Трамп без јасен став за анексијата на Газа – Нетанјаху најавува целосна окупација

Американскиот претседател Доналд Трамп избегна директно да одговори дали ја поддржува или се противи на најавената намера на Израел да го анектира целиот Појас Газа, јавува Reuters.„Што се однесува на останатото, не можам многу да кажам. Тоа главно ќе зависи од Израел“, изјави Трамп, додавајќи дека фокусот на неговата администрација е насочен кон зголемување на испораката на хуманитарна помош за палестинската енклава.Израелскиот премиер Бенјамин Нетанјаху, пак, во вторникот повтори дека целосното уништување на Хамас останува клучна цел. Во безбедносен состанок посветен на следната фаза од војната, која според израелски извори е „неизбежна“, тој изјави: „Потребно е целосно поразување на непријателот во Газа, ослободување на сите наши заложници и гарантирање дека Газа повеќе нема да претставува закана за Израел. Ниту од една од овие мисии не се откажуваме“.Израелскиот печат, повикувајќи се на анонимни официјални извори, јавува дека Нетанјаху во приватни разговори изразил подготвеност да нареди целосна окупација на Газа, и покрај внатрешниот отпор во редовите на израелската армија.Американскиот претседател Трамп, во меѓувреме, го нарече „страшно“ видеото на кое се гледа израелскиот заложник Евјатар Давид, објавено неодамна од страна на Хамас.Очекувањата во израелската јавност и медиумите се јасни – следува нов бран ескалација, со можен обид за целосна територијална контрола на Газа од страна на Израел.

Свет | пред 9 месеци

Изборната комисија му го одзеде мандатот на Додик – Република Српска пред вонредни избори и институционална криза

Централната изборна комисија на Босна и Херцеговина (ЦИК) едногласно донесе одлука за одземање на мандатот на Милорад Додик, актуелен претседател на Република Српска, откако Судот на БиХ донесе правосилна пресуда со која тој е осуден на една година затвор и шест години забрана за политичко дејствување.Судот пресуди дека Додик одбивал да ги спроведе одлуките на високиот меѓународен претставник Кристијан Шмит, што според измените во законите што Шмит ги наметна, претставува тешко кривично дело. Освен забраната да ја врши функцијата претседател, Додик нема да смее да обавува никаква јавна функција која има допир со јавни средства – што ги вклучува и партиските позиции финансирани од буџет.Адвокатот на Додик, Горан Бубиќ, најави дека ќе бара привремена мерка за стопирање на извршувањето на пресудата. Истовремено, Додик на мрежата X го постави провокативното прашање: „А што ако одбијам?“, со што уште еднаш ја подгреа неизвесноста околу мирната примена на одлуката.ЦИК е должен во рок од 90 дена да распише предвремени избори за нов претседател на РС. Додека меѓународната заедница повикува на почитување на владеењето на правото, раководството на Република Српска веќе најави дека ќе се „бори со сите средства, но не и со сила“ против изборите, повикувајќи граѓаните да не излезат на гласање.Во вакумот што би настанал, функцијата би ја презел потпретседателот Давор Прањиќ од ХДЗ, во јавноста познат како „Хрватот на Додик“, што дополнително ја усложнува ситуацијата.Иако не се исклучени протести на приврзаници на Додик, меѓународните мисии во БиХ се во состојба на зголемена готовност и се проценува дека Република Српска нема капацитет за сериозна институционална побуна или вооружен конфликт. Српската Влада го поддржа Додик и ја оцени пресудата како „неуставна и политички мотивирана“, а поддршка пристигна и од премиерот на Унгарија, Виктор Орбан.Но, внатрешнополитичкото единство е разнишано – опозициските партии во РС, меѓу кои и СДС и Народен фронт, го одбија повикот на Додиковиот СНСД за формирање на влада на национално единство. Партијата ПДП допрва треба да се изјасни.Одбраната на Додик најави дека ќе се жали до Уставниот суд на БиХ и подоцна до Европскиот суд за човекови права во Стразбур, но додека не се донесе поинаква одлука, тој е правосилно осуден и формално отстранет од функцијата.Иако институциите се подготвуваат за избори, клучното прашање останува: ќе се дозволи ли мирен трансфер на власта, или Додик ќе се обиде да ја блокира државата однатре?

Свет | пред 9 месеци

(Видео) Скандалозни скандирања на натпреварот Шкендија – Карабах: собранискиот спикер наместо да осуди, им честиташе на навивачите

Фудбалерите на Шкендија вечерва беа поразени со 1:0 од Карабах во рамките на третото квалификациско коло од Лигата на шампионите. Но, покрај спортскиот резултат, вниманието го привлекоа и инцидентите од трибините.Дел од навивачите на Шкендија игнорираа повиците за фер и спортско навивање и скандираа политички и територијално провокативни пароли како „Голема Албанија“, „Илирида“ и „Чамерија“.Очекувањата се дека Министерството за внатрешни работи ќе реагира по примерот со натпреварот во Куманово, кога беа санкционирани слични појави за време на кошаркарскиот меч со Романија.Натпреварот на трибините на Арената „Тодор Проевески“ го следеа влдини фунционери и вице премиерот Изет Меџити, претседателот на Собранието Африм Гаши, министерот за eкономија Дурмиши, но и опозиционерите Ахмети и Таравари.Наместо осуда, Гаши на „Фејсбук“ им честиташе на навивачите: „Особено им честитам на навивачите, кои беа подеднакво достоинствен пример за нашите национални вредности, внатре и надвор од стадионот“:

Спорт | пред 9 месеци

Обвинителството бара притвор за дилерот од Битола

Основното јавно обвинителство Битола донесе Наредба за спроведување истражна постапка против едно лице за продолжено кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 во врска со член 45 од Кривичниот законик.-Осомничениот од октомври 2024 се до почетокот на овој месец, неовластено продавал наркотична дрога на повеќе лица-сведоци. На 4 август полицијата извршила претрес во неговиот дом и други простории. Во мопедот паркиран пред домот и во објект во непосредна близина кој не се користи полициските службеници пронашле вкупно 16,21 грама марихуана и 10,44 грама амфетамин. Дрогата била спакувана во повеќе помали пакувања наменети за натамошна продажба и скриена во различни предмети. Јавниот обвинител, оценувајќи дека се исполнети законските основи, до судијата на претходна постапка достави предлог за определување мерка притвор за осомничениот, се наведува во сооштението.

Македонија | пред 9 месеци

ВМРО-ДПМНЕ бара оставка од Коцевски: „Обвинителот е дискредитиран и без легитимитет“

ВМРО-ДПМНЕ повторно го повика државниот јавен обвинител Љубомир Коцевски да поднесе оставка, оценувајќи дека е целосно делегитимиран и дискредитиран како личност што треба да ја брани правдата.Во партиското соопштение се наведува дека Коцевски ја изгубил довербата од јавноста, бидејќи, како што се посочува, не отвора предмети, не гони криминал и држи истраги „во фиока“. Оттаму додаваат дека довербата на граѓаните во правосудството е падната под 2 проценти, токму поради неговото однесување.„Коцевски е делегитимиран и од Собранието. Со негласањето на интерпелацијата од страна на СДС се докажа меѓусебната заштита помеѓу тие што го поставија – од Струмица и Мала Речица – и потребата од негово останување на функцијата за да ги заштити од одговорност функционерите на СДС и ДУИ“, наведуваат од ВМРО-ДПМНЕ.Од партијата прашуваат „со што се задолжил Коцевски кај СДС и ДУИ“ за да останува на функцијата и покрај делегитимирањето, како и „дали му значат повеќе личните интереси од правдата и владеењето на правото“.„Импресивно е како Коцевски балансира помеѓу улогата обвинител и верен потрчко на Заев и Филипче. Очигледно правдата е на одмор, а срамот кај Коцевски е отсутен“, се наведува во соопштението.Според ВМРО-ДПМНЕ, државниот јавен обвинител не постапува ниту по предмети со јавни докази за криминал и корупција, поради што, велат, треба да ја прими пораката од народот и од парламентот и да се повлече.„На Македонија ѝ се потребни реформи и целосна трансформација на правосудниот систем“, порачуваат од партијата.

Македонија | пред 9 месеци

Стартуваше обуката за идните пожарникари – интересот послаб од очекувањата

Во организација на Дирекцијата за заштита и спасување, започна обуката за кандидатите кои се пријавија на јавниот повик на Владата за ангажирање пожарникари, со цел јакнење на капацитетите за превенција и справување со пожари.Како што информира директорот на ДЗС, Стојанче Ангелов, сите кандидати кои го поминале процесот на селекција ги исполнувале бараните услови, а по завршување на обуката ќе бидат распределени таму каде што има најголема потреба.Претседателот на Противпожарниот сојуз посочи дека обуките, покрај во Скопје, се одржуваат и во уште 12 други градови низ земјава, каде се обучуваат вкупно 364 лица, кои по завршување на процесот ќе бидат испратени во општините од каде што доаѓаат.Оваа обука следува по владиниот оглас за нови 400 пожарникари, но интересот беше под очекувањата, во Скопје, каде беа потребни 80 пожарникари, пристигнале само 50 апликации. Ниската плата, која изнесува околу 24.000 денари, се смета за една од причините за слабиот интерес.

Македонија | пред 9 месеци

Мистериозна смрт во Кавадарци: 42-годишен маж пронајден мртов, се сомнева на убиство

Тело на 42-годишен маж било пронајдено во помошни простории од куќа во Кавадарци, при што првичните наоди упатуваат на можноста за насилна смрт. Телото било прекриено со земја и разни предмети, што ја зголемува сомнителноста околу причините за смртта.На терен излегол дежурен јавен обвинител од Основното јавно обвинителство Кавадарци, кој заедно со полициски екипи извршил увид и издал наредба за обдукција на починатиот.Според информациите, мажот живеел сам, а неговото семејство неколку дена безуспешно се обидувало да воспостави контакт со него.Од местото на настанот се подигнати траги и материјални докази кои ќе бидат подложени на вештачење, а надлежните органи преземаат дополнителни мерки и активности за целосно расветлување на случајот и откривање на можниот сторител.

Македонија | пред 9 месеци

Се разбудил по операцијата, но има проблеми со говорот: Српскиот министер Дарко Глишиќ во критична состојба

Министерот за јавни инвестиции на Србија, Дарко Глишиќ, се разбуди по сложената операција што ја претрпе по мозочниот удар, но и натаму се наоѓа во критична состојба, соопштија српските здравствени власти. Тој е свесен, но има сериозни проблеми со говорот.Глишиќ доживеа мозочен удар во текот на вчерашното утринско гостување во живо на ТВ Пинк. По итна интервенција во Клиничкиот центар на Србија, министерот за здравство Златибор Лончар изјави дека првите 24 часа се клучни за неговото закрепнување.„Интервенцијата траеше подолго од планираното, но успешно го решивме најголемиот проблем – блокадата на крвниот сад што води кон мозокот, поточно до говорниот центар. Истовремено имаше тромб и крварење, што дополнително ја усложни состојбата. Сега е на респиратор, на одделението за интензивна нега, каде што продолжува борбата за неговиот живот“, изјави Лончар.Тој нагласи дека се работело за исклучително комплексна процедура во која биле вклучени неколку медицински тимови. Дополнително, кај пациентот биле забележани и други проширени крвни садови со присуство на тромбна маса која исто така предизвикала крварење.„Причината за мозочниот удар е елиминирана, но телото сега треба да се избори со последиците. Не даваме прогнози – секој час е борба“, додаде Лончар.

Свет | пред 9 месеци

(Видео) Кој е убиецот од болницата во Бардовци: Слободно шетал, пиел по кафеани, снимал насилство

Убиецот Димитар Спасов, кој пред 13 години ја уби мајка му, сега усмрти осуденик со кој престојувал во психијатриската болница „Скопје“ во Бардовци. За морбидниот чин искористил стаклено шише, а до инцидентот, според информации на „Скопје1“ дошло по кавга за легло. Во кругот на болницата, убиецот е познат како проблематичен пациент, со кој тешко се справувале и вработените.Но и покрај ова, подолго време, Спасов бил гледан и низ Ѓорче Петров, што укажува дека тој слободно и без надзор ја напуштал установата. Иако бил чуван од полиција, истата била повлечена од правосудните органи, па тој слободно излегувал и се враќал во болницата. Низ скопските улици бил забележан со уште еден хоспитализиран пациент во Бардовци, кој исто така извршил убиство на член на неговото семејство.За насилното однесување, сведочат и снимките кои сам ги споделувал, каде повикува друго лице на физичка пресметка, за да му покажел, како што вели, како тој мава боксови.Друга снимка пак сведочи како на друг цимер му дава насоки да претепа хоспитализиран пациент. Се слуша „не го тепај, отепај го, по славина, по ребра, во глава“.Во установата пак, слободно консумирале и алкохол, што значи дека не им бил забранет. Според извори на „Скопје1“, имало и поплаки од него и неговото однесување. Вработени се жалеле дека добивале закани по нив, но и по нивните семејства, дека ќе им наштети доколку не му ги исполнат желбите.Дека функционирал слободно, сведочат и неговите профили на социјалните мрежи. Дури, седел и по кафеани, со ракија и салата пред него. Нема еден, туку два профили на „Фејсбук“.Овие објави и негови дејствија го отвораат прашањето за тоа дали неговиот третман требало и треба да продолжи во психијатриската болница, но и дали околината е безбедна доколку тој по првото убиство шета слободно, споделува насилни содржини, има пристап до социјални мрежи, а од неговото однесување има поплаки.За потсетување, Спасов ја уби сопствената мајка на 23 годишна возраст, која работела како хигиеничка. По убиството се огласи на „Фејсбук“ каде напиша „Фала ви на сите, г...а, еве ви ја, ја заклав, ја угушив“.Во психијатриската болница „Скопје“ во Бардовци, Спасов е сместен уште од 2012 година. Првата одлука за ваков третман ја донесе велешкиот суд, откако психијатри од Клиничкиот центар во Скопје го прогласија за непресметлив. Според вештите лица, Спасов во моментот на убиството на мајка му, бил во параноична халуцинирачка состојба.По убиството на пациентот, тој и натаму е во болницата, затворен во собата каде го изврши злочинот. Жртвата на Спасов, е лице со иницијали И.Т., чие тело е предадено на обдукција.

Скопје | пред 9 месеци

Костовски: Д-р Никола Божиновски е нов претседател на Советот на Општина Бутел, убеден сум дека ќе имаме одлична соработка

„Д-р Никола Божиновски е нов пртетседател на Советот на Општина Бутел“, напиша Дарко Костовски во неговата фејсбук објава и додаде:Д-р Никола е специјализант ЈЗУ Универзитетска Клиника. Никола живее во Бутел 2, пред се станува за добар млад човек. Тој добро ја познава душата на Општина Бутел, неколку години работеше и како матичен лекар во Бутел. Слободно можам да кажам дека беше исклучително омилен кај своите пациенти.Д-р Никола е човек со изграден карактер, човек со интегритет, на посебен начин ја доживува Македонија, особено Општина Бутел.Нашата Општина може да се гордее со вакви квалитетни млади луѓе.Докторе, убеден сум дека ќе имаме одлична соработка, не чека многу работа, покажавме дека можеме и знаеме. Тек допрва доаѓаат најголемите работи.Искрено сакам да му се заблагодарам на досегашниот претседател на совет д-р Игор Николов за одличната соработка. Тој веќе е избран за амбасадор во Р. Франција. Честитки.

Слајдер | пред 9 месеци

Кривична пријава за две лица од Скопје, изнудиле 300.000 евра од кумановец во период од осум години

Одделот за сузбивање на организиран и сериозен криминал денеска (05.08.2025) до Oсновното јавно обвинителство за гонење на организиран криминал и корупција поднесе кривична пријава против Ш.М. (34) и Ф.М. (37), двајцата од Скопје, поради постоење на основано сомнение за сторено кривично дело „изнуда“ по чл.258 ст.3 од Кривичен законик.Во временски период од осум години, Ш.М. и Ф.М. од оштетено лице од Куманово, изнудувале пари, при што континуирано му упатувале сериозни закани врз неговиот и животот на неговата фамилија, со што прибавиле противправна имотна корист во вредност од 300.000 евра.Во наведениот временски период оштетениот од Ш.М. земал 30.000 евра договарајќи се секој 1-ви во месецот да му исплаќа камата од 16%, при што до сега во повеќе наврати преку брз трансфер на пари, но и лично на Ш.М. му исплатил вкупно околу 300.000 евра.На 04.08.2025, врз основа на претходен договор меѓу Ш.М. и оштетениот, тие се сретнале во кафе бар во склоп на бензинска пумпа во Куманово, каде оштетениот му дал на Ш.М. 2000 евра, по што Ш.М. е лишен од слобода, а при извршен преглед на лицето, кај него се пронајдени парите.Врз основа на издадена наредба од судија на претходна постапка од Основен кривичен суд Скопје, извршен е претрес во куќа каде престојуваат Ш.М. и Ф.М., при што е пронајдена документација поврзана со кривичното дело.

Скопје | пред 9 месеци

МВР апелира за фер и спортско навивање, а било какви навреди ќе бидат најстрого санкционирани

Министерството за внатрешни работи апелира до сите граѓани и членови на навивачки групи да ги бодрат своите спортски миленици, но да навиваат спортски, исклучиво во спортски дух, без говор на омраза, без било какви навреди по лична, етничка, верска или било која друга припадност што не соодветствува на спортски натпревари и е спротивно на законот.Во врска со кошаркарскиот натпревар што се одржа на 02.08.2025 во Спортската сала во Куманово, во СВР Куманово веќе се повикани неколку осомничени лица со кои што е извршен службен разговор, и по извршени анализи во координација со ОЈО Куманово ќе бидат преземени конкретни законски мерки против инволвираните лица, вклучително и кривични постапки. Денеска, полициски службеници од СВР Куманово го лишија од слобода С.М. (30) од Куманово, кој се сомничи дека на полувреме од кошаркарскиот натпревар се обидел да внесе транспарент со навредлива содржина. По целосно расчистување на случајот против него ќе следи соодветен поднесок.Во тој контекст, МВР уште еднаш нагласува дека во рамки на обезбедувањето на мирни и непречени спортски натпревари, полицијата ќе биде крајно ригорозна по однос на било какви нарушувања на јавниот ред и мир, односно било какви навредливи скандирања врз база на национална, етничка или верска припадност и тоа ќе биде најстрого санкционирано, без никаква толеранција. Само спортското фер навивање и бодрење може да ни донесе успеси, победи и спортски радости.

Македонија | пред 9 месеци

Продавал билети за концерт што не постоел, кривична пријава за Скопјанец

Секторот за компјутерски криминал при Министерството за внатрешни работи поднесе кривична пријава против 25-годишен скопјанец, кој преку веб страница продавал билети за концерт што никогаш не бил планиран ниту договорен. Според МВР, осомничениот не им ги вратил парите на оштетените граѓани, а се товари за кривично дело „компјутерска измама“.-Денеска (05.08.2025) Секторот за компјутерски криминал при МВР до ОЈО Скопје поднесе кривична пријава против А.Х. (25) од Скопје за сторено кривично дело „компјутерска измама“ по чл.251-б од Кривичниот законик. А.Х. во периодот од 04.04.2025 до 13.06.2025 како одговорно лице на компанија која организира музички настани, преку веб страница за продавање на билети овозможил електронско купување на билети за концерт кој воопшто не бил предвиден да се одржи, односно не бил склучен никаков договор за негово одржување, со што ги довел лицата во заблуда да купат билети за концертот и притоа не ги рефундирал парите, соопѓти МВР.Секторот за компјутерски криминал во рамки на утврдениот делокруг на надлежности, продолжува активно да спроведува мониторинг на содржините на социјалните мрежи и целокупниот интернет простор, со цел превенција на повикување на насилство, загрозување на сигурноста, ширење на расистички и ксенофобичен материјал по пат на компјутерски систем, злоупотреба на лични податоци и говор на омраза со елементи од кривични дела за кои се постапува по службена должност.

Скопје | пред 9 месеци

Македонија може да остане без 13 сеизмолошки станици, МОН најавува можно решение преку научен проект

Ако не се обезбедат средства и нова опрема, државата од почетокот на 2026 година ризикува да остане без телеметриската мрежа од 13 сеизмолошки станици што ја покриваат територијата на цела Македонија и пограничниот регион. Причината – истекувањето на меѓународниот проект AdriaArray, по чие завршување германската влада ќе ги повлече инструментите со кои во моментов се врши мониторингот на сеизмичката активност.Со ова, Сеизмолошката опсерваторија при Природно-математичкиот факултет во Скопје ќе остане без функционална опрема, а мрежата за следење земјотреси во реално време ќе биде практично нефункционална. Институцијата веќе алармираше за тешка состојба, поради недостиг на опрема, кадар, софтвери и сеизмометри.Министерката за образование и наука, Весна Јаневска, денеска изјави дека постои надеж оти преку тековен конкурс за научно-истражувачки проекти може да се обезбедат барем дел од неопходните средства.– „Ова прашање е актуелно и е многу значајно бидејќи ние сме трусно подрачје. Германската влада ќе си ги повлече инструментите затоа што завршува проектот“ – изјави министерката на денешната прес-конференција.Таа додаде дека веќе неколку пати имала средби со директорката на Сеизмолошката опсерваторија и разговарале за можностите за решавање на проблемот.– „Односно да се обезбедиме, тоа не е помош, тоа е сигурност на сите граѓани на оваа земја. Јас сум многу среќна што кога ги разгледував апликациите на научно-истражувачките проекти, видов дека Сеизмолошката опсерваторија конкурирала на овој конкурс и, според информациите кои ги добивам од комисијата, многу се големи изгледите тие и да го добијат овој проект, со што ќе се обезбедат дел од средствата за да се набават одреден број инструменти. Ако тоа биде така, не можам да прејудицирам, но се надевам дека ќе биде така, малку од малку нешто ќе покриеме, а потоа продолжуваме да го решаваме проблемот за кој сметам дека ургентен и многу значаен“ – рече Јаневска.Организацијата ORFEUS, која стои зад проектот AdriaArray, од 2023 година инсталираше 13 привремени сеизмолошки станици во земјава. Мисијата е насочена кон подобро разбирање на движењата на Јадранската микроплоча и следење на сеизмичноста во регионот и глобално. Но, веќе во март 2026 година тие ја напуштаат Македонија и продолжуваат во други земји.Опсерваторијата предупредува дека за минимално ниво на сеизмички мониторинг во реално време потребни се барем десет нови станици, лиценциран софтвер и модерна компјутерска опрема. Во моментов, дополнителен сеизмички надзор се врши и на стратешки точки – браните Козјак и Св. Петка, како и на локацијата Белица кај Кнежево.

Македонија | пред 9 месеци

Погребна церемонија за Душко Чифлиганец во среда – останките изложени во храмот во Аеродром

Семејството Чифлиганец соопшти дека посмртните останки на починатиот Душко Чифлиганец ќе бидат изложени на 6 август (среда) во 14 часот во храмот „Св. Јован Крстител“ во општина Аеродром.Опелото ќе го водат свештени лица предводени од Поглаварот на МПЦ-ОА, Архиепископот Охридски и Македонски г.г. Стефан.Душко Чифлиганец, познат македонски бизнисмен и заменик-претседател на „Адора Бизнис Групација“, загина на 3 август 2025 година по сериозна повреда од пад со мотор на трка во Брно, Чешка.Со хеликоптер е веднаш пренесен во медицинскиот центар во Брно во критична состојба и им подлегнал на повредите наредниот ден.

пред 9 месеци

Крвава тепачка во Бардовци, осуденик со стаклено шише усмртил друг осуденик!

Ноќеска се случила тепачка меѓу две лица во Психијатриската болница Бардовци, по што едно од нив починало во болница заради повреди здобиени од убоди од стаклено шише, соопшти Министерството за внатрешни.„На 05.08.2025 во 01:38 часот во СВР Скопје било пријавено дека околу 00.50 часот во Јавната здравствена установа „Психијатриска болница Скопје “ во Бардовци, во соба на судскиот оддел, настанала физичка пресметка помеѓу осудениците Д.С.(35) од Неготино и И.Т.(62) од с.Љубанци, скопско. Притоа, од ударите со стаклено шише И.T. паднал во бесознание, по што бил пренесен во Ургентен центар при Комплекс клиники „Мајка Тереза“, каде што во 02.20 часот починал. Лекар констатирал смрт, а по наредба на јавен обвинител телото на починатиот било дадено на обдукција.Д.С. е задржан во собата каде се случил настанот. Имено, Д.С. е осудено лице за сторено кривично дело „убиство“, додека И.Т. бил осуден за кривично дело „семејно насилство“. По целосно расчистување и документирање на случајот, ќе биде поднесена соодветна пријава“, стои во соопштението на МВР.

Скопје | пред 9 месеци

Tошковски: Опасното возење за слава на мрежите ќе биде санкционирано

„Нема храброст во ризикување животи за неколку секунди внимание“ – со оваа порака министерот за внатрешни работи Панче Тошковски реагираше по објавувањето на видео на кое се гледаат млади лица како се возат на хауба од автомобил што се движи со голема брзина низ скопските улици.Случајот предизвика силна реакција во јавноста, а МВР веднаш презеде мерки и ги идентификуваше лицата вклучени во опасното возење.-Нема храброст во ризикување животи за неколку секунди внимание на социјалните мрежи.Овој случај нека биде потсетник дека секое непромислено однесување ќе биде санкционирано, напиша министерот.

Македонија | пред 9 месеци

Инцидентот во Куманово стигна до ФИБА – стартува истрага против МКФ

Светската кошаркарска федерација (ФИБА) поведе истрага против Македонската кошаркарска федерација поради националистичките скандирања што се случија за време на натпреварот меѓу Македонија и Романија, кој се одигра во саботата во Куманово.Како што соопштија од ФИБА, во моментот се прибираат сите релевантни извештаи поврзани со инцидентот, а федерацијата е во постојана комуникација со националните кошаркарски тела, локалните институции и органите за спроведување на законот.Неприфатливото однесување на дел од публиката беше остро осудено од страна на Македонската кошаркарска федерација, Министерството за спорт, како и од политичките претставници во земјата. Министерството за внатрешни работи, пак, веќе презема мерки за идентификација и санкционирање на сторителите.

Македонија | пред 9 месеци

Импресивен роденденски концерт на „Охридско лето“ со ангелскиот глас на Ана Дурловски

Со ангелскиот глас на првенката на Македонската опера и балет, сопранот Ана Дурловски која настапи во придружба на ерменско-германската пијанистка Анахит Тер-Татшатјан, вчеравечер пред многубројна публика во црквата „Света Софија“ беше одбележан 65. роденден на фестивалот „Охридско лето“.Директорот на НУ „Охридско лето“, Ѓорѓи Цуцковски, честитајќи им го роденденот на вработените во оваа национална установа, но и на сите претходни директори и уметнички селектори кои се вградиле во успешната фестивалска приказна, порача, идните генерации внимателно да се грижат за оваа врвна установа која, како што додаде, претставува енциклопедиско национално богатство и редок пример за одржување на трајните вредности.-Вечерва првпат се враќаме на корените, онака како што е формиран овој бесценето реномиран и општествено важен фестивал, во далечната 1961 со концерт на македонската оперска првенка Ана Липша-Тофовиќ, а денес со концерт на најреномираната македонска пејачка Ана Дурловски, овде во оваа света црква, под оваа божествена акустика. Ана, благословена со уникатна боја на гласот и магнетно сценско присуство допира до најпрестижните оперски и концертни сцени во светот. Виенската државна опера, Метрополитен опера во Њујорк, Дојч Опера Берлин... се само дел од престижните институции каде Ана со себе носи дел од нашата татковина и претставува вистински културен амбасадор, рече директорот Цуцковски.Со својата колористичка перфекција и префинетост, сопранистката Ана Дурловски пееше инспиративно, со душа и срце, суверено владеејќи со подиумот во катедралната црква „Света Софија“.-„Охридско лето“ е симбол на нашиот културен идентитет, на нашата духовна енергија. За секој уметник што настапува тука е како средба со историјата, со традицијата, со оваа енергија што ја има овој град. За мене е огромна чест и поттик да бидам уште подобра и одговорност да се носам со тежината на еден ваков фестивал. Неколку пати сум настапувала на фестивалот и можам да кажам дека моите почетоци на некој начин се на овој фестивал. Уште како студент во четврта година, ја имав честа, круна на моето дипломирање да биде заокружено со целовечерен концерт во црквата „Света Софија“, рече националниот уметник Ана Дурловски.Традиционалниот роденденски коктел за сите што вчеравечер го проследија импресивниот концерт на извонредните уметници, го организира Винарската визба „Тиквеш“, еден од ексклузивните и долгогодишни спонзори на фестивалот „Охридско лето“ која годинава одбележува 140 години од своето постоење.Приказната „Охридско лето“ која низ годините прерасна во една од најзначајните музичко-сценски манифестации во Европа и регионот започна токму на 4. август 1961 година под акустичните сводови на црквата „Света Софија“ со концерт на оперската примадона Ана Липша-Тофовиќ и нејзиниот пијано соработник Ладислав Перлдик.Оттогаш наваму во оваа успешна приказна се вградиле бројни уметници од целиот свет, збогатувајќи ја фестивалската историја со незаборавни концерти и театарски претстави.

Охрид | пред 9 месеци

Трагедија во Алјаска: Загина млад Бугарин, тешко повредена Македонка по судир со елен

Едно лице го загуби животот, а друго е тешко повредено во сообраќајна несреќа што се случила во раните утрински часови во близина на влезот на Националниот парк и резерват Денали во Алјаска.Несреќата се случила во петокот, на 1 август, околу 1 часот по локално време, на патот Денали Парк, во близина на 235-та милја од автопатот Џорџ Паркс (познат и како автопат Паркс), јужно од влезот на паркот.Според информациите на Националната служба за паркови, 24-годишен државјанин на Бугарија управувал со возилото кога удрило во елен. Тој починал на самото место.Во возилото се наоѓала и 24-годишна девојка од Македонија, која со тешки повреди била пренесена во болница во Фербанкс, на околу 190 километри оддалеченост.Од Националната служба за паркови изјавија дека овој трагичен случај е „тежок потсетник на опасностите што ги носи присуството на диви животни на патиштата во Алјаска“, особено во раните и доцните часови кога лосовите, карибуите и други крупни животни се најактивни и често тешко видливи.Службата додаде дека е во координација со бугарската амбасада за да ги извести најблиските роднини на починатиот, по што ќе биде објавен неговиот идентитет.фото: Unsplash

Македонија | пред 9 месеци

(ВИДЕО) Српскиот министер Дарко Глишиќ доживеал тежок мозочен удар во емисија во живо

Гостувањето на српскиот министер за јавни инвестиции, Дарко Глишиќ, во утринската програма на телевизијата Пинк заврши со нагло прекинување на емисијата, откако му се слоши додека беше во живо вклучување.Во еден момент, Глишиќ започнал нејасно да зборува, не успевајќи да состави реченица, што предизвикало загриженост кај водителите, кои неколку пати го прашале дали се чувствува добро. Откако не добиле јасен одговор, програмата веднаш била прекината, а министерот бил итно префрлен во болница.Според неофицијални информации, постои сомневање дека Глишиќ доживеал тежок мозочен удар. Набргу по хоспитализацијата, во болницата пристигнал и претседателот на Србија, Александар Вучиќ, со кого министерот важи за еден од најблиските соработници.Дарко Глишиќ е член на Српската напредна партија од нејзиното основање, а од 2016 година ја води Извршната комисија на СНС. Министерската функција ја извршува од мај 2024 година.Во продолжение – видеото од драматичниот момент во студиото.

Свет | пред 9 месеци

Случајот „Секјуриком“ застарува за помалку од месец – Доневски и Гампер на чекор до конечна слобода, Апелација решила да не им ги конфискува милионите

Ексдиректорот на Службата за општи и заеднички работи Васе Доневски и сопственикот на „Секјуритиком“, Волфганг Гампер, против кои се водеа постапки за злоупотреби, за 26 дена, односно од септември, ќе бидат слободни граѓани. На судовите не им беа доволни седум години за да донесат правосилна судска одлука, па додека предметот се шеташе на релација Кривичен-Апелација, делата им застаруваат. Доневски и Гампер беа гонети за местење на тендер, односно злоупотреба на службена положба и овластување. Обвинението им беше поднесено во март 2018 година, а сега, предметот е пред Врховен суд, кој има нецел месец да одлучи, пред истиот да застари. Предметот две години седел во фиоките на Апелација, без да биде одлучен. Кога судиите решиле да одлучат по предметот, донеле одлука со која ги ослободиле осомничените, а решиле и да не се конфискува ниту имотот.„Во повторената судска постапка на  8.2.2023 година  е донесена пресуда  со која двајцата ги добиваат прво изречените казни, но сега  со пресудата се конфискува имот и парични средства во вредност од 480.487.402 денари од двајцата обвинети, како и од правното лице Друштвото за обезбедување и услуги „Секјуриком Мултисервис Интернационал“ ДОО Скопје. Против оваа пресуда осудените вложиле жалби и во јуни 2023 година предметот е доставен до Апелациониот суд Скопје да решава по истите. Постапувајќи по жалбите, Апелациониот суд Скопје повторно ја укина пресудата и одлучи да закаже главна расправа.  Главната расправа во Апелациониот суд беше закажана на 10.7.2025 година и по изведување на доказите и извршено советување и гласање, на 14.7.2025 година е донесена пресуда со која двајцата осудени се ослободени од обвинение и не е досудена ниту конфискацијата што беше утврдена со пресудата на првостепениот суд“, велат од Обвинителството за „Скопје1“.Побаравме одговори и од Апелација, зошто предметот две години седел во фиока и не бил одлучен, а сега, судиите од Врховен се во трка со времето, пред тој да застари. Оттаму не добивме никакво објаснување, туку одговор кој гласи: „Согласно евиденцијата на Судот, бил заведен предмет, во кој како обвинети се јавуваат гореименуваните лица. Жалбената постапка во целост е завршена и предметот со сите списи е доставен до првостепениот суд на ден 21.07.2025 година“.Доневски и Гампер беа гонети дека свесно ги пречекориле границите на службеното овластување со цел да прибават имотна корист за газдата на фирмата и самата фирма. Па според обвинителот, договориле спроведување на постапка за јавна набавка за одржување на хигиена, дактилографија, противпожарна опрема. Без спроведување на технички дијалог изготвиле записник, а ексдиректорот на СОЗР не ја поништил постапката, туку ја фаворизирал фирмата. Обвинителството тврди дека буџетот е оштетен за над 10 милиони евра.Ако се следи целата постапка, може да се види дека првостепената судска одлука на Кривичен суд била донесена во јануари 2021 година, а Васе Доневски е осуден на затвор од три години, додека Гампер во отсуство е осуден на пет години затвор.Апелација веќе во септември истата година ја укинува пресудата и предметот го враќа на повторно одлучување. Кривичен суд го суди случајот нови две години и во февруари 2023 година одлучува да ги одреди истите казни за обвинетите, но овојпат, одредува и конфискување на имотот и парите од двајцата обвинети, како и од „Секјуриком“.Предметот е пак во рацете на судиите во Апелација од јуни 2023 година. Во октомври истата година, Апелација ја укинува пресудата и закажува јавна расправа, која се одржува две години подоцна во јули 2025 година. Судиите носат одлука да ги ослободат обвинетите, како и да не им се конфискува имотот. Сега предметот е во рацете на Врховниот суд, чија одлука се очекува.Предметот требало да се води по скратена постапка, а со оглед дека од септември 2023 година се донесени измени на Кривичниот законик со кои е изменето и кривичното дело за кое се гонат двајцата обвинети, а пропишаната казна е до пет години затвор.

Македонија | пред 9 месеци

Ако Меџити стане градоначалник на Чаир, Сали ќе го замени како вицепремиер

Во рамките на коалицијата Вреди постигнат е договор – доколку Изет Меџити победи на локалните избори и ја преземе функцијата градоначалник на Општина Чаир, неговото место како прв вицепремиер ќе го заземе Беким Сали.Како што изјави Меџити за медиумите, партнерите во коалицијата се усогласиле дека Сали, кој претходно беше министер за здравство, е најсоодветен кадар за таа позиција – со искуство, подготвеност и стручност потребна за функцијата.Во меѓувреме, премиерот Христијан Мицкоски посочи дека и покрај најавената кандидатура на Меџити за градоначалник, тој ќе продолжи со извршување на своите актуелни обврски.

Македонија | пред 9 месеци

(Видео) Најдени се лицата кои возеа лудо низ Ѓорче: 19-години има лицето качено на хауба, поднесени пријави

По појавувањето на видео запис на социјалните мрежи на кој се гледа како лице стои на хауба од движечко возило без регистарски таблици, Министерството за внатрешни работи веднаш презело мерки за идентификација и санкционирање на вклучените.Како што информираат од МВР, по преземените активности, лицата се идентификувани и со нив е извршен службен разговор. Против нив ќе бидат поднесени соодветни поднесоци согласно Законот за безбедност на сообраќајот на патиштата и Законот за возила.Возачот С.З. (20) од Скопје се товари за: превезување лице на надворешен дел од возило (член 167 став 2), управување возило без возачка дозвола (член 225 став 9), управување нерегистрирано возило (член 26 став 10 од Законот за возила).Р.Ѓ. (19), лицето што стоеше на хаубата, ќе одговара за: дозволување управување возило на лице без дозвола (член 317 став 14), загрозување на сопствената безбедност (член 165 став 2).Од СВР Скопје најавуваат и дополнителни мерки за целосно расчистување на случајот, апелирајќи до граѓаните за одговорно однесување во сообраќајот и почитување на законските прописи.

Македонија | пред 9 месеци

Заплена на луксузни возила во Струга по гласна бучава – одземени се пет автомобили, интервенција на полицијата

Струшката полиција синоќа интервенирала по дојава за нарушен јавен ред и мир предизвикан од голема бучава на паркинг во градот. Според информациите објавени од Министерството за внатрешни работи, на терен биле затекнати повеќе од 500 лица и околу 120 спортски и луксузни возила. Присутните не постапиле по наредбите на полицијата, па биле повикани засилувања, а ситуацијата била ставена под контрола.Одземени пет возила во Струга поради преголема бучава, преземени и други мерки по ЗБСПДенеска (05.08.2025) во периодот од 00:30 до 02:00 часот, постапувајќи по претходна пријава дека на паркинг во Струга бил нарушен јавниот ред и мир од повеќе лица со бучава од возила, полициски службеници презеле повеќе мерки по Законот за безбедност на патниот сообраќај.Веднаш по пријавување на случајот, полициски службеници од Полициското одделение за безбедност на патниот сообраќај Струга излегле на местото и затекнале повеќе од 500 лица и околу 120 спортски и луксузни возила, кои наводно изведувале изложба. Лицата не постапиле по наредбите на полициските службеници, по што биле ангажирани дополнителни служби и состојбата била ставена под контрола.Притоа, биле одземени пет возила по член 344 од Законот за безбедност на патниот сообраќај, а биле констатирани и осум други прекршоци од ЗБСП. По целосно расчистување и документирање на настанот, ќе бидат поднесени соодветни поднесоци.

Македонија | пред 9 месеци