите.

Настани | пред 6 месеци

Во Тетово одржана панел-дискусија „Каква магија се крие зад една петка“ – наставниците се срцето на образованието

Во рамки на националната кампања „Магијата е во знаењето“ на Министерството за образование и наука, денеска во Тетово се одржа третата панел-дискусија под наслов „Каква магија се крие зад една петка – минатото и сегашноста во дуел“.Настанот ја отвори темата за тоа како се менувал образовниот систем низ генерациите, што денес значи успех, и која е улогата на наставникот во време кога технологијата може да објасни сè, но не секогаш да инспирира.Министерката за образование и наука, проф. д-р Весна Јаневска, нагласи дека магијата на наставничката професија е во човечноста, допирот и разбирањето, кои ниту еден уред не може да ги замени. „Во минатото учењето беше трпеливо запишување и помнење, а денес тоа е анализа, селекција и создавање нови идеи. Но и тогаш и сега, вистинската магија ја создава наставникот, кој љубопитноста ја претвора во знаење“, рече министерката, додавајќи дека учителот не носи наметка, но создава магија – магијата на учењето што ја менува иднината.Милка Тримчевска, директорка на Биро за развој на образованието, истакна дека секој ученички успех започнува со наставникот, а Бирото е тука да ја поддржи таа магија преку континуирана обука и менторство.На панелот учествуваа и Даниела Апостоловска од ООУ „Братство – Миѓени“, Сихана Каба Касами од ООУ „Кирил и Методиј“ и Салих Мислими, професор во ОСМУ „Никола Штејн“ – Тетово. Тие преку лични искуства направија паралела меѓу времето кога учењето се одвивало со книги и денешното време на дигитализација, заклучувајќи дека технологијата може да помогне, но само човекот може да инспирира.Панел-дискусијата потсети дека вистинската магија на образованието не е во брзината на пристап до информација, туку во разбирањето и примената на знаењето. Наставниците, и покрај сите промени, остануваат срцето на системот што ја претвора љубопитноста во мудрост, а „петката“ во нешто многу повеќе од бројка.Кампањата „Магијата е во знаењето“ има за цел да ги афирмира наставниците како креатори на промени и двигатели на општествениот напредок, потсетувајќи дека секое знаење започнува со искра инспирација.

Македонија | пред 6 месеци

Запалено возило во Аеродром – изгоре „Сеат Леон“

Ноќеска, 09 ноември 2025 година, во 00:45 часот, во СВР Скопје било пријавено дека на паркинг простор во општина Аеродром било опожарено патничко возило „Сеат Леон“ со скопски регистарски ознаки, сопственост на С.Д. (48) од Скопје, информираат од Министерството за внатрешни работи.Пожарот бил изгаснат од екипи на Бригадата за противпожарна заштита, а повредени лица нема.Од МВР додаваат дека извршен е увид од увидна екипа на СВР Скопје и се преземаат мерки за целосно расчистување на случајот.

Скопје | пред 6 месеци

Возач со „Хјундаи“ удрил полициски службеник во центарот на Скопје

Рано утрово, 09 ноември 2025 година, во 04:35 часот, во СВР Скопје било пријавено дека на крстосницата меѓу улиците „Ленинова“ и „Столтенбергова“ во Скопје, патничко возило „Хјундаи“ со скопски регистарски ознаки, управувано од Д.Д. (38) од Скопје, удрило во полициски службеник кој извршувал службени дејствија, информираат од Министерството за внатрешни работи.При ударот, полицискиот службеник се здобил со телесни повреди, кои биле констатирани во Градската општа болница „Св. Наум Охридски“ во Скопје.Од МВР соопштуваат дека извршен е увид од увидна екипа од СВР Скопје, а по целосно документирање на случајот ќе биде поднесен соодветен поднесок.

Скопје | пред 6 месеци

Возачот кој удри во контејнери и паркирани возила во Аеродром избегал по инцидентот, па го бркале и фатиле

Во саботата, 08 ноември 2025 година, во 22:50 часот, во СВР Скопје било пријавено дека на сервисна улица од ул. „Матеја Матевски“ во Скопје, патничко возило „БМВ 5“ со скопски регистарски ознаки, управувано од М.А.А. (22) од Република Турција, со привремен престој во Скопје, удрило во контејнери и во патничко возило „Алфа Ромео“ со демиркаписки регистарски таблички, информираат од Министерството за внатрешни работи.Возачот го напуштил местото на несреќата, но по преземени мерки од полициските службеници бил наскоро пронајден и фатен.Од МВР додаваат дека по целосно документирање на случајот ќе следува соодветен поднесок.

Скопје | пред 6 месеци

Тепачка по сообраќајно недоразбирање во Аеродром – три лица вмешани во инцидентот

Во саботата, 08 ноември 2025 година, околу 18:00 часот, во СВР Скопје било пријавено дека на подрачјето на општина Аеродром, по претходно недоразбирање во сообраќајот, бил нарушен јавниот ред и мир со физичка пресметка помеѓу Л.Ј. (19), Д.Г. (24) и Г.С. (42) – сите од Скопје, информираат од Министерството за внатрешни работи.Од МВР додаваат дека по целосно документирање на случајот ќе следува соодветен поднесок.

Скопје | пред 6 месеци

Жена пријавила дека била нападната од сопругот во Ѓорче Петров

Во саботата, 08 ноември 2025 година, во 21:30 часот, во СВР Скопје 33-годишна жена пријавила дека околу 15:00 часот, во семејниот дом на подрачјето на Ѓорче Петров, била физички нападната од нејзиниот сопруг Б.А., соопшти Министерството за внатрешни работи.Од МВР информираат дека се преземаат мерки за целосно расчистување на случајот.

Скопје | пред 6 месеци

Жена и малолетен син нападнати од сопругот во скопско село

Во саботата, 08 ноември 2025 година, во 16:30 часот, во СВР Скопје 44-годишна жена пријавила дека околу 11:00 часот во семејниот дом во скопско село, таа и нејзиниот малолетен син биле физички нападнати од нејзиниот сопруг В.В., информираат од Министерството за внатрешни работи.Од МВР додаваат дека се преземаат мерки за целосно расчистување на случајот.

Скопје | пред 6 месеци

Работник од Виница паднал во отворена шахта – пренесен во болница

Во саботата, 08 ноември 2025 година, во 15:55 часот, во ОВР Виница од Итната медицинска помош било пријавено дека кај нив е донесен со повреди Д.Д. (43) од село Градец, виничко, соопштија од Министерството за внатрешни работи.Според пријавата, мажот се повредил поради пад во отворена шахта на неговото работно место, во хидроцентрала во близина на селото Градец, сопственост на правно лице.Повредениот бил пренесен во Општата болница во Кочани, каде му била укажана медицинска помош.Од МВР информираат дека се преземаат мерки за целосно расчистување на случајот.

Македонија | пред 6 месеци